1 بِيتُرُسْ

طٜرٜوٛلْ

بِيتُرُسْ

اَرَنْدٜوٛلْ

حَبَرُ دٛوْ طٜرٜوٛلْ نغٛعٛلْ

بِيتُرُسْ لِلَاطٛ يٜىٰسُ اَلْمَسِيحُ وِنْدِ طٜرٜوٛلْ نغٛعٛلْ؞ اٛ وِنْدِينغٛلْ دُوٻِ 96‏‑60 غَطَ دَݧْنغٛلْ يٜىٰسُ؞ اٛ وِنْدَنْغٛلْ تٛکُّٻٜ يٜىٰسُ جٛوطِيٻٜ بِغٜىٰجٜ فٜىٰرٜ‑فٜىٰرٜ؞ کٛ وَطِ ٻٜ نجٛوطِي ندٜرْ بِغٜىٰجٜ فٜىٰرٜ‑فٜىٰرٜ وٛنِ غٛطّٛ لَامِيطٛ بِعٜتٜىٰطٛ کَيْسَرْ نٜىٰرٛ تٛرِّيٻٜ سَنْکِتِٻٜ؞ بِيتُرُسْ وِنْدَنِيٻٜ وِيکِ ٻٜ مُݧَ ندٜرْ تٛرَّ کَ ٻٜ نجَرَتَ؞ اٛ وِعِيٻٜ ٻٜ نغَطَ جٛنْدٜ اَادِلَاکُ، ٻٜ نغَطَ ٻٜرْطٜ مَٻّٜ دٛوْ يٜىٰسُ تَنْ، ٻٜ نغَرْتَ شٜنِيٻٜ، ٻٜ نغَطَ کَ حٛولَاکِ يٜىٰسُ؞ اٛ حٛلِّيٻٜ نٛ حَانِ تٛکُّٻٜ يٜىٰسُ نجٛوطٛرٛو ندٜرْ وَطُکِ کٛ وٛوطِ، اٜ تٛکُّکِ اَللَّه اٜ ٻٜرْندٜ غٛعٛ، اٜ يِطِندِرْکِ حَکُّندٜ مَٻّٜ؞

¹مِنْ بِيتُرُسْ لِلَاطٛ يٜىٰسُ اَلْمَسِيحُ وِنْدِ طٜرٜوٛلْ نغٛعٛلْ؞

مِ وِنْدَنْغٛلْ يِمْٻٜ ٻٜ اَللَّه سُٻِ، شَنْکِتِيٻٜ، غَطٛوٻٜ جٛنْدٜ کٛطَاکُ اٜ لٜيْدِ فَنْتُسْ، اٜ لٜيْدِ غَلَاتِيَ، اٜ لٜيْدِ کَفَدٛوکِيَ، اٜ لٜيْدِ اَاسِيَ، اٜ لٜيْدِ بِتِينِيَ؞ ²اَللَّه ݧَاکٛ مٛ دٛوْ سُٻِيعٛنْ ندٜرْ يِدّٜ مَاکٛ؞ رُوحُ مَاکٛ وَرْتِرِيعٛنْ شٜنِيٻٜ، نغَمْ تٛکّٛنْ کٛ يٜىٰسُ اَلْمَسِيحُ وِعِ، لَاٻٛنْ بَرْکَ پِيپَمْ مَاکٛ؞

اَللَّه ٻٜيْدَ بَرْکِطِنْکِعٛنْ، ٻٜيْدَ حٛکُّکِعٛنْ جَمْ؞

کَمُّندٜ بٛنْدٜ

³يٜتّٛورٜ تَبِّتَ تٛ اَللَّه، ݧَاکٛ جٛومِرَاوٛ مٜىٰطٜنْ يٜىٰسُ اَلْمَسِيحُ؞ نغَمْ يُرْمٜىٰندٜ مَاکٛ مَوْندٜ اٛ حٛکِّيعٜنْ يٛنْکِ کٜسُمْ بَرْکَ اُمَّاکِ يٜىٰسُ دَغَ مَيْدٜ؞ نغَمْ مَاجُمْ اٜنْ نغٛودِ کَمُّندٜ تَبُّتُندٜ، ⁴اٜنْ کٜٻَيْ ندٛنُ نغُ لَلَّتَا، نغُ وٛنَّتَاکٛ، ندٜنْ نغُ رٜعَتَا، نغُ طُمْ رٜسَنِعٛنْ تٛنْ دٛوْ؞ ⁵اٛنٛنْ بَوْطٜ اَللَّه اٜ سُرَنَعٛنْ بَرْکَ حٛولَاکِ يٜىٰسُ، نغَمْ کٜٻٛنْ کِسْندَمْ طَمْ اٛ سِرْيِي وَنْغِنْکِ ݧَلْندٜ رٜعُکِ دُونِيَارُ؞

⁶نغَمْ نٛنْ، نَنٜىٰ بٜلْطُمْ طُطُّمْ، کٛو ندٜ جٛونِ طُمْ وَطٛتٛ اٛنْ نَتَّيْ تٛرَّاجِ فٜىٰرٜ‑فٜىٰرٜ شَرٜلْ سٜطَّ ⁷نغَمْ تَبِّتِنْکِ حٛولَارٜ مٛوطٛنْ؞ حٛولَارٜ ندٜنْ ندٜ ٻُرِ جِينَارِ؞ کٛو ندٜ جِينَارِ ݧَلْندٜ غٛعٛ طُمْ رٜعَيْ، اٜ طُمْ فٛوندِرٜىٰ حِيتٜ؞ نٛنْ مَا طُمْ فٛوندَيْ حٛولَارٜ مٛوطٛنْ طُمْ تَبِّتِنَنْدٜ نغَمْ کٜٻٛنْ مَنْتٜىٰکِ، اٜ تٜدِّنٜىٰکِ، اٜ مَوْنِنٜىٰکِ ݧَلْندٜ ندٜ يٜىٰسُ اَلْمَسِيحُ وَرْتَتَ؞ ⁸کٛو ندٜ اٛنْ مٜىٰطَايِ يِيکِمٛ، اٛنْ نغِطِمٛ؞ کٛو ندٜ نَاع اٛنْ نغِعَمٛ جٛونِ، اٛنْ کٛولَکٜمٛ، اٛنْ نَنَ بٜلْطُمْ مَوْطُمْ ندٜرْ ٻٜرْطٜ مٛوطٛنْ پَٻِّيطُمْ مٜتٜىٰکِ؞ ⁹نغَمْ اٛنْ کٛولَکٜ يٜىٰسُ اَلْمَسِيحُ وَطِ اٛنْ کٜٻَ کِسْندَمْ؞

¹⁰اَنَّبٛعٜنْ غَطُٻٜ اَنَّبَاکُ دٛوْ شَاحُ طُمْ کٜٻٛتٛنْ، وَاتٛ کِسْندَمْ، ٻٜ نغَطِي کَ طَٻُّتُکِ لَاوٛلْ کِسْندَمْ طَمْ طٛنْ نَاع سٜطَّ؞ ¹¹رُوحُ اَللَّه غٛنْطُمْ ندٜرْ ٻٜرْطٜ مَٻّٜ وِعِيٻٜ نٛ اَلْمَسِيحُ تٛرّٛرْتٛو، ندٜنْ غَطَ طٛنْ اٛ مَوْنِنٜىٰ؞ نغَمْ نٛنْ، ٻٜ طَٻِّتِي نَاع سٜطَّ نغَمْ ٻٜ اَنْدَ مٛيٜ وٛنِ اَلْمَسِيحُ، ندٜنْ ندٜيٜ فِي طُعُمْ وَطَتَ؞ ¹²طُمْ وِعِيٻٜ اٛنٛنْ ٻٜ کُوَنْتَ نَاع کٛعٜ مَٻّٜ، ندٜ ٻٜ مٜتِ دٛوْ فُو فِي طُمْ طٛنْ طُمْ نَنْطٛنْ جٛونِ؞ اٛنْ نَنِيطُمْ دَغَ تٛ غَعَجِنَنْٻٜعٛنْ حَبَرُ بٜلْطُمْ بَرْکَ رُوحُ اَللَّه لِلٛيَاطُمْ دَغَ دٛوْ؞ کٛو مَلَاعِکَعٜنْ اٜ نغِطِ فَامُکِطُمْ؞

جٛنْدٜ لَمْندٜ

¹³نغَمْ نٛنْ، شِرْيٜىٰ ٻٜرْطٜ مٛوطٛنْ، شُرٜىٰ کٛعٜ مٛوطٛنْ، نغَطٜىٰ کَمُّندٜ مٛوطٛنْ فُو دٛوْ بَرْکَ طُمْ اُمْ حٛکَّتَعٛنْ ݧَلْندٜ وَرْتٛيْکِ يٜىٰسُ اَلْمَسِيحُ؞ ¹⁴نغَطٜىٰ جٛنْدٜ بٛ ٻِٻّٜ غَطٛوٻٜ کٛ طُمْ وِعِٻٜ؞ تٛع اٛنْ تٛکِّرَنْ سُونٛ مٛوطٛنْ نغٛ ندٜنّٛ، نغٛ نغٛودُنٛوطٛنْ شَرٜلْ کٛ اٛنْ اَنْدَا کٛو طُمٜ؞ ¹⁵اَمَّا نٛنْ نٛ اَللَّه نٛدُّطٛعٛنْ اٛ شٜنِيطٛ، اٛنٛنْ مَا، نغَرْتٜىٰ شٜنِيٻٜ ندٜرْ کٛ نغَطٛتٛنْ فُو؞ ¹⁶نغَمْ اَايَارٜ وِعِي، ‏«‏نغَرْتٜىٰ شٜنِيٻٜ، نغَمْ مِنْ مِ شٜنِيطٛ؞»‏

¹⁷اٛنْ نٛدَّ اَللَّه ݧَاکٛ مٛ دٛوْ ندٜرْ دٛعَارٜ مٛوطٛنْ؞ ندٜ اٜ مٛ وَطَنَ کٛو مٛيٜ کِيتَ دٛوْ کُوطٜ طٜ وَطِ، اٛ حٛلَّتَا فٜىٰرٛوتِرٛلْ، نغَطٜىٰ جٛنْدٜ مٛوطٛنْ ندٜ کٛطَاکُ اٜ دُونِيَارُ ندُعُ ندٜرْ کُلٛلْ اَللَّه؞ ¹⁸اٛنْ اَنْدِ طُمْ رِمْطِنِيعٛنْ دَغَ نغِکُّوجِ مٜىٰرٜىٰجِ طِ ندٛنُطٛنْ تٛ مَامَعٜنْ مٛوطٛنْ؞ طُمْ رِمْطِنِرَايِعٛنْ فِي رٜعٛوجُمْ بٛ اَجُرْفَارِ اٜ جِينَارِ؞ ¹⁹طُمْ رِمْطِنِرِيعٛنْ پِيپَمْ اَلْمَسِيحُ غٛودُطَمْ دَرَجَ؞ کَنْکٛ وٛنِ بٛ کَرٛورِ ندِ وَلَا غٛطُّمْ کٛ حَانَا؞ ²⁰کَنْکٛ اَللَّه سُٻِ دَغَ کٛ طُمْ تَغَ دُونِيَارُ، اَمَّا طُمْ وَنْغِنِمٛ نغَمْ مٛوطٛنْ اٜ بَلْطٜ طٜعٜ طٜ رٜعُکِ دُونِيَارُ؞ ²¹بَرْکَ مَاکٛ کٛولِيطٛنْ اَللَّه، اُمِّنْطٛمٛ دَغَ مَيْدٜ، حٛکِّمٛ مَنْغُ؞ نغَمْ نٛنْ، اٜ حٛولَارٜ مٛوطٛنْ اٜ کَمُّندٜ مٛوطٛنْ دٛوْ اَللَّه طُمْ وٛنِ؞

²²تٛکُّکِ غٛونغَ لَاٻِنَنِيعٛنْ ٻٜرْطٜ اٛنْ نغِطِندِرِ يِدّٜ ندٜ غٛونغَ؞ نغَمْ مَاجُمْ، نغِطِندِرٜىٰ اٜ ٻٜرْندٜ غٛعٛ؞ ²³نغَطٜىٰ نٛنْ نغَمْ اَللَّه حٛکِّيعٛنْ يٛنْکِ کٜسُمْ بَرْکَ وٛلْدٜ مَاکٛ غٛودُندٜ يٛنْکِ تَبُّتُندٜ حَا اَبَدَا؞ ²⁴نٛ اَايَارٜ وِعِ،

‏«‏فُو يِمْٻٜ بٛ غٜىٰنٜ مبَعِ،

فُو لَٻْکِ مَٻّٜ بٛ ڤِيندِ لَدّٜ وَعِ؞

غٜىٰنٜ اٜ نجٛورَ، ڤِيندِ اٜ سَامَ،

²⁵اَمَّا وٛلْدٜ جٛومِرَاوٛ اٜ ندٜ طٛنْ حَا اَبَدَا؞»‏

ندٜعٜ وٛلْدٜ کَيْرٜ وٛنِ حَبَرُ بٜلْطُمْ دٛوْ يٜىٰسُ اَلْمَسِيحُ طُمْ اُمْ وَعَجِنَنِعٛنْ؞

اٛنٛنْ نغٛنِ يِمْٻٜ شٜنِيٻٜ ٻٜ اَللَّه

¹نغَمْ نٛنْ، اَلٜىٰ کٛو اِرِ طُمٜ نغِکُّ کَلُّطُمْ؞ اَلٜىٰ فٜوْرٜ، اٜ نغِکُّ مُنَافُکِيجٛ، اٜ لَوْلِيرُ، اٜ حُطُکِ وٛٻّٜ کٛو اِرِ کِيٜ؞ ²نٛ ٻِکّٛيْ کٜشّٛيْ نغِطِرِ اٜنْطَمْ، اٛنٛنْ مَا نغِطِرٜىٰ وٛلْدٜ اَللَّه نٛنْ نغَمْ ندٜ وَطَعٛنْ شٜمْبِطٛنْ ندٜرْ کِسْندَمْ طَمْ کٜٻُطٛنْ، ³ندٜ اٛنْ مٜىٰطِي نَنْکِ بٜلْطُمْ يُرْمٜىٰندٜ جٛومِرَاوٛ؞

⁴نغَرٜىٰ تٛ مَاکٛ؞ کَنْکٛ وٛنِ حَيْرٜ غٛودُندٜ يٛنْکِ؞ يِمْٻٜ نغَݧِيمٛ، اَمَّا اَللَّه سُٻِيمٛ مَوْنِنِيمٛ؞ ⁵اٛنٛنْ بٛو، بٛ کَاپٜ غٛودُطٜ يٛنْکِ، اَلٜىٰ طُمْ حُوتِرَعٛنْ طُمْ مَحَ وُرٛ شٜنِينغٛ نغَمْ رُوحُ اَللَّه؞ اٛنٛنْ نغٛنِ کَوْتَلْ اَرْدِيٻٜ دِينَ، اٛنْ کٛکَّ اَللَّه شَکِّرِ ندِ رُوحُ مَاکٛ وَلَّتَعٛنْ کٛکّٛنْ؞ اٜ مٛ جَٻَندِ لَاوٛلْ يٜىٰسُ اَلْمَسِيحُ؞ ⁶نغَمْ اَايَارٜ وِعِي،

‏«‏رَطُّمْ، مِ سُٻِي حَيْرٜ ٻُرْندٜ کٛو ندٜيٜ دَرْنُکِ مَادِ،

مِ تِغِّيندٜ ندٜ جٛطِّنَ مَادِ غَرِيرِ سِحِيٛونَ؛

فُو کٛولِيطٛمٛ اٛ سٜمْتِنْتَاکٜ کٛو سٜطَّ؞»‏

⁷حَيْرٜ ندٜنْ طٛنْ اٜ ندٜ وٛودِ مَنْغُ تٛ مٛوطٛنْ اٛنٛنْ کٛولِيٻٜ يٜىٰسُ؞ اَمَّا تٛ غَݧُٻٜ کٛولٛومٛ ٻٜ نغِعَيْ نٛ،

‏«‏حَيْرٜ ندٜ مَحٛوٻٜ نغَݧِ،

کَيْرٜ وٛنِ حَيْرٜ ٻُرْندٜ کٛو ندٜيٜ دَرْنُکِ مَادِ؞»‏

⁸طٛنْمَا وٛنْدٜ اَايَارٜ وِعِي،

‏«‏طُمْ حَيْرٜ غَطٛورٜ يِمْٻٜ فٜغّٛو،

غَطٛورٜ يِمْٻٜ نجَنَ؞»‏

اٜ ٻٜ ڤٜغّٛو نغَمْ ٻٜ نغَݧِي وَطُکِ کٛ وٛلْدٜ اَللَّه وِعِ؞ نٛنْ طُمْ سِرْيَنِيٻٜ؞

⁹اَمَّا اٛنٛنْ طُمْ لٜݧٛلْ نغٛلْ اَللَّه سُٻِ، اٛنْ کَوْتَلْ اَرْدِيٻٜ دِينَ کُوَنٛوٻٜ لَامِيطٛ مَوْطٛ، يِمْٻٜ شٜنِيٻٜ، ٻٜ اَللَّه جٜيِ؞ اٛ سُٻُعٛنْ نغَمْ نغَعَجِنٛنْ حَبَرُ کُوطٜ مَاکٛ کَيْطِنِيطٜ؞ اٛ وُرْتِنٛيعٛنْ ندٜرْ ݧِوْرٜ نغَمْ نَتّٛنْ جَيْنغٛلْ مَاکٛ کَيْطِنِينغٛلْ؞ ¹⁰ندٜنّٛ نَاع اٛنْ يِمْٻٜ اَللَّه، اَمَّا جٛونِ اٛنْ يِمْٻٜ مَاکٛ؞ ندٜنّٛ اٛنْ کٜٻَايِ يُرْمٜىٰندٜ مَاکٛ، اَمَّا جٛونِ اٛنْ کٜٻِي؞

مَشُّٻٜ اَللَّه

¹¹اٛنٛنْ ٻٜ نغِطُمِ، اٛنْ حٛٻّٜ ندٜرْ دُونِيَارُ ندُعُ، اٛنٛنْ نَاع طُمْ ٻٜ طٛعٛ؞ نغَمْ نٛنْ اٜ مِ تٛرٛوعٛنْ، شٜنْدِرٜىٰ اٜ سُونٛوجِ ٻَنْدُ غِطِّ حَلْکُکِعٛنْ؞ ¹²کٛلّٜىٰ نغِکُّ بٛطُّمْ ندٜرْ يِمْٻٜ ٻٜ اَنْدَا اَللَّه، نغَمْ تٛ ٻٜ مبِعَيْ اٛنْ کَلُّٻٜ، سٜيْ ٻٜ نغِعَ کُوطٜ مٛوطٛنْ طٜ بٛطّٜ، ٻٜ مَوْنِنَ اَللَّه ݧَلْندٜ وَرْتُکِ مَاکٛ؞

¹³کٛو طُمٜ لَامُ لَامٛتٛوطُمْ يِمْٻٜ، تٛکّٜىٰ کٛ طُمْ وِعِ، نغَمْ نٛنْ جٛومِرَاوٛ يِطِ؞ تٛکّٜىٰ مَوْطٛ لَامِيٻٜ، اَرْدِيطٛ دٛوْ کٛو مٛيٜ، ¹⁴حَا اٜ غٛمْنَعٜنْ، نغَمْ لَامِيطٛ اٛنْ لِلِٻٜ ٻٜ کٛکَّ غَطٛوٻٜ کٛ وٛوطَا بٛنٜ، ٻٜ مَنْتَ غَطٛوٻٜ کٛ وٛوطِ؞ ¹⁵نغَمْ اَللَّه اٜ يِطِ نغَطٛنْ کٛ وٛوطِ يٜىٰسٛ يِمْٻٜ ٻٜ نغَلَا اَنْدَلْ، نغَمْ نغَطٛنْ ٻٜ اَلَ مٜتٜمٜتٜىٰجِ طِ نغَلَا فَامُ؞ ¹⁶نَاع اٛنْ مَشُّٻٜ، اٛنْ رِمْطِنَاٻٜ، اَمَّا تٛع اٛنْ نغَرْتِرْ رِمْطِنْکِ مٛوطٛنْ وَرْتَ لَاوٛلْ وَطُکِ کٛ حَلِّ، اَمَّا نغَطٜىٰ جٛنْدٜ بٛ مَشُّٻٜ اَللَّه؞ ¹⁷کٛکّٜىٰ کٛو مٛيٜ مَنْغُ، نغِطٜىٰ تٛکُّٻٜ يٜىٰسُ؞ کُلٜىٰ اَللَّه، مَوْنِنٜىٰ لَامِيطٛ؞

يَرْکِ تٛرَّ اِرِ کَ اَلْمَسِيحُ يَرِ

¹⁸اٛنٛنْ مَشُّٻٜ، نغَطٜىٰ کٛ جٜيْٻٜعٛنْ مبِعِعٛنْ کٛکّٛنْٻٜ مَنْغُ کٛو ندٜيٜ؞ نَاع غٛودُٻٜ نغِکُّ بٛطُّمْ تَنْ اٜ ٻٜ شَطَا نغَطَنْتٛنْ نٛنْ، حَا مَا اٜ غٛودُٻٜ ٻٜرْطٜ کَٻٛوجٜ؞ ¹⁹تٛ نٜطّٛ مُݧِي ندٜرْ تٛرَّ نغَمْ اٜ ݧُمَ دٛوْ کٛ اَللَّه يِطِ، اَللَّه بَرْکِطِنَيْمٛ، تٛ اٜ مٛ يَرَ تٛرَّ کَنْ نَاع نغَمْ وَطُکِ کٛ وٛوطَا؞ ²⁰تٛ اٛنْ نغَطِي کٛ وٛوطَا اٛنْ ڤِيَامَ اٛنْ مُݧِي، مٛيٜ مَنْتَتَ مُݧَلْ مٛوطٛنْ؟ اَمَّا تٛ اٛنْ نغَطِي کٛ وٛوطِ اٛنْ تٛرَّامَ اٛنْ مُݧِي، اَللَّه بَرْکِطِنَيْعٛنْ؞ ²¹دٛوْ اِرِ کَنْ طٛنْ تٛرَّ اَللَّه نٛدِّعٛنْ، نغَمْ اَلْمَسِيحُ مَا يَرِي تٛرَّ نغَمْ مٛوطٛنْ؞ اٛ اَلَنِيعٛنْ کٛ تٛکّٛتٛنْ نغَمْ نجٛوطٛرٛوطٛنْ نٛ اٛ جٛوطٛرِي؞ ²²اٛ مٜىٰطَايِ وَطُکِ حَکّٜ کٛو سٜطَّ، طُمْ مٜىٰطَايِ نَنْکِ فٜوْرٜ وُرْتَکٜ دَغَ حٛنْدُکٛ مَاکٛ؞ ²³ندٜ اٛ حُطَا، اٛ وَاتَاکِ؞ ندٜ اٛ يَرِ تٛرَّ، اٛ وِعَايِ اٛ وَاتٛتٛ، اَمَّا اٛ اَلَنِي اَللَّه غَطٛووٛ کِيتَ غٛونغَ؞ ²⁴کَنْکٛ اٜ حٛورٜ مَاکٛ جَٻِ اٛ يٛوَنٜىٰ حَکّٜ طُمْ نغَطُطٜنْ اٛ ٻِلٜىٰ دٛوْ غَافَانغَلْ؞ اٛ وَطُ نٛنْ نغَمْ لَاوٛلْ مَيْدٜ مَاکٛ اَلٜنْ وَطُکِ حَکّٜ، نجٛوطٛوطٜنْ جٛنْدٜ اَادِلَاکُ؞ نٛ اَايَارٜ وِعِ، ‏«‏بَرْکَ نَوْنٛوطٜ مَاکٛ اٛنْ نجَمْطِتِي؞»‏ ²⁵ندٜنّٛ اٛنْ نَنْدِي اٜ بَالِ مَجُّطِ لَاوٛلْ، اَمَّا جٛونِ طُمْ سٛعّٛيِيعٛنْ نغَمْ تٛکّٛنْ غَيْنَاکٛ ڤَامَنَيْطٛ يٛنْکِيجِ مٛوطٛنْ؞

جٛنْدٜ تٜىٰغَلْ

¹نٛنْ مَا اٛنٛنْ رٜوْٻٜ تٜىٰغَلْ، تٛکّٜىٰ کٛ وٛرْٻٜ مٛوطٛنْ مبِعِ؞ نغَمْ تٛ اٜ وٛودِ وٛٻّٜ وٛرْٻٜ ٻٜ تٛکَّايِ وٛلْدٜ اَللَّه، طُمْ غَطٛتٛوطُمْ نغِکُّ رٜوْٻٜ مَٻّٜ وَطَ ٻٜ تٛکَّ اَللَّه، نَاع سٜيْ تٛ ٻٜ مٜتَنَامَ، ²تٛ ٻٜ نغِعِي نغِکُّ مٛوطٛنْ بٛطُّمْ ندٜنْ ٻٜ نغِعِ اٛنْ نغَطَ کٛ ٻٜ مبِعِ؞ ³تٛع مٛعِّتِنَاکِ کِ مٛعِّتِنْتٛوطٛنْ وَرْتَ کِ ٻَنْدُ تَنْ، بٛ مٛرْطِ، اٜ کٛ وَطِرَا اٜ جِينَارِ، اٜ کٛلْتٜ غٛودُطٜ شٜىٰدٜ؞ ⁴سٜيْ نِ مٛعِّتِنَاکِ مٛوطٛنْ وَرْتَ مٛعِّنْکِ ٻٜرْطٜ مٛوطٛنْ اٜ وَطُکِ کٛ لَلَّتَا وَاتٛ لٜسْتِنْکِ حٛورٜ، اٜ سُرُکِ حٛورٜ؞ اِرِ کِنْ طٛنْ مٛعِّتِنَاکِ کِ لَلَّتَا؛ کَنْکِ وٛنِ ٻُرْکِ وٛوطُکِ يٜىٰسٛ اَللَّه؞ ⁵نغَمْ ندٜنّٛ نٛنْ رٜوْٻٜ شٜنِيٻٜ غَطُٻٜ ٻٜرْطٜ مَٻّٜ دٛوْ اَللَّه مٛعِّتِنٛرِي ندٜ ٻٜ تٛکِّ وٛرْٻٜ مَٻّٜ؞ ⁶مِسَالُ، سَارَتُ وَطِي کٛ غٛرْکٛ مُوطُمْ اِبْرَاهِمْ وِعِ، اٜ مٛ نٛدِّرَمٛ جٛومُ مَاکٛ؞ جٛونِ، اٛنٛنْ نغٛنِ ٻِٻّٜ سَارَتُ تٛ اٛنْ نغَطِي کٛ وٛوطِ، اٛنْ نجَٻَايِ غٛطُّمْ حُلْنِعٛنْ؞

⁷نٛنْ مَا، اٛنٛنْ وٛرْٻٜ، نجٛوطٛدٜىٰ اٜ رٜوْٻٜ مٛوطٛنْ نٛ حَانِ؞ کٛکّٜىٰٻٜ مَنْغُ نغَمْ کَمْٻٜ ٻٜ نغَلَا سٜمْبٜ بٛ مٛوطٛنْ، طٛنْمَا اٛنٛنْ اٜ رٜوْٻٜ مٛوطٛنْ اٛنْ فُو اٛنْ کٜٻَيْ شَاحُ جٛومِرَاوٛ، وَاتٛ يٛنْکِ کِ رٜعَتَا؞ نغَطٜىٰ نٛنْ نغَمْ تٛع غٛطُّمْ حَطَعٛنْ وَطُکِ دٛعَارٜ؞

يَرْکِ تٛرَّ نغَمْ وَطُکِ اَادِلَاکُ

⁸جٛونِ اٜ مِ يِطِ يٛتِّنْکِ کٛ مبِعَيْمِ اٜ وِيکِ، اٛنْ فُو ݧُمٛ مٛوطٛنْ وَرْتَ غٛعٛ؞ نجُرْمِندِرٜىٰ، نغِطِندِرٜىٰ نٛ حَانِ تٛکُّٻٜ يٜىٰسُ نغَطَ، مبَلِّندِرٜىٰ، لٜسْتِنٜىٰ کٛعٜ مٛوطٛنْ؞ ⁹تٛع اٛنْ نغَاتٛ حَلّٜىٰندٜ اٜ حَلّٜىٰندٜ، کٛو حُطُکِ اٜ حُطُکِ، اَمَّا نغَاتٛرٜىٰ بَرْکِطِنْکِ، نغَمْ اَللَّه نٛدِّيعٛنْ نغَطٛنْ نٛنْ نغَمْ اٛ بَرْکِطِنَعٛنْ؞ ¹⁰اَايَارٜ وِعِي،

‏«‏فُو غِطّٛ نَنَ بٜلْطُمْ جٛنْدٜ مُوطُمْ،

نٜىٰٻَ اٜ دُونِيَارُ،

سٜيْ اٛ اَلَ مٜتٛ کَلُّنغٛ،

اٛ اَلَ فٜوْرٜ؞

¹¹اٛ اَلَ وَطُکِ کٛ حَلِّ، اٛ وَطَ اَادِلَاکُ؛

اٛ طَٻِّتَ جَمْ اٜ ٻٜرْندٜ غٛعٛ؞

¹²نغَمْ جٛومِرَاوٛ اٜ فَامَنَ غٛودُٻٜ اَادِلَاکُ،

اٜ مٛ نَنَ دٛعَاجٜ مَٻّٜ،

اَمَّا اٜ مٛ وَݧَ کُوٛوٻٜ کٛ حَلِّ؞»‏

¹³تٛ اٛنْ نغَطَ کٛ مبَاوٛتٛنْ وَطُکِ نغَمْ نغَطٛنْ کٛ وٛوطِ، مٛيٜ حَلَّنْتَعٛنْ؟ ¹⁴اَمَّا کٛو تٛ اٛنْ نجَرِي تٛرَّ نغَمْ وَطُکِ کٛ وٛوطِ، اَللَّه بَرْکِطِنَيْعٛنْ؞ نغَمْ نٛنْ، تٛع اٛنْ کُلُ تٛرَّيْٻٜعٛنْ، تٛع اٛنْ نغَنُّ؞ ¹⁵اَمَّا مَوْنِنٜىٰ اَلْمَسِيحُ ندٜرْ ٻٜرْطٜ مٛوطٛنْ نغَمْ کَنْکٛ وٛنِ جٛومِرَاوٛ؞ کٛو ندٜيٜ نجٛوطٜىٰ اٛنْ شِرْيِي نٛوتَاکِ کٛو مٛيٜ پَمُطٛعٛنْ دٛوْ وَطُکِ ٻٜرْندٜ کِ نغَطّٛنْ دٛوْ اَلْمَسِيحُ؞ نغَطٜىٰ نٛنْ ندٜرْ لٜسْنُکِ حٛورٜ اٜ مَوْنِنْکِ؞ ¹⁶کٛو ندٜيٜ طُمْ تَوْرَعٛنْ اٜ ٻٜرْندٜ لَمْندٜ، نغَمْ تٛ طُمْ حُطِيعٛنْ، ٻٜنْ طٛنْ کُطٛوٻٜ نغِکُّ مٛوطٛنْ بٛطُّمْ نغَمْ اٛنْ تٛکُّٻٜ يٜىٰسُ ٻٜ شٜمْتَ؞ ¹⁷نغَمْ طُمْ ٻُرِي نٜطّٛ يَرَ تٛرَّ نغَمْ وَطُکِ فِي بٛطُّمْ، تٛ طُمْ شُٻٛلْ اَللَّه، اٜ دٛوْ يَرَ تٛرَّ نغَمْ وَطُکِ کٛ حَلِّ؞ ¹⁸نغَمْ اَلْمَسِيحُ مَايِي ندٜ غٛعٛ نغَمْ اِتُّکِ حَکّٜىٰجِ مٜىٰطٜنْ؞ کَنْکٛ اٛ غٛودُطٛ اَادِلَاکُ، اَمَّا اٛ مَايِي نغَمْ ٻٜ نغَلَا اَادِلَاکُ نغَمْ اٛ يَارَعٜنْ تٛ اَللَّه؞ طُمْ وَرِيمٛ، اَمَّا رُوحُ اَللَّه حٛکِّيمٛ يٛنْکِ؞ ¹⁹ندٜرْ بَوْطٜ رُوحُ طُمْ اٛ يَحِ اٛ وَعَجِنَنِ رُوحُوجِ مَٻَّاطِ؞ ²⁰رُوحُوجِ طِنْ طٛنْ کَنْجِ نغٛنِ طِ تٛکَّايِ اَللَّه ندٜنّٛ اٜ جَامَنُ اَنَّبِ نُحُ؞ اَللَّه حٜطَکٜ اٜ مُݧَ شَرٜلْ کٛ اَنَّبِ نُحُ وَطَتَ کٛمِوَلْ؞ يِمْٻٜ سٜطَّ تَنْ نَتِّنغَلْ کِسِ ندِيَمْ تُفَانَ، کَمْٻٜ نجٛوٜىٰتَتٛ؞ ²¹ندِيَمْ طَمْ بٛو طُمْ مِسَالُ بَڤْتِسْمَ؞ جٛونِ بَڤْتِسْمَ حِسْنِيعٛنْ بَرْکَ بَوْطٜ اُمَّاکِ يٜىٰسُ اَلْمَسِيحُ دَغَ مَيْدٜ؞ بَڤْتِسْمَ نَاع طُمْ اِتُّکِ تُوندِ دَغَ ٻَلِّ مٜىٰطٜنْ، طُمْ اَلْکَوَلْ نغَلْ نٜطّٛ وَطَنِ اَللَّه اٜ ٻٜرْندٜ لَمْندٜ؞ ²²يٜىٰسُ يَحِ دٛوْ، اٜ مٛ جٛوطِي تٛ جُنْغٛ اَللَّه ݧَامٛ، اٜ مٛ لَامٛو مَلَاعِکَعٜنْ، اٜ غٛودُٻٜ لَامُ، اٜ غٛودُٻٜ بَوْطٜ؞

جٛنْدٜ تٛکُّطٛ اَلْمَسِيحُ

¹ندٜ اَلْمَسِيحُ يَرِي تٛرَّ ندٜرْ ٻَنْدُ، اٛنٛنْ مَا شِرْيٜىٰ ٻٜرْطٜ مٛوطٛنْ نغَمْ يَرْکِ تٛرَّ؞ نغَمْ فُو جَرْطٛ تٛرَّ ندٜرْ ٻَنْدُ، اَلِي وَطُکِ حَکّٜ؞ ²نغَمْ نٛنْ، ندٜرْ بَلْطٜ مٛوطٛنْ کٛرِيطٜ اٜ دُونِيَارُ، تٛع اٛنْ ٻٜيْدُ تٛکُّکِ سُونٛ ٻَنْدُ، اَمَّا تٛکّٜىٰ کٛ اَللَّه يِطِ؞ ³جٛنْدٜ ندٜ نغَطّٛنْ ندٜنّٛ اِرِ ندٜ يِمْٻٜ ٻٜ اَنْدَا اَللَّه نغِطِ، ندٜ حٜپِي نٛنْ؞ ندٜنّٛ اٛنْ نغَطِ کَ حَلّٜىٰندٜ، اٜ سُونٛوجِ کَلُّطِ، اٜ يَرٜيَرٜىٰجِ ڤٛوطٛوجِ جٛنْدٜ مٜىٰرٜ، اٜ مَوْنِنْکِ غُنْکِيجِ فِي کٛو وٛوطَا؞ ⁴اٜ ٻٜ کَيْطِنَ نغَمْ اٛنْ کَوْتَتَا کٛعٜ اٜ مَٻّٜ جٛونِ ندٜرْ وَطُکِ کُوطٜ طُطّٜ طٜ مبٛوطَا؞ نغَمْ نٛنْ اٜ ٻٜ کُطَعٛنْ؞ ⁵اَمَّا ٻٜ مبِعَيْ اَللَّه کٛ ٻٜ نغَطِ، کَنْکٛ کِيتٛتٛوطٛ ٻٜ يٛنْکِ اٜ مَيْٻٜ؞ ⁶کَنْجُمْ وَطِ حَا مَيْٻٜ مَا نغَعَجِنَنَا حَبَرُ بٜلْطُمْ دٛوْ يٜىٰسُ اَلْمَسِيحُ؞ نغَمْ کٛو ندٜ اَللَّه تٛرِّرِيٻٜ مَيْدٜ ندٜرْ ٻَنْدُ بٛ کٛو مٛيٜ، يٛنْکِيجِ مَٻّٜ نجٛوطٛدٛتٛ اٜ اَللَّه؞

جٛغِيٻٜ دٛکّٜ اَللَّه بٛطُّمْ

⁷رٜعُکِ کٛو طُمٜ ٻَدَکٜ؞ نغَمْ نٛنْ ڤَامٜىٰ، شُرٜىٰ کٛعٜ مٛوطٛنْ نغَمْ مبَاوٛنْ وَطُکِ دٛعَارٜ؞ ⁸کٛ ٻُرِ کٛو طُمٜ وٛنِ، نغِطِندِرٜىٰ نَاع سٜطَّ، نغَمْ يِدّٜ اٜ وَطَ طُمْ يَافٛو حَکّٜىٰجِ طُطِّ؞ ⁹نغَطٜىٰ کَ جَٻّٛوتِرْکِ ندٜرْ غُرٜىٰجٜ مٛوطٛنْ نَاع اٜ مٜتٜمٜتٜىٰجِ؞ ¹⁰ندٜ اَللَّه حٛکِّ کٛو مٛيٜ تٛکُّطٛ يٜىٰسُ دٛکَّلْ، کُوتِرٜىٰ دٛکَّلْ نغَلْ حَکُّندٜ مٛوطٛنْ نٛ ڤَامَنٛووٛ دٛکَّلْ اَللَّه بٛطُّمْ وَطَتَ؞ ¹¹فُو غَعَجِنٛووٛ، سٜيْ وَعَجِنَ وٛلْدٜ اَللَّه؞ فُو بَلّٛووٛ سٜيْ وَلِّرَ سٜمْبٜ طُمْ اَللَّه حٛکِّمٛ، نغَمْ ندٜرْ کٛو طُمٜ طُمْ مَوْنِنَ اَللَّه بَرْکَ يٜىٰسُ اَلْمَسِيحُ؞ مَنْغُ اٜ لَامُ تَبِّتَ تٛ مَاکٛ حَا اَبَدَا اَبَدِنْ؞ اَامِنْ؞

تٛرَّ نغَمْ تٛکُّکِ يٜىٰسُ

¹²اٛنٛنْ ٻٜ نغِطُمِ، تٛع اٛنْ کَيْطِنْ دٛوْ تٛرَّ کَلُّکَ کٜٻُکَعٛنْ؞ کَ حٜٻُعٛنْ نغَمْ طُمْ فٛوندَعٛنْ؞ تٛع اٛنْ ݧُمُ غٛطُّمْ فِي کٜسُمْ حٜٻِيعٛنْ؞ ¹³اَمَّا نَنٜىٰ بٜلْطُمْ تٛ اٛنْ نجَرَ تٛرَّ اِرِ کَ اَلْمَسِيحُ يَرِ، نغَمْ تٛ اٛ وَرْتِي ندٜرْ مَنْغُ مَاکٛ نَنٛنْ بٜلْطُمْ نَاع سٜطَّ؞ ¹⁴اٛنْ بَرْکِطِنَاٻٜ، تٛ اٜ طُمْ حُطَعٛنْ نغَمْ اِنْدٜ اَلْمَسِيحُ، نغَمْ رُوحُ اَللَّه غٛودُطُمْ تٜدُّنغَلْ اٜ وٛنْدِ اٜ مٛوطٛنْ؞ ¹⁵اَمَّا تٛع غٛطّٛ ندٜرْ مٛوطٛنْ يَرَ تٛرَّ نغَمْ وَطُکِ وَرْحٛورٜ، کٛو نغُيْکَ، کٛو وَطُکِ کٛ حَلِّ، کٛو وَطُکِ کٛ وَطَاکَ؞ ¹⁶اَمَّا تٛ غٛطّٛ يَرِي تٛرَّ نغَمْ اٛ تٛکُّطٛ يٜىٰسُ، تٛو، تٛع اٛ نَنَ شٜمْتُطُمْ، سٜيْ نِ اٛ يٜتَّ اَللَّه نغَمْ اٛ نٛدِّرَامَ اِنْدٜ اَلْمَسِيحُ؞

¹⁷نغَمْ شَرٜلْ وَطِي نغٜلْ طُمْ وَطَنْتَ يِمْٻٜ کِيتَ؞ ٻٜ طُمْ فُطَّنْتَ وَطَنْکِ کِيتَ بٛو وٛنِ يِمْٻٜ اَللَّه؞ تٛ دٛوْ مٜىٰطٜنْ اٜنٜنْ يِمْٻٜ اَللَّه طُمْ فُطِّرْتَ کِيتَ، تٛو، نٛ طُمْ وَرْتَنْتَ غَݧُٻٜ تٛکَّ حَبَرُ بٜلْطُمْ طُمْ اَللَّه؟ ¹⁸اَايَارٜ وِعِي،

‏«‏تٛ اٜ طُمْ سَطِ اَادِلِعٜنْ کِسَ،

تٛو، کٛ حٜٻَتَ ٻٜ کُلَتَا اَللَّه اٜ غٛودُٻٜ حَکّٜ؟»‏

¹⁹نغَمْ نٛنْ، فُو جَرٛوٻٜ تٛرَّ دٛوْ کٛ اَللَّه يِطِ، ٻٜ نغَطَ کٛ حَانِ؞ ٻٜ نغَطَ يٛنْکِيجِ مَٻّٜ ندٜرْ جُنْغٛ اَللَّه تَغُطٛ کٛو طُمٜ؞ کَنْکٛ اٛ کٜبِّنٛووٛ اَلْکَوَلْ مَاکٛ؞

فَامَنْکِ اٛرْندٜ جٛومِرَاوٛ

¹اٜ مِ تٛرٛو مَوْٻٜ کَوْتَلْ تٛکُّٻٜ يٜىٰسُ غٛنْٻٜ ندٜرْ مٛوطٛنْ؞ مِنْ مَا مِ مَوْطٛ ندٜرْ تٛکُّٻٜ يٜىٰسُ، بَنْدِرَاوٛ مٛوطٛنْ، شٜيْدِيطٛ تٛرَّ کَ اَلْمَسِيحُ يَرِ، کٜٻَيْطٛ غٜطَلْ مُوطُمْ ندٜرْ مَنْغُ مَاکٛ تٛ اٛ وَرْتٛيِي؞ اٜ مِ تٛرٛوعٛنْ، ²ڤَامَنٜىٰ اٛرْندٜ اَللَّه ندٜ طُمْ تَمْبِنِعٛنْ؞ ڤَامَنٜىٰندٜ ندٜرْ بٜلْطُمْ ٻٜرْندٜ، نَاع بٛ دٛولٜ طُمْ وَطَتَعٛنْ، طٛنْمَا نَاع نغَمْ حٜٻُکِ شٜىٰدٜ، اَمَّا نغَمْ اٛنْ نغٛودِ يِدّٜ کُوغَلْ نغَلْ ندٜرْ ٻٜرْطٜ مٛوطٛنْ؞ ³تٛع اٛنْ کٛلُّ يِمْٻٜ ٻٜ اَللَّه تَمْبِنِعٛنْ لَامُ سٜمْبٜ، اَمَّا نغَرْتٜىٰ کٛ ٻٜ اٜکِّتٛتٛو تٛ مٛوطٛنْ؞ ⁴نغَمْ تٛ اَلْمَسِيحُ لَامِيطٛ وٛيْنَاٻٜ وَرْتٛيِي، اٛنْ کٜٻَيْ غِيفٛلْ مَنْغُ نغٛلْ حَا اَبَدَا؞

⁵اٛنٛنْ سُکَاٻٜ، نغَطٜىٰ کٛ مَوْٻٜ کَوْتَلْ تٛکُّٻٜ يٜىٰسُ غٛنْٻٜ ندٜرْ مٛوطٛنْ مبِعِ؞ اٛنْ فُو نغَرْتٜىٰ لٜيْنٛوٻٜ کٛعٜ، مبَلِّندِرٜىٰ حَکُّندٜ مٛوطٛنْ؞ نغَمْ اَايَارٜ وِعِي، ‏«‏اَللَّه وَݧِي غٛودُٻٜ مَنْغُ حٛورٜ، اَمَّا اٜ مٛ وَلَّ لٜسْنُٻٜ کٛعٜ؞»‏ ⁶نغَمْ نٛنْ، لٜسْتِنٜىٰ کٛعٜ مٛوطٛنْ يٜىٰسٛ اَللَّه مٛ بَوْطٜ، نغَمْ اٛ وَطَ کٜٻٛنْ مَنْغُ اٜ شَرٜلْ نغٜلْ اٛ يِطِ؞ ⁷تَمْبِنَنٜىٰمٛ فُو کٛ وَنَّتَعٛنْ، نغَمْ اٜ مٛ فَامَنَعٛنْ؞

⁸شُرٜىٰ کٛعٜ مٛوطٛنْ، نجٛوطٛوطٛنْ اٛنْ شِرْيِي؞ غَݧٛ مٛوطٛنْ شٜيْطَنْ اٜ مٛ وٛوسٛو بٛ سٜمْبِنْدُ ٻٜرْنُندُ اٜ مٛ طَٻِّتَ مٛ اٛ حَلْکَتَ؞ ⁹نغَݧٜىٰمٛ، ندَرٛوطٛنْ دٛوْ حٛولَاکِ يٜىٰسُ اٜ سٜمْبٜ؞ اٛنْ اَنْدِ بَنْدِرَاٻٜ مٛوطٛنْ فُو ندٜرْ دُونِيَارُ اٜ نجَرَ اِرِ کَنْ طٛنْ تٛرَّ؞ ¹⁰ندٜنْ غَطَ اٛنْ نجَرِي تٛرَّ شَرٜلْ سٜطَّ، اَللَّه غٛودُطٛ يِدّٜ فُو، نٛدُّطٛعٛنْ نغَمْ کٜٻٛنْ غٜطَلْ ندٜرْ تٜدُّنغَلْ مَاکٛ تَبٛتٛونغَلْ بَرْکَ اَلْمَسِيحُ، کَنْکٛ اٜ حٛورٜ مَاکٛ اٛ وَرْتِرَيْعٛنْ کٜىٰوُٻٜ، اٛ جٛطِّنَعٛنْ، اٛ سٜمْبِطِنَعٛنْ بٛ تَفَارٜ؞ ¹¹لَامُ تَبِّتَ تٛ مَاکٛ حَا اَبَدَا اَبَدِنْ؞ اَامِنْ؞

کٛوْنٛلْ شَکِتِينغٛلْ

¹²سِلْبَانُسْ وَلِّيَمْ مبِنْدَنْمِعٛنْ طٜرٜوٛلْ نغٛعٛلْ ڤَمَرٛلْ؞ اٜ يِيکِ اَمْ اٛ تٛکُّطٛ يٜىٰسُ کٛولٜتٜىٰطٛ؞ اٜ مِ يِطِ مِ سٜمْبِطِنَعٛنْ مِ وِعَعٛنْ طُعُمْ وٛنِ شَاحُ اَللَّه طُمْ غٛونغَ؞ ندَرٜىٰ دٛوْ مَاجُمْ اٜ غٛونغَ؞

¹³کَوْتَلْ تٛکُّٻٜ يٜىٰسُ وٛنْٻٜ طٛعٛ بَابِيلَ، ٻٜ اَللَّه سُٻِ نٛ اٛ سُٻِرِعٛنْ، اٜ ٻٜ کٛوْنَعٛنْ؞ مَرْکُسْ مَا، ٻِطّٛ اَمْ ندٜرْ تٛکُّکِ يٜىٰسُ، اٜ حٛوْنَعٛنْ؞ ¹⁴کٛوْنِرٜىٰ حَکُّندٜ مٛوطٛنْ کٛوْنٛلْ يِدّٜ؞

اَللَّه حٛکَّعٛنْ جَمْ اٛنٛنْ تٛکُّٻٜ اَلْمَسِيحُ فُو؞