THUPHUAN

THUPHUAN

¹ Hihi Jesu Khrih-ih Thuphuan a si. A siahhlawhpawl hnenih hmuh dingah Pathian in Jesu Khrih hnenih a pek mi, a rei hlanih thil rung thleng tengteng ding mipawl an si. Cucu Pathian in a vancungmi thlah in a siahhlawhpa kei, John hnenah a run theihter. ² Kei, John cun Pathian thu le Jesu Khrih-ih theihternak le ka hmuh mi thil hmuahhmuah cu ka theihter a si. ³ Hi simsungnak thupawl a siartu le a ngaithlatu le a sungih ngan mi thupawl a thluntu cu mihualvanṭha an si; ziangahtile, can a nai zo. ⁴ Kei, John in Asia peng ih um mi kawhhran pasarihpawl hnenah hiti hin ka ngan. A um lai mi le a rak um zo mi le a ra leh ding mi hnen ihsin le a laltohkham hmaiih um mi Thlarau pasarihpawl hnen ihsin zangfahnak le hnangamdaihnak nan hnenah um hram seh. ⁵ Cun, theihpitu rinum a si mi, mithi lakih suak hmaisabik, leitlun siangpahrangpawl uktu a si mi Jesu Khrih hnen ihsin zangfahnak le hnangamdaihnak nan hnenah um hram seh. Anih cu in duhdawtu le amai thisen roriih kan sualnakpawl in khawlhfaisaktu a si. ⁶ Cun, anih cu Pathian le a Pa hnen lamih siangpahrang le puithiam ih in tuahtu a si. A hnenah thangṭhatnak le thiltitheinak cu kumkhaw tlaitluan in um hram seh. Amen. ⁷ Ngai hnik uh, anih cu mero thawn a ra ding. Cule mit hmuahhmuah in amah cu an hmu ding ih, amah a suntupawl rori khalin an hmu ding. Leitlun ih hrin hmuahhmuah cu amai ruangah an ṭap an rak ding. A si, Amen. ⁸ “Kei cu Alpha le Omega, Thawknak le Cemnak, a um lai mi, a um zo mi le a ra leh ding mi, Ziangkimtithei ka si,” tiah Bawipa in a ti. ⁹ Kei, John, nan unaupa, harsatnak le Jesu Khrih-ih uknak le tuarfainak ṭawmpitu cu Pathian thu ruangah le Jesu Khrih theihpinak ruangah Patmos tikulh an ti mi ah ka um a si. ¹⁰ Bawipai ni ah Thlarau in ka rak um. Cun ka dung lam ihsin tawtawrawt aw vek aw ring zetin, ¹¹ “Kei cu Alpha le Omega, Hmaisabik le Netabik ka si. Cule na hmuh mi cu cazual sungah ngan aw la, Asia peng ih a um mi: Efesa khawpi, Smirna khawpi, Pergamos khawpi, Thiatira khawpi, Sardis khawpi, Filadelfia khawpi le Laodisia khawpi pawl ih a um mi kawhhran pasarihpawl hnenah cun kuat aw,” a ti ka thei. ¹² Cule, i betu hmu dingah ka heraw. Cun ka herawk tikah, sui meito retnak pasarih ka hmu. ¹³ Meito retnak pasarih laifangah Minung Fapa a bang mi Pa cu a kephah tiangin kawrfual a hruk ih, a ṭang ah sui taikhap a khap. ¹⁴ A lu le a sam cu tuu hmul le vur vekin a var ih, a mit cu meisa alh vek a si. ¹⁵ Cun, a ke cu rawhtitnak meisa vam sungih rawh thianhlim zo mi dar tle vek a si ih, a aw cu tidai tampi aw vek a si. ¹⁶ Cun, a vawrh lam kut ah arsi pasarih a keng ih, a kaa ihsin kap hnih hriam mi ralnam hriam zet a suak. Cule a hmel cu sun ni ling zet vek a si. ¹⁷ Cun, ka hmuh tikah, a ke hramah mithi vekin ka tlu. Cu tikah anih in a vawrh lam kut cu ka parah a suang ih ka hnenah, “Ṭih hlah, keimah hi Hmaisabik le Netabik ka si. ¹⁸ Kei cu a nung mi le a thi dah zo mi ka si, cun, ngai hnik, kei cu kumkhua in ka nung a si. Amen. Mithikhua le Thihnak tawhfung pawl ka nei a si. ¹⁹ “Na hmuh zo mi thilpawl le atu ih a um rero lai mi thilpawl le leh hnuih a um leh ding mi thilpawl cu ngan aw. ²⁰ Ka kut vawrh lamih arsi pasarih um na hmuh mi le sui meito vannak pasarih na hmuh miih thuthup cu hihi a si: arsi pasarih cu kawhhran pasarihpawlih vancungmi an si. Cule meito vannak pasarih cu kawhhran pasarihpawl kha an si.

¹ “Efesa kawhhran vancungmi hnenah hitin ngan aw, ‘A kut vawrh lamih arsi pasarih keng ih, sui meito vannak pasarih lakih vak rerotu in hi thupawl tla a sim, ² “Na hnaṭuan mipawl, na ṭuan bangnakpawl le na tuarfainakpawl, miṭhalopawl na zawi thei loziapawl tla ka thei. Apostol si si lo ih apostol tiawpawl cu na hniksak ih, thuphanper an si ti na rak hmu zo. ³ Cun na rak tuar ṭenṭo zo ih, tuarfainak na nei. Ka hmin ruangah na ṭuan bang zet ih, na cau fawn lo. ⁴ Sihmansehla, lo demnak ka nei. Cucu na duhdawtnak hmaisa na tlansan mi kha a si. ⁵ Curuangah, khui tawkin na tlu ti cing ringring aw la, siraw in, na tuah mi thil hmaisapawl kha tuahsal aw. Cuti asilole na hnenah ka ra lohli ding ih, na sirawk lo asile na meito vannak cu a hmun ihsin ka ṭhawn ding. ⁶ Asinan, hihi na nei, Nikolas thluntupawlih thilti mipawl na huat hi, cucu kei khalin ka hua ve a si. ⁷ Thlarau in kawhhranpawl hnenih a sim mi hi theih theinak hna a neitu cun thei seh. Nehtu hnenah Pathian-ih Paradise laifangih a um mi nunnak thingrah cu a ei dingah ka pe ding.” ’ ⁸ “Cun, Smirna kawhhran vancungmi hnenah hitin ngan aw, ‘Hmaisabik le Netabik, a rak thi ih a nungsaltu in hi thupawl hi a sim a si, ⁹ “Na hnaṭuan mipawl, na harsatnak le na retheihnak ka thei, asinan na lian a si. Jew-mi si lopiin Jew-mi tiawpawlih an lo relsiatnak ka thei, annih cu Setan-ih sinakok an si. ¹⁰ Na tuar ding mi thilpawl hi zianghman ṭih hlah. Ngai hnik, hniksak nan si theinak dingah Diabol cun nan lakih mi hrekkhat cu thawng a lo thla cing ding. Cun ni hra sung harsatnak nan tuar ding. Thih tiang rinum in um aw. Cule nunnak lallukhum ka lo pe ding. ¹¹ Thlarau in kawhhranpawl hnenih a sim mi hi theih theinak hna a neitu cun thei seh. Nehtu cu veihnih thihnak in a tuahmawh hrimhrim lo ding.” ’ ¹² “Cun, Pergamos kawhhran vancungmi hnenah hitin ngan aw, ‘Ralnam kaphnih hriam neitu in hi thupawl hi a sim a si, ¹³ “Na hnaṭuan mipawl le na umnak hmun cu Setan-ih laltohkham umnak hmun a si ti ka thei. Cun, ka hmin cu na kaihnget ih, ka martar rinum Antipas, nan lakah Setan umnak hmun ih an rak thah lai khalah khan keimah i zumnak na phatsan lo. ¹⁴ Asinan, kha tawkah Balam-ih zirhnak pawmtupawl na umpi hai ruangah lo demnak malte ka nei a si. Israel fatepawl hmaiah tluknak ret dingin Balam cun Balak a rak zirh. Cui an tluknak cu milem hnenih an hlan mi ei ding le hursualnak tuah dingin a si. ¹⁵ Cuvek thothoin Nikolas thluntupawlih zirhnak pawmtupawl khal na umpi, cui zirhawknak cu ka hua a si. ¹⁶ Siraw aw! Cu lo asile na hnenah ka ra lohli ding ih, ka kaa ih ralnam thawn cupawl cu ka do hai ding. ¹⁷ Thlarau in kawhhranpawl hnenih a sim mi hi theih theinak hna a neitu cun thei seh. Nehtu hnenah ei dingih thuh mi mana ka pe ding. Lung var ka pe ding ih, cui lung parih hmin thar ngan mi cu a cotu siarlo zohman in an thei lo.” ’ ¹⁸ “Cun, Thiatira kawhhran vancungmi hnenah hitin ngan aw, ‘Pathian Fapa, a mit meisa bangih alh mi le a ke dar tle vek a si mi in hi thupawl hi a sim, ¹⁹ “Na hnaṭuannak, na duhdawtnak, na rawngbawlnak, na zumnak, na tuarfainakpawl cu ka thei. Na hnaṭuan netabikpawl cu a hmaisabikpawl hnakin a nasasawn ti ka thei. ²⁰ Cuti sihmansehla, khaih nunau, Jezebel, profet tiaw nu kha na sian ruangah lo demnak malte ka nei. Anih cun ka siahhlawhpawl hursualnak tuah ding le milem hnenih hlan mi thil ei ding a zirh hai ih, a hruaipen ding na siang. ²¹ Cun, a hursual tuahnak ihsin siraw dingah can ka pe nan a siraw cuang lo. ²² Ngai hnik, amah cu mina ihkhun ah ka hlawn ding ih, amah thawi a uiretupawl khal an thiltuah mipawl ihsin an sirawk lo asile harsatnak rapthlak sungah ka thla hai ding. ²³ Cun, a fatepawl cu thihnak in ka that ding ih, cule kei cun ruahnaklungthin le thinlung zohtu ka si ti kawhhran hmuahhmuah in an thei ding. Cule, nan hnaṭuandan vek cioin ka lo rulsal ding. ²⁴ Asinan nanmah hnen le Thiatira khua ih a tang mipawl, cui zirhnak pawm lo ih, Setan-ih thuthuk an ti mipawl a theilotu nan parah phurrit dang ka ret lo ding. ²⁵ Nan rak neih cia mi kha cu ka rat tiangin kaihnget uh. ²⁶ Cule, nehtu le ka hnaṭuanpawl a cemnet tiangih a kiltu hnenah miphunpawl parih thuneihnak ka pe hai ding. ²⁷ ‘Anih cun thir kianghrawl thawn a uk hai ding ih, beltuahtupai leibelpawl bangin annih cu an kekkuai ṭheh ding.’ Ka Pai hnen ihsin thuneihnak ka hmuh vekin, an hnen khalah thuneihnak ka pe ve hai ding. ²⁸ Cule, amah cu deirel arsi ka pe ding. ²⁹ Thlarau in kawhhranpawl hnenih a sim mi hi theih theinak hna a neitu cun thei seh.” ’

¹ “Cun Sardis kawhhran vancungmi hnenah hitin ngan aw, ‘Pathian Thlarau pasarih le arsi pasarih neitupa in hi thupawl hi a sim a si, “Na hnaṭuan mipawl ka thei, nung hmin na pu nan na thi a si. ² Ralring aw la, a thi zikte mi, a tang mi thilpawl kha cakter aw. Ziangahtile, na hnaṭuan mipawl Pathian hmaiah famkim tawkin ka hmu lo. ³ Curuangah, ziangtin na rak pawm ih na rak ngaithla ti kha cing ringring aw la, kaihnget aw la, siraw aw. Curuangah na ralrin lo asile na hnenah rukru bangin ka ra ding ih, ziangtik canah na hnenah ka ra ding ti na thei hrimhrim lo ding. ⁴ Sardis khua ah an hnipuan bawrhhlawhterlotu mi malte na nei. Annih cu puan var sin in keimah thawn an leng ding. Ziangahtile, annih cu an tling a si. ⁵ A nehtu hnenah cuvekin puan var sinter a si ding ih, nunnak cazual sung ihsin a hmin cu ka phiathlo hrimhrim lo ding ih, a hmin cu ka Pai hmaiah le a vancungmipawl hmaiah ka ṭan sawn ding. ⁶ Thlarau in kawhhranpawl hnenih a sim mi hi theih theinak hna a neitu cun thei seh.” ’ ⁷ “Cun, Filadelfia kawhhran vancungmi hnenah hitin ngan aw, ‘A thianghlim mi, a dik mi, “David-ih tawhfung neitu, a awn mi cu zohman ih khar theih lo le a khar mi cu zohman ih awn theih lo mi in hi thupawl hi a sim a si.” ⁸ “Na hnaṭuan mipawl ka thei, ngai hnik, na hmaiah awn mi sangka ka ret. Cucu zohman in an khar thei lo ding. Ziangahtile, cahnak malte na nei, ka thu na rak kilkhawi ih, ka hmin na phatsan lo. ⁹ Ngai hnik, Setan sinakok ih mi, Jew-mi ngai si lo, Jew-mi ka si tiih thuphanpertupawl kha ka thlah hai ding. Ngai hnik, na ke hramah ra in, ka bawkkhupter hai ding ih, ka lo duhdaw ti khal ka theihter hai ding. ¹⁰ Tuarfainak nei dingih thu ka lo pek mi na kilhim ruangah, leilung ih um mipawl hniksak dingah leitlun hmuahhmuah ah a ra thleng ding mi hniksaknak tikcucan ihsin kei khalin ka lo kilhim ve ding. ¹¹ Ngai hnik, ka ra cing ding! Zohman in na lallukhum an lo laksaklonak dingah na rak neih cia mi kha kaihnget aw. ¹² A nehtu cu ka Pathian-ih temple sungih ban ah ka tuah ding ih, cule anih cu a lengah a suak nawn lo ding. Cun, a parah ka Pathian hmin le ka Pathian khawpi hmin ka ngan ding ih, a parah ka hmin thar ka ngan ding; cumi cu, van ihsin, ka Pathian hnenin a rung ṭum mi Jerusalem Thar a si. ¹³ Thlarau in kawhhranpawl hnenih a sim mi hi theih theinak hna a neitu cun thei seh.” ’ ¹⁴ “Cun, Laodisia kawhhran vancungmi hnenah hitin ngan aw, ‘Pathian sersiam miih Hrampi, Thutheitu Rinum le Dik, Amen in hi thupawl hi a sim a si, ¹⁵ “Na hnaṭuan mipawl ka thei, nang cu daih khal na dai lo ih, sat khal na sa lo. Na daih simaw, na sat simaw ka duh a si. ¹⁶ Cuti cun nang cu dai si lo, sa si lo, hlum fangfang na si ruangah ka kaa sung ihsin ka lo khak ding. ¹⁷ ‘Ka lian, thilri thawn ka ṭhanglian ih, ṭul mi zianghman ka nei lo,’ na ti ruangah ka lo khaksuak ding a si. Mizawnzai, zangfahumza, mirethei, mitcaw le taklawng ih um na sizia na theiaw lo. ¹⁸ Na len theinak dingah meisa sungih hniksak mi sui, na taklawng ningzahnak a langlonak dingah na hruh ding mi hnipuan var si seh, khua na hmuh theinak dingah na mit hnih ding mitna si ka hnenah lei dingin ka lo rawn a si. ¹⁹ Ka duhdawt mi pohpoh cu ka kawk ih nun ka sim ṭheu. Curuangah fimkhur aw la, siraw aw. ²⁰ Ngai hnik, sangka hramah dingin ka king. Mi zokhal ka aw a thei ih sangka a awn ah cun a hnenah ka lut ding ih, a hnenah zanriah ka ei ding. Cule anih khal ka hnenah a ei ve ding. ²¹ Kei in ka neh ih, ka Pai hnenah a laltohkham ih ka to bangin a nehtu cu ka laltohkham ah, ka hnenah, ka toter ve ding. ²² Thlarau in kawhhranpawl hnenih a sim mi hi theih theinak hna a neitu cun thei seh,” ’ ” tiah a ti.

¹ Cu mipawl hnuah ka hun zoh ih, cule, ngai hnik, vanah khin sangka a awngaw. Cun, a hmaisabikih ka theih mi tawtawrawt aw vekih i betu khan, “Hi tawkah hung so aw la, hi hnuih thil ra thleng tengteng ding mipawl ka lo hmuh ding,” tiah a ti. ² Cule, hmakhatteah kei cu Thlarau in ka um. Cun, ngai hnik, laltohkham pakhat cu van ah ret in a um ih, cui laltohkham ah totu Pa a um. ³ Cui a totu Pa cu jasper le sardias lung mankhung vekin a lang. Cui laltohkham kimvel cu vangro, emerald lung mankhung vekih lang mi in a kulh. ⁴ Cui laltohkham kimvelah cun laltohkham kul hluanli a um. Cui laltohkhampawl parah cun upa kul hluanli, puan var sin in an to kha ka hmu. Cun an lu ah sui lallukhum an khum. ⁵ Cui laltohkham ihsi cun nimthlakau si seh, khawri si seh, aw si seh an ra suak. Cule laltohkham hmaiah a alh mi meito pasarih an um, cupawl cu Pathian Thlarau pasarihpawl kha an si. ⁶ Cun, laltohkham hmaiah krisṭal vek a si mi thlalang tifinriat a um. Cule, laltohkham laifangah si seh, a kimvelah si seh, dung lam le hmai lamih mit thawi a khat mi thilnung pali an um. ⁷ Cun, a pakhatnak thilnung cu kiosa vek a si ih, a pahnihnak thilnung cu cawpa note vek a si. Cun a pathumnak thilnung cun minung vekin mithmai a nei ih, a palinak thilnung cu a zam mi mupi vek a si. ⁸ Cui thilnung palipawl cun thla paruk cio an nei ih, an leng lam le sung lam cu mit hlirin a khat. Cun annih in, “Bawipa Pathian Ziangkimtithei, a um zo mi le a um lai mi le a um leh ding mi cu, a thianghlim, a thianghlim, a thianghlim,” tiah sun le zan cawl loin an ti. ⁹ Cun, cui thilnung palipawl cun kumkhua kumkhuaih a nung mi laltohkham ih a totu Pai hnenah thangṭhatnak, upatnak le lungawinak an hlan tikah, ¹⁰ upa kul hluanlipawl cu laltohkham ih a totu Pai hmaiah an bawkkhup ih, kumkhua kumkhuaih a nung mi cu an bia. Cun an lallukhumpawl cu laltohkham hmaiah an sep ih, ¹¹ “Maw Bawipa, nang in ziangkim na sersiam ih, nangmai duhnak ruangih ra um le sersiam mi an si. Curuangah ropitnak si seh, sunlawihnak si seh, huham si seh co tlak na si,” tiah an ti.

¹ Cule, laltohkham parih a to mi Pai vawrh lam kut sungah cun a sung lam le a leng lamih ngan mi cazual, tacik pasarih khen mi cu ka hmu. ² Cun, a cak zet mi vancungmi pakhat ka hmu ih, aw ring zetin, “Zo so hi cazual pharh ih, tacik khen mipawl phawih tlak um?” tiah a au. ³ Cun, vancung ih a um mi si seh, leitlun ih a um mi si seh, lei hnuaiih a um mi khal si seh, zohman in cui cazual a pharh theitu an um lo ih, a sung lam zoh theitu khal an um lo. ⁴ Cule, cui cazual cu siar dingah pharh ih a sung lam khal zohtu dingah a tlak mi zohman hmuh an si lo ruangah nasazetin ka ṭap. ⁵ Cun, upapawl lakih pakhat in ka hnenah, “Ṭap hlah, ngai hnik, Kiosa, Judah hrin, David-ih Hram cun cui cazual pharh ding le tacik khen mi pasarih phawih dingah a neh zo,” tiah a ti. ⁶ Cule, ka zoh ih, ngai hnik, laltohkham le thilnung pali le upapawlih laifangah thah zo mi vek Tuufano ding ka hmu. Cui Tuufano cun ki pasarih le mit pasarih a nei. Cupawl cu leitlun pumpuluk ih thlah mi Pathian Thlarau pasarih tla an si. ⁷ Cun, anih cu a ra ih, laltohkham parih a totu Pai kut vawrh lamih cazual cu a lak. ⁸ Cule, cui cazual a lakngah tikah, thilnung pali le upa kul hluanlipawl cu ṭingṭang le rimhmui thawi a khat mi sui kheng keng cioin Tuufano hmaiah cun an bawkkhup. Cui rimhmuipawl cu mithianghlimpawlih thlacamnak a si. ⁹ Cule hla thar an sak ih, “Nang cu cui cazual latu dingah le tacikpawl phawihtu dingah na tlak a si. Ziangahtile, nang cu thah na si zo ih, nang cun na thisen in hrin kip, ṭawng kip, mi kip le phun kip lak ihsin Pathian hrangah in rak tlen zo. ¹⁰ “Cule, kan Pathian hrangah siangpahrangpawl ah le puithiampawl ah in rak tuah zo. Cun lei parah kan uk ding,” tiah an ti. ¹¹ Cun, ka hun zoh ih, laltohkham le thilnungpawl le upapawlih kimvelah cun vancungmi tampi aw ka thei. Cui vancungmipawlih tam lam cu thawnghra ih a let thawnghra le a thawngtel ih thawngtel an si. ¹² Cupawl cun aw ring zetin, “Thah mi Tuufano cu huham, lennak, fimnak, cahnak, upatnak, thangṭhatnak le sunlawihnak co tlak a si!” tiah an ti. ¹³ Cule, vancung ah si seh, leitlun le lei hnuai khalah si seh, tifinriat sungih a um mi si seh, cui sungih a um mi hmuahhmuah cun, “Laltohkham ih a totu le Tuufano hnenah cun, sunlawihnak si seh, upatnak si seh, ropitnak si seh, huham si seh kumkhua in kumkhua tiang um seh!” tiah an ti ka thei. ¹⁴ Cun, thilnung palipawl cun, “Amen!” tiah an ti. Upa kul hluanlipawl khal cun kumkhua in kumkhua tiang a nung mi Pa cu bawkkhup in an bia.

¹ Cun, Tuufano in tacik khen mi pasarih lakih pakhat a phawih lai kha ka hmu. Cule, thilnung palipawl lakih pakhat in khawri aw bangtukin, “Ra aw la, zoh hnik,” a ti ka thei. ² Cule, ka hun zoh ih, ngai hnik, rang raang pakhat ka hmu, a parih a totupa cun thal pakhat a keng. Cule, a hnenah cun lallukhum an pe ih, neh ding le neh vivo dingin a fehsuak. ³ Cun, tacik pahnihnak a phawih tikah, thilnung pahnihnak in, “Ra aw la, zoh hnik,” a ti ka thei. ⁴ Cun, a dang rang pakhat a ra suak ih, cui rang cu a sen a si. Cule, a parih a totupai hnenah cun mi pakhat le pakhat an thahawktawn theinak dingah leilung ihsin daihnak lakhlo theinak huham an pe. Cun, a hnenah ralnam tumpi khal an pe. ⁵ Cun, tacik pathumnak a phawih tikah, sahrang pathumnak in, “Ra aw la, zoh hnik,” tiah a ti ka thei. Cun, ka zoh ih, rang dum pakhat ka hmu, cui parih a totupa cu a kut ah cuai thlainak pakhat a keng. ⁶ Cun, thilnung palipawl laifang ihsin aw pakhat ka thei ih, “Dinari paisa pakhat in sangvut khoinik khat, bali sangvut khoinik thum ah dinari paisa pakhat, asinan siti le sabitzu cu na siatsuah lo pei,” tiah a ti kha ka thei. ⁷ Cule, tacik palinak a phawih tikah, thilnung palinak in, “Ra aw la, zoh hnik,” a ti ka thei. ⁸ Cun, ka zoh ih, ngai hnik, rang raam pakhat a um, a parih totupai hmin cu ‘Thihnak’ a si. Cun, Mithikhua in amah cu a run thlun. Cun, anmah cu leilung tlun mi ṭhenli-ih ṭhenkhat pawl, ralnam in si seh, rilrawnnak in si seh, thihnak in si seh, leilung sahrangpawl in si seh that dingin huham pek an si. ⁹ Cun, tacik panganak a phawih tikah, Pathian thu ruangah le an pawm mi theihternak thu ruangih thah a tuar mipawlih thlaraupawl cu biakṭheng hnuaiah ka hmu. ¹⁰ Ring zetin, “Maw Bawipa, a thianghlim mi le a dik mi, leitlun ih a um mipawl parah ziang tik tiang saw thu ṭhen loin le kan thisen phuba la loin na um ding?” tiah an au. ¹¹ Cun, an hnenah kawrfual rang pek cio an si. Cule, anmah bang tukih thah a si ding mi an salpipawl le an unaupawl thah kim an si hlanlo can malte sung cawl hrih dingih sim an si. ¹² Cun, tacik paruknak a phawih tikah, ngai hnik, ling nasazet a hnin, ni cu buri hmul dum vekah a cang ih, thlapi cu thisen vekah a cang. ¹³ Cun, theipi kung thlipi in a nuai ruangih a kuhpawl an tlak vekin van arsipawl cu lei ah an tla. ¹⁴ Cun, van cu cazual vekin a zualawhlo ih, tlang le tikulh hmuahhmuah cu an umnak hmun ihsin an ṭhawn ṭheh. ¹⁵ Cule, leilung ih siangpahrangpawl, mithupipawl, milianpawl, ralbawipawl, micakpawl, sal hmuahhmuah le miluat hmuahhmuah cu lungpuk sungah le tlang ih lungpi karlakah an relh. ¹⁶ Cun, tlangpawl le lungpipawl hnenah, “In nen uh la, laltohkham parih a totupai hmai ihsin le Tuufano-ih thinhengnak ihsin in phen uh! ¹⁷ Ziangahtile, a thinhengnak ni rapthlak cu a ra thleng zo a si hi, zo so a ding thei ding?” tiah an ti.

¹ Cui thilpawl hnuah cun leilung parah le tifinriat parah le ziang thingkung par khalih thli hrang lo dingin lei thli pali cu kai in leilung kil li ih a ding mi vancungmi pali ka hmu. ² Cun, ni suahnak lam ihsin a hung suak mi, a nung mi Pathian-ih hminsinnak tacik a nei mi a dang vancungmi pakhat ka hmu. Cule, anih cun leilung le tifinriat siatsuah dingih thupek mi vancungmi pali hnenah aw ring zetin, ³ “Kan Pathian siahhlawhpawl an cal ih hminsinnak tacik kan khen thluh hlanlo cu leilung si seh, tifinriat si seh, thingkungpawl si seh siatsuah hlah uh,” tiah a au. ⁴ Cun, hminsinnak tacik khen a si mipawlih an mipum zat cu ka thei. Israel thlah ih hrin kip ihsin thawngzakhat le thawngsawmli le thawngli cu hminsinnak tacik khen an si. ⁵ Judah hrin ihsin thawnghleihnih; Reuben hrin ihsin thawnghleihnih; Gad hrin ihsin thawnghleihnih; ⁶ Asher hrin ihsin thawnghleihnih; Naphtali hrin ihsin thawnghleihnih; Manasseh hrin ihsin thawnghleihnih; ⁷ Simeon hrin ihsin thawnghleihnih; Levi hrin ihsin thawnghleihnih; Issakhar hrin ihsin thawnghleihnih; ⁸ Zebulon hrin ihsin thawnghleihnih; Joseph hrin ihsin thawnghleihnih; Benjamin hrin ihsin thawnghleihnih pawl cu hminsinnak tacik khen an si. ⁹ Himi hnuah ka hun zoh ih, ngai hnik, zohman ih siarcawklo mi burpi ka hmu. Cui mi burpi cu phun kip le hrin kip le mi kip le ṭawng kip ihsi a ra mi an si. Kawrfual var hruh in an kut in tumkau hnah an keng ih, laltohkham hmai le Tuufano hmaiih an din kha ka hmu. ¹⁰ Cun, annih in aw ring zetin, “Laltohkham parih a totu kan Pathian le Tuufano hnenah rundamnak a um!” tiah an au. ¹¹ Cun, vancungmi hmuahhmuah cu laltohkham le upapawl le thilnung palipawlih kimvelah an ding. Cule laltohkham hmaiah cun bawkkhup in, Pathian an bia. ¹² “Amen! Sunlawihnak si seh, thangṭhatnak si seh, fimnak si seh, lungawithu simnak si seh, upatnak si seh, huham si seh, cahnak si seh a kumkhuaih kumkhua tiang kan Pathian hnenah um seh. Amen,” tiah an ti. ¹³ Cun, upa lakih pakhat cun a sang ih ka hnenah, “Hi kawrfual var hruhtupawl hi zo an si, khui tawk ihsin an ra?” tiah a ti. ¹⁴ Cule, kei in a hnenah, “Ka pu, nangmah in na thei,” tiah ka ti. Cule, anih in ka hnenah, “Hipawl hi harsatnak rapthlak sung ihsi a ra suak mi an si ih, an kawrfual kha Tuufano thisen ah sawp in, an varter. ¹⁵ Cuiruangah, annih cu Pathian laltohkham hmaiah an um a si. A sun a zan in a hmun thianghlim ah a rawng an bawl. Cun, laltohkham parih a totupa cu an lakah a um ding. ¹⁶ “Annih cu an ril a rawng nawn lo ding ih, an ti khal a hal nawn lo ding. Ni khalin a sat nawn lo ding ih, ziang satnak khal an tuar lo ding. ¹⁷ “Ziangahtile, laltohkham laifangih a um mi Tuufano in anmah cu tuukhaltu bangin a kilkhawi hai ding ih, cirhti nung umnak ah a hruai hai ding. Cule, Pathian in an mit ihsin an mitthli hmuahhmuah cu a hnulsak thluh ding,” tiah i ti.

¹ Cun, Tuufano in tacik pasarihnak a phawih tikah, vancung ah nazi khuai hrawng a dai ṭhepṭhep. ² Cun, Pathian hmaiih a ding mi vancungmi pasarih ka hmu ih, an hnenah tawtawrawt pasarih pek an si. ³ Cule, a dang vancungmi a ra ih, rimhmui urnak sui kheng pakhat keng in biakṭheng kiangah cun a ding. Cule, mithianghlimpawl hmuahhmuah ih thlacamnak thawn laltohkham hmai, sui biakṭheng parih a hlan theinak dingah rimhmui tam zet a hnenah pek a si. ⁴ Cun, rimhmui khu cu vancungmi kut ihsin mithianghlimpawlih thlacamnak thawn Pathian hmaiah a hung kai. ⁵ Cule, cui vancungmi cun rimhmui urnak kheng cu a lak ih, biakṭheng meisa thawn a khatter ih, leilung parah a hlawn. Cu veten, aw thawmpawl si seh, khawripawl si seh, nimthlakaupawl si seh, linghnin si seh a um. ⁶ Cun, tawtawrawt pasarih kengtu vancungmi pasarihpawl cu an tawtawrawt phaw dingin an timtuahaw. ⁷ A pakhatnak vancungmi in a tawtawrawt a phaw ih, cule thisen thawi a rawiaw mi, rial le meisa a umcih hngal. Cupawl cu leilung parah hlawnthlak an si. Cu tikah, thingkung ṭhenthumih ṭhenkhat a kang ih, hrampi hring hmuahhmuah khal an kang ṭheh. ⁸ Cun, a pahnihnak vancungmi in a tawtawrawt a phaw ih, cule tlang tumpi meisa ih kang lai vek cu tifinriat sungah hlawnthlak a si. Cu tikah tifinriat ṭhenthumih ṭhenkhat cu thisen ah a cang. ⁹ Cun, sersiam mi, tifinriat sungih a um mi nunnak a nei mipawl ṭhenthumih ṭhenkhat an thi ih, lawngpawl khal ṭhenthumih ṭhenkhat an siat thluh. ¹⁰ Cun, a pathumnak vancungmi in a tawtawrawt a phaw ih, meito vekih alh arsi tum zet pakhat cu van ihsin tivapawl le cirhtipawl ṭhenthumih ṭhenkhat parah a tla. ¹¹ Cui arsi hmin cu Khatnak tiah an ko, tidai ṭhenthumih ṭhenkhat cu a kha. Cule, tidai cu a khat tuk ruangah cui tidai ruangah cun mi tampi an thi. ¹² Cule, a palitnak vancungmi in a tawtawrawt a phaw ih, ni ṭhenthumih ṭhenkhat, thlapi ṭhenthumih ṭhenkhat le arsi ṭhenthumih ṭhenkhat cu tidanglam an si. Cuti cun cupawlih ṭhenthumih ṭhenkhat cu a thim. Sun khal ṭhenthumih ṭhenkhat cu a tle lo ih, zan khal cuvek thothoin a si ve. ¹³ Cule, ka hun zoh ih, van laifangih a zam mi vancungmi pakhat ka hmu. Cui vancungmi in aw ring zetin, “Vancungmi pathumpawl in an phawt lai ding mi tawtawrawt aw ruangah leitlun ih a um mipawl an hmakhua a pit, an hmakhua a pit, an hmakhua a pit!” tiah a au.

¹ Cun, a panganak vancungmi in a tawtawrawt a phaw ih, arsi pakhat van ihsin leilung ih a tla cia mi cu ka hmu. Cule, a hnenah tawnet nei lo khur tawhfung cu pek a si. ² Cun, anih cun tawnet nei lo khur a awng ih, cui khur ihsin meikhu, rawhtitnak mei nasazet khu vek a hung suak. Cun cui khur ih meikhu ruangah ni le boruak cu an thim. ³ Cule, cui meikhu ihsin kharbawk leilung parah an ra suak ih, cui kharbawkpawl cu leilung ih tlangkaikuangpawl in thuneihnak an neih vekin an hnenah thuneihnak pek an si. ⁴ Cun, cui kharbawkpawl cu lei ih hrampipawl khal si seh, thil hring ziang khal si seh, thingkung ziang khal si seh, siatsuah loin, asinan an cal ih Pathian hminsinnak tacik a nei lo minungpawl lawng kha siatsuah dingih thupek an si. ⁵ Cun, cui kharbawkpawl cu minungpawl that lo ih, thla nga sung hrem sawn dingin thuneihnak pek an si. Mi an hrem tikih a natzia cu tlangkaikuang in mi a hen tikih a nat vek kha a si. ⁶ Cun, cui nipawl ah cun minungpawl in thihnak an hawl ding ih, an hmu hrimhrim lo ding. Thih an duh ding ih, thihnak in a tlansan hai ding. ⁷ Cun, cui kharbawkpawlih pianzia cu raldonak hrangih a tiar mi rang vek an si. An lu parah sui lallukhum vek an khum ih, an hmai cu minung hmai vek an si. ⁸ Cun, nunau sam vek an nei ih, an ha cu kiosa ha vek a si. ⁹ Cun, thir awmphaw vek a si mi awmphaw an nei ih, an thla zap awn cu ral do dingih a tlan mi rangleng tampi awn tlurtlo vek a si. ¹⁰ Cui kharbawkpawl cun tlangkaikuang mei vek mei an nei ih, an mei ah mi hennak hmanrua a um. Thla nga sung minungpawl siatsuah theinak thuneihnak an nei fawn. ¹¹ Cun, anmah uktu siangpahrang an nei ih, cui an siangpahrang cu tawnet nei lo khur ih vancungmi a si. A hmin cu Hebru ṭawng in Abaddon a si ih, Grik ṭawng in a hmin cu Apollyon a si. ¹² Hmakhuapihnak pakhat cu a cem zo ih, ngai hnik, hipawl hnuah hmakhuapihnak pahnih a ra lai ding. ¹³ Cun, a paruknak vancungmi in a tawtawrawt a phaw ih, Pathian hmaiih a um mi sui biakṭheng ih ki pali ihsin aw pakhat ka thei. ¹⁴ Cui aw cun tawtawrawt kengtu a paruknak vancungmi hnenah, “Zufraṭis tivapi ih ṭawn mi vancungmi pali kha phawih aw,” tiah a ti. ¹⁵ Cui vancungmi pali cu thlah an si ih, annih cu hi nazi le ni le thla le kum ih minung ṭhenthumih ṭhenkhat that dingah rak timtuah mi an si. ¹⁶ Cule, rang ralkap mipum zat cu million zahnih an si tiah ka hna in ka thei. ¹⁷ Cun, larnak ah cun rangpawl le an parih totupawl cu hitivekin ka hmu hai. Meisa vekih sen, dumpawl le kat vekih aire awmphaw an hruk. Rangpawlih lu cu kiosa lu vek an si ih, an kaa ihsin mei le meikhu le kat alh a suak. ¹⁸ Cui thil pathum, rangpawlih kaa sung ihsin a suak mi meisa, meikhu le kat meisa pawl in minung ṭhenthumih ṭhenkhat cu thah an si. ¹⁹ Ziangahtile, an thuneihnak cu an kaa le an mei ah a um. Ziangahtile, an mei cu rul vek a si ih, an mei ah lu an nei, cu mi in mi an tuahmawh. ²⁰ Cun, cui hremnakpawl ih thah lo mi, a tang mipawl cu khawsepawl le sui, ngun, dar, lungto le thing ih tuah mi, khua a hmu thei lo mi, a thei thei lo mi, a feh thei lo mi milempawl be lo dingin, an kut ih tuah mi thilpawl ihsin an siraw cuang lo. ²¹ An lai thahnak, an dawi hmannak, nupa sual an tuahnak le an rukruknak pawl khal an siraw cuang lo.

¹ Cun, a cak zet mi a dang vancungmi pakhat mero thawi thuamaw, van ihsi rung ṭum ka hmu. A lu ah vangro a zam ih, a hmai cu ni vek a si, a ke cu meisa ban vek an si. ² Cule, a kut in kau cia mi, cazual fa te a keng. A vawrh lam ke cu tifinriat parah a ret ih, a keh lam ke cu leilung parah a ret. ³ Cun, kiosa huk vekin, aw ring zetin cui vancungmi cu a au ih, a au ṭheh tikah, khawri pasarihpawl in an aw an suah. ⁴ Cule, khawri pasarihpawl in an aw an suahngah tikah, ngan ka tum ih, cuti cun van ihsin aw pakhat in ka hnenah, “Khawri pasarihpawl ih sim mi thilpawl cu tacik khen aw, ngan hlah,” tiah i run ti. ⁵ Cun, ka hmuh mi, tifinriat par le leilung parih ding vancungmi in a kut cu van lamah a phar ih, ⁶ cule, kumkhua in kumkhua tiang a nung mi, van le a sungih a um mi thilpawl, leilung le a sungih a um mi thilpawl, cun tifinriat le a sungih a um mi a sersiam mi thilpawl sal in sia a sam ih, tikcucan a um nawn lo ding. ⁷ Sikhalsehla, a pasarihnak vancungmi in a tawtawrawt a phawt zik tikah cun, Pathian thuthup, a siahhlawh a si mi profetpawl hnenih a rak phuan zo mi kha a kim thluh thlang ding, tiah a ti. ⁸ Cun, van ihsi ka theih mi aw khan in run be lehsal ih, “Feh aw la, tifinriat par le leilung parih a ding mi vancungmi kut sungih kau cia mi cazual fa te kha va la aw,” tiah i ti. ⁹ Cun, cui vancungmi hnenah cun ka va feh ih, a hnenah, “Khaih cazual fa te kha i pe aw,” tiah ka ti. Cule, anih in ka hnenah, “La aw la, ei thluh aw. Na pum cu a khater ding ih, asinan na kaa sungah cun khuaitizu bangin a thlum ding,” tiah i ti. ¹⁰ Cun, cui cazual fa te cu vancungmi kut ihsin ka lak ih, ka ei thluh. Cui cazual fa te cu ka kaa sungah cun khuaitizu bangin a thlum. Cun, ka ei thluh veten ka pum cu a kha. ¹¹ Cule, anih in ka hnenah, “Minung tampi, miphunpawl, ṭawngpawl le siangpahrangpawl hnenah profet bangin thu na phuang lehsal tengteng ding,” tiah a ti.

¹ Cun, kianghrawl vek a si mi tahnak phai kung in pe ih, cule cui a ding mi vancungmi cun, “Tho aw la, Pathian temple hmun thianghlim le biakṭheng le a sungih Pathian a betupawl cu tah aw. ² Asinan temple hmun thianghlim leng lamih tual cu tanta aw, tah hlah. Ziangahtile, cucu Zentelpawl hnenih pek a si zo. Annih cun khawpi thianghlim cu thla sawmli le thla hnih an ke hnuaiah an pal ding. ³ Cun, ka thutheitu pahnih hnenah huham ka pe ding ih, annih cun buri hnipuan hruk in ni thawngkhat le zahnih le sawmruk sung profet vekin thu an sim ding,” tiah a ti. ⁴ Cun, hite cu lei Pathian hmaiih a dingtu olif thing pahnih le meito retnak pahnih an si. ⁵ Cun mi pakhatkhat in anmah kha tuahmawh a tum asile, an kaa ihsin meisa a suak ih, an ralpawl cu an kangral thluh. Cun, mi pakhatkhat in annih cu tuahmawh a tum asile, cutivekin thah tengteng a si ding. ⁶ Hi theihpitu pahnih hin profet vekih thu an phuan sung hmuah ruah sur lo ko van khar theinak thuneihnak an nei. Cun, an duh tik can pohih thisen ih canter theinak tidaipawl parah thuneihnak le leilung hi hremnak hmuahhmuah ih tidanglam theinak thuneihnak an nei. ⁷ Cun, an thutheihternak an ṭheh tikah, tawnet nei lo khur ihsi a hung suak mi sahrang in anmah kha a do ding. A neh ding ih, a that hai ding. ⁸ Cule, an ruang cu khawpi ropi zin ah a um ding ih, cui khawpi ropi cu thlarau lam ihsin Sodom le Izip tiih kawh a si. Cui hmun ah cun, kan Bawipa khal khenbet a rak si. ⁹ Cun, mi kip, hrin kip, ṭawng kip le mi phun kipin an ruang cu ni thum le a hrek sung an zoh ding ih, thlan ih phum an siang lo ding. ¹⁰ Cule, cui profet pahnih cun leitlun ih a um mipawl hremnak an rak pek ṭheu ruangah an thih tikah cun leitlun ih a um mipawl cu an lung a awi ding ih, nawmnak an tuah ding, pakhat le pakhat thilpek an kuataw ding. ¹¹ Cun, ni thum le a hrek hnuah cun Pathian hnen ihsin nunnak Thlarau cu an sungah a rung lut ih, an ke in an ding. Anmah a hmutupawl cu ṭihnak nasazetin an khat. ¹² Cule, “Hi tawkah hung so uh,” tiin van ihsi aw ring zet an thei. Cun, mero lakah van ah an kai so ih, an ralpawl in an hmu. ¹³ Cun, culai fangah ling nasazetin a hnin ih, khawpi cu ṭhenhra-ih ṭhenkhat a cim. Cule, cui linghninnak ah mi thawngsarih an thi. A tang mipawl cu an thin a phang ih van Pathian hnenah sunlawinak an pe. ¹⁴ Hmakhuapihnak pahnihnak cu a cem zo, cule, ngai hnik, hmakhuapihnak pathumnak cu a ra thleng cing ding. ¹⁵ Cun, a pasarihnak vancungmi in a tawtawrawt a phaw ih van ah aw ring zet a suak ih, “Hi leitlun uknakpawl cu kan Bawipa le a Khrih-ih uknak ah an cang zo. Amah in kumkhua in kumkhua tiang a uk ding!” tiah an ti. ¹⁶ Cun, Pathian hmaiih anmai laltohkham parih a totu upa kul hluanlipawl cun bawkkhup in Pathian an bia. ¹⁷ “Maw Bawipa Pathian, Ziangkimtithei, atu ih a um lai Mi le a rak um zo Mi le a ra lai ding Mi, na huham ropi cu na rak la zo ih, na rak uk zo ruangah na hnenah lungawithu kan lo sim a si. ¹⁸ “Miphunpawl cu an thin a heng ih, cule, na thinhengnak a rung thleng ve. Mithipawl thu na ṭhen ding can cu a rung thleng zo ih, na siahhlawh profetpawl le mithianghlimpawl, na hmin a ṭihzahtu, mithupi le mithupilopawl hnenih lawmman pek can khal a rung thleng zo, cule leilung siatsuahtupawl siatsuah can khal a thleng a si,” tiah an ti. ¹⁹ Cun, van ah Pathian temple cu a awngaw ih, a thuthlung bawm cu temple sungah cun a ra lang. Cule, nimthla a kau, awpawl a thang, khua a ri, ling a hnin ih, rial nasazetin a tla.

¹ Cun, van ah hminsinnak ropi zet a lang. Nunau pakhat cu ni thawn a thuamaw, a ke hnuaiah thlapi a um ih, a lu parah arsi hleihnih nei lallukhum a khum. ² Cun, cu nu cun fa a rai ih, fa a hrin zikah nauhrin nat tuar in a au. ³ Cun, van ah a dang hminsinnak a ra lang leh. Ngai hnik, lu pasarih le ki pahra nei, a lu parih lallukhum pasarih a khum mi rulhreng sen tumpi a um. ⁴ Cule, a mei in van ih arsi ṭhenthumih ṭhenkhat kha a dir ih, leilung ah a hlawnthlak. Cule, cui rulhreng cu nau hring zikte nunaunui hmaiah naute a suah leveten dawlh dingin a ding. ⁵ Cun, cu nu cun miphun hmuahhmuah thir kianghrawl thawi uktu ding mipa naute a hring. Cule, a naute cu Pathian hnen, a laltohkham ah cun cawisoh a si. ⁶ Cule, ni thawngkhat le zahnih le sawmruk sung an cawm theinak dingah nunaunu cu ramṭhing ih a hmun neih mi, Pathian ih a timtuahsak mi hmun ah a tlan. ⁷ Cun, van ah doawknak a um. Maikal le a vancungmipawl cun cui rulhreng cu an do ih, rulhreng khalin a vancungmipawl thawn a do hai ve. ⁸ Asinan, rulhreng le a vancungmipawl cun an neh lo ruangah van ah umnak hmun khal an nei nawn lo. ⁹ Cun, rulhreng maksak cu an hlawnthlak. Cui rul tar cu Diabol tiin le leilung pumpuluk bumtu Setan tiih kawh a si. Anih cu leilung ah an hlawnthlak ih, a vancungmipawl khal amah thawn hlawnthlak an si ve. ¹⁰ Cun, van ah aw ring zet pakhat ka thei. Cui aw cun, “Atu ah cun rundamnak, cahnak, kan Pathian-ih uknak le a Khrih-ih thuneihnak cu a ra thleng zo. Ziangahtile, kan unaupawl hektu, kan unaupawl Pathian hmaiih a sun a zan hektu cu hlawnthlak a si zo. ¹¹ Cun, annih in Tuufano thisen le an theihternak thu in amah cu an neh. Cun, thih ngam tiangin an nunnak an ui lo. ¹² Cuiruangah nannih vanpawl le nannih a sungih um mipawl nan lungawi uh! Diabol cun can tawite lawng a nei ti thei in, nasazetih thinheng in nan hnen lamih a rung ṭum ruangah leilung ih a um mipawl le tifinriat sungih a um mipawl cu nan hmakhua a pit a si!” tiah a ti. ¹³ Cun, rulhreng in leilung ah hlawn a si ti a theih tikah, fapa naute a hringtu nunau kha a tiduhdah. ¹⁴ Cule, cui nunaunu cu amai umnak hmun ramṭhing ih a zam theinak dingah mupi tum zet thla pahnih an pek. Cu tawkah rulpi ih hmuh ban lo dingin can khat le canpawl le can hrek sung cawm a si ding. ¹⁵ Cun, rulpi cun cui nunaunu kha tilian in a fenhlo theinak dingah a kaa sung ihsin tilian vekin nunaunu ih dungah ti a phutsuak. ¹⁶ Asinan, leilung in cui nunaunu cu a bawm, leilung cu a kaa a ang ih, rulhreng in a kaa sung ihsin a suahter mi tilian kha a dawlh thluh. ¹⁷ Rulhreng cu nunaunui parah a thin a heng tuk lawmmam ih, nunaunu-ih tesinfa a tang mipawl, Pathian thupek a thluntupawl le Jesu Khrih thu theihter mi a pawmtupawl kha do dingin a fehsuak.

¹ Cun, tifinriat ih vunnel parah ka ding ih, tifinriat ihsin a hung suak mi sahrang pakhat, lu pasarih le ki pahra nei cu ka hmu. A kipawl ah cun lallukhum pahra a um ih, a lupawl parah cun Pathian thangsiatnak hmin a um. ² Cule, ka hmuh mi sahrang cu tlavang vek a si ih, a ke cu savawm ke vek a si. A kaa cu kiosa kaa vek a si. Cule, rulhreng cun a hnenah a huham le a laltohkham le thuneihnak nasazet cu a pe. ³ Cun, a lu pakhat cu thihpi tlakih tuahmawh mi vek khan ka hmu. Asinan, thihpi tlak a si mi a hriamhma cu a dam ih, leitlun mi hmuahhmuah in cui sahrang parah an khawruah a har ih, amah cu an thlun. ⁴ Cun, sahrang hnenih thuneihnak petu rulhreng cu an bia. Cule, “Hi sahrang vek zo a um? Zo in so amah cu a do thei ding?” tiah an ti. ⁵ Cun, cui sahrang hnenah thil ropi zetzet le Pathian thangsiatnak thusimnak kha pek a si ih, thla sawmli le thla hnih sung cangvai dingin thuneihnak khal pek a si. ⁶ Cule, anih in Pathian hmin le a biakbuk le van ih a um mipawl thangsiat in le Pathian thangsiat in a kaa a ang. ⁷ Cun, mithianghlimpawl do ding le anmah neh ding cu a hnenah pek a si. Cule, hrin hmuahhmuah, ṭawng hmuahhmuah le miphun hmuahhmuah parih thuneihnak cu a hnenah pek a si. ⁸ Cun, leilung tlunih a um mi hmuahhmuah, leilung sersiam thawk ihsi thah a si mi Tuufano nunnak cazual sungih hmin ngan a si lo mi hmuahhmuah in sahrang cu an be ding. ⁹ Zokhal theihnak hna a neih asile thei seh. ¹⁰ Sal tannak sungih mi a hruaitu cu amah khal sal tannak sungah a feh ve ding. Ralnam thawi mi a thattu cu amah khal ralnam ih thah a si tengteng ding. Hi tawkah hin mithianghlimpawlih tuarfainak le zumnak a lang. ¹¹ Cun, leilung sung ihsi hung suak mi sahrang dang pakhat ka hmu. Anih cun tuu ki vek ki pahnih a nei ih, rulhreng vekin a ṭawng. ¹² Cule, amai hlanih sahrang hmaisasawnih thuneihnak hmuahhmuah kha cui sahrang hmaisasawn hmaiah cun a hmang. Leilung le a parih a um mipawl cu thihpi tlak hriamhma damter a si mi sahrang pakhatnak kha a biakter hai. ¹³ Cun, a pahnihnak sahrang cun hminsinnak nasazetpawl tla a tuah, van ihsi meisa tlakter tiang khal milaipawl mithmuh ah a tuah. ¹⁴ Cun, sahrang hmaisa sawn hmaiah tuah dingih pek a si mi hminsinnakpawl hmang in lei ih a um mipawl cu a bum hai. Lei ih a um mipawl hnenah ralnam ih tuahmawh ih nungsal mi sahrang lem tuah dingin a fial hai. ¹⁵ Cun, a pahnihnak sahrang hnenah cun cui sahrang pakhatnak lem sungih thaw pek theinak huham cu pek a si. Cuti cun sahrang lem cu a ṭawng thei ih, cui sahrang lem a be duhlotu hmuahhmuah thahter theinak a tuah thei fawn. ¹⁶ Cun, cui sahrang in mi hmuahhmuah, mitum si seh, mite si seh, milian si seh, mirethei si seh, sal si seh, miluat si seh, an vawrh lam kut ah asilole an cal ah hminsinnak a coter hai. ¹⁷ Cuti cun, cui hminsinnak, asilole sahrang hmin, asilole sahrang hminih nambat a neilotu zohman in an lei thei lo ding ih, an zuar thei fawn lo ding. ¹⁸ Hi tawkah fimnak a um. Theihthiamnak a neitu cun sahrang nambat cu tuak seh. Ziangahtile, cui nambat cu mi pakhat nambat a si ih, a nambat cu zaruk le sawmruk paruk a si.

¹ Cun, ka hun zoh ih, ngai hnik, Zion Tlang parah Tuufano a ding ka hmu. Cule amah thawn mi thawngzakhat le thawngsawmli le thawngli an um ih, an cal ah a Pai hmin ngan a si. ² Cule, van ihsin aw ka thei ih, tidai tampi aw vek le khawri nasazet aw vek a si. Cun ṭingṭang tumtupawlih an ṭingṭang tum aw khal ka thei fawn. ³ Cun, annih in laltohkham le sahrang pali le upapawl hmaiah cun hla thar si awm tak khi an sak. Cule cui hla cu leilung ihsi tlen a si mi minung thawngzakhat le thawngsawmli le thawngli pawl siarlo zohman in an zir thei lo. ⁴ Hipawl cu nunaupawl thawi a bawrhhlawhawter lo mi an si. Ziangahtile, annih cu mihim an si. Hipawl cun Tuufano cu a fehnak kipah an thlun. Minungpawl lak ihsin tlen an si ih, Tuufano le Pathian hrangah thlai thar an si. ⁵ Cun, an kaa ah mi bumnak thu a um lo. Ziangahtile, annih cu Pathian laltohkham hmaiah sawihnawm ding um lo an si. ⁶ Cun, leitlun ih a um mipawl, miphun kip, hrin kip, ṭawng kip le mi kip hnenih phuan ding mi catuan thuthangṭha nei a dang vancungmi van laifangih a zam ka hmu. ⁷ Anih cun aw ring zetin, “A thuṭhennak tikcucan a ra thlen zo ruangah Pathian cu ṭihzah uh la, a hnenah thangṭhatnak cu hlan uh. Van si seh, leilung si seh, tifinriat si seh, cirhtipawl si seh sersiamtu cu bia uh,” tiah a ti. ⁸ Cun, a dang vancungmi in a run thlun ih, “Babilon cu a siat zo! Khaih khaw ropi cu a siatngah zo! Ziangahtile, miphun hmuahhmuah kha a nu le pa sualnak thinhengnak zu a inter thluh a si,” tiah a ti. ⁹ Cun, a pathumnak vancungmi in annih cu a run thlun hai ih, aw ring zetin, “Mi zokhal sahrang le a milem bia ih, a cal ah simaw, a kut ah simaw a hminsinnak a neih asile, ¹⁰ cu mi pa rori cun Pathian thinhengnak zu, a thinhengnak no sungah zianghman rawi lo ih thlet mi cu a in ding. A thianghlim mi vancungmipawlih hmaiah le Tuufano hmaiah meisa le kat ih hrem a si ding. ¹¹ Cun, anmah hremnak meikhu cu kumkhuaih kumkhua in tlun van ah a so ding ih, cun sahrang le amai lem a betupawl le mi zokhal a hmin ih hminsinnak a neitu pohpoh a sun a zan cawlhhahdamnak an nei lo,” tiah a ti. ¹² Hi tawkah mithianghlimpawlih tuarfainak cu a um. Hi tawkah Pathian thupekpawl a kilkhawitu le Jesu zumnak a kilkhawitupawl an um. ¹³ Cun, van ihsin aw pakhat ka thei ih, ka hnenah, “Ngan aw, ‘Atu thawkin mithi, Bawipa ih a thi mipawl cu mihualvanṭha an si.’ ” “A si,” Thlarau cun, “An ṭuan bangnak ihsin an cawl ding ih, an hnaṭuan mipawl in a run thlun hai ding,” tiah a ti ka thei. ¹⁴ Cun, ka hun zoh ih, cule ngai hnik, mero var ka hmu. Cui mero parah cun Mi Pakhat, Minung Fapa vek, a lu ah sui lallukhum a khum ih, a kut ah favah hriam zet keng in a to. ¹⁵ Cun, a dang vancungmi pakhat cu temple ihsin a ra suak ih, cui mero parih a to mi pai hnenah aw ring zetin, “Na favah hawi aw la, at aw. Ziangahtile, na ah ding can a ra thleng zo. Leilung rawl khawm can a cu zo a si,” tiah a au. ¹⁶ Cule, cui mero parih a totu cun a favah cu leilung ah a hawi ih, leilung ih ta cu ah a si. ¹⁷ Cun, a dang vancungmi pakhat van temple ihsin a ra suak leh ih, anih khal cun a hriam zet mi favah a nei ve. ¹⁸ Cun, a dang vancungmi pakhat, meisa tlunih thuneihnak neitu cu biakṭheng ihsin a ra suak. Cule, favah hriam zet a neitu vancungmi hnenah ring zetin a au ih, “Na favah hriam zet kha hawi aw la, sabit rahpawl kha an hmin thluh zo ruangah, leilung ih sabit rah bawr zetzetpawl kha khawm thlang aw,” tiah a ti. ¹⁹ Cule, cui vancungmi cun a favah cu leilung ah a vun hawi. Cun, leilung ih sabit cu a khawm ih, cule, Pathian thinhengnak sabit sawrnak maksak sungah a vun thlak. ²⁰ Cule, khawpi lengih sabitsawrnak khur ah cun an palsawr. Cun, sabit sawrnak khur ihsin thisen a luangsuak. Cui thisen ih a khuh mi cu peng zahnih hrawng a kau ih, rang kakharh thleng tiangih thuk a si.

¹ Cun, van ah a maksak zet mi le khawruahharza a si mi hminsinnak dang pakhat ka hmu. Cucu netabik hremnak pasarihpawl neitu vancungmi pasarih an si. Cuipawl ah cun Pathian thinhengnak a kim a si. ² Cun, thlalang le meisa rawiaw mi tifinriat vek ka hmu. Cule, sahrang le amai lem le a hminsinnak le a hmin nambat parih nehnak cotupawl cu Pathian ṭingṭangpawl tla keng in thlalang tifinriat parah ding in ka hmu hai fawn. ³ Cun, annih in Pathian salpa Mawsi hla le Tuufano hla, “Bawipa Pathian, Ziangkimtithei, na hnaṭuan mipawl cu a ropi ih, khawruahharza a si. Nang, mithianghlimpawlih Siangpahrang, na lamzinpawl cu a dik in a hman a si. ⁴ Maw Bawipa, zo so nangmah lo ṭihzah loin le na hmin thangṭhat lo ih um ding? Ziangahtile, nangmah lawng hi mithianghlim na si. Miphun hmuahhmuah an ra ding ih, na lairelnakpawl cu phuanlang an si ruangah na hmaiah an lo be ding,” ti mi an sak. ⁵ Cu mi hnuah cun ka hun zoh ih, ngai hnik, van ih theihternak biakbuk hmun thianghlim cu awn in a um. ⁶ Cun, hmun thianghlim sung ihsin hremnak pasarih nei vancungmi pasarihpawl cu a thiangfai mi puannem var an sin ih, an ṭang ah sui taikhap ih khapaw in an ra suak. ⁷ Cun, thilnung pali lakih pakhat in vancungmi pasarihpawl hnenah kumkhua kumkhuaih a nung mi Pathian-ih thinhengnak thawi a khat mi sui kheng pasarih cu a pek. ⁸ Cun, hmun thianghlim cu Pathian ropitnak le a huham khu in a khat. Cun vancungmi pasarihpawlih hremnak pasarih cu kimter a si hlanlo, zohman hmun thianghlim sungah an lut thei lo.

¹ Cun, hmun thianghlim sung ihsin aw ring zet pakhat in, vancungmi pasarihpawl hnenah, “Va feh uh la, cule Pathian thinhengnak khengpawl kha leilung parah burh uh,” tiah a ti ka thei. ² Cun, a pakhatnak cu a feh ih, a kheng cu leilung parah a burh. Cule, sahrang hminsinnak nei milaipawl parah le amai lem betupawl parah cun a rimse zet mi le a na zet mi hma a suak. ³ Cun, a pahnihnak vancungmi in a kheng kha tifinriat ah a burh. Cule cui tifinriat cu mithi thisen vekah a cang ih, cui tifinriat sungih um thilnung tinkim cu an thi ṭheh. ⁴ Cun, a pathumnak vancungmi in a kheng cu tivapawl le cirhtiputpawl parah a burh. Cule, thisen ah an cang. ⁵ Cun, tidaipawlih vancungmi in, “Atu ih a um Mi le um zo Mi le a um lai ding Mi, maw Bawipa, nang cu midingfel na si. Ziangahtile, hitivekin thu na rak ṭhen zo. ⁶ Ziangahtile, annih cun mithianghlimpawl le profetpawlih thisen an suah. Cule nang in pek tlak an si ruangah annihpawl cu an in dingah thisen na pe hai,” tiah a ti ka thei. ⁷ Cun, biakṭheng ihsin aw dang pakhat in, “A si ngai, Bawipa Pathian, Ziangkimtithei, na thuṭhennakpawl cu a dik ih an dingfel a si,” tiah a ti ka thei. ⁸ Cun, a palitnak vancungmi in a kheng cu ni parah a burh. Cule, ni hnenah cun milaipawl meisa thawi kang theinak thuneihnak cu pek a si. ⁹ Cun, milaipawl cu a sa zet mi nisa in a kang hai ih, cui hremnakpawl parih thuneihnak neitu Pathian hmin cu an thangsiat. Amah upatnak pe dingin an siraw cuang lo. ¹⁰ Cun, a pangatnak vancungmi in a kheng cu sahrang tohkham parah a burh. Cule, a uknak cu thimnak in a khat ih, a nat tuk ruangah an lei an keu. ¹¹ Cun, an natnakpawl le an hmapawl ruangah vancung Pathian cu an thangsiat ih, an thiltuah mipawl ihsin an siraw cuang lo. ¹² Cun, a paruknak vancungmi in a kheng kha Zufraṭis tivapi parah a burh. Cule, ni suahnak lam siangpahrangpawlih lamzin timtuah a si theinak dingah a ti cu a kangcat. ¹³ Cun, rulhreng kaa sung, sahrang kaa sung le profet deu kaa sung ihsin a ra suak mi butlak vek thlarau bawrhhlawh pathum kha ka hmu. ¹⁴ Cupawl cu khawsepawlih thlarau, hminsinnakpawl tuah ṭheutu an si. Annih cu Ziangkimtithei Pathian-ih ni ropi, doawknak ih hruaikhawm dingin leitlun siangpahrangpawl hnenah le leitlun pumpuluk ah an fehsuak. ¹⁵ “Ngai hnik, fifir vekin ka ra ding. Ralring ih a hnipuan a fingkhawitu cu mihualvanṭha a si. Cu lo asile taklawng in a um ding ih, a ningzahnak mi in an hmu ding,” tiah Bawipa in a ti. ¹⁶ Cun, thlarau pathumpawl cun siangpahrangpawl cu Hebru ṭawng in Armageddon an ti mi hmun ah an finkhawm. ¹⁷ Cun, a pasarihnak vancungmi in a kheng cu thli lakah a burh. Cule, van hmun thianghlim sungih laltohkham ihsin, “Ṭheh a si zo!” tiin aw ring zet a ra suak. ¹⁸ Cule, awpawl si seh, khawripawl si seh, nimthlakaupawl si seh, a um. Linghnin maksak, cutivekih a cak mi le a maksak mi lei milai an um thawk ihsin a um dah kel lo mi linghnin a um. ¹⁹ Cun, khawpi ropi cu ṭhenthum ah a ṭhenaw ih, miphunpawlih an khawpipawl khal an cim ṭheh. Cule, a thinling thinhengnak zu no inter dingin Babilon khaw ropi cu Pathian in a vun mang. ²⁰ Cun, tikulh hmuahhmuah an tlanhlo ṭheh ih, tlangpawl cu hmuh an si nawn lo. ²¹ Cun, van ihsin rial tum pipi, pakhat ah talent khat tluk a rit mi cu milaipawl parah an tla. Cule, hremnak cu a nasatuk ih, cui rial hremnak ruangah milaipawl in Pathian cu an thangsiat.

¹ Cun, kheng pasarih keng, vancungmi pasarihpawl lakih pakhat kha ka hnenah a ra ih hitin i sim, “Hi tawkah ra hnik, ti tampi parih to a maksak zet mi hlawhhlangnu tlunih thuṭhennak cu ka lo hmuh ding. ² Leitlun siangpahrangpawl cu amah thawn nu le pa sualnak an tuah ih, leitlun ih a um mi milaipawl cu a nupa sual tuahnak zu ri in an um,” tiah a ti. ³ Vancungmi cun ramṭhing ah Thlarau in i hruai. Cun Pathian thangsiatnak hminpawl ih a khat mi lu pasarih le ki pahra nei sahrang sen parih to nunau pakhat ka hmu. ⁴ Cun, cui nunaunu cu hnipuan sen le sendup a hruk ih, sui le lung mankhungpawl le keplungpawl thawn a ceimawiaw. Cun a kut ah fihnungza thilpawl le a nupa sual tuahnak thil bawrhhlawhpawl thawi a khat mi sui no a keng. ⁵ Cun, a cal ah, “THUTHUP, A ROPI ZET MI BABILON, HLAWHHLANGPAWL LE LEITLUN FIHNUNGZA THILPAWLIH NU,” tiih hmin ngan mi a um. ⁶ Cun, cui nunau cu mithianghlimpawlih thisen le Jesu ruangih martar tuarpawlih thisen ri in ka hmu. Ka hmuh tikah mak ti zetin ka mang a bang. ⁷ Cun, vancungmi in ka hnenah, “Ziangah na mang a bang? Nunau le a phurtu sahrang, lu pasarih le ki pahra nei ih thuthup ka lo sim ding. ⁸ Na hmuh mi sahrang kha hlanah a rak um dah zo, atu ah cun a um lo, tawnet nei lo khur sung ihsin a hung suak ding ih, siatralnak sungah a feh ding. Cule, leitlun ih a um mipawl, leilung hramthawk ihsin nunnak cazual sungih hmin ngan lo mipawl in, hlanih rak um dah zo, atu ih um lo, cun a um lehsal ding mi, sahrang an hmuh tikah an mang a bang ding. ⁹ “Hi tawkah fimnak nei ruahnaklungthin a um. Lu pasarih cu cui nunaunui tonak tlang pasarih an si. ¹⁰ Cun, siangpahrang pasarih khal an si. Panga cu an tlu zo ih, pakhat cu a um lai, pakhat cu a ra lang hrih lo, cun a ra lang tik khalah can tawite sung lawng a um ding. ¹¹ Cun, a rak um dah zo, cule atu ih um lo mi sahrang kha a pariatnak a si. Siangpahrang pasarih lakih tel mi a si ih, siatralnak ah a feh. ¹² “Cun, ki pahra na hmuh mi kha uknak a co hrih lo mi siangpahrang pahra an si. Asinan sahrang thawn nazi pakhat sung siangpahrang vekin thuneihnak an cotlang ding. ¹³ Cui siangpahrang pahrapawl cu ruahnaklungthin pakhat an nei ih, an huham le an thuneihnak cu sahrang hnenah an pe ding. ¹⁴ Annih cun Tuufano cu an do ding ih, Tuufano cu bawipawlih Bawi, siangpahrangpawlih Siangpahrang a si ruangah annih cu a neh hai ding. Cun, a hnenih um mipawl cu kawh mi, hril mi, mirinum an si,” tiah i ti. ¹⁵ Cun, vancungmi cun ka hnenah, “Na hmuh mi hlawhhlangnui tonak tidaipawl cu minungpawl, mi burpi, miphunpawl le ṭawngpawl an si. ¹⁶ Cun, sahrang parih na hmuh mi ki pahrapawl khan hlawhhlangnu cu an hua ding ih, zianghman nei lo le taklawng in an umter ding. Cun a sa an ei ding ih, meisa in an ur ding. ¹⁷ Ziangahtile, Pathian thupawl a thlenkim lai hlanlo a tumtah mi an tuahnak dingah le ruahnaklungthin pakhat an neihnak dingah le an uknak sahrang hnenih an peknak dingah Pathian in an thinlung ah a fial hai a si. ¹⁸ Cun, na hmuh mi nunaunu kha khawpi ropi, leitlun siangpahrangpawl uktu cu a si,” tiah i ti.

¹ Cun, cui thilpawl hnuah a dang vancungmi, van ihsin a rung ṭum ka hmu. Anih cun thuneihnak ropi a nei ih, a ropitnak in leilung a tlet. ² Cule, anih in aw ring zetin nasazetin a au ih, “Babilon khaw ropi cu a tlu zo, a tlu zo. Anih cu khawsepawl umnak le thlarau bawrhhlawh tinkim umkhawmnak le huatumza vate bawrhhlawh tinkim hrangih thawnginn ah a cang zo! ³ Ziangahtile, miphun hmuahhmuah in a nupa sual tuah thinhengnak zu cu an in zo. Leitlun siangpahrangpawl cun amah thawn nu le pa sualnak an tuah ih, leitlun ih sum tuahtupawl cun a nawmcennak khatliam cu an lenpi phah,” tiah a ti. ⁴ Cun, van ihsin aw dangin hitiih a ti ka thei, “Ka minungpawl, a sualnak ih nan tellonak dingah le hrem a tuarnak nan tuar ve lonak dingah a sung ihsin suak uh. ⁵ Ziangahtile, cu nui sualnakpawl cu van an thleng ih, Pathian in a thil tuahsualpawl kha a cing ringring. ⁶ Nan parih a tuah mi vekin lehrul uh la, a thiltuah mi vekin a let hnih in lehrul uh. Amah ih a cawhrawinak no sungah a hrangah a let hnih in cawkrawi uh. ⁷ Amah le amah a rak ropitawkternak zat in le nuamcen ih a rak um zat in hremnak le riahsiatnak pe uh. Ziangahtile, a thinlung sungin, ‘Siangpahrangnu vekin ka to, nuhmei ka si lo ih, riahsiatnak cu ka hmu dah hrimhrim lo ding,’ tiah a tiaw. ⁸ Curuangah hremnak a tuar ding mipawl thihnak, riahsiatnak le mangṭam pawl cu nikhat sungah an ra thleng ding ih, amah cu meisa ih urkang thluh a si ding. Ziangahtile, amah thu a ṭhentu Bawipa Pathian cu a cak a si. ⁹ “Cun, amah thawi nu le pa sualnak tuah ih, nuamcen ih a rak umtu, leitlun siangpahrangpawl cu a kangnak meikhu an hmuh tikah amah an ṭah ding ih, an rak ding. ¹⁰ A tuar mi ṭih ruangah a hlatnak hmun ah dingin, ‘Ala, ala, khaih Babilon khaw ropi, khaih a cak zet mi khawpi! Nazi pakhat sungah thuṭhen na sinak a ra thleng a si hi,’ tiah an ti ding. ¹¹ “Cun, leitlun ih sum tuahtupawl zohman in an sumdawnnak thil an lei nawn lo ruangah cui khawpi cu an ṭah ding ih riahsia in an um ding. ¹² An zuar mi sui le ngun, lung mankhung le keplung, puan nem pate le puan sendup, pu puan le puan sen, thing rimhmui phunphun le vui ho ih tuah mi bungbel a phunphun, thing mankhung ih tuah mi bungbel a phunphun le dar, thir le marbal lungto, ¹³ thinghawng hmui le rawh ci rimhmui, hriak rimhmui le frankinsense rimhmui, zu le siti, sangvut phut le sangvut, caw le tuu, rangpawl le ranglengpawl, salpawl le minung nunnakpawl tla cu an lei nawn lo. ¹⁴ “Cun, na thlarau ih cakhiar mi rahpawl cun an lo tlan hlohsan, lennak thil hmuahhmuah le thil duhnung hmuahhmuah cun an lo tlan hlohsan ih, cupawl cu ziangtik hmanah na hmusal nawn hrimhrim lo ding. ¹⁵ Hi thilpawlih sum tuahtupawl, amah ih a lenter mipawl cu, hrem a tuar mi an ṭih ruangah lamhlapi ah an ding ding, an ṭap ding ih, an riah a se ding. ¹⁶ Cun, ‘Ala, ala, puan nem pate, puan sendup, puan sen hruh ih sui le lung mankhung le keplung pawl thawn a thuamaw mi khaih khaw ropi cu, ¹⁷ nazi pakhat sungah kha tluk lennak maksak cu zianghmanlo ah a cang ta riai,’ tiah an ti ding. Cun, lawng mawngtu hmuahhmuah, lawng ih khualtlawng mipawl hmuahhmuah, lawng hnaṭuantupawl hmuahhmuah le tifinriat ih sumtuahtupawl hmuahhmuah cu hmun hlatpi ah an ding. ¹⁸ Cun, a kangnak meikhu an hmuh tikah an ṭap ih, ‘Hi khawpi ropi vek hi ziang khawpi a um dah?’ tiah an au. ¹⁹ “ ‘Ala, ala, hi khawpi ropi hi milian ih kan cannak a si. Kannih tifinriat parih lawng neitu hmuahhmuah cu a thil mankhungpawl ruangah milian ah kan cang. Nazi pakhat sungah zianghmanlo ah a cang tariai,’ tiah au in an lu ah leivut an phulhaw. ²⁰ “Maw van, nannih apostol thianghlimpawl le profet thianghlimpawl amah ruangah nan lungawi uh. Ziangahtile, Pathian in nan hrangah a parah phuba a la zo!” tiah a ti. ²¹ Cun, a cak zet mi vancungmi pakhat in riallung tumpi vek lung pakhat a lak ih, tifinriat sungah a hlawn ih, “Hitivekin khawpi ropi Babilon cu nasazetih hlawnthlak a si ding ih, hmuhsal a si nawn hrimhrim lo ding. ²² Cun, ṭingṭang tumtupawl, awnmawi tumtupawl, phirivau tumtupawl le tawtawrawt tumtupawl ih aw cu na sungah theih a si nawn lo ding. Cun kutzungthiam, ziangvek kutzungthiam an si khal le na sungah hmuh an si nawn lo ding ih, rialnak awnthawm khal na sungah theih a si nawn hrimhrim lo ding. ²³ Cun, meito tleu khal na sungah a vang nawn hrimhrim lo ding ih, na sungah mo le mo neitupa ih aw khal theih a si nawn hrimhrim lo ding. Ziangahtile, na sumtuahtupawl cu leitlun ih miropi zetzetpawl an rak si ih, na dawithiamnak in miphun hmuahhmuah cu bum an rak si. ²⁴ Cun, profetpawl, mithianghlimpawl le leilung tlunih thah mipawl hmuahhmuah ih thisen cu a sungah hmuh a si,” tiah a ti.

¹ Cui thilpawl hnuah van ah mipi tam zet aw ring zetin, “Halleluiah, rundamnak, ropitnak, upatnak le huham cu Bawipa kan Pathian ta a si! ² “Ziangahtile, a thuṭhennakpawl cu an dik ih, an fel. A nupa sual tuahnak in leilung a bawrhhlawhtertu a maksak zet mi hlawhhlangnu cu thu a ṭhen zo ih, a siahhlawhpawlih thisen kha cu nui kut ah phuba a lak zo hi,” tiah an ti. ³ Cun, annih in, “Halleluiah! Cui hlawhhlangnui khu cu kumkhuaih kumkhua tiang a kai so!” tiah an tisal. ⁴ Cun, upa kul hluanlipawl le sahrang palipawl in laltohkham parih a totu Pathian cu bawkkhup in an bia ih, “Amen! Halleluiah!” tiah an ti. ⁵ Cun, laltohkham ihsin aw a ra suak mi cun, “Nannih a siahhlawhpawl hmuahhmuah, nannih amah ṭihzahtu mithupi le mithupilo pawl hmuahhmuah, kan Pathian cu thangṭhat uh!” tiah a ti. ⁶ Cun, minung tampi aw vek le tidai tampi aw vek, a cak zet mi khawri aw vek kha ka thei ih, “Halleluiah! Ziangahtile, Ziangkimtithei Bawipa Pathian in a uk a si! ⁷ Lungawi le aipuang ih um in, amah cu upatnak pe uhsi. Ziangahtile, Tuufano nupi ṭhitpuai cu a ra thleng zo ih, a nupi khal amahte roriin a timtuahaw zo,” a ti kha ka thei. ⁸ Cun, Tuufano nupi cu a thuamawknak dingah a ṭha zet mi puan nem pate ṭha zet, fai le var cu pek a si. Ziangahtile, puan nem pate cu mithianghlimpawlih dingfelnak a si. ⁹ Cule, vancungmi cun ka hnenah, “ ‘Tuufano nupi ṭhit puai ih sawm a si mipawl cu mihualvanṭha an si,’ tiin ngan aw,” in ti. Cule, ka hnenah anih in, “Hi thupawl hi Pathian thudik an si,” tiah i ti. ¹⁰ Cule, amah be dingah a ke hramah ka bawkkhup. Asinan anih cun ka hnenah, “Kha tin ti hlah! Kei cu nangmah le Jesui thu theihtertu na unaupawlih siahhlawhpi ka si. Pathian be aw! Ziangahtile, Jesui thutheihternak cu simsungnak thlarau hi a si,” tiah a ti. ¹¹ Cun, van awngaw ka hmu ih, cule ngai hnik, rang raang pakhat le a parih to Rinum le Dik an ti mi cu ka hmu fawn. Anih cun dingfelnak in thu a ṭhen ih, ral a do. ¹² A mitpawl cu meisa alh vek an si ih, a lu parah lallukhum tampi a khum. Cun, hmin ngan mi a nei ih, amah siarlo zohman in an thei lo. ¹³ Cun, anih cu thisen sungih hnim mi hnipuan hrukter a si. Cule, a hmin cu ‘Pathian Thu’ tiih kawh a si. ¹⁴ Cun, van ralkappawl cun puan nem pate, var le fai sin in rang raangpawl parah to in amah cu an run thlun. ¹⁵ Cun, a kaa sung ihsin ralnam hriam pakhat a suak ih, cui ralnam in miphunpawl cu a sat hai ding. Cun, annih cu thir kianghrawl thawn a uk hai ding. Ziangkimtithei Pathian thinlingnak le thinhengnak sabit sawrnak khur ah cun a palsawr hai ding. ¹⁶ Cun, a puan par le a cawn parah, “SIANGPAHRANGPAWLIH SIANGPAHRANG LE BAWIPAWLIH BAWI,” tiih hmin ngan a um. ¹⁷ Cun, ni sungih a ding mi vancungmi pakhat ka hmu ih, cule, anih cun van laifangih a zam mi vate hmuahhmuah hnenah aw ring zetin, “Pathian ropi ih zanriah ah cun hmunkhat ah rakhawmaw uh. ¹⁸ Siangpahrangpawlih sa, ralbawipawlih sa, micakpawlih sa, rangpawl le an parih a totupawlih sa, mi hmuahhmuah ih sa, miluat le sal pawlih sa, mithupi le mithupilo pawlih sa nan ei theinak dingah ra uh,” tiin a au. ¹⁹ Cun, sahrang, leitlun siangpahrangpawl le an ralkappawl cu rang parih a totu Pa le a ralkappawl do dingah hmunkhat ih an khawmawk ka hmu. ²⁰ Cun, sahrang le sahrang mithmuh ih hminsinnak tuah ṭheutu profet deu cu kaih an si. Cui hminsinnakpawl hmang cun sahrang hminsinnak neitu le a milem betupawl cu a bum ṭheu hai. An pahnih in kat meisa thawi a alh mi mei lipi sungah nung cingin a paih hai. ²¹ Cun a tang mipawl cu rang parih totu Pa in a kaa ihsi a suak mi ralnam in a that ṭheh hai. Cule vate hmuahhmuah cun cupawlih sa cu khawp zetin an ei.

¹ Cun, vancungmi pakhat tawnet nei lo khur awnnak tawhfung nei le a kut ih cikcin tum zet pakhat keng van ihsin a rung ṭum kha ka hmu. ² Cun, anih cun khai rul tar, rulhreng cu a kai. Cumi cu Diabol le Setan a si. Anih cu kum thawngkhat sung vancungmi cun a ṭawnhrem ih, ³ kum thawngkhat a kim hlanlo miphunpawl bum nawn lo dingin tawnet nei lo khur sungah a vun hlawn ih, a kharhkhum ih tacik a khen. Cui hnuah can malte sung thlahsal a si ding. ⁴ Cun, laltohkhampawl ka hmu. Cule, cupawl parah cun mi an to ih, an hnenah thuṭhennak pek an si. Cun Jesui thu theihpitu an si ruangah le Pathian thu ruangah lu tan a tuar mipawlih thlarau tla ka hmu. Hipawl cun sahrang an be lo, a milem khal an be lo ih, a hminsinnak khal an cal ah si seh, an kut ah si seh, an nei ve lo. Cupawl cu an nungkirsal ih, Khrih thawn kum thawngkhat an uk. ⁵ Sikhalsehla, mithi dangpawl cu kum thawngkhat a cem hlanlo cu an nungkirsal hrih lo. Himi cu thawhsalnak hmaisa a si. ⁶ Thawhsalnak hmaisaih a tel mipawl cu mihualvanṭha le mithianghlim an si. An parah thih hnihnak in thuneihnak zianghman a nei lo. Sikhalsehla, annih cu Pathian le Khrih-ih puithiam an si ding ih, amah thawn kum thawngkhat an uk ding. ⁷ Cun, kum thawngkhat a cem tikah, Setan cu a thawngtlaknak ihsin suah a si ding. ⁸ Cule, leilung kil li ih a um mi miphunpawl bum dingah a feh ding. Cui miphunpawl cu Gog le Magog an si. Annihpawl cu ral do dingah hmunkhat ah a finkhawm hai ding. An mipum cu tifinriat ih vunnel zat an si. ⁹ Cun, leilung tlun hmun zakipah an fehdarh ih, mithianghlimpawl umnak hmun le duhdawt mi khawpi cu an kulh. Cun van ihsin Pathian hnenin meisa a rung tla ih, anmah a kangral thluh hai. ¹⁰ Cun, anmah bumtu Diabol cu sahrang le profet deu an hlawnnak mei lipi le kat meisa sungah an hlawn. Cule, annih cu a sun a zan in kumkhuaih kumkhua tiang hrem an si ding. ¹¹ Cun, laltohkham var ropi le a parih a totu Pa cu ka hmu. A hmai ihsin leilung le van cu an tlanhlo ih, an um nawn lo. ¹² Cun, mithipawl, mithupi le mithupilo khal, Pathian hmaiih ding ka hmu. Cule, cazualpawl cu pharh an si ih, cun cazual dang pakhat khal pharh a si, cucu nunnak cazual a si. Cule mithipawl cu cui cazualpawl sungih an ngan mi, an thiltuah mipawl vekin thuṭhen an si. ¹³ Cun, tifinriat cun a sungih a um mi mithipawl kha a hun suah ih, Thihnak le Mithikhua khalin an sungih a um mi mithipawl kha an hun suah ve. Cule mitin an thiltuah mipawl vekin thuṭhen an si. ¹⁴ Cun, Thihnak le Mithikhua cu mei lipi sungah hlawn an si. Himi cu veihnih thihnak a si. ¹⁵ Cun, zokhal nunnak cazual sungih an hmin ngan hmuh a si lo mi cu mei lipi sungah hlawn an si.

¹ Cun, van thar le lei thar ka hmu. Ziangahtile, van hmaisa le lei hmaisa cu an hloral ih, tifinriat khal a um nawn lo. ² Cule, khawpi thianghlim, Jerusalem Thar cu, a pasal hrangih mawi zetih a ceiaw mi mo vekin timtuahaw in van Pathian hnen ihsin a rung ṭum kha keimah John in ka hmu. ³ Cun, van ihsin a ring zet mi aw pakhat in, “Ngai hnik, Pathian biakbuk cu minungpawl hnenah a um. Amah cu an hnenah a ceng ding ih, annih cu amai minung an si ding. Pathian amah rori cu an hnenah a um ding ih, an Pathian a si ding. ⁴ Cun, Pathian in mitthli hmuahhmuah kha an mit ihsin a hnulsak thluh hai ding. Cun thihnak a um nawn lo ding, riahsiatnak khal a um nawn lo ding. Ṭahnak si seh, na tuar si seh a um nawn lo ding. Ziangahtile, thil hmaisapawl cu an hloral thluh zo,” a ti ka thei. ⁵ Cun, laltohkham parih a totu Pa in, “Ngai hnik, thil hmuahhmuah cu ka tharter thluh zo,” tiah a ti. Cun, ka hnenah, “Ngan aw, ziangahtile hi ṭawngkampawl hi an dik ih, rin tlak an si,” tiah a ti. ⁶ Cun, ka hnenah, “Ṭheh a si zo. Kei cu Alpha le Omega, Hramthawknak le Cemnak ka si. Tihal mi hnenah nunnak cirhti alakin ka pe ding. ⁷ A nehtu cun thil hmuahhmuah ro ah a co ding. Kei cu a Pathian ka si ding ih, anih cu ka fapa a si ding. ⁸ Asinan, miṭihhrutpawl, zumlotupawl, Pathian huat mi tuahtupawl, laithatpawl, hursualnak a tuahtupawl, dawithiampawl, milem betupawl le thuphanpertu hmuahhmuah pawlih an co ding hmun cu mei le kat thawi a kang mi mei lipi a si ding. Himi cu veihnih thihnak a si,” tiah a ti. ⁹ Cun, vancungmi pasarih, hremnak netabik pasarih thawi a khat mi kheng pasarih kengtu lakih pakhat kha ka hnenah ra in i sim ih, “Hi tawkah ra aw, Tuufano nupi, mo cu ka lo hmuh ding,” tiah i ti. ¹⁰ Cun, cui vancungmi cun Thlarau in tlang tum zet le sang zet parah in thiarhlo ih, khawpi ropi Jerusalem khaw thianghlim Pathian hnenin van ihsi a rung ṭum mi cu i hmuh. ¹¹ Cui khawpi cun Pathian ropitnak a nei. A tleuzia cu lung mankhungbik jasper lung vek le krisṭal lung vekih fai a si. ¹² Cun, kulh ropi zet le sang zet a nei ih, kawtka hleihnih a nei. Cui kawtkapawl ah cun vancungmi hleihnih an um ih, cui kawtkapawl parah Israel hrin hleihnihpawlih hmin ngan a si. ¹³ Ni suahnak lamah kawtka pathum, sak lamah kawtka pathum, thlang lamah kawtka pathum, ni tlaknak lamah kawtka pathum a um. ¹⁴ Cun, cui khawpi kulh cun lungphum hleihnih a nei ih, an parah Tuufano-ih apostol hleihnihpawlih hmin ngan a si. ¹⁵ Cun, i simtu vancungmi cun cui khawpi le a kawtkapawl le a kulh tah dingah sui phai kung fung a keng. ¹⁶ Cun, cui khawpi cu kil li nei in a um ih, a kauh lam le a sau lam a bangaw. Cun cui vancungmi in khawpi kha cui tahnak fung in a tah. A sau lamah peng thawngkhat le zanga a si ih, a kauh lam khalah peng thawngkhat le zanga, a san lam khalah peng thawngkhat le zanga thotho a sang. ¹⁷ Cun, vancungmi cun khaw kulh cu minung tahnak hmang in, cumi cu vancungmi tahnak a si, a tah ih dawng za le sawmli le dawng li a si. ¹⁸ Cun, a kulh cu jasper lung mankhung ih tuah a si ih, cui khawpi cu thlalang vekih a fim mi sui hlir ih tuah a si. ¹⁹ Cun, cui khawpi kulh hram ṭohnakpawl cu lung mankhung a phunphun ih ceimawi an si. Lungphum hmaisabik cu jasper lung a si ih, a pahnihnak cu saphir lung a si. A pathumnak cu kalkidon lung a si ih, a palinak cu emerald lung a si. ²⁰ A panganak cu sardonuk lung a si ih, a paruknak cu sardion lung a si. A pasarihnak cu krisolait lung a si ih, a pariatnak cu birul lung a si. A pakuanak cu ṭopaz lung a si ih, a pahratnak cu krusopra lung a si. A hleikhatnak cu Jacinth lung a si ih, a hleihnihnak cu amethusto lung a si. ²¹ Cun, kawtka hleihnihpawl cu keplung hleihnih an si. Kawtka pakhat ciar cu keplung pakhat fingfing a si. Cun cui khawpi lamzin cu sui hlir, thlalang zohtlang thei mi vek hi a si. ²² Cun, cui khawpi sungah cun temple ka hmu lo. Ziangahtile, Ziangkimtithei Bawipa Pathian le Tuufano cu cui khawpi ih temple an si. ²³ Cun, cui khawpi cu Pathian ropitnak in a tlet ruangah a tleunak hrangah ni khal a ṭul lo, thlapi khal a ṭul lo. Tuufano cu cui khawpi ih tleu a si. ²⁴ Cun, rundam a si mi miphunpawl cu cui khawpi ih tleu sungah an feh ding ih, leitlun siangpahrangpawl cun an ropitnak le an zahumnakpawl cu cui khawpi sungah an kenglut ding. ²⁵ Cun, cui khawpi kawtkapawl cu sunnivu in khar an si lo ding. Ziangahtile, cu tawkah cun zan a um hrimhrim lo ding. ²⁶ Cun, miphunpawl cun an ropitnak le an zahumnakpawl kha cui khawpi sungah an kenglut ding. ²⁷ Cun, cui khawpi sungah cun ziangti lam khalin thil thiang lo zianghman a lut lo ding ih, Pathian huat mi a tuahtupawl si seh, thuphanpertupawl khal si seh an lut lo ding. Tuufano nunnak cazual sungah an hmin ngan a si mipawl lawng an lut ding.

¹ Cun, vancungmi cun nunnak ti, tiva fim, krisṭal lung vekih fim Pathian le Tuufano laltohkham ihsi a luangsuak mi cu i hmuh. ² Cui khawpi lamzin laifangah le cui tiva tlang kap hnih ah phun hleihnih a rah mi nunnak thingkung a um ih, thla tinten rah a rah. Cui thinghnahpawl cu miphunpawl hrangah damnak a si. ³ Cun, cu tawkah cun camsiatnak hrimhrim a um nawn lo ding ih, Pathian le Tuufano laltohkham cu cui khawpi sungah a um sawn ding. Cule, a siahhlawhpawl in amah kha an rian ding. ⁴ A hmel an hmu ding ih, a hmin cu an cal ah a um ding. ⁵ Cun, cu tawkah cun zan a um nawn lo ding. Cun, meito an ṭul nawn lo ding ih, ni tleu khal a ṭul nawn lo ding. Ziangahtile, Bawipa Pathian cun tleu a pe hai ding ih, kumkhuaih kumkhua in an uk ding. ⁶ Cun, anih cun ka hnenah, “Hi thupawl hi zum tlak le a dik mi an si,” tiah i ti. A thianghlim profetpawlih Bawipa Pathian cun thil rung thleng tengteng cing ding mipawl cu a siahhlawhpawl hnenah hmuh dingin a vancungmi a thlah a si. ⁷ “Ngai hnik, ka ra cing ding! Hi cazual sungih simsungnak ṭawngkampawl a thluntu cu mihualvanṭha an si,” tiah Jesu in a ti. ⁸ Cun, kei, John hi cui thilpawl hmutu le hna ih a theitu cu ka si. Ka theih ih, ka hmuh tikah, cui thilpawl i hmuhtu vancungmi cu be dingin a ke hramah ka bawkkhup. ⁹ Cule anih in ka hnenah, “Hitin ti hlah. Ziangahtile, kei cu nangmah le na unau profetpawl le hi cazual pawmtupawlih siahhlawhpi ka si. Pathian cu be aw,” tiah i ti. ¹⁰ Cule, anih in ka hnenah, “Hi cazual simsungnak ṭawngkampawl hi tacik khen hlah: ziangahtile, can a nai zo. ¹¹ Midiklo cu diklo in um hrih ko seh la, mibawrhhlawh cu bawrhhlawh in um hrih ko seh. Cule, midingfel cu, fel in um hrih ko seh la, mithianghlim cu thianghlim in um hrih ko seh,” tiah i ti. ¹² “Cun ngai hnik, zamrang zetin ka ra ding. Mi kip an thiltuah mi vekih pe dingin ka lawmman ka hnenah a um. ¹³ Kei cu Alpha le Omega, Thawknak le Cemnak, Hmaisabik le Netabik cu ka si,” tiah Jesu in a ti. ¹⁴ A thupekpawl a thluntu cu mihualvanṭha an si. Nunnak thing ei theinak le kawtkapawl ihsin khawpi sungih luh theinak an nei ding. ¹⁵ Ziangahtile, a lengih a um mipawl cu uicopawl, dawithiampawl, hursualnak tuahtupawl, laithatpawl, milem betupawl, mi zokhal thuphanper a duhtu le thuphan a pertu hmuahhmuah pawl an si. ¹⁶ “Kei, Jesu in hi thilpawl hi nan hnenah kawhhranpawl sungah theihter dingin ka vancungmi ka run thlah a si. Keimah cu David-ih Hram le Tesinfa, Atleuzetmi le Deirel Arsi cu ka si,” tiah a ti. ¹⁷ Cun, Thlarau le mo cun, “Ra aw!” an ti. A theitu in, “Ra aw!” ti seh. Tihaltu cu ra seh. Zokhal a duhtu cu nunnak ti alakin la seh. ¹⁸ Hi cazual sungih simsungnak thupawl a theitu hmuahhmuah hnenah ka lo theihter a si. Zokhal hi thupawl tlunah a bet asile hi cazual sungih ngan mi hremnakpawl hi Pathian in a parah a thlengter ve ding. ¹⁹ Cun, zokhal hi simsungnak cazual sungih thupawl a lakhlo asile nunnak cazual ih a co ding mi a covo si seh, khawpi thianghlim ih a co ding mi a covo si seh, hi cazual sungih ngan mi thilpawl a co ding mi a covo si seh, Pathian in a lahlo ve ding. ²⁰ Hi thilpawl a theihtertu in, “A si, zamrang zetin ka ra ding,” tiah a ti. Amen, a si, Bawipa Jesu, ra aw! ²¹ Kan Bawipa Jesu Khrih zangfahnak cu nan zate hnenah um hram seh. Amen.