2 تَسَلٛونِکَنْکٛعٜنْ

طٜرٜوٛلْ طِطَٻٛلْ نغٛلْ بُلُسْ وِنْدَنِ

تَسَلٛونِکَنْکٛعٜنْ

حَبَرُ دٛوْ طٜرٜوٛلْ نغٛعٛلْ

بُلُسْ لِلَاطٛ يٜىٰسُ اَلْمَسِيحُ وِنْدِي طٜرٜوٛلْ نغٛعٛلْ حَکُّندٜ دُوٻِ 25‏-15 غَطَ دَݧْنغٛلْ يٜىٰسُ؞

شِيَ فَامُ دٛوْ وَرْتٛيْکِ اَلْمَسِيحُ ݧَمْرِي يٜىٰسٛ اٜ فٛوطُکِ وَنَّارٜ ندٜرْ کَوْتَلْ تٛکُّٻٜ يٜىٰسُ غٛنْٻٜ غَرِيرِ تَسَلٛونِکَ؞ بُلُسْ مٜتِي دٛوْ يِمْٻٜ ݧُمٛوٻٜ ݧَلْندٜ ندٜ جٛومِرَاوٛ وَرْتٛيْتَ يَادَکٜ وَرِي؞ اٛ وِعِٻٜ تٛع ٻٜ نجَٻَ غٛطّٛ مَجِّنَٻٜ اٜ اٜکِّتِنٛلْ فٜوْرٜ دٛوْ فِي طُعُمْ؞ اٛ حٛلِّيٻٜ وِيکِ کٛ اَلْمَسِيحُ وَرْتٛيَ حَلّٜىٰندٜ اٜ کُوطٜ کَلُّطٜ ٻٜيْدٛتٛ نَاع سٜطَّ لٜيْ لَامُ غٛطّٛ بِعٜتٜىٰطٛ کَلُّطٛ، غَݧٛ اَلْمَسِيحُ؞

بُلُسْ ٻٜيْدِي وِيکِ تَسَلٛونِکَنْکٛعٜنْ ندَرٛو دٛوْ حٛولَارٜ مَٻّٜ، کٛو ندٜرْ تٛرَّ کٛو ندٜرْ يَرْکِ بٛنٜ؞ ٻٜ کُوَ ٻٜ کٜٻَ کٛ ٻٜ مَرٛرْتٛو نٛنْ نٛ بُلُسْ اٜ ٻٜ اٛ حُودَتَ نغَطَتَ؞ ندٜنْ ٻٜ ݧَمْرَ يٜىٰسٛ اٜ وَطُکِ کٛ وٛوطِ؞

کٛوْنٛلْ بُلُسْ

¹مِنْ بُلُسْ وِنْدِ طٜرٜوٛلْ نغٛعٛلْ حَوْتِ اٜ سِيلَ اٜ تِمٛوتِ؞ مِنْ مبِنْدَنْغٛلْ تٛکُّٻٜ يٜىٰسُ غٛنْٻٜ غَرِيرِ تَسَلٛونِکَ، ٻٜ اَللَّه ݧَاکٛ مٜىٰطٜنْ اٜ يٜىٰسُ اَلْمَسِيحُ جٛومِرَاوٛ جٜيِ؞

²اَللَّه ݧَاکٛ مٛ دٛوْ اٜ يٜىٰسُ اَلْمَسِيحُ جٛومِرَاوٛ بَرْکِطِنَعٛنْ حٛکَّعٛنْ جَمْ؞

غَرْتٛلْ اَلْمَسِيحُ

³بَنْدِرَاٻٜ اَمِنْ، اٜ حَانِ مِنْ نغَطَ کَ يٜتُّکِ اَللَّه کٛو ندٜيٜ نغَمْ مٛوطٛنْ، نغَمْ حٛولَارٜ مٛوطٛنْ اٜ ٻٜيْدٛو نَاع سٜطَّ، ندٜنْ يِدّٜ ندٜ نغِطِنْدِرٛنْ اٜ ٻٜيْدٛو؞ ⁴کَنْجُمْ وَطِ مِنٛنْ اٜ کٛعٜ اَمِنْ اٜ مِنْ مَنْتٛرٛوعٛنْ ندٜرْ کَوْتٜ تٛکُّٻٜ اَللَّه؞ اٜ مِنْ طِيوِتَنَٻٜ نٛ مُݧِرْطٛنْ اٜ حٛولَارٜ مٛوطٛنْ ندٜرْ فُو تٛرَّاجِ اٜ شَطٜىٰلٜ طٜ نجَرٛتٛنْ؞

⁵فُو طُعُمْ تَبِّتِنِي کِيتَ اَللَّه اٜ وٛودِ غٛونغَ، نغَمْ مَاجُمْ طُمْ وَرْتِرَيْعٛنْ کٜوْتُٻٜ جٛوطَاکِ ندٜرْ لَامُ مَاکٛ، نغَمْ دٛوْ مَاجُمْ نجَرٛتٛنْ تٛرَّ؞ ⁶اَللَّه اٛ غَطٛووٛ کٛ حَانِ؞ اٛ وَاتَنَيْ ٻٜنْ طٛنْ تٛرَّيْٻٜعٛنْ اٜ تٛرَّ، ⁷اٛ وَلْتِنَيْ ٻٜرْطٜ مٛوطٛنْ اٛنٛنْ تٛرّٜتٜىٰٻٜ؞ مِنٛنْ مَا اٛ وَلْتِنَيْ ٻٜرْطٜ اَمِنْ؞ اٛ وَطَيْ نٛنْ ݧَلْندٜ ندٜ يٜىٰسُ اَلْمَسِيحُ وَنْغَتَ دَغَ دٛوْ ندٜرْ حِيتٜ حَوْتِ اٜ مَلَاعِکَعٜنْ مَاکٛ غٛودُٻٜ بَوْطٜ؞ ⁸غَݧُٻٜ اَللَّه اٜ غَݧُٻٜ نغَطَ کٛ حَبَرُ بٜلْطُمْ طُمْ جٛومِرَاوٛ مٜىٰطٜنْ يٜىٰسُ وِعِ، اَللَّه وَاتَنَيْٻٜ حَلْکٜرٜ کَلُّندٜ؞ ⁹ٻٜ نجَرَيْ تٛرَّ حَلْکٜرٜ ندٜ حَا اَبَدَا، طُمْ اِتَّيْٻٜ دَغَ يٜىٰسٛ جٛومِرَاوٛ اٜ يٜىٰسٛ مَنْغُ بَوْطٜ مَاکٛ؞ ¹⁰حَلْکٜرٜ ندٜنْ وَنْغَيْ ݧَلْندٜ ندٜ اٛ وَرْتٛيْتَ؞ اٛ وَرْتٛيَيْ نغَمْ شٜنِيٻٜ مَاکٛ تٜدِّنَمٛ فُو کٛولِيٻٜمٛ مَوْنِنَمٛ؞ اٛنٛنْ مَا اٛنْ کَوْتَيْ اٜ مَٻّٜ، نغَمْ اٛنْ نجَٻِي حَبَرُ طُمْ مِنْ کٛکِّعٛنْ؞ ¹¹کَنْجُمْ وَطِ کٛو ندٜيٜ اٜ مِنْ نغَطَنَعٛنْ دٛعَارٜ؞ اٜ مِنْ تٛرٛو اَللَّه مٜىٰطٜنْ وَرْتِرَعٛنْ يِمْٻٜ غَطٛوٻٜ اِرِ جٛنْدٜ ندٜ اٛ نٛدِّعٛنْ نغَطٛنْ؞ بَرْکَ بَوْطٜ مَاکٛ اٛ حٜبِّنَ کٛو طُمٜ بٛطُّمْ طُمْ نغِطّٛنْ وَطُکِ نغَمْ اٛنْ کٛولَکٜ يٜىٰسُ؞ ¹²اٜ مِنْ نغَطَ دٛعَارٜ ندٜعٜ نغَمْ اِنْدٜ جٛومِرَاوٛ مٜىٰطٜنْ يٜىٰسُ مَوْنِنٜىٰ ندٜرْ مٛوطٛنْ، کَنْکٛ بٛو اٛ مَوْنِنَعٛنْ بَرْکَ يِدّٜ اَللَّه مٜىٰطٜنْ اٜ يٜىٰسُ اَلْمَسِيحُ جٛومِرَاوٛ؞

وَنْغُکِ کَلُّطٛ

¹دٛوْ غَرْتٛلْ جٛومِرَاوٛ مٜىٰطٜنْ يٜىٰسُ اَلْمَسِيحُ اٜ حَوْرُتُکِ مٜىٰطٜنْ اٜ مَاکٛ، اٜ مِنْ تٛرٛوعٛنْ بَنْدِرَاٻٜ، ²تٛع حَکِّيلٛ مٛوطٛنْ اُمِّلَوٛو کٛو نغَنّٛنْ دٛوْ يِمْٻٜ بِعٛوٻٜ ݧَلْندٜ ندٜ جٛومِرَاوٛ وَرْتٛيْتَ وَرِي؞ طُمْ غَطٛتٛوطُمْ ٻٜ مبِعَ مِنٛنْ مبِعِ نٛنْ ندٜرْ اَنَّبَاکُ، کٛو ندٜرْ وَعَجِنْکِ، کٛو بٛو ندٜرْ طٜرٜوٛلْ مِنْ مبِنْدِطُمْ؞ ³تٛع اٛنْ نجَٻُ غٛطّٛ مَجِّنَعٛنْ اٜ کٛو نغٛلٜ لَاوٛلْ؞ نغَمْ ندٜنْ طٛنْ ݧَلْندٜ وَرٛيْتَا نَا وٛنْغٜلْ شَرٜلْ وَطِي نغٜلْ يِمْٻٜ طُطْٻٜ نغَݧَتَ اَللَّه؞ اٜ شَرٜلْ نغٜلْ، کَلُّطٛ وَنْغَيْ، مٛ طُمْ سِرْيَنِي حَلْکٜرٜ ندٜ حَا اَبَدَا؞ ⁴اٛ وَݧَيْ کٛو طُمٜ کٛ يِمْٻٜ نٛدَّتَ اَلَّح کٛو بٛو کٛ ٻٜ مَوْنِنْتَ، اٛ مَوْنِنَ حٛورٜ مَاکٛ دٛوْ مَاجُمْ؞ حَا مَا اٛ نَتَّيْ وُرٛ شٜنِينغٛ نغٛ اَللَّه، اٛ جٛوطٛو، اٛ وِعَ کَنْکٛ وٛنِ اَللَّه؞

⁵اٛنْ شِفْتٛرَايِ کٛ نغٛنْدُنٛومِ اٜ مٛوطٛنْ مِ وِعِيعٛنْ طُعُمْ؟ ⁶جٛونِ اٛنْ اَنْدِ کٛ حَطِ کَلُّطٛ اٛعٛ وَرْکِ؞ تٛ شَرٜلْ کَانُنغٜلْ وَطِي، طُمْ وَنْغِنَيْمٛ؞ ⁷نغَمْ بَوْطٜ کَلُّطٛ اٛنْ طٛنْ يَادَکٜ فُطِّي حُوُکِ اٜ سُوطٜ؞ اَمَّا اٛنْ طٛنْ تَٻّٛتٛوطٛطٜ، اٛ وَطَيْ کَ تَٻَّاکِطٜ نَا اٛ حٛشَّامَ؞ ⁸غَطَ طٛنْ طُمْ وَنْغِنَيْ کَلُّطٛ اٛنْ، سٜيْ يٜىٰسُ جٛومِرَاوٛ وَرِرَمٛ اٜ فٛوفَانغٛ حٛنْدُکٛ مُوطُمْ، ندٜنْ حَلْکِرَمٛ تٜدُّنغَلْ وَرْتُکِ مُوطُمْ؞ ⁹کَلُّطٛ اٛنْ وَرْدَيْ اٜ بَوْطٜ شٜيْطَنْ، اٛ وَطَيْ اَلَامَاجِ اٜ کَيْطِنِيطُمْ اٜ کُلْنِيطُمْ فٜىٰرٜ‑فٜىٰرٜ طُمْ فٜوْرٜ، ¹⁰اٜ کٛو اِرِ طٜيٜ کُوطٜ کَلُّطٜ پٛيْرَيْطٜ يِمْٻٜ کَلْکَيْٻٜ؞ يِمْٻٜ ٻٜنْ کَلْکَيْ نغَمْ ٻٜ نغَݧِي ٻٜ نغِطَ غٛونغَ ٻٜ کِسَ؞ ¹¹نغَمْ نٛنْ، اَللَّه لِلْدَنَيْٻٜ وٜمْبٜرٜ مَوْندٜ نغَمْ ٻٜ نجَٻَ فٜوْرٜ، ¹²نغَمْ طُمْ تَپَ کِيتَ دٛوْ فُو ٻٜ نجَٻَايِ غٛونغَ نَنٛوٻٜ بٜلْطُمْ حَلّٜىٰندٜ؞

ندَرٜىٰ بٛطُّمْ

¹³اٛنٛنْ بَنْدِرَاٻٜ اَمِنْ ٻٜ جٛومِرَاوٛ يِطِ، اٜ حَانِ مِنْ نغَطَ کَ يٜتُّکِ اَللَّه نغَمْ مٛوطٛنْ کٛو ندٜيٜ؞ نغَمْ دَغَ اَرَنْدٜ اَللَّه سُٻِيعٛنْ نغَمْ کِسٛنْ بَرْکَ لَاٻِنْکِ کِ رُوحُ مَاکٛ وَطَتَ اٜ جَٻُکِ غٛونغَ؞ ¹⁴نغَمْ مَاجُمْ اَللَّه نٛدِّعٛنْ بَرْکَ حَبَرُ بٜلْطُمْ طُمْ مِنْ نغَعَجِنَنِعٛنْ؞ اٛ نٛدُّعٛنْ نغَمْ کٜٻٛنْ نَتُّکِ تٜدُّنغَلْ جٛومِرَاوٛ مٜىٰطٜنْ يٜىٰسُ اَلْمَسِيحُ؞ ¹⁵نغَمْ نٛنْ بَنْدِرَاٻٜ، ندَرٜىٰ بٛطُّمْ نجٛغٜىٰ اٜکِّتِنٛلْ نغٛلْ مِنْ اٜکِّتِنِعٛنْ ندٜرْ مٜتٛ اَمِنْ کٛو ندٜرْ طٜرٜوٛلْ نغٛلْ مِنْ مبِنْدَنِعٛنْ؞

¹⁶جٛومِرَاوٛ مٜىٰطٜنْ يٜىٰسُ اَلْمَسِيحُ اٜ حٛورٜ مُوطُمْ، اٜ اَللَّه ݧَاکٛ مٜىٰطٜنْ مٛ دٛوْ، غِطّٛعٜنْ شٜمْبِطِنْطٛعٜنْ سٜمْبِطِنْکِ کِ رٜعَتَا کٛکُّطٛعٜنْ کَمُّندٜ بٛنْدٜ بَرْکَ يِدّٜ مَاکٛ، ¹⁷اٛ فُکِّنَنَعٛنْ ٻٜرْطٜ، اٛ سٜمْبِطِنَعٛنْ ندٜرْ کٛو نغَلٜ کُوغَلْ بٛنْغَلْ اٜ وٛلْدٜ بٛنْدٜ؞

نغَطَنٜىٰمِنْ دٛعَارٜ

¹بَنْدِرَاٻٜ اَمِنْ، کٛ سَکِتِي وٛنِ نغَطَنٜىٰمِنْ دٛعَارٜ نغَمْ حَبَرُ جٛومِرَاوٛ سَنْکِتٛو جَوْطُمْ طُمْ مَوْنِنٜىٰ نٛنْ نٛ مَوْنِنِرْطٛنْطُمْ؞ ²کَدِنْ نغَطَنٜىٰمِنْ دٛعَارٜ نغَمْ جٛومِرَاوٛ حِسْنَمِنْ دَغَ يِمْٻٜ کَلُّٻٜ، نغَمْ نَاع کٛو مٛيٜ حٛولِي يٜىٰسُ؞

³اَمَّا جٛومِرَاوٛ اٛ غَطٛووٛ کٛ اٛ وِعِ، اٛ سٜمْبِطِنَيْعٛنْ، اٛ رٜىٰنَيْعٛنْ دَغَ اٛنْ طٛنْ کَلُّطٛ؞ ⁴اٜ مِنْ کٛولِي جٛومِرَاوٛ، مِنْ تَبِّتِنِي اٛنْ نغَطَ کٛ مِنْ مبِعِعٛنْ نغَطٛنْ، اٛنْ نغَطَيْ بٛو کَ وَطُکِطُمْ؞

⁵جٛومِرَاوٛ وَطَ ٻٜيْدٛنْ اَنْدُکِ يِدّٜ اَللَّه اٛ وَطَعٛنْ مُݧٛنْ ندٜرْ تٛرَّاجِ طِ نجَرٛتٛنْ نٛنْ نٛ يٜىٰسُ مُݧِرِ ندٜرْ تٛرَّاجِ کَلُّطِ طِ اٛ يَرِ؞

دٛولٜ کٛو مٛيٜ حُوَ

⁶بَنْدِرَاٻٜ، اٜ مِنْ مبِعَعٛنْ ندٜرْ اِنْدٜ جٛومِرَاوٛ مٜىٰطٜنْ يٜىٰسُ اَلْمَسِيحُ، دٛولٜ نغٛطِّتٛوطٛنْ کٛو مٛيٜ دَکِّيطٛ تٛکُّطٛ يٜىٰسُ مٛ تٛکَّتَا کٛ مِنْ اٜکِّتِنِعٛنْ؞ ⁷نغَمْ اٛنٛنْ اٜ کٛعٜ مٛوطٛنْ اٛنْ اَنْدِ اٜ حَانِ نغَطٛنْ کَ اٜکِّتَاکِ اِرِ جٛنْدٜ اَمِنْ؞ نَاع مِنْ دَکِّيٻٜ شَرٜلْ کٛ مِنْ نجٛوطٛدِي اٜ مٛوطٛنْ؞ ⁸نٛنْ مَا، فُو مٛ مِنْ ݧَامَنِ ݧَمْندُ مِنْ نجٛٻِيمٛ؞ مِنْ کُوِي نَاع سٜطَّ جٜمَّ اٜ ݧَلَوْمَ نغَمْ تٛع مِنْ نجٛوَنَ غٛطّٛ مٛوطٛنْ تٜدّٛرَلْ؞ ⁹مِنْ نغَطُ نٛنْ نَاع نغَمْ مِنْ مبَاوَتَا طَٻُّتُکِ بَلَّلْ مٛوطٛنْ، اَمَّا نغَمْ مِنْ نغَطَ غٛطُّمْ کٛ اٜکِّتٛتٛوطٛنْ؞ ¹⁰نغَمْ کٛو شَرٜلْ کٛ مِنْ نغٛنْدُنٛو اٜ مٛوطٛنْ، رَا کٛ مِنْ مبِعِعٛنْ نغَطٛنْ، ‏«‏تٛ نٜطّٛ وَݧِي حُوَ، تٛع اٛنْ کٛکُّمٛ ݧَمْندُ؞»‏

¹¹نغَمْ مِنْ نَنِي حَبَرُ وٛٻّٜ مٛوطٛنْ ٻٜ دَکِّيٻٜ، ٻٜ کُوَتَا؞ اٜ ٻٜ نَتَّ حَالَ کَ يَالَايِٻٜ؞ ¹²اٜ مِنْ مبِعَ اِرِ يِمْٻٜ ٻٜعٜ اٜ مِنْ مبَغِّنَٻٜ ندٜرْ اِنْدٜ جٛومِرَاوٛ مٜىٰطٜنْ يٜىٰسُ اَلْمَسِيحُ ٻٜ نغَطَ جٛنْدٜ بٛنْدٜ ٻٜ کُوَ ٻٜ کٜٻَنَ کٛعٜ مَٻّٜ کٛ ٻٜ ݧَامَتَ؞

¹³اٛنٛنْ بٛو بَنْدِرَاٻٜ اَمِنْ، تٛع اٛنْ شٛمُ وَطُکِ کٛ حَانِ؞ ¹⁴تٛ غٛطّٛ وَݧِي تٛکُّکِ کٛ مِنْ مبِعِ ندٜرْ طٜرٜوٛلْ نغٛعٛلْ، ڤَامَنٜىٰمٛ بٛطُّمْ؞ تٛع اٛنْ کَوْتُ حٛورٜ اٜ مَاکٛ نغَمْ اٛ نَنَ شٜمْتُطُمْ اٛ مٛعِّنَ نغِکُّ مَاکٛ؞ ¹⁵فُو اٜ نٛنْ، تٛع اٛنْ کٛشُّمٛ بٛ غَݧٛ مٛوطٛنْ، اَمَّا مبَغِّنٜىٰمٛ نٛ مبَغِّنِرْتٛنْ تٛکُّطٛ يٜىٰسُ؞

بٛلِيطٜ شَکِتِيطٜ

¹⁶جٛومِرَاوٛ جٛومُ جَمْ اٜ حٛورٜ مُوطُمْ حٛکَّعٛنْ جَمْ کٛو ندٜيٜ ندٜرْ کٛو طُمٜ؞ جٛومِرَاوٛ وٛنْدَ اٜ مٛوطٛنْ اٛنْ فُو؞

¹⁷مِنْ بُلُسْ وِنْدِ کٛوْنٛلْ نغٛعٛلْ اٜ جُنْغٛ اَمْ؞ اٜ مِ وِنْدَ طُعُمْ ندٜرْ فُو طٜرٜىٰجِ طِ مبِنْدُمِ نغَمْ طُمْ حٛلَّ مِنْ وِنْدِطِ؞ نٛنْ مبِنْدِرَيْمِ؞

¹⁸جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ اٛنْ فُو؞