1 تِمٛوتِ

طٜرٜوٛلْ اَرَنْدٜوٛلْ نغٛلْ بُلُسْ وِنْدَنِ

تِمٛوتِ

حَبَرُ دٛوْ طٜرٜوٛلْ نغٛعٛلْ

بُلُسْ وِنْدِ طٜرٜوٛلْ نغٛعٛلْ حَکُّندٜ دُوٻِ 76‏‑56 غَطَ دَݧْنغٛلْ يٜىٰسُ؞ اٛ وِنْدَنْغٛلْ تِمٛوتِ مٛ اٛ سٜمْبِطِنِ ندٜرْ تٛکُّکِ يٜىٰسُ؞ تِمٛوتِ اٛ سُکَ تٛکُّطٛ يٜىٰسُ پِوٛيْطٛ لٜيْدِ اَاسِيَ ڤَمَرْدِ؞ مَدُوجٛ مَاکٛ اٛ يَحُودَنْکٜىٰجٛ، ندٜنْ ݧَاکٛ مَاکٛ اٛ حٜلٜنَنْکٜىٰجٛ؞ اٛ وَرْتِ جَادٛووٛ اٜ بُلُسْ اٜ مٛ وَلَّمٛ ندٜرْ کُوغَلْ وَعَجِنْکِ حَبَرُ بٜلْطُمْ؞

بُلُسْ مٜتِي دٛوْ فِي تَتُمْ مَوْطُمْ؞ اَرَنْدٜ، اٛ وَغِّنِي دٛوْ اٜکِّتِنٛلْ فٜوْرٜ ندٜرْ کَوْتَلْ تٛکُّٻٜ يٜىٰسُ؞ اٜکِّتِنٛلْ نغٛلْ وُرْتَکٜ نغَمْ وٛٻّٜ اٜ مبِعَٻٜ دُونِيَارُ ندُعُ ندُ کَلُّندُ؞ اٜ ٻٜ مبِعَ وَلَا کِسَيْطٛ، سٜيْ تٛ حٜٻِي اَنْدَلْ شُوطِينغَلْ، اٜ اَلُکِ ݧَامُکِ غٛطِّ ݧَمْندُوجِ، اٜ اَلُکِ وَطُکِ تٜىٰغَلْ؞ طٜرٜوٛلْ نغٛلْ کَدِنْ اٜ سَاوِ وَغِّنْکِ دٛوْ کَوْتَلْ تٛکُّٻٜ يٜىٰسُ اٜ نٛ ٻٜ اَرْدٛرْتٛو، اٜ نٛ ٻٜ مَوْنِنِرْتَ اَللَّه؞ طٛنْمَا اٜ نغٛلْ حٛلَّ اِرِ نغِکُّ طُمْ اَرْدِيٻٜ اٜ بَلّٛوٻٜ ندٜرْ کَوْتَلْ تٛکُّٻٜ يٜىٰسُ حَانِ نغَطَ؞ شَکِتِيطُمْ وٛنِ، بُلُسْ حٛکِّي تِمٛوتِ شَاوٛرِ نٛ وَرْتِرْتَ کُوَنٛووٛ يٜىٰسُ اَلْمَسِيحُ بٛطّٛ، اٜ تٜدّٛرَلْ غٛنْغَلْ دٛوْ مَاکٛ دٛوْ يِمْٻٜ فٜىٰرٜ‑فٜىٰرٜ غٛنْٻٜ ندٜرْ کَوْتَلْ تٛکُّٻٜ يٜىٰسُ؞

¹طٜرٜوٛلْ نغٛعٛلْ پِوٛيِي دَغَ جُنْغٛ اَمْ، مِنْ بُلُسْ؞ اَللَّه کِسْنٛووٛ مٜىٰطٜنْ اٜ يٜىٰسُ اَلْمَسِيحُ مٛ نغَطّٜنْ ٻٜرْندٜ دٛوْ مُوطُمْ وِعِي مِ وَرْتَ لِلَاطٛ مَاکٛ؞

²اٜ مِ وِنْدَنْمَا طٜرٜوٛلْ نغٛعٛلْ، تِمٛوتِ، ٻِطّٛ اَمْ مٛ غٛونغَ ندٜرْ تٛکُّکِ يٜىٰسُ؞

اَللَّه ݧَاکٛ مٜىٰطٜنْ مٛ دٛوْ اٜ يٜىٰسُ اَلْمَسِيحُ جٛومِرَاوٛ مٜىٰطٜنْ بَرْکِطِنْمَا، يُرْمِنَنْمَا، حٛکُّمَا جَمْ؞

وَغِّنٛلْ دٛوْ اٜکِّتِنٛلْ فٜوْرٜ

³اٜ مِ يِطِ نجٛوطٛطَا اٜ اَافِسَ، نٛنْ نٛ تٛرٛرِمَامِ شَرٜلْ کٛ نجَحَيْنٛومِ مَکِدٛونِيَ، نغَمْ مبَغِّنَا وٛٻّٜ يِمْٻٜ اٜکِّتِنٛوٻٜ اٜکِّتِنٛلْ فٜوْرٜ ٻٜ اَلَ؞ ⁴وِعُٻٜ ٻٜ شٜنْدِرَ اٜ حَبَرُوجِ فٜوْرٜ طِنْ طٛنْ اٜ فٜىٰرٛوتِرْکِ لٜݧٛلْ کِ وَلَا کٜىٰرٛلْ، نغَمْ اِرِ نٛنْ حٛلَّتَا نٛ طُمْ حٛولٛرْتٛو اَللَّه، سٜيْ نِ طُمْ اُمِّنَ غٜدِّ تَنْ؞ ⁵کٛ وَطِ مبِيمِ نغَطَا نٛنْ وٛنِ نغَمْ طُمْ وَطَعٜنْ نغِطِندِرٜنْ يِدّٜ پِوٛيْندٜ ندٜرْ ٻٜرْندٜ لَمْندٜ اٜ ٻٜرْندٜ کٛلَّيْندٜ اٜنْ نغَطَ کٛ وٛوطِ، اٜ ٻٜرْندٜ کٛولِيندٜ يٜىٰسُ اٜ غٛونغَ؞ ⁶وٛٻّٜ يِمْٻٜ ندٜ اَلِ وَطُکِ نٛنْ، ٻٜ مَجِّي لَاوٛلْ غٛونغَ، ٻٜ ڤُطِّ مٜتُکِ حَالَاجِ مٜىٰرٜىٰجِ؞ ⁷اٜ ٻٜ نغِطِ طُمْ اَنْدَ ٻٜ مٛودِٻّٜ اَتَّوْرَ، اَمَّا ٻٜ ڤَامَتَا کٛ ٻٜ مبِعَتَ، کٛو دٛوْ کٛ ٻٜ اٜکِّتِنْتَ ٻٜرْندٜ غٛعٛ؞

⁸اٜنْ اَنْدِ دٛوکَ اٜ وٛوطِ تٛ طُمْ حُوتِرَامَ نٛ حَانِ طُمْ حُوتِرٜىٰ؞ ⁹کَدِمَا اٜنْ اَنْدِ دٛوکَ وَطَاکَ نغَمْ اَادِلِعٜنْ، اَمَّا نغَمْ غٜوٛوٻٜ دٛوکَ، اٜ يِمْٻٜ ٻٜ نغَطَتَا کٛ طُمْ وِعِٻٜ، اٜ ٻٜ کُلَتَا اَللَّه، اٜ غَطٛوٻٜ کٛ وٛوطَا، اٜ يِمْٻٜ ٻٜ شٜنَاکِ، اٜ کُطٛوٻٜ اَللَّه، اٜ يِمْٻٜ بَرٛوٻٜ دَݧٛوٻٜ مُعّٜنْ، اٜ غَطٛوٻٜ وَرْحٛورٜ، ¹⁰اٜ غَطٛوٻٜ نجٜىٰنُ، اٜ غَطٛوٻٜ لُوطُ، اٜ شٛورٛوٻٜ مَشُّٻٜ، اٜ ڤٜوٛوٻٜ، اٜ شٜيْدٛتٛوٻٜ فٜوْرٜ، اٜ کٛو طُمٜ طُمْ تٛکَّايِ اٜکِّتِنٛلْ غٛونغَ، ¹¹غٛنْغٛلْ ندٜرْ حَبَرُ بٜلْطُمْ طُمْ اَللَّه جٛومُ مَنْغُ بَرْکِطِنَاطٛ وِعِيَمْ مِ وَعَجِنَ؞

بُلُسْ يٜتِّي اَللَّه

¹²مِ يٜتِّي يٜىٰسُ اَلْمَسِيحُ جٛومِرَاوٛ مٜىٰطٜنْ کٛکُّطٛيَمْ سٜمْبٜ کُوغَلْ اَمْ؞ مِ يٜتِّيمٛ نغَمْ اٛ يِيرِييَمْ غٛونغَ اٛ سُٻِييَمْ مِ حُوَنَمٛ؞ ¹³کٛو ندٜ ندٜنّٛ مِ مٜتِي حَالَاجِ کَلُّطِ دٛوْ مَاکٛ، مِ تٛرِّي تٛکُّٻٜمٛ، مِ حُطِيمٛ، اَمَّا اَللَّه يُرْمِنَنِييَمْ، نغَمْ اٜ شَرٜلْ نغٜلْ، مِ اَنْدَا کٛ نغَطَيْمِ، مِ حٛولَاکِ يٜىٰسُ اَلْمَسِيحُ؞ ¹⁴جٛومِرَاوٛ مٜىٰطٜنْ يَافَنَکٜيَمْ حَکّٜ شَاحُ، ندٜنْ اٛ حٛکِّييَمْ حٛولَارٜ اٜ يِدّٜ غٛنْدٜ ندٜرْ يٜىٰسُ اَلْمَسِيحُ؞ ¹⁵يٜىٰسُ اَلْمَسِيحُ وَرِي ندٜرْ دُونِيَارُ نغَمْ حِسْنَ غَطٛوٻٜ حَکّٜ؞ حَالَ کَعَ کَ تَبُّتُکَ کَ حٜوْتِي طُمْ جَٻَکَ؞ مِنْ بٛو، مِ ٻُرِي کٛو مٛيٜ وَطُکِ حَکّٜ؞ ¹⁶اَمَّا اَللَّه يُرْمِنَنِييَمْ نغَمْ يٜىٰسُ اَلْمَسِيحُ حٛلِّييَمْ مُݧَلْ نغَلْ وَلَا کٜىٰرٛلْ، مِنْ ٻُرْطٛ کٛو مٛيٜ حَکّٜ، نغَمْ طُمْ وَرْتَ مِسَالُ تٛ کٛو مٛيٜ تٛکَّيْطٛمٛ يٜىٰسٛ طٛعٛ نغَمْ حٜٻَ يٛنْکِ کِ رٜعَتَا؞ ¹⁷اٛ لَامِيطٛ حَا اَبَدَا، اٛ وَلَا کٜىٰرٛلْ، اٛ يِعَتَاکٛ، کَنْکٛ تَنْ وٛنِ اَللَّه؞ مَنْغُ اٜ تٜدُّنغَلْ تَبِّتَ تٛ مَاکٛ حَا اَبَدَا اَبَدِنْ؞

¹⁸ٻِطّٛ اَمْ، تِمٛوتِ، اٜ مِ وَغِّنْمَا دٛوْ کٛ اَنَّبٛعٜنْ مبِينٛو دٛوْ مَاطَ؞ تٛکُّ کٛ ٻٜ مبِعِ نغَمْ مبَاوَا وَطُکِ کُوغَلْ نغَلْ اَللَّه حٛکُّمَا، ¹⁹اَ حٛولٛومٛ اٜ ٻٜرْندٜ لَمْندٜ؞ وٛٻّٜ يِمْٻٜ ندٜ نغَݧِ وَطُکِ نٛنْ، ٻٜ لَلِّنِي حٛولَارٜ مَٻّٜ؞ ²⁰ندٜرْ مَٻّٜ اٜ وٛودِ حِمٜىٰنِيُسْ اٜ اَلِجَنْدَ؞ مِ اَلْدِيٻٜ اٜ شٜيْطَنْ نغَمْ ٻٜ اٜکِّتٛو اَلُکِ مٜتُکِ حَالَاجِ کَلُّطِ دٛوْ اَللَّه؞

اٜکِّتِنْکِ دٛوْ دٛعَارٜ

¹نغَمْ نٛنْ، اَرَنْدٜ اٜ مِ وِعَ طُمْ وَطَ کَ تٛرَاکِ اَللَّه، طُمْ وَطَ دٛعَارٜ، طُمْ تٛرٛومٛ، طُمْ يٜتَّمٛ نغَمْ کٛو مٛيٜ؞ ²طُمْ وَطَنَ لَامِيٻٜ دٛعَارٜ، اٜ کٛو مٛيٜ اَرْدِيطٛ نغَمْ نجٛوطٛوطٜنْ جَمْ حَکِّيلٛ مٜىٰطٜنْ اٜ فُکِّي، اٜنْ مَوْنِنَ اَللَّه، اٜنْ نغَطَ کٛ اٛ وِعِ؞ ³نٛنْ اٜ وٛوطِ؞ اَللَّه کِسْنٛووٛ مٜىٰطٜنْ اٜ نَنَ بٜلْطُمْ مَاجُمْ، ⁴نغَمْ اٜ مٛ يِطِ کٛو مٛيٜ اَنْدَ غٛونغَ حِسَ؞ ⁵نغَمْ اَللَّه اٛ غٛعٛتٛ، ندٜنْ شِرْيٛوتِرْطٛ حَکُّندٜ اَللَّه اٜ يِمْٻٜ اٛ غٛعٛتٛ؞ کَنْکٛ وٛنِ يٜىٰسُ اَلْمَسِيحُ، ⁶کٛکُّطٛ حٛورٜ مَاکٛ نغَمْ اٛ رِمْطِنَ يِمْٻٜ؞ کَنْجُمْ وٛنِ شٜيْدَ طُمْ اُمْ حٛکِّ ندٜ شَرٜلْ وَطِ؞ ⁷نغَمْ مَاجُمْ طُمْ سُٻِييَمْ مِ وَرْتَ غَعَجِنٛووٛ اٜ لِلَاطٛ اٜ اٜکِّتِنٛووٛ يِمْٻٜ نَاع يَحُودَنْکٛعٜنْ دٛوْ حٛولَاکِ غٛونغَحِ؞ غٛونغَ مبِعَيْمِ، نَاع مِ فٜوَيْ!‏

⁸نغَمْ نٛنْ اٜ مِ يِطِ تٛ تٛکُّٻٜ يٜىٰسُ کَوْرِتِ فُو، وٛرْٻٜ نغَطَ دٛعَارٜ اٜ ٻٜ پٜفْتَ جُوطٜ شٜنِيطٜ نَاع ندٜرْ مٛنّٜرٜ کٛو غٜدِّ؞ ⁹نٛنْ مَا، اٜ مِ يِطِ رٜوْٻٜ ٻٛرْنٛو کٛلْتٜ نٛ حَانِ نغَمْ سٜمْتٜىٰندٜ اٜ فَامَنْکِ حٛورٜ؞ مِ يِطَا ٻٜ ٻٛرْنٛو کٛلْتٜ طٜ شٜىٰدٜ اٜ مٛعِّتِنَاکِ کٛشَّيْکِ حَکِّيلٛ يِمْٻٜ بٛ مٛعِّنْکِ غَاسَ، کٛو وَطُکِ شٛدِّ، کٛو جِينَارِ، ¹⁰سٜيْ نِ ٻٜ کُوَ کُوطٜ بٛطّٜ نٛ رٜوْٻٜ کُلٛوٻٜ اَللَّه حَانِ نغَطَ؞ ¹¹رٜوْٻٜ اٜکِّتٛو اٜکِّتِنٛلْ ندٜرْ دٜعُّتُکِ اٜ لٜسْنُکِ حٛورٜ؞ ¹²مِ جَٻَايِ غٛطّٛ دٜبّٛ اٜکِّتِنَ غٛرْکٛ کٛو لَامٛو دٛوْ مَاکٛ؛ دٛولٜ ٻٜ ندٜعِّتَ؞ ¹³نغَمْ اَادَمُ اَللَّه اَرْتِ تَغُکِ، ندٜنْ حَوَّاعُ؞ ¹⁴ندٜنْ نَاع اَادَمُ طُمْ پٛيْرِ، طُمْ دٜبّٛ اٛنْ طُمْ پٛيْرِ، اٛ يٜوِ دٛوکَ اَللَّه؞ ¹⁵فُو اٜ نٛنْ، رٜوْٻٜ ندٜرْ دَݧْنغٛلْ ٻِٻّٜ ٻٜ کِسَيْ تٛ ٻٜ نغَطِي کَ حٛولَاکِ يٜىٰسُ اٜ ٻٜ کٛلَّ يِدّٜ اٜ ٻٜ نغَطَ جٛنْدٜ لَمْندٜ اٜ سٜمْتٜىٰندٜ؞

اَرْدِيٻٜ کَوْتَلْ تٛکُّٻٜ يٜىٰسُ

¹حَالَ کَنْ طٛنْ کَ تَبُّتُکَ وِعُکِ:‏ غَطّٛ ٻٜرْندٜ مُوطُمْ دٛوْ وَرْتُکِ مَوْطٛ کَوْتَلْ تٛکُّٻٜ يٜىٰسُ، اٛ يِطِي کُوغَلْ بٛنْغَلْ وٛنْ طٛنْ؞ ²نغَمْ نٛنْ دٛولٜ مَوْطٛ کَوْتَلْ تٛکُّٻٜ يٜىٰسُ وَرْتَ وَلَا کٛ طُمْ حُطِرْتَمٛ، غٛودُطٛ دٜبّٛ غٛعٛتٛ، شُرْطٛ حٛورٜ مُوطُمْ، غَطٛووٛ کٛ حَانِ، جَٻّٛتٛوطٛ حٛٻّٜ، بَوْطٛ اٜکِّتِنْکِ؞ ³تٛع اٛ وَرْتَ جَرٛووٛ، کٛو طَٻِّتٛووٛ حَوْرٜ، اَمَّا مٛ حَکِّيلٛ، غِطّٛ جٛنْدٜ جَمْ، نَاع غٛودُطٛ يِدّٜ شٜىٰدٜ؞ ⁴دٛولٜ اٛ جٛغٛو وُرٛ مَاکٛ بٛطُّمْ، اٛ اٜکِّتِنَ ٻِٻّٜ مَاکٛ نغَطَ کٛ اٛ وِعِ، ٻٜ کٛکَّمٛ مَنْغُ؞ ⁵نغَمْ تٛ نٜطّٛ اَنْدَا نٛ جٛغٛرْتٛو وُرٛ مُوطُمْ، نٛ اٛ اَرْدٛرْتٛو کَوْتَلْ يِمْٻٜ اَللَّه؟ ⁶حَانَا بٛو تٛکُّطٛ يٜىٰسُ کٜسٛ وَرْتَ اَرْدِيطٛ، نغَمْ طُمْ غَطٛتٛوطُمْ اٛ مَوْنِنَ حٛورٜ مَاکٛ، ندٜنْ طُمْ وَطَنَمٛ نٛ طُمْ وَطَنِ شٜيْطَنْ؞ ⁷اٜ حَانِ اٛ وَرْتَ نٜطّٛ مٛ کٛو مٛيٜ اَنْدِ جٛنْدٜ مَاکٛ اٜ وٛوطِ حَا مَا اٜ ٻٜ تٛکَّايِ يٜىٰسُ؞ نغَمْ تٛع اٛ وَرْتَ کٛ سٜمْتِنِي اٛ يَنَ ندٜرْ تَرْکٛوٛلْ شٜيْطَنْ؞

کُوٛوٻٜ ندٜرْ کَوْتَلْ تٛکُّٻٜ يٜىٰسُ

⁸نٛنْ مَا دٛولٜ کُوٛوٻٜ ندٜرْ کَوْتَلْ تٛکُّٻٜ يٜىٰسُ نغَرْتَ غٛودُٻٜ نغِکُّ بٛطُّمْ، وِعٛوٻٜ غٛونغَ، نَاع جَرٛوٻٜ، کٛو غٛودُٻٜ يِدّٜ شٜىٰدٜ؞ ⁹دٛولٜ ٻٜ نجٛغٛو غٛونغَ لُغُّکَ دٛوْ حٛولَاکِ يٜىٰسُ اٜ ٻٜرْندٜ لَمْندٜ؞ ¹⁰اَرَنْدٜ طُمْ فٛوندَٻٜ تَوْ طُمْ يِعَ؞ تٛ ٻٜ نغَلَا کٛ طُمْ حُطِرْتَٻٜ، سٜيْ ٻٜ کُوَ کُوغَلْ نغَلْ؞ ¹¹نٛنْ مَا رٜوْٻٜ ٻٜنْ نغَرْتَ ٻٜ نغِکُّ بٛطُّمْ، تٛع ٻٜ نغَرْتَ بِعٛوٻٜ حَالَاجِ کَلُّطِ دٛوْ وٛٻّٜ، اَمَّا ٻٜ نغَرْتَ شُرْٻٜ کٛعٜ مَٻّٜ، غَطٛوٻٜ غٛونغَ دٛوْ کٛو طُمٜ؞ ¹²کُوٛووٛ ندٜرْ تٛکُّٻٜ يٜىٰسُ وٛنَ غٛودُطٛ دٜبّٛ غٛعٛتٛ، جٛغِيطٛ وُرٛ مُوطُمْ بٛطُّمْ؞ ¹³ٻٜنْ طٛنْ کُوٛوٻٜ کُوطٜ مَٻّٜ بٛطُّمْ، ٻٜ کٜٻَنِ کٛعٜ مَٻّٜ اِنْطٜ بٛطّٜ، ٻٜ مبَاوَيْ ٻٜ مٜتَ کُلٛلْ وَلَا دٛوْ حٛولَاکِ يٜىٰسُ اَلْمَسِيحُ؞

سِرُّ دِينَ مٜىٰطٜنْ

¹⁴اٜ مِ وِنْدَ طٜرٜوٛلْ نغٛعٛلْ، اٜ مِ کَمّٛو وَرٛيْکِ تٛ مَاطَ نَاع کٛ نٜىٰٻِ؞ ¹⁵اَمَّا تٛ مِ وَرِلَوَايِ، طٜرٜوٛلْ نغٛعٛلْ وَلّٜتٜ اَنْدَا نٛ حَانِ نجٛوطٛرٛوطٜنْ ندٜرْ وُرٛ اَللَّه، وَاتٛ کَوْتَلْ تٛکُّٻٜ اَللَّه مٛ يٛنْکِ، دَرْݝَلَلْ جٛغٛتٛونغَلْ غٛونغَ؞ ¹⁶وَلَا وٛنْغٛ سٜکٛ، سِرُّ دِينَ مٜىٰطٜنْ اٜ مَوْنِ، وِيکِ:‏

اَلْمَسِيحُ وَرِي ندٜرْ ٻَنْدُ نٜطّٛ،

رُوحُ اَللَّه حٛلِّي اٜ مٛ وَطَ کٛ اَللَّه يِطِ،

مَلَاعِکَعٜنْ نغِعِيمٛ،

طُمْ حٛکِّي حَبَرُ مَاکٛ ندٜرْ لٜݧِ،

طُمْ حٛولَکٜمٛ ندٜرْ دُونِيَارُ،

طُمْ حٛشِّيمٛ يَاکِ دٛوْ ندٜرْ مَنْغُ مَاکٛ؞

اٜکِّتِنٛوٻٜ فٜوْرٜ

¹رُوحُ اَللَّه تَبِّتِنِي وِعُکِ اٜ بَلْطٜ رٜعُکِ دُونِيَارُ وٛٻّٜ يِمْٻٜ اَلَيْ حٛولَاکِ يٜىٰسُ، ٻٜ تٛکَّ اٜکِّتِنٛوٻٜ فٜوْرٜ کٜٻُٻٜ اَنْدَلْ مُعّٜنْ تٛ غِنِّ؞ ²اٜکِّتِنٛوٻٜ ٻٜنْ ٻٜ مُنَافُکِعٜنْ، ٻٜ ڤٜوٛوٻٜ ٻٜ ݧُمٛ وَاتُنغٛ؞ ³اٜ ٻٜ کَطَ تٜىٰغَلْ، اٜ ٻٜ کَطَ ݧَامُکِ غٛطِّ ݧَمْندُوجِ؞ اَمَّا اَللَّه وَطِي تٜىٰغَلْ اٜ کٛو اِرِ ندُيٜ ݧَمْندُ نغَمْ کٛولِيٻٜمٛ اَنْدُٻٜ غٛونغَ نجَٻَ نغٜتَّمٛ؞ ⁴نغَمْ فُو کٛ اَللَّه وَطِ اٜ طُمْ وٛوطِ؞ ندٜنْ تٛع طُمْ وَݧَ کٛو طُمٜ، اَمَّا طُمْ جَٻٜىٰ ندٜرْ يٜتّٛورٜ، ⁵نغَمْ وٛلْدٜ اَللَّه اٜ دٛعَارٜ لَاٻِنِيطُمْ؞

کُوَنٛووٛ يٜىٰسُ اَلْمَسِيحُ بٛطّٛ

⁶تَا اٜکِّتِنِي تٛکُّٻٜ يٜىٰسُ نِينِ، اَ وَرْتَيْ کُوَنٛووٛ يٜىٰسُ اَلْمَسِيحُ بٛطّٛ مَوْنٛووٛ ندٜرْ بٛلِيطٜ غٛونغَ طٜ حٛولَاکِ يٜىٰسُ اٜ اٜکِّتِنٛلْ بٛنْغٛلْ نغٛلْ تٛکُّطَا؞ ⁷وٛطِّتَ حَبَرُوجِ فٜوْرٜ طِ مٜىٰرٜ طِ نغَلَا غٛونغَ دٛوْ اَللَّه؞ اٜکِّتِنْ حٛورٜ مَاطَ تٛکُّکِ اَللَّه؞ ⁸کٛو ندٜ اٜکِّتِنْکِ ٻَنْدُ نَفَنْتٜ سٜطَّ، تٛکُّکِ اَللَّه نَفَنْتٜ کٜىٰرٛلْ وَلَا؞ نغَمْ تَا وَطِي نٛنْ، طُمْ نَفَنْتٜ جٛونِ، ندٜنْ طُمْ نَفَنْتٜ ندٜرْ يٛنْکِ کِ کٜٻَتَا غَطَ مَيْدٜ؞ ⁹حَالَ کَعَ کَ تَبُّتُکَ کَ حٜوْتِي طُمْ جَٻَکَ؞ ¹⁰اٜنْ کُوَ، اٜنْ ڤِيدَ نَاع سٜطَّ نغَمْ اٜنْ نغَطِي ٻٜرْطٜ مٜىٰطٜنْ دٛوْ اَللَّه مٛ يٛنْکِ، کِسْنٛووٛ کٛو مٛيٜ، وَاتٛ کٛولِيٻٜمٛ؞

¹¹وِعُ طُمْ وَطَ فُو فِي طُعُمْ، اٜکِّتِنْطُمْ؞ ¹²تَاع جَٻُ کٛو مٛيٜ يَوَنَ سُکَاکُ مَاطَ، اَمَّا وَرْتُ مِسَالُ تٛ تٛکُّٻٜ يٜىٰسُ ندٜرْ مٜتٛ مَاطَ، اٜ نغِکُّ مَاطَ، اٜ يِدّٜ مَاطَ، اٜ حٛولَارٜ مَاطَ، اٜ جٛنْدٜ مَاطَ لَمْندٜ؞ ¹³کٛ مِ وَرَ، وَطُ کَ جَنْغَنْکِ يِمْٻٜ وٛلْدٜ اَللَّه اَ وَعَجِنَ، اَ اٜکِّتِنَ؞ ¹⁴تَاع فِجِرْ دٛکَّلْ نغَلْ طُمْ حٛکُّمَا شَرٜلْ کٛ طُمْ وَطِ اَنَّبَاکُ مَوْٻٜ کَوْتَلْ تٛکُّٻٜ يٜىٰسُ نجٛوَنْمَا جُوطٜ دٛوْ حٛورٜ؞ ¹⁵وَطُ کَ وَطُکِ فُو فِي طُعُمْ، وَطُ ٻٜرْندٜ مَاطَ دٛوْ مَاجُمْ نغَمْ کٛو مٛيٜ يِعَ يَحُکِ يٜىٰسٛ مَاطَ؞ ¹⁶فَامَنْ حٛورٜ مَاطَ اٜ اٜکِّتِنٛلْ مَاطَ؛ وَطُ کَ وَطُکِطُمْ، نغَمْ تَا وَطَ نٛنْ، اَ حِسْنَيْ حٛورٜ مَاطَ اٜ نَنَيْٻٜمَ؞

نٛ حَانِ طُمْ جٛغٛرٛو تٛکُّٻٜ يٜىٰسُ

¹تَاع حَٻَنْ ندٛتِّيجٛ، اَمَّا مٜتَنْمٛ نٛ مٜتِرَنْتَا ݧَاکٛ مَاطَ؞ وَغِّنْ کَيٜعٜنْ نٛ مبَغِّنِرْتَا مِݧِرَاٻٜ مَاطَ، ²رٜوْٻٜ نَيٜعٜنْ بٛو، بٛ مَدُعٜنْ مَاطَ، سُرْبَاٻٜ بٛو، بٛ مِݧِرَاٻٜ مَاطَ رٜوْٻٜ ندٜرْ ٻٜرْندٜ لَمْندٜ؞

³مَوْنِنْ رٜوْٻٜ ٻٜ نغَلَا وَلّٛوٻٜ ٻٜ وٛرْٻٜ مُعّٜنْ مَايِ؞ ⁴تٛ دٜبّٛ مٛ غٛرْکٛ مُوطُمْ مَايِ اٜ وٛودِ ٻِٻّٜ کٛو تَانِرَاٻٜ، ٻٜ ڤُطَّ اٜکِّتَاکِ کٛ دِينَ مَٻّٜ وِعِ اٜ حَانِ ٻٜ نغَطَنَ دَݧٛوٻٜ مَٻّٜ، نٛنْ ٻٜ نغَاتِرَنْتَ دَݧٛوٻٜ مَٻّٜ کٛ ٻٜ نغَطَنِٻٜ، نغَمْ اَللَّه اٜ نَنَ بٜلْطُمْ نٛنْ؞ ⁵دٜبّٛ مٛ غٛرْکٛ مُوطُمْ مَايِ اَلَاطٛ کَنُمْ تَنْ وَلَا بَلَّيْطٛمٛ، اٛ وَطِي ٻٜرْندٜ مَاکٛ دٛوْ اَللَّه وٛنْ طٛنْ، اٜ مٛ وَطَ کَ دٛعَارٜ اٜ مٛ تٛرٛومٛ جٜمَّ اٜ ݧَلَوْمَ؞ ⁶اَمَّا دٜبّٛ مٛ غٛرْکٛ مُوطُمْ مَايِ غِطَنْطٛ حٛورٜ مُوطُمْ جٛنْدٜ نَنْکِ بٜلْطُمْ، اٛ يَادَکٜ اٛ مَايِي کٛو ندٜ اٜ مٛ فٛوفَ؞ ⁷وِعُ تٛکُّٻٜ يٜىٰسُ نغَطَ نٛنْ، نغَمْ تٛع غٛطّٛ حٜٻَ کٛ حُطِرْتَٻٜ؞ ⁸فُو مٛ وَلَّايِ بَنْدِرَاٻٜ مُوطُمْ، کٛ ٻُرِ مَا وُرٛ مُوطُمْ، اٛ اَلِي حٛولَاکِ يٜىٰسُ اٜ غٛونغَ، اٛ ٻُرِي مٛ تٛکَّايِ يٜىٰسُ حَلُّکِ؞

⁹تٛع طُمْ وِنْدَ اِنْدٜ دٜبّٛ مٛ غٛرْکٛ مُوطُمْ مَايِ ندٜرْ اِنْطٜ رٜوْٻٜ ٻٜ وٛرْٻٜ مُعّٜنْ مَايِ نَا اٛ حٜوْتِي دُوٻِ 60 يَاکِ يٜىٰسٛ؞ نٛنْ مَا دٛولٜ اٛ جٛوطٛدَکٜنٛ اٜ غٛرْکٛ مَاکٛ اٜ غٛونغَ، اٛ تٛکَّايِ وٛرْٻٜ؞ ¹⁰دٛولٜ اٛ وَرْتَ مٛ طُمْ اَنْدِرِ وَطُکِ کُوطٜ بٛطّٜ، اٜکِّتِنْطٛ ٻِٻّٜ مَاکٛ بٛطُّمْ، جَٻّٛتٛوطٛ حٛٻّٜ، غَطَنٛووٛ تٛکُّٻٜ يٜىٰسُ فِي بٛطُّمْ ندٜرْ لٜسْنُکِ حٛورٜ، بَلّٛووٛ يِمْٻٜ نَتُّٻٜ تٛرَّ، غَطُطٛ حٛورٜ مُوطُمْ دٛوْ وَطُکِ بٛطُّمْ ندٜرْ کٛو طُمٜ؞

¹¹اَمَّا تَاع وِنْدُ اِنْطٜ رٜوْٻٜ سُکَاٻٜ ٻٜ وٛرْٻٜ مُعّٜنْ مَايِ ندٜرْ اِنْطٜ رٜوْٻٜ ٻٜ وٛرْٻٜ مُعّٜنْ مَايِ؞ مِ وِعُ نٛنْ نغَمْ تٛ سُونٛ وٛرْٻٜ اُمَّنَکٜٻٜ، نغٛ سٜنْدَيْ حَکِّيلٛ مَٻّٜ اٜ اَلْکَوَلْ نغَلْ ٻٜ نغَطَنِ يٜىٰسُ، ٻٜ نغَطَ وٛنْغَلْ تٜىٰغَلْ؞ ¹²ندٜنْ کِيتَ اَللَّه نَنْغَيْٻٜ نغَمْ ٻٜ نغٜوِي اَلْکَوَلْ نغَلْ ٻٜ نغَطَنّٛومٛ اَرَنْدٜ؞ ¹³غَطَ نٛنْ، ٻٜ کُوَتَا وٛنْغَلْ کُوغَلْ سٜيْ نَتّٜ‑نَتّٜ غُرٜىٰجٜ، اَمَّا کٛ ٻُرِ نٛنْ حَلُّکِ، ٻٜ نغَطَيْ کَ مٜتُکِ حَالَاجِ کَلُّطِ دٛوْ يِمْٻٜ اٜ ٻٜ مبِعَ کٛ حَانَا وِعٜىٰکِ؞ ¹⁴نغَمْ مَاجُمْ مِ ٻُرِي يِطُکِ رٜوْٻٜ سُکَاٻٜ ٻٜ وٛرْٻٜ مُعّٜنْ مَايِ نغَطَ تٜىٰغَلْ، ندَݧَ ٻِٻّٜ، ڤَامَنَ وُرٛ مَٻّٜ، نغَمْ تٛع وَݧْوَݧْٻٜ مٜىٰطٜنْ کٜٻَ نٛ مٜتِرْتَ فِي کَلُّطُمْ دٛوْ مٜىٰطٜنْ؞ ¹⁵مِ وِعُ نٛنْ نغَمْ وٛٻّٜ ندٜرْ مَٻّٜ شٜلِي تٛکِّي شٜيْطَنْ؞ ¹⁶تٛ غٛطّٛ دٜبّٛ تٛکُّطٛ يٜىٰسُ اٜ وٛودِ بَنْدِرَاٻٜ رٜوْٻٜ ٻٜ وٛرْٻٜ مُعّٜنْ مَايِ، سٜيْ اٛ وَلَّٻٜ؞ تٛع اٛ اَلْدَ کَوْتَلْ تٛکُّٻٜ يٜىٰسُ اٜ تٜدّٛرَلْ، نغَمْ ٻٜ مبَاوَ ٻٜ مبَلَّ رٜوْٻٜ ٻٜ وٛرْٻٜ مُعّٜنْ مَايِ ٻٜ نغَلَا وَلّٛوٻٜ؞

¹⁷مَوْٻٜ ندٜرْ کَوْتَلْ تٛکُّٻٜ يٜىٰسُ اَرْدٛتٛوٻٜ بٛطُّمْ اٜ حَانِ ٻٜ ٻُرَ حٛکّٜىٰکِ مَنْغُ، ٻُرْٻٜ مَا کَمْٻٜ نغٛنِ وَعَجِنٛوٻٜ اٜ اٜکِّتِنَ؞ ¹⁸مِ وِعُ نٛنْ نغَمْ اَايَارٜ وِعِي، ‏«‏تَاع مَٻَّنْ نغَارِ حٛنْدُکٛ شَرٜلْ کٛ ندِ سٛرْٻَتَ،»‏ ندٜنْ، ‏«‏کُوٛووٛ اٜ حَانِ طُمْ يٛٻَمٛ؞»‏ ¹⁹تٛ نٜطّٛ غٛعٛتٛ وِعِي مَوْطٛ ندٜرْ کَوْتَلْ تٛکُّٻٜ يٜىٰسُ وَطِي کٛ وٛوطَا، تَاع جَٻُکَ سٜيْ نِ تٛ اٜ وٛودِ شٜيْدِيٻٜ طِطٛ کٛو تَتٛ؞ ²⁰وَغِّنْ غَطٛوٻٜ حَکّٜ يٜىٰسٛ کٛو مٛيٜ، نغَمْ کٛرِيٻٜ کُلَ؞

²¹يٜىٰسٛ اَللَّه اٜ يٜىٰسُ اَلْمَسِيحُ اٜ مَلَاعِکَعٜنْ شٜنِيٻٜ، اٜ مِ وَغِّنْمَا تَاع وَطُ يِدّٜ حٛورٜ ندٜرْ وَطُکِ کٛ مبِيمَامِ؞ ²²تَاع يَاوُ يٛوَنْکِ کٛو مٛيٜ جُوطٜ نغَمْ وَطُکِ دٛعَارٜ سُٻُکِمٛ اَرْدِيطٛ؞ نٛنْ مَا تَاع وَطُ حٛورٜ مَاطَ ندٜرْ غٛطُّمْ کٛ وٛوطَا طُمْ وٛٻّٜ نغَطَتَ؞ وَطُ جٛنْدٜ لَمْندٜ؞

²³تَاع يَرُ ندِيَمْ تَنْ، اَمَّا يَرُ ندِيَمْ اِنَبٛجَمْ سٜطَّ نغَمْ فُکِّنْکِ ݧَوُ اُمَّنْتٛوطُمَّ ندٜرْ رٜىٰدُ؞

²⁴حَکّٜ وٛٻّٜ يِمْٻٜ اٜ نجَيْرِ طُمْ وٛنِ کٛ طُمْ فٛوندَ نغِکُّ مَٻّٜ، اَمَّا حَکّٜ وٛٻّٜ سٜيْ يٜىٰسٛ طُمْ وُرْتٛيْتٛ؞ ²⁵نٛنْ مَا کُوطٜ بٛطّٜ اٜ نجَيْرِ طٜ نغٛنِ، کٛو مَا اٜ طٜ شُوطِي طٜ مبُرْتٛيْتٛ؞

¹تٛ مَشُّٻٜ اٜ تٛکَّ يٜىٰسُ، اٜ حَانِ ٻٜ مَوْنِنَ جٜيْٻٜٻٜ، نغَمْ تٛع غٛطّٛ مٜتَ حَالَ کَلُّکَ دٛوْ اَللَّه اٜ اٜکِّتِنٛلْ مٜىٰطٜنْ؞ ²تٛ مَشُّٻٜ ٻٜنْ اٜ نغٛودِ جٜيْٻٜٻٜ تٛکُّٻٜ يٜىٰسُ، تٛع ٻٜ نجَوَنَٻٜ نغَمْ کَمْٻٜ مَا ٻٜ تٛکُّٻٜ يٜىٰسُ؞ اَمَّا ٻٜ کُوَنَٻٜ کٛ ٻُرِ وٛوطُکِ، نغَمْ ݧَامٛوٻٜ بٛتٜ کُوطٜ مَٻّٜ ٻٜ تٛکُّٻٜ يٜىٰسُ، غِطَاٻٜ؞

اٜکِّتِنٛلْ فٜوْرٜ اٜ رِسْکُ طُمْ غٛونغَ

دٛولٜ اٜکِّتِنَا طُعُمْ فُو نغَعَجِنَاطُمْ؞ ³فُو اٜکِّتِنْطٛ اٜکِّتِنٛلْ فٜىٰرٜ شَلِينغٛلْ تٛکَّ بٛلِيطٜ غٛونغَ طٜ يٜىٰسُ اَلْمَسِيحُ جٛومِرَاوٛ مٜىٰطٜنْ، طٛنْمَا اٛ وَݧِ اٜکِّتِنٛلْ کٛلُّنغٛلْ نٛ تٛکِّرْتٜنْ اَللَّه، ⁴اٛ کٜوْطٛ مَنْغُ حٛورٜ، وَلَا کٛ اٛ اَنْدِ؞ اٛ غِطّٛ غٜدِّ اٜ فٛطْفٛطْتِرْکِ دٛوْ بٛلِيطٜ؞ فٛطْفٛطْتِرْکِ کِنْ اٜ وَدَّ لَوْلِيرُ، اٜ يٜدّٛوتِرْکِ، اٜ حُطْحُطْتِرْکِ، اٜ ݧُمٛوجِ کَلُّطِ دٛوْ يِمْٻٜ؞ ⁵اٛ غِطّٛ يٜدّٛوتِرْکِ کِ رٜعَتَا اٜ يِمْٻٜ ٻٜ ݧُمٛ بَاتُنغٛ، ٻٜ نغَلَا غٛونغَ، ݧُمٛوٻٜ تٛکّٛلْ اَللَّه طُمْ طَتَلْ حٜٻُکِ شٜىٰدٜ؞

⁶غٛونغَ، اٜ وٛودِ رِسْکُ مَوْطُمْ ندٜرْ کُلٛلْ اَللَّه تٛ اٜنْ مُݧِي دٛوْ کٛ نغٛودُطٜنْ؞ ⁷نغَمْ اٜنْ نغَرْدَايِ اٜ غٛطُّمْ ندٜرْ دُونِيَارُ، نٛنْ مَا اٜنْ شٛعّٛدَتَاکٛ اٜ غٛطُّمْ؞ ⁸تٛو، تٛ اٜنْ نغٛودِ ݧَمْندُ اٜ کٛلْتٜ، طُمْ حٜپِيعٜنْ؞ ⁹اَمَّا غِطْٻٜ رِسْکُکِ، سَطَا ٻٜ نغَطَ کٛ حَلِّ، ٻٜ نجَنَ ندٜرْ تَرْکٛوٛلْ سُونٛ فُو فِي مٜىٰرٜجُمْ؞ سُونٛ نغٛنْ فٛوطَنَيْٻٜ تٛرَّ ٻٜ لَلَّ ٻٜ کَلْکَ؞ ¹⁰نغَمْ يِدّٜ شٜىٰدٜ وٛنِ فُطّٛودٜ کٛو اِرِ طُمٜ فِي کَلُّطُمْ؞ نغَمْ يِدّٜ شٜىٰدٜ، وٛٻّٜ اَلِي حٛولَاکِ يٜىٰسُ ٻٜ ڤٛوطَنِ کٛعٜ مَٻّٜ تٛرَّاجِ کَلُّطِ؞

نٛ حَانِ تٛکُّطٛ يٜىٰسُ جٛوطٛرٛو

¹¹اَمَّا اَنْ، ندٜ اَ حٛولَکٜ اَللَّه، وٛطِّتَ فُو فِي طُعُمْ؞ وَطُ حٛورٜ مَاطَ دٛوْ وَطُکِ کٛ وٛوطِ، اٜ تٛکُّکِ اَللَّه، اٜ حٛولَاکِمٛ، اٜ يِدّٜ، اٜ مُݧَلْ، اٜ حَکِّيلٛ؞ ¹²وَطُ کٜىٰرٛلْ کٛ مبَاوَتَا وَطُکِ ندٜرْ حٛولَاکِ يٜىٰسُ اَلْمَسِيحُ؞ کٜٻَنَا حٛورٜ مَاطَ يٛنْکِ کِ رٜعَتَا، نغَمْ کَنْجُمْ وَطِ طُمْ نٛدُّمَا شَرٜلْ کٛ نجَٻُطَا يٜىٰسُ يٜىٰسٛ يِمْٻٜ طُطْٻٜ؞ ¹³يٜىٰسٛ اَللَّه غَطَنْطٛ کٛو طُمٜ يٛنْکِ، اٜ يٜىٰسٛ يٜىٰسُ اَلْمَسِيحُ بِيطٛ غٛونغَ دٛوْ مُوطُمْ يٜىٰسٛ بِلَاتُسْ کُلٛلْ وَلَا، ¹⁴اٜ مِ وِعُمَا، تٛکُّ کٛ اَللَّه وِعِ اٜ غٛونغَ نَا ݧَلْندٜ ندٜ جٛومِرَاوٛ مٜىٰطٜنْ يٜىٰسُ اَلْمَسِيحُ وَرْتٛيْتَ؞ ¹⁵اٛ وَرْتَيْ اٜ شَرٜلْ نغٜلْ اَللَّه سُٻَنِمٛ؞ اَللَّه اٛ بَرْکِطِنَاطٛ، کَنْکٛ تَنْ جٜيِ لَامُ، لَامِيطٛ لَمْلَمْٻٜ، جٛومُ کٛو طُمٜ؞ ¹⁶کَنْکٛ تَنْ وٛنِ مٛ مَايَتَا، اٜ مٛ جٛوطِي ندٜرْ جَيْنغٛلْ، وَلَا ڤٛتُطٛ ٻَدّٛو حَادٜ مَاغٛلْ، وَلَا مٜىٰطُطٛ يِيکِمٛ، وَلَا بَاوَيْطٛ يِعَمٛ؞ مَنْغُ اٜ لَامُ طُمْ رٜعَتَا تَبِّتَ تٛ مَاکٛ؞ اَامِنْ؞

¹⁷وَغِّنْ غٛودُٻٜ رِسْکُ ندٜرْ دُونِيَارُ ندُعُ، تٛع ٻٜ مَوْنِنَ کٛعٜ مَٻّٜ، تٛع ٻٜ نغَطَ ٻٜرْطٜ مَٻّٜ دٛوْ رِسْکُ طُمْ تَبِّتَتَا، اَمَّا ٻٜ نغَطَ ٻٜرْطٜ مَٻّٜ دٛوْ اَللَّه، کٛکُّطٛعٜنْ کٛو طُمٜ ٻٜرْندٜ غٛعٛ نغَمْ نَنٜنْ بٜلْطُمْ؞ ¹⁸وِعُٻٜ ٻٜ نغَطَ کٛ وٛوطِ، ٻٜ نغَرْتَ غَطٛوٻٜ کُوطٜ بٛطّٜ، ٻٜ نغَرْتَ کٛکّٛوٻٜ شَاحُ ٻٜرْندٜ غٛعٛ، غِطْٻٜ سٜنْدُدُکِ کٛ ٻٜ نغٛودِ اٜ وٛٻّٜ؞ ¹⁹تٛ ٻٜ نغَطِي نٛنْ، ٻٜ ندٜسَنِي کٛعٜ مَٻّٜ رِسْکُ تَبُّتُطُمْ نغَمْ ݧَلْندٜ جَانغٛ، نغَمْ ٻٜ مبَاوَ حٜٻُکِ يٛنْکِ تَبِّتَيْکِ؞

²⁰تِمٛوتِ، جٛغَ کٛ اَللَّه حٛکُّمَا بٛطُّمْ؞ وٛطِّتَ حَالَاجِ طِ نغَلَا غٛونغَ دٛوْ اَللَّه اٜ غٜدِّ مٜىٰرٜىٰجِ طِ وٛٻّٜ يِمْٻٜ نٛدِّرْتَ ‏«‏اَنْدَلْ،»‏ اَمَّا نَاع طُمْ غٛونغَ؞ ²¹نغَمْ وٛٻّٜ اٜ مبِعَ اٜ نغٛودِ اَنْدَلْ، ندٜرْ نٛنْ ٻٜ اَلِي حٛولَاکِ يٜىٰسُ؞

اَللَّه بَرْکِطِنَعٛنْ؞