1 کٛرِنْتِيَنْکٛعٜنْ

طٜرٜوٛلْ اَرَنْدٜوٛلْ نغٛلْ بُلُسْ وِنْدَنِ

کٛرِنْتِيَنْکٛعٜنْ

حَبَرُ دٛوْ طٜرٜوٛلْ نغٛعٛلْ

بُلُسْ لِلَاطٛ يٜىٰسُ وِنْدِ طٜرٜوٛلْ نغٛعٛلْ؞ اٛ وِنْدِينغٛلْ دُوٻِ 55 غَطَ دَݧْنغٛلْ يٜىٰسُ شَرٜلْ کٛ اٛ وٛنِ اٜ غَرِيرِ اَافِسَ؞

اٜ جَامَنُ بُلُسْ غَرِيرِ کٛرِنْتِ ندِ مَوْندِ اٜ ندِ اَندِرَا کُوطٜ فٜىٰرٜ‑فٜىٰرٜ بٛ سٛودُکِ اٜ سٛورِتَاکِ، اٜ شٛغُّ، اٜ طَٻُّتُکِ اَنْدَلْ اٜ فَامُ، اٜ تٛکُّکِ دِينَ فٜىٰرٜ‑فٜىٰرٜ، اٜ وَطُکِ نجٜىٰنُ؞

اٛ وِنْدُ طٜرٜوٛلْ نغٛعٛلْ نغَمْ اٛ حٛلِّتَ تٛکُّٻٜ يٜىٰسُ غٛودُٻٜ نغِکُّ طُمْ حَانَا؞ طٜرٜوٛلْ نغٛلْ حٛلِّي وِيکِ دٛولٜ ٻٜ کٛلَّ نغِکُّ بٛطُّمْ، طٛنْمَا ٻٜ اَلَ حٛلُّکِ فٜىٰرٛوتِرٛلْ حَکُّندٜ مَٻّٜ، ٻٜ اَلَ وُلّٛوتِرْکِ تٛ يِمْٻٜ ٻٜ تٛکَّايِ يٜىٰسُ؞ ندٜنْ اٛ مٛعِّنِي ݧُمٛ مَٻّٜ دٛوْ اُمَّاکِ مَيْٻٜ؞ طٛنْمَا اٛ مٜتِي دٛوْ نجٜىٰنُ، اٜ تٜىٰغَلْ، اٜ دٛکّٜ رُوحُ اَللَّه؞

ندٜرْ سُورَوٛلْ 31 بُلُسْ مٜتِي دٛوْ تٛکُّٻٜ يٜىٰسُ کٛلَّ يِدّٜ اِرِ ندٜ جٛومِرَاوٛ حٛکِّٻٜ حَکُّندٜ مَٻّٜ؞

¹مِنْ، بُلُسْ مٛ اَللَّه سُٻِ وَرْتَ لِلَاطٛ يٜىٰسُ اَلْمَسِيحُ اٜ بَنْدِرَاوٛ مٜىٰطٜنْ سَسْتَانِسْ مبِنْدِ طٜرٜوٛلْ نغٛعٛلْ؞

²مِنْ مبِنْدَنْغٛلْ کَوْتَلْ يِمْٻٜ اَللَّه وٛنْٻٜ کٛرِنْتِ، ٻٜ اَللَّه نٛدِّ نغَرْتَ يِمْٻٜ مُوطُمْ؞ مِنْ مبِنْدَنْغٛلْ يِمْٻٜ فُو غٛنْٻٜ کٛو تٛيٜ غَطٛوٻٜ دٛعَارٜ ندٜرْ اِنْدٜ يٜىٰسُ اَلْمَسِيحُ جٛومِرَاوٛ مٜىٰطٜنْ؞ کَنْکٛ وٛنِ جٛومِرَاوٛ مٜىٰطٜنْ اٜ مَٻّٜ فُو؞

³اَللَّه ݧَاکٛ مٜىٰطٜنْ مٛ دٛوْ اٜ يٜىٰسُ اَلْمَسِيحُ جٛومِرَاوٛ بَرْکِطِنَعٛنْ حٛکَّعٛنْ جَمْ؞

بُلُسْ يٜتِّي اَللَّه

⁴کٛو ندٜيٜ اٜ مِ يٜتَّ اَللَّه نغَمْ مٛوطٛنْ نغَمْ بَرْکَ اٜ يِدّٜ طُمْ اٛ حٛکِّعٛنْ نغَمْ سُمْڤٛوتِرْکِ مٛوطٛنْ اٜ يٜىٰسُ اَلْمَسِيحُ؞ ⁵سُمْڤٛوتِرْکِ مٛوطٛنْ اٜ مَاکٛ طُمْ بَرْکِطِنِيعٛنْ اٜ کٛو نغٛلٜ لَاوٛلْ، وَاتٛ ندٜرْ مٜتٛ فُو اٜ اَنْدَلْ فُو، ⁶نغَمْ طُمْ تَبِّتِنَنِيعٛنْ وَعَجُ طُمْ مِنْ نغَعَجِنَنِعٛنْ دٛوْ اَلْمَسِيحُ طُمْ غٛونغَ؞ ⁷نغَمْ نٛنْ، اٛنْ ندُلَّايِ کٛو نغَلٜ دٛکَّلْ نغَلْ رُوحُ اَللَّه حٛکَّتَ، اٛنْ کٜطِي اٛنْ کَاٻِي غَرْتٛلْ يٜىٰسُ اَلْمَسِيحُ جٛومِرَاوٛ مٜىٰطٜنْ؞ ⁸اٛ وَطَيْ کَ سٜمْبِطِنْکِعٛنْ حَا يَاکِ رٜعِرْدٜ، نغَمْ نغَرْتٛنْ ٻٜ نغَلَا کٛ طُمْ حُطِرْتَعٛنْ ݧَلْندٜ ندٜ اٛ وَرْتٛيْتَ؞ ⁹اَللَّه اٛ غَطٛووٛ کٛ اٛ وِعِ؞ کَنْکٛ نٛدِّعٛنْ نغَمْ شُمْڤٛوتِرٛنْ اٜ ٻِطّٛ مَاکٛ يٜىٰسُ اَلْمَسِيحُ جٛومِرَاوٛ مٜىٰطٜنْ؞

فٜىٰرٛوتِرْکِ ندٜرْ کَوْتَلْ تٛکُّٻٜ يٜىٰسُ

¹⁰اٜ مِ تٛرٛوعٛنْ بَنْدِرَاٻٜ نغَمْ اِنْدٜ جٛومِرَاوٛ مٜىٰطٜنْ يٜىٰسُ اَلْمَسِيحُ، اٛنْ فُو نجَٻٜىٰ کٛ مبِعٛتٛنْ وَرْتَ غٛعٛ نغَمْ تٛع طُمْ حٜٻَ فٜىٰرٛوتِرٛلْ حَکُّندٜ مٛوطٛنْ، اَمَّا ݧُمٛ مٛوطٛنْ اٜ ٻٜرْطٜ مٛوطٛنْ وَرْتَ غٛعٛ؞ ¹¹بَنْدِرَاٻٜ اَمْ، يِمْٻٜ وُرٛ کُلُووِ کٛکِّييَمْ حَبَرُ اٜ وٛودِ شِيَ فَمْفَمْتِرْکِ حَکُّندٜ مٛوطٛنْ؞ ¹²کٛ نغِطُمِ مِ وِعَ وٛنِ، غٛطّٛ مٛوطٛنْ اٜ وِعَ، ‏«‏مِنْ بُلُسْ تٛکُّمِ؞»‏ غٛطّٛ اٜ وِعَ، ‏«‏مِنْ اَفٛولٛسْ تٛکُّمِ،»‏ اٛنْ نِ اٜ وِعَ، ‏«‏مِنْ بِيتُرُسْ تٛکُّمِ؞»‏ اٛنْ طَاعٜ بٛو اٜ وِعَ، ‏«‏مِنْ اَلْمَسِيحُ تٛکُّمِ؞»‏ ¹³تٛو، اَلْمَسِيحُ اٜ سٜنْدِي وٛنْ طٛنْ؟ کٛو بُلُسْ وَرَا دٛوْ غَافَانغَلْ نغَمْ مٛوطٛنْ؟ کٛو اٜ اِنْدٜ بُلُسْ طُمْ وَطِرَنِعٛنْ بَڤْتِسْمَ؟

¹⁴مِ يٜتِّي اَللَّه ندٜ مِ وَطَنَايِ کٛو مٛيٜ مٛوطٛنْ بَڤْتِسْمَ سٜيْ نِ کِرِبُسْ اٜ غَايُسْ؞ ¹⁵نغَمْ نٛنْ، وَلَا بَاوَيْطٛ وِعَ طُمْ وَطَنِيعٛنْ بَڤْتِسْمَ ندٜرْ اِنْدٜ اَمْ؞ ¹⁶تٛو، طٛنْمَا مِ وَطَنِي يِمْٻٜ وُرٛ اِسْتِفَانُسْ بَڤْتِسْمَ؞ غَطَ ٻٜنْ طٛنْ مِ يٜجِّتِي تٛ مِ وَطَنِي غٛطّٛ بَڤْتِسْمَ؞ ¹⁷نغَمْ اَلْمَسِيحُ لِلَايِيَمْ نغَمْ مِ وَطَ بَڤْتِسْمَ، اَمَّا نغَمْ مِ وَعَجِنَ حَبَرُ بٜلْطُمْ؞ نَاع اٜ فَامُ نٜطّٛ نغَعَجِنِرَيْمِطُمْ، نغَمْ تٛع بَوْطٜ مَيْدٜ اَلْمَسِيحُ دٛوْ غَافَانغَلْ وَرْتِرٜىٰ مٜىٰرٜ؞

اَلْمَسِيحُ وٛنِ فَامُ اَللَّه اٜ بَوْطٜ اَللَّه

¹⁸حَبَرُ مَيْدٜ اَلْمَسِيحُ دٛوْ غَافَانغَلْ، طُمْ حَاݝٛورٜ تٛ يِمْٻٜ غٛنْٻٜ دٛوْ لَاوٛلْ حَلْکٜرٜ؞ اَمَّا تٛ مٜىٰطٜنْ اٜنٜنْ کِسْنَاٻٜ طُمْ بَوْطٜ اَللَّه؞ ¹⁹نغَمْ اَايَارٜ وِعِي،

‏«‏مِ لَلِّنَيْ فَامُ ݧُمٛوٻٜ اٜ نغٛودِ فَامُ؛

مِ وٛنَّيْ پٛيْرٜ ݧُمٛوٻٜ اٜ نغٛودِ پٛيْرٜ؞»‏

²⁰تٛو، تٛ غٛودُطٛ فَامُ وٛنِ؟ تٛ مٛودِبّٛ اَتَّوْرَ وٛنِ؟ تٛ بَوْطٛ غٜدِّ وٛنِ؟ نَاع اَللَّه وَرْتِرِي فَامُ دُونِيَارُ ندُعُ حَاݝٛورٜ؟

²¹نغَمْ اَللَّه ندٜرْ فَامُ مُوطُمْ سُٻِي تٛع يِمْٻٜ اَنْدَمٛ لَاوٛلْ فَامُ مَٻّٜ؞ اٛ نَنِي بٜلْطُمْ حِسْنُکِ کٛولِيٻٜ اَلْمَسِيحُ لَاوٛلْ وَعَجِنْکِ حَبَرُ بٜلْطُمْ طُمْ وٛٻّٜ نغِعَتَ طُمْ حَاݝٛورٜ؞ ²²يَحُودَنْکٛعٜنْ اٜ نغِطِ نغَطَنٜىٰ کٛ حَيْطِنِي کٛ ٻٜ نجَٻَ حَبَرُ طُعُمْ؞ يِمْٻٜ نَاع يَحُودَنْکٛعٜنْ بٛو اٜ نغِطِ مٜتِرَنٜىٰکِ اَنْدَلْ کٛ ٻٜ نجَٻَطُمْ؞ ²³مِنٛنْ بٛو، اٜ مِنْ نغَعَجِنَ اَلْمَسِيحُ بَرَاطٛ دٛوْ غَافَانغَلْ؞ تٛ يَحُودَنْکٛعٜنْ طُمْ حَالَ کَلُّکَ، تٛ يِمْٻٜ نَاع يَحُودَنْکٛعٜنْ بٛو طُمْ حَاݝٛورٜ؞ ²⁴اَمَّا تٛ يِمْٻٜ ٻٜ اَللَّه نٛدِّ، يَحُودَنْکٛعٜنْ اٜ نَاع يَحُودَنْکٛعٜنْ، اَلْمَسِيحُ اٛ بَوْطٜ اَللَّه اٜ فَامُ اَللَّه؞ ²⁵کٛ طُمْ يِعَتَ بٛ حَاݝٛورٜ اَللَّه وَطِي طُمْ ٻُرِي پٛيْرٜ نٜطّٛ؞ ندٜنْ کٛ طُمْ يِعَتَ بٛ اَللَّه تَمْڤِي، طُمْ ٻُرِي سٜمْبٜ نٜطّٛ سٜمْبٜ؞

²⁶بَنْدِرَاٻٜ، ݧُمٜىٰ نٛ مبَانٛوطٛنْ شَرٜلْ کٛ اَللَّه نٛدِّعٛنْ؞ سٜطَّ ندٜرْ مٛوطٛنْ نغٛودِ فَامُ اٜ يِيکِ يِمْٻٜ دُونِيَارُ؞ سٜطَّ ندٜرْ مٛوطٛنْ نغٛنِ اَنْدَنْٻٜ کٛو طُمٜ، ندٜنْ سٜطَّ ندٜرْ مٛوطٛنْ نغٛودِ دَݧٛوٻٜ لَامِيٻٜ؞ ²⁷اَمَّا اَللَّه سُٻِي کٛ يِمْٻٜ دُونِيَارُ ندُعُ نغِعَتَ طُمْ حَاݝٛورٜ، نغَمْ اٛ سٜمْتِنَ غٛودُٻٜ فَامُ اِرِ طُمْ دُونِيَارُ ندُعُ؞ اَللَّه سُٻِي کٛ يِمْٻٜ نغِعَتَ بٛ طُمْ تَمْڤُطُمْ ندٜرْ دُونِيَارُ ندُعُ نغَمْ اٛ سٜمْتِنَ غٛودُٻٜ لَامُ؞ ²⁸کٛ يِمْٻٜ نجَوَنْتَ، اٜ کٛ ٻٜ کٛشِّ وَلَا کٛ طُمْ وَطٜتٜىٰ ندٜرْ دُونِيَارُ، اٜ کٛ ٻٜ کٛشِّ نَاع طُمْ غٛطُّمْ، کَنْجُمْ اَللَّه سُٻِ حُوتِرَ نغَمْ لَلِّنَ کٛ يِمْٻٜ نغِعَتَ اٜ طُمْ وٛودِ دَرَجَ؞ ²⁹اَللَّه وَطِي نٛنْ نغَمْ تٛع غٛطّٛ نٜطّٛ مَوْنِنَ حٛورٜ مُوطُمْ يٜىٰسٛ مَاکٛ؞ ³⁰اٛ وَرْتِرِيعٛنْ ٻٜ يٜىٰسُ اَلْمَسِيحُ؞ اَللَّه وَرْتِرِيمٛ فَامُ مٜىٰطٜنْ؞ لَاوٛلْ مَاکٛ طُمْ وَرْتِرِعٜنْ اَادِلِعٜنْ، شٜنِيٻٜ، رِمْطِنَاٻٜ؞ ³¹نغَمْ نٛنْ، نٛنْ نٛ طُمْ وِنْدِرَا، ‏«‏فُو مَنْتِتٛتٛوطٛ، اٛ مَنْتِتٛرٛو جٛومِرَاوٛ؞»‏

حَبَرُ اَلْمَسِيحُ بَرَاطٛ دٛوْ غَافَانغَلْ

¹بَنْدِرَاٻٜ، شَرٜلْ کٛ نغَرْمِ تٛ مٛوطٛنْ اٜ مِ وَعَجِنَ سِرُّ اَللَّه، مِ حُوتِرَايِ بٛلِيطٜ لُغُّطٜ کٛو حٛلُّکِ اَنْدَلْ؞ ²شَرٜلْ کٛ نغٛنْدُنٛومِ اٜ مٛوطٛنْ، مِ سُٻِي ندٜرْ ٻٜرْندٜ اَمْ مِ مٜتَتَا دٛوْ کٛو طُمٜ، سٜيْ دٛوْ حَبَرُ يٜىٰسُ اَلْمَسِيحُ مٛ طُمْ وَرِ دٛوْ غَافَانغَلْ؞ ³مِ وَرِي تٛ مٛوطٛنْ مِ سٜمْبِطَا، اٜ مِ دِوْنَ نغَمْ کُلٛلْ؞ ⁴ندٜرْ کٛ مبِيمِ اٜ کٛ نغَعَجِنْمِ مِ حُوتِرَايِ فَامُ لُغُّطُمْ کٛو بٜلْطُمْ حَالَ نغَمْ نجَٻٛنْ کٛ مبِيمِ، اَمَّا بَوْطٜ رُوحُ اَللَّه تَبِّتِنَنِيعٛنْ طُمْ غٛونغَ؞ ⁵مِ وَطُ نٛنْ نغَمْ تٛع حٛولَاکِ کِ کٛولِيطٛنْ يٜىٰسُ دَرٛو دٛوْ فَامُ يِمْٻٜ، سٜيْ نِ دٛوْ بَوْطٜ اَللَّه؞

فَامُ پِوٛيْطُمْ تٛ اَللَّه

⁶فُو اٜ نٛنْ، تٛ اٜ مِنْ مٜتَنَ کٜىٰوُٻٜ ندٜرْ حٛولَاکِ يٜىٰسُ، اٜ مِنْ مٜتِرَ فَامُ، اَمَّا نَاع اِرِ فَامُ طُمْ جَامَنُ طُعُمْ، کٛو فَامُ لَامٛتٛوٻٜ جَامَنُ طُعُمْ ٻٜ لَامُ دٜعٛوجُمْ؞ ⁷اَمَّا اٜ مِنْ مٜتَ دٛوْ فَامُ اَللَّه طُمْ سِرُّ شُوطِيطُمْ ندٜنّٛ، طُمْ اَللَّه سِرْيَنِيعٜنْ کٛ دُونِيَارُ تَغٜىٰ نغَمْ تٜدِّنْکِعٜنْ؞ ⁸ندٜرْ لَامٛتٛوٻٜ جَامَنُ طُعُمْ وَلَا ڤَامُطٛ طُعُمْ؞ نغَمْ دَا ٻٜ ڤَامِينٛطُمْ، دَا ٻٜ مبَرَايِ جٛومِرَاوٛ جٛومُ مَنْغُ دٛوْ غَافَانغَلْ؞ ⁹اَمَّا نٛنْ نٛ طُمْ وِنْدِرَا،

‏«‏کٛ حِتٜرٜ مٜىٰطَايِ يِيکِ، کٛ نٛوْرُ مٜىٰطَايِ نَنْکِ،

کٛ نٜطّٛ مٜىٰطَايِ ݧُمُکِ،

کَنْجُمْ اَللَّه سِرْيَنِي يِطُٻٜمٛ؞»‏

¹⁰اَمَّا اَللَّه حٛلِّيعٜنْطُمْ لَاوٛلْ رُوحُ مَاکٛ؞ نغَمْ رُوحُ مَاکٛ اٜ اَنْدِ کٛو طُمٜ حَا اٜ سِرُّ مَاکٛ لُغُّطُمْ؞ ¹¹مٛيٜ ندٜرْ يِمْٻٜ اَنْدَتَ کٛ وٛنِ ندٜرْ ٻٜرْندٜ نٜطّٛ تٛ نَاع نٜطّٛ اٛنْ؟ نٛنْ مَا، وَلَا اَنْدُطٛ ݧُمٛ اَللَّه سٜيْ نِ رُوحُ اَللَّه؞ ¹²رُوحُ طُمْ کٜٻُطٜنْ، نَاع تٛ دُونِيَارُ طُمْ پِوٛيِ؛ تٛ اَللَّه طُمْ پِوٛيِ، نغَمْ اَندٜنْ شَاحُ طُمْ اٛ حٛکِّعٜنْ؞

¹³اٜ مِنْ مٜتَ دٛوْ طُعُمْ نَاع ندٜرْ حَالَ کَ فَامُ نٜطّٛ اٜکِّتَتَ، سٜيْ نِ ندٜرْ حَالَ کَ رُوحُ اَللَّه اٜکِّتِنِمِنْ؞ اٜ مِنْ اٜکِّتِنَ غٛودُٻٜ رُوحُ اَللَّه دٛوْ غٛونغَ اَللَّه؞ ¹⁴نٜطّٛ مٛ وَلَا رُوحُ اَللَّه، اٛ جَٻَتَا کٛ پِوٛيِ تٛ رُوحُ اَللَّه، نغَمْ تٛ مَاکٛ طُمْ حَاݝٛورٜ؞ اٛ وَاوَتَا اٛ فَامَطُمْ نغَمْ اٛ وَلَا رُوحُ اَللَّه؞ ¹⁵غٛودُطٛ رُوحُ اَللَّه بٛو وَاوَيْ فَامُکِ کٛو طُمٜ کٛ رُوحُ اَللَّه اٜکِّتَتَ؞ اَمَّا مٛ وَلَا رُوحُ اَللَّه فَامَتَا ݧُمٛ غٛودُطٛ رُوحُ اَللَّه؞ ¹⁶نٛ اَايَارٜ وِعِ،

‏«‏مٛيٜ مٜىٰطِ اَنْدُکِ ݧُمٛ جٛومِرَاوٛ

نغَمْ اٜکِّتِنَمٛ؟»‏

اَمَّا اٜنٜنْ اٜنْ ڤَامَيْ فِي طُعُمْ نغَمْ اٜنْ ݧُمَ نٛ اَلْمَسِيحُ ݧُمِرْتَ؞

مَشُّٻٜ اَللَّه

¹بَنْدِرَاٻٜ، مِنْ مِ وَاوَايِ مٜتَنْکِعٛنْ نٛ مٜتِرَنَيْمِ کٜىٰوُٻٜ ندٜرْ حٛولَاکِ يٜىٰسُ؞ سٜيْ نِ مِ مٜتِرَنِيعٛنْ نٛ مٜتِرَنَيْمِ يِمْٻٜ دُونِيَارُ ندُعُ، کٛو بٛو نٛ مٜتِرَنَيْمِ ٻِکّٛيْ ڤَمَرٛيْ، وَاتٛ تٛکُّٻٜ يٜىٰسُ حٜسْٻٜ؞ ²طُمْ حٛکَّتَا ٻِنْغٜلْ کٜشّٜلْ ݧَمْندُ شٜمْبِنْدُ؞ نٛنْ مِنْ مَا مِ حٛکَّايِعٛنْ ݧَمْندُ شٜمْبِنْدُ، وَاتٛ اٜکِّتِنٛلْ لُغُّنغٛلْ؞ اَمَّا مِ حٛکِّيعٛنْ اٜنْطَمْ، وَاتٛ اٜکِّتِنٛلْ نغٛلْ لُغَّا نغَمْ اٛنْ کٜوْتَايِ ݧَامُکِ ݧَمْندُ شٜمْبِنْدُ؞ غٛونغَ، حَا جٛونِ اٛنْ کٜوْتَايِ ݧَامُکِندُ؞ ³نغَمْ حَا جٛونِ اٛنْ نغَطَ جٛنْدٜ اِرِ ندٜ يِمْٻٜ دُونِيَارُ؞ تٛ نِ اٜ وٛودِ لَوْلِيرُ اٜ غٜدِّ حَکُّندٜ مٛوطٛنْ، تٛو، حَا جٛونِ دُونِيَارُ جٜيِعٛنْ، اٛنْ کُوَ کُوطٜ اِرِ طٜ دُونِيَارُ ندُعُ؞ ⁴نغَمْ تٛ غٛطّٛ وِعِي، ‏«‏بُلُسْ تٛکُّمِ،»‏ اٛنْ نِي بٛو وِعِي، ‏«‏اَفٛولٛسْ تٛکُّمِ،»‏ تٛو، نَاع اٛنْ نغَطَ جٛنْدٜ اِرِ ندٜ يِمْٻٜ دُونِيَارُ ندُعُ وٛنْ طٛنْ؟

⁵تٛو، مٛيٜ وٛنِ اَفٛولٛسْ؟ مٛيٜ وٛنِ بُلُسْ؟ مِنْ مَشُّٻٜ اَللَّه تَنْ؞ لَاوٛلْ اَمِنْ کٛولِيطٛنْ يٜىٰسُ اَلْمَسِيحُ؞ کٛو مٛيٜ اَمِنْ اٜ حُوَ کُوغَلْ نغَلْ جٛومِرَاوٛ حٛکِّمٛ اٛ حُوَ؞ ⁶مِنْ مِ اَاوِي، اَفٛولٛسْ بٛو يَرْنِي اَوْرٜ ندٜنْ، اَمَّا اَللَّه وٛنِ مَوْنِنْطٛندٜ؞ ⁷نغَمْ نٛنْ، اٜ اَاوُطٛ اٛنْ اٜ جَرْنُطٛ اٛنْ نَاع ٻٜ غٛطُّمْ، اَمَّا اَللَّه تَنْ وٛنِ مَوْطٛ، نغَمْ کَنْکٛ وٛنِ مَوْنِنْطٛ اَوْرٜ ندٜنْ؞ ⁸اٜ اَاوُطٛ اٜ جَرْنُطٛ ٻٜ کُودٛوٻٜ؞ کٛو مٛيٜ حٜٻَيْ مبَرْجَارِ کٛ فٛتِّدِ اٜ کُوغَلْ مُوطُمْ؞ ⁹نغَمْ مِنٛنْ، مِنْ کُودٛوٻٜ اٜ اَللَّه؞ اٛنٛنْ بٛو اٛنْ نغٜسَ مَاکٛ، مَادِ مَاکٛ؞

¹⁰بَرْکَ دٛکَّلْ نغَلْ اَللَّه حٛکِّيَمْ، مِ فُطِّي مَادِ بٛ مَحٛووٛ بَوْطٛ مَادِ نَاع سٜطَّ؞ مِ فُطِّ مَادِي، ندٜنْ غٛطّٛ اٜ مَحَ دٛوْ فُطّٛودٜ ندٜنْ؞ اَمَّا کٛو مٛيٜ مَحٛووٛ دٛوْ فُطّٛودٜ ندٜنْ اٛ فَامَ اِرِ مَحُکِ کِ اٛ مَحَتَ؞ ¹¹نغَمْ وَلَا غٛطّٛ بَاوَيْطٛ فُطَّ وٛنْدٜ فُطّٛودٜ مَادِ فٜىٰرٜ ٻُرْندٜ ندٜ طُمْ فُطِّ، وَاتٛ يٜىٰسُ اَلْمَسِيحُ؞ ¹²تٛ غٛطّٛ مَحِي دٛوْ فُطّٛودٜ ندٜنْ، تٛ اٛ حُوتِرِي جِينَارِ، کٛو اَجُرْفَارِ، کٛو کَاپٜ غٛودُطٜ شٜىٰدٜ، کٛو لٜطّٜ، کٛو غٜىٰنٜ، کٛو پٛمْبٜ، ¹³وٛوطُکِ کُوغَلْ مَاکٛ وُرْتٛتٛ اٜ نجَيْرِ ݧَلْندٜ جَانغٛ؞ اٜ ندٜنْ طٛنْ ݧَلْندٜ حِيتٜ وَنْغِنَيْ کُوغَلْ کٛو مٛيٜ، نغٜ فٛوندَيْ کُوغَلْ نغَلْ نغٜ حٛلَّ نٛ نغَلْ وٛنْتِندِرِ؞ ¹⁴تٛ بٛو مَادِ ندِ اٛ مَحِ وُلَايِ، اٛ حٜٻَيْ مبَرْجَارِ مبٛنْدِ؞ ¹⁵تٛ مَادِ ندِنْ وُلِي، اٛ دُلَّيْ مبَرْجَارِ مَاکٛ، کٛو ندٜ اٛ حٜٻَيْ کِسْندَمْ، اَمَّا بٛ ندٜرْ حِيتٜ اٛ پِوِ؞

¹⁶اٛنْ اَنْدَا ٻَلِّ مٛوطٛنْ طُمْ وُرٛ تٛ اَللَّه جٛوطٛتٛو، ندٜنْ رُوحُ اَللَّه اٜ جٛوطٛو ندٜرْ ٻٜرْطٜ مٛوطٛنْ؟ ¹⁷فُو بٛنُّطٛ وُرٛ اَللَّه، اَللَّه حَلْکَيْمٛ؞ نغَمْ وُرٛ اَللَّه نغٛ شٜنِينغٛ؛ اٛنٛنْ بٛو نغٛنِ وُرٛ مَاکٛ نغٛنْ؞

¹⁸تٛع غٛطّٛ پٛيْرَ حٛورٜ مُوطُمْ؞ تٛ غٛطّٛ مٛوطٛنْ اٜ ݧُمَ اٜ وٛودِ فَامُ نٛ جَامَنُ طُعُمْ حٛشِّرِ فَامُ، سٜيْ اٛ وَرْتِرَ حٛورٜ مَاکٛ بٛ کَاݝَاطٛ، نغَمْ اٛ وَرْتَ غٛودُطٛ فَامُ طُمْ غٛونغَ؞ ¹⁹نغَمْ فَامُ اِرِ طُمْ دُونِيَارُ ندُعُ، يٜىٰسٛ اَللَّه طُمْ حَاݝٛورٜ؞ نٛنْ نٛ طُمْ وِنْدِرَا، ‏«‏اَللَّه اٜ نَنْغَ غٛودُٻٜ فَامُ ندٜرْ دَبَرٜ مَٻّٜ؞»‏ ²⁰طٛنْمَا وٛنْدٜ اَايَارٜ وِعِي، ‏«‏جٛومِرَاوٛ اٜ اَنْدِ ݧُمٛ غٛودُٻٜ فَامُ وَلَا کٛ نَفِ؞»‏ ²¹نغَمْ نٛنْ، تٛع نٜطّٛ مَنْتٛرٛو نٜطّٛ!‏ نغَمْ کٛو طُمٜ اٛنٛنْ نجٜيِطُمْ؞ ²²کٛو بُلُسْ، کٛو اَفٛولٛسْ، کٛو بِيتُرُسْ، کٛو دُونِيَارُ، کٛو يٛنْکِ، کٛو مَيْدٜ، کٛو کٛ وٛنِ جٛونِ، کٛو کٛ وٛنِ يٜىٰسٛ طٛعٛ، طُمْ فُو اُمْ طُمْ مٛوطٛنْ؞ ²³اٛنٛنْ بٛو طُمْ ٻٜ اَلْمَسِيحُ؞ اَلْمَسِيحُ بٛو طُمْ مٛ اَللَّه؞

لِلَاٻٜ اَلْمَسِيحُ

¹کٛشّٜىٰمِنْ مِنْ مَشُّٻٜ اَلْمَسِيحُ ٻٜ اَللَّه حٛکِّ کُوغَلْ وَعَجِنْکِ سِرُّ مَاکٛ؞ ²فِي غٛعٛ کٛ طُمْ يِطِ تٛ اِرِ ٻٜنْ طٛنْ مَشُّٻٜ ٻٜ نغَطَ کٛو طُمٜ کٛ جٜيْطٛٻٜ وِعِ؞ ³اَمَّا مِ وَنَّايِ دٛوْ نٛ نغِيرٛتٛنْ کُوغَلْ اَمْ، کٛو بٛو نٛ وٛٻّٜ نغِيرَتَنغَلْ؞ مِنْ اٜ حٛورٜ اَمْ مِ فٛوندَتَا حٛورٜ اَمْ؞ ⁴ٻٜرْندٜ اَمْ اٜ رَنِّ تَرْ، اَمَّا نٛنْ حٛلَّايِ مِ وَطَايِ غٛطُّمْ کٛ وٛوطَا؞ جٛومِرَاوٛ وٛنِ دَارَيْطٛ کُوغَلْ اَمْ وِعَ کٛو کٛ نغَطُمِ اٜ وٛوطِ کٛو طُمْ وٛوطَا؞ ⁵نغَمْ نٛنْ، تٛع اٛنْ مبِعُ غٛطّٛ وَطِي کُوغَلْ نغَلْ اَللَّه حٛکِّمٛ بٛطُّمْ، کٛو اٛ وَطَايِنغَلْ بٛطُّمْ؞ کٜطٜىٰ نَا ݧَلْندٜ ندٜ جٛومِرَاوٛ وَرْتِ؞ کٛو طُمٜ شُوطِيطُمْ ندٜرْ ݧِوْرٜ اٛ وُرْتِنَيْطُمْ اٜ نجَيْرِ، ندٜنْ اٛ وُرْتِنَيْ ݧُمٛوجِ غٛنْطِ ندٜرْ ٻٜرْطٜ يِمْٻٜ اٜ نجَيْرِ؞ اٜ شَرٜلْ نغٜلْ اَللَّه وِعَيْ کٛو نٜطّٛ وَطِي کُوغَلْ نغَلْ اٛ حٛکِّمٛ بٛطُّمْ کٛو وَطَايِنغَلْ بٛطُّمْ؞

⁶تٛو، بَنْدِرَاٻٜ، مِ حٛکُّ مِسَالُ طُعُمْ دٛوْ اَمْ اٜ دٛوْ اَفٛولٛسْ نغَمْ اٜ مِ يِطِ اٜکِّتٛوطٛنْ تٛ اَمِنْ:‏ تٛع پَٻّٛوطٛنْ کٛ وِنْدَا، نغَمْ تٛع ڤِيٛنْ غَبَارٜ مبِعٛنْ غٛطّٛ اَرْدِيطٛ ٻُرِي غٛطّٛ؞ ⁷مٛيٜ وَرْتِرْمَا مَوْطٛ دٛوْ حٛرِيٻٜ؟ کٛو طُمٜ طُمْ نغٛودُطَا نَاع اَللَّه حٛکُّمَاطُمْ؟ تٛ طُمْ نٛنْ، نغَمْ طُمٜ اَ فِيَ غَبَارٜ مَاطَ بٛ کٛ نغٛودُطَا نَاع شَاحُ کٜٻُطَاطُمْ؟

⁸اٛنْ نغِعَ بٛ اٛنْ نجَادَکٜ اٛنْ کٜٻِي کٛ نغِطّٛنْ!‏ اٛنْ نغِعَ بٛ اٛنْ نجَادَکٜ اٛنْ نغَرْتِي دِسْکُٻٜ!‏ اٛنْ نغِعَ بٛ اٛنْ نغَرْتِي لَامِيٻٜ، کٛو ندٜ مِنٛنْ نَاع مِنْ لَامِيٻٜ؞ دَا اٛنْ نغَرْتِي لَامِيٻٜ دَا وٛوطِي، سٜيْ لَامٛدٛوطٜنْ!‏ ⁹نغَمْ اٜ يِيکِ اَمْ مِنٛنْ لِلَاٻٜ، اَللَّه وَرْتِرِيمِنْ يِمْٻٜ کٛشَّاٻٜ نَاع ٻٜ غٛطُّمْ، بٛ يِمْٻٜ ٻٜ طُمْ تَپَنِ کِيتَ مَيْدٜ بَرٜتٜىٰٻٜ يٜىٰسٛ کٛو مٛيٜ؞ مِ وِعُ نٛنْ نغَمْ مِنْ نغَرْتِي کٛ مَلَاعِکَعٜنْ اٜ يِمْٻٜ فُو نغَطَنِ غِتٜ؞ ¹⁰تٛو، مِنٛنْ مِنْ حَاݝَاٻٜ نغَمْ اٜ مِنْ تٛکِّ اَلْمَسِيحُ، اَمَّا اٛنٛنْ اٛنْ تٛکُّٻٜ اَلْمَسِيحُ غٛودُٻٜ فَامُ؞ مِنٛنْ مِنْ نغَلَا بَوْطٜ اَللَّه، اَمَّا اٛنٛنْ اٛنْ نغِعَ بٛ اٛنْ نغٛودِ بَوْطٜ اَللَّه نَاع سٜطَّ!‏ يِمْٻٜ اٜ کٛکَّعٛنْ مَنْغُ، اَمَّا مِنٛنْ يِمْٻٜ اٜ نجَوَنَمِنْ؞ ¹¹حَا جٛونِ اٜ مِنْ ڤِيدَ اٜ وٜىٰلٛ اٜ طٛنْکَ؞ مِنْ نغَلَا کٛلْتٜ بٛطّٜ؞ يِمْٻٜ اٜ کَلَّنَمِنْ، ندٜنْ مِنْ نغَلَا وُرٛ؞ ¹²اٜ مِنْ کُوَ اٜ جُوطٜ اَمِنْ نَاع سٜطَّ؞ تٛ يِمْٻٜ کُطِيمِنْ، سٜيْ مِنْ مبَرْکِطِنَٻٜ؞ تٛ ٻٜ تٛرِّيمِنْ، سٜيْ مِنْ مُݧَ؞ ¹³تٛ يِمْٻٜ مٜتِي حَالَ کَلُّکَ دٛوْ اَمِنْ، سٜيْ مِنْ مٜتَنَٻٜ حَالَ مبٜلْکَ؞ مِنْ نغَرْتِي مبُورِ دُونِيَارُ، مِنْ نغَرْتِي کٛ نٜفْنِي؞ حَا جٛونِ نٛنْ طُمْ وٛنِ؞

¹⁴مِ وِنْدَنْعٛنْ طٜرٜوٛلْ نغٛعٛلْ نَاع نغَمْ مِ سٜمْتِنَعٛنْ، سٜيْ نِ نغَمْ مِ وَغِّنَعٛنْ نغَمْ اٛنْ ٻِٻّٜ اَمْ ٻٜ نغِطُمِ؞ ¹⁵کٛو دَا اٛنْ نغٛودِ مٛودِٻّٜ 10,000 ندٜرْ تٛکُّکِ اَلْمَسِيحُ، اٛنْ نغَلَا دَݧٛوٻٜ طُطْٻٜ؞ غٛونغَ، مِ وَرْتِي ݧَاکٛ مٛوطٛنْ ندٜرْ تٛکُّکِ يٜىٰسُ اَلْمَسِيحُ ندٜ نغَعَجِنَنْمِعٛنْ حَبَرُ بٜلْطُمْ؞ ¹⁶نغَمْ نٛنْ، اٜ مِ تٛرٛوعٛنْ، اٜکِّتٜىٰ اِرِ نغِکُّ اَمْ؞ ¹⁷کَنْجُمْ وَطِ لِلٛنٛيْمِعٛنْ تِمٛوتِ، ٻِطّٛ اَمْ مٛ نغِطُمِ، تٛکُّطٛ جٛومِرَاوٛ اٜ غٛونغَ؞ اٛ سِفْتٛرَنَيْعٛنْ اِرِ جٛنْدٜ ندٜ نغَطُمِ ندٜرْ تٛکُّکِ يٜىٰسُ اَلْمَسِيحُ؞ اٜ مِ اٜکِّتِنَ اِرِ جٛنْدٜ ندٜنْ کٛو تٛيٜ ندٜرْ تٛکُّٻٜ يٜىٰسُ؞

¹⁸وٛٻّٜ ندٜرْ مٛوطٛنْ اٜ پٜفْتَ کٛعٜ نغَمْ اٜ ٻٜ کَمّٛو مِ وَرَتَا تٛ مٛوطٛنْ؞ ¹⁹اَمَّا تٛ جٛومِرَاوٛ جَٻِي مِ وَرٛيَيْ تٛ مٛوطٛنْ نَاع کٛ نٜىٰٻِ، مِ طَٻِّتَيْ مِ يِعَ اِرِ بَوْطٜ طٜ ٻٜنْ طٛنْ پٜفْتٛوٻٜ کٛعٜ نغٛودِ، نَاع مٜتٜ‑مٜتٜ مَٻّٜ تَنْ؞ ²⁰نغَمْ کٛ حٛلَّتَ نٜطّٛ اٜ وَطَ کٛ اَللَّه لَامِيطٛ وِعِ، نَاع طُمْ بٛلِيطٜ مَاکٛ، اَمَّا طُمْ بَوْطٜ رُوحُ اَللَّه غٛنْطٜ ندٜرْ مَاکٛ؞ ²¹تٛو، طُمٜ ٻُرْطٛنْ يِطُکِ؟ مِ وَرْدَنَعٛنْ اٜ سَوْرُ، کٛو مِ وَرَنَعٛنْ ندٜرْ يِدّٜ اٜ مُݧَلْ؟

شٜنْدِرٜىٰ اٜ حَکّٜ

¹مِ نَنِي حَبَرُ اٜ وٛودِ نجٜىٰنُ کَلُّطُمْ حَکُّندٜ مٛوطٛنْ اِرِ نجٜىٰنُ طُمْ وَطَتَاکٜ کٛو ندٜرْ حٜىٰفٜرْٻٜ، حَا نٜطّٛ اٜ وَلْدَ اٜ دٜبّٛ ݧَاکٛ مُوطُمْ!‏ ²فُو اٜ نٛنْ اٛنْ مَنْتٛرٛو کَوْتَلْ مٛوطٛنْ!‏ نَاع اٜ حَانِ نغَنّٛنْ حَا مبُرْتِنٛنْ غَطُطٛ کُوغَلْ نغَعَلْ دَغَ ندٜرْ کَوْتَلْ مٛوطٛنْ؟ ^3‏-4کٛو ندٜ مِ وٛنْدَا اٜ مٛوطٛنْ ندٜرْ ٻَنْدُ، اٜ مِ ݧُمَ دٛوْ مٛوطٛنْ ندٜرْ ٻٜرْندٜ اَمْ؞ بَرْکَ لَامُ طُمْ يٜىٰسُ جٛومِرَاوٛ مٜىٰطٜنْ حٛکِّيَمْ، مِ يَادَکٜ مِ تَپَنِي نٜطّٛ غَطُطٛ نٛنْ کِيتَ بٛ اٜ مِ وٛنْدِ اٜ مٛوطٛنْ؞ تٛ اٛنْ کَوْرِتِي، بَوْطٜ يٜىٰسُ جٛومِرَاوٛ مٜىٰطٜنْ اٜ وٛنْدِ اٜ مٛوطٛنْ، مِنْ مَا، بٛ اٜ مِ وٛنْدِ اٜ مٛوطٛنْ؞ ⁵سٜيْ نغَطٛنْ نٜطّٛ غَطُطٛ نٛنْ ندٜرْ جُنْغٛ شٜيْطَنْ، نغَمْ شٜيْطَنْ تٛرَّ ٻَنْدُ مَاکٛ، نغَمْ طُمْ حِسْنَ يٛنْکِ مَاکٛ ݧَلْندٜ وَرْتٛيْکِ يٜىٰسُ جٛومِرَاوٛ؞

⁶مَنْتِتَاکِ مٛوطٛنْ وٛوطَا؞ اٛنْ اَنْدَا نٛ پُوفِنِرْطُمْ سٜطَّ ٻُوتِنِرْتَ شٛنْدِ بُرٛودِ طُنْدِ؟ نٛنْ تٛ اٛنْ اَلِي حَکّٜ سٜطَّ ندٜرْ مٛوطٛنْ، طُمْ سَنْکِتٛتٛ کٛو تٛيٜ ندٜرْ مٛوطٛنْ؞ ⁷شٜنْدِرٜىٰ اٜ پُوفِنِرْطُمْ کِيطُمْ غٛنْطُمْ ندٜرْ مٛوطٛنْ، وَاتٛ حَکّٜ، نغَمْ نغَرْتٛنْ بٛ شٛنْدِ بُرٛودِ ندِ وَلَا پُوفِنِرْطُمْ، وَاتٛ کَوْتَلْ تٛکُّٻٜ يٜىٰسُ ٻٜ نغَلَا يِمْٻٜ غَݧُٻٜ تُوبَ دَغَ حَکّٜ مَٻّٜ، نٛنْ نٛ نغٛنْتِندِرْطٛنْ؞ نغَمْ طُمْ يَادَکٜ طُمْ حِرْسِي کَرٛورِ مٜىٰطٜنْ ندِ حُمْتٛ سَکِّنْکِ؞ کَيْرِ وٛنِ اَلْمَسِيحُ؞ ⁸نغَمْ نٛنْ، اٜنْ نغَطُ حُمْتٛ سَکِّنْکِ مٜىٰطٜنْ نَاع اٜ بُرٛودِ غٛودُطُمْ پُوفِنِرْطُمْ کِيطُمْ طُمْ حَلّٜىٰندٜ اٜ کُوطٜ کَلُّطٜ، سٜيْ نِ اٜ بُرٛودِ طُمْ وَلَا پُوفِنِرْطُمْ، وَاتٛ اٜنْ نغَطُ جٛنْدٜ لَمْندٜ ندٜ غٛونغَ؞

⁹ندٜرْ طٜرٜوٛلْ اَمْ مِ وِنْدَنِيعٛنْ وِيکِ، تٛع اٛنْ کَوْتُ کٛعٜ مٛوطٛنْ اٜ غَطٛوٻٜ نجٜىٰنُ؞ ¹⁰نَاع اٜ مِ مٜتَ دٛوْ يِمْٻٜ ٻٜ دُونِيَارُ ندُعُ غَطٛوٻٜ نجٜىٰنُ، کٛو غٛودُٻٜ سُونٛ شٜىٰدٜ، کٛو وُيْٻٜ، کٛو مَوْنِنٛوٻٜ غُنْکِيجِ؞ نغَمْ تٛ نِ مِ وِعِيعٛنْ، تٛع کَوْتٛنْ کٛعٜ اٜ اِرِ يِمْٻٜ ٻٜعٜ، تٛو، سٜيْ نِ اَلٛنْ دُونِيَارُ؞ ¹¹اَمَّا جٛونِ اٜ مِ وِنْدَنَعٛنْ وِيکِ، تٛع اٛنْ کَوْتُ کٛعٜ اٜ کٛو مٛيٜ نٛدّٜتٜىٰطٛ تٛکُّطٛ يٜىٰسُ، ݧَمْرُطٛ يٜىٰسٛ اٜ وَطُکِ نجٜىٰنُ، کٛو غٛودُطٛ سُونٛ شٜىٰدٜ، کٛو مَوْنِنٛووٛ غُنْکِيجِ، کٛو مٜتٛووٛ کَلُّکَ دٛوْ غٛطّٛ، کٛو جَرٛووٛ، کٛو غُجّٛ؞ تٛع مَا اٛنْ ݧَمْدُ اٜ اِرِ مَٻّٜ؞

¹²نَاع طُمْ کُوغَلْ مٜىٰطٜنْ نغَطَنٜنْ يِمْٻٜ ٻٜ تٛکَّايِ يٜىٰسُ کِيتَ؞ کُوغَلْ مٛوطٛنْ وٛنِ نغَطَنٛنْ غٛنْٻٜ ندٜرْ کَوْتَلْ مٛوطٛنْ نغَلْ تٛکُّٻٜ يٜىٰسُ کِيتَ؞ ¹³اَللَّه وٛنِ غَطَنَيْطٛ يِمْٻٜ ٻٜ تٛکَّايِ يٜىٰسُ کِيتَ؞ نٛ اَايَارٜ وِعِ، ‏«‏اٛنٛنْ، ندِيوٜىٰ غَطٛووٛ کٛ حَلِّ دَغَ ندٜرْ مٛوطٛنْ؞»‏

تٛع کٛولِيٻٜ يٜىٰسُ نغُلّٛوتِرَ

¹تٛ غٛطّٛ مٛوطٛنْ وُلّٛيْتٛ غٛطّٛ تٛکُّطٛ يٜىٰسُ، نَاع طُمْ شٜمْتِنِيطُمْ اٛ وُلّٛيٛومٛ تٛ ٻٜ تٛکَّايِ يٜىٰسُ؟ نَاع اٜ حَانِ اٛ وُلّٛيٛومٛ تٛ تٛکُّٻٜ يٜىٰسُ؟ ²اٛنْ اَنْدَا ݧَلْندٜ غٛعٛ يِمْٻٜ اَللَّه نغَطَنَيْ دُونِيَارُ کِيتَ؟ تٛ طُمْ اٛنٛنْ نغَطَنْتَ دُونِيَارُ کِيتَ، نغَمْ طُمٜ اٛنْ مبَاوَتَا نغَطَنٛنْ يِمْٻٜ کِيتَ دٛوْ شَطُّمْ ڤَمَرُمْ؟ ³اٛنْ اَنْدَا اٜنْ نغَطَنَيْ مَلَاعِکَعٜنْ کِيتَ؟ تٛ طُمْ نٛنْ، اٛنْ مبَاوَيْ شِرْيٛوتِرٛنْ شِيَ فَمْفَمْتِرْکِ حَکُّندٜ يِمْٻٜ!‏ ⁴نغَمْ نٛنْ، تٛ اٛنْ نغٛودِ شِيَ فَمْفَمْتِرْکِ، نغَمْ طُمٜ نجَارٛتٛنْطُمْ تٛ يِمْٻٜ ٻٜ تٛکُّٻٜ يٜىٰسُ کٛشِّ نَاع ٻٜ غٛطُّمْ؟ ⁵مِ وِعُ نٛنْ نغَمْ مِ سٜمْتِنَعٛنْ؞ جٛونِ، وَلَا کٛو غٛعٛتٛ ندٜرْ مٛوطٛنْ غٛودُطٛ فَامُ بَاوَيْطٛ سِرْيٛوتِرَ کٛولِيٻٜ يٜىٰسُ؟ ⁶اَمَّا کٛولِيطٛ يٜىٰسُ وُلّٛيٛو کٛولِيطٛ يٜىٰسُ، حَا يٜىٰسٛ ٻٜ کٛولَاکِ يٜىٰسُ!‏

⁷وُلّٛوتِرْکِ حَکُّندٜ مٛوطٛنْ طُمْ شٜمْتِنِيطُمْ؞ نَاع طُمْ ٻُرِي مُݧٛنْ تٛ يِمْٻٜ نغَطَنِيعٛنْ کٛ وٛوطَا؟ نَاع طُمْ ٻُرِي مُݧٛنْ تٛ طُمْ پٛيْرِيعٛنْ طُمْ جَٻَنِيعٛنْ کٛ نغٛودُطٛنْ؟ ⁸اَمَّا اٛنٛنْ اٜ کٛعٜ مٛوطٛنْ حَا اٛنْ نغَطَنَ وٛٻّٜ تٛکُّٻٜ يٜىٰسُ کٛ وٛوطَا اٛنْ پٛيْرَٻٜ اٛنْ نجَٻَنَٻٜ کٛ ٻٜ نغٛودِ!‏ ⁹اٛنْ اَنْدَا غَطٛوٻٜ کٛ وٛوطَا نَتَّتَا لَامُ اَللَّه؟ تٛع اٛنْ نجَٻُ طُمْ مَجِّنَعٛنْ؞ غَطٛوٻٜ نجٜىٰنُ، کٛو اٜ ٻٜ نغٛودِ تٜىٰغَلْ کٛو ٻٜ نغَلَا تٜىٰغَلْ، اٜ مَوْنِنٛوٻٜ غُنْکِيجِ، اٜ غَطٛوٻٜ لُوطُ، ¹⁰اٜ وُيْٻٜ، اٜ غٛودُٻٜ سُونٛ شٜىٰدٜ، اٜ جَرٛوٻٜ، اٜ مٜتٛوٻٜ کَلُّکَ دٛوْ وٛٻّٜ، اٜ وُيْٻٜ تٜىٰتٛوٻٜ، ٻٜ فُو ٻٜ نَتَّتَا لَامُ اَللَّه؞ ¹¹ندٜنّٛ نٛنْ وٛٻّٜ مٛوطٛنْ مبَعِ؞ اَمَّا جٛونِ طُمْ لٛوتِي حَکّٜ مٛوطٛنْ، اٛنْ نغَرْتِرَامَ يِمْٻٜ اَللَّه، اٛنْ نغَرْتِرَامَ اَادِلِعٜنْ بَرْکَ يٜىٰسُ اَلْمَسِيحُ جٛومِرَاوٛ مٜىٰطٜنْ اٜ رُوحُ اَللَّه؞

مَوْنِنٜىٰ اَللَّه اٜ ٻَلِّ مٛوطٛنْ

¹²وٛٻّٜ مٛوطٛنْ مبِعَيْ، ‏«‏طُمْ جَٻِي مِ وَطَ کٛو طُمٜ،»‏ اَمَّا اٜ مِ وِعَعٛنْ نَاع کٛو طُمٜ نَفَنْتَعٜنْ؞ طُمْ جَٻِي مِ وَطَ کٛو طُمٜ، اَمَّا مِ وَرْتَتَا مَشُّطٛ کٛو طُمٜ؞ ¹³طٛنْمَا وٛٻّٜ مٛوطٛنْ مبِعَيْ، ‏«‏طُمْ وَطِي ݧَمْندُ نغَمْ رٜىٰدُ، نٛنْ مَا طُمْ وَطِي رٜىٰدُ نغَمْ ݧَمْندُ،»‏ اَمَّا شَرٜلْ اٜ وَرَ نغٜلْ اَللَّه وَرْتِرْتَ فُو طِطُمْ کٛو کٛ نَفِ؞ ٻَنْدُ وَطَاکَ نغَمْ نجٜىٰنُ، اَمَّا ندُ وَطَا نغَمْ جٛومِرَاوٛ، ندٜنْ جٛومِرَاوٛ جٜيِندُ؞ ¹⁴اَللَّه اُمِّنِي يٜىٰسُ جٛومِرَاوٛ مٜىٰطٜنْ دَغَ مَيْدٜ، اٜنٜنْ مَا اٛ اُمِّنَيْعٜنْ دَغَ مَيْدٜ بَرْکَ بَوْطٜ مَاکٛ؞

¹⁵اٛنْ اَنْدَا ٻَلِّ مٛوطٛنْ طُمْ جٛکّٛوطٜ ٻَنْدُ اَلْمَسِيحُ؟ تٛو، مِ حٛشَّيْ ٻَنْدُ اَلْمَسِيحُ مِ حَوْتَندُ اٜ ٻَنْدُ کَارُوَاجٛ؟ سَمْ، مِ وَطَتَا نٛنْ!‏ ¹⁶اٛنْ اَنْدَا فُو کَوْتُطٛ ٻَنْدُ اٜ کَارُوَاجٛ ٻٜ نغَرْتِي ٻَنْدُ غٛعٛ وٛنْ طٛنْ؟ نغَمْ نٛ اَايَارٜ وِعِ، ‏«‏کَمْٻٜ طِطٛ ٻٜ نغَرْتَ ٻَنْدُ غٛعٛ؞»‏ ¹⁷اَمَّا فُو شُمْڤٛوتِرٛووٛ اٜ جٛومِرَاوٛ، کَنْکٛ اٜ جٛومِرَاوٛ ٻٜ نغَرْتِي غٛعٛ؞

¹⁸نغٛطِّتٜىٰ وَطُکِ نجٜىٰنُ!‏ کٛو طُمٜ حَکّٜ طُمْ نٜطّٛ وَطَتَ، طُمْ مٜىٰمَتَا ٻَنْدُ مَاکٛ، اَمَّا غَطٛووٛ نجٜىٰنُ اٜ وٛنَّ ٻَنْدُ مُوطُمْ؞ ¹⁹اٛنْ اَنْدَا ٻَلِّ مٛوطٛنْ طُمْ وُرٛ تٛ رُوحُ اَللَّه جٛوطٛتٛو؟ اَللَّه حٛکِّيعٛنْطُمْ طُمْ جٛوطٛو ندٜرْ مٛوطٛنْ؞ نَاع اٛنٛنْ نجٜيِ کٛعٜ مٛوطٛنْ؞ ²⁰اَللَّه حٛکِّي ٻِطّٛ مُوطُمْ نغَمْ اٛ وَرْتِرَعٛنْ ٻٜ مَاکٛ؞ نغَمْ نٛنْ، مَوْنِنِرٜىٰ اَللَّه اٜ ٻَلِّ مٛوطٛنْ؞

پَمٛلْ دٛوْ تٜىٰغَلْ

¹تٛو، جٛونِ مِ نٛوتٛتٛ پَمٛلْ نغٛلْ پَمْطٛنْيَمْ ندٜرْ طٜرٜوٛلْ نغٛلْ مبِنْدٛنٛيْطٛنْيَمْ:‏ اٜ طُمْ وٛوطِ تٛع نٜطّٛ تٜعَ؞ ²اَمَّا ندٜ اٜ وٛودِ نجٜىٰنُ نَاع سٜطَّ حَکُّندٜ يِمْٻٜ، اٜ حَانِ کٛو مٛيٜ نٜطّٛ تٜعَ، ندٜنْ کٛو مٛيٜ دٜبّٛ وَطَ تٜىٰغَلْ؞ ³غٛرْکٛ حٛکَّ دٜبّٛ مُوطُمْ ٻَنْدُ مُوطُمْ نٛ دٛوکَ تٜىٰغَلْ وِعِ؞ نٛنْ مَا دٜبّٛ اٛنْ حٛکَّ غٛرْکٛ مُوطُمْ ٻَنْدُ مُوطُمْ نٛ دٛوکَ تٜىٰغَلْ وِعِ؞ ⁴نغَمْ دٜبّٛ جٜيَايِ ٻَنْدُ مُوطُمْ؛ غٛرْکٛ مَاکٛ جٜيِندُ؞ نٛنْ مَا غٛرْکٛ جٜيَايِ ٻَنْدُ مُوطُمْ، دٜبّٛ مَاکٛ جٜيِندُ؞ ⁵تٛع اٛنْ نغَݧُ وَلْدُکِ تٛ نَاع نٛنْ شِرْيِيطٛنْ حَکُّندٜ مٛوطٛنْ نغَمْ شَرٜلْ سٜطَّ، نغَمْ نغَطٛنْ حَکِّيلٛ مٛوطٛنْ دٛوْ دٛعَارٜ؞ غَطَ مَاجُمْ ݧَمْرٛنْ يٜىٰسٛ اٜ وَلْدُکِ نغَمْ تٛع شٜيْطَنْ فٛوطَعٛنْ نغَطٛنْ کٛ وٛوطَا نغَمْ شِيَ سُرُکِ کٛعٜ مٛوطٛنْ؞

⁶کٛ مبِيمِعٛنْ، طُمْ شَاوٛرِ، نَاع طُمْ دٛوکَ؞ ⁷مِنْ مِ ٻُرِي يِطُکِ دَا کٛو مٛيٜ وَلَا تٜىٰغَلْ بٛ اَمْ!‏ اَمَّا کٛو مٛيٜ اٜ اِرِ دٛکَّلْ نغَلْ اَللَّه حٛکِّمٛ، اٛعٛ اٜ نغَلْ مُوطُمْ، اٛنْ طَاعٜ اٜ نغَلْ مُوطُمْ؞

⁸جٛونِ دٛوْ يِمْٻٜ ٻٜ نغَلَا تٜىٰغَلْ اٜ رٜوْٻٜ ٻٜ وٛرْٻٜ مَٻّٜ مَايِ، اٜ مِ وِعَ طُمْ ٻُرِي تٛع ٻٜ نغَطَ تٜىٰغَلْ بٛ اَمْ؞ ⁹اَمَّا تٛ ٻٜ مبَاوَتَا سُرُکِ کٛعٜ مَٻّٜ، اٜ حَانِ ٻٜ نغَطَ تٜىٰغَلْ؞ نغَمْ طُمْ ٻُرِي نٜطّٛ وَطَ تٜىٰغَلْ دٛوْ سُونٛ نجٜىٰنُ نَنْغَمٛ؞

¹⁰غٛودُٻٜ تٜىٰغَلْ بٛو اٜ مِ حٛکَّٻٜ دٛوکَ طُعُمْ؞ نَاع طُمْ مِنْ حٛکِّطُمْ، جٛومِرَاوٛ حٛکِّطُمْ:‏ تٛع دٜبّٛ يٛوفَ غٛرْکٛ مُوطُمْ؞ ¹¹تٛ بٛو اٛ يٛوفِي غٛرْکٛ مَاکٛ، دٛولٜ اٛ وَطَتَا وٛنْغَلْ تٜىٰغَلْ، کٛو بٛو اٛ سِرْيٛوتِرَ اٜ غٛرْکٛ مَاکٛ؞ نٛنْ مَا تٛع غٛرْکٛ يٛوفَ دٜبّٛ مُوطُمْ؞

¹²دٛوْ حٛرِيٻٜ بٛو اٜ مِ وِعَ طُعُمْ، نَاع جٛومِرَاوٛ وِعِکَ، مِنْ اٜ حٛورٜ اَمْ وِعِکَ؞ تٛ غٛطّٛ کٛولِيطٛ يٜىٰسُ اٜ وٛودِ دٜبّٛ مٛ حٛولَاکِ يٜىٰسُ، تٛ دٜبّٛ اٛنْ جَٻِي نجٛوطٛدٛو اٜ مَاکٛ، تٛو، تٛع اٛ يٛوفَمٛ؞ ¹³نٛنْ مَا تٛ دٜبّٛ کٛولِيطٛ يٜىٰسُ اٜ وٛودِ غٛرْکٛ مٛ حٛولَاکِ يٜىٰسُ، تٛ غٛرْکٛ اٛنْ جَٻِي جٛوطٛدٛو اٜ مَاکٛ، تٛع دٜبّٛ اٛنْ يٛوفَمٛ؞ ¹⁴نغَمْ غٛرْکٛ مٛ حٛولَاکِ يٜىٰسُ اٜ لَاٻِنٜىٰ بَرْکَ تٜىٰغَلْ مَاکٛ اٜ دٜبّٛ کٛولِيطٛ يٜىٰسُ؞ نٛنْ مَا دٜبّٛ مٛ حٛولَاکِ يٜىٰسُ اٜ لَاٻِنٜىٰ بَرْکَ تٜىٰغَلْ مَاکٛ اٜ غٛرْکٛ کٛولِيطٛ يٜىٰسُ؞ دَا نَاع طُمْ نٛنْ، دَا ٻِٻّٜ مٛوطٛنْ نغَرْتِي ٻٜ لَاٻَا، اَمَّا نٛ طُمْ وٛنْتِندِرِ جٛونِ ٻٜ نغَرْتِي لَٻّٜ؞ ¹⁵اَمَّا تٛ نٜطّٛ مٛ حٛولَاکِ يٜىٰسُ اٜ يِطِ يٛوفَ دٜبّٛ مُوطُمْ کٛولِيطٛ يٜىٰسُ، تٛو، سٜيْ اٛ يٛوفَمٛ؞ تٛ اِرِ نٛنْ وَطِي، کٛولِيطٛ يٜىٰسُ غٛرْکٛ کٛو دٜبّٛ نَاع طُمْ دٛولٜ اٛ جٛوطٛدٛو اٜ مٛ حٛولَاکِ يٜىٰسُ، نغَمْ اَللَّه سُٻِيعٜنْ نغَمْ نجٛوطٛدٛوطٜنْ جَمْ؞ ¹⁶اَنْ دٜبّٛ کٛولِيطٛ يٜىٰسُ، اَ اَنْدَا طُمْ غَطٛتٛوطُمْ نغَرْتَا لَاوٛلْ حِسْنُکِ غٛرْکٛ مَاطَ؟ اَنْ غٛرْکٛ کٛولِيطٛ يٜىٰسُ، اَ اَنْدَا طُمْ غَطٛتٛوطُمْ نغَرْتَا لَاوٛلْ حِسْنُکِ دٜبّٛ مَاطَ؟

اِرِ جٛنْدٜ ندٜ اَللَّه يِطِ طُمْ وَطَ

¹⁷اٜ حَانِ کٛو مٛيٜ ݧَمْرَ يٜىٰسٛ اٜ وَطُکِ جٛنْدٜ نٛنْ نٛ جٛومِرَاوٛ سُٻِرِ اٛ جٛوطٛرٛو نٛنْ نٛ اٛ وٛنْتِندِرْنٛو کٛ اَللَّه نٛدَّمٛ؞ کَنْجُمْ وٛنِ کٛ اٜکِّتِنَيْمِ کٛو تٛيٜ ندٜرْ تٛکُّٻٜ يٜىٰسُ؞ ¹⁸نٜطّٛ نَادَاطٛ کٛ اَللَّه نٛدَّمٛ، تٛع اٛ طَٻِّتَ وَرْتُکِ مٛ نَادَاکَ؞ نٛنْ مَا نٜطّٛ مٛ نَادَاکَ کٛ اَللَّه نٛدَّمٛ، تٛع اٛ طَٻِّتَ وَرْتُکِ نَادَاطٛ؞ ¹⁹نَادٜىٰکِ نَاع طُمْ غٛطُّمْ، نٛنْ مَا شِيَ نَادٜىٰکِ نَاع طُمْ غٛطُّمْ؞ اَمَّا وَطُکِ کٛ اَللَّه وِعِ ٻُرِي کٛو طُمٜ؞ ²⁰اٜ حَانِ کٛو مٛيٜ ݧَمْرَ يٜىٰسٛ اٜ وَطُکِ جٛنْدٜ نٛنْ نٛ اَللَّه سُٻِرِ اٛ جٛوطٛرٛو؞ ²¹تَا مَشُّطٛ شَرٜلْ کٛ اَللَّه نٛدُّمَا، تَاع وَنُّ دٛوْ مَاجُمْ؞ اَمَّا تَا حٜٻِي لَاوٛلْ رِمْطِنٜىٰکِ، وَطُطُمْ؞ ²²تٛ نٜطّٛ اٛ مَشُّطٛ شَرٜلْ کٛ جٛومِرَاوٛ نٛدِّمٛ، اٛ وَرْتِي رِمْطِنَاطٛ جٛومِرَاوٛ؞ نٛنْ مَا تٛ نٜطّٛ نَاع اٛ مَشُّطٛ شَرٜلْ کٛ اَللَّه نٛدِّمٛ، اٛ وَرْتِي مَشُّطٛ اَلْمَسِيحُ؞ ²³اَللَّه حٛکِّي ٻِطّٛ مُوطُمْ نغَمْ اٛ وَرْتِرَعٛنْ ٻٜ مَاکٛ؞ نغَمْ نٛنْ، تٛع اٛنْ نغَرْتُ مَشُّٻٜ يِمْٻٜ؞ ²⁴تٛو، بَنْدِرَاٻٜ اَمْ، اٜ حَانِ کٛو مٛيٜ ݧَمْرَ يٜىٰسٛ اٜ وَطُکِ جٛنْدٜ نٛنْ نٛ اَللَّه سُٻِرِ اٛ جٛوطٛرٛو يٜىٰسٛ مَاکٛ؞

ٻٜ نغَلَا تٜىٰغَلْ اٜ ٻٜ وٛرْٻٜ مُعّٜنْ مَايِ

²⁵جٛونِ مِ نٛوتٛتٛ پَمٛلْ نغٛلْ پَمْطٛنْيَمْ ندٜرْ طٜرٜوٛلْ نغٛلْ مبِنْدٛنٛيْطٛنْيَمْ دٛوْ يِمْٻٜ ٻٜ نغَلَا تٜىٰغَلْ؞ جٛومِرَاوٛ وِعَايِيَمْ غٛطُّمْ دٛوْ مَٻّٜ، اَمَّا مِ حٛکَّيْ شَاوٛرِ؞ مِ تَبِّتِنِي اٛنْ نجَٻَيْ کٛ مبِيمِ نغَمْ جٛومِرَاوٛ وَرْتِرِييَمْ کٛولَاطٛ بَرْکَ يُرْمٜىٰندٜ مَاکٛ؞

²⁶نغَمْ تٛرَّاجِ طِ نغٛنْطٜنْ ندٜرْ حَنْدٜ، اٜ يِيکِ اَمْ طُمْ ٻُرِي کٛو مٛيٜ ݧَمْرَ يٜىٰسٛ اٜ وَطُکِ جٛنْدٜ نٛنْ نٛ وٛنْتِندِرِ؞ ²⁷تَا وٛودِ دٜبّٛ، تَاع طَٻُّتُ يٛوفُکِمٛ؞ تَا وَلَا دٜبّٛ بٛو، تَاع طَٻُّتُ تٜعُکِ؞ ²⁸اَمَّا تَا وَطِي تٜىٰغَلْ، نَاع حَکّٜ نغَطَّا؞ طٛنْمَا تٛ سُرْبَاجٛ وَطِي تٜىٰغَلْ، نَاع حَکّٜ اٛ وَطِ؞ فُو اٜ نٛنْ، فُو غَطُٻٜ تٜىٰغَلْ نجَرَيْ تٛرَّ ندٜرْ جٛنْدٜ مَٻّٜ؞ مِنْ بٛو، مِ يِطَا نجَرٛنْ کَنْ طٛنْ تٛرَّ؞

²⁹بَنْدِرَاٻٜ اَمْ، کٛ نغِطُمِ وِيکِ وٛنِ نَاع کٛ نٜىٰٻِ يٜىٰسُ اَلْمَسِيحُ وَرْتٛيَيْ دُونِيَارُ؞ دَغَ جٛونِ غٛودُٻٜ تٜىٰغَلْ تٛع ٻٜ نغَطَ حَکِّيلٛ مَٻّٜ دٛوْ مَاغَلْ تَنْ؞ ³⁰وٛيٛوٻٜ نغَمْ مَيْدٜ، اٜ وٜلْوٜلْتٛوٻٜ، اٜ لُومٛتٛوٻٜ، ³¹اٜ کُوتِرٛوٻٜ کٛ وٛنِ ندٜرْ دُونِيَارُ ندُعُ، تٛع ٻٜ نغَطَ حَکِّيلٛ مَٻّٜ دٛوْ مَاجُمْ تَنْ، نغَمْ دُونِيَارُ ندُعُ اٜ کٛ وٛنِ ندٜرْ مَيْرُ طُمْ پَٻّٛتٛوطُمْ؞

³²اٜ مِ يِطِ نغَطٛنْ جٛنْدٜ ندٜ وَلَا وَنَّارٜ؞ غٛرْکٛ مٛ وَلَا دٜبّٛ اٜ مٛ وَطَ ٻٜرْندٜ مَاکٛ فُو دٛوْ وَطُکِ کُوغَلْ جٛومِرَاوٛ، نغَمْ اٜ مٛ يِطِ اٛ وٜلْنَنَ جٛومِرَاوٛ ٻٜرْندٜ؞ ³³اَمَّا غٛودُطٛ دٜبّٛ بٛو اٜ وَنِّ اٜ فِي دُونِيَارُ، نغَمْ اٜ مٛ يِطِ اٛ وٜلْنَنَ دٜبّٛ مَاکٛ ٻٜرْندٜ؞ ³⁴حَکِّيلٛ مَاکٛ سٜنْدَکٜ طِطِ وٛنْ طٛنْ؞ طٛنْمَا سُرْبَاجٛ کٛو دٜبّٛ مٛ وَطَايِ تٜىٰغَلْ اٜ مٛ وَطَ ٻٜرْندٜ مَاکٛ فُو دٛوْ وَطُکِ کُوغَلْ جٛومِرَاوٛ، نغَمْ اٛ وَرْتَ لَاٻُطٛ ندٜرْ فُو کٛ اٛ وَطَتَ اٜ کٛ اٛ ݧُمَتَ؞ دٜبّٛ غٛودُطٛ تٜىٰغَلْ بٛو اٜ مٛ وَنِّ اٜ فِي دُونِيَارُ، نغَمْ اٜ مٛ يِطِ اٛ وٜلْنَنَ غٛرْکٛ مَاکٛ ٻٜرْندٜ؞

³⁵مِ وِعُ نٛنْ نغَمْ ٻٜيْدَارِ مٛوطٛنْ، نَاع نغَمْ مِ ٻِطَّعٛنْ، اَمَّا نغَمْ نغَطٛنْ جٛنْدٜ مٛوطٛنْ نٛ حَانِ، تٛکّٛنْ جٛومِرَاوٛ اٜ ٻٜرْندٜ غٛعٛ؞ ³⁶تٛ نٜطّٛ وَطِدِي اَلْکَوَلْ تٜىٰغَلْ اٜ سُرْبَاجٛ، تٛ اٜ مٛ ݧُمَ اٜ مٛ وَطَنَ سُرْبَاجٛ اٛنْ کٛ حَانَا، تٛ اٛ وَاوَتَا سُرُکِ سُونٛ مَاکٛ، اٜ مٛ ݧُمَ اٜ حَانِ اٛ تٜعَمٛ، تٛو، سٜيْ اٛ تٜعَمٛ، نَاع طُمْ حَکّٜ؞ ³⁷اَمَّا تٛ اٛ سُٻِي ندٜرْ ٻٜرْندٜ مَاکٛ تٛع اٛ تٜعَ سُرْبَاجٛ اٛنْ، کَدِنْ تٛ وَلَا دٛولُطٛمٛ اٛ تٜعَمٛ، اَمَّا اٜ مٛ سُرِ سُونٛ مَاکٛ، اٛ وَطِي کٛ حَانِ؞ ³⁸نغَمْ نٛنْ، فُو تٜعُطٛ سُرْبَاجٛ مٛ اٛ وَادِ اَلْکَوَلْ تٜىٰغَلْ وَطِي کٛ وٛوطِ، اَمَّا نٜطّٛ مٛ وَطَايِ تٜىٰغَلْ وَطِي کٛ ٻُرِ وٛوطُکِ؞

³⁹تٜىٰغَلْ حَٻِّي دٜبّٛ اٜ غٛرْکٛ مُوطُمْ، تٛ نِ غٛرْکٛ اٛنْ اٜ فٛوفَ؞ تٛ بٛو غٛرْکٛ اٛنْ مَايِي، اٛ وَاوَيْ اٛ تٜىٰرَ اٜ مٛ اٛ يِطِ فُو، اَمَّا سٜيْ نِ اٛ تٜىٰرَ اٜ تٛکُّطٛ يٜىٰسُ؞ ⁴⁰اَمَّا اٜ مِ ݧُمَ اٛ ٻُرَيْ نَنْکِ بٜلْطُمْ تٛ اٛ وَطَايِ تٜىٰغَلْ، ندٜنْ اٜ يِيکِ اَمْ اٜ مِ وٛودِ رُوحُ اَللَّه؞

کٛ طُمْ سَکَّنِ غُنْکِيجِ

¹تٛو، جٛونِ دٛوْ کٛ طُمْ سَکَّنِ غُنْکِيجِ، اٜنْ اَنْدِ اٜنْ فُو اٜنْ نغٛودِ اَنْدَلْ؞ اَنْدَلْ بٛو اٜ وَدَّ مَنْغُ حٛورٜ، اَمَّا يِدّٜ اٜ سٜمْبِطِنَ يِمْٻٜ؞ ²فُو ݧُمٛووٛ اٜ اَنْدِ غٛطُّمْ، تٛو، حَا جٛونِ اٛ وَلَا اَنْدَلْ نٛ حَانِ؞ ³اَمَّا نٜطّٛ غِطّٛ اَللَّه، اَللَّه اٜ اَنْدِمٛ؞

⁴نغَمْ نٛنْ، دٛوْ ݧَامُکِ کٛ طُمْ سَکَّنِ غُنْکِيجِ، اٜنْ اَنْدِ نغُنْکِوَ نَاع طُمْ غٛطُّمْ ندٜرْ دُونِيَارُ ندُعُ، ندٜنْ اٜنْ اَنْدِ اَللَّه اٛ غٛعٛتٛ، وَلَا غٛطّٛ سٜيْ کَنْکٛ تَنْ؞ ⁵کٛو ندٜ طُمْ غَطٛتٛوطُمْ اٜ وٛودِ کٛ يِمْٻٜ نٛدَّتَ ‏«‏اَلَّاجِ»‏ تٛنْ دٛوْ کٛو ندٜرْ دُونِيَارُ، غٛونغَ بٛو اٜ وٛودِ بِعٜتٜىٰٻٜ ‏«‏اَلَّاجِ»‏ طُطِّ اٜ ‏«‏جٛومِرَاٻٜ»‏ طُطْٻٜ؞ ⁶فُو اٜ نٛنْ، تٛ مٜىٰطٜنْ اَللَّه اٛ غٛعٛتٛ، ݧَاکٛ مٛ دٛوْ، تَغُطٛ کٛو طُمٜ، ندٜنْ اٜنْ نغَطَ جٛنْدٜ نغَمْ مَاکٛ؞ طٛنْمَا اٜ وٛودِ جٛومِرَاوٛ غٛعٛتٛ، وَاتٛ يٜىٰسُ اَلْمَسِيحُ؞ بَرْکَ مَاکٛ کٛو طُمٜ تَغَا، ندٜنْ بَرْکَ مَاکٛ کٜٻُطٜنْ يٛنْکِ؞

⁷اَمَّا نَاع کٛو مٛيٜ وٛودِ اَنْدَلْ نغَعَلْ؞ اٜ وٛودِ يِمْٻٜ مَوْنُدُٻٜ اٜ ݧُمٛ وِيکِ غُنْکِيجِ اٜ نغٛودِ يٛنْکِ؞ حَا جٛونِ بٛو تٛ ٻٜ ݧَامِي ݧَمْندُ ندُ طُمْ سَکَّنِ غُنْکِيجِ، اٜ طُمْ وَنَّٻٜ نغَمْ اٜ ٻٜ ݧُمَ کٛ ٻٜ نغَطِ طُمْ حَکّٜ؞ ⁸اَمَّا نَاع ݧَمْندُ ٻَدِّنْتَاعٜنْ حَادٜ اَللَّه؞ تٛ اٜنْ ݧَامَايِ، طُمْ اُسْتَنْتَاعٜنْ غٛطُّمْ؞ تٛ بٛو اٜنْ ݧَامِي، طُمْ ٻٜيْدَنْتَاعٜنْ غٛطُّمْ؞

⁹اٛنْ کٛکَّامَ لَاوٛلْ ݧَامٛنْ کٛو اِرِ ندُيٜ ݧَمْندُ؞ اَمَّا ڤَامٜىٰ تٛع نٛنْ وَرْتَ کٛ مَجِّنْتَ مٛ سٜمْبِطَا ندٜرْ تٛکُّکِ يٜىٰسُ؞ ¹⁰اَنْ غٛودُطٛ اَنْدَلْ دٛوْ طُعُمْ، تٛ نٜطّٛ مٛ سٜمْبِطَا ندٜرْ تٛکُّکِ يٜىٰسُ يِعِي اَ ݧَامَ ݧَمْندُ ندٜرْ سُودُ غُنْکِيجِ، اٜ يِيکِ مَاطَ طُمْ سٜمْبِطِنْتَامٛ اٛ ݧَامَ ݧَمْندُ ندُ طُمْ سَکَّنِ غُنْکِيجِ؟ ¹¹نٛنْ، اَنْدَلْ مَاطَ مَجِّنَيْ نٜطّٛ اٛنْ مٛ اَلْمَسِيحُ مَايِ نغَمْ مُوطُمْ؞ ¹²تَا وَطِي نٛنْ، اَ مَجِّنِي تٛکُّطٛ يٜىٰسُ مٛ سٜمْبِطَا، اَ وَطَنِي اَلْمَسِيحُ حَکّٜ؞ ¹³نغَمْ مَاجُمْ، تٛ کٛ ݧَامَيْمِ وَطِي بَنْدِرَاوٛ اَمْ وَطِي حَکّٜ، تٛو، مِ فُطِّتَتَا مِ ݧَامَ کُسٜلْ، نغَمْ تٛع مِ وَطَ بَنْدِرَاوٛ اَمْ وَطَ حَکّٜ؞

نجٛٻَارِ بُلُسْ

¹مِنْ، نَاع مِ دِمٛ؟ نَاع مِ لِلَاطٛ؟ نَاع مِ يِعِي يٜىٰسُ جٛومِرَاوٛ مٜىٰطٜنْ؟ نَاع اٛنْ نغَرْتِي تٛکُّٻٜ يٜىٰسُ بَرْکَ کُوغَلْ اَمْ نغَلْ جٛومِرَاوٛ؟ ²کٛو تٛ نَاع مِ لِلَاطٛ تٛ وٛٻّٜ، مِ تَبِّتِنِي مِ لِلَاطٛ تٛ مٛوطٛنْ!‏ نغَمْ اٛنٛنْ نغٛنِ کٛ تَبِّتِنِ مِ لِلَاطٛ جٛومِرَاوٛ؞

³رَا کٛ مبِعَيْمِ غٛودُٻٜ پَمٛلْ دٛوْ لَامُ اَمْ طُمْ لِلَاطٛ؞ ⁴نَاع اٜ حَانِ مِنْ ݧَامَ مِنْ نجَرَ؟ ⁵نَاع مِنْ مبَاوَيْ مِنْ تٜعَ تٛکُّطٛ يٜىٰسُ مِنْ نجَادَ اٜ مَاکٛ کٛو تٛيٜ تٛ مِنْ نجَحَتَ نٛ لِلَاٻٜ حٛرِيٻٜ، اٜ مِݧِرَاٻٜ يٜىٰسُ جٛومِرَاوٛ، اٜ بِيتُرُسْ نغَطَتَ؟ ⁶کٛو مِنْ اٜ بَرْنَبَ تَنْ نغٛنِ لِلَاٻٜ کَانُٻٜ کُوَ نغَمْ کٜٻَ کٛ ݧَامِ؟ ⁷مٛيٜ سٛوجِيجٛ يٛٻَتَ حٛورٜ مُوطُمْ نجٛٻَارِ؟ مٛيٜ رٜمَتَ نغٜسَ اِنَبٛوجٜ طُمْ حَطَمٛ ݧَامُکِ ٻِکّٛيْ کٛيْ؟ مٛيٜ دُرَتَ اٛرْندٜ ندٜنْ طُمْ حَطَمٛ يَرْکِ کٛسَمْ مَاجِ؟

⁸کٛ مبِيمِ نَاع طُمْ ݧُمٛ نٜطّٛ؞ نَاع اَتَّوْرَ مَا مٜتِي دٛوْ مَاجُمْ؟ ⁹طُمْ وِنْدَامَ ندٜرْ اَتَّوْرَ مُوسَ وِيکِ، ‏«‏تَاع مَٻَّنْ نغَارِ حٛنْدُکٛ شَرٜلْ کٛ ندِ سٛرْٻَتَ؞»‏ ندٜ اَللَّه وِعِ نٛنْ، غَعِ تَنْ اٛ وَنِّ؟ ¹⁰نَاع نغَمْ مٜىٰطٜنْ اٛ وِعِکَ؟ غٛونغَ نغَمْ مٜىٰطٜنْ طُمْ وِنْدَا؞ نغَمْ اٜ حَانِ کٛو مٛيٜ دٜمٛووٛ اٜ شٛرْٻٛووٛ ٻٜ نغَطَ کُوغَلْ مَٻّٜ ندٜرْ کَمُّندٜ حٜٻُکِ غٜطَلْ مَٻّٜ دَغَ نغٜسَ کَنْ؞ ¹¹ندٜ مِنْ اَاوِ وٛلْدٜ اَللَّه ندٜرْ ٻٜرْطٜ مٛوطٛنْ، تٛو، طُمْ فِي مَوْطُمْ تٛ مِنْ ݧَامِي بٛتٜ مٛوطٛنْ اِرِ طُمْ دُونِيَارُ؟ ¹²تٛ وٛٻّٜ مبَاوَيْ کٜٻَ اِرِ بَلَّلْ نغَعَلْ تٛ مٛوطٛنْ، نَاع مِنْ ٻُرَيْٻٜ؟ فُو اٜ نٛنْ مِنْ کُوتِرَايِ نغٛلْ طٛنْ لَاوٛلْ، اَمَّا مِنْ مُݧِي ندٜرْ کٛو کَيٜ تٛرَّ، نغَمْ تٛع مِنْ کَطَ حَبَرُ بٜلْطُمْ دٛوْ اَلْمَسِيحُ ݧَمْرُکِ يٜىٰسٛ؞ ¹³اٛنْ اَنْدَا کُوٛوٻٜ ندٜرْ وُرٛ شٜنِينغٛ اٜ کٜٻَ ݧَمْندُ مَٻّٜ دَغَ ندٜرْ مَغّٛ؟ نٛنْ مَا کُوٛوٻٜ تٛ سَکِّرْدٜ اٜ ٻٜ کٜٻَ غٜطَلْ مَٻّٜ دَغَ ندٜرْ کٛ طُمْ سَکِّ دٛوْ مَيْرٜ؟ ¹⁴ندٜنْ نٛنْ مَا جٛومِرَاوٛ وِعِي وَعَجِنٛوٻٜ حَبَرُ بٜلْطُمْ اٜ حَانِ ٻٜ کٜٻَ کٛ ٻٜ ݧَامَتَ دَغَ ندٜرْ کُوغَلْ نغَلْ؞

¹⁵اَمَّا مِ حُوتِرَايِ طِنْ طٛنْ لَاوِ؞ طٛنْمَا نَاع اٜ مِ وِنْدٛنٛيَعٛنْ طٜرٜوٛلْ نغٛعٛلْ نغَمْ کٛکّٛيْيَمْ غٛطُّمْ؞ طُمْ ٻُرِي مِ مَايَ دٛوْ غٛطّٛ حَطَيَمْ کٛ مَنْتٛرْتٛومِ؞ ¹⁶اَمَّا تٛ مِ وَعَجِنِي حَبَرُ بٜلْطُمْ، مِ مَنْتٛرْتَاکٛطُمْ، نغَمْ طُمْ دٛولٜ مِ وَعَجِنَ؞ تٛ مِ وَعَجِنَايِ حَبَرُ بٜلْطُمْ مِ وٛنِ!‏ ¹⁷دَا مِنْ اٜ حٛورٜ اَمْ سُٻِ مِ وَعَجِنَ، دَا مِ حٜٻَيْ نجٛٻَارِ؞ اَمَّا تٛ نَاع مِنْ سُٻِ مِ وَعَجِنَ، کٛ نغَطَيْمِ وٛنِ اٜ مِ حُوَ کُوغَلْ نغَلْ طُمْ تَمْبِنِيَمْ؞ ¹⁸تٛ طُمْ نٛنْ، کٛ وٛنِ نجٛٻَارِ اَمْ؟ نجٛٻَارِ اَمْ وٛنِ وَعَجِنْکِ حَبَرُ بٜلْطُمْ شَاحُ، نَاع مِ طَٻِّتَ کٛ حَانِ مِ حٜٻَ ندٜرْ وَعَجِنْکِطُمْ؞

¹⁹کٛو ندٜ نَاع مِ مَشُّطٛ کٛو مٛيٜ، مِ وَرْتِرِي حٛورٜ اَمْ مَشُّطٛ کٛو مٛيٜ نغَمْ مِ وَدّٛيَ يِمْٻٜ طُطْٻٜ تٛ اَلْمَسِيحُ؞ ²⁰ندٜرْ يَحُودَنْکٛعٜنْ مِ وَرْتِرِي حٛورٜ اَمْ بٛ يَحُودَنْکٜىٰجٛ، نغَمْ مِ وَدَّٻٜ تٛ اَلْمَسِيحُ؞ کٛو ندٜ نَاع لٜيْ لَامُ اَتَّوْرَ نغٛنْمِ، ندٜرْ يِمْٻٜ غٛنْٻٜ لٜيْ لَامُ اَتَّوْرَ، مِ وَرْتِرِي حٛورٜ اَمْ بٛ غٛنْطٛ لٜيْ لَامُ اَتَّوْرَ نغَمْ مِ وَدَّٻٜ تٛ اَلْمَسِيحُ؞ ²¹ندٜرْ يِمْٻٜ ٻٜ نغَلَا لٜيْ لَامُ اَتَّوْرَ بٛو، مِ وَرْتِرِي حٛورٜ اَمْ بٛ مٛ وَلَا لٜيْ لَامُ اَتَّوْرَ نغَمْ مِ وَدَّٻٜ تٛ اَلْمَسِيحُ کَمْٻٜ مَا؞ نٛنْ حٛلَّايِ مِ تٛکَّايِ دٛوکَ اَللَّه، اَمَّا اٜ مِ تٛکَّ دٛوکَ اَلْمَسِيحُ؞ ²²ندٜرْ يِمْٻٜ ٻٜ شٜمْبِطَا ندٜرْ تٛکُّکِ يٜىٰسُ، مِ وَرْتِرِي حٛورٜ اَمْ بٛ مٛ سٜمْبِطَا، نغَمْ مِ وَدَّٻٜ تٛ اَلْمَسِيحُ؞ مِ وَرْتِرِي حٛورٜ اَمْ بٛ کٛو اِرِ مٛيٜ نٜطّٛ نغَمْ اٜ کٛو نغٛلٜ لَاوٛلْ مِ حِسْنَ وٛٻّٜ؞

²³مِ وَطُ طُعُمْ فُو نغَمْ حَبَرُ بٜلْطُمْ، نغَمْ مِ حٜٻَ غٜطَلْ اَمْ ندٜرْ بَرْکَ غٛنْطُمْ ندٜرْ مَاجُمْ؞ ²⁴اٛنْ اَنْدَا ندٜرْ فِجٛ دٛغُّدُ يِمْٻٜ طُطْٻٜ ندٛغَّتَ ندٜرْ فِجٛ نغٛنْ، اَمَّا نٜطّٛ غٛعٛتٛ تَنْ حٜٻَتَ دٛکَّلْ حٜٻُکِ جَالٛرْغَلْ؟ نغَمْ نٛنْ، ندٛغِّرٜىٰ نٛ کٜٻِرْتٛنْ جَالٛرْغَلْ؞ ²⁵فُو غِطْٻٜ کٜٻَ جَالٛرْغَلْ ندٜرْ فِجٛ اٜ ٻٜ اٜلْتَ ٻَلِّ مَٻّٜ؞ اٜ ٻٜ نغَطَ نٛنْ نغَمْ ٻٜ کٜٻَ غِيفٛلْ کٛو ندٜ غِيفٛلْ نغٛلْ نغٛلْ دٜعٛووٛلْ؞ اَمَّا اٜنٜنْ غِيفٛلْ تَبِّتَيْنغٛلْ کٜٻٜتٜنْ؞ ²⁶نغَمْ نٛنْ، مِ دٛغَّتَا بٛ نٜطّٛ غَطٛووٛ دٛغُّدُ مٜىٰرٜ؞ نٛنْ مَا مِ حَٻَتَا بٛ نٜطّٛ ڤِيٛووٛ حٜنْدُ؞ ²⁷اَمَّا اٜ مِ تٛرَّ ٻَنْدُ اَمْ، اٜ مِ وَرْتِرَندُ مَشُّطٛ اَمْ، نغَمْ تٛع غَطَ مِ وَعَجِنَنِي وٛٻّٜ، مِنْ اٜ حٛورٜ اَمْ مِ دُلَّ حٜٻُکِ دٛکَّلْ نغَلْ؞

حَٻَنْکِ دٛوْ مَوْنِنْکِ غُنْکِيجِ

¹بَنْدِرَاٻٜ، اٜ مِ يِطِ اَنْدٛنْ کٛ حٜٻِ مَامَعٜنْ مٜىٰطٜنْ؞ ٻٜ نغَطِي يَادُ لٜيْ ندُولَ نجُوتُنغَ ڤٛرْتِينغَ دٛوْ، ٻٜ فُو ٻٜ کُلْتِي مَايٛ وٛطٜوٛ؞ ²يَادُ ندُ ٻٜ نغَطِ لٜيْ ندُولَ اٜ حُولُکِ کِ ٻٜ کُولِ مَايٛ وٛطٜوٛ بٛ ٻٜ نغَطَنَ بَڤْتِسْمَ، ٻٜ نغَرْتِ تٛکُّٻٜ مُوسَ؞ ³ٻٜ فُو ٻٜ ݧَامِي ݧَمْندُ غٛعٛ پِوٛيْندُ تٛ اَللَّه، ⁴ندٜنْ ٻٜ نجَرِي ندِيَمْ نغٛعٛتَمْ پِوٛيْطَمْ تٛ اَللَّه؞ نغَمْ ٻٜ نجَرِي ندِيَمْ دَغَ حَيْرٜ پِوٛيْندٜ تٛ اَللَّه يَادَيْندٜ اٜ مَٻّٜ؞ حَيْرٜ ندٜنْ بٛو وٛنِ اَلْمَسِيحُ؞ ⁵فُو اٜ نٛنْ اَللَّه نَنَايِ بٜلْطُمْ طُطْٻٜ مَٻّٜ حَا ٻٜ مبَرَا، ٻَلِّ مَٻّٜ شَنْکِتَا ندٜرْ لَدّٜ؞

⁶فُو فِي طُعُمْ طُمْ وَطُ نغَمْ طُمْ وَرْتَ مِسَالُ تٛ مٜىٰطٜنْ، نغَمْ تٛع نغَطٜنْ سُونٛ وَطُکِ فِي کَلُّطُمْ نٛنْ نٛ ٻٜ نغَطِ؞ ⁷تٛع اٛنْ نغَرْتُ مَوْنِنٛوٻٜ غُنْکِيجِ نٛ وٛٻّٜ مَٻّٜ نغَطِ؞ نٛنْ نٛ طُمْ وِنْدِرَا، ‏«‏يِمْٻٜ نجٛوطَکٜ ݧَامِي، نجَرِي، ٻٜ اُمِّي، ٻٜ نغَمِ غَمٛلْ کَلُّنغٛلْ؞»‏ ⁸تٛع اٜنْ نغَطُ نجٜىٰنُ نٛ وٛٻّٜ مَٻّٜ نغَطِ حَا يِمْٻٜ 32,000 مَايِ ݧَلْندٜ غٛعٛ؞ ⁹تٛع اٜنْ ڤٛوندُ جٛومِرَاوٛ نٛ وٛٻّٜ مَٻّٜ نغَطِ، حَا بٛولٜ کَلْکِٻٜ؞ ¹⁰ندٜنْ تٛع اٛنْ مٜتِتٛ نٛ وٛٻّٜ مَٻّٜ نغَطِ حَا مَلَاعِکَاجٛ مَيْدٜ وَرِٻٜ؞

¹¹طُعُمْ فُو حٜٻُٻٜ نغَمْ طُمْ وَرْتَ مِسَالُ تٛ مٜىٰطٜنْ، ندٜنْ طُمْ وِنْدَا نغَمْ طُمْ وَغِّنَعٜنْ، اٜنٜنْ غٛنْٻٜ رٜعِرْدٜ جَامَنُ؞

¹²نغَمْ نٛنْ، تَا ݧُمَ اَ دَرِي بٛطُّمْ، وَطُ حَکِّيلٛ تٛع نجَنَا؞ ¹³وَلَا ڤٛوندٛلْ نغٛلْ طُمْ فٛونْدَتَعٛنْ نغٛلْ طُمْ مٜىٰطَايِ فٛوندُکِ نٜطّٛ؞ اَللَّه بٛو اٛ کٜبِّنٛووٛ اَلْکَوَلْ، اٛ اَلَتَا طُمْ فٛوندَعٛنْ ڤٛوندٛلْ ٻُرْنغٛلْ سٜمْبٜ مٛوطٛنْ؞ اَمَّا ندٜرْ ڤٛوندٛلْ نغٛلْ، اٛ وَطَنَيْعٛنْ لَاوٛلْ نٛ مبُرْتٛرْتٛوطٛنْ نغَمْ مبَاوٛنْ مُݧٛنْ ندٜرْ مَغّٛلْ؞

¹⁴نغَمْ نٛنْ، اٛنٛنْ ٻٜ نغِطُمِ، نغٛطِّتٜىٰ مَوْنِنْکِ غُنْکِيجِ؞ ¹⁵اٜ مِ مٜتَنَعٛنْ اٛنٛنْ يِمْٻٜ ٻٜ حَکِّيلٛ؞ ندَارَنٜىٰ کٛعٜ مٛوطٛنْ نغِعٛنْ کٛو کٛ مبِعَيْمِ طُمْ غٛونغَ؞ ¹⁶جَرْدُغٜلْ ندِيَمْ اِنَبٛجَمْ طَمْ نجَرٜتٜنْ ندٜرْ کِرْتَارِ جٛومِرَاوٛ طَمْ نغٜتّٜتٜنْ اَللَّه نغَمْ مَاجَمْ، تٛ اٜنْ نجَرِيطَمْ، نَاع اٜنْ کٜٻَيْ بَرْکَ غٛنْطُمْ ندٜرْ پِيپَمْ اَلْمَسِيحُ؟ ندٜنْ بُرٛودِ طُمْ شٜنْدٜتٜنْ، تٛ اٜنْ ݧَامِيطُمْ، نَاع اٜنْ کٜٻَيْ بَرْکَ غٛنْطُمْ ندٜرْ ٻَنْدُ اَلْمَسِيحُ؟ ¹⁷ندٜ بُرٛودِ طُمْ طُمْ غٛعٛتُمْ، اٜنٜنْ طُطْٻٜ اٜنْ نغَرْتِي بٛ ٻَنْدُ غٛعٛ، نغَمْ اٜنْ فُو بُرٛودِ غٛعٛ ݧَامٜتٜنْ؞

¹⁸ندَارٜىٰ ٻِٻّٜ اِسْرَاعِيلَ؛ ݧَامٛوٻٜ کٛ طُمْ سَکِّ، نَاع ٻٜ نغَرْتِي غٛعٛ ندٜرْ مَوْنِنْکِ اَللَّه؟ ¹⁹طُمٜ نغِطُمِ وِيکِ؟ کٛ طُمْ سَکَّنِ نغُنْکِوَ طُمْ غٛطُّمْ؟ کٛو نغُنْکِوَ طُمْ غٛطُّمْ؟ ²⁰نَاع نٛنْ!‏ اَمَّا کٛ حٜىٰفٜرْٻٜ شَکَّتَ، غِنِّ ٻٜ شَکَّنْتَ، نَاع اَللَّه؞ مِ بٛو يِطَا نغَرْتٛنْ غٛعٛ اٜ غِنِّ؞ ²¹طُمْ وَطَتَاکٛ نجَرٛنْ کٛ وٛنِ ندٜرْ جَرْدُغٜلْ جٛومِرَاوٛ، ندٜنْ فُطِّتٛنْ نجَرٛنْ کٛ وٛنِ ندٜرْ جَرْدُغٜلْ غِنِّ؞ طُمْ وَطَتَاکٛ ݧَامٛنْ کِرْتَارِ جٛومِرَاوٛ، ندٜنْ ݧَامٛنْ ݧَمْندُ غِنِّ؞ ²²اٜنْ نغِطِ نجُکِّتٜنْ جٛومِرَاوٛ اُمِّنَنٜنْمٛ لَوْلِيرُ؟ اٜنْ ݧُمَ اٜنْ ٻُرِيمٛ سٜمْبٜ؟

وَطُ کٛو طُمٜ نغَمْ مَوْنِنْکِ اَللَّه

²³وٛٻّٜ مٛوطٛنْ اٜ مبِعَ، ‏«‏طُمْ جَٻِي نغَطٜنْ کٛو طُمٜ؞»‏ طُمْ نٛنْ، اَمَّا نَاع کٛو طُمٜ نَفَنْتَعٜنْ؞ کَدِنْ اٜ ٻٜ مبِعَ، ‏«‏طُمْ جَٻِي نغَطٜنْ کٛو طُمٜ؞»‏ طُمْ نٛنْ، اَمَّا نَاع کٛو طُمٜ سٜمْبِطِنْتَعٜنْ؞ ²⁴تٛع غٛطّٛ مٛوطٛنْ طَٻِّتَ کٛ نَفَنْتَمٛ تَنْ، اَمَّا اٛ طَٻِّتَ کٛ نَفَنْتَ وٛٻّٜ؞

²⁵ݧَامٜىٰ کٛو نغٜلٜ کُسٜلْ شٛورٜتٜىٰنغٜلْ تٛ لُومٛ؞ تٛع اٛنْ پَمُ کٛو طُمْ سَکَّنِينغٜلْ غُنْکِيجِ؞ ²⁶نغَمْ اَايَارٜ وِعِي، ‏«‏دُونِيَارُ اٜ کٛو طُمٜ کٛ وٛنِ ندٜرْ مَيْرُ، جٛومِرَاوٛ جٜيِطُمْ؞»‏

²⁷تٛ غٛطّٛ مٛ تٛکَّايِ يٜىٰسُ نٛدِّيعٛنْ ݧَامُکِ ݧَمْندُ، تٛ اٛنْ نجَٻِي اٛنْ نجَحِي، ݧَامٜىٰ کٛو طُمٜ کٛ طُمْ حٛکِّعٛنْ، نَاع نَا اٛنْ پَمِي کٛو غُنْکِيجِ طُمْ سَکَّنِ ݧَمْندُ ندُنْ؞ ²⁸اَمَّا تٛ غٛطّٛ وِعِيعٛنْ، ‏«‏غُنْکِيجِ طُمْ سَکَّنِ ݧَمْندُ ندُنْ،»‏ تٛو، تٛع اٛنْ ݧَامُندُ نغَمْ اٛنْ طٛنْ بِيطٛعٛنْکَ، کَدِنْ نغَمْ ݧُمٛ ٻٜرْندٜ؞ ²⁹نَاع دٛوْ ݧُمٛ مٛوطٛنْ مٜتَيْمِ، اَمَّا اٜ مِ مٜتَ دٛوْ ݧُمٛ بِيطٛعٛنْکَ؞ نغَمْ طُمٜ ݧُمٛ غٛطّٛ حَطَتَيَمْ ݧَامُکِ کٛو طُمٜ؟ ³⁰تٛ اٜ مِ يٜتَّ اَللَّه دٛوْ ݧَمْندُ اَمْ، نغَمْ طُمٜ طُمْ حُطَتَيَمْ دٛوْ کٛ نغٜتُّمِ اَللَّه ݧَامُمِ؟

³¹تٛو، کٛو اٛنْ ݧَامَ کٛو اٛنْ نجَرَ، کٛو ندٜرْ کٛو طُمٜ طُمْ نغَطٛتٛنْ، نغَطٜىٰطُمْ نغَمْ تٜدِّنْکِ اَللَّه؞ ³²تٛع اٛنْ نغَطُ غٛطُّمْ کٛ وٛنَّتَ ݧُمٛ غٛطّٛ، کٛو اٛ يَحُودَنْکٜىٰجٛ، کٛو طُمْ وٛنْغٛلْ لٜݧٛلْ، کٛو کَوْتَلْ يِمْٻٜ اَللَّه، ³³نٛنْ نٛ نغِطُمِ مِ وٜلْنَنَ کٛو مٛيٜ ٻٜرْندٜ؞ مِ طَٻِّتَتَا کٛ نَفَنْتَيَمْ، اَمَّا اٜ مِ طَٻِّتَ کٛ نَفَنْتَ يِمْٻٜ طُطْٻٜ، نغَمْ ٻٜ کٜٻَ ٻٜ کِسَ؞

¹اٜکِّتٜىٰ تٛ اَمْ نٛ اٜکِّتٛرِيمِ تٛ اَلْمَسِيحُ؞

حُرْنَاکِ ندٜرْ مَوْنِنْکِ اَللَّه

²اٜ مِ مَنَعٛنْ نغَمْ اٛنْ نغٜجِّتَايِيَمْ ندٜرْ کٛو طُمٜ، ندٜنْ اٛنْ تٛکَّ اٜکِّتِنٛلْ نغٛلْ اٜکِّتِنْمِعٛنْ؞ ³اَمَّا اٜ مِ يِطِ اَنْدٛنْ، اَلْمَسِيحُ وٛنِ اَرْدِيطٛ کٛو مٛيٜ غٛرْکٛ، ندٜنْ غٛرْکٛ وٛنِ اَرْدِيطٛ دٜبّٛ مُوطُمْ، اَللَّه وٛنِ اَرْدِيطٛ اَلْمَسِيحُ؞ ⁴فُو غٛرْکٛ غَطُطٛ دٛعَارٜ کٛو اَنَّبَاکُ اٜ حُرْنِي، اٛ سٜمْتِنِي اَرْدِيطٛمٛ؞ ⁵اَمَّا فُو دٜبّٛ غَطُطٛ دٛعَارٜ کٛو اَنَّبَاکُ حُرْنَاکِ اٛ سٜمْتِنِي اَرْدِيطٛمٛ، اٛ وَرْتِي بٛ اٛ ڤٜمْبُطٛ حٛورٜ مَاکٛ؞ ⁶تٛ دٜبّٛ وَݧِي حُرْنَ حٛورٜ مُوطُمْ، سٜيْ اٛ تَپَ غَاسَ مَاکٛ؞ اَمَّا تٛ اٜ طُمْ سٜمْتِنِي دٜبّٛ تَپَ غَاسَ مُوطُمْ کٛو فٜمْبٛو، تٛو، سٜيْ اٛ حُرْنٛو؞ ⁷غٛرْکٛ حَانَايِ حُرْنَ حٛورٜ مُوطُمْ نغَمْ اٛ تَغَا ندٜرْ نَنْدِ اَللَّه ندٜنْ اٜ مٛ حٛلَّ مَنْغُ اَللَّه، اَمَّا دٜبّٛ اٜ حٛلَّ مَنْغُ غٛرْکٛ؞ ⁸نغَمْ غٛرْکٛ نَاع دَغَ ٻَنْدُ دٜبّٛ تَغَا، اَمَّا دٜبّٛ تَغَا دَغَ ٻَنْدُ غٛرْکٛ؞ ⁹نٛنْ مَا طُمْ تَغَايِ غٛرْکٛ نغَمْ دٜبّٛ، اَمَّا دٜبّٛ تَغَا نغَمْ غٛرْکٛ؞ ¹⁰نغَمْ طُعُمْ اٜ نغَمْ مَلَاعِکَعٜنْ، اٜ حَانِ دٜبّٛ حُرْنٛو؞ ¹¹فُو اٜ نٛنْ، ندٜرْ يِمْٻٜ جٛومِرَاوٛ دٜبّٛ اٜ يِطِ بَلَّلْ غٛرْکٛ، نٛنْ مَا غٛرْکٛ اٜ يِطِ بَلَّلْ دٜبّٛ؞ ¹²دٜبّٛ اَرَنْدٜىٰجٛ اٛ تَغَا دَغَ ٻَنْدُ غٛرْکٛ، ندٜنْ وٛرْٻٜ فُو دٜبّٛ دَݧِٻٜ، اَمَّا کٛو طُمٜ دَغَ تٛ اَللَّه طُمْ پِوٛيِ؞

¹³ݧُمٜىٰ اٜ کٛعٜ مٛوطٛنْ، اٜ طُمْ حَانِ دٜبّٛ وَطَ دٛعَارٜ حُرْنَاکِ؟ ¹⁴نَاع اٜ يِيکِ يِمْٻٜ، تٛ غٛرْکٛ اَلِي غَاسَ حٛورٜ مُوطُمْ جُوتِي، طُمْ شٜمْتِنِيطُمْ؟ ¹⁵اَمَّا تٛ دٜبّٛ اٜ وٛودِ غَاسَ نجُوتُکَ، طُمْ وَرْتِي کٛ اٛ مَنْتٛرْتٛو؞ اَللَّه حٛکِّيمٛ غَاسَ کَنْ نغَمْ کَ سُدَّنَمٛ حٛورٜ؞ ¹⁶تٛ بٛو غٛطّٛ اٜ يِطِ يٜدَّ حَالَ کَعَ، سٜيْ اٛ اَنْدَ مِنْ نغَلَا غٛطُّمْ ندٛنُ فٜىٰرٜ، نٛنْ مَا کٛو نغَلٜ کَوْتَلْ يِمْٻٜ اَللَّه؞

کِرْتَارِ جٛومِرَاوٛ

¹⁷تٛو، اٜ وٛودِ کٛ نغِطُمِ وِيکِعٛنْ، مِ مَنْتَتَاعٛنْ دٛوْ مَاجُمْ، نغَمْ فُو شَرٜلْ کٛ کَوْرُتُطٛنْ نغَمْ مَوْنِنْکِ اَللَّه، حَوْرُتُکِ کِنْ نَفَنْتَاعٛنْ، سٜيْ نِ اٜ کِ ٻٜيْدَ سٛعُّکِعٛنْ غَطَ؞ ¹⁸اَرَنْدٜ، مِ نَنِي اٛنٛنْ تٛکُّٻٜ يٜىٰسُ تٛ اٛنْ کَوْرِتِي، اٜ وٛودِ فٜىٰرٛوتِرٛلْ حَکُّندٜ مٛوطٛنْ؞ اٜ مِ ݧُمَ اٜ وٛودِ غٛونغَ ندٜرْ حَالَ کَنْ؞ ¹⁹وَلَا سٜکٛ دٛولٜ طُمْ حٜٻَ فٜىٰرٛوتِرٛلْ حَکُّندٜ مٛوطٛنْ، نغَمْ طُمْ وَاوَ حٜٻْتُکِ ٻٜيٜ نغٛنِ دَرِيٻٜ اٜ غٛونغَ ندٜرْ مٛوطٛنْ؞ ²⁰تٛ اٛنْ کَوْرِتِي، غٛونغَ نَاع نغَمْ ݧَامُکِ کِرْتَارِ جٛومِرَاوٛ کَوْرِتٛتٛنْ؞ ²¹نغَمْ تٛ شَرٜلْ حِرْتَاکِ وَطِي، کٛو مٛيٜ اٜ ݧَمْرَ يٜىٰسٛ اٜ ݧَامُکِ ݧَمْندُ مُوطُمْ، وَلَا کٜطٛتٛوطٛ غٛطّٛ؞ غٛطّٛ اَلْدٜىٰ اٜ وٜىٰلٛ، غٛطّٛ بٛو يَرَ نَا يِلْتَکٜ؞ ²²تٛو، اٛنْ نغَلَا غُرٜ تٛ ݧَامٛتٛنْ نجَرٛنْ؟ کٛو اٛنْ نجَوَنَ کَوْتَلْ يِمْٻٜ اَللَّه، ندٜنْ اٛنْ شٜمْتِنَ ٻٜ نغَلَنَا؟ تٛو، کٛ مبِعَيْمِعٛنْ؟ مِ مَنَعٛنْ دٛوْ نٛنْ؟ مِ وَاوَتَا مِ مَنَعٛنْ دٛوْ مَاجُمْ کٛو سٜطَّ؞

²³نغَمْ کٛ نَنْمِ تٛ جٛومِرَاوٛ، کَنْجُمْ اٜکِّتِنْمِعٛنْ؞ ندٜرْ جٜمَّارٜ ندٜ طُمْ حٛکِّتِرِ جٛومِرَاوٛ مٜىٰطٜنْ يٜىٰسُ، اٛ حٛشِّ بُرٛودِ، ²⁴اٛ يٜتِّ اَللَّه، اٛ سٜنْدِطُمْ، اٛ وِعِ، ‏«‏طُعُمْ طُمْ ٻَنْدُ اَمْ کٛکَّاندُ نغَمْ مٛوطٛنْ؞ نغَطٜىٰ کَ وَطُکِ نٛنْ نغَمْ سِفْتٛرْکِيَمْ؞»‏ ²⁵نٛنْ مَا، غَطَ ٻٜ کِرْتَکٜ، اٛ حٛشِّ جَرْدُغٜلْ ندِيَمْ اِنَبٛجَمْ، اٛ وِعِ، ‏«‏طَعَمْ اِنَبٛجَمْ نغٛنْطَمْ ندٜرْ جَرْدُغٜلْ نغٜعٜلْ کَنْجَمْ وٛنِ اَلْکَوَلْ کٜسَلْ تَبِّتَيْنغَلْ اٜ پِيپَمْ اَمْ؞ نغَطٜىٰ نٛنْ فُو شَرٜلْ نغٜلْ نجَرٛتٛنْطَمْ نغَمْ سِفْتٛرْکِيَمْ؞»‏

²⁶فُو شَرٜلْ نغٜلْ ݧَامٛتٛنْ بُرٛودِ طُمْ ندٜنْ اٛنْ نجَرَ اِنَبٛجَمْ طَمْ، نغَطٜىٰ نٛنْ اٛنْ کٛکَّ حَبَرُ مَيْدٜ يٜىٰسُ جٛومِرَاوٛ؞ نغَطٜىٰ کَ وَطُکِ نٛنْ حَا شَرٜلْ نغٜلْ اٛ وَرْتٛيْتَ؞

²⁷نغَمْ نٛنْ، فُو ݧَامُطٛ بُرٛودِ طُمْ، کٛو يَرِي اِنَبٛجَمْ طَمْ جٛومِرَاوٛ نٛ حَانَا، اٛ وَطِي حَکّٜ وَرْتِرْکِ ٻَنْدُ جٛومِرَاوٛ اٜ پِيپَمْ جٛومِرَاوٛ مٜىٰرٜ؞ ²⁸اٜ حَانِ نٜطّٛ فٛوندَ حٛورٜ مُوطُمْ کٛ اٛ ݧَامَ بُرٛودِ طُمْ اٛ يَرَ اِنَبٛجَمْ طَمْ؞ ²⁹فُو ݧَامُطٛ بُرٛودِ طُمْ يَرِ اِنَبٛجَمْ طَمْ، تٛ اٛ ݧُمَايِ دٛوْ ٻَنْدُ جٛومِرَاوٛ، اٛ فٛوطَنِي حٛورٜ مَاکٛ کِيتَ لَاوٛلْ ݧَامُکِ اٜ يَرْکِ کِ اٛ وَطِ؞ ³⁰کَنْجُمْ وَطِ طُطْٻٜ ندٜرْ مٛوطٛنْ ٻَلِّ مَٻّٜ شٜمْبِطَا اٛنْ نغٛودِ شِيَ نجَمُ، ندٜنْ وٛٻّٜ مٛوطٛنْ بٛو مَايِي؞ ³¹اَمَّا تٛ اٜنْ ڤٛوندِي کٛعٜ مٜىٰطٜنْ، اَللَّه وَطَنْتَاعٜنْ کِيتَ؞ ³²تٛ جٛومِرَاوٛ نَتِّنِيعٜنْ تٛرَّ، اٜ مٛ يِطِ اٛ اٜلْتَعٜنْ، نغَمْ تٛع طُمْ تَپَنَعٜنْ کِيتَ حَوْتِ اٜ دُونِيَارُ؞

³³نغَمْ نٛنْ، بَنْدِرَاٻٜ اَمْ، تٛ اٛنْ کَوْرِتِي نغَمْ ݧَامُکِ کِرْتَارِ ندِنْ، کٜطٛوتِرٜىٰ؞ ³⁴تٛ اٜ وٛودِ نَنٛووٛ وٜىٰلٛ ندٜرْ مٛوطٛنْ، سٜيْ اٛ ݧَامَ ݧَمْندُ تٛ وُرٛ، نغَمْ تٛع حَوْرُتُکِ مٛوطٛنْ فٛوطَنَعٛنْ کِيتَ؞ دٛوْ فِي کٛرِيطُمْ بٛو، تٛ مِ وَرِي، مِ اٜکِّتِنَيْعٛنْ دٛوْ مَاجُمْ؞

دٛکّٜ طٜ رُوحُ اَللَّه حٛکَّتَ

¹جٛونِ بَنْدِرَاٻٜ اَمْ، دٛوْ دٛکّٜ طٜ رُوحُ اَللَّه حٛکَّتَ، اٜ مِ يِطِ ڤَامٛنْ؞ ²اٛنْ اَنْدِ شَرٜلْ نغٜلْ نغٛنّٛوطٛنْ حٜىٰفٜرْٻٜ طُمْ فٛوطِي حَکِّيلٛ مٛوطٛنْ طُمْ مَجِّنِيعٛنْ، اٛنْ مَوْنِنَ غُنْکِيجِ طِ مٜتَتَا؞ ³نغَمْ نٛنْ، اٜ مِ يِطِ اَنْدٛنْ وَلَا نٜطّٛ مٛ رُوحُ اَللَّه تٛکِّنْتَ وِعَ، ‏«‏يٜىٰسُ اٛ لَانَاطٛ!‏»‏ نٛنْ مَا وَلَا بَاوَيْطٛ وِعَ، ‏«‏يٜىٰسُ اٛ جٛومِرَاوٛ،»‏ سٜيْ نِ تٛ رُوحُ اَللَّه تٛکِّنِيمٛ؞

⁴تٛو، اٜ وٛودِ دٛکّٜ فٜىٰرٜ‑فٜىٰرٜ، اَمَّا رُوحُ غٛعٛتُمْ حٛکَّتَطٜ؞ ⁵اٜ وٛودِ کُوطٜ فٜىٰرٜ‑فٜىٰرٜ، اَمَّا جٛومِرَاوٛ غٛعٛتٛ حُوَنْتٜىٰطٜ؞ ⁶اٜ وٛودِ لَاوِ حُوَنْکِ اَللَّه فٜىٰرٜ‑فٜىٰرٜ، اَمَّا اَللَّه غٛعٛتٛ حٛکَّتَ کٛو مٛيٜ بَوْطٜ حُوتِرْکِطِ؞ ⁷اَللَّه اٜ حٛکَّ کٛو مٛيٜ نٜطّٛ اَلَامَ کٛلّٛوجُمْ اٜ مٛ وٛودِ رُوحُ اَللَّه نغَمْ ٻٜيْدَارِ کٛو مٛيٜ؞ ⁸رُوحُ طُمْ، کَنْجُمْ حٛکَّتَ غٛطّٛ دٛکَّلْ وٛلْدٜ فَامُ، غٛطّٛ بٛو دٛکَّلْ وٛلْدٜ اَنْدَلْ؞ ⁹کَنْجُمْ حٛکَّتَ غٛطّٛ دٛکَّلْ حٛولَاکِ اَللَّه، ندٜنْ غٛطّٛ بٛو دٛکَّلْ يَمْطِتِنْکِ ݧَوْٻٜ، ¹⁰غٛطّٛ کَدِنْ دٛکَّلْ وَطُکِ فِي کَيْطِنِيطُمْ، غٛطّٛ وَطُکِ اَنَّبَاکُ، غٛطّٛ بٛو مبَوْکَ فٜىٰرٛوتِرْکِ حَکُّندٜ رُوحُ اَللَّه اٜ غِنِّ، غٛطّٛ بٛو مبَوْکَ وَطِرْکِ دٛعَارٜ طٜمْطٜ طٜ ٻٜ اَنْدَا، غٛطّٛ بٛو مبَوْکَ حٛکُّکِ مَعَنَ طٜمْطٜ طٜنْ؞ ¹¹فُو فِي طُعُمْ طُمْ کُوغَلْ رُوحُ غٛعٛتُمْ، کَنْجُمْ حٛکَّتَ کٛو مٛيٜ دٛکَّلْ نٛنْ نٛ طُمْ سُٻِرِ؞

ٻَنْدُ غٛعٛ، جٛکّٛوطٜ طُطّٜ

¹²ٻَنْدُ غٛعٛ اٜ وٛودِ جٛکّٛوطٜ طُطّٜ؞ فُو جٛکّٛوطٜ ٻَنْدُ ندُنْ کٛو ندٜ اٜ طٜ طُوطِ، کَنْجٜ کَوْتِ نغَرْتِ ٻَنْدُ غٛعٛ؞ تٛو، نٛنْ مَا تٛکُّٻٜ اَلْمَسِيحُ نغٛنْتِندِرِ؞ ¹³يَحُودَنْکٛعٜنْ، اٜ لٜپِّ فٜىٰرٜ، اٜ مَشُّٻٜ، اٜ نَاع مَشُّٻٜ، اٜنْ فُو اٜنْ نغَطَنَامَ بَڤْتِسْمَ ندٜرْ رُوحُ غٛعٛتُمْ نغَمْ نغَرْتٜنْ بٛ ٻَنْدُ غٛعٛ، ندٜنْ اٜنْ فُو اَللَّه حٛکِّيعٜنْ رُوحُ طُمْ؞

¹⁴نغَمْ ٻَنْدُ نَاع جٛکّٛودٜ وٛعٛيْرٜ تَنْ وٛودِ، اَمَّا جٛکّٛوطٜ طُطّٜ ندُ وٛودِ؞ ¹⁵تٛ کٛيْنغَلْ وِعِي، ‏«‏ندٜ نَاع مِ جُنْغٛ، ٻَنْدُ جٜيَايِيَمْ،»‏ وِعُکِ نٛنْ سٜنْدَتَانغَلْ اٜ ٻَنْدُ ندُنْ؞ ¹⁶نٛنْ مَا تٛ نٛوْرُ وِعِي، ‏«‏ندٜ نَاع مِ حِتٜرٜ، ٻَنْدُ جٜيَايِيَمْ،»‏ وِعُکِ نٛنْ سٜنْدَتَاندُ اٜ ٻَنْدُ ندُنْ؞ ¹⁷تٛ ٻَنْدُ فُو وَرْتِي غِتٜ، تٛو، کٛ طُمْ نَنِرْتَ؟ تٛ ٻَنْدُ فُو وَرْتِي نٛڤِّ، کٛ طُمْ نَنِرْتَ لُمْنغٛلْ؟ ¹⁸اَمَّا نٛ طُمْ وٛنْتِندِرِ، اَللَّه سِرْيَکٜ جٛکّٛوطٜ ندٜرْ ٻَنْدُ، اٛ سِرْيَکٜ کٛو ندٜيٜ جٛکّٛودٜ نٛنْ نٛ اٛ يِطِرِ؞ ¹⁹تٛ ٻَنْدُ اٜ وٛودِ جٛکّٛودٜ غٛعٛ تَنْ، ندٜنْ نَاع طُمْ ٻَنْدُ؞ ²⁰نٛ طُمْ وٛنْتِندِرِ، ٻَنْدُ ندُ وٛعٛيْرُ، اَمَّا اٜ ندُ وٛودِ جٛکّٛوطٜ طُطّٜ؞

²¹حِتٜرٜ فٛتَايِ وِعَ جُنْغٛ، ‏«‏اَ نَفَنْتَايَمْ؞»‏ طٛنْمَا حٛورٜ فٛتَايِ وِعَ کٛيْطٜ، ‏«‏اٛنْ نَفَنْتَايَمْ؞»‏ ²²نَاع نٛنْ طُمْ وٛنِ؞ جٛکّٛوطٜ طٜ طُمْ يِعَتَ بٛ طٜ شٜمْبِطَا، کَنْجٜ ٻُرِ نَفُکِ؞ ²³جٛکُّلٜ ٻَنْدُ طٜ نغِعٜتٜنْ بٛ سٜطَّ تَنْ طٜ نَفِ، کَنْجٜ ٻُرْطٜنْ فَامَنْکِ بٛطُّمْ، ندٜنْ جٛکّٛوطٜ طٜ شٜمْتٜتٜنْ يِيکِ، کَنْجٜ ٻُرْطٜنْ فَامَنْکِ؞ ²⁴جٛکُّلٜ مٜىٰطٜنْ ٻُرْطٜ وٛوطُکِ، نَاع نَا اٜنْ ڤَامَنِيطٜ؞ اَمَّا اَللَّه حَوْتِي جٛکّٛوطٜ ٻَنْدُ فُو؞ جٛکُّلٜ طٜ نغِعٜتٜنْ بٛ سٜطَّ تَنْ طٜ نَفِ، اٛ حٛکِّيطٜ مَنْغُ ٻُرْطُمْ، ²⁵نغَمْ تٛع طُمْ حٜٻَ فٜىٰرٛوتِرٛلْ ندٜرْ ٻَنْدُ، اَمَّا جٛکّٛوطٜ طٜنْ فُو طٜ نغِطِندِرَ يِدّٜ غٛعٛ؞ ²⁶تٛ وٛنْدٜ جٛکّٛودٜ نَوْنَکٜ، سٜيْ کٛرِيطٜ فُو نَنِدَ نَوْطُمْ اٜ جٛکّٛودٜ ندٜنْ؞ تٛ جٛکّٛودٜ وٛعٛيْرٜ مَوْنِنَامَ، سٜيْ کٛرِيطٜ فُو کَوْتَ مبٜلْمبٜلْتَ حَوْتِ اٜ جٛکّٛودٜ ندٜنْ؞

²⁷تٛو، اٛنٛنْ نغٛنِ ٻَنْدُ اَلْمَسِيحُ، کٛو مٛيٜ مٛوطٛنْ بٛ طُمْ جٛکّٛودٜ مَاکٛ؞ ²⁸ندٜرْ کَوْتَلْ تٛکُّٻٜ يٜىٰسُ، اَرَنْدٜ اَللَّه وَرْتِرِي وٛٻّٜ لِلَاٻٜ، وٛٻّٜ بٛو اٛ وَرْتِرِيٻٜ اَنَّبٛعٜنْ، ندٜنْ وٛٻّٜ اٜکِّتِنٛوٻٜ، وٛٻّٜ بٛو غَطٛوٻٜ کُوطٜ کَيْطِنِيطٜ، وٛٻّٜ بٛو يَمْطِتِنٛوٻٜ ݧَوْٻٜ، وٛٻّٜ بٛو وَلّٛوٻٜ، وٛٻّٜ اَرْدِيٻٜ، وٛٻّٜ بٛو غَطِرٛوٻٜ دٛعَارٜ طٜمْطٜ طٜ ٻٜ اَنْدَا؞ ²⁹ٻٜ فُو نغٛنِ لِلَاٻٜ؟ ٻٜ فُو نغٛنِ اَنَّبٛعٜنْ؟ ٻٜ فُو نغٛنِ اٜکِّتِنٛوٻٜ؟ ٻٜ فُو نغٛنِ غَطٛوٻٜ کُوطٜ کَيْطِنِيطٜ؟ ³⁰ٻٜ فُو نغٛنِ يَمْطِتِنٛوٻٜ ݧَوْٻٜ؟ ٻٜ فُو نغٛنِ غَطِرٛوٻٜ دٛعَارٜ طٜمْطٜ طٜ ٻٜ اَنْدَا؟ ٻٜ فُو مبَاوِ حٛکُّکِ مَعَنَ طٜمْطٜ طٜنْ؟ نَاع نٛنْ!‏ ³¹اَمَّا اٛنٛنْ طَٻِّتٜىٰ حٜٻُکِ دٛکّٜ ٻُرْطٜ مَنْغُ؞

جٛونِ مِ حٛلَّيْعٛنْ لَاوٛلْ ٻُرْنغٛلْ وٛوطُکِ؞

يِدّٜ

¹تٛ مِ مٜتِرِي طٜمْطٜ يِمْٻٜ اٜ طٜ مَلَاعِکَعٜنْ، اَمَّا مِ وَلَا يِدّٜ، تٛو، مِ وَرْتِي بٛ لٜنْغُرُ شٛݧٛورُ تَنْ، کٛو مبَغُّ اِيدٛووُ اٜ مٜىٰرٜ؞ ²تٛ اٜ مِ وَطَ اَنَّبَاکُ، ندٜنْ تٛ اٜ مِ فَامَ سِرُّوجِ اَللَّه، تٛ اٜ مِ وٛودِ اَنْدَلْ کٜوْنغَلْ، کٛو تٛ اٜ مِ وٛودِ حٛولَارٜ شٜمْبِنْدٜ حَا اٜ مِ سٛتِّنَ کٛشّٜىٰجٜ، اَمَّا مِ وَلَا يِدّٜ، تٛو، وَلَا کٛ نَفُمِ؞ ³تٛ مِ حٛکِّي ٻٜ نغَلَنَا فُو کٛ نغٛودُمِ، کٛو مِ جَٻِي ٻَنْدُ اَمْ وُلٜىٰ، تٛ مِ وَلَا يِدّٜ، وَلَا کٛ ٻٜيْدٛرِيمِ؞

⁴غٛودُطٛ يِدّٜ اٜ وٛودِ مُݧَلْ، اٜ نغِکُّ بٛطُّمْ؞ اٛ وَلَا لَوْلِيرُ، اٛ مَنْتِتَتَاکٛ، اٛ وَلَا مَنْغُ حٛورٜ؞ ⁵غٛودُطٛ يِدّٜ وَطَتَا کٛ سٜمْتِنِي، اٛ طَٻِّتَتَا کٛ وَلَّتَمٛ کَنْکٛ تَنْ؞ اٛ يَاوَا مٛنُّکِ، اٛ جٛغِتَتَاکٛ فِي کَلُّطُمْ طُمْ غٛطّٛ وَطَنِمٛ؞ ⁶غٛودُطٛ يِدّٜ نَنَتَا بٜلْطُمْ حَلّٜىٰندٜ، اَمَّا اٜ مٛ نَنَ بٜلْطُمْ غٛونغَ؞ ⁷اٜ مٛ مُݧَ ندٜرْ کٛو طُمٜ؞ حٛولَارٜ مَاکٛ، اٜ کَمُّندٜ مَاکٛ، اٜ مُݧَلْ مَاکٛ رٜعَتَا؞

⁸اَنَّبَاکُ رٜعَيْ، وَطِرْکِ دٛعَارٜ طٜمْطٜ طٜ طُمْ اَنْدَا پَٻّٛتٛ، اَنْدَلْ رٜعَيْ، اَمَّا يِدّٜ رٜعَتَا حَا اَبَدَا؞ ⁹نغَمْ اَنْدَلْ مٜىٰطٜنْ اٜ اَنَّبَاکُ مٜىٰطٜنْ نَاع طُمْ کٜوْطُمْ، ¹⁰اَمَّا تٛ کٜوْطُمْ وَرِي، کٛ حٜىٰوَايِ رٜعَيْ؞

¹¹شَرٜلْ کٛ نغٛنْمِ سُکَيٜلْ، مِ مٜتِي نٛ سُکَيٜلْ مٜتِرْتَ، مِ ݧُمِي نٛ سُکَيٜلْ ݧُمِرْتَ؞ اَمَّا ندٜ مَوْنُمِ، مِ اَلِي نغِکُّ سُکَاکُ؞ ¹²کٛ نغِعٜتٜنْ جٛونِ، اٜنْ نغِعَتَاطُمْ بٛطُّمْ بٛ دَارٛووٛ دَارٛغَّلْ ݧِٻُّنغَلْ، اَمَّا شَرٜلْ اٜ وَرَ نغٜلْ نغِعٜتٜنْطُمْ بٛطُّمْ؞ جٛونِ سٜطَّ تَنْ اَنْدُمِ، اَمَّا شَرٜلْ اٜ وَرَ نغٜلْ اَنْدَيْمِ اَنْدَلْ کٜوْنغَلْ، نٛنْ نٛ طُمْ اَنْدِرِيَمْ؞

¹³تٛو، جٛونِ اٜ وٛودِ فِي تَتُمْ، وَاتٛ حٛولَارٜ، اٜ کَمُّندٜ، اٜ يِدّٜ، اَمَّا يِدّٜ وٛنِ کٛ ٻُرِي مَنْغُ؞

بُلُسْ فُطِّتِي مٜتِي دٛوْ دٛکّٜ رُوحُ

¹نغَطٜىٰ کٛ مبَاوٛتٛنْ وَطُکِ نغَرْتٛنْ غٛودُٻٜ يِدّٜ، ندٜنْ طَٻِّتٜىٰ دٛکّٜ رُوحُ اَللَّه، کٛ ٻُرِ وٛنِ دٛکَّلْ وَطُکِ اَنَّبَاکُ؞ ²نغَمْ غَطِرٛووٛ دٛعَارٜ طٜمْنغَلْ نغَلْ طُمْ اَنْدَا نَاع يِمْٻٜ اٛ مٜتَنْتَ، اَللَّه اٛ مٜتَنْتَ؞ وَلَا ڤَامَيْطٛ کٛ اٛ وِعَتَ، نغَمْ سِرُّوجِ اٛ مٜتَتَ لَاوٛلْ رُوحُ اَللَّه؞ ³اَمَّا فُو غَطُطٛ اَنَّبَاکُ، يِمْٻٜ اٛ مٜتَنْتَ، نغَمْ اٛ ٻٜيْدَنَٻٜ حٛولَارٜ، اٛ سٜمْبِطِنَٻٜ، اٛ وَلْتِنَ ٻٜرْطٜ مَٻّٜ؞ ⁴غَطِرٛووٛ دٛعَارٜ طٜمْنغَلْ نغَلْ طُمْ اَنْدَا حٛورٜ مَاکٛ اٛ سٜمْبِطِنْتَ، اَمَّا غَطٛووٛ اَنَّبَاکُ، تٛکُّٻٜ يٜىٰسُ اٛ سٜمْبِطِنْتَ؞

⁵اٜ مِ يِطِ اٛنْ فُو نغَطِرٛنْ دٛعَارٜ طٜمْطٜ طٜ طُمْ اَنْدَا، اَمَّا مِ ٻُرِي يِطُکِ نغَطٛنْ اَنَّبَاکُ؞ نغَمْ غَطٛووٛ اَنَّبَاکُ ٻُرِي غَطِرٛووٛ دٛعَارٜ طٜمْطٜ طٜ طُمْ اَنْدَا، سٜيْ نِ تٛ اٜ مٛ حٛکَّ مَعَنَ مَاجٜ، نغَمْ اٛ سٜمْبِطِنَ تٛکُّٻٜ يٜىٰسُ؞ ⁶تٛو، جٛونِ بَنْدِرَاٻٜ اَمْ، تٛ مِ وَرِي تٛ مٛوطٛنْ مِ وَطِرِي دٛعَارٜ طٜمْطٜ طٜ طُمْ اَنْدَا، طُمٜ طُمْ ٻٜيْدَنْتَعٛنْ؟ وَلَا!‏ سٜيْ نِ تٛ مِ وِعِيعٛنْ کٛ اَللَّه وَنْغِنَنِيَمْ، کٛو مِ اٜکِّتِنِيعٛنْ کٛ اَنْدُمِ دٛوْ اَللَّه، کٛو مِ وَطَنِيعٛنْ اَنَّبَاکُ، کٛو مِ اٜکِّتِنِيعٛنْ وٛلْدٜ اَللَّه؞ ⁷رَا مِسَالُ دٛوْ فِي طُمْ وَلَا يٛنْکِ، وَاتٛ دُودَاندُ اٜ غَرَايَارُ؞ تٛ دُودَاندُ دُودَاکَ بٛطُّمْ کٛو تٛ غَرَايَارُ ڤِيَاکَ بٛطُّمْ، نٛ طُمْ اَنْدِرْتَ دُودُکِ کِنْ کٛو ڤِيٛلْ نغٛلْ؟ ⁸طٛنْمَا، تٛ دُودٛووٛ لُوَلْ کٛنُ دُودَايِنغَلْ بٛطُّمْ، مٛيٜ سِرْيٛتٛو يَاکِ کٛنُ؟ ⁹نٛنْ طُمْ وٛنِ تٛ مٛوطٛنْ، تٛ نَاع اٛنْ نغَطِرْ دٛعَارٜ طٜمْنغَلْ نغَلْ يِمْٻٜ نَنَتَ، نٛ وَطَتَ ٻٜ ڤَامَ کٛ مبِعٛتٛنْ؟ طُمْ وَرْتَيْ بٛ اٛنْ مٜتَ اٜ مٜىٰرٜ؞ ¹⁰غٛونغَ، اٜ وٛودِ طٜمْطٜ فٜىٰرٜ‑فٜىٰرٜ اٜ دُونِيَارُ، اَمَّا ندٜرْ طٜمْطٜ طٜنْ وَلَا طٜمْنغَلْ نغَلْ وَلَا مَعَنَ؞ ¹¹تٛ مِ فَامَايِ طٜمْنغَلْ نغَلْ غٛطّٛ مٜتِ، مِ وَرْتِي کٛطٛ تٛ مَاکٛ، کَنْکٛ مَا اٛ وَرْتِي کٛطٛ تٛ اَمْ؞ ¹²اٛنٛنْ مَا، نٛنْ طُمْ وٛنِ تٛ مٛوطٛنْ؞ ندٜ اٛنْ کَاٻِي کٜٻٛنْ دٛکّٜ رُوحُ اَللَّه، نغَطٜىٰ کٛ مبَاوٛتٛنْ وَطُکِ ٻُرٛنْ حُوتِرْکِ دٛکّٜ شٜمْبِطِنَيْطٜ تٛکُّٻٜ يٜىٰسُ؞

¹³نغَمْ نٛنْ، فُو غَطِرْطٛ دٛعَارٜ طٜمْنغَلْ نغَلْ اٛ اَنْدَا، سٜيْ اٛ تٛرٛو اَللَّه وَلَّمٛ اٛ وَاوَ حٛکُّکِ مَعَنَ طٜمْنغَلْ نغَلْ؞ ¹⁴نغَمْ تٛ مِ وَطِرِي دٛعَارٜ طٜمْنغَلْ نغَلْ مِ اَنْدَا، ٻٜرْندٜ اَمْ وَطِي دٛعَارٜ، اَمَّا مِ حٜٻْتَتَا کٛ مبِيمِ؞ ¹⁵تٛو، کٛ حَانِ مِ وَطَ؟ مِ وَطَيْ دٛعَارٜ ندٜرْ ٻٜرْندٜ اَمْ، طٛنْمَا مِ وَطَيْ دٛعَارٜ ندٜرْ ݧُمٛلْ اَمْ؞ مِ يِمَيْ غِمٛلْ مَنْتُکِ اَللَّه ندٜرْ ٻٜرْندٜ اَمْ، طٛنْمَا مِ يِمَيْ ندٜرْ ݧُمٛ اَمْ؞ ¹⁶تٛ نَاع نٛنْ، تَا يٜتِّي اَللَّه ندٜرْ طٜمْنغَلْ نغَلْ اَ اَنْدَا، نٛ غٛطّٛ مٛ نَنَتَانغَلْ وِيرَتَ ‏«‏اَامِنْ»‏ دٛوْ يٜتّٛورٜ مَاطَ؟ اٛ فَامَايِ کٛ مبِيطَا؞ ¹⁷طُمْ غٛونغَ اَ يٜتَّ اَللَّه بٛطُّمْ، اَمَّا طُمْ سٜمْبِطِنْتَا نَنَيْطٛمَ؞

¹⁸مِ يٜتِّي اَللَّه نغَمْ مِ ٻُرِيعٛنْ اٛنْ فُو وَطِرْکِ دٛعَارٜ طٜمْطٜ طٜ مِ اَنْدَا؞ ¹⁹اَمَّا ندٜرْ کَوْتَلْ تٛکُّٻٜ يٜىٰسُ طُمْ ٻُرِي مِ مٜتَ بٛلِيطٜ جٛوِ ڤَامٜتٜىٰطٜ نغَمْ مِ اٜکِّتِنَ وٛٻّٜ اٜ دٛوْ مِ مٜتَ بٛلِيطٜ 10,000 ندٜرْ طٜمْنغَلْ نغَلْ طُمْ اَنْدَا؞

²⁰بَنْدِرَاٻٜ، اَلٜىٰ ݧُمُکِ بٛ سُکَحٛيْ؞ نغَرْتٜىٰ ٻٜ نغَلَا حَلّٜىٰندٜ بٛ ٻِکّٛيْ کٜشّٛيْ، اَمَّا نغَرْتٜىٰ بٛ مَوْٻٜ ندٜرْ ݧُمٛ مٛوطٛنْ؞ ²¹اَتَّوْرَ وِعِي جٛومِرَاوٛ وِعِي،

‏«‏مِ مٜتَنَيْ يِمْٻٜ اَمْ

لَاوٛلْ مٜتٛوٻٜ طٜمْطٜ طٜ اَنْدَاکَ؞

مِ مٜتَنَيْٻٜ اٜ حٛنْدُکٛ يِمْٻٜ غٛطّٜ لٜيْطٜ،

اَمَّا فُو اٜ نٛنْ ٻٜ کٜتِّندَنْتَاکٛيَمْ؞»‏

²²نغَمْ نٛنْ، وَطِرْکِ دٛعَارٜ طٜمْطٜ طٜ طُمْ اَنْدَا نَاع طُمْ اَلَامَ نغَمْ تٛکُّٻٜ يٜىٰسُ، اَمَّا طُمْ اَلَامَ نغَمْ يِمْٻٜ ٻٜ تٛکَّايِ يٜىٰسُ؞ اَنَّبَاکُ بٛو طُمْ نغَمْ تٛکُّٻٜ يٜىٰسُ، نَاع نغَمْ يِمْٻٜ ٻٜ تٛکَّايِ يٜىٰسُ؞

²³نغَمْ نٛنْ، تٛ اٛنْ فُو اٛنْ کَوْرِتِي کٛو مٛيٜ اٜ وَطِرَ دٛعَارٜ طٜمْطٜ طٜ طُمْ اَنْدَا، تٛ وٛٻّٜ ٻٜ ڤَامَايِ کٛو يِمْٻٜ ٻٜ تٛکَّايِ يٜىٰسُ نَتِّي ندٜرْ مٛوطٛنْ، نَاع ٻٜ مبِعَيْ اٛنْ حَاݝَاٻٜ؟ ²⁴اَمَّا تٛ غٛطّٛ مٛ تٛکَّايِ يٜىٰسُ کٛو غٛطّٛ مٛ اَنْدَا کٛ نغَطٛتٛنْ نَتِّي ندٜرْ مٛوطٛنْ تَوِي کٛو مٛيٜ اٜ وَطَ اَنَّبَاکُ، اٛ فَامَيْ اٛ وَطِي حَکّٜ، نٛنْ وَطَيْ اٛ طَٻِّتَ اٛ تُوبَ؞ ²⁵کٛ وٛنِ ندٜرْ ٻٜرْندٜ مَاکٛ شُوطِيطُمْ طُمْ وُرْتٛتٛ اٜ نجَيْرِ، اٛ دِشّٛتٛ، اٛ مَوْنِنَ اَللَّه، اٜ مٛ وِعَ، ‏«‏غٛونغَ، اَللَّه اٜ طٛنْ ندٜرْ مٛوطٛنْ؞»‏

مَوْنِنْکِ اَللَّه نٛ حَانِ

²⁶تٛو، بَنْدِرَاٻٜ، طُمٜ نغَطٛتٛنْ؟ تٛ اٛنْ کَوْرِتِي نغَمْ مَوْنِنْکِ اَللَّه، غٛطّٛ اٜ وٛودِ غِمٛلْ، غٛطّٛ اٜ وٛودِ اٜکِّتِنٛلْ، ندٜنْ غٛطّٛ اٜ وَطِرَيْ دٛعَارٜ طٜمْنغَلْ نغَلْ طُمْ اَنْدَا، غٛطّٛ حٛکَّيْ مَعَنَ طٜمْنغَلْ نغَلْ؞ طُمْ فُو طُمْ وَطٜىٰ نغَمْ سٜمْبِطِنْکِ کَوْتَلْ تٛکُّٻٜ يٜىٰسُ؞ ²⁷تٛ وٛٻّٜ اٜ نغَطِرَ دٛعَارٜ طٜمْنغَلْ نغَلْ طُمْ اَنْدَا، تٛع ٻٜ ٻُرَ طِطٛ کٛو تَتٛ؞ اٜ حَانِ ٻٜ مٜتَ غٛعٛ‑غٛعٛ، طٛنْمَا دٛولٜ غٛطّٛ حٛکَّ مَعَنَ کٛ ٻٜ مبِعَتَ؞ ²⁸اَمَّا تٛ وَلَا کٛکّٛووٛ مَعَنَ کٛ ٻٜ مبِعَتَ، اٜ حَانِ ٻٜ ندٜعِّتَ ندٜرْ کَوْتَلْ تٛکُّٻٜ يٜىٰسُ، ٻٜ مٜتَنَ اَللَّه ندٜرْ ٻٜرْندٜ مَٻّٜ؞ ²⁹غَطٛوٻٜ اَنَّبَاکُ مَا، تٛع ٻٜ ٻُرَ طِطٛ کٛو تَتٛ؞ اٜ حَانِ ٻٜ مٜتَ غٛعٛ‑غٛعٛ، ندٜنْ کٜتِّندَنِيٻٜٻٜ ڤٛوندَ کٛ ٻٜ مبِعَتَ اٜ حَکِّيلٛ؞ ³⁰تٛ اٜ وٛودِ کٛ اَللَّه وَنْغِنَنِ غٛطّٛ ندٜرْ کٜتِّندَنْتٛوٻٜ ٻٜنْ، سٜيْ مٜتٛووٛ اَرَنْدٜىٰجٛ اٛنْ دٜعِّتَ؞ ³¹اٛنْ فُو اٛنْ مبَاوَيْ نغَطٛنْ اَنَّبَاکُ غٛعٛتٛ‑غٛعٛتٛ نغَمْ کٛو مٛيٜ اٜکِّتٛو حٜٻَ کٛ سٜمْبِطِنْتَمٛ؞ ³²غَطٛوٻٜ اَنَّبَاکُ اٜ حَانِ ٻٜ مبَاوَنَ کٛعٜ مَٻّٜ؞ ³³نغَمْ اَللَّه نَاع اٛ اَللَّه غَدّٛووٛ جِيٻَارٜ، اَمَّا اٛ غَدّٛووٛ جَمْ؞

تٛ تٛکُّٻٜ يٜىٰسُ کَوْرِتِي ندٜرْ کَوْتَلْ مَٻّٜ، ³⁴اٜ حَانِ رٜوْٻٜ ندٜعِّتَ؞ طُمْ جَٻَايِ ٻٜ مٜتَ، اَمَّا ٻٜ نجٛوطٛو لٜيْ لَامُ وٛرْٻٜ نٛ اَتَّوْرَ وِعِ؞ ³⁵تٛ اٜ وٛودِ غٛطُّمْ طُمْ ٻٜ نغِطِ ٻٜ اَنْدَ، ٻٜ پَمَ وٛرْٻٜ مَٻّٜ تٛ وُرٛ؞ نغَمْ طُمْ شٜمْتِنِيطُمْ دٜبّٛ مٜتَ ندٜرْ تٛکُّٻٜ يٜىٰسُ شَرٜلْ کٛ ٻٜ کَوْرِتِ نغَمْ مَوْنِنْکِ اَللَّه؞

³⁶تٛو، تٛ مٛوطٛنْ وٛلْدٜ اَللَّه فُطِّرِ، کٛو تٛ مٛوطٛنْ تَنْ ندٜ يَحِ؟ ³⁷تٛ غٛطّٛ اٜ کَمِّي اٛ اَنَّبِيجٛ، کٛو اٛ کٜٻُطٛ دٛکَّلْ رُوحُ اَللَّه، اٜ حَانِ اٛ اَنْدَ طُعُمْ طُمْ مبِنْدَنَيْمِعٛنْ تٛ جٛومِرَاوٛ طُمْ پِوٛيِ؞ ³⁸اَمَّا تٛ اٛ وَݧِي طُمْ نٛنْ، کَنْکٛ مَا سٜيْ اٛ وَݧٜىٰ؞

³⁹نغَمْ نٛنْ، بَنْدِرَاٻٜ اَمْ، نغِطٜىٰ وَطُکِ اَنَّبَاکُ، تٛع اٛنْ کَرْمِنْ وَطِرْکِ دٛعَارٜ طٜمْطٜ طٜ طُمْ اَنْدَا؞ ⁴⁰سٜيْ کٛو طُمٜ وَطٜىٰ نٛ حَانِ اٜ لَاوٛلْ بٛنْغٛلْ؞

اُمَّاکِ اَلْمَسِيحُ دَغَ مَيْدٜ

¹جٛونِ بَنْدِرَاٻٜ اَمْ، اٜ مِ يِطِ مِ سِفْتٛرَنَعٛنْ حَبَرُ بٜلْطُمْ طُمْ نغَعَجِنَنْمِعٛنْ، طُمْ نجَٻُطٛنْ، طُمْ تٛکّٛتٛنْ بٛطُّمْ؞ ²بَرْکَ مَاجُمْ اٛنْ کِسِي، تٛ اٛنْ نجٛغَکٜ بٛطُّمْ وَعَجُ طُمْ نغَعَجِنَنْمِعٛنْ؞ تٛ نَاع نٛنْ، اٛنْ کٛولِي يٜىٰسُ اٜ مٜىٰرٜ؞

³مِ وَدَّنِيعٛنْ فِي ٻُرْطُمْ دَرَجَ طُمْ کٜٻُمِ؞ کَنْجُمْ وٛنِ اَلْمَسِيحُ مَايِي نغَمْ حَکّٜ مٜىٰطٜنْ نٛنْ نٛ غٛطّٜ اَايَاجٜ مبِعِ، ⁴اٛ اُوَامَ، اٛ اُمِّنَامَ دَغَ مَيْدٜ ݧَلْندٜ تَتَوْرٜ نٛنْ نٛ غٛطّٜ اَايَاجٜ مبِعِ، ⁵اٛ وَنْغَنِ بِيتُرُسْ، ندٜنْ اٛ وَنْغَنِي لِلَاٻٜ مَاکٛ سَڤّٛ اٜ طِطٛ؞ ⁶غَطَ طٛنْ اٛ وَنْغَنِي تٛکُّٻٜمٛ ٻُرْٻٜ 500 اٜ شَرٜلْ غٛعٛ؞ طُطْٻٜ مَٻّٜ حَا جٛونِ اٜ ٻٜ فٛوفَ، اَمَّا وٛٻّٜ مَايِي؞ ⁷طٛنْمَا اٛ وَنْغَنِي يَاکُبُ، ندٜنْ فُو لِلَاٻٜ مَاکٛ؞

⁸غَطَ مَاجُمْ فُو، مِنْ مَا، اٛ وَنْغَنِييَمْ، کٛو ندٜ اٜ مِ نَنْدِ اٜ ٻِنْغٜلْ دَݧَانغٜلْ کٛ شَرٜلْ دَݧُکِنغٜلْ وَطَ؞ ⁹نغَمْ مِنْ وٛنِ ٻُرْطٛ فَمْطُکِ ندٜرْ لِلَاٻٜ مَاکٛ؞ مِ حٜوْتَايِ مَا مِ نٛدّٜىٰ لِلَاطٛ مَاکٛ، نغَمْ مِ تٛرِّي کَوْتَلْ يِمْٻٜ اَللَّه؞ ¹⁰اَمَّا نغَمْ يِدّٜ ندٜ اَللَّه حٛلِّيَمْ مِ وَرْتِي کٛ نغٛنْمِ حَنْدٜ، ندٜنْ يِدّٜ ندٜ اٛ حٛلِّيَمْ وَرْتَايِ مٜىٰرٜ؞ مِ ٻُرِي کٛو مٛيٜ لِلَاطٛ حُوُکِ، کٛو ندٜ نَاع طُمْ مِنْ حُوَتَ، طُمْ يِدّٜ اَللَّه غٛنْدُندٜ اٜ اَمْ حُوَتَ؞ ¹¹تٛو، وَلَا فٜىٰرٛوتِرٛلْ کٛو تٛ مِنْ وَعَجِنَنِعٛنْ، کٛو تٛ لِلَاٻٜ حٛرِيٻٜ نغَعَجِنَنِعٛنْ؞ کٛ مِنْ نغَعَجِنْتَ طُمْ غٛعٛ؛ کَنْجُمْ بٛو نجَٻُطٛنْ؞

اُمَّاکِ مَيْٻٜ

¹²تٛو، تٛ اٜ طُمْ وَعَجِنَ وِيکِ اَلْمَسِيحُ اُمِّنَامَ دَغَ مَيْدٜ، نٛ وَطَتَ وٛٻّٜ مٛوطٛنْ اٜ مبِعَ مَيْٻٜ اُمَّتَاکٛ؟ ¹³دَا مَيْٻٜ اُمَّتَاکٛ دَغَ مَيْدٜ، تٛو، دَا اَلْمَسِيحُ اُمِّنَاکَ دَغَ مَيْدٜ وٛنْ طٛنْ؞ ¹⁴تٛ بٛو اَلْمَسِيحُ اُمَّاکِ دَغَ مَيْدٜ، تٛو، وَعَجِنْکِ اَمِنْ وَرْتِي مٜىٰرٜ، ندٜنْ حٛولَارٜ مٛوطٛنْ وَرْتِي مٜىٰرٜ؞ ¹⁵کٛ ٻُرِ نٛنْ وٛنِ، مِنْ نغَرْتِي شٜيْدُعٜنْ فٜوٛوٻٜ دٛوْ اَللَّه؞ نغَمْ مِنْ مبِعِي اَللَّه اُمِّنِي اَلْمَسِيحُ دَغَ مَيْدٜ؞ اَمَّا دَا طُمْ غٛونغَ مَيْٻٜ اُمِّنْتَاکٜ، دَا اَللَّه اُمِّنَايِمٛ؞ ¹⁶نغَمْ دَا طُمْ اُمِّنْتَا مَيْٻٜ، تٛو، دَا اَلْمَسِيحُ مَا اُمِّنَاکَ دَغَ مَيْدٜ وٛنْ طٛنْ؞ ¹⁷دَا اَلْمَسِيحُ اُمِّنَاکَ، تٛو، حٛولَارٜ مٛوطٛنْ وَرْتِي مٜىٰرٜ، ندٜنْ حَا جٛونِ اٛنْ نغٛنْدِ اٜ حَکّٜ مٛوطٛنْ، ¹⁸ندٜنْ مَيْٻٜ اٜ کٛولِي اَلْمَسِيحُ کَلْکِي وٛنْ طٛنْ؞ ¹⁹تٛ نِ نغَمْ جٛنْدٜ دُونِيَارُ ندُعُ تَنْ نغَطٜتٜنْ کَمُّندٜ دٛوْ اَلْمَسِيحُ، اٜنْ ٻُرِي کٛو مٛيٜ وَرْتُکِ ٻٜ طُمْ يُرْمِنَنْتَ؞

²⁰اَمَّا غٛونغَ اَلْمَسِيحُ اُمِّنَامَ دَغَ مَيْدٜ؞ کَنْکٛ وٛنِ اَرْتُطٛ اُمَّاکِ دَغَ ندٜرْ ٻٜ طُمْ اُمِّنْتَ دَغَ مَيْدٜ؞ ²¹ندٜ مَيْدٜ وَرِي لَاوٛلْ نٜطّٛ غٛعٛتٛ، نٛنْ مَا اُمَّاکِ مَيْٻٜ دَغَ مَيْدٜ وَرِي لَاوٛلْ نٜطّٛ غٛعٛتٛ؞ ²²نٛ يِمْٻٜ فُو مَيْرَتَ نغَمْ سُمْڤٛ اٜ اَادَمُ، نٛنْ مَا فُو غٛودُٻٜ سُمْڤٛ اٜ اَلْمَسِيحُ کٜٻَيْ يٛنْکِ کِ رٜعَتَا؞ ²³اَمَّا رَا نٛ اُمَّاکِ مَيْٻٜ وَعَتَ؞ اَرَنْدٜ اَلْمَسِيحُ اُمِّنَامَ دَغَ مَيْدٜ، ندٜنْ ݧَلْندٜ ندٜ اٛ وَرْتٛيِ طُمْ اُمِّنَيْ فُو يِمْٻٜ مَاکٛ دَغَ مَيْدٜ؞ ²⁴ندٜنْ غَطَ اٛ حٜٻِي جَالٛرْغَلْ دٛوْ کٛو مٛيٜ لَامِيطٛ، اٜ کٛو طُمٜ لَامُ غِنِّ، اٜ کٛو طٜيٜ بَوْطٜ، رٜعِرْدٜ دُونِيَارُ وَرَيْ، ندٜنْ اٛ حٛکِّتَ اَللَّه ݧَاکٛ مٛ دٛوْ لَامُ؞ ²⁵نغَمْ دٛولٜ اَلْمَسِيحُ لَامٛو نَا اَللَّه يٛوِيمٛ دٛوْ وَݧْوَݧْٻٜ مَاکٛ فُو؞ ²⁶غَݧٛ کَلْکٜتٜىٰطٛ غَطَ کٛو طُمٜ، کَنْکٛ وٛنِ مَيْدٜ؞ ²⁷نغَمْ اَايَارٜ وِعِي، ‏«‏اَللَّه وَرْتِرِي کٛو طُمٜ لٜيْ لَامُ اَلْمَسِيحُ؞»‏ اَمَّا ندٜ طُمْ وِعِ، ‏«‏کٛو طُمٜ وَرْتِرَامَ لٜيْ لَامُ اَلْمَسِيحُ،»‏ تٛو، اٜ نجَيْرِ طُمْ وٛنِ طُعُمْ حَوْتَايِ اٜ اٛنْ طٛنْ غَرْتِرْطٛ کٛو طُمٜ لٜيْ لَامُ اَلْمَسِيحُ؞ ²⁸غَطَ اَللَّه وَطِي کٛو طُمٜ لٜيْ لَامُ ٻِطّٛ مَاکٛ، سٜيْ ٻِطّٛ اٛنْ وَرْتَ لٜيْ لَامُ اَللَّه غَرْتِرْطٛ کٛو طُمٜ لٜيْ لَامُ ٻِطّٛ اٛنْ، نغَمْ اَللَّه تَنْ وَرْتَ لَامِيطٛ کٛو طُمٜ کٛو تٛيٜ؞

²⁹تٛو، تٛ مَيْٻٜ اُمَّتَاکٛ دَغَ مَيْدٜ، طُمٜ غَطَنَاٻٜ بَڤْتِسْمَ نغَمْ مَيْٻٜ نغَطَتَ؟ تٛ طُمْ اُمِّنَايِ مَيْٻٜ کٛو سٜطَّ، نغَمْ طُمٜ طُمْ وَطَنْتَ يِمْٻٜ بَڤْتِسْمَ نغَمْ مَٻّٜ؟ ³⁰ندٜنْ نغَمْ طُمٜ مِنْ شٛورَتَ يٛنْکِ اَمِنْ کٛو ندٜيٜ؟ ³¹غٛونغَ بَنْدِرَاٻٜ، مَنْتٛرَاکِ کِ مَنْتٛرْتٛومِعٛنْ ندٜرْ سُمْڤٛوتِرْکِ اٜ يٜىٰسُ اَلْمَسِيحُ جٛومِرَاوٛ مٜىٰطٜنْ وَطِ کٛو ندٜيٜ ݧَلْندٜ اٜ مِ حَادٜ مَيْدٜ؞ ³²تٛ مِ حَٻْدِي اٜ يِمْٻٜ غٛودُٻٜ نغِکُّ بٛ طُمْ مَرْلٜ لَدّٜ ندٜرْ غَرِيرِ اَافِسَ نغَمْ حٜٻُکِ فِي دُونِيَارُ ندُعُ تَنْ، طُمٜ ٻٜيْدٛرِيمِ؟ تٛ مَيْٻٜ اُمِّنْتَاکٜ دَغَ مَيْدٜ، سٜيْ نغَطٜنْ کٛ طُمْ وِعُنٛو، ‏«‏اٜنْ ݧَامُ، اٜنْ نجَرُ، نغَمْ جَانغٛ اٜنْ مَايَيْ؞»‏

³³تٛع اٛنْ نجَٻُ طُمْ مَجِّنَعٛنْ؞ ‏«‏جٛوطٛدَاکِ اٜ غٛودُٻٜ نغِکُّ کَلُّطُمْ وٛنَّيْ نغِکُّ بٛطُّمْ؞»‏ ³⁴نغَرْتٜىٰ ندٜرْ حَکِّيلٛ مٛوطٛنْ نٛ حَانِ، اَلٜىٰ وَطُکِ حَکّٜ، نغَمْ اٜ وٛودِ وٛٻّٜ مٛوطٛنْ ٻٜ نغَلَا اَنْدَلْ دٛوْ اَللَّه؞ مِ وِعُ نٛنْ نغَمْ شٜمْتٛنْ؞

ٻَنْدُ اُمِّنْتٜىٰندُ

³⁵غٛطّٛ پَمَيْ وِعَ، ‏«‏نٛ مَيْٻٜ اُمِّنِرْتٜىٰ دَغَ مَيْدٜ؟ اٜ اِرِ ندُيٜ ٻَنْدُ ٻٜ اُمّٛدٛرْتٛو؟»‏ ³⁶اَنْ کَاݝَاطٛ!‏ تَا اَاوِي غَبّٜلْ، نغٜلْ فُطَتَا نَا نغٜلْ وَاتِي؞ ³⁷کٛ اَاوُطَا فُو، کٛو غَبّٜلْ اَلْکَمَارِ، کٛو وٛنْغٜلْ غَبّٜلْ فٜىٰرٜ، کٛ فُطِ نَنْدَتَا اٜ کٛ اَاوُطَا؞ ³⁸اَمَّا اَللَّه اٜ حٛکَّ کٛ فُطِ نَنْدِ فٜىٰرٜ نٛنْ نٛ اٛ سُٻِرِ؞ کٛو اِرِ نغٜلٜ غَبّٜلْ اٜ اِرِ نَنْدِ طُمْ نغٜلْ فُطِرْتَ؞

³⁹نَاع فُو ٻَلِّ نغٛنِ نَنْدُطِ؞ ٻَلِّ يِمْٻٜ فٜىٰرٜ، ٻَلِّ مَرْلٜ فٜىٰرٜ، ٻَلِّ شٛلِّ فٜىٰرٜ، ٻَلِّ لِپِّ فٜىٰرٜ؞

⁴⁰کٛو طُمٜ غٛنْطُمْ اٜ دٛوْ اٜ وٛودِ نٛ طُمْ وَعِ؞ نٛنْ مَا کٛو طُمٜ غٛنْطُمْ ندٜرْ دُونِيَارُ اٜ وٛودِ نٛ طُمْ وَعِ؞ غٛنْطُمْ اٜ دٛوْ وٛوطُکِ مَاجُمْ اٜ فٜىٰرٛوتِرِ اٜ وٛوطُکِ فِي غٛنْطُمْ ندٜرْ دُونِيَارُ؞ ⁴¹نَانغٜ نٛ طٜلْکِتِرْتَ فٜىٰرٜ، لٜوْرُ نٛ طٜلْکِتِرْتَ فٜىٰرٜ، کٛودٜ نٛ طٜلْکِتِرْتَ فٜىٰرٜ، ندٜنْ کٛودٜ اٜ فٜىٰرٛوتِرِ کٛو ندٜيٜ حٛودٜرٜ اٜ نٛ ندٜ طٜلْکِتٛرْتٛو؞

⁴²نٛنْ اُمَّاکِ مَيْٻٜ وَعِ؞ ٻَنْدُ اُوَاندُ ندُ ݧٛلَيْندُ، تٛ ندُ اُمِّنَامَ ندُ ݧٛلَتَا؞ ⁴³ٻَنْدُ اُوَاندُ وٛوطَا يِيکِ، ندُ وَلَا سٜمْبٜ، تٛ ندُ اُمِّنَامَ، ندُ وَرْتَيْ وٛوطُندُ يِيکِ، غٛودُندُ بَوْطٜ؞ ⁴⁴ٻَنْدُ اُوَاندُ کَيْرُ حُوتِرْتٜىٰ ندٜرْ دُونِيَارُ ندُعُ، اَمَّا ٻَنْدُ اُمِّنْتٜىٰندُ، کَيْرُ حُوتِنِرْتٜىٰ اٜ تٛنْ دٛوْ؞ ندٜ اٜ وٛودِ ٻَنْدُ کُوتِرْتٜىٰندُ ندٜرْ دُونِيَارُ، نٛنْ مَا اٜ وٛودِ ٻَنْدُ کُوتِرْتٜىٰندُ تٛنْ دٛوْ؞ ⁴⁵نغَمْ، نٛنْ نٛ طُمْ وِنْدِرَا، ‏«‏نٜطّٛ اَرَنْدٜىٰجٛ، وَاتٛ اَادَمُ، اٛ وَرْتِي غٛودُطٛ يٛنْکِ؞»‏ اَمَّا اَادَمُ شَکِتِيطٛ، وَاتٛ اَلْمَسِيحُ، اٛ حٜٻِي ٻَنْدُ کُوتِرْتٜىٰندُ تٛنْ دٛوْ، اٛ وَرْتِي کٛکّٛووٛ يٛنْکِ کِ رٜعَتَا؞ ⁴⁶نَاع ٻَنْدُ کُوتِرْتٜىٰندُ تٛنْ دٛوْ طُمْ اَرْتَتَ حٜٻُکِ، اَمَّا کُوتِرْتٜىٰندُ ندٜرْ دُونِيَارُ طُمْ اَرْتَتَ حٜٻُکِ، ندٜنْ طُمْ حٜٻَ کُوتِرْتٜىٰندُ تٛنْ دٛوْ؞ ⁴⁷نٜطّٛ اَرَنْدٜىٰجٛ مبُلْمبُلْدِ اٛ تَغِرَا، ندٜنْ نٜطّٛ طِطَٻٛ بٛو، دَغَ دٛوْ اٛ پِوٛيِ؞ ⁴⁸يِمْٻٜ دُونِيَارُ اٜ نغٛودِ ٻَنْدُ اِرِ ندُ اَادَمُ تَغِرَاطٛ مبُلْمبُلْدِ؞ جَحَيْٻٜ تٛنْ دٛوْ بٛو، ٻٜ کٜٻَيْ ٻَنْدُ اِرِ ندُ اٛنْ طٛنْ پِوٛيْطٛ دَغَ تٛنْ دٛوْ، وَاتٛ اَلْمَسِيحُ؞ ⁴⁹نٛنْ نٛ نغٛودِرْطٜنْ نَنْدِ اٛنْ طٛنْ تَغِرَاطٛ مبُلْمبُلْدِ، نٛنْ مَا اٜنْ کٜٻَيْ نَنْدِ اٛنْ طٛنْ پِوٛيْطٛ دَغَ دٛوْ؞

⁵⁰بَنْدِرَاٻٜ، اٜ مِ وِعَعٛنْ، ٻَنْدُ غٛودُندُ کُسٜلْ اٜ پِيپَمْ نَتَّتَا ندٜرْ وُرٛ اَللَّه تٛنْ دٛوْ؞ ٻَنْدُ ݧٛلَيْندُ نَتَّتَا وُرٛ اَللَّه تَبِتَيْنغٛ؞

⁵¹ندَرٜىٰ مِ وِعَعٛنْ غٛطُّمْ سِرُّ:‏ نَاع اٜنْ فُو مَايَتَ، اَمَّا اٜنْ فُو طُمْ وَيْلِتَنَيْعٜنْ ٻَلِّ ⁵²طٛنْ اٜ طٛنْ، بٛ مَپُّکِ حِتٜرٜ، تٛ طُمْ دُودِي لُوَلْ شَکِتِينغَلْ؞ نغَمْ تٛ لُوَلْ نغَلْ دُودَامَ، مَيْٻٜ اُمّٛدٛتٛ اٜ ٻَلِّ طِ ݧٛلَتَا، ندٜنْ اٜنٜنْ فٛوفٛوٻٜ طُمْ وَيْلِتَيْ ٻَلِّ مٜىٰطٜنْ؞ ⁵³نغَمْ دٛولٜ ندُعُ ٻَنْدُ مَايَيْندُ ݧٛلَيْندُ وَرْتِرٜىٰ ٻَنْدُ ندُ مَايَتَا ندُ ݧٛلَتَا؞ ⁵⁴شَرٜلْ نغٜلْ ٻَنْدُ مَايَيْندُ ݧٛلَيْندُ وَرْتِرَا ٻَنْدُ ندُ مَايَتَا ندُ ݧٛلَتَا، کٛ اَايَارٜ وِعِ طُمْ حٜىٰوَيْ، وَاتٛ، ‏«‏طُمْ حٜٻِي جَالٛرْغَلْ دٛوْ مَيْدٜ!‏»‏

⁵⁵‏«‏مَيْدٜ، تٛ جَالٛرْغَلْ مَاطَ؟

مَيْدٜ، تٛ تٛوکٜ مَاطَ؟»‏

⁵⁶نغَمْ حَکّٜ وٛنِ تٛوکٜ ڤٛوطَيْطٜ مَيْدٜ، ندٜنْ بَوْطٜ حَکّٜ تٛ اَتَّوْرَ پِوِ؞ ⁵⁷اَمَّا يٜتّٛورٜ تَبِّتَ تٛ اَللَّه کٛکُّطٛعٜنْ جَالٛرْغَلْ بَرْکَ يٜىٰسُ اَلْمَسِيحُ جٛومِرَاوٛ مٜىٰطٜنْ؞

⁵⁸نغَمْ نٛنْ، بَنْدِرَاٻٜ اَمْ ٻٜ نغِطُمِ، ندَرٜىٰ بٛطُّمْ، تٛع غٛطُّمْ دِمْبَعٛنْ؞ کٛو ندٜيٜ نغَطٜىٰ کٛ مبَاوٛتٛنْ وَطُکِ کُوٛنْ کُوغَلْ جٛومِرَاوٛ، نغَمْ اٛنْ اَنْدِ کُوغَلْ نغَلْ کُوَنْتٛنْمٛ نَاع اٜ مٜىٰرٜ نغَلْ وٛنِ؞

وَلُّکِ بَنْدِرَاٻٜ غٛنْٻٜ اُرُشَلِيمَ

¹تٛو، جٛونِ دٛوْ حَوْرُتُکِ شٜىٰدٜ نغَمْ وَلُّکِ يِمْٻٜ اَللَّه غٛنْٻٜ اُرُشَلِيمَ، نغَطٜىٰ کٛ مبِيمِ تٛکُّٻٜ يٜىٰسُ ٻٜ غَلَاتِيَ نغَطَ؞ ²کٛو ندٜيٜ ݧَلْندٜ اَرَنْدٜىٰرٜ ندٜ يٛنْتٛورٜ، کٛو مٛيٜ مٛوطٛنْ رٜسَ غٛطُّمْ ندٜرْ کٛ حٜٻِي کٜىٰرٛلْ نٛ وَاوَتَ؞ ندٜنْ تٛع اٛنْ اَلُ نَا مِ وَرِي ڤُطّٛنْ حَوْرُتُکِ شٜىٰدٜ طٜنْ؞ ³تٛ مِ يٛتَّکٜ تٛ مٛوطٛنْ، مِ حٛکَّيْ يِمْٻٜ ٻٜ شُٻُطٛنْ طٜرٜىٰجِ کٛلَّيْطِ اٛنْ شُٻِيٻٜ ٻٜ نجَارَ بَلَّلْ مٛوطٛنْ اُرُشَلِيمَ؞ ⁴تٛ اٜ حَانِ مِنْ مَا مِ يَحَ، سٜيْ ٻٜ نجَادَ اٜ اَمْ؞

کٛ بُلُسْ يِطِ وَطُکِ

⁵مِ وَرَيْ تٛ مٛوطٛنْ غَطَ مِ يَحِي لٜيْدِ مَکِدٛونِيَ، نغَمْ مِ سُٻِي يَاکِ مَکِدٛونِيَ؞ ⁶طُمْ غَطٛتٛوطُمْ مِ جٛوطٛو تٛ مٛوطٛنْ شَرٜلْ سٜطَّ، کٛو مَا مِ رُومَ، نغَمْ مبَلّٛنْيَمْ مِ يَحَ فُو تٛ نجَحَيْمِ؞ ⁷مِ يِطَا مِ يَالَ تٛ مٛوطٛنْ تَنْ مِ پَٻّٛو، نغَمْ اٜ مِ يِطِ مِ نٜىٰٻِدَ اٜ مٛوطٛنْ تٛ جٛومِرَاوٛ جَٻِي؞

⁸اَمَّا مِ جٛوطٛتٛ تٛ غَرِيرِ اَافِسَ نَا حُمْتٛ ٻٜنْدٛلْ اَلْکَمَارِ ⁹نغَمْ مِ حٜٻِي لَاوٛلْ حُوُکِ کُوغَلْ مَنْغَلْ، ندٜنْ اٜ وٛودِ طُطْٻٜ غَݧُٻٜيَمْ؞

¹⁰تٛ تِمٛوتِ وَرِي تٛ مٛوطٛنْ، تَبِّتِنٛنْ اٛ وٜدِّتَکٜ ندٜرْ مٛوطٛنْ، نغَمْ کَنْکٛ مَا اٛ کُوَنٛووٛ جٛومِرَاوٛ بٛ اَمْ؞ ¹¹نغَمْ نٛنْ، تٛع غٛطّٛ يَوَنَمٛ؞ مبَلّٜىٰمٛ ندٜرْ يَادُ مَاکٛ، نجَٻّٛوتِرٛنْ جَمْ اٜ جَمْ، اٛ وَرْتٛيَ تٛ اَمْ؞ مِنْ اٜ وٛٻّٜ بَنْدِرَاٻٜ اٜ مِنْ ندٜنْتِ غَرْتٛلْ مَاکٛ؞

¹²جٛونِ دٛوْ بَنْدِرَاوٛ مٜىٰطٜنْ اَفٛولٛسْ، مِ تٛرَکٜمٛ نَاع سٜطَّ اٛ وَرَ تٛ مٛوطٛنْ کَنْکٛ اٜ وٛٻّٜ بَنْدِرَاٻٜ، اَمَّا اٛ يِطَا يَادُ ندُنْ جٛونِ؞ اٛ وَرَيْ تٛ مٛوطٛنْ تٛ اٛ حٜٻِي لَاوٛلْ؞

وَغِّنْکِ اٜ کٛوْنٛلْ شَکِتِينغٛلْ

¹³نجٛوطٜىٰ اٛنْ ڤَامَ، ندَرٜىٰ بٛطُّمْ دٛوْ حٛولَارٜ مٛوطٛنْ، نغَطٛنْ نغٛرْغُ، شٜمْبِطٜىٰ؞ ¹⁴فُو کٛ نغَطٛتٛنْ، نغَطٜىٰطُمْ ندٜرْ يِدّٜ؞

¹⁵بَنْدِرَاٻٜ، اٛنْ اَنْدِ ندٜرْ لٜيْدِ اَکَايَ يِمْٻٜ وُرٛ اِسْتِفَانُسْ اَرْتِ وَرْتُکِ تٛکُّٻٜ يٜىٰسُ، ندٜنْ ٻٜ کٛکِّي کٛعٜ مَٻّٜ نغَمْ وَلُّکِ يِمْٻٜ اَللَّه؞ ¹⁶اٜ مِ تٛرٛوعٛنْ کٛکّٜىٰ اِرِ ٻٜنْ طٛنْ يِمْٻٜ مَنْغُ حَوْتِ اٜ فُو يِمْٻٜ ٻٜ مِنْ کُوِدِ مِنْ ڤِيدِ ندٜرْ کُوغَلْ؞

¹⁷مِ نَنِي بٜلْطُمْ وَرٛيْکِ اِسْتِفَانُسْ، اٜ فَرْتُنَاتُسْ، اٜ اَکَيْکُسْ، نغَمْ طُمْ وَرْتَنِييَمْ بٛ اٛنٛنْ نغَرِ تٛ اَمْ، ¹⁸نغَمْ ٻٜ مبَلْتِنِي ٻٜرْندٜ اَمْ اٜ ٻٜرْطٜ مٛوطٛنْ اٛنٛنْ مَا؞ نغَمْ نٛنْ، کٛکّٜىٰ اِرِ ٻٜنْ طٛنْ يِمْٻٜ مَنْغُ؞

¹⁹تٛکُّٻٜ يٜىٰسُ وٛنْٻٜ لٜيْدِ اَاسِيَ اٜ کٛوْنَعٛنْ؞ اَکِيلَ، اٜ بِرِسْکِلَ، اٜ تٛکُّٻٜ يٜىٰسُ کَوْرِتٛوٻٜ اٜ وُرٛ مَٻّٜ اٜ ٻٜ کٛوْنَعٛنْ بٛطُّمْ ندٜرْ اِنْدٜ جٛومِرَاوٛ؞ ²⁰فُو بَنْدِرَاٻٜ غٛنْٻٜ طٛعٛ اٜ کٛوْنَعٛنْ؞

کٛوْنِندِرٜىٰ حٛوْنِرْکِ حِغَاکُ شٜنِيکِ؞

²¹مِنْ بُلُسْ وِنْدِ کٛوْنٛلْ نغٛعٛلْ اٜ جُنْغٛ اَمْ؞

²²فُو مٛ يِطَا جٛومِرَاوٛ، اَللَّه لَانَمٛ؞

يَا جٛومِرَاوٛ اَمِنْ، وَرٛيْ!‏

²³يٜىٰسُ جٛومِرَاوٛ بَرْکِطِنَعٛنْ؞

²⁴اٜ مِ يِطِعٛنْ اٛنْ فُو نغَمْ سُمْڤٛوتِرْکِ مٜىٰطٜنْ اٜ يٜىٰسُ اَلْمَسِيحُ؞