FILIPI

FILIPI

¹ Jesu Khrih-ih ṭemṭawn sal, Paul le Timothy in, Filipi khua ih um Jesu Khrih-ih mithianghlim hmuahhmuah le kawhhran hotupawl le dikhonpawl hnenah ca kan lo kuat a si. ² Pathian kan Pa le Bawipa Jesu Khrih hnen ihsin zangfahnak le hnangamdaihnak nan hnenah um hram seh. ³ Nanmah ka lo mansuah tinten ka Pathian hnenah lungawithu ka sim ṭheu. ⁴ Ka thlacamnak kipah nan zate hrangah lungawinak thawn ka lo dilsak. ⁵ Ziangahtile, ni hmaisabik ihsin tu tiang thuthangṭha phuansuahnak ah nan tel a si. ⁶ Nan hnenih hnaṭuan ṭha a ṭuan thawktu cun Jesu Khrih-ih ni tiang a tifamkim ding, cu mi rori cu ka zumhnget a si. ⁷ Hitivekih nan zate thuhla ka ruah cu ka hrangah a dik a si. Ziangahtile, ka thinlung ah nan um, cikcin ih ṭawn ka sinakpawl, thuthangṭha humnak le nemhngehnak ah nan zaten ka co mi zangfahnak i ṭawmpitu nan si. ⁸ Ziangahtile, Jesu Khrih-ih lainat duhdawtnak in nan zaten ziang tlukin ka lo ngai ti i theihpitu cu Pathian a si. ⁹ Cule, nan duhdawtnak cu theihnak le thuṭhenfel thiamnak hmuahhmuah ah a ṭhan sinsin theinak dingah thla ka cam. ¹⁰ Cuti cun Khrih-ih ni tiang diktak le sawihnawm ding um lo nan si theinak dingah thil ṭhabikpawl cu nan thleidang thiam ding ih, ¹¹ Pathian ropitnak le thangṭhatnak ah Jesu Khrih zarah dingfelnak rahpawl thawi khat mi nan si thei ding. ¹² Asinan, u le nau tla, ka hnenih thil cang mipawl hi thuthangṭha karhzaitertu ah an cang sawn riangri ti nan theih ka duh. ¹³ Cutin, Khrih ruangih cikcin ih ṭawn ka si ti cu siangpahrang inn kiltu hmuahhmuah le a dang Rom khawpi sungih um mi hmuahhmuah in fiang zetin an hmu. ¹⁴ Bawipa ih unau tampi tla cu cikcin ih ṭawn ka sinak ruangah zumhnget in an um ih, ṭih loin Pathian thusimnak ah an ral a ṭha sinsin. ¹⁵ Hihi a dik mi thu a si, mihrekkhat cun nahsuahnak le eltainak thawn Khrih thu an sim, asinan mi hrekkhat cun duhsaknak thawn an sim. ¹⁶ A hmaisapawl khi cun cikcin ih ṭawn ka sinak ah harsatnak bet ding tum in, lungput diklo zetin, ṭhenṭhekter duhnak lungput thawn Khrih thu cu an sim. ¹⁷ Asinan a neta sawnpawl cun, keimah cu thuthangṭha humtu dingah ret mi ka si ti thei in duhdawtnak thawn thu an sim sawn a si. ¹⁸ A pawinak ziang a um? Ziang a va si hmanah, lamzin phunphunin a der in si maw, a taktak in simaw, Khrih cu phuansuah in a um. Cu mi ah cun ka lung a awi a si, ka lung a awi ding. ¹⁹ Ziangahtile, thla in camsaknak le Jesu Khrih Thlarau bawmnak thawngin himi cu runsuah ka sinak ah a cang ding ti ka thei. ²⁰ Ka beiseinak nasazet le ka ruahsannak bangtukin ziang thu hmanah ka mualpho lo ding. Asinan ralṭhatnak hmuahhmuah thawn ka rak um kel vek ten, nunnak in si maw, thihnak in si maw, atu khalah Khrih cu ka taksa ah cawimawi in a um ding. ²¹ Ziangahtile, kei ka hrangah cun nun hi Khrih a si ih, thih cu hlawknak a si. ²² Sikhalsehla, taksa ih ka nun vivo asile cumi cu ka ṭuanbangnak rah suahtertu ding a si; cuticing cun ziang ka hril sawn ding ti ka thei lo. ²³ Ziangahtile, kei cu thil pahnih lakah awlawksawng in ka um, fehsuak ih Khrih thawi um duhnak ka nei; cumi cu a ṭhasawn mi a si. ²⁴ Sikhalsehla taksa ih ka um hi nanmai hrangah a ṭul sawn. ²⁵ Cun, cu mi zumhngehnak cu nei in, zumnak ah nan ṭhanlennak dingah le nan lungawinak dingah nan zate hnenah um in ka tang hrih ding ti ka thei. ²⁶ Cuti cun nan hnenih ka ratsalnak ruangah ka hrangih nan lungawinak cu Khrih ah a tam sinsin thei ding. ²⁷ Ziang a va si khalle, nan nuntuzia cu Jesu Khrih thuthangṭha thawn milaw phawt seh. Cutin, nan hnenah ra in ka lo hmuh ah simaw, nan hnenih ka um lo khalah simaw, thlarau hmunkhat ah dinghnget in, thuthangṭha zumnak hrangah ruahnaklungthin hmunkhatten nan ṭangtlang ti nan thuhla ka thei thei ding. ²⁸ Cule, nanmah a lo dotupawl ṭih hrimhrim hlah uh. Cumi cu an hrangah siatralnak langfiangternak a si ih, nannih hrangah cun Pathian hnen ihsi a ra mi nan rundamnak langfiangternak a si sawn. ²⁹ Ziangahtile, Pathian in Khrih ruangah thilti ding mi a lo pe. Cumi cu amah Khrih nan zum ding lawng si loin, amai ruangih nan tuar ding khal a lo siang a si. ³⁰ Harsatbuainak keimah ih nan rak hmuh mi, atu khalah keimah ah a um ti hna ih nan theih mi, cu mi rori cu nan nei ve.

¹ Khrih ah cun thapeknak si seh, duhdawt thlangamnak si seh, Thlarau pawlkawmnak si seh, lainatduhdawtnak le zahngainak a um. ² Curuangah, cumi cu a dik asile ruahnak bangrep ih um in, duhdawtnak bangrep nei in, lungrual ih ruahnaklungthin pakhat nei in ka lungawinak famkimter uh. ³ Ṭhenṭhekter duhnak lungput ruangah si seh, thulolak pawrhawknak ruangah si seh zianghman tuah hlah uh la, cu hnakin ruahnaklungthin tangdawrnak thawn mi tinin midang kha mah hnakih ṭhasawnah ruat cio sawn hai seh. ⁴ Zokhal maibul thil lawng ngaihsak loin midang ta khal ngaihsak uh. ⁵ Hi ruahnaklungthin Khrih khalih um mi hi nanmah ah um seh. ⁶ Anih cu Pathian mizia nei ih um mi a si. Pathian tlukih um cu kaihhnget ding thil ah a ruat lo. ⁷ Sikhalsehla, amah le amah kawlawngawter in, ṭemṭawn sal pianzia la in minung vekin a rung suak. ⁸ Cun, minung pianzia keng in amah le amah hnuai a dawr ih, thi tiang rori thulung in a um, khraws thihnak cu. ⁹ Curuangah, Pathian khalin anih cu nasazetin a cawisang ih, hmin hmuahhmuah lakih hmin cungnungbik a pe. ¹⁰ Cu mi ruangah mi tin vancung ih um si seh, leitlun ih um si seh, lei hnuai ih um si seh Jesui hmaiah an khuk an bil thluh ding. ¹¹ Cule, cutin Pa Pathian cu thangṭhat ih a um theinak dingah lei hmuahhmuah in Jesu Khrih cu Lal a si tiah an phuang ding. ¹² Curuangah ka duhdawt mi tla, thu nan rak lun ṭheu vek khan, ka um lai lawngah si loin, atu ka um nawn lo hnu khalah nasasawnin ṭih le khur phahin nanmai rundamnak cu ṭuansuak uh. ¹³ Ziangahtile, a lungawi zawng tuah duh ding le tuah dingih nan sungih a ṭuantu cu Pathian a si. ¹⁴ Thil ziangkim hi phunzainak le elawknak um loin tuah uh. ¹⁵ Cuti cun, thinlung kawi le mi khermeipawl lakah sawihnawm ding um lo le thianghlim, kawk ding um lo Pathian fate nan si ding ih, leitlun tleu vekin an lakah nan tle ding. ¹⁶ Nunnak thu cu kaihnget uh, cuti cun alakih tlan le alakih ṭuan ka si lo ding ih, Khrih ni ah tluang ka khawng thei ding. ¹⁷ A si, kei cu nan zumnak raithawinak le rawngbawlnak parih burh ka si khalle ka lung a awi, nan zaten ka lo lungawipi fawn. ¹⁸ Cutivekin, nannih khal lungawi uh la, i lungawipi ve uh. ¹⁹ Asinan nan umtudan ka theih tikih thazang ka ngah theinak dingah a rei hlanah nan hnenih Timothy thlah thei dingin Bawipa Jesu ah ruahsannak ka nei. ²⁰ Ziangahtile, hivek ruahnak nei, nan umdan thungaithlak ih lo ngaihsaktu ding dang zohman ka nei lo. ²¹ Ziangahtile, mi hmuahhmuah in Jesu Khrih-ih thilpawl tla hawl loin, anmai thil lawng an hawl. ²² Asinan, Timothy hi cu fa in a pai rawng a bawl vekin thuthangṭha hnaṭuannak ah rawng i bawlpitu a si ti amah in a langter zo ti nan thei. ²³ Curuangah, ziangti vek ka si ding ti ka theih leveten amah hi rak thlah lohli ka beisei. ²⁴ Asinan, nan hnenah keimah rori khal ka ra cing ding ti Bawipa ah zumhngehnak ka nei. ²⁵ Ka unaupa, Epafrodiṭas, ka hnaṭuanpi le ka ralkap ṭuanpi, nan palai le ka ṭulnak ih rawng i bawlsaktu cu nan hnenah thlah a ṭul tiah ka ruat. ²⁶ Ziangahtile, anih cun nan zaten a lo ngai zet ih, a na ti nan theih ruangah a thin khal a har zet. ²⁷ Ziangahtile, thi zikin a na taktak, asinan Pathian cun a parah zahngainak a nei. Amah lawng si loin thinharnak parih thinhar sinnak ka neihlonak dingah ka par khalah zah a ngai a si. ²⁸ Curuangah amah nan hmuhsal tikah nan lung a awi theinak dingah le ka ninghannak a dem deuh theinak dingah ka rak thlah lohli a si. ²⁹ Curuangah, lungawinak hmuahhmuah thawn Bawipa ah amah cu rak cohlang uh la, hivek mi hi upat uh. ³⁰ Ziangahtile, keimah in sawmdawlnak sambau mi cu silhkhat dingah a nunnak ui loin, Khrih-ih hnaṭuannak ruangah a thi zikte a si.

¹ Anetnakah, u le nau tla, Bawipa ah lungawi uh. Nan hnenih thukel ngan nawnsal ding hi ka hrangah thil buaithlak a si lo, cucu nan hrangah himnak ding a si sawn. ² Uicopawl kha va ralring uh la, ṭhatlonak tuahtupawl kha ralring uh. Mai taksa siatsuahawtupawl kha va ralring uh. ³ Ziangahtile, kannih Thlarau ih Pathian a betu, Khrih Jesu ih lungawitu le tisa rinsanlotupawl hi serhtan mi diktak kan si sawn. ⁴ Sikhalsehla, kei khal tisa ah rinsan ding ka nei. Mi pakhatkhat in tisa ah rinsan ding nei ih a ruahawk asile kei cun ka nei tam sinsin. ⁵ Ni riatnak ih serhtan, Israel-mi, Benjamin hrin, Hebrumi diktak, Dan thu lamah Farasi ka si. ⁶ Ṭhahnemngainak lamah cun kawhhran tiduhdahtu; Dan thu ih dingfelnak lamah sawihnawm ding um lo ka si. ⁷ Sikhalsehla, hlawknak dingih ka rak ruah mi cui thilpawl cu, Khrih ruangah sunnak ah ka ruat thlang. ⁸ A si, thungaitein, ka Bawipa Khrih Jesu theih hi a hlut hleice ruangah thil hmuahhmuah hi sunnak ah ka ruat. Amah ruangah thil hmuahhmuah sunnak ka tuar ih, Khrih ka neihngah theinak dingah cupawl cu hnawmhne menah ka ruat. ⁹ Cun, Pathian in Khrih ah i hmuh theinak dingah Dan parih ṭhumaw mi keimai dingfelnak cu nei loin, Khrih zumnak ruangih dingfelnak, zumnak ruangih Pathian hnen ihsi dingfelnak cu ka nei sawn. ¹⁰ Cuti cun, a thihnak bangnak nei ih tuah mi si in, Khrih le a thawhsalnak huham le a tuarnakpawl ṭawmpinakpawl tla cu ka theih theinak dingah a si. ¹¹ Cule ziangmawti tiih, mithi thawhsalnak ih telngah thei ding ka duh. ¹² Ka congah zo ih ka famkim zo ka tinak a si lo. Cu hnakin Khrih Jesu ih i kaihnak san cu kaingah thei rori dingin ka dawi sawn a si. ¹³ U le nau tla, ka kaingah zo tiah keimah le keimah ka ruataw lo. Cu hnakin hi thil pakhat hi ka tuah: dung lamih thil umpawl hngilh in, hmai lamih thil umpawl cu ka dawi sawn. ¹⁴ Cule, Khrih Jesu ah tlun lamih Pathian kawhnak nehman laksawng hrangah hmuitin mi lam panin ka nawr. ¹⁵ Curuangah u le nau tla, a pitling mi hmuahhmuah in cutivek ruahnaklungthin nei uhsi. Cule, ziang thil khalah ruahnaklungthin danglam nei nan sile Pathian in nan hnenah ka lo sim mi kha a lo theifiangter ding. ¹⁶ Ziangti a va si khalle, kan thlen cintawk tiangah dan bangrep in feh uhsi la, thil bangrep kha ruat uhsi. ¹⁷ U le nau tla, keimah i cawngtu si uh la, zohṭhim ding kannih in neih vekin cutivekih nungtupawl cu zohṭhim uh. ¹⁸ Ziangahtile, mi tampi cu Khrih-ih khraws doral an si. An thuhla cu atu le atu ka rak lo sim. Atu khalah ṭap phahin ka lo sim a si. ¹⁹ Cupawlih cemnak cu siatralnak a si. An pathian cu an pumpi a si ih, ningzahthlak thil an tuah mi ah an tluangkhawng. Leilung thilpawl ruattu an si. ²⁰ Asinan kannih cu vancungram mi sinak kan nei. Cui hmun ihsi a ra ding mi rundamtu, Bawipa Jesu Khrih cu kan hngak a si. ²¹ Khrih cun a santlailo zet mi kan taksa hi a ropi mi amai taksa vekih an can theinak dingah a thleng ding. Cu mi tuahnak ah ziangtinkim a thu hnuaiih ret theinak huham kha a hmang ding.

¹ Curuangah, ka duhdawt mi le ka ngai mi u le nau pawl, ka lungawinak le ka lallukhum, ka duhdawt mi tla, cutivek cun Bawipa ah dinghnget uh. ² Bawipa ah ruahnaklungthin bangrep pu dingin Zudias ka ngen ih, Sinṭakhe khal ka ngen. ³ Cun, ka kawn phurhpi diktak, nang khal, khai nunaupawl kha rak bawm dingin ka lo ngen a si. Annih cun Klemen le a dang ka hnaṭuanpi nunnak cazual sungih an hmin ngan mipawl thawn thuthangṭha ah in ṭuanpi a si. ⁴ Bawipa ah lungawi ringring uh, ka simsal ding, lungawi uh! ⁵ Nan tlaitluanzia cu mi hmuahhmuah in thei hai seh. Bawipa cu a nai a si. ⁶ Ziang thu hmanah dawnhar hlah uh, asinan ziangkimah thla cam le dil in, lungawithu simnak thawn nan dilnakpawl cu Pathian hnenah theihter uh. ⁷ Cule, milai ih theihthiam ban lo mi Pathian-ih hnangamdaihnak cun nan thinlung le ruahnaklungthin tla cu Khrih Jesu ah a lo kilsak ding. ⁸ Anetnakah, u le nau tla, a dik mi thil ziangkhal, upat tlak mi thil ziangkhal, a dingfel mi thil ziangkhal, a thianghlim mi thil ziangkhal, a duhnung mi thil ziangkhal, a thangmawi mi thil ziangkhal; tlinnak ziangtal simaw, thangṭhat tlak ziangtal simaw a um a si ah cun cuipawl cu ruat uh. ⁹ Cui thilpawl, keimah ih nan zir mi le nan cohlan mi, hna ih nan theih mi le nan hmuh mipawl kha tuah uh. Cule hnangamdaihnak Pathian in a lo umpi ding. ¹⁰ Sikhalsehla in kilkhawinak cu can reipi hnu, atu ah nan run tuah tharsal ruangah Bawipa ah nasazetin ka lung a awi; cumi cu nan rak ngaihsak zet nan tikcucan remcang nan rak hmu lo men a si. ¹¹ Ka tlaksam ruangah hi thu sim ka si lo. Ziangahtile, kei cu ziangvek dinhmun ih ka um khalah, cu mi ih lungkim tawkdan ka rak zir zo. ¹² Tlawm zetih umdan ka thiam ih, lian zetih umdan khal ka thiam; hmun tinah le thil ziangkimah tlai le rilrawng ih umdan, lian zetih umdan le tlaksamdan ka zirngah zo. ¹³ Cahnak i petu Khrih thawngin ziangkim ka tuah thei. ¹⁴ Cuti si hman sehla, ka harsatnak in tuarpi ve hi cu thil nan tiṭha a si. ¹⁵ Cule nan hnenih thuthangṭha ka thlenter thawk lai, Masidonia ihsin ka fehsuak laiah khan nanmah siarlo peknak le dawnnak thu ah kawhhran pakhat hmanin in hlawm lo ti cu nanmah Filipi mipawl khalin nan thei. ¹⁶ Ziangahtile, Thessalonika khua khalah nannih in ka ṭul mi hrangah vei khat lawng si loin vei hnih lai in rak kuat. ¹⁷ Thilpek ka hawl ruangah a si lo. Nanmah lamah rah tampi a um theinak ding ka hawl sawn a si. ¹⁸ Sikhalsehla ziangkim ka nei ih, tampi ka nei. Epafrodiṭas hnenih thil nan rak kuat mipawl tla ka rak ngah ih ka daihaw ngah a si. Cupawl cu thil rimthaw, Pathian cohlan tlak le lungawizawng raithawinak a si. ¹⁹ Asinan ka Pathian cun ropitnak ih a lendan zulhin nan ṭul mi hmuahhmuah cu Khrih Jesu zarah a lo pe hai ding. ²⁰ Atu ah kan Pathian le kan Pa hnenah ropitnak cu kumkhua in kumkhua tiang um seh. Amen. ²¹ Khrih Jesu ih mithianghlim hmuahhmuah kha cibai in buksak uh. Ka hnenih a um mi unaupawl in cibai an lo buk. ²² Mithianghlimpawl hmuahhmuah in cibai an lo buk. Ahleicein Kaisar inn ih umpawl in an lo buk a si. ²³ Kan Bawipa Jesu Khrih zangfahnak cu nan zate hnenah um hram seh. Amen.