1 يَحَيَ

طٜرٜوٛلْ

يَحَيَ اَرَنْدٜوٛلْ

حَبَرُ دٛوْ طٜرٜوٛلْ نغٛعٛلْ

غٛعٛتٛ ندٜرْ تٛکُّٻٜ يٜىٰسُ بِعٜتٜىٰطٛ يَحَيَ وِنْدِ طٜرٜوٛلْ نغٛعٛلْ؞ دُوٻِ 59‏‑58 غَطَ دَݧْنغٛلْ يٜىٰسُ؞ اٛ وِنْدِينغٛلْ اٜ غَرِيرِ اَافِسَ؞ اٛ وِنْدُنغٛلْ نغَمْ طُمْ يَارَنَ تٛکُّٻٜ يٜىٰسُ ٻٜ تٛرَّ سَنْکِتِ غٛنْٻٜ بِغٜىٰجٜ فٜىٰرٜ‑فٜىٰرٜ؞ طٛنْمَا اٛ وِنْدُنغٛلْ نغَمْ اٛ سٜمْبِطِنَ تٛکُّٻٜ يٜىٰسُ ٻٜ شُمْڤٛوتِرَ اٜ اَللَّه لَاوٛلْ يٜىٰسُ اَلْمَسِيحُ؞ اٛ اٜکِّتِنِيٻٜ نٛ ٻٜ اَنْدِرْتَ اٜکِّتِنٛلْ کَلُّنغٛلْ بٛنَّيْنغٛلْ سُمْڤٛ تٛکُّٻٜ يٜىٰسُ؞ نغَمْ اٜکِّتِنٛلْ نغٛلْ اٜ اٜکِّتِنَ وِيکِ يٜىٰسُ وَرْدَايِ دُونِيَارُ اٜ ٻَنْدُ بٛ ندُ نٜطّٛ، وَاتٛ يٜىٰسُ نَاع طُمْ نٜطّٛ؞

اٛ وِنْدَنْٻٜ نغَمْ ٻٜ تَبِّتِنَ حٛولَارٜ مَٻّٜ، ندٜنْ ٻٜ نغِطِندِرَ حَکُّندٜ مَٻّٜ، نٛنْ نٛ اَللَّه يِطِرِٻٜ؞

وٛلْدٜ کٛکَّيْندٜ يٛنْکِ

¹اٜ مِنْ مبِنْدَنَعٛنْ حَبَرُ غٛطّٛ بِعٜتٜىٰطٛ وٛلْدٜ کٛکَّيْندٜ يٛنْکِ؞ کٛ دُونِيَارُ تَغٜىٰ اٜ مٛ طٛنْ؞ مِنْ نَنِيمٛ، مِنْ نغِعِيمٛ اٜ غِتٜ اَمِنْ؞ مِنْ ندَارِيمٛ، مِنْ مٜىٰمِيمٛ اٜ جُوطٜ اَمِنْ؞ ²اٛنْ طٛنْ کٛکّٛووٛ يٛنْکِ اٛنْ، طُمْ وَنْغِنَنِيمِنْمٛ، مِنْ نغِعِمٛ؞ دٛوْ مَاکٛ مِنْ کٛکَّتَ شٜيْدَ، طٛنْمَا اٜ مِنْ نغَعَجِنَنَعٛنْ وِيکِ کَنْکٛ وٛنِ مٛ يٛنْکِ کِ رٜعَتَا؞ دَغَ ندٜنّٛ اٜ مٛ وٛنْدِ اٜ ݧَاکٛ مٛ دٛوْ، ندٜنْ طُمْ وَنْغِنَنِيمِنْمٛ؞ ³اٜ مِنْ نغَعَجِنَنَعٛنْ کٛ مِنْ نَنِ اٜ کٛ مِنْ نغِعِ نغَمْ کَوْتٜنْ سُمْڤٛ؞ سُمْڤٛ مٜىٰطٜنْ وٛنِ سُمْڤٛوتِرْکِ اٜ ݧَاکٛ مٜىٰطٜنْ مٛ دٛوْ اٜ ٻِطّٛ مَاکٛ يٜىٰسُ اَلْمَسِيحُ؞ ⁴اٜ مِنْ مبِنْدٛنٛيَعٛنْ طُعُمْ نغَمْ نَنٜنْ بٜلْطُمْ نَاع سٜطَّ؞

جٛوطَاکِ ندٜرْ جَيْنغٛلْ

⁵طُعُمْ حَبَرُ وٛنِ طُمْ مِنْ نَنِ تٛ يٜىٰسُ اَلْمَسِيحُ مِنْ نغَعَجِنَنِعٛنْطُمْ وِيکِ، اَللَّه اٛ جَيْنغٛلْ، ݧِوْرٜ وَلَا تٛ مَاکٛ کٛو سٜطَّ؞ ⁶تٛ اٜنْ مبِعِي اٜنْ شُمْڤٛوتِرَ اٜ اَللَّه، اَمَّا اٜنْ نجٛوطِي ندٜرْ ݧِوْرٜ، تٛو، اٜنْ ڤٜوِي، اٜنْ تٛکَّتَا غٛونغَ؞ ⁷اَمَّا تٛ اٜنْ نجٛوطَکٜ ندٜرْ جَيْنغٛلْ نٛنْ نٛ اَللَّه جٛوطٛرِي ندٜرْ جَيْنغٛلْ، اٜنْ شُمْڤٛوتِرَ حَکُّندٜ مٜىٰطٜنْ وٛنْ طٛنْ؞ طٛنْمَا پِيپَمْ يٜىٰسُ ٻِطّٛ مَاکٛ اٜ لٛوتَنَعٜنْ حَکّٜىٰجِ فُو؞

⁸تٛ اٜنْ مبِعِي اٜنْ نغَلَا حَکّٜ، اٜنْ پٛيْرَ کٛعٜ مٜىٰطٜنْ وٛنْ طٛنْ، ندٜنْ غٛونغَ وَلَا ندٜرْ ٻٜرْطٜ مٜىٰطٜنْ؞ ⁹اَمَّا تٛ اٜنْ مبِعِي اَللَّه حَکّٜ طُمْ نغَطُطٜنْ، اٛ يَافَنْتٛعٜنْ حَکّٜ مٜىٰطٜنْ، اٛ لٛوتَعٜنْ دَغَ کٛ وٛوطَا طُمْ نغَطُطٜنْ، نغَمْ کَنْکٛ اٛ کٜبِّنٛووٛ اَلْکَوَلْ، اٜ مٛ وٛودِ اَادِلَاکُ؞ ¹⁰تٛ اٜنْ مبِعِي اٜنْ نغَطَايِ حَکّٜ، اٜنْ نغَرْتِرِيمٛ ڤٜوٛووٛ وٛنْ طٛنْ، ندٜنْ وٛلْدٜ مَاکٛ وَلَا ندٜرْ ٻٜرْطٜ مٜىٰطٜنْ؞

اَلْمَسِيحُ وٛنِ بَلَّيْطٛعٜنْ

¹اٛنٛنْ ٻِٻّٜ اَمْ، اٜ مِ وِنْدَنَعٛنْ طُعُمْ نغَمْ تٛع نغَطٛنْ حَکّٜ؞ اَمَّا تٛ غٛطّٛ وَطِي حَکّٜ، اٜنْ نغٛودِ تٛرٛتٛوطٛ ݧَاکٛ مٛ دٛوْ نغَمْ مٜىٰطٜنْ؞ کَنْکٛ وٛنِ يٜىٰسُ اَلْمَسِيحُ اَادِلِيجٛ؞ ²کَنْکٛ وٛنِ مٛ طُمْ سَکِّ نغَمْ يَافَاکِ حَکّٜ مٜىٰطٜنْ؞ نَاع حَکّٜ مٜىٰطٜنْ تَنْ، اَمَّا حَا اٜ حَکّٜ يِمْٻٜ دُونِيَارُ فُو؞

³تٛ اٜنْ نغَطَ کٛ اَللَّه وِعِ نغَطٜنْ، اٜ حٛلَّ اٜنْ تَبِّتِنِي اٜنْ اَنْدِمٛ وٛنْ طٛنْ؞ ⁴فُو بِيطٛ اٜ اَنْدِ اَللَّه، اَمَّا اٛ تٛکَّايِ کٛ اَللَّه وِعِ، تٛو، اٛ ڤٜوٛووٛ، غٛونغَ وَلَا ندٜرْ ٻٜرْندٜ مَاکٛ؞ ⁵اَمَّا فُو تٛکُّطٛ وٛلْدٜ اَللَّه، تٛو، اٜ مٛ يِطِ اَللَّه اٜ غٛونغَ؞ نٛنْ تَبِّتِنَنْتَعٜنْ اٜنْ شُمْڤٛوتِرَ اٜ اَللَّه؞ ⁶فُو بِيطٛ اٜ سُمْڤٛوتِرَ اٜ اَللَّه، حَانِي اٛ جٛوطٛرٛو نٛ يٜىٰسُ اَلْمَسِيحُ جٛوطٛرِي؞

دٛوکَ کٜسُمْ

⁷حِغٛوٻٜ اَمْ غِطَاٻٜ، نَاع طُمْ غٛطُّمْ دٛوکَ کٜسُمْ مبِنْدَنَيْمِعٛنْ، اَمَّا طُمْ دٛوکَ کِيطُمْ طُمْ نغٛودُنٛوطٛنْ دَغَ اَرَنْدٜ؞ دٛوکَ کِيطُمْ طُمْ طٛنْ وٛنِ وٛلْدٜ ندٜ نَنُنٛوطٛنْ؞ ⁸فُو اٜ نٛنْ، اٜ مِ وِنْدَنَعٛنْ دٛوکَ کٜسُمْ، جٛنْدٜ اَلْمَسِيحُ اٜ جٛنْدٜ مٛوطٛنْ حٛلِّي طُمْ غٛونغَ، نغَمْ ݧِوْرٜ اٜ دِلَّ، جَيْنغٛلْ غٛونغَوٛلْ يَادَکٜ يٜيْنَکٜ؞

⁹فُو بِيطٛ ندٜرْ جَيْنغٛلْ وٛنِ، اَمَّا اٜ مٛ وَݧَ بَنْدِرَاوٛ مَاکٛ، تٛو، حَا جٛونِ ندٜرْ ݧِوْرٜ اٛ وٛنِ؞ ¹⁰اَمَّا فُو غِطّٛ بَنْدِرَاوٛ مُوطُمْ، ندٜرْ جَيْنغٛلْ جٛوطِي، اٛ وَلَا غٛطُّمْ غَطَيْطُمْ اٛ وَطَ حَکّٜ؞ ¹¹فُو مٛ يِطَا بَنْدِرَاوٛ مُوطُمْ، ندٜرْ ݧِوْرٜ جٛوطِي، اٜ مٛ يَحَ ندٜرْ ݧِوْرٜ؞ اٛ اَنْدَا تٛ اٛ فَعِ، نغَمْ ݧِوْرٜ وُمْنِيمٛ؞

¹²اٛنٛنْ ٻِٻّٜ اَمْ، مِ وِنْدَنْعٛنْ نغَمْ اٛنْ نجَافَنَامَ حَکّٜ مٛوطٛنْ بَرْکَ يٜىٰسُ؞ ¹³مِ وِنْدَنْعٛنْ، اٛنٛنْ ندٛتِّعٜنْ، نغَمْ اٛنْ اَنْدِ اٛنْ طٛنْ غٛنْطٛ دَغَ اَرَنْدٜ؞ مِ وِنْدَنْعٛنْ، اٛنٛنْ کَيٜعٜنْ، نغَمْ اٛنْ کٜٻِي جَالٛرْغَلْ دٛوْ کَلُّطٛ؞ مِ وِنْدَنْعٛنْ، اٛنٛنْ ٻِٻّٜ اَمْ، نغَمْ اٛنْ اَنْدِ ݧَاکٛ مٛ دٛوْ؞

¹⁴مِ وِنْدَنْعٛنْ، اٛنٛنْ ندٛتِّعٜنْ، نغَمْ اٛنْ اَنْدِمٛ، کَنْکٛ غٛنْطٛ دَغَ اَرَنْدٜ؞ مِ وِنْدَنْعٛنْ، اٛنٛنْ کَيٜعٜنْ، نغَمْ اٛنْ نغٛودِ سٜمْبٜ ٻٜرْندٜ، ندٜنْ وٛلْدٜ اَللَّه اٜ جٛوطِي ندٜرْ ٻٜرْطٜ مٛوطٛنْ؞ طٛنْمَا اٛنْ کٜٻِي جَالٛرْغَلْ دٛوْ کَلُّطٛ؞

¹⁵تٛع اٛنْ نغِطُ دُونِيَارُ، کٛو بٛو کٛ وٛنِ ندٜرْ مَيْرُ؞ فُو غِطّٛ دُونِيَارُ، يِطَا ݧَاکٛ مٛ دٛوْ؞ ¹⁶نغَمْ کٛو طُمٜ کٛ وٛنِ ندٜرْ دُونِيَارُ، بٛ سُونٛ ٻَنْدُ، اٜ سُونٛ غِتٜ، اٜ مَوْنِنْکِ حٛورٜ نغَمْ جَوْدِ، نَاع دَغَ تٛ اَللَّه طُمْ پِوٛيِ؞ دَغَ تٛ دُونِيَارُ طُمْ پِوٛيِ؞ ¹⁷دُونِيَارُ اٜ کٛو طُمٜ طُمْ يِمْٻٜ نغِطِ ندٜرْ مَيْرُ طُمْ پَٻّٛتٛوطُمْ، اَمَّا غَطٛووٛ کٛ اَللَّه يِطِ جٛوطٛتٛ حَا اَبَدَا؞

غَݧٛووٛ اَلْمَسِيحُ

¹⁸اٛنٛنْ ٻِٻّٜ اَمْ، تِمّٛودٜ دُونِيَارُ ٻَدَکٜ، نٛنْ نٛ نَنْطٛنْ غَݧٛ اَلْمَسِيحُ اٜ وَرَ؞ ندٜنْ جٛونِ وَݧْوَݧْٻٜ اَلْمَسِيحُ نجَادَکٜ مبَنْغِي؞ نغَمْ مَاجُمْ اٜنْ اَنْدِ تِمّٛودٜ دُونِيَارُ ٻَدَکٜ؞ ¹⁹وَݧْوَݧْٻٜ اَلْمَسِيحُ ٻٜنْ ندٜنّٛ ندٜرْ مٜىٰطٜنْ ٻٜ نغٛنّٛو، اَمَّا ٻٜ شٜنْدِرِي اٜ مٜىٰطٜنْ نغَمْ دَغَ ندٜنّٛ مَا نَاع طُمْ ٻٜ مٜىٰطٜنْ؞ دَا طُمْ ٻٜ مٜىٰطٜنْ، دَا حَا جٛونِ اٜ ٻٜ نغٛنْدِ اٜ مٜىٰطٜنْ؞ اَمَّا ٻٜ اَلِيعٜنْ، نغَمْ طُمْ حٛلَّ ندٜنْ مَا ٻٜ فُو نَاع طُمْ ٻٜ مٜىٰطٜنْ؞

²⁰اَمَّا اَلْمَسِيحُ حٛکِّيعٛنْ رُوحُ اَللَّه؞ کَنْجُمْ وَطِ اَنْدُطٛنْ غٛونغَ؞ ²¹مِ وِنْدَنْعٛنْ، نَاع نغَمْ اٛنْ اَنْدَا غٛونغَ، اَمَّا نغَمْ اٛنْ اَنْدِکَ، ندٜنْ اٛنْ اَنْدِ غٛونغَ رِمَتَا فٜوْرٜ؞

²²طُمْ مٛيٜ وٛنِ ڤٜوٛووٛ؟ کَنْکٛ وٛنِ غَݧُطٛ يٜىٰسُ وٛنِ اَلْمَسِيحُ؞ غَݧُطٛ ݧَاکٛ مٛ دٛوْ اٜ ٻِطّٛ مَاکٛ کَنْکٛ وٛنِ غَݧٛ اَلْمَسِيحُ؞ ²³نغَمْ کٛو مٛيٜ وَݧِ ٻِطّٛ اٛنْ، وَݧِي ݧَاکٛ اٛنْ مَا؞ فُو بِيطٛ اٜ نجَيْرِ يٜىٰسُ اٛ ٻِطّٛ اَللَّه، اٜ سُمْڤٛوتِرَ اٜ اَللَّه ݧَاکٛ مٛ دٛوْ وٛنْ طٛنْ؞

²⁴نغَطٜىٰ کَ جٛغَاکِ کٛ نَنْطٛنْ دَغَ اَرَنْدٜ ندٜرْ ٻٜرْطٜ مٛوطٛنْ؞ تٛ اٛنْ نجٛغَکٜ کٛ نَنْطٛنْ دَغَ اَرَنْدٜ ندٜرْ ٻٜرْطٜ مٛوطٛنْ، اٛنْ شُمْڤٛوتِرَ اٜ ٻِطّٛ اٛنْ اٜ ݧَاکٛ اٛنْ؞ ²⁵نغَعَلْ کَنْغَلْ وٛنِ اَلْکَوَلْ نغَلْ اَلْمَسِيحُ وَطَنِعٜنْ، وَاتٛ يٛنْکِ کِ رٜعَتَا؞

²⁶مِ وِنْدَنْعٛنْ طُعُمْ دٛوْ ٻٜنْ طٛنْ غِطْٻٜ مَجِّنَعٛنْ؞ ²⁷اَمَّا اٛنٛنْ، اَلْمَسِيحُ حٛکِّيعٛنْ رُوحُ اَللَّه، جٛوطِيطُمْ ندٜرْ ٻٜرْطٜ مٛوطٛنْ؞ نَاع نَا غٛطّٛ اٜکِّتِنٛووٛ فٜىٰرٜ اٜکِّتِنِيعٛنْ، نغَمْ رُوحُ طُمْ اٜ اٜکِّتِنَعٛنْ کٛو طُمٜ؞ ندٜنْ کٛ طُمْ اٜکِّتِنْتَ طُمْ غٛونغَ، نَاع طُمْ فٜوْرٜ؞ نغَطٜىٰ کَ سُمْڤٛوتِرْکِ اٜ يٜىٰسُ نٛنْ نٛ رُوحُ اَللَّه اٜکِّتِنِرِعٛنْ؞

²⁸جٛونِ، اٛنٛنْ ٻِٻّٜ اَمْ، نغَطٜىٰ کَ سُمْڤٛوتِرْکِ اٜ اَلْمَسِيحُ، نغَمْ ݧَلْندٜ ندٜ اٛ وَرْتَتَ ندَرٛوطٜنْ يٜىٰسٛ مَاکٛ ٻٜرْندٜ غٛعٛ، تٛع شٜمْتٜنْ يٜىٰسٛ مَاکٛ؞ ²⁹تٛ اٛنْ اَنْدِ اَلْمَسِيحُ اٛ اَادِلِيجٛ، اٛنْ تَبِّتِنِي وِيکِ کٛو مٛيٜ غَطٛووٛ اَادِلَاکُ اٛ ٻِطّٛ اَللَّه؞

يِمْٻٜ اَللَّه

¹ندَارٜىٰ نٛ ݧَاکٛ مٛ دٛوْ يِطِرِعٜنْ، حَا اٜ طُمْ نٛدِّرَعٜنْ ٻِٻّٜ اَللَّه، نٛنْ بٛو نغٛنْتِندِرْطٜنْ؞ کٛ وَطِ يِمْٻٜ دُونِيَارُ ندُعُ اَنْدَاعٜنْ نغَمْ ٻٜ اَنْدَامٛ؞ ²اٛنٛنْ حِغٛوٻٜ اَمْ ٻٜ نغِطُمِ، جٛونِ اٜنْ ٻِٻّٜ اَللَّه؞ طُمْ حٛلَّايِعٜنْ کٛ نغَرْتٜتٜنْ طٛعٛ يٜىٰسٛ تَوْ؞ اَمَّا اٜنْ اَنْدِ تٛ اَلْمَسِيحُ وَرْتِي، اٜنْ نغَرْتَيْ بٛ مَاکٛ، نغَمْ اٜنْ نغِعَيْمٛ نٛنْ نٛ اٛ وٛنِ؞ ³فُو غَطُطٛ ٻٜرْندٜ دٛوْ اَلْمَسِيحُ نٛنْ، اٛ لَاٻِنَ حٛورٜ مَاکٛ نٛ اَلْمَسِيحُ لَاٻِرِ؞

⁴فُو غَطٛووٛ حَکّٜ يٜوِي دٛوکَ اَللَّه، نغَمْ وَطُکِ حَکّٜ وٛنِ يٜوُکِ دٛوکَ اَللَّه؞ ⁵اٛنْ اَنْدِ يٜىٰسُ اَلْمَسِيحُ وَرِي نغَمْ اِتَّ حَکّٜ؞ کَنْکٛ اٛ وَلَا حَکّٜ؞ ⁶کٛو مٛيٜ وٛنْدِ اٜ مَاکٛ وَطَتَا کَ وَطُکِ حَکّٜ؞ فُو غَطّٛ کَ وَطُکِ حَکّٜ مٜىٰطَايِ يِيکِمٛ کٛو اَنْدُکِمٛ؞

⁷اٛنٛنْ ٻِٻّٜ اَمْ، تٛع اٛنْ اَلُ غٛطّٛ مَجِّنَعٛنْ؞ کٛو مٛيٜ غَطٛووٛ اَادِلَاکُ، کَنْکٛ وٛنِ اَادِلِيجٛ نٛنْ نٛ اَلْمَسِيحُ وٛنِ اَادِلِيجٛ؞ ⁸فُو غَطّٛ کَ وَطُکِ حَکّٜ، شٜيْطَنْ جٜيِمٛ، نغَمْ دَغَ اَرَنْدٜ شٜيْطَنْ اٛ غَطٛووٛ حَکّٜ؞ کٛ وَطِ ٻِطّٛ اَللَّه وَرِ دُونِيَارُ وٛنِ نغَمْ اٛ حَلْکَ کُوطٜ شٜيْطَنْ؞

⁹فُو ٻِطّٛ اَللَّه وَطَتَا کَ وَطُکِ حَکّٜ، نغَمْ نغِکُّ اَللَّه اٜ ندٜرْ مَاکٛ؞ ندٜنْ ندٜ اَللَّه وٛنِ ݧَاکٛ مَاکٛ، اٛ وَطَتَا کَ وَطُکِ حَکّٜ؞ ¹⁰رَا نٛ طُمْ فٜىٰرٛوتِرْتَ ٻِٻّٜ اَللَّه اٜ ٻِٻّٜ شٜيْطَنْ؞ فُو مٛ وَطَتَا کٛ وٛوطِ کٛو يِطَا بَنْدِرَاٻٜ مُوطُمْ، کَنْکٛ نَاع اٛ ٻِطّٛ اَللَّه؞

نغِطِندِرٜنْ

¹¹طُعُمْ وٛنِ کٛ نَنْطٛنْ دَغَ اَرَنْدٜ وِيکِ نغِطِندِرٜنْ؞ ¹²تٛع اٜنْ نغَرْتُ بٛ کَيِنُ غَرْتُطٛ مٛ شٜيْطَنْ، اٛ وَرِ مِݧِرَاوٛ مَاکٛ؞ نغَمْ طُمٜ اٛ وَرِمٛ؟ اٛ وَرُ مِݧِرَاوٛ مَاکٛ نغَمْ کٛ مِݧِرَاوٛ مَاکٛ وَطِ اٜ وٛوطِ، اَمَّا کَنْکٛ، کٛ اٛ وَطِ طُمْ وٛوطَا؞

¹³بَنْدِرَاٻٜ، تٛع اٛنْ کَيْطِنْ تٛ يِمْٻٜ دُونِيَارُ اٜ نغَݧَعٛنْ؞ ¹⁴ندٜنّٛ اٜنْ نَنْدِ اٜ مَيْٻٜ، اَمَّا جٛونِ اٜنْ نغٛودِ يٛنْکِ، نغَمْ اٜنْ نغِطِ بَنْدِرَاٻٜ مٜىٰطٜنْ؞ فُو مٛ يِطَا بَنْدِرَاوٛ مُوطُمْ اٜ جٛوطِي ندٜرْ مَيْدٜ؞ ¹⁵کٛو مٛيٜ وَݧِ بَنْدِرَاوٛ مُوطُمْ اٛ غَطٛووٛ وَرْحٛورٜ؞ اٛنْ اَنْدِ غَطٛووٛ وَرْحٛورٜ وَلَا يٛنْکِ کِ رٜعَتَا ندٜرْ مَاکٛ؞ ¹⁶طُعُمْ وٛنِ نٛ اَنْدِرْطٜنْ کٛ وٛنِ يِدّٜ:‏ يٜىٰسُ حٛکِّي يٛنْکِ مُوطُمْ نغَمْ مٜىٰطٜنْ؞ اٜ حَانِ اٜنٜنْ مَا کٛکّٜنْ يٛنْکِ مٜىٰطٜنْ نغَمْ بَنْدِرَاٻٜ مٜىٰطٜنْ؞ ¹⁷تٛ غٛودُطٛ رِسْکُ يِعِي بَنْدِرَاوٛ مُوطُمْ ندٜرْ دُلّٜرٜ اٛ وَݧِي اٛ وَلَّمٛ، تٛو، نٛ وَطَتَ اٛ وِعَ اٜ مٛ وٛودِ يِدّٜ اَللَّه ندٜرْ ٻٜرْندٜ مَاکٛ؟ ¹⁸اٛنٛنْ ٻِٻّٜ اَمْ، تٛع اٜنْ کٛلُّ يِدّٜ مٜىٰطٜنْ اٜ حٛنْدُکٛ تَنْ، اَمَّا اٜنْ کٛلُّ يِدّٜ مٜىٰطٜنْ اٜ غٛونغَ ندٜرْ کُوطٜ؞

¹⁹تٛ اٜنْ نغِطِندِرِي نٛنْ، اٜنْ اَنْدِ اٜنْ نغٛودِ غٛونغَ وٛنْ طٛنْ؞ ندٜنْ اٜنْ مبَاوَيْ دَرَاکِ يٜىٰسٛ اَللَّه اٜ ٻٜرْندٜ غٛعٛ، ²⁰کٛو تٛ ٻٜرْطٜ مٜىٰطٜنْ کٛلِّيعٜنْ اٜنْ نغَطِي کٛ وٛوطَا؞ نغَمْ اَللَّه ٻُرِي ٻٜرْطٜ مٜىٰطٜنْ، اٜ مٛ اَنْدِ کٛو طُمٜ؞ ²¹اٛنٛنْ ٻٜ نغِطُمِ، تٛ ٻٜرْطٜ مٜىٰطٜنْ کٛلَّايِعٜنْ اٜنْ نغَطِي کٛ وٛوطَا، اٜنْ نغٛودِ سٜمْبٜ ٻٜرْطٜ دَرَاکِ يٜىٰسٛ اَللَّه؞ ²²اٜنْ کٜٻَ کٛو طُمٜ کٛ تٛرِيطٜنْمٛ نغَمْ اٜنْ تٛکِّي کٛ اٛ وِعِ نغَطٜنْ، اٜنْ نغَطَ کٛ وٜلْنَنْتَمٛ ٻٜرْندٜ؞ ²³کٛ اَللَّه وِعِ نغَطٜنْ، کَنْجُمْ وٛنِ کٛولٛوطٜنْ اِنْدٜ ٻِطّٛ مَاکٛ يٜىٰسُ اَلْمَسِيحُ، ندٜنْ نغِطِندِرٜنْ نٛنْ نٛ اَلْمَسِيحُ وِعِ نغَطٜنْ؞ ²⁴فُو تٛکُّٻٜ کٛ اَللَّه وِعِ طُمْ وَطَ اٜ ٻٜ نغٛنْدِ اٜ مَاکٛ، کَنْکٛ مَا اٜ مٛ وٛنْدِ اٜ مَٻّٜ؞ رَا نٛ تَبِّتِنِرْطٜنْ اٜ مٛ وٛنْدِ اٜ مٜىٰطٜنْ:‏ اٜنْ تَبِّتِنِي نٛنْ نغَمْ رُوحُ مَاکٛ طُمْ اٛ حٛکِّعٜنْ؞

نٛ اَنْدِرْتٜنْ رُوحُ غٛونغَ اٜ رُوحُ فٜوْرٜ

¹اٛنٛنْ ٻٜ نغِطُمِ، نَاع کٛو مٛيٜ بِيطٛ اٜ وٛودِ رُوحُ اَللَّه کٛولٛتٛوطٛنْ؞ اَمَّا ڤٛوندٜىٰٻٜ نغِعٛنْ کٛو رُوحُ اَللَّه اٜ ندٜرْ مَٻّٜ کٛو وَلَا ندٜرْ مَٻّٜ، نغَمْ اَنَّبٛعٜنْ فٜوْرٜ طُطْٻٜ شَنْکِتَکٜ کٛو تٛيٜ ندٜرْ دُونِيَارُ؞ ²رَا نٛ اَنْدِرْتٛنْ تٛ نٜطّٛ اٜ وٛودِ رُوحُ اَللَّه:‏ فُو بِيطٛ يٜىٰسُ اَلْمَسِيحُ وَرِي ندٜرْ ٻَنْدُ اٜ وٛودِ رُوحُ اَللَّه؞ ³اَمَّا فُو مٛ وِعَايِ يٜىٰسُ اَلْمَسِيحُ وَرِي ندٜرْ ٻَنْدُ، اٛ وَلَا رُوحُ اَللَّه؞ کٛ اٛ وِعَتَ تٛ غَݧٛ اَلْمَسِيحُ طُمْ پِوٛيِ؞ غَݧٛ مٛ نَنْطٛنْ اٜ وَرَ، اٛ يَادَکٜ اٛ وَرِي ندٜرْ دُونِيَارُ؞

⁴اٛنٛنْ ٻِٻّٜ اَمْ، اٛنٛنْ طُمْ ٻٜ اَللَّه، ندٜنْ اٛنْ کٜٻِي جَالٛرْغَلْ دٛوْ اَنَّبٛعٜنْ فٜوْرٜ ٻٜنْ طٛنْ؞ نغَمْ بَوْطٜ رُوحُ اَللَّه غٛنْطُمْ ندٜرْ مٛوطٛنْ ٻُرِي بَوْطٜ شٜيْطَنْ لَامٛتٛوطٛ يِمْٻٜ دُونِيَارُ سٜمْبٜ؞ ⁵کَمْٻٜ طُمْ ٻٜ دُونِيَارُ، نغَمْ نٛنْ کٛ ٻٜ مبِعَتَ اُمْ طُمْ دُونِيَارُ، ندٜنْ دُونِيَارُ بٛو اٜ جَٻَ کٛ ٻٜ مبِعَتَ؞ ⁶اٜنٜنْ اٜنْ يِمْٻٜ اَللَّه؞ فُو اَنْدُٻٜ اَللَّه اٜ نجَٻَ کٛ مبِعٜتٜنْ؞ ٻٜ اَنْدَا اَللَّه بٛو نجَٻَتَا کٛ مبِعٜتٜنْ؞ نٛنْ اَنْدِرْتٜنْ نٜطّٛ غٛودُطٛ رُوحُ اَللَّه وَنْغِنٛوجُمْ غٛونغَ اٜ غٛودُطٛ بَوْطٜ شٜيْطَنْ مَجِّنٛوجٜ يِمْٻٜ؞

اَللَّه اٛ يِدّٜ

⁷اٛنٛنْ ٻٜ نغِطُمِ، سٜيْ نغِطِندِرٜنْ نغَمْ يِدّٜ پِوٛيِ دَغَ تٛ اَللَّه؞ فُو غٛودُطٛ يِدّٜ اٛ ٻِطّٛ اَللَّه، ندٜنْ اٜ مٛ اَنْدِ اَللَّه؞ ⁸فُو مٛ وَلَا يِدّٜ، اٛ اَنْدَا اَللَّه، نغَمْ اَللَّه اٛ يِدّٜ؞ ⁹اَللَّه حٛلِّيعٜنْ يِدّٜ مُوطُمْ ندٜ اٛ لِلٛيِ ٻِطّٛ مَاکٛ غٛعٛتٛ تَنْ مٛ اٛ وٛودِ ندٜرْ دُونِيَارُ، نغَمْ کٜٻٜنْ يٛنْکِ کِ رٜعَتَا بَرْکَ ٻِطّٛ اٛنْ؞ ¹⁰رَا نٛ يِدّٜ ندٜ غٛونغَ وَعِ، نَاع اٜنٜنْ نغِطِ اَللَّه، اَمَّا اَللَّه يِطِعٜنْ اٛ لِلٛيِ ٻِطّٛ مَاکٛ نغَمْ وَرْتَ شَکِّرِ يَافَاکِ حَکّٜ مٜىٰطٜنْ؞

¹¹اٛنٛنْ ٻٜ نغِطُمِ، ندٜ اَللَّه يِطِرِيعٜنْ نٛنْ، اٜنٜنْ مَا اٜ حَانِ نغِطِندِرٜنْ؞ ¹²وَلَا نٜطّٛ مٜىٰطُطٛ يِيکِ اَللَّه کٛو سٜطَّ؞ اَمَّا تٛ اٜنْ نغِطِندِرِي، اَللَّه اٜ وٛنْدِ اٜ مٜىٰطٜنْ وٛنْ طٛنْ؞ طٛنْمَا يِدّٜ اِرِ ندٜعٜ اٜ جٛوطِي ندٜرْ ٻٜرْطٜ مٜىٰطٜنْ اٜ غٛونغَ؞

¹³اَللَّه حٛکِّيعٜنْ رُوحُ مُوطُمْ؞ کَنْجُمْ وَطِ اَنْدُطٜنْ اٜ مٛ وٛنْدِ اٜ مٜىٰطٜنْ، اٜنٜنْ مَا اٜنْ نغٛنْدِ اٜ مَاکٛ؞ ¹⁴مِنْ نغِعِي، مِنْ بٛو شٜيْدَکٜ وِيکِ، ݧَاکٛ مٛ دٛوْ لِلٛيِي ٻِطّٛ مُوطُمْ اٛ وَرْتَ کِسْنٛووٛ دُونِيَارُ؞ ¹⁵فُو جَٻُطٛ اٜ ٻٜرْندٜ مُوطُمْ اٜ حٛنْدُکٛ مُوطُمْ وِيکِ يٜىٰسُ اٛ ٻِطّٛ اَللَّه، اَللَّه اٜ وٛنْدِ اٜ مَاکٛ؞ کَنْکٛ مَا اٜ مٛ وٛنْدِ اٜ اَللَّه؞ ¹⁶نغَمْ نٛنْ اٜنٜنْ اٜنْ اَنْدِ يِدّٜ ندٜ اَللَّه وَطَنِعٜنْ اٜنْ نجَٻِيندٜ؞ اَللَّه اٛ يِدّٜ، فُو کٛلّٛووٛ يِدّٜ اٜ مٛ جٛوطٛدِي اٜ اَللَّه وٛنْ طٛنْ، ندٜنْ اَللَّه مَا اٜ جٛوطٛدِي اٜ مَاکٛ؞ ¹⁷تٛ اٜنْ نغِطِ يِمْٻٜ اٜ غٛونغَ، اٜنْ نغَطَ جٛنْدٜ نٛ يٜىٰسُ جٛوطٛرِي ندٜرْ دُونِيَارُ، اٜنْ کُلَتَا ݧَلْندٜ جَانغٛ؞ ¹⁸تٛ نٜطّٛ اٜ اَنْدِ اَللَّه اٜ يِطِمٛ، اٛ دَرٛتٛ يٜىٰسٛ اَللَّه ٻٜرْندٜ غٛعٛ، نغَمْ يِدّٜ ندٜ اَللَّه حٛلِّعٜنْ اٜ رِيوَ کُلٛلْ؞ نغَمْ تٛ نٜطّٛ اٜ حُلَ کِيتَ اَللَّه حٛلِّي اٛ فَامَايِ يِدّٜ ندٜ اَللَّه يِطِمٛ؞ نٛنْ حٛلِّي يِدّٜ ندٜ اَللَّه وَطَنْتَمٛ ندٜ حُوَتَا کُوطٜ طٜ اٛ يِطِ حُوتِرْکِمٛ؞

¹⁹اٜنْ نغِطِندِرِ، نغَمْ اَللَّه اَرْتِي يِطُکِعٜنْ؞ ²⁰تٛ غٛطّٛ وِعِي اٜ يِطِ اَللَّه، اَمَّا اٜ مٛ وَݧَ بَنْدِرَاوٛ مَاکٛ، تٛو، اٛ ڤٜوٛووٛ؞ نغَمْ فُو مٛ يِطَا بَنْدِرَاوٛ مُوطُمْ مٛ اٛ يِعَتَ، نٛ وَطَتَ اٛ يِطَ اَللَّه مٛ اٛ مٜىٰطَايِ يِيکِ؟ ²¹طُعُمْ وٛنِ کٛ اٛ وِعِعٜنْ نغَطٜنْ:‏ اٛ وِعِي، فُو غِطّٛ اَللَّه دٛولٜ يِطَ بَنْدِرَاوٛ مُوطُمْ مَا؞

حٛولَارٜ حٜٻِي جَالٛرْغَلْ دٛوْ دُونِيَارُ

¹فُو کٛولِيطٛ يٜىٰسُ وٛنِ اَلْمَسِيحُ اٛ ٻِطّٛ اَللَّه؞ فُو غِطّٛ ݧَاکٛ سُکَ، اٜ مٛ يِطِ سُکَ اٛنْ مَا؞ ²نٛ اَنْدِرْتٜنْ اٜنْ نغِطِ ٻِٻّٜ اَللَّه وٛنِ، تٛ اٜنْ نغِطِ اَللَّه اٜنْ نغَطَ کٛ اٛ وِعِ نغَطٜنْ؞ ³نغَمْ يِدّٜ اَللَّه وٛنِ نغَطٜنْ کٛ اٛ وِعِ نغَطٜنْ؞ کٛ اٛ وِعِ نغَطٜنْ بٛو سَلٛرْتَاعٜنْ وَطُکِ؞ ⁴نغَمْ فُو ٻِطّٛ اَللَّه وَاوَيْ حٜٻُکِ جَالٛرْغَلْ دٛوْ دُونِيَارُ؞ حٛولَارٜ مٜىٰطٜنْ دٛوْ اَلْمَسِيحُ، کَيْرٜ وَطِ کٜٻُطٜنْ جَالٛرْغَلْ دٛوْ دُونِيَارُ؞ ⁵مٛيٜ وَاوَتَ حٜٻُکِ جَالٛرْغَلْ دٛوْ دُونِيَارُ؟ سٜيْ کٛولِيطٛ يٜىٰسُ اٛ ٻِطّٛ اَللَّه؞

شٜيْدَاکِ يٜىٰسُ

⁶يٜىٰسُ اَلْمَسِيحُ وٛنِ غَرْطٛ ندٜرْ دُونِيَارُ؞ اٛ وَرْدِي اٜ اَلَامَ ندِيَمْ اٜ پِيپَمْ؞ نَاع اٜ ندِيَمْ تَنْ اٛ وَرْدِ، اَمَّا ندِيَمْ اٜ پِيپَمْ؞ رُوحُ اَللَّه وِعِيعٜنْ نٛنْ، نغَمْ رُوحُ اٜ وِعَ غٛونغَ؞ ⁷اٜ وٛودِ فِي تَتُمْ تَبِّتِنَنْطُمْعٜنْ غٛونغَ دٛوْ يٜىٰسُ؞ ⁸کَنْجُمْ وٛنِ رُوحُ اَللَّه، اٜ ندِيَمْ، اٜ پِيپَمْ، طُمْ فُو اٜ طُمْ حٛلَّ شٜيْدَ غٛعٛ؞ ⁹تٛ اٜنْ نجَٻِي کٛ يِمْٻٜ تَبِّتِنِ، کٛ اَللَّه تَبِّتِنِ ٻُرِي غٛونغَ؞ نغَمْ طُعُمْ وٛنِ کٛ اَللَّه تَبِّتِنِ دٛوْ ٻِطّٛ مُوطُمْ؞ ¹⁰فُو کٛولِيطٛ ٻِطّٛ اَللَّه تَبِّتِنِي طُعُمْ ندٜرْ ٻٜرْندٜ مُوطُمْ؞ اَمَّا فُو مٛ حٛولَاکِ اَللَّه، اٛ وَرْتِرِي اَللَّه ڤٜوٛووٛ وٛنْ طٛنْ، نغَمْ اٛ وَݧِي اٛ حٛولٛو کٛ اَللَّه تَبِّتِنِ دٛوْ ٻِطّٛ مُوطُمْ؞ ¹¹طُعُمْ وٛنِ کٛ تَبِّتِنَنِعٜنْ اَللَّه حٛکِّيعٜنْ يٛنْکِ کِ رٜعَتَا، ندٜنْ يٛنْکِ کِنْ تٛ ٻِطّٛ مَاکٛ کٜٻٜتٜنْکِ؞ ¹²فُو جَٻُطٛ ٻِطّٛ اَللَّه اٜ وٛودِ يٛنْکِ؞ مٛ جَٻَايِ ٻِطّٛ اٛنْ، وَلَا يٛنْکِ؞

يٛنْکِ کِ رٜعَتَا

¹³مِ وِنْدَنْعٛنْ طُعُمْ، اٛنٛنْ کٛولِيٻٜ اِنْدٜ ٻِطّٛ اَللَّه، نغَمْ اَنْدٛنْ اٛنْ نغٛودِ يٛنْکِ کِ رٜعَتَا؞ ¹⁴اٜنْ نغٛودِ سٜمْبٜ ٻٜرْطٜ دَرَاکِ يٜىٰسٛ مَاکٛ، نغَمْ اٜنْ تَبِّتِنِي اٜ مٛ نَنَعٜنْ تٛ اٜنْ تٛرَکٜمٛ کٛو طُمٜ نٛنْ نٛ اٛ يِطِرِ؞ ¹⁵ندٜ اٜنْ اَنْدِ اٜ مٛ نَنَعٜنْ کٛو ندٜيٜ تٛ اٜنْ تٛرَکٜمٛ غٛطُّمْ، اٜنْ اَنْدِ اٜنْ کٜٻِي کٛ تٛرِيطٜنْمٛ وٛنْ طٛنْ؞

¹⁶تٛ اٛنْ نغِعِي تٛکُّطٛ يٜىٰسُ اٜ وَطَ حَکّٜ طُمْ يَارَتَامٛ مَيْدٜ، سٜيْ نغَطَنٛنْمٛ دٛعَارٜ، ندٜنْ اَللَّه حٛکَّيْمٛ يٛنْکِ؞ اَمَّا اٜ وٛودِ حَکّٜ جَارَيْطُمْ نٜطّٛ مَيْدٜ، وَاتٛ سٜنْدُکِمٛ اٜ اَللَّه حَا اَبَدَا؞ مِ وِعَايِ طُمْ وَطَ دٛعَارٜ دٛوْ مَاجُمْ؞ ¹⁷فُو وَطُکِ کٛ اَللَّه يِطَا طُمْ حَکّٜ، اَمَّا اٜ وٛودِ حَکّٜ طُمْ يَارَتَا نٜطّٛ مَيْدٜ؞

¹⁸اٜنْ اَنْدِ فُو ٻِطّٛ اَللَّه ݧَمْرَتَا يٜىٰسٛ اٜ وَطُکِ حَکّٜ، اَمَّا ٻِطّٛ اَللَّه سُرَنَيْمٛ؞ شٜيْطَنْ مٜىٰمَتَامٛ؞

¹⁹اٜنْ اَنْدِ اٜنٜنْ طُمْ ٻٜ اَللَّه، کٛو ندٜ دُونِيَارُ فُو اٜ لٜيْ لَامُ شٜيْطَنْ؞

²⁰اٜنْ اَنْدِ ٻِطّٛ اَللَّه وَرِي دُونِيَارُ حٛکِّعٜنْ اَنْدَلْ، نغَمْ اَندٜنْ اَللَّه مٛ غٛونغَ؞ بَرْکَ يٜىٰسُ اَلْمَسِيحُ، جٛونِ اَللَّه مٛ غٛونغَ جٜيِعٜنْ؞ کَنْکٛ وٛنِ اَللَّه مٛ غٛونغَ، کٛکّٛووٛ يٛنْکِ کِ رٜعَتَا؞

²¹اٛنٛنْ ٻِٻّٜ اَمْ، نغٛطِّتٜىٰ اَلَّاجِ فٜوْرٜ؞