2 تِمٛوتِ

طٜرٜوٛلْ طِطَٻٛلْ نغٛلْ بُلُسْ وِنْدَنِ

تِمٛوتِ

حَبَرُ دٛوْ طٜرٜوٛلْ نغٛعٛلْ

بُلُسْ لِلَاطٛ يٜىٰسُ اَلْمَسِيحُ وِنْدِ طٜرٜوٛلْ نغٛعٛلْ دُوٻِ 76 کٛو 86 غَطَ دَݧْنغٛلْ يٜىٰسُ؞ طٜرٜوٛلْ نغٛعٛلْ اٜ سَاوِ شَاوٛرِ طُمْ بُلُسْ حٛکِّ تِمٛوتِ نغَمْ اٛ سُکَ مٛ اٛ حُودَتَ؞ کٛ اٛ ٻُرِ مٜتُکِ وٛنِ دٛوْ مُݧَلْ؞ اٛ حٛکِّي تِمٛوتِ شَاوٛرِ اٛ سٜمْبِطِنِيمٛ اٛ وَطَ کَ حٛکُّکِ حَبَرُ يٜىٰسُ اٜ غٛونغَ؞ ندٜنْ اٛ حُوَ کُوغَلْ مَاکٛ نغَلْ اٜکِّتِنْکِ اٜ وَعَجِنْکِ کٛو ندٜرْ تٛرَّ کٛو ندٜرْ وَݧٜىٰکِ؞

بُلُسْ وَغِّنِي تِمٛوتِ دٛوْ نَتِّنْکِ حٛورٜ مَاکٛ ندٜرْ غٜدِّ مٜىٰرٜىٰجِ طِ نَفَنْتَامٛ نغَمْ طِ مبٛنَّيْ يِمْٻٜ نَنٛوٻٜطِ؞

ندٜرْ طُعُمْ فُو، بُلُسْ سِفْتٛرَنِي تِمٛوتِ اٜکِّتٛو اِرِ جٛنْدٜ مَاکٛ، اٜ کٛ اٛ يِطِ وَطُکِ، اٜ حٛولَارٜ مَاکٛ، اٜ نٛ اٛ يِطِرِ يِمْٻٜ، اٜ نٛ اٛ مُݧِرِ ندٜرْ تٛرَّ کَ اٛ نَتِّ ندٜ يِمْٻٜ نغَݧِمٛ؞

کٛوْنٛلْ بُلُسْ

¹مِنْ بُلُسْ مٛ اَللَّه سُٻِ مِ وَرْتَ لِلَاطٛ يٜىٰسُ اَلْمَسِيحُ وِنْدِ طٜرٜوٛلْ نغٛعٛلْ؞ اَللَّه سُٻِييَمْ نغَمْ مِ حٛکَّ حَبَرُ يٛنْکِ کِ طُمْ وَطِ اَلْکَوَلْ حٜٻُکِ ندٜرْ تٛکُّکِ يٜىٰسُ؞

²اٜ مِ وِنْدَنْمَا طٜرٜوٛلْ نغٛعٛلْ تِمٛوتِ، ٻِطّٛ اَمْ ندٜرْ تٛکُّکِ يٜىٰسُ، مٛ نغِطُمِ؞

اَللَّه ݧَاکٛ مٜىٰطٜنْ اٜ يٜىٰسُ اَلْمَسِيحُ جٛومِرَاوٛ مٜىٰطٜنْ بَرْکِطِنْمَا، يُرْمِنَنْمَا حٛکُّمَا جَمْ؞

يٜتّٛورٜ اٜ سٜمْبِطِنْکِ

³اٜ مِ يٜتَّ اَللَّه مٛ کُوَنَيْمِ اٜ ٻٜرْندٜ لَمْندٜ، نٛ مَامَعٜنْ اَمْ نغَطِ؞ اٜ مِ يٜتَّمٛ کٛو نغٜلٜ شَرٜلْ نغٜلْ نغَطَنَيْمَامِ دٛعَارٜ جٜمَّ اٜ ݧَلَوْمَ؞ ⁴تٛ مِ سِفْتٛرِي غٛنْطِ طِ ندُفُطَا، سٜيْ مِ نَنَ مِ حَاٻِي يِيکِمَ نغَمْ مِ نَنَ بٜلْطُمْ طُطُّمْ؞ ⁵مِ سِفْتٛرِي نٛ کٛولٛرِطَا يٜىٰسُ اٜ ٻٜرْندٜ غٛعٛ، نٛنْ نٛ مَامَ مَاطَ لٛويِسْ اٜ مَدُوجٛ مَاطَ يُنِسْ کٛولٛرِيمٛ ٻٜرْندٜ غٛعٛ، ندٜنْ جٛونِ بٛو مِ تَبِّتِنِي اَنْ مَا اَ حٛولَکٜمٛ نٛنْ؞ ⁶نغَمْ نٛنْ اٜ مِ تٛرٛمَا، ٻٜيْدُ حُوتِرْکِ دٛکَّلْ نغَلْ اَللَّه حٛکُّمَا شَرٜلْ کٛ نجٛوَنْمَامِ جُوطٜ؞ ⁷نغَمْ جٛومِرَاوٛ حٛکَّايِعٜنْ نغِکُّ کُلٛلْ، اَمَّا اٛ حٛکِّيعٜنْ نغِکُّ يِدّٜ اٜ بَوْطٜ اٜ سُرُکِ کٛعٜ مٜىٰطٜنْ؞

⁸نغَمْ مَاجُمْ تَاع سٜمْتُ حٛکُّکِ يِمْٻٜ حَبَرُ جٛومِرَاوٛ مٜىٰطٜنْ، تَاع بٛو سٜمْتَمْ مِنْ مَٻَّاطٛ نغَمْ تٛکُّکِ يٜىٰسُ؞ اَمَّا اٜنْ نجَرْدُ تٛرَّ حٛکُّکِ حَبَرُ يٜىٰسُ ندٜرْ بَوْطٜ اَللَّه؞ ⁹کَنْکٛ حِسْنِعٜنْ، نٛدِّعٜنْ نغَمْ نغَرْتٜنْ يِمْٻٜ مَاکٛ کُوٜنْ کُوغَلْ مَاکٛ؞ اٛ وَطُ نٛنْ نَاع نغَمْ غٛطُّمْ بٛطُّمْ طُمْ نغَطّٜنْ، اَمَّا نٛنْ اٛ يِطِرِ فِي طُمْ وَطٛرٛو اٜ يِدّٜ ندٜ اٛ حٛلِّعٜنْ ندٜرْ يٜىٰسُ اَلْمَسِيحُ کٛ دُونِيَارُ تَغٜىٰ؞ ¹⁰جٛونِ بٛو اٛ وَنْغِنَنِيعٜنْ يِدّٜ ندٜنْ بَرْکَ کِسْنٛووٛ مٜىٰطٜنْ يٜىٰسُ اَلْمَسِيحُ، غَرْتِرْطٛ سٜمْبٜ مَيْدٜ مٜىٰرٜ؞ کَنْکٛ حٛلِّعٜنْ لَاوٛلْ نغٛلْ تٛکّٜتٜنْ کِسٜنْ کٜٻٜنْ يٛنْکِ کِ رٜعَتَا بَرْکَ حَبَرُ بٜلْطُمْ؞

¹¹نغَمْ حٛکُّکِ حَبَرُ بٜلْطُمْ طُعُمْ، اَللَّه وَرْتِرِيَمْ غَعَجِنٛووٛ اٜ لِلَاطٛ اٜ اٜکِّتِنٛووٛ؞ ¹²کَنْجُمْ وَطِ اٜ مِ يَرَ بٛنٜ طُعُمْ نِينِ، اَمَّا فُو اٜ نٛنْ مِ سٜمْتَايِ نغَمْ اٜ مِ اَنْدِ مٛ کٛولِيمِ؞ مِ تَبِّتِنِي اٛ وَاوَيْ رٜىٰنُکِ کٛ اٛ حٛکِّيَمْ يَاکِ ݧَلْندٜ جَانغٛ؞ ¹³کٛ اٜکِّتِنْمَامِ طُمْ غٛونغَ؞ جٛغَطُمْ بٛطُّمْ، تٛکُّطُمْ اٜ يِدّٜ ندٜ کٜٻْطٜنْ ندٜرْ حٛولَاکِ يٜىٰسُ اَلْمَسِيحُ؞ ¹⁴جٛغَ حَبَرُ غٛونغَ بٛطُّمْ طُمْ رُوحُ اَللَّه غٛنْطُمْ ندٜرْ مٜىٰطٜنْ حٛکُّمَا؞

¹⁵اَ اَنْدِ کٛو مٛيٜ غٛنْطٛ ندٜرْ لٜيْطٜ اَاسِيَ وَݧِييَمْ، ندٜرْ مَٻّٜ حَا اٜ فَيْجٜلُسْ اٜ حَمٛوجٜنِسْ؞ ¹⁶جٛومِرَاوٛ يُرْمِنَنَ وُرٛ اٛنٜسِفٛرُسْ نغَمْ ندٜ طُطُّمْ اٜ مٛ سٜمْبِطِنَيَمْ، اٛ سٜمْتَايِيَمْ ندٜ طُمْ مَٻِّيَمْ ندٜرْ سُودُ شُرَلْ؞ ¹⁷کٛ اٛ يٛتِّي غَرِيرِ رٛومَ، اٛ طَٻِّتِييَمْ نَاع سٜطَّ نَاکِ اٛ حٜٻْتِيَمْ؞ ¹⁸جٛومِرَاوٛ مٜىٰطٜنْ يُرْمِنَنَمٛ ݧَلْندٜ جَانغٛ؞ اَ اَنْدِ بٛطُّمْ نٛ اٛ وَلِّرِيَمْ ندٜرْ غَرِيرِ اَافِسَ؞

سٛوجِيجٛ يٜىٰسُ اَلْمَسِيحُ بٛطّٛ

¹اَنْ، ٻِطّٛ اَمْ تِمٛوتِ، سٜمْبُطُ ندٜرْ بَرْکَ غٛنْطُمْ ندٜرْ سُمْڤٛوتِرْکِ اٜ يٜىٰسُ اَلْمَسِيحُ؞ ²کٛ نَنْطَا مِ اٜکِّتِنِي يٜىٰسٛ شٜيْدُعٜنْ طُطْٻٜ، اٜکِّتِنْطُمْ يِمْٻٜ ٻٜ غٛونغَ، بَاوَيْٻٜ اٜکِّتِنَطُمْ وٛٻّٜ؞

³مُݧُ ندٜرْ تٛرَّ کَ نجَرٜتٜنْ بٛ سٛوجِيجٛ يٜىٰسُ اَلْمَسِيحُ بٛطّٛ؞ ⁴وَلَا سٛوجِيجٛ نَتِّنَيْطٛ حٛورٜ مُوطُمْ ندٜرْ وٛنْغَلْ کُوغَلْ فٜىٰرٜ، نغَمْ کٛ اٛ يِطِ وٛنِ اٛ وٜلْنَنَ مَوْطٛ مَاکٛ ٻٜرْندٜ؞ ⁵وَلَا کٜٻٛووٛ دٛکَّلْ ندٜرْ فِجٛ تٛ اٛ تٛکَّايِ دٛوکَ فِجٛ نغٛنْ؞ ⁶دٜمٛووٛ فِجٛ وَلَا، کَنْکٛ حَانِ اَرْتَ حٜٻُکِ کٛ رٜمَا؞ ⁷ݧُمُ دٛوْ کٛ مبِيمِ، نغَمْ جٛومِرَاوٛ حٛکّٜتٜ فَامُ ندٜرْ کٛو طُمٜ؞

⁸سِفْتٛرْ يٜىٰسُ اَلْمَسِيحُ؞ اٛ اُمَّکٜ دَغَ مَيْدٜ، اٛ وَرِي دَغَ لٜݧٛلْ دَوْدَ، نٛنْ نٛ نغَعَجِنِرْمِ؞ ⁹کَنْجُمْ وَطِ تٛرّٛتٛومِ جٛونِ اٜ مِ حَٻِّرَا ٻٛغِّ نجَمْندِ بٛ غُجّٛ شَلٛرْطٛ، اَمَّا وٛلْدٜ اَللَّه حَٻَّاکِ؞ ¹⁰نغَمْ مَاجُمْ مِ مُݧِي ندٜرْ کٛو طُمٜ نغَمْ يِمْٻٜ ٻٜ اَللَّه سُٻِ، نغَمْ کَمْٻٜ مَا ٻٜ کٜٻَ کِسْندَمْ تٛ يٜىٰسُ اَلْمَسِيحُ، حَوْتِ اٜ مَنْغُ تَبِّتَيْطُمْ؞ ¹¹حَالَ کَعَ طُمْ غٛونغَ:‏

‏«‏تٛ اٜنْ مَيْدِي اٜ يٜىٰسُ،

اٜنْ نجٛوطٛدٛتٛ اٜ مَاکٛ؞

¹²تٛ اٜنْ مُݧِي،

اٜنْ لَامٛدٛتٛ اٜ مَاکٛ؞

تٛ اٜنْ نغَݧِيمٛ،

کَنْکٛ مَا اٛ وَݧَيْعٜنْ؞

¹³تٛ اٜنْ نغَطَنْتَا يٜىٰسُ کٛ حَانِ،

کَنْکٛ اٛ وَطَيْ کَ وَطُکِ کٛ حَانِ،

نغَمْ اٛ وَاوَتَا وَݧُکِ حٛورٜ مَاکٛ؞»‏

کُوٛووٛ مٛ اَللَّه جَٻِ

¹⁴وَطُ کَ سِفْتٛرَنْکِٻٜ فُو فِي طُعُمْ، وَغِّنْٻٜ يٜىٰسٛ اَللَّه ٻٜ نغٛطِّتٛو يٜدّٛوتِرْکِ دٛوْ بٛلِيطٜ، نغَمْ وَلَا کٛ طُمْ نَفِ، سٜيْ نِ طُمْ وٛنَّ نَنٛوٻٜ؞ ¹⁵وَطُ کٛ مبَاوَتَا وَطُکِ نغَمْ نغَرْتِرَا حٛورٜ مَاطَ کٛ جَٻٜتٜىٰ تٛ اَللَّه، کُوٛووٛ مٛ نَنَتَا شٜمْتُطُمْ، اٜکِّتِنٛووٛ وٛلْدٜ غٛونغَ نٛ ندٜ وٛنْتِندِرِ؞ ¹⁶وٛطِّتَ حَالَ مٜىٰرٜحَ کَ وَلَا کُلٛلْ اَللَّه، نغَمْ کَ وَطَيْ يِمْٻٜ ٻٜيْدَ وٛطِّتَاکِ اَللَّه؞ ¹⁷حَالَ مَٻّٜ سَنْکِتٛتٛ نٛ ڤُتّٜ ݧَامِرْتَ ٻَنْدُ؞ ندٜرْ مَٻّٜ اٜ وٛودِ حِمٜىٰنِيُسْ اٜ فِلٜتُسْ، ¹⁸اَلُٻٜ تٛکُّکِ غٛونغَ اٜ مبِعَ اُمَّاکِ مَيْٻٜ يَادَکٜ پَٻَّکٜ؞ اٜ ٻٜ مَجِّنَ وٛٻّٜ کٛولِيٻٜ يٜىٰسُ؞ ¹⁹فُو اٜ نٛنْ، کٛ اَللَّه تِغِّ اٜ طُمْ دَرِي بٛطُّمْ؞ دٛوْ مَاجُمْ طُمْ وِنْدِ وِيکِ، ‏«‏جٛومِرَاوٛ مٜىٰطٜنْ اٜ اَنْدِ ٻٜ مُوطُمْ،»‏ ندٜنْ، ‏«‏کٛو مٛيٜ بِعٛووٛ اٜ تٛکَّ جٛومِرَاوٛ مٜىٰطٜنْ دٛولٜ اٛ اَلَ وَطُکِ کٛ وٛوطَا؞»‏

²⁰ندٜرْ وُرٛ مَنْغٛ نَاع تُمُّطٜ طٜ طُمْ وَطِرِ جِينَارِ اٜ اَجُرْفَارِ تَنْ نغٛنِ ندٜرْ، اَمَّا اٜ وٛودِ تُمُّطٜ غَطِرَاطٜ لٜطّٜ اٜ لٛوڤٜ کَدِنْ؞ غٛطّٜ اٜ کُوتِرٜىٰ نغَمْ حُمْتٛ، ندٜنْ غٛطّٜ نغَمْ کٛو ندٜيٜ؞ ²¹نٛنْ مَا تٛ نٜطّٛ اَلِي وَطُکِ کٛ وٛوطَا، اٛ وَرْتَيْ کُوتِرْتٜىٰطٛ نغَمْ فِي بٛطُّمْ؞ جٜيْطٛمٛ سُٻَيْمٛ وَرْتِرَمٛ نٜطّٛ مٛ اٛ حُوتِرْتَ، شِرْيِيطٛ نغَمْ حُوَ کٛو اِرِ نغَلٜ کُوغَلْ بٛنْغَلْ؞ ²²دٛغُّ سُونٛ نغٛ وٛوطَا نغٛ سُکَاکُ، وَطُ کٛ مبَاوَتَا وَطُکِ تٛکَّا اَادِلَاکُ، اٜ حٛولَاکِ يٜىٰسُ، اٜ يِدّٜ، اٜ جٛنْدٜ جَمْ، حَوْتِ اٜ يِمْٻٜ تٛکّٛوٻٜ جٛومِرَاوٛ اٜ ٻٜرْندٜ لَمْندٜ؞ ²³تَاع نَتِّنْ حٛورٜ مَاطَ ندٜرْ غٜدِّ مٜىٰرٜىٰجِ طِ نغَلَا حٛورٜ، نغَمْ اَ اَنْدِ اٜ طِ نغَدَّ حَوْرٜ؞ ²⁴دٛولٜ تٛع کُوَنٛووٛ جٛومِرَاوٛ مٜىٰطٜنْ وَرْتَ غِطّٛ حَوْرٜ، اَمَّا اٛ وَرْتَ غَطَنٛووٛ يِمْٻٜ کٛ وٛوطِ، بَوْطٛ اٜکِّتِنْکِ، غٛودُطٛ مُݧَلْ؞ ²⁵اٛ وَرْتَ ڤَمْتِنٛووٛ غٜدّٛوٻٜ اٜکِّتِنٛلْ مَاکٛ ندٜرْ حَکِّيلٛ؞ طُمْ غَطٛتٛوطُمْ اَللَّه وَطَ ٻٜ تُوبَ، ٻٜ ڤَامَ غٛونغَ، ²⁶ٻٜ شٛڤْتٛو تَرْکٛوٛلْ شٜيْطَنْ نَنْغُنغٛلْٻٜ وَرْتِرِٻٜ غَطٛوٻٜ کٛ اٛ يِطِ؞

بَلْطٜ رٜعُکِ دُونِيَارُ

¹اَمَّا فَامُ طُعُمْ، تٛ رٜعُکِ دُونِيَارُ ٻَدَکٜ، طُمْ وَطَيْ شَرٜلْ شَطُنغٜلْ؞ ²يِمْٻٜ نغَرْتَيْ غِطُٻٜ کٛعٜ مَٻّٜ، غٛودُٻٜ يِدّٜ شٜىٰدٜ، مَنْتٛوٻٜ کٛعٜ مَٻّٜ، مَوْنِنٛوٻٜ حٛورٜ، غِطُٻٜ حُطُکِ، ٻٜ مَوْنِنْتَا دَݧٛوٻٜ مَٻّٜ، ٻٜ نغٜتَّتَا، ٻٜ نغَرْتَيْ ٻٜ شٜنَاکِ؞ ³ٻٜ نغَرْتَيْ ٻٜ نغَلَا يِدّٜ، ٻٜ نجَافَتَاکٛ، مٜتٛوٻٜ حَالَاجِ کَلُّطِ دٛوْ وٛٻّٜ، ٻٜ شُرَتَا کٛعٜ مَٻّٜ، غٛودُٻٜ حَلّٜىٰندٜ، غَݧٛوٻٜ کٛ وٛوطِ؞ ⁴ٻٜ نغَرْتَيْ ݧَامٛوٻٜ اَمَانَ، ٻٜ نغَلَا حَکِّيلٛ، نغِعٛوٻٜ کٛعٜ مَٻّٜ ٻٜ ٻُرِي کٛو مٛيٜ، ٻُرْٻٜ يِطُکِ نَنْکِ بٜلْطُمْ دٛوْ يِطُکِ اَللَّه؞ ⁵ٻٜ کٛلَّيْ بٛ ٻٜ تٛکُّٻٜ اَللَّه، اَمَّا ٻٜ نغَݧَ بَوْطٜ مَاکٛ؞ وٛطِّتَ اِرِ يِمْٻٜ ٻٜنْ طٛنْ؞ ⁶نغَمْ ندٜرْ مَٻّٜ اٜ وٛودِ نَتّٛوٻٜ غُرٜ اٜ مَجِّنَ رٜوْٻٜ ٻٜ نغَلَا فَامُ، ٻٜ حَکّٜ ݧٛعِّ، ٻٜ سُونٛ فٜىٰرٜ‑فٜىٰرٜ لَامِي؞ ⁷ٻٜنْ طٛنْ رٜوْٻٜ کٛو ندٜيٜ اٜ ٻٜ اٜکِّتٛو، اَمَّا ٻٜ مبَاوَتَا حٜٻْتُکِ غٛونغَ؞ ⁸نٛنْ نٛ جٜنِسْ اٜ جَمْبِرَسْ نغَݧِرِ کٛ مُوسَ وِعِ، نٛنْ يِمْٻٜ ٻٜنْ نغَݧِرْتَ غٛونغَ؞ ݧُمٛ مَٻّٜ نغٛ کَلُّنغٛ، حٛولَارٜ مَٻّٜ وَرْتِي لَلُّندٜ؞ ⁹اَمَّا ٻٜ نغٛطِّنْتَا ندٜرْ مَجِّنْکِ يِمْٻٜ، نغَمْ کٛو مٛيٜ اَندِتَيْ شِيَ حَکِّيلٛ مَٻّٜ نٛنْ نٛ طُمْ اَندِتِرِ جٜنِسْ اٜ جَمْبِرَسْ؞

وَغِّنٛلْ بُلُسْ شَکِتِينغٛلْ

¹⁰اَمَّا اَنْ، تِمٛوتِ، اَ اَنْدِ اٜکِّتِنٛلْ اَمْ، اٜ نغِکُّ اَمْ، اٜ کٛ نغِطُمِ وَطُکِ ندٜرْ جٛنْدٜ اَمْ، اٜ نٛ کٛولٛرِيمِ يٜىٰسُ، اٜ مُݧَلْ اَمْ، اٜ يِدّٜ اَمْ، اٜ مُݧَلْ اَمْ ندٜرْ تٛرَّ، ¹¹اٜ بٛنٜ طُمْ اُمْ حٛکِّيَمْ، اٜ تٛرَّاجِ طِ نجَرْمِ، اٜ کٛ حٜٻِيَمْ اٜ اَنْتَاکِيَ اٜ اِکٛونِيَ اٜ لِسْتِرَ؞ اَمَّا فُو اٜ نٛنْ، جٛومِرَاوٛ حِسْنِييَمْ ندٜرْ تٛرَّاجِ طِنْ فُو؞ ¹²غٛونغَ کٛو مٛيٜ غِطّٛ وَطَ جٛنْدٜ اِرِ ندٜ اَللَّه يِطِ ندٜرْ تٛکُّکِ يٜىٰسُ اَلْمَسِيحُ، اٛ يَرَيْ بٛنٜ؞ ¹³يِمْٻٜ کَلُّٻٜ اٜ مُنَافُکِعٜنْ ٻٜ ٻٜيْدَيْ حَلّٜىٰندٜ مَٻّٜ ٻٜ نغَطَيْ کَ مَجِّنْکِ يِمْٻٜ، کَمْٻٜ مَا وٛٻّٜ اٜ مَجِّنَٻٜ؞ ¹⁴اَمَّا اَنْ وَطُ کَ وَطُکِ فِي بٛطُّمْ طُمْ اٜکِّتِطَا طُمْ تَبِّتِنْطَا غٛونغَ مَاجُمْ، نغَمْ اَ اَنْدِ يِمْٻٜ اٜکِّتِنْٻٜمَ؞ ¹⁵اَ اَنْدِ دَغَ اَ سُکَيٜلْ ڤَمَرٜلْ اَنْدُطَا دٜفْتٜ شٜنِيطٜ، بَاوَيْطٜ کٛلُّمَا لَاوٛلْ کِسْندَمْ بَرْکَ حٛولَاکِ يٜىٰسُ اَلْمَسِيحُ؞ ¹⁶فُو اَايَاجٜ غٛنْطٜ ندٜرْ دٜفْتٜرٜ شٜنِيندٜ طُمْ فٛوفَانغٛ اَللَّه؞ طُمْ حُوتِرَيْطٜ نغَمْ اٜکِّتِنْکِ، اٜ وَغِّنْکِ، اٜ حٛلُّکِ يِمْٻٜ غٛونغَ تٛ ٻٜ مبٛوفِي، اٜ اٜکِّتِنْکِ کٛ اَللَّه يِطِ؞ ¹⁷طٜ مبَلَّيْ کُوَنٛووٛ اَللَّه وَرْتَ کُوٛووٛ بٛطّٛ شِرْيِيطٛ نغَمْ حُوُکِ کٛو اِرِ نغَلٜ کُوغَلْ بٛنْغَلْ؞

¹اٜ مِ وَغِّنْمَا يٜىٰسٛ اَللَّه اٜ يٜىٰسُ اَلْمَسِيحُ غَطَنٛووٛ ٻٜ يٛنْکِ اٜ مَيْٻٜ کِيتَ؞ نغَمْ سٛعّٛيَاکِ مَاکٛ دُونِيَارُ اٜ لَامُ مَاکٛ، اٜ مِ وِعُمَا، ²وَعَجِنْ وٛلْدٜ اَللَّه، وَطُ کَ وَعَجِنْکِندٜ اٜ شَرٜلْ نغٜلْ نغِطَّا اٜ شَرٜلْ نغٜلْ اَ يِطَا؞ تٛ يِمْٻٜ نغَطِي کٛ وٛوطَا، وِعُٻٜکَ، وَغِّنْٻٜ، سٜمْبِطِنْٻٜ، وَادُ مُݧَلْ اٜ مَٻّٜ، نغَطَا کَ اٜکِّتِنْکِٻٜ؞ ³نغَمْ شَرٜلْ اٜ وَرَ نغٜلْ يِمْٻٜ نغَݧَتَ اٜکِّتِنٛلْ غٛونغَ، ٻٜ تٛکَّ کٛ وٜلْنَنْتَٻٜ ٻٜرْطٜ، ٻٜ تٛکَّ مٛودِٻّٜ بِعٛوٻٜٻٜ کٛ ٻٜ نغِطِ نَنْکِ؞ ⁴يِمْٻٜ نغَݧَيْ نَنْکِ اٜکِّتِنٛلْ غٛونغَ، ٻٜ کٜتِّنْدَنٛو حَبَرُوجِ فٜوْرٜ؞ ⁵اَمَّا اَنْ، سُرُ حٛورٜ مَاطَ کٛو ندٜيٜ، مُݧُ ندٜرْ تٛرَّ کَ نجَرَتَا، حُوُ کُوغَلْ وَعَجِنْکِ، وَطُ فُو کُوغَلْ نغَلْ اَللَّه حٛکُّمَا بٛطُّمْ؞

⁶يٛنْکِ اَمْ اٜ کُوغَلْ اَمْ وَرٛيِي رٜعُکِ؞ شَرٜلْ وَطِي نغٜلْ اَلَيْمِ دُونِيَارُ ندُعُ؞ ⁷مِ وَطِي کٛ مبَاوَيْمِ وَطُکِ ندٜرْ کُوغَلْ نغَلْ يٜىٰسُ حٛکِّيَمْ، مِ يٛتِّنِينغَلْ، مِ اَلَايِ حٛولَاکِمٛ؞ ⁸جٛونِ غِيفٛلْ اٜ تٛنْ حٜطِييَمْ، نغٛلْ طُمْ حٛکَّتَ غَطُٻٜ جٛنْدٜ بٛنْدٜ، نغٛلْ جٛومِرَاوٛ غَطٛووٛ کِيتَ غٛونغَ حٛکَّتَيَمْ ݧَلْندٜ جَانغٛ؞ نَاع مِنْ تَنْ، اَمَّا فُو غِطْٻٜ يِيکِ غَرْتٛلْ مَاکٛ؞

بٛلِيطٜ شَکِتِيطٜ

⁹وَطُ کٛ مبَاوَتَا وَطُکِ نغَرَا تٛ اَمْ ندٜرْ يَوْطَارٜ؞ ¹⁰دِمَسْ سٜنْدِرِي اٜ اَمْ نغَمْ يِدّٜ فِي دُونِيَارُ ندُعُ، اٛ دِلِّي تَسَلٛونِکَ؞ کِرِجٜنْ بٛو دِلِّي غَلَاتِيَ، تِيتُسْ کَدِمَا دِلِّي دَلْمَاتِيَ؞ ¹¹لُکَ تَنْ وٛنْدِ اٜ اَمْ طٛعٛ؞ طَٻُّتُ مَرْکُسْ نغَرْدَا اٜ مَاکٛ، نغَمْ اٛ وَاوَيْ وَلُّکِيَمْ ندٜرْ کُوغَلْ اَمْ؞ ¹²مِ لِلِي تِيکِکُسْ تٛ غَرِيرِ اَافِسَ؞ ¹³تَا وَرَيْ، نغَرْدَنَايَمْ اٜ شُدَّارِ اَمْ ندِ ندٜسُنٛومِ تٛ وُرٛ کَابُسْ تٛ غَرِيرِ تٛورُوَسْ، طٛنْمَا اٜ دٜفْتٜ اَمْ؛ کٛ ٻُرِ مَا، غَطِرَاطٜ لَرٜ؞

¹⁴اَلِجَنْدَ بَعِلّٛ اَجُرْفَارِ حَلَّنِييَمْ نَاع سٜطَّ؞ جٛومِرَاوٛ وَاتَنَيْمٛ کٛ اٛ وَطِ؞ ¹⁵اَنْ مَا فَامَنْمٛ بٛطُّمْ، نغَمْ اٛ وَݧِي اٜکِّتِنٛلْ مٜىٰطٜنْ نَاع سٜطَّ؞ ¹⁶ݧَلْندٜ اَرَنْدٜىٰرٜ ندٜ ندَرِيمِ يٜىٰسٛ کِيتَ اٜ رٛومَ نغَمْ مِ وُرْتِنَ حٛورٜ اَمْ، وَلَا بَلُّطٛيَمْ؞ کٛو مٛيٜ سٜنْدِرِي اٜ اَمْ؞ اٜ مِ وَطَ دٛعَارٜ تٛع اَللَّه نَنْغَٻٜ دٛوْ کٛ ٻٜ نغَطِ؞ ¹⁷اَمَّا جٛومِرَاوٛ وَلِّييَمْ سٜمْبِطِنِييَمْ نغَمْ مِ وَعَجِنَ فُو وٛلْدٜ مَاکٛ نغَمْ يِمْٻٜ نَاع يَحُودَنْکٛعٜنْ فُو نَنَ؞ اٛ حِسْنِييَمْ دَغَ مَيْدٜ نٛ طُمْ حِسْنِرْتَ نٜطّٛ دَغَ حٛنْدُکٛ سٜمْبِنْدُ؞ ¹⁸جٛومِرَاوٛ وُرْتِنَيْيَمْ دَغَ کٛو اِرِ طُمٜ فِي کَلُّطُمْ، اٛ حِسْنَيْيَمْ نغَمْ اٛ نَتِّنَيَمْ وُرٛ مَاکٛ تٛنْ دٛوْ؞ مَنْغُ تَبِّتَ تٛ مَاکٛ حَا اَبَدَا اَبَدِنْ؞ اَامِنْ؞

کٛوْنٛلْ شَکِتِينغٛلْ

¹⁹کٛوْنَنَايَمْ بِرِسْکِلَ اٜ اَکِيلَ اٜ اِيَالُ اٛنٜسِفٛرُسْ؞ ²⁰اٜرَسْتُسْ دَرَکٜ اٜ غَرِيرِ کٛرِنْتِ؞ تُرٛوفِمُسْ بٛو، مِ اَلِيمٛ اٜ غَرِيرِ مِلِتُسْ اٛ يَمْطَا؞ ²¹وَطُ کٛ مبَاوَتَا وَطُکِ نغَرَا طٛعٛ کٛ ندُنْغُ وَرَ؞

يُبُلُسْ، اٜ فُدٜنْ، اٜ لَيْنُسْ، اٜ کَلَوْدِيَ، اٜ فُو تٛکُّٻٜ يٜىٰسُ غٛنْٻٜ طٛعٛ اٜ ٻٜ کٛوْنُمَا؞

²²جٛومِرَاوٛ بَرْکِطِنْمَا تِمٛوتِ، بَرْکِطِنَ فُو ٻٜ نغٛنْدُطَا؞