کُوطٜ لِلَاٻٜ

کُوطٜ لِلَاٻٜ

حَبَرُ دٛوْ طٜرٜوٛلْ نغٛعٛلْ

بِنْدُطٛ طٜرٜوٛلْ نغٛعٛلْ وٛنِ لُکَ حِغٛ يَادُ بُلُسْ؞ طٛنْمَا کَنْکٛ وِنْدِ دٜفْتٜرٜ لُکَ، کَنْکٛ اٛ ݧَوْندٛووٛ؞ ندٜنْ نغٛلْ وِنْدَ نغَمْ تِيٛوفِلُسْ اٜ کٛو مٛيٜ اَنْدَ نٛ تٛکُّٻٜ يٜىٰسُ فُطِّرِ ندٜرْ يَحُودَنْکٛعٜنْ غَطَ اُمَّاکِ يٜىٰسُ دَغَ مَيْدٜ؞ اٜ نغٛلْ حٛلَّ نٛ رُوحُ اَللَّه وَرِ وَلِّرِ تٛکُّٻٜ يٜىٰسُ، اٜ نٛ ٻٜ طُوطِرِ کٛو تٛيٜ ندٜرْ دُونِيَارُ، اٜ نٛ ٻٜ شٜمْبِطِنِرِ حٛولَارٜ مَٻّٜ ندٜرْ تٛرَّ کَ ٻٜ نجَرَتَ، اٜ نٛ ٻٜ نغَعَجِنِرِ کٛو تٛيٜ کُلٛلْ وَلَا؞

اٜ طُمْ کَمّٛو دٜفْتٜرٜ کُوطٜ لِلَاٻٜ وِنْدَامَ شَرٜلْ غٛعٛ اٜ دٜفْتٜرٜ لُکَ؞

اَلْکَوَلْ غَرٛلْ رُوحُ اَللَّه

¹يَا تِيٛوفِلُسْ مَوْطٛ،

ندٜرْ دٜفْتٜرٜ اَمْ اَرَنْدٜىٰرٜ، مِ وِنْدِينٛ دٛوْ کٛو طُمٜ کٛ يٜىٰسُ وَطِ اٜ کٛ اٛ اٜکِّتِنِ، ²حَا يَاکِ ݧَلْندٜ ندٜ اٛ حٛشَّا يَاکِ دٛوْ؞ کٛ اٛ حٛشّٜىٰ يَاکِ دٛوْ، اٛ اٜکِّتِنِي لِلَاٻٜ ٻٜ اٛ سُٻِ ندٜرْ بَوْطٜ رُوحُ اَللَّه؞ ³غَطَ اٛ تٛرَّامَ اٛ وَرَامَ، اٛ اُمِّي دَغَ مَيْدٜ اٛ وَنْغَنِٻٜ؞ اٜ طَتٜ طُطّٜ اٛ حٛلِّٻٜ اٜ مٛ فٛوفَ؞ اٛ وَطِي بَلْطٜ 40 اٜ مٛ وَنْغَنَٻٜ، اٜ مٛ اٜکِّتِنَٻٜ دٛوْ لَامُ اَللَّه؞ ⁴شَرٜلْ کٛ اٛ وٛنْدِ اٜ مَٻّٜ، اٛ وِعِٻٜ، ‏«‏تٛع اٛنْ اَلُ اُرُشَلِيمَ، اَمَّا کٜطٜىٰ نَا ݧَاکٛ مٜىٰطٜنْ مٛ دٛوْ حٜبِّنِي اَلْکَوَلْ نغَلْ اٛ وَطَنِعٛنْ نغَلْ مبِيمِعٛنْ؞ کَنْغَلْ وٛنِ حٛکُّکِعٛنْ رُوحُ مَاکٛ؞ ⁵يَحَيَ وَطَنِي يِمْٻٜ بَڤْتِسْمَ اٜ ندِيَمْ، اَمَّا ندٜرْ بَلْطٜ سٜطَّ، اٛنٛنْ اَللَّه وَطِرَنَيْعٛنْ بَڤْتِسْمَ اٜ رُوحُ مَاکٛ؞»‏

يٜىٰسُ اَلْمَسِيحُ حٛشَّامَ يَاکِ دٛوْ

⁶ندٜ تٛکُّٻٜمٛ فُو کَوْرِتِ، سٜيْ ٻٜ پَمِمٛ، ٻٜ مبِعِ، ‏«‏جٛومِرَاوٛ، جٛونِ نغَرْتِرَنْتَا اِسْرَاعِيلَ لَامُ؟»‏

⁷اَمَّا يٜىٰسُ وِعِٻٜ، ‏«‏اَنْدُکِ شَرٜلْ اٜ جَامَنُوجِ طِ ݧَاکٛ مٜىٰطٜنْ مٛ دٛوْ سِرْيِي ندٜرْ لَامُ مُوطُمْ نَاع اُمْ طُمْ مٛوطٛنْ؞ ⁸اَمَّا تٛ رُوحُ اَللَّه جِڤّٛيَکٜ دٛوْ مٛوطٛنْ، اٛنْ کٜٻَيْ بَوْطٜ، اٛنْ نغَرْتَيْ کٛکَّيْٻٜ وٛٻّٜ حَبَرُ اَمْ ندٜرْ اُرُشَلِيمَ، اٜ لٜيْدِ يَحُودِيَ فُو، اٜ لٜيْدِ سَمَارِيَ، حَا کٜىٰرٛلْ دُونِيَارُ؞»‏ ⁹غَطَ اٛ وِعِي نٛنْ، اٛ حٛشَّا يَاکِ دٛوْ؞ اٜ ٻٜ ندَارَمٛ حَا دُولٜ شُدِّمٛ؞

¹⁰اٜ ٻٜ تِجِّي اٜ ٻٜ ندَارَمٛ اٜ مٛ فَعِ دٛوْ، سٜيْ رَا وٛرْٻٜ طِطٛ ٻٜ کٛلْتٜ دَنٜىٰجٜ مبَنْغِي حَادٜ مَٻّٜ اٜ ندَرِي؞ ¹¹وٛرْٻٜ ٻٜنْ مبِعِٻٜ، ‏«‏اٛنٛنْ يِمْٻٜ غَلِيلِ، نغَمْ طُمٜ ندَرِيطٛنْ طٛعٛ اٛنْ ندَارَ دٛوْ؟ يٜىٰسُ اٛنْ طٛنْ کٛشَّاطٛ ندٜرْ مٛوطٛنْ يَاکِ دٛوْ، اٛ سٛعّٛيْتٛ نٛنْ نٛ نغِيرُطٛنْ اٛ حٛشِّرَامَ دٛوْ؞»‏

مَاتِيَسْ سُٻَامَ

¹²سٜيْ ٻٜ نجِڤّٛيِي دَغَ دٛوْ حٛشّٜىٰرٜ ندٜ لٜطّٜ جَيْتُنْ، ٻٜ کٛوتِ اُرُشَلِيمَ؞ حَکُّندٜ حٛشّٜىٰرٜ ندٜنْ اٜ اُرُشَلِيمَ طُمْ ٻُرَايِ مِلْ غٛعٛ؞ ¹³ندٜ ٻٜ نَتِّ غَرِيرِ ندِنْ، ٻٜ پٜنْتِ سُودُ دٛوْ تٛ ٻٜ کَوْرِتَتَ؞ لِلَاٻٜ ٻٜنْ نغٛنِ:‏ بِيتُرُسْ، اٜ يَحَيَ، اٜ يَاکُبُ، اٜ اَنْدِرَاوُسْ، اٜ فِلِبُسْ، اٜ تٛومَ، اٜ بَتِلٛومِ، اٜ مَاتِيُ، اٜ يَاکُبُ ٻِي حَلْفَ، اٜ سِيمَنْ جَلٛوتِ ¹⁴ٻٜ فُو، اٜ ٻٜ کَوْرِتَ ٻٜ نغَطَ دٛعَارٜ اٜ ٻٜرْندٜ غٛعٛ، کَمْٻٜ اٜ مَرْيَامَ مَدُوجٛ يٜىٰسُ اٜ مِݧِرَاٻٜ يٜىٰسُ وٛرْٻٜ، اٜ وٛٻّٜ رٜوْٻٜ طٛنْمَا؞

¹⁵ندٜرْ بَلْطٜ طٜنْ، کَوْتَلْ کٛولِيٻٜ يٜىٰسُ يَارِي يِمْٻٜ 120؞ سٜيْ بِيتُرُسْ اُمِّي، دَرِي يٜىٰسٛ مَٻّٜ، وِعِ، ¹⁶‏«‏بَنْدِرَاٻٜ، رُوحُ اَللَّه مٜتِينٛ دَغَ حٛنْدُکٛ دَوْدَ دٛوْ يَحُودَ، کٛلُّطٛ نَنْغٛوٻٜ يٜىٰسُ لَاوٛلْ نٛ نَنْغِرْتَمٛ؞ دٛولٜ اَايَاجٜ طٜنْ کٜىٰوَ؞ ¹⁷يَحُودَ اٛ کُودَيْنٛوطٛ اٜ مٜىٰطٜنْ ندٜرْ کُوغَلْ جٛومِرَاوٛ؞»‏

¹⁸﴿اٛ سٛودِ نغٜسَ اٜ شٜىٰدٜ طٜ اٛ يٛٻَا نغَمْ کُوغَلْ کَلُّنغَلْ نغَلْ اٛ وَطِ، اٛ يَنِ ندٜرْ مَاکَ، رٜىٰدُ مَاکٛ ڤُسِ، تٜتٜکِّ مَاکٛ فُو ندُفِ اٜ لٜيْدِ، اٛ مَايِ؞ ¹⁹يِمْٻٜ اُرُشَلِيمَ فُو نَنِي حَبَرُ طُمْ؞ کَنْجُمْ وَطِ ٻٜ نٛدِّرِ نغٜسَ کَنْ ندٜرْ طٜمْنغَلْ مَٻّٜ اَکٜلْدَمَ وَاتٛ ‏«‏نغٜسَ پِيپَمْ؞»‏﴾

²⁰‏«‏نغَمْ طُمْ وِنْدَامَ ندٜرْ دٜفْتٜرٜ جَبُورَ دٛوْ مَاکٛ وِعُکِ،

‏‹‏اَلْ وُرٛ مَاکٛ وَرْتَ وِنْدٜ،

تٛع کٛو مٛيٜ جٛوطٛو ندٜرْ مَاغٛ؞›‏

کَدِمَا وٛنْدٜ اَايَارٜ وِعِي،

‏‹‏اَلْ غٛطّٛ حٛشَّ کُوغَلْ اَرْدَارٜ مَاکٛ؞›‏

^21‏-22‏«‏اٜ حَانِ شُٻٜنْ غٛعٛتٛ دَغَ ندٜرْ غٛنْدُنٛوٻٜ اٜ مٜىٰطٜنْ شَرٜلْ کٛ يٜىٰسُ جٛومِرَاوٛ وٛنْدِ اٜ مٜىٰطٜنْ دَغَ شَرٜلْ کٛ يَحَيَ وَطَنِ يِمْٻٜ بَڤْتِسْمَ يَاکِ ݧَلْندٜ ندٜ يٜىٰسُ حٛشَّا ندٜرْ مٜىٰطٜنْ، نغَمْ اٛ وَرْتَ کٛکِّدٛووٛ حَبَرُ اُمَّاکِ يٜىٰسُ اٜ مٜىٰطٜنْ؞»‏

²³دَغَ طٛنْ، سٜيْ ٻٜ ندَرْنِ وٛرْٻٜ طِطٛ:‏ مَاتِيَسْ اٜ يُسُفُ بَرْسَبَ بِعٜتٜىٰطٛ جُسْتُسْ؞ ²⁴ٻٜ نغَطِ دٛعَارٜ، ٻٜ مبِعِ، ‏«‏جٛومِرَاوٛ، اَنْ اَنْدُطٛ ٻٜرْطٜ يِمْٻٜ فُو، حٛلُّمِنْ مٛ شُٻُطَا دَغَ ندٜرْ يِمْٻٜ طِطٛ ٻٜعٜ، ²⁵نغَمْ اٛ حُوَ کُوغَلْ لِلَاٻٜ نغَلْ يَحُودَ اَلِ؞ نغَمْ يَحُودَ يَحِي وِغٜىٰرٜ تٛ حَانَنِمٛ؞»‏ ²⁶سٜيْ ٻٜ نغَطِ شُٻٛلْ حَکُّندٜ يِمْٻٜ طِطٛ ٻٜنْ؞ شُٻَاطٛ اٛنْ وٛنِ مَاتِيَسْ؞ اٛ نَتِّنَا ندٜرْ لِلَاٻٜ سَڤّٛ اٜ غٛعٛ ٻٜنْ؞

غَرٛلْ رُوحُ اَللَّه

¹ندٜ حُمْتٛ ٻٜنْدٛلْ اَلْکَمَارِ وَطِ، تٛکُّٻٜ يٜىٰسُ فُو کَوْرِتِ وِغٜىٰرٜ غٛعٛ؞ ²طٛنْ اٜ طٛنْ ٻٜ نَنِ اِيدٛ پِوٛيِي دَغَ دٛوْ بٛ حٜنْدُ شٜمْبِنْدُ؞ اِيدٛ نغٛنْ حٜىٰوِ وُرٛ نغٛ ٻٜ نغٛنِ ندٜرْ؞ ³سٜيْ غٛطُّمْ نَنْدُطُمْ اٜ طٜمْطٜ حِيتٜ وَنْغِ؞ طٜ شَنْکِتِي، طٜ کٛطِ دٛوْ حٛورٜ کٛو مٛيٜ مَٻّٜ؞ ⁴سٜيْ ٻٜ فُو ٻٜ کٜىٰوِ رُوحُ اَللَّه، ٻٜ ڤُطِّ مٜتُکِ ندٜرْ طٜمْطٜ فٜىٰرٜ‑فٜىٰرٜ نٛ رُوحُ حٛکِّرِٻٜ بَوْطٜ مٜتُکِ؞

⁵اٜ وٛودِ يَحُودَنْکٛعٜنْ جٛوطِيٻٜ ندٜرْ اُرُشَلِيمَ پِوٛيْٻٜ دَغَ کٛو طٜيٜ لٜيْطٜ دُونِيَارُ کُلٛوٻٜ جٛومِرَاوٛ؞ ⁶ندٜ ٻٜ نَنِ اِيدٛ نغٛنْ، ٻٜ فُو ٻٜ کَوْرِتِ؞ فِي طُمْ حُلْنِيٻٜ، ٻٜ ندُلِّ کٛ ٻٜ نغَطَتَ، نغَمْ ٻٜ نَنِي لِلَاٻٜ اٜ مٜتَ ندٜرْ طٜمْنغَلْ کٛو مٛيٜ مَٻّٜ؞ ⁷فِي طُمْ حَيْطِنِٻٜ نَاع سٜطَّ، ٻٜ مبِعِ، ‏«‏ٻٜعٜ مٜتٛوٻٜ نَاع ٻٜ غَلِلَنْکٛعٜنْ؟ ⁸ندٜنْ نٛ طُمْ وَطِ کٛو مٛيٜ ندٜرْ مٜىٰطٜنْ اٜ نَنَ کٛ ٻٜ مبِعَتَ ندٜرْ طٜمْنغَلْ مُوطُمْ؟ ⁹رَا ندٜرْ مٜىٰطٜنْ اٜ وٛودِ فَرْتِيَنْکٛعٜنْ اٜ مَدِيَنْکٛعٜنْ اٜ اٜلَامِيَنْکٛعٜنْ، اٜ يِمْٻٜ مٜسٛفٛتَامِيَ، اٜ وٛٻّٜ دَغَ ندٜرْ لٜيْطٜ يَحُودِيَ اٜ کَفَدٛوکِيَ اٜ فَنْتُسْ اٜ اَاسِيَ، ¹⁰اٜ يِمْٻٜ فِرِيجِيَ اٜ بَمْفِيلِيَ اٜ لٜيْدِ مَسَرْ اٜ لٜيْدِ لِبِيَ حَادٜ سَايِرِنْ اٜ پِوٛيْٻٜ رٛومَ، ¹¹يَحُودَنْکٛعٜنْ اٜ وٛٻّٜ جَٻُٻٜ دِينَ يَحُودَنْکٛعٜنْ، اٜ وٛٻّٜ دَغَ کِرِتِ، اٜ لَارَبَنْکٛعٜنْ؞ اَمَّا فُو اٜ نٛنْ، اٜنْ فُو اٜنْ نَنَ يِمْٻٜ ٻٜعٜ اٜ مٜتَ ندٜرْ طٜمْطٜ مٜىٰطٜنْ دٛوْ کُوطٜ مَوْطٜ طٜ اَللَّه وَطِ!‏»‏ ¹²ٻٜ فُو فِي طُمْ حَيْطِنِٻٜ، ٻٜ نجِيٻٛوتِرِ، ٻٜ نغَطِ کَ پَمْپَمْتِرْکِ، اٜ ٻٜ مبِعَ، ‏«‏طُمٜ وٛنِ مَعَنَ فِي طُعُمْ؟»‏

¹³اَمَّا وٛٻّٜ نجَلِ تٛکُّٻٜ يٜىٰسُ مبِعِ، ‏«‏ندِيَمْ اِنَبٛجَمْ ٻٜ نجَرِ، ٻٜ نغِلْتِي!‏»‏

نٛ بِيتُرُسْ وَعَجِنِرِ

¹⁴سٜيْ بِيتُرُسْ اُمِّي، کَنْکٛ اٜ لِلَاٻٜ سَڤّٛ اٜ غٛعٛ، ٻٜ ندَرِي، اٛ پٜفْتِ حٛنٛنْدٜ مَاکٛ، اٛ وِعِ حَوْرُتُٻٜ ٻٜنْ، ‏«‏اٛنٛنْ يَحُودَنْکٛعٜنْ اٜ جٛوطِيٻٜ ندٜرْ اُرُشَلِيمَ فُو، نَنٜىٰ کٛ مبِعَيْمِعٛنْ؞ مِ حٛکَّيْعٛنْ مَعَنَ فِي طُعُمْ؞ ¹⁵يِمْٻٜ ٻٜعٜ نَاع ٻٜ جَرُٻٜ نٛ کَمِّيطٛنْ، نغَمْ جٛونِ طُمْ سُبَکَ نجَمْندِ جٛوٜىٰنَيِ!‏ ¹⁶اَمَّا رَا کٛ اَنَّبِ يٛوٜلْ وِعِ اَللَّه وِعِي،

¹⁷‏‹‏ندٜرْ بَلْطٜ شَکِتِيطٜ کٛ دُونِيَارُ رٜعَ،

مِ حٛکَّيْ يِمْٻٜ فُو رُوحُ اَمْ؞

ٻِٻّٜ مٛوطٛنْ وٛرْٻٜ اٜ رٜوْٻٜ ٻٜ نغَعَجِنَيْ حَبَرُ اَمْ،

کٛرِعٜنْ مٛوطٛنْ نغِعَيْ وَحَيُ،

ندٛتِّعٜنْ مٛوطٛنْ کٛيْطَيْ کٛيْطِ پِوٛيْطِ تٛ اَللَّه؞

¹⁸مِ حٛکَّيْ مَشُّٻٜ اَمْ وٛرْٻٜ اٜ رٜوْٻٜ رُوحُ اَمْ ندٜرْ بَلْطٜ طٜنْ،

ٻٜ نغَعَجِنَيْ حَبَرُ اَمْ؞

¹⁹مِ حٛلَّيْ فِي کُلْنِيطُمْ اٜ دٛوْ؛

ندٜرْ دُونِيَارُ بٛو مِ وَطَيْ اَلَامَاجِ کُلْنِيطِ،

وَاتٛ پِيپَمْ اٜ حِيتٜ اٜ شُرْکَ ٻَلٜحَ؞

²⁰نَانغٜ وَرْتَيْ ݧِوْرٜ، لٜوْرُ بٛو وٛوجَيْ بٛ پِيپَمْ؞

فُو فِي طُعُمْ وَطَيْ

کٛ ݧَلْندٜ جٛومِرَاوٛ مَوْندٜ تٜدُّندٜ وَرَ؞

²¹ندٜرْ بَلْطٜ طٜنْ، کٛو مٛيٜ تٛرِيطٛ جٛومِرَاوٛ حِسْنَمٛ، جٛومِرَاوٛ حِسْنَيْمٛ؞›‏ »‏

²²طٛنْمَا بِيتُرُسْ وِعِ، ‏«‏يِمْٻٜ اِسْرَاعِيلَ، نَنٜىٰ بٛلِيطٜ طٜعٜ:‏ اَللَّه حٛلِّيعٛنْ اٛ سُٻِي يٜىٰسُ نَجَرَنْکٜىٰجٛ نغَمْ اٛ حٛکِّيمٛ بَوْطٜ حُوُکِ کُوطٜ مَوْطٜ اٜ کُوطٜ کَيْطِنِيطٜ اٜ اَلَامَاجِ طِ اٛ وَطِ ندٜرْ مٛوطٛنْ؞ اٛنٛنْ اٜ کٛعٜ مٛوطٛنْ اٛنْ اَنْدِ کٛ وَطِ؞ ²³فُو اٜ نٛنْ اٛنْ کٛکِّتِرِيمٛ ندٜرْ جُوطٜ کَلُّٻٜ؞ اٛنْ نغَطِي ٻٜ ٻِلِيمٛ دٛوْ غَافَانغَلْ، ٻٜ مبَرِمٛ؞ فُو اٜ نٛنْ، نٛنْ اَللَّه سِرْيٛرِي فِي طُمْ وَطِرَ؞ ²⁴اَمَّا اَللَّه اُمِّنِيمٛ دَغَ مَيْدٜ، وُرْتِنِيمٛ يٜنَاندٜ، نغَمْ مَيْدٜ وَاوَتَا جٛغَاکِمٛ؞ ²⁵نغَمْ اَنَّبِ دَوْدَ مٜتِي دٛوْ يٜىٰسُ اَلْمَسِيحُ وِعِي،

‏‹‏کٛو ندٜيٜ اٜ مِ يِعَ جٛومِرَاوٛ يٜىٰسٛ اَمْ،

وَلَا کٛ کُلَيْمِ نغَمْ اٜ مٛ وٛنْدِ اٜ اَمْ؞

²⁶نغَمْ مَاجُمْ ٻٜرْندٜ اَمْ اٜ نَنَ بٜلْطُمْ

اٜ مِ وٜلْوٜلْتَ،

کٛو ندٜ مِ نٜطّٛ مَايَيْطٛ

مِ جٛوطٛدٛتٛ اٜ ٻٜرْندٜ وَالْتِيندٜ،

²⁷نغَمْ اَ اَلَتَا يٛنْکِ اَمْ ندٜرْ يٜنَاندٜ،

اَ اَلَتَايَمْ، مِنْ شٜنِيطٛ مَاطَ مِ ݧٛلَ؞

²⁸اَ حٛلِّييَمْ طَتٜ طٜ تٛکَّيْمِ مِ حٜٻَ يٛنْکِ،

تَا وٛنْدِ اٜ اَمْ مِ نَنَيْ بٜلْطُمْ طُطُّمْ؞›‏ »‏

²⁹بِيتُرُسْ ٻٜيْدِي وِعُکِ، ‏«‏بَنْدِرَاٻٜ، اَلْ مِ وِعَعٛنْ غٛونغَ؞ مَامَ مٜىٰطٜنْ دَوْدَ مَايِي اٛ اُوَامَ، يٜنَاندٜ مَاکٛ اٜ طٛعٛ حَا حَنْدٜ؞ ³⁰اٛ اَنَّبِيجٛ، اٜ مٛ اَنْدِ اَللَّه وَطَنِيمٛ اَلْکَوَلْ حُنِي وِعُکِ غٛطّٛ دَغَ ندٜرْ لٜݧٛلْ مَاکٛ وَرْتَيْ لَامِيطٛ، وَاتٛ اَلْمَسِيحُ؞ ³¹اٛ يِعِي کٛ وَرٛيْتَ يٜىٰسٛ، اٛ مٜتِي دٛوْ اُمَّاکِ اَلْمَسِيحُ دَغَ مَيْدٜ؞ اٛ وِعِي اَللَّه اَلَتَا اَلْمَسِيحُ ندٜرْ يٜنَاندٜ، ٻَنْدُ مَاکٛ بٛو ݧٛلَتَا؞ ³²اَلْمَسِيحُ اٛنْ وٛنِ يٜىٰسُ مٛ اَللَّه اُمِّنِ دَغَ مَيْدٜ؞ مِنْ فُو اٜ مِنْ شٜيْدِيطُمْ؞ ³³اَللَّه مَوْنِنِيمٛ، جٛوطِنِيمٛ اٜ جُنْغٛ مُوطُمْ ݧَامٛ حٛکِّمٛ رُوحُ مُوطُمْ نٛ اٛ وَطُنٛو اَلْکَوَلْ؞ کَنْکٛ بٛو اٛ حٛکِّيمِنْطُمْ؞ کَنْجُمْ وٛنِ کٛ نغِعٛتٛنْ اٜ کٛ نَنٛتٛنْ جٛونِ؞ ³⁴نغَمْ دَوْدَ يَحَايِ وُرٛ جٛومِرَاوٛ تٛنْ دٛوْ، اَمَّا اٛ وِعِي،

‏‹‏جٛومِرَاوٛ مٜتَنِي اَلْمَسِيحُ جٜيْطٛيَمْ، وِعِي،

جٛوطَ اٜ جُنْغٛ اَمْ ݧَامٛ،

³⁵نَا مِ وَطِي وَݧْوَݧْٻٜ مَاطَ نغَرْتِي تٛ نجٛوَتَا کٛيْطٜ مَاطَ؞›‏

³⁶‏«‏نغَمْ مَاجُمْ اٜ حَانِ يِمْٻٜ اِسْرَاعِيلَ فُو تَبِّتِنَ اَللَّه سُٻِي يٜىٰسُ مٛ مبَرْطٛنْ دٛوْ غَافَانغَلْ وَرْتَ اَلْمَسِيحُ جٜيْطٛ لَامُ؞»‏

³⁷ندٜ ٻٜ نَنِ بٛلِيطٜ طٜنْ، ٻٜرْطٜ مَٻّٜ تَپِ، ٻٜ مبِعِ بِيتُرُسْ اٜ لِلَاٻٜ حٛرِيٻٜ، ‏«‏بَنْدِرَاٻٜ، طُمٜ مِنْ نغَطَتَ؟»‏

³⁸بِيتُرُسْ وِعِ، ‏«‏کٛو مٛيٜ مٛوطٛنْ تُوبَ وَطَنٜىٰ بَڤْتِسْمَ ندٜرْ اِنْدٜ يٜىٰسُ اَلْمَسِيحُ نغَمْ کٜٻٛنْ يَافَنٜىٰکِ حَکّٜ مٛوطٛنْ؞ ندٜنْ اَللَّه حٛکَّيْعٛنْ رُوحُ مُوطُمْ شَاحُ؞ ³⁹نغَمْ اَللَّه وَطِي اَلْکَوَلْ مُوطُمْ نغَمْ مٛوطٛنْ، اٜ ٻِٻّٜ مٛوطٛنْ حَا اٜ يِمْٻٜ وٛطُّٻٜ، اٜ کٛو مٛيٜ مٛ اَللَّه مٜىٰطٜنْ نٛدِّ وَرَ تٛ مُوطُمْ؞»‏

⁴⁰غَطَ مَاجُمْ اٛ وَغِّنِٻٜ اٜ بٛلِيطٜ طُطّٜ، اٜ مٛ تٛرٛوٻٜ، اٜ مٛ وِعَ، ‏«‏کِسْنٜىٰ کٛعٜ مٛوطٛنْ دَغَ جَامَنُ کَلُّطُمْ طُعُمْ!‏»‏

کَوْتَلْ کٛولِيٻٜ يٜىٰسُ اَرَنْدٜعٜنْ

⁴¹فُو جَٻُٻٜ کٛ بِيتُرُسْ وِعِ ٻٜ نغَطَنَا بَڤْتِسْمَ؞ ݧَلْندٜ ندٜنْ حَادٜ يِمْٻٜ 3,000 ٻٜيْدِي ندٜرْ کَوْتَلْ کٛولِيٻٜ يٜىٰسُ؞ ⁴²ٻٜ نغَطِ کَ تٛکُّکِ اٜکِّتِنٛلْ لِلَاٻٜ، اٜ ٻٜ شُمْڤٛوتِرَ، اٜ ٻٜ ݧَمْدَ، اٜ ٻٜ نغَادَ دٛعَارٜ؞

⁴³کُلٛلْ نَنْغِ کٛو مٛيٜ، نغَمْ اَللَّه اٜ وَطَ اَلَامَاجِ کَيْطِنِيطِ طُطِّ دَغَ جُوطٜ لِلَاٻٜ؞ ⁴⁴فُو کٛولِيٻٜ يٜىٰسُ کَوْتِ حٛورٜ، اٜ ٻٜ شٜنْدَ فُو کٛ ٻٜ نغٛودِ حَکُّندٜ مَٻّٜ؞ ⁴⁵ٻٜ شٛورِ غٜسٜ مَٻّٜ اٜ کٛ ٻٜ نغٛودِ، ٻٜ شٜنْدَنِ کٛو مٛيٜ مَٻّٜ فُو کٛ حَانِ نغَمْ مُوطُمْ؞ ⁴⁶کٛو ندٜيٜ ݧَلْندٜ اٜ ٻٜ کَوْرِتَ ندٜرْ وُرٛ شٜنِينغٛ؞ اٜ ٻٜ ݧَمْدَ ندٜرْ غُرٜ مَٻّٜ اٜ ٻٜرْطٜ لَٻْطٜ اٜ وٜلْوٜلٛ مَنْغٛ، ⁴⁷اٜ ٻٜ مَنْتَ اَللَّه؞ يِمْٻٜ فُو اٜ نغِطِٻٜ؞ کٛو ندٜيٜ ݧَلْندٜ بٛو جٛومِرَاوٛ اٜ ٻٜيْدَنَٻٜ تُوبٛوٻٜ؞

جَرَاطٛ تٛرٛتٛوطٛ يَمْطِتِي

¹وٛنْدٜ ݧَلْندٜ بِيتُرُسْ اٜ يَحَيَ اٜ نجَحَ وُرٛ شٜنِينغٛ شَرٜلْ دٛعَارٜ، نجَمْندِ تَتِ ندِ ݧَلَوْمَ؞ ²اٜ وٛودِ غٛطّٛ نٜطّٛ دَغَ اٛ دَݧَا اٛ جَرَاطٛ، اٜ مٛ جٛوطِي اٜ دَمُّغَلْ وُرٛ شٜنِينغٛ بِعٜتٜىٰنغَلْ دَمُّغَلْ بٛنْغَلْ؞ کٛو ندٜيٜ ݧَلْندٜ يِمْٻٜ مَاکٛ اٜ نجَارَمٛ تٛ دَمُّغَلْ نغَلْ نغَمْ اٛ تٛرٛو نَتّٛوٻٜ وُرٛ شٜنِينغٛ شٜىٰدٜ؞ ³تٛو، ندٜ اٛ يِعِ بِيتُرُسْ اٜ يَحَيَ اٜ نَتَّ، سٜيْ اٛ تٛرِيٻٜ شٜىٰدٜ؞ ⁴ٻٜ شُتِيمٛ، بِيتُرُسْ وِعِمٛ، ‏«‏رَارُمِنْ!‏»‏ ⁵اٛ رَارِٻٜ اٜ مٛ کَمّٛو حٜٻُکِ غٛطُّمْ تٛ مَٻّٜ؞ ⁶بِيتُرُسْ وِعِمٛ، ‏«‏مِ وَلَا شٜىٰدٜ، اَمَّا مِ حٛکّٜتٜ کٛ نغٛودُمِ؞ ندٜرْ اِنْدٜ يٜىٰسُ اَلْمَسِيحُ نَجَرَنْکٜىٰجٛ، اٜ مِ وِعِمَا، اُمَّ، نجَاٻَا!‏»‏ ⁷سٜيْ بِيتُرُسْ نَنْغِ جُنْغٛ مَاکٛ ݧَامٛ دَرْنِمٛ؞ طٛنْ اٜ طٛنْ کٛيْطٜ مَاکٛ شٜمْبِطِ؞ ⁸اٛ دِوِ اٛ فُطِّ يَادُ؞ اٛ نَتِّدِ اٜ مَٻّٜ ندٜرْ وُرٛ شٜنِينغٛ؞ اٜ مٛ يَحَ، اٜ مٛ دِوَ، اٜ مٛ يٜتَّ اَللَّه؞ ⁹يِمْٻٜ فُو نغِعِمٛ اٜ مٛ يِيلٛو، اٜ مٛ يٜتَّ اَللَّه؞ ¹⁰ٻٜ اَنْدِتِي کَنْکٛ وٛنِ جٛوطٛتٛوطٛ اٜ دَمُّغَلْ بٛنْغَلْ نغَلْ وُرٛ شٜنِينغٛ اٜ تٛرٛو يِمْٻٜ شٜىٰدٜ؞ ٻٜ فُو ٻٜ کَيْطِنِ نَاع سٜطَّ کٛ طُوطِ دٛوْ کٛ حٜٻِ نٜطّٛ اٛنْ؞

بِيتُرُسْ وَعَجِنَنِي يِمْٻٜ

¹¹جَرَاطٛ جَمْطِتِنَاطٛ اٛنْ اٜ جٛغٛوتِرِ اٜ بِيتُرُسْ اٜ يَحَيَ ندٜرْ رُمْڤَارُ مَوْندُ بِعٜتٜىٰندُ رُمْڤَارُ سُلٜيْمَانُ، سٜيْ يِمْٻٜ طُطْٻٜ ندٛغّٛيِ کَوْرِتِ تٛ مَٻّٜ اٜ کَيْطِنَ؞ ¹²ندٜ بِيتُرُسْ يِعِ يِمْٻٜ کَوْرِتِي، سٜيْ اٛ وِعِٻٜ، ‏«‏اٛنٛنْ بَنْدِرَاٻٜ اَمْ اِسْرَاعِيلَنْکٛعٜنْ، نغَمْ طُمٜ کَيْطِنْتٛنْ؟ نغَمْ طُمٜ ندَارٛتٛنْمِنْ؟ اٛنْ کَمِّي اٜ بَوْطٜ اَمِنْ کٛو نغَمْ تِينَارٜ اَمِنْ دٛوْ تٛکُّکِ اَللَّه مِنْ نجَمْطِتِنِرِ جَرَاطٛ اٛعٛ؟ ¹³اَللَّه مٛ اِبْرَاهِمْ اٜ اِشِيَاکُ اٜ يَاکُبُ، اَللَّه مٛ مَامَعٜنْ مٜىٰطٜنْ، اٛ تٜدِّنِي مَشُّطٛ مَاکٛ يٜىٰسُ؞ اَمَّا کَنْکٛ وٛنِ مٛ کٛکِّتِرْنٛوطٛنْ نغَمْ اٛ وَرٜىٰ؞ اٛنْ نغَݧِيمٛ يٜىٰسٛ بِلَاتُسْ کٛو ندٜ بِلَاتُسْ اٜ يِطِ يٛوفُکِمٛ؞ ¹⁴اٛ شٜنِيطٛ اَادِلِيجٛ، اَمَّا اٛنْ نغَݧِيمٛ، اٛنْ تٛرَکٜ بِلَاتُسْ يٛوفَنَعٛنْ غَطّٛ وَرْحٛورٜ؞ ¹⁵اٛنْ مبَرِي کٛکَّيْطٛ يٛنْکِ، اَمَّا اَللَّه اُمِّنِيمٛ دَغَ مَيْدٜ؞ مِنٛنْ بٛو، مِنْ شٜيْدُعٜنْ مَاجُمْ؞ ¹⁶نغَمْ دَغَ ندٜرْ بَوْطٜ غٛنْطٜ ندٜرْ اِنْدٜ يٜىٰسُ، نٜطّٛ جَرَاطٛ اٛعٛ مٛ نغِعٛتٛنْ مٛ اَنْدُطٛنْ حٜٻِ نجَمُ؞ نغَمْ حٛولَاکِ اِنْدٜ يٜىٰسُ وَطِ اٛ حٜٻِ نجَمُ يٜىٰسٛ مٛوطٛنْ، اٛنْ فُو اٛنْ شٜيْدُعٜنْ مَاجُمْ؞

¹⁷‏«‏جٛونِ بَنْدِرَاٻٜ اَمْ، اٜ مِ اَنْدِ کٛ نغَطَنْطٛنْ يٜىٰسُ اٛنٛنْ اٜ مَوْٻٜ مٛوطٛنْ اٛنْ نغَطُطُمْ نغَمْ شِيَ اَنْدَلْ؞ ¹⁸نٛنْ اَللَّه حٜبِّنِرِ کٛ اَنَّبٛعٜنْ مُوطُمْ فُو مبِعِ کٛ نٜىٰٻِ، ٻٜ مبِعِي اَلْمَسِيحُ تٛرّٛتٛ؞ ¹⁹نغَمْ نٛنْ، تُوبٜىٰ، شٛعّٛوطٛنْ تٛ جٛومِرَاوٛ نغَمْ اٛ يَافَنٛوعٛنْ حَکّٜ مٛوطٛنْ، اٛ سٜمْبِطِنَعٛنْ ندٜرْ تٛکُّکِمٛ، ²⁰اٛ وَرْتِرَنَعٛنْ يٜىٰسُ اَلْمَسِيحُ مٛ اٛ وَطَنِعٛنْ اَلْکَوَلْ؞ ²¹دٛولٜ يٜىٰسُ جٛوطٛو ندٜرْ وُرٛ اَللَّه تٛنْ دٛوْ حَا يَاکِ شَرٜلْ نغٜلْ اَللَّه وَرْتِرْتَ کٛو طُمٜ کٜسُمْ، نٛ اٛ وِعُنٛو ندٜرْ کٛنْدُطٜ اَنَّبٛعٜنْ مَاکٛ شٜنِيٻٜ دَغَ ندٜنّٛ؞ ²²نغَمْ مُوسَ وِعِي، ‏‹‏اَللَّه جٛومِرَاوٛ مٛوطٛنْ لِلْدٛنٛيَيْعٛنْ اَنَّبِيجٛ دَغَ ندٜرْ مٛوطٛنْ نٛنْ نٛ اٛ لِلْدٛيِيَمْ تٛ مٛوطٛنْ؞ نجَٻٜىٰ کٛو طُمٜ کٛ اٛ وِعَتَعٛنْ؞ ²³نٜطّٛ فُو مٛ جَٻَايِ اَنَّبِيجٛ اٛنْ، طُمْ وُرْتِنَيْمٛ ندٜرْ يِمْٻٜ اَللَّه اٛ حَلْکٜىٰ؞›‏ ²⁴اَنَّبٛعٜنْ فُو دَغَ سَمَاعِلَ حَا يَاکِ اَنَّبٛعٜنْ تٛکُّٻٜ غَطَ مَاکٛ، ٻٜ فُو ٻٜ مٜتِي دٛوْ کٛ وَطَتَ ندٜرْ بَلْطٜ طٜعٜ؞ ²⁵فُو اَنَّبَاکُوجِ طِ اَنَّبٛعٜنْ نغَطِ طِ نغَطَ نغَمْ مٛوطٛنْ؞ اٛنٛنْ نغٛنِ رٛنٛوٻٜ اَلْکَوَلْ نغَلْ اَللَّه وَطَنِ مَامَعٜنْ مٜىٰطٜنْ ندٜ اٛ وِعِ اِبْرَاهِمْ، ‏‹‏دَغَ دَݧْنغٛلْ مَاطَ مِ بَرْکِطِنَيْ لٜپِّ دُونِيَارُ فُو؞›‏ ²⁶ندٜ اَللَّه سُٻِ يٜىٰسُ مَشُّطٛ مَاکٛ، اٛ اَرْتِي لِلٛيْکِمٛ تٛ مٛوطٛنْ نغَمْ اٛ بَرْکِطِنَعٛنْ، اٛ وَيْلِتَ کٛو مٛيٜ مٛوطٛنْ اَلَ کُوغَلْ مُوطُمْ کَلُّنغَلْ؞»‏

بِيتُرُسْ اٜ يَحَيَ يٜىٰسٛ کَوْتَلْ مَوْٻٜ يَحُودَنْکٛعٜنْ

¹بِيتُرُسْ اٜ يَحَيَ اٜ مٜدَّ اٜ يِمْٻٜ، سٜيْ اَرْدِيٻٜ دِينَ اٜ مَوْطٛ تَادِيٻٜ وُرٛ شٜنِينغٛ اٜ سَادُسَنْکٛعٜنْ نغَرِ تٛ مَٻّٜ؞ ²ٻٜرْطٜ مَٻّٜ اٜ مٜتِّ نغَمْ بِيتُرُسْ اٜ يَحَيَ اٜ نغَعَجِنَ وِعُکِ يِمْٻٜ مَيْٻٜ اُمّٛدٛتٛ اٜ يٛنْکِ، نغَمْ يٜىٰسُ اُمَّکٜ دَغَ مَيْدٜ؞ ³نغَمْ مَاجُمْ ٻٜ نَنْغِٻٜ، ٻٜ مَٻِّٻٜ ندٜرْ سُودُ شُرَلْ حَا سُبَکَ، نغَمْ حِيرِي کٛ ٻٜ نَنْغِٻٜ؞ ⁴طُطْٻٜ ندٜرْ نَنْٻٜ وَعَجُ مَٻّٜ تٛکِّ يٜىٰسُ، حَا طُوطٛرَلْ تٛکُّٻٜ يٜىٰسُ وَطِ يِمْٻٜ 5,000؞

⁵ندٜ فِنِ، اَرْدِيٻٜ اٜ مَوْٻٜ اٜ مٛودِٻّٜ اَتَّوْرَ کَوْرِتِ اٜ اُرُشَلِيمَ، ⁶کَمْٻٜ اٜ حَنَانَ مَوْطٛ مَوْٻٜ اَرْدِيٻٜ دِينَ، اٜ کَيَافَ، اٜ يَحَيَ، اٜ اَلِجَنْدَ، اٜ وٛٻّٜ ندٜرْ بَنْدِرَاٻٜ حَنَانَ؞ ⁷ٻٜ ندَرْنِ بِيتُرُسْ اٜ يَحَيَ يٜىٰسٛ مَٻّٜ، ٻٜ پَمِٻٜ ٻٜ مبِعِ، ‏«‏اٜ اِرِ طٜيٜ بَوْطٜ، کٛو ندٜرْ اِنْدٜ مٛيٜ نجَمْطِتِنِرْطٛنْ جَرَاطٛ اٛنْ طٛنْ؟»‏

⁸بِيتُرُسْ اٜ حٜىٰوِ رُوحُ اَللَّه، وِعِٻٜ، ‏«‏اٛنٛنْ اَرْدِيٻٜ يِمْٻٜ اٜ مَوْٻٜ، ⁹حَنْدٜ اٛنْ پَمَمِنْ دٛوْ فِي بٛطُّمْ طُمْ مِنْ نغَطَنِ اٛعٛ جَرَاطٛ اٜ نٛ اٛ يَمْطِتِنِرَا؞ ¹⁰ندَرٜىٰ مِ وِعَعٛنْ اٛنٛنْ يِمْٻٜ اِسْرَاعِيلَ فُو، نٜطّٛ اٛعٛ جَمْطِتِنَاطٛ، دَرِيطٛ يٜىٰسٛ مٛوطٛنْ طٛعٛ، اٛ يَمْطِتِنَ ندٜرْ اِنْدٜ يٜىٰسُ اَلْمَسِيحُ نَجَرَنْکٜىٰجٛ مٛ مبَرْطٛنْ دٛوْ غَافَانغَلْ، مٛ اَللَّه اُمِّنِ دَغَ مَيْدٜ؞ ¹¹کَنْکٛ وٛنِ مٛ جٛومِرَاوٛ وِعِ ندٜرْ دٜفْتٜرٜ شٜنِيندٜ،

‏‹‏حَيْرٜ ندٜ مَحٛوٻٜ نغَݧِ،

کَيْرٜ وَرْتِ حَيْرٜ ٻُرْندٜ دَرْنُکِ مَادِ؞›‏

¹²تٛ مَاکٛ تَنْ کِسْندَمْ حٜٻٜتٜىٰ، نغَمْ وَلَا وٛنْدٜ اِنْدٜ فٜىٰرٜ ندٜرْ دُونِيَارُ ندٜ اَللَّه حٛکِّ ندٜ طُمْ حِسِرْتَ تٛ نَاع اِنْدٜ يٜىٰسُ؞»‏

¹³مَوْٻٜ ٻٜنْ کَيْطِنِ ندٜ ٻٜ نغِعِ بِيتُرُسْ اٜ يَحَيَ اٜ مٜتَ ٻٜرْندٜ غٛعٛ، حَکّٛ ندٜ ٻٜ نَنِ ٻٜ لَدّٜعٜنْ، نَاع ٻٜ جَنْغُٻٜ؞ سٜيْ ٻٜ ڤَامِ بِيتُرُسْ اٜ يَحَيَ اٜ ٻٜ نجَادَيْنٛو اٜ يٜىٰسُ؞ ¹⁴اَمَّا ٻٜ کٜٻَايِ کٛ ٻٜ مبِعِ نغَمْ نٜطّٛ مٛ بِيتُرُسْ اٜ يَحَيَ يَمْطِتِنِ اٜ دَرٛدِي اٜ مَٻّٜ طٛنْ؞ ¹⁵ٻٜ مبِعِ بِيتُرُسْ اٜ يَحَيَ مبُرْتٛو يَاسِ؞ ٻٜ نغَطِ شَاوٛرِ؞ ¹⁶اٜ ٻٜ مبِعَ حَکُّندٜ مَٻّٜ، ‏«‏کٛ نغَطَنْتٜنْ ٻٜعٜ يِمْٻٜ؟ اٜنْ مبَاوَتَا يٜدُّکِ کٛ ٻٜ نغَطِ نغَمْ کٛو مٛيٜ جٛوطِيطٛ ندٜرْ اُرُشَلِيمَ نَنِي ٻٜ نغَطِي فِي کَيْطِنِيطُمْ؞ ¹⁷اَمَّا نغَمْ حَطُکِ حَالَ کَنْ سَنْکِتَاکِ ندٜرْ يِمْٻٜ، سٜيْ مبَغِّنٜنْٻٜ تٛع ٻٜ ڤُطِّتَ ٻٜ مٜتَنَ غٛطّٛ دٛوْ اِنْدٜ يٜىٰسُ؞»‏

¹⁸سٜيْ ٻٜ نٛدِّتِي بِيتُرُسْ اٜ يَحَيَ ندٜرْ سُودُ ندُنْ، ٻٜ مبِعِٻٜ تٛع ٻٜ ڤُطِّتَ ٻٜ مٜتَنَ غٛطّٛ کٛو ٻٜ اٜکِّتِنَ غٛطّٛ ندٜرْ اِنْدٜ يٜىٰسُ؞ ¹⁹اَمَّا بِيتُرُسْ اٜ يَحَيَ مبِعِٻٜ، ‏«‏اٛنٛنْ اٜ کٛعٜ مٛوطٛنْ، شُٻٜىٰ طُمٜ ٻُرِ وٛوطُکِ يٜىٰسٛ اَللَّه، مِنْ نغَطَ کٛ نغِطّٛنْ کٛو مِنْ نغَطَ کٛ اَللَّه يِطِ؟ ²⁰مِنٛنْ کَمْ، مِنْ مبَاوَتَا مِنْ اَلَ مٜتُکِ دٛوْ کٛ مِنْ نغِعِ اٜ غِتٜ اَمِنْ اٜ کٛ مِنْ نَنِ اٜ نٛڤِّ اَمِنْ؞»‏ ²¹مَوْٻٜ اَرْدِيٻٜ دِينَ اٜ مَوْٻٜ يِمْٻٜ ٻٜيْدِ وَغِّنْکِ بِيتُرُسْ اٜ يَحَيَ؞ غَطَ مَاجُمْ ٻٜ نجٛوفِٻٜ، ٻٜ کٜٻَايِ لَاوٛلْ نٛ ٻٜ تٛرِّرْتَٻٜ نغَمْ يِمْٻٜ فُو اٜ مَنْتَ اَللَّه دٛوْ فِي کَيْطِنِيطُمْ طُمْ ٻٜ نغَطِ؞ ²²نٜطّٛ جَمْطِتِنَاطٛ اٛنْ اٛ ٻُرِي دُوٻِ 40؞

کٛولِيٻٜ يٜىٰسُ نغَطِي دٛعَارٜ

²³ندٜ بِيتُرُسْ اٜ يَحَيَ نجٛوفَا ٻٜ شٛعِّي تٛ بَنْدِرَاٻٜ مَٻّٜ تٛکُّٻٜ يٜىٰسُ ٻٜ طِيوِتَنِٻٜ فُو کٛ مَوْٻٜ اَرْدِيٻٜ دِينَ اٜ مَوْٻٜ مبِعِٻٜ؞ ²⁴ندٜ تٛکُّٻٜ يٜىٰسُ ٻٜنْ نَنِ نٛنْ، ٻٜ فُو ٻٜ اُمِّي ٻٜ نغَطِ دٛعَارٜ اٜ ٻٜرْندٜ وٛعٛيْرٜ، ٻٜ مبِعِ، ‏«‏يَا جٛومِرَاوٛ، تَغُطٛ دٛوْ اٜ لٜيْ اٜ مَايٛ اٜ کٛ وٛنِ ندٜرْ مَاجُمْ فُو، ²⁵اَنْ مٜتِ اٜ حٛنْدُکٛ مَامَ اَمِنْ دَوْدَ مَشُّطٛ مَاطَ ندٜرْ رُوحُ اَللَّه اٛ وِعِ،

‏‹‏نغَمْ طُمٜ يِمْٻٜ نَاع يَحُودَنْکٛعٜنْ مٜتِّنِ ٻٜرْطٜ مَٻّٜ نَاع سٜطَّ؟

نغَمْ طُمٜ يِمْٻٜ ݧُمِ ݧُمٛوجِ مٜىٰرٜ؟

²⁶لَامِيٻٜ دُونِيَارُ شِرْيَکٜ حَوْرٜ،

اَرْدِيٻٜ کَوْرِتِي

نغَمْ ٻٜ کٛنَ جٛومِرَاوٛ اٜ اَلْمَسِيحُ مَاکٛ؞›‏

²⁷رَا بٛو، ندٜرْ غَرِيرِ ندِعِ حِرُدُسْ اٜ بِلَاتُسْ اٜ يِمْٻٜ اِسْرَاعِيلَ اٜ غٛطِّ لٜپِّ ٻٜ کَوْتِي کٛعٜ مَٻّٜ ٻٜ نغَݧِي يٜىٰسُ، مَشُّطٛ مَاطَ شٜنِيطٛ مٛ شُٻُطَا، ²⁸نغَمْ فُو کٛ ٻٜ کُوِ دَغَ اَرَنْدٜ اٜ بَوْطٜ مَاطَ اَ سِرْيَکٜنٛ نٛنْ طُمْ وَارَتَ؞ ²⁹جٛونِ جٛومِرَاوٛ، اَ نَنِي بٛلِيطٜ مَٻّٜ کَلُّطٜ، حٛکُّ مَشُّٻٜ مَاطَ سٜمْبٜ وَعَجِنْکِ بٛلِيطٜ مَاطَ کُلٛلْ وَلَا، ³⁰حٛلُّ بَوْطٜ مَاطَ، يَمْطِتِنْ ݧَوْٻٜ، وَطُ اَلَامَاجِ اٜ کُوطٜ کَيْطِنِيطٜ ندٜرْ اِنْدٜ يٜىٰسُ مَشُّطٛ مَاطَ شٜنِيطٛ؞»‏

³¹ندٜ ٻٜ نجٛتِّنِ دٛعَارٜ وُرٛ نغٛ ٻٜ کَوْرِتِ دِمْبِي؞ ٻٜ فُو ٻٜ کٜىٰوِ رُوحُ اَللَّه، ٻٜ نغَعَجِنِ وٛلْدٜ اَللَّه کُلٛلْ وَلَا؞

نٛ کٛولِيٻٜ يٜىٰسُ نجٛوطٛرِي

³²فُو کٛولِيٻٜ يٜىٰسُ ٻٜرْطٜ مَٻّٜ اٜ حَکِّيلٛ مَٻّٜ وَرْتِ غٛعٛ؞ وَلَا بِعٛووٛ کَنُمْ جٜيِ کٛ وٛودِ، اٜ ٻٜ شٜنْدَ کٛو طُمٜ طُمْ ٻٜ نغٛودِ؞ ³³لِلَاٻٜ ٻٜنْ ندٜرْ بَوْطٜ ٻٜ نغَطِ کَ وَعَجِنْکِ اُمَّاکِ يٜىٰسُ جٛومِرَاوٛ دَغَ مَيْدٜ؞ کٛو مٛيٜ مَٻّٜ اٜ وٛنْدِ اٜ بَرْکَ اَللَّه مَوْطُمْ؞ ^34‏-35وَلَا کٛو مٛيٜ ندٜرْ مَٻّٜ دُلُّطٛ غٛطُّمْ، نغَمْ غٛودُٻٜ غٜسٜ اٜ غُرٜ فُو شٛورِيطٜ کٛکِّي لِلَاٻٜ شٜىٰدٜ طٜنْ نغَمْ ٻٜ کٛکَّ کٛو مٛيٜ مٛ وَلَنَا ندٜرْ مَٻّٜ؞

³⁶اٜ وٛودِ غٛطّٛ لٜىٰوِيَنْکٜىٰجٛ، نٜطّٛ لٜيْدِ سَيِيفُرُسْ بِعٜتٜىٰطٛ يُسُفُ، مٛ لِلَاٻٜ نٛدِّرْتَ بَرْنَبَ ﴿مَعَنَ اِنْدٜ مَاکٛ وٛنِ شٜمْبِطِنٛووٛ ٻٜرْطٜ﴾، ³⁷اٛ سٛورِ نغٜسَ مَاکٛ، اٛ حٛکِّ لِلَاٻٜ شٜىٰدٜ طٜنْ؞

حَنَانِيَ اٜ سَفِيرَتُ

¹اَمَّا اٜ وٛودِ غٛطّٛ بِعٜتٜىٰطٛ حَنَانِيَ اٜ دٜبّٛ مَاکٛ سَفِيرَتُ؞ کَنْکٛ مَا اٛ سٛورِ نغٜسَ مَاکٛ؞ ²اٛ سٜنْدِ شٜىٰدٜ طٜنْ اٜ اَنْدَلْ دٜبّٛ مَاکٛ؞ اٛ سُوطِ غٛطّٜ اٛ يَارِ کٛرِيطٜ اٛ حٛکِّ لِلَاٻٜ؞ ³بِيتُرُسْ وِعِمٛ، ‏«‏حَنَانِيَ، نغَمْ طُمٜ اَلُطَا شٜيْطَنْ نَتِّ ٻٜرْندٜ مَاطَ حَا ڤٜوَنْطَا رُوحُ اَللَّه، شُوطُطَا غٛطّٜ شٜىٰدٜ ندٜرْ شٜىٰدٜ نغٜسَ کَنْ؟ ⁴کٛ شٛورُطَا طُمْ، نَاع اُمْ طُمْ مَاطَ؟ ندٜ شٛورُطَاطُمْ نَاع اَنْ جٜيِ شٜىٰدٜ طٜنْ؟ کٛ وَطِ نغَطُطَا نٛنْ؟ نَاع يِمْٻٜ ڤٜوَنْطَا، اَمَّا اَللَّه ڤٜوَنْطَا؞»‏ ⁵ندٜ حَنَانِيَ نَنِ بٛلِيطٜ طٜنْ، اٛ يَنِ اٛ مَايِ؞ کُلٛلْ مَنْغٛلْ نَنْغِ نَنْٻٜ حَبَرُ طُمْ فُو؞ ⁶وٛٻّٜ کَيٜعٜنْ اُمِّي، تَارِ ٻَنْدُ مَاکٛ اٜ غُدٜ، کٛشِّمٛ، مبُرْتِنِمٛ يَاسِ، اُوٛيِمٛ؞

⁷غَطَ اَوَاجِ تَتِ سٜيْ رَا دٜبّٛ مَاکٛ وَرِ نَتّٛيِ؞ اٛ اَنْدَا کٛ وَطِ؞ ⁸بِيتُرُسْ وِعِمٛ، ‏«‏وِعَمْ، طٜعٜ شٜىٰدٜ کَنْجٜ تَنْ شٛورُطٛنْ نغٜسَ مٛوطٛنْ؟»‏

اٛ وِعِ، ‏«‏اٜىٰ، طُمْ نٛنْ مِنْ شٛورِکَ؞»‏

⁹ندٜنْ بِيتُرُسْ وِعِمٛ، ‏«‏نغَمْ طُمٜ کَوْتُطٛنْ حٛورٜ نغَمْ فٛوندُکِ رُوحُ جٛومِرَاوٛ؟ رَا، اُوٛيْٻٜ غٛرْکٛ مَاطَ طٛنْ نغَرَ، جٛونِ ٻٜ کٛشّٜتٜ اَنْ مَا!‏»‏ ¹⁰طٛنْ اٜ طٛنْ کَنْکٛ مَا اٛ يَنِ حَادٜ کٛيْطٜ بِيتُرُسْ، اٛ مَايِ؞ کَيٜعٜنْ ٻٜنْ نَتِّ تَوِ اٛ مَيْطٛ، ٻٜ کٛشِّمٛ ٻٜ مبُرْتِنِمٛ، ٻٜ اُوٛيِمٛ حَادٜ غٛرْکٛ مَاکٛ؞ ¹¹کُلٛلْ مَنْغٛلْ نَنْغِ کَوْتَلْ تٛکُّٻٜ يٜىٰسُ اٜ نَنْٻٜ حَبَرُ طُمْ فُو؞

لِلَاٻٜ نغَطِي اَلَامَاجِ طُطِّ کَيْطِنِيطِ

¹²لِلَاٻٜ نغَطِ اَلَامَاجِ اٜ کُوطٜ کَيْطِنِيطٜ طُطّٜ ندٜرْ يِمْٻٜ؞ کٛولِيٻٜ يٜىٰسُ فُو اٜ کَوْرِتَ ندٜرْ رُمْڤَارُ سُلٜيْمَانُ مَوْندُ ندٜرْ ݧُمٛ غٛعٛ؞ ¹³کٛو مٛيٜ مٛ وَلَا ندٜرْ کَوْتَلْ مَٻّٜ اٜ حُلَ نَتُّکِٻٜ، کٛو ندٜ کٛو مٛيٜ اٜ حٛکَّٻٜ مَنْغُ نَاع سٜطَّ؞ ¹⁴فُو اٜ نٛنْ کٛو ندٜيٜ يِمْٻٜ طُطْٻٜ، وٛرْٻٜ اٜ رٜوْٻٜ، اٜ ٻٜيْدٛو ندٜرْ تٛکُّٻٜ يٜىٰسُ، ¹⁵حَا طُمْ وَرْتِ يِمْٻٜ اٜ کٛشّٛيَ ݧَوْٻٜ، اٜ ٻٜ مبُرْتِنٛيَٻٜ دٛوْ طَتٜ، اٜ ٻٜ ڤُکِّنَٻٜ دٛوْ لٜىٰشٜ اٜ دَاغٜ، نغَمْ تٛ بِيتُرُسْ وَرِي کٛو طٛوْدِ مَاکٛ مَا تَنْ مٜىٰمَ وٛٻّٜ مَٻّٜ؞ ¹⁶يِمْٻٜ طُطْٻٜ دَغَ نغَرِحٛيْ ڤِلِيکٛيْ اُرُشَلِيمَ مَا نغَدِّنغَدِّنِ ݧَوْٻٜ اٜ غٛودُٻٜ غِنِّ؞ ٻٜ فُو بٛو ٻٜ نجَمْطِتِنَا؞

تٛرُّکِ لِلَاٻٜ

¹⁷ندٜنْ مَوْطٛ مَوْٻٜ اَرْدِيٻٜ دِينَ اٜ وٛنْدُٻٜ اٜ مَاکٛ، وَاتٛ سَادُسَنْکٛعٜنْ، ٻٜ اُمِّنِ لَوْلِيرُ کَلُّندُ؞ ¹⁸ٻٜ نَنْغِ لِلَاٻٜ، ٻٜ مَٻِّٻٜ ندٜرْ سُودُ شُرَلْ؞ ¹⁹اَمَّا ندٜرْ جٜمَّارٜ ندٜنْ مَلَاعِکَاجٛ جٛومِرَاوٛ وَرِ مَٻِّتَنِ لِلَاٻٜ ٻٜنْ دَمُّطٜ سُودُ شُرَلْ ندُنْ، وُرْتِنِٻٜ، وِعِٻٜ، ²⁰‏«‏نجَحٜىٰ ندَرٜىٰ ندٜرْ وُرٛ شٜنِينغٛ، کٛکّٛنْ کٛو مٛيٜ حَبَرُ يٛنْکِ کٜسُمْ؞»‏ ²¹ندٜ ٻٜ نَنِ نٛنْ، ٻٜ نَتّٛيِ ندٜرْ وُرٛ شٜنِينغٛ سُبَکَ، طٛنْ اٜ طٛنْ ٻٜ ڤُطِّ اٜکِّتِنْکِ؞

مَوْطٛ مَوْٻٜ اَرْدِيٻٜ دِينَ اٜ وٛنْدُٻٜ اٜ مَاکٛ نٛدِّ کَوْتَلْ مَوْٻٜ اٜ اَرْدِيٻٜ يَحُودَنْکٛعٜنْ فُو؞ ٻٜ مبِعِ طُمْ وُرْتِنٛيَ لِلَاٻٜ ٻٜنْ دَغَ ندٜرْ سُودُ شُرَلْ، ٻٜ نغَدّٜىٰ؞ ²²اَمَّا ندٜ تَادِيٻٜ نجَحِ، ٻٜ تَوَايِ لِلَاٻٜ ٻٜنْ ندٜرْ سُودُ ندُنْ؞ سٜيْ ٻٜ شٛعِّي، ٻٜ مبِعِ مَوْٻٜ ٻٜنْ، ²³‏«‏مِنْ تَوِي سُودُ شُرَلْ ندُنْ اٜ مَٻِّي، تَادِيٻٜ اٜ ندَرِي اٜ ندٜىٰنَ دَمُّطٜ طٜنْ، اَمَّا ندٜ مِنْ مَٻِّتِ، مِنْ تَوَايِ کٛو غٛعٛتٛ ندٜرْ مَٻّٜ!‏»‏ ²⁴ندٜ مَوْطٛ تَادِيٻٜ وُرٛ شٜنِينغٛ اٜ مَوْٻٜ اَرْدِيٻٜ دِينَ نَنِ نٛنْ، طُمْ وَنِّيٻٜ، ٻٜ اَنْدَا نٛ فِي طُمْ وَرْتَتَ؞ ²⁵سٜيْ غٛطّٛ وَرِ، وِعِٻٜ، ‏«‏يِمْٻٜ ٻٜ مَٻُّطٛنْ ندٜرْ سُودُ شُرَلْ اٜ ٻٜ تٛنْ ندٜرْ وُرٛ شٜنِينغٛ اٜ ٻٜ نغَعَجِنَنَ يِمْٻٜ!‏»‏ ²⁶ندٜنْ مَوْطٛ تَادِيٻٜ اٛنْ يَادِ اٜ تَادِيٻٜ، ٻٜ نغَدِّ لِلَاٻٜ ٻٜنْ؞ اَمَّا ٻٜ نغَدِّرَايِٻٜ اٜ سٜمْبٜ، نغَمْ اٜ ٻٜ کُلَ تٛ يِمْٻٜ کُبٛرٛوٻٜ اٜ کَاپٜ؞

²⁷ندٜ ٻٜ نغَدِّٻٜ، ٻٜ ندَرْنِٻٜ يٜىٰسٛ کَوْتَلْ مَوْٻٜ؞ مَوْطٛ مَوْٻٜ اَرْدِيٻٜ دِينَ پَمْتِٻٜ، ²⁸وِعِ، ‏«‏مِنْ کَطِيعٛنْ اٜکِّتِنْکِ دٛوْ اِنْدٜ يٜىٰسُ، اَمَّا اٛنْ شَنْکِتِي وَعَجُ مٛوطٛنْ ندٜرْ اُرُشَلِيمَ فُو؞ کَدِمَا اٛنْ نغِطِ يٛوَنْکِمِنْ حَکّٜ پِيپَمْ وَرُکِمٛ؞»‏

²⁹بِيتُرُسْ اٜ لِلَاٻٜ نٛوتِي، مبِعِ، ‏«‏دٛولٜ مِنْ تٛکَّ کٛ اَللَّه وِعِ، نَاع کٛ يِمْٻٜ مبِعِ؞ ³⁰اَللَّه مٛ مَامَعٜنْ مٜىٰطٜنْ اُمِّنِي يٜىٰسُ دَغَ مَيْدٜ، غَطَ اٛنْ مبَرِيمٛ دٛوْ غَافَانغَلْ؞ ³¹اَللَّه حٛکِّيمٛ مَنْغُ، جٛعِّنِيمٛ اٜ جُنْغٛ مُوطُمْ ݧَامٛ، وَرْتِرِيمٛ لَامِيطٛ اٜ کِسْنٛووٛ، نغَمْ يِمْٻٜ اِسْرَاعِيلَ تُوبَ، ٻٜ کٜٻَ يَافَنٜىٰکِ حَکّٜ مَٻّٜ؞ ³²مِنٛنْ نغٛنِ شٜيْدِيٻٜ فِي طُعُمْ، مِنٛنْ اٜ رُوحُ اَللَّه طُمْ اَللَّه حٛکِّ يِمْٻٜ غَطٛوٻٜ کٛ اٛ وِعِ؞»‏

³³ندٜ مَوْٻٜ ٻٜنْ نَنِ نٛنْ، ٻٜرْطٜ مَٻّٜ مٜتِّ نَاع سٜطَّ، ٻٜ نغِطِي ٻٜ مبَرَ لِلَاٻٜ ٻٜنْ؞ ³⁴اَمَّا غٛطّٛ بِعٜتٜىٰطٛ غَمَالِيَ اُمِّي دَرِي شَکَ کَوْتَلْ مَوْٻٜ؞ کَنْکٛ اٛ فَارِسَنْکٜىٰجٛ اٛ مٛودِبّٛ اَتَّوْرَ، يِمْٻٜ فُو اٜ کٛکَّمٛ مَنْغُ؞ اٛ وِعِ طُمْ وُرْتِنَ لِلَاٻٜ ٻٜنْ يَاسِ شَرٜلْ سٜطَّ؞ ³⁵غَطَ ٻٜ مبُرْتِنَامَ، اٛ وِعِ کَوْتَلْ نغَلْ، ‏«‏اٛنٛنْ بَنْدِرَاٻٜ اَمْ اِسْرَاعِيلَنْکٛعٜنْ، ندٜىٰنٜىٰ کٛعٜ مٛوطٛنْ دٛوْ کٛ نغِطّٛنْ وَطَنْکِ يِمْٻٜ ٻٜعٜ؞ ³⁶کٛ نٜىٰٻَايِ غٛطّٛ بِعٜتٜىٰطٛ تُدَسْ وَنْغِي؞ اٛ حٛشِّي حٛورٜ مَاکٛ بٛ اٛ مَوْطٛ؞ يِمْٻٜ کٛ وَطِ 400 تٛکِّمٛ؞ تٛو، اٛ وَرَامَ، تٛکُّنٛوٻٜمٛ فُو شَنْکِتَکٜ، وَلَا کٛو غٛعٛتٛ دَرِيطٛ؞ ³⁷غَطَ مَاکٛ، يَحُودَ غَلِلَنْکٜىٰجٛ وَرِي شَرٜلْ کٛ غٛمْنَتِ لِمَتَ يِمْٻٜ، يِمْٻٜ طُطْٻٜ تٛکِّيمٛ؞ کَنْکٛ مَا اٛ وَرَامَ، تٛکُّٻٜمٛ فُو شَنْکِتَکٜ؞ ³⁸جٛونِ، اٜ مِ وِعَعٛنْ، نغٛطِّتٜىٰ يِمْٻٜ ٻٜعٜ، اَلٜىٰٻٜ؞ نغَمْ تٛ ݧُمٛوجِ مَٻّٜ اٜ کُوغَلْ مَٻّٜ پِوِي تٛ يِمْٻٜ، طُمْ لَلَّيْ؞ ³⁹اَمَّا تٛ طُمْ پِوٛيِي تٛ اَللَّه، ندٜنْ کَمْ اٛنْ مبَاوَتَا سَنْکُتُکِطُمْ؞ ڤَامٜىٰ تٛع کَٻْدٛنْ اٜ اَللَّه!‏»‏

⁴⁰مَوْٻٜ ٻٜنْ نجَٻِ کٛ اٛ وِعِ؞ ٻٜ نٛدِّتِ لِلَاٻٜ ٻٜنْ، ٻٜ ڤِيِٻٜ، ٻٜ مبِعِٻٜ تٛع ٻٜ ٻٜيْدَ مٜتُکِ دٛوْ اِنْدٜ يٜىٰسُ؞ ندٜنْ ٻٜ نجٛوفِٻٜ؞ ⁴¹لِلَاٻٜ ٻٜنْ مبُرْتٛيِي ندٜرْ کَوْتَلْ مَوْٻٜ اٜ وٜلْوٜلٛ نغَمْ اَللَّه مَوْنِنِيٻٜ حَا ٻٜ کٜوْتِي سٜمْتِنٜىٰکِ نغَمْ يٜىٰسُ؞ ⁴²کٛو ندٜيٜ ݧَلْندٜ اٜ ٻٜ نغَعَجِنَ حَبَرُ بٜلْطُمْ وِعُکِ يٜىٰسُ وٛنِ اَلْمَسِيحُ، اٜ ٻٜ اٜکِّتِنَ ندٜرْ وُرٛ شٜنِينغٛ اٜ ندٜرْ غُرٜ فُو؞

وٛرْٻٜ نجٛوٜىٰطِطٛ شُٻَامَ

¹ندٜرْ بَلْطٜ طٜنْ، تٛکُّٻٜ يٜىٰسُ اٜ ٻٜيْدَ طُطْکِ؞ سٜيْ يَحُودَنْکٛعٜنْ مٜتٛوٻٜ حٜلٜنَنْکٛورٜ مٜتِتَنِ يَحُودَنْکٛعٜنْ مٜتٛوٻٜ اِبْرَانِيَنْکٛورٜ، نغَمْ رٜوْٻٜ مَٻّٜ ٻٜ وٛرْٻٜ مُعّٜنْ مَايِ کٛکَّتَاکٜ کٛ حَانِ کٛکّٜىٰ ندٜرْ ݧَمْندُ ندُ طُمْ وٛووِ يٜىٰدُکِ کٛو ندٜيٜ ݧَلْندٜ؞ ²سٜيْ لِلَاٻٜ سَڤّٛ اٜ طِطٛ نٛدِّ کَوْتَلْ تٛکُّٻٜ يٜىٰسُ فُو، ٻٜ مبِعِ، ‏«‏مِنٛنْ، طُمْ حَانَايِ مِنْ اَلَ وَعَجِنْکِ وٛلْدٜ اَللَّه نغَمْ سٜنْدُکِ ݧَمْندُ؞ ³نغَمْ نٛنْ، بَنْدِرَاٻٜ، شُٻٜىٰ وٛرْٻٜ نجٛوٜىٰطِطٛ ندٜرْ مٛوطٛنْ ٻٜ طُمْ حٛولِي کٜىٰوُٻٜ رُوحُ اَللَّه، غٛودُٻٜ فَامُ نغَمْ مِنْ کٛکَّٻٜ کُوغَلْ نغَلْ؞ ⁴اَمَّا مِنٛنْ، مِنْ نغَطَيْ کَ وَطُکِ دٛعَارٜ اٜ مِنْ اٜکِّتِنَ وٛلْدٜ اَللَّه؞»‏

⁵حَالَ کَنْ بٛو وٜلِي کَوْتَلْ تٛکُّٻٜ يٜىٰسُ فُو؞ ندٜنْ ٻٜ شُٻِ اِسْتِفَانُسْ، نٜطّٛ کٛولِيطٛ جٛومِرَاوٛ، کٜىٰوُطٛ رُوحُ اَللَّه، کَنْکٛ اٜ فِلِبُسْ اٜ بُرٛکٛرَسْ اٜ نِکَنٛ اٜ تِمٛنْ اٜ بَرْمٜنَسْ اٜ نِکٛلَسْ پِوٛيْطٛ اَنْتَاکِيَ، نَتُّطٛ دِينَ يَحُودَنْکٛعٜنْ کَنْکٛ نَاع اٛ يَحُودَنْکٜىٰجٛ؞ ⁶ٻٜ نغَدِّٻٜ يٜىٰسٛ لِلَاٻٜ؞ سٜيْ لِلَاٻٜ ٻٜنْ نجٛوَنِٻٜ جُوطٜ، نغَطَنِٻٜ دٛعَارٜ؞

⁷وٛلْدٜ اَللَّه بٛو ٻٜيْدِ سَنْکِتَاکِ؞ تٛکُّٻٜ يٜىٰسُ اٜ ٻٜيْدَ طُوطُکِ ندٜرْ غَرِيرِ اُرُشَلِيمَ، حَا اَرْدِيٻٜ دِينَ طُطْٻٜ تٛکِّ يٜىٰسُ؞

نَنْغٛلْ اِسْتِفَانُسْ

⁸اَللَّه بَرْکِطِنِ اِسْتِفَانُسْ حٛکِّمٛ بَوْطٜ وَطُکِ کُوطٜ مَوْطٜ کَيْطِنِيطٜ اٜ اَلَامَاجِ ندٜرْ يِمْٻٜ؞ ⁹اَمَّا اٜ وٛودِ وٛٻّٜ ندٜرْ سُودُ دٛعَارٜ بِعٜتٜىٰندُ سُودُ رِمْطِنَاٻٜ، اٜ وٛٻّٜ پِوٛيْٻٜ غَرِيرِ سَايِرِنْ اٜ غَرِيرِ اَلِجَندِيرِيَ اٜ لٜيْدِ کِلِيکِيَ اٜ لٜيْدِ اَاسِيَ، ٻٜ اُمَّنِيمٛ اٜ ٻٜ نغٜدّٛوتِرَ اٜ مَاکٛ؞ ¹⁰اَمَّا ٻٜ ندُلِّ نٛ ٻٜ نجَالٛرْتٛومٛ نغَمْ اٜ مٛ مٜتِرَ فَامُ اٜ رُوحُ اَللَّه؞ ¹¹سٜيْ ٻٜ کٛکِّ وٛٻّٜ شٜىٰدٜ اٜ سُوطٜ نغَمْ ٻٜ مبِعَ ٻٜ نَنِي اٜ مٛ حُطَ مُوسَ اٜ اَللَّه؞ ¹²نٛنْ ٻٜ اُمِّنِرِ ٻٜرْطٜ يِمْٻٜ اٜ مَوْٻٜ اٜ مٛودِٻّٜ اَتَّوْرَ؞ سٜيْ ٻٜ نَنْغِ اِسْتِفَانُسْ، ٻٜ نجَارِمٛ يٜىٰسٛ کَوْتَلْ مَوْٻٜ، ¹³ٻٜ نغَدِّ شٜيْدُعٜنْ فٜوْرٜ؞ شٜيْدُعٜنْ ٻٜنْ مبِعِ، ‏«‏کٛو ندٜيٜ نٜطّٛ اٛعٛ اٜ مٜتَ کَلُّکَ دٛوْ وُرٛ شٜنِينغٛ اٜ اَتَّوْرَ؞ ¹⁴مِنْ نَنِي اٜ مٛ وِعَ يٜىٰسُ نَجَرَنْکٜىٰجٛ سَنْکِتَيْ وُرٛ شٜنِينغٛ، اٛ وَيْلِتَيْ ندٛنُوجِ طِ مُوسَ حٛکِّعٜنْ؞»‏ ¹⁵سٜيْ فُو جٛوطِيٻٜ ندٜرْ کَوْتَلْ نغَلْ شُتِي اِسْتِفَانُسْ، ٻٜ نغِعِ يٜىٰسٛ مَاکٛ وَرْتِي بٛ يٜىٰسٛ مَلَاعِکَاجٛ؞

اِسْتِفَانُسْ مٜتَنِي کَوْتَلْ مَوْٻٜ

¹ندٜنْ مَوْطٛ مَوْٻٜ اَرْدِيٻٜ دِينَ پَمِ اِسْتِفَانُسْ وِعِ، ‏«‏کٛ ٻٜ مبِعِ دٛوْ مَاطَ طُمْ غٛونغَ؟»‏

²سٜيْ اِسْتِفَانُسْ وِعِ، ‏«‏بَنْدِرَاٻٜ اَمْ اٜ دَݧٛوٻٜ اَمْ، نَنٜىٰ کٛ مبِعَيْمِ!‏ اَللَّه جٛومُ مَنْغُ وَنْغَنِي مَامَ مٜىٰطٜنْ اِبْرَاهِمْ شَرٜلْ کٛ اٛ وٛنّٛو لٜيْدِ مٜسٛفٛتَامِيَ، کٛ اٛ جٛوطٛو لٜيْدِ حَرَنْ؞ ³اَللَّه وِعِمٛ، ‏‹‏وُرْتَ لٜيْدِ مَاطَ اٜ يِمْٻٜ مَاطَ، نجَحَا لٜيْدِ ندِ کٛلَّيْمَامِ؞›‏ ⁴ندٜنْ اِبْرَاهِمْ وُرْتِي لٜيْدِ کَلْدِيَ، اٛ يَحِ اٛ جٛوطِي ندٜرْ لٜيْدِ حَرَنْ؞ غَطَ مَيْدٜ ݧَاکٛ مَاکٛ، اَللَّه اُمِّنِمٛ طٛنْمَا يَارِمٛ ندٜرْ لٜيْدِ ندِ نجٛوطِيطٛنْ جٛونِ؞ ⁵اَللَّه حٛکَّايِمٛ ندٛنُ لٜيْدِ ندِنْ کٛو يَاٻَندٜ وٛعٛيْرٜ، اَمَّا اٛ وَطَنِيمٛ اَلْکَوَلْ حٛکُّکِمٛندِ، ندِ وَرْتَ ندِ مَاکٛ، کَنْکٛ اٜ ٻِٻّٜ مَاکٛ، کٛو ندٜ اٛ وَلَا ٻِطّٛ اٜ شَرٜلْ نغٜلْ؞ ⁶طُعُمْ وٛنِ کٛ اَللَّه وِعِمٛ، ‏‹‏ٻِٻّٜ ٻِٻّٜىٰجِ مَاطَ نجَحَيْ لٜيْدِ وٛٻّٜ؞ يِمْٻٜ لٜيْدِ ندِنْ نغَرْتِرَٻٜ مَشُّٻٜ، ٻٜ تٛرَّٻٜ دُوٻِ 400؞ ⁷اَمَّا مِ تٛرَّيْ ٻٜنْ طٛنْ يِمْٻٜ غَرْتِرْٻٜ ٻِٻّٜ ٻِٻّٜىٰجِ مَاطَ مَشُّٻٜ؞ غَطَ مَاجُمْ ٻٜ مبُرْتٛتٛ لٜيْدِ ندِنْ ٻٜ مَوْنِنَيَمْ ندٜرْ لٜيْدِ ندِعِ؞›‏ ⁸ندٜنْ اَللَّه وَطَنِ اِبْرَاهِمْ اَلْکَوَلْ؞ نَادُکِ وٛنِ کٛ حٛلَّتَ اٛ جَٻِي اَلْکَوَلْ نغَلْ؞ ندٜ اِبْرَاهِمْ دَݧِ اِشِيَاکُ، غَطَ بَلْطٜ جٛوٜىٰتَتِ اٛ نَادِمٛ؞ نٛنْ اِشِيَاکُ مَا نَادِ يَاکُبُ؞ يَاکُبُ مَا نَادِ ٻِٻّٜ مُوطُمْ سَڤّٛ اٜ طِطٛ، کَمْٻٜ نغٛنِ مَامَعٜنْ مٜىٰطٜنْ؞

⁹‏«‏مَامَعٜنْ مٜىٰطٜنْ نَنِ لَوْلِيرُ اِسُفُ، ٻٜ شٛورِمٛ اٛ وَرْتِ مَشُّطٛ ندٜرْ لٜيْدِ مَسَرْ؞ اَمَّا اَللَّه اٜ وٛنْدِ اٜ مَاکٛ، ¹⁰حِسْنِمٛ دَغَ تٛرَّاجِ فُو، حٛکِّمٛ فَامُ حَا فِرعَوْنَ لَامِيطٛ مَسَرْ اَنْدِ کَ مَاکٛ؞ فِرعَوْنَ وَرْتِرِمٛ مَوْطٛ ندٜرْ لٜيْدِ مَسَرْ حَا دٛوْ وُرٛ مُوطُمْ فُو؞ ¹¹سٜيْ وٜىٰلٛ کَلُّنغٛ وَطِ ندٜرْ لٜيْدِ مَسَرْ اٜ لٜيْدِ کَنْعَانَ فُو؞ نغٛ تٛرِّ يِمْٻٜ حَا مَامَعٜنْ مٜىٰطٜنْ ندُلِّ کٛ ݧَامَتَ؞ ¹²ندٜ يَاکُبُ نَنِ اٜ وٛودِ ݧَمْندُ ندٜرْ لٜيْدِ مَسَرْ، اٛ لِلِ مَامَعٜنْ مٜىٰطٜنْ تٛنْ؞ اَرَنْدٜ ٻٜ نجَحِ ٻٜ نغَرْتِ، سٜيْ ٻٜ شٛعِّي کَدِنْ؞ ¹³اٜ يَادُ مَٻّٜ طِطَوْرُ، اِسُفُ حٛلِّٻٜ اٛ سَکِرَاوٛ مَٻّٜ؞ فِرعَوْنَ بٛو اَنْدِ بَنْدِرَاٻٜ اِسُفُ؞ ¹⁴ندٜنْ اِسُفُ لِلِٻٜ ٻٜ نغَدّٛيَ ݧَاکٛ مَاکٛ يَاکُبُ اٜ وُرٛ مُوطُمْ فُو؞ طُطْکِ مَٻّٜ وَطِي يِمْٻٜ 75؞ ¹⁵سٜيْ يَاکُبُ يَحِ لٜيْدِ مَسَرْ؞ اٛ مَايِ تٛنْ، کَنْکٛ اٜ مَامَعٜنْ مٜىٰطٜنْ؞ ¹⁶ٻٜ نجَارَا شٜىٰکٜمْ، ٻٜ اُوَا تٛنْ ندٜرْ يٜنَاندٜ ندٜ اِبْرَاهِمْ سٛودُنٛو تٛ ٻِٻّٜ حَمٛرْ اٜ اَجُرْفَارِ؞

¹⁷‏«‏ندٜ اَلْکَوَلْ نغَلْ اَللَّه وَطَنِ اِبْرَاهِمْ ٻَدِي حٜىٰوُکِ، يِمْٻٜ اِبْرَانِيَنْکٛعٜنْ طُوطِ ندٜرْ لٜيْدِ مَسَرْ؞ ¹⁸اٜ شَرٜلْ نغٜلْ غٛطّٛ وَرْتِ لَامِيطٛ لٜيْدِ مَسَرْ مٛ اَنْدَا اِسُفُ؞ ¹⁹لَامِيطٛ اٛنْ حَلَّنِ لٜݧٛلْ مٜىٰطٜنْ، اٛ تٛرِّ مَامَعٜنْ مٜىٰطٜنْ اٛ دٛولِٻٜ ٻٜ کُبِنَ ٻِکّٛيْ مَٻّٜ نغَمْ کٛيْ مَايَ؞ ²⁰ندٜرْ شَرٜلْ نغٜلْ مُوسَ دَݧَا، اٛ ٻِنْغٜلْ بٛنْغٜلْ نَاع سٜطَّ؞ نغٜلْ رٜىٰنَا ندٜرْ وُرٛ ݧَاکٛ مَاغٜلْ لٜبِّ تَتِ؞ ²¹ندٜ نغٜلْ حُبِنَا، ٻِي فِرعَوْنَ دٜبّٛ حٛشِّنغٜلْ، وَرْتِرِنغٜلْ ٻِنْغٜلْ مُوطُمْ؞ ²²سٜيْ طُمْ جَنْغِنِ مُوسَ اٛنْ اَنْدَلْ مَسَرَنْکٛعٜنْ فُو، اٛ وَرْتِ بَوْطٛ حَالَ اٜ کُوطٜ؞

²³‏«‏ندٜ مُوسَ وَطِ دُوٻِ 40، اٛ يَحِ تٛ لٜݧٛلْ مَاکٛ، ٻِٻّٜ اِسْرَاعِيلَ نغَمْ اٛ يِعَ نٛ ٻٜ نغٛنْتِندِرِ؞ ²⁴ندٜ اٛ يِعِ غٛطّٛ مَسَرَنْکٜىٰجٛ اٜ تٛرَّ غٛطّٛ اِسْرَاعِيلَنْکٜىٰجٛ، اٛ وَلِّ اِسْرَاعِيلَنْکٜىٰجٛ تٛرّٜتٜىٰطٛ اٛنْ، اٛ فِيِ مَسَرَنْکٜىٰجٛ اٛنْ، اٛ وَرِمٛ؞ ²⁵اٛ ݧُمِ بَنْدِرَاٻٜ مَاکٛ اَندِتَيْ اَللَّه حُوتِرَيْمٛ نغَمْ حِسْنَٻٜ دَغَ جُنْغٛ مَسَرَنْکٛعٜنْ، اَمَّا ٻٜ اَنْدِتَايِ؞ ²⁶ندٜ فِنِ اٛ تَوِ اِسْرَاعِيلَنْکٛعٜنْ طِطٛ اٜ کَٻَ؞ اٛ يِطِي اٛ سِرْيٛوتِرَٻٜ، اٛ وِعِٻٜ، ‏‹‏حِغٛوٻٜ اَمْ، اٛنٛنْ اٛنْ بَنْدِرَاٻٜ!‏ نغَمْ طُمٜ کَلَّنْتٛنْ کٛعٜ مٛوطٛنْ؟›‏ ²⁷اَمَّا تٛرَّيْطٛ غٛعٛتٛ اٛنْ تُرْتِي مُوسَ وُتُّدُ، وِعِمٛ، ‏‹‏مٛيٜ وَرْتِرْمَا اَرْدِيطٛ اٜ کِيتٛتٛوطٛ دٛوْ اَمِنْ؟ ²⁸مِنْ مَا، اَ يِطِ مبَرَايَمْ نٛ مبَرْدُطَا مَسَرَنْکٜىٰجٛ کٜىٰݧَ؟›‏ ²⁹ندٜ مُوسَ نَنِ نٛنْ دٛغِّ يَحِ لٜيْدِ مِدِيَنْ؞ تٛنْ اٛ دَݧَنَا ٻِٻّٜ وٛرْٻٜ طِطٛ؞

³⁰‏«‏غَطَ اٛ وَطِي دُوٻِ 40 تٛنْ، مَلَاعِکَاجٛ وَنْغَنِمٛ ندٜرْ طٜمْنغَلْ حِيتٜ دٛوْ لٜغّٜلْ ندٜرْ لَدّٜ، حَادٜ حٛشّٜىٰرٜ سِنَيْ؞ ³¹ندٜ مُوسَ يِعِ نٛنْ طُمْ حَيْطِنِيمٛ، اٜ مٛ ٻَتّٛو نغَمْ اٛ رَارَ، سٜيْ اٛ نَنِ حٛنٛنْدٜ جٛومِرَاوٛ وِعِي، ³²‏‹‏مِنْ وٛنِ اَللَّه مَامَعٜنْ مَاطَ، اَللَّه اِبْرَاهِمْ اٜ اِشِيَاکُ اٜ يَاکُبُ؞›‏ مُوسَ دَرِي اٜ دِوْنَ، حُلِ رَارُکِ؞ ³³جٛومِرَاوٛ وِعِمٛ، ‏‹‏اِتُّ ڤَطٜ مَاطَ، نغَمْ وِغٜىٰرٜ تٛ ندَرِطَا ندٜ شٜنِيندٜ؞ ³⁴مِ يِعِي تٛرَّ يِمْٻٜ اَمْ وٛنْٻٜ لٜيْدِ مَسَرْ، مِ نَنِي بٛجِّ مَٻّٜ؞ جٛونِ مِ جِڤّٛيَکٜ نغَمْ حِسْنُکِٻٜ؞ وَرْ مِ لِلْمَا لٜيْدِ مَسَرْ؞›‏

³⁵‏«‏مُوسَ مٛ ٻِٻّٜ اِسْرَاعِيلَ نغَݧُنٛو مبِعِ، ‏‹‏مٛيٜ وَرْتِرْمَا اَرْدِيطٛ اٜ کِيتٛتٛوطٛ دٛوْ اَمِنْ؟›‏ کَنْکٛ وٛنِ مٛ اَللَّه لِلٛيِ، وَرْتِرِمٛ اَرْدِيطٛ اٜ جٛوفَيْطٛٻٜ دَغَ مَشُّنغَاکُ اٜ بَلَّلْ مَلَاعِکَاجٛ وَنْغَنّٛوطٛمٛ ندٜرْ لٜغّٜلْ نغٜلْ حِيتٜ؞ ³⁶کَنْکٛ اَرْدِيٻٜ، ٻٜ مبُرْتِي لٜيْدِ مَسَرْ؞ اٛ وَطِي کُوطٜ کَيْطِنِيطٜ اٜ اَلَامَاجِ ندٜرْ لٜيْدِ مَسَرْ اٜ ندٜرْ مَايٛ وٛطٜوٛ اٜ ندٜرْ لَدّٜ جٛرْندٜ دُوٻِ 40؞ ³⁷مُوسَ اٛنْ کَنْکٛ وٛنِ بِيطٛ ٻِٻّٜ اِسْرَاعِيلَ، ‏‹‏اَللَّه لِلْدٛيَيْعٛنْ اَنَّبِيجٛ بٛ اَمْ، دَغَ ندٜرْ بَنْدِرَاٻٜ مٛوطٛنْ؞›‏ ³⁸مُوسَ اٛنْ اٜ مٛ ندٜرْ کَوْتَلْ مَامَعٜنْ مٜىٰطٜنْ ندٜرْ لَدّٜ، اٜ مٛ وٛنْدِ اٜ مَلَاعِکَاجٛ مٜتَنْطٛمٛ دٛوْ حٛشّٜىٰرٜ سِنَيْ؞ کَنْکٛ اَللَّه حٛکِّ حَبَرُ وٛلْدٜ کٛکَّيْندٜ يٛنْکِ نغَمْ اٛ وَدَّنَعٜنْ؞

³⁹‏«‏اَمَّا مَامَعٜنْ مٜىٰطٜنْ نجَٻَايِ تٛکُّکِ کٛ اٛ وِعِ؞ ٻٜ شَلَنِيمٛ، ٻٜرْطٜ مَٻّٜ شٛعِّي مَسَرْ؞ ⁴⁰ٻٜ مبِعِ هَرُونَ، ‏‹‏وَطَنْعٜنْ اَلَّاجِ اَرْدٛتٛوطِعٜنْ، نغَمْ اٜنْ اَنْدَا کٛ حٜٻِ مُوسَ بُرْتِنٛيْطٛعٜنْ لٜيْدِ مَسَرْ؞›‏ ⁴¹ندٜرْ بَلْطٜ طٜنْ ٻٜ نغَطِ غَغٜلْ جِينَارِ، ٻٜ نغَرْتِرِنغٜلْ اَلَّح مَٻّٜ، ٻٜ کِرْسَنِنغٜلْ شَکِّرِ، ٻٜ نغَطِ حُمْتٛ نغَمْ مَوْنِنْکِ کٛ ٻٜ نغَطِ اٜ جُوطٜ مَٻّٜ؞ ⁴²نغَمْ نٛنْ اَللَّه وَيْلِتَنِٻٜ ٻَاوٛ، اَلِٻٜ ٻٜ مَوْنِنَ کٛودٜ، نٛنْ نٛ طُمْ وِنْدِرَا ندٜرْ دٜفْتٜرٜ اَنَّبٛعٜنْ وِعُکِ:‏

‏‹‏اٛنٛنْ يِمْٻٜ اِسْرَاعِيلَ، دُوٻِ 40 طِ نغَطّٛنْ ندٜرْ لَدّٜ،

مِنْ کِرْسَنْطٛنْ مَرْلٜ شَکَّنْطٛنْ؟

⁴³اَاعَ، نَاع طُمْ مِنْ؞ اٛنْ ندٛوندَکٜ لُکُرُ اَلَّح مٛوطٛنْ مٛلٜکْ،

کَنْغَ اٜ اَلَّح حٛودٜرٜ مٛوطٛنْ بِعٜتٜىٰندٜ رِفَنْ،

اَلَّاجِ طِ نغَطّٛنْ نغَمْ مَوْنِنْکِ!‏

نغَمْ مَاجُمْ مِ رِيوَيْعٛنْ، مِ يَارَعٛنْ تٛنْ لٜيْدِ بَابِيلَ؞›‏ »‏

⁴⁴اِسْتِفَانُسْ ٻٜيْدِ مٜتُکِ، وِعِ، ‏«‏ندٜنّٛ مَامَعٜنْ مٜىٰطٜنْ اٜ نغٛودِ لُکُرُ تٛ طُمْ حَوْرَتَ اٜ اَللَّه ندٜرْ لَدّٜ؞ کَيْرُ حٛلَّتَ اَللَّه اٜ وٛنْدِ اٜ مَٻّٜ؞ لُکُرُ طُمْ وَطِرَامَ نٛنْ نٛ اَللَّه تِندِنِرِ مُوسَ؞ ⁴⁵مَامَعٜنْ مٜىٰطٜنْ ٻٜنْ ندٛنِ لُکُرُ طُمْ؞ ٻٜ ندِلِّدِ اٜ مَاجُمْ شَرٜلْ کٛ جٛوشُوَ اَرْدِيٻٜ؞ ٻٜ نَتِّنِطُمْ لٜيْدِ ندِ ٻٜ نجَٻِ دَغَ تٛ لٜپِّ طِ اَللَّه رِيوِ يٜىٰسٛ مَٻّٜ؞ لُکُرُ طُمْ بٛو اٜ طٛنْ حَا جَامَنُ دَوْدَ؞ ⁴⁶دَوْدَ حٜٻِ يِدّٜ اَللَّه مٛ يَاکُبُ، اٛ تٛرِي مَحُکِ سُودُ نغَمْ مَوْنِنْکِ اَللَّه اٛنْ، اَمَّا اٛ حٜٻَايِ مَحُکِندُ؞ ⁴⁷اَمَّا ٻِطّٛ مَاکٛ سُلٜيْمَانُ مَحِندُ؞

⁴⁸‏«‏اَللَّه جٛومُ مَنْغُ جٛوطَتَاکٛ ندٜرْ شُوطِ طِ يِمْٻٜ مَحِ، نٛنْ نٛ اَنَّبِيجٛ وِعِ جٛومِرَاوٛ وِعِي،

⁴⁹‏‹‏دٛوْ وٛنِ جٛوطٛرْغَلْ لَامُ اَمْ،

لٜيْدِ وٛنِ تٛ نجٛوَيْمِ کٛيْطٜ اَمْ؞

اِرِ ندُيٜ سُودُ مَحَنْتٛنْيَمْ؟

ندٜيٜ وِغٜىٰرٜ شِوْتٛتٛومِ؟

⁵⁰نَاع اٜ بَوْطٜ اَمْ تَغِرْمِ طُمْ طٛنْ فُو؟›‏ »‏

⁵¹اِسْتِفَانُسْ ٻٜيْدِ مٜتُکِ، وِعِ، ‏«‏اٛنٛنْ ٻٜ کٛعٜ شَاتُطٜ ٻٜ ٻٜرْطٜ کٜىٰفٜرْطٜ، ٻٜ نٛڤِّ غَݧُطِ نَنُکِ حَالَ جٛومِرَاوٛ!‏ کٛو ندٜيٜ اٛنْ کَٻْدَ اٜ رُوحُ اَللَّه نٛنْ نٛ مَامَعٜنْ مٛوطٛنْ نغَطُنٛو؞ ⁵²مٛيٜ اَنَّبِيجٛ وٛنِ مٛ مَامَعٜنْ مٛوطٛنْ تٛرَّايِ؟ حَا مَا ٻٜ مبَرِي وِعُنٛوٻٜ اَادِلِيجٛ اٛنْ وَرَيْ؞ جٛونِ اٛنٛنْ اٜ کٛعٜ مٛوطٛنْ اٛنْ ݧَامِي اَمَانَ مَاکٛ، اٛنْ مبَرِيمٛ؞ ⁵³اٛنٛنْ اٛنْ کٜٻِي اَتَّوْرَ دَغَ جُوطٜ مَلَاعِکَعٜنْ دَغَ ندٜنّٛ، اَمَّا اٛنْ تٛکَّايِطُمْ؞»‏

نٛ اِسْتِفَانُسْ وَرِرَا

⁵⁴ندٜ کَوْتَلْ مَوْٻٜ يَحُودَنْکٛعٜنْ نَنِ حَالَ کَنْ، ٻٜرْطٜ مَٻّٜ مٜتِّ ٻٜ ندَرِي اٜ ٻٜ ݝَتّٛو؞ ⁵⁵اَمَّا کَنْکٛ، اٜ مٛ حٜىٰوِ رُوحُ اَللَّه، اٛ تِجِّي دٛوْ اٛ يِعِ تٜدُّنغَلْ اَللَّه، اٛ يِعِ يٜىٰسُ اٜ دَرِي اٜ جُنْغٛ اَللَّه ݧَامٛ؞ ⁵⁶اٛ وِعِ، ‏«‏رَا!‏ اٜ مِ يِعَ دٛوْ اٜ مَٻِّتِي، ٻِي نٜطّٛ اٜ دَرِي اٜ جُنْغٛ اَللَّه ݧَامٛ؞»‏

⁵⁷سٜيْ ٻٜ فُو ٻٜ نغُلِّ سٜمْبٜىٰ، ٻٜ شُکِّ نٛڤِّ مَٻّٜ؞ طٛنْ اٜ طٛنْ، ٻٜ مَکِّيمٛ، ٻٜ نَنْغِمٛ، ⁵⁸ٻٜ مبُرْتِنِمٛ غَرِيرِ، ٻٜ کُبٛرِيمٛ اٜ کَاپٜ، ٻٜ ٻٛرْتِي کٛلْتٜ مَٻّٜ ٻٜ ندٜسِطٜ تٛ غٛطّٛ کَيٜىٰجٛ بِعٜتٜىٰطٛ شَاوُلُ نغَمْ ٻٜ کُبٛومٛ بٛطُّمْ؞ ⁵⁹اٜ ٻٜ کُبٛرٛومٛ کَاپٜ، کَنْکٛ بٛو اٜ مٛ وَطَ دٛعَارٜ اٜ مٛ وِعَ، ‏«‏يَا يٜىٰسُ جٛومِرَاوٛ، جَٻُ يٛنْکِ اَمْ!‏»‏ ⁶⁰ندٜنْ اٛ دِشِّي، اٛ وُلِّ اٜ سٜمْبٜ اٜ مٛ وِعَ، ‏«‏يَا جٛومِرَاوٛ، تَاع يٛوَنْٻٜ طُعُمْ حَکّٜ!‏»‏ ندٜ اٛ وِعِ نٛنْ، اٛ مَايِ؞

¹شَاوُلُ بٛو جَٻِي طُمْ وَرِ اِسْتِفَانُسْ؞

نٛ شَاوُلُ تٛرِّرِ کَوْتَلْ تٛکُّٻٜ يٜىٰسُ

دَغَ ݧَلْندٜ ندٜنْ، تٛرَّ مَوْکَ وَرَنِ کَوْتَلْ تٛکُّٻٜ يٜىٰسُ وٛنْٻٜ اُرُشَلِيمَ؞ ٻٜ فُو ٻٜ شَنْکِتِي ندٜرْ لٜيْطٜ يَحُودِيَ اٜ سَمَارِيَ، سٜيْ لِلَاٻٜ تَنْ کٛرِي ندٜرْ اُرُشَلِيمَ؞ ²وٛٻّٜ کُلٛوٻٜ اَللَّه اُوِ اِسْتِفَانُسْ، ٻٜ مبٛيَنِ مَيْدٜ مَاکٛ بٛجِّ نَوْطِ؞

³اَمَّا شَاوُلُ اُمَّنِي کَوْتَلْ تٛکُّٻٜ يٜىٰسُ، وَطِ کَ سَنْکُتُکِٻٜ؞ اٜ مٛ نَتَّ وُرٛ‑وُرٛ، اٜ مٛ نَنْغَ تٛکُّٻٜ يٜىٰسُ وٛرْٻٜ اٜ رٜوْٻٜ، اٜ مٛ دَسَٻٜ، اٜ مٛ مَٻَّٻٜ ندٜرْ سُودُ شُرَلْ؞

وَعَجِنْکِ ندٜرْ لٜيْدِ سَمَارِيَ

⁴ندٜنْ شَنْکِتَاٻٜ نغَطِ کَ يِيلَاکِ اٜ نغَعَجِنَ حَبَرُ بٜلْطُمْ؞ ⁵فِلِبُسْ بٛو يَحِ وٛنْدِ غَرِيرِ ندٜرْ لٜيْدِ سَمَارِيَ، اٜ مٛ وَعَجِنَنَٻٜ حَبَرُ اَلْمَسِيحُ؞ ⁶ندٜ يِمْٻٜ فُو نَنِ، نغِعِ اَلَامَاجِ کَيْطِنِيطِ طِ فِلِبُسْ وَطِ، ٻٜ شٛعِّ حَکِّيلٛ مَٻّٜ دٛوْ کٛ اٛ وِعِ؞ ⁷نغَمْ يِمْٻٜ طُطْٻٜ مبُرْتِنَنَامَ غِنِّ اٜ طِ نغُلَّ سٜمْبٜىٰ، ندٜنْ جَرَاٻٜ اٜ لَپٛوٻٜ طُطْٻٜ نجَمْطِتِنَا؞ ⁸نغَمْ نٛنْ طُمْ نَنِ وٜلْوٜلٛ طُطْنغٛ ندٜرْ غَرِيرِ ندِنْ؞

⁹ندٜرْ غَرِيرِ ندِنْ بٛو اٜ وٛودِ غٛطّٛ نٜطّٛ بِعٜتٜىٰطٛ سِيمَنْ، اٛ دَرْنٛووٛ؞ اٜ مٛ حَيْطِنَ سَمَارِيَنْکٛعٜنْ نَاع سٜطَّ اٜ کُوطٜ مَاکٛ، اٜ مٛ وِعَ حٛورٜ مَاکٛ اٛ مَوْطٛ؞ ¹⁰يِمْٻٜ فُو دَغَ مَوْٻٜ حَا سُکَاٻٜ نجَٻِي کٛ اٛ وِعَتَ، اٜ ٻٜ مبِعَ، ‏«‏نٜطّٛ اٛعٛ اٜ وٛودِ بَوْطٜ اَللَّه بِعٜتٜىٰطٜ بَوْطٜ مَوْطٜ؞»‏ ¹¹ٻٜ تٛکُّمٛ نغَمْ اٛ نٜىٰٻِي اٜ مٛ حَيْطِنَٻٜ اٜ سِحِرِيجِ مَاکٛ؞ ¹²اَمَّا ندٜ ٻٜ نجَٻِ حَبَرُ بٜلْطُمْ طُمْ فِلِبُسْ وَعَجِنَنْتَٻٜ دٛوْ لَامُ اَللَّه اٜ اِنْدٜ يٜىٰسُ اَلْمَسِيحُ، وٛرْٻٜ اٜ رٜوْٻٜ فُو نغَطَنَا بَڤْتِسْمَ؞ ¹³حَا سِيمَنْ مَا اٜ حٛورٜ مُوطُمْ تٛکِّ يٜىٰسُ؞ غَطَ اٛ وَطَنَامَ بَڤْتِسْمَ، اٛ تٛکِّ فِلِبُسْ حَادٜ، اٛ حَيْطِنِي ندٜ اٛ يِعِ اَلَامَاجِ اٜ کُوطٜ کَيْطِنِيطٜ مَوْطٜ طٜ فِلِبُسْ وَطِ؞

¹⁴ندٜ لِلَاٻٜ وٛنْٻٜ اُرُشَلِيمَ نَنِ سَمَارِيَنْکٛعٜنْ نجَٻِي وٛلْدٜ اَللَّه، سٜيْ ٻٜ لِلِ بِيتُرُسْ اٜ يَحَيَ تٛ مَٻّٜ؞ ¹⁵ندٜ ٻٜ نجٛتِّي، ٻٜ تٛرِي اَللَّه حٛکَّ سَمَارِيَنْکٛعٜنْ ٻٜنْ رُوحُ مُوطُمْ، ¹⁶نغَمْ ٻٜ نغَطَنَامَ بَڤْتِسْمَ ندٜرْ اِنْدٜ يٜىٰسُ جٛومِرَاوٛ تَنْ، اَمَّا رُوحُ اَللَّه جِڤّٛيَاکِ دٛوْ کٛو مٛيٜ مَٻّٜ تَوْ؞ ¹⁷سٜيْ بِيتُرُسْ اٜ يَحَيَ نجٛوِ جُوطٜ مُعّٜنْ دٛوْ مَٻّٜ، ٻٜ کٜٻِ رُوحُ اَللَّه؞

¹⁸ندٜ سِيمَنْ يِعِ يٛوُکِ جُوطٜ لِلَاٻٜ دٛوْ تٛکُّٻٜ يٜىٰسُ اٜ حٛکَّ رُوحُ اَللَّه، اٛ وَدَّنِٻٜ شٜىٰدٜ، ¹⁹اٛ وِعِ، ‏«‏کٛکّٜىٰيَمْ، مِنْ مَا بَوْطٜ طٜنْ، نغَمْ مٛ نجٛوَنْمِ جُوطٜ فُو حٜٻَ رُوحُ اَللَّه؞»‏

²⁰اَمَّا بِيتُرُسْ وِعِمٛ، ‏«‏اَنْ اٜ شٜىٰدٜ مَاطَ کَلْکِدٜىٰ، نغَمْ اَ ݧُمِي اَ وَاوَيْ سٛودُکِ دٛکَّلْ اَللَّه اٜ شٜىٰدٜ!‏ ²¹اَ وَلَا غٜطَلْ ندٜرْ کُوغَلْ نغَعَلْ، نغَمْ ٻٜرْندٜ مَاطَ لَاٻَايِ يٜىٰسٛ اَللَّه؞ ²²تُوبُ دَغَ حَلّٜىٰندٜ مَاطَ، تٛرَ جٛومِرَاوٛ يَافَنٛمَا ݧُمٛوجِ مَاطَ کَلُّطِ؞ ²³نغَمْ مِ يِعِي اَ وٛودِ ٻٜرْندٜ ٻَلٜىٰرٜ، حَلّٜىٰندٜ طُوطَنِيمَ؞»‏

²⁴سِيمَنْ وِعِمٛ، ‏«‏تٛرَنٜىٰيَمْ جٛومِرَاوٛ، نغَمْ تٛع کٛ مبِيطَا حٜٻَيَمْ؞»‏

²⁵غَطَ بِيتُرُسْ اٜ يَحَيَ تَبِّتِنَنِي سَمَارِيَنْکٛعٜنْ دٛوْ يٜىٰسُ، ٻٜ نغَعَجِنَنِٻٜ وٛلْدٜ جٛومِرَاوٛ؞ ندٜ اٜ ٻٜ دٛوْ لَاوٛلْ حٛوتُکِ اُرُشَلِيمَ، ٻٜ نغَعَجِنِ حَبَرُ بٜلْطُمْ ندٜرْ نغَرِحٛيْ سَمَارِيَ طُطْکٛيْ؞

فِلِبُسْ اٜ دٛوغَرِيجٛ اِتِيٛوفِيَ

²⁶سٜيْ غٛطّٛ مَلَاعِکَاجٛ جٛومِرَاوٛ وِعِ فِلِبُسْ، ‏«‏اُمَّ دِلِّرْ فٛمْبِنَ تٛکَّا طَتَلْ پِوٛيْنغَلْ اُرُشَلِيمَ يَاکِ غَاجَ، طَتَلْ لَدّٜوَلْ؞»‏ ²⁷سٜيْ فِلِبُسْ اُمِّي دِلِّ؞ اٜ مٛ دٛوْ لَاوٛلْ اٛ حَوْرِ اٜ غٛطّٛ نٜطّٛ لٜيْدِ اِتِيٛوفِيَ تَڤَّاطٛ؞ نٜطّٛ اٛنْ اٜ وٛودِ لَامُ مَوْطُمْ ندٜرْ لَامٛرْدٜ لَامِيطٛ دٜبّٛ بِعٜتٜىٰطٛ کَندِسْ؞ کَنْکٛ وٛنِ دٜسٛووٛ شٜىٰدٜ لَامِيطٛ اٛنْ؞ اٛ يَحُنٛ اُرُشَلِيمَ نغَمْ مَوْنِنْکِ جٛومِرَاوٛ؞ ²⁸اٜ مٛ حٛوتَ، اٜ مٛ جٛوطِي ندٜرْ کٜىٰکٜ ڤُشِّ، اٜ مٛ جَنْغَ دٜفْتٜرٜ اَنَّبِ اِشَايَ؞ ²⁹رُوحُ اَللَّه وِعِ فِلِبُسْ، ‏«‏يَحُ، ٻَدّٛطَا کٜىٰکٜ ڤُشِّ طُمْ؞»‏ ³⁰سٜيْ فِلِبُسْ دٛغِّ يَحِ تٛ مَاکٛ، نَنِ اٜ مٛ جَنْغَ دٜفْتٜرٜ اَنَّبِ اِشَايَ؞ فِلِبُسْ پَمِمٛ، وِعِ، ‏«‏اَ فَامَ کٛ نجَنْغَتَا بٛو؟»‏

³¹نٜطّٛ اٛنْ وِعِمٛ، ‏«‏نٛيٜ ڤَامِرَيْمِ ندٜ وَلَا ڤَمْتِنَيْطٛيَمْ؟»‏ اٛ تٛرِي فِلِبُسْ نَتَّ جٛوطٛدٛو اٜ مَاکٛ؞

³²رَا اَايَاجٜ طٜ اٛ جَنْغَتَ ندٜرْ دٜفْتٜرٜ ندٜنْ:‏

‏«‏اٛ فٛوطَامَ بٛ مبَالَ کِرْسٛيْتٜىٰنغَ؞

نٛ ٻِي مبَالَ دٜعِّتِرْتَ تٛ جُنْغٛ تَپٛووٛ لٜىٰٻٜ مَاغَ،

نٛنْ اٛ دٜعِّتِرِ؞

³³ٻٜ شٜمْتِنِمٛ، ٻٜ نغَطَنَايِمٛ کِيتَ غٛونغَ؞

مٛيٜ وَاوَتَ حٛکُّکِ حَبَرُ ٻِٻّٜ مَاکٛ؟

نغَمْ يٛنْکِ مَاکٛ اِتَّامَ دَغَ ندٜرْ دُونِيَارُ؞»‏

³⁴اِتِيٛوفِيَنْکٜىٰجٛ اٛنْ وِعِ فِلِبُسْ، ‏«‏وِعَمْ دٛوْ مٛيٜ اَنَّبِيجٛ اٛعٛ مٜتِ حَالَ کَعَ، دٛوْ حٛورٜ مَاکٛ کٛو دٛوْ غٛطّٛ؟»‏ ³⁵سٜيْ فِلِبُسْ فُطِّ مٜتَنْکِمٛ دٛوْ اَايَاجٜ طٜنْ، اٜ وَعَجِنَنَمٛ حَبَرُ بٜلْطُمْ دٛوْ يٜىٰسُ؞ ³⁶اٜ ٻٜ ندٜرْ يَادُ ٻٜ نجٛتِّي تٛ ندِيَمْ وٛنِ؞ سٜيْ نٜطّٛ اٛنْ وِعِ، ‏«‏رَا ندِيَمْ!‏ کٛ حَطَتَ طُمْ وَطَنَيَمْ بَڤْتِسْمَ؟»‏ ³⁷‏[‏فِلِبُسْ وِعِمٛ، ‏«‏تَا حٛولَکٜ يٜىٰسُ اٜ ٻٜرْندٜ غٛعٛ، وَلَا کٛ حَطَتَ طُمْ وَطَنْمَا بَڤْتِسْمَ؞»‏

سٜيْ نٜطّٛ اٛنْ وِعِ، ‏«‏مِ جَٻِي يٜىٰسُ اَلْمَسِيحُ اٛ ٻِي اَللَّه؞»‏]‏

³⁸اٛ وِعِ طُمْ دَرْنَ کٜىٰکٜ ڤُشِّ طُمْ؞ ٻٜ فُو طِطٛ ٻٜ نجِڤِّي، ٻٜ نَتِّ ندٜرْ ندِيَمْ طَمْ؞ فِلِبُسْ وَطَنِمٛ بَڤْتِسْمَ؞ ³⁹ندٜ ٻٜ مبُرْتِي ندِيَمْ طَمْ، سٜيْ رُوحُ جٛومِرَاوٛ حٛشِّ فِلِبُسْ؞ نٜطّٛ اٛنْ فُطِّتَايِ يِعُکِمٛ، اٛ ݧَمْرِ يٜىٰسٛ اٜ يَادُ، اٜ مٛ نَنَ بٜلْطُمْ؞ ⁴⁰اَمَّا فِلِبُسْ يِعِ حٛورٜ مُوطُمْ اٜ غَرِيرِ اَجٛتُسْ؞ دٛوْ لَاوٛلْ اٛ وَطِ کَ وَعَجِنْکِ حَبَرُ بٜلْطُمْ اٜ کٛو ندِيٜ غَرِيرِ حَا اٛ يٛتِّي کَيْسَارِيَ؞

نٛ شَاوُلُ تُوبِرِ

¹ندٜرْ شَرٜلْ نغٜلْ بٛو، شَاوُلُ اٜ ٻٜيْدَ تٛرُّکِ تٛکُّٻٜ يٜىٰسُ، اٜ مٛ يِطِ وَرْکِٻٜ؞ سٜيْ اٛ يَحِ تٛ مَوْطٛ مَوْٻٜ اَرْدِيٻٜ دِينَ؞ ²اٛ تٛرِيمٛ اٛ وِنْدَنَمٛ طٜرٜوٛلْ نغٛلْ اٛ حٛلَّتَ مَوْٻٜ شُوطِ دٛعَارٜ غٛنْطِ غَرِيرِ دِمَسْکُ، وِيکِ تٛ اٛ تَوِي تٛکُّٻٜ لَاوٛلْ يٜىٰسُ تٛنْ، وٛرْٻٜ کٛو رٜوْٻٜ، اٛ نَنْغَٻٜ، اٛ حَٻَّٻٜ، اٛ يَارَٻٜ غَرِيرِ اُرُشَلِيمَ؞

³اٜ مٛ دٛوْ لَاوٛلْ اٛ ٻَدَکٜ يٛتَّاکِ غَرِيرِ دِمَسْکُ، اٛ اَنْدَا اٛ اَنْدِتَا سٜيْ رَا جَيْنغٛلْ دَغَ دٛوْ يٜيْنَنِيمٛ فِلِيمٛ؞ ⁴اٛ يَنِ اٜ لٜيْدِ، اٛ نَنِ حٛنٛنْدٜ اٜ وِعَمٛ، ‏«‏شَاوُلُ، شَاوُلُ، نغَمْ طُمٜ تٛرَّتَايَمْ؟»‏

⁵شَاوُلُ وِعِ، ‏«‏مَوْطٛ، اَنْ طُمْ مٛيٜ؟»‏ حٛنٛنْدٜ ندٜنْ وِعِمٛ، ‏«‏مِنْ وٛنِ يٜىٰسُ مٛ تٛرَّتَا؞ ⁶اُمَّ نَتُّ ندٜرْ غَرِيرِ؞ طُمْ وِعٜتٜ کٛ حَانِ نغَطَا؞»‏

⁷حِغٛوٻٜ يَادُ مَاکٛ نَنِي حٛنٛنْدٜ ندٜنْ، اَمَّا ٻٜ نغِعَايِ کٛو مٛيٜ؞ ٻٜ ندَرِي، ٻٜ ندُلِّ کٛ ٻٜ مبِعَتَ؞ ⁸شَاوُلُ اُمِّي دَرِي فٜىٰرِ غِتٜ مُوطُمْ، اَمَّا يِعَتَا؞ ندٜنْ اٛ جٛغَنَا جُنْغٛ، اٛ نَتِّنَا غَرِيرِ دِمَسْکُ؞ ⁹اٛ وَطِ بَلْطٜ تَتِ اٜ مٛ وُمِ، اٛ يَرَايِ اٛ ݧَامَايِ؞

¹⁰اٜ وٛودِ غٛطّٛ تٛکُّطٛ يٜىٰسُ ندٜرْ غَرِيرِ ندِنْ بِعٜتٜىٰطٛ حَنَانِيَ؞ جٛومِرَاوٛ نٛدِّمٛ ندٜرْ کٛيْطٛلْ، وِعِمٛ، ‏«‏حَنَانِيَ!‏»‏ اٛ وِعِ، ‏«‏نَعَمْ، جٛومِرَاوٛ؞»‏

¹¹جٛومِرَاوٛ وِعِمٛ، ‏«‏اُمَّ تٛکَّا لَاوٛلْ بِعٜتٜىٰنغٛلْ لَاوٛلْ ڤٛرْتِينغٛلْ، نجَحَا وُرٛ يَحُودَ، نغٜيْنَا غٛطّٛ بِعٜتٜىٰطٛ شَاوُلُ پِوٛيْطٛ غَرِيرِ تَرْسُسْ؞ نغَمْ اٜ مٛ طٛنْ وَطَ دٛعَارٜ، ¹²حَا مَا ندٜرْ کٛيْطٛلْ اٛ يِعِي نٜطّٛ بِعٜتٜىٰطٛ حَنَانِيَ نَتّٛيِي، يٛوِي جُوطٜ مُوطُمْ دٛوْ مَاکٛ نغَمْ اٛ وُمْتَ؞»‏

¹³اَمَّا حَنَانِيَ وِعِمٛ، ‏«‏جٛومِرَاوٛ، مِ نَنِي يِمْٻٜ طُطْٻٜ کٛکِّي حَبَرُ نٜطّٛ اٛنْ، اٜ تٛرَّاجِ طُطِّ طِ اٛ تٛرِّ يِمْٻٜ مَاطَ وٛنْٻٜ اُرُشَلِيمَ؞ ¹⁴اٛ وَرْدِي اٜ طٜرٜوٛلْ طٛعٛ دَغَ تٛ مَوْٻٜ اَرْدِيٻٜ دِينَ، نغَمْ اٛ نَنْغَ نٛدِّرَاٻٜ اِنْدٜ مَاطَ فُو؞»‏

¹⁵اَمَّا جٛومِرَاوٛ وِعِمٛ، ‏«‏يَحُ نغَطَا کٛ مبِيمَامِ، نغَمْ مِ سُٻِيمٛ اٛ حُوَنَيَمْ، اٛ اَنْدِنَ اِنْدٜ اَمْ يٜىٰسٛ يِمْٻٜ نَاع يَحُودَنْکٛعٜنْ اٜ لَامِيٻٜ مَٻّٜ، اٜ اِسْرَاعِيلَنْکٛعٜنْ؞ ¹⁶مِنْ اٜ حٛورٜ اَمْ مِ حٛلَّيْمٛ دٛولٜ اٛ تٛرّٜىٰ تٛرَّاجِ طُطِّ نغَمْ اِنْدٜ اَمْ؞»‏

¹⁷ندٜنْ حَنَانِيَ يَحِ، نَتِّ وُرٛ نغٛ شَاوُلُ وٛنِ، يٛوِ جُوطٜ مُوطُمْ دٛوْ مَاکٛ، وِعِمٛ، ‏«‏بَنْدِرَاوٛ اَمْ شَاوُلُ، يٜىٰسُ جٛومِرَاوٛ وَنْغَنْطٛمَ دٛوْ لَاوٛلْ نغٛلْ نغَرْدُطَا، اٛ لِلٛيِييَمْ نغَمْ مبُمْتَا، کٜٻَا رُوحُ اَللَّه؞»‏ ¹⁸طٛنْ اٜ طٛنْ، غٛطُّمْ بٛ کٛٻٜ مبُرْتِي ندٜرْ غِتٜ شَاوُلُ؞ اٛ وُمْتِ، اٛ اُمِّي، اٛ وَطَنَا بَڤْتِسْمَ؞ ¹⁹سٜيْ اٛ ݧَامِ ݧَمْندُ، اٛ حٜٻِ سٜمْبٜ؞ دَغَ طٛنْ اٛ وَالِ بَلْطٜ سٜطَّ تٛ تٛکُّٻٜ يٜىٰسُ وٛنْٻٜ غَرِيرِ دِمَسْکُ ندِنْ؞

وَعَجِنْکِ شَاوُلُ ندٜرْ دِمَسْکُ

²⁰طٛنْ اٜ طٛنْ شَاوُلُ فُطِّ وَعَجِنْکِ حَبَرُ يٜىٰسُ ندٜرْ شُوطِ دٛعَارٜ؞ اٛ وِعِ غٛونغَ يٜىٰسُ وٛنِ ٻِطّٛ اَللَّه؞

²¹طُمْ حَيْطِنِي نَنْٻٜمٛ فُو، ٻٜ مبِعِ، ‏«‏نَاع کَنْکٛ وٛنِ تٛرَّيْنٛوطٛ کٛولِيٻٜ يٜىٰسُ وٛنْٻٜ ندٜرْ غَرِيرِ اُرُشَلِيمَ؟ نَاع اٛ وَرٛيِ طٛعٛ نغَمْ اٛ حَٻَّٻٜ اٛ يَارَٻٜ تٛ مَوْٻٜ اَرْدِيٻٜ دِينَ؟»‏

²²اَمَّا شَاوُلُ ٻٜيْدِ سٜمْبُطُکِ ندٜرْ وَعَجِنْکِ، حَا طُمْ جِيٻِ حَکِّيلٛوجِ يَحُودَنْکٛعٜنْ جٛوطِيٻٜ دِمَسْکُ فُو، نغَمْ ٻٜ کٜٻَايِ کٛ ٻٜ مبِعِمٛ ندٜ اٛ تَبِّتِنَنِٻٜ يٜىٰسُ وٛنِ اَلْمَسِيحُ؞

²³سٜيْ غَطَ بَلْطٜ طُطّٜ، يَحُودَنْکٛعٜنْ ندَرْوِ دَبَرٜ نٛ مبَرْدَتَ شَاوُلُ؞ ²⁴شَاوُلُ بٛو اَنْدِتِ دَبَرٜ مَٻّٜ؞ جٜمَّ اٜ ݧَلَوْمَ فُو اٜ ٻٜ ندٜىٰنَ دَمُّطٜ غَرِيرِ نغَمْ ٻٜ کٜٻَ نٛ ٻٜ مبَرِرْتَمٛ؞ ²⁵اَمَّا حِغٛوٻٜ مَاکٛ کٛشِّمٛ جٜمَّ، نغَطِمٛ ندٜرْ سٛمْڤٛورٜ، ٻٜ نجِڤِّنِرِمٛ يٛلْندٜ مَادِ ڤِلِيندِ غَرِيرِ ندِنْ؞

شَاوُلُ وَرْتِي اُرُشَلِيمَ

²⁶ندٜ شَاوُلُ وَرْتِ اُرُشَلِيمَ اٛ يِطِي نَتُّکِ تٛکُّٻٜ يٜىٰسُ، اَمَّا ٻٜ فُو ٻٜ کُلِمٛ، ٻٜ نجَٻَايِ اٛ وَرْتِي تٛکُّطٛ يٜىٰسُ اٜ غٛونغَ؞ ²⁷اَمَّا بَرْنَبَ يَارِمٛ تٛ لِلَاٻٜ، طِيوِتِٻٜ نٛ شَاوُلُ يِعِرِ جٛومِرَاوٛ اٜ نٛ جٛومِرَاوٛ مٜتِرَنِمٛ دٛوْ لَاوٛلْ، اٜ نٛ اٛ وَعَجِنِرِ حَبَرُ يٜىٰسُ اٜ غَرِيرِ دِمَسْکُ کُلٛلْ وَلَا؞ ²⁸نغَمْ نٛنْ شَاوُلُ جٛوطٛدِي اٜ لِلَاٻٜ، اٜ مٛ يِيلٛدٛو اٜ مَٻّٜ ندٜرْ غَرِيرِ اُرُشَلِيمَ، اٜ مٛ اٜکِّتِنَ حَبَرُ جٛومِرَاوٛ اٜ ٻٜرْندٜ غٛعٛ، کُلٛلْ وَلَا؞ ²⁹اٜ مٛ وَعَجِنَنَ يَحُودَنْکٛعٜنْ مٜتٛوٻٜ حٜلٜنَنْکٛورٜ، اٜ مٛ يٜدّٛوتِرَ اٜ مَٻّٜ، اَمَّا کَمْٻٜ اٜ ٻٜ طَٻِّتَ نٛ ٻٜ مبَرْدَتَمٛ؞ ³⁰ندٜ تٛکُّٻٜ يٜىٰسُ نَنِ حَبَرُ طُمْ، ٻٜ نجَارِ شَاوُلُ غَرِيرِ کَيْسَارِيَ؞ ٻٜ نَتِّنِمٛ کٛمِوَلْ ٻٜ شٛعِّمٛ تَرْسُسْ غَرِيرِ مَاکٛ؞

³¹غَطَ مَاجُمْ کَوْتَلْ تٛکُّٻٜ يٜىٰسُ ندٜرْ لٜيْطٜ يَحُودِيَ اٜ غَلِيلِ اٜ سَمَارِيَ فُو کٜٻِ جٛنْدٜ جَمْ؞ رُوحُ اَللَّه وَلِّٻٜ، ٻٜ شٜمْبِطِ، ٻٜ ٻٜيْدِ کُلٛلْ جٛومِرَاوٛ، ٻٜ طُوطِ؞

بِيتُرُسْ يَمْطِتِنِي اِنِيَسْ اُمِّنِي تَبِيتَ دَغَ مَيْدٜ

³²تٛو، ندٜ بِيتُرُسْ يِيلِي ندٜرْ لٜيْدِ ندِنْ فُو، سٜيْ جِڤِّي تٛ تٛکُّٻٜ يٜىٰسُ وٛنْٻٜ غَرِيرِ لِدَّ؞ ³³طٛنْ اٛ تَوِ غٛطّٛ ݧَوْطٛ بِعٜتٜىٰطٛ اِنِيَسْ مٛ ٻَنْدُ مُوطُمْ فُو وَاتِي؞ اٛ وَطِي دُوٻِ جٛوٜىٰتَتِ اٜ مٛ فُکِّي؞ ³⁴بِيتُرُسْ وِعِمٛ، ‏«‏اِنِيَسْ، يٜىٰسُ اَلْمَسِيحُ يَمْطِتِنِيمَ!‏ اُمَّ تَغُّ مبٜعِّتَارِ مَاطَ!‏»‏ طٛنْ اٜ طٛنْ اٛ اُمِّي؞ ³⁵ندٜ وٛنْٻٜ غَرِيرِ لِدَّ اٜ وٛنْٻٜ لٜيْدِ شَرٛنْ فُو نغِعِ کٛ وَطِ، ٻٜ تُوبِ ٻٜ تٛکِّ جٛومِرَاوٛ؞

³⁶ندٜرْ غَرِيرِ جٛفَّ بٛو اٜ وٛودِ غٛطّٛ دٜبّٛ تٛکُّطٛ يٜىٰسُ بِعٜتٜىٰطٛ تَبِيتَ؞ ﴿مَعَنَ تَبِيتَ ندٜرْ حٜلٜنَنْکٛورٜ وٛنِ دٛوکَسْ، وَاتٛ لٜلْوَ؞﴾اٜ مٛ حُوَ کُوطٜ بٛطّٜ، اٜ مٛ وَلَّ ٻٜ نغَلَنَا؞ ³⁷ندٜرْ بَلْطٜ طٜنْ اٛ ݧَوِ، اٛ مَايِ؞ ٻٜ لٛوتِمٛ، ٻٜ ڤُکِّنِمٛ ندٜرْ سُودُ دٛوْ؞ ³⁸غَرِيرِ جٛفَّ وٛطِّدَا اٜ غَرِيرِ لِدَّ؞ نغَمْ مَاجُمْ ندٜ تٛکُّٻٜ يٜىٰسُ نَنِ بِيتُرُسْ اٜ تٛنْ، ٻٜ لِلِ وٛرْٻٜ طِطٛ نجَحِ تٛرِيمٛ اٛ وَرَ تٛ مَٻّٜ جَوْطُمْ؞ ³⁹بِيتُرُسْ اُمِّي، يَادِ اٜ مَٻّٜ؞ ندٜ اٛ وَرِ، ٻٜ پٜنْتِنِمٛ سُودُ دٛوْ؞ رٜوْٻٜ ٻٜ وٛرْٻٜ مُعّٜنْ مَايِ فُو ٻَدِّيمٛ، ٻٜ ندَرِي اٜ ٻٜ مبٛيَ، اٜ ٻٜ کٛلَّمٛ تٛغّٛوجٜ اٜ غٛطّٜ کٛلْتٜ طٜ دٛوکَسْ ݧٛوتَنِٻٜ کٛ اٛ وٛنْدُنٛو اٜ مَٻّٜ؞ ⁴⁰سٜيْ بِيتُرُسْ وُرْتِنِ يِمْٻٜ فُو ندٜرْ سُودُ ندُنْ، اٛ دِشِّي اٛ وَطِ دٛعَارٜ؞ غَطَ مَاجُمْ اٛ وَيْلِتِي اٛ رَارِ ٻَنْدُ ندُنْ، اٛ وِعِ، ‏«‏تَبِيتَ، اُمَّ!‏»‏

سٜيْ تَبِيتَ فٜىٰرِ غِتٜ مُوطُمْ؞ ندٜ اٛ يِعِ بِيتُرُسْ بٛو، اٛ اُمِّي اٛ جٛوطِي؞ ⁴¹سٜيْ بِيتُرُسْ نَنْغِ جُنْغٛ مَاکٛ، اُمِّنِمٛ؞ غَطَ مَاجُمْ اٛ نٛدِّ رٜوْٻٜ ٻٜ وٛرْٻٜ مُعّٜنْ مَايِ اٜ کٛولِيٻٜ يٜىٰسُ ٻٜنْ، اٛ حٛلِّٻٜ تَبِيتَ اٜ فٛوفَ؞ ⁴²حَبَرُ طُمْ نَنَامَ ندٜرْ غَرِيرِ جٛفَّ فُو، حَا طُطْٻٜ کٛولِي جٛومِرَاوٛ؞ ⁴³بِيتُرُسْ بٛو وَطِي بَلْطٜ طُطّٜ اٜ مٛ جٛوطِي ندٜرْ غَرِيرِ جٛفَّ تٛ وُرٛ ڤِيٛووٛ لَرٜ بِعٜتٜىٰطٛ سِيمَنْ؞

بِيتُرُسْ اٜ کٛنٜىٰلِيُسْ

¹اٜ وٛودِ غٛطّٛ نٜطّٛ بِعٜتٜىٰطٛ کٛنٜىٰلِيُسْ غٛنْطٛ غَرِيرِ کَيْسَارِيَ؞ اٛ مَوْطٛ ندٜرْ کَوْتَلْ سٛوجِعٜنْ بِعٜتٜىٰنغَلْ نغَلْ اِتَالِيَ؞ ²اٛ کُلٛووٛ اَللَّه، کَنْکٛ اٜ وُرٛ مَاکٛ فُو؞ اٜ مٛ وَلَّ يَحُودَنْکٛعٜنْ ٻٜ نغَلَنَا نَاع سٜطَّ، اٜ مٛ تٛرٛو اَللَّه کٛو نغٜلٜ شَرٜلْ؞ ³وٛنْدٜ ݧَلْندٜ حَادٜ نجَمْندِ تَتِ ندِ ݧَلَوْمَ اٛ يِعِ وَحَيُ؞ ندٜرْ وَحَيُ طُمْ اٛ يِعِ مَلَاعِکَاجٛ بُرْتَنِيطٛمٛ اٜ نجَيْرِ، وِعِمٛ، ‏«‏کٛنٜىٰلِيُسْ!‏»‏

⁴اٛ رَارِ مَلَاعِکَاجٛ اٛنْ ندٜرْ کُلٛلْ، اٛ وِعِمٛ، ‏«‏نَعَمْ، مَوْطٛ؟»‏

مَلَاعِکَاجٛ اٛنْ وِعِمٛ، ‏«‏اَللَّه نَنِي دٛعَاجٜ مَاطَ اٛ يِعِي کٛ کٛکَّتَا ٻٜ نغَلَنَا؞ ⁵جٛونِ لِلُ وٛٻّٜ نجَحَ غَرِيرِ جٛفَّ ٻٜ نٛدّٛيَ غٛطّٛ بِعٜتٜىٰطٛ سِيمَنْ بِيتُرُسْ؞ ⁶اٜ مٛ طٛنْ جٛوطِي اٜ وُرٛ سِيمَنْ ڤِيٛووٛ لَرٜ مٛ وُرٛ مُوطُمْ وٛنِ حَادٜ مَايٛ؞»‏ ⁷ندٜ مَلَاعِکَاجٛ اٛنْ دِلِّ، کٛنٜىٰلِيُسْ نٛدِّ کُوَنٛوٻٜمٛ طِطٛ اٜ سٛوجِيجٛ غٛعٛتٛ کُلٛووٛ اَللَّه غٛنْطٛ لٜيْ مَاکٛ؞ ⁸اٛ طِيوِتَنِٻٜ کٛ مَلَاعِکَاجٛ وِعِمٛ فُو، اٛ لِلِٻٜ ٻٜ نجَحَ غَرِيرِ جٛفَّ؞

⁹ندٜ فِنِ اٜ ٻٜ دٛوْ لَاوٛلْ، شَکَ ݧَلَوْمَ اٜ ٻٜ حَادٜ غَرِيرِ جٛفَّ، اٜ شَرٜلْ نغٜلْ بِيتُرُسْ پٜنْتِ دٛوْ سُودُ نغَمْ وَطُکِ دٛعَارٜ؞ ¹⁰سٜيْ وٜىٰلٛ نَنْغِمٛ، اٛ وِعِ طُمْ دٜفَنَمٛ ݧَمْندُ؞ اٜ طُمْ ندٜرْ سِرْيَنَاکِمٛ ݧَمْندُ، سٜيْ اٛ يِعِ وَحَيُ؞ ¹¹اٛ يِعِ دٛوْ اٜ مَٻِّتِي، غٛطُّمْ نَنْدُطُمْ اٜ وُدٜرٜ مَوْندٜ اٜ طُمْ جِڤِّنِرٛيٜىٰ غُتُّلِّ مَاجُمْ نَيِ؞ ¹²ندٜرْ مَاجُمْ بٛو اٜ وٛودِ مَرْلٜ فٜىٰرٜ‑فٜىٰرٜ طٜ کٛيْطٜ نَيِ، اٜ دَسٛتٛوطٜ، اٜ شٛلِّ؞ ¹³سٜيْ اٛ نَنِ وٛنْدٜ حٛنٛنْدٜ اٜ وِعَمٛ، ‏«‏بِيتُرُسْ، اُمَّ، نَنْغُ، کِرْسَا، ݧَامَا!‏»‏

¹⁴اَمَّا بِيتُرُسْ نٛوتِي وِعِ، ‏«‏اَاعَ، جٛومِرَاوٛ!‏ مِ مٜىٰطَايِ ݧَامُکِ کٛ حَرْمِنِي کٛو کٛ لَاٻَايِ؞»‏

¹⁵حٛنٛنْدٜ ندٜنْ ٻٜيْدِ وِعُکِمٛ، ‏«‏تَاع حَرْمِنْ کٛ اَللَّه لَاٻِنِ؞»‏ ¹⁶طُمْ وَطِ نٛنْ ندٜ تَتِ؞ ندٜنْ کٛ اٛ يِعِ طُمْ سٛعَّا يَاکِ دٛوْ؞

¹⁷بِيتُرُسْ اٜ ندٜرْ ݧُمُکِ دٛوْ مَعَنَ وَحَيُ طُمْ اٛ يِعِ؞ اٜ شَرٜلْ نغٜلْ، وٛرْٻٜ ٻٜ کٛنٜىٰلِيُسْ لِلٛيِ اٜ نغٜيْنَ وُرٛ سِيمَنْ؞ ٻٜ نغَرِ، ٻٜ ندَرِي اٜ دَمُّغَلْ؞ ¹⁸ٻٜ شِلْمِنِي، ٻٜ پَمِ، ٻٜ مبِعِ کٛو طٛعٛ سِيمَنْ بِعٜتٜىٰطٛ بِيتُرُسْ وٛنِ؞

¹⁹بِيتُرُسْ اٜ ندٜرْ ݧُمُکِ دٛوْ کٛ اٛ يِعِ، سٜيْ رُوحُ اَللَّه وِعِمٛ، ‏«‏رَا يِمْٻٜ تَتٛ اٜ طَٻُّتُمَا؞ ²⁰اُمَّ جِڤَّ، نجَادَا اٜ مَٻّٜ؞ تَاع حُلُ، نغَمْ مِنْ لِلٛيِٻٜ؞»‏ ²¹بِيتُرُسْ جِڤِّي، وِعِ لِلٛيَاٻٜ ٻٜنْ، ‏«‏مِنْ وٛنِ مٛ طَٻِّتٛتٛنْ؞ طُمٜ وَدِّعٛنْ؟»‏

²²ٻٜ مبِعِمٛ، ‏«‏کٛنٜىٰلِيُسْ مَوْطٛ سٛوجِعٜنْ لِلٛيِمِنْ؞ اٛ اَادِلِيجٛ، کُلٛووٛ اَللَّه، مٛ لٜݧٛلْ يَحُودَنْکٛعٜنْ فُو مَنَتَ؞ مَلَاعِکَاجٛ شٜنِيطٛ وَنْغَنِيمٛ وِعِيمٛ اٛ نٛدُّمَا نغَرَا وُرٛ مَاکٛ، نغَمْ اٛ نَنَ کٛ مبِعَتَامٛ؞»‏ ²³سٜيْ بِيتُرُسْ جَٻِّيٻٜ، حٛکِّٻٜ تٛ ٻٜ مبَالَتَ ندٜرْ وُرٛ نغٛنْ؞

ندٜ فِنِ، اٛ اُمِّي اٛ دِلِّدِ اٜ مَٻّٜ؞ وٛٻّٜ ندٜرْ تٛکُّٻٜ يٜىٰسُ وٛنْٻٜ جٛفَّ تٛکِّٻٜ؞ ²⁴ندٜ فِنْتِ ٻٜ نجٛتِّي غَرِيرِ کَيْسَارِيَ؞ ندٜنْ مَا کٛنٜىٰلِيُسْ اٜ کَمّٛو غَرٛلْ مَٻّٜ، اٛ حَوْرِتِ بَنْدِرَاٻٜ مَاکٛ اٜ حِغٛوٻٜ مَاکٛ اٜ ٻٜ کٜطِيٻٜ؞ ²⁵اٜ نَتُّکِ بِيتُرُسْ وُرٛ نغٛنْ، کٛنٜىٰلِيُسْ جَٻِّيمٛ، دِشِّي يٜىٰسٛ مَاکٛ مَوْنِنِمٛ؞ ²⁶اَمَّا بِيتُرُسْ اُمِّنِمٛ، وِعِ، ‏«‏اُمَّ؞ مِنْ مِ نٜطّٛ تَنْ؞»‏ ²⁷بِيتُرُسْ اٜ مٜدَّ اٜ مَاکٛ، حَا ٻٜ نَتِّ ندٜرْ وُرٛ، ٻٜ تَوِ يِمْٻٜ طُطْٻٜ اٜ کَوْرِتِ؞ ²⁸سٜيْ بِيتُرُسْ وِعِٻٜ، ‏«‏اٛنٛنْ اٜ کٛعٜ مٛوطٛنْ اٛنْ اَنْدِ دِينَ اَمِنْ حَطِي يَحُودَنْکٜىٰجٛ حَوْتُکِ حٛورٜ اٜ غٛطّٛ نَاع يَحُودَنْکٜىٰجٛ کٛو نَتُّکِ وُرٛ مَاکٛ؞ اَمَّا اَللَّه حٛلِّييَمْ تٛع مِ وِعَ کٛو مٛيٜ نٛ کَرْمِنِيطٛ کٛو لَاٻَا؞ ²⁹نغَمْ نٛنْ ندٜ لِلٛنٛيْطٛنْيَمْ، مِ وَرِي مِ سَلَاکِ؞ جٛونِ اٜ مِ يِطِ نَنُکِ کٛ نٛدَّنْطٛنْيَمْ؞»‏

³⁰سٜيْ کٛنٜىٰلِيُسْ وِعِمٛ، ‏«‏بَلْطٜ نَيِ پَٻِّيطٜ اٜ مِ وَطَ دٛعَارٜ ندٜرْ وُرٛ اَمْ نجَمْندِ تَتِ بٛ جٛونِ؞ سٜيْ رَا، نٜطّٛ مٛ کٛلْتٜ طٜلْکِتٛتٛوطٜ وَرِي، اٛ دَرِي يٜىٰسٛ اَمْ؞ ³¹اٛ وِعِيَمْ، ‏‹‏کٛنٜىٰلِيُسْ، اَللَّه نَنِي دٛعَاجٜ مَاطَ اٛ جَٻِي سَدَکَاجِ مَاطَ؞ ³²لِلُ غٛطّٛ غَرِيرِ جٛفَّ، نٛدَّا غٛطّٛ بِعٜتٜىٰطٛ سِيمَنْ بِيتُرُسْ غٛنْطٛ وُرٛ غٛطّٛ ڤِيٛووٛ لَرٜ بِعٜتٜىٰطٛ سِيمَنْ، مٛ وُرٛ مُوطُمْ وٛنِ حَادٜ مَايٛ؞›‏ ³³طٛنْ اٜ طٛنْ لِلْمِ تٛ مَاطَ؞ مِ نَنِي بٜلْطُمْ غَرٛلْ مَاطَ؞ جٛونِ مِنْ فُو اٜ مِنْ طٛعٛ يٜىٰسٛ اَللَّه نغَمْ مِنْ نَنَ کٛ جٛومِرَاوٛ وِعِمَا مبِعَامِنْ فُو؞»‏

مٜتٛ بِيتُرُسْ

³⁴ندٜنْ بِيتُرُسْ فُطِّ مٜتَنْکِٻٜ وِعِ، ‏«‏جٛونِ غٛونغَ اٜ مِ اَنْدِ اَللَّه حٛلَّتَا فٜىٰرٛوتِرٛلْ حَکُّندٜ يِمْٻٜ؞ ³⁵تٛ غٛطّٛ حُلِيمٛ، حُوِي کٛ وٛوطِ، اَللَّه جَٻَيْمٛ کٛو طُمْ اِرِ نغٛلٜ لٜݧٛلْ؞ ³⁶اٛنْ اَنْدِ حَبَرُ طُمْ اَللَّه لِلْدٛيِ اِسْرَاعِيلَنْکٛعٜنْ؞ کَنْجُمْ وٛنِ ٻٜ نغَعَجِنَ حَبَرُ بٜلْطُمْ، طُمْ جَمْ کٜٻَاطُمْ بَرْکَ يٜىٰسُ اَلْمَسِيحُ؞ کَنْکٛ وٛنِ جٛومِرَاوٛ يِمْٻٜ فُو؞ ³⁷اٛنْ اَنْدِ نٛ حَبَرُ طُمْ سَنْکِتٛرِي کٛو تٛيٜ ندٜرْ لٜيْدِ يَحُودِيَ؞ طُمْ فُطِّي دَغَ لٜيْدِ غَلِيلِ غَطَ يَحَيَ وَطِي وَعَجُ دٛوْ بَڤْتِسْمَ؞ ³⁸اٛنْ اَنْدِ نٛ اَللَّه سُٻِرِ يٜىٰسُ نَجَرَنْکٜىٰجٛ، اٜ نٛ اٛ حٛکِّرِمٛ بَوْطٜ رُوحُ مَاکٛ؞ اٛنْ اَنْدِ نٛ يٜىٰسُ يِيلٛرِي ندٜرْ غَرِيجٜ فُو اٜ مٛ حُوَ کُوطٜ بٛطّٜ، اٜ مٛ يَمْطِتِنَ ٻٜ شٜيْطَنْ تٛرَّتَ فُو نغَمْ اَللَّه اٜ وٛنْدِ اٜ مَاکٛ؞ ³⁹مِنٛنْ مِنْ شٜيْدُعٜنْ کٛ اٛ حُوِ ندٜرْ لٜيْدِ يَحُودِيَ اٜ ندٜرْ غَرِيرِ اُرُشَلِيمَ فُو؞ ٻٜ ٻِلِمٛ دٛوْ غَافَانغَلْ، ٻٜ مبَرِمٛ، ⁴⁰اَمَّا اَللَّه اُمِّنِمٛ دَغَ مَيْدٜ ݧَلْندٜ تَتَوْرٜ، وَنْغِنِمٛ ندٜرْ يِمْٻٜ؞ ⁴¹اٛ وَنْغَنَايِ يِمْٻٜ فُو، اَمَّا اٛ وَنْغَنِيمِنْ مِنٛنْ شٜيْدُعٜنْ ٻٜ اَللَّه اَرْتِ سُٻُکِ؞ مِنٛنْ نغٛنِ ݧَمْندُٻٜ اٜ مَاکٛ نجَرْدِ اٜ مَاکٛ غَطَ اٛ اُمَّکٜ دَغَ مَيْدٜ؞ ⁴²اٛ وِعِمِنْ مِنْ نغَعَجِنَنَ يِمْٻٜ، مِنْ تَبِّتِنَنَٻٜ يٜىٰسُ وٛنِ مٛ اَللَّه وَرْتِرِ کِيتٛتٛوطٛ مَيْٻٜ اٜ ٻٜ يٛنْکِ؞ ⁴³اَنَّبٛعٜنْ فُو مٜتِي دٛوْ مَاکٛ ٻٜ مبِعِي کٛولِيطٛمٛ فُو حٜٻَيْ يَافَنٜىٰکِ حَکّٜ مُوطُمْ بَرْکَ اِنْدٜ مَاکٛ؞»‏

يِمْٻٜ نَاع يَحُودَنْکٛعٜنْ کٜٻِي رُوحُ اَللَّه

⁴⁴بِيتُرُسْ اٜ ندٜرْ مٜتَنْکِٻٜ، سٜيْ رُوحُ اَللَّه جِڤِّي دٛوْ نَنٛوٻٜمٛ فُو؞ ⁴⁵يَحُودَنْکٛعٜنْ کٛولِيٻٜ يٜىٰسُ غَرْدُٻٜ اٜ بِيتُرُسْ کَيْطِنِي ندٜ ٻٜ نغِعِ نٛ اَللَّه حٛکِّرِ يِمْٻٜ نَاع يَحُودَنْکٛعٜنْ رُوحُ مُوطُمْ، ⁴⁶نغَمْ ٻٜ نَنِي يِمْٻٜ ٻٜنْ اٜ مٜتِرَ طٜمْطٜ طٜ ٻٜ اَنْدَا، اٜ نغٜتَّ اَللَّه؞ سٜيْ بِيتُرُسْ وِعِ، ⁴⁷‏«‏يِمْٻٜ ٻٜعٜ کٜٻِي رُوحُ اَللَّه نٛ کٜٻِرْطٜنْطُمْ؞ طُمٜ حَطَتَ ٻٜ نغَطَنٜىٰ بَڤْتِسْمَ؟»‏ ⁴⁸نغَمْ نٛنْ اٛ وَطِ ٻٜ نغَطَنٜىٰ بَڤْتِسْمَ ندٜرْ اِنْدٜ يٜىٰسُ اَلْمَسِيحُ؞ غَطَ مَاجُمْ، ٻٜ تٛرِيمٛ اٛ جٛوطٛو تٛ مَٻّٜ بَلْطٜ سٜطَّ؞

بِيتُرُسْ مٜدِّي اٜ تٛکُّٻٜ يٜىٰسُ وٛنْٻٜ اُرُشَلِيمَ

¹لِلَاٻٜ اٜ تٛکُّٻٜ يٜىٰسُ وٛنْٻٜ لٜيْدِ يَحُودِيَ فُو ٻٜ نَنِي حَبَرُ يِمْٻٜ نَاع يَحُودَنْکٛعٜنْ نجَٻِي وٛلْدٜ اَللَّه؞ ²ندٜ بِيتُرُسْ يَحِ اُرُشَلِيمَ، يَحُودَنْکٛعٜنْ کٛولِيٻٜ يٜىٰسُ دَرِيٻٜ دٛوْ ندٛنُ مُعّٜنْ نغُ نَادُکِ ٻٜ مبِعِ کٛ اٛ وَطِ طُمْ وٛوطَا، ³اٜ ٻٜ مبِعَ، ‏«‏نغَمْ طُمٜ نَتُّطَا ندٜرْ وُرٛ يِمْٻٜ ٻٜ نَادَاکَ، حَا اَ ݧَمْدِي اٜ مَٻّٜ؟»‏ ⁴بِيتُرُسْ طِيوِتَنِٻٜ نٛ کٛو طُمٜ فُطِّرِ، اٛ وِعِٻٜ،

⁵‏«‏کٛ نغٛنّٛومِ ندٜرْ غَرِيرِ جٛفَّ اٜ مِ وَطَ دٛعَارٜ، مِ يِعِي وَحَيُ؞ ندٜرْ وَحَيُ طُمْ مِ يِعِي غٛطُّمْ اٜ جِڤّٛيٛو دَغَ دٛوْ؞ اٜ طُمْ نَنْدِ اٜ وُدٜرٜ مَوْندٜ کَٻَّاندٜ اٜ غُتُّلِّ نَيِ؞ طُمْ پِوٛيِ دَغَ دٛوْ اٜ طُمْ جِڤِّنٛيٜىٰ تٛ اَمْ؞ ⁶ندٜ ندَارُمِ ندٜرْ مَاجُمْ، سٜيْ نغِيمِ مَرْلٜ طٜ کٛيْطٜ نَيِ اٜ دِيوٜ لَدّٜ اٜ دَسٛتٛوطٜ اٜ شٛلِّ ندٜرْ مَيْرٜ؞ ⁷سٜيْ نَنْمِ حٛنٛنْدٜ اٜ وِعَيَمْ، ‏‹‏بِيتُرُسْ، اُمَّ، نَنْغُ، کِرْسَا، ݧَامَا!‏›‏ ⁸مبِعُمِ، ‏‹‏اَاعَ، جٛومِرَاوٛ!‏ مِ مٜىٰطَايِ ݧَامُکِ کٛ حَرْمِنِي کٛو کٛ لَاٻَايِ؞›‏ ⁹حٛنٛنْدٜ ندٜنْ فُطِّتِ وِعِيَمْ، ‏‹‏تَاع حَرْمِنْ کٛ اَللَّه لَاٻِنِ؞›‏ ¹⁰طُمْ وَطِ نٛنْ ندٜ تَتِ؞ غَطَ نٛنْ طُمْ فُو طُمْ سٛعَّا دٛوْ؞ ¹¹اٜ شَرٜلْ نغٜلْ، وٛرْٻٜ تَتٛ لِلٛيَاٻٜ تٛ اَمْ دَغَ کَيْسَارِيَ نجٛتِّي وُرٛ تٛ نغٛنْمِ؞ ¹²رُوحُ اَللَّه وِعِيَمْ مِ يَادَ اٜ مَٻّٜ تٛع مِ وَطَ سٜکٛ؞ ٻٜعٜ تٛکُّٻٜ يٜىٰسُ جٛوٜىٰغٛعٛ نجَادِ اٜ اَمْ، مِنْ نَتِّدِ وُرٛ کٛنٜىٰلِيُسْ؞ ¹³اٛ وِعِمِنْ نٛ اٛ يِعِرِ مَلَاعِکَاجٛ غَرْطٛ وُرٛ مَاکٛ وِعِمٛ، ‏‹‏لِلُ غٛطّٛ غَرِيرِ جٛفَّ، نٛدَّا غٛطّٛ بِعٜتٜىٰطٛ سِيمَنْ بِيتُرُسْ؞ ¹⁴اٛ وِعٜتٜ نٛ کٜٻْرَتَا کِسْندَمْ، اَنْ اٜ وُرٛ مَاطَ فُو؞›‏ ¹⁵ندٜ ڤُطُّمِ مٜتُکِ، سٜيْ رُوحُ اَللَّه جِڤِّي دٛوْ مَٻّٜ نٛنْ نٛ طُمْ جِڤّٛرِي دٛوْ مٜىٰطٜنْ اَرَنْدٜ؞ ¹⁶سٜيْ شِفْتٛرْمِ کٛ جٛومِرَاوٛ وِعُنٛو وِعُکِ، ‏‹‏يَحَيَ وَطَنِي يِمْٻٜ بَڤْتِسْمَ اٜ ندِيَمْ، اَمَّا اٛنٛنْ، اَللَّه وَطِرَنَيْعٛنْ بَڤْتِسْمَ اٜ رُوحُ مُوطُمْ؞›‏ ¹⁷تٛ اَللَّه حٛکِّيٻٜ دٛکَّلْ نغَلْ اٛ حٛکِّعٜنْ ندٜ کٛولِيطٜنْ يٜىٰسُ اَلْمَسِيحُ جٛومِرَاوٛ، تٛو، مِنْ مِ مٛيٜ کَطَيْمِ کٛ اَللَّه يِطِ وَطُکِ؟»‏

¹⁸ندٜ ٻٜ نَنِ کٛ اٛ وِعِ، ٻٜ ندٜعِّتِ، ٻٜ مَنْتِ اَللَّه، ٻٜ مبِعِ، ‏«‏اَللَّه وَطَنِي يِمْٻٜ نَاع يَحُودَنْکٛعٜنْ لَاوٛلْ تُوبُکِ نغَمْ ٻٜ کِسَ ٻٜ کٜٻَ يٛنْکِ کِ رٜعَتَا؞»‏

کَوْتَلْ تٛکُّٻٜ يٜىٰسُ وٛنْٻٜ غَرِيرِ اَنْتَاکِيَ

¹⁹وٛٻّٜ تٛکُّٻٜ يٜىٰسُ شَنْکِتَامَ نغَمْ تٛرَّاجِ طِ ٻٜ تٛرَّا غَطَ طُمْ وَرِي اِسْتِفَانُسْ؞ وٛٻّٜ نجَحِ فِنِيکِيَ، وٛٻّٜ نجَحِ سَيِيفُرُسْ، وٛٻّٜ بٛو نجَحِ اَنْتَاکِيَ؞ اٜ ٻٜ نغَعَجِنَ ندٜرْ يَحُودَنْکٛعٜنْ تَنْ؞ ²⁰اَمَّا وٛٻّٜ ندٜرْ مَٻّٜ پِوٛيْٻٜ سَيِيفُرُسْ اٜ سَايِرِنْ نَتِّ غَرِيرِ اَنْتَاکِيَ، اٜ ٻٜ نغَعَجِنَ حَبَرُ بٜلْطُمْ طُمْ يٜىٰسُ جٛومِرَاوٛ ندٜرْ يِمْٻٜ نَاع يَحُودَنْکٛعٜنْ؞ ²¹جٛومِرَاوٛ بٛو اٜ وٛنْدِ اٜ مَٻّٜ؛ يِمْٻٜ طُطْٻٜ تُوبِ نغَيْلِتِي تٛ جٛومِرَاوٛ؞

²²کَوْتَلْ تٛکُّٻٜ يٜىٰسُ وٛنْٻٜ اُرُشَلِيمَ بٛو نَنِي حَبَرُ کٛ وَطِ تٛنْ اَنْتَاکِيَ، سٜيْ ٻٜ لِلِ بَرْنَبَ تٛ مَٻّٜ؞ ²³ندٜ بَرْنَبَ وَرِ يِعِ نٛ اَللَّه بَرْکِطِنِرِ يِمْٻٜ نَاع يَحُودَنْکٛعٜنْ تٛکُّٻٜ يٜىٰسُ، اٛ نَنِ بٜلْطُمْ، اٛ سٜمْبِطِنِٻٜ ٻٜ ندَرٛو دٛوْ کٛ ٻٜ کٛولِي، ٻٜ تٛکَّ جٛومِرَاوٛ اٜ ٻٜرْندٜ غٛعٛ؞ ²⁴نغَمْ بَرْنَبَ اٛ نٜطّٛ مٛ نغِکُّ بٛطُّمْ، کٜوْطٛ رُوحُ اَللَّه کٛولِيطٛ جٛومِرَاوٛ؞ سٜيْ يِمْٻٜ طُطْٻٜ تُوبِ تٛکِّ جٛومِرَاوٛ؞

²⁵غَطَ نٛنْ، بَرْنَبَ يَحِ غَرِيرِ تَرْسُسْ نغَمْ طَٻُّتُکِ شَاوُلُ؞ ²⁶ندٜ اٛ تَوِمٛ، اٛ يَارِمٛ غَرِيرِ اَنْتَاکِيَ؞ ٻٜ نجٛوطٛدِي اٜ کَوْتَلْ تٛکُّٻٜ يٜىٰسُ وٛنْٻٜ تٛنْ حِتَاندٜ وٛعٛيْرٜ، اٜ ٻٜ اٜکِّتِنَ يِمْٻٜ طُطْٻٜ؞ اٜ اَنْتَاکِيَ طُمْ فُطِّ نٛدِّرْکِ تٛکُّٻٜ يٜىٰسُ مَسِيحِيَنْکٛعٜنْ؞

²⁷ندٜرْ بَلْطٜ طٜنْ، وٛٻّٜ اَنَّبٛعٜنْ پِوٛيِ اُرُشَلِيمَ نغَرِ اَنْتَاکِيَ؞ ²⁸غٛعٛتٛ ندٜرْ مَٻّٜ بِعٜتٜىٰطٛ اَغَبُسْ اُمِّي دَرِي وَطِ اَنَّبَاکُ اٜ بَوْطٜ رُوحُ اَللَّه، وِعِ وٜىٰلٛ کَلُّنغٛ وَطَيْ ندٜرْ دُونِيَارُ فُو؞ نغٛ بٛو وَطِ ندٜرْ شَرٜلْ لَامِيطٛ مَوْطٛ بِعٜتٜىٰطٛ کَلَوْدِيُسْ؞ ²⁹سٜيْ تٛکُّٻٜ يٜىٰسُ ڤُطِّ حَوْرُتُکِ شٜىٰدٜ، کٛو مٛيٜ وَدَّ کٛ وَاوِ وَدُّکِ، نغَمْ ٻٜ مبَلَّ بَنْدِرَاٻٜ مَٻّٜ وٛنْٻٜ لٜيْدِ يَحُودِيَ؞ ³⁰ندٜ ٻٜ کَوْرِتِ بَلَّلْ نغَلْ، سٜيْ ٻٜ لِلْدِنغَلْ اٜ جُنْغٛ بَرْنَبَ اٜ شَاوُلُ، ٻٜ نجَارَنغَلْ تٛ مَوْٻٜ کَوْتَلْ تٛکُّٻٜ يٜىٰسُ تٛنْ اُرُشَلِيمَ؞

طُمْ ٻٜيْدِي تٛرُّکِ تٛکُّٻٜ يٜىٰسُ

¹ندٜرْ شَرٜلْ نغٜلْ، حِرُدُسْ لَامِيطٛ فُطِّ تٛرُّکِ وٛٻّٜ ندٜرْ تٛکُّٻٜ يٜىٰسُ؞ ²اٛ نَنْغِ يَاکُبُ مِݧِرَاوٛ يَحَيَ، اٛ وَطِ طُمْ وَرْدِمٛ کَافَحِ؞ ³ندٜ اٛ يِعِ کٛ اٛ وَطِ وٜلِي يَحُودَنْکٛعٜنْ، اٛ نَنْغِ بِيتُرُسْ؞ نَنْغُکِ کِنْ بٛو وَرِ دٜي‑دٜيْ اٜ شَرٜلْ حُمْتٛ بُرٛودِ طُمْ وَلَا پُوفِنِرْطُمْ؞ ⁴غَطَ اٛ نَنْغِيمٛ، اٛ مَٻِّمٛ ندٜرْ سُودُ شُرَلْ، اٛ وَطِ مٛٻْطٜ سٛوجِعٜنْ نَيِ طٜ سٛوجِعٜنْ نَيٛ‑نَيٛ ٻٜ ندٜىٰنَمٛ؞ اٜ مٛ يِطِ وَدُّکِمٛ يٜىٰسٛ يِمْٻٜ غَطَ حُمْتٛ نغٛنْ اٛ وَطَنَمٛ کِيتَ؞ ⁵بِيتُرُسْ مَٻَّا ندٜرْ سُودُ شُرَلْ، اَمَّا کَوْتَلْ تٛکُّٻٜ يٜىٰسُ نغَطِ کَ وَطَنْکِمٛ دٛعَارٜ؞

⁶ندٜرْ جٜمَّارٜ ندٜ حِرُدُسْ ݧُمِ وُرْتِنْکِ بِيتُرُسْ، وَطَنَمٛ کٛ يِطِ تٛ وٜىٰتِ، بِيتُرُسْ اٜ طَانِي حَکُّندٜ سٛوجِعٜنْ طِطٛ، اٜ مٛ حَٻّٛرِي ٻٛغِّ نجَمْندِ؞ رٜىٰنٛوٻٜ بٛو اٜ ندٜىٰنِ دَمُّطٜ سُودُ شُرَلْ ندُنْ؞ ⁷طٛنْ اٜ طٛنْ مَلَاعِکَاجٛ جٛومِرَاوٛ وَنْغَنِمٛ، جَيْنغٛلْ يٜيْنِي ندٜرْ سُودُ ندُنْ فُو؞ اٛ دِمْبِ بِيتُرُسْ، اٛ فِندِنِمٛ، اٛ وِعِ، ‏«‏يَوْنُ، اُمَّ!‏»‏ سٜيْ ٻٛغِّ نجَمْندِ طِطُمْ حَٻِّرِ جُوطٜ مَاکٛ تَپِ، طِ نجَنِ؞ ⁸مَلَاعِکَاجٛ اٛنْ وِعِمٛ، ‏«‏تَادَ تَادٛرْدٜ مَاطَ، فَطَ ڤَطٜ مَاطَ؞»‏ ندٜ بِيتُرُسْ وَطِ نٛنْ، مَلَاعِکَاجٛ اٛنْ وِعِمٛ، ‏«‏وَانَ شُدَّارِ مَاطَ، تٛکَّمْ؞»‏ ⁹بِيتُرُسْ وُرْتِي، تٛکِّمٛ؞ اٛ اَنْدَا کٛ مَلَاعِکَاجٛ اٛنْ وَطَتَ طُمْ غٛونغَ؛ اٛ کَمِّ طُمْ وَحَيُ؞ ¹⁰ندٜ ٻٜ پَٻِّي رٜىٰنٛوٻٜ اَرَنْدٜعٜنْ اٜ شَکِتِيٻٜ، ٻٜ نغَرِ دَمُّغَلْ نجَمْندِ دَارَيْنغَلْ غَرِيرِ؞ نغَلْ مَٻِّتِي اٜ حٛورٜ مَاغَلْ يٜىٰسٛ مَٻّٜ، سٜيْ ٻٜ مبُرْتِي، ٻٜ نَنْغِ لَاوٛلْ؞ اٜ ٻٜ نجَحَ، سٜيْ طٛنْ اٜ طٛنْ مَلَاعِکَاجٛ اٛنْ مَجِّتَنِمٛ؞

¹¹ندٜنْ حَکِّيلٛ بِيتُرُسْ وَرْتِ، اٛ وِعِ، ‏«‏جٛونِ مِ تَبِّتِنِي جٛومِرَاوٛ لِلٛيِي مَلَاعِکَاجٛ مُوطُمْ نغَمْ حِسْنَيَمْ دَغَ جُنْغٛ حِرُدُسْ اٜ ݧُمٛوجِ يَحُودَنْکٛعٜنْ کَلُّطِ؞»‏

¹²ندٜ اٛ اَنْدِتِ نٛنْ، اٛ يَحِ وُرٛ مَرْيَامَ، مَدُوجٛ يَحَيَ بِعٜتٜىٰطٛ مَرْکُسْ، تٛنْ تٛ يِمْٻٜ طُطْٻٜ کَوْرِتِ اٜ نغَطَ دٛعَارٜ؞ ¹³ندٜ بِيتُرُسْ فِيِ دَمُّغَلْ وُرٛ نغٛنْ، کٛرْطٛ بِعٜتٜىٰطٛ رٛودَ وَرِ دَمُّغَلْ نغَلْ نغَمْ يِعَ طُمْ مٛيٜ؞ ¹⁴ندٜ اٛ اَنْدِتِ حٛنٛنْدٜ بِيتُرُسْ، اٛ نَنِ بٜلْطُمْ حَا اٛ يٜجِّتِ مَٻِّتَنْکِمٛ دَمُّغَلْ؞ اٛ حَٻْتِي اٛ سٛعِّي ندٜرْ، اٛ وِعِٻٜ طُمْ بِيتُرُسْ دَرِي يَاسِ دَمُّغَلْ؞ ¹⁵ٻٜ مبِعِمٛ، ‏«‏اَ کَاݝَاطٛ!‏»‏ اَمَّا اٛ ٻٜيْدِ وِعُکِ طُمْ بِيتُرُسْ؞ طٛنْمَا ٻٜ مبِعِمٛ، ‏«‏طُمْ مَلَاعِکَاجٛ مَاکٛ؞»‏

¹⁶اَمَّا بِيتُرُسْ دَرِي اٜ فِيَ دَمُّغَلْ؞ ندٜ ٻٜ مَٻِّتَنِمٛ ٻٜ نغِعِمٛ، طُمْ حَيْطِنِيٻٜ نَاع سٜطَّ؞ ¹⁷اٛ پٜفْتَنِٻٜ جُنْغٛ نغَمْ ٻٜ ندٜعِّتَ، اٛ وِعِٻٜ نٛ جٛومِرَاوٛ وُرْتِنِرِمٛ ندٜرْ سُودُ شُرَلْ، اٛ وِعِ، ‏«‏کٛکّٜىٰ يَاکُبُ حَبَرُ طُعُمْ، اٜ تٛکُّٻٜ يٜىٰسُ حٛرِيٻٜ فُو؞»‏ غَطَ مَاجُمْ اٛ وُرْتِي، اٛ يَحِ وٛنْدٜ وِغٜىٰرٜ؞

¹⁸ندٜ وٜىٰتِ، وٜمْبٜرٜ مَوْندٜ نَنْغِ سٛوجِعٜنْ ٻٜنْ نغَمْ ٻٜ اَنْدَا تٛ بِيتُرُسْ وٛنِ؞ ¹⁹ندٜ حِرُدُسْ طَٻِّتِ بِيتُرُسْ حٜٻْتَايِمٛ، وَطِ طُمْ پَمَ سٛوجِعٜنْ رٜىٰنٛوٻٜ ٻٜنْ طُمْ وَرَٻٜ؞ غَطَ مَاجُمْ حِرُدُسْ اَلِ لٜيْدِ يَحُودِيَ، اٛ يَحِ غَرِيرِ کَيْسَارِيَ، اٛ نٜىٰٻِ تٛنْ؞

مَيْدٜ حِرُدُسْ

²⁰حِرُدُسْ اٜ مٛنَّنَ يِمْٻٜ غَرِيجٜ تَايَ اٜ سِدٛنْ؞ سٜيْ يِمْٻٜ غَرِيجٜ طٜنْ کَوْرِتِ نجَحِ تٛ مَاکٛ؞ ٻٜ اَرْتِ نَرُّکِ اٜ مَوْطٛ کُوَنٛوٻٜ حِرُدُسْ بِعٜتٜىٰطٛ بِلَسْتُسْ؞ ندٜنْ ٻٜ نجَحِ تٛ حِرُدُسْ، ٻٜ تٛرِي جٛنْدٜ جَمْ حَکُّندٜ مَٻّٜ، نغَمْ ندٜرْ لٜيْدِ مَاکٛ ٻٜ کٜٻَتَ ݧَمْندُ؞

²¹ندٜ ݧَلْندٜ ندٜ اٛ رٜسَنِٻٜ وَرِ، حِرُدُسْ ٻٛرْنِي کٛلْتٜ لَامُ، جٛوطِي دٛوْ جٛوطٛرْغَلْ لَامُ، اٛ مٜتَنِٻٜ؞ ²²سٜيْ ٻٜ مٜتِ سٜمْبٜىٰ، ٻٜ مبِعِ، ‏«‏طُعُمْ طُمْ حٛنٛنْدٜ اَلَّح، نَاع طُمْ حٛنٛنْدٜ نٜطّٛ!‏»‏ ²³طٛنْ اٜ طٛنْ مَلَاعِکَاجٛ جٛومِرَاوٛ يٛوفٛنٛيِمٛ ݧَوُ نغَمْ اٛ مَوْنِنَايِ اَللَّه؞ غِلْپِ نغَطِ کَ ݧَامُکِمٛ حَا اٛ مَايِ؞

²⁴اَمَّا حَالَ اَللَّه يَحِ يٜىٰسٛ، ٻٜيْدِ سَنْکِتَاکِ؞

²⁵ندٜ بَرْنَبَ اٜ شَاوُلُ کٜىٰݧِ کُوغَلْ مُعّٜنْ ندٜرْ اُرُشَلِيمَ، ٻٜ کٛوتِدِ اٜ يَحَيَ بِعٜتٜىٰطٛ مَرْکُسْ؞

بَرْنَبَ اٜ بُلُسْ لِلَامَ سَيِيفُرُسْ

¹ندٜرْ کَوْتَلْ تٛکُّٻٜ يٜىٰسُ وٛنْٻٜ غَرِيرِ اَنْتَاکِيَ اٜ وٛودِ اَنَّبٛعٜنْ اٜ اٜکِّتِنٛوٻٜ، کَمْٻٜ نغٛنِ بَرْنَبَ اٜ سَامِنُ بِعٜتٜىٰطٛ ٻَلٜىٰجٛ، اٜ لُوسِيُسْ سَايِرَنْکٜىٰجٛ، اٜ مَنَيٜنْ مَوْنُدُطٛ اٜ حِرُدُسْ لَامِيطٛ، اٜ شَاوُلُ؞ ²وٛنْدٜ ݧَلْندٜ اٜ ٻٜ مَوْنِنَ جٛومِرَاوٛ اٜ ٻٜ شُومٛو، سٜيْ رُوحُ اَللَّه وِعِٻٜ، ‏«‏کَکِّتَنٜىٰيَمْ بَرْنَبَ اٜ شَاوُلُ نغَمْ کُوغَلْ نغَلْ نٛدُّمِٻٜ ٻٜ نغَطَ؞»‏

³غَطَ ٻٜ شُومَکٜ ٻٜ نغَطِي دٛعَارٜ، ٻٜ نجٛوَنِ بَرْنَبَ اٜ شَاوُلُ جُوطٜ ٻٜ مبَرْکِطِنِٻٜ، ٻٜ طٛفْتِٻٜ ٻٜ ندِلِّ؞

يَادُ بُلُسْ اَرَنْدٜىٰرُ

⁴غَطَ رُوحُ اَللَّه لِلِي بَرْنَبَ اٜ شَاوُلُ، ٻٜ نجَحِ غَرِيرِ سَلُوکِيَ، دَغَ تٛنْ ٻٜ نَتِّ کٛمِوَلْ ٻٜ نجَحِ لٜيْدِ سَيِيفُرُسْ نغٛنْدِ شَکَ ندِيَمْ؞ ⁵ندٜ ٻٜ نجٛتِّي سَلَمِسْ، ٻٜ نغَعَجِنِ وٛلْدٜ اَللَّه طٛنْ ندٜرْ شُوطِ دٛعَارٜ يَحُودَنْکٛعٜنْ؞ يَحَيَ بِعٜتٜىٰطٛ مَرْکُسْ بٛو اٜ وٛنْدِ اٜ مَٻّٜ، اٜ مٛ وَلَّٻٜ؞

⁶ٻٜ نغِيلِي ندٜرْ لٜيْدِ سَيِيفُرُسْ نغٛنْدِ شَکَ ندِيَمْ حَا ٻٜ نغَرِ غَرِيرِ بَافٛسْ؞ تٛنْ ٻٜ کَوْرِ اٜ غٛطّٛ يَحُودَنْکٜىٰجٛ دَرْنٛووٛ بِعٜتٜىٰطٛ بَر‑جٛوشُوَ؞ اٛ اَنَّبِيجٛ فٜوْرٜ، ⁷غٛنْدُطٛ اٜ غٛمْنَاجٛ لٜيْدِ ندِنْ؞ اِنْدٜ غٛمْنَاجٛ اٛنْ سَرْجِيُسْ بُلُسْ، اٛ نٜطّٛ غٛودُطٛ فَامُ؞ اٛ نٛدِّ بَرْنَبَ اٜ شَاوُلُ نغَمْ اٜ مٛ يِطِ نَنُکِ وٛلْدٜ اَللَّه؞ ⁸اَمَّا بَر‑جٛوشُوَ اٛنْ بِعٜتٜىٰطٛ اَلِمَسْ، اٛ جَٻَايِ لِلَاٻٜ ٻٜنْ؞ ﴿مَعَنَ اَلِمَسْ وٛنِ دَرْنٛووٛ نغَمْ اٛ دَرْنٛووٛ؞﴾اٜ مٛ يِطِ حَطُکِ غٛمْنَاجٛ اٛنْ جَٻَ وٛلْدٜ اَللَّه؞ ⁹سٜيْ شَاوُلُ، بِعٜتٜىٰطٛ بُلُسْ، کٜىٰوُطٛ رُوحُ اَللَّه، سُتِيمٛ، ¹⁰وِعِمٛ، ‏«‏اَنْ ٻِي شٜيْطَنْ، اَ غَݧٛ کٛو طُمٜ بٛطُّمْ، کٜىٰوُطٛ پٛيْرٜ کَلُّندٜ اٜ نغَݧَاندِ؞ اَ يِطِ وَيْلُتُکِ غٛونغَ جٛومِرَاوٛ کَ وَرْتَ فٜوْرٜ؟ ¹¹جٛونِ جٛومِرَاوٛ نٛ تٛرّٜتٜ، اَ وُمَيْ، اَ يِعَتَا نَانغٜ نَا طُمْ حٛشِّي شَرٜلْ؞»‏

طٛنْ اٜ طٛنْ وٛنْدٜ ݧِوْرٜ سُدِّ غِتٜ اَلِمَسْ اٛ وُمِ؞ اٛ وَطِ کَ مبُمْبُمْتُکِ، اٜ مٛ طَٻِّتَ جٛغَنْتٛوطٛمٛ جُنْغٛ؞ ¹²ندٜ غٛمْنَاجٛ اٛنْ يِعِ کٛ وَطِ، اٛ جَٻِ يٜىٰسُ، نغَمْ اٛ حَيْطِنِي اٜ اٜکِّتِنٛلْ نغٛلْ دٛوْ جٛومِرَاوٛ؞

وَعَجِنْکِ بُلُسْ اٜ اَنْتَاکِيَ لٜيْدِ بِسِيدِيَ

¹³سٜيْ بُلُسْ اٜ ٻٜ اٛ يَادَتَ نَتِّ کٛمِوَلْ دَغَ غَرِيرِ بَافٛسْ، ٻٜ نجَحِ فٜرْغَ ندٜرْ لٜيْدِ بَمْفِيلِيَ؞ اَمَّا يَحَيَ مَرْکُسْ اَلِٻٜ سٛعِّي اُرُشَلِيمَ؞ ¹⁴ٻٜ پَٻِّي فٜرْغَ، ٻٜ نجَحِ غَرِيرِ اَنْتَاکِيَ ندٜرْ لٜيْدِ بِسِيدِيَ؞ ݧَلْندٜ سِوْتَارٜ ٻٜ نَتِّ سُودُ دٛعَارٜ ٻٜ نجٛوطِي؞ ¹⁵غَطَ طُمْ جَنْغِي اَتَّوْرَ اٜ دٜفْتٜ اَنَّبٛعٜنْ، سٜيْ اَرْدِيٻٜ سُودُ دٛعَارٜ ندُنْ لِلِ غٛطّٛ وِعَٻٜ، ‏«‏بَنْدِرَاٻٜ، تٛ اٛنْ نغٛودِ بٛلِيطٜ طٜ شٜمْبِطِنِرْتٛنْ يِمْٻٜ، مبِعٜىٰٻٜکَ؞»‏ ¹⁶سٜيْ بُلُسْ اُمِّي، پٜفْتِ جُنْغٛ مُوطُمْ، وِعِ،

‏«‏اٛنٛنْ بَنْدِرَاٻٜ اَمْ اِسْرَاعِيلَنْکٛعٜنْ اٜ حٛرِيٻٜ کُلٛوٻٜ اَللَّه، نَنٜىٰ کٛ مبِعَيْمِعٛنْ؞ ¹⁷اَللَّه مٛ اِسْرَاعِيلَنْکٛعٜنْ اٛ سُٻِي مَامَعٜنْ مٜىٰطٜنْ، اٛ مَوْنِنِي لٜݧٛلْ مَٻّٜ کٛ نغٛلْ وٛنّٛو لٜيْدِ مَسَرْ، کَدِمَا اٛ وُرْتِنِيٻٜ لٜيْدِ ندِنْ اٜ بَوْطٜ مَاکٛ؞ ¹⁸اٛ مُݧَنِيٻٜ دُوٻِ 40 ندٜرْ لَدّٜ؞ ¹⁹غَطَ اٛ حَلْکِي لٜپِّ جٛوٜىٰطِطِ جٛوطِنٛوطِ ندٜرْ لٜيْدِ کَنْعَانَ، اٛ حٛکِّٻٜ ندٛنُ لٜيْدِ ندِنْ؞ ²⁰فِي طُعُمْ فُو وَطِي ندٜرْ دُوٻِ 450؞ غَطَ مَاجُمْ، اٛ سُٻَنِٻٜ غَطٛوٻٜ کِيتَ حَا يَاکِ جَامَنُ اَنَّبِ سَمَاعِلَ؞

²¹‏«‏غَطَ طٛنْ ٻٜ تٛرِي اَللَّه حٛکَّٻٜ لَامِيطٛ؞ سٜيْ اَللَّه حٛکِّٻٜ شَاوُلُ، ٻِي کِسْ، پِوٛيْطٛ لٜݧٛلْ بِلِيَامِنُ؞ اٛ لَامِيٻٜ دُوٻِ 40؞ ²²ندٜ جٛومِرَاوٛ جِڤِّنِ شَاوُلُ دٛوْ لَامُ، اٛ لَمْنِ دَوْدَ؞ دٛوْ دَوْدَ اٛنْ بٛو اٛ وِعِ، ‏‹‏مِ يِعِي دَوْدَ ٻِي جٜىٰسِ، اٛ نٜطّٛ ڤُکَّنِيطٛيَمْ تٛ ٻٜرْندٜ، غَطَيْطٛ کٛ نغِطْمِ؞›‏ ²³دَغَ ندٜرْ لٜݧٛلْ دَوْدَ اٛنْ اَللَّه وُرْتِنِ يٜىٰسُ، کِسْنٛووٛ اِسْرَاعِيلَ نٛنْ نٛ اٛ وَارُنٛو اَلْکَوَلْ؞ ²⁴ندٜنْ کٛ يٜىٰسُ فُطَّ کُوغَلْ مُوطُمْ، يَحَيَ وَعَجِنَنِي لٜݧٛلْ اِسْرَاعِيلَ فُو ٻٜ تُوبَ، ٻٜ نغَطَنٜىٰ بَڤْتِسْمَ؞ ²⁵ندٜ يَحَيَ ٻَدِي حٜىٰݧُکِ کُوغَلْ مُوطُمْ، اٛ وِعِ، ‏‹‏مِنْ نَاع طُمْ اٛنْ طٛنْ مٛ کَمِّيطٛنْ؞ اَمَّا اٜ وٛودِ غَرَيْطٛ غَطَ اَمْ، مٛ مِ فٛتَايِ فِتُّکِ کٛو ٻٛغِّ ڤَطٜ مَاکٛ؞›‏

²⁶‏«‏اٛنٛنْ بَنْدِرَاٻٜ اَمْ، لٜݧٛلْ اِبْرَاهِمْ، اٜ اٛنٛنْ کُلٛوٻٜ اَللَّه وٛنْٻٜ ندٜرْ مٜىٰطٜنْ!‏ اٜنٜنْ طُمْ وَدَّنِ حَبَرُ کِسْندَمْ؞ ²⁷وٛنْٻٜ اُرُشَلِيمَ اٜ مَوْٻٜ مَٻّٜ فُو اَنْدِتَايِ يٜىٰسُ اٛ مٛيٜ؞ ٻٜ ڤَامَايِ بٛلِيطٜ اَنَّبٛعٜنْ جَنْغٜتٜىٰطٜ ݧَلْندٜ سِوْتَارٜ فُو ندٜرْ شُوطِ دٛعَارٜ؞ اَمَّا فُو اٜ نٛنْ، ٻٜ کٜبِّنِ کٛ اَنَّبٛعٜنْ ٻٜنْ مبِعِ ندٜ ٻٜ مبَرِ يٜىٰسُ؞ ²⁸کٛو ندٜ ٻٜ کٜٻَايِ دَلِيلَ وَطَنْکِمٛ کِيتَ مَيْدٜ، فُو اٜ نٛنْ ٻٜ تٛرَکٜ بِلَاتُسْ وَرَمٛ؞ ²⁹ندٜنْ غَطَ ٻٜ کٜبِّنِي کٛ دٜفْتٜرٜ وِعِ دٛوْ مَاکٛ فُو، ٻٜ نجِڤِّنِ ٻَنْدُ مَاکٛ دَغَ دٛوْ غَافَانغَلْ، ٻٜ نغَطِندُ ندٜرْ يٜنَاندٜ؞ ³⁰اَمَّا اَللَّه اُمِّنِيمٛ دَغَ مَيْدٜ؞ ³¹بَلْطٜ طُطّٜ اٜ مٛ وَنْغَنَ وٛنْدُنٛوٻٜ اٜ مَاکٛ، تٛکُّٻٜمٛ دَغَ لٜيْدِ غَلِيلِ يَاکِ اُرُشَلِيمَ؞ جٛونِ کَمْٻٜ ٻٜ نغَرْتِي اَنْدِنٛوٻٜمٛ يٜىٰسٛ يِمْٻٜ؞ ³²مِنْ نغَدَّنِيعٛنْ حَبَرُ بٜلْطُمْ طُمْ اَللَّه وَطَنّٛو مَامَعٜنْ مٜىٰطٜنْ اَلْکَوَلْ؞ ³³اَللَّه حٜبِّنَنِيعٜنْ اَلْکَوَلْ نغَلْ، اٜنٜنْ ٻِٻّٜ مَٻّٜ، ندٜ اٛ اُمِّنِ يٜىٰسُ دَغَ مَيْدٜ؞ کَدِمَا نٛنْ نٛ طُمْ وِنْدِرَا ندٜرْ دٜفْتٜرٜ جَبُورَ سُورَوٛلْ طِطَٻٛلْ وِعُکِ،

‏‹‏اَنْ، اَ ٻِطّٛ اَمْ،

حَنْدٜ مِ وَرْتِي ݧَاکٛ مَاطَ؞›‏

³⁴اَللَّه اُمِّنِي يٜىٰسُ دَغَ مَيْدٜ اٛ اَلَتَا ٻَنْدُ مَاکٛ ݧٛلَ ندٜرْ يٜنَاندٜ؞ نٛنْ نٛ اٛ وِعُنٛو:‏

‏‹‏مِ حٛکَّيْعٛنْ بَرْکَ شٜنِيطُمْ تَبِّتَيْطُمْ،

طُمْ نغَطَنْمِ دَوْدَ اَلْکَوَلْ؞›‏

³⁵کَدِمَا بَنْݧٜ ندٜرْ جَبُورَ وِعِ،

‏‹‏اَ اَلَتَا شٜنِيطٛ مَاطَ ݧٛلَ؞›‏

³⁶دَوْدَ حُوِي کٛ اَللَّه يِطِ ندٜرْ جَامَنُ مُوطُمْ؞ غَطَ مَاجُمْ اٛ مَايِ، اٛ اُوَا حَادٜ مَامَعٜنْ مَاکٛ، اٛ ݧٛلِي؞ ³⁷اَمَّا مٛ اَللَّه اُمِّنِ دَغَ مَيْدٜ ݧٛلَايِ؞ ³⁸بَنْدِرَاٻٜ اَمْ، سٜيْ اَنْدٛنْ اٜ مِنْ نغَعَجِنَنَعٛنْ حَبَرُ يَافَنٜىٰکِ حَکّٜ بَرْکَ يٜىٰسُ؞ ³⁹کٛولِيطٛمٛ فُو، اٛ رِمْطِنَيْمٛ دَغَ حَکّٜ طُمْ اَتَّوْرَ وَاوَايِ رِمْطِنْکِطُمْ؞ ⁴⁰نغَمْ مَاجُمْ، ڤَامٜىٰ تٛع کٛ اَنَّبٛعٜنْ مبِعِ حٜٻَعٛنْ؞ نغَمْ ٻٜ مبِعِي،

⁴¹‏‹‏رَطُّمْ، اٛنٛنْ يَوَنْٻٜ کُوطٜ جٛومِرَاوٛ، اٛنْ کَيْطِنَيْ، اٛنْ کَلْکَيْ!‏

نغَمْ مِ وَطَيْ غٛطُّمْ ندٜرْ جَامَنُ مٛوطٛنْ،

طُمْ اٛنْ نجَٻَتَا کٛو دَا غٛطّٛ فَمْتِنِيعٛنْطُمْ!‏›‏ »‏

⁴²تٛو، بُلُسْ اٜ بَرْنَبَ اٜ مبُرْتٛو سُودُ دٛعَارٜ ندُنْ، سٜيْ يِمْٻٜ تٛرِيٻٜ ٻٜ شٛعّٛيٛو ݧَلْندٜ سِوْتَارٜ وَرَيْندٜ، ٻٜ ٻٜيْدَ مٜتَنْکِٻٜ حَالَ کَنْ؞ ⁴³غَطَ يِمْٻٜ ٻٜنْ شَنْکِتَکٜ، يَحُودَنْکٛعٜنْ طُطْٻٜ اٜ نَتُّٻٜ ندٜرْ دِينَ مَٻّٜ تٛکِّ بُلُسْ اٜ بَرْنَبَ؞ کَمْٻٜ بٛو ٻٜ مٜتَنِٻٜ، اٜ ٻٜ شٜمْبِطِنَٻٜ ٻٜ نغَطَ کَ تٛکُّکِ اَللَّه نغَمْ ندٜرْ يِدّٜ مَاکٛ اٛ وَلَّٻٜ ٻٜ نغَطَ کٛ اٛ يِطِ؞

⁴⁴ندٜ ݧَلْندٜ سِوْتَارٜ يَلْتِ، ٻُرْٻٜ طُوطُکِ ندٜرْ غَرِيرِ ندِنْ نغَرِ نغَمْ نَنُکِ وٛلْدٜ جٛومِرَاوٛ؞ ⁴⁵اَمَّا ندٜ يَحُودَنْکٛعٜنْ نغِعِ مٛٻْدٜ يِمْٻٜ طُطْٻٜ، ٻٜ نَنِ لَوْلِيرُ، ٻٜ نغَطِ کَ يٜدُّکِ کٛ بُلُسْ اٜکِّتِنْتَ، اٜ ٻٜ کُطَمٛ؞ ⁴⁶اَمَّا بُلُسْ اٜ بَرْنَبَ مٜتَنِٻٜ کُلٛلْ وَلَا مبِعِ، ‏«‏دٛولٜ مِنْ اَرْتَ وَعَجِنَنْکِعٛنْ وٛلْدٜ اَللَّه اٛنٛنْ يَحُودَنْکٛعٜنْ؞ اَمَّا نغَمْ اٛنْ شَلَکٜندٜ، اٛنْ کٛلِّي اٛنْ ڤٛتَايِ حٜٻُکِ يٛنْکِ کِ رٜعَتَا؞ نغَمْ نٛنْ مِنْ نجَحَيْ تٛ لٜپِّ طِ نَاع يَحُودَنْکٛعٜنْ؞ ⁴⁷نغَمْ کَنْجُمْ وٛنِ کٛ جٛومِرَاوٛ وِعِ مِنْ نغَطَ، ندٜ اٛ وِعِ،

‏‹‏مِ وَطِيمَ نغَرْتَا جَيْنغٛلْ تٛ لٜپِّ نَاع يَحُودَنْکٛعٜنْ،

نغَمْ نغَدَّنَا دُونِيَارُ فُو کِسْندَمْ؞›‏ »‏

⁴⁸ندٜ يِمْٻٜ نَاع يَحُودَنْکٛعٜنْ نَنِ نٛنْ، ٻٜ نَنِ بٜلْطُمْ، ٻٜ تٜدِّنِ وٛلْدٜ جٛومِرَاوٛ؞ ندٜنْ ٻٜنْ طٛنْ ٻٜ اَللَّه سِرْيَنِي حٜٻُکِ يٛنْکِ کِ رٜعَتَا تٛکِّ يٜىٰسُ؞

⁴⁹وٛلْدٜ جٛومِرَاوٛ بٛو سَنْکِتِي کٛو تٛيٜ ندٜرْ لٜيْدِ ندِنْ؞ ⁵⁰اَمَّا اَرْدِيٻٜ يَحُودَنْکٛعٜنْ نغَطِ رٜوْٻٜ کُلٛوٻٜ اَللَّه ٻٜ طُمْ مَوْنِنْتَ، اٜ اَرْدِيٻٜ غَرِيرِ ندِنْ نغَݧَ بُلُسْ اٜ بَرْنَبَ، سٜيْ ٻٜ نغَطِ طُمْ فُطِّ تٛرُّکِ بُلُسْ اٜ بَرْنَبَ، ٻٜ ندِيوِٻٜ دَغَ ندٜرْ غَرِيرِ مَٻّٜ؞ ⁵¹نغَمْ نٛنْ بُلُسْ اٜ بَرْنَبَ ڤِطِّ سٛلَّارٜ ڤَطٜ مَٻّٜ نغَمْ حٛلُّکِ يِمْٻٜ ٻٜنْ نغَطِي حَکّٜ، ندٜنْ ٻٜ ندِلِّ غَرِيرِ اِکٛونِيَ؞ ⁵²اَمَّا تٛکُّٻٜ يٜىٰسُ وٛنْٻٜ اَنْتَاکِيَ نَنِ بٜلْطُمْ نَاع سٜطَّ، اٜ ٻٜ کٜىٰوِ رُوحُ اَللَّه؞

بُلُسْ اٜ بَرْنَبَ ندٜرْ غَرِيرِ اِکٛونِيَ

¹تٛو، ندٜ بُلُسْ اٜ بَرْنَبَ نجٛتِّي اِکٛونِيَ، ٻٜ نَتِّ ندٜرْ سُودُ دٛعَارٜ نٛنْ نٛ ٻٜ مبٛووِ وَطُکِ؞ ٻٜ نغَعَجِنِ حَا طُطْٻٜ ندٜرْ يَحُودَنْکٛعٜنْ اٜ غٛطِّ لٜپِّ کٛولِي يٜىٰسُ؞ ²اَمَّا يَحُودَنْکٛعٜنْ غَݧُٻٜ کٛولٛو يٜىٰسُ اُمِّنِ ٻٜرْطٜ يِمْٻٜ نَاع يَحُودَنْکٛعٜنْ نغَمْ ٻٜ نغَݧَ تٛکُّٻٜ يٜىٰسُ؞ ³فُو اٜ نٛنْ بُلُسْ اٜ بَرْنَبَ نٜىٰٻِ تٛنْ، اٜ ٻٜ نغَعَجِنَ ٻٜرْندٜ غٛعٛ دٛوْ جٛومِرَاوٛ کٛلُّطٛ کٛ ٻٜ نغَعَجِنْتَ طُمْ غٛونغَ ندٜ اٛ حٛکِّٻٜ بَوْطٜ وَطُکِ اَلَامَاجِ اٜ کُوطٜ کَيْطِنِيطٜ؞ ⁴اَمَّا يِمْٻٜ اِکٛونِيَ شٜنْدِي طِطِ؞ وٛٻّٜ تٛکِّ يَحُودَنْکٛعٜنْ، وٛٻّٜ بٛو تٛکِّ لِلَاٻٜ ٻٜنْ؞

⁵سٜيْ يِمْٻٜ نَاع يَحُودَنْکٛعٜنْ اٜ يَحُودَنْکٛعٜنْ اٜ اَرْدِيٻٜ مَٻّٜ فُو ٻٜ کَوْتِ حٛنْدُکٛ ٻٜ اُمَّنٛو لِلَاٻٜ ٻٜ کُبٛرٛوٻٜ اٜ کَاپٜ حَا ٻٜ مبَرَٻٜ؞ ⁶ندٜ لِلَاٻٜ ٻٜنْ نَنِ نٛنْ، سٜيْ ٻٜ ندٛغِّ يَاکِ غَرِيرِ لِسْتِرَ اٜ غَرِيرِ دَرْبٜ ندٜرْ لٜيْدِ لِکٛونِيَ، اٜ لَدّٜ غَرِيجٜ طٜنْ؞ ⁷تٛنْ ٻٜ نغَعَجِنِ حَبَرُ بٜلْطُمْ؞

بُلُسْ اٜ بَرْنَبَ ندٜرْ غَرِيرِ لِسْتِرَ

⁸ندٜرْ غَرِيرِ لِسْتِرَ اٜ وٛودِ غٛطّٛ جَرَاطٛ؞ دَغَ اٛ دَݧَا اٛ مٜىٰطَايِ دَرٛرَاکِ کٛيْطٜ مَاکٛ؞ ⁹وٛنْدٜ ݧَلْندٜ اٜ مٛ حٜتِّندَنٛو وَعَجِنْکِ بُلُسْ، سٜيْ بُلُسْ سُتِيمٛ، يِعِ اٜ مٛ وٛودِ حٛولَارٜ کٜوْتُندٜ اٛ يَمْطِتِنٜىٰ؞ ¹⁰سٜيْ اٛ وِعِ اٜ سٜمْبٜ، ‏«‏اُمَّ ندَرٛطَا!‏»‏ طٛنْ اٜ طٛنْ نٜطّٛ اٛنْ اُمِّي فُطِّ يَادُ؞ ¹¹ندٜ يِمْٻٜ حَوْرُتُٻٜ نغِعِ کٛ بُلُسْ وَطِ، ٻٜ مبِعِ سٜمْبٜىٰ ندٜرْ طٜمْنغَلْ مَٻّٜ نغَلْ لِکٛونِيَارٜ، ‏«‏اَلَّاجِ نجِڤَّنَکٜعٜنْ ندٜرْ نَنْدِ يِمْٻٜ!‏»‏ ¹²ٻٜ نٛدِّرِ بَرْنَبَ جٜىٰوُسْ، ٻٜ نٛدِّرِ بُلُسْ حٜرْمٜسْ، نغَمْ کَنْکٛ وٛنِ ٻُرْطٛ مٜتُکِ؞ ¹³وُرٛ تٛ طُمْ مَوْنِنْتَ اَلَّح مَٻّٜ بِعٜتٜىٰطُمْ جٜىٰوُسْ تٛ دَمُّغَلْ غَرِيرِ ندِنْ نغٛ وٛنِ؞ سٜيْ اَرْدِيطٛ دِينَ جٜىٰوُسْ وَدِّ غَعِ اٜ ڤِنْدِ تٛ دَمُّغَلْ نغَلْ؞ کَنْکٛ اٜ حَوْرُتُٻٜ طُطْٻٜ اٜ ٻٜ نغِطِ سَکَّنْکِ لِلَاٻٜ ٻٜنْ شَکِّرِ؞

¹⁴اَمَّا ندٜ بَرْنَبَ اٜ بُلُسْ نَنِ نٛنْ، ٻٜ شٜىٰکِ کٛلْتٜ مَٻّٜ نغَمْ ٻٜ نغَنِّي؞ ٻٜ کَٻْتِي ٻٜ نَتِّ ندٜرْ يِمْٻٜ ٻٜنْ، ٻٜ مبِعِ اٜ سٜمْبٜ، ¹⁵‏«‏نغَمْ طُمٜ نغَطٛتٛنْ نِحِ؟ مِنٛنْ يِمْٻٜ بٛ مٛوطٛنْ؞ اٜ مِنْ نغَعَجِنَنَعٛنْ حَبَرُ بٜلْطُمْ نغَمْ تُوبٛنْ، اَلٛنْ طٜعٜ کُوطٜ مٜىٰرٜ، نغَيْلِتٛيٛوطٛنْ تٛ اَللَّه مٛ يٛنْکِ، تَغُطٛ دٛوْ اٜ لٜيْ اٜ مَايٛ اٜ کٛ وٛنِ ندٜرْ مَاجُمْ؞ ¹⁶ندٜرْ جَامَنُوجِ پَٻِّيطِ اَللَّه اَلِي لٜپِّ دُونِيَارُ فُو تٛکَّ طَتٜ طٜ نغِطِ؞ ¹⁷فُو اٜ نٛنْ، اٛ اَلَايِ حٛلُّکِ يِمْٻٜ حٛورٜ مَاکٛ ندٜرْ کُوطٜ بٛطّٜ طٜ اٛ وَطَتَ؞ اٜ مٛ حٛکَّعٛنْ ندِيَمْ دَغَ دٛوْ، اٜ مٛ ٻٜنْدِنَنَعٛنْ غٜسٜ ندٜرْ شَرٜلْ کَانُنغٜلْ، اٜ مٛ حٛکَّعٛنْ ݧَمْندُ، اٜ مٛ وٜلْنَ ٻٜرْطٜ مٛوطٛنْ؞»‏ ¹⁸اَمَّا فُو اٜ بٛلِيطٜ طٜعٜ، لِلَاٻٜ ٻٜنْ تٛرَّکٜ کٛ کَطَ يِمْٻٜ ٻٜنْ حِرْسَنْکِٻٜ شَکِّرِ؞

¹⁹غَطَ مَاجُمْ يَحُودَنْکٛعٜنْ نغَرِ دَغَ اَنْتَاکِيَ اٜ اِکٛونِيَ؞ ٻٜ ڤٛوطِ حَکِّيلٛ يِمْٻٜ، حَا ٻٜ کُبٛرِي بُلُسْ اٜ کَاپٜ؞ سٜيْ ٻٜ ندَسِمٛ ٻٜ نجَارِمٛ غَطَ غَرِيرِ، نغَمْ اٜ ٻٜ کَمِّي اٛ مَايِي؞ ²⁰اَمَّا ندٜ تٛکُّٻٜ يٜىٰسُ نغَرِ ڤِلِيمٛ، اٛ اُمِّي، اٛ نَتِّ ندٜرْ غَرِيرِ؞ ندٜ فِنِ، اٛ دِلِّدِ اٜ بَرْنَبَ غَرِيرِ دَرْبٜ؞

سٛعَّاکِ غَرِيرِ اَنْتَاکِيَ لٜيْدِ سِيرِيَ

²¹بُلُسْ اٜ بَرْنَبَ نغَعَجِنِ حَبَرُ بٜلْطُمْ تٛنْ دَرْبٜ، ٻٜ کٜٻِ تٛکُّٻٜ يٜىٰسُ طُطْٻٜ؞ غَطَ مَاجُمْ ٻٜ شٛعِّي لِسْتِرَ اٜ اِکٛونِيَ اٜ اَنْتَاکِيَ؞ ²²اٜ ٻٜ شٜمْبِطِنَ ٻٜرْطٜ تٛکُّٻٜ يٜىٰسُ، اٜ ٻٜ مبَغِّنَٻٜ ٻٜ ندَرٛو اٜ سٜمْبٜ ندٜرْ تٛکُّکِ يٜىٰسُ؞ ٻٜ مبِعِٻٜ، ‏«‏سٜيْ اٜ تٛرَّاجِ طُطِّ کٜٻٜتٜنْ نَتُّکِ لَامُ اَللَّه؞»‏ ²³ندٜرْ کٛو نغَلٜ کَوْتَلْ تٛکُّٻٜ يٜىٰسُ، ٻٜ شُٻَنِٻٜ مَوْٻٜ؞ ندٜرْ سُومَيٜىٰرٜ اٜ دٛعَارٜ، ٻٜ نغَطِ شُٻَاٻٜ ٻٜنْ ندٜرْ جُنْغٛ جٛومِرَاوٛ مٛ ٻٜ کٛولِي؞

²⁴ندٜ ٻٜ کُولِ لٜيْدِ بِسِيدِيَ، ٻٜ نغَرِ لٜيْدِ بَمْفِيلِيَ؞ ²⁵ندٜ ٻٜ نغَعَجِنِ وٛلْدٜ اَللَّه ندٜرْ غَرِيرِ فٜرْغَ، سٜيْ ٻٜ ندِلِّرِ غَرِيرِ اَتَالِيَ؞ ²⁶دَغَ تٛنْ ٻٜ نَتِّ کٛمِوَلْ، ٻٜ کٛوتِ اَنْتَاکِيَ، نغَمْ ٻٜ نجٛتِّنِي کُوغَلْ نغَلْ ٻٜ نغِطِ وَطُکِ ندٜرْ يَادُ ندُنْ؞ اَنْتَاکِيَ وٛنِ غَرِيرِ ندِ تٛکُّٻٜ يٜىٰسُ نغٛنِ غَطَنْٻٜٻٜ دٛعَارٜ اَللَّه بَرْکِطِنَٻٜ وَلَّٻٜ ندٜرْ يَادُ ندُنْ؞

²⁷ندٜ ٻٜ نجٛتِّي، ٻٜ کَوْرِتِ کَوْتَلْ تٛکُّٻٜ يٜىٰسُ، ٻٜ طِيوِتَنِٻٜ کٛ اَللَّه وَطِ لَاوٛلْ مَٻّٜ، اٜ نٛ اٛ مَٻِّتِرَنِ لٜپِّ طِ نَاع يَحُودَنْکٛعٜنْ دَمُّغَلْ حٛولَاکِ يٜىٰسُ؞ ²⁸ٻٜ مبَالِ بَلْطٜ طُطّٜ تٛنْ ندٜرْ تٛکُّٻٜ يٜىٰسُ ٻٜنْ؞

کَوْتَلْ تٛکُّٻٜ يٜىٰسُ تٛ اُرُشَلِيمَ

¹سٜيْ وٛٻّٜ يِمْٻٜ پِوٛيِ لٜيْدِ يَحُودِيَ نغَرِ غَرِيرِ اَنْتَاکِيَ، اٜ ٻٜ اٜکِّتِنَ تٛکُّٻٜ يٜىٰسُ، اٜ ٻٜ مبِعَ، ‏«‏تٛ اٛنْ نَادَاکَ نٛنْ نٛ اَتَّوْرَ وِعِ اٛنْ کِسَتَا؞»‏ ²بُلُسْ اٜ بَرْنَبَ نغٜدّٛوتِرِ اٜ مَٻّٜ غٜدِّ نَوْطِ؞ سٜيْ کٛولِيٻٜ يٜىٰسُ وٛنْٻٜ اَنْتَاکِيَ شُٻِ بُلُسْ اٜ بَرْنَبَ اٜ وٛٻّٜ ندٜرْ مَٻّٜ، ٻٜ لِلِٻٜ اُرُشَلِيمَ نغَمْ ٻٜ مٜدَّ اٜ لِلَاٻٜ اٜ مَوْٻٜ وٛنْٻٜ تٛنْ دٛوْ حَالَ کَنْ؞

³سٜيْ تٛکُّٻٜ يٜىٰسُ ٻٜنْ طٛفْتِٻٜ ٻٜ نَنْغِ لَاوٛلْ يَاکِ لٜيْطٜ فِنِيکِيَ اٜ سَمَارِيَ، اٜ ٻٜ کٛکَّ تٛکُّٻٜ يٜىٰسُ حَبَرُ تُوبُکِ يِمْٻٜ نَاع يَحُودَنْکٛعٜنْ؞ تٛکُّٻٜ يٜىٰسُ فُو نَنِ بٜلْطُمْ حَبَرُ طُمْ؞ ⁴ندٜ ٻٜ نجٛتِّي اُرُشَلِيمَ، کَوْتَلْ تٛکُّٻٜ يٜىٰسُ اٜ لِلَاٻٜ اٜ مَوْٻٜ ٻٜنْ نجَٻِّيٻٜ؞ ندٜنْ بُلُسْ اٜ بَرْنَبَ طِيوِتَنِٻٜ فُو کٛ اَللَّه حُوتِنِرِٻٜ ٻٜ نغَطِ؞ ⁵اَمَّا وٛٻّٜ کٛولِيٻٜ يٜىٰسُ ندٜرْ فَارِسَنْکٛعٜنْ اُمِّي، مبِعِ، ‏«‏دٛولٜ تٛکُّٻٜ يٜىٰسُ نَاع يَحُودَنْکٛعٜنْ نَادٜىٰ، ٻٜ مبِعٜىٰ ٻٜ تٛکَّ کٛ اَتَّوْرَ وِعِ؞»‏

⁶سٜيْ لِلَاٻٜ اٜ مَوْٻٜ کَوْرِتِ نغَمْ ٻٜ مٜدَّ دٛوْ حَالَ کَنْ؞ ⁷ندٜ ٻٜ نٜىٰٻِ اٜ ٻٜ فٛطْفٛطْتِرَ دٛوْ فِي طُمْ، بِيتُرُسْ اُمِّي وِعِٻٜ، ‏«‏بَنْدِرَاٻٜ، اٛنْ اَنْدِ کٛ نٜىٰٻِ اَللَّه سُٻِييَمْ ندٜرْ مٛوطٛنْ مِ وَعَجِنَ حَبَرُ بٜلْطُمْ ندٜرْ لٜپِّ طِ نَاع يَحُودَنْکٛعٜنْ، نغَمْ ٻٜ نَنَ ٻٜ نغَرْتَ تٛکُّٻٜ يٜىٰسُ؞ ⁸اَللَّه اَنْدُطٛ ٻٜرْطٜ يِمْٻٜ فُو حٛلِّي اٛ جَٻِيٻٜ ندٜ اٛ حٛکِّٻٜ رُوحُ مَاکٛ نٛنْ نٛ اٛ حٛکِّرِعٜنْطُمْ؞ ⁹اٛ فٜىٰرٛوتِرَايِعٜنْ اٜ مَٻّٜ، نغَمْ اٛ يَافَنَکٜٻٜ حَکّٜ ندٜ ٻٜ کٛولِي يٜىٰسُ؞ ¹⁰جٛونِ، نغَمْ طُمٜ ڤٛوندٛتٛنْ اَللَّه اٛنْ نجٛوَنَ تٛکُّٻٜ يٜىٰسُ دٛنْغَلْ نغَلْ اٜنْ مبَاوَايِ رٛنْدَاکِ، اٜنٜنْ اٜ مَامَعٜنْ مٜىٰطٜنْ؟ ¹¹اَاعَ!‏ نٛنْ نٛ تٛکِّرْطٜنْ يٜىٰسُ جٛومِرَاوٛ کٜٻْطٜنْ کِسْندَمْ بَرْکَ يِدّٜ مَاکٛ، نٛنْ کَمْٻٜ مَا ٻٜ کِسْرَتَ؞»‏

¹²حَوْرُتُٻٜ فُو ندٜعِّتِ کٜتِّندَنِي کٛ بَرْنَبَ اٜ بُلُسْ مبِعَتَٻٜ دٛوْ نٛ اَللَّه حُوتِنِرِٻٜ وَطِ اَلَامَاجِ اٜ کُوطٜ کَيْطِنِيطٜ ندٜرْ لٜپِّ طِ نَاع يَحُودَنْکٛعٜنْ؞ ¹³ندٜ ٻٜ کٜىٰݧِ مٜتُکِ، سٜيْ يَاکُبُ وِعِ، ‏«‏بَنْدِرَاٻٜ، نَنٜىٰ کٛ مبِعَيْمِعٛنْ!‏ ¹⁴جٛونِ سِيمَنْ يٛتِّنِ طِيوِتَنْکِعٜنْ نٛ اَللَّه سُٻِرِ وٛٻّٜ ندٜرْ لٜپِّ طِ نَاع يَحُودَنْکٛعٜنْ، وَرْتِرِٻٜ يِمْٻٜ مُوطُمْ؞ ¹⁵طُمْ فٛتِّدِي اٜ کٛ اَنَّبٛعٜنْ مبِنْدُنٛو، ٻٜ مبِعِي،

¹⁶‏‹‏اَللَّه وِعِي، ‏«‏غَطَ مَاجُمْ، مِ سٛعّٛيْتٛ،

مِ مَحِتٛتٛو وُرٛ دَوْدَ سَنْکِتَانغٛ؞

مِ مَحِتٛونغٛ،

مِ دَرْنَنغٛ کَدِمَا،

¹⁷نغَمْ يِمْٻٜ حٛرِيٻٜ فُو طَٻِّتَ جٛومِرَاوٛ،

فُو اٜ يِمْٻٜ نَاع يَحُودَنْکٛعٜنْ نٛدِّرْتٜىٰٻٜ اِنْدٜ اَمْ؞

¹⁸نٛنْ جٛومِرَاوٛ وِعِ، اَنْدِنْطٛ فِي طُعُمْ کٛ نٜىٰٻِ؞»‏ ›‏

¹⁹‏«‏تٛو، نغَمْ مَاجُمْ مِنْ اٜ يِيکِ اَمْ، تٛع اٜنْ نغَنُّ يِمْٻٜ نَاع يَحُودَنْکٛعٜنْ نغَيْلِتٛيِيٻٜ تٛ اَللَّه؞ ²⁰اٜنْ مبِنْدَنْٻٜ طٜرٜوٛلْ تٛع ٻٜ ݧَامَ ݧَمْندُ حَرْمِنِيندُ ندُ طُمْ حِرْسَنِ اَلَّاجِ، تٛع ٻٜ نغَطَ نجٜىٰنُ، تٛع ٻٜ ݧَامَ کٛ مٛيْلَنَا دَاندٜ کٛو کٛ سَاطِ کٛو پِيپَمْ؞ ²¹نغَمْ کٛ نٜىٰٻِ اٜ طُمْ وَعَجِنَ اَتَّوْرَ اٜ کٛو ندِيٜ غَرِيرِ، اٜ طُمْ جَنْغَطُمْ کٛو ندٜيٜ ݧَلْندٜ سِوْتَارٜ ندٜرْ شُوطِ دٛعَارٜ؞»‏

نٛوتَاکِ اَرْدِيٻٜ کَوْتَلْ کٛولِيٻٜ يٜىٰسُ

²²سٜيْ لِلَاٻٜ اٜ مَوْٻٜ اٜ کَوْتَلْ تٛکُّٻٜ يٜىٰسُ فُو ندَرْوِ سُٻُکِ وٛٻّٜ دَغَ ندٜرْ مَٻّٜ نغَمْ ٻٜ لِلَٻٜ غَرِيرِ اَنْتَاکِيَ، ٻٜ نجَادَ اٜ بُلُسْ اٜ بَرْنَبَ؞ ٻٜ شُٻِ مَوْٻٜ طِطٛ ندٜرْ مَٻّٜ:‏ يَحُودَ، بِعٜتٜىٰطٛ بَرْسَبَ، اٜ سِيلَ؞ ²³ٻٜ کٛکِّٻٜ طٜرٜوٛلْ بِينغٛلْ:‏

‏«‏دَغَ بَنْدِرَاٻٜ مٛوطٛنْ لِلَاٻٜ اٜ مَوْٻٜ، اٜ مِنْ کٛوْنَعٛنْ، اٛنٛنْ بَنْدِرَاٻٜ اَمِنْ دَغَ غٛطِّ لٜپِّ غٛنْطِ ندٜرْ غَرِيرِ اَنْتَاکِيَ اٜ ندٜرْ لٜيْطٜ سِيرِيَ اٜ کِلِيکِيَ؞ ²⁴مِنْ نَنِي حَبَرُ وٛٻّٜ ندٜرْ اَمِنْ اُمِّنَنِيعٛنْ حَکِّيلٛ اٜ مٜتٜمٜتٜىٰجِ مَٻّٜ اٜ ٻٜ نغَنَّعٛنْ، کٛو ندٜ نَاع مِنٛنْ لِلِٻٜ؞ ²⁵کَنْجُمْ وَطِ مِنْ کَوْرِتِ کٛعٜ اَمِنْ مِنْ ندَرْوِ سُٻُکِ وٛٻّٜ ندٜرْ اَمِنْ مِنْ لِلٛيَٻٜ تٛ مٛوطٛنْ، حَوْتِ اٜ بَرْنَبَ اٜ بُلُسْ حِغٛوٻٜ اَمِنْ، ²⁶شٛورُٻٜ يٛنْکِيجِ مَٻّٜ نغَمْ حُوَنْکِ جٛومِرَاوٛ مٜىٰطٜنْ يٜىٰسُ اَلْمَسِيحُ؞ ²⁷نغَمْ نٛنْ مِنْ لِلٛيِ يَحُودَ اٜ سِيلَ ٻٜ مٜدَّ اٜ مٛوطٛنْ حٛنْدُکٛ اٜ حٛنْدُکٛ دٛوْ کٛ مِنْ مبِنْدَنِعٛنْ؞ ²⁸طُمْ دَرْوُکِ رُوحُ اَللَّه اٜ اَمِنْ، تٛع مِنْ نجٛوَنَعٛنْ وٛنْغَلْ تٜدّٛرَلْ، سٜيْ نِ طُعُمْ نَنْغُطُمْ دٛولٜ:‏ ²⁹تٛع اٛنْ ݧَامُ کٛ طُمْ سَکَّنِ غُنْکِيجِ کٛو کٛ سَاطِ کٛو کٛ طُمْ مٛيْلَنِ دَاندٜ کٛو پِيپَمْ، ندٜنْ تٛع اٛنْ نغَطُ نجٜىٰنُ؞ تٛ اٛنْ شُرِي کٛعٜ مٛوطٛنْ اٜ وَطُکِ فِي طُعُمْ اٛنْ نغَطِي بٛطُّمْ؞ اَللَّه وَلَّعٜنْ!‏»‏

³⁰سٜيْ ٻٜ لِلِٻٜ يَاکِ اَنْتَاکِيَ؞ ندٜ ٻٜ نجٛتِّي تٛنْ، ٻٜ کَوْرِتِ تٛکُّٻٜ يٜىٰسُ، ٻٜ کٛکِّٻٜ طٜرٜوٛلْ نغٛلْ؞ ³¹ندٜ تٛکُّٻٜ يٜىٰسُ وٛنْٻٜ اَنْتَاکِيَ نجَنْغِنغٛلْ، ٻٜ نَنِ بٜلْطُمْ نغَمْ نغٛلْ سٜمْبِطِنِيٻٜ؞ ³²ندٜ يَحُودَ اٜ سِيلَ ٻٜ اَنَّبٛعٜنْ، ٻٜ شٜمْبِطِنِ ٻٜرْطٜ تٛکُّٻٜ يٜىٰسُ، ٻٜ مبَغِّنِٻٜ دٛوْ فِي طُطُّمْ؞ ³³غَطَ ٻٜ مبَالِي بَلْطٜ تٛنْ، ٻٜ طٛفْتَا ٻٜ مبَرْکِطِنِٻٜ، ٻٜ شٛعِّي تٛ لِلٛيْٻٜٻٜ؞ ³⁴‏[‏اَمَّا سِيلَ جٛوطِي طٛنْ؞]‏ ³⁵بُلُسْ اٜ بَرْنَبَ بٛو نجٛوطِي ندٜرْ اَنْتَاکِيَ اٜ يِمْٻٜ طُطْٻٜ اٜ ٻٜ اٜکِّتِنَ، اٜ ٻٜ نغَعَجِنَ وٛلْدٜ جٛومِرَاوٛ؞

بُلُسْ سٜنْدِرِي اٜ بَرْنَبَ

³⁶غَطَ بَلْطٜ سٜطَّ بُلُسْ وِعِ بَرْنَبَ، ‏«‏اٜنْ شٛعّٛ غَرِيجٜ تٛ نغَعَجِنّٛوطٜنْ وٛلْدٜ جٛومِرَاوٛ، ندَارٜنْ نٛ تٛکُّٻٜ يٜىٰسُ نغٛنْتِندِرِ؞»‏ ³⁷بَرْنَبَ اٜ يِطِ ٻٜ نجَادَ اٜ يَحَيَ بِعٜتٜىٰطٛ مَرْکُسْ؞ ³⁸اَمَّا بُلُسْ يِعِ طُمْ حَانَايِ، نغَمْ مَرْکُسْ سٜنْدِرِينٛ اٜ مَٻّٜ اٜ لٜيْدِ بَمْفِيلِيَ، اٛ حٜىٰݧَايِ کُوغَلْ نغَلْ اٛ فُطِّدِ اٜ مَٻّٜ؞ ³⁹ٻٜ نغٜدّٛوتِرِ نَاع سٜطَّ حَا غٜدِّ طِنْ نجَارِٻٜ اٜ سٜنْدِرْکِ؞ بَرْنَبَ حٛشِّ مَرْکُسْ، ٻٜ نَتِّ کٛمِوَلْ يَاکِ سَيِيفُرُسْ؞ ⁴⁰اَمَّا بُلُسْ سُٻِ سِيلَ، دِلِّدِ اٜ مَاکٛ؞ تٛکُّٻٜ يٜىٰسُ نغَطِٻٜ ندٜرْ جُنْغٛ جٛومِرَاوٛ نغَمْ اٛ رٜىٰنَٻٜ؞ ⁴¹سٜيْ ٻٜ تٛکِّ ندٜرْ لٜيْطٜ سِيرِيَ اٜ کِلِيکِيَ، اٜ ٻٜ شٜمْبِطِنَ تٛکُّٻٜ يٜىٰسُ؞

تِمٛوتِ تٛکِّي بُلُسْ اٜ سِيلَ

¹بُلُسْ يَحِ غَرِيرِ دَرْبٜ اٜ غَرِيرِ لِسْتِرَ؞ تٛ لِسْتِرَ بٛو اٜ وٛودِ غٛطّٛ کٛولِيطٛ يٜىٰسُ بِعٜتٜىٰطٛ تِمٛوتِ؞ مَدُوجٛ مَاکٛ نٛ يَحُودَنْکٜىٰجٛ تٛکُّطٛ يٜىٰسُ، ݧَاکٛ مَاکٛ بٛو نٛ حٜلٜنَنْکٜىٰجٛ؞ ²تٛکُّٻٜ يٜىٰسُ وٛنْٻٜ لِسْتِرَ اٜ اِکٛونِيَ اٜ مٜتَ حَالَ مبٛطْکَ دٛوْ تِمٛوتِ؞ ³بُلُسْ اٜ يِطِ يَادُکِ اٜ مَاکٛ، نغَمْ مَاجُمْ اٛ نَادِمٛ؛ نغَمْ يَحُودَنْکٛعٜنْ وٛنْٻٜ بِغٜىٰجٜ طٜنْ فُو اٜ اَنْدِ ݧَاکٛ تِمٛوتِ نٛ حٜلٜنَنْکٜىٰجٛ؞ ⁴غَرِيجٜ تٛ ٻٜ نجَالِ فُو، اٜ ٻٜ مبِعَ تٛکُّٻٜ يٜىٰسُ کٛ لِلَاٻٜ اٜ مَوْٻٜ وٛنْٻٜ اُرُشَلِيمَ ندَرْنِ نغَمْ ٻٜ تٛکَّطُمْ؞ ⁵نٛنْ تٛکُّٻٜ يٜىٰسُ ٻٜيْدِ سٜمْبٜ ندٜرْ حٛولَاکِ يٜىٰسُ، اٜ ٻٜ ٻٜيْدَ طُوطُکِ کٛو ندٜيٜ ݧَلْندٜ؞

وَحَيُ بُلُسْ دٛوْ نٜطّٛ مَکِدٛونِيَ

⁶رُوحُ اَللَّه حَطِٻٜ وَعَجِنْکِ وٛلْدٜ اَللَّه ندٜرْ لٜيْدِ اَاسِيَ، نغَمْ نٛنْ ٻٜ ندِلِّ لٜيْطٜ فِرِيجِيَ اٜ غَلَاتِيَ؞ ⁷ندٜ ٻٜ نغَرِ کٜىٰرٛلْ لٜيْدِ مِيسِيَ، ٻٜ نغِطِي يَاکِ لٜيْدِ بِتِينِيَ، اَمَّا رُوحُ يٜىٰسُ، وَاتٛ رُوحُ اَللَّه، جَٻَايِ؞ ⁸نغَمْ مَاجُمْ، ٻٜ تٛکِّرِ ندٜرْ لٜيْدِ مِيسِيَ، ٻٜ نجَحِ غَرِيرِ بِعٜتٜىٰندِ تٛورُوَسْ؞ ⁹ندٜرْ جٜمَّارٜ ندٜنْ بُلُسْ حٛيْطِ؞ اٛ يِعِي نٜطّٛ مَکِدٛونِيَ اٜ دَرِي اٜ تٛرٛومٛ اٜ وِعَ، ‏«‏وٛرٛيْ مَکِدٛونِيَ، مبَلَّامِنْ!‏»‏ ¹⁰ندٜ بُلُسْ حٛيْطِ کٛيْطٛلْ نغٛلْ، طٛنْ اٜ طٛنْ مِنْ ندَرْوِ يَاکِ مَکِدٛونِيَ، نغَمْ مِنْ اَنْدِتِي اَللَّه نٛدِّيمِنْ مِنْ نغَعَجِنَنَٻٜ حَبَرُ بٜلْطُمْ کَمْٻٜ مَا؞

بُلُسْ ندٜرْ غَرِيرِ فِلِبِ

¹¹مِنْ نَتِّ کٛمِوَلْ اٜ تٛورُوَسْ، مِنْ نجَحِ حَا سَمُتَرْکِيَ؞ ندٜ فِنِ مِنْ نجَحِ نِيَافٛلِسْ؞ ¹²دَغَ طٛنْ مِنْ نجَحِ فِلِبِ، غَرِيرِ مَوْندِ ندٜرْ لٜيْدِ مَکِدٛونِيَ نغٛنْدِ لٜيْ لَامُ رٛومَنْکٛعٜنْ؞ مِنْ مبَالِ بَلْطٜ تٛنْ؞ ¹³ݧَلْندٜ سِوْتَارٜ، مِنْ مبُرْتِي غَرِيرِ ندِنْ مِنْ نجَحِ رٜغٛرْدٜ شَانغٛلْ، نغَمْ اٜ مِنْ کَمِّي اٜ وٛودِ وِغٜىٰرٜ تٛ يَحُودَنْکٛعٜنْ نغَطَتَ دٛعَارٜ تٛنْ؞ تٛنْ مِنْ تَوِ رٜوْٻٜ اٜ کَوْرِتِ؞ مِنْ نجٛوطِي، اٜ مِنْ مٜدَّ اٜ مَٻّٜ؞ ¹⁴ندٜرْ مَٻّٜ اٜ وٛودِ غٛطّٛ دٜبّٛ بِعٜتٜىٰطٛ لِيدِيَ، پِوٛيْطٛ غَرِيرِ تَيَاتِرَ کُلٛووٛ اَللَّه؞ اٜ مٛ سٛورَ کٛلْتٜ بٛطٜىٰجٜ طٜ شٜىٰدٜ؞ جٛومِرَاوٛ مَٻِّتِ ٻٜرْندٜ مَاکٛ اٛ حٜتِّندَنِي کٛ بُلُسْ وِعَتَ؞ ¹⁵غَطَ کَنْکٛ اٜ وُرٛ مَاکٛ فُو ٻٜ نغَطَنَامَ بَڤْتِسْمَ، سٜيْ اٛ تٛرِيمِنْ، اٛ وِعِ، ‏«‏تٛ اٛنْ جَٻِي مِ کٛولِيطٛ جٛومِرَاوٛ اٜ غٛونغَ، نغَرٜىٰ نجٛوطٛوطٛنْ تٛ وُرٛ اَمْ؞»‏ اٛ اٜسْتِمِنْ مِنْ نجِڤّٛو تٛ مَاکٛ، سٜيْ مِنْ نجِڤِّي؞

بُلُسْ اٜ سِيلَ ندٜرْ سُودُ شُرَلْ

¹⁶وٛنْدٜ ݧَلْندٜ اٜ مِنْ نجَحَ تٛ طُمْ وَطَتَ دٛعَارٜ، سٜيْ مِنْ کَوْرِ اٜ غٛطّٛ کٛرْطٛ؞ کٛرْطٛ اٛنْ اٛ دَرْنٛووٛ، اٜ مٛ حٜٻَنَ جٜيْٻٜمٛ شٜىٰدٜ طُطّٜ اٜ کُوغَلْ مَاکٛ نغَلْ رَرْنُکِ؞ ¹⁷سٜيْ اٛ وَطِ کَ تٛکُّکِمِنْ، مِنٛنْ اٜ بُلُسْ، اٜ مٛ وُلَّ، اٜ مٛ وِعَ، ‏«‏يِمْٻٜ ٻٜعٜ ٻٜ کُوَنٛوٻٜ اَللَّه مَوْطٛ!‏ اٜ ٻٜ اَنْدِنَعٛنْ لَاوٛلْ کِسْندَمْ؞»‏ ¹⁸اٛ وَطِ بَلْطٜ طُطّٜ اٜ مٛ وَطَ نٛنْ حَا بُلُسْ ٻٜرْنِ، يٜىٰپِيمٛ، وِعِ غِنّٛلْ نغٛلْ، ‏«‏ندٜرْ اِنْدٜ يٜىٰسُ اَلْمَسِيحُ، اٜ مِ وِعِمَا وُرْتَ ندٜرْ مَاکٛ!‏»‏ طٛنْ اٜ طٛنْ غِنّٛلْ نغٛلْ وُرْتِيمٛ؞ ¹⁹ندٜ جٛومِرَاٻٜ مَاکٛ نغِعِ لَاوٛلْ حٜٻُکِ شٜىٰدٜ مَٻّٜ تٛ کٛرْطٛ اٛنْ دَرَکٜ، ٻٜ نَنْغِ بُلُسْ اٜ سِيلَ، ٻٜ ندَسِٻٜ ٻٜ نجَارِيٻٜ لُومٛ، تٛنْ تٛ مَوْٻٜ غَرِيرِ؞ ²⁰ٻٜ نجَارِٻٜ يٜىٰسٛ مَوْٻٜ غَرِيرِ ندِنْ، ٻٜ مبِعِ، ‏«‏ٻٜعٜ يِمْٻٜ طِطٛ ٻٜ يَحُودَنْکٛعٜنْ، اٜ ٻٜ اُمِّنَ حَکِّيلٛ يِمْٻٜ غَرِيرِ مٜىٰطٜنْ نَاع سٜطَّ؞ ²¹اٜ ٻٜ اٜکِّتِنَ ندٛنُوجِ طِ حَانَا نجَٻٜنْ کٛو تٛکّٜنْ، نغَمْ اٜنٜنْ اٜنْ رٛومَنْکٛعٜنْ؞»‏ ²²يِمْٻٜ طُطْٻٜ کَوْرِتِ دٛوْ مَٻّٜ؞

مَوْٻٜ غَرِيرِ نغَطِ طُمْ ٻٛرْتِٻٜ طُمْ فِيِٻٜ؞ ²³غَطَ ٻٜ ڤِيَامَ ڤِيطٜ کَلُّطٜ، ٻٜ مَٻَّا ندٜرْ سُودُ شُرَلْ؞ مَوْٻٜ ٻٜنْ مبِعِ دٜىٰنٛووٛ سُودُ شُرَلْ رٜىٰنَٻٜ بٛطُّمْ؞ ²⁴کَنْکٛ بٛو، ندٜ اٛ نَنِ نٛنْ، اٛ نَتِّنِٻٜ ندٜرْ سُودُ شُرَلْ شَکَارُ، اٛ حَٻِّ کٛيْطٜ مَٻّٜ حَکُّندٜ لٜطّٜ طِطِ مَوْطٜ؞

²⁵شَکَ جٜمَّ، بُلُسْ اٜ سِيلَ اٜ ٻٜ نغَطَ دٛعَارٜ اٜ ٻٜ مَنْتَ اَللَّه اٜ غِمِ؞ نَنْغَاٻٜ حٛرِيٻٜ اٜ کٜتِّندَنِي کٛ ٻٜ مبِعَتَ؞ ²⁶طٛنْ اٜ طٛنْ لٜيْدِ دِمْبِي دِمْبَاکِ مَوْکِ، حَا فُطّٛودٜ سُودُ شُرَلْ ندُنْ دِمْبِي؞ دَمُّطٜ طٜنْ فُو مَٻِّتِي، ٻٛغِّ نجَمْندِ طِ طُمْ حَٻِّرِ وٛنْٻٜ ندٜرْ سُودُ شُرَلْ ندُنْ فُو تَپِ؞ ²⁷ندٜ دٜىٰنٛووٛ سُودُ شُرَلْ اٛنْ حُيْلِي، اٛ يِعِ دَمُّطٜ طٜنْ فُو اٜ مَٻِّتِي، اٛ کَمِّ مَٻَّاٻٜ فُو ندٛغِّي؞ نغَمْ مَاجُمْ اٛ سٛرْتِ کَافَحِ نغَمْ اٛ وَرَ حٛورٜ مَاکٛ؞ ²⁸سٜيْ بُلُسْ نٛدِّ اٜ سٜمْبٜ، وِعِ، ‏«‏تَاع وَرُ حٛورٜ مَاطَ؞ مِنْ فُو اٜ مِنْ طٛنْ!‏»‏

²⁹دٜىٰنٛووٛ اٛنْ وِعِ حٛکّٜىٰ فِتِلَارُ، اٛ دٛغِّ اٛ نَتِّ تٛ بُلُسْ اٜ سِيلَ نغٛنِ، اٛ دِشِّي يٜىٰسٛ مَٻّٜ، اٜ مٛ دِوْنَ نغَمْ کُلٛلْ؞ ³⁰ندٜنْ اٛ وُرْتِنِٻٜ، اٛ وِعِٻٜ، ‏«‏مٛودِٻّٜ، کٛ نغَطَيْمِ مِ حِسَ؟»‏

³¹ٻٜ نٛوتِي ٻٜ مبِعِ، ‏«‏حٛولَ يٜىٰسُ جٛومِرَاوٛ، اَنْ اٜ وُرٛ مَاطَ فُو، اٛنْ کِسَيْ؞»‏ ³²ٻٜ مٜتَنِمٛ وٛلْدٜ جٛومِرَاوٛ، کَنْکٛ اٜ وُرٛ مَاکٛ فُو؞ ³³ندٜرْ جٜمَّارٜ ندٜنْ، اٛ وُرْتِنِٻٜ، اٛ لٛوتَنِٻٜ نَوْنٛوطٜ؞ اٜ نغٜلْ طٛنْ شَرٜلْ اٛ وَطَنَا بَڤْتِسْمَ، کَنْکٛ اٜ وُرٛ مَاکٛ فُو؞ ³⁴ندٜنْ اٛ يَارِ بُلُسْ اٜ سِيلَ وُرٛ مَاکٛ، اٛ حٛکِّٻٜ ݧَمْندُ؞ کَنْکٛ اٜ وُرٛ مَاکٛ فُو ٻٜ نَنِ بٜلْطُمْ نغَمْ ٻٜ نغَرْتِي کٛولِيٻٜ اَللَّه؞

³⁵ندٜ وٜىٰتِ، مَوْٻٜ غَرِيرِ ندِنْ لِلٛيِ تَادِيٻٜ مبِعَ دٜىٰنٛووٛ اٛنْ اٛ يٛوفَ بُلُسْ اٜ سِيلَ ندِلَّ؞ ³⁶سٜيْ دٜىٰنٛووٛ اٛنْ وِعِ بُلُسْ، ‏«‏مَوْٻٜ لِلٛيِي مبِعِ طُمْ يٛوفَعٛنْ؞ نغَمْ نٛنْ مبُرْتٜىٰ جٛونِ، نجَحٛنْ جَمْ؞»‏

³⁷اَمَّا بُلُسْ وِعِمٛ، ‏«‏ٻٜ نغَطِي طُمْ فِيِيمِنْ يٜىٰسٛ يِمْٻٜ دَغَ مِنْ نغَطَنَاکَ کِيتَ، ٻٜ مَٻِّيمِنْ ندٜرْ سُودُ شُرَلْ؞ مِنٛنْ بٛو، مِنْ رٛومَنْکٛعٜنْ؞ ندٜنْ جٛونِ ٻٜ مبُرْتِنَمِنْ اٜ سُوطٜ؟ طُمْ وَطَتَاکٛ سَمْ!‏ دٛولٜ کَمْٻٜ اٜ کٛعٜ مَٻّٜ، ٻٜ نغَرَ طٛعٛ ٻٜ مبُرْتِنَمِنْ!‏»‏

³⁸سٜيْ تَادِيٻٜ ٻٜنْ نجَحِ طِيوِتَنِ مَوْٻٜ غَرِيرِ حَالَ کَنْ؞ ندٜ ٻٜ نَنِ بُلُسْ اٜ سِيلَ ٻٜ رٛومَنْکٛعٜنْ، ٻٜ کُلِ؞ ³⁹ٻٜ نجَحِ ٻٜ تُوبَنِٻٜ، ٻٜ مبُرْتِنِٻٜ سُودُ شُرَلْ ندُنْ؞ ٻٜ تٛرِيٻٜ ٻٜ مبُرْتٛو غَرِيرِ مَٻّٜ؞ ⁴⁰ندٜ بُلُسْ اٜ سِيلَ مبُرْتِي سُودُ شُرَلْ ندُنْ، ٻٜ نَتِّ وُرٛ لِيدِيَ؞ ٻٜ نغِيدِ اٜ تٛکُّٻٜ يٜىٰسُ، ٻٜ شٜمْبِطِنِ ٻٜرْطٜ مَٻّٜ؞ غَطَ مَاجُمْ ٻٜ ندِلِّ؞

بُلُسْ اٜ سِيلَ ندٜرْ غَرِيرِ تَسَلٛونِکَ

¹ندٜ بُلُسْ اٜ سِيلَ تٛکِّ لَاوٛلْ تٛکُّنغٛلْ ندٜرْ غَرِيجٜ اَمْڤِبٛلِسْ اٜ اَفٛلٛونِيَ، سٜيْ ٻٜ نغَرِ تَسَلٛونِکَ؞ غَرِيرِ ندِنْ اٜ وٛودِ سُودُ دٛعَارٜ يَحُودَنْکٛعٜنْ؞ ²سٜيْ بُلُسْ نَتِّ ندٜرْ سُودُ دٛعَارٜ ندُنْ نٛنْ نٛ اٛ وٛووِ وَطُکِ؞ اٛ وَطِ يٛنْتٛوجٜ تَتِ ݧَلْندٜ سِوْتَارٜ فُو اٜ مٛ نَتَّ سُودُ دٛعَارٜ ندُنْ اٜ مٛ مٜدَّ اٜ مَٻّٜ دٛوْ دٜفْتٜرٜ شٜنِيندٜ؞ ³اٜ مٛ فَمْتِنَٻٜ اٜ مٛ تَبِّتِنَنَٻٜ ندٜرْ دٜفْتٜرٜ شٜنِيندٜ وِعُکِ دٛولٜ اَلْمَسِيحُ تٛرّٜىٰ، ندٜنْ اٛ اُمّٛو دَغَ مَيْدٜ؞ اٛ وِعِٻٜ، ‏«‏يٜىٰسُ اٛعٛ مٛ نغَعَجِنَنَيْمِعٛنْ حَبَرُ مَاکٛ، کَنْکٛ وٛنِ اَلْمَسِيحُ؞»‏ ⁴وٛٻّٜ ندٜرْ يَحُودَنْکٛعٜنْ نجَٻِکَ، ٻٜ تٛکِّ بُلُسْ اٜ سِيلَ، کَمْٻٜ اٜ يِمْٻٜ نَاع يَحُودَنْکٛعٜنْ طُطْٻٜ کُلٛوٻٜ اَللَّه، حَوْتِ اٜ رٜوْٻٜ طُطْٻٜ غٛودُٻٜ مَنْغُ؞

⁵اَمَّا وٛٻّٜ يَحُودَنْکٛعٜنْ ٻٜ کٛولَاکِ يٜىٰسُ نَنِ لَوْلِيرُ بُلُسْ اٜ سِيلَ؞ سٜيْ ٻٜ کَوْرِتِ سُکَحٛ مٜىٰرٜحٛ، نغِيلٛتٛوکٛ ندٜرْ لُومٛ؞ ٻٜ اُمِّنَنِ فُو يِمْٻٜ غَرِيرِ ندِنْ حَکِّيلٛ؞ ٻٜ نَتِّ وُرٛ جَاسٛنْ، اٜ ٻٜ طَٻِّتَ بُلُسْ اٜ سِيلَ نغَمْ ٻٜ نجَارَٻٜ يٜىٰسٛ يِمْٻٜ؞ ⁶ندٜ ٻٜ کٜٻْتَايِ بُلُسْ اٜ سِيلَ، ٻٜ ندَسٛيِ جَاسٛنْ اٜ وٛٻّٜ تٛکُّٻٜ يٜىٰسُ، ٻٜ نغَدِّٻٜ يٜىٰسٛ مَوْٻٜ غَرِيرِ، اٜ ٻٜ مبِعَ اٜ سٜمْبٜ، ‏«‏رَا يِمْٻٜ کَطٛوٻٜ جٛنْدٜ جَمْ کٛو تٛيٜ، رَا ٻٜ نغَرِي حَا طٛعٛ؞ ⁷جَاسٛنْ بٛو جِڤِّنِيٻٜ ندٜرْ وُرٛ مُوطُمْ!‏ ٻٜ فُو ٻٜ تٛکَّتَا کٛ کَيْسَرْ لَامِيطٛ وِعِ، اٜ ٻٜ مبِعَ اٜ وٛودِ غٛطّٛ لَامِيطٛ بِعٜتٜىٰطٛ يٜىٰسُ؞»‏ ⁸ندٜ يِمْٻٜ غَرِيرِ ندِنْ اٜ مَوْٻٜ مَٻّٜ نَنِ نٛنْ، حَکِّيلٛ مَٻّٜ اُمِّي؞ ⁹مَوْٻٜ ٻٜنْ نغَطِ جَاسٛنْ اٜ ٻٜ اٛ نَنْغِدَا نجٛٻِ شٜىٰدٜ، ندٜنْ ٻٜ نجٛوفِٻٜ؞

بُلُسْ ندٜرْ غَرِيرِ بِيرِيَ

¹⁰ندٜ جٜمَّ وَطِ، تٛکُّٻٜ يٜىٰسُ نغَطِ بُلُسْ اٜ سِيلَ نجَحَ غَرِيرِ بِيرِيَ؞ ندٜ ٻٜ نجٛتِّي غَرِيرِ ندِنْ، ٻٜ نجَحِ سُودُ دٛعَارٜ يَحُودَنْکٛعٜنْ؞ ¹¹يِمْٻٜ غَرِيرِ بِيرِيَ ٻُرِي يِمْٻٜ تَسَلٛونِکَ نغِکُّ بٛطُّمْ نغَمْ ٻٜ نجَٻِي حَبَرُ طُمْ بُلُسْ وَدَّنِٻٜ اٜ جُوطٜ طِطِ؞ اٜ ٻٜ لِنْشِتَ دٜفْتٜرٜ شٜنِيندٜ کٛو ندٜيٜ ݧَلْندٜ، نغَمْ ٻٜ نغِعَ کٛو کٛ بُلُسْ اٜکِّتِنْتَٻٜ طُمْ غٛونغَ؞ ¹²يَحُودَنْکٛعٜنْ طُطْٻٜ نجَٻِ وٛلْدٜ جٛومِرَاوٛ، حَا اٜ رٜوْٻٜ حٜلٜنَنْکٛعٜنْ غٛودُٻٜ مَنْغُ اٜ وٛرْٻٜ حٜلٜنَنْکٛعٜنْ طُطْٻٜ؞ ¹³ندٜ يَحُودَنْکٛعٜنْ تَسَلٛونِکَ نَنِ بُلُسْ وَعَجِنِي وٛلْدٜ اَللَّه ندٜرْ غَرِيرِ بِيرِيَ، ٻٜ نجَحِ تٛنْ مَا، ٻٜ اُمِّنِ حَکِّيلٛ يِمْٻٜ؞ ¹⁴طٛنْ اٜ طٛنْ تٛکُّٻٜ يٜىٰسُ نغَطِ بُلُسْ حُولَ فٛنْغٛ مَايٛ، اَمَّا سِيلَ اٜ تِمٛوتِ نجٛوطِي ندٜرْ غَرِيرِ ندِنْ؞ ¹⁵طٛفْتُٻٜ بُلُسْ بٛو نجَادِ اٜ مَاکٛ ندٜرْ کٛمِوَلْ حَا غَرِيرِ اَتِنَ؞ ندٜ ٻٜ نجٛتِّي تٛنْ، بُلُسْ لِلٛيِٻٜ ٻٜ مبِعَ سِيلَ اٜ تِمٛوتِ نغَرَ تٛ مَاکٛ ندٜرْ يَوْطَارٜ؞

بُلُسْ ندٜرْ غَرِيرِ اَتِنَ

¹⁶شَرٜلْ کٛ بُلُسْ اٜ رٜنْتِ غَرٛلْ سِيلَ اٜ تِمٛوتِ اٜ غَرِيرِ اَتِنَ، ٻٜرْندٜ مَاکٛ نَاوِي نَاع سٜطَّ ندٜ اٛ يِعِ نٛ غَرِيرِ ندِنْ حٜىٰوِرِ غُنْکِيجِ؞ ¹⁷نغَمْ مَاجُمْ اٜ مٛ يٜدّٛوتِرَ اٜ يَحُودَنْکٛعٜنْ اٜ وٛٻّٜ نَاع يَحُودَنْکٛعٜنْ کُلٛوٻٜ اَللَّه ندٜرْ سُودُ دٛعَارٜ؞ طٛنْمَا کٛو ندٜيٜ اٜ مٛ وَطَ نٛنْ ندٜرْ لُومٛ اٜ ٻٜ اٛ حَوْرِ طٛنْ فُو؞ ¹⁸سٜيْ وٛٻّٜ غٛودُٻٜ اَنْدَلْ بِعٜتٜىٰٻٜ اَبِکُورِعٜنْ اٜ سِتٛوکِعٜنْ مٜدِّ اٜ مَاکٛ؞ وٛٻّٜ مَٻّٜ اٜ مبِعَ، ‏«‏طُمٜ اٛعٛ مَوْنِنٛووٛ حٛورٜ مٛ اَنْدَا کٛو طُمٜ يِطِ وِعُکِ؟»‏

وٛٻّٜ مبِعِ، ‏«‏اٜ مِنْ نغِعَ بٛ اٛ غَعَجِنٛووٛ حَبَرُ اَلَّاجِ غٛطّٜ لٜيْطٜ؞»‏ ٻٜ مبِعُ نٛنْ نغَمْ اٜ مٛ وَعَجِنَ حَبَرُ يٜىٰسُ اٜ اُمَّاکِ مَيْٻٜ؞ ¹⁹نغَمْ نٛنْ ٻٜ نجَارِمٛ يٜىٰسٛ مَوْٻٜ غَرِيرِ تٛ وِغٜىٰرٜ بِعٜتٜىٰندٜ پٛلْدٜ اَرَاسَ، ٻٜ مبِعِمٛ، ‏«‏اٜ مِنْ نغِطِ اَنْدُکِ اٜکِّتِنٛلْ کٜسٛلْ نغٛلْ اٜکِّتِنْتَا، ²⁰نغَمْ اَ وَدِّي فِي طُمْ مِنْ مٜىٰطَايِ نَنُکِ؞ اٜ مِنْ نغِطِ اَنْدُکِ مَعَنَ مَاجُمْ؞»‏ ²¹يِمْٻٜ غَرِيرِ اَتِنَ اٜ حٛٻّٜ جٛوطِيٻٜ طٛنْ وَلَا کٛ ٻٜ ٻُرِ يِطُکِ بٛ نَنُکِ فِي کٜسُمْ ٻٜ مٜتَ دٛوْ مَاجُمْ؞

²²سٜيْ بُلُسْ دَرِي يٜىٰسٛ مَوْٻٜ ٻٜنْ تٛ پٛلْدٜ اَرَاسَ، اٛ وِعِ، ‏«‏اٛنٛنْ يِمْٻٜ اَتِنَ، مِ يِعِي اٜ کٛو نغٛلٜ لَاوٛلْ اٛنْ غِطُٻٜ تٛکُّکِ دِينَ نَاع سٜطَّ، ²³نغَمْ ندٜ نغِيلِيمِ ندٜرْ غَرِيرِ مٛوطٛنْ، اٜ مِ رَارَ بِغٜىٰجٜ دِينَ مٛوطٛنْ حَا مِ يِعِ سَکِّرْدٜ، طُمْ وِنْدِ دٛوْ مَيْرٜ ‏‹‏نغَمْ اَللَّه مٛ اَنْدَاکَ؞›‏ تٛو، اٛنْ طٛنْ مٛ مَوْنِنْتٛنْ ندٜرْ شِيَ اَنْدَلْ، کَنْکٛ نغِطُمِ اَنْدِنْکِعٛنْ؞ ²⁴اَللَّه تَغُطٛ دُونِيَارُ اٜ کٛ وٛنِ ندٜرْ مَيْرُ فُو، کَنْکٛ وٛنِ جٛومُ دٛوْ اٜ لٜيْ؞ اٛ جٛوطَتَاکٛ ندٜرْ شُوطِ مَحِرَاطِ جُوطٜ؞ ²⁵کَنْکٛ اٛ يِطَا بَلَّلْ نٜطّٛ؞ وَلَا کٛو طُمٜ کٛ يِمْٻٜ مبَاوَتَ وَطَنْکِمٛ، نغَمْ کَنْکٛ حٛکَّتَ يِمْٻٜ يٛنْکِ اٜ فٛوفَانغٛ اٜ کٛو طُمٜ؞ ²⁶دَغَ تٛ نٜطّٛ غٛعٛتٛ اَللَّه تَغِ لٜپِّ فُو، اٛ جٛوطِنِطِ ندٜرْ دُونِيَارُ؞ اٛ دَرْنِ شَرٜلْ نغٜلْ ٻٜ نغَطَتَ کٜىٰرٛلْ جٛنْدٜ مَٻّٜ فُو؞ ²⁷اَللَّه وَطِي طُعُمْ نغَمْ ٻٜ طَٻِّتَمٛ طُمْ غَطٛتٛوطُمْ ٻٜ مبُمْبُنْتَ ٻٜ کٜٻَمٛ، کٛو ندٜ اٛ وٛطَّا کٛو مٛيٜ مٜىٰطٜنْ؞ ²⁸نغَمْ غٛطّٛ وِعِ،

‏‹‏يٛنْکِ مٜىٰطٜنْ اٜ يَادُ مٜىٰطٜنْ اٜ جٛنْدٜ مٜىٰطٜنْ طُمْ فُو تٛ مَاکٛ طُمْ پِوٛيِ؞›‏

نٛنْ نٛ وٛٻّٜ غِمٛوٻٜ مٛوطٛنْ مبِعِ،

‏‹‏غٛونغَ اٜنٜنْ مَا، اٜنْ لٜݧٛلْ مَاکٛ؞›‏

²⁹تٛو، ندٜ اٜنْ لٜݧٛلْ اَللَّه، حَانَايِ کَمّٛوطٜنْ اٜ مٛ نَنْدِ اٜ غٛطُّمْ غَطِرَاطُمْ اٜ جِينَارِ کٛو اٜ اَجُرْفَارِ کٛو اٜ حَيْرٜ شٜحَاندٜ، کٛو اٜ کٛ نٜطّٛ وَطِرِ ݧُمٛ مُوطُمْ؞ ³⁰اَللَّه مُݧَنِي يِمْٻٜ کٛ ٻٜ نغٛنّٛو ندٜرْ شِيَ اَنْدَلْ؞ اَمَّا جٛونِ، اٜ مٛ وِعَ يِمْٻٜ فُو کٛو تٛيٜ ٻٜ تُوبَ، ³¹نغَمْ اٛ سِرْيَکٜ ݧَلْندٜ ندٜ اٛ وَطَنْتَ دُونِيَارُ کِيتَ ندٜرْ غٛونغَ؞ اٛ وَطَيْ شُٻَاطٛ مَاکٛ وَطَ کِيتَ کَنْ؞ اٛ تَبِّتِنَنِيطُمْ يِمْٻٜ فُو ندٜ اٛ اُمِّنِمٛ دَغَ مَيْدٜ؞»‏

³²ندٜ ٻٜ نَنِ بُلُسْ اٜ مٜتَ دٛوْ اُمَّاکِ مَيْٻٜ، وٛٻّٜ نجَلِمٛ، وٛٻّٜ بٛو مبِعِ، ‏«‏اٜ مِنْ نغِطِ ٻٜيْدَا مٜتَنْکِمِنْ دٛوْ فِي طُعُمْ وٛنْدٜ ݧَلْندٜ؞»‏ ³³سٜيْ بُلُسْ دِلِّ اَلِٻٜ؞ ³⁴اَمَّا وٛٻّٜ نجَٻِ کٛ بُلُسْ وِعِ ٻٜ تٛکِّ يٜىٰسُ؞ ندٜرْ مَٻّٜ اٜ وٛودِ غٛطّٛ غٛنْطٛ ندٜرْ کَوْتَلْ پٛلْدٜ اَرَاسَ بِعٜتٜىٰطٛ دِيٛنِيسِيُسْ، کَنْکٛ اٜ دٜبّٛ بِعٜتٜىٰطٛ دَمَارِسْ، ندٜنْ اٜ وٛٻّٜ؞

نٛ بُلُسْ وَعَجِنِرِ ندٜرْ غَرِيرِ کٛرِنْتِ

¹غَطَ مَاجُمْ، بُلُسْ اَلِ اَتِنَ، يَحِ کٛرِنْتِ؞ ²تٛنْ اٛ تَوِ غٛطّٛ يَحُودَنْکٜىٰجٛ بِعٜتٜىٰطٛ اَکِيلَ، کَنْکٛ اٜ دٜبّٛ مَاکٛ بِعٜتٜىٰطٛ بِرِسْکِلَ، پِوٛيْٻٜ لٜيْدِ فَنْتُسْ؞ ٻٜ نٜىٰٻَايِ کٛ ٻٜ پِوٛيِ لٜيْدِ اِتَالِيَ، نغَمْ کَلَوْدِيُسْ، مَوْطٛ لَامِيٻٜ لٜيْطٜ رٛومَ، وِعِ يَحُودَنْکٛعٜنْ فُو مبُرْتٛو غَرِيرِ رٛومَ؞ بُلُسْ يَحِ تٛ مَٻّٜ؞ ³اٛ جٛوطِي تٛ مَٻّٜ، اٜ مٛ حُودَ اٜ مَٻّٜ نغَمْ کَنْکٛ اٛ ݧٛوتٛووٛ شُدَّحٛ لُکُرُوجِ بٛنٛ مَٻّٜ؞ ⁴کٛو ندٜيٜ ݧَلْندٜ سِوْتَارٜ، بُلُسْ اٜ يٜدّٛوتِرَ اٜ يِمْٻٜ ندٜرْ سُودُ دٛعَارٜ، اٜ مٛ فٛوطَ حَکِّيلٛ يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ نغَمْ ٻٜ تٛکَّ يٜىٰسُ؞

⁵ندٜ سِيلَ اٜ تِمٛوتِ پِوٛيِ لٜيْدِ مَکِدٛونِيَ نجٛتِّي غَرِيرِ کٛرِنْتِ، بُلُسْ حٛشِّ شَرٜلْ مُوطُمْ فُو نغَمْ وَعَجِنْکِ اٜ تَبِّتِنَنْکِ يَحُودَنْکٛعٜنْ يٜىٰسُ وٛنِ اَلْمَسِيحُ؞ ⁶اَمَّا ندٜ ٻٜ نغٜدِّمٛ، ٻٜ کُطِمٛ؞ سٜيْ اٛ فِطِّ سٛلَّارٜ کٛلْتٜ مَاکٛ، اٛ وِعِٻٜ، ‏«‏مِ وُرْتَکٜ حَکّٜ مٛوطٛنْ!‏ پِيپَمْ مٛوطٛنْ اٜ دٛوْ کٛعٜ مٛوطٛنْ؞ دَغَ حَنْدٜ، تٛ يِمْٻٜ نَاع يَحُودَنْکٛعٜنْ نجَحَيْمِ؞»‏ ⁷اٛ وُرْتِي اٛ اَلِ سُودُ دٛعَارٜ ندُنْ، اٛ يَحِ وُرٛ غٛطّٛ مَوْنِنٛووٛ اَللَّه، بِعٜتٜىٰطٛ تِيتِيُسْ جُسْتُسْ، مٛ وُرٛ مُوطُمْ وٛنِ حَادٜ سُودُ دٛعَارٜ ندُنْ؞ ⁸کِرِبُسْ، مَوْطٛ سُودُ دٛعَارٜ ندُنْ، کَنْکٛ اٜ وُرٛ مَاکٛ فُو ٻٜ تٛکِّ يٜىٰسُ؞ طُطْٻٜ دَغَ ندٜرْ کٛرِنْتِيَنْکٛعٜنْ نَنْٻٜ وَعَجُ بُلُسْ مَا تٛکِّ يٜىٰسُ، ٻٜ نغَطَنَا بَڤْتِسْمَ؞

⁹وٛنْدٜ جٜمَّارٜ جٛومِرَاوٛ مٜدِّ اٜ بُلُسْ ندٜرْ وَحَيُ، وِعِمٛ، ‏«‏تَاع حُلُ!‏ وَعَجِنْ حَبَرُ اَمْ، تَاع دٜعُّتُ، ¹⁰نغَمْ اٜ مِ وٛنْدِ اٜ مَاطَ؞ وَلَا بَاوَيْطٛ وَطَنْکِمَ غٛطُّمْ، نغَمْ اٜ مِ وٛودِ يِمْٻٜ طُطْٻٜ ندٜرْ غَرِيرِ ندِعِ؞»‏ ¹¹نغَمْ نٛنْ بُلُسْ جٛوطٛدِي اٜ مَٻّٜ حِتَاندٜ غٛعٛ اٜ لٜبِّ جٛوٜىٰغٛعٛ، اٜ مٛ اٜکِّتِنَٻٜ وٛلْدٜ اَللَّه؞

¹²اَمَّا شَرٜلْ کٛ غَالِيٛ لَامٛتٛو لٜيْدِ اَکَايَ، يَحُودَنْکٛعٜنْ کَوْتِ کٛعٜ، نَنْغِ بُلُسْ، نجَارِمٛ يٜىٰسٛ لَامُ؞ ¹³ٻٜ نغُلِّيمٛ، ٻٜ مبِعِ، ‏«‏نٜطّٛ اٛعٛ اٜ فٛوطَ يِمْٻٜ نغَمْ ٻٜ تٛکَّ اَللَّه دٛوْ لَاوٛلْ نغٛلْ اَتَّوْرَ حَطِ؞»‏

¹⁴بُلُسْ اٜ يِطِ مٜتَنْکِٻٜ وٛنْ طٛنْ، سٜيْ غَالِيٛ وِعِٻٜ، ‏«‏اٛنٛنْ يَحُودَنْکٛعٜنْ، دَا طُمْ غٛطُّمْ کٛ وٛوطَا کٛو کُوغَلْ کَلُّنغَلْ اٛ وَطِ، دَا مِ جَٻَيْ کٛ مبِيطٛنْ دٛوْ مَاکٛ؞ ¹⁵اَمَّا ندٜ طُمْ غٜدِّ دٛوْ دِينَ مٛوطٛنْ، اٜ اِنْطٜ، اٜ دٛوکَ مٛوطٛنْ، اٛنٛنْ اٜ کٛعٜ مٛوطٛنْ نغَطَنٜىٰمٛ کِيتَ؞ مِنْ کَمْ، مِ وَطَنْتَا اِرِ طُعُمْ فِي کِيتَ!‏»‏ ¹⁶سٜيْ اٛ رِيوِٻٜ دَغَ ندٜرْ سُودُ کِيتَ ندُنْ؞ ¹⁷سٜيْ ٻٜ نَنْغِ سٛسْتَانُسْ، مَوْطٛ سُودُ دٛعَارٜ ندُنْ، ٻٜ ڤِيِمٛ يٜىٰسٛ دَمُّغَلْ سُودُ کِيتَ ندُنْ؞ اَمَّا غَالِيٛ وَنَّايِ؞

نٛ بُلُسْ سٛعّٛرِي اَنْتَاکِيَ

¹⁸غَطَ بُلُسْ ٻٜيْدِي بَلْطٜ سٜطَّ تٛ کٛرِنْتِ، اٛ اَلِ تٛکُّٻٜ يٜىٰسُ، اٛ نَتِّ کٛمِوَلْ جَحَيْنغَلْ لٜيْدِ سِيرِيَ، کَنْکٛ اٜ بِرِسْکِلَ اٜ اَکِيلَ؞ اٛ فٜمْبِ اٜ کَنْکِيرِيَ نغَمْ اٛ وَطِي اَلْکَوَلْ يٜىٰسٛ جٛومِرَاوٛ؞ ¹⁹ندٜ ٻٜ نجٛتِّي غَرِيرِ اَافِسَ، طٛنْ بُلُسْ اَلِ بِرِسْکِلَ اٜ اَکِيلَ؞ کَنْکٛ اٛ نَتِّ سُودُ دٛعَارٜ، اٜ مٛ مٜدَّ اٜ يَحُودَنْکٛعٜنْ؞ ²⁰ٻٜ تٛرِيمٛ اٛ ٻٜيْدَ جٛوطَاکِ بَلْطٜ سٜطَّ تٛ مَٻّٜ، اَمَّا اٛ جَٻَايِ؞ ²¹ندٜ اٛ وَرِ سٜنْدِرْکِ اٜ مَٻّٜ، اٛ وِعِ، ‏«‏مِ سٛعّٛيْتٛ تٛ مٛوطٛنْ تٛ اَللَّه جَٻِي؞»‏ اٛ نَتِّ کٛمِوَلْ، اٛ دِلِّ؞

²²ندٜ اٛ يٛتِّي غَرِيرِ کَيْسَارِيَ، اٛ پَٻِّي يَاکِ اُرُشَلِيمَ اٛ حٛوْنِ تٛکُّٻٜ يٜىٰسُ؞ سٜيْ اٛ يَحِ اَنْتَاکِيَ؞ ²³غَطَ اٛ وَطِي بَلْطٜ تٛنْ، اٛ دِلِّ اٛ تٛکِّ ندٜرْ لٜيْطٜ غَلَاتِيَ اٜ فِرِيجِيَ، اٜ مٛ سٜمْبِطِنَ تٛکُّٻٜ يٜىٰسُ؞

وَعَجُ اَفٛولٛسْ اٜ يَادُ بُلُسْ تَتَوْرُ

²⁴اٜ شَرٜلْ نغٜلْ سٜيْ غٛطّٛ يَحُودَنْکٜىٰجٛ بِعٜتٜىٰطٛ اَفٛولٛسْ نٜطّٛ غَرِيرِ اَلِجَندِيرِيَ وَرِ غَرِيرِ اَافِسَ؞ نٜطّٛ اٛنْ اٛ بَوْطٛ مٜتُکِ، اٛ اَنْدُطٛ وٛلْدٜ اَللَّه نَاع سٜطَّ؞ ²⁵اٛ اٜکِّتِنَامَ لَاوٛلْ يٜىٰسُ بٛطُّمْ؞ اٜ مٛ وَعَجِنَ حَبَرُ يٜىٰسُ ندٜرْ وٜلْوٜلٛ، اٜ مٛ وَعَجِنَ بٛطُّمْ، کٛو ندٜ بَڤْتِسْمَ يَحَيَ تَنْ اٛ اَنْدِ؞ ²⁶سٜيْ اٛ فُطِّ وَعَجِنْکِ اٜ سٜمْبٜ مَاکٛ فُو ندٜرْ سُودُ دٛعَارٜ؞ ندٜ بِرِسْکِلَ اٜ اَکِيلَ نَنِمٛ، ٻٜ نٛدِّمٛ وُتُّدُ غٛعٛ، ٻٜ ٻٜيْدِ فَمْتِنْکِمٛ لَاوٛلْ اَللَّه؞ ²⁷ندٜ اَفٛولٛسْ يِطِ حُولُکِ يَحَ لٜيْدِ اَکَايَ، تٛکُّٻٜ يٜىٰسُ مبَلِّمٛ مبِنْدَنِ تٛکُّٻٜ يٜىٰسُ وٛنْٻٜ تٛنْ طٜرٜوٛلْ نغَمْ ٻٜ نجَٻّٛومٛ جُوطٜ طِطِ؞ ندٜ اٛ يٛتِّي تٛنْ، اٛ وَرْتِ وَلِّرّٜ مَوْندٜ تٛ يِمْٻٜ غَرْتُٻٜ تٛکُّٻٜ يٜىٰسُ بَرْکَ يِدّٜ جٛومِرَاوٛ؞ ²⁸اٛ يٜدّٛوتِرِ اٜ يَحُودَنْکٛعٜنْ اٛ دٛعِّٻٜ يٜىٰسٛ يِمْٻٜ فُو، نغَمْ اٛ حٛلِّيٻٜ ندٜرْ دٜفْتٜرٜ شٜنِيندٜ يٜىٰسُ وٛنِ اَلْمَسِيحُ؞

بُلُسْ ندٜرْ غَرِيرِ اَافِسَ

¹شَرٜلْ کٛ اَفٛولٛسْ وٛنِ غَرِيرِ کٛرِنْتِ، بُلُسْ تٛکِّ لَاوٛلْ پِوْرُنغٛلْ ندٜرْ کٛشّٜىٰجٜ، اٛ يَحِ اَافِسَ؞ تٛنْ اٛ تَوِ وٛٻّٜ تٛکُّٻٜ يٜىٰسُ؞ ²اٛ پَمِٻٜ، اٛ وِعِ، ‏«‏کٛو اٛنْ کٜٻِي رُوحُ اَللَّه ندٜ نغَرْتُطٛنْ تٛکُّٻٜ يٜىٰسُ؟»‏

ٻٜ نٛوتِي، ٻٜ مبِعِمٛ، ‏«‏مِنْ مٜىٰطَايِ نَنُکِ حَبَرُ رُوحُ اَللَّه؞»‏

³اٛ وِعِٻٜ، ‏«‏اِرِ طُمٜ بَڤْتِسْمَ نغَطَنَاطٛنْ؟»‏

ٻٜ مبِعِ، ‏«‏بَڤْتِسْمَ يَحَيَ؞»‏

⁴بُلُسْ وِعِ، ‏«‏يَحَيَ وَطِي بَڤْتِسْمَ تُوبُکِ؞ اٜ مٛ وِعَ يِمْٻٜ کٛولٛو غٛطّٛ غَرَيْطٛ غَطَ مَاکٛ، وَاتٛ يٜىٰسُ؞»‏

⁵ندٜ ٻٜ نَنِ نٛنْ، ٻٜ نغَطَنَا بَڤْتِسْمَ ندٜرْ اِنْدٜ يٜىٰسُ جٛومِرَاوٛ؞ ⁶ندٜ بُلُسْ يٛوِ جُوطٜ مُوطُمْ دٛوْ مَٻّٜ، رُوحُ اَللَّه جِڤّٛيِي دٛوْ مَٻّٜ، ٻٜ مٜتِ ندٜرْ طٜمْطٜ طٜ ٻٜ اَنْدَا، ٻٜ ڤُطِّ وَعَجِنْکِ؞ ⁷طُطْکِ مَٻّٜ وَطِي يِمْٻٜ سَڤّٛ اٜ طِطٛ؞

⁸بُلُسْ وَطِ لٜبِّ تَتِ اٜ مٛ وَعَجِنَنَ يَحُودَنْکٛعٜنْ ندٜرْ سُودُ دٛعَارٜ اٜ سٜمْبٜ مَاکٛ فُو، کُلٛلْ وَلَا؞ اٜ مٛ مٜدَّ اٜ مَٻّٜ، اٜ مٛ فٛوطَ حَکِّيلٛ مَٻّٜ حَا اٛ اَنْدِنِٻٜ حَبَرُ لَامُ اَللَّه؞ ⁹اَمَّا ندٜرْ مَٻّٜ اٜ وٛودِ ٻٜ کٛعٜ جٛرْطٜ؞ ٻٜ نغَݧِ حٛولَاکِ يٜىٰسُ، ٻٜ مٜتِ حَالَ کَلُّکَ دٛوْ لَاوٛلْ يٜىٰسُ يٜىٰسٛ يِمْٻٜ فُو؞ نغَمْ مَاجُمْ بُلُسْ سٜنْدِرِ اٜ مَٻّٜ، اٛ حٛشِّ تٛکُّٻٜ يٜىٰسُ؞ کٛو ندٜيٜ ݧَلْندٜ اٜ مٛ اٜکِّتِنَ ندٜرْ سُودُ جَنْغِرْدٜ تِرَانُسْ؞ ¹⁰اٛ وَطِ کَ وَطُکِ نٛنْ دُوٻِ طِطِ حَا يَحُودَنْکٛعٜنْ اٜ لٜپِّ اَاسِيَ فُو نَنِ حَالَ جٛومِرَاوٛ؞

حَبَرُ ٻِٻّٜ سِيبَ

¹¹اَللَّه وَطِ کُوطٜ کَيْطِنِيطٜ مَوْطٜ دَغَ جُوطٜ بُلُسْ طٜ طُمْ مٜىٰطَايِ يِعُکِ؞ ¹²حَا مَا لٜفٛيْ اٜ کٛلْتٜ مٜىٰمُطٜ ٻَنْدُ مَاکٛ فُو اٜ نجَارَنٜىٰ ݧَوْٻٜ، اٜ ٻٜ نجَمْطِتَ، غِنِّ مَا مبُرْتٛو ندٜرْ مَٻّٜ؞ ¹³تٛو، اٜ وٛودِ وٛٻّٜ يَحُودَنْکٛعٜنْ يِيلٛتٛوٻٜ نغَمْ وُرْتِنَنْکِ غِنَّاٻٜ غِنِّ؞ وٛٻّٜ مَٻّٜ ڤٛوندِي حُوتِرْکِ اِنْدٜ يٜىٰسُ جٛومِرَاوٛ، اٜ ٻٜ مبِعَ غِنِّ طِنْ، ‏«‏ندٜرْ اِنْدٜ يٜىٰسُ مٛ بُلُسْ وَعَجِنْتَ اٜ مِنْ مبِعَعٛنْ مبُرْتٜىٰ!‏»‏ ¹⁴ٻِٻّٜ غٛطّٛ مَوْطٛ اَرْدِيٻٜ دِينَ يَحُودَنْکٛعٜنْ بِعٜتٜىٰطٛ سِيبَ کَمْٻٜ نجٛوٜىٰطِطٛ اٜ نغَطَ نٛنْ؞

¹⁵اَمَّا غِنّٛلْ نغٛلْ وِعِٻٜ، ‏«‏اٜ مِ اَنْدِ يٜىٰسُ، اٜ مِ اَنْدِ بُلُسْ، اَمَّا اٛنٛنْ، اٛنْ ٻٜيٜ؟»‏

¹⁶غِنَّاطٛ اٛنْ يَنَنِٻٜ، نَوْنِٻٜ، جَالِيٻٜ حَا ٻٜ مبُرْتِي وُرٛ نغٛنْ، اٜ ٻٜ ندٛغَّ ٻٜ ٻٛرْنَاکِ ٻٜ فُو ٻٜ نَوْنٛوطٜ؞ ¹⁷حَبَرُ مَاجُمْ سَنْکِتِي ندٜرْ يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ جٛوطِيٻٜ ندٜرْ غَرِيرِ اَافِسَ؞ کُلٛلْ نَنْغِٻٜ، ٻٜ فُو؞ اِنْدٜ يٜىٰسُ بٛو حٜٻِي مَوْنِنٜىٰکِ؞ ¹⁸يِمْٻٜ طُطْٻٜ غَرْتُٻٜ تٛکُّٻٜ يٜىٰسُ نغَرِ مبِعِ اٜ نجَيْرِ فُو کُوطٜ کَلُّطٜ طٜ ٻٜ کُوُنٛو؞ ¹⁹دَرْنٛوٻٜ طُطْٻٜ کَوْرِتِ طٜرٜىٰجِ مَٻّٜ، ٻٜ نغُلِطِ يٜىٰسٛ يِمْٻٜ؞ ندٜ ٻٜ لِمِ شٜىٰدٜ مَاجِ، طٜ نجَارِي شٜىٰدٜ اَجُرْفَارِ 50,000؞ ²⁰نٛنْ حَبَرُ يٜىٰسُ ٻٜيْدِ سَنْکِتٛرَاکِ کٛو تٛيٜ؞

حَوْرٜ ندٜرْ غَرِيرِ اَافِسَ

²¹غَطَ فِي طُمْ طٛنْ فُو، بُلُسْ سُٻِ تٛکَّ لَاوٛلْ لٜيْطٜ مَکِدٛونِيَ اٜ اَکَايَ يَاکِ اُرُشَلِيمَ؞ اٛ وِعِ، ‏«‏غَطَ مِ يَحِي تٛنْ، دٛولٜ مِ يَحَ غَرِيرِ رٛومَ مَا؞»‏ ²²سٜيْ اٛ لِلِ وَلَّيْٻٜمٛ طِطٛ، تِمٛوتِ اٜ اٜرَسْتُسْ، ٻٜ نجَحَ لٜيْدِ مَکِدٛونِيَ؞ کَنْکٛ بٛو اٛ وَالِ بَلْطٜ ندٜرْ لٜيْدِ اَاسِيَ؞

²³اٜ شَرٜلْ نغٜلْ حَوْرٜ مَوْندٜ اُمِّي ندٜرْ اَافِسَ دٛوْ لَاوٛلْ جٛومِرَاوٛ نغٛلْ بُلُسْ اٜکِّتِنْتَ؞ ²⁴اٜ وٛودِ غٛطّٛ بَعِلّٛ اَجُرْفَارِ بِعٜتٜىٰطٛ دِمِتِيرِيُسْ؞ اٜ مٛ وَطَ شُوطِ ڤَمَرِ طِ مَوْنِنْکِ اَلَّح مَٻّٜ طِ اَجُرْفَارِ نَنْدُطِ اٜ شُوطِ غُنْکِ مَٻّٜ دٜبُمْ بِعٜتٜىٰطُمْ اَرْتٜمِسْ؞ نَاع شٜىٰدٜ سٜطَّ اٛ حٜٻَنْتَٻٜ، کَنْکٛ اٜ ٻٜ اٛ حُودَتَ؞ ²⁵سٜيْ اٛ حَوْرِتِ ٻٜ اٛ حُودَتَ ٻٜنْ اٜ وٛٻّٜ غَطٛوٻٜ اِرِ کُوغَلْ نغَلْ، اٛ وِعِٻٜ، ‏«‏بَنْدِرَاٻٜ اَمْ، اٛنْ اَنْدِ کُوغَلْ نغَعَلْ اٜ وَدَّنَعٜنْ شٜىٰدٜ طُطّٜ؞ ²⁶کَدِمَا اٛنْ نَنِي، اٛنْ نغِعِي کٛ بُلُسْ وَطَتَ؞ اٜ مٛ سٜلْنَ يِمْٻٜ طُطْٻٜ، نَاع طٛعٛ ندٜرْ غَرِيرِ اَافِسَ تَنْ، اَمَّا حَا ندٜرْ لٜيْدِ اَاسِيَ فُو؞ اٜ مٛ وِعَٻٜ اَلَّاجِ طِ يِمْٻٜ نغَطِ اٜ جُوطٜ مَٻّٜ، نَاع طِ غٛونغَاجِ؞ ²⁷تٛ اٜنْ اَلْدِيمٛ نٛنْ، يِمْٻٜ مبٛنَّيْ اِنْدٜ کُوغَلْ مٜىٰطٜنْ؞ نَاع کَنْجُمْ تَنْ، طٛنْمَا ٻٜ مبٛنَّيْ اِنْدٜ سُودُ مَوْنِنْکِ اَلَّح مٜىٰطٜنْ اَرْتٜمِسْ مَوْطٛ؞ ندٜنْ ٻٜ اَلَيْ تٜدِّنْکِمٛ، کَنْکٛ مٛ جٛوطِيٻٜ لٜيْدِ اَاسِيَ اٜ دُونِيَارُ ندُعُ فُو مَوْنِنْتَ؞»‏

²⁸ندٜ ٻٜ نَنِ نٛنْ، ٻٜرْطٜ مَٻّٜ مٜتِّ، ٻٜ نغُلِّ، اٜ ٻٜ مبِعَ، ‏«‏اَرْتٜمِسْ مٛ اَافِسَ کَنْکٛ وٛنِ مَوْطٛ!‏»‏ ²⁹حَکِّيلٛ يِمْٻٜ غَرِيرِ ندِنْ فُو اُمِّي، ٻٜ نجَحِ ٻٜ نَنْغِ غَايُسْ اٜ اَرِسْتَرْکُسْ، يِمْٻٜ مَکِدٛونِيَ، جَادٛوٻٜ اٜ بُلُسْ؞ ٻٜ ندَسِٻٜ، ٻٜ نجَارِٻٜ نجَيْرِ تٛ يِمْٻٜ غَرِيرِ کَوْرِتَتَ؞ ³⁰بُلُسْ اٜ يِطِ نَتُّکِ ندٜرْ مٛٻْتٛرْدٜ ندٜنْ، اَمَّا تٛکُّٻٜ يٜىٰسُ کَطِمٛ؞ ³¹حَا اٜ وٛٻّٜ ندٜرْ مَوْٻٜ لٜيْدِ اَاسِيَ، حِغٛوٻٜ مَاکٛ، لِلٛنٛيِمٛ تٛرِيمٛ تٛع اٛ نَتَّ وِغٜىٰرٜ ندٜنْ؞ ³²اٜ شَرٜلْ نغٜلْ، حَکِّيلٛ حَوْرُتُٻٜ فُو جِيٻَکٜ؞ کٛو مٛيٜ اٜ کَ وِعَتَ، نغَمْ طُطْٻٜ ندٜرْ مَٻّٜ اَنْدَا کٛ حَوْرِتِٻٜ؞ ³³يَحُودَنْکٛعٜنْ نغَرْتِرِ اَلِجَنْدَ مٜتٛووٛ نغَمْ مَٻّٜ؞ وٛٻّٜ ندٜرْ حَوْرُتُٻٜ ٻٜنْ مبِعِمٛ اٛ مٜتَ؞ سٜيْ اَلِجَنْدَ پٜفْتِ جُنْغٛ نغَمْ ٻٜ ندٜعِّتَ اٛ مٜتَنَٻٜ؞ ³⁴اَمَّا ندٜ ٻٜ اَنْدِتِ اٛ يَحُودَنْکٜىٰجٛ، ٻٜ نغَطِ اَوَاجِ طِطِ اٜ ٻٜ مبِعَ اٜ سٜمْبٜ، ‏«‏اَرْتٜمِسْ مٛ اَافِسَ کَنْکٛ وٛنِ مَوْطٛ!‏»‏

³⁵اَمَّا ندٜ بِنْدٛووٛ غَرِيرِ ندِنْ دٜعِّتِنِٻٜ، اٛ وِعِٻٜ، ‏«‏اٛنٛنْ اَافِسَنْکٛعٜنْ، کٛو مٛيٜ اٜ اَنْدِ طٛعٛ اَافِسَ وٛنِ تٛ طُمْ رٜىٰنَتَ سُودُ مَوْنِنْکِ اَرْتٜمِسْ مَوْطٛ اٜ حَيْرٜ مَاکٛ جَنٛيْندٜ دَغَ دٛوْ؞ ³⁶وَلَا بَاوَيْطٛ يٜدُّکِطُمْ؞ نغَمْ نٛنْ اٜ حَانِ ڤُکِّنٛنْ ٻٜرْطٜ مٛوطٛنْ، ڤَامٜىٰ اٜ کٛ نغَطٛتٛنْ؞ ³⁷يِمْٻٜ ٻٜ نغَدُّطٛنْ طٛعٛ ٻٜ نغُجَّايِ کٛو طُمٜ ندٜرْ سُودُ دٛعَارٜ، ٻٜ کُطَايِ اَلَّح مٜىٰطٜنْ؞ ³⁸تٛ دِمِتِيرِيُسْ اٜ ٻٜ اٛ حُودَتَ اٜ نغِطِ وُلَّاکِ غٛطّٛ، سُودُ کِيتَ اٜ مَٻِّتِي، اٜ وٛودِ غَطٛوٻٜ کِيتَ، سٜيْ ٻٜ نغُلّٛيٛو تٛنْ!‏ ³⁹تٛ بٛو اٜ وٛودِ غٛطُّمْ کٛ نغِطّٛنْ ٻُرْطُمْ نٛنْ، سٜيْ نجَارٛنْطُمْ تٛ مَوْٻٜ غَرِيرِ طُمْ مٛعِّنٜىٰ؞ ⁴⁰حَنْدٜ اٜنْ ندٜرْ شَطُّمْ، طُمْ وُلّٛرْتٛعٜنْ اُمِّنْکِ حَکِّيلٛ؞ وَلَا بٛو کٛ کٜٻٜتٜنْ مبِعٜنْ دٛوْ حَوْرٜ اُمِّيندٜ حَنْدٜ؞ اٜنْ مبَاوَتَا کٛکّٜنْ شٜيْدَ غٜىٰتُمْ اُمِّنْطُمْ حَوْرٜ ندٜنْ؞»‏ ⁴¹ندٜ اٛ وِعِ نٛنْ، اٛ وِعِ يِمْٻٜ ٻٜنْ شَنْکِتٛو؞

بُلُسْ سٛعَّکٜ مَکِدٛونِيَ اٜ حٜلٜنَ

¹ندٜ کٛو طُمٜ وَلْتِي، بُلُسْ حَوْرِتِ تٛکُّٻٜ يٜىٰسُ، سٜمْبِطِنِ ٻٜرْطٜ مَٻّٜ؞ غَطَ اٛ جَٻّٛوتِرِ اٜ مَٻّٜ، اٛ دِلِّ لٜيْدِ مَکِدٛونِيَ؞ ²اٛ تٛکِّ ندٜرْ لٜيْدِ ندِنْ، اٜ مٛ سٜمْبِطِنَ ٻٜرْطٜ يِمْٻٜ اٜ بٛلِيطٜ طُطّٜ؞ ندٜنْ اٛ يٛتِّي لٜيْدِ حٜلٜنَ؞ ³اٛ وَطِ لٜبِّ تَتِ تٛنْ؞ شَرٜلْ کٛ اٛ سِرْيٛتٛو نَتُّکِ کٛمِوَلْ يَاکِ لٜيْدِ سِيرِيَ، سٜيْ اٛ نَنِ حَبَرُ يَحُودَنْکٛعٜنْ ندَرْوِي وَرُکِمٛ؞ نغَمْ نٛنْ، اٛ سُٻِ سٛعّٛرَاکِ لَاوٛلْ مَکِدٛونِيَ؞ ⁴اٛ يَادِ اٜ سُفَاتَ ٻِي فَارُسْ مٛ غَرِيرِ بِيرِيَ، اٜ اَرِسْتَرْکُسْ اٜ سَکُندُسْ ٻٜ غَرِيرِ تَسَلٛونِکَ، اٜ غَايُسْ مٛ غَرِيرِ دَرْبٜ، اٜ تِمٛوتِ اٜ تِيکِکُسْ اٜ تُرٛوفِمُسْ ٻٜ لٜيْطٜ اَاسِيَ؞ ⁵ٻٜ اَرْتِمِنْ يَاکِ غَرِيرِ تٛورُوَسْ، ٻٜ ندٜنْتِمِنْ تٛنْ؞ ⁶غَطَ حُمْتٛ بُرٛودِ طُمْ وَلَا پُوفِنِرْطُمْ، مِنْ نَتِّ کٛمِوَلْ تٛ غَرِيرِ فِلِبِ؞ غَطَ بَلْطٜ جٛوِ مِنْ نجٛتِّي تٛ مَٻّٜ اٜ غَرِيرِ تٛورُوَسْ، مِنْ نغَطِ بَلْطٜ جٛوٜىٰطِطِ تٛنْ؞

بُلُسْ اُمِّنِي يُتِکُسْ دَغَ مَيْدٜ

⁷ݧَلْندٜ سِوْتَارٜ مِنْ کَوْرِتِ نغَمْ سٜنْدُکِ بُرٛودِ، سٜيْ بُلُسْ وَطِ کَ مٜتَنْکِ يِمْٻٜ حَا شَکَ جٜمَّ، نغَمْ اٜ مٛ يِطِ دِلُّکِ تٛ فِنِي؞ ⁸ندٜرْ سُودُ دٛوْ تٛ مِنْ کَوْرِتِ اٜ وٛودِ فِتِلَاجِ طُطِّ؞ ⁹غٛطّٛ کَيٜىٰجٛ بِعٜتٜىٰطٛ يُوتِکُسْ اٜ جٛوطِي دٛوْ يٛلْندٜ سُودُ؞ بُلُسْ جُوتِنِ حَالَ مُوطُمْ حَا کَيٜىٰجٛ اٛنْ فُطِّ ݝٛݝُکِ؞ طٜيْنغٛلْ تٜدُّنغٛلْ نَنْغِمٛ، اٛ يَنٛيِ دَغَ تٛنْ دٛوْ سُودُ تَتَوْرُ؞ کٛ ٻٜ کٛشَّمٛ فُو، اٛ مَايِي؞ ¹⁰اَمَّا بُلُسْ جِڤِّي، يَحِ، تُرِي دٛوْ مَاکٛ، وُوندِيمٛ اٜ جُوطٜ مُوطُمْ، وِعِ، ‏«‏تٛع اٛنْ کُلُ!‏ اٜ مٛ وٛودِ يٛنْکِ!‏»‏ ¹¹سٜيْ بُلُسْ پٜنْتِتِ، سٜنْدِ بُرٛودِ، ݧَامِ؞ غَطَ مَاجُمْ اٛ ݧَمْرِ يٜىٰسٛ اٜ مٜتَنْکِٻٜ حَا وٜىٰتِ، ندٜنْ اٛ دِلِّ؞ ¹²ٻٜ کٛوتِدِ اٜ کَيٜىٰجٛ اٛنْ، اٜ مٛ فٛوفَ؞ نٛنْ سٜمْبِطِنِي ٻٜرْطٜ مَٻّٜ نَاع سٜطَّ؞

يَادُ بُلُسْ دَغَ تٛورُوَسْ يَاکِ مِتِلِنْ

¹³بُلُسْ سُٻِ تٛکَّ طَتَلْ يَحَ اَاسُسْ؞ مِنٛنْ بٛو، مِنْ نَتِّ کٛمِوَلْ نغَمْ اٜ مٛ يِطِ نَا مِنْ نجَحِي تٛنْ مِنْ کٛشَّمٛ؞ ¹⁴ندٜ اٛ تَوِمِنْ تٛ غَرِيرِ اَاسُسْ، مِنْ کٛشِّمٛ ندٜرْ کٛمِوَلْ، مِنْ نجَحِ غَرِيرِ مِتِلِنْ؞ ¹⁵طٛنْمَا مِنْ اُمّٛيِي تٛنْ ندٜرْ کٛمِوَلْ، ندٜ فِنِ مِنْ نجٛتِّي کِيٛسْ؞ ݧَلْندٜ طِطَوْرٜ مِنْ نجٛتِّي سَامٛسْ، ندٜرْ ݧَلْندٜ تَتَوْرٜ بٛو مِنْ نجٛتِّي مِلِتُسْ؞ ¹⁶بُلُسْ يِطَا دَرَاکِ ندٜرْ اَافِسَ، نغَمْ اٛ يِطَا نٜىٰٻُکِ ندٜرْ اَاسِيَ؞ اٜ مٛ يِطِ يٛتَّاکِ اُرُشَلِيمَ کٛ ݧَلْندٜ حُمْتٛ ٻٜنْدٛلْ اَلْکَمَارِ وَرَ، تٛ طُمْ وَطٛتٛ؞

بُلُسْ جَٻِّتَکٜ مَوْٻٜ غَرِيرِ اَافِسَ

¹⁷دَغَ غَرِيرِ مِلِتُسْ، بُلُسْ لِلٛنٛيِ مَوْٻٜ تٛکُّٻٜ يٜىٰسُ وٛنْٻٜ اَافِسَ ٻٜ نغَرَ تٛ مَاکٛ؞ ¹⁸ندٜ ٻٜ نغَرِ، اٛ وِعِٻٜ، ‏«‏اٛنٛنْ اٜ کٛعٜ مٛوطٛنْ اٛنْ اَنْدِ نٛ نجٛوطٛرِيمِ ندٜرْ مٛوطٛنْ دَغَ ݧَلْندٜ ندٜ ڤُطُّمِ نَتُّکِ لٜيْدِ اَاسِيَ وَرْکِ حَنْدٜ؞ ¹⁹مِ حُوَنِي جٛومِرَاوٛ ندٜرْ لٜسْتِنْکِ حٛورٜ اٜ غٛنْطِ طُطِّ، کٛو ندٜ مِ يَرِي تٛرَّاجِ طُطِّ اٜ جُوطٜ يَحُودَنْکٛعٜنْ؞ ²⁰اٛنْ اَنْدِ مِ سُوطَايِعٛنْ کٛو طُمٜ کٛ وَلَّتَعٛنْ؞ مِ وَعَجِنَنِيعٛنْ، مِ اٜکِّتِنِيعٛنْ يٜىٰسٛ يِمْٻٜ فُو، حَا ندٜرْ غُرٜ مٛوطٛنْ؞ ²¹مِ وَغِّنِي يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ فُو ٻٜ تُوبَنَ اَللَّه، ٻٜ کٛولٛو جٛومِرَاوٛ مٜىٰطٜنْ يٜىٰسُ اَلْمَسِيحُ؞ ²²رُوحُ اَللَّه حٛلِّييَمْ مِ يَحَ اُرُشَلِيمَ جٛونِ؞ مِ اَنْدَا کٛ حٜٻَتَيَمْ تٛنْ، ²³سٜيْ نِ رُوحُ اَللَّه وِعِييَمْ ندٜرْ غَرِيرِ ندِ نجَالُمِ فُو حَٻّٜىٰکِ اٜ تٛرَّ اٜ حٜطِييَمْ؞ ²⁴اَمَّا مِ حٛشَّايِ يٛنْکِ اَمْ بٛنٛ غٛطُّمْ غٜىٰتُمْ، تٛ نِ مِ حٜٻِي مِ حٜىٰݧِي کُوغَلْ نغَلْ يٜىٰسُ جٛومِرَاوٛ حٛکِّيَمْ، وَاتٛ وَعَجِنْکِ حَبَرُ بٜلْطُمْ طُمْ يِدّٜ اَللَّه؞

²⁵‏«‏مِ يِيلَکٜ ندٜرْ مٛوطٛنْ، اٜ مِ وَعَجِنَنَعٛنْ حَبَرُ لَامُ جٛومِرَاوٛ؞ جٛونِ، اٜ مِ اَنْدِ اٛنْ ڤُطِّتَتَا يِعُکِيَمْ؞ ²⁶نغَمْ نٛنْ اٜ مِ وِعَعٛنْ حَنْدٜ تٛ غٛطّٛ ندٜرْ مٛوطٛنْ سٜلِي لَاوٛلْ غٛونغَ، حَکّٜ مَاکٛ وَلَا دٛوْ اَمْ؞ ²⁷نغَمْ مِ وَعَجِنَنِيعٛنْ کٛ اَللَّه يِطِ فُو، مِ سُوطَايِعٛنْ کٛو طُمٜ؞ ²⁸ڤَامَنٜىٰ کٛعٜ مٛوطٛنْ، ندٜىٰنٛنْ اٛرْندٜ ندٜ رُوحُ اَللَّه حٛکِّعٛنْ؞ نغَرْتٜىٰ وٛيْنَاٻٜ کَوْتَلْ يِمْٻٜ اَللَّه، ٻٜ اٛ سٛودِرِ اٜ مَيْدٜ ٻِطّٛ مَاکٛ؞ ²⁹اٜ مِ اَنْدِ غَطَ مِ اَلِي طٛعٛ يِمْٻٜ کَلُّٻٜ بٛ شَافَالِ نٛ نَتَّيْ ندٜرْ مٛوطٛنْ، کَدِمَا بٛو ٻٜ اَلَتَا اٛرْندٜ ندٜنْ؞ ³⁰حَا ندٜرْ مٛوطٛنْ مَا، وٛٻّٜ اُمّٛتٛ اٜ اٜکِّتِنَ اٜکِّتِنٛلْ فٜوْرٜ نغَمْ ٻٜ ڤٛوطٛيَ تٛکُّٻٜ يٜىٰسُ تٛکَّٻٜ؞ ³¹نغَمْ نٛنْ، ڤَامٜىٰ، شِفْتٛرٜىٰ دُوٻِ تَتِ نغَطُمِ، جٜمَّ اٜ ݧَلَوْمَ، اٜ مِ وَغِّنَ کٛو مٛيٜ مٛوطٛنْ فُو حَا اٜ غٛنْطِ؞

³²‏«‏جٛونِ، مِ وَطِيعٛنْ ندٜرْ جُنْغٛ اَللَّه اٜ وٛلْدٜ مَاکٛ، بَاوَيْندٜ سٜمْبِطِنْکِعٛنْ حٛکَّعٛنْ ندٛنُ نغُ اٛ رٜسَنِ شٜنِيٻٜ مَاکٛ فُو؞ ³³مِ مٜىٰطَايِ يِطُکِ شٜىٰدٜ غٛطّٛ کٛو کٛلْتٜ غٛطّٛ؞ ³⁴اٛنٛنْ اٜ کٛعٜ مٛوطٛنْ، اٛنْ اَنْدِ مِ حُوتِرِي جُوطٜ اَمْ نغَمْ مِ وَلَّ حٛورٜ اَمْ اٜ وٛنْدُٻٜ اٜ اَمْ؞ ³⁵مِ حٛلِّيعٛنْ مِسَالُ ندٜرْ کٛ نغَطُمِ فُو؞ نٛنْ حَانِ نغَطٛنْ نغَمْ مبَلّٛنْ تَمْڤُٻٜ؞ شِفْتٛرٜىٰ بٛلِيطٜ طٜ يٜىٰسُ جٛومِرَاوٛ وِعِ اٜ حٛورٜ مُوطُمْ، ‏‹‏کٛکّٛووٛ ٻُرِي جَٻٛووٛ بَرْکَ؞›‏ »‏

³⁶ندٜ بُلُسْ يٛتِّنِ بٛلِيطٜ مُوطُمْ، سٜيْ کَنْکٛ اٜ مَٻّٜ ٻٜ فُو ٻٜ ندِشِّي ٻٜ نغَطِ دٛعَارٜ؞ ³⁷ٻٜ فُو ٻٜ مبٛيِ بٛجِّ طُطِّ، ٻٜ نغُوندِ بُلُسْ ٻٜ نجَٻّٛتِرِ اٜ مَاکٛ؞ ³⁸کٛ ٻُرِ وَنُّکِٻٜ وٛنِ ندٜ اٛ وِعِٻٜ ٻٜ ڤُطِّتَتَا ٻٜ نغِعَمٛ؞ سٜيْ ٻٜ طٛفْتِمٛ ٻٜ نجَارِمٛ تٛ کٛمِوَلْ؞

نٛ بُلُسْ يَحِرِ اُرُشَلِيمَ

¹ندٜ مِنْ شٜنْدِرِ اٜ مَٻّٜ، مِنْ نَتِّ کٛمِوَلْ، مِنْ نجَحِ لٜيْدِ کٛسْ؞ ندٜ وٜىٰتِ، مِنْ نجَحِ لٜيْدِ رٛودٛسْ، دَغَ تٛنْ مِنْ نجَحِ غَرِيرِ فَاتِرَ؞ ²طٛنْ مِنْ تَوِ کٛمِوَلْ جَحَيْنغَلْ لٜيْدِ فِنِيکِيَ، سٜيْ مِنْ نَتِّنغَلْ، مِنْ ندِلِّ؞ ³مِنْ کَيْنِي لٜيْدِ نغٛنْدِ شَکَ ندِيَمْ بِعٜتٜىٰندِ سَيِيفُرُسْ مِنْ تٛکِّ فٛمْبِنَ مَيْرِ، مِنْ اُمَّنِي لٜيْدِ سِيرِيَ؞ مِنْ نجٛتِّ غَرِيرِ تَايَ، تٛنْ تٛ طُمْ جِڤِّنَنْتَ کٛمِوَلْ اَمِنْ دٛݝْلٜ؞ ⁴مِنْ تَوِ تٛکُّٻٜ يٜىٰسُ تٛنْ، مِنْ نجٛوطٛدِي اٜ مَٻّٜ بَلْطٜ جٛوٜىٰطِطِ؞ ندٜرْ بَوْطٜ رُوحُ اَللَّه ٻٜ مبِعِ بُلُسْ تٛع اٛ يَحَ اُرُشَلِيمَ؞ ⁵اَمَّا ندٜ يٛنْتٛورٜ ندٜنْ حٜىٰݧِ، مِنْ شٛعِّي تٛ کٛمِوَلْ؞ ٻٜ فُو ٻٜ طٛفْتِمِنْ، کَمْٻٜ اٜ رٜوْٻٜ مَٻّٜ اٜ ٻِکّٛيْ مَٻّٜ، حَا مِنْ مبُرْتِي غَرِيرِ؞ مِنْ ندِشِّي دَاندٜ مَايٛ، مِنْ نغَطِ دٛعَارٜ؞ ⁶ندٜ مِنْ شٜنْدِرِ، مِنٛنْ مِنْ نَتِّ کٛمِوَلْ، کَمْٻٜ بٛو ٻٜ شٛعِّي غُرٜ مَٻّٜ؞

⁷مِنْ اَلِ غَرِيرِ تَايَ مِنْ دِلِّ ندٜرْ کٛمِوَلْ نغَلْ، مِنْ نجٛتِّ غَرِيرِ تٛلٜمَيِسْ؞ مِنْ تَوِ تٛکُّٻٜ يٜىٰسُ تٛنْ، مِنْ مبَالِ تٛ مَٻّٜ وَلْندٜ وٛعٛيْرٜ؞ ⁸ندٜ فِنِ مِنْ اَلِ طٛنْ، مِنْ نجَحِ غَرِيرِ کَيْسَارِيَ؞ مِنْ نَتِّ وُرٛ فِلِبُسْ غَعَجِنٛووٛ حَبَرُ بٜلْطُمْ، مِنْ نجِڤِّي تٛ مَاکٛ؞ کَنْکٛ اٛ غٛعٛتٛ ندٜرْ ٻٜنْ طٛنْ نجٛوٜىٰطِطٛ ٻٜ طُمْ سُٻِ نغَمْ کُوَنَ تٛکُّٻٜ يٜىٰسُ؞ ⁹اٜ مٛ وٛودِ ٻِٻّٜ رٜوْٻٜ نَيٛ ٻٜ تٜعَاکَ، غَطٛوٻٜ اَنَّبَاکُ؞ ¹⁰غَطَ مِنْ نجٛوطَکٜ طٛنْ بَلْطٜ سٜطَّ، غٛطّٛ اَنَّبِيجٛ بِعٜتٜىٰطٛ اَغَبُسْ وَرِ دَغَ لٜيْدِ يَحُودِيَ وَرِ تٛ اَمِنْ؞ ¹¹اٛ حٛشِّ تَادٛرْدٜ بُلُسْ، اٛ حَٻِّ جُوطٜ مَاکٛ اٜ کٛيْطٜ مَاکٛ، اٛ وِعِ، ‏«‏رُوحُ اَللَّه وِعِي نِحِ يَحُودَنْکٛعٜنْ وٛنْٻٜ اُرُشَلِيمَ کَٻِّرْتَ جٛومُ تَادٛرْدٜ ندٜعٜ، ٻٜ نغَطَمٛ ندٜرْ جُوطٜ يِمْٻٜ نَاع يَحُودَنْکٛعٜنْ؞»‏

¹²ندٜ مِنْ نَنِ کٛ اٛ وِعِ، مِنٛنْ اٜ وٛنْٻٜ طٛنْ فُو، مِنْ تٛرِي بُلُسْ تٛع يَحَ اُرُشَلِيمَ؞ ¹³بُلُسْ نٛوتِي، وِعِمِنْ، ‏«‏اَلٜىٰ بٛجِّ، تٛع اٛنْ نغٜوَنَمْ ٻٜرْندٜ!‏ اٜ مِ سِرْيِي نَاع مِ حَٻّٜىٰ تَنْ، اَمَّا حَا مِ مَايَ تٛنْ اُرُشَلِيمَ نغَمْ اِنْدٜ يٜىٰسُ جٛومِرَاوٛ؞»‏

¹⁴ندٜ مِنْ اَنْدِتِ مِنْ مبَاوَتَا وَيْلُتُکِ ݧُمٛ مَاکٛ، مِنْ ندٜعِّتِ، مِنْ مبِعِ، ‏«‏جٛومِرَاوٛ وَطَ نٛ يِطِ!‏»‏

¹⁵غَطَ مِنْ نغَطِي بَلْطٜ سٜطَّ تٛنْ، مِنْ شِرْيِي يَاکِ اُرُشَلِيمَ؞ ¹⁶وٛٻّٜ ندٜرْ تٛکُّٻٜ يٜىٰسُ دَغَ کَيْسَارِيَ طٛفْتِمِنْ، ٻٜ نجَارِمِنْ وُرٛ غٛطّٛ نٜطّٛ بِعٜتٜىٰطٛ مَنَاسٛنْ پِوٛيْطٛ سَيِيفُرُسْ؞ کَنْکٛ اٛ غٛعٛتٛ ندٜرْ تٛکُّٻٜ يٜىٰسُ اَرَنْدٜعٜنْ مٛ مِنْ نجِڤّٛتٛ تٛ وُرٛ مُوطُمْ؞

نٛ بُلُسْ يَحِرِ تٛ يَاکُبُ

¹⁷ندٜ مِنْ نجٛتِّي اُرُشَلِيمَ، تٛکُّٻٜ يٜىٰسُ نجَٻِّمِنْ ندٜرْ وٜلْوٜلٛ؞ ¹⁸ندٜ وٜىٰتِ مِنْ نجَادِ اٜ بُلُسْ تٛ يَاکُبُ؞ مَوْٻٜ کَوْتَلْ تٛکُّٻٜ يٜىٰسُ فُو اٜ طٛنْ؞ ¹⁹غَطَ بُلُسْ حٛوْنِيٻٜ، اٛ وِعِٻٜ کٛو طُمٜ کٛ اَللَّه حُوِ دَغَ جُوطٜ مَاکٛ ندٜرْ يِمْٻٜ نَاع يَحُودَنْکٛعٜنْ؞ ²⁰ندٜ ٻٜ نَنِ کٛ اٛ وِعِ، ٻٜ نغٜتِّ اَللَّه؞ ٻٜ مبِعِ بُلُسْ، ‏«‏اَنْ بَنْدِرَاوٛ اَمِنْ، اَ يِعِي نٛ يَحُودَنْکٛعٜنْ تٛکُّٻٜ يٜىٰسُ طُوطِرِ، ٻٜ فُو اٜ ٻٜ تِينِ تٛکُّکِ اَتَّوْرَ؞ ²¹ٻٜ نَنِي اَ اٜکِّتِنَ يَحُودَنْکٛعٜنْ وٛنْٻٜ ندٜرْ غٛطِّ لٜپِّ اَلَ تٛکُّکِ اَتَّوْرَ، اَ وِعَ تٛع ٻٜ نَادَ ٻِکّٛيْ مَٻّٜ، تٛع ٻٜ تٛکَّ ندٛنُ يَحُودَنْکٛعٜنْ؞ ²²نٛيٜ نغَطٜتٜنْ؟ نغَمْ اٜ مِنْ اَنْدِ ٻٜ نَنَيْ اَ وَرِي طٛعٛ؞ ²³جٛونِ وَطُ کٛ مِنْ مبِعَتَمَ؞ طٛعٛ اٜ وٛودِ وٛرْٻٜ نَيٛ غَطَنْٻٜ اَللَّه اَلْکَوَلْ؞ ²⁴يَادُ اٜ مَٻّٜ، نغَطٛنْ کٛ دِينَ يَحُودَنْکٛعٜنْ وِعِ نغَطٜنْ نغَمْ نغَرْتٛنْ لَاٻُٻٜ يٜىٰسٛ جٛومِرَاوٛ؞ ندٜنْ کٛکَّا کٛ حَانِ ٻٜ کٛکَّ نغَمْ ٻٜ ڤٜمْبٜىٰ؞ نٛنْ حٛلَّيْ يِمْٻٜ کٛ نَنَتَ فُو دٛوْ مَاطَ نَاع طُمْ غٛونغَ؞ ٻٜ اَنْدَيْ کَدِمَا اَنْ اٜ حٛورٜ مَاطَ، اَ تٛکِّ اَتَّوْرَ؞ ²⁵اَمَّا کٛولِيٻٜ يٜىٰسُ پِوٛيْٻٜ غٛطِّ لٜپِّ، مِنْ مبِنْدَنِيٻٜ تٛع ٻٜ ݧَامَ کٛ حِرْسَنَا غُنْکِيجِ اٜ کٛ سَاطِ اٜ کٛ مٛيْلَنَا دَاندٜ، کٛو پِيپَمْ، ندٜنْ تٛع ٻٜ نغَطَ نجٜىٰنُ؞»‏

²⁶سٜيْ بُلُسْ حٛشِّ وٛرْٻٜ نَيٛ ٻٜنْ يَادِ اٜ مَٻّٜ؞ ندٜ فِنِ ٻٜ نغَطِ کٛ دِينَ يَحُودَنْکٛعٜنْ وِعِ ٻٜ نغَطَ نغَمْ وَرْتُکِ لَاٻُٻٜ؞ سٜيْ اٛ نَتِّ وُرٛ شٜنِينغٛ، اٛ وِعِ اَرْدِيٻٜ دِينَ ݧَلْندٜ ندٜ بَلْطٜ لَاٻِنْکِ مَٻّٜ کٜىٰݧَتَ، ݧَلْندٜ ندٜ طُمْ حِرْسَتَ شَکِّرِ نغَمْ کٛو مٛيٜ مَٻّٜ؞

نَنْغٛلْ بُلُسْ

²⁷ندٜ بَلْطٜ جٛوٜىٰطِطِ طٜنْ ٻَدِي حٜىٰوُکِ، وٛٻّٜ يَحُودَنْکٛعٜنْ پِوٛيْٻٜ لٜيْدِ اَاسِيَ نغِعِ بُلُسْ ندٜرْ وُرٛ شٜنِينغٛ؞ سٜيْ ٻٜ اُمِّنِ حَکِّيلٛ حَوْرُتُٻٜ طٛنْ فُو، ٻٜ نَنْغِمٛ؞ ²⁸ٻٜ نغُلِّ ٻٜ مبِعِ، ‏«‏اِسْرَاعِيلَنْکٛعٜنْ، مبَلّٜىٰمِنْ!‏ رَا نٜطّٛ جَحٛووٛ کٛو تٛيٜ اٜ اٜکِّتِنَ يِمْٻٜ اٜ وِعَ لٜݧٛلْ مٜىٰطٜنْ اٜ اَتَّوْرَ مٜىٰطٜنْ اٜ وُرٛ شٜنِينغٛ نغٛعٛ وَلَا کٛ نَفِ؞ جٛونِ مَا اٛ وٛنِّي وِغٜىٰرٜ شٜنِيندٜ نغَمْ اٛ وَدِّي يِمْٻٜ نَاع يَحُودَنْکٛعٜنْ ندٜرْ وُرٛ شٜنِينغٛ!‏»‏ ²⁹ٻٜ مبِعُ نٛنْ نغَمْ ٻٜ نغِيدِينٛ بُلُسْ اٜ تُرٛوفِمُسْ نٜطّٛ اَافِسَ ندٜرْ غَرِيرِ ندِنْ؞ اٜ ٻٜ کَمِّي بُلُسْ نَتِّنِيمٛ ندٜرْ وُرٛ شٜنِينغٛ؞

³⁰حَکِّيلٛ يِمْٻٜ غَرِيرِ ندِنْ فُو اُمِّي؞ يِمْٻٜ اٜ مبُرْتٛيٛو کٛو تٛيٜ اٜ ندٛغّٛيَ اٜ نغَرَ؞ ٻٜ نَنْغِ بُلُسْ ٻٜ ندَسِمٛ ٻٜ مبُرْتِنِمٛ وُرٛ شٜنِينغٛ؞ طٛنْ اٜ طٛنْ دَمُّطٜ مَاغٛ فُو مَٻَّا؞ ³¹اٜ ٻٜ شِرْيٛ ٻٜ مبَرَ بُلُسْ، سٜيْ مَوْطٛ سٛوجِعٜنْ رٛومَ نَنِ حَبَرُ حَکِّيلٛ يِمْٻٜ اُرُشَلِيمَ فُو اُمَّکٜ؞ ³²طٛنْ اٜ طٛنْ، اٛ حٛشِّ سٛوجِعٜنْ اٜ مَوْٻٜ مَٻّٜ، اٛ اُمَّنِي کَوْرُتُٻٜ ٻٜنْ؞ ندٜ يِمْٻٜ ٻٜنْ نغِيدِمٛ اٜ سٛوجِعٜنْ، طٛنْ اٜ طٛنْ ٻٜ اَلِ فِيکِ بُلُسْ؞ ³³مَوْطٛ اٛنْ ٻَتِّي بُلُسْ وِعِ اٛ نَنْغٜىٰ اٛ حَٻِّرٜىٰ ٻٛغِّ نجَمْندِ طِطِ؞ ندٜنْ اٛ پَمِ بُلُسْ کَنْکٛ اٛ مٛيٜ، طُمٜ اٛ وَطِ؟ ³⁴يِمْٻٜ ٻٜنْ بٛو اٜ نغُلَّ؞ کٛو مٛيٜ اٜ کَ وِعَتَ حَا اٛ دُلِّ غٛونغَ حَالَ کَنْ؞ سٜيْ اٛ وِعِ بُلُسْ يَارٜىٰ وُرٛ سٛوجِعٜنْ؞ ³⁵ندٜ ٻٜ نجٛتِّي پٜنْتِرْطُمْ وُرٛ نغٛنْ، سٛوجِعٜنْ پٜفْتِمٛ دٛوْ نغَمْ يِمْٻٜ ٻٜنْ طُوطِي؞ ³⁶يِمْٻٜ طُطْٻٜ ٻٜنْ اٜ تٛکِّمٛ اٜ ٻٜ نغُلَّ اٜ ٻٜ مبِعَ، ‏«‏مبَرٜىٰمٛ!‏»‏

نٛ بُلُسْ مٜتِرَنِ يِمْٻٜ اُرُشَلِيمَ

³⁷ندٜ ٻٜ نغَرِ نَتِّنْکِمٛ وُرٛ سٛوجِعٜنْ ٻٜنْ، بُلُسْ وِعِ مَوْطٛ اٛنْ، ‏«‏کٛو اَ جَٻَيْ مِ مٜدَّ اٜ مَاطَ؟»‏

مَوْطٛ سٛوجِعٜنْ اٛنْ وِعِ بُلُسْ ‏«‏اَشٜىٰ، اَ وَاوِ حٜلٜنَنْکٛورٜ؟ ³⁸نَاع اَنْ وٛنِ مَسَرَنْکٜىٰجٛ اُمِّنْطٛ حَوْرٜ کٛ نٜىٰٻَايِ، حَا حَوْرِتِ يِمْٻٜ کَلُّٻٜ ندٜرْ لَدّٜ کٜوْتُٻٜ 4,000؟»‏

³⁹بُلُسْ وِعِ، ‏«‏مِنْ مِ يَحُودَنْکٜىٰجٛ دَݧَاطٛ ندٜرْ غَرِيرِ مَوْندِ بِعٜتٜىٰندِ تَرْسُسْ ندٜرْ لٜيْدِ کِلِيکِيَ؞ اٜ مِ تٛرٛمَا اَلَايَمْ مِ مٜدَّ اٜ يِمْٻٜ؞»‏

⁴⁰سٜيْ مَوْطٛ سٛوجِعٜنْ اٛنْ جَٻِ اٛ مٜدَّ اٜ مَٻّٜ؞ سٜيْ بُلُسْ دَرِي دٛوْ پٜنْتِرْطُمْ سُودُ، اٛ پٜفْتَنِ يِمْٻٜ ٻٜنْ جُنْغٛ نغَمْ ٻٜ ندٜعِّتَ؞ ندٜ ٻٜ ندٜعِّتِ، اٛ مٜتِرَنِٻٜ طٜمْنغَلْ اِبْرَانِيَنْکٛورٜ، اٛ وِعِ،

¹‏«‏اٛنٛنْ بَنْدِرَاٻٜ اَمْ اٜ دَݧٛوٻٜ اَمْ، کٜتِّندَنٜىٰيَمْ مِ وِعَعٛنْ غٛونغَ دٛوْ کٛ نغُلّٛرِيطٛنْيَمْ؞»‏ ²ندٜ ٻٜ نَنِ اٜ مٛ مٜتِرَنَٻٜ اِبْرَانِيَنْکٛورٜ ٻٜ ٻٜيْدِ دٜعُّتُکِ؞ ندٜنْ اٛ وِعِٻٜ،

³‏«‏مِنْ مِ يَحُودَنْکٜىٰجٛ دَݧَاطٛ غَرِيرِ تَرْسُسْ ندٜرْ لٜيْدِ کِلِيکِيَ؞ اَمَّا طٛعٛ اُرُشَلِيمَ مَوْنُمِ؞ غَمَالِيَ وٛنِ مٛودِبّٛ اَمْ؞ کَنْکٛ جَنْغِنِيَمْ اَتَّوْرَ مَامَعٜنْ مٜىٰطٜنْ؞ اٜ مِ تٛکِّ اَللَّه اٜ ٻٜرْندٜ غٛعٛ نٛنْ نٛ تٛکِّرْطٛنْمٛ حَنْدٜ؞ ⁴مِ تٛرِّينٛ تٛکُّٻٜ لَاوٛلْ يٜىٰسُ حَا مِ وَرِي وٛٻّٜ؞ مِ نَنْغِي وٛرْٻٜ حَا اٜ رٜوْٻٜ، مِ مَٻِّيٻٜ ندٜرْ سُودُ شُرَلْ؞ ⁵مَوْطٛ مَوْٻٜ اَرْدِيٻٜ دِينَ اٜ کَوْتَلْ مَوْٻٜ بٛو ٻٜ مبَاوَيْ تَبِّتِنَنْکِعٛنْ کٛ مبِيمِعٛنْ طُمْ غٛونغَ؞ دَغَ تٛ مَٻّٜ کٜٻُمِ طٜرٜىٰجِ يَاکِ تٛ يَحُودَنْکٛعٜنْ وٛنْٻٜ غَرِيرِ دِمَسْکُ؞ مِ يَحِ تٛنْ نَنْغٛيْکِ تٛکُّٻٜ يٜىٰسُ، مِ وَدَّٻٜ اُرُشَلِيمَ نغَمْ ٻٜ تٛرّٜىٰ؞

بُلُسْ وِعِ نٛ تُوبِرِ

⁶‏«‏اٜ مِ دٛوْ لَاوٛلْ يَاکِ دِمَسْکُ، ندٜ ٻَدِيمِ غَرِيرِ ندِنْ، شَکَ ݧَلَوْمَ مِ اَنْدَا مِ اَنْدِتَا سٜيْ وٛنْغٛلْ جَيْنغٛلْ دَنٜوٛلْ تَرْ پِوٛيِ دَغَ دٛوْ يٜيْنَنِييَمْ؞ ⁷سٜيْ نجَنُمِ اٜ لٜيْدِ، نَنْمِ وٛنْدٜ حٛنٛنْدٜ اٜ وِعَيَمْ، ‏‹‏شَاوُلُ، شَاوُلُ، نغَمْ طُمٜ تٛرَّتَايَمْ؟›‏ ⁸نٛوتِيمِ مبِيمِ، ‏‹‏مَوْطٛ، اَنْ طُمْ مٛيٜ؟›‏ اٛ وِعِيَمْ، ‏‹‏مِنْ وٛنِ يٜىٰسُ نَجَرَنْکٜىٰجٛ مٛ تٛرَّتَا؞›‏ ⁹وٛنْدُٻٜ اٜ اَمْ نغِعِ جَيْنغٛلْ نغٛلْ، اَمَّا ٻٜ نَنَايِ حٛنٛنْدٜ مٜتَنَيْطٛيَمْ اٛنْ؞ ¹⁰ندٜنْ مبِيمِ، ‏‹‏جٛومِرَاوٛ، کٛ نغِطَّا مِ وَطَ؟›‏ اٛ وِعِيَمْ، ‏‹‏اُمَّ نجَحَا دِمَسْکُ؞ تٛنْ طُمْ وِعَتَمَ کٛ نغَطَتَا فُو؞›‏ ¹¹وٛنْدُٻٜ اٜ اَمْ نجٛغَنِييَمْ جُوطٜ حَا ندٜرْ غَرِيرِ دِمَسْکُ، نغَمْ جَيْنغٛلْ نغٛلْ وُمْنِييَمْ؞

¹²‏«‏ندٜرْ غَرِيرِ ندِنْ اٜ وٛودِ غٛطّٛ نٜطّٛ بِعٜتٜىٰطٛ حَنَانِيَ، کُلٛووٛ جٛومِرَاوٛ، تٛکُّطٛ اَتَّوْرَ، مٛ يَحُودَنْکٛعٜنْ جٛوطِيٻٜ تٛنْ فُو مَنَتَ؞ ¹³اٛ وَرِ اٛ دَرِي يٜىٰسٛ اَمْ، اٛ وِعِيَمْ، ‏‹‏بَنْدِرَاوٛ اَمْ شَاوُلُ، وُمْتُ!‏›‏ طٛنْ اٜ طٛنْ مبُمْتُمِ نغِيمٛومِ؞ ¹⁴اٛ وِعِيَمْ، ‏‹‏اَللَّه مٛ مَامَعٜنْ مٜىٰطٜنْ سُٻِيمَ نغَمْ اَنْدَا کٛ اٛ يِطِ وَطُکِ، نغِعَا اَادِلِيجٛ مَاکٛ، نَنَا کٛ اٛ وِعَتَ اٜ حٛنْدُکٛ مَاکٛ، ¹⁵نغَمْ اَنْ اَندِنْتَمٛ يٜىٰسٛ يِمْٻٜ فُو دٛوْ کٛ نغِيطَا اٜ کٛ نَنْطَا؞ ¹⁶جٛونِ، طُمٜ ندٜنْتُطَا؟ اُمَّ طُمْ وَطَنْمَا بَڤْتِسْمَ، تٛرٛطَا اَللَّه يَافَنٛمَا حَکّٜ مَاطَ؞›‏

بُلُسْ وَعَجِنَنَيْ يِمْٻٜ نَاع يَحُودَنْکٛعٜنْ

¹⁷‏«‏غَطَ مِ وَرْتِي اُرُشَلِيمَ، اٜ مِ وَطَ دٛعَارٜ ندٜرْ وُرٛ شٜنِينغٛ، سٜيْ نغِيمِ وَحَيُ؞ ¹⁸ندٜرْ وَحَيُ طُمْ، مِ يِعِ جٛومِرَاوٛ اٜ وِعَيَمْ، ‏‹‏يَوْنُ، وُرْتَ اُرُشَلِيمَ، نغَمْ يِمْٻٜ طٛعٛ نجَٻَتَا کٛ مبِعَتَا دٛوْ اَمْ؞›‏ ¹⁹ندٜنْ نٛوتِيمِ مبِيمِ، ‏‹‏جٛومِرَاوٛ، کَمْٻٜ اٜ کٛعٜ مَٻّٜ اٜ ٻٜ اَنْدِ مِ نَتِّي ندٜرْ شُوطِ دٛعَارٜ فُو، مِ نَنْغِي تٛکُّٻٜ يٜىٰسُ، مِ ڤِيِيٻٜ، مِ مَٻِّيٻٜ ندٜرْ سُودُ شُرَلْ؞ ²⁰ندٜ اِسْتِفَانُسْ مٜتَنَيْطٛ يِمْٻٜ دٛوْ مَاطَ وَرَا، مِنْ اٜ حٛورٜ اَمْ مِ جَٻِي وَرُکِمٛ، مِنْ رٜىٰنِ کٛلْتٜ بَرْٻٜمٛ؞›‏ ²¹جٛومِرَاوٛ وِعِيَمْ، ‏‹‏اُمَّ، مِ لِلٜتٜ تٛ وٛطِّ ندٜرْ لٜپِّ طِ نَاع يَحُودَنْکٛعٜنْ؞›‏ »‏

بُلُسْ وِعِي نٛ رٛومَنْکٜىٰجٛ

²²يِمْٻٜ ٻٜنْ اٜ کٜتِّندَنِي بُلُسْ نَاکِ اٛ وِعِ کَعَ حَالَ؞ سٜيْ ٻٜ نغُلِّ سٜمْبٜىٰ، ٻٜ مبِعِ، ‏«‏مبَرٜىٰمٛ، اِتّٜىٰمٛ دَغَ ندٜرْ دُونِيَارُ ندُعُ!‏ اٛ حَانَايِ اَلْدٜىٰکِ اٜ يٛنْکِ!‏»‏ ²³اٜ ٻٜ نغُلَّ، اٜ ٻٜ ٻٛرْتٛو کٛلْتٜ مَٻّٜ، اٜ ٻٜ نٛکَّ مبُلْمبُلْدِ اٜ ٻٜ شَنْکِتَندِ دٛوْ؞ ²⁴سٜيْ مَوْطٛ سٛوجِعٜنْ اٛنْ وِعِ طُمْ يَارَ بُلُسْ ندٜرْ وُرٛ سٛوجِعٜنْ، ٻٜ ڤِيَمٛ نغَمْ ٻٜ اَنْدَ کٛ وَطِ يِمْٻٜ ٻٜنْ نغُلِّرْتَ دٛوْ مَاکٛ نِحِ؞ ²⁵ندٜ ٻٜ کَٻِّمٛ نغَمْ ٻٜ ڤِيَمٛ، سٜيْ بُلُسْ وِعِ اَرْدِيطٛ غٛنْطٛ طٛنْ، ‏«‏کٛو اٛنْ نغٛودِ لَامُ فِيکِ رٛومَنْکٜىٰجٛ مٛ وَطَنَاکَ کِيتَ تَوْ؟»‏

²⁶ندٜ اَرْدِيطٛ اٛنْ نَنِ نٛنْ، اٛ يَحِ تٛ مَوْطٛ مَاکٛ، اٛ وِعِ، ‏«‏طُمٜ نغِطَّا وَطَنْکِمٛ؟ نغَمْ نٜطّٛ اٛنْ اٛ رٛومَنْکٜىٰجٛ!‏»‏

²⁷سٜيْ مَوْطٛ سٛوجِعٜنْ اٛنْ وَرِ تٛ بُلُسْ، پَمِمٛ وِعِ، ‏«‏وِعَمْ غٛونغَ، اَ رٛومَنْکٜىٰجٛ؟»‏

بُلُسْ نٛوتِي، وِعِ، ‏«‏اٜىٰ، مِ رٛومَنْکٜىٰجٛ!‏»‏

²⁸اٛ وِعِ بُلُسْ، ‏«‏مِنْ، اٜ شٜىٰدٜ طُطّٜ کٜٻُمِ وَرْتُکِ رٛومَنْکٜىٰجٛ؞»‏

بُلُسْ وِعِمٛ، ‏«‏مِنْ بٛو مِ رٛومَنْکٜىٰجٛ نغَمْ دَݧٛوٻٜ اَمْ نغَرْتِي رٛومَنْکٛعٜنْ؞»‏

²⁹طٛنْ اٜ طٛنْ شِرْيِنٛوٻٜ فِيکِمٛ اَلِمٛ؞ مَوْطٛ اٛنْ حُلِ، نغَمْ اٛ اَنْدِتِي بُلُسْ نٛ رٛومَنْکٜىٰجٛ، رَطُّمْ حَا ٻٜ کَٻِّرِيمٛ ٻٛغِّ نجَمْندِ؞

بُلُسْ يٜىٰسٛ مَوْٻٜ يَحُودَنْکٛعٜنْ

³⁰تٛو، مَوْطٛ سٛوجِعٜنْ اٛنْ اٜ يِطِ اَنْدُکِ کٛ وَطِ يَحُودَنْکٛعٜنْ نغُلّٛيِي بُلُسْ؞ نغَمْ نٛنْ، ندٜ وٜىٰتِ اٛ وَطِ طُمْ فِتِّ بُلُسْ اٛ نٛدِّ مَوْٻٜ اَرْدِيٻٜ دِينَ اٜ کَوْتَلْ مَوْٻٜ فُو ٻٜ کَوْرِتَ؞ اٛ وَدِّ بُلُسْ يٜىٰسٛ مَٻّٜ؞

¹بُلُسْ سُتِي کَوْتَلْ مَوْٻٜ، وِعِٻٜ، ‏«‏بَنْدِرَاٻٜ اَمْ، اٜ ٻٜرْندٜ لَاٻُندٜ تٛکِّرْمِ اَللَّه دَغَ اَرَنْدٜ حَا وَرْکِ حَنْدٜ؞»‏ ²سٜيْ حَنَانِيَ، مَوْطٛ مَوْٻٜ اَرْدِيٻٜ دِينَ وِعِ دَرِيٻٜ حَادٜ بُلُسْ ڤِيَ حٛنْدُکٛ مَاکٛ؞ ³سٜيْ بُلُسْ وِعِمٛ، ‏«‏اَنْ مَا اَللَّه فِيٜتٜ، اَنْ مُنَافُکِيجٛ!‏ اَ جٛوطِ نغَمْ نغَطَنَايَمْ کِيتَ دٛوْ دٛوکَ اَتَّوْرَ، اَمَّا اَنْ اَ يٜوِي دٛوکَ طُمْ نغَمْ اَ وِعِ مِ فِيٜىٰ؞»‏

⁴دَرِيٻٜ حَادٜ مَاکٛ مبِعِمٛ، ‏«‏اَ حُطُ مَوْطٛ مَوْٻٜ اَرْدِيٻٜ دِينَ مٛ اَللَّه سُٻِ؟»‏

⁵بُلُسْ وِعِ، ‏«‏بَنْدِرَاٻٜ اَمْ، مِ اَنْدَا اٛ مَوْطٛ مَوْٻٜ اَرْدِيٻٜ دِينَ، نغَمْ اَايَارٜ وِعِي، ‏‹‏تَاع حُطُ اَرْدِيطٛ لٜݧٛلْ!‏›‏ »‏

⁶ندٜ بُلُسْ اَنْدِتِ وٛٻّٜ ندٜرْ کَوْتَلْ نغَلْ ٻٜ سَادُسَنْکٛعٜنْ، وٛٻّٜ ندٜرْ مَٻّٜ بٛو ٻٜ فَارِسَنْکٛعٜنْ، اٛ وِعِ اٜ سٜمْبٜ، ‏«‏بَنْدِرَاٻٜ اَمْ، مِنْ مِ فَارِسَنْکٜىٰجٛ، ٻِي فَارِسَنْکٛعٜنْ؞ مِ وُلَّ دٛوْ کَمُّندٜ ندٜ نغٛودُمِ دٛوْ اُمَّاکِ مَيْٻٜ؞»‏

⁷ندٜ اٛ وِعِ نٛنْ، سٜيْ فَارِسَنْکٛعٜنْ اٜ سَادُسَنْکٛعٜنْ ڤُطِّ يٜدّٛوتِرْکِ؞ کَوْتَلْ نغَلْ سٜنْدِي طِطِ، ⁸نغَمْ سَادُسَنْکٛعٜنْ مبِعِ اُمَّاکِ مَيْٻٜ وَلَا، مَلَاعِکَعٜنْ نغَلَا، رُوحُوجِ نغَلَا، اَمَّا فَارِسَنْکٛعٜنْ اٜ مبِعَ طُمْ فُو تَتُمْ اٜ طُمْ وٛودِ؞ ⁹غٜدِّ ٻٜيْدِ اُمَّاکِ؞ وٛٻّٜ دَغَ ندٜرْ مٛودِٻّٜ اَتَّوْرَ ندٜرْ فَارِسَنْکٛعٜنْ ندَرِ، اُمِّنِ غٜدِّ کَلُّطِ، ٻٜ مبِعِ، ‏«‏مِنْ نغِعَايِ غٛطُّمْ کٛ حَلِّ کٛ نٜطّٛ اٛعٛ وَطِ؞ طُمْ غَطٛتٛوطُمْ رُوحُ کٛو مَلَاعِکَاجٛ مٜدِّي اٜ مَاکٛ!‏»‏

¹⁰غٜدِّ طِنْ نغَرْتِ کَلُّطِ حَا مَوْطٛ سٛوجِعٜنْ اٛنْ حُلِ تٛ بُلُسْ شِشِّتٜىٰ؞ نغَمْ نٛنْ اٛ وِعِ سٛوجِعٜنْ مَاکٛ نجَحَ تٜىٰتٛيَ بُلُسْ تٛ يِمْٻٜ اٜ سٜمْبٜ، ٻٜ نجَارَمٛ وُرٛ سٛوجِعٜنْ؞

¹¹ندٜرْ جٜمَّارٜ ندٜنْ جٛومِرَاوٛ وَنْغِ حَادٜ بُلُسْ، وِعِمٛ، ‏«‏تَاع حُلُ!‏ نٛنْ نٛ اَندِنِرْطَا حَبَرُ اَمْ ندٜرْ اُرُشَلِيمَ، دٛولٜ نغَطَا نٛنْ ندٜرْ غَرِيرِ رٛومَ؞»‏

دَبَرٜ وَرُکِ بُلُسْ

¹²ندٜ وٜىٰتِ، وٛٻّٜ يَحُودَنْکٛعٜنْ کَوْتِ کٛعٜ، ٻٜ کُنِي وِيکِ ٻٜ نجَرَتَا ٻٜ ݧَامَتَا سٜيْ تٛ ٻٜ مبَرِي بُلُسْ؞ ¹³کَٻُّٻٜ دَبَرٜ ندٜنْ ٻُرِي يِمْٻٜ 40؞ ¹⁴ٻٜ نجَحِ تٛ مَوْٻٜ اَرْدِيٻٜ دِينَ اٜ مَوْٻٜ، ٻٜ مبِعِٻٜ، ‏«‏مِنْ کُنَنَکٜ اَللَّه مِنْ نجَرَتَا مِنْ ݧَامَتَا، سٜيْ تٛ مِنْ مبَرِي بُلُسْ؞ ¹⁵جٛونِ، اٛنٛنْ اٜ کَوْتَلْ مَوْٻٜ، مبِعٜىٰ مَوْطٛ سٛوجِعٜنْ اٛ وَدَّنَعٛنْ بُلُسْ، نغَطٛنْ بٛ اٛنْ نغِطِ ٻٜيْدٛنْ نَنُکِ کٛ اٛ وِعَتَ؞ مِنٛنْ بٛو، اٜ مِنْ شِرْيِي وَرُکِمٛ کٛ اٛ يٛتّٛو تٛ مٛوطٛنْ؞»‏

¹⁶اَمَّا ٻِي مِݧِرَاوٛ بُلُسْ دٜبّٛ نَنِي کٛ طُمْ شِرْيِي؞ نغَمْ نٛنْ اٛ يَحِ تٛ وُرٛ سٛوجِعٜنْ نغٛنْ، اٛ نَتِّ، اٛ وِعِکَ بُلُسْ؞ ¹⁷سٜيْ بُلُسْ نٛدِّ غٛعٛتٛ ندٜرْ اَرْدِيٻٜ سٛوجِعٜنْ، وِعِمٛ، ‏«‏يَارُ کَيٜىٰجٛ اٛعٛ تٛ مَوْطٛ مٛوطٛنْ، نغَمْ اٜ مٛ وٛودِ کٛ اٛ وِعَتَمٛ؞»‏ ¹⁸سٜيْ اَرْدِيطٛ سٛوجِعٜنْ اٛنْ يَارِمٛ تٛ مَوْطٛ اٛنْ، اٛ وِعِمٛ، ‏«‏نَنْغَاطٛ بِعٜتٜىٰطٛ بُلُسْ نٛدِّيَمْ، تٛرِييَمْ مِ وَدَّ کَيٜىٰجٛ اٛعٛ تٛ مَاطَ، نغَمْ اٜ وٛودِ کٛ اٛ وِعَتَمَ؞»‏

¹⁹مَوْطٛ اٛنْ نَنْغِ جُنْغٛ مَاکٛ، فٛوطِمٛ وُتُّدُ، پَمِمٛ، وِعِمٛ، ‏«‏طُمٜ نغِطَّا وِعُکِيَمْ؟»‏

²⁰کَيٜىٰجٛ اٛنْ نٛوتِي، وِعِ، ‏«‏اَرْدِيٻٜ يَحُودَنْکٛعٜنْ کَوْتِي حٛورٜ جَانغٛ ٻٜ تٛرٜتٜ نجَارَنَاٻٜ بُلُسْ يٜىٰسٛ کَوْتَلْ مَوْٻٜ، ٻٜ نغَطَيْ بٛ اٜ ٻٜ نغِطِ ٻٜ ٻٜيْدَ نَنُکِ کٛ اٛ وِعَتَ؞ ²¹اَمَّا تَاع جَٻُ کٛ ٻٜ مبِعِ!‏ نغَمْ کٛ ٻُرِ يِمْٻٜ 40 ندٜرْ مَٻّٜ شِرْيَکٜ تَٻَّاکِمٛ دٛوْ لَاوٛلْ؞ ٻٜ فُو ٻٜ کُنَکٜ ٻٜ نجَرَتَا ٻٜ ݧَامَتَا سٜيْ تٛ ٻٜ مبَرِيمٛ؞ جٛونِ ٻٜ شِرْيَکٜ، اٜ ٻٜ کٜطِي کٛ نغَطَتَا؞»‏

²²مَوْطٛ اٛنْ وِعِ کَيٜىٰجٛ اٛنْ، ‏«‏تَاع وِعُ کٛو مٛيٜ اَ وِعِييَمْکَ؞»‏ سٜيْ اٛ اَلِ کَيٜىٰجٛ اٛنْ دِلِّ؞

بُلُسْ يَارَامَ کَيْسَارِيَ

²³سٜيْ مَوْطٛ سٛوجِعٜنْ اٛنْ نٛدِّ اَرْدِيٻٜ سٛوجِعٜنْ مُوطُمْ طِطٛ، وِعِٻٜ، ‏«‏شِرْيٜىٰ سٛوجِعٜنْ 200 اٜ سٛوجِعٜنْ وَطّٛتٛوٻٜ ڤُشِّ کَمْٻٜ 70 اٜ سٛوجِعٜنْ جٛغٛتٛوٻٜ لَبّٜ 200، نَنْغٛنْ لَاوٛلْ يَاکِ غَرِيرِ کَيْسَارِيَ نجَمْندِ جٛوٜىٰنَيِ حَنْدٜ جٜمَّ؞ ²⁴شِرْيٜىٰ ڤُشِّ طِ بُلُسْ وَطّٛتٛو نجَارٛنْمٛ جَمْ تٛ فٜلِسْ غٛمْنَاجٛ؞»‏ ²⁵مَوْطٛ اٛنْ وِنْدِ طٜرٜوٛلْ، وِعِ، ²⁶‏«‏مِنْ، کَلَوْدِيُسْ لِسِيَ، اٜ مِ حٛوْنُمَا، يَا فٜلِسْ، لَامِيطٛ مَوْطٛ؞ ²⁷نٜطّٛ مٛ لِلْدٛيْمَامِ، اَرْدِيٻٜ يَحُودَنْکٛعٜنْ نَنْغِيمٛ، اٜ نغِطِ وَرْکِمٛ؞ ندٜ طُمْ وِعِيَمْ اٛ رٛومَنْکٜىٰجٛ، مِ يَادِي اٜ سٛوجِعٜنْ، تٜىٰتُمٛومِ؞ ²⁸ندٜ اٜ مِ يِطِ اَنْدُکِ کٛ ٻٜ نغُلّٛرِيمٛ، نجَارُمٛومِ يٜىٰسٛ کَوْتَلْ مَوْٻٜ يَحُودَنْکٛعٜنْ؞ ²⁹مِ تَوِي دٛوْ دٛوکَ مَٻّٜ تَنْ ٻٜ نغُلّٛرِيمٛ، اَمَّا کٛ ٻٜ نغُلّٛرِيمٛ حٜوْتَايِ اٛ وَرٜىٰ کٛو اٛ مَٻّٜىٰ ندٜرْ سُودُ شُرَلْ؞ ³⁰ندٜ طُمْ وِعِيَمْ يَحُودَنْکٛعٜنْ شِرْيَکٜ دَبَرٜ وَرُکِمٛ، طٛنْ اٜ طٛنْ مِ لِلْدٛيِيمٛ تٛ مَاطَ؞ مِ وِعِ غُلّٛيِيٻٜمٛ نجَحَ مبِعَ کٛ اٛ وَطِ يٜىٰسٛ مَاطَ؞»‏

³¹سٛوجِعٜنْ ٻٜنْ نغَطِ کٛ مَوْطٛ مَٻّٜ وِعِٻٜ، ٻٜ کٛشِّ بُلُسْ جٜمَّ، ٻٜ نجَارِمٛ غَرِيرِ اَنْتِفَاتِرِسْ؞ ³²ندٜ فِنِ، سٛوجِعٜنْ غَرْٻٜ اٜ کٛيْطٜ شٛعِّي وُرٛ سٛوجِعٜنْ؞ ٻٜ اَلْدِ بُلُسْ اٜ سٛوجِعٜنْ وَطّٛتٛوٻٜ ڤُشِّ نجَادَ اٜ مَاکٛ؞ ³³ندٜ سٛوجِعٜنْ وَطِّيٻٜ ڤُشِّ ٻٜنْ نجٛتِّي کَيْسَارِيَ، ٻٜ کٛکِّ غٛمْنَاجٛ اٛنْ طٜرٜوٛلْ نغٛلْ، ٻٜ اَلِ بُلُسْ تٛ جُنْغٛ مَاکٛ؞ ³⁴ندٜ غٛمْنَاجٛ اٛنْ جَنْغِ طٜرٜوٛلْ نغٛلْ، اٛ پَمِ ندِيٜ لٜيْدِ بُلُسْ دَݧَا؞ ندٜ اٛ نَنِ بُلُسْ نٛ نٜطّٛ لٜيْدِ کِلِيکِيَ، ³⁵اٛ وِعِمٛ، ‏«‏مِ نَنَيْ کٛ مبِعَتَا تٛ غُلِّيٻٜمَ نغَرِي؞»‏ سٜيْ اٛ وِعِ رٜىٰنٛوٻٜ ندٜىٰنَ بُلُسْ ندٜرْ لَامٛرْدٜ ندٜ حِرُدُسْ مَحِ؞

بُلُسْ وُلّٛيَامَ يٜىٰسٛ فٜلِسْ

¹غَطَ بَلْطٜ جٛوِ، حَنَانِيَ، مَوْطٛ مَوْٻٜ اَرْدِيٻٜ دِينَ، وَرِ کَيْسَارِيَ؞ اٜ مٛ وٛنْدِ اٜ وٛٻّٜ مَوْٻٜ اٜ غٛطّٛ لَوْيَاجٛ بِعٜتٜىٰطٛ تَرْتُلُسْ؞ ٻٜ نغُلِّي بُلُسْ يٜىٰسٛ فٜلِسْ غٛمْنَاجٛ؞ ²ندٜ طُمْ وَدِّ بُلُسْ، تَرْتُلُسْ فُطِّ مٜتُکِ دٛوْ مَاکٛ اٜ وِعَ،

‏«‏اَللَّه رٜىٰنٜ، لَامِيطٛ مَوْطٛ!‏ لَامُ مَاطَ وَدَّنِيمِنْ جٛنْدٜ جَمْ نَاع سٜطَّ، کَدِمَا اَ مٛعِّنِي کٛ حَانِ مٛعِّنٜىٰکِ، کٛ لٜيْدِ ندِعِ ٻٜيْدٛرْتٛو، اَنْ وَطِطُمْ؞ ³طُمْ فُو دَغَ تٛ مَاطَ مِنْ کٜٻِطُمْ، مِنْ نغٜتِّيمَ نَاع سٜطَّ؞ ⁴مِ يِطَا جُوتِنَنْکِمَ بٛلِيطٜ، اَمَّا اٜ مِ تٛرٛمَا تَا جَٻِي حٜتِّندَنَمِنْ سٜطَّ؞ ⁵مِنْ تَوِي نٜطّٛ اٛعٛ نٛ کَلُّطٛ نَاع سٜطَّ، غَدّٛووٛ حَوْرٜ حَکُّندٜ يَحُودَنْکٛعٜنْ ندٜرْ دُونِيَارُ فُو؞ اٛ مَوْطٛ ندٜرْ دِينَ نَجَرَنْکٛعٜنْ، وَاتٛ تٛکُّٻٜ يٜىٰسُ؞ ⁶حَا مَا اٛ فُطِّي لَلِّنْکِ وُرٛ شٜنِينغٛ، کَنْجُمْ وَطِ مِنْ نَنْغِمٛ؞ ‏[‏مِنْ نغِطِي وَطَنْکِمٛ کِيتَ اَمِنْ، ⁷اَمَّا لِسِيَ مَوْطٛ سٛوجِعٜنْ تٜىٰتِمٛ تٛ جُوطٜ اَمِنْ اٜ سٜمْبٜ، ⁸اٛ وِعِ وُلّٛيِيٻٜمٛ نغَرَ يٜىٰسٛ مَاطَ؞]‏ اَنْ اٜ حٛورٜ مَاطَ، پَمُمٛ، اَ نَنَيْ بٛطُّمْ کٛ مِنْ نغُلّٛرِيمٛ فُو؞»‏ ⁹يَحُودَنْکٛعٜنْ غَرْدُٻٜ اٜ مَاکٛ کَوْتِ مبِعِ کٛ اٛ وِعِ فُو طُمْ غٛونغَ؞

بٛلِيطٜ بُلُسْ يٜىٰسٛ فٜلِسْ

¹⁰سٜيْ فٜلِسْ غٛمْنَاجٛ حٛلِّ بُلُسْ مٜتَ، سٜيْ بُلُسْ وِعِمٛ،

‏«‏اٜ مِ اَنْدِ اَ وَطِي دُوٻِ طُطِّ اَ وَطَنَ يِمْٻٜ لٜيْدِ ندِعِ کِيتَ؞ نغَمْ مَاجُمْ اٜ مِ نَنَ بٜلْطُمْ وِعُکِمَ کٛ يِمْٻٜ ٻٜعٜ نغُلّٛرِييَمْ؞ ¹¹طُمْ ٻُرَايِ بَلْطٜ سَڤّٛ اٜ طِطِ کٛ نجَامِ اُرُشَلِيمَ نغَمْ مِ مَوْنِنَ جٛومِرَاوٛ؞ تَا طَٻِّتِي کٛو طُمٜ، اَ تَوَيْ نٛنْ طُمْ وٛنْتِندِرِ؞ ¹²وَلَا تَوُطٛيَمْ اٜ مِ يٜدّٛوتِرَ اٜ غٛطّٛ کٛو اٜ مِ اُمِّنَ حَکِّيلٛ يِمْٻٜ، کٛو ندٜرْ وُرٛ شٜنِينغٛ، کٛو ندٜرْ شُوطِ دٛعَارٜ، کٛو ندٜرْ غَرِيرِ؞ ¹³ٻٜ مبَاوَتَا تَبِّتِنَنْکِمَ کٛ ٻٜ نغُلّٛرِييَمْ جٛونِ؞ ¹⁴اٜ مِ اَنْدِ اٜ ٻٜ مبِعَ لَاوٛلْ يٜىٰسُ نغٛلْ تٛکُّمِ طُمْ فٜوْرٜ، اَمَّا اٜ مِ مَوْنِنَ اَللَّه مٛ مَامَعٜنْ اَمِنْ، اٜ مِ حٛولِي کٛ وِنْدَا ندٜرْ اَتَّوْرَ اٜ دٜفْتٜ اَنَّبٛعٜنْ فُو؞ ¹⁵طٛنْمَا اٜ مِ وَطِ کَمُّندٜ اَمْ تٛ اَللَّه، نٛ کَمْٻٜ مَا ٻٜ نغَطِرِ کَمُّندٜ مَٻّٜ دٛوْ مَاکٛ، وِعُکِ مَيْٻٜ اَادِلِعٜنْ اٜ کَلُّٻٜ فُو ٻٜ اُمّٛتٛ دَغَ مَيْدٜ؞ ¹⁶کَنْجُمْ وَطِ کٛو ندٜيٜ ݧَلْندٜ اٜ مِ يِطِ جٛوطٛدَاکِ اٜ ٻٜرْندٜ لَاٻُندٜ يٜىٰسٛ اَللَّه اٜ يٜىٰسٛ يِمْٻٜ؞

¹⁷‏«‏مِ وَطِي دُوٻِ سٜطَّ اٜ لٜيْطٜ يَاسِ؞ غَطَ طٛنْ مِ سٛعَّکٜ اُرُشَلِيمَ نغَمْ يَارَنْکِ ٻٜ نغَلَنَا دٛکَّلْ اٜ سَکَّنْکِ جٛومِرَاوٛ؞ ¹⁸اٜ مِ ندٜرْ وَطُکِ کٛ دِينَ اَمِنْ وِعِ مِ وَطَ نغَمْ مِ وَرْتَ لَاٻُطٛ يٜىٰسٛ جٛومِرَاوٛ، سٜيْ ٻٜ تَوِيَمْ ندٜرْ وُرٛ شٜنِينغٛ؞ مِ وٛنْدَا اٜ يِمْٻٜ طُطْٻٜ، مِ اُمِّنَايِ حَکِّيلٛ کٛو مٛيٜ؞ ¹⁹اَمَّا اٜ وٛودِ وٛٻّٜ يَحُودَنْکٛعٜنْ طٛنْ پِوٛيْٻٜ لٜيْدِ اَاسِيَ، کَمْٻٜ کَانِ نغَرَ نغُلّٛويَمْ يٜىٰسٛ مَاطَ، تٛ اٜ وٛودِ کٛ ٻٜ نغُلّٛرْتٛويَمْ؞ ²⁰کٛو بٛو ٻٜعٜ وٛنْٻٜ طٛعٛ سٜيْ ٻٜ مبِعَ فِي کَلُّطُمْ طُمْ ٻٜ تَوْرِيَمْ شَرٜلْ کٛ ندَرِيمِ يٜىٰسٛ کَوْتَلْ مَوْٻٜ، ²¹سٜيْ نِ حَالَ نغٛعٛتَ تَنْ کَ مبِيمِ ندٜ ندَرِيمِ يٜىٰسٛ مَٻّٜ، وِعُکِ، ‏‹‏اٛنْ نغَطَنَيَمْ کِيتَ حَنْدٜ نغَمْ مِ جَٻِي مَيْٻٜ اُمّٛتٛ دَغَ مَيْدٜ!‏›‏ »‏

²²ندٜ فٜلِسْ نَنِ نٛنْ اٛ پٜفْتِ حَالَ کَنْ، نغَمْ اٜ مٛ اَنْدِ لَاوٛلْ يٜىٰسُ بٛطُّمْ؞ اٛ وِعِ، ‏«‏سٜيْ تٛ لِسِيَ مَوْطٛ سٛوجِعٜنْ وَرِي، مِ تَپَنَعٛنْ کِيتَ؞»‏ ²³اٛ وِعِ اَرْدِيطٛ سٛوجِعٜنْ سُرَ بُلُسْ، اَمَّا تٛع اٛ حَطَمٛ وٜدِّتَاکِ، اٛ اَلَ حِغٛوٻٜ مَاکٛ مبَلَّمٛ؞

بُلُسْ يٜىٰسٛ فٜلِسْ اٜ دُرُوسِلَ

²⁴غَطَ بَلْطٜ سٜطَّ فٜلِسْ وَرْدِ اٜ دٜبّٛ مُوطُمْ، يَحُودَنْکٜىٰجٛ بِعٜتٜىٰطٛ دُرُوسِلَ؞ اٛ لِلِ بُلُسْ نٛدّٛيٜىٰ اٛ نَنَ کٛ اٛ وِعَتَ دٛوْ حٛولَاکِ يٜىٰسُ اَلْمَسِيحُ؞ ²⁵اَمَّا ندٜ بُلُسْ وَطِ کَ مٜتُکِ دٛوْ اَادِلَاکُ اٜ سُرُکِ حٛورٜ اٜ ݧَلْندٜ جَانغٛ، سٜيْ فٜلِسْ حُلِ، وِعِ، ‏«‏جٛونِ طُمْ حٜپِي؞ يَحُ!‏ تٛ مِ حٜٻِي شَرٜلْ، مِ نٛدّٜتٜ؞»‏ ²⁶اٜ مٛ کَمِّي بُلُسْ حٛکَّيْمٛ شٜىٰدٜ؞ کَنْجُمْ وَطِ کٛو ندٜيٜ اٜ مٛ نٛدَّمٛ نغَمْ ٻٜ مٜدَّ؞

²⁷غَطَ دُوٻِ طِطِ، فٜلِسْ جِڤِّي، فٛکِيُسْ فٜسْتُسْ وَرْتِ غٛمْنَاجٛ؞ ندٜ فٜلِسْ اٜ يِطِ وٜلْنَنْکِ يَحُودَنْکٛعٜنْ ٻٜرْطٜ، اٛ اَلِ بُلُسْ ندٜرْ سُودُ شُرَلْ؞

بُلُسْ تٛرَکٜ يَارٜىٰ يٜىٰسٛ کَيْسَرْ

¹بَلْطٜ تَتِ غَطَ فٜسْتُسْ وَرِي ندٜرْ لٜيْدِ ندِنْ نغَمْ فُطُّکِ کُوغَلْ لَامُ مُوطُمْ، اٛ اُمِّي دَغَ کَيْسَارِيَ، اٛ يَحِ اُرُشَلِيمَ؞ ²تٛنْ مَوْٻٜ اَرْدِيٻٜ دِينَ اٜ اَرْدِيٻٜ يَحُودَنْکٛعٜنْ نغُلِّي بُلُسْ تٛ مَاکٛ؞ ٻٜ تٛرِيمٛ ³اٛ وَدَّنَٻٜ بُلُسْ اُرُشَلِيمَ، نغَمْ ٻٜ نغَطِي دَبَرٜ نٛ ٻٜ مبَرْدَتَمٛ دٛوْ لَاوٛلْ؞ ⁴فٜسْتُسْ وِعِٻٜ، ‏«‏بُلُسْ اٜ تٛنْ مَٻِّي ندٜرْ سُودُ شُرَلْ غَرِيرِ کَيْسَارِيَ؞ مِنْ اٜ حٛورٜ اَمْ مِ سٛعّٛتٛ تٛنْ نَاع کٛ نٜىٰٻِ؞ ⁵نغَمْ مَاجُمْ، سٜيْ مَوْٻٜ مٛوطٛنْ نجَادَ اٜ اَمْ کَيْسَارِيَ، ٻٜ نغُلّٛومٛ تٛنْ تٛ اٜ وٛودِ غٛطُّمْ کَلُّطُمْ طُمْ اٛ وَطِ؞»‏

⁶فٜسْتُسْ جٛوطِي تٛ مَٻّٜ کٛ ٻَدِي بَلْطٜ جٛوٜىٰتَتِ کٛو سَڤّٛ؞ غَطَ مَاجُمْ اٛ سٛعِّي غَرِيرِ کَيْسَارِيَ؞ ندٜ وٜىٰتِ، اٛ جٛوطِي دٛوْ جٛوطٛرْغَلْ کِيتَ، اٛ وِعِ بُلُسْ وَدّٜىٰ؞ ⁷ندٜ بُلُسْ وَرِ، يَحُودَنْکٛعٜنْ پِوٛيْٻٜ اُرُشَلِيمَ ڤِلِيمٛ، ٻٜ نغُلّٛرِيمٛ غُلَّالِ طُطِّ کَلُّطِ، طِ ٻٜ مبَاوَايِ تَبِّتِنْکِ؞ ⁸اَمَّا بُلُسْ وِعِٻٜ، ‏«‏مِ وَطَايِ کٛ اَتَّوْرَ حَطِ، کٛو کٛ حَانَا دٛوْ وُرٛ شٜنِينغٛ، کٛو بٛو دٛوْ کَيْسَرْ لَامِيطٛ رٛومَنْکٛعٜنْ مَوْطٛ؞»‏

⁹اَمَّا فٜسْتُسْ اٜ يِطِ وٜلْنَنْکِ يَحُودَنْکٛعٜنْ ٻٜرْندٜ، نغَمْ نٛنْ اٛ پَمِ بُلُسْ، اٛ وِعِ، ‏«‏اَ جَٻَيْ نجَحَا اُرُشَلِيمَ نغَمْ مِ وَطَنْمَا کِيتَ تٛنْ دٛوْ کٛ طُمْ وُلّٛرْتٛمَا؟»‏

¹⁰بُلُسْ نٛوتِي، وِعِ، ‏«‏جٛونِ اٜ مِ دَرِي يٜىٰسٛ جٛوطٛرْغَلْ کِيتَ لٜيْ لَامُ کَيْسَرْ لَامِيطٛ رٛومَنْکٛعٜنْ مَوْطٛ تٛ حَانِ مِ وَطَنٜىٰ کِيتَ؞ مِ وَطَنَايِ يَحُودَنْکٛعٜنْ غٛطُّمْ کٛ وٛوطَا؞ اَنْ اٜ حٛورٜ مَاطَ اَ اَنْدِ؞ ¹¹تٛ مِ وَطِي غٛطُّمْ کٛ حٜوْتِ مِ وَرٜىٰ، مِ سَلَتَاکٛ وَرٜىٰکِ؞ اَمَّا تٛ کٛ ٻٜ نغُلّٛرِييَمْ نَاع طُمْ غٛونغَ، وَلَا بَاوَيْطٛ وَطُکِيَمْ اٜ جُوطٜ مَٻّٜ؞ اٜ مِ يِطِ مِ وَطَنٜىٰ کِيتَ يٜىٰسٛ کَيْسَرْ!‏»‏

¹²غَطَ فٜسْتُسْ مٜدِّي اٜ کٛکّٛوٻٜمٛ شَاوٛرِ، اٛ وِعِ بُلُسْ، ‏«‏ندٜ اَ تٛرَکٜ کِيتَ مَاطَ يَارٜىٰ تٛ کَيْسَرْ، طُمْ يَارٜتٜ تٛ مَاکٛ!‏»‏

بُلُسْ يٜىٰسٛ اَغَرِفَ لَامِيطٛ

¹³بَلْطٜ سٜطَّ غَطَ مَاجُمْ، غٛطّٛ لَامِيطٛ بِعٜتٜىٰطٛ اَغَرِفَ اٜ مَوْنِرَاوٛ مَاکٛ دٜبّٛ بِعٜتٜىٰطٛ بَنِسْ ٻٜ نغَرِ غَرِيرِ کَيْسَارِيَ نغَمْ ٻٜ نجَٻّٛو فٜسْتُسْ؞ ¹⁴ندٜ ٻٜ مبَالِ تٛنْ بَلْطٜ سٜطَّ، فٜسْتُسْ حٛکِّ لَامِيطٛ اٛنْ حَبَرُ بُلُسْ، اٛ وِعِ، ‏«‏اٜ وٛودِ غٛطّٛ نٜطّٛ مٛ فٜلِسْ لَامِيطٛ اَلِ طٛعٛ ندٜرْ سُودُ شُرَلْ؞ ¹⁵کٛ نجَامِ اُرُشَلِيمَ، مَوْٻٜ اَرْدِيٻٜ دِينَ اٜ مَوْٻٜ يَحُودَنْکٛعٜنْ نغُلِّيمٛ تٛ اَمْ، ٻٜ تٛرِييَمْ مِ تَپَنَمٛ کِيتَ وَرٜىٰکِ؞ ¹⁶نٛوتِيمِ، مبِيمِٻٜ، اٜنٜنْ رٛومَنْکٛعٜنْ اٜنْ نغَطَنْتَا غٛطّٛ کِيتَ تٛ غُلِّيطٛمٛ وَلَا طٛنْ، ندٜنْ نَاع اٛ حٛکَّامَ شَرٜلْ نغَمْ اٛ وُرْتِنَ حٛورٜ مَاکٛ دٛوْ کٛ طُمْ وُلّٛرِيمٛ؞ ¹⁷تٛو، ندٜ نغَرْدُمِ اٜ مَٻّٜ طٛعٛ، مِ وٛنَّايِ شَرٜلْ کٛو سٜطَّ؞ ندٜ فِنِ نجٛوطِيمِ دٛوْ جٛوطٛرْغَلْ کِيتَ، مبِيمِ نٜطّٛ اٛنْ وَدّٜىٰ؞ ¹⁸ندٜ غُلِّيٻٜمٛ ندَرِي، ٻٜ نغُلّٛرَاکِمٛ غٛطُّمْ کَلُّطُمْ نٛ کَمِّنٛومِ؞ ¹⁹سٜيْ غٜدِّ تَنْ ٻٜ نغَادِ اٜ مَاکٛ دٛوْ بٛلِيطٜ دِينَ مَٻّٜ، اٜ غٛطّٛ مَيْطٛ بِعٜتٜىٰطٛ يٜىٰسُ، مٛ بُلُسْ وِعَتَ اٜ فٛوفَ؞ ²⁰مِنْ بٛو، ندٜ مِ اَنْدَا نٛ نغَطَنَيْمِ حَالَ کَنْ، پَمُمٛومِ تٛ اٛ جَٻِي اٛ يَحَ اُرُشَلِيمَ اٛ وَطَنٜىٰ کِيتَ تٛنْ دٛوْ کٛ طُمْ وُلّٛرْتٛومٛ؞ ²¹اَمَّا ندٜ اٛ تٛرِييَمْ اٛ اَلٜىٰ ندٜرْ جُوطٜ سٛوجِعٜنْ نَا کَيْسَرْ وَطَنِيمٛ کِيتَ، مبِيمِ اٛ سُرٜىٰ تٛنْ نَا شَرٜلْ نغٜلْ لِلْدَيْمٛومِ تٛ کَيْسَرْ؞»‏

²²ندٜنْ اَغَرِفَ وِعِ فٜسْتُسْ، ‏«‏مِنْ اٜ حٛورٜ اَمْ، اٜ مِ يِطِ نَنْکِ کٛ نٜطّٛ اٛعٛ وِعَتَ؞»‏

فٜسْتُسْ وِعِمٛ، ‏«‏اَ نَنَيْ کٛ اٛ وِعَتَ جَانغٛ؞»‏

²³ندٜ فِنِ اَغَرِفَ اٜ بَنِسْ نغَرِ ندٜرْ لَامُ مَوْطُمْ، ٻٜ نَتِّ ندٜرْ سُودُ کِيتَ، کَمْٻٜ اٜ مَوْٻٜ سٛوجِعٜنْ اٜ اَرْدِيٻٜ غَرِيرِ ندِنْ فُو؞ ندٜنْ فٜسْتُسْ وِعِ بُلُسْ وَدّٜىٰ، سٜيْ اٛ وَدَّا؞ ²⁴فٜسْتُسْ وِعِ، ‏«‏اَنْ اَغَرِفَ لَامِيطٛ اٜ يِمْٻٜ حَوْرُتُٻٜ طٛعٛ!‏ اٛنْ نغِعِي نٜطّٛ مٛ يَحُودَنْکٛعٜنْ فُو نغُلِّي تٛ اَمْ ندٜرْ اُرُشَلِيمَ حَا اٜ طٛعٛ، اٜ ٻٜ مبِعَ اٜ سٜمْبٜ اٛ حَانَا اَلْدٜىٰکِ اٜ يٛنْکِ؞ ²⁵اَمَّا مِ تَوِي اٛ وَطَايِ غٛطُّمْ کٛ حَانِ اٛ وَرٜىٰ؞ اَمَّا ندٜ کَنْکٛ اٜ حٛورٜ مَاکٛ اٛ تٛرَکٜ کِيتَ مَاکٛ يَارٜىٰ تٛ کَيْسَرْ، مِ سُٻِي لِلْدُکِمٛ تٛ کَيْسَرْ لَامِيطٛ؞ ²⁶اَمَّا مِ وَلَا حَالَ ندَرِيکَ دٛوْ مَاکٛ کٛ حَانِ مِ وِنْدَنَ لَامِيطٛ اٛنْ؞ کَنْجُمْ وَطِ نغَدُّمٛومِ طٛعٛ يٜىٰسٛ مٛوطٛنْ اٛنْ فُو، کٛ ٻُرِ مَا يٜىٰسٛ مَاطَ اَنْ، اَغَرِفَ لَامِيطٛ، نغَمْ تٛ اٜنْ طَٻِّتِي کٛو طُمٜ مِ حٜٻَ کٛ مبِنْدُمِ؞ ²⁷نغَمْ اٜ يِيکِ اَمْ، طُمْ لَاٻَنَايَمْ مِ يَارَ نَنْغَاطٛ تٛ لَامِيطٛ مَوْطٛ، مِ حٜٻَايِ فِي جَمُمْ طُمْ اٛ نَنْغِرَا؞»‏

بُلُسْ وُرْتِنِ حٛورٜ مُوطُمْ يٜىٰسٛ اَغَرِفَ

¹ندٜنْ اَغَرِفَ وِعِ بُلُسْ، ‏«‏مِ اَلِيمَ وِعُ کٛ نغِطَّا وِعُکِ؞»‏ سٜيْ بُلُسْ پٜفْتِ جُنْغٛ فُطِّ وُرْتِنْکِ حٛورٜ مُوطُمْ، وِعِ،

²‏«‏اَللَّه رٜىٰنٜ، اَغَرِفَ لَامِيطٛ؞ مِ نَنِي بٜلْطُمْ ندٜ کٜٻُمِ شَرٜلْ مٜتُکِ نغَمْ مِ وُرْتِنَ حٛورٜ اَمْ يٜىٰسٛ مَاطَ حَنْدٜ دٛوْ کٛ يَحُودَنْکٛعٜنْ نغُلّٛرِييَمْ فُو، ³نغَمْ اَ اَنْدِ ندٛنُوجِ يَحُودَنْکٛعٜنْ اٜ غٜدِّ اَمِنْ فُو؞ نغَمْ مَاجُمْ اٜ مِ تٛرٛمَا، حٜتِّندَنَيَمْ ندٜرْ مُݧَلْ؞

⁴‏«‏يَحُودَنْکٛعٜنْ فُو اٜ اَنْدِ جٛنْدٜ اَمْ دَغَ کٛ مِ سُکَيٜلْ ڤَمَرٜلْ؞ اٜ ٻٜ اَنْدِ نٛ نجٛوطٛرِيمِ ندٜرْ لٜيْدِ اَمْ اٜ ندٜرْ اُرُشَلِيمَ فُو؞ ⁵کَمْٻٜ اٜ کٛعٜ مَٻّٜ، تٛ ٻٜ نجَٻِي وَطُکِ شٜيْدَ اَمْ، اٜ ٻٜ اَنْدِ دَغَ اَرَنْدٜ مِ غٛعٛتٛ ندٜرْ تٛکُّٻٜ لَاوٛلْ دِينَ اَمِنْ ٻُرْنغٛلْ سَطُکِ نغٛلْ فَارِسَنْکٛعٜنْ؞ ⁶جٛونِ، اٜ مِ دَرِي طٛعٛ يٜىٰسٛ مٛوطٛنْ اٜ مِ وَطَنٜىٰ کِيتَ نغَمْ کَمُّندٜ اَمْ دٛوْ حٜٻُکِ اَلْکَوَلْ نغَلْ اَللَّه وَطَنِ مَامَعٜنْ اَمِنْ؞ ⁷لٜپِّ اَمِنْ سَڤّٛ اٜ طِطِ فُو اٜ ندٜنْتِ ندٜرْ کَمُّندٜ حٜٻُکِ اَلْکَوَلْ نغَلْ، کَنْجُمْ وَطِ اٜ ٻٜ مَوْنِنَ اَللَّه جٜمَّ اٜ ݧَلَوْمَ؞ اَللَّه رٜىٰنٜ، نغَمْ اٜ مِ وٛودِ کَمُّندٜ ندٜنْ وَطِ يَحُودَنْکٛعٜنْ نغُلِّييَمْ!‏ ⁸نغَمْ طُمٜ کَمِّيطٛنْ اَللَّه وَاوَتَا اُمِّنْکِ مَيْٻٜ؟

⁹‏«‏مِنْ اٜ حٛورٜ اَمْ، ندٜنّٛ مِ کَمَّکٜ اٜ حَانِ مِ وَطَ کٛ مبَاوَيْمِ وَطُکِ نغَمْ مِ وٛنَّ اِنْدٜ يٜىٰسُ نَجَرَنْکٜىٰجٛ؞ ¹⁰کَنْجُمْ نغَطُمِ ندٜرْ اُرُشَلِيمَ؞ مَوْٻٜ اَرْدِيٻٜ دِينَ کٛکِّييَمْ لَامُ مِ مَٻَّ تٛکُّٻٜ يٜىٰسُ؞ مِ مَٻِّ طُطْٻٜ ندٜرْ سُودُ شُرَلْ؞ ندٜ ٻٜ تَپَنَا کِيتَ وَرٜىٰکِ، مِ جَٻِيطُمْ؞ ¹¹مِ تٛرِّيٻٜ ندٜ طُطُّمْ ندٜرْ شُوطِ دٛعَارٜ فُو؞ اٜ مِ وَطَٻٜ ٻٜ نغَݧَ تٛکُّکِ يٜىٰسُ؞ مِ حَلَّنِيٻٜ نَاع سٜطَّ حَا اٜ مِ طَٻِّتَٻٜ ندٜرْ غَرِيجٜ غٛطّٜ لٜيْطٜ، اٜ مِ تٛرَّٻٜ؞

بُلُسْ وِعِي نٛ تُوبِرِ

¹²‏«‏ندٜ مَوْٻٜ اَرْدِيٻٜ دِينَ کٛکِّيَمْ لَامُ نَنْغُکِ تٛکُّٻٜ يٜىٰسُ تٛ غَرِيرِ دِمَسْکُ سٜيْ ندِلُّمِ؞ ¹³اَللَّه رٜىٰنٜ، اٜ مِ دٛوْ لَاوٛلْ شَکَ ݧَلَوْمَ، سٜيْ نغِيمِ جَيْنغٛلْ پِوٛيِي دَغَ دٛوْ نغٛلْ ٻُرِي جَيْنغٛلْ نَانغٜ نغٛلْ يٜيْنِي دٛوْ اَمِنْ، مِنْ اٜ ٻٜ نجَادَيْمِ؞ ¹⁴غَطَ مِنْ فُو مِنْ نجَنِي اٜ لٜيْدِ، سٜيْ نَنْمِ حٛنٛنْدٜ اٜ وِعَيَمْ ندٜرْ اِبْرَانِيَنْکٛورٜ، ‏‹‏شَاوُلُ، شَاوُلُ، نغَمْ طُمٜ تٛرَّتَايَمْ؟ اَ تٛرَّ حٛورٜ مَاطَ اٜ مٜىٰرٜ ندٜ نغَݧُطَايَمْ؞›‏ ¹⁵نٛوتِيمِ مبِيمِ، ‏‹‏مَوْطٛ، اَنْ طُمْ مٛيٜ؟›‏ جٛومِرَاوٛ وِعِ، ‏‹‏مِنْ وٛنِ يٜىٰسُ مٛ تٛرَّتَا؞ ¹⁶اُمَّ دَرَ؞ مِ وَنْغَنٜ نغَمْ مِ سُٻُمَا نغَرْتَا کُوَنَيْطٛيَمْ، شٜيْدِنَا کٛ نغِيطَا دٛوْ اَمْ جٛونِ اٜ کٛ کٛلَّيْمَامِ يٜىٰسٛ طٛعٛ؞ ¹⁷مِ حِسْنٜتٜ دَغَ جُوطٜ يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ، ٻٜ لِلَيْمَامِ تٛ مَٻّٜ؞ ¹⁸اَ وُمْتِنَيْٻٜ، ٻٜ مبُرْتٛيٛ ندٜرْ ݧِوْرٜ، ٻٜ نغَرْتَ ندٜرْ جَيْنغٛلْ، ٻٜ مبُرْتٛو ندٜرْ لَامُ شٜيْطَنْ، ٻٜ شٛعّٛو تٛ اَللَّه، نغَمْ ٻٜ کٜٻَ يَافَنٜىٰکِ حَکّٜ، ٻٜ نَتَّ ندٜرْ يِمْٻٜ غَرْتُٻٜ شٜنِيٻٜ نغَمْ ٻٜ کٛولَکٜيَمْ؞›‏

بُلُسْ مٜتِ دٛوْ کُوغَلْ مُوطُمْ

¹⁹‏«‏اَللَّه رٜىٰنٜ، اَغَرِفَ لَامِيطٛ، کَنْجُمْ وَطِ مِ سَلَاکِ وَطُکِ کٛ نغِيمِ ندٜرْ وَحَيُ دَغَ دٛوْ؞ ²⁰اَرَنْدٜ مِ وَعَجِنَنِي يِمْٻٜ دِمَسْکُ، ندٜنْ اٜ يِمْٻٜ اُرُشَلِيمَ اٜ لٜيْدِ يَحُودِيَ فُو؞ غَطَ نٛنْ تٛکُّمِ ندٜرْ يِمْٻٜ نَاع يَحُودَنْکٛعٜنْ، مبِيمِٻٜ ٻٜ تُوبَ، ٻٜ نغَيْلِتٛيٛو تٛ اَللَّه، ٻٜ کُوَ کُوطٜ کٛلَّيْطٜ ٻٜ تُوبِي؞ ²¹کَنْجُمْ وَطِ يَحُودَنْکٛعٜنْ نَنْغِيَمْ ندٜرْ وُرٛ شٜنِينغٛ، ٻٜ ٻَدِي وَرْکِيَمْ؞ ²²اَمَّا اَللَّه اٜ وَلَّيَمْ حَا حَنْدٜ؞ نغَمْ نٛنْ اٜ مِ دَرِي طٛعٛ اٜ مِ مٜتَنَعٛنْ غٛونغَ يٜىٰسٛ مَوْٻٜ اٜ ڤَمَرْٻٜ فُو؞ مِ وِعَايِ کٛو طُمٜ سٜيْ کٛ مُوسَ اٜ اَنَّبٛعٜنْ حٛرِيٻٜ مبِعِ وَطَيْ، ²³وَاتٛ اَلْمَسِيحُ تٛرّٛتٛ، ندٜنْ اٛ وَرْتَ اَرْتُطٛ اُمَّاکِ دَغَ مَيْدٜ، نغَمْ اٛ وَدَّ جَيْنغٛلْ تٛ يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ؞»‏ ²⁴بُلُسْ اٜ ندٜرْ مٜتُکِ، سٜيْ فٜسْتُسْ پٜفْتِ حٛنٛنْدٜ، وِعِ، ‏«‏بُلُسْ، حٛورٜ مَاطَ وَيْلِتَکٜ!‏ طُوطُکِ اَنْدَلْ مَاطَ حَاݝِيمَ!‏»‏

²⁵اَمَّا بُلُسْ وِعِ، ‏«‏اَللَّه رٜىٰنٜ، فٜسْتُسْ، مِ حَاݝَاکِ؞ کٛ مبِيمِ طُمْ غٛونغَ شٜمْبِطْکَ؞ ²⁶اَغَرِفَ لَامِيطٛ اٜ اَنْدِ فِي طُعُمْ فُو؞ کَنْجُمْ وَطِ مِ حُلَايِ مٜتُکِ يٜىٰسٛ مَاکٛ؞ مِ تَبِّتِنِي اٜ مٛ اَنْدِ کٛو طُمٜ نٛ وٛنْتِندِرِ، نغَمْ طُمْ وَطَاکَ اٜ سُوطٜ؞ ²⁷اَغَرِفَ لَامِيطٛ!‏ اَ جَٻِي کٛ اَنَّبٛعٜنْ مبِنْدِ؟ اٜ مِ اَنْدِ اَ جَٻِي!‏»‏

²⁸اَغَرِفَ وِعِ بُلُسْ، ‏«‏ندٜرْ شَرٜلْ سٜطَّ نغٜعٜلْ اَ ݧُمَ اَ وَاوَيْ وَرْتِرْکِيَمْ تٛکُّطٛ يٜىٰسُ؟»‏

²⁹بُلُسْ وِعِمٛ، ‏«‏کٛو ندٜرْ شَرٜلْ سٜطَّ، کٛو نَاع ندٜرْ شَرٜلْ سٜطَّ، اٜ مِ تٛرٛو اَللَّه نغَمْ مَاطَ اَنْ اٜ نَنْٻٜيَمْ حَنْدٜ فُو نغَرْتٛنْ کٛ نغَرْتُمِ، اَمَّا نَاع اٜ طِعِ ٻٛغِّ نجَمْندِ؞»‏

³⁰ندٜنْ اَغَرِفَ اٜ فٜسْتُسْ اٜ بَنِسْ اٜ جٛوطٛدِيٻٜ اٜ مَٻّٜ فُو اُمِّي، ندِلِّ؞ ³¹ندٜ ٻٜ مبُرْتِي وُرٛ نغٛنْ، ٻٜ مبِعِ حَکُّندٜ مَٻّٜ، ‏«‏نٜطّٛ اٛعٛ وَطَايِ کٛ حٜوْتِ اٛ وَرٜىٰ کٛو اٛ مَٻّٜ ندٜرْ سُودُ شُرَلْ؞»‏ ³²سٜيْ اَغَرِفَ وِعِ فٜسْتُسْ، ‏«‏دَا نٜطّٛ اٛعٛ وِعَايِنٛ کِيتَ مَاکٛ يَارٜىٰ تٛ کَيْسَرْ، دَا اٛ يٛوفَامَ؞»‏

بُلُسْ نَنْغِ لَاوٛلْ غَرِيرِ رٛومَ

¹ندٜ طُمْ سُٻِ مِنْ نجَحَ لٜيْدِ اِتَالِيَ ندٜرْ کٛمِوَلْ، سٜيْ بُلُسْ اٜ وٛٻّٜ نَنْغَاٻٜ نغَطَا ندٜرْ جُنْغٛ مَوْطٛ سٛوجِعٜنْ بِعٜتٜىٰطٛ جُولِيٛسْ؞ کَنْکٛ وٛنِ اَرْدِيطٛ کَوْتَلْ سٛوجِعٜنْ بِعٜتٜىٰنغَلْ سٛوجِعٜنْ کَيْسَرْ؞ ²مِنْ نَتِّ کٛمِوَلْ پِوٛيْنغَلْ اَدِرَمِتِييُمْ جَحَيْنغَلْ غَرِيجٜ غٛنْطٜ فٛنْغٛ مَايٛ ندٜرْ لٜيْدِ اَاسِيَ؛ مِنْ ندِلِّ؞ اٜ مِنْ نغٛنْدِ اٜ اَرِسْتَرْکُسْ، نٜطّٛ لٜيْدِ مَکِدٛونِيَ پِوٛيْطٛ غَرِيرِ تَسَلٛونِکَ؞ ³ندٜ فِنِ مِنْ نجٛتِّي غَرِيرِ سِدٛنْ؞ جُولِيٛسْ نَنِ جُرُمْطُمْ بُلُسْ؛ اٛ جَٻِ بُلُسْ يَحَ تٛ حِغٛوٻٜ مَاکٛ نغَمْ ٻٜ مبَلَّمٛ؞ ⁴ندٜ مِنْ اُمِّي طٛنْ، مِنْ تٛکِّ فُونَ لٜيْدِ سَيِيفُرُسْ نغٛنْدِ شَکَ ندِيَمْ، نغَمْ حٜنْدُ سٜمْبِطِرَا تٛنْ؞ ⁵مِنْ کُلْتِ مَايٛ نغٛ حَادٜ کِلِيکِيَ اٜ بَمْفِيلِيَ، مِنْ نجٛتِّي غَرِيرِ مِرَ ندٜرْ لٜيْدِ لِيکِيَ؞ ⁶تٛنْ اَرْدِيطٛ سٛوجِعٜنْ اٛنْ حٜٻَنِمِنْ کٛمِوَلْ پِوٛيْنغَلْ اَلِجَندِيرِيَ اُمَّنِينغَلْ اِتَالِيَ، اٛ تِّنِمِنْغَلْ؞

⁷بَلْطٜ طُطّٜ کٛمِوَلْ اَمِنْ وَطِ اٜ يَارَ سٜىٰسٜ‑سٜىٰسٜ؞ اٜ بٛنٜ مِنْ نجٛتّٛرِي حَادٜ غَرِيرِ کِنِدُسْ؞ ندٜ حٜنْدُ حَطِمِنْ يَاکِ يٜىٰسٛ، سٜيْ مِنْ تٛکِّرِ فٛمْبِنَ حَا مِنْ نجٛتِّ کِرِتِ، لٜيْدِ نغٛنْدِ شَکَ ندِيَمْ؞ ندٜ مِنْ پَٻِّي حَادٜ سَلْمٛنِ مِنْ تٛکِّرِ فٛنْغٛ کِرِتِ تٛنْ تٛ حٜنْدُ سٜمْبِطِرَا؞ ⁸اٜ بٛنٜ مِنْ پَٻّٛرِي، مِنْ نجٛتِّي وِغٜىٰرٜ بِعٜتٜىٰندٜ جِڤّٛرْدٜ بٛنْدٜ حَادٜ غَرِيرِ لَاسِيَ؞

⁹مِنْ مبٛنِّ شَرٜلْ طُنغٜلْ حَا ݧَلْندٜ حُمْتٛ اِتُّکِ حَکّٜ پَٻِّي؞ ندٜرْ شَرٜلْ نغٜلْ يَادُ ندٜرْ کٛمِوَلْ اٜ سَطِ نَاع سٜطَّ؞ نغَمْ مَاجُمْ بُلُسْ حٛکِّ شَاوٛرِ، ¹⁰اٛ وِعِ، ‏«‏بَنْدِرَاٻٜ، مِ يِعِي کٛمِوَلْ نغَلْ اٜ کٛ وٛنِ ندٜرْ مَاغَلْ فُو وٛنّٛتٛ؞ نَاع کَنْجُمْ تَنْ، اَمَّا حَا اٜ اٜنٜنْ مَا اٜنْ کَلْکَيْ؞»‏ ¹¹اَمَّا مَوْطٛ سٛوجِعٜنْ ٻُرِي جَٻُکِ حَالَ جٛومُ کٛمِوَلْ نغَلْ اٜ ڤٛوطٛووٛ نغَلْ دٛوْ حَالَ بُلُسْ؞ ¹²جِڤّٛرْدٜ کٛمِيجٜ تٛ مِنْ نغٛنِ وٛوطَا ندٜرْ ندُنْغُ؞ نغَمْ نٛنْ طُطْٻٜ وٛنْٻٜ ندٜرْ کٛمِوَلْ نغَلْ ٻُرِي يِطُکِ مِنْ نجَحَ فِنِکِ نغَمْ مِنْ ندُومَ تٛنْ، تٛ طُمْ وَطٛتٛ؞ فِنِکِ وٛنِ جِڤّٛرْدٜ کٛمِيجٜ ندٜرْ لٜيْدِ کِرِتِ، دَارَيْندٜ لٛکِرّٜ حِرْنَا اٜ وٛيْلَ اٜ لٛکِرّٜ حِرْنَا اٜ فٛمْبِنَ؞

حٜنْدُ مَوْندُ دٛوْ مَايٛ

¹³ندٜ حٜنْدُ فٛمْبِنَ فُطِّ وِسُکِ سٜىٰسٜ‑سٜىٰسٜ، حُوٛوٻٜ ندٜرْ کٛمِوَلْ نغَلْ کَمِّي ٻٜ مبَاوَيْ يَاکِ تٛ ٻٜ نغِطِ؞ ٻٜ اِتّٛيِ نجَمْنغَ دَرْنِرْغَ کٛمِوَلْ نغَلْ، مِنْ تٛکِّ حَادٜ فٛنْغٛ لٜيْدِ کِرِتِ، مِنْ ندِلِّ؞ ¹⁴اَمَّا غَطَ مَاجُمْ سٜطَّ، حٜنْدُ مَوْندُ بِعٜتٜىٰندُ حٜنْدُ لٛکِرّٜ وٛيْلَ اٜ فُونَ اُمّٛيِي دَغَ لٜيْدِ کِرِتِ؞ ¹⁵حٜنْدُ ندُنْ تَٻِّي کٛمِوَلْ نغَلْ حَا مِنْ مبَاوَايِ تٛکُّکِ ندٜرْ مَيْرُ؞ نغَمْ نٛنْ، مِنْ اَلِندُ ندُ دِلِّدِ اٜ مَاغَلْ؞ ¹⁶ندٜ مِنْ تٛکِّ حَادٜ وٛنْدِ لٜيْدِ ڤَمَرْدِ نغٛنْدِ شَکَ ندِيَمْ بِعٜتٜىٰندِ کَوْدَ، ندِ اُسْتَنِمِنْ حٜنْدُ؞ اٜ بٛنٜ مِنْ ڤٛوطِرٛيِ کٛمِوَلْ ڤَمَرَلْ، ¹⁷مِنْ نَتِّنِنغَلْ ندٜرْ کٛمِوَلْ مَنْغَلْ؞ ندٜنْ ٻٜ نغَطِ ٻٛغِّ لٜيْ کٛمِوَلْ مَنْغَلْ نغَلْ، ٻٜ کَٻِّنغَلْ، نغَمْ تٛع نغَلْ فٜشّٛو؞ اٜ ٻٜ کُلَ تٛع نغَلْ نُفَ ندٜرْ نجَارٜىٰندِ ندٜرْ ندِيَمْ حَادٜ سِرْتِسْ؞ نغَمْ نٛنْ ٻٜ نجِڤِّنِ غُدٜ غَطَيْطٜ کٛمِوَلْ دِلَّ، ٻٜ اَلِ حٜنْدُ دِلِّدِ اٜ مَاغَلْ؞ ¹⁸حٜنْدُ شٜمْبِنْدُ ندُنْ وَطِ کَ فِيکِ؞ نغَمْ نٛنْ ندٜ فِنِ ٻٜ ڤُطِّ حُبِنْکِ کٛ وٛنِ ندٜرْ کٛمِوَلْ نغَلْ ندٜرْ ندِيَمْ؞ ¹⁹ندٜرْ ݧَلْندٜ تَتَوْرٜ، کَمْٻٜ اٜ کٛعٜ مَٻّٜ ٻٜ کُبِنِ کٛ ٻٜ کُوتِرْتَ ندٜرْ کٛمِوَلْ نغَلْ ندٜرْ ندِيَمْ؞ ²⁰بَلْطٜ طُطّٜ مِنْ نغِعَايِ نَانغٜ اٜ کٛودٜ، نغَمْ حٜنْدُ ندُنْ وَطِي کَ فَلْپِنْکِ مَايٛ نغٛنْ سٜمْبٜىٰ حَا مِنْ اِتِّ کَمُّندٜ حِسُکِ؞

²¹غَطَ ٻٜ نغَطِي بَلْطٜ ٻٜ ݧَامَايِ، بُلُسْ دَرِي يٜىٰسٛ مَٻّٜ، وِعِ، ‏«‏دَا اٛنْ نجَٻِينٛ حَالَ اَمْ، دَا اٛنْ اَلَايِ کِرِتِ، دَا تٛرَّ کَعَ اٜ دُلّٜرٜ ندٜعٜ حٜٻَايِعٜنْ؞ ²²اَمَّا جٛونِ اٜ مِ تٛرٛوعٛنْ، شٜمْبِطِنٜىٰ ٻٜرْطٜ مٛوطٛنْ، نغَمْ کٛو غٛعٛتٛ ندٜرْ مٛوطٛنْ حَلْکَتَا، سٜيْ کٛمِوَلْ نغَعَلْ تَنْ؞ ²³اَللَّه جٜيْطٛيَمْ مٛ مَوْنِنَيْمِ لِلٛيِي مَلَاعِکَاجٛ مُوطُمْ، اٛ وَرِي تٛ اَمْ جٜمَّ؞ ²⁴اٛ وِعِيَمْ، ‏‹‏بُلُسْ، تَاع حُلُ، اَ دَرٛتٛ يٜىٰسٛ کَيْسَرْ لَامِيطٛ رٛومَنْکٛعٜنْ مَوْطٛ؞ کَدِمَا، بَرْکَ مَاطَ اَللَّه حِسْنَيْ يِمْٻٜ وٛنْدُٻٜ اٜ مَاطَ ندٜرْ کٛمِوَلْ فُو؞›‏ ²⁵نغَمْ نٛنْ، شٜمْبِطِنٜىٰ ٻٜرْطٜ مٛوطٛنْ، نغَمْ اٜ مِ حٛولِي اَللَّه، کٛ اٛ وِعِيَمْ طُمْ وَرْتَيْ غٛونغَ؞ ²⁶اَمَّا دٛولٜ حٜنْدُ نٛ يَارَيْعٜنْ ندٜرْ وٛنْدِ لٜيْدِ نغٛنْدِ ندٜرْ ندِيَمْ؞»‏

²⁷ندٜرْ جٜمَّارٜ سَڤّٛ اٜ نَيَوْرٜ، ندٜ حٜنْدُ وَطِ کَ دِلُّدُکِ اٜ اَمِنْ ندٜرْ مَايٛ اَدِيرِيَ، شَکَ جٜمَّ حُوٛوٻٜ ندٜرْ کٛمِوَلْ نغَلْ اٜ کَمِّي مِنْ ٻَدَکٜ لٜيْدِ، ²⁸سٜيْ ٻٜ نغَطِ ٻٛغّٛلْ ڤٛوندِرْنغٛلْ لُغُّکِ ندِيَمْ ٻٜ نغِعِ لُغُّکِ ندِيَمْ طَمْ کٛيْطٜ 40؞ مِنْ ٻٜيْدِ يٜىٰسٛ سٜطَّ، ٻٜ ڤٛوندِ کَدِمَا، ٻٜ نغِعِ لُغُّکِ مَاجَمْ حَادٜ کٛيْطٜ 30؞ ²⁹ٻٜ کُلِ تٛ کٛمِوَلْ نغَلْ فِيَ حَيْرٜ، نغَمْ نٛنْ ٻٜ نغَطِ نجَمْکٛ نَيٛ ندَرْنِرْکٛ کٛمِوَلْ ندٜرْ ندِيَمْ طَمْ غَطَ مَاغَلْ، ٻٜ نغَطِ کَ وَطُکِ دٛعَارٜ غَرِ وٜىٰتَ؞ ³⁰ندٜنْ کُوٛوٻٜ ندٜرْ کٛمِوَلْ نغَلْ اٜ ٻٜ نغِطِ وُرْتَاکِنغَلْ ٻٜ ندَطَ، سٜيْ ٻٜ نجِڤِّنِ کٛمِوَلْ ڤَمَرَلْ ندٜرْ ندِيَمْ، ٻٜ نغَطِ بٛ ٻٜ نجِڤِّنَيْ نجَمْکٛ ندَرْنِرْکٛ دَغَ يٜىٰسٛ کٛمِوَلْ مَنْغَلْ نغَلْ؞ ³¹سٜيْ بُلُسْ وِعِ سٛوجِعٜنْ ٻٜنْ اٜ مَوْطٛ مَٻّٜ، ‏«‏تٛ يِمْٻٜ ٻٜعٜ ندَرَاکِ ندٜرْ کٛمِوَلْ نغَعَلْ اٛنْ کِسَتَا؞»‏ ³²سٜيْ سٛوجِعٜنْ ٻٜنْ تَپِ ٻٛغِّ جٛغِيطِ کٛمِوَلْ ڤَمَرَلْ نغَلْ، ٻٜ اَلِنغَلْ نغَلْ تٛکِّ ندِيَمْ؞

³³ندٜ غَرِ ٻَدِي وٜىٰتُکِ، بُلُسْ تٛرِيٻٜ ٻٜ فُو ٻٜ ݧَامَ ݧَمْندُ؞ اٛ وِعِ، ‏«‏حَنْدٜ وٛنِ ݧَلْندٜ سَڤّٛ اٜ نَيَوْرٜ اٛنْ ݧَامَايِ غٛطُّمْ نغَمْ وَنَّارٜ؞ ³⁴نغَمْ نٛنْ اٜ مِ تٛرٛوعٛنْ، ݧَامٜىٰ نغَمْ کِسٛنْ، نغَمْ کٛو لَاسٛلْ حٛورٜ غٛعٛتٛ ندٜرْ مٛوطٛنْ حَلْکَتَا؞»‏ ³⁵ندٜ اٛ وِعِ نٛنْ، اٛ حٛشِّ بُرٛودِ، اٛ يٜتِّ اَللَّه يٜىٰسٛ مَٻّٜ ٻٜ فُو، اٛ ݝَڤِّتِطُمْ اٛ فُطِّ ݧَامُکِ؞ ³⁶سٜيْ ٻٜرْطٜ مَٻّٜ شٜمْبِطِ، کَمْٻٜ مَا ٻٜ کٛشِّ ٻٜ ݧَامِ؞ ³⁷مِنٛنْ وٛنْٻٜ ندٜرْ کٛمِوَلْ نغَلْ، مِنْ نغَطِي يِمْٻٜ 276؞ ³⁸ندٜ ٻٜ ݧَامِ ٻٜ کَارِ، ٻٜ کٛشِّ بُحُوجِ اَلْکَمَارِ غٛنْطِ ندٜرْ کٛمِوَلْ نغَلْ، ٻٜ ڤَطِّطِ ندٜرْ ندِيَمْ نغَمْ ٻٜ اُسْتَنَنْغَلْ تٜدُّطُمْ؞

ڤُسُکِ کٛمِوَلْ نغَلْ

³⁹ندٜ وٜىٰتِ حُوٛوٻٜ ندٜرْ کٛمِوَلْ نغَلْ اَنْدِتَايِ لٜيْدِ ندِ ٻٜ نجٛتِّ؞ ٻٜ کَيْنِي وِغٜىٰرٜ غٛودُندٜ نجَارٜىٰندِ؞ ٻٜ نغِطِي يَارُکِ کٛمِوَلْ نغَلْ تٛنْ تٛ ٻٜ مبَاوِي؞ ⁴⁰سٜيْ ٻٜ تَپِ ٻٛغِّ نجَمْکٛ ندَرْنِرْکٛ کٛمِوَلْ نغَلْ، ٻٜ اَلِطِ ندٜرْ ندِيَمْ؞ طٛنْمَا ٻٜ ڤِتِّ ٻٛغِّ طِطُمْ حَٻِّرِ ڤٛوطِرْطُمْ کٛمِوَلْ نغَلْ؞ غَطَ مَاجُمْ، ٻٜ پٜفْتِ وُدٜرٜ وٛنْدٜ اٜ حٛورٜ کٛمِوَلْ نغَلْ، نغَمْ حٜنْدُ فَارَنغَلْ يٜىٰسٛ، يَارَنغَلْ دَاندٜ ندِيَمْ طَمْ؞ ⁴¹اَمَّا کٛمِوَلْ نغَلْ فِيِ مٛٻْدٜ نجَارٜىٰندِ ندٜرْ ندِيَمْ، حٛورٜ مَاغَلْ نُفِ، نغَلْ دَرِي طٛنْ؞ غٜىٰلٛوطِ ندِيَمْ نغَطِ کَ ڤِيُکِ غَطَ مَاغَلْ حَا نغَلْ ڤُسِ؞

⁴²سٛوجِعٜنْ وٛنْٻٜ ندٜرْ مَاغَلْ شِرْيِي دَبَرٜ نٛ ٻٜ مبَرْدَتَ شُرَاٻٜ وٛنْٻٜ ندٜرْ کٛمِوَلْ نغَلْ، نغَمْ تٛع غٛطّٛ ندٜرْ مَٻّٜ يِنٛو دَطَ؞ ⁴³اَمَّا ندٜ مَوْطٛ سٛوجِعٜنْ اٛنْ اٜ يِطِ حِسْنُکِ بُلُسْ، اٛ حَطِٻٜ وَطُکِ کٛ ٻٜ شِرْيِي، اٛ وِعِ بَوْٻٜ ندِيَمْ اَرْتَ نَتُّکِ ندٜرْ مَاجَمْ، مبُرْتٛو؞ ⁴⁴ندٜنْ حٛرِيٻٜ بٛو مبَطّٛو لٜطّٜ کٛمِوَلْ نغَلْ اٜ ڤٜشّٜ مَاغَلْ؞ نٛنْ مِنْ فُو مِنْ نغَطِ مِنْ مبُرْتِي جَمْ؞

بُلُسْ ندٜرْ لٜيْدِ مَلْتَ

¹ندٜ مِنْ کِسِ، مِنْ نَنِ اِنْدٜ لٜيْدِ نغٛنْدِ شَکَ ندِيَمْ ندِنْ اٜ وِعٜىٰ مَلْتَ؞ ²يِمْٻٜ لٜيْدِ ندِنْ نجَٻِّيمِنْ بٛطُّمْ؞ ٻٜ کُٻَّنِمِنْ حِيتٜ، نغَمْ ندِيَمْ اٜ وَطَ، ندٜنْ اٜ وٛودِ ڤٜىٰوٛلْ؞ ³بُلُسْ حَوْرِتِ لٜطّٜ اٜ مٛ وَطَطٜ ندٜرْ حِيتٜ نغٜنْ، سٜيْ غُلْطُمْ حِيتٜ نغٜنْ وُرْتِنِ مبٛودِ ندٜرْ مَاجٜ، ندِ فٜعِّمٛ اٜ جُنْغٛ؞ ⁴ندٜ يِمْٻٜ ٻٜنْ نغِعِ مبٛودِ ندِنْ اٜ جٛغِي جُنْغٛ بُلُسْ، ٻٜ مبِعِ حَکُّندٜ مَٻّٜ، ‏«‏غٛونغَ نٜطّٛ اٛعٛ اٛ غَطٛووٛ وَرْحٛورٜ؞ کٛو ندٜ اٛ حِسِي دَغَ مَايٛ، اَمَّا فُو اٜ نٛنْ اَلَّح مٜىٰطٜنْ دٜبّٛ تَپٛووٛ کِيتَ اَلْدَتَامٛ اٜ يٛنْکِ؞»‏ ⁵اَمَّا بُلُسْ فِطِّ مبٛودِ ندِنْ ندٜرْ حِيتٜ نغٜنْ، اٛ نَنَايِ نَوْطُمْ کٛو سٜطَّ؞ ⁶اٜ ٻٜ کَمِّي جُنْغٛ مَاکٛ نٛ ٻُوتَيْ، کٛو اٛ يَنَ طٛنْ اٜ طٛنْ اٛ مَايَ؞ اَمَّا ندٜ يَوْتِي ٻٜ نغِعِ وَلَا کٛ يَنِمٛ، ٻٜ نغَيْلِتِ ݧُمٛلْ مَٻّٜ، ٻٜ مبِعِ، ‏«‏اٛعٛ، اٛ اَلَّح فٜىٰرٜ!‏»‏

⁷حَادٜ وِغٜىٰرٜ ندٜنْ اٜ وٛودِ غٜسٜ مَوْطٛ لٜيْدِ ندِنْ، بِعٜتٜىٰطٛ فُبِلِيُسْ؞ اٛ جَٻِّيمِنْ بٛطُّمْ، اٛ جِڤِّنِمِنْ تٛ وُرٛ مَاکٛ بَلْطٜ تَتِ؞ ⁸ݧَاکٛ مَاکٛ اٜ فُکِّي فِيدَ اٜ جٛنْتٜ کَلُّطٜ اٜ دٛغّٛلْ رٜىٰدُ؞ بُلُسْ يَحِ تٛ مَاکٛ، يٛوِ جُوطٜ مُوطُمْ دٛوْ مَاکٛ، وَطَنِمٛ دٛعَارٜ، اٛ يَمْطِتِ؞ ⁹غَطَ مَاجُمْ، ݧَوْٻٜ حٛرِيٻٜ ندٜرْ لٜيْدِ ندِنْ نغَرِ تٛ بُلُسْ، اٛ يَمْطِتِنِٻٜ؞ ¹⁰ٻٜ مَوْنِنِمِنْ نَاع سٜطَّ؞ ندٜ مِنْ نغَرِ دِلُّکِ، ٻٜ کٛکِّمِنْ کٛ مِنْ نغِطِ فُو نغَمْ يَادُ؞

يَادُ بُلُسْ دَغَ مَلْتَ يَاکِ رٛومَ

¹¹غَطَ لٜبِّ تَتِ، مِنْ نَتِّ ندٜرْ کٛمِوَلْ پِوٛيْنغَلْ اَلِجَندِيرِيَ نٛدِّرْتٜىٰنغَلْ وٛرْٻٜ شِوْتَاٻٜ دُومُنغَلْ ندٜرْ لٜيْدِ مَلْتَ، مِنْ ندِلِّ؞ ¹²مِنْ نجٛتِّي غَرِيرِ بِعٜتٜىٰندِ سِرَکُسْ، مِنْ نغَطِ بَلْطٜ تَتِ تٛنْ؞ ¹³دَغَ طٛنْ مِنْ نَتِّ کٛمِوَلْ، مِنْ ڤِلِي حَا مِنْ نجٛتِّي غَرِيرِ رِغِيُمْ؞ ندٜ فِنِ حٜنْدُ فٛمْبِنَ فُطِّ وِسُکِ؞ ندٜرْ بَلْطٜ طِطِ مِنْ نغَرِ غَرِيرِ فُتِيٛولِ؞ ¹⁴مِنْ تَوِ تٛکُّٻٜ يٜىٰسُ تٛنْ؞ ٻٜ تٛرِيمِنْ مِنْ نجٛوطٛو تٛ مَٻّٜ يٛنْتٛورٜ غٛعٛ؞ ندٜنْ مِنْ نجٛتّٛيِي غَرِيرِ رٛومَ؞ ¹⁵ندٜ تٛکُّٻٜ يٜىٰسُ وٛنْٻٜ رٛومَ نَنِ حَبَرُ غَرٛلْ اَمِنْ، ٻٜ نجَحِ لُومٛ اَافِيُسْ اٜ وٛنْدٜ وِغٜىٰرٜ بِعٜتٜىٰندٜ غُرٜ حٛٻّٜ تَتِ نغَمْ جَٻَّاکِمِنْ؞ ندٜ بُلُسْ يِعِٻٜ، اٛ يٜتِّ اَللَّه، ٻٜرْندٜ مَاکٛ سٜمْبِطِ؞

وَعَجُ بُلُسْ ندٜرْ غَرِيرِ رٛومَ

¹⁶ندٜ مِنْ نغَرِ غَرِيرِ رٛومَ، طُمْ اَلِ بُلُسْ جِڤِّي ندٜرْ وُرٛ نغٛ طُمْ يٛٻَتَ طُمْ وَالَ، کَنْکٛ اٜ سٛوجِيجٛ دٜىٰنَيْطٛمٛ؞

¹⁷بَلْطٜ تَتِ غَطَ مِنْ نغَرِي، بُلُسْ نٛدِّ مَوْٻٜ يَحُودَنْکٛعٜنْ؞ ندٜ ٻٜ کَوْرِتِ، اٛ وِعِٻٜ، ‏«‏بَنْدِرَاٻٜ!‏ کٛو ندٜ مِ وَطَنَايِ يِمْٻٜ مٜىٰطٜنْ کٛ حَانَايِ، مِ وٛنَّايِ ندٛنُوجِ مَامَعٜنْ مٜىٰطٜنْ، اَمَّا مِ نَنْغَامَ اٜ اُرُشَلِيمَ، مِ وَطَامَ ندٜرْ جُوطٜ رٛومَنْکٛعٜنْ؞ ¹⁸ٻٜ پَمِيَمْ کٛ نغَطُمِ؞ ٻٜ تَوِي مِ وَطَايِ غٛطُّمْ کٛ حٜوْتِ مِ وَرٜىٰ، نغَمْ نٛنْ ٻٜ نغِطِ يٛوفُکِيَمْ؞ ¹⁹اَمَّا ندٜ يَحُودَنْکٛعٜنْ غٛنْٻٜ طٛنْ نجَٻَايِ مِ يٛوفٜىٰ، طُمْ نَنْغِ مِ تٛرٛو کِيتَ اَمْ وَدّٜىٰ تٛ کَيْسَرْ، کٛو ندٜ مِ وَلَا کٛ نغُلّٛرْتٛومِ لٜݧٛلْ اَمْ؞ ²⁰کَنْجُمْ وَطِ نٛدُّمِعٛنْ نغَمْ مِ يِعَعٛنْ، مِ مٜدَّ اٜ مٛوطٛنْ؞ نغَمْ کَمُّندٜ اِسْرَاعِيلَنْکٛعٜنْ کَٻِّرَامِ ٻٛغِّ نجَمْندِ طِعِ؞»‏

²¹يَحُودَنْکٛعٜنْ ٻٜنْ مبِعِمٛ، ‏«‏مِنْ کٜٻَايِ طٜرٜوٛلْ دَغَ لٜيْدِ يَحُودِيَ کٛلَّيْنغٛلْمِنْ حَبَرُ مَاطَ؞ کَدِمَا بٛو وَلَا کٛو غٛعٛتٛ ندٜرْ بَنْدِرَاٻٜ اَمِنْ غَرْطٛ وِعِمِنْ حَبَرُ طُمْ وٛوطَا دٛوْ مَاطَ؞ ²²اَمَّا اٜ مِنْ نغِطِ مبِعَامِنْ ݧُمٛ مَاطَ، نغَمْ اٜ مِنْ اَنْدِ يِمْٻٜ کٛو تٛيٜ اٜ نغٜدَّ دِينَ کَ تٛکُّطَا؞»‏

²³ٻٜ ندٜسِ ݧَلْندٜ ندٜ ٻٜ شٛعّٛيْتٛو تٛ مَاکٛ؞ ندٜ ݧَلْندٜ ندٜنْ وَرِ، يِمْٻٜ طُطْٻٜ نغَرِ، کَوْرِتِ تٛ بُلُسْ جِڤِّي؞ اِلَا سُبَکَ حَا اَلَاسَرَ اٜ مٛ وَعَجِنَنَٻٜ، اٜ مٛ حٛکَّٻٜ حَبَرُ لَامُ اَللَّه؞ اٜ مٛ حٛلَّٻٜ حَبَرُ يٜىٰسُ ندٜرْ اَتَّوْرَ اٜ ندٜرْ دٜفْتٜ اَنَّبٛعٜنْ نغَمْ اٛ فٛوطَٻٜ ٻٜ تٛکَّ يٜىٰسُ؞ ²⁴وٛٻّٜ ندٜرْ مَٻّٜ نجَٻِ کٛ اٛ وِعِ، وٛٻّٜ بٛو نجَٻَايِ؞ ²⁵نغَمْ نٛنْ ٻٜ نغٜدّٛوتِرِ حَکُّندٜ مَٻّٜ، ٻٜ ڤُطِّ سَنْکِتَاکِ؞ اَمَّا بُلُسْ وِعِٻٜ، ‏«‏رُوحُ اَللَّه وِعِي غٛونغَ ندٜ مٜتَنِ مَامَعٜنْ مٛوطٛنْ دَغَ حٛنْدُکٛ اَنَّبِ اِشَايَ، ²⁶اٛ وِعِ،

‏‹‏يَحُ تٛ يِمْٻٜ ٻٜعٜ مبِعَاٻٜ:‏

کٛو ندٜيٜ اٛنْ نَنَيْ، اَمَّا اٛنْ ڤَامَتَا؞

اٛنْ ندَارَيْ، اَمَّا اٛنْ نغِعَتَا؞

²⁷نغَمْ ٻٜرْطٜ لٜݧٛلْ نغٛعٛلْ نجٛورِي؞

ٻٜ شُکِّي نٛڤِّ مَٻّٜ،

ٻٜ مَٻِّي غِتٜ مَٻّٜ،

نغَمْ تٛع ٻٜ نغِعَ اٜ غِتٜ مَٻّٜ،

تٛع نٛڤِّ مَٻّٜ نَنَ،

تٛع ٻٜرْطٜ مَٻّٜ ڤَامَ،

حَا ٻٜ نغَرْتَ تٛ اَمْ،

مِ يَمْطِتِنَٻٜ؞›‏ »‏

²⁸بُلُسْ ٻٜيْدِ مٜتُکِ، وِعِ، ‏«‏سٜيْ ڤَامٛنْ، اَللَّه لِلْدِي کِسْندَمْ مُوطُمْ تٛ يِمْٻٜ نَاع يَحُودَنْکٛعٜنْ؞ کَمْٻٜ بٛو ٻٜ نجَٻَيْطُمْ!‏»‏ ²⁹‏[‏ندٜ بُلُسْ وِعِ نٛنْ، يَحُودَنْکٛعٜنْ مبُرْتِي اٜ نغٜدّٛوتِرَ حَکُّندٜ مَٻّٜ نَاع سٜطَّ؞]‏

³⁰بُلُسْ بٛو جٛوطِي دُوٻِ طِطِ ندٜرْ وُرٛ نغٛ طُمْ يٛٻَتَ طُمْ وَالَ؞ اٛ يٛٻَنِ حٛورٜ مَاکٛ؞ اٜ مٛ جَٻّٛو کٛو مٛيٜ غَرْطٛ تٛ مَاکٛ، ³¹اٜ مٛ وَعَجِنَنَٻٜ حَبَرُ لَامُ اَللَّه، اٜ مٛ اٜکِّتِنَٻٜ حَبَرُ يٜىٰسُ اَلْمَسِيحُ جٛومِرَاوٛ اٜ سٜمْبٜ، وَلَا کَطُطٛمٛ؞