2 بِيتُرُسْ

طٜرٜوٛلْ

بِيتُرُسْ

طِطَٻٛلْ

حَبَرُ دٛوْ طٜرٜوٛلْ نغٛعٛلْ

بِيتُرُسْ لِلَاطٛ يٜىٰسُ وِنْدِ طٜرٜوٛلْ نغٛعٛلْ دُوٻِ 86‏‑56 غَطَ دَݧْنغٛلْ يٜىٰسُ؞ اٛ وِنْدُنغٛلْ نغَمْ اٛ اٜکِّتَ تٛکُّٻٜ يٜىٰسُ نٛ ٻٜ اَنْدِرْتَ مٛودِٻّٜ فٜوٛوٻٜ، اٜ نٛ ٻٜ اَنْدِرْتَ کَلُّٻٜ نَتُّٻٜ ندٜرْ مَٻّٜ؞ ندٜنْ اٛ سٜمْبِطِنِي تٛکُّٻٜ يٜىٰسُ دٛوْ حٛولَارٜ مَٻّٜ، اٜ نٛ حَانِ ٻٜ نجٛوطٛرٛو؞

¹مِنْ، سِيمَنْ بِيتُرُسْ، وِنْدِ طٜرٜوٛلْ نغٛعٛلْ؞ مِ مَشُّطٛ يٜىٰسُ اَلْمَسِيحُ لِلَاطٛ مَاکٛ؞

اٜ مِ وِنْدَنَ کٜٻُٻٜ حٛولَارٜ بٛنْدٜ بٛ ندٜ اَمِنْ لَاوٛلْ اَادِلَاکُ اَللَّه مٜىٰطٜنْ کِسْنٛووٛ مٜىٰطٜنْ يٜىٰسُ اَلْمَسِيحُ:‏

²اَللَّه ٻٜيْدَ بَرْکِطِنْکِعٛنْ حٛکَّعٛنْ جَمْ لَاوٛلْ اَنْدُکِمٛ، کَنْکٛ اٜ يٜىٰسُ جٛومِرَاوٛ مٜىٰطٜنْ؞

جٛنْدٜ تٛکُّٻٜ يٜىٰسُ

³اَللَّه ندٜرْ بَوْطٜ مُوطُمْ حٛکِّيعٜنْ فُو کٛ حَانِ نغَمْ وَطُکِ جٛنْدٜ کُلٛلْ مَاکٛ؞ اٛ حٛکِّيعٜنْطُمْ نغَمْ اٜنْ اَنْدِ يٜىٰسُ اَلْمَسِيحُ نٛدُّطٛعٜنْ بَرْکَ تٜدُّنغَلْ مَاکٛ اٜ نغِکُّ مَاکٛ بٛطُّمْ؞ ⁴بَرْکَ فُو فِي طُعُمْ اَللَّه وَطَنِيعٜنْ اَلْکَوَلْ مَنْغَلْ بٛنْغَلْ، نغَمْ کٜٻٜنْ نغِکُّ اِرِ طُمْ مَاکٛ، ندٜنْ کٜٻٜنْ ندَطٜنْ حَلّٜىٰندٜ غٛنْدٜ ندٜرْ دُونِيَارُ ندٜ سُونٛ کَلُّنغٛ وَدَّتَ؞ ⁵نغَمْ نٛنْ، نغَطٜىٰ کٛ مبَاوٛتٛنْ وَطُکِ ٻٜيْدَنٛنْ حٛولَارٜ مٛوطٛنْ نغِکُّ بٛطُّمْ، ٻٜيْدَنٛنْ نغِکُّ طُمْ اَنْدَلْ؞ ⁶ندٜنْ ٻٜيْدَنٜىٰ اَنْدَلْ مٛوطٛنْ سُرُکِ حٛورٜ، ٻٜيْدَنٛنْ سُرُکِ حٛورٜ مٛوطٛنْ مُݧَلْ، ٻٜيْدَنٛنْ مُݧَلْ مٛوطٛنْ کُلٛلْ اَللَّه؞ ⁷کَدِمَا ٻٜيْدَنٜىٰ کُلٛلْ اَللَّه يِدّٜ تٛکُّٻٜ يٜىٰسُ، ندٜنْ ٻٜيْدَنٛنْ يِدّٜ ندٜنْ يِدّٜ کٛو مٛيٜ؞ ⁸تٛ اٛنْ نغٛودِ اِرِ طُعُمْ نغِکُّ نَاع سٜطَّ، طُمْ حَطَيْعٛنْ نغَرْتٛنْ ٻٜ ٻٜرْطٜ بَاتُطٜ تَمْڤُٻٜ ندٜرْ اَنْدُکِ يٜىٰسُ اَلْمَسِيحُ جٛومِرَاوٛ مٜىٰطٜنْ؞ ⁹نغَمْ فُو دُلُّطٛ اِرِ نغِکُّ طُمْ طٛنْ وَرْتِي بُمْطٛ اٛ يِعَتَا غٛطُّمْ دَغَ تٛ وٛطِّ، ندٜنْ اٛ يٜجِّتِي اٛ لٛوتَامَ دَغَ حَکّٜ مَاکٛ طُمْ ندٜنّٛ؞

¹⁰نغَمْ نٛنْ، بَنْدِرَاٻٜ، نغَطٜىٰ کٛ مبَاوٛتٛنْ وَطُکِ تَبِّتِنٛنْ نٛدّٛلْ اٜ شُٻٛلْ نغٛلْ اَللَّه وَطَنِعٛنْ؞ تٛ اٛنْ نغَطِي نٛنْ، اٛنْ نجَنَتَا؞ ¹¹نٛنْ طُمْ جَٻّٛرْتٛوعٛنْ جَٻَّاکِ بٛطْکِ ندٜرْ لَامُ تَبِتَيْطُمْ طُمْ جٛومِرَاوٛ مٜىٰطٜنْ کِسْنٛووٛ مٜىٰطٜنْ يٜىٰسُ اَلْمَسِيحُ؞

¹²نغَمْ نٛنْ، مِ وَطَيْ کَ سِفْتٛرَنْکِعٛنْ فُو فِي طُعُمْ، کٛو ندٜ اٛنْ نجَادَکٜ اٛنْ اَنْدِيطُمْ، اٛنْ شٜمْبِطِي ندٜرْ غٛونغَ کَ نجَٻُطٛنْ؞ ¹³اٜ يِيکِ اَمْ اٜ حَانِ، تٛ نِ اٜ مِ وٛودِ يٛنْکِ، مِ وَطَ کَ سِفْتٛرَنْکِعٛنْطُمْ؞ ¹⁴نغَمْ اٜ مِ اَنْدِ بَلْطٜ اَمْ ندٜرْ دُونِيَارُ ٻَدَکٜ ندٜعَ، نٛنْ نٛ يٜىٰسُ اَلْمَسِيحُ جٛومِرَاوٛ مٜىٰطٜنْ حٛلِّيَمْ؞ ¹⁵مِ وَطَيْ کٛ مبَاوَيْمِ وَطُکِ مِ يِعَ اٛنْ نجٛغَکٜ فِي طُعُمْ ندٜرْ ٻٜرْطٜ مٛوطٛنْ کٛو نغٜلٜ شَرٜلْ غَطَ مِ اَلِي دُونِيَارُ ندُعُ؞

غِيٻٜ مَنْغُ اَلْمَسِيحُ

¹⁶نغَمْ شَرٜلْ کٛ مِنْ کٛکِّعٛنْ حَبَرُ بَوْطٜ يٜىٰسُ اَلْمَسِيحُ جٛومِرَاوٛ مٜىٰطٜنْ اٜ غَرٛلْ مَاکٛ، نَاع حَبَرُوجِ طِ طُمْ سِرْيِي اٜ پٛيْرٜ مِنْ تٛکِّ؞ اَمَّا مِنْ نغِعِي مَنْغُ مَاکٛ اٜ غِتٜ اَمِنْ؞ ¹⁷نغَمْ شَرٜلْ نغٜلْ اَللَّه ݧَاکٛ مٛ دٛوْ حٛکِّمٛ مَنْغُ اٜ تٜدُّنغَلْ، حٛنٛنْدٜ پِوٛيِي تٛنْ دٛوْ دَغَ تٛ اَللَّه اٛنْ جٛومُ مَنْغُ ندٜ وِعِ، ‏«‏اٛعٛ وٛنِ ٻِطّٛ اَمْ مٛ نغِطُمِ؞ اٜ مِ نَنَ بٜلْطُمْ مَاکٛ نَاع سٜطَّ؞»‏ ¹⁸مِنْ نَنِي حٛنٛنْدٜ ندٜنْ دَغَ دٛوْ، شَرٜلْ نغٜلْ مِنْ نغٛنْدِ اٜ مَاکٛ دٛوْ حٛشّٜىٰرٜ شٜنِيندٜ؞

¹⁹فُو فِي طُعُمْ وَطِي اٜنْ ٻٜيْدِي تَبِّتِنْکِ کٛ اَنَّبٛعٜنْ مبِعِ طُمْ غٛونغَ؞ اٛنْ نغَطَيْ بٛطُّمْ تٛ اٛنْ نغَطِي حَکِّيلٛ دٛوْ اَنَّبَاکُ طُمْ؞ نغَمْ اَنَّبَاکُ طُمْ اٜ طُمْ نَنْدِ اٜ فِتِلَارُ يٜيْنٛتٛوندُ ندٜرْ ݧِوْرٜ حَا وٜىٰتَ، جَيْنغٛلْ حٛودٜرٜ سُبَکَ يٜيْنٛو ندٜرْ ٻٜرْطٜ مٛوطٛنْ؞ ²⁰اَمَّا اَرَنْدٜ اٜ حَانِ ڤَامٛنْ وِيکِ، وَلَا اَنَّبَاکُ غٛنْطُمْ ندٜرْ دٜفْتٜرٜ شٜنِيندٜ طُمْ اُمْ وَاوَتَ وُرْتِنْکِ مَعَنَ مَاجُمْ اٜ فَامُ نٜطّٛ؞ ²¹نغَمْ وَلَا اَنَّبَاکُ مٜىٰطُطُمْ وَرْکِ دَغَ ݧُمٛلْ نٜطّٛ؞ اَمَّا رُوحُ اَللَّه حٛلِّٻٜ ٻٜ مبِعَ کٛ اَللَّه وِعِٻٜ؞

مٛودِٻّٜ فٜوْرٜ

¹اَمَّا ندٜنّٛ اَنَّبٛعٜنْ فٜوْرٜ نَتِّي ندٜرْ يِمْٻٜ جٛومِرَاوٛ؞ نٛنْ مٛودِٻّٜ فٜوْرٜ نَتِّرْتَ ندٜرْ مٛوطٛنْ؞ ٻٜ نغَدَّيْ وٛنْغٛلْ اٜکِّتِنٛلْ ندٜرْ مٛوطٛنْ اٜ سُوطٜ ڤٛوطَنَيْنغٛلْعٛنْ حَلْکٜرٜ، حَا مَا ٻٜ مبِعَ ٻٜ اَنْدَا جٛومِرَاوٛ رِمْطِنْطٛٻٜ؞ نٛنْ ٻٜ ڤٛوطِرَنْتَ کٛعٜ مَٻّٜ حَلْکٜرٜ جَوْندٜ؞ ²يِمْٻٜ طُطْٻٜ تٛکَّيْ نغِکُّ مَٻّٜ کَلُّطُمْ؞ نغَمْ کٛ ٻٜ نغَطَتَ طُمْ مٜتَيْ حَالَاجِ کَلُّطِ دٛوْ لَاوٛلْ غٛونغَ؞ ³کَمْٻٜ شٜىٰدٜ ٻٜ نغِطِ؞ نغَمْ نٛنْ ٻٜ مَجِّنَيْعٛنْ اٜ مٜتٜمٜتٜىٰجِ فٜوْرٜ نغَمْ ٻٜيْدَارِ کٛعٜ مَٻّٜ؞ اَمَّا دَغَ ندٜنّٛ طُمْ سِرْيَکٜ تَپَنْکِٻٜ کِيتَ، حَلْکٜرٜ مَٻّٜ اٜ طٛنْ حٜطِيٻٜ؞

⁴کٛو مَلَاعِکَعٜنْ، اَللَّه اَلَايِٻٜ ندٜ ٻٜ نغَطِ حَکّٜ، اَمَّا اٛ وَطِٻٜ ندٜرْ وُرٛ حِيتٜ ندٜرْ غَيْطٜ لُغُّطٜ غٛودُطٜ ݧِوْرٜ ٻَلٜىٰرٜ نغَمْ طُمْ سُرَٻٜ نَا ݧَلْندٜ کِيتَ؞ ⁵ندٜنْ اٜ جَامَنُ نُحُ، اَللَّه اَلَايِ يِمْٻٜ ٻٜ کُلَتَامٛ، اَمَّا اٛ حَلْکِرِٻٜ ندِيَمْ تُفَانَ؞ نُحُ غَطٛووٛ وَعَجُ اَادِلَاکُ تَنْ اٛ حِسْنِ حَوْتِ اٜ وٛٻّٜ نجٛوٜىٰطِطٛ؞ ⁶اَللَّه بٛو تَپَنِي غَرِيجٜ سٛدٛمْ اٜ غٛمٛورَ کِيتَ حَلْکُکِ؞ اٛ حَلْکِرِيطٜ حِيتٜ، اٛ وَرْتِرِي نٛنْ مِسَالُ کٛ اٛ وَطَنْتَ يِمْٻٜ ٻٜ کُلَتَامٛ؞ ⁷اٛ حِسْنِي لُوتُ اَادِلِيجٛ غَنُّطٛ اٜ کُوطٜ کَلُّطٜ طٜ يِمْٻٜ کَلُّٻٜ نغَطَتَ؞ ⁸لُوتُ اٛ اَادِلِيجٛ، اٜ مٛ جٛوطِي ندٜرْ مَٻّٜ؞ کٛو ندٜيٜ اٜ مٛ وَنِّ نغَمْ اٜ مٛ يِعَ کُوطٜ کَلُّطٜ طٜ ٻٜ نغَطَتَ؞ ⁹فُو فِي طُعُمْ حٛلِّيعٜنْ جٛومِرَاوٛ اٜ اَنْدِ نٛ حِسْنِرْتَ کُلٛوٻٜمٛ دَغَ تٛرَّاجِ، اٜ نٛ اٛ وَطَتَ کَ تٛرِّرْکِ کَلُّٻٜ حَا اٛ حِيتٛوٻٜ ݧَلْندٜ جَانغٛ؞ ¹⁰تٛکُّٻٜ سُونٛ ٻَلِّ مَٻّٜ غَݧُٻٜ لَامُ، کَمْٻٜ اٛ ٻُرَتَ تَپَنْکِ کِيتَ کَلُّکَ؞

ٻٜنْ طٛنْ مٛودِٻّٜ فٜوْرٜ ٻٜ شٜمْتَتَا کٛو سٜطَّ، ٻٜ مَوْنِنٛوٻٜ کٛعٜ مَٻّٜ؞ ٻٜ کُلَتَا مٜتُکِ حَالَاجِ کَلُّطِ دٛوْ غٛودُٻٜ تٜدُّنغَلْ غٛنْٻٜ دٛوْ؞ ¹¹اَمَّا مَلَاعِکَعٜنْ، کٛو ندٜ ٻٜ ٻُرِي ٻٜعٜ مٛودِٻّٜ فٜوْرٜ بَوْطٜ اٜ لَامُ، ٻٜ نغُلِّرْتَا ٻٜعٜ غٛودُٻٜ تٜدُّنغَلْ حَالَاجِ کَلُّطِ يٜىٰسٛ جٛومِرَاوٛ؞ ¹²اَمَّا مٛودِٻّٜ فٜوْرٜ ٻٜعٜ اٜ ٻٜ مٜتَ حَالَاجِ کَلُّطِ دٛوْ کٛو طُمٜ طُمْ ٻٜ ڤَامَايِ؞ اٜ ٻٜ نغٛودِ نغِکُّ بٛ مَرْلٜ لَدّٜ دِمَاطٜ نغَمْ نَنْغٜىٰ مبَرٜىٰ؞ ٻٜ تٛکّٛوٻٜ کٛ سُونٛ ٻَلِّ مَٻّٜ نغِطِ؞ طُمْ حَلْکَيْٻٜ نٛ طُمْ حَلْکِرْتَ مَرْلٜ لَدّٜ؞ ¹³طُمْ وَاتَنَيْٻٜ اٜ تٛرَّ نغَمْ ٻٜ تٛرِّي وٛٻّٜ؞ کٛ وٜلْنَنْتَٻٜ ٻٜرْندٜ وٛنِ ٻٜ نغَطَ کٛو طُمٜ کٛ ٻَلِّ مَٻّٜ نغِطِ شَکَ ݧَلَوْمَ؞ کٛو نغٜلٜ شَرٜلْ نغٜلْ ٻٜ ݧَمْدَتَ ݧَمْندُ اٜ مٛوطٛنْ اٜ ٻٜ نغَطَ کٛ ٻٜ نغِطِ وَطُکِ، اٜ ٻٜ شٜمْتِنَعٛنْ؞ ¹⁴کٛو ندٜيٜ طَٻُّتُکِ رٜوْٻٜ وٛنِ ݧُمٛ مَٻّٜ؞ ٻٜ شٛمَتَا وَطُکِ حَکّٜ؞ اٜ ٻٜ مَجِّنَ ٻٜ شٜمْبِطَا ندٜرْ تٛکُّکِ يٜىٰسُ؞ ٻٜ اٜکِّتِنِ ٻٜرْطٜ مَٻّٜ يِدّٜ شٜىٰدٜ؞ اَللَّه بٛو لَانِيٻٜ؞ ¹⁵ٻٜ اَلِي لَاوٛلْ غٛونغَ، ٻٜ مَجِّي، ٻٜ تٛکِّي لَاوٛلْ بَلَعَمُ، ٻِطّٛ بٜىٰيٛرْ، غِطّٛ وَطُکِ کٛ وٛوطَا نغَمْ حٜٻُکِ شٜىٰدٜ؞ ¹⁶اَمَّا طُمْ حَٻَنِيمٛ دٛوْ کٛ وٛوطَا طُمْ اٛ وَطَتَ؞ مبَبَّ مَاکٛ مٜتَنِيمٛ اٜ حٛنٛنْدٜ اِرِ ندٜ نٜطّٛ، نغَ حَطِمٛ وَطُکِ حَاݝٛورٜ؞

¹⁷ٻٜنْ طٛنْ يِمْٻٜ اٜ ٻٜ نَنْدِ اٜ شَنْطِ جٛورُطِ، اٜ ٻٜ نَنْدِ اٜ دُولٜ طٜ حٜنْدُ حٛشِّ؞ اَللَّه سِرْيَنَکٜٻٜ تٛ ٻٜ نجٛوطٛتٛو ندٜرْ ݧِوْرٜ کَلُّندٜ، ¹⁸نغَمْ اٜ ٻٜ مَوْنِنَ کٛعٜ مَٻّٜ اٜ مٜتٜمٜتٜىٰجِ مٜىٰرٜىٰجِ؞ اٜ ٻٜ کُوتِرَ سُونٛ ٻَلِّ نغَمْ ٻٜ ڤٛوطٛيَ حَکِّيلٛ يِمْٻٜ سٛٻْتِيٻٜ کٛ نٜىٰٻَايِ دَغَ ندٜرْ يِمْٻٜ جٛوطِيٻٜ ندٜرْ حَکّٜ؞ ¹⁹اٜ ٻٜ نغَطَنَٻٜ اَلْکَوَلْ رِمْطِنٜىٰکِ، اَمَّا کَمْٻٜ اٜ کٛعٜ مَٻّٜ ٻٜ مَشُّٻٜ حَکّٜ، نغَمْ نٜطّٛ اٛ مَشُّطٛ کٛو طُمٜ کٜٻُطُمْ جَالٛرْغَلْ دٛوْ مَاکٛ؞ ²⁰تٛ يِمْٻٜ کِسِي دَغَ کُوطٜ کَلُّطٜ طٜ دُونِيَارُ نغَمْ ٻٜ اَنْدِي يٜىٰسُ اَلْمَسِيحُ جٛومِرَاوٛ مٜىٰطٜنْ اٜ کِسْنٛووٛ مٜىٰطٜنْ، ندٜنْ دَغَ غَطَ ٻٜ شٛعِّي ٻٜ نَتِّ اِرِ کُوطٜ کَلُّطٜ طٜنْ طٛنْ، حَا طٜ نجَرِي کٛعٜ مَٻّٜ، رٜعِرْدٜ جٛنْدٜ مَٻّٜ ٻُرَيْ فُطّٛودٜ مَٻّٜ حَلُّکِ؞ ²¹نغَمْ طُمْ ٻُرَنِيٻٜ دَا ٻٜ مٜىٰطَايِ اَنْدُکِ لَاوٛلْ اَادِلَاکُ اٜ دٛوْ غَطَ ٻٜ اَنْدِينغٛلْ ندٜنْ ٻٜ شٛعِّي غَطَ، ٻٜ اَلِ تٛکُّکِ دٛوکَ طُمْ طٛنْ شٜنِيطُمْ طُمْ اُمْ حٛکِّٻٜ؞ ²²کٛ ٻٜ نغَطِ طُمْ يَادِي اٜ حَالَ بِيکَ، ‏«‏کُتِيرُ تُوتِي سٛعَّکٜ تَحِ تُرّٜ مُوطُمْ،»‏ ندٜنْ اٜ حَالَ بِيکَ، ‏«‏اَلَدٜىٰرُ ندُ طُمْ لٛوتِ سٛعَّکٜ ندٜرْ لٛوڤٜ نٜفْنِيطٜ؞»‏

اَلْکَوَلْ وَرْتٛيْکِ يٜىٰسُ

¹اٛنٛنْ ٻٜ نغِطُمِ، نغٛعٛلْ وٛنِ طٜرٜوٛلْ اَمْ طِطَٻٛلْ نغٛلْ مبِنْدَنْمِعٛنْ؞ ندٜرْ طٜرٜىٰجِ اَمْ طِ فُو طِطِ مِ سِفْتٛرَنِيعٛنْ کٛ اَنْدُطٛنْ نغَمْ ݧُمٛوجِ مٛوطٛنْ نغَرْتَ لَٻْطِ؞ ²اٜ مِ يِطِ شِفْتٛرٛنْ اٜ کٛ اَنَّبٛعٜنْ اَللَّه مبِعُنٛو ندٜنّٛ، اٜ کٛ جٛومِرَاوٛ مٜىٰطٜنْ کِسْنٛووٛ مٜىٰطٜنْ وِعِ طُمْ وَطَ دَغَ کٛنْدُطٜ لِلَاٻٜ مَاکٛ ٻٜ اٛ لِلٛيِ تٛ مٛوطٛنْ؞ ³اَرَنْدٜ دٛولٜ اَنْدٛنْ طُعُمْ، ندٜرْ بَلْطٜ رٜعُکِ دُونِيَارُ وٛٻّٜ يِمْٻٜ نغَرَيْ نجُکِّتَعٛنْ، تٛکّٛوٻٜ سُونٛ مَٻّٜ کَلُّنغٛ؞ ⁴اٜ ٻٜ مبِعَ، ‏«‏نَاع يٜىٰسُ وَطَنِيعٛنْ اَلْکَوَلْ وِيکِ اٛ وَرْتَيْ؟ تٛو، تٛ اٛ وٛنِ؟ نغَمْ دَغَ شَرٜلْ نغٜلْ مَامَعٜنْ مٜىٰطٜنْ مَايِ، کٛو طُمٜ اٜ يَحَ نٛ وٛنْتِندِرِ دَغَ فُطّٛودٜ دُونِيَارُ؞»‏ ⁵وِعٛوٻٜ نٛنْ اٜ مٜىٰرٜ ٻٜ نغَݧِ فَامُکِ وِيکِ ندٜنّٛ اَللَّه تَغِرِي دٛوْ اٜ وٛلْدٜ مُوطُمْ؞ اٛ وُرْتِنِ لٜيْدِ دَغَ ندِيَمْ، اٛ فِلْنِرِيندِ ندِيَمْ؞ ⁶اٜ ندِيَمْ طَمْ اٛ مَٻِّرِ دُونِيَارُ ندٜنّٛ، اٛ حَلْکِندُ؞ ⁷اَمَّا وٛلْدٜ مَاکٛ جٛغِي دٛوْ اٜ لٜيْ طُمْ نغِعٜتٜنْ جٛونِ نغَمْ طُمْ حَلْکِرٜىٰ حِيتٜ؞ اٜ مٛ جٛغِيطُمْ حَا يَاکِ ݧَلْندٜ ندٜ اٛ وَطَنْتَ ٻٜ کُلَتَامٛ کِيتَ اٛ حَلْکَٻٜ؞

⁸اَمَّا اٛنٛنْ حِغٛوٻٜ اَمْ ٻٜ نغِطُمِ، تٛع اٛنْ نغٜجُّتُ فِي غٛعٛ، کَنْجُمْ وٛنِ ݧَلْندٜ غٛعٛ تٛ جٛومِرَاوٛ بٛ دُوٻِ 1,000 وٛنِ، ندٜنْ دُوٻِ 1,000 بٛ ݧَلْندٜ غٛعٛ وٛنِ؞ ⁹وٛٻّٜ اٜ مبِعَ جٛومِرَاوٛ نٜىٰٻَيْ کٛ حٜبِّنَ اَلْکَوَلْ مُوطُمْ؞ نَاع طُمْ نٛنْ، اَمَّا مُݧَلْ اٛ وَادَتَ اٜ مٛوطٛنْ، نغَمْ اٛ يِطَا کٛو مٛيٜ حَلْکَ، سٜيْ نِ کٛو مٛيٜ اَلَ وَطُکِ حَکّٜ، تُوبَ؞

¹⁰اَمَّا ݧَلْندٜ جٛومِرَاوٛ وَرَيْ بٛ غُجّٛ؞ اٜ شَرٜلْ نغٜلْ دٛوْ مَجِّتَيْ اٜ حٛولٛ شٜمْبِنْغٛ؞ ندٜنْ فُو کٛ وٛنِ ندٜرْ مَاجُمْ حَلْکِرَيْ اٜ حِيتٜ؞ دُونِيَارُ اٜ کٛ وٛنِ ندٜرْ مَيْرُ طُمْ مَجِّتَيْ؞ ¹¹ندٜ کٛو طُمٜ حَلْکِرَيْ نِينِ، اِرِ ٻٜيٜ يِمْٻٜ حَانِ نغَرْتٛنْ؟ اٜ حَانِ نغَطٛنْ جٛنْدٜ شٜنِيندٜ اٜ جٛنْدٜ کُلٛلْ اَللَّه، ¹²اٛنْ کٜطٛو وَرْکِ ݧَلْندٜ اَللَّه؞ نغَطٜىٰ کٛ مبَاوٛتٛنْ وَطُکِ نغَطٛنْ ݧَلْندٜ ندٜنْ وَرَ جَوْطُمْ؞ ندٜرْ ݧَلْندٜ ندٜنْ طُمْ حَلْکِرَيْ دٛوْ اٜ حِيتٜ، کٛو طُمٜ کٛ حٛرِي طُمْ حَلْکِرَيْ حِيتٜ؞ ¹³اَمَّا اٜنٜنْ اٜنْ کٜطِي اَلْکَوَلْ اَللَّه، وَاتٛ دٛوْ کٜسُمْ اٜ لٜيْدِ کٜيْرِ تٛ اَادِلَاکُ جٛوطِي؞

¹⁴نغَمْ نٛنْ، اٛنٛنْ ٻٜ نغِطُمِ، ندٜ اٛنْ کٜطِي ندٜنْ طٛنْ ݧَلْندٜ، نغَطٜىٰ کٛ مبَاوٛتٛنْ وَطُکِ نجٛوطٛوطٛنْ جٛنْدٜ لَمْندٜ اٜ اَادِلَاکُ يٜىٰسٛ اَللَّه اٜ ٻٜرْندٜ وَلْتِيندٜ؞ ¹⁵تٛع اٛنْ نغٜجُّتُ، جٛومِرَاوٛ اٜ مُݧَ نغَمْ اٜ مٛ يِطِ يِمْٻٜ کِسَ؞ نٛنْ مَا حِغٛ مٜىٰطٜنْ بُلُسْ مٛ نغِطّٜنْ وِنْدَنِعٛنْ ندٜرْ فَامُ طُمْ اَللَّه حٛکِّمٛ؞ ¹⁶کٛو ندٜيٜ اٜ مٛ مٜتَ دٛوْ مَاجُمْ ندٜرْ طٜرٜىٰجِ مَاکٛ؞ ندٜرْ طٜرٜىٰجِ طِنْ اٜ وٛودِ فِي شَطُّمْ فَامُکِ؞ وٛٻّٜ ٻٜ نغَلَا فَامُ، ٻٜ ٻٜرْطٜ طٜ ندَرَاکِ تٛ غٛعٛ اٜ نغَيْلِتَ مَعَنَ مَاجُمْ نٛنْ نٛ ٻٜ نغَيْلِتِرْتَ غٛطّٜ اَايَاجٜ ندٜرْ دٜفْتٜرٜ شٜنِيندٜ؞ وَطُکِ نٛنْ اٜ فٛوطَنَٻٜ حَلْکٜرٜ؞

¹⁷نغَمْ نٛنْ، اٛنٛنْ ٻٜ نغِطُمِ، ندٜ اٛنْ اَنْدِ فِي طُعُمْ، ڤَامَنٜىٰ يِمْٻٜ کَلُّٻٜ، تٛع اٜکِّتِنٛلْ فٜوْرٜ مَٻّٜ حٛشَّ حَکِّيلٛ مٛوطٛنْ نجَنٛنْ دَغَ دٛوْ وِغٜىٰرٜ شٜمْبِنْدٜ تٛ ندَرِيطٛنْ؞ ¹⁸اَمَّا ٻٜيْدٜىٰ يِدّٜ اٜ يُرْمٜىٰندٜ اٜ اَنْدُکِ جٛومِرَاوٛ مٜىٰطٜنْ کِسْنٛووٛ مٜىٰطٜنْ يٜىٰسُ اَلْمَسِيحُ؞ تٜدُّنغَلْ تَبِّتَ تٛ مَاکٛ جٛونِ اٜ حَا اَبَدَا!‏ اَامِنْ؞