FILEMON
11 Kei Paul, Khrih Jesu-ih thawngtla le kan unaupa Timothy in, kan duhdawt zet mi le kan hnaṭuanpi Filemon na hnenah le, 2 kan duhdawt mi Afia le kan ralkap ṭuanpi Arkhippas hnenah le na inn ih kawhhran hnenah ca kan lo kuat. 3 Pathian kan Pa le Bawipa Jesu Khrih hnen ihsin zangfahnak le hnangamdaihnak cu nan hnenah um hram seh. 4 Ka thlacamnak ah na hmin sal ringringin, Pathian hnenah lungawithu ka sim ṭheu. 5 Cucu Bawipa Jesu le mithianghlim hmuahhmuahpawl hnenih na duhdawtnak le na zumnak ka hna ih ka theih ruangah a si. 6 Cuti cun Khrih Jesu ah nanmah ih um thil ṭha tinkim theihnak ruangah na zumnak mi na va hlawm tikah hmualnei thei dingin thla ka cam. 7 Ziangahtile, mithianghlimpawlih thinlung sungril cu unaupa, nangmah in na harhtharter ruangah na duhdawtnak ah lungawinak le thlangamnak nasazet kan nei. 8 Curuangah, thil dik ti dingih thu lo pek ding cu Khrih ah ralṭha zet thei si hman ningla, 9 kei Paul, tar zet zo mi, atu khalih Jesu Khrih-ih thawngtla hin duhdawtnak ruangah a ngen in ka lo ngen sawn a si. 10 Ṭemṭawn ka sinak ih ka hrin mi ka fapa Onesimas hrangah ka lo ngen a si. 11 A liam cia mi canah cun na hrangah miṭhahnemlo a si, asinan atu ah cun nang le kei hrangah miṭhahnem a si. 12 Amah cu na hnenah ka rak thlahsal. Curuangah amah cu ka sungmuril vek roriin cohlang hram aw. 13 Amah cu thuthangṭha ih ṭemṭawn ka si sung, nangmah aiawh ih rawng i bawlsak theinak dingah ka hnenih umter ka duh. 14 Sikhalsehla, na ṭhatnak cu ti lo theih lo vek si loin na duhnak hrimhrim ruang sawnah a si theinak dingah na lungkimnak um lo cun zianghman tuah ka duh lo. 15 Reilote sung a lo ṭhennak san hi nang in amah cu a kumkhuaih na neih theinak dingah a si thei men. 16 Sal vek si nawn loin, sal hnakih sangsawnin amah cu cohlang aw. Amah hi ka hrangah duh zet mi unau a si hleice ih, taksa dan ah le Bawipa ah na hrangah ziang tluk duh zet mi a si sinsin pei. 17 Curuangah na hnaṭuanpi pakhat ih i ruat asile, keimah vek roriin amah cu rak cohlang aw. 18 Anih in na parah tuahsual mi, asilole ziang simaw bak mi a neih a si khalle keimai bakah ruat aw. 19 Kei, Paul in himi hi keimai kut roriin ka ngan a si, cumi cu ka rulhsak ding. Sikhalsehla, ka hnenah nangmah rori khalin bak mi na neihzia kha ka lo sim a si lo. 20 A si, unaupa, Bawipa ah na hnen ihsin lungawinak i neihter aw la, Bawipa ah ka thinlung muril harhtharter aw. 21 Ka thu na ngai ding ti zumhngehnak ka neih ruangah na hnenah hiti hin ka run ngan a si. Ka sim mi hnakih nasasawnin na tuah ding ti khal ka thei. 22 Cule, cennak ding hmun khal in rak timlamsak aw, ziangahtile nan thlacamnak zarah nan hnenah ka ra thei ding tiah ruahsannak ka nei. 23 Khrih Jesu ih ka thawngtlakpi Epafras in cibai a lo buk. 24 Ka hnaṭuanpi Mark, Aristarkhas, Demas le Luke tlain cibai an lo buk. 25 Kan Bawipa Jesu Khrih-ih zangfahnak cu na thlarau hnenah um hram seh. Amen.