MAHTE

MAHTE

¹ Himi hi Abraham-ih fapa, David-ih fapa, Jesu Khrih sungkua thlahawkdan cazual a si. ² Abraham cu Isak-ih pa a si. Isak cu Jakob-ih pa a si. Jakob cu Judah le a unaupawl ih pa a si. ³ Judah cu Perez le Zerah ih pa a si. An nu cu Tamar a si. Perez cu Hezron-ih pa a si ih, Hezron cu Ram-ih pa a si. ⁴ Ram cu Amminadab-ih pa a si. Amminadab cu Nahson-ih pa a si. Nahson cu Salmon-ih pa a si. ⁵ Salmon cu Boaz-ih pa a si. Boaz-ih nu cu Rahab a si. Boaz cu Obed-ih pa a si. Obed-ih nu cu Ruth a si. Obed cu Jesse-ih pa a si. ⁶ Jesse cu Siangpahrang David-ih pa a si. Siangpahrang David cu Solomon-ih pa a si. Solomon-ih nu cu Uriah-ih nupi a rak si dah. ⁷ Solomon cu Rehoboam-ih pa a si. Rehoboam cu Abijah-ih pa a si. Abijah cu Asa-ih pa a si. ⁸ Asa cu Jehoshafat-ih pa a si ih, Jehoshafat cu Joram-ih pa a si. Joram cu Uzziah-ih pa a si. ⁹ Uzziah cu Jotham-ih pa a si ih, Jotham cu Ahaz-ih pa a si. Ahaz cu Hezekiah-ih pa a si. ¹⁰ Hezekiah cu Manasseh-ih pa a si ih, Manasseh cu Amon-ih pa a si. Amon cu Josiah-ih pa a si. ¹¹ Babilon mipawl in, Jew-pawl Babilon ih an hruai lai hrawngah Josiah cu Jekoniah le a unaupawl ih pa a si. ¹² Babilon ih an hruai hnuah, Jekoniah cu Shealtiel-ih pa a si. Shealtiel cu Zerubbabel-ih pa a si. ¹³ Zerubbabel cu Abiud-ih pa a si. Abiud cu Eliakim-ih pa a si ih, Eliakim cu Azor-ih pa a si. ¹⁴ Azor cu Zadok-ih pa a si. Zadok cu Akhim-ih pa a si ih, Akhim cu Eliud-ih pa a si. ¹⁵ Eliud cu Eleazar-ih pa a si. Eleazar cu Mathan-ih pa a si ih, Mathan cu Jakob-ih pa a si. ¹⁶ Jakob cu Joseph-ih pa a si. Joseph cu Khrih an ti mi Jesu hringtu Mary-ih pasal a si. ¹⁷ Curuangah, san hmuahhmuah cu Abraham ihsin David tiang san hleili, David ihsin Babilon sal ih an tan tiang san hleili, sal an tan ihsin Khrih tiang san hleili a si. ¹⁸ Jesu Khrih suahnak cu hitin a si. A nu Mary cu Joseph thawn an hamaw. An ṭhitawk hlanah Mary cu Thlarau Thianghlim in fa a vunter ti Joseph in a theisuak. ¹⁹ Cule, a pasal Joseph cu midingfel a si. Mipi theihih Mary mualphoter a duh lo ruangah athupten Mary cu tansan a tum. ²⁰ Ngai hnik, cui thupawl a ruah rero laiah a mang ah Bawipai vancungmi cu a hnenah a lang ih, “David fapa Joseph, Mary na nupiih ṭhit ding ṭih hlah. Ziangahtile, a vun mi fa cu Thlarau Thianghlim hnen ihsin a si. ²¹ Anih in fapa a hring ding ih, Jesu tiah hmin na sak ding. Ziangahtile, anih in a mipawl kha an sualnakpawl ihsin a rundam ding a si,” tiah a ti. ²² Cumi cun profet hmang in Bawipa in a cang lai ding mi a rak sim mi cu a thlengkimter a si. ²³ Profet cun, “Ngai hnik, fala him in fa a vun ding ih, fapa a hring ding. A hmin ah ‘Immanuel,’ tiah an ko ding,” tiah a ti. Immanuel tiih a tican cu, “Pathian kan hnenah a um,” tinak a si. ²⁴ Joseph cu a ihthahnak ihsin a hung ṭhang tikah Bawipai vancungmi in thu a pek vekin Mary cu a nupi ah a ṭhi. ²⁵ A fapa hmaisabik a hrin hlan tiang Joseph in a ihpi lo. Cule Joseph in a fapa cu Jesu tiah hmin a sak.

¹ Herod, Siangpahrang a ṭuan laiah Judia peng Bethlehem khua ah Jesu a suak. Ngai hnik, cu mi hnuah mifimpawl cu ni suahnak lam ihsin Jerusalem khua ah an ra thleng. ² “Jew-pawlih Siangpahrang a suak mi cu khuiah a um? Kan ratnak san cu ni suahnak lamih kan um laiah a arsi kan hmu ih, amah be dingah kan ra a si,” tiah an ti. ³ Cui thu cu Siangpahrang Herod in a theih tikah amah le Jerusalem khua ih um mipawl hmuahhmuah an thin a buai. ⁴ Cule Herod in puithiam sangpawl hmuahhmuah le mipi Danzirhtupawl hmuahhmuah cu a kokhawm ih, Khrih suahnak ding hmun a sut hai. ⁵ Annih in a hnenah, “Judia peng Bethlehem khua ah a si ding. Ziangahtile, cumi cu profet in, ⁶ ‘Judia ram sungih um nang Bethlehem, Judia uktupawl lakah a tenaubik na si hrimhrim lo. Ziangruangah tile na sung ihsin Uktu a suak ding. Ka mi Israel-pawl a kilkhawi ding,’ tin a ngan,” tiah an ti. ⁷ Cule Herod in mifimpawl cu athupten a ko hai ih, fimkhur zetin arsi lang tikcu cu a sut hai. ⁸ Cule Bethlehem ah a thlah hai ih an hnenah, “Va feh uh la, fimkhurten nauhak thuhla cu va sut uh. Nan hmuh hnuah in rak simsal uh la kei khal amah be dingah ka feh ve ding,” tiah a ti hai. ⁹ Siangpahrangih thusim mi an theih tikah an fehsuak. Ngai hnik, ni suahnak lamih arsi an rak hmuh mi kha an hmaiah a feh. Nauhak umnak hmun zawn tlun a thlen tikah a cawl. ¹⁰ Cui arsi an hmuh tikah an lung a awi ngaingai. ¹¹ Cule, inn sungih an luh tikah nauhak cu a nu Mary thawn an vung hmu. An bawkkhup ih, nauhak cu an bia. An hlawnthilpawl cu an awng ih, a hnenah an thilpek ken mi Sui, Frankinsense rimhmui le Mura tla an pe. ¹² Herod hnenih kirsal lo dingin Pathian in an mang ah a sim. Curuangah anmai ram ah lamzin dangin an tlung. ¹³ Cui mifimpawl an fehsuak hnuah, ngai hnik, Bawipai vancungmi cu Joseph hnenah a mang ah a runglang ih, “Tho aw la, nauhak le a nu cu hruai in Izip ram ah tlanpi hai aw. Ziangahtile, nauhak that dingah Herod in a hawl ding. Curuangah, thu ka lo simsal hlanlo Izip ah va um ringring aw,” tiah a ti. ¹⁴ Cule Joseph cu a tho ih, nauhak le a nu cu a hruai hai ih, a zanzanin Izip ram ah an tlan. ¹⁵ “Ka fapa cu Izip ihsin ka kosuak zo,” tiih Bawipa in profet hmang ih a rak sim mi a thlenkim theinak dingah Herod a thih hlanlo cu tawkah an va um. ¹⁶ Herod in mifimpawl in in bum ti a theih tikah a thin a heng tuk lawmmam. Mifimpawl hnenih fimkhur zetih arsi suah can a suh mi thawn dengaw in a tuak ih, Bethlehem le a khaw kiangkapah mi a thlah ih, kum hnih hnuai lam mipa nauhak zaten a that thluh. ¹⁷ Cuti cun profet Jeremiah ih a rak ngan cia mi cu a kim a si. ¹⁸ “Rama khaw sung ihsin aw a thang, mithi ṭah le ṭahnak le riahsiat ṭah aw a si. Rachel in a falepawl a ṭah. An thih ruangah, zo ih hnem khal a duh lo,” tiah profet in a ngan. ¹⁹ Herod a thih tikah, ngai hnik, Bawipai vancungmi cu Izip ram ah Joseph hnenah a mang ah a runglang ih, ²⁰ “Tho aw la, nauhak le a nu kha hruai aw la, Israel ram ah feh aw. Ziangahtile, nauhak that dingih hawltupawl an thi zo,” tiah a ti. ²¹ Joseph cu a tho ih nauhak le a nu cu a hruai ih, Israel ram ah a feh. ²² Asinan Arkhelaus in a pa Herod aiawh in Judia a uk ti Joseph in a theih tikah, cu tawk hmun feh cu a ṭih. Pathian in a mang ih a sim hnuah Galili peng ah a feh. ²³ Cule Joseph cu Nazareth khua ti mi a thleng ih, cu tawkah a um. Cuti cun profetpawl in an rak sim cia mi, “Amah cu mi in Nazareth mi tiah an ti ding,” ti mi cu a kim a si.

¹ Tawkfang a rei hnuah, baptisma petu John cu a feh ih, Judia peng ramṭhing ah thu a sim. ² “Vancung uknak cu a nai zo. Curuangah nan sual sir uh,” tiah a ti. ³ Ziangahtile, profet Isaiah in a thuhla a rak ngan mi kha amah hi a si. “Ramṭhing ih mi pakhat auaw cun, ‘ BAWIPAI hrangah lamzin sial uh; a zinpawl kha dingter uh,’ a ti,” tiah a ti. ⁴ Cui John thotho cu kalauk hmulih tah mi hnipuan a hruh, a tai ah savun taikhap a khap. A rawl cu kharbawk le hramlak khuaitizu a si. ⁵ Jerusalem khaw sung in si seh, Judia peng hmuahhmuah le Jordan Tiva kiangkap hmuahhmuah in si seh a hnenah mi an ra. ⁶ An sualnakpawl tla an phuang ih, John in Jordan tiva ah baptisma a pe hai. ⁷ Farasi mi tampipawl le Sadusi mi tampipawl a baptisma zoh dingih a hnenih an rat kha John in a hmuh tikah, “Nannih cu tur nei rul cithlah nan si! A ra thleng lai ding mi thinhengnak ihsin tlansuak dingah zo in so ralrinnak a rak lo pe? ⁸ Curuangah, nan sual nan sir taktakzia cu nan rah in langter uh. ⁹ ‘Abraham cu kan pa a si,’ tiin, nan thinlung sung in ruat hlah uh. Nan hnenah ka lo sim a si. Pathian cun hi lungtopawl sung ihsin Abraham hrangah tesinfa tla a tuah thei a si. ¹⁰ Thingkungpawl hramah hreitlung ret a si zo. Curuangah, rah ṭha a rah lo mi thingkung cu hau thluk an si ding ih, meisa sungah paih an si ding. ¹¹ Nan sual nan sir ruangah kei cun ti ah baptisma ka lo pe. Asinan ka hnuih a ratupa cu keimah hnakin a nasasawn. Kei cu a kedampawl kengtu ding hmanah ka tlak lo. Anih cun Thlarau Thianghlim ah le meisa ah baptisma a lo pe ding. ¹² A kut ah sangvut zapnak ṭangṭa a um ih, sangvut cilnak hruih cu a thianfai ṭheh ding. Amai sangvut cu cuam sungah a thun ding. Asinan a hi cu zohman ih mih thei lo mi meisa sungah a urkang thluh ding,” tiah a ti hai. ¹³ Cun, Jesu cu Galili peng ihsin Jordan tiva ah John-ih baptisma co dingah a feh. ¹⁴ Asinan John in a hnenah, “Keimah sawn hi nangmah ih baptisma pek ka ṭul. Ziangah saw nangmah sawn riangri ka hnenih na rat?” tiah a el. ¹⁵ Jesu in a hnenah, “Cuvek cun atu ah rem ti ko aw. Ziangahtile, dingfelnak hmuahhmuah cu cutivekin kan famkimter thluh a ṭul a si,” tiah a sawn. Cule John in rem a rak ti ve. ¹⁶ John in Jesu baptisma a pek hnuah, Jesu cu ti sung ihsin a hung suak lohli. Ngai hnik, vanpawl tla khi a hrangah an awngaw. Cule John in thuro bangin Pathian Thlarau a rung ṭum lai le Jesui parih a rung fut kha a hmu. ¹⁷ Cule, ngai hnik, van ihsin aw pakhat in, “Hihi ka duhdawt zet mi ka Fapa a si, a parah ka lung a awi zet,” tiah a ti.

¹ Cule Jesu cu Diabol-ih sualfawrh dingah Thlarau Thianghlim in ramṭhing ah a hruai. ² Ni sawmli le zan sawmli rawl a ulh hnuah Jesu cu a ril a rawng. ³ Cule a hnenah sualfawrhtu cu a ra ih, “Nangmah cu Pathian Fapa na sile hi lungtopawl hi rawl ah cang dingin thu pe aw,” tiah a ti. ⁴ Jesu in, “Cathianghlim in, ‘Milai cu rawl lawngin a nung lo ding. Pathian kamsuak thu tinin a nung sawn ding a si,’ tiah ngan a si,” tiah a let. ⁵ Cule Diabol in Jesu cu khawpi thianghlim ah a hruai ih, temple kulh a sannakbik ah a ret. ⁶ Cule Jesu hnenah, “Pathian Fapa na sile dawpthla hnik aw. Ziangahtile Cathianghlim in, ‘Nangmai thuhla ah cun a vancungmipawl thu a pe ding ih, na ke in lungto khawng lo dingin an kut in an lo dawm ding,’ a ti,” tiah a ti. ⁷ Jesu in a hnenah, “Cathianghlim lala in, ‘ BAWIPA na Pathian na hniksak lo pei,’ a ti,” tiah a ti. ⁸ Cule Jesu cu Diabol in tlang sang zetah a hruaisal ih, milai umnak leitlun ram hmuahhmuah le a ropitnak hmuahhmuah tla a hnenah a hmuh. ⁹ Cule Diabol in a hnenah, “Bawkkhup tahratin i biak asile hi thil hmuahhmuah tla hi na hnenah ka lo pe ding,” tiah a ti. ¹⁰ Cule Jesu in a hnenah, “Setan, fehhlo aw. Ziangahtile, Cathianghlim in, ‘ BAWIPA na Pathian na be ding ih, amah lawng na rian ding,’ a ti,” tiah a ti. ¹¹ Cule Diabol cun a tlansan. Ngai hnik, vancungmipawl cu an ra ih, amah cu an tuamhlawm. ¹² Cui hnuah Jesu in John kha thawng ah an thlak zo ti a theih tikah Galili peng lamah a pawksuak. ¹³ Nazareth khua a suahsan hnuah Jesu cu a feh ih, Zebulun le Naphtali ramri tili kapih um Kapernaum khua ah a va um. ¹⁴ Hitiih a umnak cu profet Isaiah ih a rak sim cia mi a kimnak dingah a si. ¹⁵ Isaiah in, “Zebulun ram le Naphtali ram, Jordan Tiva khatlam ralih a um mi Zentelmipawl umnak Galili, ¹⁶ khawthim sungih a rak um mipawl in tleunak nasazet an rak hmu zo. Thihnak ram le thihnak phenthlam sungih a um mipawl hnenah tleu a rak thleng zo,” tiah a ti. ¹⁷ Cui can ihsin Jesu in, “Nan sual sir uh, ziangahtile vancung uknak cu a nai zo a si,” ti thu sim le rel a thawk. ¹⁸ Cule Jesu cu Galili Tili kapih a feh rero laiah unau pahnih Peter tiih an kawh mi Simon le a naupa Andru tla cu tili sungih sur an vawrh rero lai kha a hmu. Ziangahtile, annih cu ngakaitu an si. ¹⁹ Cule Jesu in an hnenah, “I thlun uh la minung kaitu ah ka lo tuah ding,” tiah a ti hai. ²⁰ Cule an surpawl cu hmakhatteah an tanta ih, amah cu an thlun. ²¹ Cu tawk ihsin Jesu cu a feh vivo ih, Zebedi-ih fapa pahnih James le a naupa John tla cu a hmu. Anmah cu an pa Zebedi thawn an lawng sungah an um ih, an surpawl an thawlh rero. Cule Jesu cun a ko hai. ²² Cule annih in an lawng le an pa an tanta lohli ih, amah cu an thlun. ²³ Jesu cu Galili peng hmun zakip a fangkual ih, an sinakokpawl ah Pathian uknak thuthangṭha a zirh ih, a sim. Cule mipi lakah nathrik phun zakip le natnak phun zakippawl tla cu a damter. ²⁴ A thuhla cu Siria ram hmuahhmuah ah a thang thluh. Cule mina hmuahhmuah a hnenah an rak hruai. Minapawl hmuahhmuah, cupawl tla cu: nathrik phun tampi le tuarnak phun tampi ih a natter mi, khawsia ih pawlh mipawl, merainat neipawl le mizengpawl khal an um. Cupawl cu Jesu in a damter hai. ²⁵ Cule Galili le Dekapolis peng, Jerusalem khua le Judia peng le Jordan tiva khatlam ral ihsin mi tampi an ra ih, Jesu cu an thlun.

¹ Cule mi burpi a hmuh tikah tlang parah a hung kai. Cule a to ih, a dungthluntupawl a hnenah an ra. ² Cule a kaa a ang ih, an hnenah thuzirh a thawk. Hitin a ti, ³ “Thinlung tangdawr mipawl cu mihualvanṭha an si. Ziangahtile, vancung uknak cu anmai ta a si. ⁴ Ninghanglungsiapawl cu mihualvanṭha an si. Ziangahtile, annih cu hnem an si leh ding. ⁵ Lungnem mipawl cu mihualvanṭha an si. Ziangahtile, leilung hi ro ah an co ding. ⁶ Dingfelnak duhih rilrawng le tihalpawl cu mihualvanṭha an si. Ziangahtile, annih cu an tlai leh ding. ⁷ Midang parih zahngainak neitupawl cu mihualvanṭha an si. Ziangahtile, an parah zahngainak an co leh ding. ⁸ Thinlung thiang mipawl cu mihualvanṭha an si. Ziangahtile, Pathian an hmu ding. ⁹ Remnak tuahtupawl cu mihualvanṭha an si. Ziangahtile, Pathian fate tiih kawh an si leh ding. ¹⁰ Dingfelnak ruangih tiduhdahnak a tuartupawl cu mihualvanṭha an si. Ziangahtile, vancung uknak cu anmai ta a si. ¹¹ “Keimai ruangah mi in an lo zawkzet ding ih, an lo tiduhdah ding. Ṭawngkam ṭha lo phun zakipin nanmah dokalh in thuphan an lo puh ding. Cu tikah nannih cu mihualvanṭha nan si. ¹² Curuangah aipuang uh la, nasazetin lungawi uh. Ziangahtile, vancung ram ih nan lawmman cu a ropi ih, nan hlanih profetpawl khal cuvekin an rak tiduhdah a si. ¹³ “Nannih cu leitlun cite nan si. Asinan cite in a alnak hlohta hnik sehla ziangtin al ko nan tuahsal thei ding? Ziang hrang hmanah a ṭhahnem nawn lo ding. Mi in an hlawn ding ih, an ke in an pal men ding. ¹⁴ “Nannih cu leitlun tleu nan si. Tlang parih an sak mi khua cu phen theih a si lo. ¹⁵ Mi zohman in meito vang tahratin kho hnuaiah an ret dah lo. Meito vannak parah an ret ih, inn sungih minung um mi hmuahhmuah a tlet thluh. ¹⁶ Cuvekin nan tleu cu mi hmaiah tle seh. Cule mi in nan thil ṭha tuah mipawl an hmu ding ih, van ih nan Pa an thangṭhat ding. ¹⁷ “Dan thupawl si seh, profetpawlih ngan mipawl si seh hloralter dingih ra ah in ruat hlah uh. Cupawl hloralter dingah ka ra lo. Cupawl famkimter dingah ka ra sawn. ¹⁸ Thungai thu ka lo sim, lei le van a hlohral hlanlo cu Dan sungih cafang tebik si seh, thai khatte si seh a zaten a thlenkim hlanlo a hloral hrimhrim lo ding. ¹⁹ Curuangah, mi zokhal hivek thupekpawl lakih a fatebik pakhat a pahbal ih, midang a va zirh ih, cuvekin an tuah ve asile cu pa cu vancung uknak sungah mitenaubik tiah kawh a si ding. Asinan zokhal cui thupekpawl tuah ih a zirhtu cu vancung uknak sungah miropi tiah kawh a si ding. ²⁰ Nan dingfelnak in Danzirhtupawl le Farasipawl ih dingfelnak a hleih tengteng ding tiah ka lo sim. Ziangahtile, a hleih lo asile vancung uknak sungah nan lut hrimhrim lo ding. ²¹ “ ‘Tual that hlah, zokhal tual a thattu cu thuṭhennak a tawng ding,’ tiin hlan lai mipawl ih an sim mi cu nan rak thei zo. ²² Asinan kei cun zokhal san um loin amai unau parih a thin a hengtu cu thuṭhennak a tawng ding. Cun zokhal in amai unau hnenah, ‘Misantlailopa!’ titu cu Sanhedrin thuṭhennak a tawng ding. Cun mi zokhal in, ‘Nang miaa!’ tiah mi a ti asile Gehenna meisa a tawng ding, tiah ka lo sim. ²³ Curuangah biakṭheng ih na thilpek na ken tikah na unau in na parah lungkimlonak a nei ti na theihsuahsal asile, ²⁴ biakṭheng hmaiah na thilpek cu tanta in hmaisabikah na unau hnenah va feh tahratin remawknak tuah aw. Cu ṭheh in kirsal aw la, na thilpek cu hlan aw. ²⁵ Thuṭhennak hmun ih a lo hruaitu na ralpa thawn lamzin ih nan fehtlang laiah amah thawn remawknak tuah lohli aw. Cu lo asile na ralpa in thuṭhentu hnenah a lo thlen ding ih, thuṭhentu in a kut hnuai bawi hnenah a lo thlen ding. Cule anih in thawng a lo thla ding. ²⁶ Thungai thu ka lo sim, kuadron tiangin na pek ṭheh thluh lai hlanlo ziangti lam khalin na suak lo ding. ²⁷ “ ‘Na uire lo ding,’ tiin hlan lai mipawlih an sim mi cu nan rak thei zo. ²⁸ Asinan kei cun mi zokhal in cakhiarnak thawi nunau a zoh asile a thinlung in a uire zo a si tiah ka lo sim. ²⁹ Curuangah, na vawrh lam mit in a lo tlukter asile phawrhsuak aw la, hlawn aw. Ziangahtile, Pathian in na pumhlumih Gehenna meisa sungih a lo paih ding hnakin na taksa hrekkhat a hlohral ding cu na hrangah a ṭhasawn. ³⁰ Na vawrh lam kut in a lo tlukter asile tan aw la, hlawn aw. Pathian in na pumhlumih Gehenna meisa sungih a lo paih ding hnakin na taksa hrekkhat a hlohral ding cu na hrangah a ṭhasawn. ³¹ “ ‘Zokhal in a nupi a mak asile nemhngeh mi maknak ca ken seh,’ tiah an ti mi thu cu nan rak thei zo. ³² Asinan kei cun nan hnenah, ‘Nu le pa sualnak siarlo ah zokhal a nupi a mak asile a nupi a uireter a si. A mak mi nu a rak ṭhitu khal a uire ve a si,’ ka lo ti. ³³ “Cuitlunah, ‘Na sesamthukam pelhter hlah, na sesamthukam mi cu Bawipai hnenah pe aw,’ tiin hlan lai mipawlih an sim mi cu nan rak thei zo. ³⁴ Asinan kei cun nan hnenah, sesamthukam tuah hrimhrim hlah. Vancung sal in sesamthukam tuah hlah uh, ziangahtile cumi cu Pathian tohkham a si. ³⁵ Leilung sal khalin sesamthukam tuah hlah, ziangahtile cumi cu Pathian kepal a si. Siangpahrang ropi-ih khua a si ruangah Jerusalem sal khalin sesamthukam tuah hlah. ³⁶ Samphang pakhat khal na varter in na dumter thei lo ruangah na lu sal khalin sesamthukam tuah hlah. ³⁷ Asinan na ṭawngkam cu, ‘a si’ cu ‘a si,’ ‘a si lo’ cu ‘a si lo,’ tin si seh. Ziangahtile, cui tlun lam cu miṭhalopa hnen ihsin a si. ³⁸ “ ‘Mit aiah mit, ha aiah ha,’ tiih an sim mi cu nan rak thei zo. ³⁹ Asinan, kei cun nan hnenah, miṭhalo cu va dodal hlah uh. Mi zo in simaw na vawrh lam biang a lo beng asile khatlam biang khal tun lawlaw aw. ⁴⁰ Cule mi pakhat in na angki lak duh ah taza a lo cuai asile na kawrfual khal lakter lawlaw aw. ⁴¹ Mi zokhal in amah thawn loh theih loin peng khat feh a lo fial asile peng hnih feh aw. ⁴² Na hnen ihsin thil pakhatkhat a duhtu cu pe aw la, na hnen ihsin thil lo cawi a duhtu cu dungtun hlah. ⁴³ “ ‘Na inhnen na duhdaw pei ih, na ral na hua pei,’ an ti mi cu nan rak thei zo. ⁴⁴ Asinan kei cun nan hnenah, nan ral duhdaw uh la, a lo camsiattu thlawsuah va pe uh. A lo huatupawl hnenah thil ṭha tuah uh la, a lo hmuhsuamtupawl le a lo hremtupawl hrangah thla camsak uh. ⁴⁵ Vancung nan Pai faletla nan si theinak dingah cucu tuah uh. Ziangahtile, anih cun amai ni cu miṭha par le miṭhalo par khalah a tlangter ih, ruah cu miṭha par le miṭhalo par khalah a surter. Cun, midingfel par le midingfello parah ruah a surter. ⁴⁶ Ziangahtile, nanmah a lo duhdawtupawl lawng nan duhdaw asile ziang lawmman saw nan neih ding? Siahkhawngtupawl khalin cuvekin an tuah ve a si lo maw? ⁴⁷ Cule nan sungkhat unaupawl lawng nan biak ṭhat asile a hleiih nan tuah mi ziang saw a um cuang? Siahkhawngtupawl khalin cuvekin an tuah ve a si lo maw? ⁴⁸ Curuangah, van ih nan Pa a famkim vekin famkim ve uh.

¹ “Bawmnak thilpek nan pek mi hi mi in in hmu hai seh tiin mi zapi hmaiih tuah lo dingin ralring uh. Cutiih nan tuah asile vancung ih a um mi nan Pa hnen ihsin lawmman zianghman nan ngah lo ding. ² “Curuangah bawmnak thilpek na pek tikah midepdepawl in mipi ih lawm dingah sinakokpawl ah le lamzinpawl ih tuah an duh vekin na hmaiah tawtawrawt phaw hlah. Thungai thu ka lo sim, an lawmman cu an ngah zo. ³ Curuangah, bawmnak thilpekpawl na pek tikah na vawrh lam kut ih a tuah mi cu na keh lam kut in thei hlah seh. ⁴ Bawmnak thilpek na pek mi cu athuptein si seh. Cule, minung ih hmuh lo mi hmutu na Pa in langhnganin lawmman a lo pe ding. ⁵ “Cule thla na cam tikah midepdepawl vekin cam hlah. Ziangahtile, annih cun mi in in hmu hai seh tiah sinakokpawl ah le zalamzin tawnawknak hmunpawl ah ding in thla cam an duh. Thungai thu ka lo sim, an lawmman cu an ngah zo. ⁶ Asinan nang cun thla na cam tikah na inn pindan sungah lut aw la, sangka na khar hnuah zohman ih hmuhlonak ih um na Pai hnenah thla cam aw. Cule zohman ih hmuh lo mi hmutu na Pa in langhnganin lawmman a lo pe ding. ⁷ Cule thla nan cam tikah Zentelpawl vekin sullam nei lo ṭawng nawlhsal rero hlah uh. Ziangahtile, annih cun ṭawngkam tampi an sal nawn rero asile an pathian in theihsak dingah an ruat. ⁸ Nannih cu anmah vek si hlah uh. Ziangahtile, a hnenih nan dil hlanah nan ṭul mipawl cu nan Pa in a thei. ⁹ Thla nan camdan ding cu hitin a si, ‘Vancung ih a um mi kan Pa, na hmin thianghlim seh. ¹⁰ Na uknak thleng hram seh. Vancung ih na duhnak tuah a si bangin leitlun khalah na duhnak tuah si hram seh. ¹¹ Tuisun ih kan ṭul mi rawl tuisun ah in pe aw. ¹² Kan parih leibatupawl kan ngaidam vekin kan leibapawl in ngaidam ve aw. ¹³ Cule hniksaknak sungah in hruai loin, miṭhalopai hnen ihsin in run sawn aw. Ziangahtile, uknak le huham le ropitnak cu a kumkhuain nangmai ta a si. Amen.’ ¹⁴ “Ziangahtile, nan parih mi thil tisual nan ngaidam asile vancung ih a um mi nan Pa khalin a lo ngaidam ve ding. ¹⁵ Asinan mi thil tisual nan ngaidam lo asile nan Pa khalin nan thil tisual a lo ngaidam ve lo ding. ¹⁶ “Cule rawl nan ulh tikah midepdepawl vekin riahsia mithmai in um hlah uh. Ziangahtile, annih cun rawl an ul ti mi in an hmuh theinak dingah an hmel an seawter. Thungai thu ka lo sim, annih cun an lawmman an ngah zo a si. ¹⁷ Asinan nang cun rawl na ulh tikah na lu hriak thih aw la, na hmai phiah aw. ¹⁸ Mi in rawl na ul ti hmu loin, zohman ih hmuhlonak ih um na Pa lawngin a hmuh theinak dingah cutin tuah aw. Cule zohman ih hmuh lo mi hmutu na Pa in langhnganin lawmman a lo pe ding. ¹⁹ “Tlap le sunhrul ih a siatsuah theinak le rukrupawl in an bauh ih, an ruk theinak hi leitlun ah nanmai hrangah hlawnthil khawl hlah uh. ²⁰ Asinan tlap le sunhrul ih siatsuah theilonak le rukrupawl tlain an bauh ih, an ruk theilonak hmun vancung ah nanmai hrangah hlawnthil cu khawl sawn uh. ²¹ Ziangahtile, nan hlawnthil umnak hmun ah nan thinlung khal a um ve ding. ²² “Mit cu taksaruangpumih meito a si. Curuangah na mit a harhdam asile tleu in na taksaruangpum a luahkhat ding. ²³ Asinan na mit a ṭhat lo asile thim in na taksaruangpi a luahkhat ding. Curuangah, na sungih um tleu cu a thim asile cui thim cu ziang tlukin so a natsat! ²⁴ “Zokhal in bawi pahnih a riankawp thei lo. Ziangahtile, pakhat a hua ding ih, pakhat a duhdaw ding. Cu lo asile pakhat parah rinum tahratin pakhat a hmuhsuam ding. Pathian le sumpai nan riankawp thei lo. ²⁵ “Cuti a si ruangah nan hnenah ka lo sim, nunnak thu ah ziang ka ei ding ih, ziang ka in ding tiah dawnhar hlah uh. Nan taksapum thu ah ziang kan hruh ding ti khalin dawnhar hlah uh. Rawl hnakin nunnak a thupisawn ih, hnipuan hnakin taksapum a thupisawn a si lo maw? ²⁶ Tlunzuang vatepawl tla khi zoh hnik uh. Thlaici an tuh lo, an at lo, cuam sung khalah rawl an khawl lo. Asinan vancung ih a um mi nan Pa in a cawm hai a si. Nannih cu annihpawl hnakin nan man nasazetin a khungsawn a si lo maw? ²⁷ Nanmah lakah dawnharnak ruangin zo in amai san lam dawng khat a bet thei? ²⁸ “Cun ziangah saw hnipuan thu ah nan dawn a har? Ramlak lily par tla khi ziangtin an ṭhang ti zohhliah hnik uh. Hna an ṭuan lo, pat khal an hnuk lo. ²⁹ Asinan, ka lo sim a si. Solomon rori hman a ropitnak hmuahhmuah ih a thawmawk lai hmanah hi lily parpawl lakih pakhatte vek hman a tluk lo. ³⁰ Nannih, zumnak malpawl, tuisun ah lo sungah a um ih, thaisun ah mi in thuk sungih an paih mi hrampi hman Pathian in cu tlukin a thawm asile nannih tla cu nasa sinsinin a lo thuam lo ding maw? ³¹ Curuangah dawnhar hlah uh la, ‘Ziang kan ei ding?’ asilole ‘Ziang kan in ding?’ asilole ‘Ziang kan hruh ding?’ tiah ti hlah uh. ³² Zentelpawl in cui thilpawl hmuahhmuah cu an hawl. Vancung ih a um mi nan Pa in cui thilpawl hmuahhmuah nan ṭul ti a thei. ³³ Asinan Pathian uknak le a dingfelnak cu hawl hmaisa uh. Cule cui thilpawl hmuahhmuah tla cu a lo pebet ding. ³⁴ Curuangah, thaisun hrangah dawnhar hlah uh. Ziangahtile, thaisun cun amahte in a dawn a har leh ding. Ni khat hrangih ni khat harsat cu a tawk a si,” tiah a ti.

¹ “Mi in thu an lo ṭhenlonak dingah, thu ṭhen hlah. ² Ziangahtile, mi thu na ṭhensaknak in mi in thu an lo ṭhen ve ding. Cule na mi tahnak khan tah na si ve ding. ³ “Nangmai mit sungih thingtluan hman ruat loin ziangah saw na unaupai mit sungih mithnawmte cu na zoh? ⁴ Cule, zoh hnik, nangmai mit sungah thingtluan a um laiah ziangtin na unaupai hnenah, ‘Na mithnawm ka lo cawihsak ding na ti ngam?’ ⁵ Midepdepa! Na mit sungih thingtluan cu hlawn hmaisata aw. Cule na unaupai mit sungih mithnawm cawih ding cu fiangten na hmu thei ding. ⁶ “A thianghlim mi thil cu uicopawl pe hlah uh. Cun nan keplungpawl cu vawk hmaiah thlak hlah uh. Cu lole an ke hnuaiah an pal ding ih, nan lam her in an lo taithlek thluh ding. ⁷ “Dil uh la pek nan si ding. Hawl uh la nan hmu ding. King uh la awnsak nan si ding. ⁸ Ziangahtile, a diltu zokhal a ngah ding. A hawltu cun a hmu ding. Cule a kingtu cu sangka awnsak a si ding. ⁹ “Nan lakih mi pakhat cu a fapa in sang dil sehla lungto a pe pei maw? ¹⁰ Asilole a fapa in nga dil sehla rul tur nei a pe pei maw? ¹¹ Nannih miṭhalopawl hmanin nan fale hnenah a ṭha mi thilpekpawl tla pek nan thiam asile vancung ih um nan Pa cun amah diltupawl hnenah thilpek tamsin a pe lo ding maw? ¹² Curuangah mi in nan parah tuah hai seh ti nan duh mi hmuahhmuah kha midang parah va tuah uh. Ziangahtile, cumi cun Dan thu le profetpawlih ngan mi thupawl a khaikhawm thluh a si. ¹³ “A fiak mi kawtka ihsin lut uh. Ziangahtile, kawtka kau le lamzin kau cun siatnak ah mi a hruai. Mi tampi cu cui lamzin ihsin an feh rero. ¹⁴ Ziangahtile, nunnak ih hruaitu kawtka cu a fiak ih, a lamzin khal a har. Cule mi malte lawngin cumi cu an hmungah. ¹⁵ “Profet deupawl kha ralring uh! Tuu phaw sin in nan hnenih an rat kha. Asinan an sung lam cu cinghnia koham an si. ¹⁶ Anmah cu an rah ihsin nan thei famkim ding. Milai in hling kung ihsin sabit rah le lenhling ihsin theipi an khawm dah kel maw? ¹⁷ Cuvekin thingkung ṭha kipin rah ṭha a rah ih, thingkung sia cun rah sia a rah. ¹⁸ Thingkung ṭha in rah sia a rah thei lo ih, thingkung sia in rah ṭha a rah thei lo. ¹⁹ Rah ṭha a rah lo mi thingkung kipin hauthluk an si ding ih, meisa sungah paih an si ding. ²⁰ Curuangah an rah ihsin nan rak theithiam ding. ²¹ “ ‘Bawipa, Bawipa,’ tiih i kotu hmuahhmuah in vancung uknak sungah an lut thluh lo ding. Asinan, vancung ih a um mi ka Pai duhnak a tuahtu lawng an lut ding. ²² Cui thuṭhennak ni ah mi tampi in, ‘Bawipa, Bawipa, na hmin in thu kan sim, na hmin in khawsepawl tla kan dawisuak ih, huham ih tuah mi mangbangza tampi na hmin in kan rak tuah a si lo maw?’ tiah in ti ding. ²³ Cule kei in an hnenah, ‘Ka lo thei dah lo. Nannih dan lo ih nungpawl ka hnen ihsin tlansuak uh,’ tiah fiangten ka ti hai ding. ²⁴ “Cuiruangah, zokhal ka hnen ihsin hi ka sim mi thupawl a thei ih, a tuahtu cu mifimpa vek a si. Cui mifimpa cun lungpi parah a inn a sak. ²⁵ Cule ruahpi a sur, ti a lian ih, thli a hrang. Thlipi in cui inn cu a nuai ciamco nan, a tlu lo. Ziangahtile, a hrampi cu lungpi parah a bun. ²⁶ Zokhal ka hnen ihsin hi ka sim mi thupawl thei ko na ih, a tuahlotu cu miaapa vek a si. Cui miaapa cun vunnel parah a inn a sak. ²⁷ Ruahpi a sur, ti a lian ih, thli a hrang. Thlipi in cui inn cu a nuai ih, a tlu. Nasazetin a cim,” tiah a ti. ²⁸ Cule hiti hi a rak si, Jesu in cui thupawl a sim ṭheh tikah, a thuzirh mi in mi tampi a mangbangter nasa. ²⁹ Ziangahtile, Danzirhtupawl vekin zirh loin, thuneihnak nei vekih a zirh ruangah a si.

¹ Tlang par ihsin Jesu a rung ṭum tikah mipi tam zetin an thlun. ² Ngai hnik, miphar pakhat a hnenah ra in a bia ih, “Bawipa, na duh ah cun i thiangter thei,” tiah a ti. ³ Cule Jesu cun a kut a suah ih a tham, “Ka duh a si, thiang aw,” tiah a ti. Cule hmakhatteah Jesu in cu pai pharnat cu a thiangter. ⁴ Cule Jesu in a hnenah, “Zohman sim lo dingin fimkhur aw. Asinan va feh aw la, puithiam hnenah na taksa va hmuh aw. Cule mi in an lo theihpinak dingah Mawsi thupek mi thilpek va hlan aw,” tiah a ti. ⁵ Cun Jesu cu Kapernaum khua ih a luh tikah, ralkap za hotu a hnenah a ra ih bawmnak a dil. ⁶ “Bawipa, ka hnenumpa cu zengnat bese zet tuar in inn ah a it,” tiah a ti. ⁷ Jesu in a hnenah, “Ka ra ding ih ka damter ding,” tiah a ti. ⁸ Asinan ralkap za hotu in, “Bawipa, ka luangpi hnuaiih nang ra dingah kei ka tlak lo. Ṭawng men aw la, ka hnenumpa cu a dam ko ding. ⁹ Ziangahtile, keimah khal mi thuneihnak hnuaiih um ka si ve ih, ka kut hnuaiah ralkap tla ka nei. Hi ralkappa hnenah, ‘Feh aw,’ ka ti le a feh. A dang pakhat hnenah, ‘Ra aw,’ ka ti le a ra. Ka hnenum hnenah, ‘Himi tuah aw,’ ka ti ih a tuah,” tiah a sawn. ¹⁰ Jesu in cui thu a theih tikah a mang a bang ih, amah thluntupawl hnenah, “Thungai thu ka lo sim, Israel-mi lakah hivek zumnak nasa ka hmu hrih lo! ¹¹ Nan hnenah ka lo sim a si, ni suahnak le ni tlaknak lam ihsin mi tampi an ra ding ih, Abraham le Isak le Jakob tla thawn vancung uknak ah an totlang ding. ¹² Asinan lalram fatepawl cu Pathian in leng lam thim lakah a hlawn hai ding. Cui hmun ah ṭap le hacang rial in an um ding,” tiah a ti. ¹³ Cule Jesu in ralkap za hotu hnenah, “Va tlung aw la, na zum vek khan na hrangah ka tuah ding,” tiah a ti. Cui tikcu cekci ah a hnenumpa cu a dam. ¹⁴ Peter-ih inn sungih Jesu a va luh tikah Peter nupi-ih nu kha khawsik nat tuar in a ih kha a hmu. ¹⁵ Jesu in a kut a tham ih a khawsik nat cu a reh. Cule a tho ih, anmahpawl cu a rian. ¹⁶ Cule zan lam a thlen tikah khawsepawlih pawlh mi, mi tampi Jesu hnenah an ratpi. Cule anih in khawse ṭhalopawl cu a ṭawngkam khat in a dawisuak ih, mina hmuahhmuah a damter. ¹⁷ Cumi cun profet Isaiah ih thil cang ding mi a sim mi cu a kimter. Isaiah in, “Kan cahlonakpawl tla cu a la ih, kan natnakpawl tla a phur,” tiah a ti. ¹⁸ Jesu in a kiangkapah mipi tam zet a hmuh tikah a dungthluntupawl kha tili khatlam ralih feh dingin thu a pe hai. ¹⁹ Cu tikah Danzirhtu pakhat a hnenah a ra ih, “Zirhtupa, na fehnak kipah ka lo thlun ding,” tiah a ti. ²⁰ Cule Jesu in a hnenah, “Sihalpawl in kua an nei ih, tlunzuang vatepawl in bu an nei. Asinan, Minung Fapa cun lu retnak ding hmun hman a nei lo,” tiah a ti. ²¹ Cun, a dungthluntu tampi lakih pakhat in Jesu hnenah, “Bawipa, va feh ih ka pa va phum hmaisakta i siang hram aw,” tiah a ti. ²² Asinan Jesu in a hnenah, “I thlun aw, mithipawl in an mithipawl cu phum hai seh,” tiah a ti. ²³ Cutin lawng sungih Jesu a luh tikah a dungthluntu mi tampi tlain an thlun. ²⁴ Ngai hnik, thlisia nasazet cu tili parah a ra ih, tisuar tlain an lawng cu a khuh. Asinan Jesu cu a itthat. ²⁵ Cule a dungthluntu mi hrekkhatpawl cu a hnenah an ra ih an ra ṭhang, “Bawipa, in run aw! Kan pil cuahco a si!” tiah an ti. ²⁶ Cule anih in an hnenah, “Nannih zumnak malpawl, ziangah saw nan ṭih?” tiah a ti hai. Cun a hung tho ih thlipi le tili cu a kawk hai. Cule tili cu a dai khepkhep. ²⁷ Cule, annihpawl cu an mang a bang ih, “Hi pa hi ziangvek minung a si pei, thlipi le tili khalin a thu an ngai hi?” tiah an ti. ²⁸ Jesu cu tili khatlam ral Gadara mipawlih ram sungah a thleng. Cu tawkah khawsepawlih pawlh mi, mi pahnih thlan hmun ihsin an ra ih, Jesu cu an tawng. Cute pahnih cu an hrohran tuk ruangah zohman in cui zin an zawh ngam lo. ²⁹ Cule, ngai hnik, “Pathian Fapa, Jesu, nang thawn ziang tiawk ding kan neih? A tikcu a thlen hlanah in hrem dingin na ra maw si?” tiah au in an ti. ³⁰ An hnen ihsin tawkfang a hlatnak hmun ah vawk rual tampi rawl an ei rero. ³¹ Cule khawsepawl in, “In dawisuak asile vawk rual sungih luh in siang hram aw,” tiah Jesu an dil. ³² Cule Jesu in an hnenah, “Feh uh,” tiah a ti. Cule cui mi pahnih sung ihsin an suak ih, vawk rual sungah an lut. Ngai hnik, vawk rual zate cu khamhrap ihsin tili sungah an tlanthla ih, ti sungah an thi ṭheh. ³³ Vawk kiltupawl cu an tlan ih, khaw sungah an feh. Vawkpawl parih thil cang mi hmuahhmuah le khawse pawlh mite parih thil cang mi cu an than. ³⁴ Cule ngai hnik, khaw sung mi hmuahhmuah cu Jesu tawng dingah an ra ih, an hmuh tikah an ram sung ihsin suak dingin an dil.

¹ Jesu cu lawng sungah a lut ih, khatlam ralah a kai ih amai khua a thleng. ² Cule, ngai hnik, mizeng pakhat cu a ihphah thawn Jesu hnenah an rak zawn. Jesu in an zumnak a hmuh tikah mizengpai hnenah cun, “Ka fa, hnangamten um aw, na sualpawl tla ngaidam ṭheh a si zo,” tiah a ti. ³ Cule, ngai hnik, Danzirhtu mi hrekkhatpawl in an thinlung sungin, “Hi pa hin Pathian a thangsiat a si!” tiah an ti. ⁴ Jesu in an ruahnakpawl cu a thei ih, “Ziangah nan thinlung in thil ṭha lo tla nan ruat? ⁵ Ziangahtile, ‘Na sualpawl tla ngaidam ṭheh a si zo,’ ti maw, ‘Tho aw la, feh aw ti a awldeuh?’ tiah a ti. ⁶ Sikhalsehla Minung Fapa in leitlun ah sualpawl ngaidam theinak thuneihnak a nei a si ti nan theihnak dingah hihi tuah a si,” tiah a ti ih, mizengpai hnenah, “Tho aw, na ihphah la aw la, na inn ah tlung aw,” tiah a ti. ⁷ Cule mizengpa cu a tho ih, a inn lamah a tlung. ⁸ Mipi in cumi cu an hmuh tikah an mang a bang ih, cuvek thuneihnak minung hnenih petu Pathian cu an thangṭhat. ⁹ Cui hmun ihsin Jesu cu a feh ih, siahkhawnnak buk ih Mathai an ti mi a to lai kha a hei hmu. Cule Jesu in a hnenah, “I thlun aw,” tiah a ti. Cule Mathai cu a tho ih, Jesu a thlun. ¹⁰ Cule hiti hin thil a cang, Jesu cu rawl ei dingin inn sungih a to laiah, ngai hnik, siahkhawngtu tampi le misualpawl an ra ih, Jesu le a dungthluntupawl thawi rawl eitlang in cabuai kil in an to. ¹¹ Cumi cu Farasipawl in an hmuh tikah a dungthluntupawl hnenah, “Ziangruangah nan zirhtupa cu siahkhawngtupawl le misualpawl thawi rawl an eitlang?” tiah an ti. ¹² Asinan Jesu in cui thu a theih tikah, “Miharhdampawl in sibawi an ṭul lo. Minapawl lawngin an ṭul. ¹³ Asinan va feh uh la, ‘Thawinak si loin zahngainak ka duh ti miih tican zir uh.’ Ziangahtile, midingfelpawl ko dingah ka ra lo. Misualpawl an sual sir dingih ko dingah ka ra sawn,” tiah a ti. ¹⁴ Cule John-ih dungthluntupawl cu Jesui hnenah an ra ih, “Kannih le Farasipawl cu rawl kan ul ṭheu nan ziangah saw na dungthluntupawl hmuah rawl an ulh ve lo?” tiah an ti. ¹⁵ Cule Jesu in an hnenah, “Mo neitupa an hnenih a um sungah cun mo lawmtupawl an riah a se thei lo a si lo maw? An hnen ihsin mo neitupa lakhloh ni a thleng leh ding. Cui canah rawl an ul leh ding. ¹⁶ “Zohman in a cawm thei mi puanthan thar belcawng cu hnipuan hlun parah an belh kel lo. Ziangahtile, an belh mi in a dir ding ih, a tlek cu a kausin ding. ¹⁷ Sabitti thar kha savun thawl hlun sungah an thun kel lo. An thun asile sabitti in savun thawl hlun cu a kekter ding, cule sabitti cu a dawk ding ih, savun thawl hlun khal cu a siat ding. Asinan, sabitti thar cu savun thawl thar sungah an thun tengteng ding a si. Cumi cun an pahnih in a kilhim ding,” tiah a ti. ¹⁸ Cui thupawl an hnenih a sim hai rero laiah, ngai hnik, sinakok uktu pakhat a ra ih, Jesui hmaiah a bawkkhup. Cule, “Atu teah ka fanu a thi. Asinan ra aw la, a parih na kut na suan ah cun a nung ding,” tiah a ti. ¹⁹ Cule Jesu cu a tho ih, cu pa cu a thlun. A dungthluntupawl khalin an thlun ve. ²⁰ Cule, ngai hnik, cu tawkah kum hleihnih sung thiput nat tuar nunau pakhat a rak um. Cu nu cu Jesui dungin a thlun ih, a kawrfual zim kha a tham. ²¹ Ziangruangah tile, “A kawrfual tal ka tham asile ka dam ding,” tiah a thinlung sungin amah le amah a tiaw. ²² Cule Jesu cu a her ih, nunaunu a hmuh tikah, “Ka fanu, hnangamten um aw. Na zumnak in a lo damter zo,” tiah a ti. Cule cui tikcucan teah nunaunu cu a dam. ²³ Jesu cu uktupai inn sungih a luh tikah phirivau tumtupawl le mipi hnawkbuai culci ih an um kha a hmu. ²⁴ Cule anih in, “Tlan uh, ziangahtile hi nauhaknu hi a thi lo, a itthat a si,” tiah a ti. Cu tikah Jesu cu an rak hnihsan. ²⁵ Mipi suahter thluh an si hnuah, Jesu cu a lut ih nauhaknui kut a vun kai ih, nauhaknu cu a hung tho. ²⁶ Cui thuthang cu cui ram hmuahhmuah ah a thang. ²⁷ Cu tawk hmun ihsin Jesu a fehsuak tikah mitcaw pahnih in Jesu cu an thlun. An au ih, “David Fapa, kan parah zahngainak nei hram aw!” tiah an ti. ²⁸ Cule Jesu inn sungih a luh tikah mitcaw pahnih cu a hnenah an ra ih, Jesu in an hnenah, “Hihi ka tuah thei ti nan zum maw?” tiah a ti hai. Annih in a hnenah, “Zum e, Bawipa,” tiah an ti. ²⁹ Cule Jesu in an mit a tham ih, “Nan zumnak vekin ka lo tuahsak ding,” tiah a ti. ³⁰ Cule an mit cu a vangter ih, an hnenah, “Zohman in hi thu hi thei hlah hai seh,” tiah khoh zetin a tiam hai. ³¹ Asinan, an fehsuak ih Jesui thu cu cui ram hmuahhmuah ah an than. ³² Cule an fehsuak laiah, ngai hnik, khawse pawlh mi, ṭawng thei lo pa pakhat kha Jesui hnenah an rak hruai. ³³ Jesu in khawsia a dawisuak hnuah ṭawng thei lo pa cu a ṭawng. Cule mipi cu an mang a bang ih, “Israel ram ah hi hlanah hivek thil a rak lang dah lo!” tiah an ti. ³⁴ Asinan Farasipawl cun, “Khawsepawlih hotu thawngin khawsepawl a dawi a si,” tiah an ti. ³⁵ Cule Jesu cu khawpipawl le khawtepawl hmuahhmuah tla a fangsuak ih, an sinakokpawl ah a zirh ih, Pathian uknak thuthangṭha a phuang. Cule mipi lakih nathrik phun zakip le natnak phun zakip a damter. ³⁶ Cun, Jesu in mipi kha a hmuh tikah a lainat hai. Ziangahtile, khaltu nei lo tuu bangin harsat tuar le vakdarh ih an um ruangah a si. ³⁷ Cule Jesu in a dungthluntupawl hnenah, “Fang ah ding a tam zet nan hnaṭuantu an mal. ³⁸ Curuangah fang ah ding neitu Bawipai hnenah a lo sungah hnaṭuantupawl a thlah theinak dingah thla cam uh,” tiah a ti.

¹ Cule Jesu in a dungthluntu hleihnihpawl a hnenah a kokhawm ih, thlarau bawrhhlawhpawl parih thuneihnak a pek hai. Cule annih in khawse bawrhhlawhpawl dawisuah theinak le nathrik phun zakip le natnak phun zakip damter theinak thuneihnak an nei. ² Apostol hleihnihpawlih hmin tla cu: Peter tiih an kawh mi, an hotupa Simon le a naupa Andru, Zebedi-ih fapa James le a naupa John, ³ Filip le Bartholomeo, Thomas le siahkhawngtu Mathai, Alfias-ih fapa James le Tadias tiih an kawh mi Lebbias, ⁴ Kanaan mi Simon le Jesu phiarsawmtu Judas Iskariot tla an si. ⁵ Cui hleihnihpawl cu Jesu in a thlah hai ih, an hnenah hitin thu a cah, “Zentelpawl lakah va feh hlah uh la, Samaria-mipawlih khuapawl ah va lut hlah uh. ⁶ Cu hnakin a hlo mi tuu run Israel sungkuapawl hnenah va feh sawn uh. ⁷ Nan va feh tikah, ‘Vancung uknak cu a nai zo a si,’ ti thucah hi sim uh. ⁸ Mina damter uh. Mithi thoter uh. Miphar thiangter uh. Khawsia dawisuak uh. Alakin nan rak ngah zo ih alakin pe uh. ⁹ Nan taiṭawn paisa bawm sungah sui si seh, ngun si seh, dar si seh keng hlah uh. ¹⁰ Cun, khualtlawnnak hrangah zal si seh, angki zun hnih si seh, kedam hlei si seh, kianghrawl si seh keng hlah uh. Ziangahtile, hnaṭuantu cu ei tlak a si. ¹¹ “Cule khawpi si seh, khawte si seh nan va luh tikah mitlingtlak zo a si ti sut uh. Cule cui khua nan suahsan hlan sung acui inn ah cun cam uh. ¹² Cule cui inn sungih nan va luh tikah cibai buk uh. ¹³ Cui inn cu a tlingtlak mi asile daihnak hrangih thlawsuah nan pek mi cu cui inn ah um seh. Asinan, cui inn cu a tlak lo asile thlawsuah nan pek mi cu nan parah kirsal seh. ¹⁴ Mi zokhal in an lo cohlang lo ih, nan thu tla an ngaithla duh lo asile cui inn asilole cui khua nan suahsan tikah nan ke ih leivut cu thingthlata uh. ¹⁵ Thungai thu ka lo sim, Pathian in thu a ṭhen ni ah acui khua hnakin Sodom khua le Gomorrah khua cu an tuar a dem sawn ding. ¹⁶ “Ngai hnik uh, cinghnia rual lakih tuu thlah vekin ka lo thlah a si. Curuangah rul vekin fim uh la thuro vekin pawikhawih loin um uh. ¹⁷ Asinan minungpawl kha va ralring uh. Ziangahtile, Sanhedrin hnenah an lo thlen ding ih, an sinakokpawl ah an lo vaw ding. ¹⁸ Keimai ruangah uktupawl le siangpahrangpawl hmaiah an lo hruai ding ih, anmah le Zentelpawl hnenah thutheihpitu nan si ding. ¹⁹ Asinan, anmahpawl hnenih an lo thlen tikah ziang ka ṭawng ding tiin le ziangtin ka ṭawng ding tiin nan dawnhar hlah uh. Ziangahtile, Thlarau Thianghlim in nan ṭawng ding mi cu cui tikcu teah a lo pe ding. ²⁰ Ziangahtile, a ṭawngtu ding cu nanmah nan si lo. Nan Pai Thlarau in nanmah hmang in a ṭawng ding a si. ²¹ “A unau in a unau lala kha thihnak ah a thlen ding ih, pa in a fate a thlen ding. Falepawl khalin an nu le pa an dodal ding ih, mi an thatter ding. ²² Keimai hmin ruangah mi hmuahhmuah in an lo hua ding. Asinan, a cemnet tiangih a tuarsuaktu cu runsuah a si ding. ²³ Asinan khaw pakhat ih an lo tiduhdah asile khaw dangah tlan uh. Ziangahtile, thungai thu ka lo sim, Israel ram ih khuapawl nan pal thluh hlanah Minung Fapa cu a ra ding. ²⁴ “Dungthluntu cu a zirhtupa hnakin a cungnungsawn lo ih siahhlawh khal a bawipa hnakin a cungnungsawn lo. ²⁵ Dungthluntu cu a zirhtupa tluk a si ih, siahhlawh khal a bawipa tluk asile a tawk a si. Intekpabik kha Beelzabub tiih an rak kawh asile a insungsangpawl cu ziang tluk nasa sinsinin an ko pei? ²⁶ Curuangah annihpawl kha ṭih hlah uh. Ziangahtile, phuanlang leh lo dingih khuh mi zianghman a um lo, theih leh lo dingih thuh mi khal zianghman a um lo. ²⁷ “Khawthim ih ka lo sim mi kha tleu ah va rel uh, cun nan hna kiang teih ka lo sim thektho mi kha mipi hnenah langhnganin phuang uh. ²⁸ Cule taksapum that thei naih, thlarau that theilotu minungpawl kha ṭih hlah uh. Cu hnakin taksapum le thlarau a pahnih ih Gehenna meisa sungih a siatsuah theitupa kha ṭih sawn uh. ²⁹ Mi in sunṭam pahnih kha assarion pakhat ah an zuar a si lo maw? Sihmansehla, nan Pa in a sian lo asile cui sunṭam pakhatte khal lei ah a tla lo ding. ³⁰ Cun, nan lu parih samphangpawl a zaten a siar thluh a si. ³¹ Curuangah, ṭih hlah uh sunṭam tampi hnakin nan man a khung sawn. ³² “Curuangah, zokhal milai hmaiih i ṭantu cu kei khalin vancung ih a um mi ka Pai hmaiah ka ṭan ve ding. ³³ Asinan, zokhal milai hmaiih i hnawngtu cu vancung ih a um mi ka Pai hmaiah ka hnawng ve ding. ³⁴ “Hi leitlun ah remnak run keng ih ra ah in ruat hlah uh. Remnak thlen dingah ka ra lo ih, ralnam thlengter dingah ka ra sawn a si. ³⁵ “Mi pakhat in a pa doter dingah, fanu in a nu doter dingah le mo in a ni doter dingah ka ratnak san a si. ³⁶ Mi pakhatih ralpawl tla cu amai insungsang mi lala an si ding. ³⁷ “Zokhal a pa simaw, a nu simaw keimah i duhdawt hnakih a duhdaw sawntu cu ka hrangah a tlak lo. Cun zokhal a fapa simaw, a fanu simaw a duhdaw sawntu cu ka hrangah a tlak lo. ³⁸ Cule zokhal amai khraws la tahratih i thlunlotu cu ka hrangah a tlak lo. ³⁹ A nunnak a hmutu cun, a nunnak a hloh ding. Keimai ruangih a nunnak a hlohtu cun a nunnak a hmu ding. ⁴⁰ “A lo cohlangtu cun keimah i cohlang a si. Cule keimah i cohlangtu cun i thlahtu khal a cohlang a si. ⁴¹ Profet pakhat kha profet hmin ih a cohlangtu cun profetih lawmman a ngah ding. Cun, midingfel pakhat kha midingfel hmin ih a cohlangtu cun midingfelpaih lawmman a ngah ding. ⁴² Cule zokhal dungthluntu hmin in in dingah tidai no khat hi nauhaktepawl lakih pakhat a petu cun, thungai thu ka lo sim, a lawmman a hloh hrimhrim lo ding,” tiah a ti.

¹ Cule hiti hi a si, Jesu in a dungthluntu hleihnihpawl thu a cah ṭheh hnuah cu tawk hmun ihsin cui kiangkap khuapawl ah thuzirh le thusim dingin a pawksuak. ² Cui canah thawnginn sungih um John in Khrih ih hnaṭuan mipawl tla a theih tikah a dungthluntupawl lak ihsin mi pahnih a hei thlah ih, ³ “Nangmah hi a ra ding mi pa cu na si maw? Asilole a dang kan rak thlir hrih ding saw? tiah John in a lo sut,” tiah a hnenah an ti. ⁴ Cule Jesu in a let hai ih an hnenah, “Va feh uh la John hnenah nan hmuh mi le nan theih mi tla va sim uh. ⁵ Mitcawpawl khua an hmu. Kebaipawl tla an feh. Cule mipharpawl an thiang. Hnasetpawl in an thei ih, mithipawl tla an tho. Cun, miretheipawl hnenah thuthangṭha phuan a si. ⁶ Mi zokhal keimah ruangih a tlubahlotu cu mihualvanṭha a si,” tiah a ti. ⁷ John-ih dungthluntupawl an tlun hnuah Jesu in John-ih thuhla mipi hnenih sim a thawk. “Ramṭhing ah ziang zoh dingah nan va feh? Thli ih a sem ruangih a hnin rero mi phai kung zoh dingah maw? ⁸ Ziang zoh dingah saw nan va feh? Hnipuan nem a hruhtupa zoh dingah maw nan feh? Ngai hnik, hnipuan nem hruhtupawl cu siangpahrang innpawl ah an um. ⁹ Ziang zoh ding bikah saw nan feh? Profet zoh dingah maw? Nan hnenah ka lo sim, a dik a si, John cu profet hnakin a ropisawn. ¹⁰ Ziangahtile, ‘Ngai hnik, na hmaiah ka palai ka thlah. Amah in na lamzin cu na hmaiah a sial ding,’ tiih a thuhla an ngan mi pa cu hi pa hi a si. ¹¹ “Thungai thu ka lo sim, nunau hrin mi lakah baptisma petu John hnakih ropi an um lo. Asinan, vancung uknak ih mitenaubik cu John hnakin a ropisawn a si. ¹² Asinan baptisma petu John rawng a bawl thawk ihsin tuisun tiangah mi in vancung uknak cu thahrum suah in an lut ih, mihrohrangpawl in cumi cu an la. ¹³ Ziangahtile, John a lang hlan tiang cu profetpawl hmuahhmuah le Dan in an rak simsung cia a si. ¹⁴ Cumi cu, nan pawm duh asile amah hi a ra ding mi pa Elijah cu a si. ¹⁵ Theih theinak hna a neitu cun thei seh! ¹⁶ “Tui san minungpawl hi ziang thawn ka khaikhin hai pei? Anmah cu dawrhmun ih a to mi nauhakpawl tla an bang. An rualpipawl tla ko in, ¹⁷ ‘Phirivau kan rak lo tumsak nan, nan lam lo. Mithi ṭahnak hlapawl tla kan lo saksak nan nan rak ṭap lo ti mi vek a si,’ tiah a ti. ¹⁸ Ziangahtile, John cu mi lakah rawl ei lo le sabitti in loin a ra. Cule annih in, ‘Anih cu khawsia a nei,’ tiah an ti. ¹⁹ Minung Fapa cu mi lakah ei le in in a ra. Cule annih in, ‘Zoh hnik uh, hi pa cu rawl pham le sabitti pham pa a si ih, siahkhawngtupawl le misualpawlih rualpi a si,’ tiah an ti. Cule mifimpawlih ṭawngkam cu mifimpawl in an theithiam,” tiah a ti. ²⁰ Cui canah Jesu in huham ih thil tampi a rak tuahnak khuapawl an sual an sir lo ruangah kawk a thawk. ²¹ “Maw Khorazin! Na hmakhua a pit. Maw Bethsaida! Na hmakhua a pit. Ziangahtile, huham in nan sungih thil tampi tuah mipawl hi Taiar khua le Sidon khua ah tuah rak si sehla an sual an sirnak a rei zo ding ih, buri sin in le vutcam lakah an um ding. ²² Asinan ka lo sim a si, thuṭhen ni ah cun nannih hnakin Taiar khua le Sidon khua tla an tuar a dem sawn ding. ²³ Nang Kapernaum khua, van tiang khaisan na si nan Mithikhua ah dirhthlak na si ding. Ziangahtile, huham in na sungih tuah mi thil tampi tla hi Sodom khua ah tuah rak si sehla cu tuini tiangin a tang lai ding. ²⁴ Asinan, nan hnenah ka lo sim a si, nanmah hnakin Sodom ram in thuṭhen ni ah cun a tuar dem sawn ding,” tiah a ti. ²⁵ Cui canah cun Jesu in, “Maw ka Pa, lei le van ih Lal, ka lo thangṭhat a si. Ziangahtile, nang cun hi thilpawl tla hi mifim le mithiampawl hnen ihsin na thup ih, mi menmen hnen tla ah na rak phuanglang. ²⁶ A si, ka Pa, cutivekih na tuah mi cun na lung a lo awiter zet a si. ²⁷ “Ka Pa in thil ziang hmuahhmuah ka hnenah i pe zo. Pa siarlo zohman in Fapa hi an thei lo. Cule Fapa siarlo zohman in le Fapa in an hnenih phuanlang a duh mipawl siarlo in Pa an thei lo. ²⁸ “Nannih hnaṭuan har zet a ṭuantupawl le thilrit a phur mipawl hmuahhmuah ka hnenah ra uh la ka lo cawlhahdamter ding. ²⁹ Nan parah ka kawn bat uh la ka hnen ihsin zir uh. Ziangahtile, kei cu nunnem mi le thinlung tangdawr mi ka si ih, nan thlarau hrangah cawlhhahdamnak nan hmu ding. ³⁰ Ziangahtile, keiih kawn cu hman a nuam ih, ka phur khal a zang,” tiah a ti.

¹ Cui canah Jesu cu Sabbath Ni ah sangvut lo lak ihsin a feh. Cule a dungthluntupawl cu an ril a rawng ih, sangvut vui an sik ih ei an thawk. ² Farasipawl in cumi cu an hmuh tikah Jesui hnenah, “Zoh hnik, na dungthluntupawl cun Dan in Sabbath Ni ih tuah a sian lo mi an tuah hi,” tiah an ti. ³ Asinan anih in an hnenah, “David le a rualpipawl an ril a rawn laiah ziang an tuah ti kha nan rak siar lo maw si? ⁴ David cu Pathian inn sungah a lut ih, Dan ih a sian lo mi sangserh cu a rualpipawl thawn an ei. Cui sangpawl tla cu puithiampawl lawngih ei thei mi a si. ⁵ Cu lole puithiampawl in ziang an tuah ti Dan sungah nan siar dah maw? Puithiampawl in Sabbath Ni ah temple sungah Sabbath danpawl tla an pahbal a si khalle annih cu mawhsualnak nei loin an um a si lo maw? ⁶ Ka lo sim a si, temple hnakih ropisawn mi hi tawkah a um a si. ⁷ ‘Thawinak hnakin zahngainak ka duh sawn a si,’ ti ngan miih tican thei uhla cu mawh nei lo mi cu thiamlo nan rak coter lo ding nan. ⁸ Ziangahtile, Minung Fapa cu Sabbath tlun khalah Lal a si,” tiah a ti. ⁹ Cule, cui hmun ihsin Jesu cu a feh ih, an pumkhawmnak sinakok sungah a lut. ¹⁰ Cule, ngai hnik, cu tawkah kutropa pakhat a rak um, cule Jesu sual an puh theinak dingah, “Sabbath Ni ah Dan in mi damter a siang maw?” tiah Jesui hnenah hi thusuhnak hi an sut. ¹¹ Cule, Jesu in, “Thuṭhimnakah nanmah lakah mi pakhat cu Sabbath Ni ah a neihsun tuu kha khur sungah tla sehla lasuak loin a um ding maw? ¹² Minung cu tuu hnakin nasazetin a man a khung a si. Curuangah Sabbath Nipawl ih thil ṭha tuah cu Dan in a thiang a si,” tiah a ti. ¹³ Cule, cu pai hnenah Jesu in, “Na kut hawi hnik,” tiah a ti. Cule a kut cu a hun hawi ih, a khatlam vekin a dam. ¹⁴ Cule Farasipawl cu an suak ih, Jesu thah theinak ding thu an rawnawkhawm. ¹⁵ Asinan Jesu in cumi cu a theih tikah cu tawk hmun ihsin a fehsuak. Cule mi burpi in an thlun ih, an zaten a damter hai. ¹⁶ Cun, an hnenah a thuhla midang tla theihter lo dingin khoh zetin thu a pe hai. ¹⁷ Cuti zawng cun profet Isaiah ih thil cang ding mi a sim mi cu a thlengkimter. ¹⁸ Isaiah in, “Ngai hnik, hihi ka rak hril mi ka siahhlawh cu a si. Ka duhdawt zet mi a si ih, ka thinlung cu a parah a lung a awi zet. A parah ka Thlarau ka ret ding ih, anih in Zentelpawl hnenah diknak thu a phuang ding. ¹⁹ Anih cun mi a to lo ding ih, a au fawn lo ding. Zohman in lamzinpawl ah a aw an thei lo ding. ²⁰ Diknak cu nehnak ih a hruai lai hlanlo mi ih an rak palbet zo mi phai kung khal a khiak lo ding ih, a khu rero mi patpar hman a timit lo ding. ²¹ Cule Zentelpawl in a hmin ah ruahsannak an nei ding,” tiah a ti. ²² Cule khawse pawlh mi, mitcaw le ṭawng thei lo pa pakhat Jesui hnenah an rak hruai. Cui mitcaw le ṭawng thei lo pa cu Jesu in a damter ih, cu pa cu a ṭawng thei ih, khua a hmu. ²³ Cule mipi hmuahhmuah an mang a bang zet ih, “Hi pa hi David-ih Fapa a si ko lo maw?” tiah an ti. ²⁴ Asinan, Farasipawl in cui thu an theih tikah, “Hi pa in khawsepawl a dawisuak theinak cu khawsepawlih lal Beelzabub thawngin a si,” tiah an ti. ²⁵ Cule Jesu in an ruahnakpawl tla a thei ih an hnenah, “Ziang ram khal ṭhenaw ih amah le amah a doaw mi cu a siatral ding. Cun ziang khua khal si seh, ziang insang khal si seh ṭhenaw ih amah le amah a doaw mi cu a dingsuak thei lo ding. ²⁶ Setan in Setan lala a dawisuak asile amah le amah a doaw ih a ṭhenaw. Ziangtin saw a uknak cu a dinsuak thei ding? ²⁷ Beelzabub thawngin khawsepawl ka dawisuak asile nan fapalepawl in teh zo thawngin an dawisuak? Cu mi ruangah anmah cu nan thuṭhentu an si ding. ²⁸ Asinan Pathian Thlarau thawngin khawsepawl ka dawisuak asile Pathian uknak cu nan hnenah a rung thleng zo taktak a si. ²⁹ “Mi pakhat in micakpa cu a ṭembet hmaisakta lo ah cun ziangtin saw micakpai inn ah lut in a thilri a laksak thei ding? A ṭembet hnu lawngah a inn sung ihsin a thilripawl a laksak thei ding. ³⁰ Ka lamih a ṭanglotu cu i dodaltu a si ih, i finkhawmpilotu cun a ṭhekdarh a si. ³¹ “Curuangah ka lo sim a si, mi ih an tuah mi sual phun zakip le Pathian an thangsiatnak ṭawngkampawl cu ngaidam a si ding. Asinan zokhal Thlarau Thianghlim a thangsiattu cu ngaidam a si lo ding. ³² Cule zokhal Minung Fapa a thangsiattu cu ngaidam a si ding. Asinan zokhal Thlarau Thianghlim thangsiattu cu tui sanah si seh, a ra lai ding mi sanah si seh ngaidam a si lo ding. ³³ “Thingkung cu ṭha ko tuah aw la, a rah khal a ṭha ding. Cu lole thingkung cu se ko tuah aw la, a rah khal a se ding. Ziangahtile, mi in thingkung cu a rah in an thei. ³⁴ Nannih cu rul tur nei cithlahpawl nan si. Miṭhalo nan si laiah ziangtin a ṭha mi nan ṭawng thei ding? Ziangahtile, kaa cun thinlung sungih a khat mi a ṭawng a si. ³⁵ Miṭha cun a thinlung sungih hlawnthil ṭha a khawl mi a suah ih, miṭhalo cun a thinlung sungih hlawnthil ṭha lo a khawlkhawm mi a suah. ³⁶ Asinan ka lo sim a si, minungpawl in ralring lo ih an ṭawng mi kip kha thuṭhen ni ah ziangruangah an ṭawng ti an relsuak leh ding. ³⁷ Ziangahtile, na ṭawngkam ruangah Pathian in thiam a lo coter ding ih, na ṭawngkampawl lala ruangah thiamlo a lo coter ding,” tiah a ti. ³⁸ Cui canah Danzirhtu hrekkhatpawl le Farasi mi hrekkhatpawl in, “Zirhtupa, na hnen ihsin hminsinnak hmuh kan duh,” tiah an sawn. ³⁹ Asinan anih in an hnenah, “Nannih tui san minungpawl hi miṭhalo nan si ih, nan uire a si. Nannih cun hminsinnak nan duh zet, asinan profet Jonah-ih hminsinnak siarlo, hminsinnak dang Pathian in a lo pe lo ding. ⁴⁰ Ziangahtile, Jonah cu ngapi pum sungih ni thum le zan thum sung a um bangin, Minung Fapa khal leilung sungah ni thum le zan thum sung a um ve ding. ⁴¹ Nineveh khaw mipawl cu thuṭhen ni ah an ding ding ih, tui san minungpawl tla dokalh in thiamlo an coh ding. Ziangahtile, Jonah in thu a sim tikah an sual an sir. Cule, ngai hnik, Jonah hnakih ropisawn hi tawkah hin a um a si. ⁴² Thlang lam siangpahrangnu khal thuṭhen ni ah cun tui san minungpawl dokalh in a tho ding ih, thiamlo a coh hai ding. Ziangahtile, Solomon-ih fimnak ngaithla dingah leilung deng ihsin a ra. Ngai hnik, Solomon hnakih ropisawn hi tawkah hin a um a si, tiah a sang hai. ⁴³ “Mi pakhat sung ihsin thlarau bawrhhlawh a suah tikah cui khawsia cu cawlhnak hawl in ramcar hmunpawl tla ah a vak rero nan a hmu lo. ⁴⁴ Cule, ‘Ka suahsan mi inn ah ka kirsal ding,’ tiah a ti. Cutin, a va feh ih acui inn cu kawlawng le phiahfai le ceimawi in a hmu. ⁴⁵ Cule a feh ih, amah hnakih sualralsawn mi a dang khawsia pasarih tla a va hruai ih, cui hmun ah cun an lut ih an um. Cu pai cemnetnak cu a thawk hnakin a sesawn. Cuvekin tui san minung sualralpawl hnen khalah a si ve ding,” tiah a ti. ⁴⁶ Mipi hnenih Jesu a ṭawng rero laiah, ngai hnik, a nu le a naupalepawl cu leng ah an ding. Jesu kha biak an duh. ⁴⁷ Cule mi pakhat in Jesui hnenah, “Zoh hnik, na nu le na naupalepawl cu nangmah lo biak duh in inn leng ah an ding,” tiah a sim. ⁴⁸ Cule Jesu in, “Ka nu cu zo a si ih, ka naupalepawl cu zo an si?” tiah a hnenih thusimtupa hnenah cun a let. ⁴⁹ Cun, Jesu cun a dungthluntupawl lam kha a kut in a khih ih, “Ngai hnik, hipawl hi ka nu le ka naupalepawl cu an si. ⁵⁰ Ziangahtile, vancung ih a um mi ka Pai duhnak a tuahtu zokhal ka naupa le ka farnu le ka nu an si,” tiah a ti.

¹ Cui ni thothoah Jesu cu cui inn ihsin a suak ih, tili kapah a to. ² Mipi tampi in an kulh ruangah Jesu cu lawng sungah a lut. Ti kapih mipi hmuahhmuah an din laiah Jesu cu lawng sungah a to. ³ Cule tahṭhimnakpawl hmang in an hnenah thu tampi a sim, “Ngai hnik, thlaici vawrhtu cu thlaici vawrh dingin a fehsuak. ⁴ Cule thlaici cu a vawrh ih, a hrekkhat cu lamzin kap tluanah an tla ih, vatepawl tla an ra ih, an cuk thluh. ⁵ Cun, a hrekkhat cu lung tampi umnak hmun lei se dap ah an tla. Lei a sah lo ruangah thlaici cu an keuh lohli. ⁶ Ni a hung sat tikah thlai ṭopawl cu nisa in a em hai ih, hram an neih lo ruangah an ro ṭheh. ⁷ Cule, thlaici dangpawl tla cu hlingrul lakah an tla ih, hlingrul an ṭhan tikah thlai kungpawl kha an zap. ⁸ Asinan, thlaici dangpawl cu leiram ṭha ah an tla ih, rah an suah. A hrekkhat cu a let zakhat, hrekkhat cu a let sawmruk, hrekkhat cu a let sawmthum rah an suah. ⁹ Theih theinak hna a neitu cun thei seh!” tiah a ti. ¹⁰ Cule dungthluntupawl cu a hnenah an ra ih, “Ziangruangah mipi hnenah tahṭhimnak hmang ih thu na sim?” tiah an sut. ¹¹ Cule anih in an hnenah, “Ziangahtile, vancung uknak thu thawn pehparawin thuthuppawl theihnak Pathian in nan hnenah a lo pe zo. Cumi cu midang hnenah a rak pe lo. ¹² Ziangahtile, a neitu zokhal pek a si ding ih, tam sinsinin a nei ding. Asinan a neilotu zokhal cu a neihsun hman laksak a si ding. ¹³ Himi ruangah an hnenah tahṭhimnak in thu ka sim a si. Ziangahtile, an hmu nan theihthiamnak thawn an hmu lo. An hna in an thei nan an thei taktak lo ih a theih khal an theithiam lo. ¹⁴ Profet Isaiah in, ‘Hna cun nan thei ding nan, nan theithiam hrimhrim lo ding. A hmuh cu nan hmu ding nan theihthiamnak thawn nan hmu hrimhrim lo ding. ¹⁵ Ziangahtile, hi minungpawlih thinlung cu a cawlawl ih hnaset vekin an um ih, an mit khal an rak sing. Cu lo asile, an mit in an hmu ding, an hna in an thei ding ih, an thinlung in an theithiam ding. Cule an thinlung an hawikir ding ih ka damter hai ding,’ tiih a rak ngan mi cu anmah ah a thlengkim a si. ¹⁶ “Nan mit in a hmuh ruangah nan mit cu mit hualvanṭha an si. Nan hna in a theih ruangah nan hna cu hna hualvanṭha an si. ¹⁷ Thungai thu ka lo sim, profet tampi le midingfelpawl in nan hmuh mipawl hi hmuh an rak hiar zet nan an rak hmu lo. Nan hna ih nan rak theih mi thilpawl hi theih an rak hiar zet nan an rak thei lo. ¹⁸ “Curuangah thlaici vawrh tahṭhimnak ih tican hi ngaithla hnik uh. ¹⁹ Mi pakhatkhat in Pathian uknak thawn pehparawin Pathian thu a thei ih, cumi cu a theithiam lo. Cule miṭhalopa a ra ih, thlaici vawrhtu in a thinlung sungih a vawrh mi Pathian thu cu a lakhlosak. Cumi cu thlaici vawrhtu in lamzin kap tluanih a vawrh mi thlaici tla an si. ²⁰ Lung tampi umnak ih a vawrh mi thlaici cu Pathian thu a thei ih lungawi zetin a cohlang lohlitu vek a si. ²¹ Asinan, amah ah hram a nei lo ih, can reilote sung lawng a daih. Pathian thu ruangah harsatnak a ra thleng ih, tiduhdahnak a tuar tikah a tlu lohli. ²² Cule thlaici vawrhtu in hlingrul lakih a vawrh mi thlaicipawl tla cu Pathian thu a thei ko naih tui san dawnharnak le lennak ih bumnak in cui thu cu a zap ih, rah nei lo ih a cang mi vek a si. ²³ Cule thlaici vawrhtu in leiram ṭhatnak ih a vawrh mi thlaicipawl cu Pathian thu a thei ih cumi cu a theithiam. Rah a suah ih, hrekkhat cu a let zakhat, hrekkhat cu a let sawmruk, hrekkhat cu a let sawmthum ih rah suahtu vek a si,” tiah a sang hai. ²⁴ Jesu in an hnenah tahṭhimnak dang a sim, “Vancung uknak cu mi pakhat a lo sungih thlaici ṭha vawrhtupa vek a si. ²⁵ Minungpawl an ihthah laiah, a ralpa cu a ra ih sangvut lakah sangvut ci lem a vawrh ih, a fehhlo. ²⁶ Asinan, sangvut a hung ṭhang ih a vuih tikah sangvut lempawl khal cu an lang ve. ²⁷ Cule intekpai siahhlawhpawl cu a hnenah an feh ih, ‘Ka pu, na lo sungah thlaici ṭha na vawrh a si lo maw? Khui lam ihsin saw sangvut lem an rat?’ tiah an ti. ²⁸ Cule anih in an hnenah, ‘Cumi cu ralpa in a rak tuah a si,’ tiah a ti. Cun, a siahhlawhpawl in a hnenah, ‘Kan feh pei ih, kan phawi hai ding na duh maw?’ tiah an ti. ²⁹ Asinan anih in, ‘Phawi hlah uh. Ziangahtile, sangvut lem nan phawi tikah sangvut kung tla nan phawicih pang ding. ³⁰ Sangvut ah a cut hlanlo sangvut kung le sangvut lem cu ṭhangtlang ko hai seh. Cule sangvut ah a cut tikah sangvut attupawl hnenah, “A hmaisabikah sangvut lem kha khawm uh la urkang dingah tawm uh. Cui hnuah ka cuam sungah rawl cu khawm uh,” tiah ka ti hai ding,’ ” tiah a ti. ³¹ Cun Jesu in an hnenah tahṭhimnak dang a sim, “Vancung uknak cu mi pakhat in anṭam ci a lak ih a lo sungih a vawrh mi vek a si. ³² Anṭam ci cu ci hmuahhmuah lakih a fatebik mi asinan a hung ṭhan tikah cun hanghnah hangrah dang hmuahhmuah hnakin a tumsawn. Kung bukpi ah a cang ih, tlunzuang vatepawl tla an ra ih, a hngeṭekpawl ah bu an sak,” tiah a ti. ³³ Cule an hnenah a dang tahṭhimnak a simsal, “Vancung uknak cu nunau pakhat in thilnu keng tahratin sangphut saton thum sungah phum ih, sangphut hmuahhmuah thotertu thilnu vek a si,” tiah a ti. ³⁴ Jesu in cui thupawl hmuahhmuah cu mipi hnenah tahṭhimnakpawl tlain a sim. An hnenah tahṭhimnak tel loin zianghman a sim lo. ³⁵ Cutivek cun profet in thil cang ding mi a sim mi cu a thlengkimter. Profet in, “Tahṭhimnak in ka kaa ka ang ding. Leitlun hramthawk ihsin Pathian in a rak thuh mipawl cu ka ṭawngsuak ding,” tiah a ti. ³⁶ Cui hnuah Jesu in mipipawl kha a tlunter hai ih, inn sungah a lut. Cule a dungthluntupawl kha a hnenah an ra ih, “Lo sungih sangvut lem tahṭhimnak kha in simfiang aw,” tiah an ti. ³⁷ Cule anih in, “Minung Fapa hi thlaici ṭha vawrhtu cu a si. ³⁸ Lo cu hi leitlun hi a si. Cule thlaici ṭha ti mi cu lalram mipawl an si. Cule sangvut lem cu misualralpai mipawl tla an si. ³⁹ Sangvut lem rak vawrhtu ralpa cu Diabol a si. Sangvut ah ti mi cu san cemnak a si ih, sangvut attupawl cu vancungmi an si. ⁴⁰ Milaipawl in sangvut lem cu an khawm ih, meisa ih an ur bangin san cemnak ah cun a si ve ding. ⁴¹ Minung Fapa in a vancungmipawl a thlah ding ih, a uknak sung ihsin mi a tlutertupawl hmuahhmuah le dan lo i nungpawl hmuahhmuah an hlawnsuak ding. ⁴² Cule cuipawl cu meipi sungah an paih ding. Cui hmun ah cun an ṭap ding ih, an hacang an rial ding. ⁴³ Midingfelpawl cu an Pai uknak sungah ni bangin an tlang ding. Theih theinak hna a neitu cun thei seh! ⁴⁴ “Cun, vancung uknak cu lo sungih thuh mi hlawnthil vek a si fawn. Mi pakhat in cumi cu a hmuh tikah a thup ih, a lungawi tuk ruangah a feh ih, a neih mi hmuahhmuah tla a zuar ih cui lo cu a lei. ⁴⁵ “Vancung uknak cu keplung ṭhabik hawltu sumtuahtupa thawn a bangaw fawn. ⁴⁶ Cu Pa in cui keplung mankhung a hmuh tikah a feh ih, a neih mi hmuahhmuah a zuar ih, cumi cu a lei. ⁴⁷ “Vancung uknak cu mi in tifinriat sungih an vawrh mi sur vek a si fawn. Cumi cun nga phun zakip a khawm. ⁴⁸ Cui sur a khah tikah ngakaitupawl in sur cu ti kapah an dirsuak. Cule an to ih, nga ṭhapawl cu an bawm sungpawl ah an retkhawm ih, nga ṭhalopawl cu an hlawnhlo. ⁴⁹ Cuvekin san cemnak ah cun a si ding. Vancungmipawl cu an fehsuak ding ih, midingfelpawl hnen ihsin miṭhalopawl cu an ṭhen ding. ⁵⁰ Cule miṭhalopawl cu meipi sungah an paih ding. Cui hmun ah cun an ṭap ding ih, an hacang an rial ding,” tiah a sang hai. ⁵¹ Jesu in, “Hi bang thilpawl hmuahhmuah tla hi nan rak theithiam maw?” tiah a ti. Cule annih in a hnenah, “Kan theithiam a si, Bawipa,” tiah an ti. ⁵² Cule anih in an hnenah, “Cu mi ruangah Danzirhtu zokhal vancung uknak dungthluntu ih a cangtu cu a thil retnak sung ihsin thil hlunpawl le thil tharpawl tla a suahtu inn neitupa vek a si,” tiah a ti. ⁵³ Cule hiti hi a si, Jesu in cui tahṭhimnakpawl a sim ṭheh tikah cui hmun ihsin a ṭhawn. ⁵⁴ Amai khua a va thlen tikah an sinakok sungah thuzirh a thawk. A thuzirhdan cun an mang a bangter ngaingai ih, “Hi pa hin khuitawk ihsin hi fimnak le hi huham ih tuah mi thilpawl tla hi a ngah a si pei? ⁵⁵ Hi pa cu lettamapai fapa a si ih, a nu cu Mary le a naupalepawl cu James, Joses, Simon le Judas an ti mi pa kha a si lo maw? ⁵⁶ Cun, a farnulepawl hmuahhmuah tla kan hnenah an um a si lo maw? Khui lam ihsin hi pa hin hi thilpawl hmuahhmuah hi a ngah a si pei?” tiah an ti. ⁵⁷ Cule amai ruangah an zum thei lo. Asinan, Jesu in an hnenah, “Profet cu amai khaw mi, amai insang siarlo cun an upat,” tiah a ti. ⁵⁸ Cu tawkah huham ih tuah mi thil tampi a tuah lo. Ziangahtile, an rak zum lo.

¹ Cui canah Herod Tetrak in Jesui hminthanzia a rak thei. ² Cule a siahhlawhpawl hnenah, “Hi pa cu baptisma petu John a si. Mithi lak ihsin a tho a si. Curuangah huham ih tuah mi thilpawl cu amah ah an lang a si,” tiah a ti. ³ Ziangahtile, hi hlanah Herod in a unaupa Filip nupi Herodias ruangah John cu a kaihter. An ṭawn ih thawng ah a thlakter hai. ⁴ Ziangahtile, John in a hnenah, “Dan in anih na neih ding a lo sen lo,” tiah a ti. ⁵ Cule Herod in John thah ding a duh zet nan mipi a ṭih. Ziangahtile, John cu profet ah an ruat. ⁶ Asinan Herod-ih suahcam a thlen tikah Herodias-ih fanu cu Herod le a mipipawl hmaiah a lam ih, Herod a lungawiter zet. ⁷ Cule Herod in a hnenah a dil mi pohpoh pe dingah sesam in thu a kam. ⁸ A nu ih a rak fawrh cia vekin, “Kheng in baptisma petu John-ih lu kha atu ah hi tawkah i rak pe aw,” tiah a ti. ⁹ Cumi cun siangpahrang a riah a seter ngaingai. Asinan, sesam in thu a rak kam zo ruangah le a rawl kilpipawl ruangah pe dingin thu a pe. ¹⁰ Cule thawnginn sungah John-ih lu va tan dingin mi a thlah. ¹¹ Cule John-ih lu cu kheng in an keng ih, cui nunaunute cu an pe. Cule anih in a nu a pesin. ¹² Cule John-ih dungthluntupawl an feh ih, a ruak cu an la ih an phum. Cui hnuah an ra ih, Jesu an sim. ¹³ Cui thu cu Jesu in a theih tikah cui hmun ihsin a sip ih, lawng in amahte lawngin ramṭhing ah a feh. Cui thu cu mipi in an theih tikah an khua cio ihsin ke in an pawksuak ih, Jesu an thlun. ¹⁴ Jesu cu a fehsuak ih, mi burpi a hmuh tikah an parah lainatnak a nei. Cule an minapawl a damter. ¹⁵ Zan lam a thlen tikah a dungthluntupawl a hnenah an ra ih, “Hi hmun hi ramṭhing a si ih, khua khal a sim zo. Khaw sungpawl ah feh in anmai hrangih rawl an lei theinak dingah mipipawl kha thlah hai aw,” tiah an ti. ¹⁶ Asinan Jesu in an hnenah, “Annih feh a ṭul lo. An ei ding rawl pe uh,” tiah a ti. ¹⁷ Asinan annih in a hnenah, “Hi tawkah sang hlawm nga le nga pahnih lawng kan nei,” tiah an ti. ¹⁸ Cule anih in, “Cupawl cu hi tawkah ka hnenah rak keng uh,” tiah a ti. ¹⁹ Cule mipipawl cu hrampi parih to dingin thu a pe hai. Cule sang hlawm nga le nga pahnih cu a lak ih, van lam hawi in lungawithu a sim. Cun, a phel hnuah sang cu a dungthluntupawl a pek. Cule a dungthluntupawl in mipi an pe. ²⁰ Cun, an zaten an ei ih an khawp zet. Dungthluntupawl in an hlah mi nepnawi an sar ih, bawmte hleihnih a khat. ²¹ A eitu patling hlirah thawngnga hrawng an si. Cuitlunah nunaupawl le nauhakpawl an um lai. ²² Cule Jesu in mipipawl a tlunter hai laiah amai hlanah tili khatlam ralah rak fehsung dingin a dungthluntupawl cu lawng sungah a luhter lohli. ²³ Mipipawl a tlunter ṭheh hnuah thla cam dingin amah lawng tlang parah a kai. Zan a thlen tikah cu tawkah cun amahte lawng a um. ²⁴ Lawng cu tili laifangah a um ih, thlipi kha anmah lamih a rak hran ruangah tisuar in an lawng cu suk le so ah a then ciamco. ²⁵ Cun, zan sentari kil a ṭum litnak ah Jesu cu anmah lam panin tili parah a feh. ²⁶ Ti parih a feh kha a dungthluntupawl in an hmuh tikah an ṭih zet. “Thla a si,” tiah an ti. Cule ṭih in an au ciamco. ²⁷ Asinan hmakhatteah Jesu in an hnenah, “Hnangamten um uh. Keimah sokhaw ka si. Ṭih hlah uh,” tiah a ti hai. ²⁸ Cule Peter in a hnenah, “Bawipa, nangmah na si le ti parin na hnenih feh dingah thu i pe aw,” tiah a ti. ²⁹ Cule Jesu in, “Ra aw,” tiah a ti ih, Peter cu lawng sung ihsin a suak ih, ti parin Jesu lam panin a feh. ³⁰ Asinan, thli a cak tuk ti kha a hmuh tikah Peter in a ṭih. Cule pil a thawk ih, “Bawipa, i run aw,” tiah a au. ³¹ Hmakhatteah Jesu in a kut a hei dawh ih, Peter cu a kai. Cule a hnenah, “Maw nang zumnak malpa, ziangah saw na rak rinhlelh?” tiah a ti. ³² Cule lawng sungih an luh tikah thlipi cu a reh. ³³ Cule lawng sungih um mipawl in Jesu cu an bia ih, “Nangmah cu Pathian Fapa rori na si,” tiah an ti. ³⁴ Tili an hei kan hnuah Genesareth ram an va thleng. ³⁵ Cu tawkih minungpawl in Jesu a si ti an theihthiam tikah acui ram kiangkappawl hmuahhmuah ah mi an thlah ih, a hnenah mina hmuahhmuah an rak keng. ³⁶ Cule, a hnipuan zimte tal thamter siang dingin Jesu cu an dil. Cule a thamngahtu hmuahhmuah in an dam.

¹ Cule Danzirhtupawl le Farasipawl kha Jerusalem ihsin Jesui hnenah an ra. ² “Ziangruangah na dungthluntupawl in kan pupapawlih thurosiah an thlun lo? Ziangah cu mi kan lo sut tile rawl an ei tikah an kut an khawlh lo,” tiah an ti. ³ Cule Jesu in an hnenah, “Nannih teh ziangah saw nan pupapawlih thurosiah ruangah Pathian thupek nan thlun lo? ⁴ Ziangahtile, Pathian in, ‘Na nu le na pa upat aw,’ tiin le ‘Zokhal a pa si seh, a nu si seh a camsetu cu thah a si ding,’ a ti. ⁵ Asinan, nannih Farasipawl cun, ‘Mi zokhal in a pa asilole a nui hnenah, “Ka hnen ihsin na rak ngah ding mi ziangkhal Pathian hnenih thilpek a si,” tiah nan ti ih, cule cu pa cu a nu le a pai hnenah mawhphurhnak a nei nawn lo,’ tiah nan ti. ⁶ Cuti cun nan thurosiah ruangah Pathian thupek cu zianghmanlo ah nan canter. ⁷ Nannih cu midepde nan si. Isaiah in nan thuhla a sim tikah, a tiṭha riai a si. ⁸ ‘Hi minungpawl cun an kaa thawn in ra naih ih, an hmur thawn in upat. Asinan an thinlung cu ka hnen ihsin a hlat zet ding. ⁹ In biaknak cu alak a si. An thurin zirh mipawl tla cu minungih thupek men an si a ti,’” tiah a let hai. ¹⁰ Cule Jesu in mipipawl a hnenah a ko hai ih, “I ngai uh la theithiam hnik uh. ¹¹ Milai cu a kaa sungih a lut mi in a bawrhhlawhter lo. A kaa sung ihsin a hung suak mi in a bawrhhlawhter sawn a si,” tiah a ti. ¹² Cule a dungthluntupawl a hnenah an ra ih, “Hi thu an theih tikah Farasipawl an lung a si lo ti hi na thei maw?” tiah an ti. ¹³ Cule Jesu in, “Vancung ih a um mi ka Pa in a phun lo mi kung hmuahhmuah cu a phawi ding. ¹⁴ Anmah ten um ko hai seh. Annih cu mitcawpawl hruaitu mitcaw an si. Mitcaw in a dang mitcaw a hruai a si ah cun an pahnih in khur sungah an tla ding,” tiah a sang hai. ¹⁵ Cule Peter in Jesu hnenah, “Himi tahṭhimnak thu hi in simfiang aw,” tiah a sawn. ¹⁶ Cule Jesu in, “Ziangtin saw nang khal theithiam lo ih na um hrih? ¹⁷ Kaa sungih a lut mi ziangkhal pum sungah a feh ih, dailennak hmun ah hlawnsuahsal a si lo maw? ¹⁸ Kaa sung ihsin a suak mi thilpawl cu thinlung ihsin an suak ih, cumi cun milai a bawrhhlawhter sawn a si. ¹⁹ Ziangahtile, thinlung sung ihsin ruahnak ṭha lopawl, laithahnak, uiretnak, nu le pa sualnak, rukruknak, theihpinak diklo le ṭawngkam ṭha lo hmang ih mi thangsiatnakpawl tla an ra suak. ²⁰ Milai a bawrhhlawhtertu cu cui thilpawl hi an si. Kut khawlh lo ih rawl ei cun milai a bawrhhlawhter lo,” tiah a ti. ²¹ Cui hmun a suahsan hnuah Jesu cu Taiar ram le Sidon ram lamah a feh. ²² Cule, ngai hnik, Kanaan nunau pakhat cu cui khaw kiangkap ram ihsin a ra suak ih, “David-ih Fapa, Bawipa ka parah zahngai hram aw. Ka fanu cu siava zetin khawsia in a pawlh,” tiah a au. ²³ Asinan Jesu in cu nu cu kam khat hman a rak sawn lo. Cule a dungthluntupawl cu a hnenah an ra ih, “Hi nu hi dawihlo aw. Ziangahtile, kan dung lamah a au rero,” tiah Jesu cu an dil. ²⁴ Cule Jesu in, “Pathian in Israel sungkua tuu hlopawl hnen lawngah i thlah,” tiah a sang. ²⁵ Asinan cu nu cu Jesui hnenah feh in a bia ih, “Bawipa, i bawm hram aw,” tiah a sawn. ²⁶ Asinan Jesu in, “Falepawlih rawl laksak tahratih uicopawl pek cu a ṭha lo,” tiah a let. ²⁷ Cule nunaunu in, “A si, Bawipa, uicopawl khalin an pulepawlih cabuai ihsin rawl ṭilfuan cu an ei ve a si kha,” tiah a ti. ²⁸ Cule Jesu in a hnenah, “Maw nunau, zumnak ropi na nei a si! Na duh mi vekin na hnenah ka lo pe a si,” tiah a sang. Acui tikcucan roriah a fanu cu a dam. ²⁹ Cui hmun ihsin Jesu cu a suak ih, Galili Tili kapin a feh. Tlang parah a hung kai ih, cui hmun ah cun a to. ³⁰ Mipi tam zet a hnenah an ra ih, kebai, mitcaw, ṭawngsuak thei lo, taksa kimlopawl le midang tampi tla an rak hruai ih, Jesui ke hramah an ret. Jesu in an zaten a damter hai. ³¹ Ṭawngsuak thei lo an ṭawng thei, taksa kimlopawl an ṭhasal, kebaipawl an feh ih, mitcawpawl in khua an hmuhziapawl tla an hmuh tikah mipi an mang a bang. Cule Israel-pawlih Pathian cu an thangṭhat. ³² Cule Jesu in a dungthluntupawl cu a hnenah a kokhawm ih, “Hi mipipawl hi ka lainat tuk hai. Ni thum sung ka hnenah an um zo ih, ei ding zianghman an nei lo. Zianghman ei lo ih tlunter ding cu ka duh lo. Lam lakah an va ṭamsawl pang ding,” tiah a ti. ³³ Cule a dungthluntupawl cun a hnenah, “Mi hi zat khawp ding rawl cu hi ramṭhing ah khuiah kan hmu thei ding?” tiah an ti. ³⁴ Cule Jesu in an hnenah, “Sang hlawm paziat nan nei?” tiah a ti. Annih in, “Pasarih le nga fate te malte kan nei,” tiah an ti. ³⁵ Cule Jesu in mipipawl cu lei parah to dingin thu a pe. ³⁶ Cun, sang hlawm pasarih le nga malte cu a lak ih, Pathian hnenah lungawithu a sim hnuah a phel ih, a dungthluntupawl hnenah a pek. Dungthluntupawl in mipi an zem. ³⁷ Mipi zaten an ei ih, an khawp zet. Cui hnuah dungthluntupawl in a phel mi nepnawi tang mi bawmpi sarih khat an sar. ³⁸ Nunau le nauhak siar tel loin a eitu patling hlir thawngli an si. ³⁹ Mipipawl a tlunter hai hnuah Jesu cu lawng sungah a lut ih, Makdala ram lamah a feh.

¹ Farasipawl le Sadusipawl cu Jesui hnenah an ra ih, Jesu cu an hniksak. Van ihsin hminsinnak an hnenah hmuh dingin an dil. ² Asinan Jesu in an hnenah, “‘Zan lam a thlen tikah van a sen ruangah nikhua a ṭha ding,’ tiah nan ti. ³ Cun zing lamah, ‘Van cu a sen ih, khua a dur ruangah nikhua a se ding,’ nan ti. Nannih cu midepde nan si. Nannih in van langdan in nikhua nan theithiam. Asinan can hminsinnakpawl thuhla cu nan theithiam thei lo. ⁴ Misualral le a uire mi tui san minungpawl hin hminsinnak an duh zet. Profet Jonah-ih hminsinnak siarlo Pathian in hminsinnak dang a pe hai lo ding,” tiah a sang hai. Cule, Jesu cun a suahsan hai ih a fehhlo. ⁵ Tili ralkhat lam an thlen tikah dungthluntupawl in sang hlawm tla ken an rak hngilh. ⁶ Cule Jesu in an hnenah, “Farasipawl le Sadusipawl ih thilnu khi ralring uh la, fimkhur uh,” tiah a ti. ⁷ Annih in cui thu cu an relkhawm ih, “Hitiih a tinak san cu sang zianghman kan rak ken lo ruangah a si ding,” tiah an ti. ⁸ Asinan Jesu in annih in ziang an relkhawm rero ti a rak thei ih, “Nannih zumnak malpawl, ziangruangah sang zianghman nan neih lo thu nanmah lakah nan relkhawm rero? ⁹ Nan theithiam hrih lo a si lo maw? Patling thawngnga hrangih sang hlawm panga le bawmte paziat khat nan sar ti nan cing lo maw? ¹⁰ Patling thawngli hrangih sang hlawm pasarih le bawmpi paziat khat nan sar ti kha nan cing lo maw? ¹¹ Ziangtin saw sang hlawm thuhla ka rel mi a si lo ti nan theihthiam lo? Asinan Farasipawl le Sadusipawl ih thilnu khi va ralring uh,” tiah a ti. ¹² Cule a dungthluntupawl in sang tuahnakih an hman mi thilnu lakah ralring uh a ti hai mi si loin Farasipawl le Sadusipawl ih zirhnak lakih an ralrin ding thu a sim ti an rak theithiam. ¹³ Jesu cu Sisaria Filipi khawpi kiangkap ram ah a thleng ih, a dungthluntupawl kha, “Minung Fapa, Kei hi mi in zo a si in ti?” tiah a sut hai. ¹⁴ Cule annih in, “Mi hrekkhat in baptisma petu John a si an lo ti. Midangpawl in Elijah a si an lo ti. Cule midangpawl in Jeremiah asilole a dang profet pakhatkhat a si an lo ti,” tiah an ti. ¹⁵ Anih in an hnenah, “Nannih in teh kei hi zo a si in ti?” tiah a ti hai. ¹⁶ Cule Simon Peter in, “Nangmah cu a nung mi Pathian Fapa, Khrih na si,” tiah a sawn. ¹⁷ Cule Jesu in, “Jonah-ih fapa Simon, nang cu mihualvanṭha na si. Ziangahtile, milai titsa le thisen in hi thu hi na hnenah a phuanglang lo. Vancung ih a um mi ka Pa in cui thu cu na hnenah a phuanglang. ¹⁸ Na hnenah hihi ka lo sim, ‘Nangmah cu Peter na si ih, hi lungpi parah ka kawhhran ka din ding. Cumi cu Mithikhua kawtkapawl in an neh lo ding. ¹⁹ Vancung uknak tawhfungpawl na hnenah ka lo pe ding. Cule zokhal leitlun ih na ṭawn mi cu van ah ka ṭawn ding. Zokhal leitlun ih na phelh mi cu van ah ka phelh ding,’” tiah a sang. ²⁰ Cule Jesu in a dungthluntupawl kha amah cu Jesu Khrih a si ti zohman sim lo dingin khoh zetin thu a pe hai. ²¹ Cui can thawk ihsin Jerusalem ah a feh tengteng ding thu le miupapawl le puithiam sangpawl le Danzirhtupawl hnen ihsin tuarnak tampi a tuardan ding le an that ding ih a ni thumnak ih a thawhsal ding thu tla a dungthluntupawl hnenah theihter a thawk. ²² Cule Peter in a dang deuhah a hruai ih, Jesu kawk a thawk. “Bawipa, cuvek cu si hram hlah seh, na hnenah cuvek a thleng hrimhrim lo ding,” tiah a ti. ²³ Asinan Jesu cu a her ih Peter hnenah, “Setan, ka dungah feh aw. Nang cu ka hrangah tluknak na si. Ziangahtile, nang cun Pathian thilpawl thupi ah ruat loin minung thilpawl thupi ah na ruat sawn a si,” tiah a ti. ²⁴ Cun Jesu in a dungthluntupawl hnenah, “Zokhal i thlun a duhtu cun amah le amah elaw seh la, amai khraws la in i thlun seh. ²⁵ Ziangahtile, zokhal a nunnak humhim a duhtu cun a nunnak a hloh ding. Asinan, zokhal keimai ruangih a nunnak a hlohtu cun a nunnak a hmu ding. ²⁶ Ziangahtile, mi pakhat in leitlun pumpi hi nei in amai nunnak a hloh asile a hrangah ziang hlawknak a um? A nunnak thlengnak ding hrangah minung in ziang a pe thei ding? ²⁷ Ziangahtile, Minung Fapa hi a Pai ropitnak le a vancungmipawl thawn a rasal ding. Cule mi kip anmai ṭuan mi vekin lawmman a pe ding. ²⁸ “Thungai thu ka lo sim, hi tawkih a ding mi mi hrekkhat cu Minung Fapa hi a uknak thawn a rat an hmuh lai hlanlo thihnak an tep hrimhrim lo ding,” tiah a ti.

¹ Ni ruk hnuah Jesu in Peter, James le a naupa John cu a hnenah a hruai hai ih, tlang sang parah a kaisohpi ih, anmah lawng an um. ² Cu tawkah an hmaiah Jesu cu a hmuihmel a thleng. A hmai cu ni vekin a tleu ih, a hnipuan cu tleu vekin a var. ³ Cule, ngai hnik, an hnenah Mawsi le Elijah an runglang ih, Jesu thawn an beaw rero. ⁴ Cule, Peter in Jesui hnenah, “Bawipa, hi tawkih kan um hi a ṭha. Na duh asile, thlam pathum in kan sak ding. Na hrangah pakhat, Mawsi hrangah pakhat le Elijah hrangah pakhat,” tiah a sang. ⁵ A ṭawng rero laiah, ngai hnik, mero tleu zet a ra zam ih, a run hliap hai. Cule, ngai hnik, mero lak ihsin aw pakhat in, “Hihi ka duhdawt zet mi ka Fapa a si, a parah ka lung a awi zet. A thu ngaithla uh,” tiah a ti. ⁶ Dungthluntupawl in cui aw an theih tikah lei ah an bawkkhup ih, an ṭih zet. ⁷ Cule Jesu cu a feh ih, a tham hai. “Tho uh, ṭih hlah uh,” tiah a ti. ⁸ An kiangkap an zoh tikah Jesu lawng an hmu, zo dang hman an hmu lo. ⁹ Cule tlang par ihsin an rung ṭum laiah Jesu in an hnenah, “Minung Fapa hi mithi lak ihsin a thawhsal lai hlanlo nan hmuh mi larnak hi zohman sim hlah uh,” tiah thu a pe hai. ¹⁰ Cule a dungthluntupawl in a hnenah, “Ziangruangah Danzirhtupawl in Elijah a ra hmaisa tengteng ding an ti?” tiah an sut. ¹¹ Cule Jesu in, “Elijah cu a ra hmaisa taktak ding ih, ziang hmuahhmuah amah in a rem ṭhasal thluh ding. ¹² Asinan nan hnenah ka lo sim. Elijah cu a ra zo nan an rak theithiam lo. An tuah duh mi hmuah in a parah an rak tuah. Cuvek thothoin, Minung Fapa khal an kut a tuar ve ding,” tiah a sang hai. ¹³ Cu tikah dungthluntupawl in an hnenah baptisma petu John-ih thuhla a rel a si ti an rak theithiam. ¹⁴ Cun, Jesu le a dungthluntu pathum tla mipi hnen an thlen tikah mi pakhat in Jesu a ra pan ih, a hmaiah khukbil in, ¹⁵ “Bawipa, ka fapa parah zahngai hram aw. Ziangahtile, merai nat a nei ih, siava zetin a tuar. Meisa sungah asilole ti sungah a tla leuhleuh. ¹⁶ Na dungthluntupawl hnenah ka rak hruai nan amah damter theinak huham an nei lo,” tiah a ti. ¹⁷ Cule Jesu in a dungthluntupawl hnenah, “Maw nannih zumnak nei lo le zinpeng zawh tui san minungpawl, ziangtik tiang saw nan hnenah ka um ding ih? Ziangtik tiang saw ka lo zawi ding? Nauhakpa cu ka hnenah rak hruai hnik uh,” tiah a sang hai. ¹⁸ Cule Jesu in khawsia cu a kawk ih, nauhakpai hnen ihsin a suak. Nauhakpa cu cui tikcucan roriah a dam. ¹⁹ Cun, dungthluntupawl cu Jesu amahte lawng a um laiah a hnenah an ra ih, “Ziangruangah kannih hmuah in kan dawisuak thei lo?” tiah an sut. ²⁰ Cule Jesu in an hnenah, “Nan zumlonak ruangah a si. Thungai thu ka lo sim, anṭam ci vek zumnak nan neih asile hi tlang hnenah, ‘Hi tawk ihsin ṭhawn aw,’ nan ti ding ih a ṭhawn mai ding. Cule nan hrangah thil cang thei lo mi a um lo ding. ²¹ Asinan thla nan cam le rawl nan ulh tik lawngah khavek khawsia cu an suak ding,” tiah a ti. ²² Cule dungthluntupawl cu Jesu thawn Galili peng ih an umkhawm laiah, Jesu in an hnenah, “Minung Fapa hi mi kut ah phiarsawm a si zikte thlang. ²³ Cule an that ding ih a ni thumnak ah thawhter a si ding,” tiah a ti. Cule nasazetin dungthluntupawl cu an riah a sia. ²⁴ Kapernaum khua an va thlen tikah temple siah khawngtupawl in Peter an ra pan ih, “Nan zirhtupa hin temple siah a pe kim maw?” tiah an ti. ²⁵ Peter in, “Pe e,” tiah a ti. Cun inn sungih a luh tikah Peter a ṭawng hlanah Jesu in a hnenah, “Simon ziangtin na ruat? Leitlun siangpahrangpawl in siah simaw, ngunkhuai simaw zo hnenah an dil? An falepawl hnenah maw, midangpawl hnenah saw an dil?” tiah a ti. ²⁶ Cule Peter in, “Midangpawl hnenah,” tiah a ti. Cule Jesu in a hnenah, “Falepawl cun an pek a ṭul lo. ²⁷ Asinan, kan tlukterlonak dingah tili ah va feh aw la, ti sungah sio va thla aw. Cule na kaih hmaisabik nga kha la aw la, a kaa na kau ding ih, tangka shekel khat na hmu ding. Cumi cu la aw la, an hnenah na hrang le ka hrangah siah va pe aw,” tiah a ti.

¹ Cui canah dungthluntupawl cu Jesui hnenah an feh ih, “Vancung uknak sungah zo hi mithupibik a si?” tiah an sut. ² Cule Jesu in nauhakte pakhat a hnenah a ko ih, an laiah a ret. ³ Cule, anih in, “Thungai thu ka lo sim, nan thlengawk ih, nauhaktepawl vek nan si lo ah cun vancung uknak ah nan lut hrimhrim lo ding. ⁴ Curuangah, zokhal hi nauhakte vekih a hnuaidawrtu cu vancung uknak sungah mithupibik a si. ⁵ Cule Ka hmin in hi nauhakte vek nauhak pakhat a cohlangtu cu keimah i cohlang a si. ⁶ “Cun, zokhal keimah i zumtu hi nauhaktepawl lakih pakhat a tlutertu cu a hngawng ah rial lung thlaih tahratin tifinriat thuk zet sungah pilter sehla a hrangah thil ṭhasawn a si. ⁷ “Mi an tlukter ding ruangah leitlun mipawl cu an hmakhua a pit a si. Ziangahtile, cuvek thil cu a thleng ding. Asinan, mi a tlutertu cu a hmakhua a pit tiah ka phuang a si. ⁸ Na kut in simaw, na ke in simaw a lo tlukter asile tan aw la, na hnen ihsin hlawn aw. Na kut pahnih le na ke pahnih thawi kumkhaw meisa sungih Pathian in a lo hlawnthlak hnakin, kebai le taksa kim loin nunnak sungih na luh cu na hrangah a ṭhasawn. ⁹ Cule na mit in a lo tlukter asile phawrhsuak aw la, na hnen ihsin hlawn aw. Pathian in na mit pahnih thawi Gehenna meisa sungih a lo hlawnthlak ding hnakin nunnak sungih mit pakhat thawi na luh ding cu na hrangah a ṭhasawn a si. ¹⁰ “Hi nauhakpawl lakih pakhat hmuhsuam lo dingin ralring uh. Ziangahtile, vanram ih an vancungmipawl in, ngai hnik, vancung ih a um mi ka Pai mithmai an hmu ringring a si. ¹¹ Ziangahtile, Minung Fapa cu a hlo mipawl rundam dingah a ra. ¹² “Ziangtin nan ruat? Mi pakhat in tuu zakhat a nei ih, pakhat cu lamzin a pialhlo. A tuu sawmkua le pakua pawl cu a tanta ding ih, a rak pialhlo mi tuu hawl dingah tlangpawl ah a feh ding a si lo maw? ¹³ Cule, a va hmuh asile, thungai thu ka lo sim, anih cu a lung a awi. A pialhlo lo mi sawmkua le pakua pawl hnakin a hmuhsal mi tuu hlo pakhat parah a lung a awi sawn a si. ¹⁴ Cuvek thothoin hi nauhakpawl lakih pakhat khal an siatral ding cu vancung ih a um mi nan Pai duhzawng a si lo. ¹⁵ “Cule na unaupa in na parah thil a tisual asile va feh aw la, nanmah pahnih theih lawngah a mawhsualnak cu va sim aw. Na thu a lo ngaithlak asile na unaupa cu na ngahsal a si. ¹⁶ Asinan, na unaupa in na thu a lo ngaithlak lo asile midang pakhat simaw, pahnih simaw amah hnenah hruai aw. Cutin Dan vekin, ‘Theihpitu pahnih maw, pathum simaw ih thu theihter mi in ṭawngsuak mi hmuahhmuah cu a dik a si ti a langter ding.’ ¹⁷ Asinan, an thu ngaithlak a el asile cui thu cu kawhhran hnenah sim aw. Cule kawhhran thu ngaithlak khal a el thotho asile cu pa cu Zentel le siahkhawngtu vekin ruat uh. ¹⁸ “Thungai thu ka lo sim, ziangkhal leitlun ih nan ṭawn mi cu van ah ka ṭawn ding. Ziangkhal lei parih nan phawih mi cu van ah ka phawih ding. ¹⁹ “Nan hnenah ka lo simsal, nan lakih mi pahnih in leitlun ah lungrual in ziang thil khal an dil asile vancung ih a um mi ka Pa in cumi cu an hrangah a tuahsak ding. ²⁰ Ziangahtile, mi pahnih maw, pathum simaw ka hmin ih an pumkhawmawknak hmun ah kei cu an lakah ka um a si,” tiah a ti. ²¹ Cun Peter cu Jesui hnenah a ra ih, “Bawipa, ka unaupa in keimah dokalh in thil sual a tuah mi vei ziangzat tiang so ka ngaidam ding? Vei sarih tiang ka ngaidam ding maw?” tiah a ti. ²² Jesu in a hnenah, “Vei sarih lawng ka ti lo. Vei sarihih let sawmsarih na ngaidam ding a si. ²³ “Ziangahtile, vancung uknak cu siangpahrang pakhat a siahhlawhpawl thawi sum tiaw fel thluh dingih cazin zohfel a duhtu thawn an bangaw. ²⁴ Sum cazin zohfel a thawk tikah tangka talent thawnghra a baktupa pakhat a hnenah an rak hruai. ²⁵ Asinan a sam thei lo ruangah amah le a nupi le a fatepawl le a neih mi hmuahhmuah tla zuar ṭheh ih a leiba sam dingin an pu in thu a pe hai. ²⁶ “Cule siangpahrang hmaiah cui siahhlawh cu a khuk a bil ih a bia. Cule, ‘Ka pu, i rak hngak hrih hram aw la, a zaten ka lo sam ṭheh ding,’ tiah a ti. ²⁷ Cun, cui siahhlawhpai pu cun a lainat ih, a suah ih a leiba cu a rak ngaidam. ²⁸ “Asinan acui salpa cu a fehsuak ih, amah dinari zakhat a rak baktu a hnaṭuanpi siahhlawh pakhat a tawng. Cule cu pa cu a kaih ih, a hngawng a rek. Cule, ‘I bak mi i pe aw,’ tiah a ti. ²⁹ “Cui a hnaṭuanpi siahhlawhpa cun a ke hramah bawk tahratin, ‘I rak hngak hrih hram aw la, a zaten ka lo sam ṭheh ding,’ tiah a dil. ³⁰ “Asinan a duh cuang lo. A feh ih, a bak mi zaten a sam thluh lai hlanlo thawng ah a thlak. ³¹ A hnaṭuanpi siahhlawh dangpawl in cutiih a tuah cu an hmuh tikah an thin a na tuk. Cule an feh ih, thil cang mi hmuahhmuah kha an pupa hnenah an sim. ³² “Cule cui siahhlawhpa cu a pu in a ko ih, ‘Nang siahhlawh ṭhalo, i rak dil tikah khan na leiba hmuahhmuah ka lo ngaidam thluh. ³³ Na parih zah ka ngai vekin na hnaṭuanpi siahhlawhpa parah zah na ngai ve a mawi lo maw?’ tiah a ti. ³⁴ Cun, a pu cu a parah a thin a heng tuk ih, a leiba hmuahhmuah a sam thluh lai hlanlo amah hremtu dingpawl kut ah a pek. ³⁵ “Curuangah nan thinlung sung ihsin nan unaupawlih thil tisual mipawl nan ngaidam lo asile van ih ka Pa in nan hnenah cuvekin a ti ve ding,” tiah a ti.

¹ Cule hitin thil a cang, cui thupawl Jesu in a sim ṭheh tikah Galili peng a suahsan ih, Jordan tiva khatlam ral Judia ramri ah a thleng. ² Cule mi burpi in an thlun ih cu tawkah a damter hai. ³ Amah hniksak dingah Farasipawl a hnenah an ra ih, “Ziangvek thu ruang khalah pasal in a nupi mak hi Dan vek a si maw?” tiah an ti. ⁴ Cule Jesu in an hnenah, “Atirah Pathian in mipa le nunau a tuah. ⁵ Cule, ‘Cuti a si ruangah mipa in a nu le a pa a tanta ding ih a nupi a kawp ding. Cule pahnih cu taksa pumkhat ah an cang ding,’ tiah Pathian ih a ti mi hi nan rak siar dah zo a si lo maw? ⁶ Cuiruangah annih cu mi pahnih an si nawn lo ih, taksa pumkhat an si sawn a si. Cu mi ruangah cun Pathian ih a rak kawmawkter zo mi cu zohman in ṭhen hlah seh,” tiah a sang hai. ⁷ Cule, annih in Jesui hnenah, “Cuti asile ziangruangah saw Mawsi in mi in a nupi cu maknak ca a pe ding ih, a tlungter thei tiah thu a rak pe?” tiah an ti. ⁸ Jesu in an hnenah, “Nan lung a ruh tuk ruangah nan nupipawl nan mak ding Mawsi in a lo sen a si. Asinan a hramthawk ihsin cutivek a si lo. ⁹ Asinan nan hnenah ka lo sim, nu le pa sualnak a tuah lo a si ah cun zokhal a nupi a ṭhen ih, nunau dang a ṭhitu cu a uire a si. A pasal ih a ṭhen mi nu a ṭhitu khal a uire a si,” tiah a ti. ¹⁰ A dungthluntupawl in Jesui hnenah, “Nupi thu ah pasal cu, cutivek a si ah cun nupi neih lo hi a ṭhasawn,” tiah an ti. ¹¹ Cule Jesu in an hnenah, “Cui nan ti mi thu cu mi hmuahhmuah in an cohlang thei lo. Pathian in cui nan ti mi thu cu a pek mipawl lawngin an cohlang thei. ¹² Ziangahtile, mi hrekkhat cu an nui pum sung ihsin tilper cia mi an um. Mi hrekkhat cu minung ih persak mi an si. Cule mi hrekkhatpawl cu vancung uknak ruangah anmah le anmah tilper mi vekin an um. Cui thu a cohlang theitu cun cohlang seh,” tiah a ti. ¹³ Cui canah, an parah a kut suang ding le thla camsak dingah Jesui hnenah, nauhakpawl tla an rak hruai. Asinan dungthluntupawl in an rak kawk. ¹⁴ Asinan Jesu in, “Nauhakpawl kha ka hnenah ratter uh, kham hlah uh. Ziangahtile, vancung uknak cu hivek mipawl ta a si,” tiah a ti. ¹⁵ An lu parih a kut a suan hnuah, cu tawk ihsin a fehsuak. ¹⁶ Cule, ngai hnik, pakhat pa a hnenah a ra ih, “Zirhtu ṭha, kumkhawnunnak ka co theinak dingah ziang thil ṭha ka tuah pei?” tiah a ti. ¹⁷ Cule Jesu in a hnenah, “Ziangah kei cu miṭha i ti? Pathian siarlo zohman miṭha an um lo. Asinan, nunnak sungih luh na duh asile thupekpawl kha thlun aw,” tiah a ti. ¹⁸ Cu pa cun Jesui hnenah, “Ziang thupek bik saw?” tiah a ti. Cule Jesu in, “Lai that hlah, uire hlah, rukru hlah, a diklo mi theihpinak pe hlah. ¹⁹ Na nu le na pa upat aw. Nangmah le nangmah na duhdawtawk vekin na inhnen duhdaw aw,” tiah a ti. ²⁰ Cule tlangvalpa in a hnenah, “Ka no lai ihsin cui thupekpawl hmuahhmuah cu ka rak thlun zo. Ziang ka sam hrih?” tiah a ti. ²¹ Jesu in a hnenah, “Famkim na duh asile va feh aw la, na neih mi zuar in na ngah mi tangka cu miretheipawl pe aw. Van ah hlawnthil na nei ding. Cule ra aw la, i thlun aw,” tiah a ti. ²² Asinan, cui thu cu tlangvalpa in a theih tikah riahse zetin a fehhlo. Ziangahtile, thil tampi a neih ruangah a si. ²³ Cule Jesu in a dungthluntupawl hnenah, “Thungai thu ka lo sim, milian vancung uknak sungih luh cu a har zet a si. ²⁴ Cun, ka lo simsal, Pathian uknak sungih milian luh hnakin ṭhim hnakua sungih kalauk luh a awlsawn,” tiah a ti. ²⁵ Cui thu cu a dungthluntupawl in an theih tikah an khawruah a har ngaingai ih, “Cuti asile zo so rundam si thei ding?” tiah an ti. ²⁶ Jesu in anmah cu a zoh hai ih, “Cumi cu minung hrangah a cang thei lo. Asinan Pathian hrangah cun ziang hmuahhmuah a cang thei a si,” tiah a ti. ²⁷ Cule Peter in a hnenah, “Ngai hnik, ziang hmuahhmuah tanta in nangmah kan lo thlun. Ziang so kan ngah ding?” tiah a let. ²⁸ Cule Jesu in an hnenah, “Thungai thu ka lo sim, Pathian in thil hmuahhmuah a tharter tikah Minung Fapa cu laltohkham ropi parah a to ding. Cule keimah i thluntu nannih khal laltohkham hleihnih parah nan to ve ding ih, Israel miphun hleihnihpawl thu nan ṭhensak ding. ²⁹ Cule, keimah ruangih inn si seh, unau si seh, farnu si seh, pa si seh, nu si seh, nupi si seh, fale si seh, leiram si seh a tlansantu pohpoh cun a let zakhat le kumkhawnunnak a co ding. ³⁰ Sikhalsehla, mi tampi a hmaisabikpawl kha a netabikah an cang ding ih, mi tampi a netabikpawl cu a hmaisabikah an cang ding,” tiah a ti.

¹ Cule Jesu in a dungthluntupawl hnenah hitin thusim a peh, “Ziangahtile, vancung uknak cu a sabit hmuan sungih hnaṭuantu dingpawl hlawhphalh dingih zingpit teih a fehsuaktu intekpa thawn a bangaw. ² Cule a hnaṭuantupawl ni khat hlawhman ah dinari paisa pakhat pe dingin a lungkim ih, a sabit hmuan ah cun a hei thlah hai. ³ “Cule zing lam nazi pakua hrawngah a va fehsuak ih, dawr hmun ah zianghman tuah lo ih ding lak menpawl a va hmu. ⁴ An hnenah, ‘Nannih khal ka sabit hmuan ah hnaṭuan dingin feh uh. Cule ziangkhal a mawi tawkin ka lo pe ding,’ tiah a ti hai. Cule annih khal cu an feh. ⁵ Cun, sun nazi hleihnih le zan lam nazi pathum hrawngah a ti kel vekin a tisal. ⁶ Zan lam nazi panga hrawngah a fehsuak ih, zianghman tuah lo ih dingpawl a va hmu. Cule an hnenah, ‘Ziangruangah hi tawkah zianghman tuah loin sunnihlawhih nan din?’ tiah a ti hai. ⁷ “Annih in a hnenah, ‘Ziangahtile, zohman in hlawh in phalh ve lo,’ tiah an ti. Cule anih in an hnenah, ‘Nannih khal sabit hmuan ah va feh uh la ziangkhal a mawi tawkin nan ngah ding,’ tiah a ti. ⁸ “Cule zan lam a rung thleng ih sabit hmuan neitu cu a sum cazin kaitu hnenah, ‘Hnaṭuantupawl kha ko aw la, an hlawhman pe aw. A netabikih ka phalh mipawl ihsin thawk aw la, a hmaisabik lamah feh vivo aw,’ tiah a ti. ⁹ “Zan lam nazi panga hrawngih a phalh mi hnaṭuantupawl an ra ih, an zaten dinari paisa pakhat cio an ngah. ¹⁰ A hmaisabikih a phalh mipawl an rat tikah tamdeuh ngah dingah an ruataw. Annih khal cun dinari paisa pakhat cio an ngah ve. ¹¹ Cu mi an ngah tikah, intekpa dokalh in an vuivai. ¹² ‘Netabikih na phalh mipawl cun nazi pakhat sung lawng an ṭuan. Asinan kannih sunnihlawhih phurrit a phurtu le nisa tuartupawl thawn bangrep in in ngahtlangter,’ tiah an ti. ¹³ “Asinan anih in an lakih mi pakhat hnenah cun a sang ih, ‘Rualpa, a diklo mi na parah ka tuah lo. Dinari paisa pakhat hlawh dingin na lungkim a si lo maw? ¹⁴ Na ta cu la aw la, feh aw. Netabikih ka phalh mi pa khal nan hnenih ka lo pek mi zat thotho pek ka duh a si. ¹⁵ Keimai ta a si mi parah cun ka duhdan ih tuah theinak thu ka nei a si lo maw? Nan iksiknak san cu ka ṭhat ruangah a si lo maw?’ ¹⁶ “Cuvekin, a netabikpawl cu an hmaisabik ding ih, a hmaisabikpawl cu an netabik ding. Ziangahtile, mi tampi kawh an si nan mi malte lawng hril an si,” tiah a ti. ¹⁷ Cule, Jesu cu Jerusalem lam panin a hung so ih, lamzin ih an feh laiah a dungthluntu hleihnihpawl kha a dang teah a hruai ih, an hnenah thu a sim hai. ¹⁸ “Ngai hnik uh, Jerusalem ah kan hung so ding ih Minung Fapa hi puithiam sangpawl le Danzirhtupawl hnenah phiarsawm a si ding. Annih in thi dingin thu an ṭhensak ding. ¹⁹ Cule annih in Zentelpawl kut ah an thlen ding. Cule annih in hnihsuahsainak ah an hmang ding, an vaw ding ih, an khengbet ding. A ni thumnak ah a thosal ding,” tiah a ti hai. ²⁰ Cule, Zebedi-ih fapalepawlih nu cu Jesui hnenah a fapale thawn a feh ih, Jesui hmaiah a bawkkhup ih, a hnen ihsin thil pakhat a dil. ²¹ Cun Jesu in a hnenah, “Ziang na duh?” tiah a ti. Cule anih in Jesui hnenah, “Hi ka fapale pahnih tla hi na uknak sungah pakhat na vawrh lamah, pakhat na keh lamah to dingin thu pe aw,” tiah a ti. ²² Cule Jesu in, “Nan dil mi hi nan theithiam lo. Ka in ding mi no hi nan in thei pei maw? Ka co ding mi baptisma hi nan co thei pei maw?” tiah a let hai. Cule annih in, “Kan ti thei ding,” tiah an sang. ²³ Jesu cun an hnenah, “Thungaiin ka in ding mi no cu nan in ko ding ih, ka co ding mi baptisma khal nan co ko ding. Asinan ka vawrh lam le ka keh lam ih nannih lo toter theinak ka nei lo. Ka Pa in a rak timtuah cia mipawl hnenah a pe hai ding,” tiah a ti. ²⁴ A dang dungthluntu pahrapawl in cui thu an theih tikah cute unau hnih parah an thin a heng zet. ²⁵ Asinan, Jesu in a hnenah a kokhawm hai ih, “Zentel uktupawl cu an uk mipawl parah an lal zet ti nan thei. Cule an mithupipawl khalin an mipi parah thuneihnak nasazet an nei. ²⁶ Asinan nannih lakah cun cuvekin si hlah seh. Zokhal nan lakih mithupi si a duhtu cu nanmah lo riantu si seh. ²⁷ Cule zokhal nan lakah mithupibik si a duhtu cu nan sal a si tengteng ding a si. ²⁸ Cuvekin, Minung Fapa cu midang ih ren dingah a ra lo. Mi rian dingin le mi tampi tlen dingah a nunnak pe dingin a ra sawn a si,” tiah a ti. ²⁹ Jeriko khua ihsin Jesu le a dungthluntupawl an pawhsuak laiah mi burpi in an thlun. ³⁰ Cule, ngai hnik, lamzin kapih to mitcaw pahnih in Jesu a ra ti an theih tikah an au ih, “David Fapa, Bawipa, kan parah zahngai hram aw,” tiah an ti. ³¹ Mipipawl in daitei um dingin an rak kawk nan an au ring deuhdeuh. “David Fapa, Bawipa, kan parah zahngai hram aw,” tiah an ti. ³² Cule Jesu cu a ding ih an pahnih in a hnenah a ko hai ih, “Ziang ka lo tuahsak ding nan duh?” tiah a ti. ³³ Annih in, “Bawipa, kan mit khua in hmuter aw la, kan duh,” tiah an let. ³⁴ Jesu in a lainat hai ih an mit cu a thamsak. Hmakhatteah khua an hmu ih, amah cu an thlun.

¹ Cule, Jesu le a dungthluntupawl cu Jerusalem khaw kiang le Olif Tlang ih um Betfat khua an thlen tikah Jesu in a dungthluntu pahnih a hei thlah. ² Cule an hnenah hitin thu a cah, “Nan hmaiih khua ah khin va feh uh la cu tawkah an rak hren mi laakpi, a note thawn nan hmu lohli ding. Va phawih uh la ka hnenah rak hruai hai uh. ³ Cule mi pakhatkhat in ziang thu khal a lo suh asile a hnenah, ‘Bawipa in a hai a si,’ tiah ti uh. Cule a lo pe lohli ko ding,” tiah a ti. ⁴ Profet ih a rak ṭawng mi Jesu in a kimter theinak dingah hi thil hi a cang a si. ⁵ Profet in, “Zion fanu hnenah, ‘Ngai hnik, na Siangpahrang cu na hnenah a ra. Amah cu minunnem a si ih laak parah a to. Cumi cu laak note a si,’ tiah sim uh,” tiah a ti. ⁶ Cule a dungthluntupawl cu an feh ih, Jesu ih a rak sim hai vekin an tuah. ⁷ Cule laakpi le laak note cu an rak hruai ih, laak note parah an puanpawl an phah ih, a parah Jesu an toter. ⁸ Cun, mipi tam zetin lamzin parah an puanpawl tla an rak phah. Midangpawl in hnahsawl an sat ih, lamzin parah an rak phah. ⁹ Jesui hmaiih a fehtu mipi le a dung lam ihsin a thluntu mipi an zaten an au ih, “David-ih Fapa hnenah Hosana! BAWIPAI hmin ih a ratu cu thangṭhat in um seh. Cungnungbikah, Hosana,” tiah an ti. ¹⁰ Jerusalem khaw sungih Jesu a luh tikah an khawpawh in an sa hiamhiam ih, “Hi pa hi zo a si?” tiah an ti. ¹¹ Cule mipipawl cun, “Hi pa cu Galili peng, Nazareth khaw mi profet Jesu a si,” tiah an ti. ¹² Cule Jesu cu Pathian temple kulh sungah a lut ih, thil zuarpawl le leitupawl hmuahhmuah tla a dawisuak ṭheh. Paisa thlengtupawlih cabuaipawl le thuro zuartupawlih tonakpawl khal a linglet ṭheh. ¹³ Cule an hnenah, “Cathianghlim in, ‘Ka inn cu thlacamnak inn tiah an ko ding,’ a ti. Asinan suamhmangpawl umnak puk ah nan can a si,” tiah a ti. ¹⁴ Mitcawpawl le kebaipawl cu temple kulh sungih Jesui hnenah an ra ih, anih in a damter hai. ¹⁵ Cule puithiam sangpawl le Danzirhtupawl in mangbangza thilpawl a tuah mi le temple kulh sungih nauhakpawl in “David-ih Fapa hnenah Hosana” tiih an au mi an hmuh tikah an thin a heng nasa. ¹⁶ Cule, Jesui hnenah, “Hi nauhakpawlih an ṭawng rero mi hi na thei maw?” tiah an ti. Cule Jesu in an hnenah, “Thei e! Cathianghlim in, ‘Nauhak le nausen hnawi fawp laipawl kaa sung ihsin nangmai hrangah thangṭhatnak famkim cu na rak tuah zo,’ a ti mi cu nan rak siar dah lo maw si?” tiah a ti. ¹⁷ Cule, Jesu cun a fehsan hai ih Jerusalem khaw sung ihsin Bethany khua ah a feh. Cu tawkah a va riakta. ¹⁸ Jerusalem khaw lam panin zingpit teih a kir laiah Jesu cu a ril a rawng. ¹⁹ Cule lamzin kapah theipi kung a hmu ih, a va pan. A parah a hnah siarlo zianghman a hmu lo. Cule Jesu in theipi kung hnenah, “Tui si thawkin na parah kumkhua in rah um nawn hlah seh,” tiah a ti. Hmakhatteah cui theipi kung cu a ro. ²⁰ A dungthluntupawl in cu mi an hmuh tikah an mang a bang ih, “Ziangtin saw cui theipi kung cu a ro lohli?” tiah an ti. ²¹ Cule Jesu in an hnenah, “Thungai thu ka lo sim, zumnak nan neih ih, nan rinhlelh lo asile hi theipi kung parih thil cang mi vek hi nan tuah thei ding. Cu lawng si loin, hi tlang hnen khalah, ‘Ṭhawn aw la, tipithuanthum sungah va tla aw,’ nan ti asile, nan ti vekin a cang ding. ²² Thla nan cam tikah nan zum asile nan dil mi hmuahhmuah in nan ngah ding,” tiah a let hai. ²³ Cule Jesu cu temple kulh sungah a lut ih, thu a zirh rero laiah puithiam sangpawl le miupapawl cu a hnenah an ra ih, “Ziang thuneihnak in hipawl hi na tuah? Zo in hi thuneihnak hi a lo pe?” tiah an ti. ²⁴ Cule Jesu in an hnenah, “Kei khal thu pakhat ka lo sut ve ding. In let asile ziang thuneihnak in hi thilpawl ka tuah ti ka lo sim ve ding. ²⁵ John-ih baptisma pek mi hi van lam ihsin maw, milai hnen ihsin a si?” tiah a sawn hai. Cule cumi cu anmah ten an relkhawm ih, “‘Van ihsin a si,’ kan ti asile ‘Ziangah amah cu nan zum lo?’ tiah in ti ding. ²⁶ Asinan, ‘Milai hnenin a si,’ tiah kan ti asile mipi kan ṭih fawn. Ziangahtile, mipi zaten John cu profet a si tiah an rak zum si,” tiah an ti. ²⁷ Cule annih in, “Kan thei lo,” tiah Jesu cu an sang. Cule anih in an hnenah, “Kei khalin ziang thuneihnak in hipawl hi ka tuah ti ka lo sim ve lo ding,” tiah a ti hai. ²⁸ “Asinan, ziangtin nan ruat? Mi pakhat in fapa pahnih a nei. A pakhatnak hnenah cun a feh ih, ‘Fapa, tuisun cu ka sabit hmuan sungah va feh aw la, hna va ṭuan aw,’ tiah a ti. ²⁹ “A fapa cun, ‘Ka feh paih lo,’ tiah a let. Asinan netaah a thinlung a thleng ih a fehsal. ³⁰ “Cule a fapa a pahnihnak hnenah a va feh ih, cutivek thothoin a sim ve. Cule a fapa cun, ‘Bawipa, ka feh ding,’ tiah a sawn. Asinan a feh lo. ³¹ “Cui fapa pahnih lakah zo in a pai duhzawng a tuah?” tiah a sut hai. Annih in a hnenah, “A pakhatnak pa in,” tiah an ti. Jesu in an hnenah, “Thungai thu ka lo sim, siahkhawngtupawl le hlawhhlangpawl cu nan hlanah Pathian uknak sungah an lut ding. ³² Ziangahtile, John cu dingfelnak lamzin in nan hnenah a ra nan, amah cu nan rak zum lo. Asinan, siahkhawngtupawl le hlawhhlangpawl cun amah cu an zum a si. Amah cu nan rak hmu ko nan nan sual nan sir lo ih nan zum lo. ³³ “A dang tahṭhimnak thu hi ngaithla hrih uh. Intekpa pakhat in sabit hmuan a tuah. Cui a hmuan cu hruang in a kulh. Cule sabit sawrnak ding hrangah khur a lai ih, khaw cawnnak thlam sangpi a sak. Cule hmuan ṭuanhlawh a duhtu hnenah a pekta ih, ram hlapi ah khualtlawng in a feh. ³⁴ Sabit rah lawh can a cut zik tikah a hmuan ṭuanhlawhtupawl hnenah a siahhlawhpawl cu a rah va la dingin a thlah hai. ³⁵ “A hmuan ṭuanhlawhtupawl in a siahlawhpawl cu an kai ih, pakhat an vua, pakhat an that ih, a dang pakhat cu lungto in an deng. ³⁶ A hmaisa hnakih tamdeuh a siahhlawh rual dang a hei thlahsal. Cule a hmuan ṭuanhlawhtupawl cun a hmaisa vek thothoin an rak tuah. ³⁷ Asinan a netabikah a hmuan ṭuanhlawhtupawl hnenah cun a fapa a hei thlah. ‘Ka fapa cu an ṭihzah ko ding,’ tiah a ti. ³⁸ “Asinan, lo ṭuantupawl in a fapa an hmuh tikah anmah le anmah lakah, ‘Hi pa hi ro cotupa a si. Ra uh, kan that ding ih a ro co ding mi tla laksak uhsi,’ tiah an tiaw. ³⁹ Cule an kai ih, sabit hmuan sung ihsin an hlawnsuak ih an that. ⁴⁰ “Cuti asile sabit hmuan neitupa a rat tikah cui a hmuan ṭuanhlawhtupawl parah ziang a tuah pei?” tiah a sut hai. ⁴¹ Annih in a hnenah, “Cui miṭhalopawl cu siava zetin a that ṭheh hai ding ih, a sabit hmuan cu sabit a rah can kipih a covo rah a petu ding hmuan ṭuanhlawhtu midangpawl hnenah a pe ding,” tiah an ti. ⁴² Jesu in an hnenah, “Cathianghlim in, ‘Inn saktupawl ih an hnawn mi lung cu a kilih lung pawimawhbik ah a cang. Hihi BAWIPAI tuah mi a si ih, kan mithmuh ah mangbangza a si,’ a ti. Cucu nan rak siar dah lo maw? ⁴³ “Cuiruangah nan hnenah ka lo sim a si. Pathian uknak cu nan hnen ihsin Pathian in a la ding ih, Pathian uknak rah a suahtu ding miphun hnenah a pe ding. ⁴⁴ Cule mi zokhal cui lung parih a tlutu cu a kekkuai ding ih, asinan cui lung ih a tlakngah mi cu leivut vekin an cip neknek thluh ding,” tiah a ti. ⁴⁵ Cun, puithiam sangpawl le Farasipawl in a tahṭhimnak thupawl an theih tikah anmai thuhla a rel a si ti an rak thei. ⁴⁶ Cule amah kaihdan ding lamzin an hawl nan mipipawl in Jesu cu profet a si tin an pawm ruangah mipi an ṭih.

¹ Cule, Jesu in an hnenah tahṭhimnak thupawl in a let ih a simsal hai. ² “Vancung uknak cu a fapa hrangih mo puai a timtuahsaktu siangpahrangpa thawn a bangaw. ³ Cui mo puai ih ra tel dingih a rak sawm cia zo mipawl ko dingah a siahhlawhpawl a thlah. Asinan an ra tel duh lo. ⁴ “A siahhlawh dangpawl a thlahsal ih, ‘Ka sawm mipawl hnenah, “Ngai hnik, zanriah ka timtuah ṭheh zo. Ka cawcangpawl le ka ṭilva thau zetzetpawl ka that zo ih, ziangkim timtuah cia a si. Mo puai ah cun ra thlang uh, tiah va sim uh,” ’ tiah a ti. ⁵ “Asinan, annih in an rak pawisa lo. Anmai duhnak ah an fehsan men. Pakhat cu a lo ah a rak feh. A dang pakhat cu a thil zuarnak hmun ah a feh. ⁶ Cule a tang lai mipawl in a siahhlawhpawl cu an kai, ningzak mualpho in an tuah ih an that. ⁷ Siangpahrangpa in cui thu a theih tikah a thin a heng zet. A ralkappawl a thlah ih, cui mithattupawl cu an that ih an khua tla an ur. ⁸ “Cui hnuah, a siahhlawhpawl hnenah, ‘Mo puai cu tiar cia a si zo. Asinan ka sawm mipawl kha an rak tlak lo. ⁹ Curuangah lamzin kawtthlerpawl ah va feh uh la nan hmuh mi zokhal mo puai ah va sawm uh,’ tiah a ti. ¹⁰ Cule cui siahhlawhpawl cu lamzinpawl ah an va feh ih, an tawn mi hmuahhmuah misia si seh, miṭha si seh an rak hruaikhawm ih, puai tuahnak hmun cu an khat. ¹¹ “Asinan, rawl ei dingih a to mipawl zoh dingin siangpahrangpa a ra luh tikah cu tawkah mo puai zawhtupawlih hruk ding mi hnipuan hruhlotupa pakhat a hmu. ¹² Cule a hnenah, ‘Rualpa, ziangtin mo puai hnipuan hruh loin hi tawkah na lut?’ tiah a ti. Cu pa cun ṭawng ding a thei lo. ¹³ “Cule siangpahrang in a siahhlawhpawl hnenah, ‘A kut le a ke ṭawn uh. Cule hruaisuak uh la khaw leng a thimnak sungah hlawn uh. Cui hmun ah ṭap le hacang rial in a um ding,’ tiah a ti. ¹⁴ “Ziangahtile, mi tampi kawh an si nan mi malte lawng hril an si,” tiah a ti. ¹⁵ Cule Farasipawl cu an fehsuak ih, Jesu cu amai ṭawng mi ih awk thei dingin an rawnawkhawm. ¹⁶ Cule, Jesui hnenah Farasipawl in an dungthluntupawl le Herod-ih milaipawl an hei thlah ih, “Zirhtupa, nang cu midik na si ih Pathian lamzin cu thutak a sinak vekin na zirh. Hmaisawng mi zokhal na nei lo. Ziangahtile, nang cun mi thleidan na nei lo. ¹⁷ Curuangah in sim hnik. Ziangtin na ruat? Kaisar hnenih ngunkhuai hi Dan in a siang maw, siang lo?” tiah an sut. ¹⁸ Asinan Jesu in an sualralzia a rak thei ih, “Midepdepawl, ziangruangah sual in fawrh rero? ¹⁹ Ngunkhuai hrangih an hman mi paisa cu in rak hmuh hnik uh,” tiah a ti. Cule a hnenah dinari paisa pakhat cu an rak keng. ²⁰ Cule Jesu in an hnenah, “Hihi zo-ih zuk a si ih, ziang a nganaw?” tiah a ti. ²¹ Cule annih in, “Kaisar-ih zuk le hmin,” tiah an sawn. Cun anih in an hnenah, “Kaisar-ih tapawl cu Kaisar hnenah pe uh la, Pathian-ih tapawl cu Pathian hnenah pe uh,” tiah a ti. ²² Cui thu an theih tikah an khawruah a har zet. Cule Jesu cu an tanta ih, an fehhlo. ²³ Cui ni thothoah thawhsalnak a um lo titu Sadusipawl cu Jesui hnenah an ra ih, thu an sut. ²⁴ “Zirhtupa, Mawsi in, ‘Mi pakhat cu fate nei loin a thih asile cu pa in cithlah mi a neihnak ding hrangah a naupa in cui a nupi cu a ṭhi ding,’ tiah a ti. ²⁵ Kan lakah unau pasarih an um. Upabik in nupi a ṭhi ih a thi. Cithlah mi a neih lo ruangah a naupa hnenah a nupi cu a tanta. ²⁶ A pahnihnak le a pathumnak pai hnen khalah cuvek thothoin a cang. A pasarihnak tiangin cuvekin a cang vivo. ²⁷ Cule netabikah cu nu khal a thi ve. ²⁸ Curuangah thawhsalnak canah cu nu cu an pasarih lakah zo bikih nupi a si ding? Ziangahtile, an unau pasarih in cu nu cu nupi ah an rak nei ciar,” tiah an ti. ²⁹ Cule Jesu in an hnenah, “Nan fehpeng a si. Cathianghlim ih ngan mi le Pathian huham nan thei lo. ³⁰ Ziangahtile, thawhsalnak canah an ṭhiaw nawn lo ding. Ṭhitumnak khal a um nawn lo ding ih, vanram ih Pathian vancungmipawl vek an si ding. ³¹ Asinan, mithi thawhsalnak thu ah cun Cathianghlim sungah Pathian in nan hnenih a sim mi nan rak siar dah lo maw? ³² Pathian in, ‘Keimah cu Abraham-ih Pathian, Isak-ih Pathian, Jakob-ih Pathian ka si a ti.’ Anih cu mithipawlih Pathian a si lo, a nung mipawlih Pathian a si,” tiah a sang hai. ³³ Mipi in cui thu an theih tikah a zirhnak cun an mang a bangter zet. ³⁴ Asinan Farasipawl in Jesu in Sadusipawl ṭawng ding thei lo ko a rak tuah hai ti an theih tikah an tawngawkhawm. ³⁵ Anmai lakih Danthiam zet pakhat in Jesu kha hniksak phahin thu a sut, ³⁶ “Zirhtupa, Dan thu lakah thupek pawimawhbik ziang a si?” tiah a ti. ³⁷ Jesu in a hnenah, “BAWIPA na Pathian cu na thinlung zate, na nunnak zate le na ruahnak zate thawn na duhdaw pei. ³⁸ Cumi cu a pakhatnak le a pawimawhbik mi thupek a si. ³⁹ A pahnihnak cu a pakhatnak vek thotho a si. Nangmah na duhdawtawk vekin na inhnen na duhdaw pei. ⁴⁰ Hi thupek pahnih parah Dan thupawl hmuahhmuah le profetpawlih ngan mi thupawl hmuahhmuah cu a ṭhumaw ṭheh,” tiah a ti. ⁴¹ Farasipawl an rak tawnkhawmawk tikah Jesu in thu a rak sut hai, ⁴² “Khrih thuhla cu ziangtin nan ruat? Zo-ih Fapa a si?” tiah a ti. Cule annih in a hnenah, “Anih cu David-ih Fapa a si,” tiah an ti. ⁴³ Anih in an hnenah, “Cuti asile ziangah saw Thlarau huham ih a ṭawngtu David in amah cu, ‘Bawipa,’ tiah a kawh? ⁴⁴ “ ‘David in, “BAWIPA in ka Bawipai hnenah na ralpawl na kepal ih ka retngah hlanlo ka vawrh lamah to aw,” ’ tiah a ti. ⁴⁵ “Curuangah, David in anih cu Bawipa tiah a kawh asile ziangtin David-ih Fapa a si thei ding?” tiah a ti. ⁴⁶ Zohman in Jesu cu kam khat hman an sawn thei lo. Cule cui ni thawk ihsin zohman in thu dang an sut ngam nawn lo.

¹ Cule Jesu in mipi le a dungthluntupawl hnenah thu a sim. ² “Danzirhtupawl le Farasipawl cu Mawsi-ih tonak ah an to. ³ Curuangah, thlun dingih an lo fial mi hmuah cu thlun uh la tuah uh. Asinan, an sim mi anmah in an tuah lo ruangah an tuah vekin tuah hlah uh. ⁴ Ziangahtile, annih cun phurh har zet mi thilrit zetzet an ṭawn ih, mi liang parah an suang. Asinan anmah cun cui phurrit ṭhawn dingah an kutzung khatte hman an suah duh lo. ⁵ “Mi ih hmuh dingah an hnaṭuan mi hmuahhmuah hi an tuah. Curuangah, an fulakṭeri tla an tumter ih, an puan zim fem an fualter. ⁶ Cule puai hmun ah a sangbik hmunpawl an duh ih, sinakokpawl ah tohkham pawimawh bikbik an duh. ⁷ Cun, dawrhmunpawl ah mi ih upatnak pek le, ‘Rabbi, Rabbi,’ tiih kawh an duh. ⁸ “Asinan nannih cun mi in Rabbi tiih an lo kawh ding duh hlah uh. Ziangahtile, Zirhtu pakhat lawng nan nei ih, amah cu Khrih a si. Cule nannih cu nan zaten unau rual nan si. ⁹ Cule mi pakhat hman leitlun ah ka pa tiah ko hlah uh. Ziangahtile, Pa pakhat lawng nan nei ih, anih cu vancungram ah a um. ¹⁰ Mi in zirhtupa ti khalin lo ko hlah hai seh. Ziangahtile, Zirhtu pakhat lawng nan nei ih, amah cu Khrih a si. ¹¹ Asinan, nan lakih a ropibik cu nan siahhlawh a si ding a si. ¹² Cule mi zokhal amah le amah a cawisangawtu cu niamter a si ding ih amahtei hnuai a dawrtu cu cawisan a si ding. ¹³ “Asinan nannih Danzirhtupawl le nannih Farasipawl nan hmakhua a pit a si! Nannih cu midepde nan si. Ziangahtile, nannih cun midang hrangah vancung uknak sangka tla nan khar. Nanmah le nan lut fawn lo. A lut duhtupawl le nan siang fawn lo. ¹⁴ Nannih Danzirhtupawl le Farasipawl nan hmakhua a pit a si! Nannih cu midepde nan si. Ziangahtile, nuhmeipawlih inn nan lawng ih, mi bumnak ah rei zetzet thla nan camawter. Curuangah a nasasin mi thuṭhennak nan co ding. ¹⁵ “Nannih Danzirhtupawl le Farasipawl nan hmakhua a pit a si! Nannih cu midepde nan si. Ziangahtile, mi pakhat nan biaknak ih la lut dingah cun khawmual le tifinriat ah nan tlawng. Mi pakhat nan lakluhngah tikah nanmah hnakih Gehenna mi let hnih ah nan canter. ¹⁶ “Nannih hruaitu mitcawpawl nan hmakhua a pit a si! ‘Mi zokhal in temple sal ih sia a sam asile zianghman a pawi lo. Asinan mi zokhal in temple sungih a um mi sui sal in sia a sam asile a sesam mi in amah le amah a kaihrengaw a si,’ tiah nan ti. ¹⁷ Nannih miaa le mitcaw pawl! Khui mi so ropideuh? Sui maw, sui thianghlimtertu temple so ropideuh? ¹⁸ Nannih cun, ‘Mi zokhal in biakṭheng sal in sia a sam asile zianghman a pawi lo. Asinan mi zokhal in biakṭheng parih thilhlan mi sal ih sia a sam asile a sesam mi in amah le amah a kaihrengaw,’ ti khalin nan ti. ¹⁹ Nannih miaa le mitcaw pawl! Khui mi so ropideuh? Thilhlan maw, thilhlan thianghlimtertu biakṭheng so ropideuh? ²⁰ Curuangah mi pakhat in biakṭheng sal ih sia a sam tikah biakṭheng le a parih um mi zatein sia a sam a si. ²¹ Cule mi pakhat in temple sal ih sia a sam tikah, acui temple le a sungih umtu pai hmin in sia a sam a si. ²² Cule van sal ih sesamtu cun Pathian-ih laltohkham le a parih totupai hmin in sia a sam a si. ²³ “Nannih Danzirhtupawl le Farasipawl nan hmakhua a pit a si! Nannih cu midepde nan si. Ziangahtile, nannih cun kuṭinan, anethon le kumin pawl tiang ṭhenhra ṭhenkhat nan pe. Asinan, a thupisawn mi diknak, zahngainak le rinumnak danpawl cu nan tanta. Cupawl cu rak tuah zo ding nan mawi a si. A dangpawl khal kha nan tan men ding cu a si lo. ²⁴ Nannih lam hruaitu mitcawpawl! Fikte fa te zetzet cu nan thlefai nan kalauk cu nan dawlh. ²⁵ “Nannih Danzirhtupawl le Farasipawl nan hmakhua a pit a si! Nannih cu midepde nan si. Ziangahtile, no le kheng leng lam cu fai zetin nan khawlh nan a sung lam cu mi thil lawnnak le thlahdahawknak in a khat. ²⁶ Nannih Farasi mitcawpawl no le kheng a leng lam faiter dingah a sung lam khawlh hmaisa uh. ²⁷ “Nannih Danzirhtupawl le Farasipawl nan hmakhua a pit a si! Nannih cu midepde nan si. Ziangahtile, nannih cu si rang an hnih mi thlan vek nan si. A leng lam cun mi in mawi zetin an hmu nan a sung lamah cun milai ruhpawl le bawrhhlawh hlirin a khat. ²⁸ Cutivek thothoin nannih khal a leng lamah cun midingfel ah mi in an lo hmu ding. Asinan nan sung lam cu depdetnak le dan lo ih nunnak in a lo luahkhat a si. ²⁹ “Nannih Danzirhtupawl le Farasipawl nan hmakhua a pit a si! Nannih cu midepde nan si. Ziangahtile, profetpawlih thlanpawl cu nan sak. Midingfelpawlih lungphunpawl cu nan ceimawi. ³⁰ Nannih in, ‘Kan pupapawlih sanah hin rak nung veta nungla profetpawl thisen an suahnak ah kan tel ve lo ding,’ tiah nan ti. ³¹ Cutiih nan ti ruangah nannih cu profetpawl a rak thattupawlih tesinfa nan si tin nanmah le nanmah dokalhaw in theihpitu nan si. ³² Cule nan pupapawlih tahnak cu nannih in khatter lawlaw uh. ³³ “Nannih rulpawl! Tur nei rul cithlahpawl! Ziangtin Gehenna meisa thuṭhennak ihsin nan luat thei ding? ³⁴ Ngai hnik uh, ziangahtile nan hnenah profetpawl le mifimpawl le Danzirhtupawl ka thlah ding. Cule nannih in a hrekkhatpawl cu nan that ding ih, nan khengbet ding. A dangpawl cu nan sinakokpawl ah nan vaw ding ih, khaw khat hnu khaw khat nan dawi vivo ding. ³⁵ Cu mi ruangah leitlun ih midingfelpawl thisen nan rak suah mi hmuahhmuah, Abel-ih thisen ihsi thawkin temple le biakṭheng karlakih nan rak thah mi Berakhiah-ih fapa Zakhariah-ih thisen tiang mawhnak cu nanmai parah a tla ṭheh ding. ³⁶ Thungai thu ka lo sim a si, cui thilpawl hmuahhmuah cu tui san minungpawl parah a rung thleng leh ding. ³⁷ “Maw Jerusalem, Jerusalem! Profetpawl na that ih, na hnenih Pathian in a thlah mipawl cu lungto in na dengthat. Arpi in a fatepawl a thla hnuaiih a awp vekin na falepawl cu vei ziangzat meng so lo khawmsak ka tum. Asinan na rak duh lo. ³⁸ Ngai hnik uh, nan inn cu ṭhing reprepin tansan a si. ³⁹ Curuangah, nan hnenah ka lo sim a si, ‘ BAWIPAI hmin ih a ratu cu thangṭhat in um seh,’ tiih nan ti lai hlanlo tuisi thawkin in hmu nawn hrimhrim lo ding,” tiah a ti.

¹ Jesu cu temple kulh sung ihsin a suak ih, a feh laiah a dungthluntupawl a hnenah an ra ih, temple innpawl tla cu an hei khih. ² Cule Jesu in an hnenah, “Hi thilpawl hmuahhmuah hi nan hmu a si lo maw? Thungai thu ka lo sim, lungto pakhat parih lungto a suangaw mi pakhat hman tang loin hlawn ṭheh an si leh ding,” tiah a let hai. ³ Olif Tlang parih Jesu a to laiah zohman ih theih loin a dungthluntupawl a hnenah an ra ih, “Cui thilpawl tla cu ziang tikah a thleng ding? Na ratsalnak ding le san cemnak ding hminsinnak cu ziangvek a si ding? in sim aw,” tiah an ti. ⁴ Cule Jesu in an hnenah hitin a sawn hai, “Zohman ih an lo bumlonak dingah va ralring uh. ⁵ Ziangahtile, ka hmin in mi tampi an ra ding ih, ‘Khrih cu keimah hi ka si,’ tiah an ti ding ih, mi tampi an bum ding. ⁶ Ral doawknak thupawl si seh, ral doawk ding titi thupawl tla nan thei ding. Asinan thinphang lo dingin ralring uh. Ziangahtile, cui thilpawl hmuahhmuah cu an ra thleng ko ding, asinan a cemnetnak cu a si hrih lo ding. ⁷ Ziangahtile, miphun pakhat le pakhat an doaw ding, ram khat le ram khat an doaw ding. Cule pam le hremnak le linghnin pawl tla hmun dangdang ah a um ding. ⁸ Hi thilpawl hmuahhmuah tla cu harsat tuarnakih hramthawknak an si. ⁹ “Cule harsatnak ah an lo thlen ding ih, an lo that ding. Ka hmin ruangah miphun hmuahhmuah in an lo hua ding. ¹⁰ Cu tikah mi tampi cu an tlu ding. Pakhat le pakhat an phiarsawmaw ding ih, pakhat le pakhat an huaaw ding. ¹¹ Cule profet deu tampi an suak ding ih, mi tampi an bum ding. ¹² Dan lo ih nun a karh ding ruangah mi tampiih duhdawtnak cu a dai ding. ¹³ Asinan a cemnet tiangih a tuarsuaktu cu runsuah a si ding. ¹⁴ Cule vancung uknak thuthangṭha hi leilung tlun khua zakipah phuan a si ding. Cumi cu miphun hmuahhmuah hnenah theihpitu a si ding. Cui hnuah a cemnetnak a thleng ding. ¹⁵ “Profet Daniel-ih sim mi fihnungza siatsuahtu cu hmun thianghlim ih a din nan hmuh tikah hi ca a siartu cun theithiam seh. ¹⁶ Cu mi nan hmuh tikah Judia peng ih a um mipawl cu tlang parah tlan hai seh. ¹⁷ Inn parih a um mi cun thil lasuak dingin a inn sungah rung ṭum hlah seh. ¹⁸ Lo ih a umtu cun a hnipuan la dingin a inn ah tlungkir hlah seh. ¹⁹ Cui canih favun mipawl le nausen hnawifawp neitupawl an hmakhua a pit ding. ²⁰ Asinan, nan tlan can cu thlatang can le Sabbath Ni a silonak dingin thla cam uh. ²¹ Ziangahtile, leilung hramthawk ihsin tuini tiang a um dah kel lo mi le hmai lam khalih a umsal nawn lo ding mi harsatnak rapthlak a thleng ding. ²² Cui can cu tawiter a si lo ah cun zohman a tang an um lo ding. Asinan hril mipawl ruangah cui can cu tawiter a si ding. ²³ “Cule zo in simaw, ‘Ngai hnik, Khrih cu hinah a um,’ asilole ‘Khinah a um,’ an lo ti asile va zum hlah uh. ²⁴ Ziangahtile, khrih deupawl le profet deupawl an suak ding ih, cang thei sehla hril mipawl hman an bum theinak dingah hminsinnak ropipawl le mangbangza thilpawl an hmuh ding. ²⁵ Ngai hnik uh, a hlankhanin ka lo sim cia a si. ²⁶ “Ngai hnik, ‘Anih cu ramṭhing ah a um,’ an lo ti asile va feh hlah uh. ‘Ngai hnik, anih cu inn sung deng pindan ah a um,’ an lo ti khalle va zum hlah uh. ²⁷ Ziangahtile, Minung Fapa cu ni suahnak lam ihsin ni tlaknak lam tiang nimthlakau a tletsuak vekin a runglang ding. ²⁸ Ziangahtile, mithi ruak umnak kipah mulukawlh an khawmaw ding. ²⁹ “Acui harsatnak a cem leveten ni a thim ding. Thlapi in a tleunak a suah nawn lo ding. Arsipawl tla van ihsin an tla ding. Cule van ih a um mi huhampawl tla an hnin ṭheh ding. ³⁰ “Cu tikah, Minung Fapa-ih hminsinnak cu van ah a runglang ding. Cule leilung tlunih miphun hmuahhmuah an ṭap ding. Minung Fapa cu huham le ropitnak nasazet thawn van mero parih a rat kha an hmu ding. ³¹ Cule tawtawrawt awn ring zet thawn a vancungmipawl a thlah ding ih, lei kil li ih ta le van hram khatlam deng ihsin khatlam deng tiangih a um mi a hril mipawl kha an finkhawm ding. ³² “Theipi kung tahṭhimnak ihsin zir hnik uh. A hngepawl tla an hung no ih, a hnah nopawl a cerh suah tikah ṭhal can a nai thlang a si ti nan thei. ³³ Cuvekin, cui thilpawl hmuahhmuah nan hmuh tikah Minung Fapa rat can cu a nai tuk thlang, a thleng lohli ding ti thei uh. ³⁴ Thungai thu ka lo sim a si, cui thilpawl hmuahhmuah a kim lai hlanlo tui san minungpawl hi an hloral hrimhrim lo ding. ³⁵ Lei le van cu an hloral ding, asinan, ka thupawl cu an hloral hrimhrim lo ding. ³⁶ “Cui ni le cui tikcucan cu zohman in an thei lo. Van ih um vancungmipawl khalin an thei ve lo. Asinan, ka pa lawngin a thei. ³⁷ Minung Fapa a rat tikah Noah san lai vek khan a si ding. ³⁸ Ziangahtile, ti a lik hlanah minungpawl cu an ei, an in, an ṭhi aw ih an hamaw. Noah lawng sungih a luh ni tiang cutin an um. ³⁹ Tilik a tlung ih an zaten a fenhlo thluh hlan tiang zianghman an thei lo. Minung Fapa, a runglang tik khalah hivekin a si thotho ding. ⁴⁰ Cule mi pahnih cu lo ah an um ding. Pakhat lak a si ding ih a dang pakhat cu tanta a si ding. ⁴¹ Nunau pahnih cu riallung an rial laiah pakhat lak a si ding ih, a dang pakhat cu tanta a si ding. ⁴² “Curuangah, ralring in um uh. Ziangahtile, ziang tikah nan Bawipa a ra ding ti nan thei lo. ⁴³ Cule hihi thei uh, intekpa in rukru rat ding can rak thei sehla cu a ralring ding ih, rukru cu a inn sungah a lutter lo ding. ⁴⁴ Curuangah nannih khal tiar ringring uh. Ziangahtile, nan rin lo canah Minung Fapa cu a ra ding. ⁴⁵ “A pu in a insang hotu dingih a ret mi, a tikcu teih anmah rawl petu ding siahhlawh rinsan tlak le fim cu zo so a si? ⁴⁶ A pu a rat tikih a ṭuan ding mi hna ṭuan rero ih a hmuh mi siahhlawh cu mihualvanṭha a si. ⁴⁷ Thungai thu ka lo sim, cui siahhlawhpa cu a pu in a thilri neih mi hmuahhmuah kilkhawitu ah a ret ding. ⁴⁸ Asinan, siahhlawh ṭha lo cun a thinlungtein, ‘Ka pu cu a ra cing lo ding,’ tiah a ti. ⁴⁹ Cule a rualpi siahhlawh dangpawl kha vuak a thawk ih, zuripawl thawn in le ei in an um. ⁵⁰ Cui siahhlawhpai pu cu a rin lo ni le a theih lo canah a ra ding. ⁵¹ Cule a pupa cun a salpa cu tan hnih ah a sattan ding ih, midepdepawlih co vek a coter ding. Cui hmun ah ṭap le hacang rial in a um ding.

¹ “Cule cui ni a thlen tikah vancung uknak cu mo neitupa hmuak dingin an meito la ih a fehsuaktu fala him pahra thawn an bangaw ding. ² Cule cui lakih panga cu an fim ih panga an aa. ³ Ziangahtile, fala aapawl cun an meito an ken tikah meiti zianghman an keng lo. ⁴ Asinan fala fimpawl cun meiti cu thawl in meito thawn an kengtlang. ⁵ Mo neitupa a rat tlai ruangah an zaten an ih a hmu ih, an itthat ṭheh. ⁶ “Asinan zanṭim ah mi pakhat a au ih, ‘Ngai hnik uh, mo neitupa a ra! Amah hmuak dingah va feh uh,’ tiah a ti. ⁷ “Cu tikah cui fala himpawl cu an zaten an ṭhang ih an meito an timtuah. ⁸ Cule a aapawl cun a fimpawl hnenah, ‘Kan meito an mit cuahco ruangah nan meiti hrekkhat in pe ve uh,’ tiah an dil. ⁹ “A fimpawl in, ‘Kan lo pe lo ding! Nannih le kannih hrangah a daih lo ding. Meiti zuarpawl hnenah va feh uh la nanmai hrangah va lei sawn uh,’ tiah an let. ¹⁰ “Asinan meiti lei dingin lamzin ih an feh laiah mo neitupa cu a ra thleng. A rak tiar mi fala himpawl cu amah thawn mo puai ah an lut. Cule sangka an khar. ¹¹ “Cui hnuah a dang falapawl khal cu an rakirsal ih, ‘Bawipa, Bawipa, sangka in rak awn aw,’ tiah an ti. ¹² Asinan anih in, ‘Thungai thu ka lo sim, ka lo thei hai lo,’ tiah a let. ¹³ “Minung Fapa-ih rat ding ni le tikcucan nan theih lo ruangah ralringten um uh. ¹⁴ “Cun, vancung uknak cu mi pakhat a siahhlawhpawl ko in a neih mi thilpawl an kilkhawi dingin an hnenah ap tahratih ram hlapi ih khualtlawngtupa vek a si ding. ¹⁵ Sal pakhat hnenah, talent panga, a dang pakhat hnenah talent pahnih, a dang pakhat hnenah talent pakhat tiin anmai ti thei tawk ciarin a pe. Cule khual a tlawnsan lohli. ¹⁶ Talent panga cotupa cu a feh ih, cumi cun sum a tuah. Cule a dang talent panga a ngahbet. ¹⁷ Cuvek thothoin talent pahnih cotupa khalin a dang pahnih a ngahbet ve. ¹⁸ Asinan talent pakhat cotupa cu a va feh ih, lei ah kua a lai ih, a pu-ih tangka cu a thup. ¹⁹ “Can reipi hnuah cui siahhlawhpawlih pupa cu a ra tlung ih, anmah thawn sum cazin tifelawknak an nei. ²⁰ Talent panga cotupa cu a ra ih, a dang talent panga a rak keng ih, ‘Ka pu, nang in talent panga i rak pe. Zoh hnik, a dang talent panga ka rak ngah,’ tiah a ti. ²¹ “Cule a pu in a hnenah, ‘Na tiṭha riai! Nang cu siahhlawh ṭha le siahhlawh rinum na si. Nang cu thil malte parah na rinum a si, thil tampi uktu ah ka lo tuah ding. Na pu-ih lungawinak sungah va lut aw,’ tiah a ti. ²² “Talent pahnih cotupa khal a ra ih, ‘Ka pu, talent pahnih i rak pe. Zoh hnik, a dang talent pahnih ka rak ngah,’ tiah a ti. ²³ “Cule a pu in a hnenah, ‘Na tiṭha riai! Nang cu siahhlawh ṭha le siahhlawh rinum na si. Nang cu thil malte parah na rinum a si, thil tampi uktu ah ka lo tuah ding. Na pu-ih lungawinak ah lut aw la, co ve aw,’ tiah a ti. ²⁴ “Cule talent pakhat cotupa cu a ra ih, ‘Ka pu, nang cu mitikherkher na si ti ka lo thei. Na tuhlonak hmun ah na at ih, thlaici na vawrhlonak hmun ah na khawm. ²⁵ Curuangah ka ṭih ih, ka va feh ih na talent cu lei sungah ka thup. Zoh hnik, na ta cu hi tawkah a um ko,’ tiah a ti. ²⁶ “A pu cun, ‘Nang cu siahhlawh ṭha lo le mizangzel na si. Ka tuhlonak hmun ah ka at ih, thlaici ka vawrhlonak hmun ah ka khawm ti na thei maw si? tiah a let. ²⁷ Curuangah, ka tangka cu paisa cawihtupawl hnenah rak pe zo ding na si. Cule ka ra tlunkirsal tikah ka paisa cu a ṭhang thawn ka rak la ding nan. ²⁸ “Curuangah, a hnen ihsin talent cu la uh la talent tangka pahra neitu kha pe uh. ²⁹ Ziangahtile, thil a neitu kip hnenah pekbet an si ding ih, tampi in a nei hnenhnen ding. Thil le ri neilotu cu a neih mi ziangkhal a hnen ihsin laksak a si ding. ³⁰ Khai siahhlawh santlailopa kha a leng khawthim lakah hlawn uh. Cui hmun ah a ṭap ding ih a hacang a rial ding,’ tiah a ti. ³¹ “Cule Minung Fapa cu a ropitnak ih thuamaw in a thianghlim vancungmipawl hmuahhmuah thawn a rat tikah a laltohkham parah ropitnak thawn a to ding. ³² Cule miphun hmuahhmuah cu a hmaiah an finkhawmaw ding. Cule tuukhaltu in a tuupawl me lak ihsin a ṭhen bangin a ṭhen hai ding. ³³ Tuupawl cu a vawrh lamah a ret ding ih, mepawl cu a keh lamah a ret ding. ³⁴ “Cule Siangpahrang in a vawrh lamih umpawl hnenah, ‘Nannih ka Pai thlawsuah rak pek zo mipawl ra uh. Leilung sem tir ihsin nan hrangih a rak timtuah mi uknak cu nan ro ah co uh. ³⁵ Ziangahtile, ka ril a rawn laiah nannih in ka ei dingah rawl in pe. Ka ti a hal laiah nannih in ka in ding in pe. Mikhual ka si laiah nan inn ah in thlengter. ³⁶ Taklawng ih ka um laiah hruh ding in pe. Ka nat laiah in ra veh. Thawng ka tlak laiah ka hnenah nan ra,’ tiah a ti hai ding. ³⁷ “Cule midingfelpawl cun, ‘Bawipa, ziang tikah na rilrawn kan lo hmuh ih rawl kan lo pek? Ziang tikah na tihal kan lo hmuh ih in ding kan lo pek? ³⁸ Ziang tikah mikhual na si lai kan lo hmuh ih kan inn ah kan lo thlenter? Ziang tikah taklawng ih na um kan lo hmuh ih hnipuan kan lo pek? ³⁹ Cule ziang tikah na nat le thawng na tlak kan lo hmuh ih na hnenih kan ra feh dah?’ tiah an sang ding. ⁴⁰ “Cule Siangpahrang in an hnenah, ‘Thungai thu ka lo sim, ziangkhal ka unaulepawl lakih a tenaubik mi pakhat parih nan rak tuah mi hmuahhmuah cu ka parah nan rak tuah a si,’ tiah a let hai ding. ⁴¹ “Cun, a keh lamih um mipawl hnenah, ‘Nannih camsiat mipawl Diabol le a vancungmipawl hrangih rak timtuah mi kumkhaw meisa sungah ka hnen ihsin feh uh. ⁴² Ziangahtile, ka rilrawn laiah ka ei dingah rawl in rak pe lo. Ka ti a hal laiah ka in ding in rak pe lo. ⁴³ Mikhual ka si laiah in thlengter lo. Taklawng ih ka um laiah hruh ding in rak pe lo. Ka nat lai le thawng ka tlak laiah in rak veh lo,’ tiah a sang hai ding. ⁴⁴ “Cule annih khalin, ‘Bawipa, ziang tikah rilrawng le tihal in si seh, mikhual le taklawng in si seh, na le thawngtla in kan lo hmu na cing in lo tuamhlawm lo ih kan um?’ tiah an let ding. ⁴⁵ “Cule anih in an hnenah, ‘Thungai thu ka lo sim, ziangkhal hi minungpawl lakih a tenaubik mi pakhat parih nan tuah lo mi hmuahhmuah cu ka parah nan tuah lo a si,’ tiah a sang hai ding. ⁴⁶ “Cule annih cu kumkhaw dantatnak sungah an fehhlo ding ih, midingfelpawl cu kumkhawnunnak sungah an feh ding,” tiah a ti.

¹ Cun, hiti hin thil a cang, Jesu in cui thupawl hmuahhmuah a sim ṭheh tikah a dungthluntupawl hnenah, ² “Tui hnu ni hnihnak ah Lantapuai a um ding ti nan thei. Cule Minung Fapa cu khenbet dingah phiarsawm a si ding,” tiah a ti hai. ³ Cun, puithiam sangpawl le Danzirhtupawl le miupapawl tla cu Kaiafas an ti mi puithiam lubikih inn tual ah an tawngawkhawm ih, ⁴ hrawkhrawl zetin Jesu kaihdan ding le thah theidan ding an ruatkhawm. ⁵ Asinan, “Puai ni ah cun si hlah seh, mipi an buai pang ding,” tiah an ti. ⁶ Cui canah, Jesu cu Bethany khua, a rak phar dah mi Simon-ih inn ah a um. ⁷ Nunaunu pakhat cu cu tawkah hriak rimhmui mankhung zet mi cu alabasṭa lung ih tuah mi thawl in a rak keng ih, Jesu cu rawl ei dingin cabuai a kil laiah a lu ah acui hriak cu a burh. ⁸ Cumi cu dungthluntupawl in an hmuh tikah an thin a heng zet ih, “Ziangruangah hi hriak rimhmui cu a riaralter men? ⁹ Cui hriak cu man tampi ah zuar in a tangka cu miretheipawl pek theih a si,” tiah an ti. ¹⁰ Asinan Jesu in cumi cu a thei ih an hnenah, “Ziangah nunaunu cu nan hnaihnawk rero? Anih in ka parah thil ṭha a tuah a si. ¹¹ Ziangahtile, miretheipawl cu nan hnenah an um ringring ko. Asinan kei cu nan hnenah ka um ringring lo ding. ¹² Anih in ka taksa parah hriak rimhmui a burh tikah keimah phumnak ding hrangih a rak timtuah mi a si. ¹³ Thungai thu ka lo sim, hi thuthangṭha an simnak leitlun hmun kipah hi thu hi amah hngilhlonak ah an sim ringring ding,” tiah a ti. ¹⁴ Cun, a dungthluntu hleihnih lakih pakhat Judas Iskariot cu puithiam sangpawl hnenah a va feh ih, ¹⁵ “Nan hnenih Jesu ka lo pek asile ziang in pe ding?” tiah a ti hai. Cule annih in ngun paisa sawmthum pe dingin an lungkim. ¹⁶ Cui can thawk ihsin Judas in Jesu phiarsawm theinak ding can remcang a hawl. ¹⁷ Thilnu tel lo sang puai a ni khatnak ah a dungthluntupawl cu Jesu hnenah an feh ih, “Khuiah so na ei ding mi Lantarawl kan lo timtuahsak ding na duh?” tiah an ti. ¹⁸ Cule anih in, “Khawpi sungih mi pakhat hnenah va feh uh la a hnenah cun, ‘Zirhtupa in, “Ka can a nai thlang. Ka dungthluntupawl thawn na inn ah Lantapuai ka hmang ding,” a ti,’ tin va sim uh,” tiah a ti. ¹⁹ Cule a dungthluntupawl cun Jesu-ih a cah mi vekin an tuah ih, Lantarawl cu an timtuah. ²⁰ Zan lam a thlen tikah Jesu cu hleihnihpawl thawn cabuai a hil. ²¹ Cule an ei laiah Jesu in, “Thungai thu ka lo sim, nan lakih pakhat in i phiarsawm ding,” tiah a ti hai. ²² Cu tikah an riah a se zet. Cule pakhat hnu pakhat a hnenah, “Bawipa, keimah ka si maw?” ti an thawk. ²³ Cule anih in, “Keimah thawn kheng pakhat sungih sang a hnimtlangtu in i phiarsawm ding a si. ²⁴ Cathianghlim in Minung Fapa-ih thuhla a rak ngan cia vekin anih cu a feh ko ding. Asinan, Minung Fapa a phiarsawmtupa cu a hmakhua a pit a si. Suak lo lawlaw sehla a hrangah a ṭhasawn ding,” tiah a ti. ²⁵ Cule Jesu phiarsawmtu ding Judas in, “Rabbi, keimah hi ka si maw?” tiah a let. Jesu in a hnenah, “A si, nangmah roriih na sim vek hin a si ko,” tiah a ti. ²⁶ Rawl an ei laiah, Jesu in sang a la ih, lungawithu a sim hnuah a phel ih a dungthluntupawl a pek hai. “Cule, la uh la ei uh, hihi ka taksapum a si,” tiah a ti. ²⁷ Cun, no cu a la ih, lungawithu a sim hnuah a pe hai. Cule anih in, “Nan zaten rak in uh. ²⁸ Ziangahtile, himi cu sualpawl ngaidam a si theinak ding hrangih mi tampi hrangah ka thlet mi ka thisen ih nemhngeh mi thuthlung thar a si. ²⁹ Ka lo sim a si, ka Pai uknak sungah nanmah thawn a thar ka insal ni a thlen lai hlanlo hi sabitti cu ka in nawn lo ding,” tiah a ti. ³⁰ Cule thangṭhatnak hla an sak hnuah Olif Tlang ah an feh. ³¹ Cun Jesu in an hnenah, “Tuizan ah keimai ruangah nan tlu ṭheh ding. Ziangahtile, Cathianghlim in, ‘Tuukhaltu ka vaw ding ih tuu runrual an tlandarh ṭheh ding,’ a ti. ³² “Asinan ka thawhsal hnuah cun nan hmaiah Galili peng ah ka feh ding,” tiah a ti. ³³ Asinan Peter in a hnenah, “Nangmah ruangah mi hmuahhmuah an tluk ṭheh hmanah kei cu ka tlu dah lo ding,” tiah a let. ³⁴ Jesu in a hnenah, “Thungai thu ka lo sim, tuizan roriah ar a khuan hlanah vei thum i phatsan ding,” tiah a ti. ³⁵ Cule Peter in Jesui hnenah, “Nangmah thawi thihtlang a si khalle ka lo phatsan hrimhrim lo ding,” tiah a ti. Dungthluntu zaten cutin an ti ṭheh. ³⁶ Cule Jesu cu a dungthluntupawl thawn Gesmani an ti mi hmun ah an va thleng ih, a dungthluntupawl hnenah, “Thla cam dingah khi tawkih ka va fehsung hmuah hi tawkah rak to uh,” tiah a ti. ³⁷ Cule a hnenah Peter le Zebedi-ih fapa pahnih tla a hruai ih, Jesu cu riahsia le thinhar zetih um a thawk. ³⁸ Cun, anih in an hnenah, “Ka thinlung hi thihnak tlakkhawp le nasazetin a riah a sia. Hinah hin um uh la, ralringten rak um uh,” tiah a ti hai. ³⁹ Cule hmai deuhah malte a va feh ih a bawkkhup ih, “Maw ka Pa, a cang thei asile hi no hi ka hnenin lanter aw. Asinan, ka duh vekin si hlah sehla nangmai duh vekin si ko seh,” tiah thla a cam. ⁴⁰ Cule a dungthluntupawl hnenah a rakir ih an itthah ṭheh a hmuh tikah Peter hnenah, “Ziangruangah nazi pakhatte hman ralringten nan rak um thei lo? ⁴¹ Sualfawrhnak sungih nan luhlonak dingah ralring uh la thla cam uh. Thlarau cun a duh ko nan, taksa cu a ṭawnṭai a si,” tiah a ti. ⁴² A vei hnihnak a va fehsal ih thla a cam, “Maw ka Pa, hi no hi in loin ka hnen ihsin a lan thei lo ding asile nangmai duhnak vekin si ko seh,” tiah a ti. ⁴³ Cule a feh ih an itthah ṭheh kha a hmu lala. Ziangahtile, an mit a rit tuk. ⁴⁴ Cun a tanta hai ih a fehsal ih, a vei thumnak a cam kel mi vekin thla a cam. ⁴⁵ Cule a dungthluntupawl hnenah a kirsal ih an hnenah, “Itthat hrih uh la, cawl hrih ko uh. Ngai hnik uh, a tikcu a thleng zo. Minung Fapa cu misualpawl kut sungah phiarsawm a si thlang. ⁴⁶ Tho uh la, feh uhsi. Ngai hnik uh, i phiarsawmtupa nai teih a ra thlen zo khi!” tiah a ti. ⁴⁷ Cule a ṭawng rero laiah, ngai hnik, a dungthluntu hleihnih lakih mi pakhat Judas cu puithiam sangpawl le miupapawlih rak thlah mi, ralnam le talhtum keng mi tampipawl thawn a ra thleng. ⁴⁸ Jesu phiarsawmtupa cun puithiam sangpawl le miupapawl cu theihthiamnak a rak pek cia zo, “Ka hnam mi pa cu nan kaih duh mi pa a si, kai uh,” tiah a ti. ⁴⁹ A thlen veten Jesu cu a pan lohli ih, “Rabbi, cibai,” a ti ih a hnam. ⁵⁰ Cule Jesu in a hnenah, “Rualpa, ziangah saw na rat?” tiah a ti. Cule mipi an ra ih, Jesu cu an kai ih an hruai. ⁵¹ Cule, ngai hnik, Jesu hnenih a um mipawl lakih mi pakhat in a kut a suah ih a ralnam a zuk ih, puithiam lubikih siahhlawhpa kha a sat ih a hna a sahthlakngah. ⁵² Cule Jesu in a hnenah, “Na ralnam cu a umnak sungah retsal aw. Ziangahtile, ralnam lentu hmuahhmuah cu ralnam in an thi ding. ⁵³ Vancungmi lizon hleihnih hnakih tam run thlah lohli dingin ka Pai hnenah dil thei lo ah maw i ruah? ⁵⁴ Asinan cuvekin si hnik sehla Cathianghlim ih a sim mi cu ziangtin a kim thei ding?” tiah a ti. ⁵⁵ Cui canah, Jesu in mipipawl hnenah, “Suamhmang kai ding bangin ralnam le talhtum thawn keimah kai dingah maw nan rat? Ni tinten temple kulh sungah thu zirh in nan hnenah ka to ko nan in kai fawn lo. ⁵⁶ Profetpawlih ngan mipawl a kim theinak dingah hi thil hmuahhmuah tla hi a cang a si,” tiah a ti. Cu tikah, a dungthluntu zaten Jesu cu tanta in an tlan hlohsan ṭheh. ⁵⁷ Cule Jesu a rak kaitupawl in Danzirhtupawl le miupapawl an rak pumkhawmawknak hmun puithiam lubik Kaiafas hnenah an hei hruai. ⁵⁸ Asinan, Peter cun hla nawnin puithiam lubikih inn tual tiang a hei thlun ih a sungah a lut. Ziangvekin thil a cang pei ti hmuh duh ah temple kiltupawl hnenah a to. ⁵⁹ Cui canah, puithiam sangpawl, miupapawl le Sanhedrinpawl hmuahhmuah cun Jesu dokalh in amah thah theinak ding theihpitu diklo an rak hawl rero. Asinan zianghman an hmu lo. ⁶⁰ Theihpitu diklo tampi hmai lamah an ra suak ko nan zianghman an rak hmu lo. A netnakah mi pahnih an ra suak ih, ⁶¹ “Hi pa hin, ‘Pathian temple cu ka siatbal thei ih ni thum sungah ka saksal thei,’ a ti,” tiah an ti. ⁶² Cule puithiam lubik a hung ding ih Jesui hnenah, “Ziang tal na sawn ve hai lo ding maw? Hipawl in nangmah dokalh ih thu an theihter mipawl hi ziangtin a si?” tiah a ti. ⁶³ Asinan Jesu cu daiten a um thotho. Cule puithiam lubik cun a hnenah, “Nangmah cu Pathian Fapa, Khrih na si le si lo in sim dingin a nung mi Pathian sal in ka lo ngen a si,” tiah a ti. ⁶⁴ Jesu in a hnenah, “Na sim mi vekin a si ko. Sikhalsehla hmai lam canah Minung Fapa hi huham neitupai vawrh lamih a to le van mero parih a rat khal na hmu leh ding,” tiah a ti. ⁶⁵ Cule puithiam lubik cun a hnipuan a thlek ih, “Hi Pa in Pathian a thangsiat zo. Thutheihpitu dang kan ṭul nawn maw si? Zoh hnik uh, Pathian a thangsiatzia cu atu ah khan nan thei a si. ⁶⁶ Ziangtin nan ruat?” tiah a ti. Cule, annih in, “Anih cu thi tlak hrimhrim a si,” tiah an sang. ⁶⁷ Cuisin a hmai ah cil an phui ih an kuttum in an thawng. Cule midangpawl in an kut zaphak in an beng. ⁶⁸ Cule annih in, “Nang Khrih, profet vekin kan hnenah thu phuang aw, a lo veltu hi zo a si?” tiah an ti. ⁶⁹ Cui canah, “Peter cu tual ah a rak to. Cule hnenumnu pakhat a hnenah a ra ih, “Nang khal Galili peng mi Jesu thawi umtlang mi na si,” tiah a ti. ⁷⁰ Asinan anih in, “Na ṭawng mi cu ka thei lo,” tiah an zate hmaiah a pha. ⁷¹ Cule Peter cu inn hmai kawtka lamah a va feh ih, cu tawkah hnenum nunau dang pakhat in a rak hmu. Cule, cu nu cun cu tawkih um mipawl hnenah, “Hi pa khal hi Nazareth Jesu hnenih um mi a si,” tiah a sim hai. ⁷² Cule Peter in, “Hi pa hi ka thei lo,” tiah sesam in a pha lala. ⁷³ Cui hnu malte rei deuhah cu tawkih a ding mipawl in Peter hnenah, “Nang khal hi an lakih mi pakhat na si rori. Ziangahtile, na aw cawi in a lang a si,” tiah an ti. ⁷⁴ Cule Peter cun siatcamawk le sesam a thawk ih, “Cu pa cu ka thei lo,” tiah a ti. Cu veten ar a khuang. ⁷⁵ Cu tikah Peter cun Jesu in a hnenih a sim mi, “Ar a khuan hlanah vei thum i phatsan ding,” a ti mi kha a vun mangsal. Cule, Peter cu lengah a suak ih nasazetin a ṭap.

¹ Zingpit teah puithiam sangpawl hmuahhmuah le miupapawl cu Jesu dokalh in amah that dingah thu an ruatkhawm. ² Cule Jesu cu an ṭawn ih an hruai. Cule uktu Ponṭias Pilat kut ah an thlen. ³ Jesu a rak phiarsawmtu Judas in Jesu thiamlo an coh ti a hmuh tikah a siraw ih, ngun paisa sawmthum rual tla cu puithiam sangpawl le miupapawl hnenah a va khirhsal ih, ⁴ “Mawh nei lo thisen phiarsawm in, ka rak sual zo a si,” tiah a ti. Asinan, annih in, “Cucu kan hrangah a pawinak ziang a um? Nangmah na titi in va ti aw,” tiah an ti. ⁵ Cule ngun paisapawl cu temple hmun thianghlim sungah a hlawn ih a suak. Cule a va feh ih amah le amah a awkaw. ⁶ Cule puithiam sangpawl cun acui ngun paisapawl cu an la ih, “Himi cu thisen man a si ruangah temple sung hlawnthil bawm ih ret ding cu kan dan in a siang lo,” tiah an ti. ⁷ Cun, an relkhawm ih, cui paisa in bel tuahtupai lo an lei. Cumi cu ram dang mipawl phumnak hmun ah an hmang. ⁸ Curuangah, cui lo cu tuisunni tiangin ‘Thisen lo,’ tiah an ko. ⁹ Cumi cun Profet Jeremiah in thil cang ding mi a rak sim cia mi cu a kimter. Profet Jeremiah in, “Israel minungpawl in a parih a man an rak khiah mi ngun paisa sawmthum cu an la ih; ¹⁰ BAWIPA in thu i pek mi vekin bel tuahtui lo hrangah cui paisa cu an pe,” tiah a ngan. ¹¹ Cule Jesu cu uktu bawi hmaiah a ding ih, uktupa cun, “Jew-pawlih Siangpahrang na si maw?” tiah a sut. Cule Jesu in, “Na sim vek cu a si ko,” tiah a ti. ¹² Puithiam sangpawl le miupapawl in sual an puh rero nan a let hai lo. ¹³ Cule Pilat in a hnenah, “Nangmah dokalh in thil tampi thutheihpinak an rak ken rero hi teh na thei lo maw?” tiah a ti. ¹⁴ Asinan Jesu in kam khat hman a sawn lo ruangah uktu bawipa cu a mang a bang zet. ¹⁵ Lantapuai tinten uktu bawipa in mipi ih an duh mi thawngtla pakhat an hnenah a suah ṭheu. ¹⁶ Cui canah, mi hmuahhmuah ih an theih mi thawngtla misual hminthang pakhat, Barabbas an ti mi pa a um. ¹⁷ An pumkhawmawk hnuah, Pilat in an hnenah, “Zo ka lo suahsak nan duh? Barabbas maw, Khrih an ti mi Jesu deuh?” tiah a ti hai. ¹⁸ Ziangahtile, Jesu an iksik ruangah a kut ah an thlen ti a thei. ¹⁹ Cule Pilat cu thuṭhennak tohkham parih a to laiah a nupi in, “Khai midingfelpa parah zianghman rak tuah hlah. Amai thuhla ka mang ih ka man ruangah tuisun ah tampi ka tuar a si,” tiin thu a cah. ²⁰ Asinan, puithiam sangpawl le miupapawl in Barabbas cu dil ih, Jesu cu that dingin mipi an rak hminngah cia. ²¹ Asinan, uktu bawipa cun an hnenah, “Hi mi pahnih lakah zo deuh suah ningla nan duh?” tiah a let hai. Cule annih in, “Barabbas,” tiah an ti. ²² Pilat in an hnenah, “Cuti asile, Khrih an ti mi pa Jesu hi ziangtin ka tuah ding?” tiah a ti. Cule an zaten, “Khengbet aw!” tiah an ti. ²³ Cun, uktu bawipa cun, “Ziang thil ṭha lo a tuah?” tiah a ti. Asinan annih in, “Khengbet aw!” tiah an au sinsin. ²⁴ Cule Pilat in zianghman tisuak thei mi a nei lo ih buainak a suak sawn ding ti a hmuh tikah ti a la ih, mipi hmaiah a kut a khawlh. Cule, “Kei cu hi midingfelpai thisen ah mawhnak ka nei lo. Nanmah nan titi in ti uh,” tiah a ti. ²⁵ Cule mipi an zaten, “A thisen cu kan parah le kan falepawl parah um ko seh,” tiah an sang. ²⁶ Cule Barabbas cu an hnenah uktu bawipa cun a suah ih, Jesu cu a ralkappawl a vuakter ih, khenbet dingin a ralkappawl kut ah a pe. ²⁷ Cun, uktu bawipai ralkappawl in Jesu cu Praetorium sung ah an luhpi ih, ralkap bur khat pumpin an kulh. ²⁸ Cule a hnipuan an hlihsak ih, puan sen an sinter. ²⁹ Hling ih an phiar mi lukhum a lu ah an khumter. Cule a vawrh lam kut ah nuangfung an kengter ih a hmaiah an khuk an bil. Cule nautat in an hmuhsuam ih, “Jew-pawlih Siangpahrang, salam kan lo pe!” tiah an ti. ³⁰ Cule a parah cil an phui, nuangfung an lak ih a lu ah an vuak. ³¹ Nautat in an hmuhsuam hnuah a puan cu an hlihsak ih, amai hnipuan an hruhter. Cule khengbet dingah an hruaisuak. ³² Cutiih an feh laiah Sairin ram ihsin mi pakhat Simon an ti mi pa an tawng ih, hranhramin Jesui khraws cu an putter. ³³ Cule Golgotha ti mi hmun an va thleng. A tican cu Luruh Hmun tinak a si. ³⁴ Cu tawkah, a in dingah Jesu cu thil kha thawi rawi mi sabitti thur an pek. A tep ih a in duh lo. ³⁵ “Annih in ka hnipuan cu camcawhfung zuk in an zem aw,” tiih profet in thil cang ding mi a sim mi a kim theinak dingah an khenbet hnuah camcawhfung zuk in a hnipuan cu an zem aw. ³⁶ Cui hmun ah cun an to ih, amah cu an kil. ³⁷ Jesui lu tlunah sual an puhnak, “HIHI JEW-PAWLIH SIANGPAHRANG JESU A SI,” tiih ngan mi cu an tar. ³⁸ Amah thawn suamhmang pahnih, a vawrh lamah pakhat, a keh lamah pakhat an khengbet. ³⁹ A kiangih a fehtupawl in an zawkzet, an lu an thinhnawh. ⁴⁰ Cule, “Nang temple ṭhiatbal ih, ni thum sungih a saksaltupa nangmah le nangmah runaw aw. Pathian Fapa na si ah cun khraws parin rung ṭum aw,” tiah an ti. ⁴¹ Cuvek thothoin puithiam sangpawl, Danzirhtupawl le miupapawl cun hmuhsuam in, ⁴² “Midang cu a runsuak thei nan amah le amah cu a runaw thei lo. Israel-pawlih Siangpahrang a si ah cun khraws par ihsin atu rori rung ṭum sehla amah cu kan zum ding. ⁴³ Anih cun Pathian a rinsan a si. Pathian in a duh asile atu roriah runsuak seh. Ziangahtile, ‘Keimah cu Pathian Fapa ka si,’ a ti,” tiah an ti. ⁴⁴ Cule amah thawi an khenbet mi suamhmang pahnih khalin cuvek thothoin an hmuhsuam ve. ⁴⁵ Cui canah, sun nazi hleihnih ihsin zan lam nazi pathum tiang cui ram pumpi ah thimkhawzing a tlung. ⁴⁶ Zan lam nazi pathum hrawngah Jesu cu ring zetin, “Eloi, Eloi, lama sabakthani?” tiah a au. A tican cu, “Ka Pathian, ka Pathian, ziangruangah i tlansan?” tinak a si. ⁴⁷ A kiangih a ding mi, mi hrekkhatpawl in cu mi an theih tikah, “Hi pa in Elijah a kawh hi,” tiah an ti. ⁴⁸ Cule an lakih mi pakhat a va tlan lohli ih, tihawp a lak ih, sabitti thur sungah a hnim ih, nuangfung zim ih a ṭem hnuah in dingah Jesu a pe. ⁴⁹ Asinan, a dangpawl in, “Um hrih hnik seh, amah runsuak dingah Elijah a ra maw, ra lo kan zoh hnik pei,” tiah an ti. ⁵⁰ Cule Jesu cu ring zetin a ausal ih a thlarau a thlah. ⁵¹ Cule, ngai hnik, temple hmun thianghlim sungih puanzar cu a luzim ihsin a tawdeng tiang ṭhen hnih ah a tlek. Leilung a hnin ih, lungpi tla an kuai. ⁵² Thlanpawl an awngaw ih a rak itthat zo mi mithianghlim taksaruang tampi tla an tho. ⁵³ Cule Jesu a thawhsal hnuah thlan sung ihsin an suak ih, khawpi thianghlim sungah an lut. Cule mi tampi hnenah an lang. ⁵⁴ Cui canah, ralkap za hotu le amah thawi um mi Jesui ruak kiltupawl in linghnin le thil cang mipawl an hmuh tikah an ṭih tuk lawmam ih, “Hi pa cu Pathian Fapa rori a rak si ko e!” tiah an ti. ⁵⁵ Cule cu tawkah nunau tampi an rak um. Cupawl cu Galili peng ihsin Jesu a rak thluntu le a rak tuamhlawmtupawl an si ih hla nawnin an hei cuan. ⁵⁶ Cupawl lakah cun Mary Magdalin, James le Joses-ih nu Mary le Zebedi-ih fapalepawlih nu tla an tel. ⁵⁷ Zan lam a hung si tikah Arimathia khua ihsin cu tawkah milianpa pakhat a ra thleng. A hmin cu Joseph a si ih, anih khal Jesui dungthluntu pakhat a rak si ve. ⁵⁸ Cu pa cu Pilat hnenah a feh ih, Jesui ruang cu a dil. Cule Pilat in a ruang cu pe dingin thu a pe hai. ⁵⁹ Cule Joseph in Jesui ruang cu a la ih a fai zet mi puan nem pate in a tuam. ⁶⁰ Cule lungpi a virh mi amai thlan thar sungah a vui. Cule lung tum zet thlanka ah a hril ih a fehsan. ⁶¹ Cun, Mary Magdalin le a dang Mary cu thlanka zawn ah cun an to. ⁶² Cule puai hrangih timlamawk ni a thaisun ah puithiam sangpawl le Farasipawl cu Pilat hmaiah an tawngkhawmaw. ⁶³ Cule annih in, “Ka pu, khai mibumtupa khan a nun laiah, ‘Ni thum hnuah ka thosal ding,’ tiah a ti mi kha kan cing lai. ⁶⁴ Curuangah atu ihsin ni thum a kim hlanlo thlan kha ṭhaten kil dingin thu pe aw. Cu lo asile a dungthluntupawl zan ah an ra ding ih, a ruak kha an ru ding. Cule mipipawl kha mithi lak ihsin a rak tho zo tiah an sim ding. Hi a netaih bumawknak cu a hmaisaih bumawknak hnakin pawi a khawih sawn ding,” tiah an ti. ⁶⁵ Cule Pilat in an hnenah, “Kiltupawl tla nan nei a si si. Va feh uh la thlan kha a cang thei patawpin him ko tuah uh,” tiah a ti. ⁶⁶ Cule an va feh ih, thlan kha a him thei patawpin an tuah. Cule cui lung kha hminsinnak tacik an khen ih a kiltu tla an va retta.

¹ Sabbath can a liam ih, zarh khatih a hmaisabik ni, zingthlapit khawfingcah zawngah thlan zoh dingin Mary Magdalin le a dang Mary cu cu tawkah cun an va feh. ² Cule, ngai hnik, nasazetin ling a hnin. Ziangahtile, Bawipai vancungmi cu van ihsin a rung ṭum ih, cule a ra ih, lung cu thlanka ihsin a hril ih a parah a to. ³ Cui vancungmi-ih langdan cu nimthlakau vek a si ih a hnipuan cu vur bangin a var. ⁴ Thlan kiltupawl in an ṭih tuk ruangah an khur ih, mithi vekah an cang. ⁵ Cule, vancungmi in nunaupawl hnenah, “Ṭih hlah uh. Ziangahtile, an khenbet mi Jesu nan hawl a si ti ka lo thei. ⁶ Anih cu hi tawkah a um nawn lo. Ziangahtile, a rak sim cia vekin a thosal zo. Ra uh la, Bawipa an phumnak hmun khi zoh hnik uh. ⁷ Cule zamrang zetin va feh uh la a dungthluntupawl kha mithi lak ihsin a thosal zo tiah va sim uh. Cule, zoh hnik uh, nan hmaiah Galili peng ah a feh cia. Cu tawkah nan va hmu ding. Ngai hnik uh, ka lo sim a si,” tiah a ti. ⁸ Cule zamrangten thlan ihsin an fehsuak ih ṭih phah le lungawi zetin a dungthluntupawl hnenih va than dingah an tlan. ⁹ Cun, a dungthluntupawl va sim dingih an feh laiah, ngai hnik, Jesu in a rak tawng hai ih, cibai a buk hai. Cule an va pan ih a ke an pawm ih amah cu an bia. ¹⁰ Cule Jesu in an hnenah, “Ṭih hlah uh, va feh uh la ka unaulepawl kha Galili peng ih feh dingin sim uh. Cu tawkah in hmu ding,” tiah a ti hai. ¹¹ Cutin, cui nunau pahnihte cu an feh rero laiah, ngai hnik, thlan kiltu hrekkhatpawl cu khawpi sungah an feh ih, thil cang mipawl hmuahhmuah kha puithiam sangpawl an sim. ¹² Cule puithiam sangpawl le miupapawl an tawngaw ih, thu an ruatrelkhawm. Cule ralkappawl kha tangka tampi an pe. ¹³ Cule an hnenah, “‘Kan rak ihthah sungah a dungthluntupawl kha zan ah an ra ih, kan hnen ihsin an ruk a si,’ tiah nan ti ding. ¹⁴ Cui thu cu uktu bawipai hna a thlen asile kanmah in kan lem ding ih, harsatnak sung ihsin kan lo hum ding,” tiah an ti. ¹⁵ Cule thlan kiltupawl in tangka cu an la ih, puithiam sangpawl ih an sim mi vekin an tuah. Cui thu cu Jew-pawl lakah tuisunni tiangin an rel rero mi a si. ¹⁶ Cule dungthluntu hleikhatpawl cu Jesu-ih a rak tiam cianak Galili peng ih tlang parah an feh. ¹⁷ Amah an hmuh tikah an bia. Asinan an lakih mi hrekkhatpawl cun an ringhlel. ¹⁸ Cule Jesu cu an hnenah a feh ih, “Lei le van ih thuneihnak hmuahhmuah cu ka hnenah pek a si zo. ¹⁹ Curuangah va feh uh la, miphun hmuahhmuah cu ka dungthluntu ah va tuah uh. Pa le Fapa le Thlarau Thianghlim hmin in baptisma va pe uh. ²⁰ Nan hnenih ka lo pek mi thupekpawl hmuahhmuah kha thlun dingin va zirh uh. Cule, ngai hnik uh, san cem tiangin nan hnenah ka um ringring ding,” tiah a ti. Amen.