کٛلٛوسِيَنْکٛعٜنْ

طٜرٜوٛلْ نغٛلْ بُلُسْ وِنْدَنِ

کٛلٛوسِيَنْکٛعٜنْ

حَبَرُ دٛوْ طٜرٜوٛلْ نغٛعٛلْ

بُلُسْ لِلَاطٛ يٜىٰسُ اَلْمَسِيحُ وِنْدِ طٜرٜوٛلْ نغٛعٛلْ دُوٻِ 60 غَطَ دَݧْنغٛلْ يٜىٰسُ؞ اٛ وِنْدَنْغٛلْ تٛکُّٻٜ يٜىٰسُ وٛنْٻٜ غَرِيرِ کٛلٛوسِ نغٛنْدِ ندٜرْ لٜيْدِ اَاسِيَ ڤَمَرْدِ، فُونَ اَافِسَ؞ ٻٜعٜ تٛکُّٻٜ يٜىٰسُ نَاع بُلُسْ اَرْتِ يَارَنْکِٻٜ حَبَرُ بٜلْطُمْ، اَمَّا اٛ يِعِي اٜ حَانِ اٛ وَلَّٻٜ، سٜيْ اٛ لِلْدَنِٻٜ وَعَجِنٛوٻٜ دَغَ لٜيْدِ اَافِسَ؞ اٛ نَنِي حَبَرُ اٜ وٛودِ مٛودِٻّٜ فٜوْرٜ ندٜرْ مَٻّٜ اٜ ٻٜ مبِعَ تٛ نٜطّٛ اٜ يِطِ اَنْدَ اَللَّه حِسَ، دٛولٜ مَوْنِنَ وٛٻّٜ مَلَاعِکَعٜنْ اٜ غِنِّ اٜ غٛطِّ لَامُوجِ غٛنْطِ دٛوْ اٜ لٜيْ، ندٜنْ تٛکَّ غٛطِّ ندٛنُوجِ بٛ نَادُکِ اٜ دٛوکَاجِ دٛوْ ݧَمْندُ اٜ کُوطٜ فٜىٰرٜ‑فٜىٰرٜ؞

بُلُسْ وِنْدِي طٜرٜوٛلْ نغٛعٛلْ نغَمْ حٛلَّ اٜکِّتِنٛلْ نغٛلْ تٛکَّايِ لَاوٛلْ، اٛ حٛلِّٻٜ اِرِ اٜکِّتِنٛلْ نغٛلْ تٛکُّٻٜ يٜىٰسُ حَانِ تٛکَّ؞ اٛ وِعِٻٜ يٜىٰسُ تَنْ وَاوَتَ حِسْنَ نٜطّٛ؞ کَدِنْ بُلُسْ وِعِي بَرْکَ اَلْمَسِيحُ اَللَّه تَغِ دُونِيَارُ، بَرْکَ مَاکٛ اٜ مٛ سِرْيٛوتِرَ دُونِيَارُ اٜ مَاکٛ؞ سُمْڤٛوتِرْکِ اٜ اَلْمَسِيحُ تَنْ وَطَتَ نٜطّٛ حٜٻَ کَمُّندٜ حِسُکِ؞ بُلُسْ حٛلِّي نٛ نٜطّٛ سُمْڤٛوتِرْتَ اٜ اَلْمَسِيحُ بٛطُّمْ؞

¹مِنْ بُلُسْ مٛ اَللَّه سُٻِ وَرْتَ لِلَاطٛ يٜىٰسُ اَلْمَسِيحُ وِنْدِ طٜرٜوٛلْ نغٛعٛلْ حَوْتِ اٜ بَنْدِرَاوٛ مٜىٰطٜنْ تِمٛوتِ؞

²مِنْ مبِنْدَنْغٛلْ يِمْٻٜ اَللَّه تٛکُّٻٜ يٜىٰسُ اٜ غٛونغَ غٛنْٻٜ کٛلٛوسِ؞

اَللَّه ݧَاکٛ مٜىٰطٜنْ مٛ دٛوْ بَرْکِطِنَعٛنْ حٛکَّعٛنْ جَمْ؞

دٛعَارٜ يٜتُّکِ اَللَّه

³کٛو ندٜيٜ تٛ اٜ مِنْ نغَطَنَعٛنْ دٛعَارٜ اٜ مِنْ نغٜتَّ اَللَّه ݧَاکٛ جٛومِرَاوٛ مٜىٰطٜنْ يٜىٰسُ اَلْمَسِيحُ؞ اٜ مِنْ نغٜتَّمٛ نغَمْ مٛوطٛنْ، ⁴نغَمْ مِنْ نَنِي نٛ کٛولٛرِيطٛنْ يٜىٰسُ اَلْمَسِيحُ اٜ نٛ نغِرُّطٛنْ فُو يِمْٻٜ اَللَّه؞ ⁵اٛنْ نغَطَ نٛنْ نغَمْ اٛنْ تَبِّتِنِي اٛنْ کٜٻَيْ مبَرْجَارِ ندِ اَللَّه رٜسَنِعٛنْ تٛنْ دٛوْ؞ اٛنْ نَنِي حَبَرُ طُعُمْ فِي طُمْ کَمِّيطٛنْ دَغَ اَرَنْدٜ ندٜرْ وٛلْدٜ غٛونغَ، وَاتٛ حَبَرُ بٜلْطُمْ ⁶طُمْ نَنْطٛنْ؞ حَبَرُ بٜلْطُمْ طُعُمْ اٜ طُمْ بَرْکِطِنَ يِمْٻٜ اٜ طُمْ سَنْکِتٛو ندٜرْ دُونِيَارُ فُو، نٛنْ نٛ طُمْ وَطِ ندٜرْ مٛوطٛنْ، دَغَ ݧَلْندٜ ندٜ نَنْطٛنْطُمْ ݧَلْندٜ ندٜ ڤَامُطٛنْ بٛطُّمْ نٛ اَللَّه يِطِرِ يِمْٻٜ؞ ⁷اٛنْ نَنِي حَبَرُ بٜلْطُمْ طُعُمْ دَغَ تٛ اَبَافَرَسْ مٛ مِنْ نغِطِ، مٛ مِنْ کُودَتَ؞ اٛ کُوَنٛووٛ يٜىٰسُ اٜ غٛونغَ ندٜرْ مٛوطٛنْ؞ ⁸کَنْکٛ حٛکِّمِنْ حَبَرُ يِدّٜ مٛوطٛنْ پِوٛيْندٜ تٛ رُوحُ اَللَّه؞

⁹نغَمْ مَاجُمْ، دَغَ ݧَلْندٜ ندٜ مِنْ نَنِ حَبَرُ طُمْ اٜ مِنْ نغَطَنَعٛنْ دٛعَارٜ؞ اٜ مِنْ تٛرٛو اَللَّه وَطَعٛنْ نغَرْتٛنْ غٛودُٻٜ فَامُ کٜوْطُمْ دٛوْ کٛ اٛ يِطِ نغَطٛنْ؞ طٛنْمَا اٜ مِنْ تٛرٛومٛ کٜٻٛنْ فَامُ اٜ اَنْدَلْ طُمْ رُوحُ اَللَّه حٛکَّتَ؞ ¹⁰اٜ مِنْ نغَطَنَعٛنْ ندٜعٜ دٛعَارٜ نغَمْ مبَاوٛنْ نغَطٛنْ جٛنْدٜ حَانُندٜ تٛکُّٻٜ جٛومِرَاوٛ نغَطَ، ندٜنْ نغَرْتٛنْ بٜلْنَنٛوٻٜمٛ ٻٜرْندٜ کٛو ندٜيٜ، جٛنْدٜ مٛوطٛنْ وُرْتِنَ کٛو اِرِ طٜيٜ کُوطٜ بٛطّٜ، ندٜنْ ٻٜيْدٛنْ اَنْدُکِ اَللَّه؞ ¹¹اَللَّه سٜمْبِطِنَعٛنْ اٜ فُو سٜمْبٜ بَوْطٜ مَاکٛ تٜدُّطٜ، اٛ وَطَعٛنْ ندَرٛوطٛنْ اٜ سٜمْبٜ نغَمْ مبَاوٛنْ مُݧٛنْ ندٜرْ کٛو طُمٜ کٛ حٜٻِعٛنْ، ¹²اٛنْ نغٜتَّ ݧَاکٛ مٛ دٛوْ ندٜرْ بٜلْطُمْ ٻٜرْندٜ؞ کَنْکٛ وٛنِ غَرْتِرْطٛعٛنْ کٜوْتُٻٜ کٜٻَ غٜطَلْ ندٜرْ کٛ اٛ رٜسَنِ يِمْٻٜ مَاکٛ ندٜرْ لَامُ مَاکٛ طُمْ جَيْنغٛلْ؞ ¹³اٛ حِسْنِيعٜنْ دَغَ بَوْطٜ ݧِوْرٜ طٜ شٜيْطَنْ، اٛ نَتِّنِيعٜنْ ندٜرْ لَامُ ٻِطّٛ مَاکٛ مٛ اٛ يِطِ؞ ¹⁴لَاوٛلْ ٻِطّٛ اٛنْ اٛ رِمْطِنِيعٜنْ اٛ يَافَنِيعٜنْ حَکّٜ مٜىٰطٜنْ؞

يٜىٰسُ اَلْمَسِيحُ ٻُرِي کٛو مٛيٜ

¹⁵نغِکُّ اَلْمَسِيحُ مٛ نغِعٜتٜنْ طُمْ غٛعٛ اٜ نغِکُّ اَللَّه مٛ يِعَتَاکٜ؞ اٜ مٛ طٛنْ کٛ اَللَّه تَغَ کٛو طُمٜ، اٛ مَوْطٛ دٛوْ کٛو طُمٜ کٛ تَغَا؞ ¹⁶بَرْکَ مَاکٛ اَللَّه تَغِ کٛو طُمٜ غٛنْطُمْ دٛوْ اٜ لٜيْ، کٛ يِعٜتٜىٰ اٜ کٛ يِعَتَاکٜ، حَوْتِ اٜ مَلَاعِکَعٜنْ، اٜ غِنِّ، اٜ کٛو طُمٜ غٛودُطُمْ لَامُ اٜ بَوْطٜ؞ کٛو طُمٜ کَنْکٛ تَغِطُمْ، ندٜنْ نغَمْ مَاکٛ کٛو طُمٜ تَغَا؞ ¹⁷اَلْمَسِيحُ اٜ طٛنْ کٛ کٛو طُمٜ تَغٜىٰ، بَرْکَ مَاکٛ کٛو طُمٜ اٜ يَحَ يٜىٰسٛ؞ ¹⁸اَلْمَسِيحُ وٛنِ حٛورٜ ٻَنْدُ، وَاتٛ تٛکُّٻٜمٛ؞ کَنْکٛ حٛکِّ ٻَنْدُ ندُنْ يٛنْکِ؞ کَنْکٛ وٛنِ اَرْتُطٛ اُمَّاکِ دَغَ مَيْدٜ، نغَمْ اٛ وَرْتَ مَوْطٛ دٛوْ کٛو طُمٜ؞ ¹⁹نغَمْ اَللَّه سُٻِي وَطَ فُو نغِکُّ مُوطُمْ اٜ بَوْطٜ مُوطُمْ ندٜرْ ٻِطّٛ مُوطُمْ؞ ²⁰بَرْکَ ٻِطّٛ اٛنْ اَللَّه سِرْيٛوتِرِ حٛورٜ مُوطُمْ اٜ کٛو طُمٜ غٛنْطُمْ دٛوْ اٜ لٜيْ؞ اٛ سِرْيٛوتِرَ اٜ مَاجُمْ بَرْکَ پِيپَمْ ٻِطّٛ اٛنْ ندُفَاطَمْ دٛوْ غَافَانغَلْ؞

²¹ندٜنّٛ اٛنْ نغٛطِّتَکٜ اَللَّه، اٛنْ وَݧْوَݧْٻٜ مَاکٛ نغَمْ ٻٜرْطٜ مٛوطٛنْ نغَݧِيمٛ ندٜنْ نغَمْ اٛنْ کُوَ کُوطٜ کَلُّطٜ؞ ²²اَمَّا جٛونِ اَللَّه سِرْيٛوتِرِ اٜ مٛوطٛنْ بَرْکَ مَيْدٜ ٻِطّٛ مَاکٛ، نغَمْ اٛ وَرْتِرَعٛنْ شٜنِيٻٜ، لَٻّٜ ٻٜ نغَلَا کٛ طُمْ وُلّٛرْتٛوٻٜ يٜىٰسٛ مَاکٛ؞ ²³اٛنْ نغَرْتَيْ نٛنْ تٛ نِي اٛنْ ݧَمْرِي يٜىٰسٛ اٜ حٛولَاکِ يٜىٰسُ، اٛنْ شٜمْبِطِي، اٛنْ دَرَکٜ بٛطُّمْ دٛوْ کَمُّندٜ ندٜ نغَطّٛنْ شَرٜلْ نغٜلْ نَنْطٛنْ حَبَرُ بٜلْطُمْ؞ حَبَرُ بٜلْطُمْ طُمْ وَعَجِنَنَامَ کٛو طُمٜ کٛ تَغَا غٛنْطُمْ ندٜرْ دُونِيَارُ؞ مِنْ بُلُسْ، مِ وَرْتِي مَشُّطٛ طُعُمْ حَبَرُ بٜلْطُمْ؞

کُوغَلْ بُلُسْ ندٜرْ تٛکُّٻٜ يٜىٰسُ

²⁴جٛونِ اٜ مِ نَنَ بٜلْطُمْ ندٜرْ تٛرَّاجِ طِ نجَرَيْمِ نغَمْ مٛوطٛنْ؞ اٜ مِ يٛتِّنَ تٛرَّ کَ يٜىٰسُ سِرْيَنِييَمْ مِ يَرَ ندٜرْ ٻَنْدُ نغَمْ ٻٜيْدَارِ ٻَنْدُ مَاکٛ، وَاتٛ تٛکُّٻٜمٛ؞ ²⁵مِ وَرْتِي مَشُّطٛ تٛکُّٻٜ يٜىٰسُ بَرْکَ کُوغَلْ نغَلْ اَللَّه حٛکِّيَمْ؞ کُوغَلْ نغَلْ وٛنِ مِ وَعَجِنَ فُو وٛلْدٜ مَاکٛ؞ ²⁶وٛلْدٜ ندٜنْ وٛنِ سِرُّ طُمْ اٛ سُوطِ يِمْٻٜ دَغَ جَامَنُوجِ پَٻِّيطِ، اَمَّا جٛونِ اٛ وَنْغِنَنِيطُمْ يِمْٻٜ مَاکٛ؞ ²⁷اَللَّه سُٻِي اَنْدِنَٻٜ بَرْکَ مَوْطُمْ غٛنْطُمْ ندٜرْ سِرُّ طُعُمْ طُمْ اٛ سِرْيَنِي يِمْٻٜ نَاع يَحُودَنْکٛعٜنْ؞ سِرُّ طُمْ وٛنِ اَلْمَسِيحُ اٜ جٛوطٛو ندٜرْ ٻٜرْطٜ مٛوطٛنْ، نٛنْ وَطَيْ تَبِّتِنٛنْ اٛنْ نجٛوطٛدٛتٛ اٜ مَاکٛ ندٜرْ تٜدُّنغَلْ مَاکٛ؞ ²⁸اٜ مِنْ نغَعَجِنَ حَبَرُ اَلْمَسِيحُ، اٜ مِنْ مبَغِّنَ کٛو مٛيٜ نٜطّٛ، اٜ مِنْ اٜکِّتِنَ کٛو مٛيٜ ندٜرْ فُو فَامُ اَمِنْ، نغَمْ مِنْ نغَطَ کٛو مٛيٜ وَرْتَ کٜوْطٛ ندٜرْ تٛکُّکِ يٜىٰسُ يٜىٰسٛ اَللَّه؞ ²⁹کَنْجُمْ وَطِ اٜ مِ حُوَ، اٜ مِ فِيدَ، اٜ مِ حُوتِرَ فُو سٜمْبٜ اَلْمَسِيحُ کُوٛوجُمْ اٜ بَوْطٜ ندٜرْ اَمْ؞

¹اٜ مِ يِطِ اَنْدٛنْ نٛ کُوِرْمِ نَاع سٜطَّ نغَمْ مٛوطٛنْ اٜ نغَمْ يِمْٻٜ لَوْدِيکِيَ، اٜ نغَمْ فُو يِمْٻٜ ٻٜ مٜىٰطَايِ يِيکِيَمْ غِتٜ اٜ غِتٜ؞ ²مِ وَطُ نٛنْ نغَمْ طُمْ سٜمْبِطِنَ ٻٜرْطٜ مَٻّٜ، ندٜنْ ٻٜ ٻٜيْدَ يِطِندِرْکِ، ٻٜ کٜٻَ فُو بَرْکَ کٜٻٜتٜىٰطُمْ لَاوٛلْ فَامُ کٜوْطُمْ، نغَمْ ٻٜ مبَاوَ اَنْدُکِ سِرُّ اَللَّه، وَاتٛ اَلْمَسِيحُ اٜ حٛورٜ مَاکٛ؞ ³کَنْکٛ تَنْ وٛنِ بَاوَيْطٛ حٛکُّکِٻٜ اَنْدَلْ کٜوْنغَلْ دٛوْ سِرُّ طُمْ؞

⁴مِ وِعُعٛنْ طُعُمْ نغَمْ تٛع غٛطّٛ مَجِّنَعٛنْ اٜ بٜلْطُمْ حَالَ؞ ⁵کٛو ندٜ مِ وٛنْدَا اٜ مٛوطٛنْ ندٜرْ ٻَنْدُ، فُو اٜ نٛنْ اٜ مِ ݧُمَ دٛوْ مٛوطٛنْ کٛو ندٜيٜ؞ اٜ مِ نَنَ بٜلْطُمْ ندٜ نَنْمِ حَبَرُ اٛنْ جٛوطٛو نٛ حَانِ نجٛوطٛرٛوطٛنْ، اٜ نٛ شٜمْبِطِرْطٛنْ ندٜرْ حٛولَاکِ اَلْمَسِيحُ؞

جٛنْدٜ کٜوْندٜ ندٜرْ تٛکُّکِ اَلْمَسِيحُ

⁶ندٜ اٛنْ نجَٻِي يٜىٰسُ اَلْمَسِيحُ اٛ جٛومِرَاوٛ، نغَطٜىٰ کَ سُمْڤٛوتِرْکِ اٜ مَاکٛ؞ ⁷نٛ طَطِ لٜکِّ نغَطِرْتَ لٜکِّ کِنْ دَرٛو بٛطُّمْ، شٜمْبِطَ، نٛنْ اٛنٛنْ مَا، ندَرٜىٰ بٛطُّمْ، ٻٜيْدٜىٰ سٜمْبٜ ندٜرْ حٛولَاکِمٛ، نٛنْ نٛ طُمْ اٜکِّتِنِرِعٛنْ؞ نغَطٜىٰ کَ يٜتُّکِمٛ کٛو نغٜلٜ شَرٜلْ؞

⁸تٛع اٛنْ اَلُ غٛطّٛ حُوتِرَ فَامُ دُونِيَارُ ندُعُ وَطَعٛنْ اَلٛنْ لَاوٛلْ غٛونغَ؞ اِرِ طُعُمْ فَامُ وَلَا کٛ طُمْ نَفِ طُمْ مَجِّنَيْعٛنْ؞ نَاع تٛ اَلْمَسِيحُ طُمْ پِوٛيِ، دَغَ تٛ يِمْٻٜ طُمْ پِوٛيِ اٜ غِنِّ غٛودُطِ بَوْطٜ ندٜرْ دُونِيَارُ؞ ⁹اَلْمَسِيحُ اٜ وٛودِ فُو نغِکُّ اٜ بَوْطٜ اَللَّه ندٜرْ ٻَنْدُ مَاکٛ؞ ¹⁰ندٜرْ سُمْڤٛوتِرْکِ اٜ مَاکٛ، جٛنْدٜ مٛوطٛنْ وَرْتِي کٜوْندٜ؞ کَنْکٛ وٛنِ مَوْطٛ دٛوْ کٛو نغٛلٜ غِنّٛلْ، اٜ مَلَاعِکَاجٛ، اٜ کٛو طُمٜ لَامُ غٛنْطُمْ دٛوْ اٜ لٜيْ؞

¹¹ندٜرْ سُمْڤٛوتِرْکِ مٛوطٛنْ اٜ اَلْمَسِيحُ اٛنْ نَادَامَ، نَاع اِرِ نَادُکِ کِ يِمْٻٜ نغَطَتَ، اَمَّا اِرِ نَادُکِ کِ اَلْمَسِيحُ وَطَتَ، وَاتٛ اٛ اِتِّي نغِکُّ مٛوطٛنْ غِطُّمْ وَطُکِ حَکّٜ؞ ¹²نغَمْ شَرٜلْ کٛ طُمْ وَطَنِعٛنْ بَڤْتِسْمَ، بٛ اٛنْ اُوِدَ اٜ اَلْمَسِيحُ، کَدِنْ بٛ اٛنْ اُمِّدِنَامَ اٜ مَاکٛ دَغَ مَيْدٜ؞ نٛنْ وَطِ نغَمْ اٛنْ کٛولَکٜ بَوْطٜ اَللَّه، اُمِّنْطٛمٛ دَغَ مَيْدٜ؞ ¹³ندٜنّٛ اٛنْ نَنْدِ اٜ مَيْٻٜ نغَمْ حَکّٜ طُمْ نغَطّٛنْ، کَدِنْ نغَمْ طُمْ اِتَّنَايِعٛنْ نغِکُّ مٛوطٛنْ غِطُّمْ وَطُکِ حَکّٜ؞ اَمَّا جٛونِ اَللَّه حٛکِّيعٛنْ يٛنْکِ ندٜرْ سُمْڤٛوتِرْکِ اٜ اَلْمَسِيحُ؞ اٛ يَافَنَکٜعٜنْ فُو حَکّٜ مٜىٰطٜنْ؞ ¹⁴اَللَّه وٛغِّي فُو کٛ وٛوطَا طُمْ نغَطّٜنْ بِنْدَاطُمْ طُمْ اُمْ نَنْغِرِعٜنْ؞ اٛ اِتِّيطُمْ دٛوْ مٜىٰطٜنْ ندٜ اَلْمَسِيحُ فِيَنَا کُوسَاجٜ دٛوْ غَافَانغَلْ؞ ¹⁵دٛوْ غَافَانغَلْ نغَلْ اٛ حٜٻِ جَالٛرْغَلْ دٛوْ غِنِّ اٜ فُو بَوْطٜ غٛنْطٜ دٛوْ اٜ لٜيْ، اٛ سٜمْتِنِيطُمْ اٜ نجَيْرِ؞

¹⁶نغَمْ نٛنْ، تٛع اٛنْ اَلُ غٛطّٛ يٛوَنَعٛنْ کٛ وٛوطَا نغَمْ کٛ ݧَامٛتٛنْ اٜ کٛ نجَرٛتٛنْ، کٛو نغَمْ اٛنْ نغَطَايِ وٛنْغٛ حُمْتٛ دِينَ، کٛو حُمْتٛ دَرَاکِ لٜوْرُ، کٛو دٛوْ ݧَلْندٜ سِوْتَارٜ؞ ¹⁷فُو فِي طُعُمْ طُمْ طٛوْدِ فِي غَرَيْطُمْ طٛعٛ يٜىٰسٛ، غٛونغَ فُو فِي طُعُمْ وٛنِ اَلْمَسِيحُ؞ ¹⁸اٜ وٛودِ وٛٻّٜ يِطُٻٜ لٜسْنُکِ حٛورٜ کِ فٜوْرٜ اٜ مَوْنِنْکِ مَلَاعِکَعٜنْ؞ تٛع اٛنْ اَلُ ٻٜ نجَوَنَعٛنْ؞ اِرِ مَٻّٜ اٜ ٻٜ مبِعَ اٜ ٻٜ نغِعَ وَحَيُ؞ اٜ ٻٜ پٜفْتَ کٛعٜ مَٻّٜ اٜ مٜىٰرٜ، نغَمْ ݧُمٛوجِ مَٻّٜ طُمْ طِ دُونِيَارُ؞ ¹⁹اِرِ مَٻّٜ نجَادَکٜ ٻٜ شٜنْدِرِي اٜ اَلْمَسِيحُ؞ اَلْمَسِيحُ وٛنِ بٛ حٛورٜ ٻَنْدُ، وَاتٛ تٛکُّٻٜمٛ؞ جٛکّٛوطٜ اٜ رَطٛوجِ جٛغِي ٻَنْدُ ندُنْ، اٜ ندُ مَوْنَ نغَمْ اَللَّه اٜ مَوْنِنَنْدُ؞

مَيْدُکِ اٜ اَلْمَسِيحُ اٜ جٛوطٛدَاکِ اٜ مَاکٛ

²⁰اٛنْ مَيْدِي اٜ اَلْمَسِيحُ؞ جٛونِ اٛنْ نغَلَا لٜيْ لَامُ غِنِّ لَامٛتٛوطِ دُونِيَارُ؞ ندٜ طُمْ نٛنْ، نغَمْ طُمٜ نغَطٛتٛنْ جٛنْدٜ بٛ حَا جٛونِ دُونِيَارُ ندُعُ جٜيِعٛنْ؟ نغَمْ طُمٜ تٛکّٛتٛنْ دٛوکَاجِ دُونِيَارُ بِيطِ، ²¹‏«‏تَاع جٛغَ طُعُمْ،»‏ ‏«‏تَاع ݧَامُ طُمْ تٛنْ،»‏ ‏«‏تَاع مٜىٰمُ طُمْ طٛنْ؟»‏ ²²اِرِ طِعِ دٛوکَاجِ طِ دٛوکَاجِ فِي مٜىٰرٜ طِ نغَرْتَيْ مٜىٰرٜ غَطَ طِ کُوتِرَامَ، نغَمْ طِ دٛوکَاجِ يِمْٻٜ تَنْ اٜ اٜکِّتِنٛلْ مَٻّٜ؞ ²³اٜ طِ نغَطَ بٛ اٜ طِ کٛلَّ نٛ حَانِ نٜطّٛ جٛوطٛرٛو، نغَمْ اٜ طِ اٜکِّتِنَ يِمْٻٜ نغَطَ کٛ سَطِ نغَمْ حٛلُّکِ ٻٜ تٛکُّٻٜ اَللَّه؞ اٜ ٻٜ لٜيْنَ کٛعٜ مَٻّٜ لٜيْنُکِ فٜوْرٜ، اٜ ٻٜ تٛرَّ ٻَلِّ مَٻّٜ نغَمْ اٜ ٻٜ ݧُمَ طُمْ وٜلْنَنَيْ اَللَّه ٻٜرْندٜ؞ اَمَّا طُمْ وَلَّتَاٻٜ ٻٜ کٜٻَ جَالٛرْغَلْ دٛوْ سُونٛوجِ مَٻّٜ؞

¹اٛنْ اُمِّدِنَامَ اٜ اَلْمَسِيحُ دَغَ مَيْدٜ؞ نغَمْ نٛنْ نغَطٜىٰ ٻٜرْطٜ مٛوطٛنْ دٛوْ فِي غٛنْطُمْ تٛنْ دٛوْ تٛ اَلْمَسِيحُ جٛوطِي دٛوْ جٛوطٛرْغَلْ لَامُ مُوطُمْ تٛ جُنْغٛ ݧَامٛ اَللَّه؞ ²نغَطٜىٰ کَ ݧُمُکِ دٛوْ کٛ وٛنِ اٜ دٛوْ، نَاع دٛوْ فِي غٛنْطُمْ ندٜرْ دُونِيَارُ ندُعُ، ³نغَمْ اٛنْ نغَرْتِي بٛ مَيْٻٜ، ندٜنْ جٛونِ اٛنْ نغٛودِ يٛنْکِ کٜسِ کِ غٛطّٛ وَاوَتَا يِيکِ اِرِ يٛنْکِ کِ اَلْمَسِيحُ وٛودِ غٛنْدُطٛ اٜ اَللَّه؞ ⁴يٛنْکِ مٛوطٛنْ کِ غٛونغَ وٛنِ اَلْمَسِيحُ؞ تٛ اٛ سٛعّٛيَکٜ دُونِيَارُ ندُعُ، اٛنٛنْ مَا، اٛنْ نغٛنْدَيْ اٜ مَاکٛ ندٜرْ تٜدُّنغَلْ مَاکٛ؞

جٛنْدٜ کِيندٜ اٜ جٛنْدٜ حٜيْرٜ

⁵نغَمْ نٛنْ، شٜنْدِرٜىٰ اٜ سُونٛوجِ دُونِيَارُ غٛنْطِ ندٜرْ مٛوطٛنْ، وَاتٛ نجٜىٰنُ، اٜ کُوطٜ نٜفْنِيطٜ، اٜ تٛکِّرَنْکِ کٛ ٻَنْدُ يِطِ، اٜ سُونٛوجِ کَلُّطِ، اٜ يِطُکِ کٛ غٛطّٛ جٜيِ؞ ﴿نغَمْ يِطُکِ کٛ غٛطّٛ جٜيِ طُمْ غٛعٛ اٜ مَوْنِنْکِ غُنْکِيجِ﴾؞ ⁶نغَمْ وَطُکِ کُوطٜ طٜعٜ مٛنّٜرٜ اَللَّه يَنَيْ دٛوْ فُو غَݧُٻٜ نغَطَ کٛ اٛ وِعِ؞ ⁷ندٜنّٛ اٛنْ نغَطَ اِرِ کُوطٜ طٜعٜ ندٜرْ جٛنْدٜ ندٜ نغَطَيْنٛوطٛنْ؞

⁸اَمَّا جٛونِ، شٜنْدِرٛنْ اٜ فُو اِرِ کُوطٜ طٜعٜ، وَاتٛ مٛنّٜرٜ، اٜ وَݧُکِ يِمْٻٜ، اٜ کُلّٜ، ندٜنْ تٛع اٛنْ اَلُ بٛلِيطٜ کَلُّطٜ مبُرْتٛو دَغَ حٛنْدُکٛ مٛوطٛنْ؞ ⁹تٛع اٛنْ ڤٜوِنْدِرْ، نغَمْ اٛنْ ٻٛرْتَکٜ نغِکُّ مٛوطٛنْ طُمْ ندٜنّٛ اٜ کُوطٜ مَاجُمْ؞ ¹⁰جٛونِ اٛنْ ٻٛرْنَکٜ نغِکُّ کٜسُمْ؞ اَللَّه تَغُطٛ نغِکُّ طُمْ، اٜ مٛ مٛعِّنَطُمْ طُمْ وَرْتَ اِرِ نغِکُّ مَاکٛ، نغَمْ اَنْدٛنْمٛ بٛطُّمْ؞ ¹¹کَنْجُمْ وَطِ جٛونِ وَلَا فٜىٰرٛوتِرٛلْ حَکُّندٜ يَحُودَنْکٜىٰجٛ اٜ نٜطّٛ نَاع يَحُودَنْکٜىٰجٛ، اٜ حَکُّندٜ نَادَاطٛ اٜ مٛ نَادَاکَ، اٜ لَدّٜىٰجٛ، اٜ کٛطٛ، اٜ حَکُّندٜ مَشُّطٛ اٜ نَاع مَشُّطٛ؞ اَمَّا اَلْمَسِيحُ وٛنِ کٛو طُمٜ، کَنْکٛ وٛنِ ندٜرْ ٻٜرْطٜ مٜىٰطٜنْ اٜنْ فُو؞

¹²اٛنٛنْ اٛنْ يِمْٻٜ ٻٜ اَللَّه سُٻِ، اٛنْ شٜنِيٻٜ ٻٜ اٛ يِطِ نَاع سٜطَّ؞ نغَمْ نٛنْ، نغَرْتٜىٰ غٛودُٻٜ يُرْمٜىٰندٜ اٜ يِدّٜ لٜيْنٛوٻٜ کٛعٜ، غٛودُٻٜ حَکِّيلٛ اٜ مُݧَلْ؞ ¹³مُݧِندِرٜىٰ؞ تٛ غٛطّٛ وَطَنِي غٛطّٛ کٛ حَانَا، ٻٜ نجَافٛوتِرَ؞ نٛنْ نٛ جٛومِرَاوٛ يَافٛرَنِيعٛنْ، اٛنٛنْ مَا سٜيْ نجَافٛوتِرٛنْ؞ ¹⁴کٛ ٻُرِ طُعُمْ فُو وٛنِ نغِطِنْدِرٛنْ، نغَمْ يِدّٜ حَوْتِي کٛعٜ مٜىٰطٜنْ نٛ حَانِ؞ ¹⁵جَمْ پِوٛيْطُمْ تٛ اَلْمَسِيحُ وَلَّعٛنْ شُٻٛنْ کٛ حَانِ نغَطٛنْ، ندٜ اَللَّه نٛدِّيعٛنْ نغَمْ نغَرْتٛنْ بٛ ٻَنْدُ غٛعٛ نجٛوطٛدٛوطٛنْ جَمْ؞ نغَرْتٜىٰ غٜتّٛوٻٜ اَللَّه کٛو ندٜيٜ؞ ¹⁶اَلٜىٰ بٛلِيطٜ اَلْمَسِيحُ نجٛوطٛو ندٜرْ ٻٜرْطٜ مٛوطٛنْ نَاع سٜطَّ؞ اٜکِّتِندِرٜىٰ، وَغِّندِرٜىٰ ندٜرْ فُو فَامُ؞ نغِمٜىٰ غِمِ جَبُورَ، اٜ غِمِ مَنْتُکِ جٛومِرَاوٛ، اٜ غِمِ طِ اَللَّه حٛکِّعٛنْ ندٜرْ ٻٜرْطٜ، اٛنْ نغٜتَّمٛ ندٜرْ ٻٜرْطٜ مٛوطٛنْ؞ ¹⁷ندٜرْ کٛو طُمٜ طُمْ نغَطٛتٛنْ، ندٜرْ بٛلِيطٜ مٛوطٛنْ کٛو ندٜرْ کُوطٜ مٛوطٛنْ، نغَطٜىٰطُمْ ندٜرْ اِنْدٜ يٜىٰسُ جٛومِرَاوٛ، اٛنْ نغٜتَّ اَللَّه ݧَاکٛ مٛ دٛوْ لَاوٛلْ مَاکٛ؞

نٛ حَانِ وُرٛ تٛکُّٻٜ يٜىٰسُ جٛوطٛرٛو

¹⁸اٛنٛنْ رٜوْٻٜ تٜىٰغَلْ، کٛکّٜىٰ وٛرْٻٜ مٛوطٛنْ مَنْغُ نٛنْ نٛ حَانِ تٛکُّٻٜ جٛومِرَاوٛ نغَطَ؞

¹⁹وٛرْٻٜ، نغِطٜىٰ رٜوْٻٜ مٛوطٛنْ، تٛع اٛنْ کٛلُّٻٜ نغِکُّ شَاتُطُمْ؞

²⁰سُکَاٻٜ، کٛکّٜىٰ دَݧٛوٻٜ مٛوطٛنْ مَنْغُ ندٜرْ کٛو طُمٜ، نغَمْ نٛنْ اٜ وٜلْنَنَ جٛومِرَاوٛ ٻٜرْندٜ؞

²¹اٛنٛنْ غٛودُٻٜ ٻِٻّٜ، تٛع اٛنْ کَلَّنْ ٻِٻّٜ مٛوطٛنْ نغَمْ نٛنْ وَاوَيْ وَطَ ٻٜ اَلَ وَطُکِ کٛ حَانِ؞

²²مَشُّٻٜ، کٛکّٜىٰ جٜيْٻٜعٛنْ مَنْغُ ندٜرْ کٛو طُمٜ؞ کٛکّٜىٰٻٜ مَنْغُ نَاع اٜ شَرٜلْ نغٜلْ ٻٜ نغِعَتَعٛنْ تَنْ کٛو بٛو نغَمْ ٻٜ ٻٜيْدَ يِطُکِعٛنْ، اَمَّا نغَطٜىٰطُمْ اٜ ٻٜرْندٜ غٛعٛ ندٜرْ کُلٛلْ جٛومِرَاوٛ؞ ²³ندٜرْ کٛو طُمٜ طُمْ نغَطٛتٛنْ، نغَطٜىٰطُمْ اٜ ٻٜرْطٜ مٛوطٛنْ فُو بٛ جٛومِرَاوٛ نغَطَنْتٛنْطُمْ، نَاع يِمْٻٜ؞ ²⁴نغَمْ اٛنْ اَنْدِ اٛنْ کٜٻَيْ مبَرْجَارِ دَغَ تٛ جٛومِرَاوٛ؞ اَلْمَسِيحُ وٛنِ جٛومِرَاوٛ مٛ کُوَنْتٛنْ؞ ²⁵کٛو مٛيٜ غَطٛووٛ کٛ وٛوطَا طُمْ وَاتَنَيْمٛ کٛ حَانَنِمٛ، نغَمْ اَللَّه حٛلَّتَا فٜىٰرٛوتِرٛلْ؞

¹اٛنٛنْ غٛودُٻٜ مَشُّٻٜ، نجٛغٜىٰ مَشُّٻٜ مٛوطٛنْ بٛطُّمْ، کٛکّٜىٰٻٜ کٛ حَانِ ٻٜ کٜٻَ، نغَمْ اٛنْ اَنْدِ اٛنٛنْ مَا اٛنْ نغٛودِ جٜيْطٛعٛنْ تٛنْ دٛوْ؞

وَغِّنْکِ

²نغَطٜىٰ کَ وَطُکِ دٛعَارٜ، نغَطٜىٰ حَکِّيلٛ مٛوطٛنْ دٛوْ دٛعَارٜ ندٜنْ، اٛنْ نغٜتَّ اَللَّه؞ ³نٛنْ مَا نغَطَنٜىٰمِنْ دٛعَارٜ نغَمْ اَللَّه مَٻِّتَنَمِنْ لَاوٛلْ مِنْ نغَعَجِنَ سِرُّ مَاکٛ، وَاتٛ حَبَرُ اَلْمَسِيحُ؞ دٛوْ مَاجُمْ طُمْ سُرِيَمْ؞ ⁴نغَطَنٜىٰيَمْ دٛعَارٜ نغَمْ مِ اَنْدِنَطُمْ نٛ حَانِ، نٛ کٛو مٛيٜ فَامِرْتَطُمْ بٛطُّمْ؞

⁵ڤَامٜىٰ اِرِ نغِکُّ طُمْ نغَطَنْتٛنْ ٻٜ تٛکَّايِ يٜىٰسُ؛ کُوتِرٜىٰ کٛو نغٜلٜ شَرٜلْ نغٜلْ کَوْرُطٛنْ اٜ مَٻّٜ بٛطُّمْ؞ ⁶بٛلِيطٜ مٛوطٛنْ کٛو ندٜيٜ طٜ نغَرْتَ بٜلْطٜ نَنْکِ، ڤٛوطٛوجٜ حَکِّيلٛ يِمْٻٜ، نغَمْ اَنْدٛنْ نٛ حَانِ نٛوتٛرَنٛوطٛنْ کٛو مٛيٜ؞

کٛوْنٛلْ شَکِتِينغٛلْ

⁷تِيکِکُسْ حٛکَّيْعٛنْ فُو حَبَرُ اَمْ؞ اٛ تٛکُّطٛ يٜىٰسُ مٛ مِنْ نغِطِ، کُوٛووٛ مٛ غٛونغَ، مٛ مِنْ کُودَتَ کُوغَلْ جٛومِرَاوٛ؞ ⁸کَنْجُمْ وَطِ لِلٛيْمٛومِ تٛ مٛوطٛنْ، نغَمْ اٛ حٛکَّعٛنْ حَبَرُ نٛ مِنْ غٛنْتِندِرِ، اٛ سٜمْبِطِنَ ٻٜرْطٜ مٛوطٛنْ؞ ⁹اٜ مٛ يَادَ اٜ اٛنِسِمُسْ تٛکُّطٛ يٜىٰسُ اٜ غٛونغَ، غِطَاطٛ، غٛنْطٛ ندٜرْ کَوْتَلْ مٛوطٛنْ؞ ٻٜ کٛکَّيْعٛنْ حَبَرُ کٛو طُمٜ کٛ وَطَتَ طٛعٛ؞

¹⁰اَرِسْتَرْکُسْ غٛنْدُطٛ اٜ اَمْ ندٜرْ سُودُ شُرَلْ اٜ حٛوْنَعٛنْ، نٛنْ مَا مَرْکُسْ بَنْدِرَاوٛ بَرْنَبَ؞ ﴿اٛنْ نجَادَکٜ اٛنْ مبِعَامَ نجَٻّٛوطٛنْمٛ بٛطُّمْ تٛ اٛ وَرِي تٛ مٛوطٛنْ؞﴾ ¹¹جٛوشُوَ بِعٜتٜىٰطٛ جُسْتُسْ اٜ حٛوْنَعٛنْ کَنُمْ مَا؞ ندٜرْ يِمْٻٜ ٻٜ کُودَيْمِ نغَمْ لَامُ اَللَّه، کَمْٻٜ تَنْ نغٛنِ يَحُودَنْکٛعٜنْ تٛکُّٻٜ يٜىٰسُ طٛعٛ؞ ٻٜ مبَلِّييَمْ نَاع سٜطَّ؞

¹²اَبَافَرَسْ اٜ حٛوْنَعٛنْ، کَنْکٛ مَا اٜ مٛ ندٜرْ کَوْتَلْ مٛوطٛنْ، اٛ مَشُّطٛ يٜىٰسُ اَلْمَسِيحُ؞ کٛو ندٜيٜ اٜ مٛ تٛرٛو اَللَّه سٜمْبِطِنَعٛنْ، نغَرْتٛنْ تٛکُّٻٜ يٜىٰسُ کٜىٰوُٻٜ، غَطٛوٻٜ کٛ اَللَّه يِطِ ٻٜ نغَلَا سٜکٛ؞ ¹³مِ وَاوَيْ مِ حٛکَّ شٜيْدَ اٛ حُوِي نَاع سٜطَّ نغَمْ مٛوطٛنْ اٜ نغَمْ يِمْٻٜ لَوْدِيکِيَ اٜ يِمْٻٜ حِرَفٛلِسْ؞ ¹⁴لُکَ ݧَوْندٛووٛ مٛ مِنْ نغِطِ اٜ دِمَسْ اٜ ٻٜ کٛوْنَعٛنْ؞

¹⁵کٛوْنَنٜىٰمِنْ تٛکُّٻٜ يٜىٰسُ غٛنْٻٜ غَرِيرِ لَوْدِيکِيَ اٜ بِعٜتٜىٰطٛ نِمْفَ اٜ تٛکُّٻٜ يٜىٰسُ کَوْرِتٛوٻٜ تٛ وُرٛ مَاکٛ؞ ¹⁶غَطَ طُمْ جَنْغَنِيعٛنْ طٜرٜوٛلْ نغٛعٛلْ، نٛنْ مَا تَبِّتِنٜىٰ طُمْ جَنْغَنِينغٛلْ تٛکُّٻٜ يٜىٰسُ غٛنْٻٜ لَوْدِيکِيَ؞ اٛنٛنْ مَا، نجَنْغٜىٰ طٜرٜوٛلْ نغٛلْ تٛکُّٻٜ يٜىٰسُ غٛنْٻٜ لَوْدِيکِيَ لِلْدٛنٛيْتَعٛنْ؞ ¹⁷مبِعٜىٰ اَرْکِبُسْ، ‏«‏تَبِّتِنْ اَ يٛتِّنِي کُوغَلْ نغَلْ جٛومِرَاوٛ حٛکُّمَا؞»‏

¹⁸مِنْ بُلُسْ وِنْدِ کٛوْنٛلْ نغٛعٛلْ اٜ جُنْغٛ اَمْ؞ تٛع اٛنْ نغٜجُّتُ اٜ مِ طٛنْ حَٻِّرَا ٻٛغِّ نجَمْندِ ندٜرْ سُودُ شُرَلْ؞ اَللَّه بَرْکِطِنَعٛنْ؞