TITAS

¹ Kei, Paul cu Pathian hril mipawlih zumnak zulhin le Pathian ngaihsakzawng ih thutak theihnak famkim zulhin Pathian-ih ṭemṭawn sal le Jesu Khrih-ih apostol ka si. ² Cui Pathian ngaihsaknak cu kumkhawnunnak ruahsannak ah a ṭhumaw ih, cui kumkhawnunnak cu thuphan sim thei lo Pathian in san thawk hlan ihsin a rak tiamkam zo mi a si. ³ Asinan Pathian in a thu cu thusim hmang in a can teah a langter ih, cui thusim cu in Rundamtu Pathian-ih thupek bangtukin kawlter ka si. ⁴ Zumnak hmunkhat ih ka fapa taktak Tita hnenah, Pa Pathian le in Rundamtu Bawipa Jesu Khrih hnen ihsin zangfahnak, zahngainak le hnangamdaihnak cu um hram seh. ⁵ Khrit tikulh ih ka lo tantanak san cu thu ka lo pek vekin thil tifel thluh lo mipawl tifel dingin le khaw tinah elder-pawl ruat dingin a si. ⁶ Kawhhran hotu si dingah zokhal sawihnawm ding um lo, nupi pakhat nei, a fatepawl zumtu si mi, pawisaklonak nun ah simaw, luhlulnak thu ah simaw sawihnawm ding um lo an si ding a si. ⁷ Ziangahtile, kawhhran hotu cu Pathian sumkiltu a si vekin sawihnawm ding um lo a si tengteng ding a si. Mai thu duh, thinheng awl, sabitti in duh, mihrohrang, sumpai duham mi a si lo ding a si. ⁸ Cuhnakin mikhual duhtu, thil ṭha duhtu, supaw thiam, midingfel, mithianghlim, mah le mah thununaw thei mi a si sawn ding a si. ⁹ Zirh a rak si zo bangin rin tlak thucah kaihngettu a si ding a si. Cuti cun zirhnak ziktluak hmang in tha mi a pe thei ding ih, dokalhtupawl cu a el thei hai ding. ¹⁰ Ziangahtile, thunun harsapawl, thulolakmen ṭawngtupawl le mibum hmangpawl tampi an um, ahleicein cupawl cu serhtanpawl lak ihsin an si. ¹¹ Cupawlih kaa cu huhsak tengteng ding a si. Diklo zetih hlawk duh ruangah zirh lo ding mi thilpawl an zirh ih, sungkurun in mi an siatsuah. ¹² Anmai lakih mi pakhat, anmai profet rori hmanin, “Khrit tikulh mipawl cu thuphanper hmang, sahrang sual, mize rawl pham an si,” tiah a ti. ¹³ Hi theihternak cu a dik a si. Curuangah zumnak lamah an ziktluak theinak dingah Khrit tikulh mipawl cu na zetin kawk hai aw. ¹⁴ Jew-pawlih phuahcawp thuanthupawl le thutak dungtuntu minungpawlih thupekpawl cu ngaihsak hlah. ¹⁵ Mithiangpawl hrangah cun ziangkim hi an thiang. Asinan mibawrhhlawh le zumlotupawl hrangah cun a thiang mi zianghman a um lo. An ruahnaklungthin le an sia le ṭha theihnak khal a bawrhhlawh ṭheh. ¹⁶ Pathian kan thei tiah an phuang nan, an hnaṭuannak in amah an phatsan. Annih cu Pathian huat mi tuahtu, thulung lo le hna ṭha ṭuannak tinkim ih santlailo an si.

¹ Sikhalsehla, nang cun zirhnak ziktluak hrangih a tling mi thupawl sim aw, ² cuti cun putarpawl cu supaw in, mizahum, thununaw thei mi, zumnak le duhdawtnak le tuarfainak ah ziktluak dingin zirh hai aw. ³ Cutivek thothoin pitarpawl khal diklo ih mihektu, sabitti pham lo, thil ṭha zirhtu si sawnin, an nundan cu zahum zetih um dingin tha pe aw. ⁴ Cutin, annih in nupinu no lai deuhpawl cu supaw thei dingin, an pasal duhdaw dingin, an fate duhdaw dingin, ⁵ thinlung fel zet pu dingin, thianghlim dingin, insang kilkhawitu si dingin, ṭha zetih um dingin, an pasal thu ngai dingin an zirh thei ding. Cucu Pathian thu thangsiat ih a umlonak ding a si. ⁶ Cutivek thothoin tlangvalpawl cu supaw dingin fawrh hai aw. ⁷ Thil ziangkimah thil ṭha tuahnak in zohṭhim ding mi ah tuahaw aw: zirhnak ah na takzia, na zah umzia, na dikzia, ⁸ thiamlo coter theih lo na thusim ziktluakpawl cu langter aw. Cuti cun a lo dodaltu in na thuhla ah thil ṭha lo zianghman sim ding a neih lo ruangah a ning a zak ding. ⁹ Salpawl cu an bawipawlih ṭawng sawnkir loin, an thu lung sawn dingin le thil ziangkimah an lungawiter dingin fawrh hai aw. ¹⁰ In Rundamtu Pathian thuhla zirhnak cu thil ziangkimah duhum zetih an langter theinak dingah, an bawipawlih thil ruksak loin rinumnak ṭha hmuahhmuah langter sawn dingin fawrh hai aw. ¹¹ Ziangahtile, rundamnak thlentu Pathian zangfahnak cu mi hmuahhmuah hnenah a runglang zo. ¹² Cui Pathian zangfahnak cun Pathian ngaihsaklonak le khawvel cakhiarnak pawl tlansan in tui sanah hin supaw le dingfel zet le Pathian ngaihsak ih nung ding kan si ti in zirh. ¹³ Ruahsannak lungawium kan hngah laiah hin cutivekih nung ding kan si. Cui ruahsannak cu Pathian ropi, in Rundamtu Jesu Khrih-ih runglangnak sunglawi zet cu a si. ¹⁴ Anih cun dan lo i nunnak hmuahhmuah sung ihsin in tlen theinak dingah le amah hnenih thenfai mi, amai mihleice, hnaṭuan ṭha hrangih ṭhahnemngai mi kan si theinak dingah kan hrangah amah le amah a peaw. ¹⁵ Hi thilpawl cu thuneihnak hmuahhmuah thawn sim aw, fawrh aw la, kawk aw. Zohman in lo nautat hlah hai seh.

¹ Uktupawl le thuneitupawl hnenah tlulut dingin, an thu ngai dingin, thilṭha tinkim tuah dingih tiar cia dingin zumtupawl cu theihtersal hai aw. ² Zo hnen hmanah ṭawng sia ṭawng lo le mi elbuai hmang mi si loin, zaidam le mi hmuahhmuah hnenah nunnemnak langter sawn dingin anmah cu theihtersal hai aw. ³ Ziangahtile, kanmah rori khal hi hlanah atnak ah, thulunlonak ah, bumnak ah, cakhiarnak a phunphun le nawmnak a phunphun rian in, midang parah lungput siava le iksiknak, huatthlala le pakhat le pakhat huaawtawn in kan rak um dah. ⁴ Asinan, Rundamtu Pathian-ih ngilneihnak le duhdawtnak cu minung hnenah a runglang zo. ⁵ Dingfelnak hnaṭuan kan rak ṭuan mi ruangah si loin a zahngainak zulh sawnin hrinsalnak hmang ih khawlhfainak le Thlarau Thianghlim hmang ih titharsalnak cun in rundam a si. ⁶ Cui Thlarau Thianghlim cu in Rundamtu Jesu Khrih hmang in nasazetin kan parah Pathian in a run burh. ⁷ Cuti cun, kan ruahsan mi kumkhawnunnak zulhin ro cotu ih tuah kan si theinak dingah a zangfahnak in thiamcoter kan si. ⁸ Pathian rak zum zotupawl cu hnaṭuan ṭha ṭuan vivo dingin ralring hai seh, ti thu hi milai hrangah a ṭha ih a hlawk a si. Hi ṭawngkam hi rinsan tlak a si. Hi thupawl hi nasazetin phuang aw la ka duh. ⁹ Sikhalsehla, atthlak thusuhnakpawl, thlahtupawl zawtsalnak, tawhawknakpawl le Dan thu ih elawknakpawl tla cu hrial aw. ¹⁰ Ṭhenṭhekawknak tuah ṭheutu cu vei khat nun sim aw, a vei hnihnak nun sim leh aw la, cui hnu cun hnawng aw. ¹¹ Cutivek minung cu amah le amah thiamlo cohaw in a rak fehpeng ih, thilsual a tuah a si ti nan thei. ¹² Arṭemas asilole Ṭaikhikas cu na hnenih ka rak thlah tikah Nikopolis khua ah ka hnenah rat hramhram tum aw. Ziangahtile, thlatang sung cu tawkih um ka tum. ¹³ Danthiam Zenas le Apollos in an khualtlawn vivonak ah zianghman an tlaksamlonak dingah ṭhahnemngai zetin rak bawm hai aw. ¹⁴ Cun, kanmai mipawl khalin rah nei lo ih an umlonak dingah, ṭulpawinak ih hman dingah hnaṭuan ṭha ṭuan vivo zir hai seh. ¹⁵ Ka hnenih umpawl hmuahhmuah in cibai an lo buk. Zumnak ih in duhdawtupawl kha cibai in rak buksak aw. Nan zate hnenah zangfahnak um hram seh. Amen.