1 تَسَلٛونِکَنْکٛعٜنْ

طٜرٜوٛلْ اَرَنْدٜوٛلْ نغٛلْ بُلُسْ وِنْدَنِ

تَسَلٛونِکَنْکٛعٜنْ

حَبَرُ دٛوْ طٜرٜوٛلْ نغٛعٛلْ

بُلُسْ لِلَاطٛ يٜىٰسُ وِنْدِ طٜرٜوٛلْ نغٛعٛلْ؞ اٛ وِنْدَنْغٛلْ تٛکُّٻٜ يٜىٰسُ وٛنْٻٜ غَرِيرِ تَسَلٛونِکَ نغٛنْدِ ندٜرْ لٜيْدِ مَکِدٛونِيَ؞ اٜ طُمْ کَمّٛو بُلُسْ وِنْدِي طٜرٜوٛلْ نغٛعٛلْ حَکُّندٜ دُوٻِ 15‏-05 غَطَ دَݧْنغٛلْ يٜىٰسُ؞ اٛ وِنْدُنغٛلْ شَرٜلْ کٛ اٛ وٛنِ اٜ غَرِيرِ کٛرِنْتِ غَطَ اٛ رِيوَامَ دَغَ غَرِيرِ تَسَلٛونِکَ؞

اٛ وِنْدُنغٛلْ نغَمْ اٛ سٜمْبِطِنَ تٛکُّٻٜ يٜىٰسُ دٛوْ حٛولَارٜ مَٻّٜ؞ اٛ يٜتِّي اَللَّه نغَمْ حٛولَارٜ مَٻّٜ، اٜ حٛلُّکِ يِدّٜ حَکُّندٜ مَٻّٜ، اٜ وَطُکِ ٻٜرْندٜ مَٻّٜ دٛوْ اَلْمَسِيحُ؞ اٛ سٜمْبِطِنِ تٛکُّٻٜ يٜىٰسُ دٛوْ ݧَلْندٜ وَرْتٛيْکِ اَلْمَسِيحُ؞ اٛ اٜکِّتِنِيٻٜ نٛ ٻٜ نجٛوطٛرْتٛو اٜ نٛ ٻٜ نغَطِرْتَ کَ کُوغَلْ حَا يٜىٰسُ وَرْتٛيَ؞

¹مِنْ بُلُسْ اٜ سِيلَ اٜ تِمٛوتِ وِنْدِ طٜرٜوٛلْ نغٛعٛلْ؞ مِنْ مبِنْدَنْغٛلْ تٛکُّٻٜ يٜىٰسُ وٛنْٻٜ غَرِيرِ تَسَلٛونِکَ ٻٜ اَللَّه ݧَاکٛ مٛ دٛوْ اٜ يٜىٰسُ اَلْمَسِيحُ جٛومِرَاوٛ جٜيِ؞

اَللَّه بَرْکِطِنَعٛنْ حٛکَّعٛنْ جَمْ؞

جٛنْدٜ تَسَلٛونِکَنْکٛعٜنْ اٜ حٛولَارٜ مَٻّٜ

²کٛو ندٜيٜ اٜ مِنْ نغٜتَّ اَللَّه نغَمْ مٛوطٛنْ اٛنْ فُو، اٜ مِنْ نغَطَنَعٛنْ دٛعَارٜ؞ ³يٜىٰسٛ اَللَّه مٜىٰطٜنْ ݧَاکٛ مٜىٰطٜنْ مٛ دٛوْ، اٜ مِنْ ݧُمَ دٛوْ کُوطٜ مٛوطٛنْ طٜ حٛولَارٜ، اٜ نٛ يِدّٜ ندٜ نغٛودُطٛنْ وَطَتَعٛنْ اٛنْ کُوَ نَاع سٜطَّ، اٜ نٛ مُݧِرْتٛنْ ندٜرْ تٛرَّ نغَمْ کَمُّندٜ مٛوطٛنْ دٛوْ جٛومِرَاوٛ مٜىٰطٜنْ يٜىٰسُ اَلْمَسِيحُ؞ ⁴بَنْدِرَاٻٜ ٻٜ اَللَّه يِطِ، اٜ مِنْ اَنْدِ اَللَّه سُٻِيعٛنْ؞ ⁵نغَمْ حَبَرُ بٜلْطُمْ طُمْ مِنْ نغَدَّنِعٛنْ نَاع طُمْ بٛلِيطٜ تَنْ، اَمَّا اٜ طُمْ وٛودِ بَوْطٜ، اٜ رُوحُ اَللَّه، اٜ تَبِّتِنْکِ غٛونغَ مَاجُمْ؞ اٛنْ اَنْدِ اِرِ جٛنْدٜ ندٜ مِنْ نغَطِ حَکُّندٜ مٛوطٛنْ نغَمْ طُمْ نَفَنَعٛنْ؞ ⁶اٛنْ نغَرْتِي اٜکِّتٛتٛوٻٜ تٛ اَمِنْ اٜ تٛ جٛومِرَاوٛ، نغَمْ اٛنْ نجَٻِي وٛلْدٜ اَللَّه ندٜرْ وٜلْوٜلٛ نغٛ رُوحُ اَللَّه حٛکَّتَ، کٛو ندٜ اٛنْ نجَرِي تٛرَّ نَاع سٜطَّ؞ ⁷نٛنْ نغَرْتِرْطٛنْ کٛ فُو تٛکُّٻٜ يٜىٰسُ وٛنْٻٜ لٜيْدِ مَکِدٛونِيَ اٜ اَکَايَ اٜکِّتٛتٛو؞ ⁸نغَمْ دَغَ تٛ مٛوطٛنْ وٛلْدٜ جٛومِرَاوٛ حٜٻِ سَنْکِتَاکِ نَاع اٜ لٜيْدِ مَکِدٛونِيَ اٜ اَکَايَ تَنْ، اَمَّا کٛو تٛيٜ طُمْ اَنْدِي حٛولَارٜ مٛوطٛنْ دٛوْ اَللَّه؞ نغَمْ نٛنْ نَاع سٜيْ تٛ مِنْ مبِعِي غٛطُّمْ دٛوْ مَاجُمْ؞ ⁹نغَمْ کَمْٻٜ اٜ کٛعٜ مَٻّٜ کٛکَّتَ حَبَرُ نٛ نجَٻّٛرِيطٛنْمِنْ کٛ مِنْ نغَرِ تٛ مٛوطٛنْ؞ ٻٜ کٛکِّيمِنْ حَبَرُ نٛ اَلِرْطٛنْ تٛکُّکِ غُنْکِيجِ نغَرْتُطٛنْ تٛ اَللَّه، نغَمْ کُوَنٛنْ اَللَّه مٛ يٛنْکِ مٛ غٛونغَ، ¹⁰ندٜنْ کٜطٛوطٛنْ وَرْتٛيْکِ ٻِطّٛ مَاکٛ دَغَ دٛوْ، مٛ اٛ اُمِّنِ دَغَ مَيْدٜ، وَاتٛ يٜىٰسُ کِسْنَيْطٛعٜنْ دَغَ مٛنّٜرٜ اَللَّه غَرَيْندٜ؞

کُوطٜ بُلُسْ ندٜرْ تَسَلٛونِکَ

¹بَنْدِرَاٻٜ، اٛنٛنْ اٜ کٛعٜ مٛوطٛنْ اٛنْ اَنْدِ غَرٛلْ اَمِنْ تٛ مٛوطٛنْ نَاع اٜ مٜىٰرٜ نغٛلْ وٛنِ؞ ²اَمَّا کٛو ندٜ ندٜنّٛ مِنْ نجَرِي تٛرَّ اٜ سٜمْتِنٜىٰکِ اٜ فِلِبِ، نٛنْ نٛ اَنْدُطٛنْ، اٜ بَلَّلْ اَللَّه مٜىٰطٜنْ مِنْ کٛکِّيعٛنْ حَبَرُ بٜلْطُمْ پِوٛيْطُمْ تٛ مَاکٛ کُلٛلْ وَلَا، کٛو ندٜ يِمْٻٜ نغَݧِيمِنْ نَاع سٜطَّ؞ ³شَرٜلْ نغٜلْ مِنْ تٛرِيعٛنْ نجَٻٛنْ حَبَرُ بٜلْطُمْ، مِنْ کُوتِرَايِ فٜوْرٜ، وَلَا حَلّٜىٰندٜ ندٜرْ ٻٜرْطٜ اَمِنْ، مِنْ پٛيْرَايِعٛنْ؞ ⁴اَمَّا نٛنْ نٛ اَللَّه حٛولٛرِيمِنْ حٛکِّمِنْ کُوغَلْ وَعَجِنْکِ حَبَرُ بٜلْطُمْ، نٛنْ مِنْ نغَعَجِنِرْتَطُمْ، نَاع نغَمْ مِنْ مبٜلْنَنَ يِمْٻٜ ٻٜرْطٜ، اَمَّا نغَمْ مِنْ مبٜلْنَنَ اَللَّه ٻٜرْندٜ کَنْکٛ ڤٛوندٛووٛ ٻٜرْطٜ اَمِنْ؞ ⁵اٛنْ اَنْدِ مِنْ مٜىٰطَايِ مٜتَنْکِعٛنْ مٜتٛ بٜلْطُمْ حٛنْدُکٛ، نٛنْ مَا مِنْ نغَلَا سُونٛ غٛطُّمْ نغٛ بٛلِيطٜ اَمِنْ سُوطَتَ، اَللَّه وٛنِ شٜيْدُوجٛ اَمِنْ؞ ⁶مِنْ طَٻِّتَايِ مَنْغُ تٛ يِمْٻٜ، کٛو تٛ مٛوطٛنْ، کٛو تٛ وٛٻّٜ، کٛو ندٜ مِنْ مبَاوَيْ مِنْ مبِعَعٛنْ دٛولٜ نغَطَنٛنْمِنْ غٛطُّمْ نغَمْ مِنْ لِلَاٻٜ اَلْمَسِيحُ؞ ⁷اَمَّا اٜ مِنْ جٛغٛرِيعٛنْ سٜىٰسٜ‑سٜىٰسٜ نٛ مَدُوجٛ جٛغٛرْتٛو ٻِنْغٜلْ مُوطُمْ؞ ⁸نغَمْ يِدّٜ ندٜ مِنْ نغِطِعٛنْ حَا اٜ مِنْ شِرْيِي نَاع مِنْ کٛکَّعٛنْ حَبَرُ بٜلْطُمْ طُمْ اَللَّه تَنْ، اَمَّا فُو اٜ يٛنْکِيجِ اَمِنْ، نغَمْ اٛنْ نغَرْتِي ٻٜ مِنْ نغِطِ نَاع سٜطَّ؞ ⁹بَنْدِرَاٻٜ، اٛنْ نغٜجِّتَايِ کُوطٜ طٜ مِنْ کُوِ نَاع سٜطَّ؞ مِنْ کُوِي جٜمَّ اٜ ݧَلَوْمَ نغَمْ تٛع مِنْ نجٛوَنَ غٛطّٛ ندٜرْ مٛوطٛنْ وٛنْغَلْ تٜدّٛرَلْ شَرٜلْ کٛ مِنْ نغَعَجِنَنْتَعٛنْ حَبَرُ بٜلْطُمْ پِوٛيْطُمْ تٛ اَللَّه؞

¹⁰اٛنٛنْ اٛنْ شٜيْدُعٜنْ، اَللَّه مَا اٛ شٜيْدُوجٛ دٛوْ نٛ مِنْ نجٛوطٛرِنٛو جٛنْدٜ شٜنِيندٜ اٜ اَادِلَاکُ اٜ جٛنْدٜ ندٜ وَلَا غٛطُّمْ کٛ وٛوطَا ندٜرْ مٛوطٛنْ، اٛنٛنْ کٛولِيٻٜ يٜىٰسُ؞ ¹¹نغَمْ اٛنْ اَنْدِ نٛ ݧَاکٛ جٛغٛرِي ٻِٻّٜ مُوطُمْ، نٛنْ مِنْ جٛغٛرِيعٛنْ؞ ¹²مِنْ مبَغِّنِيعٛنْ، مِنْ شٜمْبِطِنِيعٛنْ، مِنْ مبِعِيعٛنْ دٛولٜ نغَطٛنْ جٛنْدٜ بٜلْنَنَيْندٜ اَللَّه ٻٜرْندٜ نٛدُّطٛعٛنْ ندٜرْ لَامُ مَاکٛ اٜ تٜدُّنغَلْ مَاکٛ؞

¹³نٛنْ مَا کٛو ندٜيٜ اٜ مِنْ نغٜتَّ اَللَّه، نغَمْ شَرٜلْ نغٜلْ نجَٻُطٛنْ وٛلْدٜ اَللَّه ندٜ نَنْطٛنْ تٛ اَمِنْ، اٛنْ نجَٻَايِندٜ بٛ وٛلْدٜ نٜطّٛ، اَمَّا اٛنْ نجَٻِيندٜ ندٜ وٛلْدٜ اَللَّه، نٛنْ نٛ ندٜ وٛنْتِندِرِ؞ اٜ ندٜ حُوَ ندٜرْ ٻٜرْطٜ مٛوطٛنْ، اٛنٛنْ کٛولِيٻٜ اَللَّه؞ ¹⁴بَنْدِرَاٻٜ، اٛنْ نغَرْتِي اٜکِّتٛتٛوٻٜ جٛنْدٜ تٛکُّٻٜ اَللَّه وٛنْٻٜ لٜيْدِ يَحُودِيَ ٻٜ يٜىٰسُ اَلْمَسِيحُ؞ اٛنْ نجَرِي تٛرَّ تٛ يِمْٻٜ لٜيْدِ مٛوطٛنْ نٛنْ نٛ کَمْٻٜ مَا ٻٜ نجَرِرِ تٛرَّ تٛ جُوطٜ يَحُودَنْکٛعٜنْ؞ ¹⁵يَحُودَنْکٛعٜنْ ٻٜنْ مبَرِ يٜىٰسُ جٛومِرَاوٛ اٜ اَنَّبٛعٜنْ، ندٜنْ ٻٜ ندِيوِمِنْ؞ اٜ ٻٜ نغَطَ کٛ اَللَّه يِطَا، اٜ ٻٜ نغَݧَ کٛو مٛيٜ!‏ ¹⁶اٜ ٻٜ کَطَمِنْ وَعَجِنَنْکِ يِمْٻٜ نَاع يَحُودَنْکٛعٜنْ نغَمْ تٛع يِمْٻٜ ٻٜنْ کٜٻَ کِسْندَمْ؞ نٛنْ اٜ وَطَ کٛو ندٜيٜ اٜ ٻٜ کٜبِّنَ ڤٛوندِرْطُمْ حَکّٜ مَٻّٜ؞ اَمَّا مٛنّٜرٜ اَللَّه يَادَکٜ جِڤّٛنٛيَکٜٻٜ؞

بُلُسْ يِطِي سٛعَّاکِ تَسَلٛونِکَ

¹⁷بَنْدِرَاٻٜ، طُمْ سٜنْدِيعٜنْ نغَمْ شَرٜلْ سٜطَّ ندٜرْ ٻَنْدُ، اَمَّا مِنْ اَلَايِ ݧُمُکِ دٛوْ مٛوطٛنْ؞ مِنْ کَاٻِي يِيکِعٛنْ؛ نغَمْ نٛنْ مِنْ نغَطِي کٛ مِنْ مبَاوَتَ وَطُکِ مِنْ نغِعَعٛنْ غِتٜ اٜ غِتٜ؞ ¹⁸مِنْ نغِطِي وَرْکِ تٛ مٛوطٛنْ؞ غٛونغَ، مِنْ بُلُسْ، مِ يِطِي مِ وَرَ نَاع ندٜ غٛعٛ نَاع ندٜ طِطِ، اَمَّا شٜيْطَنْ حَطِيمِنْ؞ ¹⁹دٛوْ ٻٜيٜ مِنْ نغَطِ ٻٜرْطٜ اَمِنْ؟ ٻٜيٜ مبٜلْنَنْتَمِنْ ٻٜرْطٜ؟ ٻٜيٜ نغٛنِ ٻٜ مِنْ مَنْتٛرْتٛو يٜىٰسٛ جٛومِرَاوٛ مٜىٰطٜنْ يٜىٰسُ ݧَلْندٜ وَرْتٛيْکِ مَاکٛ؟ نَاع طُمْ اٛنٛنْ؟ ²⁰غٛونغَ، طُمْ اٛنٛنْ مِنْ مَنْتٛرْتٛو؞ اٛنٛنْ نغٛنِ بٜلْطُمْ ٻٜرْطٜ اَمِنْ؞

¹نغَمْ نٛنْ ندٜ مِنْ مبَاوَايِ مُݧُکِ، سٜيْ مِنْ نغِعِ طُمْ ٻُرِي وٛوطُکِ طُمْ اَلَمِنْ اٜ اَتِنَ، مِنٛنْ تَنْ؞ ²مِنْ لِلٛيِ بَنْدِرَاوٛ اَمِنْ تِمٛوتِ تٛ مٛوطٛنْ، مٛ مِنْ کُودَتَ، اٜ مٛ حُوَنَ اَللَّه ندٜرْ حٛکُّکِ حَبَرُ بٜلْطُمْ طُمْ اَلْمَسِيحُ؞ مِنْ لِلُمٛ نغَمْ اٛ تَبِّتِنَ حٛولَارٜ مٛوطٛنْ اٛ سٜمْبِطِنَعٛنْ، ³نغَمْ تٛع تٛرَّ کَ نجَرْطٛنْ وَطَ غٛطّٛ مٛوطٛنْ يٜوْرَ اَلَ حٛولَاکِ يٜىٰسُ؞ اٛنٛنْ اٜ کٛعٜ مٛوطٛنْ اٛنْ اَنْدِ دٛولٜ نجَرٜنْ تٛرَّ اِرِ کَعَ؞ ⁴نغَمْ شَرٜلْ کٛ مِنْ نغٛنْدُنٛو اٜ مٛوطٛنْ، مِنْ نغَطِي کَ وِيکِعٛنْ دَغَ اِلَا اٜنْ نجَرَيْ تٛرَّ؞ طُمْ بٛو وَطِي نٛنْ، نٛ اَنْدُطٛنْ؞ ⁵نغَمْ نٛنْ، ندٜ تَمْڤُمِ مُݧُکِ، مِ لِلٛيِي نغَمْ مِ نَنَ حَبَرُ حٛولَارٜ مٛوطٛنْ؞ اٜ مِ حُلَ کٛو شٜيْطَنْ مَجِّنِيعٛنْ، کُوغَلْ اَمِنْ وَرْتِي مٜىٰرٜ؞

⁶اَمَّا جٛونِ تِمٛوتِ وَرْتِي دَغَ تٛ مٛوطٛنْ، اٛ حٛکِّيمِنْ حَبَرُ بٛطُّمْ دٛوْ حٛولَارٜ مٛوطٛنْ اٜ يِدّٜ ندٜ نغٛودُطٛنْ؞ اٛ وِعِيمِنْ کٛو ندٜيٜ اٛنْ ݧُمَ ݧُمٛلْ بٛنْغٛلْ دٛوْ اَمِنْ، ندٜنْ اٛنْ نغِطِ يِيکِمِنْ نٛنْ نٛ مِنْ نغِطِرِ يِيکِعٛنْ؞ ⁷نغَمْ نٛنْ، بَنْدِرَاٻٜ، ندٜرْ فُو وَنَّارٜ اٜ تٛرَّ طُمْ مِنْ نجَرِ، اٛنْ ڤٜوْنَنِيمِنْ ٻٜرْطٜ نغَمْ حٛولَارٜ مٛوطٛنْ؞ ⁸جٛونِ اٜ مِنْ نغٛودِ يٛنْکِ غٛونغَ، تٛ اٛنْ ندَرَکٜ اٜ سٜمْبٜ ندٜرْ تٛکُّکِ جٛومِرَاوٛ؞ ⁹اِرِ ندٜيٜ يٜتّٛورٜ مِنْ نغٜتَّتَ اَللَّه نغَمْ مٛوطٛنْ؟ اٜ مِنْ نغٜتَّمٛ نغَمْ بٜلْطُمْ ٻٜرْندٜ طُمْ مِنْ نَنَتَ يٜىٰسٛ مَاکٛ نغَمْ مٛوطٛنْ؞ ¹⁰جٜمَّ اٜ ݧَلَوْمَ اٜ مِنْ نغَطَ دٛعَارٜ نَاع سٜطَّ نغَمْ مِنْ ڤُطِّتَ مِنْ نغِعَعٛنْ غِتٜ اٜ غِتٜ، مِنْ کٜبِّتِنَ کٛ ندُلُّطٛنْ ندٜرْ حٛولَارٜ مٛوطٛنْ؞

¹¹اَللَّه ݧَاکٛ مٜىٰطٜنْ اٜ حٛورٜ مُوطُمْ اٜ جٛومِرَاوٛ مٜىٰطٜنْ يٜىٰسُ سِرْيَنٛومِنْ لَاوٛلْ نٛ مِنْ نغَرِرْتَ تٛ مٛوطٛنْ؞ ¹²جٛومِرَاوٛ ٻٜيْدَ يِدّٜ ندٜ نغِطِندِرْطٛنْ نَاع سٜطَّ اٜ يِدّٜ ندٜ نغِطّٛنْ وٛٻّٜ مَا، نٛنْ نٛ يِدّٜ اَمِنْ ٻٜيْدٛرِي دٛوْ مٛوطٛنْ؞ ¹³اٛ سٜمْبِطِنَ ٻٜرْطٜ مٛوطٛنْ نغَمْ نغَرْتٛنْ ٻٜ نغَلَا غٛطُّمْ کٛ وٛوطَا، نغَرْتٛنْ شٜنِيٻٜ يٜىٰسٛ اَللَّه ݧَاکٛ مٜىٰطٜنْ ݧَلْندٜ وَرْتُکِ جٛومِرَاوٛ مٜىٰطٜنْ يٜىٰسُ اٜ فُو شٜنِيٻٜ مَاکٛ؞

اِرِ جٛنْدٜ ندٜ اَللَّه يِطِ

¹اٜ رٜعِرْدٜ بَنْدِرَاٻٜ، اٜ مِنْ تٛرٛوعٛنْ، نغَمْ يٜىٰسُ جٛومِرَاوٛ، نغَطٜىٰ جٛنْدٜ کَانُندٜ ندٜ اَللَّه نَنَتَ بٜلْطُمْ مَيْرٜ، نٛنْ نٛ اٜکِّتِيطٛنْ تٛ اَمِنْ، نٛنْ نٛ نجٛوطٛرِيطٛنْ جٛونِ؞ ٻٜيْدٜىٰ جٛوطٛرَاکِ نٛنْ؞ ²نغَمْ اٛنْ اَنْدِ مِنْ مبِعِيعٛنْ کٛ يٜىٰسُ جٛومِرَاوٛ وِعِ نغَطٛنْ؞ ³نغَمْ اَللَّه اٜ يِطِ نغَرْتٛنْ شٜنِيٻٜ، نغٛطِّتٛوطٛنْ وَطُکِ نجٜىٰنُ؞ ⁴کٛو مٛيٜ مٛوطٛنْ اٜکِّتٛو نٛ سُرِرْتَ ٻَنْدُ مُوطُمْ ندٜرْ سٜنَاکِ اٜ مَنْغُ، ⁵نَاع ندٜرْ سُونٛ نغٛ وٛوطَا نٛنْ نٛ حٜىٰفٜرْٻٜ ٻٜ اَنْدَا اَللَّه نغَطَتَ؞ ⁶دٛوْ فِي طُعُمْ، تٛع غٛطّٛ حَلَّنَ بَنْدِرَاوٛ مُوطُمْ کٛو وَطَنَمٛ کٛ وٛوطَا؞ مِنْ مبِعِيعٛنْ کَ دَغَ اَرَنْدٜ، مِنْ مبَغِّنِيعٛنْ وِيکِ، جٛومِرَاوٛ وَاتَنَيْ غَطٛووٛ نٛنْ اٜ بٛنٜ؞ ⁷اَللَّه نٛدَّايِعٜنْ نغَمْ نغَرْتٜنْ ٻٜ شٜنَاکِ، اَمَّا اٛ نٛدُّعٜنْ نغَطٜنْ جٛنْدٜ شٜنِيندٜ؞ ⁸نغَمْ نٛنْ، فُو غَݧُطٛ اٜکِّتِنٛلْ نغٛعٛلْ، نَاع نٜطّٛ اٛ وَݧِ، اَللَّه اٛ وَݧِ، کٛکّٛووٛعٛنْ رُوحُ مَاکٛ؞

⁹دٛوْ نٛ حَانِ نغِطِنْدِرٛنْ بٛو، نَاع سٜيْ تٛ غٛطّٛ وِنْدَنِيعٛنْ، نغَمْ اٛنٛنْ اٜ کٛعٜ مٛوطٛنْ اَللَّه اٜکِّتِنِيعٛنْ نغِطِنْدِرٛنْ؞ ¹⁰مِنْ تَبِّتِنِي اٛنْ نغِطِ فُو بَنْدِرَاٻٜ مٜىٰطٜنْ وٛنْٻٜ لٜيْدِ مَکِدٛونِيَ؞ فُو اٜ نٛنْ بَنْدِرَاٻٜ، اٜ مِنْ ٻٜيْدَ وِيکِعٛنْ، ٻٜيْدٜىٰ وَطُکِ نٛنْ؞ ¹¹نغَطٜىٰ کٛ مبَاوٛتٛنْ وَطُکِ نغَطٛنْ جٛنْدٜ جَمْ، ڤَامَنٜىٰ کٛ وٛنِ يٜىٰسٛ مٛوطٛنْ تَنْ، اٛنْ کُوتِرَ جُوطٜ مٛوطٛنْ نٛنْ نٛ مِنْ مبِعِعٛنْ نغَطٛنْ؞ ¹²نٛنْ وَطَيْ ٻٜ تٛکَّايِ يٜىٰسُ ندَرْدَعٛنْ اٜ مَنْغُ، ندٜنْ اٛنْ نجٛوَتَا کَمُّندٜ مٛوطٛنْ دٛوْ کٛو مٛيٜ نغَمْ کٛ نغِطّٛنْ؞

وَرْتٛيْکِ جٛومِرَاوٛ

¹³بَنْدِرَاٻٜ، اٜ مِنْ نغِطِ اَنْدٛنْ غٛونغَ دٛوْ ٻٜنْ طٛنْ تٛکُّٻٜ يٜىٰسُ مَيْٻٜ نغَمْ تٛع نغَطٛنْ کَ وَنُّکِ بٛ يِمْٻٜ حٛرِيٻٜ ٻٜ نغَلَا کَمُّندٜ؞ ¹⁴ندٜ اٜنْ نجَٻِي يٜىٰسُ مَايِي اُمَّکٜ، نٛنْ مَا اٜنْ نجَٻِي اَللَّه وَدَّيْ تٛکُّٻٜ يٜىٰسُ مَيْٻٜ حَوْتِ اٜ يٜىٰسُ؞

¹⁵اٜ مِنْ مبِعَعٛنْ دٛوْ کٛ وٛلْدٜ جٛومِرَاوٛ وِعِ، شَرٜلْ نغٜلْ جٛومِرَاوٛ وَرْتَتَ، غٛونغَ اٜنٜنْ غٛودُٻٜ يٛنْکِ اٜنْ اَرْتَتَا تٛکُّٻٜ يٜىٰسُ مَيْٻٜ يَاکِ دٛوْ؞ ¹⁶نغَمْ جٛومِرَاوٛ اٜ حٛورٜ مُوطُمْ جِڤّٛيْتٛ دَغَ دٛوْ اٜ نٛدّٛلْ شٜمْبِنْغٛلْ، اٜ حٛنٛنْدٜ مَلَاعِکَاجٛ مَوْطٛ، اٜ دُودٛلْ لُوَلْ اَللَّه؞ مَيْٻٜ اٜ تٛکِّ اَلْمَسِيحُ کَمْٻٜ اَرْتَتَ اُمَّاکِ؞ ¹⁷ندٜنْ اٜنٜنْ تٛکُّٻٜ يٜىٰسُ غٛودُٻٜ يٛنْکِ اٜ شَرٜلْ نغٜلْ طُمْ حٛشَّيْعٜنْ حَوْتِ اٜ مَٻّٜ ندٜرْ دُولٜ نغَمْ کَوْرٜنْ اٜ جٛومِرَاوٛ اٜ نجَيْرِ دٛوْ؞ غَطَ طٛنْ اٜنْ نجٛوطٛدٛتٛ اٜ مَاکٛ حَا اَبَدَا؞ ¹⁸نغَمْ نٛنْ، شٜمْبِطِنٜىٰ بَنْدِرَاٻٜ مٛوطٛنْ اٜ حَالَ کَعَ؞

نجٛوطٜىٰ اٛنْ شِرْيِي نغَمْ وَرْتٛيْکِ جٛومِرَاوٛ

¹اٛنٛنْ بَنْدِرَاٻٜ، دٛوْ شَرٜلْ اٜ ݧَلْندٜ ندٜ فُو فِي طُعُمْ وَطَتَ، نَاع سٜيْ تٛ طُمْ وِنْدَنِيعٛنْ؞ ²نغَمْ اٛنٛنْ اٜ کٛعٜ مٛوطٛنْ اٛنْ اَنْدِ بٛطُّمْ ݧَلْندٜ جٛومِرَاوٛ وَرَيْ نٛ غُجّٛ وَرْدَتَ جٜمَّ؞ ³شَرٜلْ نغٜلْ يِمْٻٜ مبِعَتَ، ‏«‏اٜ وٛودِ جٛنْدٜ جَمْ، ندٜنْ ٻٜرْندٜ اٜ وَلْتِي،»‏ ندٜنْ طٛنْ اٜ طٛنْ سٜيْ حَلْکٜرٜ يَنٛنٛيَٻٜ؞ ندٜ وَرَنَيْٻٜ نٛ دَݧْنغٛلْ وَرَنْتَ دٜبّٛ غٛودُطٛ رٜىٰدُ، ٻٜ کٜٻَتَا لَاوٛلْ حِسُکِ؞ ⁴اَمَّا اٛنٛنْ بَنْدِرَاٻٜ، نَاع ندٜرْ ݧِوْرٜ نغٛنْطٛنْ، حَکّٛ ݧَلْندٜ ندٜنْ طٛنْ اُدّٛوعٛنْ بٛ غُجّٛ؞ ⁵نغَمْ اٛنٛنْ اٛنْ فُو اٛنْ ٻِٻّٜ جَيْنغٛلْ، اٛنْ ٻِٻّٜ ݧَلَوْمَ؞ اٜنٜنْ نَاع اٜنْ يِمْٻٜ جٜمَّ کٛو يِمْٻٜ ݧِوْرٜ؞ ⁶نغَمْ نٛنْ، تٛع اٜنْ طَانٛ نٛ وٛٻّٜ نغَطَتَ، اَمَّا اٜنْ نجٛوطٛ اٜنْ شِرْيِي، اٜنْ شُرِ کٛعٜ مٜىٰطٜنْ؞ ⁷نغَمْ طَانٛتٛوٻٜ، جٜمَّ ٻٜ طَانٛتٛو، ندٜنْ جَرٛوٻٜ نجَرُ نغِلْتٛو مَا، جٜمَّ ٻٜ نجَرَتَ ٻٜ نغِلْتٛو؞ ⁸اَمَّا اٜنٜنْ، ندٜ اٜنْ يِمْٻٜ ݧَلَوْمَ، سٜيْ ڤَامَنٜنْ کٛعٜ مٜىٰطٜنْ؞ اٜنْ ٻٛرْنٛ حٛولَارٜ اٜ يِدّٜ ندٜ وَرْتَ بٛ تٛغّٛورٜ نجَمْندِ مٜىٰطٜنْ ندٜ کٛنُ، وَطُکِ ٻٜرْطٜ مٜىٰطٜنْ دٛوْ حٜٻُکِ کِسْندَمْ وَرْتَ بٛ حُمْنٜىٰرٜ نجَمْندِ ندٜ کٛنُ مٜىٰطٜنْ؞ ⁹اَللَّه سُٻَايِ نجَرٜنْ مٛنّٜرٜ مُوطُمْ، اَمَّا اٛ سُٻَنِيعٜنْ حٜٻُکِ کِسْندَمْ بَرْکَ جٛومِرَاوٛ مٜىٰطٜنْ يٜىٰسُ اَلْمَسِيحُ؞ ¹⁰کَنْکٛ مَايِ نغَمْ مٜىٰطٜنْ، نغَمْ کٛو اٜنْ نغٛودِ يٛنْکِ کٛو اٜنْ مَايِي، اٜنْ نجٛوطٛدٛتٛ اٜ مَاکٛ؞ ¹¹نغَمْ نٛنْ، شٜمْبِطِنْدِرٜىٰ مبَلِّندِرٜىٰ نٛنْ نٛ نغَطٛتٛنْ؞

وَغِّنْکِ اٜ کٛوْنٛلْ

¹²اَمَّا اٜ مِ تٛرٛوعٛنْ بَنْدِرَاٻٜ، کٛکّٜىٰ کُوٛوٻٜ ندٜرْ مٛوطٛنْ مَنْغُ، وَاتٛ اَرْدِيٻٜعٛنْ ندٜرْ کُوغَلْ جٛومِرَاوٛ وَغِّنٛوٻٜعٛنْ؞ ¹³کٛکّٜىٰٻٜ مَنْغُ نَاع سٜطَّ ندٜرْ يِدّٜ نغَمْ کُوغَلْ مَٻّٜ؞ نجٛوطٜىٰ جَمْ حَکُّندٜ مٛوطٛنْ؞

¹⁴طٛنْمَا اٜ مِنْ تٛرٛوعٛنْ بَنْدِرَاٻٜ، کَٻَنٜىٰ ٻٜ نغِطَا کُوغَلْ، شٜمْبِطِنٜىٰ غٜوْرُٻٜ، مبَلّٜىٰ ٻٜ شٜمْبِطَا، نغَادٜىٰ مُݧَلْ اٜ کٛو مٛيٜ؞ ¹⁵تَبِّتِنٜىٰ تٛع غٛطّٛ وَاتٛ حَلّٜىٰندٜ اٜ حَلّٜىٰندٜ؞ اَمَّا کٛو ندٜيٜ طَٻِّتٜىٰ وَطُکِ کٛ وٛوطِ حَکُّندٜ مٛوطٛنْ؞ نغَطَنٜىٰ کٛو مٛيٜ نٛنْ؞

¹⁶نَنٜىٰ وٜلْوٜلٛ ندٜرْ ٻٜرْطٜ مٛوطٛنْ کٛو ندٜيٜ؞ ¹⁷نغَطٜىٰ کَ وَطُکِ دٛعَارٜ؞ ¹⁸ندٜرْ فُو کٛ حٜٻِعٛنْ نغٜتّٜىٰ اَللَّه، نغَمْ کَنْجُمْ وٛنِ کٛ اَللَّه يِطِ نغَطٛنْ ندٜرْ تٛکُّکِ يٜىٰسُ اَلْمَسِيحُ؞

¹⁹تٛع اٛنْ کَطُ کُوغَلْ رُوحُ اَللَّه؞ ²⁰تٛع اٛنْ نجَوَنْ اَنَّبَاکُ، ²¹اَمَّا ڤٛوندٜىٰ کٛو طُمٜ، نجٛغٛوطٛنْ کٛ وٛوطِ؞ ²²نغٛطِّتٜىٰ کٛو اِرِ ندٜيٜ حَلّٜىٰندٜ؞

²³اَللَّه جٛومُ جَمْ اٜ حٛورٜ مُوطُمْ وَرْتِرَعٛنْ لَاٻُٻٜ غَطَ اٜ يٜىٰسٛ؞ اٛ سُرَ يٛنْکِيجِ مٛوطٛنْ اٜ ٻٜرْطٜ مٛوطٛنْ اٜ ٻَلِّ مٛوطٛنْ بٛطُّمْ، نغَرْتٛنْ ٻٜ نغَلَا غٛطُّمْ کٛ وٛوطَا ݧَلْندٜ وَرْتُکِ جٛومِرَاوٛ مٜىٰطٜنْ يٜىٰسُ اَلْمَسِيحُ؞ ²⁴اٛنْ طٛنْ نٛدُّطٛعٛنْ، اٛ وَطَيْطُمْ نغَمْ اٛ غَطٛووٛ کٛ اٛ وِعِ؞

²⁵بَنْدِرَاٻٜ، نغَطَنٜىٰمِنْ دٛعَارٜ؞

²⁶کٛوْنٛنْ فُو بَنْدِرَاٻٜ اٜ حٛوْنِرْکِ حِغَاکُ؞

²⁷اٜ مِ وِعَعٛنْ نغَمْ جٛومِرَاوٛ طُمْ جَنْغَنَ فُو بَنْدِرَاٻٜ طٜرٜوٛلْ نغٛعٛلْ؞

²⁸جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ؞