ROM

ROM

¹ Kei, Paul cu Jesu Khrih-ih ṭemṭawn sal, apostol si dingih kawh, Pathian thuthangṭha hrangih serhhran mi ka si. ² Cui thuthangṭha cu hlanlaiah a profetpawl hmang in Cathianghlim sungah Pathian in a rak tiamkam. ³ Cumi cu a Fapa, kan Bawipa Jesu Khrih-ih thuhla a si. Taksa dan ah cun anih cu David tesinfa ihsi ra mi a si. ⁴ Mithi lak ihta thawhter a sinak in anih cu Thianhlimnak Thlarau in Pathian Fapa a si ti huham thawn a phuanglang. ⁵ Amah Jesu Khrih thawngin le a hmin ruangah zangfahnak le apostol sinak cu kan co zo. Miphun hmuahhmuah lak ihsin mi ko dingah cuipawl tla cu kan co. Zumnak thu lung dingin anmah cu kan ko a si. ⁶ Nannih khal cui Jesu Khrih-ih kawh mipawl lakih tel mi nan si. ⁷ Pathian-ih duhdawt mi, mithianghlim si dingih kawh mi, Rom khawpi ih a um mi nan zate hnenah ca ka ngan a si. Pathian kan Pa le Bawi Jesu Khrih hnen ihsin nan hnenah zangfahnak le hnangamdaihnak um hram seh. ⁸ Nan zumnak cu leitlun pumpi ah than a si ih, nan zate hrangah Jesu Khrih zarah ka Pathian hnenah a hmaisabikah ka lung a awi. ⁹ Ziangahtile, catbang loin ka thlacamnak ah ka lo telh ringring ti cu a Fapa-ih thuthangṭha simnak ah ka thinlung zateih ka ren mi Pathian cu i theihpitu a si. ¹⁰ Tu thlang tal cun Pathian remtinak in nan hnenih rat theinak lamzin ziangmawti tiih hmu thei dingin ka ngen ringring. ¹¹ Ziangahtile, nan hngeh theinak dingah thlarau lam thilpek hrekkhat lo pe dingin lo hmuh ding ka hiar zet. ¹² Cui Thlarau thilpek cu nan zumnak le ka zumnak hmang in tha kan peawtawn ding ka tinak a si. ¹³ Unaulenuh, Zentel dangpawl hnen vekin nan hnen khalih rah ka neih theinak dingah vei tampi nan hnenih rat ka tum ṭheu ti atu ah thei lo ih nan um ding ka duh lo. Asinan atu tiang khamtu a um. ¹⁴ Grik le Barbaros pawl hnenah, mifimpawl le miaapawl hnen khalah leiba ka nei. ¹⁵ Curuangah, Rom khawpi ih a um mi nannih hnen khalah thuthangṭha ka ti thei patawpih phuang dingin ka tiar a si. ¹⁶ A zumtu mi kip hrangah rundamnak dingih Pathian huham a si ruangah Khrih thuthangṭha cu ka zahpi lo. Jew-mi hrangah a si hmaisa ih, Grikmi hrang khalah a si ve. ¹⁷ Ziangahtile, “Mifel cu zumnak in a nung ding,” tiih ngan vek khan thuthangṭha ah Pathian dingfelnak cu phuanlang a si ih, cumi cu zumnak ihsin zumnak parih ṭhumaw a si. ¹⁸ Ziangahtile, an dingfellonak in thutak hupbettu minungpawlih Pathian ngaihsaklonak le dingfellonak hmuahhmuah dokalh in Pathian thinhengnak cu van ihsin a runglang. ¹⁹ Ziangahtile, Pathian cungcangthu an theih ding mi cu Pathian in an hnenih a langfiangter zo ruangah anmah ah a langfiang a si. ²⁰ Ziangahtile, leilung sersiam thawk ihsin a sersiam mi thilpawl ihsin mit ih hmuh thei lo mi Pathian ih thil umpawl tla fiang zetin an hmu. Pathian-ih kumkhaw huham le Pathian-ih sinak hman an theithiam. Curuangah puhmawh ding an nei lo. ²¹ Pathian thei na cingin, amah cu Pathian vekin an sunlawih lo, lungawithu khal an sim lo, an khawruahnak cu thulolakmen ah a cang sawn ih, an thinlung aa cu thim ih khat ah a cang. ²² Kan fim tiah an tiaw nan miaa ah an cang. ²³ A ṭawihral thei lo mi Pathian-ih ropitnak cu a ṭawihral thei mi minung lem, vatepawl, ramsapawl le bawkvakpawl lemah an thleng. ²⁴ Curuangah an thinlung cakhiarnak vekin Pathian in anmah cu bawrhhlawhnak ah a pe hai. Curuangah anmah le anmah lakah anmai taksa rori hman zahthlak zetin an hmang. ²⁵ Pathian thutak cu thuphan ah an thleng. Sersiamtu hnakin sersiam mi thil sawn cu bia le rian in an um. Sersiamtu cu kumkhua in thangṭhat in um seh. Amen. ²⁶ Cu mi ruangah Pathian in annih cu ningzakza hurnak ah a pe hai. Ziangahtile, an nunaupawl hmanin an nunau sinak a dan vekih hmang loin, nunau tidan kalh zawngin an hmang. ²⁷ Cutivek thothoin mipapawl khalin nunau thawi pawlawkdan cu an bansan ih, pakhat le pakhat supaw thei lo cakhiarnak sia in an itaw. Mipa in mipa dang hnenah ningzakza thil sual an tuah ih, an thil sual tuah ruangih cawhkuan an hmuh ding mi cu an co. ²⁸ Cule, an theihnak ah Pathian kaihhnget an duh lo ruangah Pathian in ruahnaklungthin se linglet sungah thil mawilopawl ti dingin a pe hai. ²⁹ Annih cu dingfellonak, nu le pa sualnak, sualralnak, duhhamnak, midang parih lungput sia neihnak, iksiknak thawi khahnak, laithahnak, tawhawknak, mi bumnak, midang parih thil ṭha lo tuah duhnakpawl hmuahhmuah tlain an khat. Annih cu an hmurka a tam. ³⁰ Mi an relsia, Pathian an hua, mihngal, mipuarthau, mipawrhaw an si. Thil ṭha lo thar an tuah ih, nu le pa thu an lung lo. ³¹ Theihthiamnak an nei lo. An thukam mi an thlun lo. Suahkeh duhdawtnak an nei lo. Remawk an duh lo. Zahngainak an nei lo. ³² Cuvek a tuahtupawl cu thi tlak an si tiih Pathian thuṭhennak dik cu thei cingin an tuah lawng si loin midang a tuahtupawl khal an lungkimpi.

¹ Curuangah, maw minung, mi thu va ṭhentu, puhmawh ding zianghman na nei lo. Ziangahtile, midang thu na va ṭhen tikah nang khal cuvek thotho na tuah ve ruangah nangmah le nangmah thiamlo na cohaw a si. ² Sikhalsehla cuvek thil a titupawl Pathian in thu a ṭhen tikah thutak zulhin thu a ṭhen a si ti kan thei. ³ Maw minung, hivek thil a tuahtupawl cu thu na ṭhensak ih, nangmah rori khalin cuvek thilpawl cu na tuah. Pathian in thu a ṭhen tikah ka luat ding tiah na ruat maw si? ⁴ Asilole, Pathian-ih ṭhatnak cun sualsirnak ah a lo hruai ti thei loin a ṭhatnak, mi a zawi theinak le a thinsaunak lenziapawl tla cu ziang siar loin maw na um? ⁵ Na luhlul ih na thinlung na thleng lo. Curuangah nang cun Pathian thinhengnak ni le a thuṭhennak dik a langter ding ni hrangah nangmai hrangah thinhengnak na khawlkhawm rero a si. ⁶ Anih cun mi tin an ṭuan mi vek cioin a rul ding. ⁷ Hnaṭuan ṭha thinsau zetih tuah ṭenṭotu le thangṭhatnak le upatnak le ṭawihral thei lo mi a hawltu cu Pathian in an hnenah kumkhawnunnak a pe ding. ⁸ Asinan mai ṭanghma lawng sial, thutak thlun lo ih, dingfellonak a thluntupawl hnenah Pathian in thinhengnak le thinlingnak a pe ding. ⁹ Thil ṭha lopawl a tuah vivotu mi kip parah harsatnak le aihramnak a um ding. Jewmi parah a si hmaisa ding ih, cu ṭheh in Grikmi par khalah a si ding. ¹⁰ Asinan, thangṭhatnak le upatnak le hnangamdaihnak cu thil ṭha a tuahtu mi kip hnenah a um ding. Jew-mi hnenah a si hmaisa ding ih, cu ṭheh in Grikmi hnen khalah a si ding. ¹¹ Ziangahtile, Pathian in mi thleidan a nei lo. ¹² Dan um lo ih thil sual a tuahtupawl hmuahhmuah cu Dan um loin an hloral ding ih, Dan hnuaiih thil sual a tuahtupawl hmuahhmuah cu Dan in thu a ṭhen ding. ¹³ Ziangahtile, Dan hnuaiih a theih lawng theitu menpawl cu Pathian mithmuh ah midingfel an si lo. Asinan, cui Dan a thluntupawl cu thiamcoter an si ding. ¹⁴ Ziangahtile, Dan neilotu Zentelpawl in Dan ih a ngen mi an pianphung sinak in an tuah tikah cumi cu anmai hrangah dan an si. ¹⁵ Cui minungpawl cun Pathian in an thinlung sungah Dan ih thilti a ngan cia zo ti an langter. Cucu an sia le ṭha theihnak khalin a theihpi a si. An ruahnak cun anmah a mawhthluk thul, a hum thul. ¹⁶ Jesu Khrih hmang in Pathian in minungpawlih tuahthup mipawl thu a ṭhen ni ah cun ka thuthangṭha vekin thu a ṭhen ding. ¹⁷ Ngai hnik, Jew-mi tiih kawh mi na si. Dan parah na ṭhumaw ih, Pathian ah na pawrhaw. ¹⁸ Cule Pathian duhzawng na thei. Dan ihsin an lo zirh zo ruangah thil ṭha zetpawl cu na pawm. ¹⁹ Cule mitcaw hruaitu ah, thim lakih umpawlih tleu ah, ²⁰ miaapawl nun zirhtu ah, nauhakpawl zirhtu ah, Dan-ih theihnak le thutak nei vekin na lang. ²¹ Curuangah, nang midang zirhtu, nangmah le nangmah na zirhaw lo maw si? Rukru lo dingih simtu nangmah in na ru ding maw? ²² Uire hlah tiih titu nangmah riangri na uire maw? Nang milempawl huatu, milem temple-pawl ih thil an ret mi tla na suam maw? ²³ Nang, Dan thu ih pawrhaw, Dan na pahbal tikah khan, Pathian ziangsiarlotu na si lo maw? ²⁴ Ziangahtile, “Nangmah ruangah Pathian hmin cu Zentelpawl lakah thangsiat a si,” tiih ngan vek khan a si. ²⁵ Thungaiten, Dan na thlun a si ah cun serhtannak hi a hlawk ko. Asinan, Dan pahbaltu na si ah cun na serhtannak cu serhtan lo vekah a cang. ²⁶ Curuangah serhtan lo mi pa in Dan ih a ngen mi dingfelnakpawl a thlun asile a serhtanlonak cu serhtan ah Pathian in a pawmsak lo ding maw? ²⁷ Nannih ngan mi Dan neitu le serhtan mi in Dan nan pahbal ih, taksa dan ih serhtan lo mi pa in Dan a thlun famkim a si ah cun thu a lo ṭhen lo ding maw? ²⁸ Ziangah cutin ka ti tile a leng lamih Jew-mi cu Jew-mi taktak a si lo. Leng lam taksa men serhtannak khal serhtannak taktak a si lo. ²⁹ Asinan, sung lamih Jew-mi a situ cu Jew-mi taktak a si. Serhtannak taktak cu thinlung serhtannak hi a si. Cumi cu Thlarau in a si ih, Dan thungan mi tlain a si lo. Anih cu milaipawl ih an thangṭhat mi si loin, Pathian ih a thangṭhat mi a si sawn.

¹ Cuti asile Jew-mi in ziang hlawknak a nei? Serhtannak in teh ziang ṭhathnemnak a nei? ² A ṭhathnemnak phun tampi a um. A hmaisabikah Pathian in a kamsuak thupawl cu an kil dingah a pe. ³ Mi hrekkhat in an zum lo ah teh ziang a cang ding? An zumlonak cun Pathian rinumnak cu ṭhahnem lo ah a cangter ding maw? ⁴ Si lamlam hlah! Pathian cu midik siaw seh la, mi kip hi thuphanper si sawn hai seh. “Na thupawl tla ah nang in thiam na co thei ding ih, thuṭhen na si tikah na neh thei hainak dingah,” tiih ngan vek khan a si. ⁵ Sikhalsehla, kan dingfellonak in Pathian dingfelnak a langter a si ah cun ziang kan sim ding? Pathian in a thinhengnak kan parih a thlenter tikah, anih cu midiklo a si ding maw? Minung ṭawng vekin ka ṭawng a si. ⁶ Si lamlam hlah! Cutin rak sita hnik sehla, ziangtin Pathian in leitlun mi thu a ṭhen ding? ⁷ Asinan thuphan ka pernak in Pathian-ih thutak cu a cak sinsin ih, thangṭhat a co sinsin asile, ziangruangah kei cu Pathian in misual vekih thu i ṭhen? ⁸ Ziangah, “Thil ṭha a suah theinak dingah thil ṭha lo kan tuah pei?” tiah kan ti men lo. Mi hrekkhatpawl in cutivekin an ṭawng a si tiah kanmah hmuhsuam in in puh. Cuvek mipawl thiamlo an co cu thil dik a si. ⁹ Cuti asile ziangtin? Kannih Jew-pawl hi annih hnakin kan cungnung cuang maw? Cungnung cuang lamlam hlah! Ziangahtile, Jew-pawl le Grikpawl hmuahhmuah cu sual hnuaiah an um thluh tiah kan rak puh zo. ¹⁰ “Midingfel zohman an um lo, an um lo, pakhat khal an um lo. ¹¹ Theithiamtu zohman an um lo, Pathian hawltu zohman an um lo. ¹² An zaten zinpeng an zawh, an zaten miṭhahnemlo ah an cang. Thil ṭha tuahtu zohman an um lo, an um lo, pakhatte hman an um lo. ¹³ An dang cu a awngaw mi thlan vek a si. An lei in mi bumnak an ṭawng. An hmur hnuaiah rul tur a um. ¹⁴ An kaa cu camsiatnak le siatkhatnak ṭawngkam in a khat. ¹⁵ Thisen suah dingah an ke cu a rang zet. ¹⁶ An lamzin ah siatralnak le vanduainak a um. ¹⁷ Daihnak lamzin an thei lo. ¹⁸ An mit ah Pathian ṭihzahnak a um lo,” tiih ngan vek khan a si. ¹⁹ Kaa hmuahhmuah an cip ih, leitlun mi hmuahhmuah Pathian hmaiih mawh nei an sizia a lang theinak dingah Dan ih a sim mi kip cu Dan hnuaiih um mipawl hnenah a sim a si ti kan thei. ²⁰ Curuangah, mi zokhal Dan thiltipawl parah ṭhumaw in Pathian mithmuh ah thiamco an um lo ding. Ziangahtile, Dan ruangin sual theih famkimnak a um a si. ²¹ Asinan Dan tel loin Pathian in a dingfelnak cu a phuanglang zo. Cucu Dan thupawl le profet ih ngan mi thupawl in an theihpi. ²² Pathian hnen ihsin a dingfelnak cu Jesu Khrih zumnak in mi hmuahhmuah hnenah le mi hmuahhmuah parah a ra. Ziangahtile, Pathian hmaiah mi hmuahhmuah danglamnak zianghman a um lo. ²³ Ziangahtile, mi hmuahhmuah in thil an tisual zo ih, Pathian ropitnak an thleng ban lo. ²⁴ Pathian in annih cu a zangfahnak in Jesu Khrih ih um mi tlensalnak hmang in alakin thiam a coter hai. ²⁵ Pathian in Jesu Khrih cu tlawnlungawithawinak vekin a langter. Cucu a thisen ah zumnak in kan co. Cucu Pathian dingfelnak langternak ah a si. Ziangahtile, Pathian thinsaunak in tui hlanih sual tuah mipawl tla cu a lanta a si. ²⁶ Pathian cu midingfel le Jesu parih zumnak ṭhumtupawl thiamcotertu a sizia langternak dingah a dingfelnak cu tui canah hin a langter a si. ²⁷ Cuti asile ziangtin mi a pawrhaw thei ding? Pawrhawknak ding lamzin a um lo. Ziang dan in a dawn? A ṭuannak in maw? Si hlah, zumnak dan in a dawn sawn a si. ²⁸ Curuangah, Dan thilti tel loin minung cu zumnak in Pathian in thiam a coter ti hi kan thunetnak a si. ²⁹ Pathian cu Jew-pawl hrang lawng ih Pathian a si maw? Zentelpawlih Pathian khal a si ve lo maw? Si e, Zentelpawlih Pathian khal a si ve. ³⁰ Ziangahtile, serhtanpawl cu zumnak in le serhtanlopawl khal zumnak ih thiamcotertu Pathian pakhat a um. ³¹ Cuti asile zumnak thawngin Dan cu zianghmanlo ah kan can tinak maw si? Si lamlam hlah! Cu hnakin Dan cu kan hngetter sawn a si.

¹ Cuti asile taksa dan ih kan pa Abraham thu ah ziang kan sim ding? Ziang a hmu? ² Ziangahtile, Pathian in Abraham cu a ṭuannak in thiam a coter asile Abraham in pawrhawk ding a nei ding. Asinan Pathian hnenah cun a nei lo. ³ Cathianghlim in ziangtin a ti? “Abraham in Pathian a zum ih, cui zumnak cu a dingfelnak hrangah Pathian in a siarsak,” tiah a ti. ⁴ Mi pakhat in hna a ṭuan tikah a ṭuan man cu zangfah thilpek tiin an siar lo. Leiba ih ruah a si sawn. ⁵ Sikhalsehla, hna ṭuan lo, Pathian ngaihsak lo, thiamcotertu zum sawntu-ih zumnak cu a dingfelnak ah siarsak a si. ⁶ Cuvekin David khalin ṭuannak tel lo ih Pathian in midingfel ih a siar mi pa-ih hualvanṭhatnak cu hitin a sim, ⁷ David in, “Pathian in dan loih an nunnak tla a ngaidam mipawl, an sualnakpawl a khuhsak mipawl cu mihualvanṭha an si. ⁸ Sual na cingin sual lo tiin BAWIPA in a siar mi pa cu mihualvanṭha a si,” tiah a ti. ⁹ Hi hualvanṭhatnak cu serhtan mipawl hrang lawngah a si maw, asilole, serhtan lo mipawl hrang khalah a si? Cutiih kan tinak cu Abraham in a zum ih, cui a zumnak cu Pathian in a dingfelnak ah a siarsak. ¹⁰ Ziang tikah cumi cu a rak siarsak? Abraham serh a tan hnuah maw, serh a tan hlanah? Serh a tan hnuah si loin serh a tan hlanah a si sawn. ¹¹ Abraham cun serhtan hminsinnak a co ih, cumi cu serhtan a si hlanih a neih mi zumnak ih dingfelnak tacik a si. Cutin serhtan lo mi an si khalle zumtu hmuahhmuah ih pa a si theinak dingah le dingfelnak cu an hrang khalih Pathian in a siarsak theinak ding hrangah a si. ¹² Abraham cu serhtanpawl lawng ih pa si loin kan pa Abraham in serh a tan hlanih a neih mi zumnak keneh a zawhtupawlih pa khal a si. ¹³ Ziangahtile, leitlun ro cotu ding tiih thutiamkamnak cu Abraham le a tesinfa in Dan thawngin si loin, zumnak ih an co mi dingfelnak thawngin an ngah a si. ¹⁴ Dan thu ih nungpawl cu ro cotu rak si hai hnik sehla zumnak cu thulolakmen a si ding ih, thutiamkamnak khal santlailo ah a cang ding. ¹⁵ Ziangahtile, Dan cun Pathian thinhengnak a suah. Dan a umlonak hmun ah Dan pahbalnak a um lo. ¹⁶ Curuangah thutiamkam cu zangfahnak in a si theinak dingah zumnak parih ṭhumaw a si. Cutin thutiamkam cu Abraham-ih tesinfa hmuahhmuah hnenih a feng theinak dingah a si. Dan parih ṭhumawpawl hnen lawngah si loin, Abraham-ih zumnak parih ṭhumawpawl hnen khalah a fiang a si. Anih cu kan zateih pa a si. ¹⁷ “Miphun tampi-ih pa si dingah, ka lo ruat zo,” tiih ngan vek khan, Abraham cu mithipawl nunnak petu le thil um lo um vekih reltu a zum mi Pathian hmaiah anih cu kan pa a si. ¹⁸ “Na tesinfa cu cuvekin tampi an si ding,” tiih rak sim cia mi vekin, miphun tampi-ih pa a can theinak dingah ruahsan ding a neih lo laiah, Abraham cun ruahsannak thawn a zum. ¹⁹ Cun, a taksa cu a thi a si ti le amah cu kum zakhat a si zo ih, Sarah-ih pum khal a thi a si ti thei na cingin a zumnak a derdai cuang riai lo. ²⁰ Asinan, zumnak tlasam in Pathian-ih thutiamkam cu a ringhlel lo. Zumnak ah a cak ih, Pathian a thangṭhat. ²¹ Cule Pathian in a tiamkam zo mi cu a tuahsuak thei a si ti cu a theifiang. ²² Curuangah cui a zumnak cu a dingfelnak ah Pathian in a siarsak. ²³ “A dingfelnak ah Pathian in a siarsak,” tiih ngan mi hi Abraham hrang lawngah a si lo. ²⁴ Kan hrang khalah a si. Kan Bawipa Jesu mithi lak ihsin a thotertu Pathian kan zum asile kan zumnak cu dingfelnak ah in siarsak ding. ²⁵ Kan thil tisualnak ruangah anih cu hlan a si ih, thiam kan conak dingah anih cu thawhter a si.

¹ Zumnak in thiamcoter kan si zo ruangah kan Bawipa Jesu Khrih thawngin Pathian thawn remawknak kan nei. ² Amai zarah zumnak in cui zangfahnak sungah luhnak lamzin khal kan nei. Cui zangfahnak ah cun kan ding ih, Pathian ropitnak ruahsan in kan ai a puang. ³ Cu mi lawng si loin harsatnak kan neih tikah cu mi ah cun kan ai a puang a si. A san cu harsatnak in tuarfainak a suakter ti kan thei. ⁴ Tuarfainak cun tawntehnak a suakter ih, tawntehnak cun ruahsannak a suah. ⁵ Cule, ruahsannak in kan ning in zakter lo. Ziangahtile, Pathian in kan hnenih in pek mi Thlarau Thianghlim hmang in kan thinlung ah a duhdawtnak a burh zo. ⁶ Ziangahtile, cahnak nei lo ih kan um laiah a can teah Khrih cu Pathian ngaihsaklopawl hrangah a thi. ⁷ Midingfel aiih mi pakhat thih ding cu thil vang zet a si. Miṭha aiah cun mi zotal si maw an thi ngam khal a si thei. ⁸ Sikhalsehla, Pathian in in duhdawtzia cu hitin a langter, misual kan si laiah Khrih cu kan aiah a thi. ⁹ Cui hleiah, atu ah Khrih thisen thawngin thiamcoter kan si zo ruangah, amah thawngin Pathian thinhengnak ihsin run kan si ding. ¹⁰ Ziangahtile, a doral kan si lai hmanih, a Fapa thihnak in Pathian thawn kan remaw zo a si ah cun, remaw zo kan si hnuah cun a Fapa-ih nunnak in in rundam sinsin ding. ¹¹ Cuti lawng si loin, kan Bawipa Jesu Khrih thawngin Pathian ah kan aipuang ih, atu ah Jesu Khrih thawngin remawknak kan co zo. ¹² Curuangah, mi pakhat ruangin leitlun ah sual a lut ih, cui sual ruangah leitlun ah thihnak a luh vekin thihnak in mi hmuahhmuah a fangsuak. Ziangahtile, mi hmuahhmuah an sual thluh zo a si. ¹³ Ziangahtile, Dan a thlen hlanah leitlun ah sual a um zo. Asinan Dan a um lo laiah, sual cu sual ih siar a rak si lo. ¹⁴ Sihmansehla, Adam ihsin Mawsi tiang Adam-ih dan pahbal mi vek sual a tuahlotupawl par khalah thihnak in a uk. Adam cu a ra ding mi pa hmuhsaknak a si. ¹⁵ Asinan, thilthlawnpek cu Adam-ih thil tisual vek a si lo. Ziangahtile, mi pakhat ih thil tisualnak ruangah mi tampi an thi. Cuihleiah Pathian zangfahnak le mi pakhat, Jesu Khrih thawngih a ra mi zangfah thilpek cu mi tampi hnenah a luangliam zo. ¹⁶ Cule cui thilthlawnpek cu mi pakhat sualnak ruangih thil ra thleng mi vek a si lo. Ziangahtile, thuṭhennak cu mi pakhat sualnak ruangah thiamlo mi coter dingah a thleng. Asinan, thiltisual tampi ruangih thilthlawnpek cun thiamconak a thlen. ¹⁷ Ziangahtile, mi pakhat in thil a tisual ruangah, cui mi pakhat ruangah thihnak in a uk asile a luangliam mi zangfahnak le dingfelnak thilpek cotupawl in nunnak ah mi pakhat, Jesu Khrih thawngin an uk sinsin ding. ¹⁸ Curuangah, mi pakhat ih thil tisualnak ruangin mi hmuahhmuah hnenah thiamlo conak a thleng. Cuvek thothoin, mi pakhatih dingfelnak hnaṭuannak thawngin dingfelnak cun mi hmuahhmuah hnenah nunnak ngah theinak a thlen. ¹⁹ Ziangahtile, mi pakhatih thulunlonak ruangah mi tampi cu misual ih canter an si bangin, mi pakhatih thulunnak thawngin mi tampi cu midingfel ih canter an si ding. ²⁰ Thil tisualnak a karh theinak dingah, Dan a ra thleng. Asinan, sual a karhnak hmun ah zangfahnak a luangliam sinsin. ²¹ Cuti cun sual cun thihnak ih a rak uk dah bangin, zangfahnak cun Jesu Khrih kan Bawipa thawngin kumkhawnunnak ah dingfelnak in a uk theinak dingah a si.

¹ Cuti asile, ziang kan sim ding? Zangfahnak a karhsin theinak dingah, sual ah kan um peh vivo ding maw? ² Um peh lamlam hlah! Kannih sual ih thi zo, ziangtin sual ah kan nung vivo thei ding? ³ Kannih Khrih Jesu-ih baptisma a cotupawl hmuahhmuah hi a thihnak ah baptisma kan co a si ti nan thei lo maw? ⁴ Curuangah Pa in Khrih cu mithi lak ihsin a ropitnak hmang ih a thawhter vekin kannih khal nun tharih kan nun theinak dingah baptisma in Khrih thawn thihnak ah in phum. ⁵ Ziangahtile, Khrih thawn a thihnak bangnak nei in hmunkhat ah zawmawkter zo kan si ah cun, a thawhsalnak bangnak nei khalin hmunkhat ah zawmawkter kan si ding. ⁶ Ziangahtile, sual tisa cu zianghman tithei lo ih a um theinak dingah le kannih cu sual rawng kan bawl nawn lonak dingah kan minung hlun cu Khrih rualah khenbet a si zo ti kan thei. ⁷ Ziangahtile, a thi zotu cu sual ihsin a luat zo. ⁸ Curuangah, Khrih rualih kan thih zo ruangah, amah rualah kan nung ve ding ti kan zum a si. ⁹ Khrih cu mithi lak ihsin thawhter a si ih, a thisal nawn lo ding ti kan thei. Thihnak in a parah thu a nei nawn lo ding. ¹⁰ Ziangahtile, a thih tikah sual lamah kumkhaw hrangah vei khat a thi a si. Asinan, a nun tikah Pathian lamah a nung. ¹¹ Cutivek thothoin, nannih khal sual lamah thi taktakah ruataw uh. Asinan, Khrih Jesu kan Bawipa ah cun Pathian lamah nungah ruataw uh. ¹² Cutin, nan tisa cakhiarnak thlun dingin, a thi thei mi nan taksa parah sual in lo uk hlah seh. ¹³ Cule, nan taksa pengpawl cu dingfellonak hmanrua vekin sual ah hlan hlah uh. Mithi lak ihsin nungsalpawl vekin nanmah le nanmah cu Pathian hnenah hlanaw sawn uh la, nan taksa pengpawl tla cu dingfelnak hmanrua vekin Pathian hnenah hlan uh. ¹⁴ Nannih cu Dan hnuaiih um nan si lo ih, zangfahnak hnuaiih um nan si sawn ruangah sual in nan parah thu a nei nawn lo ding. ¹⁵ Cuti asile ziangtin? Kannih cu Dan hnuaiah um loin zangfahnak hnuaiih kan um ruangah sual kan tuah ding maw? Tuah lamlam hlah! ¹⁶ Mi pakhatkhat hnenah sal vekin a thu lung dingih nanmah le nanmah nan hlanawk asile a thu nan lun mi pai sal nan si ti nan thei lo maw? Cuti asile, nannih cu thihnak ih mi hruaitu sual sal asilole dingfelnak ih mi hruaitu thulunnakih sal nan si. ¹⁷ A hlanah cun nannih cu sualih sal nan rak si. Sikhalsehla, nan hnenih pek mi zirhnak nan thinlung zaten nan lun ruangah Pathian hnenah lungawithu ka sim. ¹⁸ Sual ihsin luatter nan si zo ruangah, nannih cu dingfelnakih sal ah nan cang. ¹⁹ Nan tisa a cah lo ruangah minung dan in thu ka sim a si. Nan taksa peng tla cu a thianghlim lo mi thil lamah le dan lo ih nunnak lamah sal vekin nan rak pe. Cui dan lo ih nunnak cun dan lo ih nun sinsinnak ah a hruai. Cuvekin, atu ah nan taksa pengpawl tla cu thianhlimnak ih hruaitu dingfelnak sal vekin pe uh. ²⁰ Nannih cu sualih sal nan rak si laiah, dingfelnak in a rak lo uk lo. ²¹ Atu ih nan zahpi mi thilpawl in khai canah ziang hlawknak a lo pe? Ziangahtile, cui thilpawlih cemnetnak cu thihnak a si. ²² Asinan, atu ah cun sual ihsin luatter nan si zo ih, Pathian sal ah nan cang zo. Thianhlimnak le a netnakih kumkhawnunnak ih hruaitu rah nan nei. ²³ Ziangahtile, sual man cu thihnak a si. Sikhalsehla Pathian thilthlawnpek belte cu Khrih Jesu kan Bawipa thawngin kumkhawnunnak a si.

¹ Dan a theitu nannihpawl hnenah atu ah ka lo sim a si. Unaulenuh, Dan cun mi pakhat parah a nun sung lawng a uk ti nan thei lo maw? ² Pasal nei mi nunau cu a pasal a nun sung lawng dan in a pasal parah a ṭemṭawn a si. Asinan, a pasal a thih ah cun pasal thu ih dan cu a santlai nawn lo. ³ Cuvek thothoin, a pasal a nun lai ah cun cu nu cu mipa dang thawn an neihawk asile cu nu cu uire tiah an ti ding. Asinan, a pasal a thih a si ah cun cu nu cu dan ihsin a luat ih, midang thawi an neihawk a si hmanah uire a si lo. ⁴ Cuvekin, ka u le ka nau tla, Pathian lamih rah kan rah theinak dingah, midang, mithi lak ihsin thawhter mi ih ṭhit mi nan si theinak dingah nannih khal Khrih-ih taksaruangpum thawngin Dan lamah mithi ah nan cang. ⁵ Ziangahtile, tisa ih kan um laiah, Dan in a cawhtho mi cakhiarnak cak zetpawl cun kan taksa pengpawl ah thihnak suah dingin hna an ṭuan. ⁶ Asinan, atu ah cun hi hlanih in kaitangtu Dan lamah kan thi zo. Curuangah, Dan in kan parah zianghman santlaihnak a nei nawn lo. Cutin Dan thu ngan mi lamzin hlun in si loin, Thlarau lamzin thar in Pathian kan ren theinak dingah a si. ⁷ Cuti asile ziangtin kan ti ding? Dan cu sual a si maw? Si lamlam hlah! Cu hnakin Dan ihsin sual thu zir lo ningla, sual cu ziang a si ti ka thei lo ding. Ziangahtile, Dan cun, “Mi thil daw hlah,” tiah a ti. Cutin ti lo sehla, mi thil dawt cu sual a si ti ka thei lo ding. ⁸ Asinan sual cun thupek cu remcangah la in keimah ah cakhiarnak phunphun a umter. Ziangahtile, Dan um lo cun sual cu a thi a si. ⁹ Dan um loin vei khat ka rak nung dah. Asinan, thupek a ra thlen tikah, sual cu a nungsal ih, kei cu ka thi. ¹⁰ Nunnak kengtu ding thupek cun ka hnenah thihnak a keng ti ka hmusuak. ¹¹ Ziangahtile, sual cun thupek cu remcangah la in i bum ih, thupek hmang in i that. ¹² Curuangah, Dan cu a thianghlim ih, thupek khal a thianghlim, a dingfel ih ṭhat khal a ṭha. ¹³ Cuti asile thil ṭha cu ka parah thihnak ah a cang maw si? Cang lamlam hlah! Asinan, sual cu sual a sizia a lang theinak dingah sual cun thil ṭha hmang in keimah ah thihnak a suah. Cutin, thupek hmang in cui sual cu sual sinsinih a lang theinak dingah sual cun keimah ah thihnak in a ṭuan a si. ¹⁴ Dan cu thlarau lam thil a si ti kan thei. Asinan, kei cu sual hnuaiih zuar mi tisa mi ka si. ¹⁵ Ziangahtile, ka thiltuah mi hi ka theithiam lo. Ziangahtile, tuah ding ka duh mi ka tuah lo ih, ka huat mi ka tuah sawn. ¹⁶ Cutiih tuah ding ka duh lo mi ka tuah asile Dan cu a ṭha a si tiah ka lungkimpi. ¹⁷ Asinan, atu ah, cu mi a tuahtu cu keimah ka si nawn lo, ka sungih a um mi sual a si sawn. ¹⁸ Ziangahtile, ka sungah thil ṭha zianghman a um lo ti ka thei. Cumi cu ka tisa ah ka tinak a si. Ziangahtile, thil ṭha tuah duhnak cu keimah ah a um, asinan cu mi tuahsuak theinak lamzin ka hmu thei lo. ¹⁹ Ziangahtile, thil ṭha tuah ka duh mipawl ka tuah lo ih, tuah ding ka duh lo mi thil ṭha lopawl ka tuah sawn. ²⁰ Atu ah tuah dingih ka duh lo mi ka tuah asile cu mi a tuahtu cu keimah ka si nawn lo, ka sungih a um mi sual a si sawn. ²¹ Curuangah, thil ṭha tuah ka duh tikah, thil ṭha lo ka hnenah a um ti mi dan hin keimah ah hna a ṭuan ti ka hmusuak. ²² Ziangahtile, ka sung lam minung cu Pathian Dan ah a lungawi zet. ²³ Asinan, ka ruahnaklungthin dan dokalhtu ka taksa peng ah dan dang ka hmu. Cumi cun, ka taksa pengpawl ih ṭuantu sual danih sal ah i hruai. ²⁴ Aw ka dinhmun hi a va harsa tak em! Thihnak ih mi hruaitu hi taksaruangpum ihsin zo in i run ding? ²⁵ Jesu Khrih kan Bawipa thawngin Pathian in i run ding ruangah a hnenah ka lung a awi a si. Curuangah, ka ruahnaklungthin thawn keimah rori cu Pathian dan cu ka rian ih, asinan ka tisa cun sual dan ka rian a si.

¹ Curuangah, tu ah cun tisa duhzawng ih nung loin Thlarau duhzawng ih a nungtu, Khrih Jesu-ih a um mipawl hrangah cun thiamlo conak a um lo. ² Ziangahtile, Khrih Jesu thawngin Khrih Jesu ah nunnak Thlarau dan cun sual le thihnak dan ihsin i luatter zo. ³ Ziangahtile, tisa ruangah Dan cu a cak lo ih huham a nei lo. Curuangah, Pathian in amai Fapa rori cu misual pian keng in sual hrangih raithawinak ah a run thlah ih, taksaruangpum ah sual cu thiamlo a coter. ⁴ Tisa duhzawng ih nung loin, Dan-ih dingfelnakpawl cu Thlarau duhzawng ih a nungtu kanmah ah a famkim theinak dingah a Fapa a run thlah. ⁵ Ziangahtile, tisa duhzawng ih a nungtupawl cun tisa lam thilpawl an ruat. Asinan, Thlarau duhzawng ih a nungtupawl cun thlarau lam thilpawl an ruat. ⁶ Tisa lamzin ruah cu thihnak a si. Asinan thlarau lam lamzin ruah cu nunnak le hnangamdaihnak a si. ⁷ Ziangruangah tile tisa lamzin ruah cu Pathian doral sinak a si. Ziangahtile, tisa cu Pathian Dan ah a tlulut lo ih, a tlulut thei lo taktak. ⁸ Curuangah tisa ih umpawl cun Pathian lung an awiter thei lo. ⁹ Asinan, nannih cu tisa ih um nan si lo. Pathian Thlarau cu nanmah ih a um ngaingai asile nannih cu Thlarau ah nan um a si. Asinan, zokhal Khrih Thlarau neilotu cu Khrih-ih ta a si lo. ¹⁰ Cule Khrih cu nan sungih a um asile sual ruangah taksa pum cu a thi. Asinan, dingfelnak ruangah Thlarau cu nunnak a si. ¹¹ Asinan mithi lak ihsin Jesu a thotertu Pathian Thlarau nan sungih a um asile mithi lak ihsin Khrih a thotertu in nan sungih um a Thlarau thawngin thi thei mi nan taksa cu nunnak a pe ve ding. ¹² Curuangah u le nau tla leiba kan nei. Asinan, tisa duhzawng ih nung dingin tisa ah a si lo. ¹³ Ziangahtile, tisa duhzawng ih nan nun asile nan thi ding. Asinan Thlarau in taksaruangpum hnaṭuan tla cu nan thah asile nan nung ding. ¹⁴ Ziangahtile, Pathian Thlarau ih a hruai mipawl hmuahhmuah cu Pathian-ih fate an si. ¹⁵ Ziangahtile, ṭih ih um dingin sal ih lo tangsaltertu ding Thlarau nan co lo. Fa sinak Thlarau nan co sawn. Cui Thlarau in, “Abba, ka Pa,” tiin kan ausuak. ¹⁶ Pathian fate kan si ti cu Thlarau roriin kan thlarau a theihfiangter. ¹⁷ Cule, fa kan si ruangah, ro cotu khal kan si ih, Pathian ro cotu le Khrih ro copitu kan si. Amah thawn kan tuartlan taktak a si ah cun Khrih thawn sunlawihtlang kan si thei ding. ¹⁸ Tui canih kan tuarnakpawl hi kan hnenih phuanlang leh ding mi ropitnak thaw cun tahṭhim tlakah ka ruat lo. ¹⁹ Pathian falepawl lang lehnak ding cu sersiam mipawl in an hngakhlap nasa a si. ²⁰ Ziangahtile, sersiam mipawl cu zianghmanlo hnuaiih ret an si. Anmai duh ruangah si loin, a umtertu in ruahsannak thawn a umter a si sawn. ²¹ Ziangruangah tile sersiam mipawl rori khal ṭawihralnak sal ihsin luatter an si ding ih, Pathian fatepawl zalennak ropi sungah luhter an si ding. ²² Ziangahtile, sersiam mi hmuahhmuah cu tu tiangin hrum le nauhrin nat tuar vekin an umtlang a si ti kan thei. ²³ Cu lawng si loin, rah hmaisabik a si mi Thlarau a neitu kanmah rori khal kan sung lam ihsin fa sinak a si mi, kan taksa tlensalnak hngak in kan hrum rero. ²⁴ Ziangahtile, kannih cu ruahsannak ah rundam kan si. Asinan hmuh thei mi ruahsan cu ruahsannak a si lo. Ziangahtile, zo in a hmuh mi thil cu a ruahsan nawn ding? ²⁵ Asinan, kan hmuh lo mi kan ruahsan asile thinsau zetin kan hngak ṭenṭo ṭheu. ²⁶ Cuvek thothoin Thlarau cun kan ṭawnṭaihnakpawl ah in bawm. Ziangahtile, zianghrangah thla kan cam ding ti kan thei lo. Sihmansehla Thlarau rori cun ṭawngkam ih sim theih lo khawp ih hrum in in ngensak. ²⁷ Thinlung cektu cun Thlarau ih ruahnaklungthin khal a thei. Ziangahtile, Thlarau cun Pathian duhzawng in mithianghlimpawl hrangah a ngensak. ²⁸ Cun Pathian a duhdawtu, amai tumtah mi vekih a kawh mipawl hrangah thil ziangkim hin an ṭhatnak dingah an ṭuantlangkhawm a si ti kan thei. ²⁹ Ziangahtile, Pathian in a theih cia mipawl cu a Fapa bangnak ih thlengaw dingah a ruat cia hai. Cutin, unau tampipawl lakah Fapa cu fatir a si thei ding. ³⁰ Cuihleiah Pathian in a ruah cia mipawl cu kawh khal a ko hai. A kawh mipawl cu thiam khal a coter hai. Thiam a coter mipawl cu a ropiter hai fawn. ³¹ Cuti asile hi thilpawl thu ah ziang kan sim ding? Pathian cu kan lamih a ṭan ah cun zo in in do thei ding? ³² Amai Fapa rori hman ui loin kan zate hrangih petu cun thil hmuahhmuah khal a Fapa thawn alakin in pecih loin a um ding maw? ³³ Pathian ih hril zo mi cu zo in sual a puh ding? Thiamcotertu cu Pathian a si. ³⁴ Thiamlo mi cohtu cu zo a si? A thi ih, cu lawng a si lo, mithi lak ihsin thawhter mi, Pathian vawrh lamah um in kan hrangih in ngensaktu Khrih cu a si. ³⁵ Khrih duhdawtnak ihsin zo in in ṭhen ding? Harsatnak in si seh, aihramnak in si seh, hremnak in si seh, pamnak in si seh, taklawngnak in si seh, ṭihphannak in si seh, ralnam in si seh in ṭhen thei ding maw? ³⁶ “Nangmai ruangah sunnihlawhin thah in kan um. Thah ding mi tuupawl vekin mi in in ruat,” tiih ngan vek khan a si. ³⁷ Sihmansehla, cui thilpawl hmuahhmuah ah cun in duhdawtui zarah nehtupawl hnakin nehtu kan si. ³⁸ Ziangahtile, thihnak in si seh, nunnak in si seh, vancungmipawl in si seh, uktupawl in si seh, huham tlain si seh, atui canih thil ziangkhal in si seh, hmai lam canih thil um ding mi ziangkhal in si seh, ³⁹ thil sang ziangkhal in si seh, thil thuk ziangkhal in si seh, sersiam mi a dang ziang thil khalin Khrih Jesu kan Bawipa-ih um Pathian duhdawtnak ihsin zianghman in in ṭhen thei lo ti ka theifiang.

¹ Khrih ah thutak ka sim a si, thuphan ka sim lo. Thlarau Thianghlim ah ka sia le ṭha theihnak khalin in theihpi ve. ² Cumi cu ka thinlung ih riahsiatnak nasazet le catbang lo thinnatnak ka neih mi hi a si. ³ Ziangahtile, taksa danih ka sungkhatpawl a si mi ka unaupawl aiah keimah rori hi Khrih hnen ihsin ṭhen in, camsiat tiang hman si ningla ka duh. ⁴ Annihpawl cu Israel-mi an si ih, fa sinak, ropitnak, thuthlungpawl, Dan peknak, Pathian rennak le thutiamkampawl tla anmai ta a si. ⁵ Pupapawl khal anmai ta an si ih, Khrih cu taksa danih a sungkua a si mi anmahpawl hnen ihsin a ra. Amah cu ziang hmuahhmuah tlunih Pathian a si. Kumkhua in amah cu thangṭhat si ko seh. Amen. ⁶ Pathian-ih ṭawngkam a hlawhsam tinak a si lo. Ziangahtile, Israel-ih tesinfa hmuahhmuah Israel diktak an si thluh lo. ⁷ Cuvek thothoin Abraham tesinfa an si ruang khalah Abraham-ih fate ngaingai an si thluh cuang lo. “Isak ah na tesinfapawl tiih kawh a si ding,” ti a si sawn. ⁸ Cucu, taksa danih fatetla cu Pathian fate an si lo ih, tiamkam fatepawl tla cu tesinfa ih pawm an si sawn tinak a si. ⁹ Ziangahtile, “Himi bikhiah mi canah ka rasal ding ih, Sarah in fapa a hring ding,” ti hi thutiamkam cu a si. ¹⁰ Cun cu lawng si loin, Rebeka khalin mi pakhat, kan pa Isak hnenin fa a vun. ¹¹ Fa a hrin hlan, a falepawl in a sia le a ṭha zianghman an tuah hlanah, hrilnak thu ih Pathian thiltum a hngeh theinak dingah Pathian in cutin a tuah. Cucu thilti parih ṭhumaw si loin, a kotu parih ṭhumaw a si sawn. ¹² Pathian in Rebeka hnenah, “A u in a nau a rian ding,” tiah a ti. ¹³ Cumi cu, “Jakob ka duh ih, Isau ka hua,” tiih ngan mi vek khan a si. ¹⁴ Cuti asile ziang kan sim ding? Pathian cu a dingfel lo maw si? Si lamlam hlah! ¹⁵ Ziangahtile, Pathian in Mawsi hnenah, “Zahngai ka duh mi parah zah ka ngai ding. Lainat ka duh mi parah ka lainat ding,” tiah a ti. ¹⁶ Cuti a si ruangah a duhtu le a tlan rerotu milai hnen ihsin a si lo ih, zahngainak a hmuhtu Pathian hnen ihsin a si sawn. ¹⁷ Ziangahtile, Cathianghlim in Faraw hnenah, “Leitlun pumpuluk ah ka hmin aupi a si theinak dingah le nangmah ah ka huham ka langter theinak dingah cui tumtahnak rori hrangah nang cu ka lo tungding a si,” tiah a ti. ¹⁸ Curuangah, Pathian cun zahngai a duh mi parah zahngainak a nei ih, thinlung hahter a duh mi parah a hakter. ¹⁹ Cule nang in, “Cuti asile ziangah Pathian in mawhsualnak a hawl hrih? Zo in a duhnak cu a dodal,” tiah thu i sut ding maw? ²⁰ Asinan, maw nang milai! Pathian kalh zawngih sawn ngamtu nang cu zo na si? Thiltuah mi in a tuahtupai hnenah, “Ziangah hivekin i tuah?” tiah thu a sut ding maw. ²¹ Bel tuahtu in bellei parah thuneihnak a nei a si lo maw? Bellei bangrep ihsin bel pakhat cu sunglawi zetih hman dingah le a dang bel pakhat cu a menmenih hman dingah tuah dingin bel tuahtu in bellei parah thuneihnak a nei a si lo maw? ²² Pathian cun a thinhengnak langter le a huham theihter duh khalsehla thinhengnak a cotu dingpawl parah le an siatnak ding a timlamsak mi thinhengnak belpawl parih thinsaunak nasazet thawi a zawi hai ah teh ziang sim ding kan nei? ²³ Cule hlan ihsi a rak timtuah hai mi zah a ngai mi belpawl parah a ropitnak lenzia a langter theinak dingah a si. ²⁴ Kannih hi a kawh mipawl cu kan si. Jew-pawl lak ihsi lawngin si loin Zentelpawl lak ihsi khalin in ko a si. ²⁵ Hosea cabu sungah Pathian in, “Ka mi a si lopawl kha, ‘Ka mi,’ tiah ka ko hai ding. Cule ka duhdawt lo mi nu kha, ‘Ka duhdawt mi nu,’ na si tiah ka ti ding,” tiah a ti. ²⁶ Cule hi tin a cang ding, “ ‘Nannih cu ka minung nan si lo,’ tiah a rak tinak hmun ah khan, ‘Nannih cu, a nung mi Pathian-ih fapapawl,’ tiah kawh an si ding,” tiah a ti. ²⁷ Isaiah khalin Israel thuhla ah, “Israel-ih fatepawl cu tipithuanthum kapih vunnel zatin tam hman hai sehla, a tangsun lawng rundam an si ding. ²⁸ Ziangahtile, Pathian in hna cu a cemnet tiang a ṭheh ding ih, dingfelnak in a tantawi ding. Ziangahtile BAWIPA in leitlun ah hna cu a tawiter ding.” ²⁹ Cucu Isaiah in hlanlaiah, “Ralkaprual BAWIPA in kan hnenah tesinfa hrekkhat tangter lo sehla, Sodom vek kan si zo ding ih, Gomorrah vekin tuah kan si zo ding,” tiah a ti vek khan a si. ³⁰ Cuti asile, ziang kan sim ding? Dingfelnak a dawilotu Zentelpawl in dingfelnak cu an hmungah zo. Cui dingfelnak cu zumnak parih ṭhumaw a si. ³¹ Asinan, dingfelnak Dan a dawitu Israel-pawl in dingfelnak Dan cu an hmungah lo. ³² Ziangruangah saw? Ziangahtile, zumnak parih ṭhumaw mi dingfelnak an dawi ve lo ih, Dan thlunnak parih ṭhumaw mi dingfelnak an dawi sawn ruangah a si. Curuangah cui bahnak lung ah an bah. ³³ Cucu, “Ngai hnik, Zion ah bahnak lung le tluknak lungpi ka ret. Zokhal amah zumtu cu mualphoter an si lo ding,” tiih ngan vek khan a si.

¹ U le nau tla, Israel-mipawl hrangih ka thinlung i duh zet mi le Pathian hnenih ka thlacam mi cu rundam an si thei ding hi a si. ² Ziangahtile Pathian hrangah ṭhahnem an ngaizia cu ka theihpi hai. Asinan an ṭhahnemngainak cu theihnak famkim milin a si lo. ³ Ziangahtile, Pathian dingfelnak an thei lo. Anmai dingfelnak dinhngehter an duh tikah, Pathian dingfelnak ah an tuhlutaw lo. ⁴ Ziangahtile, a zumtu pohpoh dingfelnak an hmuh theinak dingah Khrih cu Dan cemnetnak a si. ⁵ Ziangahtile, Mawsi cun Dan parih ṭhumaw mi dingfelnak thu a ngan, “Cu mipawl a tuahtu cu, cu mi in a nung ding,” tiah a ngan. ⁶ Asinan, zumnak parih ṭhumaw mi dingfelnak cun, “Nan thinlung in, ‘Vancung ah zo a kai ding?’ ti hlah uh,” tiah a ti. Cumi cu, tlun lam ihsin Khrih hruai suk ding tinak a si. ⁷ Asilole, “‘Zo so a thuknak sungah ṭum ding?’ ti fawn hlah uh.” Cucu, mithi lak ihsin Khrih cu hruai soh ding tinak a si. ⁸ Sikhalsehla ca ngan mi in ziang a simbet? “Thu cu na kiang nai teah a um. Na kaa le na thinlung ah a um,” tiah a ti. Cumi cu, kan phuan mi zumnak thu hi a si. ⁹ Cutin, na kaa in Jesu cu Bawi a si tiah na phuang ih, na thinlung in mithi lak ihsin Pathian in a kaitho ti na zum asile rundam na si ding. ¹⁰ Ziangahtile, mi pakhat in a thinlung in a zum ih, cumi cun dingfelnak ah a hruai. A kaa in a phuang ih, cu mi cun rundamnak a hringsuak. ¹¹ Ziangahtile, Cathianghlim in, “Amah zumtu zokhal an mualpho lo ding,” tiah a ti. ¹² Ziangahtile, Jew-mi le Grikmi karlakah zianghman danglamnak a um lo. Ziangahtile, Bawi pakhat cu an zate tlunih Bawi a si. Amah kotu hmuahhmuah hnenah a lian a si. ¹³ Ziangahtile, “Zokhal BAWIPAI hmin a kotu cu rundam an si ding.” ¹⁴ Amah cu an zum lo asile ziangtin an ko ding? A thu hna in an theih lo ah cun ziangtin amah cu an zum ding? Cule, simtu um loin ziangtin an thei ding? ¹⁵ Cule thlah an si lo ah cun ziangtin an sim ding? “Remnak thuthangṭha a phuangtu le thil ṭha thuthangṭha a phuangtupawlih ke cu ziang tlukin a mawi!” tiih ngan vek khan. ¹⁶ Asinan, thuthangṭha cu mi hmuahhmuah in an lung lo. Ziangahtile, Isaiah in, “Bawipa, kan sim mi thu cu zo in a zum?” tiah a ti. ¹⁷ Curuangah zumnak cu hna ih theihnak in a ra ih, hna ih theihnak cu Pathian thu ihsin a ra. ¹⁸ Asinan, kei in, an hna in an rak thei lo maw si? Thei taktak e, “An aw cu leilung pumpuluk ah a thang ih, an ṭawng mipawl cu leitlun deng tiang a thang,” tiah ka ti. ¹⁹ Asinan, kei in, Israel-mipawl in an theithiam lo maw si? tiah ka ti. A hmaisabikah Mawsi in, “Miphun si lo mi hmang in iksiknak ka lo neiter ding ih, miphun aa hmang in ka lo thinhengter ding a ti,” tiah a ti. ²⁰ Cule Isaiah cun ralṭha zetin, “Pathian in a hawllotupawl in in hmu. Ka thu a zingzawilotupawl hnenah keimah le keimah ka phuanglangaw a ti,” tiah a ti. ²¹ Asinan, Pathian in Israel mipawl hnenah, “Thulung lo le thuel hmangpawl hnenah sunvu in ka kut tla ka san,” tiah a ti.

¹ Asile, Pathian in a minungpawl cu a hnawng maw si? Hnawng lamlam hlah! Ziangahtile, kei khal Israel-mi, Abraham tesinfa, Benjamin hnam ka si. ² Pathian in a rak theih cia mipawl cu a hnawng lo. Cathianghlim in Elijah thu a sim mi nan thei lo maw? Anih cun Israel-mipawl dokalh in Pathian hnenah a ngen, ³ “BAWIPA, na profetpawl tla an that ih, na biakṭhengpawl tla an ṭhiatbal. Keimah lawng ka tang ih, thah in tum,” tiah a ti. ⁴ Sikhalsehla, Pathian in ziangtin a sawn? “Baal hmaiih khukbil dah lo mi thawngsarih ka hrangah ka ret a si,” tiah a ti. ⁵ Cuvek thothoin tulai khalah hin Pathian in zangfahnak ih a hril mi a tangsun an um a si. ⁶ Cule zangfahnak in a si ah cun cui hrilnak cu thilti parih ṭhumaw mi a si nawn lo. Cutin asilole zangfahnak cu zangfahnak a si nawn lo. Asinan, thilti parih ṭhumaw a si ah cun zangfahnak in a si nawn lo. Cutin asilole thilti cu thilti a si nawn lo. ⁷ Cuti asile ziangtin? Israelmipawl in an hawl mi cu an ngah lo. Asinan, hril mipawl cun an ngah ih, a tang mipawlih thinlung cu a hak. ⁸ Cucu, “Pathian in tuini tiangin ihhmutnak thlarau, hmuh theilonak mit, theihthei lonak hna a pe hai,” tiih ngan vek khan a si. ⁹ Cun David in, “An cabuai cu thang le mi awhnak, tluknak le thungrulhawknak ah cang seh. ¹⁰ An hmuh theilonak dingah an mit cu thim seh la an el cu kun lanta seh,” tiah a ti. ¹¹ Cuti asile, an tluk lantanak dingah an bah maw si? tiah kei in ka ti. Si lamlam hlah! An thil tisualnak ruangah Zentelpawl hnenah rundamnak a thleng sawn ih, cumi cun Israel-pawl thintawk ih, iksiknak an neih theinak dingah a si. ¹² An thil tisualnak cun leitlun minungpawl hnenah lennak a thlen ih, an hlawhsamnak in Zentelpawl hnenah lennak a thlen a si ah cun an famkimnak cun ziang tluk lennak a thlen sinsin ding! ¹³ Keimah rori cu Zentelpawl hnenih apostol ka si ruangah nannih Zentelpawl hnenah ka lo sim, ka rawngbawlnak cu ka tluangkhawnpi a si. ¹⁴ Ziangmawti tiin taksa danih ka miphunpawl in nahsuahnak an neih theinak dingah an thin ka thawhter ih, cutin mi hrekkhat tal ka run theinak dingah a si. ¹⁵ Ziangahtile, anmah hnawnnak hman Pathian le leitlun mipawl remawknak a si ah cun anmah cohlansalnak cu mithi lak ihsin nunnak a si lo ding maw? ¹⁶ Rah hmaisabik rawl thar cu a thianhlim asile sang hlawm pumpi khal a thianghlim a si. Cun, a hram a thianhlim asile a hngeṭekpawl khal an thianghlim. ¹⁷ A hngeṭek hrekkhatpawl cu khiah an si ih, nang cu Olif thing sungah peh na si. Nang cu hramlak Olif thing men na si nan, atu ah cun, Olif thing ih hram le thau tla na ṭawm ve. ¹⁸ Curuangah hnawn mi hngeṭekpawl cungcangthu ah tluangkhawng hlah. Cupawl ruangih na tluangkhawn asile hihi cing ringring aw, nang cun a hram na cawm lo ih, a hram in a lo cawm sawn. ¹⁹ Cutin nang in, “A sungih peh ka si theinak dingah a hngeṭekpawl tla cu khiah an si,” tiah na ti ding. ²⁰ Cumi cu a dik a si. An zum lo ruangah annih cu khiah an si, asinan nang cu zumnak in na ding. Nangmah le nangmah sang tukah ruataw hlah aw la, Pathian ṭihzah sawn aw. ²¹ Ziangahtile, Pathian in a hngeṭek taktakpawl a zuah lo asile ralring aw, cu lo asile nang khal a lo zuah ve ce lo ding. ²² Curuangah Pathian ṭhatnak le a hrohrannak cu ruat aw. A tlu mipawl parah cun a hrohrang. Asinan, a ṭhatnak ih na um peh vivo asile anih cu na hrangah a ṭha a si. Cu lo asile nang khal a lo sattan ding. ²³ Cun, zumlonak ah an um peh vivo lo asile annih cu peh an si ding. Ziangahtile, Pathian cun anmah cu a pehsal thei. ²⁴ Ziangahtile, nang cu hramlak ih mahte kho mi Olif kung ihsin tan mi na si ih, dan kalhih cin mi Olif kung ṭha sungih peh mi na si. Cumi cu a dik ruangah, ziang tluk nasa sinsinin ṭek ngai a si mipawl kha anmai Olif kung sungah peh an si pei? ²⁵ Ziangahtile, ka u le nau tla, hi thuthup hi thei lo ih nan um ding ka duh lo. Cuti asilole mifim ah nan ruataw pang ding. Cui thuthup cu hihi a si. Zentel mipum an kim lai hlanlo Pathian in Israel tamsawnih thinlung a hakter. ²⁶ Cule, cutin Israelmipawl hmuahhmuah rundam an si ding. Cumi cu, “Runsuaktu cu Zion ihsin a suak ding ih, Jakob hnen ihsin Pathian ngaihsaklonak cu a lahlo ding. ²⁷ An sualnakpawl ka lakhloh tikah cumi cu anmah thawi thuthlung ka tuah mi a si ding,” tiih ngan vek khan a si. ²⁸ Thuthangṭha lam thu ah cun nanmai hlawknak dingah annih cu thuthangṭha doral an si. Asinan, hrilnak lam thu ah cun pupapawl ruangah annih cu Pathian-ih duhdawt mi an si. ²⁹ Ziangahtile, Pathian thilthlawnpekpawl le a kawhnak cu sirawknak um loin an si. ³⁰ A liam cia mi canah nannih in Pathian thu nan lung lo. Asinan, cuvek thothoin thu an lun lo ruangah, atu ah zahngainak nan co a si. ³¹ Zahngainak nan co theinak dingah, atu ah annih cu thu an lung lo. Cui zahngainak nan conak zarin annih khalin zahngainak an co ve ding. ³² Ziangahtile, mi hmuahhmuah parih zahngainak a neih theinak dingah Pathian in an zaten thulunlonak ah a khum ṭheh hai. ³³ Pathian-ih fimnak lenzia le a theihnak lenzia cu an va thuk tak em! A thuṭhennakpawl tla cu zohman in an hawlsuak thei lo ih, a lamzinpawl tla zohman in an zawtsuak thei lo. ³⁴ “Ziangahtile, BAWIPAI ruahnaklungthin thei zo a um? Asilole zo so a thurawn mi si dah?” ³⁵ “Asilole zo in a rulhsal leh dingin a hnenah thil pe hmaisa dah?” ³⁶ Ziangahtile, thil hmuahhmuah hi amai hnenin le amai ruangin le amai hrangah an si. A hnenah kumkhua in sunlawinak um ko seh! Amen.

¹ Curuangah, ka u le ka nau tla, Pathian lainatnak ruangah nan taksaruangpum tla cu Pathian hnenah a nung ih raithawi mi vekin le thianghlim le Pathian lungawiter ih hlan dingah ka lo fawrh a si. Cumi cu nan ti ding awm hrimhrim a si. ² A ṭha mi, pawm tlak le a famkim mi Pathian duhnak cu nan theihfiang theinak dingah, tulai san mi nundan vekin nung loin nan ruahnaklungthin tharternak in thlengaw sawn uh. ³ Ziangahtile, Pathian in zumnak a lo pek tawkte fingfing vekin nanmai lakih zohman in a ruahawk ding tawk hnakih sang in ruataw hlah seh, ruahnak dik in ruataw sawn seh tiah ka hnenih zangfahnak i pek mi thawngin ka lo sim a si. ⁴ Ziangahtile, taksaruangpi pakhat ah peng tampi kan nei. Asinan, cui taksa pengpawl hmuahhmuah in hnaṭuan bangrep an nei lo. ⁵ Cuvekin, kannih cu mi tampi kan si nan, Khrih ah taksa pumkhat kan si ih, a pakpak in pehzawmawtawn cio kan si. ⁶ Kan hnenih pek mi zangfahnak bangtukin thilpek phun dangdang kan nei cio. Thilpek cu profet vekih thusim asile zumnak kan neih tawkin profet vekin thu sim uhsi. ⁷ Thilpek cu mi rennak asile mi rian uhsi. Thilpek cu zirhnak asile mi zirh seh. ⁸ Thilpek cu midang thazang va peknak asile thazang mi pe seh. Thilpek cu peknak asile siang zetin pe seh. Thilpek cu hruaitu sinak asile taima zetin hruai seh. Thilpek cu zahngainak asile lungawi zetin zahngainak nei seh. ⁹ Duhdawtnak cu a deu in si hlah seh. A ṭha lo mi hua uh la, a ṭha mi cu kaihnget uh. ¹⁰ Unau duhdawtnak thawn pakhat le pakhat duhdawaw uh. Nangmah le nangmah na upatawk hnakin midang va upat sawn aw. ¹¹ Zangzel hlah uh la, napin hna ṭuan uh. Thatho zetin Bawipa cu rian uh. ¹² Ruahsannak ah aipuang uh. Harsatnak nan tawn tikah tuar ṭenṭo uh la, bang loin thla cam uh. ¹³ A tlasam mi mithiangpawl thawn nan neih mi kha ṭawmaw uh. Mikhual ṭhaten zoh uh. ¹⁴ A lo tiduhdahtupawl thlawsuah pe uh la, camse hlah uh. ¹⁵ Lungawi mipawl cu lungawipi uh la, a ṭap mipawl cu ṭahpi uh. ¹⁶ Pakhat le pakhat parah ruahnaklungthin hmunkhat pu in umtawn uh. Nanmah le nanmah sang tukah ruataw hlah uh la, dinhmun niampawl thawn kawmaw sawn uh. Mifim ka si tiah ruataw hlah uh. ¹⁷ Zo hnen hmanah ṭhatlonak cu ṭhatlonak in lehrul hlah uh. Mi hmuahhmuah hmaiah thil ṭha tuah ding ruat uh. ¹⁸ A cang thei asile nan ti thei tawkin mi hmuahhmuah thawn remaw in um uh. ¹⁹ Duhdawt mi tla, phulei sam hlah uh la, Pathian thinhengnak hrangah hmun kian sawn uh. Ziangahtile, “Bawipa in, phuleisamnak cu keimai ta a si. Keimah in ka thungrul ding a ti,” tiih ngan a si. ²⁰ Curuangah, “Na ral a ril a rawng asile rawl pe aw. A ti a hal asile in ding pe aw. Ziangahtile cutiih na tuah asile a lu parah meiling na retkhawm a si.” ²¹ A ṭha lo in lo neh hlah seh, a ṭha lo cu a ṭha in neh sawn aw.

¹ Zokhal a tlunih thuneitu sangpawl hnenah tlulut seh. Ziangahtile, Pathian ih din lo mi thuneitu zohman an um lo. Thuneitupawl hi Pathian ih ruat mi an si. ² Curuangah zokhal thuneitu dotu cu Pathian din mi dotu a si. Cutiih a dotupawl cu anmah le anmah thuṭhennak an coawter ding. ³ Ziangahtile, uktupawl cu hnaṭuan ṭha a ṭuantu hrangah ṭihnung an si lo. Thil ṭha lo a tuahtu hrangah cun ṭihnung an si. Thuneitu ṭihnak ihsin luat na duh maw? Thil ṭha tuah aw la, thuneitu cun a lo lawm ding. ⁴ Ziangahtile, thuneitu cu na hnenih thil ṭha tuah dingah Pathian siahhlawh a si. Thil ṭha lo na tuah asile ṭih aw. Ziangahtile, anih cun ralnam cu tumtah nei in a keng a si. Ziangahtile, anih cu thil ṭha lo tuahtu parih thinhengnak thlentu, phuleisamtu Pathian siahhlawh a si. ⁵ Curuangah, thinhengnak ruang lawngah si loin sia le ṭha theihnak ruang khalah a hnenah tlulut uh. ⁶ Ziangahtile, cu mi ruangah cun siah khal kimten nan pe. Ziangahtile, thuneitupawl cu Pathian siahhlawh an si. Annih cun cu mi hrang roriah catbang loin can an pe. ⁷ Curuangah leiba nan neihnak hmuahhmuah hnenah nan leiba cu pe uh. Siah nan bak asile pe uh. Ngunkhuai nan bak asile pe uh. Nan ṭihzah ding mi pa cu ṭihzah uh. Upat ding mi cu upat uh. ⁸ Pakhat le pakhat duhdawtawknak siarlo zo hnen hmanah leiba nei hlah uh. Ziangahtile, midang a duhdawtu cun Dan a famkimter. ⁹ Dan cun, “Uire hlah,” “Tualthat hlah,” “Ruk ru hlah,” “A diklo mi theihpitu ah ṭang hlah,” “Mi thil daw hlah,” tiah a ti. Cui thupekpawl le a dang thupek ziangkhal, “Nangmah le nangmah na duhdawtawk vekin na inhnen duhdaw aw,” ti mi ṭawngkam pakhat in a khaikhawm ṭheh. ¹⁰ Duhdawtnak cun a inhnen parah thil ṭha lo a tuah lo. Curuangah duhdawtnak cun Dan a famkimter. ¹¹ Tulai thil umdan nan theih ruangah le ihthahnak ihsin ṭhangharh a cut zo ruangah cumi cu tuah uh. Ziangahtile, atu ah cun kan rak zumtir lai hnakin kan rundamnak cu a nai sawn a si. ¹² Zan hi a cem zikte thlang. Khua a vang zikte zo. Curuangah, thim ih thiltipawl cu hlawn in, tleu ih ralthuam cu hruh uhsi. ¹³ Zu hmun nuamcen in le zu ri in si seh, hursual in le tenumza hursualnak tuah in si seh, toaw le nahsuahaw ih um loin sun ih um vekin mawi zetin um uhsi. ¹⁴ Bawipa Jesu Khrih in thuamaw sawn uh la, taksa cakhiarnak cu tuah dingin tum cia hlah uh.

¹ Zumnak a cak lo mi cu rak cohlang uh la, ruahdan phun dangdang thu ah va el ruri hlah uh. ² Mi pakhat in thil ziang hmuahhmuah ka ei thei tin a zum ih, asinan a zumnak a cak lo mi pa cun hanghnah hangrah lawng a ei. ³ A eitu in a eilotu kha nautat hlah seh. A eilotu khalin a eitu kha thu ṭhen hlah seh. Ziangahtile, Pathian in anih cu a cohlang zo a si. ⁴ Midangih hnenum sawiseltu nang cu zo na si? Cui hnenum a din le a tluk cu amai pu roriih hmaiah a si. Ziangahtile, anih cu a ding ding ih, Pathian cun a dingter thei a si. ⁵ Mi pakhat in ni khat cu ni dang hnakin thupisawnah a ruat. Midang pakhat in ni ikipin bangrep in a ruat. Mi tin anmai ruahnaklungthin cioah fiang hai seh. ⁶ Ni thupi ih a ruattu cun cutin Bawipai hrangah a ruat. Cun ni thupi ih a ruatlotu cun cutin Bawipai hrangah a ruat lo. A eitu cun Bawipai hrangah a ei. Ziangahtile, a ei tikah, Pathian hnenah lungawithu a sim. A eilotu cun Bawipai hrangah a ei lo. A ei lo tikah, Pathian hnenah lungawithu a sim. ⁷ Ziangahtile, kan lakah zokhal amai hrang lawngih nung a si lo ih, amai hrang lawngih thi khal a si fawn lo. ⁸ Ziangahtile, kan nun asile Bawipai hrangah kan nung, kan thih khal asile Bawipai hrangah kan thi. Curuangah kan nun ah si seh, kan thih ah si seh, Bawipai ta kan si. ⁹ Khrih a thi ih, a thawh ih a nunsalnak san bik cu a thi mipawl le a nung mipawlih Lal a si veve theinak dingah a si. ¹⁰ Cuti asile ziangruangah nang in na unaupa thu na ṭhen? Ziangah na unaupa na nautat? Ziangahtile, Khrih-ih thuṭhennak tohkham hmaiah kan zaten kan ding leh ding. ¹¹ Ziangahtile, “BAWIPA in, ka nun vekin khuk hmuahhmuah in ka hmaiah an bil ding ih, lei hmuahhmuah in Pathian hnenah an phuangaw ding a ti,” tiih ngan a si. ¹² Curuangah kan zaten mai thuhla cio Pathian hnenah kan sim leh ding. ¹³ Curuangah, pakhat le pakhat thu ṭhensakaw nawn hlah uhsi. Cu hnakin, kan unaupai lamzin ah bahnak simaw, tluknak simaw ret lo dingin thutitluknak tuah sawn uhsi. ¹⁴ Amah teih thiang lo mi zianghman a um lo ti Bawipa Jesu ah ka thei ih, ka fiang. Asinan mi pakhat in thil hrekkhat thiang lo ih a ruah asile a hrangah cumi cu a thiang lo. ¹⁵ Na ei mi in na unaupai thin a natter asile nang cu duhdawtnak ah na um nawn lo tinak a si. Na ei mi in a hrangih Khrih a thi mi na unaupa cu siatsuah hlah. ¹⁶ Cule nan thil ṭha kha thangsiat dingah cangter hlah uh. ¹⁷ Ziangahtile, Pathian uknak cu ei le in lam thu a si lo. Cu hnakin dingfelnak, hnangamdaihnak le Thlarau Thianghlim ah lungawinak a si sawn. ¹⁸ Ziangahtile, cuti zawngih Khrih a riantu cun Pathian lung a awiter zet ih, minungpawl khalin amah cu an pawm. ¹⁹ Curuangah remawknak suaktertu le pakhat le pakhat hngetawtawntertu thilpawl tla cu dawi uh. ²⁰ Rawl ruangah Pathian hnaṭuan cu siatter hlah. Thungaite ti ah cun thil ziangkim hi an thiang ṭheh. Asinan a ei mi ruangah mi an bah asile cucu a hrangah thil ṭha lo a si. ²¹ Na unau bahnak ding si maw, a tluknak ding si maw, a cah lo phahnak dingin si maw, sa ei, zu in le thil dang ziang khal na ti lo a ṭha a si. ²² Na neih mi zumnak cu Pathian le nangmah karlakah kilkhawi aw. A pawm mi thil ih amah le amah thiamlo coawterlotu cu mihualvanṭha a si. ²³ Asinan mi pakhat in a ei tikah a ringhlel asile amah le amah thiamlo a cohaw a si. Ziangahtile, zumnak parah ṭhumaw in a ei lo. Cule ziangkhal zumnak parih ṭhumaw lo mi pohpoh cu sual a si.

¹ A cak mi kannihpawl in mah le mah lungawiawter men loin a cak lo mipawlih cahlonak cu kan phurhpi tengteng ding a si. ² Ziangahtile, mai inhnen ṭhatnak dingah an lungawiter tum cio uhsi. Cumi cun a tuahṭha ding a si. ³ Ziangahtile, Khrih amah rori khalin amah le amah a lungawiawter lo, “A lo hmuhsuamtupawlih hmuhsuamnak cu ka parah a tla,” tiih ngan vek khan a si sawn. ⁴ Ziangahtile, hlanih an rak ngan mi hmuahhmuah hi in zirhtu dingih an ngan mi a si. Ruahsannak kan neih theinak dingah Cathianghlim cun tuarfainak in neihter ih, tha in pe. ⁵ Tuarfainak le thazang petu Pathian-ih khihhmuh vekin ruahnaklungthin bangrep lo pe hram seh. ⁶ Cutin tumtah pakhat le kaa pakhat thawn kan Bawipa Jesu Khrih-ih Pa a si mi Pathian cu nan thangṭhat thei ding. ⁷ Curuangah Khrih khalin Pathian sunlawinak ding hrangih in cohlan vekin pakhat le pakhat cohlangawtawn uh. ⁸ Pupapawl hnenih Pathian in a pek mi thutiamkampawl hngetter dingah, Pathian thutak hrangah Jesu Khrih cu serhtan mipawl riantu ah a rungcang a si ti ka lo sim. ⁹ Cule Zentelpawl in a zahngainak ruangah Pathian cu an thangṭhat theinak dingah Jesu cu siahhlawh ah a rungcang. “Cu mi ruangah Zentelpawl lakah na hmin ka phuang ding ih, na hmin thangṭhatnak hla ka sak ding,” tiih ngan vek khan a si. ¹⁰ Cule, “Nannih Zentelpawl, a minungpawl thawn lungawi uh,” tiah a tisal. ¹¹ Cun, “Nannih Zentelmi hmuahhmuah, BAWIPA cu thangṭhat uh. Nannih minung hmuahhmuah tla amah cu thangṭhat uh,” tiah a tisal. ¹² Cule Isaiah in, “Jesse-ih hram a um ding ih, amah cu Zentelpawl uk dingih a ra lang ding mi pa a si. Amah ah Zentelpawl in ruahsannak an nei ding,” tiah a tisal. ¹³ Nan zum vekin ruahsannak petu Pathian in lungawinak le hnangamdaihnak hmuahhmuah thawn lo khatter hram seh. Cutin Thlarau Thianghlim huham in ruahsannak thawn nan khat liam ding. ¹⁴ Ka u le ka nau tla, nannih cu ṭhatnak in nan khat, theihnak hmuahhmuah thawn nan khat, pakhat le pakhat nun simaw thei khal nan si ti cu keimah roriin ka theifiang. ¹⁵ Sikhalsehla, u le nau tla, thil hrekkhat thu thawn pehparawin lo mangsuaktersal dingah Pathian ih i pek mi zangfahnak ruangah ralṭha zetin nan hnenah ca ka ngan a si. ¹⁶ Cutin Zentelpawl hnenah Khrih Jesu-ih rawngbawltu le Pathian-ih thuthangṭha rawngbawl ka si thei ding. Cutin Zentelpawl cu Pathian cohlan tlak thil hlan an si theinak dingah Thlarau Thianghlim in a thianghlimter hai. ¹⁷ Cu mi ruangah, kei cu Pathian lam thu ah Khrih Jesu ah cun tluangkhawn ding ka nei a si. ¹⁸ Zentelpawl in thu an lun theinak ding hrangah keimah hmang ih thu le thilti ih Khrih ih a ṭuan ṭheh mi siarlo thil dang zianghman ka sim ngam lo. ¹⁹ Cumi cu Pathian Thlarau huham in hminsinnak huhampawl le mangbangza hnaṭuannakpawl tla ih a cang mi a si. Cutin, Jerusalem ihsin Illirikam ram kiangkap hmuahhmuah tiangin Khrih thuthangṭha cu famkim zetin ka phuang zo. ²⁰ Mi ih lung phum cia mi parih ka sakbetlonak dingah Khrih hmin theihlonak hmun ah thuthangṭha phuan ding cu ka tumtah ringring mi a si. ²¹ Asinan, “Amai thu an rak sim dah lo mipawl in an hmu ding ih, hna ih a rak thei dah lopawl in an theithiam ding,” tiih ngan vek khan a si. ²² Cumi cun, nan hnen ra thei lo dingin i kham ṭheu. ²³ Asinan, atu ah cun cui rampawl ah hnaṭuannak ding hmunram ka nei nawn lo. Cule nan hnen rat ka hiar zetnak hi kum a rei tuk zo. ²⁴ Spain ka tlawn tiktikah, nan hnenah ka ra ding. Ka tlawn phahah lo hmuh rori ka beisei. Nanmah thawi pawlkawmawknak khawp tawk kan neih hmaisak hnuah Spain lam ka fehnak ah in bawm ding khal ka beisei. ²⁵ Asinan, tu cu mithianghlimpawl rian dingin Jerusalem ah ka feh ding. ²⁶ Ziangahtile, Masidonia ram le Akhaia rampawl ih mipawl in Jerusalem khua ih mithianghlimpawl lakih miretheipawl bawmnak sumpai kuat ding cu an lung a awi zet. ²⁷ Cu cun an lung a awiter zet ih, annih cu an hnenih leiba nei an si. Zentelpawl in thlarau lam thilpawl ah Jew-pawl an rak ṭawmpi zo ruangah Jew-pawl taksa thil ih va hlawm ve ding cu Zentelpawlih ṭuanvo a si. ²⁸ Curuangah, hi ṭuanvo ka ṭheh ih, cui bawmnak sumpai cu an hnenih himten ka pekngah fel hnuah Spain ka tlawn phahah ka ra lo tlawng ding. ²⁹ Cule nan hnenih ka rat tikah Khrih thuthangṭha ih thlawsuahnak ih khat in ka ra ding ti ka thei. ³⁰ Ka u le ka nau tla, kan Bawipa Jesu Khrih zarin le Thlarau hnen ihsin duhdawtnak thawngin ka hrangah Pathian hnenih thla nan camnak ah ṭan in lakpi hram dingin ka lo ngen hai a si. ³¹ Judia ram ih zumlotupawl hnen ihsin Pathian in i run dingin le Jerusalem ih ka rawngbawlnak cu cu tawkih mithianghlimpawl hrangih pawm tlak a si theinak dingah ka hrangah thla cam uh. ³² Pathian duhnak in nan hnenah lungawinak thawn ka rat theinak dingah le nanmahpawl thawn hmunkhat ah kan tiharhawk theinak dingah thla cam uh. ³³ Hnangamdaihnak petu Pathian cu nan zate hnenah um hram seh. Amen.

¹ Kenkheria khua kawhhran riantu kan farnu Fibi hi nan hnenah lo theihter ka duh. ² Mithianghlimpawlih tuah ding mawi a si vekin Bawipa ah amah cu cohlang uh la a ṭul mi kip kha rak bawm uh. Ziangahtile, anih cu mi tampi bawmtu le keimah i bawmtu khal a si. ³ Khrih Jesu ih ka hnaṭuanpi Prisilla le Akuila kha cibai i rak buksak uh. ⁴ Annih cu ka nunnak hrangih anmai hngawng rori thaptu an si. Keimah lawng si loin Zentel kawhhran zate khalin an parah lungawithu an sim a si. ⁵ An inn ih kawhhran khal cibai i buksak uh. Ka duhdawt mi Epeneṭas khal cibai i buksak uh. Anih cu Akhaia ram ih Khrih hrangih rah hmaisabik a si. ⁶ Kan hrangih nasazetih hnaṭuantu Mary kha cibai i buksak uh. ⁷ Ka sungkhat le ka thawngtlakpi Andronikas le Junias kha cibai i rak buksak uh. Annih cu apostolpawl lakah mithupi an si ih, ka hlanih Khrih sungih rak um zo khal an si. ⁸ Bawipa ih ka duhdawt mi Amfelias kha cibai i buksak uh. ⁹ Khrih ih kan hnaṭuanpi Urbanas kha cibai i buksak uh. Cun, ka duhdawt mi Stakhis kha cibai i buksak uh. ¹⁰ Apelles kha cibai i buksak uh. Anih cu Pathian in Khrih ah a pawm. Aristobulas tei sungkua ih umpawl kha cibai i buksak uh. ¹¹ Ka sungkhat Herodian kha cibai i buksak uh. Bawipa ah a um mi Narkisas-ih sungkua ih umpawl kha cibai in buksak uh. ¹² Bawipa ah nasazetih hnaṭuantu nunau Traifena le Traifosa kha cibai i buksak uh. Mi kipih an duhdawt mi Persis kha cibai i buksak uh. Cu nu cun Bawipa ah nasazetin hna a ṭuan a si. ¹³ Pathian in Bawipa ah a hril mi Rufus kha cibai i buksak uh. Ka hrang khalih nu a si ve mi a nu kha cibai i buksak uh. ¹⁴ Asinkhriṭas, Felekon, Hermas, Patrobas, Hermes le an hnenih um mi unaupawl kha cibai i buksak uh. ¹⁵ Filolokas, Julia, Nerias le a naunu, Olimpas le an hnenih um mithianghlim hmuahhmuah kha cibai i buksak uh. ¹⁶ Pakhat le pakhat hnamawknak thianghlim thawn cibai bukaw uh. Khrih kawhhran hmuahhmuah in cibai an lo buk a si. ¹⁷ Ka u le ka nau tla, tha ka lo pe a si. Ṭhenawknak suahtertupawl le nan rak zir zo mi zirhnak kalh zawngih mitlutertupawl tla va fimkhur uh. Anmah cu hrial uh. ¹⁸ Ziangahtile, cuvek mipawl cun kan Bawipa Jesu Khrih rian loin anmai pumpi an rian sawn a si. Cun ṭawngkam nem le mi pawrhnak in mitluangtlampawlih thinlung an bum. ¹⁹ Thu nan lunnak cu mi hmuahhmuah in an rak thei zo. Curuangah, nanmah ruangah lungawinak in ka khat. A ṭha mi ah fim uh la, a ṭha lo mi ah tluangtlam uh la ka duh. ²⁰ Hnangamdaihnak petu Pathian in Setan cu nan ke hnuaiah a palbek cing ding. Kan Bawipa Jesu Khrih-ih zangfahnak cu nan hnenah um hram seh. Amen. ²¹ Ka hnaṭuanpi Timothy in cibai a lo buk. Ka sungkhat Lusias, Jason le Sosipaṭa pawl khalin cibai an lo buk. ²² Hi cakuat a ngantu keimah Tersias in Bawipa ah cibai ka lo buk hai. ²³ Keimah le kawhhran pumpi ih intek a si mi Kaias in cibai a lo buk. Khawpi sumkiltu Erasṭas le unaupa Kuarṭas tlain cibai an lo buk. ²⁴ Kan Bawipa Jesu Khrih-ih zangfahnak cu nan zate hnenah um hram seh. Amen. ²⁵ Ka thuthangṭha le Jesu Khrih thuhla phuan mi zulhin, can thawk hlan ihsi rak thuh mi, sihmansehla tui canih phuanlang a si mi, ²⁶ profetpawlih cangan mi hmang ih miphun hmuahhmuah hnenih theihter mi zulhin le catuan Pathian-ih thupek bangtukin zumnak ah thu an lun theinak dingah a lo hngetter theitu, ²⁷ amah lawng Pathian fim a si mi hnenah Jesu Khrih thawngin ropitnak cu kumkhua in um hram seh. Amen.