MARK

MARK

¹ Hihi Pathian Fapa Jesu Khrih-ih thuthangṭha hramthawhnak a si. ² Profetpawlih cazual sungah, “Ngai hnik, na hmaiah ka palai ka thlah ding. Anih cun na hmaiah na lamzin a lo sialsak ding. ³ “Ramṭhing ih mi pakhat au aw cun, ‘ BAWIPAI hrangah lamzin sial uh, a zinpawl kha dingter uh,’ ” tiin ngan a si. ⁴ John cu a ra suak ih, ramṭhing ah baptisma a pe ih, sual ngaidamnak ding hrangah sualsirnak baptisma thu a sim. ⁵ Judia peng ih um mipawl hmuahhmuah le Jerusalem khua ih um mipawl cu a hnenah ra in an sualnakpawl tla an phuang ih, John in an zaten Jordan tiva ah baptisma a pe hai. ⁶ John cu kalauk hmulih tah mi hnipuan a hruh, a tai ah savun taikhap a khap ih, kharbawk sa le hramlak khuaitizu a ei. ⁷ Cule, “Ka dungih a ra mi pa hi kei hnakin a nasasawn. Kei cu kun tahratih a kedam hri phawihsaktu ding hmanah ka tlak lo. ⁸ Kei cun ti ah baptisma ka lo pe; asinan, anih cun Thlarau Thianghlim ah baptisma a lo pe ding,” tiah thu a sim. ⁹ Cule hiti hi a si, cu laiah Galili peng Nazareth khua ihsin Jesu cu John umnak ah a feh ih, John in Jordan tiva ah baptisma a pe. ¹⁰ Cule Jesu kha ti sung ihsin a hung suah veten John in vanpawl awngaw in le Thlarau cu thuro bangin Jesu parih a rung ṭum kha a hmu. ¹¹ Van ihsin aw pakhat in, “Nang cu ka duhdawt zet mi ka Fapa na si, na parah ka lung a awi zet,” tiah a ti. ¹² Cu veten Thlarau in Jesu cu ramṭhing ah a fehter ih, ¹³ cu tawkah ni sawmli a um ih, Setan in sual a fawrh. Sahrangpawl lakah a um. Cui hnuah vancungmipawl in an rung tuamhlawm. ¹⁴ John thawngthlak a si hnuah Jesu cu Galili ah a feh ih, Pathian uknak thuthangṭha a sim. ¹⁵ “A tikcucan a kim zo a si. Pathian uknak cu a nai zo. Nan sual sir uh la thuthangṭha cu zum uh,” tiah a ti. ¹⁶ Galili Tili kapih a feh laiah Simon le a naupa Andru cu tili sungih sur an vawrh rero lai kha a hmu, ziangahtile annih cu ngakaitu an si. ¹⁷ Cule Jesu in an hnenah, “I thlun uh la, minung kaitu ah ka lo tuah ding,” tiah a ti. ¹⁸ Cule an surpawl cu hmakhatteah an tanta ih, amah cu an thlun. ¹⁹ Malte hladeuh an feh hnuah Zebedi-ih fapa James le a naupa John kha lawng sungah an surpawl an thawlh rero lai cu a hei hmu. ²⁰ Jesu in a hmuh veten a ko hai ih, an pa Zebedi cu lawng sungah an hlawhfapawl thawn an tanta ih, a dung an thlun cih. ²¹ Cule Jesu le a dungthluntupawl cu Kapernaum khua ah an feh. Sabbath Ni ah sinakok ah Jesu cu a lut lohli ih, thu a zirh. ²² A thu zirh mi in an mang a bangter zet, ziangahtile Danzirhtupawl vekin zirh loin, thuneitu pakhat vekih a zirh ruangah a si. ²³ An sinakok sungah cun thlarau bawrhhlawh nei pa a um ih, cu pa cun, ²⁴ “Ha! Nazareth Jesu, kanmah ten um nung, nang le kannih ziang so tiawk ding kan neih? Kanmah siatsuah dingah maw na rat? Zo na si ti ka lo thei, nang cu Pathian-ih Mi Thianghlim Pa na si,” tiah a ti. ²⁵ Cule Jesu in a kawk ih, “Daiten um, a sung ihsin suak aw,” tiah a ti. ²⁶ Thlarau bawrhhlawh in cu pa cu nasazetin a caihter ih, ring zetin a au ruangro hnuah a sung ihsin a suak. ²⁷ Cule an zaten an mang a bang ih, pakhat le pakhat thu an sutaw, “Hivek thil cu ziang a si? Ziangvek zirhnak thar so a si? Ziangahtile, thlarau bawrhhlawhpawl hman thuneihnak thawn thu a pe ih an lung,” tiah an ti. ²⁸ Hmakhatteah Jesui thuhla cu Galili peng khaw zakipah a thang. ²⁹ Sinakok ihsin an suah veten Simon le Andru tei inn ah James le John tla thawn an lut. ³⁰ Cule Simon nupi-ih nu kha khawsik nat tuar in a it. Cui thu cu Jesu an sim lohli. ³¹ Jesu cu a hnen lam panin a feh ih, a kut in a kai ih a thawhter. Cule a khawsik nat cu a reh lohli ih, anmah a rian hai. ³² Ni a tla ih, zan lam a thlen tikah mina hmuahhmuah le khawsia pawlh mipawl tla cu a hnenah an run hruai. ³³ An khawsen in cui inn sangka kiangah an ra pumkhawmaw. ³⁴ Cule Jesu in nat phunphun a tuartupawl a damter ih, khawsia tampi a dawisuak. Khawsepawl in amah kha zo a si ti an theih ruangah an ṭawng ding a siang hai lo. ³⁵ Jesu cu khawvang hlan zing zetah a tho ih, ramṭhing ah feh in thla a cam. ³⁶ Cule Simon le a umpipawl in Jesu cu an hawl. ³⁷ An va hmuh tikah, “Mi hmuahhmuah in an lo hawl sokhaw,” tiah an sim. ³⁸ Cule Jesu in, “An hnen khalih thu ka sim thei venak dingah, hi kiangkap khuapawl khalah feh uhsi. Ziangahtile, cucu ka ratsan mi a si,” tiah a ti. ³⁹ Galili peng hmuahhmuah ih an sinakokpawl ah thu a sim ih, khawsepawl a dawisuak. ⁴⁰ Miphar pakhat Jesui hnenah a ra ih a khukbil in, “Na duh ah cun i thiangter thei,” tiah bawmnak a dil. ⁴¹ Jesu cun a lainat zet ih a kut suah in a hei tham. Cu pai hnenah, “Ka duh a si, thiang aw,” tiah a ti. ⁴² A ṭawng ṭheh hnu hmakhatteah a phar nat cu a hlo ih, a thiang. ⁴³ Jesu in khoh zetin ralrinnak a pek hnuah a fehter lohli. ⁴⁴ Jesu in a hnenah, “Zo hnen hmanah hi thu hi va sim hlah. Curuangah, va feh vurvo aw la, puithiam hnenah na taksa va hmuhawaw. Na thian zo ruangah Mawsi-ih thupek vekin thilhlan va pe aw. Cucu na dam zo ti mipi ih an lo theihpinak a si ding,” tiah a ti. ⁴⁵ Asinan, cu pa cu a feh ih a damnak thu cu nasazetin a than vivo ruangah Jesu cu khaw sungah langhnganin a lut thei nawn lo. Khaw leng ramṭhing sawnah a um ih, cu tawkah hmun kip ihsin mi in an ra pan.

¹ Ni tawkfang a rei hnuah Jesu cu Kapernaum khua ah a lutsal ih, inn ah a um ti thawm mi in an thei. ² Hmakhatteah mi tampi an pumkhawmaw ih, sangka kiang tiang hman an khat ṭheh. Cule Jesu in an hnenah thu a sim. ³ Mi hrekkhat Jesu hnenah an feh ih, mi pali in mizengpa pakhat an run zawn. ⁴ Mi burpi ruangah a hnen an va naih thei lo tikah Jesui umnak tlun zawn inn tlun khuh kha an ṭhawn ih an boh. An boh ṭheh in mizengpa cu a ihphah thawn an vun thlak. ⁵ Jesu in an zumnak a hmuh tikah mizengpai hnenah, “Ka fapa, na sualpawl tla ngaidam ṭheh a si zo,” tiah a ti. ⁶ Cu tawk hmun ih Danzirhtu hrekkhat tokhawmpawl in an thinlung sungten, ⁷ “Ziangruangah hi pa hin hitivekin Pathian a thangsiat? Pathian lawng in sual a ngaidam thei a si lo maw?” tiah an ti. ⁸ Cule hmakhatteah Jesu cun a thlarau in an thinlung sungten hivekin thusuhnak an nei rero ti a thei ih an hnenah, “Ziangah nan thinlung sungten hivekih thu nan suh rero? ⁹ Hi mizengpai hnenah, ‘Na sualpawl tla ngaidam ṭheh a si zo,’ ti maw ‘Tho aw la, na ihphah la in feh aw,’ ti a awl sawn? ¹⁰ Sikhalsehla Minung Fapa in leitlun ah sualpawl ngaidam theinak thuneihnak a nei a si ti nan theihnak dingah hihi tuah a si,” tiah a ti. Cu ṭheh in mizengpai hnenah, ¹¹ “Na hnenah ka lo sim a si, tho aw, na ihphah la aw la, na inn ah tlung aw,” a ti. ¹² Cu veten mizengpa cu a tho lohli. A ihphah cu a la ih, an zate hmaiah a fehsuak. Curuangah an zaten an mang a bang tuk. Pathian an thangṭhat ih, “Hivek thil cu kan hmu dah lo,” tiah an ti. ¹³ Cule Jesu cu tili kapah a va fehsal. Mipi zaten a hnenah an ra ih, thu a zirh hai. ¹⁴ A feh phahin Alfias-ih fapa Levi cu a siahkhawnnak buk ih a to lai kha a hei hmu. Cule Jesu in a hnenah, “I thlun aw,” tiah a ti. Levi cu a pawk ih, Jesu cu a thlun. ¹⁵ Cule hiti hi a si, Jesu cu Levi inn ah rawl ei dingin a to. Cule siahkhawngtu tampi le misualpawl khal Jesu le a dungthluntupawl hnenah an to ve. Cui mi tampipawl cun Jesu an thlun cih. ¹⁶ Danzirhtupawl le Farasipawl in Jesu cu siahkhawngtupawl le misualpawl thawi rawl an eikhawm lai cu an hmuh tikah a dungthluntupawl hnenah, “Ziangruangah Jesu cu siahkhawngtupawl le misualpawl thawn rawl an ei in an in tlang,” tiah an ti. ¹⁷ Jesu in a theih hai tikah an hnenah, “Miharhdampawl in sibawi an ṭul lo, minapawl lawng in an ṭul. Midingfelpawl ko dingin ka ra lo, misualpawl an sual sir dingih ko dingah ka ra sawn,” tiah a ti. ¹⁸ John-ih dungthluntupawl le Farasipawlih dungthluntupawl cu rawl an ul ṭheu. Mi hrekkhat Jesui hnenah an ra ih, “John-ih dungthluntupawl le Farasipawlih dungthluntupawl cu rawl an ul nan, ziangruangah nangih dungthluntupawl hmuah rawl an ulh ve lo?” tiah an ti. ¹⁹ Jesu in an hnenah, “Mo neitupa an hnenih a um laiah mo lawmtupawl cun rawl an ul thei ding maw? Mo neitupa an hnenih a um sung hmuah cu rawl an ul thei lo ding. ²⁰ Asinan, an hnen ihsin mo neitupa lakhlohsak ni a thleng leh ding. Cu tikah rawl an ul leh ding. ²¹ Zohman in a cawm thei mi puanthan thar belcawng cu hnipuan hlun parah an belh kel lo, an belh asile a thar in a hlun cu a dir ding ih a tlek mi cu a kau sinsin ding. ²² Cun, zohman in sabitti thar kha savun thawl hlun sungah an thun kel lo, an thun asile sabitti thar in savun thawl hlun cu a kekter ding. Cule sabitti cu a dawk ding ih savun thawl hlun khal cu a siat ding. Sabitti thar cu savun thawl thar sungih thun tengteng ding a si,” tiah a ti. ²³ Cule hiti hi a si, cui hnuah Jesu cu Sabbath Ni ah sangvut lo lakin a feh. A dungthluntupawl in an feh phahin sangvut vui an zut phah. ²⁴ Cule Farasipawl in Jesui hnenah, “Zoh hnik, ziangruangah Dan in Sabbath Ni ih tuah a sian lo mi cu an tuah?” tiah an ti. ²⁵ Cule Jesu in an hnenah, “David in a mipawl thawn ei ding zianghman nei loin an ril a rawn laiah ziang a tuah ti teh nan siar dah lo maw si? ²⁶ Abiathar puithiam lubik a si laiah David cu Pathian inn sungah a lut ih, sangserh cu a ei. Cui sang cu Dan in puithiampawl lawng ei dingih a sian mi a si. David cun a thluntupawl khal cui sang hrekkhat cu a pe ve,” tiah a ti. ²⁷ Cu ṭheh in Jesu in an hnenah, “Pathian in minung hrangah Sabbath Ni cu a tuah ih, minung cu Sabbath Ni hrangah a tuah lo. ²⁸ Curuangah, Minung Fapa cu Sabbath tlun khalah Lal a si,” tiah a ti.

¹ Jesu cu sinakok sungah a lutsal. Cu tawkah a kut a ro mi pa pakhat a rak um. ² Jesu kha sual an puh theinak dingah Sabbath Ni ah cu pa a damter maw, damter lo tiah ṭhaten mi hrekkhatpawl in an zoh. ³ Kutropai hnenah Jesu in, “Ding aw la, mipi hmaiah hin ra suak hnik,” tiah a ti. ⁴ Cule Jesu in an hnenah, “Dan in Sabbath Ni ah thil ṭha tuah maw, thil sia tuah in siang? Mi nunnak runsuah ding maw, thah ding in siang?” tiah a sut hai. Asinan dai ṭhepṭhepin an um. ⁵ Cule, thinheng in a kiangkap mipipawl a zoh vivo hai. An lung a ruh tuk ruangah a riah khal a sia. Cu pai hnenah cun, “Na kut hawi hnik,” tiah a ti. A kut cu a hun hawi ih khatlam vekin a dam. ⁶ Cule Farasipawl cu an suak lohli ih, Herod-ih milaipawl thawn Jesu thah theinak ding thu an rawnawkhawm. ⁷ Cule Jesu cu a dungthluntupawl thawn tili lamah an va feh. Galili peng le Judia peng ihsin mipi tam zetin Jesu cu an thlun. ⁸ Thil ropi a tuah mipawl an theih tikah Jerusalem le Idumia peng le Jordan tiva ralkhat lam ram le Taiar khua le Sidon khaw kiangkap rampawl ihsin mipi tam zet a hnenah an ra. ⁹ Mipi an tam tuk lawmmam ruangah amah an pahlonak dingah a hrangah lawng fa te pakhat timtuah cia dingin a dungthluntupawl a fial. ¹⁰ Mi tampi a damter ruangah natnak nei mi tampi cun amah thamngah dingin an engaw ciamco. ¹¹ Thlarau bawrhhlawhpawl in Jesu an hmuh tikah a hmaiah an kun ih, “Nang cu Pathian Fapa na si,” tin an au. ¹² Cupawl hnenah amah kha zo a si ti midang sim lo dingin khoh zetin thu a pe hai. ¹³ Cule tlang parah a kai ih a hnenah a mi duh mi vial a ko ih a hnenah cun an ra. ¹⁴ A hnenih um dingah le thusim dingih a thlah theinak dingah, mi hleihnih a ruat hai, ¹⁵ natnakpawl damter theinak le khawsepawl dawisuak theinak thuneihnak nei ding khalah a si. ¹⁶ Cupawl tla cu, Peter tiih hmin dang a pek mi pa Simon, ¹⁷ Zebedi-ih fapa James le a naupa John, cute unau cu Buanekes tiin hmin dang a pek hai. A tican cu, “Khawri Fatetla,” tinak a si. ¹⁸ Andru le Filip, Bartholomeo, Mathai, Thomas, Alfias-ih fapa James, Thaddias, Kanaan mi Simon, ¹⁹ Jesu phiarsawmtu Judas Iskariot tla an si. ²⁰ Cule Jesu cu inn sungah a lut. Mipi tam zet an ra pumkhawmsal rero ruangah Jesu le a dungthluntupawl cu rawl hman an ei thiam lo. ²¹ Cui thu cu a sungtepawl in an theih tikah, mi in, “Jesu cu a aa zo,” tiah an ti fawn ruangah amah hruai dingin a hnenah an ra. ²² Jerusalem ihsin Danzirhtupawl an ra ih, “Hi pa hi Beelzabub ih pawlh mi a si ih, khawsepawlih lal thawngin khawsepawl a dawisuak a si hi!” tiah an ti. ²³ Jesu in a hnenah a ko hai ih, tahṭhimnak hmang in a zirh hai, “Ziangtin Setan in Setan lala a dawisuak thei ding? ²⁴ Ram pakhat cu ṭhenaw in amah le amah a doawk asile, cui ram cu a dingsuak thei lo ding. ²⁵ Insang pakhat cu ṭhenaw in anmah le anmah an doawk asile cui insang cu a dingsuak thei lo ding. ²⁶ Cun Setan cu amah le amah doaw in a ṭhenawk asile a dingsuak thei lo ding ih, a cemral ding. ²⁷ Thungaiten, micakpa cu ṭembet hmaisak a si lo ah cun zohman in a inn sungah lut in a thilri an laksak thei lo ding. An ṭembet hnu lawngah a inn sungih a thilri an laksak thei ding. ²⁸ Thungai thu ka lo sim, minungpawlih sualnak hmuah le ziangvek thangsiatnak an ṭawng mi khal ngaidam a si ding. Pathian an thangsiat tik khalah ngaidam an si ding. ²⁹ Asinan, Thlarau Thianghlim a thangsiattu cu ngaidam a si dah lo ding. Cu pa cu kumkhua hrem dingah a tlak a si,” tiah Jesu in a ti. ³⁰ Ziangah Jesu in cutin a ti tile, “Thlarau bawrhhlawh a sungah a lut an ti ruangah,” a si. ³¹ Cule a naupalepawl le a nu cu an ra. Inn leng ah an ding ih, Jesu vung ko dingin mi an thlah. ³² A kiangkapah cun mi tampi an to. Cule, “Zoh hnik, na nu le na naupalepawl leng ah nangmah lo hmuh duh in an um,” tiah an ti. ³³ Cule anih in an hnenah, “Ka nu cu zo a si ih, ka naupale cu zo an si?” tiah a sang hai. ³⁴ Cun, a kiangkapih a totu mipipawl kha a zoh hai ih, “Ngai hnik uh, hipawl hi ka nu le ka naupale tla an si. ³⁵ Ziangahtile, zokhal Pathian duhzawng a tuahtu cu ka naupa, ka farnu le ka nu an si,” tiah a ti.

¹ Cule, Jesu cu tili kapah thuzirh a thawksal. A hnenih a ra suakkhawm mi minung an tam tuk ruangah lawng sungah a lut ih a to. Lawng cu ti parah a um ih, mipi zaten tili kapah an um. ² Cule, tahṭhimnakpawl hmang in thu tampi a zirh. A zirhnak ah cun an hnenah, ³ “Ngai hnik uh, zoh hnik uh, thlaici vawrhtu cu thlaici vawrh dingin a fehsuak. ⁴ Cule, hiti hin thil a cang, thlaici a vawrh tikah a hrekkhat cu lamzin kap tluanah an tla ih, van ih vatepawl in an ra cuk thluh. ⁵ Cun, a hrekkhat cu lung tampi umnak hmun lei se dap ah an tla, lei a sah lo ruangah thlaici cu an keuh lohli. ⁶ Asinan, ni a hung sat tikah thlai ṭopawl cu ni sa in a em hai ih, hram an neih lo ruangah an ro ṭheh. ⁷ Cun a hrekkhat cu hlingrul lakah an tla. Hlingrul an ṭhan tikah thlai kung cu an dip ih rah an suah lo. ⁸ Cun, a dang cu leiram ṭha ah an tla. An ṭhang ih, an karh ih rah an suah. A hrek cu a let sawmthum, a hrek cu a let sawmruk, a hrek cu a let zakhat tiangin rah an suah,” tiah a sim. ⁹ Cule an hnenah, “Theih theinak hna a neitu cun thei seh!” tiah a ti. ¹⁰ Cule Jesu amah lawng a um laiah a kiangih umtupawl le a dungthluntu hleihnihpawl in a tahṭhimnak thupawl cu an sut. ¹¹ Cule anih in an hnenah, “Pathian uknak thu thawn pehparawin thuthuppawl theih theinak Pathian in a lo pe zo. Asinan leng lam mipawl hrangah cun ziangkim tahṭhimnak in a tang lai a si. ¹² “An hmu nan an theithiam lo. Hna cun an thei rero ko nan an theithiam lo. Cuti si lo sehla an thinlung an thleng ding ih, an sualnakpawl ka ngaidam ding. Cuvekih cang dingin tahṭhimnak in ka sim a si,” tiah a ti. ¹³ Cule anih in an hnenah, “Hi tahṭhimnak thu hi nan theithiam lo maw si? Hiti cun ziangtin tahṭhimnak hmuahhmuah cu nan theihthiam thei ding? ¹⁴ Thlaici vawrhtu in Pathian thu a vawrh. ¹⁵ Mi hrekkhat cu lamzin kap tluanih a tla mi thlaici vek an si. Pathian thu an theih tikah Setan a ra lohli ih an thinlung sungih vawrh mi Pathian thu cu a laksak. ¹⁶ Cuvekin mi hrekkhat cu lei se dap lungto tamnak hmun ih a tla mi thlaici vek an si. Pathian thu an theih veten lungawi zetin an cohlang. ¹⁷ Asinan anmah ah hram an neih lo ruangah can reilote sung lawng an daih. Pathian thu ruangih harsatnak le hremnak a um tikah an tlu lohli. ¹⁸ Mi hrekkhat cu hlingrul lakih a tla mi thlaici vek an si. Pathian thu cu an ngaithla. ¹⁹ Asinan tulai khawvel nuntukhawsaknak thuih dawnharnak, lennakih bumnak le tisa cakhiarnak ra lut mipawl tlain Pathian thu cu an zap ruangah rah nei lo ah a cang. ²⁰ Midang cu leiram ṭhatnak ih a tla mi thlaici vek an si. Pathian thu an ngaithla, an cohlang ih rah an rah. Mi hrekkhat cu a let sawmthum, mi hrekkhat cu a let sawmruk, mi hrekkhat cu a let zakhat rah an suah,” tiah a ti. ²¹ Cule anih in an hnenah, “Meito cu kho hnuaiah simaw, ihkhun hnuaiah simaw ret dingin nan keng dah maw? Meito vannak parah nan ret a si lo maw? ²² Ziangahtile, lang leh lo dingih thuh mi zianghman a um lo. A thupih thil cang mi hmuahhmuah khal phuan ṭheh a si ding. ²³ Theih theinak hna a neitu in thei hai seh,” tiah a ti. ²⁴ Cule an hnenah, “Nan hna ih nan theih mi thu kha va ralring uh. Mi na tahnak khan tah na si ve ding. A theitu nannih cu tamsin ih pek nan si ding. ²⁵ Ziangahtile, a neitu zokhal pek a si ding ih, tam sinsinin a nei ding. Asinan a neilotu cu a neihsun hman laksak a si ding,” tiah a ti hai. ²⁶ Cule anih in, “Pathian uknak cu hivek hi a si. Mi pakhat in lei ah thlaici a vawrh. ²⁷ Amah cu zan ah it in le sun ah tho in a um. Thlaici cu amah ten a keuh ih a ṭhang, ziangtin cuvekin a cang ti khal a thei lo. ²⁸ Ziangahtile, leilung in amahte rah a suah. A hmaisabikah hnah no a suah, cui hnuah a vui ih, cule fang a hun nei. ²⁹ A fang a cut tikah fang ah can a cu thlang ih fang ahnak favah thawn a at lohli,” tiah a ti. ³⁰ Cule anih in, “Pathian uknak cu ziang thawn kan khaikhin ding? Asilole khaikhinnak dingah ziang tahṭhimnak so kan lo sim ding? ³¹ Leilung ih na vawrh mi anṭam ci vek a si. Cumi cu leilung ih na vawrh mi thlaici hmuahhmuah lakih a fatebik mi a si. ³² Na vawrh hnuah a ṭo ih a ṭhang. Hanghnah hangrah dang hmuahhmuah hnakin a tumsawn. Hngeṭek tumpi pi tla a nei ih, cui zar hnem ah tlunzuang vate tla an riak thei,” tiah a ti. ³³ An theihthiam ding tawkte hivek tahṭhimnak tla hmang in Jesu in an hnenah thu a sim. ³⁴ Asinan, tahṭhimnak tel loin mipi hnenah thu zianghman a sim lo. Jesu le a dungthluntupawl cu anmahte lawng an um tikah thil ziangkim an hnenah a simfiang. ³⁵ Cui ni khua a thim tikah an hnenah, “Tili khatlam ralah feh uhsi,” tiah a ti hai. ³⁶ Mipi an tlunter hnuah zianghman tuah nawn loin Jesu cu lawng in an fehpi lohli. Cu tawkah lawng fa te dangpawl khal an um ve. ³⁷ Cule thlipi nasazetin a hrang ciamco ih, tisuar cun lawng sungah ti a theh lut ruangah lawng cu ti in a khat. ³⁸ Cun, Jesu cu lawng mei lamah lukham kham in a itthat. An va ṭhang ih, “Zirhtupa, kan pilhlo thluh ding, pawi na ti lo maw?” tiah an ti. ³⁹ An va ṭhang hnuah thli cu a kawk ih, tipi hnenah cun, “Daiten um, dai aw,” tiah a ti. Cule thlipi cu a reh ih, tipi khal a dai depdep. ⁴⁰ Cun, a dungthluntupawl cu, “Ziangah cu tluk lawmmamih nan ṭih? Ziangtin zumnak nan va nei lo ve?” tiah a ti. ⁴¹ Cule an ṭih tuk lawmmam ih pakhat le pakhat, “Hi pa hi ziangvek minung so a si? Thlipi le tipi hmanin a thu an lun hi!” tiah an tiaw.

¹ Cule tili ralkhat lam Gadara ram an va thleng. ² Jesu cu lawng sung ihsin a suah tikah thlarau bawrhhlawh ih pawlh mi pa pakhat thlan hmun ihsin a ra suak lohli ih, Jesu a ra tawng. ³ Cu pa cu thlan ih um a si ih, zohman in an ṭembet thei lo. Cikcin khalin ṭembet theih a si lo. ⁴ Vei tampi ke hrennak le thir cikcinpawl tlain an hreng ṭheu nan cikcin tla cu a catter ih, ke hrennakpawl khal a boh ṭheh. Zohman in ngawingam ko an tuah thei lo. ⁵ A sun a zan in tlang lak le thlan ah a um ih, a aukio ih amah le amah lungto in a ataw. ⁶ Asinan, hlaral ihsin Jesu a hmuh tikah a va tlan ih a hmaiah a bawkkhup. ⁷ Cule ring zetin, “Nang cu cungnungbik Pathian Fapa, Jesu na si. Nang thawn ziang tiawk ding so kan neih? Pathian hmin in ka lo dil a si, i hrem hram hlah aw,” tiah a au. ⁸ Cutiih a aunak cu Jesu in, “Nang thlarau bawrhhlawh, hi pai sung ihsin suak aw,” tiah a rak ti zo ruangah a si. ⁹ Cule Jesu in, “Na hmin zo a si,” tiah a sut. Cu pa cun, “Ka hmin cu Lizon a si, ziangahtile, mi tampi kan si,” tiah a sawn. ¹⁰ Cule khawse bawrhhlawhpawl cu cui ram ihsin dawisuak lo dingin cu pa cun nasazetin Jesu a dil. ¹¹ Culai fangah cu tawk kiang tlang parah vawk rual tampi cu rawl an ei rero. ¹² Cule khawsepawl hmuahhmuah in Jesui hnenah, “An sungih kan luh theinak ding hrangah vawk rual hnenah in kuat hram aw,” tiah an dil. ¹³ Jesu in khawsepawl cu vawk sungih luh a sen lohli hai. Cule thlarau bawrhhlawhpawl cu cu pai sung ihsin an suak ih, vawk rual sungah an lut. Cui vawk rual tla cu khamhrap ihsin an tlanthla ih, tili sungah an pilhlo ṭheh. An zaten thawnghnih hrawng an si. ¹⁴ Vawk kiltupawl cu an tlan ih, cui thuhla cu khawpi ah le khawte ah an than ciamco. Thil cang mi zoh dingah mipi an va feh. ¹⁵ Jesu hnen an va thlen tikah khawsepawl ih an rak pawlh dah mi lizon neitupa cu lungfim le hnipuan hruh ih a to an hmuh tikah an ṭih. ¹⁶ Cule khawse pawlh mi pa parih thil thleng mi a hmutupawl in cui thu cu an than ih, vawk rual thuhla khal an than cih. ¹⁷ Mipipawl in Jesu cu an ram suahsan dingin an dil. ¹⁸ Jesu cu lawng sungih a luh tikah khawsia ih pawlh dah mi pa cun a hnenih um dingin a dil. ¹⁹ Asinan Jesu in a siang lo, “Na sungte hnen le na rualpipawl hnenah va feh aw la, Bawipa in na hrangah ziang tluk thil ropi a lo tuahsak tile ziang tlukin na parah lainatnak a nei ti kha va sim hai sawn aw,” tiah Jesu in a ti. ²⁰ Cule cu pa cu a feh ih, Jesu in a hrangih thil ropi a tuahsak mi thuhla cu Dekapolis ramah a than. Cu tikah mi hmuahhmuah cu an mang a bang ṭheh. ²¹ Jesu cu tili khatlam ralah lawng in a fehsal. Tili kapih a umnak ah mi tampi in an ra pankhawm. ²² Ngai hnik, sinakok uktupawl lakih pakhat Jairas ti mi pa cu a ra ih, Jesu a hmuh tikah a ke hramah a bawkkhup. ²³ Jairas cun nasazetin zangfah a dil, “Ka fanute cu a thi zikte thlang. A dam ih a nun theinak ding hrangah ra hramhram aw la, a parah na kut ra suang aw,” tiah a ti. ²⁴ Cule Jesu cu Jairas hnenah cun a feh. Mipi in Jesu cu an thlun ih an eng phah rero. ²⁵ Cu tawkah cun kum hleihnih sung thiput nat tuar nunau pakhat a rak um. ²⁶ A neih mi hmuahhmuah cem ko in sibawi tampi hnenah a tuamhlawmaw rero zo nan ṭhat lam pan loin a bese deuhdeuh sawn. ²⁷ Cu nu cun Jesu-ih thu a theih tikah mipi lakin Jesui dung ihsin a ra ih a kawrfual a tham. ²⁸ Ziangahtile, a thinlungten, “A kawrfual ka thamngah asile ka dam ding,” tiah a ruat. ²⁹ Cule a thiput cu a reh lohli ih, cui natsia ihsin a dam zo ti khal a taksa in a thei lohli. ³⁰ Cule Jesu in a sung ihsin huham a suak ti cu a theiaw lohli. Mipi lam a hawi ih, “Zo in ka kawrfual a tham?” tiah a ti. ³¹ Cule a dungthluntupawl in, “Mipi hi zat in an lo nawr rerozia cu na hmu ko ih, ziangtin saw, ‘Zo in i tham?’ na ti,” tiah an ti. ³² Cule Jesu cun a thamtunu hmuh tum in a kiangkap a zoh vivo. ³³ Nunaunu cun Jesu in a parah ziang a tuahsak ti a theih ruangah a ṭih ih a rak khur rero. A ra suak ih, Jesui hmaiah bawkkhup in a thuhla diktak cu a sim ṭheh. ³⁴ Cule Jesu in a hnenah, “Ka fanu na zumnak in a lo damter zo a si. Hnangamten va feh aw. Na natsia cu dam lanta seh,” tiah a ti. ³⁵ Cutiih Jesu a ṭawng rero laiah sinakok uktupai inn ihsin mi hrekkhat an ra ih, “Na fanu a thi zo. Ziangah Zirhtupa cu na hnaihnawk duh nawn rero?” tiah sinakok uktupa cu an ra ti. ³⁶ An ṭawng mi cu Jesu in a theih veten sinakok uktu hnenah, “Phang hrimhrim hlah, a zum lawng zum men aw,” tiah a ti. ³⁷ Cule Jesu in Peter, James le James-ih naupa John siarlo midang ih thlun a siang lo. ³⁸ Cun, sinakok uktupai inn a va thleng ih, hnawkbuai culci le mi ṭap le rak reroih an um kha a hmu. ³⁹ Inn sungah a vung lut ih an hnenah, “Ziangah hnawkbuai culci le ṭap ih nan um? Hi nauhaknute hi a thi lopi, a itthat a si,” tiah a ti. ⁴⁰ Cule hmuhsuam nawnin an rak hnihsan men. Asinan an zaten lengih a suahter hnuah nauhaknuih nu le pa le a hruai mipawl thawn nauhaknu an retnak hmun lamah cun an lut. ⁴¹ Nauhaknuih kut cu a kai ih, “Talitha Kumi,” tiah a ti. A tican cu, “Nute tho aw ka lo ti,” tinak a si. ⁴² Cule nauhaknu cu a tho lohli ih a feh. Cu nu cu kum hleihnih mi a si. Inn sungih umtupawl in cu mi an hmuh tikah an mang a bang zet. ⁴³ Cule Jesu in cui thu cu zohman theihter lo dingin thu a pe hai ih, a ei ding rawl pe dingin a fial hai.

¹ Cule cui hmun ihsin Jesu cu a pawksuak ih amai khua a thleng. A dungthluntupawl in an thlun. ² Sabbath Ni a thlen tikah sinakok ah a feh ih, thuzirh a thawk. A thuzirh theitu lakih mi tampi cu an mang a bang zet. “Hi pa hin hivek thil tla hi khui tawkin a ngah a si pei? A hnenih pek mi fimnak hi ziangvek fimnak so a si? A huham ih a tuah mi mangbangzapawl hi ziangvek so maw an si? ³ Amah cu Mary-ih fapa, lettamapa, James le Joses le Judas le Simon pawlih u kha a si lo sawm? A naunulepawl tla cu hi tawk kan hnenah an um a si lo maw?” tiah an ti. Amah ruangah cun an zum thei lo. ⁴ Asinan Jesu in an hnenah, “Profet cu amai khaw mi, a sungkhat le amai insang siarlo cun an upat a si,” tiah a ti. ⁵ Cule cu tawkah midamlo malte parah kut suang ih a damter mi siarlo huham ih tuah mi thil a tuah thei lo. ⁶ An zumlonak ruangah a mang a bang. Cule a kiangkap khuapawl a tlawng ih thu a zirh vivo. ⁷ Dungthluntu hleihnihpawl cu a hnenah a kokhawm hai ih, pahnih pahnih in a thlah thawk. Thlarau bawrhhlawhpawl neh theinak thuneihnak cu an hnenah a pe. ⁸ Cun, an khualtlawnnak ah kianghrawl siarlo zianghman keng lo dingin, khualtlawnnak zal si seh, sang si seh, taiṭawn paisa bawm sungah paisa si seh keng lo dingin, ⁹ asinan kedam cu hruh in, angki lawngte thuah hnih hruh lo dingin thu a pe. ¹⁰ Cule anih in an hnenah, “Khui tawk hmun khalah mi inn ih nan va thlen tikah cuih khua nan suahsan hlanlo nan camnak kel inn ah cam ringring uh. ¹¹ Cun mi zokhal in thlen inn lo awnlotu le nan thu ngaithlalotu an um tikah an khua suahsan uh la nan ke hnuaiih leivut kha anmah dokalhnak theihternak ah thingthlata uh. Thungai thu ka lo sim, Pathian-ih thuṭhen ni ah cun cui khua hnakin Sodom le Gomorrah pawl an tuar a dem sawn ding,” tiah a ti. ¹² Cule dungthluntupawl cu an fehsuak ih, mi an sual sir dingin thu an sim. ¹³ Khawsia tampi an dawisuak ih, mina tampi tla hriak an thih ih an damter. ¹⁴ Jesui hmin a than tuk ruangah Siangpahrang Herod in a thuhla cu a thei ve ih, “Baptisma petu John kha mithi lak ihsin a thawhsal ruangah huham ih tuah mi thilpawl tla amah ah an lang a si hi,” tiah a ti. ¹⁵ Midangpawl in, “Elijah a si,” an ti. Cun, a dangpawl cun, “Profet a si, asilole profetpawl lakih pakhatkhat a bang,” an ti. ¹⁶ Asinan Herod in cui thu a theih ve tikah, “A lu ka tanter mi John a si tengteng ding. Mithi lak ihsin a thosal a si hi,” tiah a ti. ¹⁷ Ziangruangah tile cui canah Herod in a unaupa Filip-ih nupi Herodias cu nupi ah a ṭhit. Herodias ruangah Herod in John kai dingin mi a thlah ih, John cu thawng an thlak ih, thir cikcin in an ṭem. ¹⁸ Cutiih a tuahnak san cu John in Herod hnenah, “Na nau nupi na ṭhit cu Dan in a siang lo,” a rak ti dah zo ruangah a si. ¹⁹ Curuangah Herodias in John cu a mitkem, a hua ih, thah a duh nan thah theinak thuneihnak a nei lo. ²⁰ Ziangahtile, John cu midingfel le mithianghlim a si ti Herod in a theih ruangah a ṭih ih a hum. John-ih thusim a theih tikah thil tampi a tuah ṭheu. John-ih thusim cu lungawi zetin a rak ngai. ²¹ Herod-ih suahcam a hung kim tikah a mizahumpawl, a ralbawipawl le Galili peng mithupibik upapawl cu zanriah ei puai a tuahsak ih, Herodias hrangah tikcu remcang a si. ²² Cule Herodias-ih fanu cu a rung lut ih an hmaiah cun a lam ih, Herod le rawl ei dingih a hnenih to mipawl cu an lung a awi tuk lawmmam. Curuangah, siangpahrang bawipa in falanute hnenah cun, “Na duh mi ziang khal i dil aw la, ka lo pe ding,” tiah a ti. ²³ Cun, a hnenah, “Ziang khal i dil mi poh cu ka lo pe ding. Ka uk mi ram a hrek tiang khal ka lo pe ding,” tiah sesam in thu a kam. ²⁴ Cule cu nu cu a feh ih a nui hnenah, “Ziang ka dil pei?” tiah a sut. A nu in, “Baptisma petu John-ih lu dil aw,” tiah a rak ti. ²⁵ Zamrang zetin siangpahrang umnak ah a lut lohli ih, “Baptisma petu John-ih lu kha kheng in i pe lohli aw la, ka duh,” tiah a dil. ²⁶ Cu cun siangpahrang a riah a siatter zet. Asinan sesam in thu a kam zo ruangah le a rawl kilpipawl ruangah a dil mi cu el a duh lo. ²⁷ Cu veten siangpahrang cun mithattu a thlah ih, John-ih lu rak keng dingin thu a pe. Cule cu pa cun thawnginn ah a va feh ih, John-ih lu cu a tan. ²⁸ Cule a lu cu kheng in a rak keng ih, falanute cu a pe. Falanu cun a nu a pesin. ²⁹ Cule, cui thu cu John-ih dungthluntupawl in an theih tikah an ra ih, a ruak cu an la ih, thlan ah an phum. ³⁰ Cule apostolpawl cu Jesu hnenah an panawkhawm ih, an tuah mi hmuahhmuah le an zirh mi hmuahhmuah cu an sim. ³¹ Cule an hnenah, “Nanmah vial keimah thawn lawng in ramṭhing ah feh uhsi la malte sung tal cawlta uhsi,” tiah a ti. Ziangahtile, mi tampi ra le kir an um ruangah rawl einak can hman an nei lo. ³² Cutin mi zohman umlonak ramṭhing lamah lawng in anmah lawng an feh. ³³ Cule mipi in an pawksuak lai cu an hmu ih, mi tampi in amah a si ti an theithiam. Curuangah khaw kipin an pawksuak ih, ke in an feh ih an tlan. Cule Jesu le a dungthluntupawl an cawlhnak ding hmun cu an thlen khelh. Cule amah an ra pankhawm. ³⁴ Jesu cu lawng sung ihsin a suah tikah mi burpi a hmu. Anmahpawl cu khaltu nei lo tuu rual vek an si ruangah a lainat hai ih, thu tampi zirh a thawk. ³⁵ Khua a hung sim tikah a dungthluntupawl cu Jesui hnenah an ra ih, “Hi hmun hi ramṭhing a si. Khua khal a sim zo. ³⁶ Mipi cu rawl ei ding zianghman an neih lo ruangah hi kiangkap khuapawl ah ei ding rawl an leingah theinak ding hrangah thlah hai aw,” tiah an ti. ³⁷ Asinan anih in, “An ei ding rawl pe uh,” tiah a sang hai. Cule annih in a hnenah, “Dinari zahnih man sang kan lei ding ih, an ei dingah kan pe ding maw?” tiah an ti. ³⁸ Cule anih in an hnenah, “Sang hlawm ziangzat saw nan neih? Feh uh la, va zoh hnik uh,” a ti. An theih tikah, “Sang hlawm nga le nga pahnih kan nei,” tiah an ti. ³⁹ Cule a dungthluntupawl hnenah mipi an zaten hram hring parah a bur a bur ih toter dingin thu a pe. ⁴⁰ Cun mipi cu zakhat bur, sawmnga bur tiin an to. ⁴¹ Cule sang hlawm nga le nga pahnih cu a la ih, van lam a hun zoh ih, lungawithu a sim. Cun sang cu a phel ih, mipipawl hmaiih hung dingah dungthluntupawl cu a pe. Nga pahnih khal cu an zaten a zem. ⁴² Cule an zaten an ei ih an khawp zet. ⁴³ Sang nepnawi le nga nepnawi pawl cu an sar ih, bawmte hleihnih a khat. ⁴⁴ Sang eitu cu patling hlirah thawngnga hrawng an si. ⁴⁵ Cule Jesu in mipipawl a tlunter laiah amai hlanah tili khatlam ral Bethsaida khua ah rak fehsung dingin a dungthluntupawl cu lawng sungah a luhter lohli. ⁴⁶ Cutin mipipawl a thlah hai hnuah tlang parah thla cam dingin a feh. ⁴⁷ Khua a thim tikah lawng cu tili laifangah a um ih, Jesu cu amahte lawngin khawmual ah a um lai. ⁴⁸ Thli kha anmah lamih a hran ruangah a dungthluntupawl in harsa zetin lawng an hlau buai ciamco cu a hei hmu. Zan sentari kil a ṭum litnak ah Jesu cu ti parin anmah lam panin a feh ih a hei lan zikte hai. ⁴⁹ Asinan ti parih a feh kha an hmuh tikah thla ah an ruat ih an au ciamco. ⁵⁰ An zaten an hei hmu ih an ṭih tuk lawmmam. Cu veten an hnenah, “Hnangamten um uh! Keimah sokhaw ka si, ṭih hlah uh,” tiah a ti hai. ⁵¹ Cule an hnenah lawng parah cun a hung kai ih, thlipi cu a reh. Cumi cun an khawruah a harter zet ih, nasazetin an mang a bang. ⁵² An lung a ruh ruangah sang thuhla khal kha an theithiam lo. Curuangah an mang a bang. ⁵³ Tili an tanngah tikah Genesareth ram an thleng ih tili kapah an lawng an hreng. ⁵⁴ Lawng sung ihsin an suah tikah mipi in Jesu cu an theithiam lohli. ⁵⁵ Cule acui ram kiangkappawl hmuahhmuah ah an tlan ih, Jesu a um ti an theihnak hmun poh ah minapawl cu an ihnak thawn an run zawn. ⁵⁶ Khawte ah si seh, khawpi ah si seh, lo ah si seh, Jesu a luhnak kipah minapawl cu dawr hmun ah an rak thlenpi ih a hnipuan zimte tal thamter siang dingin an dil ciamco. Amah a thamtu hmuahhmuah cu an dam ngaingai.

¹ Cule Farasipawl le Danzirhtu hrekkhatpawl cu Jerusalem ihsin a hnenah an ra ih, Jesu cu an kulh vialvial. ² A dungthluntu hrekkhatpawl kut thiang lo piin rawl an ei kha an hmu. A sullam cu an kut ṭhaten an khawlh lo tinak a si. Curuangah Farasipawl cun an mawhthluk. ³ Ziangahtile, Farasipawl le Jew-pawl zaten an pupapawlih thurosiah mi cu kaihnget in an kut an khawlhfai lo asile rawl an ei lo. ⁴ Cun dawr ihsin an ra tlun tikah ṭhaten an hnimpilawkta lo ah cun rawl an ei lo. Cu lo a dang tampi thlun dingih an pawm mi nunphung a um. Cupawl tla cu ṭhatei no, bel le dar bel le ihphah pawl khawlhdan tla an si. ⁵ Cule Farasipawl le Danzirhtupawl in Jesu cu, “Ziangruangah na dungthluntupawl in rawl an ei tikah kan pupapawlih thurosiah vekin an kut an khawlh lo?” tiah an sut. ⁶ Jesu in a sang hai ih, “Nannih midepdepawl, profet Isaiah in nan thuhla a sim tikah a sim dik a si. Hitin a ngan, ‘Hi minungpawl in an hmurka cun in upat. Asinan an thinlung cu ka hnen ihsin a hla zet. ⁷ In biaknak cu alak a si. An thurin zirh mipawl tla cu minungih thupek men an si.’ ⁸ “Ziangahtile, Pathian thupek cu nan tan ih, milai-ih thurosiah mi sawn bel le no khawlhdanpawl cu nan thlun. Cuvek a dang tampi khal nan tuah,” tiah a ti. ⁹ Cule an hnenah, “Nan zirhawksin vivo mi nanmai thurosiah thlun dingah Pathian thupek cu nan hnawng. Cutiih nan tuah tikah thil tiṭha ah nan ruataw. ¹⁰ Mawsi in, ‘Na nu le na pa upat aw,’ a ti. Cun, ‘Zokhal a nu le a pa dodal ih, ṭawngsia a ṭawngtu cu a thi tengteng ding,’ tiah a ti. ¹¹ Asinan nannih cun, ‘Mi pakhat in a pa asilole a nui hnenah, nan ṭhathnempi ding mi ka paisa hi Korban a si. Cucu, Pathian hnenih thilpek a si, a ti ding,’ nan ti. ¹² Cutin cu pa cu a nu le a pa hrangah ziang tuah hman nan siang nawn lo. ¹³ Nan rohawksin vivo mi nan thurosiah hmang in Pathian thu cu zianghmanlo ah nan canter. Cuvekin thil tampi nan tuah,” tiah a ti. ¹⁴ Cule mipi cu a hnenah a ko hai ih an hnenah, “Nan zaten i ngai hnik uh la ka sim ding mi thupawl hi theithiam hnik uh. ¹⁵ Leng lam ihsin sung lamih a lut mi thil in minung hi a bawrhhlawhter thei lo. A sung lam ihsin a ra suak mi in a bawrhhlawhter sawn a si. ¹⁶ Theih theinak hna a neitu cun thei seh,” tiah a ti. ¹⁷ Cule mipi hnen ihsin inn sungah a lut ih, a dungthluntupawl in cui tahṭhimnak thu cu an ra sut. ¹⁸ Cule an hnenah, “Ziangtin saw nannih khalih nan theihthiam lo? Leng lam ihsin ziang thil khal milai sungah lut sehla a bawrhhlawhter thei lo ti nan thei lo maw? ¹⁹ Ziangahtile, rawl cu a thinlung sungah a lut lo ih a pum sungah a lut sawn, cutin dailennak hmun ah hlawnsuah a si. Curuangah rawl hmuahhmuah hi a thiang a si,” tiah a ti. ²⁰ Cule anih in, “Milai sung ihsin a suak mi in milai a bawrhhlawhter. ²¹ Ziangahtile, hi thilpawl cu milai thinlung sung ihsin a suak mi an si, ruahnak ṭha lo, uiretnak, nu le pa sualnak, lai thahnak, ²² rukruknak, duhhamnak, sualralnak, mi bumnak, tenumza hursual tuahnak, iksiknak, ṭawngkam ṭha lo hmang ih mi thangsiatnak, hngalnak le atthlak zetih umnak tla; ²³ hi thil siapawl hmuahhmuah hi milai sung ihsin an suak ih, mi a bawrhhlawhter,” tiah a ti. ²⁴ Cule Jesu cu cu tawk ihsin a pawk ih, Taiar ram le Sidon ram lamah a feh. Inn pakhat sungah a lut ih, zohman in an theih ding a duh lo. Asinan a thupaw thei lo. ²⁵ Nupinu pakhat a fanute thlarau bawrhhlawh nei mi nu in Jesu a um ti a theih ruangah a ra ih, Jesui ke hramah a bawk. ²⁶ Cu nu cu Grik miphun a si ih, a nu in Siria Fonisia ram ih a hrin mi a si. Cu nu cun a fanu sungih khawsia dawisuahsak dingin a dil. ²⁷ Asinan Jesu in a hnenah, “Falepawl in khawp ko ei hmaisa hai seh, ziangahtile falepawlih sang laksak tahrat ih uicopawl pek cu a ṭha lo,” tiah a ti. ²⁸ Asinan cu nu in a hnenah, “A si ko, Bawipa, asinan cabuai hnuaiih uicopawl khalin falepawlih rawl ṭilfuan cu an ei ve a si kha,” tiah a sawn. ²⁹ Cule Jesu in, “Hitiih na ṭawng ruangah, va tlung aw, na fanu sung ihsin khawsia cu a suakhlo zo,” tiah a ti. ³⁰ Cule cu nu cu a inn a va thlen tikah a fanu kha ihkhun parah a rak it ih, khawsia in a suahsan zo ti kha a hmu. ³¹ Cule Jesu cu Taiar ram le Sidon ram cu a suahsansal ih, Dekapolis ram laifang fehtlang in Galili Tili a va thleng. ³² Cule hnaset le ṭawng ṭhiṭha thei lo mi pa pakhat a hnenah an run hruai ih, a parih kut suang dingin an dil. ³³ Cule cu pa cu Jesu in mipi lak ihsin hmun dangah a hruai ih, cu pai hnakua sungah a kutzung hnih a hrawlh ih, a cil a phui ih, a lei a thamsak. ³⁴ Cuisin van lam a hun zoh ih a hrum. Cu pai hnenah cun, “Efata,” tiah a ti. A tican cu, “Vang thlang seh,” tinak a si. ³⁵ Cu veten a hna cu a vang ih, a lei tal dawntu a pawih ih, fiang zetin a ṭawngsuak. ³⁶ Cule zohman sim lo dingin a kham hai. Asinan a kham tam poh le an than tam sinsin. ³⁷ A thiltuah mi cun mipi a mangbangter ngaingai. Cule, “Thil ziangkim hi ṭha tukin a tuah. Hnasetpawl an hna a vangter ih, ṭawng thei lopawl ṭawng thei ko a tuah,” tiah an ti.

¹ Cui canah mipi an tam zet ih, mipipawl in ei ding zianghman an neih lo ruangah Jesu in a dungthluntupawl cu a hnenah a kokhawm ih an hnenah, ² “Mipipawl hi ka hnenah ni thum an um zo. Ei ding zianghman an neih lo ruangah ka lainat tuk hai. ³ Ziangahtile, mi hrekkhat cu hmun hlapi ihsin an ra. Zianghman ei lo ih an inn ih ka tlunter asile lam lakah an va ṭamsawl pang ding,” tiah a ti. ⁴ Cule a dungthluntupawl in a hnenah, “Hivek ramṭhing ah zo in milai hi zat daih khuiah rawl a hawl thei ding,” tiah an sawn. ⁵ Cule Jesu in an hnenah, “Sang hlawm ziangzat nan nei?” tin a sut hai. Cule annih in, “Hlawm sarih,” tiah an ti. ⁶ Mipipawl cu lei parih to dingin thu a pe. Cule sang hlawm sarih cu a la ih, Pathian hnenah lungawithu a sim hnuah a phel ih, mipi hmaiih hung vivo dingah a dungthluntupawl a pe. Annih in mipi hmaiah an hung vivo. ⁷ Nga fate te khal malte an nei. Lungawithu a sim hnuah zem vivo dingin thu a pe. ⁸ Cule an ei ih an khawp zet. A phel mi nepnawi tang mi bawmpi sarih khat an sar. ⁹ A eitu patling hlirah thawngli hrawng an si. Cule annih cu a tlunter hai. ¹⁰ A dungthluntupawl thawn lawng sungah an lut lohli ih, Dalmanutha ram ah an feh. ¹¹ Cule Farasipawl an ra ih, Jesu thu an ra el. Amah hniksaknak ding hrangah van ah hminsinnak langter dingin an duh. ¹² Jesu cu nasazetin a lung sung in a hrum ih, “Ziangah tui san mi tla hin hminsinnak nan duh zet? Thungai thu ka lo sim, tui san mi hnenah Pathian in hminsinnak a pe hrimhrim lo ding,” tiah a ti. ¹³ Cule anmah cu tanta in lawng sungah a lut ih, tili khatlam ralah a feh. ¹⁴ Dungthluntupawl in sang tla ken an hngilh ih, lawng sungah sang hlawm khat lawng an nei. ¹⁵ Cule Jesu in an hnenah, “Farasipawlih thilnu le Herod-ih milaipawlih thilnu kha va ralring uh,” tiah a ti. ¹⁶ Cu tikah annih in, “Sang kan neih lo ruangah a si hi, hitiih in ti,” tiah pakhat le pakhat an tiaw rero. ¹⁷ Jesu in an ṭawng mi a theih tikah an hnenah, “Sang zianghman kan neih lo ruangah a si hi tiah ziangah nan relkhawm rero? Ziangah theifiang lo le theithiam lo ih nan um? Nan thinlung a ruh hrih lai maw? ¹⁸ Mit nei na cingin ziangah nan hmuh lo? Hna nei na cingin ziangah saw nan theih lo? Ziangah nan cing nawn lo? ¹⁹ Sang hlawm nga minung thawngnga hrangih ka phel laiah khan an hlah mi a nepnawi bawmte ziangzat khat nan sar?” tiah a sut hai. Cule annih in, “Bawm hleihnih,” tiah an ti. ²⁰ Cule Jesu in, “Mi thawngli hrangih sang hlawm sarih ka phel laiah kha teh an hlah mi a nepnawi bawmpi ziangzat khat saw nan sar?” tiah a ti. Annih in, “Bawm sarih,” tiah an ti. ²¹ Cule an hnenah, “Ziangtin theithiam loin nan um hrih lai?” tiah a ti. ²² Cule Jesu cu Bethsaida khua ah a feh ih a hnenah mitcawpa pakhat an rak hruai ih tham dingin Jesu an dil. ²³ Anih in mitcawpai kut cu a kai ih, khaw leng ah a hruai. A mit ah cil a phui ih a parah a kut a suang. Cule, “Ziang tal na hmu maw?” tiah a sut. ²⁴ Mitcawpa cun vantau in khua a hun zoh ih, “Minung ka hmu. Asinan thingkung feh rero vek an si,” tiah a ti. ²⁵ Jesu in cu pai mit ah a kut a suangsal ih khua hmu dingin a tuah. A mit cu a vangter ih ziangkim fiang zetin a hmu. ²⁶ Cule Jesu in a inn ah a tlunter ih, “Khaw sungah va lut in khaw sung mi zohman sim hlah,” tiah a ti. ²⁷ Jesu le a dungthluntupawl cu cui hmun suahsan in Sisaria Filipi khawpi kiangkapih khawtepawl an tlawng. Lamzin an feh phahin Jesu in a dungthluntupawl hnenah, “Mi in kei hi zo a si tiah in ti?” tin a sut hai. ²⁸ Annih in, “Mi hrekkhat in baptisma petu John a si an lo ti. Mi hrek in Elijah an lo ti. A dangpawl in profet pakhatkhat a si an lo ti,” tiah an let. ²⁹ Jesu in an hnenah, “Nannih in teh zo in ti?” tiah a sut hai. Peter in, “Nangmah cu Khrih na si,” tiah a sawn. ³⁰ Curuangah Jesu in khoh zetin, “Ka thuhla hi zohman sim hlah uh,” tiah thu a pe hai. ³¹ Cule anih in an hnenah hitin zirh a thawk, “Minung Fapa in thil tampi a tuar ding. Miupapawl le puithiam sangpawl le Danzirhtupawl in an hnawng ding ih an that ding. Ni thum hnuah a thosal ding,” tiah a ti. ³² Cui thu cu langhnganin a sim lawlaw hai. Cule Peter in a dang deuhah a hruai ih, Jesu kawk a thawk. ³³ Jesu cu heraw tahratin a dungthluntupawl cu a zoh ih, Peter cu a kawk, “Setan ka dungah feh aw. Ziangahtile, nang cun Pathian thilpawl thupi ah ruat loin minung thilpawl thupi ah na ruat sawn a si,” tiah a ti. ³⁴ Cule Jesu in mipi le a dungthluntupawl a hnenah a kokhawm ih, “Zokhal keimah i thlun duhtu cun amah le amah elaw in, amai khraws la in i thlun seh. ³⁵ Ziangahtile, zokhal a nunnak humhim a duhtu cun a nunnak a hloh ding. Asinan mi zokhal keimai ruang le thuthangṭha ruangih a nunnak a hlohtu cun a nunnak a humhimngah ding. ³⁶ Mi pakhat in leitlun pumpi hi nei in amai nunnak hloh hnik sehla a hrangah ziang hlawknak a um? ³⁷ A nunnak thlengnak ding hrangah minung in ziang a pe thei ding? ³⁸ Tui san minungpawl hi an uire ih thilsual an tuah. Tui canah mi zokhal in keimah le ka thu a zahpi a si ah cun Minung Fapa a rat tikah a zahpitu cu a zahpi ve ding. A Pai ropitnak le a thianghlim vancungmipawl thawn a ra ding,” tiah a ti.

¹ Cun, Jesu in an hnenah, “Thungai thu ka lo sim, hi tawkih a ding mi, mi hrekkhat cu huham thawn Pathian uknak a ra thlen an hmuh hlanlo thihnak an tep hrimhrim lo ding,” tiah a ti. ² Ni ruk hnuah Jesu in Peter, James le John cu tlang sang parah anmah lawng a hruai hai. An hmaiah a hmuihmel a thleng. ³ A hnipuan tla cu an tleu ih, vur bangin an var, leitlun puan sawptu zohman in cu tluk var in an tuah thei lo ding. ⁴ Cu tikah an hnenah Elijah le Mawsi an runglang ih, Jesu thawn an beaw rero. ⁵ Cule, Peter in Jesui hnenah, “Rabbi, hi tawkih kan um hi a ṭha, thlam pathum in kan sak pei. Na hrangah pakhat, Mawsi hrangah pakhat, Elijah hrangah pakhat,” tiah a let. ⁶ Ziangahtile, an ṭih tuk ih, Peter in ziang ṭawng ding dang a theih lo ruangah a si. ⁷ Cu tikah, mero a rung zam ih a run hliap hai, cule mero lak ihsin aw pakhat in, “Hihi ka duhdawt zet mi ka Fapa a si, a thu ngaithla uh,” tiah a ti. ⁸ Cu veten, an kiangkap an zoh tikah an hnenih um Jesu siarlo zohman an hmu nawn lo. ⁹ Tlang par ihsin an rung ṭum laiah Jesu in, Minung Fapa mithi lak ihsin a thawhsal hlanlo an hmuh mi zohman sim lo dingin thu a pe hai. ¹⁰ Cui a thusim mi cu cing in, “Mithi lak ihsin thawhsal a ti mi cu ziang a si pei,” tiah pakhat le pakhat an sutaw rero. ¹¹ Cule a hnenah, “Ziangruangah Danzirhtupawl in Elijah a ra hmaisa tengteng ding an ti?” tiah an sut. ¹² Jesu in an hnenah a sang hai ih, “Elijah cu a ra hmaisa taktak ding ih, ziang hmuahhmuah a rem ṭhasal thluh ding. Asinan ziangruangah, Cathianghlim sungah Minung Fapa cu thil tampi a tuar ding ih, hnawn a si ding tiah ngan a si? ¹³ Hihi ka lo sim, Elijah cu a ra taktak zo. Profet in a thuhla a sim cia vekin milaipawl in an duhduhin an tuah zo,” tiah a ti. ¹⁴ Dungthluntu dangpawl hnen an thlen tikah mipi tampi in an kulh ih, Danzirhtupawl le dungthluntupawl thu an elawk rero kha a hmu. ¹⁵ Mipi zaten Jesu an hmuh veten an mang a bang zet. A hnenah an va tlan ih, cibai an buk. ¹⁶ Jesu in Danzirhtupawl hnenah, “Anmah thawn ziang thu nan elaw rero?” tiah a sut. ¹⁷ Mipi lak ihsin mi pakhat in a sang ih, “Zirhtupa, khawsia in ṭawng thei lo ih a pawlh mi ka fapa na hnenah ka rak hruai. ¹⁸ Khawsia ih a kaih tinten leilung ah a hlawnaw, a cilbuanra a suak, a hacang a rial ih a ṭawl vivo. Cui khawsia dawisuak dingin na dungthluntupawl hnenah ka sim nan an dawisuak thei lo,” tiah a ti. ¹⁹ Jesu in a sang ih a hnenah, “Maw zumnak nei lo tui san minungpawl, ziangtik tiang saw ka lo zawi ding? Nauhakpa cu ka hnenah rak hruai hnik uh,” tiah a ti. ²⁰ Cule Jesui hnenah an ratpi, khawsia in Jesu a hmuh veten nauhakpa cu a dirhcaih, leilung ah a ril ih a kaa ihsin buanra a suak ciamco. ²¹ Jesu in, “Hitiih a cannak hi ziang tluk a rei zo?” tiah a pa cu a sut. A pa in, “A sentet lai ihsin a si zo. ²² Vei tampi cu khawsia in amah that dingin meisa sungah le tidai sungah a paih ṭheu. Asinan, in bawm dingin thil ziang tal na tuah thei ah cun in lainat hram aw,” tiah a ti. ²³ Jesu in a hnenah, “Na zum thei asile zumtui hrangah cun thil ziangkim a cang thei a si,” tiah a ti. ²⁴ Nauhakpai pa cu a ausuak lohli ih, mitthli thawn, “Bawipa, ka zum a si, ka zumlonak in bawm aw,” tiah a ti. ²⁵ Jesu in mipi an ra tlankhawm kha a hei hmuh tikah thlarau bawrhhlawh cu hitin a kawk, “Nang, ṭawng thei lo le hnaset thlarau, a sung ihsin tlan aw la, ra lutsal nawn hlah, tiah thu ka lo pe,” tiah a ti. ²⁶ Cule thlarau cu a au ih, nauhakpa kha a dirhcaih ih a tlansuak. Nauhakpa cu mithi vek a si ih, mi tampi in, “A thi a si,” tiah an ti. ²⁷ Asinan Jesu in a kut in a vun kaitho ih, a hung ding. ²⁸ Jesu cu inn sungih a luh tikah a dungthluntupawl in athupten, “Ziangruangah kannih hmuah in kan dawisuak thei lo?” tiah an sut. ²⁹ Jesu in, “Thlacamnak le rawlulhnak lo cun hivek khawsia cu dawisuah theih a si lo,” tiah a ti hai. ³⁰ Cu tawk ihsin an pawk ih, Galili peng paltlang in an feh. Jesu in a dungthluntupawl thu a zirh phah ruangah an umnak zohman ih theih ding a duh lo. ³¹ Anih in an hnenah, “Minung Fapa hi mi kut ah pek a si ding ih an that ding, an thah hnu ni thumnak ah a thosal ding,” tiah a ti. ³² Ziang a sim ti an theithiam lo nan an sut ngam lo. ³³ Kapernaum khua a thleng ih inn sungih a um laiah Jesu in an hnenah, “Lamzin tluanah ziang thu nan elaw rero?” tiah a sut hai. ³⁴ Lamzin tluanah zo a thupibik ding ti an elawk ruangah daiten an um. ³⁵ Jesu cu a to ih, dungthluntu hleihnih a ko ih an hnenah, “Zokhal mithupibik si a duhtu cu mitenaubik si hmaisata seh la, mi hmuahhmuah riantu si seh,” tiah a ti. ³⁶ Cule nauhak pakhat a la ih an laifangah a ret. Nauhakpate cu a kut in a cawi ih an hnenah, ³⁷ “Mi zokhal himi nauhakpawl lakih pakhatkhat ka hmin ih a rak cohlangtu cu keimah i cohlangtu a si. Mi zokhal keimah i cohlangtu cu keimah si loin i thlahtu a cohlangtu a si,” tiah a ti. ³⁸ John in Jesui hnenah, “Zirhtupa, kanmah in thlunlotu mi pakhat na hmin in khawse dawisuaktu kan hmu ih, kanmah in thlun lo ruangah kan khamta,” tiah a sang. ³⁹ Asinan Jesu in, “Kham hlah uh, ziangahtile ka hmin ih thilmak a tuahtu cun i relse maimai lo ding. ⁴⁰ Ziangahtile, a lo dolotu cu nan lamṭang a si. ⁴¹ Ziangahtile, mi zokhal in Khrih-ih ta nan si ruangih ka hmin in ti no khat a lo petu cu, thungai thu ka lo sim, a lawmman a sung hrimhrim lo ding. ⁴² “Zokhal keimah i zumtu, hi nauhak pakhat a tlutertu cu a hngawng ah riallung thlaih tahratin tifinriat sungah hlawn sehla a hrangah a ṭhasawn. ⁴³ Na kut in a lo tlukter asile tan mai aw, kut pakhat lawng thawi nunnak sungih luh cu kut hnih thawi a mit dah lo mi Gehenna meisa sungih feh hnakin na hrangah a ṭhasawn. ⁴⁴ “ ‘Cu tawkih an tholung cu an thi dah lo, meisa khal a mit dah lo.’ ⁴⁵ “Na ke in a lo tlukter asile tan mai aw. Ke hnih kim ih zohman ih mih thei lo mi Gehenna meisa sungih thlak hnak cun ke khat thawi nunnak sungih luh cu na hrangah a ṭhasawn. ⁴⁶ “ ‘Cu tawkih an tholung cu an thi dah lo, meisa khal a mit dah lo. ⁴⁷ “Na mit in a lo tlukter asile phawrh mai aw. Mit pahnih thawi Gehenna meisa sungih thlak hnak cun mit pakhat thawi Pathian uknak sungih luh cu na hrangah a ṭhasawn. ⁴⁸ “ ‘Cu tawkih an tholung cu an thi dah lo, meisa khal a mit dah lo.’ ⁴⁹ “Ziangahtile, mi kip meisa ih alter an si ding ih, thawinak kip cu ci ih alter an si ding. ⁵⁰ Cite cu a ṭha. Asinan cite in a alnak a hloh asile ziangtin al ko nan tuahsal thei ding? Nanmah ah cite cu nei uh, pakhat le pakhat remawten um uh,” tiah a ti.

¹ Cu tawk hmun ihsin Jesu cu a pawk ih, Jordan tiva ralkhat lam ihsin Judia peng ah a feh. Mi tampi in an ra pansal ih, a zirh kel vekin thu a zirhsal. ² Farasipawl a hnenah an ra ih, “Pasal in a nupi mak Dan in a siang maw?” tiah hniksak in an sut. ³ Jesu in an hnenah, “Mawsi in ziangtin thu a lo pe?” tiah a sawn hai. ⁴ Annih in, “Mawsi cun maknak ca nan ngan ding ih nan mak thei a si in ti,” tiah an ti. ⁵ Jesu in an hnenah a sang hai ih, “Nan lung a ruh tuk ruangah cui thupek cu Mawsi in nan hrangah a ngan a si. ⁶ Asinan, sersiam thawk ihsin Pathian in mipa le nunau a tuah. ⁷ Cuti a si ruangah mipa in a nu le a pa a tanta ding ih a nupi a kawp ding. ⁸ Cule pahnih cu taksa pumkhat ah an cang ding. Curuangah annih cu mi pahnih an si nawn lo ih, taksa pumkhat an si sawn a si. ⁹ Curuangah Pathian ih a kawm zo mi cu zohman in ṭhen hlah seh,” tiah a ti. ¹⁰ Inn sungih an um tikah a dungthluntupawl in cui thu cu an sutsal. ¹¹ Jesu in an hnenah, “Zokhal a nupi a mak ih, nupi dang a ṭhitu cu a nupi a uiretsan a si. ¹² Nunau khalin a pasal a ṭhen ih, pasal dang a neih ah cun uire a si,” tiah a ti. ¹³ A tham dingah nauhakpawl kha a hnenah an rak hruai. Asinan a rak hruaitupawl cu a dungthluntupawl in an kawk. ¹⁴ Jesu in cucu a hmuh tikah a thin a heng ih, “Nauhakpawl cu ka hnenah ra hai seh, kham hlah uh, ziangahtile, Pathian uknak cu hivek mipawl ta a si. ¹⁵ Thungai thu ka lo sim, zokhal nauhak vekih Pathian uknak a cohlanglotu cu Pathian uknak sungah an lut thei hrimhrim lo ding,” tiah a ti. ¹⁶ Cule nauhakpawl cu a cawi ih, an parah a kut suang in thlawsuah a pe. ¹⁷ Lamzin lam panih Jesu a feh laiah mi pakhat a ra tlan ih a hmaiah khukbil in, “Zirhtu ṭha, kumkhawnunnak ka co theinak dingah ziang ka tuah pei?” tiah a sut. ¹⁸ Jesu in, “Ziangah miṭha tiah i ti? Pathian siarlo zohman miṭha an um lo. ¹⁹ Thupekpawl na thei ko a si lo maw, ‘Uire hlah, mi that hlah, ru hlah, a diklo mi thutheihpitu si hlah, mi bum hlah, na nu le pa upat aw,’ ” tiah a ti. ²⁰ Cule cu pa in, “Zirhtupa, cui thupekpawl hmuahhmuah cu ka no lai ihsin ka rak thlun zo,” tiah a sawn. ²¹ Jesu in a zoh ih a duhdawt ruangah, “Thil pakhatte na sam lai, va feh aw la, na neih mi hmuahhmuah zuar in acui tangka kha miretheipawl va pe aw, cule van ah hlawnthil na nei ding. Cui hnuah ra aw la, khraws la in i thlun aw,” tiah a ti. ²² Cui thu a theih tikah a riah a sia ih, thinna zetin a fehhlo. Ziangahtile, thil tampi a neih ruangah a si. ²³ Jesu cun a kiangkap a zohkual ih a dungthluntupawl hnenah, “Milianpawl ih Pathian uknak sung luh ding cu a har tuk!” tiah a ti. ²⁴ Cui a ṭawngkam an theih tikah a dungthluntupawl cu an khawruah a har. Asinan Jesu in a sangsal ih an hnenah, “Falenuh, lennak a rinsantupawl hrangah cun Pathian uknak sung luh cu ziang tlukin so a har. ²⁵ Milianpawl ih Pathian uknak sungih luh ding hnakin ṭhim hnakua sungih kalauk luh a awl sawn,” tiah a ti. ²⁶ Cui thu cu an mang a bang tukih, “Cuti asile zo so rundam si thei ding?” tiah an ti. ²⁷ Asinan Jesu in a zoh hai ih an hnenah, “Himi cu milai hrangah cun thil cang thei a si lo, asinan Pathian hrangah cun thil cang thei a si. Ziangahtile, Pathian hrangah cun thil ziangkim a cang thei lo a um lo,” tiah a ti. ²⁸ Cu tikah Peter in a thawk ih, “Ngai hnik, ziangkim tan in nangmah kan lo thlun,” tiah a ti. ²⁹ Jesu in a sang ih, “Thungai thu ka lo sim, zokhal keimah ruangah le thuthangṭha ruangah, a inn si seh, a unau si seh, a farnu si seh, a pa si seh, a nu si seh, a nupi si seh, a fate si seh, a leiram si seh, a tantatu cu, ³⁰ tui san sungah a let za thlawsuahnak a si mi inn, unau, farnu, nu, fate le leiram pawl tla cu tiduhdahnak thawn a ngah ding. Cule a ra lai ding mi sanah kumkhawnunnak a ngah ding. ³¹ Sikhalsehla, mithupibikpawl a si mi mi tampi cu a netabik an si ding ih mitenaubik a si mi mi tampi cu hmaisabik an si ding,” tiah a ti. ³² Jerusalem lam panih an feh laiah Jesu cu an hmaiah a feh ih a dungthluntupawl cu an mang a bang ih ṭih phahin an thlun. Dungthluntu hleihnihpawl cu hmun dang deuhah a hruaisal ih a parih thil thleng ding mipawl sim a thawk. ³³ Anih in, “Ngai hnik uh, Jerusalem ah kan hung feh ding ih, Minung Fapa cu puithiam sangpawl le Danzirhtupawl hnenah phiarsawm a si ding, thi dingin thu an ṭhensak ding ih, Zentelpawl kut ah thlen a si ding. ³⁴ Hnihsuahsainak ah an hmang ding, an vaw ding, a parah cil an phui ding ih an that ding, ni thumnak ah a thosal ding,” tiah a ti. ³⁵ Cule, Zebedi-ih fapa James le John cu a hnenah ra in, “Zirhtupa, kan lo dil mi ziangkim in tuahsak hram dingah kan duh,” tiah an ti. ³⁶ Anih in, “Ziang ka lo tuahsak ding nan duh?” tiah a ti. ³⁷ Annih in, “Na ropitnak ah na vawrh lamah pakhat, na keh lamah pakhat nangmah thawn in toter aw,” tiah an ti. ³⁸ Jesu in an hnenah, “Nan dil mi nan thei lo, ka in mi no nan in thei ding maw? Ka co ding mi baptisma teh nan co thei ding maw?” tiah a ti. ³⁹ Annih in, “Kan ti thei ding,” tiah an sawn. Jesu in, “Thungaiin, ka in ding mi no cu nan in ko ding, ka co ding mi baptisma khal nan co ko ding. ⁴⁰ Asinan ka vawrh lam le ka keh lamih lo toter theinak ka nei lo. Pathian in a rak timtuah cia mipawl hnenah a pe hai ding,” tiah a ti. ⁴¹ Cui thu cu dungthluntu dang pahrapawl in an theih tikah James le John parah nasazetin an thin a heng thawk. ⁴² Asinan Jesu in a hnenah a kokhawm hai ih, “Zentelmi lakih uktu ih ruah mipawl cu an mipipawl parah an lal zet, an mithupipawl in an parah thuneihnak an nei zet ti nan thei. ⁴³ Asinan nan lakah cun cuvekin si hlah seh. Zokhal nan lakih mithupi si a duhtu cu, nanmah lo riantu si seh. ⁴⁴ Mi zokhal nan lakih mithupibik si a duhtu cun mi hmuahhmuah ih sal sita seh. ⁴⁵ Ziangahtile, Minung Fapa hman mi ih ren mi si dingah a ra lo, mi rian dingin le mi tampi tlen dingah a nunnak pe dingin a ra sawn a si,” tiah a ti. ⁴⁶ Jeriko khua an va thleng. Cule Jesu le a dungthluntupawl le mi burpi cu Jeriko khua ihsin an fehsuak laiah, Ṭimias-ih fapa mitcaw pakhat zinpi kapah to in kut a dawh. A hmin cu Barṭimias a si ih, a tican cu, Ṭimias-ih fapa tinak a si. ⁴⁷ Nazareth Jesu a si ti a theih tikah, “David Fapa, Jesu, ka parah zahngai hram aw,” tin a au. ⁴⁸ Mi tampi in an kawk ih, daiten um dingin an sim. Asinan, “David Fapa, ka parah zahngai hram aw,” tiah napin a au sinsin. ⁴⁹ Jesu cu a ding ih, mitcawpa cu a hnenah hruai dingin a fial hai. Mitcawpa cu an rak ko ih, “Hnangamtein um aw, tho aw, a lo ko a si,” tiah an ti. ⁵⁰ A kawrfual cu a hlawn; a ding ih, Jesui hnenah a ra. ⁵¹ Jesu in a hnenah a sang ih, “Ziang lo tuahsak ding na duh?” tiah a ti. Mitcawpa in, “Rabboni, khawhmuh thei ka duh,” tiah a ti. ⁵² Jesu in, “Va feh aw, na zumnak in a lo damter zo,” tiah a ti. Cu veten khua a hmu ih, Jesu a thlun cih.

¹ Jerusalem khaw kiang, Olif Tlang kiang, Betfat khaw kiang le Bethany khaw kiang an thlen tikah, Jesu in a dungthluntu pahnih a hei thlah ih, ² an hnenah, “Nan hmaiih khua ah va feh uh la, khaw sung nan luh veten, zohman ih to dah lo mi laak note an hren mi nan hmu ding. A hri phawih uh la rak hruai uh. ³ Mi pakhatkhat in, ‘Ziangah hitin nan tuah?’ tiah a lo ti asile, ‘Bawipa in a hai, tiah va ti uh. Cule hi tawkah a rak thlah lohli ding,’ ” tiah a ti. ⁴ Cuti cun an feh ih, khawlak lamzin pahnih tawnawknak kawtka lengih an hren mi laak note cu an hmu ih a hri an phawih. ⁵ Cu tawkih a ding mi mi hrekkhat in, “Ziangah laak note cu nan phawih?” tiah an ti. ⁶ Annih in Jesu ih thu a pek mi vekin an sim ih, an rak siang. ⁷ Laak note cu Jesui hnenah an hruai ih a parah an puanpawl an phah hnuah Jesu a to. ⁸ Minung tampi in an puanpawl cu lamzin ah an phah, mi hrekkhat cun hnahsawl an sat ih, lamzin ah an phah. ⁹ A hmaiih a fehtupawl le a dungih a thluntupawl in, “Hosana! BAWIPAI hmin ih a ratu cu thangṭhat in um seh. ¹⁰ Bawipai hmin ih a ra ding mi kan pa David-ih uknak cu thangṭhat in um seh. Cungnungbikah Hosana!” tin an au. ¹¹ Jesu cu Jerusalem khaw sungah le temple kulh sungah a lut. Thil ziangkim a zohkual ih khua a tlai thlang ruangah a dungthluntu hleihnih thawn Bethany ah an feh. ¹² A thaisun Bethany khua ihsin an kirsal tikah Jesu cu a ril a rawng. ¹³ Lamhla nawnah a hnah nim ciaiciai mi theipi kung pakhat a hei hmu, a rah ka hmuh pangah tin a hei pan, a va thlen tikah a hnah lawng a hmu, ziangahtile theirah tikcu a si lo. ¹⁴ Jesu in a sang ih, “A kumkhua in zohman in na rah lo ei nawn hlah hai seh,” tiah a ti. A ṭawng mi cu a dungthluntupawl in an thei. ¹⁵ Jerusalem an thlen tikah Jesu cu temple kulh sungah a lut ih, temple kulh sungih thil zuarpawl le leitupawl dawisuah a thawk. Paisa thlengtupawlih cabuai le thuro zuartupawlih tonakpawl khal a linglet ṭheh. ¹⁶ Cule temple kulh sung tual ih thil phur ih vah khal a kham ṭheh. ¹⁷ Cule an hnenah hitin a zirh, “‘Ka inn cu miphun hmuahhmuah ih thlacamnak inn tiah an ko ding,’ tiin Cathianghlim sungah ngan a si lo maw? Asinan suamhmang umnak pukah nan can a si,” tiah a ti. ¹⁸ Danzirhtupawl le puithiam sangpawl in cui thu an theih tikah thah theidan ding an hawl. Asinan a zirh mi thu in mipi zaten a mangbangter tuk ruangah Jesu cu an ṭih. ¹⁹ Zan lam a si tikah khaw lengah a suak. ²⁰ A thaizing lamzin ih an feh laiah a hram ihsin a ro ṭheh mi theipi kung cu an hmu. ²¹ Peter in a vun mangsal ih Jesui hnenah, “Rabbi, zoh hnik, na camsiat mi theipi kung cu a ro thluh zo,” tiah a ti. ²² Jesu in a sang hai ih an hnenah, “Pathian rinsan uh. ²³ Thungai thu ka lo sim, zokhal in a thinlung sungah rinhlelhnak nei loin, a sim vekin a cang rori ding ti a zum ah cun, hi tlang hnenah, ‘Ṭhawn aw la, tipithuanthum sungah va tla aw,’ tiih a ti ah cun a ṭawng vekin a cang taktak ding a si. ²⁴ Curuangah hihi ka lo sim, thla nan cam tikah, ka ngah ding a si, tiah zum in nan dil ah cun nan duh mi ziangkim nan ngah ding a si. ²⁵ “Thla cam ih nan dil tikah midang parah lungkimlonak na neih asile ngaidam aw la, vancung ih a um mi nan Pa khalin nan thil tisual mi a lo ngaidam ve ding. ²⁶ Asinan midang thil tisual mi nan ngaidam lo ah cun vancung ih a um mi nan Pa khalin nan thil tisual mi a lo ngaidam ve lo ding,” tiah a ti. ²⁷ Jerusalem an thlengsal ih, temple kulh sungih a feh laiah puithiam sangpawl, Danzirhtupawl le miupapawl tla a hnenah an ra ih, ²⁸ a hnenah, “Ziang thuneihnak in hipawl hi na tuah? Hi thilpawl tuah dingin zo in hi thuneihnak a lo pe?” tiah an sut. ²⁹ Jesu in a sang ih an hnenah, “Kei khalin thu pakhat ka lo sut ve ding ih in let uh la ziang thuneihnak in hi thilpawl ka tuah ti ka lo sim ding. ³⁰ John-ih baptisma pek mi hi van lam ihsin maw, milai hnen ihsin a si? in sim hnik uh,” tiah a sawn hai. ³¹ Cumi cu anmah ten an relkhawm ih, “ ‘Van ihsin a si,’ tiah kan ti asile, ‘Ziangah amah cu nan zum lo?’ tiah in ti ding. ³² Asinan, ‘Milai hnenin a si,’ tiah kan ti asile,” tiah an ti. Mipi an ṭih, ziangahtile mi hmuahhmuah in John cu profet taktak a si tiah an pawm. ³³ Curuangah Jesui hnenah, “Kan thei lo,” tiah an sawn. Jesu in an hnenah, “Kei khalin ziang thuneihnak in hipawl hi ka tuah ti ka lo sim ve lo ding,” tiah a sawn hai.

¹ Cule Jesu in an hnenah tahṭhimnakpawl thawn thusim a thawk, “Mi pakhat in sabit hmuan a tuah ih a kimvelin hruang in a kulh. Sabit sawrnak khur a lai ih khawcawnnak thlam sangpi a sak. Cule hmuan ṭuan hlawh a duhtupawl hnenah a peta ih, ram hlapi ah khualtlawng in a feh. ² A tikcucan a kim tikah lo ṭuantupawl hnen ihsin a covo sabit rah la dingin a siahhlawh pakhat a thlah. ³ Asinan an kai ih an vuak hnuah a kut lawngin an thlah. ⁴ Cun an hnenah siahhlawh dang pakhat a thlahsal. Lungto in an deng ih, a lu an tuahmawh hnuah mualpho ningzakza in an thlah. ⁵ Sal dang a hei thlah lala ih an rak that. A dang tampi khal a thlah nan a hrek cu an rak vua ih a hrek cu an that. ⁶ “Mi pakhat lawng thlah ding a tang. Cucu a duhdawt zet mi a fapa neihsun a si. Netabikah a duhdawt zet mi a fapa pakhat khal cu an hnenah a thlah ih, ‘Ka fapa cu an ṭihzah ko ding,’ tiah a ti. ⁷ “Asinan lo ṭuantupawl cun, ‘Hi pa hi ro cotupa a si, ra uh, kan that ding ih a ro co ding hmuahhmuah kan ta a si ding,’ tiah an ti. ⁸ Cule an kai ih an thah hnuah a ruak cu sabit hmuan lengah an hlawn. ⁹ “Cuti asile sabit hmuan neitupa in ziangtin a tuah pei? A ra ding ih lo ṭuantupawl cu a that ṭheh ding ih a sabit hmuan cu lo ṭuantu dang hnenah a pe ding. ¹⁰ Cule an hnenah, ‘Inn saktupawl ih an hnawn mi lung cu a kilih lung pawimawhbikah a cang. ¹¹ Hihi BAWIPAI tuah mi a si ih kan mithmuh ah mangbangza a si,’ tiih Cathianghlim sungih an ngan mi nan siar dah a si lo maw?”tiah a ti. ¹² Cui a tahṭhimnak cu anmah a ṭawngsan a si ti an theih ruangah a kaihdan ding an hawl nan mipi an ṭih ruangah an tlansan ih an tlung. ¹³ A ṭawng mipawl in amah Jesu an awh theinak dingah Farasipawl le Herod-ih milaipawl cu a hnenah an hei thlah. ¹⁴ A hnen an thlen tikah, “Zirhtupa, nang cu midik na si, hmaisawng mi zokhal na nei lo. Pathian thutak lawng na zirh sawn a si ti kan thei. Kaisar hnen ih ngunkhuai pek hi Dan in a siang maw, siang lo? ¹⁵ Kan pe ding maw, pe lo ding?” tiah an sut. Asinan Jesu in an depdetzia kha a thei ih an hnenah, “Ziangruangah in hniksak? Ka zoh dingah dinari paisa cu rak keng hnik uh,” tiah a ti. ¹⁶ An rak keng ih Jesu in an hnenah, “Hihi zo-ih zuk a si ih, ziang thu a nganaw?” tiah a ti. Annih in, “Kaisar-ih zuk le hmin,” tiah an sawn. ¹⁷ Cule Jesu in an hnenah, “Kaisar-ih tapawl cu Kaisar hnenah pe uh la, Pathian-ih tapawl cu Pathian hnenah pe uh,” tiah a sawn hai ih an mang a bang. ¹⁸ Cule thawhsalnak a um lo titu Sadusipawl cu Jesui hnenah an ra ih thu an sut. ¹⁹ “Zirhtupa, Mawsi in hitin in ngansak, ‘Mi pakhat cu fate nei loin a nupi a thihsan asile cu pa in cithlah mi a neihnak dingah a naupa in cui a nupi cu a ṭhi ding tiin.’ ²⁰ Atu ah unau pasarih an um, upabik in nupi a ṭhi ih, cithlah mi nei loin a thihsan. ²¹ A pahnihnak pa in cu nu cu a nupi ah a run ṭhit ih cithlah tan loin a thi, a pathumnak khal cutivek thothoin a cang. ²² An unau pasarih in cu nu cu nupi ah an ṭhi ih, cithlah tan loin an thi ṭheh. Netabikah cu nu khal cu a thi ve. ²³ Cuti asile thawhsal ni ih mithi an thawhsal tikah zo bikih nupi a si ding? An zaten nupi ah an nei cio zo fawn,” tiah an sut. ²⁴ Jesu in a sang hai ih an hnenah, “Cathianghlim le Pathian huham thiltitheinak nan theih lo ruangah nan fehpeng a si lo maw? ²⁵ Ziangahtile, Pathian in mithipawl a kaihthawh tikah an ṭhiaw nawn lo ding. Ṭhitumnak khal a um nawn lo ding ih, vanram ih a um mi vancungmi vek an si ding. ²⁶ Asinan mithi thawhsalnak thu ah cun, Pathian in thingbuk lak ihsin Mawsi hnenah, ‘Keimah cu Abraham-ih Pathian, Isak-ih Pathian, Jakob-ih Pathian ka si,’ a ti mi Mawsi cazual sungah nan siar dah lo maw? ²⁷ Pathian cu mithipawlih Pathian a si lo. A nung mipawlih Pathian a si, curuangah nan fehpeng nasa a si,” tiah a ti. ²⁸ Danzirhtu lakih mi pakhat a ra ih an thu relkhawm mi a ra ngai. Jesu in ṭha tukin a rak sawn thiam ti a hmuh tikah, “Thupek hmuahhmuah lakah ziang a pawimawhbik?” tiah a sut. ²⁹ Jesu in a hnenah, “Thupek hmuahhmuah lakih pawimawhbik mi cu, ‘Maw Israel-mipawl, ngai uh, BAWIPA kan Pathian amah lawng hi BAWIPA a si. ³⁰ BAWIPA na Pathian cu na thinlung zate, na nunnak zate, na ruahnak zate le na cahnak zate thawn na duhdaw pei.’ Hihi a pawimawhbik mi thupek cu a si. ³¹ A pahnihnak cu, ‘Nangmah na duhdawtawk vekin na inhnen na duhdaw pei,’ hi thupekpawl hnakih pawimawhsawn thupek a um lo,” tiah a sang. ³² Danzirhtupa in a hnenah, “Zirhtupa, na sim mi cu thutak a si, Pathian pakhat lawng a um. Amah siarlo Pathian dang an um lo. ³³ Cule thinlung zate, theihthiamnak zate, nunnak zate le cahnak zatei amah Pathian duhdawt le mah le mah duhdawtawk vekih mai inhnen duhdawt cu meiur thawinak hmuahhmuah le raithawinak dang hmuahhmuah hnakin a pawimawhsawn,” tiah a ti. ³⁴ Fimfel zetih a sawn kha Jesu in a hmuh tikah, a hnenah, “Pathian uknak thawn nan hlaaw lo,” tiah a ti. Cui hnuah zohman in thu an sut ngam nawn lo. ³⁵ Jesu cun temple kulh sungih thu a zirh laiah hitin thu a sut hai, “Ziangtin so Danzirhtupawl in Khrih cu David-ih Fapa a si an ti? ³⁶ Amah David roriin Thlarau Thianghlim huham in, ‘BAWIPA in ka Bawipai hnenah, “Na ralpawl na kepal ih ka retngah hlanlo ka vawrh lamah to aw,” ’ tiah a ti. ³⁷ David amah roriin ‘Bawipa,’ tiah a ko asile ziangtin David-ih Fapa a si thei ding?” tiah a ti. Mipi tam zet cun lungawi zetin an rak ngai. ³⁸ Cutin thu zirh phahin Jesu in Danzirhtupawl kha va ralring uh, annih cu an kawrfualpi thawi tawihvah le dawr tluanah mi ih upatnak pek ding an ngaina. ³⁹ Sinakok sungah tonak pawimawhbik ih to an duh ih, puai hmun ah hmun sangbik an duh. ⁴⁰ Nuhmeipawlih inn an lawng ih, mi bumnak ah rei zetzet thla an camawter. Hipawl hin thuṭhennak nasasawn an tuar ding,” tiah a ti. ⁴¹ Jesu cu thawhhlawm bawm lam hawi in a to ih, mipi thawhhlawm bawm sungih an dar paisa an thlak rero kha a zohhliah. Milian tampi cu paisa tampi an thlak. ⁴² Nuhmei rethei zet nu a ra ih, kuadron pakhat tluk lepton pahnih a thlak. ⁴³ Jesu in a dungthluntupawl a hnenah a ko ih, “Thungai thu ka lo sim, thawhhlawm bawm sungih a thlatu dangpawl hmuahhmuah hnakin hi nuhmei retheinu in a thla tamsawn a si. ⁴⁴ Ziangahtile, midangpawl hmuahhmuah cun an neih hleifuan mi sung ihsin an pe. Asinan anih cun rethei zet cingin a nunkhawsaknak dingih a neih mi zaten a pe thluh a si,” tiah a ti.

¹ Jesu cu temple kulh sung ihsin a suah zawng ah a dungthluntu lakih mi pakhat in, “Zirhtupa, zoh hnik, hi lungtopawl le innpipawl hi an va mak ve,” tiah a ti. ² Jesu in a sang ih a hnenah, “Hi tluk inn ropipawl hi na hmu ko lo maw? Lungto pakhat parih lungto a suangaw mi pakhat hman tang loin hlawn ṭheh an si leh ding,” tiah a ti. ³ Temple hmairal Olif Tlang parih a to laiah, Peter, James, John le Andru tlain anmahte lawngin a hnenah, ⁴ “Cui thilpawl cu ziang tikah an thleng ding? Hi thilpawl an thlen famkim zik tikah ziangvek hminsinnak a um ding?” tiah an sut. ⁵ Jesu in a sang hai ih an hnenah hitin sim a thawk, “Zohman ih an lo bumlonak dingah va ralring uh. ⁶ Ziangahtile, mi tampi ka hmin in an ra ding ih, ‘Khrih cu keimah hi ka si,’ tiah an ti ding ih mi tampi an bum ding. ⁷ Raldoawknak thupawl si seh, raldoawk ding thupawl tla nan theih tikah nan thinphang hlah uh, cui thilpawl cu an ra thleng ko ding. Asinan a cemnetnak cu a si hrih lo ding. ⁸ Miphun pakhat le pakhat an doaw ding, ram khat le ram khat an doaw ding. Hmun dangdangah ling a hnin ding, pam le buainak tampi a thleng ding. Hi thilpawl cu harsat tuarnak ih hramthawknak an si. ⁹ “Nanmah hrang hrimhrimah ralring uh, ziangahtile, Sanhedrin hnenah an lo hruai ding, sinakok sungah an lo vaw ding, keimah ruangah uktupawl le siangpahrangpawl hmaiah an lo thlen ding ih, cutin an hnenah ka thu theihpitu nan si ding. ¹⁰ Thuthangṭha cu miphun hmuahhmuah hnenah sim hmaisak a si ding. ¹¹ An lo kaih ih mi kut ih an lo thlen tikah ziangtin ka ṭawng ding ti khawruahhar cia hlah uh, a sawndan ding khal ruat cia hlah uh. Cu mi tikcucan ih a lo pek mi kha ṭawng mai uh, ziangahtile nanmah ten nan ṭawng a si lo ih, Thlarau Thianghlim in a ṭawng a si. ¹² “Unau le unau thi dingin an phiarsawmaw ding, pa in fa a phiarsawm ding, falepawl in an nu le an pa pawl an dodal ding ih, thihnak tiang an thlen ding. ¹³ Ka hmin ruangah mi hmuahhmuah in an lo hua ding. Asinan a cemnet tiangih a tuarsuaktu cu runsuah a si ding. ¹⁴ “Profet Daniel-ih sim mi fihnungza siatsuahtu cu hmun thianghlim ih a din nan hmuh tikah, hi ca a siartu cun theithiam seh. Judia peng ih a um mipawl cu tlang parah tlan hai seh. ¹⁵ Inn parih a um mi cu inn sungah rung ṭum hlah seh, thil la dingin a inn sung khalah lut hlah seh. ¹⁶ Lo ih a umtu cun a hnipuan la dingin a inn ah tlungkir hlah seh. ¹⁷ Cui canih favun mipawl le nausen hnawifawp neitupawl an hmakhua a pit ding! ¹⁸ Nan tlan can cu thlatang can a silonak dingin thla cam uh. ¹⁹ Ziangahtile, cui ni ih harsatnak cu Pathian in leilung a sersiam thawk ihsin tuini tiangih a um dah kel lo mi le hmai lam khalih a umsal nawn lo ding mi harsatnak a si ding. ²⁰ Bawipa in cui can cu a tawiter lo ah cun, zohman a tang an um lo ding. Asinan a hril hleice mipawl ruangah cui ni can cu a tawiter ding a si. ²¹ Mi pakhatkhat in, ‘Zoh hnik, Khrih cu hinah a um,’ asilole, ‘Zoh hnik, khinah a um,’ a lo ti asile va zum hlah uh. ²² Ziangahtile, khrih deupawl le profet deupawl an suak ding ih, cang thei sehla hril mipawl hman an bum theinak dingah hminsinnakpawl le mangbangza thilpawl an hmuh ding. ²³ Ralring uh, ngai hnik uh, thil ziangkim ka lo sim cia a si. ²⁴ “Cui harsatnak can hnuah cun ni a thim ding ih, thlapi in tleunak a pe lo ding. ²⁵ Van ihsin arsipawl an tla ding ih, van ih a um mi huhampawl tla an hnin ṭheh ding. ²⁶ “Cu tikah Minung Fapa cu huham nasazet le ropitnak thawn mero parih a rat an hmu ding. ²⁷ Cule a vancungmipawl a thlah ding ih, lei kil li ihta a hril mipawl cu lei deng ihsin van deng tiang a finkhawm ding. ²⁸ “Theipi kung tahṭhimnak ihsin zir hnik uh. A hnge note te suak in, hnah note te an cerh suak tikah ṭhal can a nai thlang ti nan thei. ²⁹ Cuvek thothoin hi thilpawl a ra cang ti nan hmuh tikah Minung Fapa rat can cu a nai tuk thlang, a thleng lohli ding ti thei uh. ³⁰ Thungai thu ka lo sim, cui thilpawl hmuahhmuah a kim lai hlanlo hi miphun hi a hloral hrimhrim lo ding. ³¹ Van le leilung a hloral ding, asinan ka thu cu a hloral dah lo ding. ³² “Asinan, cui ni le cui tikcucan cu zohman in an thei lo, van ih um vancungmipawl khalin an thei ve lo, Fapa khalin a thei lo, Pa lawngin a thei. ³³ A tikcu ra thlen ding can nan theih lo ruangah ralringten thla cam in hngak uh. ³⁴ Ziang thawn a bangrep tile, ram hlapi ih khualtlawng ih a feh mi pa, a inn tanta in, a siahhlawhpawl hnenah thuneihnak le an ṭuanvo cio felten peta in, sangka kiltupa kha ṭhaten sangka kil dingin a cahtatupa vek a si. ³⁵ “Hotupa cu, zan lamah maw, zanṭim ah maw, zing arkhuan canah maw, zing lamah maw a rat ding can nan theih lo ruangah ralringten hngak uh. ³⁶ Rinlopiin a ra ding ih nan ihthah lai a lo tawng pang ding. ³⁷ Nan hnenih ka sim mi hi mi hmuahhmuah hnen khalah ka sim a si, ‘Ralringten um uh,’ ” tiah a ti.

¹ Lantapuai le thilnu tel lo puai tuahnak ding ni hnih lawng a duh. Puithiam sangpawl le Danzirhtupawl in Jesu kha hrawkhrawl zetin a kaihdan ding le thah theidan ding an hawl. ² Asinan, “Puai ni ah cun si hlah seh, mipi an buai pang ding,” tiah an ti. ³ Bethany khua, a rak phar dah mi Simon-ih inn ah rawl ei in cabuai a kil laiah, nunaunu pakhat in hriak rimhmui spaiknard cu alabasṭa lung ih tuah mi thawl in a rak keng ih, a thawl cu a khuai hnuah a lu ah a tawih. ⁴ Mi hrekkhat cun thinheng in, “Ziangruangah hi hriak rimhmui cu a riaralter men? ⁵ Dinari zathum hnakih tamah zuar in a tangka cu miretheipawl pek theih a si tiah,” nunaunu cu an mawhthluk. ⁶ Jesu in, “Um ko seh, ziangah nan hnaihnawk rero? Anih in ka parah thil ṭha a tuah a si. ⁷ Ziangahtile, miretheipawl cu nan hnenah an um ringring ko, nan duh tikcan pohah an parah thil ṭha nan tuah thei. Asinan kei cu nan hnenah ka um ringring lo ding. ⁸ A ti thei tawk a tuah zo. In phumnak ding hrangih ka taksa hriak rimhmui a rak culh cia mi a si. ⁹ Thungai thu ka lo sim, hi thuthangṭha an simnak leitlun hmun kipah hi thu hi amah hngilhlonak ah an sim ringring ding,” tiah a ti. ¹⁰ Cule a dungthluntu hleihnih lakih mi pakhat Judas Iskariot cu an hnenih Jesu pe dingah puithiam sangpawl hnenah a feh. ¹¹ Cui thu puithiam sangpawl in an theih tikah an lung a awi zet ih, paisa pe dingin thu an kam. Cule remcang zetih Jesu pek theidan ding a hawl. ¹² Thilnu tel lo sang puai ni khatnak, Lantapuai tuufa thah ni ah, a dungthluntupawl in Jesui hnenah, “Khuiah so na ei ding mi Lantarawl kan lo timtuahsak ding na duh?” tiah an sut. ¹³ Cule a dungthluntu lakih mi pahnih a hei thlah ih an hnenah, “Khawpi sungah va feh uh la, tibel cawipa nan tawng ding ih amah kha thlun uh. ¹⁴ A va luhnak intekpai hnenah, ‘Zirhtupa in, “Ka dungthluntupawl thawn Lantarawl ka einak ding mikhual pindan cu khui tawkah a si?” ’ tiah va ti uh. ¹⁵ Anih in inn tlunta pindan tumpi, timtuah cia le kan ṭul mi ziangkim thawn a lo hmuh ding. Cu tawkah cun kan ei ding mi va timtuah cia uh,” tiah a ti. ¹⁶ Dungthluntupawl cu an pawk ih khaw sung an thlen tikah Jesu ih a sim vekin an va hmu ih, Lantarawl an timtuah cia. ¹⁷ Khua a thim tikah Jesu cu a dungthluntupawl thawn cu tawk hmun ah cun an va feh. ¹⁸ Rawl hil ih an ei laiah Jesu in, “Thungai thu ka lo sim, nan lakih mi pakhat, keimah thawn rawl eitlangtu in i phiarsawm ding,” tiah a ti. ¹⁹ Dungthluntupawl cu riahse zetin an um thawk. Pakhat hnu pakhat, “Keimah ka si maw?” an ti. A dang pakhat in, “Keimah ka si maw?” tiah a ti. ²⁰ Jesu in a sang hai ih an hnenah, “Nanmah hleihnih lakih mi pakhat keimah thawn kheng pakhat sungih sang a hnimtlangtu a si. ²¹ Cathianghlim sungih ngan cia vekin Minung Fapa cu a feh ko ding. Asinan Minung Fapa a phiarsawmtu cu a hmakhua a pit a si. Suak lo lawlaw sehla a hrangah a ṭhasawn ding,” tiah a ti. ²² Rawl an ei laiah Jesu in sang a la ih, lungawithu a sim hnuah a phel ih a pe hai, “La uh la, ei uh, hihi ka taksapum a si,” tiah a ti. ²³ Cule no a la ih, lungawithu a sim hnuah a pe hai ih an zaten an in. ²⁴ Jesu in an hnenah, “Himi cu mi tampi hrangih ka thlet mi ka thisen ih nemhngeh mi thuthlung thar a si. ²⁵ Thungai thu ka lo sim, ‘Pathian uknak sungih a thar ka insal lai hlanlo hi sabitti cu ka in nawn lo ding,” tiah a ti. ²⁶ Cule thangṭhatnak hla an sak hnuah Olif Tlang ah an feh. ²⁷ Jesu in an hnenah, “Tuizan ah keimai ruangah nan tlu ṭheh ding. Ziangahtile, Cathianghlim in, ‘Tuukhaltu ka vaw ding ih tuupawl an tlandarh ṭheh ding,’ tiah a ti. ²⁸ “Asinan mithi lak ihsin ka thawhsal hnuah cun nan hmaiah Galili peng ah ka feh ding,” tiah a ti. ²⁹ Asinan Peter in a hnenah, “Midang an tluk ṭheh hmanah kei cu ka tlu lo ding,” tiah a ti. ³⁰ Jesu in a hnenah, “Thungai thu ka lo sim, tuini, tuizan ar vei hnih a khuan hlanah vei thum i phatsan ding,” tiah a ti. ³¹ Asinan Peter cun nasasinin, “Nangmah thawi thihtlang a si khalle, ka lo phatsan hrimhrim lo ding,” tiah a ti. A dangpawl khalin cutin an ti ṭheh. ³² Gesmani ti mi hmun ah an va thleng ih, Jesu in a dungthluntupawl hnenah, “Thla ka cam sung hmuah, hinah rak to uh,” tiah a ti. ³³ A hnenah Peter, James le John a hruai ih khawruahhar le thinhar zetih um a thawk ih, ³⁴ an hnenah, “Ka thinlung hi nasazet le thihnak tlak khawpin a riah a sia. Hinah hin rak um uh la, ralringten rak um uh,” tiah a ti. ³⁵ Hmai deuhah malte a va feh ih, leilung ah a bawkkhup ih, “A cang thei asile cui can cu ka hnenin lanter aw,” tiah thla a cam. ³⁶ “Abba, ka Pa, na hrangah ziangkim a cang thei ṭheh a si, hi no hi ka hnen ihsin la hram aw, asinan ka duhnak vekin si hlah seh la nangmai duh vekin si ko seh,” tiah a ti. ³⁷ A rakir ih an ihthat ṭheh a hmuh tikah, Peter hnenah, “Simon, na itthat maw si? Nazi pakhatte hman in hngak thei lo maw? ³⁸ Sualfawrhnak sungih nan luhlonak dingah ralring uh la thla cam uh. Thlarau cun a duh ko nan, taksa cu a ṭawnṭai a si,” tiah a ti. ³⁹ A va fehsal ih, a ṭawng cia vekin thla a camsal. ⁴⁰ A rakirsal tikah an ihthah ṭheh kha a hmu lala, ziangahtile an ihhmuh a suak tuk. Ziangtiih sawn ding khal an thei lo. ⁴¹ A vei thumnak a rakirsal ih an hnenah, “Itthat hrih uh la, cawl hrih uh. A tawk thlang, a tikcu a thleng zo, ngai hnik uh, Minung Fapa cu misualpawl kut sungah phiarsawm a si thlang. ⁴² Tho uh la, feh uhsi. I phiarsawmtupa a rat khi,” tiah a ti. ⁴³ Cutiih a ṭawng rero lai hmakhatteah a dungthluntu hleihnih lakih mi pakhat Judas cu, puithiam sangpawl, Danzirhtupawl le miupapawlih rak thlah mi, mi tampi ralnam le talhtum keng mipawl thawn an ra thleng lohli. ⁴⁴ Jesu phiarsawmtupa cun puithiam sangpawl le miupapawl cu theihthiamnak a rak pe cia zo, “Ka hnam mi pa cu nan kaih duh mi pa a si, kai uh la kil phahin hruai uh,” tiah a ti. ⁴⁵ A thlen veten Jesu cu a pan ih, “Rabbi, Rabbi,” tiah a tiih nasazetin a hnam. ⁴⁶ Cule an kut an suah ih, Jesu cu an kai. ⁴⁷ Cule an lakih a ding mi mi pakhat in a ralnam a zuk ih, puithiam lubikih siahhlawhpa kha a sat ih a hna a sahthlakngah. ⁴⁸ Jesu in a sang hai ih an hnenah, “Suamhmang kai ding bangin ralnam le talhtum thawn keimah kai dingah maw nan rat? ⁴⁹ Ni tinten temple kulh sungah thuzirh in nan hnenah ka um ko nan in kai fawn lo. Asinan Cathianghlim sung thu cu a kim a ṭul a si,” tiah a ti. ⁵⁰ Cu tikah a dungthluntu zaten Jesu cu tanta in an tlan hlohsan ṭheh. ⁵¹ A taklawng khuhnak puan nem pate lawng a sin mi, tlangval pakhat in Jesu cu a thlun. Cu pa cu tlangvalpawl in an kai. ⁵² A puan cu tanta in a taklawng in a tlansuak. ⁵³ Jesu cu puithiam lubik hnenah an hruai ih, puithiam sangpawl zate, miupapawl le Danzirhtupawl an tawngkhawmaw. ⁵⁴ Peter cun hla nawnin puithiam lubik inn tual tiang a hei thlun ih, temple kiltupawl hnenah to in meisa a ai. ⁵⁵ Puithiam sangpawl le Sanhedrinpawl cun Jesu thah theinak ding thutheihpitu an hawl nan an hmu lo. ⁵⁶ Ziangahtile, mi tampi in diklo zetin an hek nan an thu a rualaw thei lo. ⁵⁷ Cun, mi hrekkhat an ding ih diklo zetin thutheitu ah an tuahaw. ⁵⁸ Annih cun, “Hi milai kut ih sak mi temple hi ka siatbal ding ih, ni thum sungah kut ih sak lo mi a dang pakhat ka sak ding, ti a ṭawng lai kan thei a si,” tiah an ti. ⁵⁹ Asinan cui an thutheihternak khal cu a rualaw thei cuang lo. ⁶⁰ Cule puithiam lubik cu an laifangah a hung ding ih, Jesui hnenah, “Ziang tal na sawn ve hai lo ding maw? Hipawl in nangmah dokalhih thu an theihter mipawl hi ziangtin a si?” tiah a sut. ⁶¹ Asinan zianghman sawn loin daiten a um. Puithiam lubik cun a hnenah, “Nangmah cu kan thangṭhat miih Fapa, Khrih cu na si maw?” tiah a sut lala. ⁶² Jesu in, “Ka si ko. Minung Fapa cu huham neitupai vawrh lamih a to le van mero thawi a rat khal na hmu leh ding,” tiah a ti. ⁶³ Puithiam lubik cun a hnipuan a thlek ih, “Thutheihpitu dang kan ṭul nawn maw si? ⁶⁴ Pathian a nautatzia cu nan thei ko, ziangtin nan ruat?” tiah a ti. Cule an zaten Jesu cu thi tlak hrimhrim a si tiah thiamlo an coter. ⁶⁵ Cui si thawkin mi hrek in a parah cil an phui, a hmai an hup ih an kuttum in an thawng. Cun a hnenah, “Profet vekin thu phuang aw,” an ti ih, temple kiltupawl in an zaphak in an beng. ⁶⁶ Peter cu inn hmai lam tual ih a um laiah, puithiam lubikih siahhlawhnu pakhat a hnenah a ra. ⁶⁷ Peter meisa a ai lai a hmuh tikah a zohhliah ih, “Nang khal Nazareth Jesu thawi umtlang mi na si,” tiah a ti. ⁶⁸ Asinan Peter in, “Ka thei lo, ziang na ṭawng ti ka theithiam lo,” tiah a el ih, inn hmai kawtka lamah a va feh, cu veten ar a khuang. ⁶⁹ Siahhlawhnu in a va hmu lala ih a kiangih a dingpawl hnenah, “Hi pa hi an lakih mi pakhat a si,” tiah a sim. ⁷⁰ Asinan, “Ka si lo,” tiah a el lala. Cui hnu malte rei deuhah a kiangih ding mipawl in Peter cu, “Nang khal hi an lakih mi pakhat na si rori. Ziangahtile, na ṭawngdan in Galili peng mi na sizia a langter,” tiah an ti. ⁷¹ Asinan Peter cun siatcamawk le sesam a thawk ih, “Nan sim mi pa cu ka thei lo,” tiah a ti. ⁷² Cu veten ar vei hnihnak a khuang. Cu tikah Peter cun Jesu in a hnenih a sim mi, “Ar vei hnih a khuan hlanah vei thum i phatsan ding,” a ti mi kha a vun mangsal. Cui thu ruat in a ṭap.

¹ Zingpit teah puithiam sangpawl cu miupapawl, Danzirhtupawl le Sanhedrinpawl thawn thurelcatnak an tuah. Jesu cu an ṭawn ih an hruai, cule Pilat kut ah an thlen. ² Pilat in a hnenah, “Jew-pawlih Siangpahrang na si maw?” tiah a sut. Jesu in a hnenah, “Na sim vek cu a si ko,” tiah a sawn. ³ Puithiam sangpawl cun sual tampi an puh nan zianghman a sawn hai lo. ⁴ Pilat in a hnenah, “Ziang tal na sawn hai lo ding maw? Ngai hnik, nangmah dokalh in theihpinak thu tampi an rel,” tiah a sutsal. ⁵ Jesu in zianghman a sawn lo ruangah Pilat cu a mang a bang ngaingai. ⁶ Cui puai tinten Pilat in mipi ih an dil mi thawngtla pakhat a suah ṭheu. ⁷ Cu laiah Barabbas an ti mi pa, ralthawh laiih laithatpa cu, ralthotu dangpawl thawn thawng an rak tla. ⁸ Mipipawl cun Pilat ih a tuah ṭheu vekih a tuah ding duh in ringpin an au ih, dil an thawk. ⁹ Asinan Pilat in an hnenah, “Jew-pawlih Siangpahrang nan hnenah ka suah ding nan duh maw?” tiah a sawn hai. ¹⁰ Ziangahtile, puithiam sangpawl in iksiknak ruangah a kut ah an thlen ti a thei. ¹¹ Asinan Barabbas suah sawn dingin puithiam sangpawl in mipipawl an rak tawkphirh cia. ¹² Pilat in a sang hai ih an hnenah, “Cuti asile Jew-pawlih Siangpahrang tiih nan kawh mi pa hi ziangtiih ka tuah ding nan duh?” tiah a tisal. ¹³ Annih cun, “Khengbet aw,” tiah an ausal. ¹⁴ Pilat cun, “Ziangruangah, ziang thil ṭha lo a tuah?” tiah a sut. Asinan annih cun, “Khengbet aw,” tiah an au sinsin. ¹⁵ Pilat in mipi lungawiter a duh ruangah Barabbas cu a suahsak hai. Jesu cu a ralkappawl a vuakter ih khengbet dingin a ralkappawl kut ah a pe. ¹⁶ Ralkappawl in Jesu cu praetorium sungah an luhpi ih, ralkap bur khat pumpin an kokhawm. ¹⁷ Puan sendup an sinter ih, hling ih an phiar mi lukhum a lu ah an khumter. ¹⁸ Cule salam pek an thawk ih, “Jew-pawlih Siangpahrang, salam kan lo pe,” tiah an ti. ¹⁹ A lu ah nuangfung in an vua, a parah cil an phui, an khukbil in an upatawter. ²⁰ Nautat in an hmuhsuam hnuah puan sendup cu an hlihsak ih, amai hnipuan an hruhter, cule khengbet dingin an hruaisuak. ²¹ Sairin ram mi, Alexander le Rufus-ih pa Simon cu khawte ihsin an kiangnaiah a ra ih hranhramin Jesui khraws cu an putter. ²² Jesu cu Luruh Hmun an ti mi Golgotha ah an hei hruai. ²³ In dingah mura thawn an rawi mi sabitti an pe nan a in duh lo. ²⁴ An khenbet hnuah a hnipuanpawl cu an ṭhen ih, pakhat ciarih an co ding mi thei dingin camcawhfung an zuk. ²⁵ An khenbet can cu zing lam nazi pakua a si. ²⁶ Pilat in Jesu sual an puhnak catar cu, “JEW-PAWLIH SIANGPAHRANG,” tiah a ngan. ²⁷ Amah thawn suamhmang pahnih, a vawrh lamah pakhat, a keh lamah pakhat an khengbet. ²⁸ Cumi cun Cathianghlim sungih ngan mi, “Amah cu dan thlunlotupawl thawn siar telcih a si,” ti mi cu a famkimter a si. ²⁹ A kiangih a fehtupawl in amah an thangsiat ih direm zetin an lu an thing ih, “Hei! Nangmah cu temple siatbal in ni thum sungih a saktupa na si. ³⁰ Nangmah le nangmah runsuakawaw la, khraws parin rung ṭum aw,” tiah an ti. ³¹ Cuvek thothoin puithiam sangpawl le Danzirhtupawl cun hmuhsuam in, “Midang cu a runsuak thei nan, amah le amah cu a runaw thei lo, ³² Israel Siangpahrang Khrih cu khraws par ihsin atu rori rung ṭum seh la kan hmu ding ih kan zum ding,” tiah an ti. Amah thawn an khenbet mipawl khalin an zawkzet ve. ³³ Sun nazi hleihnih a kim in zan lam nazi pathum tiang cui ram pumpi ah thimkhawzing a tlung. ³⁴ Zan lam nazi pathum ah Jesu cu, “Eloi, Eloi, lama sabakthani?” tiah ring zetin a au. A tican cu, “Ka Pathian, ka Pathian, ziangruangah i tlansan?” tinak a si. ³⁵ A kiangih a ding mi, mi hrekkhatpawl in cu mi an theih tikah, “Zoh hnik uh, Elijah a kawh hi,” tiah an ti. ³⁶ Mi pakhat a va tlan ih, tihawp kha sabitti thur sungah a hnim ih, nuangfung zim ih a ṭem hnuah in dingah a pe ih, “Um hrih hnik seh, amah lathla dingah Elijah a ra maw, ra lo kan zoh hnik pei,” tiah an ti. ³⁷ Jesu cu ring zetin a au ih a thlarau a thlah. ³⁸ Temple hmun thianghlim puanzar cu a luzim ihsin a tawdeng tiang ṭhen hnih ah a tlek. ³⁹ Jesui hmaiih a dingtu ralkap za hotu in a au le a thlarau ih a suahsanzia a hmuh tikah, “Hi pa cu Pathian Fapa rori a rak si ko e!” tiah a ti. ⁴⁰ Hla nawnih a rak cuan vetu nunau hrekkhat an um. Cupawl lakah Mary Magdalin, James nautasawn le Joses-ih nu Mary le Salomi tla an tel. ⁴¹ Cupawl cu Galili ram a um laiih a thluntu le amah tuamhlawmtupawl le Jesu thawi Jerusalem ih a ra mi nunau dang tampi tla an si. ⁴² Cui ni cu Sabbath Ni hlanih timlamawk ni a si. Zan lam a thlen tikah, ⁴³ tlangsuak upa lakih mithupi le Pathian uknak hngaktu Arimathia khaw mi Joseph cu ralṭha zetin Pilat hnenah a feh ih, Jesui ruang cu a dil. ⁴⁴ Jesu a thih zo cu Pilat a mang a bang ngaingai. A ralkap za hotu cu a ko ih, a thihnak a rei zo maw? tiah a sut. ⁴⁵ A thi zo ti ralkap za hotu hnenin Pilat in a theih tikah a ruang cu Joseph a lakter. ⁴⁶ Joseph cun puan nem pate a lei ih, a ruang cu a lathla, cule puan nem paten a tuam hnuah lungpi virh mi thlan sungah a vui ih, a thlanka ah lung a hrilhta. ⁴⁷ Mary Magdalin le Joses-ih nu Mary cun a ruak an vuinak hmun cu an hmu.

¹ Sabbath Ni a cem tikah Mary Magdalin, James-ih nu Mary le Salomi in a ruang va culh dingah rimhmui hriak an lei. ² Zarh khatih a hmaisabik ni zingpitte ni suah zawngah thlan ah an va feh. ³ “Thlan khar lungto cu zo in in hrilhsak ding?” tiah an rel rero. ⁴ Cule an hun zoh tikah lungpi cu hrilh a rak si zo ti kha an hmu. Cui lung cu lungto tum zet a si. ⁵ Thlan sung an vung luh tikah puan var a sin mi tlangval pakhat, vawrh lam kapih a to kha an hmu ih an lau zet. ⁶ Anih cun an hnenah, “Mangbang in um hlah uh, an khenbet mi Nazareth Jesu nan hawl, anih cu a tho zo, hinah a um nawn lo, an retnak hmun hi zoh hman uh. ⁷ Va feh uh la, a dungthluntupawl le Peter hnenah nan hmaiah Galili ram ah a feh cia, cui hmun ah a lo sim cia vekin nan hmu ding,” tiah a ti. ⁸ Zamrangten an fehsuak ih, khur le mangbang in thlan ihsin an tlansuak. An ṭih tuk ruangah zo hnen hmanah zianghman an sim lo. ⁹ Zarh khatih ni hmaisabiknak zingpit teah Jesu a thosal. Cui hnuah, khawsia pasarih a dawisuahsak mi Mary Magdalin hnenah a lang hmaisabik. ¹⁰ Anih cu a va feh ih, Jesu thawi umtlang dah mi, riahsia ih a ṭap rero mipawl kha a va sim hai. ¹¹ Jesu a nung tile cu nu in a hmu ti an theih tikah an zum lo. ¹² Cui hnuah anmah lakih mi pahnih khawte lamih an feh laiah phun dangin an hnenah Jesu a lang. ¹³ Cute pahnih cu an va feh ih, Jesui dungthluntu dangpawl hnenah an sim nan an rak zum cuang lo. ¹⁴ Cui hnuah rawl ei ih an to laiah a thluntu hleikhat hnenah a lang. A thawhsal hnuah mi hrek in an hmuh thu a thluntu hleikhatpawl in an zum lo ruangah, an zumlonak le an lungruhnak kha a kawk hai. ¹⁵ Cule, anih in an hnenah, “Leitlun khaw zakipah va feh uh la sersiam mi tinkim hnenah thuthangṭha va sim uh. ¹⁶ A zum ih baptisma a cotu cu rundam a si ding. Asinan a zumlotu cu thiamlo coter a si ding. ¹⁷ A zumtupawl cu hi hminsinnakpawl in a thlun ding, ka hmin in khawsia an dawi ding, ṭawng thar in an ṭawng ding. ¹⁸ Rul tla an kai ding, thih theinak ziang thil khal an in le an zianghman a pawi lo ding. Mina parah an kut an suang ding ih an dam ding,” tiah a ti. ¹⁹ Bawipa cu an hnenih thu a sim ṭheh hnuah vancung ah laksoh in a um ih, Pathian vawrh lamah a to. ²⁰ Cule an fehsuak ih hmun kipah thuthangṭha an sim. Bawipa cu an hnenah hna a ṭuan ih, an thusim mi cu hminsinnakpawl hmang in a nemhngehsak vivo. Amen.