2 کٛرِنْتِيَنْکٛعٜنْ

طٜرٜوٛلْ طِطَٻٛلْ نغٛلْ بُلُسْ وِنْدَنِ

کٛرِنْتِيَنْکٛعٜنْ

حَبَرُ دٛوْ طٜرٜوٛلْ نغٛعٛلْ

بُلُسْ لِلَاطٛ يٜىٰسُ وِنْدِ طٜرٜوٛلْ نغٛعٛلْ حَادٜ کٛ اٛ وِنْدِ اَرَنْدٜوٛلْ نغٛلْ؞ اٜ طُمْ کَمّٛو اٛ وِنْدِي طٜرٜوٛلْ نغٛعٛلْ دُوٻِ 55 غَطَ دَݧْنغٛلْ يٜىٰسُ، شَرٜلْ کٛ اٛ وَعَجِنْتَ اٜ لٜيْدِ ڤَمَرْدِ ندِ مَکِدٛونِيَ؞ اٛ وِنْدِينغٛلْ شَرٜلْ نغٜلْ سُمْڤٛ مَاکٛ اٜ تٛکُّٻٜ يٜىٰسُ غٛنْٻٜ تٛنْ نَتِّ شَطُّمْ مَوْطُمْ؞ وٛٻّٜ مَٻّٜ مٜتِ حَالَاجِ کَلُّطِ دٛوْ مَاکٛ، اَمَّا اٛ حٛلِّ اٜ مٛ يِطِ سِرْيٛوتِرْکِ اٜ مَٻّٜ، ندٜنْ اٛ نَنَيْ بٜلْطُمْ نَاع سٜطَّ شَرٜلْ نغٜلْ اٛ سِرْيٛوتِرِ اٜ مَٻّٜ؞ طٛنْمَا اٛ تٛرَکٜ کَوْتَلْ نغَلْ فُو ٻٜ مٛٻْتَ بَلَّلْ شٜىٰدٜ نغَمْ ٻٜ مبَلَّ تٛکُّٻٜ يٜىٰسُ ندٜرْ يَحُودِيَ نغَمْ اٜ ٻٜ تٛرّٛدٛو اٜ وٜىٰلٛ کَلُّنغٛ؞ ندٜرْ نغٛعٛلْ طٜرٜوٛلْ تَنْ بُلُسْ ٻُرِ مٜتُکِ دٛوْ حٛورٜ مُوطُمْ؞ اٛ وَطُ نٛنْ نغَمْ اٜ وٛودِ شَطُّمْ حَکُّندٜ مَاکٛ اٜ وٛٻّٜ ندٜرْ تٛکُّٻٜ يٜىٰسُ اٜ کٛرِنْتِ؞ طٛنْمَا بُلُسْ تَٻَّنَکٜ حٛورٜ مُوطُمْ دٛوْ مٜتٜمٜتٜىٰجِ طِ مٛودِٻّٜ ڤٜوٛوٻٜ مٜتَتَ دٛوْ مَاکٛ، نغَمْ اٜ ٻٜ مبِعَ کَنْکٛ نَاع اٛ لِلَاطٛ مٛ غٛونغَ؞

¹مِنْ بُلُسْ مٛ اَللَّه سُٻِ وَرْتَ لِلَاطٛ يٜىٰسُ اَلْمَسِيحُ اٜ بَنْدِرَاوٛ مٜىٰطٜنْ تِمٛوتِ مِنٛنْ مبِنْدِ طٜرٜوٛلْ نغٛعٛلْ؞

مِنْ مبِنْدَنْغٛلْ کَوْتَلْ يِمْٻٜ اَللَّه غٛنْٻٜ غَرِيرِ کٛرِنْتِ، اٜ فُو يِمْٻٜ اَللَّه غٛنْٻٜ ندٜرْ فُو لٜيْدِ اَکَايَ؞

²اَللَّه ݧَاکٛ مٜىٰطٜنْ اٜ جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ حٛکَّعٛنْ جَمْ؞

بُلُسْ يٜتِّي اَللَّه

³يٜتّٛورٜ تَبِّتَ تٛ اَللَّه، ݧَاکٛ جٛومِرَاوٛ مٜىٰطٜنْ يٜىٰسُ اَلْمَسِيحُ؞ کَنْکٛ وٛنِ ݧَاکٛ مٛ يُرْمٜىٰندٜ، اَللَّه بَلْتِنَيْطٛ ٻٜرْطٜ؞ ⁴اٜ مٛ وَلْتِنَ ٻٜرْطٜ مٜىٰطٜنْ ندٜرْ فُو تٛرَّاجِ طِ نجَرٜتٜنْ، نغَمْ اٜنٜنْ مَا مبَلْتِنٜنْ ٻٜرْطٜ وٛنْٻٜ ندٜرْ کٛو اِرِ کَيٜ تٛرَّ؞ اٜنْ مبَلْتِنَيْ ٻٜرْطٜ مَٻّٜ اٜ اِرِ وَلْتِنْکِ کِ اٛ وَلْتِنِ ٻٜرْطٜ مٜىٰطٜنْ؞ ⁵نٛنْ نٛ نجَرْدٜتٜنْ تٛرَّ نَاع سٜطَّ اِرِ کَ اَلْمَسِيحُ يَرِ، نٛنْ مَا بَرْکَ اَلْمَسِيحُ طُمْ وَلْتِنَيْ ٻٜرْطٜ مٜىٰطٜنْ نَاع سٜطَّ؞ ⁶تٛ مِنْ تٛرَّامَ، مِنْ تٛرَّ نغَمْ طُمْ وَلْتِنَ ٻٜرْطٜ مٛوطٛنْ ندٜنْ نغَمْ کِسْندَمْ مٛوطٛنْ؞ تٛ بٛو اَللَّه وَلْتِنِي ٻٜرْطٜ اَمِنْ، اٛ وَلْتِنْطٜ نغَمْ مِنٛنْ مَا مِنْ مبَلْتِنَ ٻٜرْطٜ مٛوطٛنْ نغَمْ کٜٻٛنْ سٜمْبٜ مُݧٛنْ ندٜرْ تٛرَّاجِ طِ نجَرٛتٛنْ اِرِ طِ مِنْ نجَرَتَ؞ ⁷مِنْ تَبِّتِنِي، اٜ مِنْ اَنْدِ نٛنْ نٛ نجَرْدٛتٛنْ تٛرَّ اِرِ کَ مِنْ نجَرِ، نٛنْ مَا ٻٜرْطٜ مٛوطٛنْ مبَلْتٛتٛ اِرِ وَلْتَاکِ ٻٜرْندٜ کِ مِنْ کٜٻِ؞

⁸بَنْدِرَاٻٜ، اٜ مِنْ نغِطِ اَنْدٛنْ اِرِ تٛرَّ کَ مِنْ نجَرِ ندٜرْ لٜيْدِ اَاسِيَ؞ مِنْ نَتِّي تٛرَّ کَلُّکَ ٻُرْکَ سٜمْبٜ اَمِنْ حَا مِنْ اِتِّي کَمُّندٜ يٛنْکِ اَمِنْ؞ ⁹ندٜرْ ٻٜرْطٜ اَمِنْ مِنْ نَنِي بٛ کِيتَ مَيْدٜ مِنْ تَپَنَا، اَمَّا نٛنْ وَطِي نغَمْ تٛع مِنْ کٛولٛو کٛعٜ اَمِنْ، اَمَّا مِنْ کٛولٛو اَللَّه اُمِّنٛووٛ مَيْٻٜ؞ ¹⁰کَنْکٛ حِسْنِمِنْ دَغَ مَيْدٜ کَلُّندٜ، اٛ ݧَمْرَيْ يٜىٰسٛ اٜ حِسْنُکِمِنْ؞ دٛوْ مَاکٛ مِنْ نغَطِ کَمُّندٜ اٛ حِسْنَيْمِنْ کَدِنْ؞ ¹¹اٛنٛنْ مَا مبَلِّرٜىٰمِنْ دٛعَارٜ، سٜيْ اَللَّه بَرْکِطِنَيْمِنْ، ندٜنْ طُطْٻٜ نغٜتَّمٛ نغَمْ اَمِنْ؞

بُلُسْ فَرِتِي يَادُ مُوطُمْ

¹²کٛ مِنْ مَنْتٛرْتٛو وٛنِ ٻٜرْطٜ اَمِنْ اٜ تَبِّتِنَنَمِنْ مِنْ نغَطِي جٛنْدٜ ندٜرْ دُونِيَارُ ندٜرْ سٜنَاکِ اٜ غٛونغَ پِوٛيْطُمْ تٛ اَللَّه، حَکّٛ مَا ندٜرْ مٛوطٛنْ؞ مِنْ نجٛوطٛرِ نٛنْ نَاع دٛوْ اَنْدَلْ اِرِ نغَلْ يِمْٻٜ دُونِيَارُ، اَمَّا يِدّٜ اَللَّه وَلِّمِنْ؞ ¹³ندٜرْ طٜرٜىٰجِ اَمِنْ مِنْ مبِنْدَنَايِعٛنْ غٛطُّمْ طُمْ اٛنْ مبَاوَتَا جَنْغُکِ کٛو فَامُکِ؞ ¹⁴جٛونِ سٜطَّ تَنْ ڤَامُطٛنْمِنْ، اَمَّا يٜىٰسٛ طٛعٛ اٜ مِ يِطِ ڤَامٛنْمِنْ بٛطُّمْ، نغَمْ ݧَلْندٜ ندٜ يٜىٰسُ جٛومِرَاوٛ مٜىٰطٜنْ وَرْتٛيْتَ مبَاوٛنْ مَنْتٛرٛوطٛنْمِنْ نٛنْ نٛ مِنٛنْ مَا مِنْ مبَاوِرْتَ مَنْتٛرَاکِعٛنْ؞ ¹⁵ندٜ مِ تَبِّتِنِي طُعُمْ، مِ يِطِينٛ وَرْکِ تٛ مٛوطٛنْ اَرَنْدٜ نغَمْ کٜٻٛنْ بَرْکَ ندٜ طِطِ؞ ¹⁶اٜ مِ يِطُنٛو دٛوْ لَاوٛلْ اَمْ يَاکِ مَکِدٛونِيَ، مِ يَالَ تٛ مٛوطٛنْ، ندٜنْ غَطَ مِ يَحِي مَکِدٛونِيَ، مِ سٛعّٛيْتٛ تٛ مٛوطٛنْ، نغَمْ مبَلّٛنْيَمْ ندٜرْ يَادُ اَمْ يَاکِ لٜيْدِ يَحُودِيَ؞ ¹⁷ندٜ مِ حٜٻَايِ نغَطُمِ يَادُ ندُنْ، اٜ يِيکِ مٛوطٛنْ مِ وَطِي ٻٜرْطٜ طِطِ ندٜ شِرْيِنٛومِ وَطُکِ يَادُ ندُنْ؟ کٛو اٜ يِيکِ مٛوطٛنْ اٜ مِ سِرْيٛو يَادُ اَمْ نٛ يِمْٻٜ دُونِيَارُ نغَطَتَ، وِعٛوٻٜ ‏«‏اٜىٰ»‏ ڤُطِّتَ مبِعَ ‏«‏اَاعَ؟»‏ ¹⁸اَللَّه اٛ غَطٛووٛ کٛ اٛ وِعِ، اٛ شٜيْدُوجٛ اَمِنْ، مِنْ مبِعَتَا ‏«‏اٜىٰ»‏ اٜ ‏«‏اَاعَ»‏ شَرٜلْ غٛعٛ؞ ¹⁹نغَمْ حَبَرُ ٻِطّٛ اَللَّه، وَاتٛ يٜىٰسُ اَلْمَسِيحُ، مٛ مِنْ نغَعَجِنَنِعٛنْ، مِنْ اٜ سِيلَ اٜ تِمٛوتِ، نَاع طُمْ ‏«‏اٜىٰ»‏ اٜ ‏«‏اَاعَ،»‏ اَمَّا کَنْکٛ کٛو ندٜيٜ ‏«‏اٜىٰ»‏ مَاکٛ طُمْ ‏«‏اٜىٰ؞»‏ ²⁰نغَمْ اَلْمَسِيحُ حٜبِّنِي کٛو نغَلٜ اَلْکَوَلْ نغَلْ اَللَّه وَطِ؞ کَنْجُمْ وَطِ مبِعٜتٜنْ ‏«‏اَامِنْ»‏ لَاوٛلْ مَاکٛ نغَمْ تٜدِّنْکِ اَللَّه؞ ²¹نغَمْ اَللَّه وٛنِ غَطُطٛعٜنْ ندَرِيطٜنْ بٛطُّمْ ندٜرْ سُمْڤٛوتِرْکِ مٜىٰطٜنْ اٜ يٜىٰسُ اَلْمَسِيحُ؞ کَنْکٛ سُٻِعٜنْ، ²²اٛ وَطَنِيعٜنْ اَلَامَ مَاکٛ کٛلُّطُمْ اٜنٜنْ طُمْ ٻٜ مَاکٛ؞ اٛ حٛکِّيعٜنْ رُوحُ مَاکٛ ندٜرْ ٻٜرْطٜ مٜىٰطٜنْ، نغَمْ طُمْ تَبِّتِنَنَعٜنْ کٛ اٛ حٛکَّتَعٜنْ يٜىٰسٛ طٛعٛ؞

²³اَللَّه وٛنِ شٜيْدُوجٛ اَمْ تٛ مِ فٜوَيْ، مِ يِطَا مِ وَطَعٛنْ نَنٛنْ شِيَ بٜلْطُمْ، کَنْجُمْ حَطِيَمْ سٛعَّاکِ کٛرِنْتِ؞ ²⁴مِنْ نغِطَا مِنْ کٛلَّعٛنْ لَامُ سٜمْبٜ دٛوْ حٛولَارٜ مٛوطٛنْ؞ مِنٛنْ مِنْ کُودٛوٻٜ اٜ مٛوطٛنْ نغَمْ نَنٛنْ بٜلْطُمْ ندٜرْ ٻٜرْطٜ مٛوطٛنْ، نغَمْ اٛنْ ندَرَکٜ بٛطُّمْ دٛوْ کٛ کٛولِيطٛنْ؞

¹نغَمْ مَاجُمْ شُٻُمِ تٛع مِ وَرَ تٛ مٛوطٛنْ مِ وَطَعٛنْ نَنٛنْ شِيَ بٜلْطُمْ؞ ²نغَمْ تٛ مِ وَطِي اٛنْ نَنِي شِيَ بٜلْطُمْ، مٛيٜ وٜلْنَنْتَيَمْ ٻٜرْندٜ تٛ نَاع اٛنٛنْ ٻٜ نغَطُمِ نَنِ شِيَ بٜلْطُمْ؟ ³کٛ مبِنْدَنْمِعٛنْ ندٜرْ طٜرٜوٛلْ اَمْ اَرَنْدٜوٛلْ، مِ وِنْدُطُمْ نغَمْ تٛ مِ وَرِي تٛ مٛوطٛنْ تٛع اٛنٛنْ کَانُٻٜ مبٜلْنَنَيَمْ ٻٜرْندٜ نغَطٛنْيَمْ مِ نَنَ شِيَ بٜلْطُمْ؞ نغَمْ مِ تَبِّتِنِي تٛ مِ نَنِي بٜلْطُمْ، اٛنْ فُو اٛنْ نَنَيْ بٜلْطُمْ؞ ⁴کٛ مبِنْدَنْمِعٛنْ، مِ وِنْدُطُمْ ندٜرْ نَوْطُمْ ٻٜرْندٜ اٜ وَنَّارٜ اٜ غٛنْطِ طُطِّ نَاع نغَمْ مِ مٜتِّنَنَعٛنْ ٻٜرْطٜ، سٜيْ نِ نغَمْ مِ وَطَعٛنْ اَنْدٛنْ اِرِ يِدّٜ لُغُّندٜ ندٜ نغِطُمِعٛنْ؞

يَافَاکِ

⁵تٛو، تٛ غٛطّٛ وَدِّي کٛ مٜتِّنِ ٻٜرْندٜ، نَاع مِنْ تَنْ اٛ مٜتِّنَنِ ٻٜرْندٜ، اٛنْ فُو اٛ مٜتِّنَنِ ٻٜرْطٜ؞ مِ وِعُ نٛنْ، اَمَّا مِ يِطَا مِ حَٻَنَمٛ کٛ ٻُرِ نٛ حَانِ؞ ⁶حَٻَنْکِ کِ طُطْٻٜ مٛوطٛنْ کَٻَنِمٛ حٜپِي؞ ⁷اَمَّا جٛونِ اٜ حَانِ نجَافَنٛوطٛنْمٛ شٜمْبِطِنٛنْمٛ نغَمْ تٛع نَوْطُمْ ٻٜرْندٜ مَاکٛ ٻُرَ سٜمْبٜ مَاکٛ؞ ⁸نغَمْ نٛنْ، اٜ مِ تٛرٛوعٛنْ، کٛلّٜىٰمٛ حَا جٛونِ اٛنْ نغِطِمٛ؞ ⁹مِ وِنْدَنْعٛنْ نغٛلْ تٛنْ طٜرٜوٛلْ نغَمْ مِ فٛوندَعٛنْ مِ يِعَ کٛو اٛنْ نغَطَيْ کٛ مبِيمِعٛنْ ندٜرْ کٛو طُمٜ؞ ¹⁰فُو مٛ نجَافَنِيطٛنْ، مِنْ مَا مِ يَافَنَکٜمٛ؞ کٛ نجَافِيمِ، تٛ اٜ وٛودِ کٛ حَانِ مَا مِ يَافٛو، مِ يَافِطُمْ نغَمْ مٛوطٛنْ يٜىٰسٛ اَلْمَسِيحُ؞ ¹¹مِ وَطُ نٛنْ نغَمْ تٛع شٜيْطَنْ پٛيْرَعٜنْ، نغَمْ اٜنْ اَنْدِ ݧُمٛ مَاکٛ بٛطُّمْ؞

بُلُسْ وَنِّي ندٜرْ غَرِيرِ تٛورُوَسْ

¹²ندٜ نجَامِ تٛورُوَسْ نغَمْ مِ وَعَجِنَ حَبَرُ بٜلْطُمْ طُمْ اَلْمَسِيحُ، جٛومِرَاوٛ مَٻِّتَنِييَمْ لَاوٛلْ کُوغَلْ طٛنْ؞ ¹³اَمَّا مِ وَنِّي نَاع سٜطَّ نغَمْ مِ تَوَايِ تِيتُسْ بَنْدِرَاوٛ مٜىٰطٜنْ تٛنْ؞ نغَمْ نٛنْ، سٜيْ نجَٻّٛوتِرْمِ اٜ مَٻّٜ نجَامِ مَکِدٛونِيَ؞

جَالٛرْغَلْ لَاوٛلْ اَلْمَسِيحُ

¹⁴اَمَّا يٜتّٛورٜ تَبِّتَ تٛ اَللَّه کٛکّٛووٛعٜنْ جَالٛرْغَلْ کٛو ندٜيٜ بَرْکَ سُمْڤٛوتِرْکِ مٜىٰطٜنْ اٜ اَلْمَسِيحُ؞ لَاوٛلْ مٜىٰطٜنْ اٛ سَنْکِتِي حَبَرُ اَلْمَسِيحُ کٛو تٛيٜ بٛ اُرْنغٛلْ بٜلْنغٛلْ؞ ¹⁵نغَمْ اٜنٜنْ نغٛنِ بٛ اُرْنغٛلْ اُرْدٜ وٜلْندٜ ندٜ اَلْمَسِيحُ حٛکِّ اَللَّه؞ اُرْنغٛلْ اُرْدٜ ندٜنْ يٛتَّکٜ کِسْنَاٻٜ اٜ غٛنْٻٜ دٛوْ لَاوٛلْ حَلْکٜرٜ؞ ¹⁶تٛ غٛنْٻٜ دٛوْ لَاوٛلْ حَلْکُکِ اُرْنغٛلْ نغٛلْ طُمْ اُرْنغٛلْ مَيْدٜ؞ اَمَّا تٛ کِسْنَاٻٜ اُرْنغٛلْ نغٛلْ طُمْ اُرْنغٛلْ غَدَّنٛووٛلْٻٜ يٛنْکِ؞ اٜ وٛودِ ڤٛتُطٛ حُوُکِ کُوغَلْ نغَعَلْ؟ ¹⁷مِنْ نغَعَجِنْتَا وٛلْدٜ اَللَّه نغَمْ مِنْ کٜٻَ شٜىٰدٜ نٛ طُطْٻٜ نغَطَتَ؞ اَمَّا اٜ مِنْ مٜتَ غٛونغَ يٜىٰسٛ اَللَّه، نغَمْ اَلْمَسِيحُ جٜيِمِنْ، ندٜنْ اَللَّه لِلٛيِمِنْ؞

اَلْکَوَلْ اَللَّه کٜسَلْ

¹تٛو، اٛنْ کَمِّي مِنْ ڤُطِّي مَنْتُکِ کٛعٜ اَمِنْ کَدِنْ؟ کٛو بٛو طُمْ دٛولٜ مِنْ نغَرْدَ اٜ طٜرٜىٰجِ کٛلَّيْطِ مِنٛنْ مِنْ ٻٜيٜ، کٛو پِوُطِ تٛ مٛوطٛنْ نغَمْ کٛلَّ وٛٻّٜ مِنْ ٻٜيٜ نٛ وٛٻّٜ نغَطَتَ؟ ²اٛنٛنْ اٜ کٛعٜ مٛوطٛنْ نغٛنِ طٜرٜوٛلْ اَمِنْ بِنْدَانغٛلْ ندٜرْ ٻٜرْطٜ اَمِنْ؞ کٛو مٛيٜ وَاوَيْ جَنْغَنغٛلْ اَنْدَنغٛلْ؞ ³اٛنْ کٛلِّي اٛنٛنْ نغٛنِ طٜرٜوٛلْ نغٛلْ اَلْمَسِيحُ وِنْدِ، نغٛلْ اٛ لِلْدِ لَاوٛلْ اَمِنْ؞ نَاع اٜ دَوَارُ نغٛلْ وِنْدِرَا، اَمَّا اٜ رُوحُ اَللَّه غٛودُطٛ يٛنْکِ نغٛلْ وِنْدِرَا؞ نَاع دٛوْ اَلّٛوَلْ حَيْرٜ نغٛلْ وِنْدَا، اَمَّا دٛوْ اَلّٛوَلْ ٻٜرْطٜ يِمْٻٜ نغٛلْ وِنْدَا؞ ⁴مِنْ مبِعُ نٛنْ نغَمْ اٜ مِنْ کٛولِي اَللَّه لَاوٛلْ اَلْمَسِيحُ؞ ⁵مِنْ کٜپَايِ مِنْ مبِعَ مِنْ مبَاوَيْ وَطُکِ کٛو طُمٜ اٜ بَوْطٜ اَمِنْ، اَمَّا بَوْطٜ اَمِنْ تٛ اَللَّه پِوٛيِ؞ ⁶کَنْکٛ وَطِ مِنْ مبَاوِ وَرْتُکِ اٜکِّتِنٛوٻٜ اَلْکَوَلْ کٜسَلْ؞ اَلْکَوَلْ نغَلْ بٛو دَرَاکِ دٛوْ دٛوکَ بِنْدَاطُمْ، اَمَّا دٛوْ رُوحُ مَاکٛ نغَلْ دَرِ؞ نغَمْ دٛوکَ بِنْدَاطُمْ اٜ فٛوطَ مَيْدٜ، اَمَّا رُوحُ اٜ حٛکَّ يٛنْکِ کِ رٜعَتَا؞

⁷طُمْ وِنْدِ دٛوکَ مُوسَ دٛوْ اَلّٛوجٜ حَيْرٜ، ندٜنْ شَرٜلْ کٛ مُوسَ حٛکّٜتٜىٰطُمْ، تٜدُّنغَلْ اَللَّه وَنْغِ وَطِ يٜىٰسٛ مَاکٛ اٜ طٜلْکِتٛو؞ کٛو ندٜ طٜلْکِتَاکِ کِنْ اٜ اُسْتٛو، فُو اٜ نٛنْ اِسْرَاعِيلَنْکٛعٜنْ مبَاوَايِ سُتَاکِ يٜىٰسٛ مَاکٛ؞ تٛ دٛوکَ غَدَّيْطُمْ مَيْدٜ وَرْدِي اٜ اِرِ نغَعَلْ تٜدُّنغَلْ، ⁸تٛو، کُوغَلْ رُوحُ اَللَّه ٻُرَيْ نٛنْ تٜدُّنغَلْ!‏ ⁹تٛ کٛ فٛوطَتَ کِيتَ اٜ وٛودِ تٜدُّنغَلْ، تٛو، کٛ وَطَتَ يِمْٻٜ کٜٻَ اَادِلَاکُ اَللَّه ٻُرَيْ نٛنْ تٜدُّنغَلْ نَاع سٜطَّ!‏ ¹⁰غٛونغَ، تٜدُّنغَلْ اَلْکَوَلْ کِينغَلْ وَلَا مَنْغُ جٛونِ تٛ نغَلْ حَوْتَامَ اٜ تٜدُّنغَلْ اَلْکَوَلْ کٜسَلْ؞ ¹¹تٛ پَٻّٛتٛوطُمْ وَرْدِي اٜ تٜدُّنغَلْ، تٛو، اَلْکَوَلْ کٜسَلْ تَبِتَيْنغَلْ ٻُرَيْ نٛنْ تٜدُّنغَلْ نَاع سٜطَّ!‏

¹²نغَمْ نٛنْ، ندٜ اٜ مِنْ نغٛودِ اِرِ ندٜعٜ کَمُّندٜ، اٜ مِنْ مٜتِرَ سٜمْبٜ ٻٜرْندٜ نَاع سٜطَّ؞ ¹³مِنٛنْ نَاع بٛ مُوسَ مِنْ مبَعِ، شُدِّرْطٛ يٜىٰسٛ مَاکٛ اٜ لٜفٜلْ، نغَمْ تٛع اِسْرَاعِيلَنْکٛعٜنْ شُتٛومٛ نغِعَ نٛ طٜلْکِتٛلْ يٜىٰسٛ مَاکٛ اُسْتٛرْتٛو؞ ¹⁴اَمَّا ٻٜ ندُلِّي فَامُ، نغَمْ حَا حَنْدٜ تٛ ٻٜ نجَنْغَنَامَ اَلْکَوَلْ کِينغَلْ، لٜفٜلْ نغٜلْ اٜ حَطَٻٜ ٻٜ ڤَامَ غٛونغَ، نغَمْ سُمْڤٛوتِرْکِ اٜ اَلْمَسِيحُ تَنْ اِتَّتَنغٜلْ؞ ¹⁵غٛونغَ، حَا جٛونِ تٛ ٻٜ نجَنْغَنَامَ اَتَّوْرَ، لٜفٜلْ نغٜلْ اٜ وُمْنَ ٻٜرْطٜ مَٻّٜ؞ ¹⁶اَمَّا تٛ نٜطّٛ تُوبِي تٛکِّي جٛومِرَاوٛ، طُمْ اِتَّيْ لٜفٜلْ نغٜلْ دَغَ ٻٜرْندٜ مَاکٛ؞ ¹⁷تٛو، جٛومِرَاوٛ اٛنْ وٛنِ رُوحُ اَللَّه، ندٜنْ تٛ رُوحُ اَللَّه وٛنِ طٛنْ رِمْطِنٜىٰکِ وٛنِ؞ ¹⁸اٜنٜنْ ٻٜ غٜىٰشٜ مُعّٜنْ شُدِّتَا اٜنْ فُو اٜنْ کٛلَّ تٜدُّنغَلْ جٛومِرَاوٛ اٜنْ ٻٜيْدَ وَرْتُکِ بٛ مَاکٛ؞ تٜدُّنغَلْ نغَلْ وَطَيْ کَ ٻٜيْدَاکِ؞ طُعُمْ طُمْ کُوغَلْ جٛومِرَاوٛ، کَنْکٛ وٛنِ رُوحُ؞

جَوْدِ ندٜرْ غٛجِيجٜ لٛوْرٜ

¹نغَمْ نٛنْ، ندٜ اَللَّه يُرْمِنَنِيمِنْ حٛکِّيمِنْ کُوغَلْ نغَعَلْ، مِنْ اِتَّتَا کَمُّندٜ؞ ²مِنْ نغَݧِي حُوُکِ کُوطٜ شُوطِيطٜ شٜمْتِنِيطٜ؞ مِنْ مَجِّنْتَا يِمْٻٜ، مِنْ نغَيْلِتَتَا مَعَنَ وٛلْدٜ اَللَّه؞ اَمَّا اٜ مِنْ مبِعَ غٛونغَ اٜ نجَيْرِ؞ لَاوٛلْ وَطُکِ نٛنْ، کٛو مٛيٜ اَنْدَيْ ندٜرْ ٻٜرْندٜ مُوطُمْ يٜىٰسٛ اَللَّه مِنٛنْ اٜ مِنْ نغٛودِ غٛونغَ؞ ³تٛ حَبَرُ بٜلْطُمْ طُمْ مِنْ نغَعَجِنْتَ اٜ سُوطِي، وٛنْٻٜ دٛوْ لَاوٛلْ حَلْکٜرٜ تَنْ طُمْ سُوطَنِي؞ ⁴شٜيْطَنْ لَامِيطٛ دُونِيَارُ ندُعُ وُمْنِي ٻٜرْطٜ يِمْٻٜ ٻٜ کٛولَاکِ يٜىٰسُ، نغَمْ تٛع ٻٜ نغِعَ جَيْنغٛلْ حَبَرُ بٜلْطُمْ طُمْ تٜدُّنغَلْ اَلْمَسِيحُ نَنْدُطٛ اٜ اَللَّه؞ ⁵نغَمْ نَاع حَبَرُ اَمِنْ مِنْ نغَعَجِنْتَ، اَمَّا کٛ مِنْ نغَعَجِنْتَ وٛنِ يٜىٰسُ اَلْمَسِيحُ اٛ جٛومِرَاوٛ، مِنٛنْ بٛو نغَمْ مَاکٛ مِنْ نغَرْتِ مَشُّٻٜ مٛوطٛنْ؞ ⁶نغَمْ اَللَّه بِيطٛ جَيْنغٛلْ وُرْتٛيٛو دَغَ ندٜرْ ݧِوْرٜ، کَنْکٛ وَطِ جَيْنغٛلْ مَاکٛ يٜيْنِي ندٜرْ ٻٜرْطٜ اَمِنْ نغَمْ مِنْ اَنْدَ تٜدُّنغَلْ اَللَّه نغَلْ طُمْ يِعِي اٜ يٜىٰسٛ يٜىٰسُ اَلْمَسِيحُ؞

⁷اَمَّا مِنٛنْ اٜ مِنْ نَنْدِ اٜ غٛجِيجٜ لٛوڤٜ؞ طُمْ رٜسِي جَوْدِ ندٜرْ اَمِنْ نغَمْ حٛلُّکِ طٜعٜ بَوْطٜ ٻُرْطٜ کٛو طٜيٜ بَوْطٜ، تٛ اَللَّه طٜ پِوٛيِ، نَاع تٛ اَمِنْ؞ ⁸مِنْ ٻِطَّامَ اٜ کٛو ندُيٜ وُتُّدُ، اَمَّا مِنْ ڤُسَايِ؞ ݧُمٛوجِ اَمِنْ نجِيٻَکٜ، اَمَّا مِنْ اِتَّايِ کَمُّندٜ؞ ⁹اٜ مِنْ تٛرّٜىٰ، اَمَّا اَللَّه سٜنْدِرَايِ اٜ اَمِنْ؞ اٜ مِنْ ندٛعّٜىٰ، اَمَّا مِنْ کَلْکَاکَ؞ ¹⁰کٛو ندٜيٜ اٜ مِنْ حَادٜ وَرٜىٰکِ نٛ طُمْ وَرِرِ يٜىٰسُ، نغَمْ يٛنْکِ اِرِ کِ مَاکٛ يِعٜىٰ ندٜرْ ٻَلِّ اَمِنْ؞ ¹¹نغَمْ مِنٛنْ غٛودُٻٜ يٛنْکِ اٜ مِنْ حَادٜ مَيْدٜ کٛو ندٜيٜ نغَمْ يٜىٰسُ، نغَمْ طُمْ يِعَ يٛنْکِ مَاکٛ ندٜرْ ٻَلِّ اَمِنْ طِعِ مَايَيْطِ؞ ¹²کَنْجُمْ وَطِ مِنْ کٜدِّ تٛ مَيْدٜ، نغَمْ اٛنٛنْ کٜٻٛنْ يٛنْکِ؞

¹³ندٜ اٜ مِنْ نغٛودِ حٛولَارٜ غٛعٛ اٜ بِنْدُطٛ اَايَارٜ بِيندٜ، ‏«‏مِ حٛولَکٜ، کَنْجُمْ وَطِ مٜتُمِ؞»‏ مِنٛنْ مَا مِنْ کٛولَکٜ، کَنْجُمْ وَطِ مِنْ مٜتِ؞ ¹⁴نغَمْ اٜ مِنْ اَنْدِ اَللَّه اُمِّنْطٛ يٜىٰسُ جٛومِرَاوٛ مٜىٰطٜنْ دَغَ مَيْدٜ، اٛ اُمِّنَيْمِنْ مِنٛنْ مَا نٛنْ نٛ اٛ اُمِّنِرِ يٜىٰسُ، اٛ وَدَّمِنْ حَوْتِ اٜ مٛوطٛنْ يٜىٰسٛ مَاکٛ؞ ¹⁵فُو طُعُمْ طُمْ نغَمْ ٻٜيْدَارِ مٛوطٛنْ، نغَمْ شَاحُ اَللَّه جٛتّٛتٛوطُمْ يِمْٻٜ طُطْٻٜ، وَطَ طُمْ ٻٜيْدَ يٜتُّکِ اَللَّه نغَمْ تٜدِّنْکِمٛ؞

حٛولَاکِ اَللَّه

¹⁶نغَمْ نٛنْ، مِنْ اِتَّتَا کَمُّندٜ؞ کٛو ندٜ ٻَلِّ اَمِنْ اٜ ٻٜيْدَ تَمڤُکِ، فُو اٜ نٛنْ ٻٜرْطٜ اَمِنْ اٜ شٜمْبِطِنٜىٰ کٛو ندٜيٜ؞ ¹⁷نغَمْ تٛرَّاجِ طِ مِنْ تٛرّٜتٜىٰ جٛونِ طِ سٜطَّنَاجِ طِ نٜىٰٻَتَا طِ نغَطَيْ مِنْ کٜٻَ تٜدُّنغَلْ نغَلْ حَا اَبَدَا ٻُرْنغَلْ کٛو طُمٜ؞ ¹⁸نغَمْ نٛنْ، حَکِّيلٛ اَمِنْ وَلَا دٛوْ کٛ غِتٜ نغِعَتَ؞ اٜ مِنْ نغَطَ حَکِّيلٛ اَمِنْ دٛوْ کٛ غِتٜ مبَاوَتَا يِيکِ؞ نغَمْ کٛ غِتٜ نغِعَتَ طُمْ پَٻّٛتٛوطُمْ، اَمَّا کٛ غِتٜ مبَاوَتَا يِيکِ، طُمْ تَبِتَيْطُمْ؞

¹نغَمْ اٜ مِنْ اَنْدِ ٻَلِّ اَمِنْ اٜ نَنْدِ اٜ لُکُرُ طُمْ مِنْ نجٛوطٛتٛو ندٜرْ، ندٜرْ دُونِيَارُ ندُعُ؞ تٛ لُکُرُ طُمْ سَنْکِتَامَ، اٜ مِنْ اَنْدِ اَللَّه حٛکَّيْمِنْ وُرٛ تَبِتَيْنغٛ تٛنْ دٛوْ، نغٛ مَحِرَاکَ اٜ جُنْغٛ نٜطّٛ؞ ²جٛونِ اٜ مِنْ اٛتَّ اٜ مِنْ کَاٻِي نَاع سٜطَّ نغَمْ طُمْ ٻٛرْنَمِنْ ٻَنْدُ اَمِنْ ندُ دٛوْ؞ ³نغَمْ تٛ مِنْ ٻٛرْنَامَ ٻَنْدُ ندُنْ، مِنْ نغَرْتَتَا يٛنْکِيجِ طِ نغَلَا ٻَنْدُ؞ ⁴نغٜعٜلْ شَرٜلْ نغٜلْ مِنْ نغٛنْدِ ندٜرْ لُکُرُ طُمْ دُونِيَارُ، وَاتٛ ٻَنْدُ اَمِنْ، اٜ مِنْ اٛتَّ نغَمْ تٛرَّاجِ طِ ٻَنْدُ ندُنْ يَرَتَ؞ نَاع نغَمْ اٜ مِنْ نغِطِ سٜنْدِرْکِ اٜ ٻَنْدُ ندُنْ، اَمَّا اٜ مِنْ نغِطِ طُمْ ٻٛرْنَمِنْ ٻَنْدُ اَمِنْ ندُ دٛوْ، نغَمْ ٻَنْدُ ندُ مَايَتَا حٛشَّ نجَيْرِ ٻَنْدُ مَايَيْندُ؞ ⁵اَللَّه اٜ حٛورٜ مُوطُمْ سِرْيِيمِنْ نغَمْ طُعُمْ، اٛ حٛکِّيمِنْ رُوحُ مَاکٛ نغَمْ تَبِّتِنَنْکِمِنْ کٛ اٛ وَطَنْتَمِنْ يٜىٰسٛ طٛعٛ؞

⁶کَنْجُمْ وَطِ کٛو ندٜيٜ اٜ مِنْ نغٛودِ سٜمْبٜ ٻٜرْندٜ؞ اٜ مِنْ اَنْدِ تٛ نِ اٜ مِنْ ندٜرْ ٻَنْدُ اَمِنْ ندُعُ، اٜ مِنْ نغٛطِّتِي وُرٛ اَمِنْ وٛنْغٛ تٛ جٛومِرَاوٛ؞ ⁷اٜ مِنْ نغَطَ جٛنْدٜ اَمِنْ دٛوْ حٛولَاکِ اَللَّه، نَاع دٛوْ کٛ مِنْ نغِعَتَ اٜ غِتٜ؞ ⁸غٛونغَ اٜ مِنْ نغٛودِ سٜمْبٜ ٻٜرْندٜ، ندٜنْ مِنْ ٻُرِي يِطُکِ مِنْ شٜنْدِرَ اٜ ندُعُ ٻَنْدُ مِنْ نجٛوطٛدٛو اٜ جٛومِرَاوٛ تٛنْ دٛوْ؞ ⁹نغَمْ نٛنْ، کٛ مِنْ نغِطِ وٛنِ مِنْ مبٜلْنَنَمٛ ٻٜرْندٜ، کٛو اٜ مِنْ ندٜرْ ندُعُ ٻَنْدُ کٛو اٜ تٛنْ دٛوْ؞ ¹⁰نغَمْ اٜنْ فُو دٛولٜ اٜنْ ندَرٛتٛ يٜىٰسٛ اَلْمَسِيحُ نغَمْ کِيتَ، نغَمْ کٛو مٛيٜ حٜٻَ مبَرْجَارِ کٛ وَطِ ندٜرْ ٻَنْدُ ندُعُ، کٛو کٛ اٛ وَطِ اٜ وٛوطِ کٛو طُمْ وٛوطَا؞

سِرْيٛوتِرْکِ يِمْٻٜ اٜ اَللَّه

¹¹ندٜ اٜ مِنْ اَنْدِ کٛ وٛنِ کُلٛلْ جٛومِرَاوٛ، کَنْجُمْ وَطِ اٜ مِنْ نغَطَ کٛ مِنْ مبَاوَتَ وَطُکِ مِنْ ڤٛوطٛيَ حَکِّيلٛ يِمْٻٜ؞ اَللَّه اٜ اَنْدِ نٛ مِنْ نغٛنْتِندِرِ بٛطُّمْ، اٜ مِ کَمّٛو اٛنٛنْ مَا اٛنْ اَندِمِنْ بٛطُّمْ ندٜرْ ٻٜرْطٜ مٛوطٛنْ؞ ¹²نَاع اٜ مِنْ نغِطِ مِنْ مَنَ کٛعٜ اَمِنْ يٜىٰسٛ مٛوطٛنْ، اَمَّا اٜ مِنْ نغِطِ مِنْ کٛکَّعٛنْ لَاوٛلْ مَنْتٛرَاکِمِنْ، نغَمْ مبَاوٛنْ نٛوتٛوطٛنْ پَمْطٜ پٜفْتٛوٻٜ کٛعٜ دٛوْ مَنْغُ مَٻّٜ نَاع دٛوْ کٛ وٛنِ ندٜرْ ٻٜرْطٜ مَٻّٜ؞ ¹³تٛ يِمْٻٜ کٛشِّيمِنْ مِنْ حَاݝَاٻٜ، فُو طُمْ نغَمْ اَللَّه؞ تٛ بٛو اٜ مِنْ ندٜرْ حَکِّيلٛ اَمِنْ، طُمْ نغَمْ مٛوطٛنْ؞ ¹⁴نغَمْ يِدّٜ اَلْمَسِيحُ وَطَتَمِنْ اٜ مِنْ کُوَ کُوطٜ اَمِنْ، نغَمْ اٜنْ تَبِّتِنِي غٛعٛتٛ مَايِي نغَمْ کٛو مٛيٜ، نغَمْ نٛنْ کٛو مٛيٜ مَايِي؞ ¹⁵اٛ مَايِي نغَمْ يِمْٻٜ فُو، نغَمْ تٛع ٻٜ نغَطَ جٛنْدٜ بٜلْنَنَيْندٜٻٜ ٻٜرْطٜ، اَمَّا ٻٜ نغَطَ جٛنْدٜ بٜلْنَنَيْندٜ اٛنْ طٛنْ مَيْطٛ نغَمْ مَٻّٜ اُمِّي دَغَ مَيْدٜ؞

¹⁶نغَمْ نٛنْ، دَغَ جٛونِ مِنْ کٛشَّتَا غٛطّٛ نٛ يِمْٻٜ دُونِيَارُ کٛشِّرِمٛ؞ کٛو ندٜ ندٜنّٛ مِنْ کٛشِّي اَلْمَسِيحُ نٛ يِمْٻٜ دُونِيَارُ کٛشِّرِمٛ، جٛونِ نَاع نٛنْ مِنْ کٛشِّرِمٛ؞ ¹⁷نغَمْ نٛنْ، فُو غَرْتُطٛ مٛ اَلْمَسِيحُ اٛ وَرْتِي نٜطّٛ کٜسٛ؞ کٛو طُمٜ طُمْ ندٜنّٛ پَٻَّکٜ، کٛو طُمٜ وَرْتِي کٜسُمْ؞ ¹⁸طُعُمْ فُو اَللَّه وَطِطُمْ شِرْيٛوتِرْطٛمِنْ اٜ مَاکٛ لَاوٛلْ اَلْمَسِيحُ، ندٜنْ اٛ حٛکِّيمِنْ کُوغَلْ وَعَجِنْکِ سِرْيٛوتِرْکِ يِمْٻٜ اٜ مَاکٛ؞ ¹⁹وَعَجُ طُمْ وٛنِ اَللَّه اٜ سِرْيٛوتِرَ يِمْٻٜ دُونِيَارُ اٜ مُوطُمْ لَاوٛلْ اَلْمَسِيحُ، ندٜنْ اٛ وِنْدَتَا حَکّٜ طُمْ ٻٜ نغَطِ؞ کَنْکٛ حٛکِّمِنْ کُوغَلْ وَعَجِنْکِ سِرْيٛوتِرْکِ اٜ مَاکٛ؞

²⁰نغَمْ نٛنْ، مِنْ مٜتٛوٻٜ کٛ اَلْمَسِيحُ وِعِمِنْ، بٛ اَللَّه تٛرٛتٛوعٛنْ لَاوٛلْ اَمِنْ؞ اٜ مِنْ تٛرٛوعٛنْ نغَمْ اَلْمَسِيحُ، شِرْيٛوتِرٜىٰ اٜ اَللَّه؞ ²¹اَلْمَسِيحُ مٜىٰطَايِ وَطُکِ حَکّٜ، اَمَّا اَللَّه يٛوِي فُو حَکّٜىٰجِ مٜىٰطٜنْ دٛوْ مَاکٛ، نغَمْ لَاوٛلْ مَاکٛ نغَرْتٜنْ اَادِلِعٜنْ يٜىٰسٛ اَللَّه؞

¹مِنٛنْ، مِنْ کُودٛوٻٜ اٜ اَللَّه؞ نغَمْ مَاجُمْ اٜ مِنْ تٛرٛوعٛنْ تٛع اٛنْ اَلُ شَاحُ اَللَّه طُمْ کٜٻُطٛنْ وَرْتَ مٜىٰرٜ؞ ²نغَمْ اَللَّه وِعِي،

‏«‏ندٜ شَرٜلْ کَانُنغٜلْ وَطِ،

مِ نَنِي دٛعَارٜ مَاطَ،

ندٜ ݧَلْندٜ کِسْندَمْ وَرِ،

مِ وَلِّيمَ؞»‏

رَا، جٛونِ وٛنِ شَرٜلْ کَانُنغٜلْ، جٛونِ وٛنِ ݧَلْندٜ کِسْندَمْ!‏

³مِنْ نغِطَا مِنْ نغَطَ کٛ وَطَتَ غٛطّٛ فٜغّٛو دٛوْ لَاوٛلْ غٛونغَ، نغَمْ تٛع طُمْ حٜٻَ کٛ طُمْ حُطَتَ ندٜرْ کُوغَلْ اَمِنْ؞ ⁴اَمَّا ندٜرْ کٛو طُمٜ کٛ مِنْ نغَطَتَ، اٜ مِنْ کٛلَّ مِنْ مَشُّٻٜ اَللَّه ٻٜ غٛونغَ ندٜرْ مُݧَلْ مَنْغَلْ نغَلْ مِنْ نغَطَتَ ندٜرْ تٛرَّ، اٜ شَطٜىٰلٜ، اٜ ٻِطَّارٜ؞ ⁵مِنْ ڤِيَامَ، مِنْ شُرَامَ، طُمْ اُمِّنِي حَوْرٜ دٛوْ اَمِنْ، مِنْ کُوِي نَاکِ ٻَلِّ اَمِنْ مبَاتِ، مِنْ مبَالِي بَلْطٜ مِنْ طَانَاکِ، بَنْݧٜ مِنْ کٜٻَتَا کٛ مِنْ ݧَامَتَ؞ ⁶مِنْ کٛلِّي مِنْ مَشُّٻٜ اَللَّه ٻٜ غٛونغَ ندٜرْ لَٻْکِ ٻٜرْطٜ کِ مِنْ نغٛودِ، اٜ اَنْدَلْ، اٜ مُݧَلْ، اٜ نٛ مِنْ مبَلِّرْتَ يِمْٻٜ، اٜ رُوحُ اَللَّه طُمْ مِنْ نغٛودِ، اٜ يِدّٜ ندٜ غٛونغَ، ⁷اٜ مٜتُکِ غٛونغَ، اٜ بَوْطٜ اَللَّه؞ اَادِلَاکُ وٛنِ کٛ مِنْ کٛنِرْتَ طُمْ مِنْ نجٛغِي جُنْغٛ ݧَامٛ اٜ نَنٛ؞ ⁸اٜ مِنْ کٛکّٜىٰ مَنْغُ، اٜ مِنْ شٜمْتِنٜىٰ، اٜ مِنْ کُطٜىٰ، اٜ مِنْ مَنٜىٰ؞ مِنْ کٛشَّامَ بٛ مَجِّنٛوٻٜ يِمْٻٜ، اَمَّا مِنْ غٛونغَعٜنْ؞ ⁹مِنْ کٛشَّامَ بٛ طُمْ اَنْدَامِنْ، اَمَّا اٜ طُمْ اَندِمِنْ بٛطُّمْ؞ مِنْ کٛشَّامَ بٛ مَيْٻٜ، اَمَّا اٜ مِنْ ڤٛوفَ؞ اٜ مِنْ ڤِيٜىٰ، اَمَّا مِنْ مَايَايِ؞ ¹⁰اٜ طُمْ وَطَ مِنْ نَنَ شِيَ بٜلْطُمْ ٻٜرْندٜ، اَمَّا کٛو ندٜيٜ اٜ مِنْ مبٜلْمبٜلْتَ؞ مِنْ نغَلَنَا، اَمَّا مِنْ نغَرْتِرِي طُطْٻٜ رِسْکُٻٜ؞ مِنْ کٛشَّامَ بٛ کٛو کٛ مِنْ نغٛودِ، اَمَّا اٜ مِنْ نغٛودِ کٛو طُمٜ؞

¹¹اٛنٛنْ کٛرِنْتِيَنْکٛعٜنْ، مِنْ مٜتَنِيعٛنْ اٜ نجَيْرِ؞ مِنْ مَٻِّتَنِيعٛنْ ٻٜرْطٜ اَمِنْ؞ ¹²نَاع مِنٛنْ نغَݧِ حٛلُّکِعٛنْ يِدّٜ، اَمَّا اٛنٛنْ نغَݧِ حٛلُّکِمِنْ يِدّٜ؞ ¹³مِ مٜتَنِيعٛنْ نٛ مٜتِرَنَيْمِ ٻِٻّٜ اَمْ؞ اٜ مِ تٛرٛوعٛنْ، ندٜ اٜ مِنْ نغِطِعٛنْ، اٛنٛنْ مَا مَٻِّتَنٜىٰمِنْ ٻٜرْطٜ مٛوطٛنْ؞

تٛع اٛنْ کَوْتُ کٛعٜ اٜ يِمْٻٜ ٻٜ کٛولَاکِ يٜىٰسُ

¹⁴تٛع اٛنْ کَوْتُ کٛعٜ اٜ يِمْٻٜ ٻٜ کٛولَاکِ يٜىٰسُ؞ کٛ حَوْتِ اَادِلَاکُ اٜ حَلّٜىٰندٜ؟ کٛو بٛو، نغٛيٜ سُمْڤٛ وٛنِ حَکُّندٜ جَيْنغٛلْ اٜ ݧِوْرٜ؟ ¹⁵کِيٜ سِرْيٛوتِرْکِ وٛنِ حَکُّندٜ اَلْمَسِيحُ اٜ شٜيْطَنْ؟ کٛو بٛو، کٛ حَوْتِ تٛکُّطٛ يٜىٰسُ اٜ مٛ تٛکَّايِ يٜىٰسُ؟ ¹⁶ندٜنْ کٛ حَوْتِ وُرٛ شٜنِينغٛ نغٛ اَللَّه اٜ غُنْکِيجِ؟ ٻَلِّ مٜىٰطٜنْ نغٛنِ وُرٛ شٜنِينغٛ نغٛ اَللَّه مٛ يٛنْکِ؞ نغَمْ اٛ وِعِ،

‏«‏مِ جٛوطٛتٛ ندٜرْ مَٻّٜ،

مِ يَادَ اٜ مَٻّٜ؞

مِ وَرْتَيْ اَللَّه مَٻّٜ،

ٻٜ نغَرْتَيْ يِمْٻٜ اَمْ؞»‏

¹⁷طٛنْمَا اٛ وِعِ، ‏«‏نغَمْ نٛنْ، مبُرْتٛيٜىٰ دَغَ ندٜرْ مَٻّٜ،

کَکِّتٜىٰ دَغَ ندٜرْ مَٻّٜ؞

تٛع اٛنْ مٜىٰمُ کٛ لَاٻَا،

ندٜنْ مِ جَٻَيْعٛنْ؞

¹⁸مِ وَرْتَيْ ݧَاکٛ مٛوطٛنْ،

اٛنٛنْ بٛو اٛنْ نغَرْتَيْ ٻِٻّٜ اَمْ وٛرْٻٜ اٜ رٜوْٻٜ؞

نٛنْ جٛومِرَاوٛ جٛومُ بَوْطٜ وِعِ؞»‏

¹تٛو، بَنْدِرَاٻٜ اَمْ ٻٜ نغِطُمِ، ندٜ اٜنْ نغَطَنَامَ اَلْکَوَلْ دٛوْ فُو طُعُمْ، اٜنْ لَاٻِنْ کٛعٜ مٜىٰطٜنْ دَغَ کٛو طُمٜ غَطٛوجُمْ ٻَلِّ مٜىٰطٜنْ اٜ ٻٜرْطٜ مٜىٰطٜنْ نغَرْتَ کٛ لَاٻَا يٜىٰسٛ اَللَّه؞ اٜنْ نغَرْتُ ٻٜ سٜنَاکِ کٜىٰوُکِ، کُلٛوٻٜ اَللَّه؞

وٜلْوٜلٛ بُلُسْ

²کٛولٜىٰمِنْ ندٜرْ يِدّٜ؞ مِنْ نغَطَنَايِ غٛطّٛ کٛ وٛوطَا، مِنْ مَجِّنَايِ غٛطّٛ، مِنْ پٛيْرَايِ غٛطّٛ نغَمْ مِنْ نجَٻَنَمٛ غٛطُّمْ؞ ³مِ وِعَايِ حَالَ کَعَ نغَمْ مِ يٛوَنَعٛنْ غٛطُّمْ کٛ وٛوطَا؞ مِ وِعِينٛعٛنْ اٜ مِنْ نغِطِعٛنْ نَاع سٜطَّ ندٜرْ ٻٜرْطٜ اَمِنْ کٛو اٜ مِنْ فٛوفَ کٛو ندٜرْ مَيْدٜ؞ ⁴مِ حٛولَکٜعٛنْ ٻٜرْندٜ غٛعٛ، اٜ مِ مَنْتٛرٛوعٛنْ نَاع سٜطَّ، اٛنْ شٜمْبِطِنِييَمْ نَاع سٜطَّ؞ فُو اٜ تٛرَّاجِ طِ مِنْ نجَرَتَ، وٜلْوٜلٛ اَمْ وَلَا کٜىٰرٛلْ؞

⁵نغَمْ کٛ مِنْ نغَرِ لٜيْدِ مَکِدٛونِيَ، مِنْ کٜٻَايِ سِوْتَارٜ، اَمَّا کٛو تٛيٜ تٛ مِنْ نغَيْلِتٛرِي اٜ مِنْ تٛرّٜىٰ؞ مِنْ نغٜدّٛوتِرِي اٜ وٛٻّٜ، ندٜرْ ٻٜرْطٜ اَمِنْ کُلٛلْ نَنْغِمِنْ؞ ⁶اَمَّا اَللَّه بَلْتِنٛووٛ ٻٜرْطٜ غٛنْٻٜ ندٜرْ وَنَّارٜ، اٛ وَلْتِنِ ٻٜرْطٜ اَمِنْ اٜ غَرٛلْ تِيتُسْ؞ ⁷نَاع وَرْکِ مَاکٛ تَنْ وَلْتِنِ ٻٜرْطٜ اَمِنْ، اَمَّا حَبَرُ طُمْ اٛ حٛکِّمِنْ نٛ مبَلْتِنِرْطٛنْ ٻٜرْندٜ مَاکٛ؞ اٛ وِعِيمِنْ نٛ کَاٻِرْطٛنْ نغِعٛنْيَمْ، اٜ نٛ نغَنِّرْطٛنْ دٛوْ کٛ نغَطَنْطٛنْيَمْ، اٜ نٛ نغِطِرْطٛنْ وَلُّکِيَمْ؞ کَنْجُمْ ٻٜيْدَنِيَمْ وٜلْوٜلْتُکِ؞

⁸کٛو تٛ طٜرٜوٛلْ نغٛلْ مبِنْدَنْمِعٛنْ وَطِي اٛنْ نَنِي شِيَ بٜلْطُمْ، طُمْ وَنَّايِيَمْ جٛونِ، کٛو ندٜ ندٜنّٛ مِ وَنِّي، نغَمْ مِ فَامِي طٜرٜوٛلْ نغٛلْ وَطِي اٛنْ نَنِي شِيَ بٜلْطُمْ ٻٜرْطٜ، کٛو ندٜ طُمْ شَرٜلْ سٜطَّ تَنْ؞ ⁹جٛونِ اٜ مِ نَنَ بٜلْطُمْ ندٜرْ ٻٜرْندٜ اَمْ، نَاع نغَمْ اٛنْ نَنَايِ بٜلْطُمْ، اَمَّا نغَمْ شِيَ نَنْکِ بٜلْطُمْ مٛوطٛنْ وَطِ تُوبُطٛنْ؞ نغَمْ شِيَ نَنْکِ بٜلْطُمْ کِنْ طُمْ اِرِ کِ اَللَّه يِطِ؞ نغَمْ نٛنْ مِنْ نغَطَنَايِعٛنْ کٛ وٛوطَا؞ ¹⁰نغَمْ شِيَ نَنْکِ بٜلْطُمْ اِرِ کِ اَللَّه يِطِ اٜ وَطَ نٜطّٛ تُوبَ حٜٻَ کِسْندَمْ؞ کِ وَطَتَا اٛ وِعَ، ‏«‏دَا اٜ مِ اَنْدُنٛو،»‏ اَمَّا شِيَ نَنْکِ بٜلْطُمْ اِرِ کِ دُونِيَارُ اٜ فٛوطَ مَيْدٜ؞ ¹¹ندَارٜىٰ نغِعٛنْ کٛ شِيَ نَنْکِ بٜلْطُمْ مٛوطٛنْ وَدَّنِعٛنْ، کِ وَطِيعٛنْ اٛنْ نغَرْتِي تِيطُٻٜ، اٛنْ نغَرْتِي کَاٻُٻٜ کٛلَّ اٛنٛنْ نَاع اٛنْ غَطٛوٻٜ کٛ وٛوطَا، اٛنْ ٻٜرْنِي دٛوْ کٛ وٛوطَا، اٛنْ کُلْتٛرِي، اٛنْ کَاٻِي نغِعٛنْيَمْ، اٛنْ نغِطِي وَلُّکِيَمْ، اٛنْ کَاٻِي نغِعٛنْ طُمْ تَپَنِي غَطٛووٛ حَکّٜ کِيتَ؞ اٛنْ کٛلِّي اٛنْ نغَطِي کٛ حَانِ دٛوْ کٛ مبِنْدَنّٛومِعٛنْ؞

¹²نغَمْ نٛنْ، کٛو ندٜ مِ وِنْدَنِينٛعٛنْ طٜرٜوٛلْ، نَاع نغَمْ نٜطّٛ غَطُطٛ کٛ وٛوطَا مبِنْدُمِنغٛلْ، کٛو نغَمْ نٜطّٛ غَطَنَاطٛ کٛ وٛوطَا، اَمَّا مِ وِنْدُنغٛلْ نغَمْ نغِعَنٛنْ غِتٜ مٛوطٛنْ نٛ نغِرُّطٛنْمِنْ يٜىٰسٛ اَللَّه؞ ¹³کَنْجُمْ وَلْتِنِ ٻٜرْطٜ اَمِنْ؞

کٛ ٻُرِ نٛنْ، وٜلْوٜلٛ نغٛ تِيتُسْ نَنِ مبٜلْنَنِيمِنْ ٻٜرْطٜ، نغَمْ اٛنْ فُو اٛنْ مبٜلْنَنِيمٛ ٻٜرْندٜ؞ ¹⁴مِ مَنْتٛرَکٜعٛنْ يٜىٰسٛ تِيتُسْ، اٛنٛنْ بٛو اٛنْ شٜمْتِنَايِيَمْ؞ نٛنْ نٛ کٛو طُمٜ طُمْ مِنْ مبِعِعٛنْ طُمْ غٛونغَ، نٛنْ مَا مَنْتٛرَاکِ کِ مِنْ مَنْتٛرِيعٛنْ يٜىٰسٛ تِيتُسْ تَبِّتِنَامَ طُمْ غٛونغَ؞ ¹⁵يِدّٜ ندٜ تِيتُسْ يِطِعٛنْ جٛونِ ٻُرِي ندٜ ندٜنّٛ، تٛ اٛ ݧُمِي نٛ تٛکِّرْطٛنْ کٛ طُمْ وِعِعٛنْ، اٜ نٛ نجَٻّٛرِيطٛنْمٛ ندٜرْ مَنْغُ اٜ فَامَنْکِ؞ ¹⁶اٜ مِ نَنَ بٜلْطُمْ نغَمْ اٜ مِ حٛولِيعٛنْ اٜ ٻٜرْندٜ غٛعٛ؞

وَلُّکِ تٛکُّٻٜ يٜىٰسُ غٛنْٻٜ اُرُشَلِيمَ

¹تٛو، بَنْدِرَاٻٜ اَمْ، جٛونِ اٜ مِنْ نغِطِ اَنْدٛنْ شَاحُ طُمْ اَللَّه حٛکِّ تٛکُّٻٜ يٜىٰسُ غٛنْٻٜ مَکِدٛونِيَ؞ ²کٛو ندٜ ٻٜ ڤٛوندِرَامَ تٛرَّ کَلُّکَ، طٛنْمَا اٜ ٻٜ ندٜرْ دُلّٜرٜ کَلُّندٜ، فُو اٜ نٛنْ وٜلْوٜلٛ مَٻّٜ مَنْغٛ وَطِي ٻٜ کٛکِّي بَلَّلْ مَنْغَلْ؞ ³مِ شٜيْدَکٜ ٻٜ کٛکِّي بَلَّلْ نٛ ٻٜ مبَاوِ حٛکُّکِ، حَا مَا کٛ ٻُرِ نٛنْ؞ ندٜرْ يِدّٜ ٻٜرْطٜ مَٻّٜ، ⁴ٻٜ تٛرَکٜمِنْ نَاع سٜطَّ مِنْ اَلَٻٜ ٻٜ نغَطَ جُنْغٛ ندٜرْ کُوغَلْ وَلُّکِ يِمْٻٜ اَللَّه غٛنْٻٜ اُرُشَلِيمَ؞ ⁵ٻٜ نغَطِي کٛ ٻُرِ ݧُمٛ اَمِنْ؞ اَرَنْدٜ ٻٜ کٛکِّي جٛومِرَاوٛ کٛعٜ مَٻّٜ، ندٜنْ مِنٛنْ مَا ٻٜ کٛکِّيمِنْ کٛعٜ مَٻّٜ نٛ اَللَّه يِطِ؞ ⁶ندٜ تِيتُسْ فُطِّ کُوغَلْ حَوْرُتُکِ بَلَّلْ تٛ مٛوطٛنْ، مِنْ تٛرَکٜمٛ اٛ سٛعّٛو تٛ مٛوطٛنْ اٛ يٛتِّنَنغَلْ؞ ⁷تٛو، اٛنْ نغَطِي بٛطُّمْ ندٜرْ کٛو طُمٜ، وَاتٛ ندٜرْ حٛولَاکِ يٜىٰسُ، اٜ مٜتُکِ بٛطُّمْ، اٜ اَنْدُکِ غٛونغَ، اٜ يِدّٜ وَلُّکِ، اٜ يِدّٜ ندٜ نغِطّٛنْمِنْ؞ نٛنْ مَا اٜ مِنْ نغِطِ نغَطٛنْ بٛطُّمْ ندٜرْ نغَعَلْ کُوغَلْ وَلُّکِ؞

⁸نَاع اٜ مِ وِعَ دٛولٜ نغَطّٛنْ نٛنْ؞ مِ حٛکُّعٛنْ حَبَرُ بَلَّلْ مَنْغَلْ نغَلْ وٛٻّٜ مبَلِّ نغَمْ مِ اَنْدَ کٛو يِدّٜ ندٜ نغِطّٛنْ وٛٻّٜ ندٜ غٛونغَ؞ ⁹نغَمْ اٛنْ اَنْدِ کٛ جٛومِرَاوٛ مٜىٰطٜنْ يٜىٰسُ اَلْمَسِيحُ وَطَنِعٛنْ نغَمْ يِدّٜ مَاکٛ؞ کٛو ندٜ اٛ دِسْکُطٛ، نغَمْ مٛوطٛنْ اٛ وَرْتِ مٛ وَلَنَا، نغَمْ لَاوٛلْ دُلّٜرٜ مَاکٛ نغَرْتٛنْ رِسْکُٻٜ؞

¹⁰رَا شَاوٛرِ طُمْ کٛکَّيْمِعٛنْ دٛوْ فِي طُعُمْ؞ رٛوَنِ اٛنٛنْ اَرْتِ حٛکُّکِ بَلَّلْ، نَاع اٛنْ اَرْتُ حٛکُّکِ بَلَّلْ تَنْ، حَا مَا اٛنْ اَرْتِي يِطُکِ حٛکُّکِ بَلَّلْ نغَلْ؞ ¹¹تٛو، جٛونِ سٜيْ نجٛتِّنٛنْ کُوغَلْ نغَلْ اٜ اِرِ ٻٜرْندٜ ندٜ ڤُطِّرْطٛنْغَلْ؞ کٛکّٜىٰ کٛ مبَاوٛتٛنْ حٛکُّکِ؞ ¹²نغَمْ تٛ اٛنْ نغٛودِ ٻٜرْطٜ حٛکُّکِ بَلَّلْ، اَللَّه جَٻَيْ کٛ کٛکُّطٛنْ؞ اَللَّه اٜ رَارَ کٛ نغٛودُطٛنْ، نَاع کٛ اٛنْ نغَلَا؞

¹³کٛ نغِطُمِ وٛنِ نَاع تٛرّٛنْ کٛعٜ مٛوطٛنْ نغَمْ مبَلّٛنْ وٛٻّٜ، اَمَّا اٜ مِ يِطِ يِمْٻٜ فُو ڤٛتِّدَ؞ ¹⁴جٛونِ طُوطُکِ جَوْدِ مٛوطٛنْ وَلَّيْ وٛنْٻٜ ندٜرْ دُلّٜرٜ؞ يٜىٰسٛ طٛعٛ کَمْٻٜ مَا، ٻٜ مبَلَّعٛنْ ندٜرْ دُلّٜرٜ مٛوطٛنْ، نغَمْ کٛو طُمٜ فٛتِّدَنَ کٛو مٛيٜ؞ ¹⁵نٛنْ نٛ طُمْ وِنْدِرَا، ‏«‏نٛکُّطٛ طُطُّمْ طُمْ طُوطَايِ؞ نٛکُّطٛ سٜطَّ، طُمْ فَمْطَايِ؞»‏

تِيتُسْ اٜ حِغٛوٻٜ مُوطُمْ

¹⁶اَمَّا يٜتّٛورٜ تَبِّتَ تٛ اَللَّه غَطُطٛ تِيتُسْ وَرْتِ غِطّٛ وَلُّکِعٛنْ نٛنْ نٛ مِنْ نغِطِرِ وَلُّکِعٛنْ؞ ¹⁷نَاع نغَمْ مِنْ تٛرَکٜمٛ تَنْ وَطِ اٛ جَٻِ يَاکِ تٛ مٛوطٛنْ، اَمَّا کَنْکٛ اٜ حٛورٜ مَاکٛ سُٻِ يَحَ تٛ مٛوطٛنْ نغَمْ اٛ حَاٻِي اٛ وَلَّ؞ ¹⁸مِنْ لِلْدٛيَيْمٛ اٜ بَنْدِرَاوٛ مٜىٰطٜنْ مَنٜتٜىٰطٛ کٛو تٛيٜ تٛ تٛکُّٻٜ يٜىٰسُ کَوْرِتَتَ؞ اٜ مٛ مَنٜىٰ نغَمْ وَعَجِنْکِ حَبَرُ بٜلْطُمْ؞ ¹⁹نَاع کَنْجُمْ تَنْ، ٻٜ شُٻِيمٛ نغَمْ اٛ يَادَ اٜ اَمِنْ ندٜرْ يَادُ يَارُکِ بَلَّلْ نغَلْ طُمْ حَوْرِتَنِ تٛکُّٻٜ يٜىٰسُ غٛنْٻٜ اُرُشَلِيمَ؞ کَنْجُمْ وٛنِ کُوغَلْ بٛنْغَلْ نغَلْ مِنْ نغَطَتَ نغَمْ مَوْنِنْکِ جٛومِرَاوٛ، طٛنْمَا نغَمْ حٛلُّکِ نٛ مِنْ نغِطِرِ وَلُّکِ؞

²⁰اٜ مِنْ ندٛغَّ تٛع غٛطّٛ مٜتَ کَلُّکَ دٛوْ نٛ مِنْ کُوِرْتَ کُوغَلْ مَنْغَلْ نغَعَلْ نغَلْ مٛٻْتُکِ اٜ سٜنْدُکِ؞ ²¹اٜ مِنْ نغِطِ مِنْ نغَطَ کٛ حَانِ، نَاع يٜىٰسٛ جٛومِرَاوٛ تَنْ، اَمَّا حَا مَا اٜ يٜىٰسٛ يِمْٻٜ؞

²²طٛنْمَا مِنْ لِلْدٛيَيْٻٜ اٜ بَنْدِرَاوٛ مٜىٰطٜنْ، ندٜ طُطُّمْ مِنْ ڤٛوندِيمٛ مِنْ نغِعِي اٜ مٛ يِطِ وَلُّکِ اٜ طَتٜ طُطّٜ، اَمَّا جٛونِ اٛ ٻُرِي يِطُکِ وَلُّکِ نغَمْ اٜ مٛ حٛولِيعٛنْ نَاع سٜطَّ؞ ²³تِيتُسْ، اٛ حِغٛ کُوغَلْ اَمْ، مِنْ اٜ مَاکٛ اٜ مِنْ کُودَ نغَمْ مٛوطٛنْ؞ بَنْدِرَاٻٜ مٜىٰطٜنْ جَادٛوٻٜ اٜ مَاکٛ، ٻٜ لِلَاٻٜ ندٜرْ تٛکُّٻٜ يٜىٰسُ اَلْمَسِيحُ، کُوغَلْ مَٻّٜ اٜ تٜدِّنَمٛ؞ ²⁴نغَمْ نٛنْ، کٛلّٜىٰٻٜ يِدّٜ مٛوطٛنْ اٜ کٛ وَطَتَ اٜ مِنْ مَنْتِتٛرٛوعٛنْ، نغَمْ کَوْتٜ تٛکُّٻٜ يٜىٰسُ تَبِّتِنَ مَنْتٛرَاکِعٛنْ کِ مِنْ مَنْتٛرْتٛوعٛنْ طُمْ غٛونغَ؞

وَلُّکِ تٛکُّٻٜ يٜىٰسُ

¹نَاع طُمْ دٛولٜ مِ وِنْدَنَعٛنْ دٛوْ کُوغَلْ وَلُّکِ يِمْٻٜ اَللَّه؞ ²نغَمْ اٜ مِ اَنْدِ اٛنْ نغِطِ وَلُّکِ نَاع سٜطَّ؞ مِ مَنْتٛرَکٜعٛنْ يٜىٰسٛ يِمْٻٜ مَکِدٛونِيَ مِ وِعِيٻٜ اٛنٛنْ يِمْٻٜ اَکَايَ اٛنْ شِرْيَکٜ کٛکّٛنْ بَلَّلْ دَغَ رٛوَنِ؞ تِينَارٜ مٛوطٛنْ وَطِ طُطْٻٜ ندٜرْ مَٻّٜ ڤُطِّ وَلُّکِ؞ ³اَمَّا مِ لِلٛيِي ٻٜنْ طٛنْ بَنْدِرَاٻٜ تٛ مٛوطٛنْ نغَمْ شِرْيٛوطٛنْ وَلُّکِ نٛ مبِيمِ، نغَمْ تٛع مَنْتٛرَاکِ کِ مِنْ مَنْتٛرْتٛوعٛنْ دٛوْ فِي طُعُمْ وَرْتَ مٜىٰرٜ؞ ⁴نغَمْ تٛ مِ وَرْدٛيِي اٜ وٛٻّٜ ندٜرْ تٛکُّٻٜ يٜىٰسُ وٛنْٻٜ مَکِدٛونِيَ مِنْ تَوِي اٛنْ شِرْيَاکِ، مِ نَنَيْ شٜمْتُطُمْ نَاع سٜطَّ نغَمْ مَنْتٛرَاکِ کِ مَنْتٛرْتٛومِعٛنْ، ندٜنْ نَاع مِنْ تَنْ سٜمْتَتَ، حَا اٜ اٛنٛنْ؞ ⁵نغَمْ نٛنْ، مِ ݧُمِي دٛولٜ مِ تٛرٛو بَنْدِرَاٻٜ ٻٜنْ طٛنْ اَرْتَ يَاکِ تٛ مٛوطٛنْ، ٻٜ تَبِّتِنَ اٛنْ شِرْيَکٜ بَلَّلْ مَنْغَلْ نغَلْ نغَطّٛنْ اَلْکَوَلْ کٛ مِ وَرَ؞ نغَمْ تٛ مِ وَرِي مِ تَوَ اٜ نغَلْ حَوْرِتِي، نغَلْ وَرْتَ بَلَّلْ نغَلْ کٛکُّطٛنْ ٻٜرْندٜ غٛعٛ، نَاع اٜ دٛولٜ؞

⁶ݧُمٜىٰ طُعُمْ؞ کٛو مٛيٜ اَاوُطٛ سٜطَّ، سٜطَّ اِتَّتَ، ندٜنْ فُو اَاوُطٛ کٛ طُوطِ، کٛ طُوطِ اِتَّتَ؞ ⁷کٛو مٛيٜ سٜيْ حٛکَّ کٛ سُٻِ حٛکُّکِ ندٜرْ ٻٜرْندٜ مُوطُمْ، نَاع اٜ نَوْطُمْ ٻٜرْندٜ کٛو اٜ دٛولٜ، نغَمْ اَللَّه اٜ يِطِ کٛکّٛووٛ ندٜرْ بٜلْطُمْ ٻٜرْندٜ؞ ⁸اَللَّه اٜ وَاوَ حٛکُّکِعٛنْ کٛو اِرِ طُمٜ بَرْکَ ٻُرْطُمْ کٛ نغِطّٛنْ، نغَمْ کٛو ندٜيٜ کٜٻٛنْ کٛو طُمٜ کٛ حٜپَتَعٛنْ اٜ کٛ مبَلِّرْتٛنْ وٛٻّٜ؞ ⁹نٛنْ نٛ طُمْ وِنْدِرَا،

‏«‏اٜ مٛ سَنْکِتَ شَاحُ مَاکٛ ندٜرْ يِمْٻٜ ٻٜ نغَلَنَا،

کُوطٜ مَاکٛ بٛطّٜ طٜ تَبُتُطٜ حَا اَبَدَا؞»‏

¹⁰اَللَّه وٛنِ کٛکّٛووٛ دٜمٛووٛ اَوْدِ، کٛکّٛووٛ يِمْٻٜ کٛ ݧَامَتَ؞ اٛ حٛکَّيْعٛنْ کٛ حٜپَتَعٛنْ، اٛ طُطِّنَيْطُمْ، نغَمْ ٻٜيْدٛنْ بَلَّلْ نغَلْ کٛکّٛتٛنْ کَانُٻٜ مبَلّٜىٰ؞ ¹¹اٛ بَرْکِطِنَيْعٛنْ اٜ کٛو نغٛلٜ لَاوٛلْ نغَمْ نغَرْتٛنْ کٛکّٛوٻٜ بَلَّلْ کٛو ندٜيٜ، ندٜنْ يِمْٻٜ نغٜتَّيْمٛ نغَمْ بَلَّلْ نغَلْ کٛکُّطٛنْ نغَلْ ٻٜ کٜٻِ لَاوٛلْ اَمِنْ؞ ¹²کُوغَلْ نغَعَلْ نغَلْ نغَطٛتٛنْ، نَاع اٜ نغَلْ وَلَّ يِمْٻٜ اَللَّه تَنْ، حَا اٜ نغَلْ وَطَ يِمْٻٜ طُطْٻٜ اٜ نغٜتَّ اَللَّه نَاع سٜطَّ؞ ¹³کُوغَلْ نغَعَلْ نغَلْ نغَطٛتٛنْ حٛلِّي اٛنْ کٛولَاٻٜ؞ طُطْٻٜ تٜدِّنَيْ اَللَّه نغَمْ اٛنْ نغَطَ کٛ حَبَرُ بٜلْطُمْ طُمْ اَلْمَسِيحُ وِعِ طُمْ نجَٻُطٛنْ يٜىٰسٛ کٛو مٛيٜ، ندٜنْ اٛنْ شٜنْدَ کٛ نغٛودُطٛنْ اٜ تٛکُّٻٜ يٜىٰسُ غٛنْٻٜ اُرُشَلِيمَ اٜ فُو حٛرِيٻٜ؞ ¹⁴اٜ ٻٜ نغِطِ يِيکِعٛنْ اٜ ٻٜ نغَطَنَعٛنْ دٛعَارٜ، نغَمْ بَلَّلْ مَنْغَلْ نغَلْ اَللَّه وَطَنِٻٜ لَاوٛلْ مٛوطٛنْ؞ ¹⁵يٜتّٛورٜ تَبِّتَ تٛ اَللَّه نغَمْ شَاحُ طُمْ اٛ حٛکِّعٜنْ طُمْ حٛنْدُکٛ وَاوَتَا وِعَ؞

بُلُسْ سُرَنِي کُوغَلْ مُوطُمْ

¹اٜ مِ تٛرٛوعٛنْ ندٜرْ لٜسْتِنْکِ حٛورٜ اٜ مُݧَلْ اَلْمَسِيحُ، مِنْ بُلُسْ نٛدّٜتٜىٰطٛ ‏«‏لٜسْتِنْطٛ حٛورٜ»‏ تٛ اٜ مِ وٛنْدِ اٜ مٛوطٛنْ، اَمَّا تٛ مِ وٛنْدَا اٜ مٛوطٛنْ اٜ مِ نٛدّٜىٰ ‏«‏مٜتَنٛووٛعٛنْ اٜ سٜمْبٜ؞»‏ ²وٛٻّٜ يِمْٻٜ اٜ مبِعَ اٜ مِنْ نغَطَ جٛنْدٜ اِرِ ندٜ يِمْٻٜ دُونِيَارُ ندُعُ؞ تٛ مِ وَرٛيِي تٛ مٛوطٛنْ، مِ ݧُمِي اٜ حَانِ مِ حَٻَنَٻٜ؞ اٜ مِ تٛرٛوعٛنْ، تٛع اٛنْ نغَطَنْ مِ وَطَنَعٛنْ نٛنْ؞ ³کٛو ندٜ اٜ دُونِيَارُ مِنْ نغٛنِ، مِنْ کٛنِرْتَا بٛ دُونِيَارُ ندُعُ، ⁴نغَمْ مِنْ کٛنِرْتَا کٛ ندُ حٛنِرْتَ؞ سٜيْ نِ کٛ مِنْ کٛنِرْتَ اٜ وٛودِ بَوْطٜ اَللَّه بَاوَيْطٜ کَلْکَ کٛ وٛودِ سٜمْبٜ فُو؞ ⁵اٜ مِنْ کٜٻَ جَالٛرْغَلْ دٛوْ کٛو طِيٜ غٜدِّ اٜ مَوْنِتَارٜ کَطَيْندٜ يِمْٻٜ اَنْدَ اَللَّه؞ اٜ مِنْ نَنْغَ ݧُمٛوجِ فُو، مِنْ نغَرْتِرَطِ غَطَيْطِ کٛ اَلْمَسِيحُ وِعِ؞ ⁶غَطَ اٛنْ کٛلِّي اٛنْ غَطٛوٻٜ کٛ اَلْمَسِيحُ وِعِ، اٜ مِنْ شِرْيِي مِنْ تٛرَّ کٛو مٛيٜ مٛوطٛنْ غَݧُطٛ وَطَ کٛو طُمٜ کٛ اَلْمَسِيحُ وِعِ؞

⁷اٛنْ ندَارَ کٛو طُمٜ دٛو‑دٛوْ تَنْ؞ فُو تَبِّتِنْطٛ اَلْمَسِيحُ جٜيِمٛ، سٜيْ اٛ فَامَ طُعُمْ، نٛنْ نٛ اَلْمَسِيحُ جٜيِرِمٛ، نٛنْ مِنٛنْ مَا اَلْمَسِيحُ جٜيِمِنْ؞ ⁸جٛومِرَاوٛ حٛکِّيمِنْ اَرْدَارٜ نغَمْ مِنْ شٜمْبِطِنَ حٛولَارٜ مٛوطٛنْ، نَاع نغَمْ مِنْ مبٛنَّندٜ؞ کٛو تٛ مِنْ مَنْتٛرَکٜ اَرْدَارٜ ندٜنْ کٛ ٻُرِ نٛ حَانِ، مِنْ نَنَتَا شٜمْتُطُمْ وَطُکِ نٛنْ؞ ⁹مِ يِطَا نغِعٛنْ بٛ اٜ مِ يِطِ مِ حُلْنِرَعٛنْ طٜرٜىٰجِ طِ مبِنْدَنْمِعٛنْ؞ ¹⁰نغَمْ وٛٻّٜ اٜ مبِعَ، ‏«‏طٜرٜىٰجِ طِ بُلُسْ وِنْدَنِعٜنْ اٜ طِ شَاوِ حَالَ تٜدُّکَ، شٜمْبِطْکَ، اَمَّا تٛ اٜ مٛ وٛنْدِ اٜ مٜىٰطٜنْ اٛ تَمْڤُطٛ، بٛلِيطٜ مَاکٛ طٜ تٜکَّا؞»‏ ¹¹اٜ حَانِ اِرِ ٻٜنْ طٛنْ يِمْٻٜ ٻٜ اَنْدَ کٛ مِنْ مبِنْدَنْتَعٛنْ ندٜرْ طٜرٜىٰجِ تٛ اٜنْ نغٛنْدَا، کَنْجُمْ مِنْ نغَطَتَ تٛ اٜ مِنْ نغٛنْدِ اٜ مٛوطٛنْ؞

¹²طُمْ وَطَتَاکٛ مِنْ ڤٛتِّنَ کٛعٜ اَمِنْ اٜ مَنْتٛوٻٜ کٛعٜ مَٻّٜ، کٛو مِنْ کٛشَّ کٛعٜ اَمِنْ بٛ مَٻّٜ؞ تٛ ٻٜ ڤٛوندِرِي کٛعٜ مَٻّٜ اٜ کٛعٜ مَٻّٜ، ندٜنْ تٛ وٛٻّٜ ندٜرْ مَٻّٜ کٛشِّي کٛعٜ مَٻّٜ ٻُرِي وٛٻّٜ مَٻّٜ، ٻٜ کٛلَّايِ اٜ ٻٜ نغٛودِ حَکِّيلٛ؞ ¹³مِنٛنْ بٛو، مِنْ مَنْتِتَتَاکٛ کٛ ٻُرِ نٛ حَانِ، سٜيْ نِ مِنْ ندَرٛو دٛوْ کٜىٰرٛلْ نغٛلْ اَللَّه نٛکَّنِمِنْ؞ طُعُمْ حَوْتِي اٜ کُوغَلْ نغَلْ مِنْ کُوَتَ ندٜرْ مٛوطٛنْ؞ ¹⁴ندٜ مِنْ نجَحِ تٛ مٛوطٛنْ، مِنْ پَٻَّاکِ کٜىٰرٛلْ نغٛلْ اَللَّه نٛکَّنِمِنْ، نغَمْ مِنٛنْ نغٛنِ اَرْتُٻٜ وَدَّنْکِعٛنْ حَبَرُ بٜلْطُمْ دٛوْ اَلْمَسِيحُ؞ ¹⁵مِنْ مَنْتٛرْتَاکٛ کٛ ٻُرِ کٜىٰرٛلْ نغٛلْ، وَاتٛ مِنْ مَنْتٛرْتَاکٛ کُوغَلْ نغَلْ وٛٻّٜ نغَطِ؞ اَمَّا کَمُّندٜ اَمِنْ وٛنِ حٛولَارٜ مٛوطٛنْ وَطَ کَ ٻٜيْدَاکِ، ندٜنْ کُوغَلْ نغَلْ مِنْ کُوَتَ ندٜرْ مٛوطٛنْ ٻٜيْدٛو نَاع سٜطَّ؞ ¹⁶نٛنْ وَرْتَيْ لَاوٛلْ نٛ مِنْ نغَعَجِنِرْتَ حَبَرُ بٜلْطُمْ ندٜرْ غٛطّٜ لٜيْطٜ غٛنْطٜ يٜىٰسٛ مٛوطٛنْ؞ مِنْ نغِطَا مَنْتٛرَاکِ کُوغَلْ نغَلْ غٛطّٛ وَطِ ندٜرْ کٜىٰرٛلْ نغٛلْ اَللَّه حٛکِّمٛ؞

¹⁷نٛ اَايَارٜ وِعِ، ‏«‏فُو مَنْتِتٛتٛوطٛ، اٛ مَنْتِتٛرٛو جٛومِرَاوٛ؞»‏ ¹⁸نغَمْ نَاع مَنٛووٛ حٛورٜ مُوطُمْ وٛنِ جَٻَاطٛ؛ جَٻَاطٛ وٛنِ مٛ جٛومِرَاوٛ مَنِ؞

بُلُسْ اٜ لِلَاٻٜ فٜوْرٜ

¹اٜ مِ يِطِ مُݧَنٛنْيَمْ کٛو تٛ مِ مٜتَنِيعٛنْ بٛ کَاݝَاطٛ؞ اٜ مِ تٛرٛوعٛنْ مُݧَنٜىٰيَمْ!‏ ²اٜ مِ حَاجَعٛنْ نٛ اَللَّه حَاجِرْتَعٛنْ؞ مِ وَطَنِيعٛنْ اَلْکَوَلْ تٜىٰغَلْ اٜ غٛرْکٛ غٛعٛتٛ، وَاتٛ اَلْمَسِيحُ؞ اٜ مِ يِطِ مِ يَارَعٛنْ تٛ مَاکٛ بٛ دٜبّٛ شٜنِيطٛ مٛ اَنْدَا غٛرْکٛ؞ ³اَمَّا اٜ مِ حُلَ تٛ طُمْ وَرْتَ نٛ مبٛودِ پٛيْرِرِ حَوَّاعُ اٜ پٛيْرٜ مَيْرِ کَلُّندٜ، اٛنٛنْ مَا طُمْ مَجِّنَعٛنْ اَلٛنْ تٛکُّکِ اَلْمَسِيحُ اٜ ٻٜرْندٜ غٛعٛ اٜ ٻٜرْندٜ لَاٻُندٜ؞ ⁴نغَمْ مِنْ کٛکِّيعٛنْ حَبَرُ يٜىٰسُ، ندٜنْ اٛنْ کٜٻِي رُوحُ اَللَّه، اٛنْ نجَٻِي وَعَجُ اَمِنْ؞ اَمَّا اٛنْ اَلَ وٛٻّٜ يِمْٻٜ نغَعَجِنَنَعٛنْ غٛطّٛ يٜىٰسُ فٜىٰرٜ، ندٜنْ اٛنْ نجَٻِي رُوحُ فٜىٰرٜ، طٛنْمَا اٛنْ نجَٻِي وَعَجُ ڤٜىٰرٛوتِرْطُمْ اٜ کٛ مِنْ نغَعَجِنَنِعٛنْ؞

⁵مِ کَمَّاکِ ٻٜنْ طٛنْ نٛدّٜتٜىٰٻٜ ‏«‏مَوْٻٜ لِلَاٻٜ»‏ ٻٜ ٻُرْدِييَمْ غٛطُّمْ؞ ⁶کٛو تٛ مِ وَاوَا مٜتٛ بٛطُّمْ، اٜ مِ اَنْدِ کٛ مبِعَيْمِ؞ مِنْ کٛلِّيعٛنْ نٛنْ اٜ کٛو نغٛلٜ لَاوٛلْ؞

⁷مِ وَعَجِنَنِيعٛنْ حَبَرُ بٜلْطُمْ دٛوْ اَللَّه شَاحُ؞ مِ لٜيْنِي حٛورٜ اَمْ نغَمْ طُمْ حٛکَّعٛنْ مَنْغُ؞ کٛو مِ وٛوفِي ندٜ نغَطُمِ نٛنْ؟ ⁸مِ جَٻِي شٜىٰدٜ بَلَّلْ دَغَ تٛ وٛٻّٜ تٛکُّٻٜ يٜىٰسُ بٛ مِ تٜىٰتَنْٻٜ نغَمْ مِ وَلَّعٛنْ؞ ⁹کٛ نغٛنْدُمِ اٜ مٛوطٛنْ مِ نَتِّي دُلّٜرٜ، اَمَّا مِ تٛرَاکِ بَلَّلْ تٛ مٛوطٛنْ، نغَمْ بَنْدِرَاٻٜ مٜىٰطٜنْ غَرٛيْٻٜ دَغَ مَکِدٛونِيَ نغَدَّنِييَمْ بَلَّلْ نغَلْ نغِطُمِ؞ اٜ نغٜلْ تٛنْ شَرٜلْ مِ وَرْتَنَايِعٛنْ تٜدّٛرَلْ، مِ بٛو وَرْتَنْتَاعٛنْ تٜدّٛرَلْ؞ ¹⁰نٛنْ نٛ تَبِّتِنِرْمِ غٛونغَ اَلْمَسِيحُ ندٜرْ اَمْ، نٛنْ مَا مِ تَبِّتِنِي ندٜرْ لٜيْدِ اَکَايَ وَلَا بَاوَيْطٛ حَطَيَمْ مَنْتٛرَاکِطُمْ؞ ¹¹تٛو، اٛنْ کَمّٛو مِ وِعُ نٛنْ نغَمْ مِ يِطَاعٛنْ؟ اَللَّه اٜ اَنْدِ اٜ مِ يِطِعٛنْ!‏

¹²مِ ݧَمْرَيْ يٜىٰسٛ اٜ وَطُکِ کٛ نغَطَيْمِ نغَمْ مِ حَطَ ٻٜنْ طٛنْ نٛدّٜتٜىٰٻٜ ‏«‏مَوْٻٜ لِلَاٻٜ»‏ حٜٻُکِ لَاوٛلْ مَنْتِتَاکِ اٜ وِيکِ ٻٜ کُوِي کُوغَلْ ڤٛتُّدُنغَلْ اٜ نغَلْ مِنْ کُوِ؞ ¹³اِرِ ٻٜنْ طٛنْ يِمْٻٜ ٻٜ لِلَاٻٜ فٜوْرٜ، ٻٜ کُوتِرٛوٻٜ فٜوْرٜ، اٜ ٻٜ نغَرْتِرَ کٛعٜ مَٻّٜ بٛ ٻٜ لِلَاٻٜ اَلْمَسِيحُ؞ ¹⁴نَاع طُمْ کَيْطِنِيطُمْ!‏ کٛو شٜيْطَنْ اٜ وَرْتِرَ حٛورٜ مُوطُمْ بٛ مَلَاعِکَاجٛ غٛودُطٛ جَيْنغٛلْ؞ ¹⁵نغَمْ نٛنْ، نَاع طُمْ کَيْطِنِيطُمْ تٛ مَشُّٻٜ مَاکٛ نغَرْتِرِي کٛعٜ مَٻّٜ بٛ کُوٛوٻٜ کُوطٜ اَادِلَاکُ؞ اٜ رٜعِرْدٜ مَٻّٜ ٻٜ کٜٻَيْ کٛ فٛتِّدِ اٜ کُوطٜ مَٻّٜ؞

بُلُسْ مَنْتٛرَکٜ تٛرَّ کَ يَرِ

¹⁶اٜ مِ فُطِّتَ وِيکِ، تٛع غٛطّٛ حٛشَّ مِ کَاݝَاطٛ؞ اَمَّا تٛ اٛنْ کٛشِّرِييَمْ نٛنْ، سٜيْ نجَٻٛنْيَمْ نٛ نجَٻِرْتٛنْ کَاݝَاطٛ نغَمْ مِ مَنْتِتٛو سٜطَّ؞ ¹⁷کٛ مبِعَيْمِ اٜ مِ مَنْتِتٛو جٛونِ، جٛومِرَاوٛ وِعَايِيَمْ مِ وِعَ نٛنْ، اَمَّا اٜ مِ مٜتَ بٛ کَاݝَاطٛ؞ ¹⁸ندٜ اٜ وٛودِ مَنْتِتٛتٛوٻٜ اِرِ مَنْتِتَاکِ کِ يِمْٻٜ دُونِيَارُ، مِنْ مَا مِ مَنْتِتٛتٛ؞ ¹⁹اٛنْ نَنَ بٜلْطُمْ حٜتِّندَنَاکِ حَاݝَاٻٜ نغَمْ اٜ يِيکِ مٛوطٛنْ اٛنْ نغٛودِ فَامُ مَوْطُمْ!‏ ²⁰حَا مَا اٛنْ مُݧَنَ کٛو مٛيٜ غَرْتِرٛووٛعٛنْ مَشُّٻٜ مَاکٛ، اٜ پٛيْرُطٛعٛنْ جَٻَنِعٛنْ کٛ نغٛودُطٛنْ، اٜ جَوَنَيْطٛعٛنْ، اٜ ڤِيطٛعٛنْ تٛ وٛلٛ؞ ²¹اٜ مِ سٜمْتَ وِيکِ مِنٛنْ مِنْ نغَلَا سٜمْبٜ وَطَنْکِعٛنْ نٛنْ!‏

اَمَّا تٛ وٛٻّٜ اٜ مَنْتٛرٛو غٛطُّمْ، مِنْ مَا مِ مَنْتٛرْتٛطُمْ؞ تٛو، اٜ مِ مٜتَ بٛ کَاݝَاطٛ!‏ ²²تٛ ٻٜ اِبْرَانِيَنْکٛعٜنْ، مِنْ مَا مِ اِبْرَانِيَنْکٜىٰجٛ؞ تٛ ٻٜ اِسْرَاعِيلَنْکٛعٜنْ، مِنْ مَا مِ اِسْرَاعِيلَنْکٜىٰجٛ؞ تٛ ٻٜ لٜݧٛلْ اِبْرَاهِمْ، مِنْ مَا لٜݧٛلْ اِبْرَاهِمْ پِوٛيِمِ؞ ²³تٛ ٻٜ کُوَنٛوٻٜ اَلْمَسِيحُ، مِنْ مِ ٻُرِيٻٜ؞ اٜ مِ مٜتَ بٛ کَاݝَاطٛ!‏ مِ ٻُرِيٻٜ حُوُکِ نَاع سٜطَّ، مِ ٻُرِيٻٜ مَٻّٜىٰکِ ندٜرْ سُودُ شُرَلْ، مِ ٻُرِيٻٜ فِيٜىٰکِ، مِ ٻَدَکٜ مَيْدٜ ندٜ طُطُّمْ؞ ²⁴ندٜ جٛوِ يَحُودَنْکٛعٜنْ اٜ ڤِيرَيَمْ لٛوشِ 93؞ ²⁵ندٜ تَتِ رٛومَنْکٛعٜنْ اٜ ڤِيرَيَمْ شَبِّ؞ مِ حُبٛرَامَ کَاپٜ ندٜ غٛعٛ؞ ندٜ تَتِ اٜ مِ نَتَّ کٛمِيجٜ اٜ طٜ ڤُسِدَ اٜ اَمْ ندٜرْ مَايٛ، مِ وَالِي مِ ݧَلِّي ندٜرْ ندِيَمْ مَايٛ؞ ²⁶ندٜرْ جَحَالٜ اَمْ مِ نَتِّي تٛرَّاجِ طُطِّ، شَنْطِ فٜىٰرٜ‑فٜىٰرٜ ٻَدَکٜ ݧَامَيَمْ، وُيْٻٜ تٛرِّييَمْ، يِمْٻٜ لٜݧٛلْ اَمْ تٛرِّييَمْ، يِمْٻٜ نَاع يَحُودَنْکٛعٜنْ تٛرِّييَمْ؞ مِ نَتِّي تٛرَّ ندٜرْ غَرِيرِ، مِ نَتِّي تٛرَّ ندٜرْ لَدّٜ، مَايٛ ٻَدَکٜ ݧَامَيَمْ، بَنْدِرَاٻٜ اَمْ فٜوْرٜعٜنْ تٛرِّييَمْ؞ ²⁷مِ حُوِي نَاع سٜطَّ مِ فِيدِي اٜ کُوغَلْ، جٜمَّاجٜ طُطّٜ مِ طَانَتَاکٛ؞ مِ فِيدِي اٜ وٜىٰلٛ اٜ طٛنْکَ، ندٜ طُطُّمْ وَلَا کٛ ݧَامَيْمِ، مِ يَرِي فٜىٰوٛ، مِ دُلِّي کٛ ٻٛرْنٛتٛومِ؞ ²⁸غَطَ کٛ مبِيمِ، اٜ وٛودِ طُطُّمْ تٛرُّطُمْيَمْ، طٛنْمَا کٛو ندٜيٜ اٜ مِ وٛودِ تٜدّٛرَلْ وَنُّکِ دٛوْ فُو تٛکُّٻٜ يٜىٰسُ؞ ²⁹تٛ غٛطّٛ دُلِّي سٜمْبٜ، سٜيْ مِ نَنَ بٛ مِنْ دُلِّ سٜمْبٜ؞ تٛ غٛطّٛ نَتِّنَامَ وَطُکِ حَکّٜ، اٜ طُمْ نَاوَيَمْ نَاع سٜطَّ؞

³⁰تٛ طُمْ دٛولٜ مِ مَنْتٛو، سٜيْ مِ مَنْتٛرٛو فِي کٛلَّيْطُمْ شِيَ سٜمْبٜ اَمْ؞ ³¹اَللَّه ݧَاکٛ يٜىٰسُ جٛومِرَاوٛ مٜىٰطٜنْ اٜ اَنْدِ کٛ مبِيمِ نَاع طُمْ فٜوْرٜ؞ يٜتّٛورٜ تَبِّتَ تٛ مَاکٛ حَا اَبَدَا؞ ³²شَرٜلْ کٛ نغٛنْمِ غَرِيرِ دِمَسْکُ، غٛمْنَاجٛ لٜيْدِ ندِنْ غٛنْطٛ لٜيْ لَامِيطٛ بِعٜتٜىٰطٛ اَرٜىٰتَسْ، اٛ وَطِي طُمْ سُرِ دَمُّطٜ غَرِيرِ ندِنْ نغَمْ اٛ نَنْغَيَمْ؞ ³³اَمَّا حِغٛوٻٜ اَمْ نغَطِيَمْ ندٜرْ سٛمڤٛورٜ، ٻٜ کَٻِّ ٻٛغّٛلْ، ٻٜ نجِڤِّنِرِيَمْ ندٜرْ يٛلْندٜ مَادِ ڤِلِيندِ غَرِيرِ ندِنْ؞ نٛنْ کِسِرْمِ دَغَ جُنْغٛ غٛمْنَاجٛ اٛنْ؞

کٛ جٛومِرَاوٛ حٛلِّ بُلُسْ ندٜرْ وَحَيُ

¹دٛولٜ مِ ݧَمْرَيْ يٜىٰسٛ اٜ مَنْتِتَاکِ، کٛو ندٜ طُمْ نَفَنْتَايَمْ کٛو سٜطَّ، اَمَّا جٛونِ مِ مٜتَيْ دٛوْ وَحَيُ طُمْ جٛومِرَاوٛ حٛلِّيَمْ اٜ کٛ اٛ وَنْغِنَنِيَمْ؞ ²اٜ مِ اَنْدِ غٛطّٛ تٛکُّطٛ اَلْمَسِيحُ دُوٻِ سَڤّٛ اٜ نَيِ پَٻِّيطِ اٛ حٛشَّامَ يَاکِ دٛوْ تَتَٻُمْ؞ کٛو ندٜرْ ٻَنْدُ اٛ حٛشَّا، کٛو نَاع ندٜرْ ٻَنْدُ، مِ اَنْدَا، اَللَّه تَنْ اَنْدِ؞ ³اٜ مِ اَنْدِ نٜطّٛ اٛنْ طُمْ حٛشِّيمٛ يَاکِ وُرٛ اَللَّه تٛنْ دٛوْ، کٛو ندٜرْ ٻَنْدُ اٛ حٛشَّا، کٛو نَاع ندٜرْ ٻَنْدُ اٛ حٛشَّا مِ اَنْدَا، اَمَّا اَللَّه تَنْ اَنْدِ؞ ⁴تٛنْ اٛ نَنِ غٛطّٜ بٛلِيطٜ طٜ نٜطّٛ فٛتَايِ وِيکِ، سِرُّوجِ طِ نٜطّٛ حَانَا وُرْتِنَ؞ ⁵مِ مَنْتٛرْتٛ اِرِ اٛنْ طٛنْ نٜطّٛ، اَمَّا مِ مَنْتٛرْتَاکٛ حٛورٜ اَمْ، سٜيْ نِ مِ مَنْتٛرٛو فِي کٛلَّيْطُمْ شِيَ سٜمْبٜ اَمْ؞ ⁶کٛو تٛ اٜ مِ يِطِ مِ مَنْتِتٛو، مِ وَرْتَتَا بٛ کَاݝَاطٛ، نغَمْ غٛونغَ مبِعَيْمِ؞ اَمَّا مِ مَنْتِتَتَاکٛ، نغَمْ تٛع غٛطّٛ حٛشَّ مِ ٻُرِي کٛ اٛ يِعِ تٛ اَمْ کٛو کٛ نَنِ تٛ اَمْ؞ ⁷اَللَّه حٛلِّييَمْ وَحَيُ مَوْطُمْ؞ اَمَّا نغَمْ تٛع مِ پٜفْتَ حٛورٜ اَمْ، سٜيْ طُمْ يٛوَنِيَمْ غٛطُّمْ طُمْ وَرْتَنِيَمْ بٛ غِعَلْ ندٜرْ ٻَنْدُ، بٛ غٛطّٛ شٜيْطَنْ لِلٛيِ وَطَ کَ تٛرُّکِيَمْ؞ ⁸ندٜ تَتِ اٜ مِ تٛرٛو جٛومِرَاوٛ اِتَّنَيَمْطُمْ، ⁹اَمَّا اٜ مٛ وِعَيَمْ، ‏«‏يِدّٜ اَمْ حٜپِيمَ، نغَمْ شَرٜلْ نغٜلْ ندُلُّطَا سٜمْبٜ، سٜيْ بَوْطٜ اَمْ کٜوْطٜ مبَنْغَ؞»‏ نغَمْ نٛنْ، ندٜرْ بٜلْطُمْ ٻٜرْندٜ مِ ٻٜيْدَيْ مَنْتٛرَاکِ شِيَ سٜمْبٜ اَمْ، نغَمْ بَوْطٜ اَلْمَسِيحُ نجٛوطٛو ندٜرْ اَمْ؞ ¹⁰کَنْجُمْ وَطِ نغَمْ اَلْمَسِيحُ اٜ مِ نَنَ بٜلْطُمْ شِيَ سٜمْبٜ اَمْ، اٜ حُطٜىٰکِ کِ کُطٜتٜىٰمِ، اٜ تٛرَّاجِ طِ نجَرَيْمِ، اٜ تٛرَّاجِ طِ تٛرّٜتٜىٰمِ، اٜ شَطٜىٰلٜ طٜ نَتُّمِ؞ نغَمْ شَرٜلْ نغٜلْ ندُلُّمِ سٜمْبٜ، شَرٜلْ نغٜلْ نغٛودُمِ سٜمْبٜ؞

وَنَّارٜ بُلُسْ دٛوْ وٛنْٻٜ کٛرِنْتِ

¹¹مِ وَرْتِرِي حٛورٜ اَمْ بٛ کَاݝَاطٛ، اَمَّا اٛنٛنْ نغَطِيَمْ نغَطُمِ نٛنْ؞ غٛونغَ، اٛنٛنْ حَانِ مَنَيَمْ، نغَمْ ٻٜنْ طٛنْ نٛدّٜتٜىٰٻٜ ‏«‏مَوْٻٜ لِلَاٻٜ»‏ ٻٜ ٻُرَايِيَمْ کٛو سٜطَّ، کٛو ندٜ نَاع مِ غٛطُّمْ؞ ¹²مِ حُوِي کُوطٜ ندٜرْ مٛوطٛنْ کٛلَّيْطٜ مِنْ مِ لِلَاطٛ اَلْمَسِيحُ مٛ غٛونغَ، مِ حُوِرِي مُݧَلْ مَنْغَلْ؞ اَللَّه حٛکِّييَمْ بَوْطٜ وَطُکِ اَلَامَاجِ کُلْنِيطِ، اٜ کُوطٜ کَيْطِنِيطٜ، اٜ کُوطٜ مَوْطٜ؞ ¹³طُمٜ نغَطَنْمِ غٛطّٜ کَوْتٜ تٛکُّٻٜ يٜىٰسُ طُمْ مِ وَطَنَايِعٛنْ؟ فِي غٛعٛ طُمْ مِ وَطَايِ وٛنِ مِ تٛرٛوعٛنْ بَلَّلْ؞ نجَافَنٜىٰيَمْ طُعُمْ طُمْ نغَطُمِ!‏

¹⁴جٛونِ اٜ مِ سِرْيِي وَرْکِ تٛ مٛوطٛنْ غَرٛلْ تَتَٻٛلْ؞ مِ وَرْتَنْتَاعٛنْ تٜدّٛرَلْ، نغَمْ نَاع جَوْدِ مٛوطٛنْ نغِطُمِ، اٛنٛنْ اٜ کٛعٜ مٛوطٛنْ نغِطُمِ؞ نغَمْ حَانَا ٻِٻّٜ کَوْرِتَ جَوْدِ نغَمْ دَݧٛوٻٜ مَٻّٜ، اَمَّا دَݧٛوٻٜ حَانِ کَوْرِتَ جَوْدِ نغَمْ ٻِٻّٜ ٻٜنْ؞ ¹⁵مِ نَنَيْ بٜلْطُمْ حٛکُّکِ حٛورٜ اَمْ اٜ فُو کٛ نغٛودُمِ نغَمْ مٛوطٛنْ؞ تٛ مِ ٻٜيْدِي يِطُکِعٛنْ، اٛنْ اُسْتَيْ يِطُکِيَمْ؟

¹⁶تٛو، اٛنْ نجَٻِي مِ وَرْتَنَايِعٛنْ تٜدّٛرَلْ؞ فُو اٜ نٛنْ وٛٻّٜ مبِعَيْ اٜ مِ وٛودِ پٛيْرٜ، مِ حُوتِرِي فٜوْرٜ مِ نَنْغِيعٛنْ؞ ¹⁷کٛو اٜ وٛودِ لِلَاٻٜ ٻٜ لِلْمِ تٛ مٛوطٛنْ پٛيْرُٻٜعٛنْ نجَٻِ کٛ نغٛودُطٛنْ؟ ¹⁸مِ تٛرَکٜ تِيتُسْ يَحَ تٛ مٛوطٛنْ، کَنْکٛ اٜ بَنْدِرَاوٛ مٜىٰطٜنْ؞ کٛو تِيتُسْ پٛيْرِيعٛنْ جَٻِي کٛ نغٛودُطٛنْ؟ نَاع مِنٛنْ اٜ مَاکٛ ݧُمٛ غٛعٛ مِنْ کُورَتَ؞ نَاع لَاوٛلْ غٛعٛ مِنْ تٛکَّتَ؟

¹⁹کٛو اٛنْ ݧُمَ دَغَ اَرَنْدٜ اٜ مِنْ شُرَنَ کٛعٜ اَمِنْ يٜىٰسٛ مٛوطٛنْ؟ نَاع نٛنْ!‏ مِنْ تٛکُّٻٜ اَلْمَسِيحُ، اٜ مِنْ مبِعَ غٛونغَ يٜىٰسٛ اَللَّه؞ بَنْدِرَاٻٜ ٻٜ مِنْ نغِطِ، کٛو طُمٜ کٛ مِنْ نغَطَتَ اٜ مِنْ نغَطَطُمْ نغَمْ سٜمْبِطِنْکِعٛنْ؞ ²⁰اٜ مِ حُلَ تٛ مِ وَرِي تٛ مٛوطٛنْ، مِ تَوْرَتَاعٛنْ نٛ نغِطُمِ، ندٜنْ اٛنٛنْ مَا اٛنْ تَوْرَتَايَمْ نٛ نغِطّٛنْ؞ اٜ مِ حُلَ مِ تَوْرَعٛنْ حَوْرٜ، اٜ لَوْلِيرُ، اٜ مٜتِّنْکِ ٻٜرْندٜ، اٜ يِدّٜ حٛورٜ، اٜ حُطُکِ، اٜ مٜتُکِ حَالَاجِ کَلُّطِ دٛوْ وٛٻّٜ، اٜ مَوْنِنْکِ حٛورٜ، اٜ اُمِّنْکِ حَکِّيلٛ؞ ²¹اٜ مِ حُلَ تٛ مِ فُطِّتِي مِ سٛعّٛيَکٜ تٛ مٛوطٛنْ، اَللَّه اَمْ سٜمْتِنَيْيَمْ يٜىٰسٛ مٛوطٛنْ، ندٜنْ ٻٜرْندٜ اَمْ نَاوَيْ، نغَمْ طُطْٻٜ غَطُنٛوٻٜ حَکّٜ ٻٜ تُوبَايِ ٻٜ اَلِ کُوطٜ طٜ ٻٜ نغَطَتَ، وَاتٛ کُوطٜ نٜفْنِيطٜ، اٜ نجٜىٰنُ، اٜ فُو کُوطٜ کَلُّطٜ طٜ ٻٜرْطٜ مَٻّٜ نغِطِ؞

وَغِّنْکِ شَکِتِيکِ

¹مِ وَرَيْ تٛ مٛوطٛنْ جٛونِ غَرٛلْ تَتَٻٛلْ؞ اَايَارٜ وِعِي، ‏«‏دٛولٜ طُمْ حٜٻَ شٜيْدُعٜنْ طِطٛ کٛو تَتٛ کٛ طُمْ تَبِّتِنَ حَالَ؞»‏ ²مِ يَادَکٜ مِ وَغِّنِي ٻٜنْ طٛنْ ݧَمْرُٻٜ يٜىٰسٛ اٜ وَطُکِ حَکّٜ کٛ نغَرْمِ تٛ مٛوطٛنْ طِطَٻُمْ؞ جٛونِ ندٜ مِ وٛنْدَا اٜ مٛوطٛنْ، اٜ مِ ٻٜيْدَ وَغِّنْکِٻٜ اٜ فُو حٛرِيٻٜ کُوٛوٻٜ طٜنْ طٛنْ کُوطٜ؞ تٛ مِ سٛعّٛيَکٜ تٛ مٛوطٛنْ، مِ تَوِي اٜ ٻٜ ندٜرْ حَکّٜ حَا جٛونِ، مِ مُݧَنْتَاٻٜ؞ ³ندٜ اٛنْ نغِطِ يِيکِ کٛ تَبِّتِنَنْتَعٛنْ اَلْمَسِيحُ اٜ مٜتِرَ لَاوٛلْ اَمْ، مِ حٛلَّيْعٛنْ طُمْ؞ اَلْمَسِيحُ دُلَّايِ سٜمْبٜ ندٜرْ مٛوطٛنْ، اَمَّا اٜ مٛ حُوَ ندٜرْ مٛوطٛنْ اٜ سٜمْبٜ؞ ⁴کٛو ندٜ اٛ وَرَامَ دٛوْ غَافَانغَلْ ندٜرْ شِيَ سٜمْبٜ، فُو اٜ نٛنْ جٛونِ اٜ مٛ فٛوفَ لَاوٛلْ بَوْطٜ اَللَّه؞ مِنٛنْ مَا نٛنْ نٛ اٛ وٛنْتِندِرْنٛو، مِنْ نغَلَا سٜمْبٜ؞ نٛنْ نٛ اَلْمَسِيحُ جٛوطٛرِي جٛونِ ندٜرْ بَوْطٜ اَللَّه، مِنٛنْ مَا مِنْ نجٛوطٛدٛتٛ اٜ بَوْطٜ اَللَّه ندٜرْ مٛوطٛنْ؞ ⁵پَمٜىٰ کٛعٜ مٛوطٛنْ نغِعٛنْ کٛو اٛنْ تٛکُّٻٜ يٜىٰسُ اٜ غٛونغَ؞ ڤٛوندٜىٰ کٛعٜ مٛوطٛنْ؞ اٛنْ اَنْدَا اَلْمَسِيحُ اٜ جٛوطِ ندٜرْ ٻٜرْطٜ مٛوطٛنْ؟ غٛونغَ اٜ مٛ جٛوطٛو ندٜرْ ٻٜرْطٜ مٛوطٛنْ، سٜيْ نِ تٛ اٛنْ تٛکَّايِمٛ اٜ غٛونغَ؞ ⁶مِ تَبِّتِنِي اٛنْ اَنْدَيْ مِنٛنْ اٜ مِنْ تٛکَّمٛ اٜ غٛونغَ؞ ⁷اَمَّا اٜ مِنْ تٛرٛو اَللَّه تٛع نغَطٛنْ غٛطُّمْ کٛ وٛوطَا؞ نَاع نغَمْ يِمْٻٜ نغِعَ بٛ اٜ مِنْ نغَطَ کٛ وٛوطِ، اَمَّا نغَمْ نغَطٛنْ کٛ حَانِ، کٛو ندٜ طُمْ يِعَيْمِنْ بٛ مِنْ نغَطَايِ کُوغَلْ اَمِنْ بٛطُّمْ؞ ⁸نغَمْ مِنْ مبَاوَتَا مِنْ کَطَ غٛونغَ ݧَمْرُکِ يٜىٰسٛ، سٜيْ نِ مِنْ نغَطَ کٛ وَطَتَ غٛونغَ ݧَمْرَ يٜىٰسٛ؞ ⁹مِنْ نَنَيْ بٜلْطُمْ تٛ مِنْ ندُلِّي سٜمْبٜ، تٛ نِ اٛنٛنْ اٛنْ نغَرْتِي شٜمْبِطْٻٜ؞ اٜ مِنْ تٛرٛو اَللَّه نغَرْتٛنْ کٜىٰوُٻٜ ندٜرْ تٛکُّکِ يٜىٰسُ؞ ¹⁰کَنْجُمْ وَطِ مبِنْدَنْمِعٛنْ فِي طُعُمْ شَرٜلْ نغٜلْ مِ وٛنْدَا اٜ مٛوطٛنْ؞ نغَمْ تٛ مِ وَرٛيِي تٛ مٛوطٛنْ، تٛع طُمْ وَرْتَنَيَمْ دٛولٜ نَاع مِ حُوتِرِي سٜمْبٜ لَامُ طُمْ جٛومِرَاوٛ حٛکِّيَمْ؞ اٛ حٛکَّمْ لَامُ طُمْ نغَمْ مِ سٜمْبِطِنَعٛنْ، نَاع نغَمْ مِ لَلِّنَعٛنْ؞

کٛوْنٛلْ اٜ بٛلِيطٜ شَکِتِيطٜ

¹¹تٛو، بَنْدِرَاٻٜ اَمْ، سٜيْ ݧَلْندٜ غٛعٛ؞ مٛعِّنٜىٰ جٛنْدٜ مٛوطٛنْ، نغَطٜىٰ کٛ تٛرِيمِعٛنْ نغَطٛنْ، نغَرْتٜىٰ ٻٜ ݧُمٛ غٛعٛ، نجٛوطٛدٜىٰ جَمْ؞ اَللَّه جٛومُ يِدّٜ اٜ جَمْ وٛنْدَ اٜ مٛوطٛنْ؞

¹²کٛوْنِندِرٜىٰ کٛوْنٛلْ حِغَاکُ؞ فُو يِمْٻٜ اَللَّه اٜ کٛوْنَعٛنْ؞ ^13‏-14بَرْکَ طُمْ يٜىٰسُ اَلْمَسِيحُ جٛومِرَاوٛ، اٜ يِدّٜ اَللَّه، اٜ سُمْڤٛوتِرْکِ اٜ رُوحُ اَللَّه وٛنْدَ اٜ مٛوطٛنْ اٛنْ ڤُو؞