LUKA

LUKA

¹ Kan lakih thil cang mipawl thuhla hi mi tampi in a sangsangtei ngankhum an rak thawk zo. Cui thilpawl tla cu kan zum rori mi an si. ² Athawk ihsin mit roriih a hmutupawl le thuthangṭha rawngbawltupawl in cui thil cang mipawl cu kan hnenah in rak simsawng. Curuangah, kan hnenih in rak sim mi vekin ka ngan a si. ³ Curuangah upat tlakbik Theofilas, a hmaisabik ihsin cui thuhlapawl a zatein ka theihfiang hnuah, a sangsangten na hnenah ngan ningla a ṭha ding tiah kei khalin ka ruat. ⁴ Cucu, midangpawl ih an rak lo zirh rero zo mi thupawl kha a dik a si ti na theih famkim theinak dingah a si. ⁵ Judia peng Siangpahrang Herod-ih san laiah, Abijah-ih ho a si mi puithiam Zakhariah a rak um. A nupi cu Aaron-ih tesinfa a si ih, a hmin cu Elizabeth a si. ⁶ An pahnih in Pathian hmaiah midingfel an si. Sawihnawm ding um loin, Bawipai thupek hmuahhmuah le dan le dun an thlun. ⁷ Elizabeth cu micing a si ruangah le an pahnih in an upat zet thlang ruangah fa an nei lo. ⁸ Cule hiti hin a si, Zakhariah cu amai can a thlen tikah puithiam a si vekin Pathian hmaiih a hopawl thawn puithiam hna a ṭuan laiah, ⁹ puithiampawl ih tidan kel bangin camcawhfung an zuk ih, Zakhariah-ih ṭuanvo cu Bawipai temple hmun thianghlim sungih rimhmui ur ding a si. ¹⁰ Cutiih rimhmui a ur laiah cun mipi zate cu temple lengah thla an rak cam rero. ¹¹ Cule Bawipai vancungmi pakhat cu a hnenah a runglang ih, rimhmui urnak biakṭheng vawrh lamah a ding. ¹² Cule Zakhariah in cui vancungmi cu a hmuh tikah nasazetin a thinlung a buai ih, ṭihnak in a khat. ¹³ Asinan cui vancungmi cun a hnenah, “Ṭih hlah, Zakhariah, ziangahtile na Pathian in na thlacam cu a thei zo ih, na nupi Elizabeth in fapa a lo hrin ding. A hmin ah John na sak pei. ¹⁴ Cule aipuannak le lungawinak na nei ding. Cui na fapa a suah tikah mi tampi tla an lung a awi ding. ¹⁵ Ziangahtile, anih cu Bawipai mithmuh ah a ropi ding. Sabitzu si seh, zu si seh a in hrimhrim lo ding. A nui pum sungih a um lai ihsin Thlarau Thianghlim in a khat ding. ¹⁶ Cule anih in Israel mi tampi Bawipa an Pathian lamah a hawikirsalter ding. ¹⁷ Cule anih cu Bawipai hmaiah Elijah-ih thlarau le huham in a feh ding. Bawipai hrangah minungpawl timlam dingin, palepawl in an fale an kaihhruaidan a thleng ding ih, thulunglopawl cu midingfelpawlih ruahnak lamah a hruai ding. Cule mipipawl cu Bawipai hrangah tiar cia le timtuah cia si dingin a tuah ding,” tiah a ti. ¹⁸ Cule Zakhariah in vancungmi hnenah, “Na sim vekin a cang ngaingai ding ti cu ziangtin ka thei thei ding? Kei cu patar ka si zo. Ka nupi khal a kum a upa tuk zo,” tiah a ti. ¹⁹ Vancungmi in a sang ih a hnenah, “Keimah cu Pathian hmaiih dingtu Gabriel ka si. Nangmah thu lo sim ding le cui lungawiumza thuthang na hnenih phuang dingah i thlah a si. ²⁰ Cule, ngai hnik, ka ṭawng mi na zum lo ruangah hi thuhla tlamtlinter ni a si hlanlo daiten na um ding ih, na ṭawng thei lo ding. Ka ṭawng mi cu a tikcu a kim tikah a tlamtling leh ding,” tiah a ti. ²¹ Mipi in Zakhariah cu an rak hngak. Temple hmun thianghlim sungih rei tuk a um ruangah an mang a rak bang. ²² A ra suah tikah a ra be thei hai lo. Cule annih in temple hmun thianghlim sungah larnak a hmu ti an rak theithiam. Ziangahtile, anih in an hnenah theihthiamnak tla a pe ih, ṭawng thei loin a rak um ringring. ²³ Cule hiti hin a si, Zakhariah cu a rawngbawl can a cem tikah amai inn ah a tin. ²⁴ Cui hnuah a nupi Elizabeth cu fa a vun ih thla nga sung inn sungah a khumawaw. ²⁵ Cule Elizabeth in, “Bawipa in ka hrangah hihi a rak tuah a si. Tui canah cun i duhsaknak a langter zo ih, misenpi lakih ka ningzahnak cu i laksak zo,” tiah a ti. ²⁶ A thla ruknak ah Pathian in vancungmi Gabriel cu Galili peng, Nazareth an ti mi khua ih um, ²⁷ fala him hnenah a run thlah. Cui fala him cu David-ih tesinfa a si mi Joseph thawn ṭhiaw dingih ham cia mi a si ih, a hmin cu Mary a si. ²⁸ Vancungmi cu a hnenah a ra ih, “Cibai! Nang cu duhsaknak sang zet cotu na si. Bawipa cu na hnenah a um a si. Nang cu nunau lakah thlawsuah mi na si,” tiah a ti. ²⁹ Cule Mary in vancungmi cu a hmuh tikah, a ṭawng mi in nasazetin a thinlung a buaiter. Cule a thinlung in, “Hi cibai buknak ih sullam cu ziang a si pei?” tiah a ruat. ³⁰ Cule vancungmi in a hnenah, “Mary, ṭih hlah, ziangahtile nang cun Pathian duhsaknak na hmu zo a si. ³¹ Ngai hnik, na pum sungah fa na vun ding ih, fapa na hring ding. Cule a hmin ah Jesu na sak ding. ³² Anih cu miropi a si ding ih, cungnungbikih Fapa tiah kawh a si ding. Cule Bawipa Pathian in a hnenah a pupa David-ih laltohkham a pe ding. ³³ Cule Jakob tefa tlunah kumkhua in a uk ding ih, a uknak cu cem ni a nei lo ding,” tiah a sim. ³⁴ Mary in vancungmi hnenah, “Hi thu cu ziangtin a cang thei ding, kei cu mipa thawn kan pawlaw lo?” tiah a ti. ³⁵ Cule vancungmi in a sang ih a hnenah, “Thlarau Thianghlim cu na parah a rung thleng ding ih, cungnungbikih huham cun a lo tuam him ding. Curuangah na hrin ding mi Mi Thianghlim Pa khal Pathian Fapa tiah kawh a si ding. ³⁶ Cule, ngai hnik, na sungkhatnu Elizabeth khalin a tar zet hnuah fa a vun. Fa a nei thei nawn lo tiah an ti mi cu atu ah fa a vunnak thla ruk a si zo. ³⁷ Ziangahtile, Pathian hrangah cun thil cang thei lo a um lo,” tiah a ti. ³⁸ Cule Mary in, “Ngai hnik, kei cu Bawipai salnu ka si. Na sim mi vekin ka hnenah thleng ko seh,” tiah a ti. Cule Vancungmi cun Mary cu a fehsan. ³⁹ Cui canah Mary cu a tho ih, Judia peng tlang par khua pakhat ah zamrangten a hung feh. ⁴⁰ Cule Zakhariah tei inn sungah a lut ih, Elizabeth cu cibai a buk. ⁴¹ Cun hiti hin a si, Elizabeth in Mary-ih cibai buknak a theih tikah a pum sungih nausente cu a khir. Cule Elizabeth cu Thlarau Thianghlim in a khat. ⁴² Cun aw ring zetin, “Nang cu nunau lakah mihualvanṭha na si. Na pum sungih naute khal mihualvanṭha a si. ⁴³ Ka Bawipai nu ka hnenih ra tlawn ding duhsaknak cu kei in ka co? ⁴⁴ Ngai hnik, cibai i buknak aw ka hnenih a thlen leveten ka pum sungih nausente cu aipuang in a khir a si. ⁴⁵ A zumtunu cu mihualvanṭha a si. Ziangahtile, Bawipai a sim mi thupawl cu a cangsuak ding a si,” tiah Elizabeth cu a au. ⁴⁶ Cule Mary in, “Ka nunnak cun nasazetin Bawipa a thangṭhat. ⁴⁷ Ka thlarau cu i rundamtu Pathian ah a aipuang zet. ⁴⁸ Ziangahtile, kei a salnu dinhmun niam zet cu i ngaihsak. Ngai hnik, atu thawk ihsin ṭhangthar hmuahhmuah in mihualvanṭha tiah in ti ding. ⁴⁹ Ziangahtile, huham ih a khat mi pa in ka hrangah thil ropi a tuah zo. A hmin cu a thianghlim a si. ⁵⁰ Cule a zahngainak cu san khat hnu san khat amah ṭihzahtupawl parah a um vivo. ⁵¹ A ban in cahnak cu a langter zo. An thinlung khawruahnak ih mihngalpawl cu a ṭekdarhter zo. ⁵² Mithiltithei cu an laltohkham ihsin a hnukthla ih, mihnuaitapawl cu a cawisang zo. ⁵³ Rilrawng mipawl cu thil ṭha thawn a tlaiter hai ih, milianpawl cu kut lawngin a fehhloter hai. ⁵⁴ Zahngainak neih ding a hngilh lo ruangah a siahhlawh Israel cu a rak bawm. ⁵⁵ Kan pupapawl hnenih a rak sim cia bangin Israel cu a bawm. Cumi cu Abraham hnenah le a tesinfa hnenah kumkhua in a rak sim,” tiah a ti. ⁵⁶ Cule Mary cu Elizabeth hnenah thla thum hrawng a um hnuah amai inn ah a tlung. ⁵⁷ Elizabeth cu fa a hrinnak ding nithla a kim ih, fapa a hring. ⁵⁸ Cule a inhnenpawl le a sungkhatpawl in Bawipa in zahngainak nasazet Elizabeth parih a neihzia an thei. Cule amah thawn lungawi aipuang in an um. ⁵⁹ Cule, hiti hin a rak si, a ni riatnak ah naute serh tan dingin an ra pan ih, a hmin ah a pai hmin Zakhariah thotho an sak. ⁶⁰ Asinan, a nu in, “Cutin si hlah seh, John ti si sawn seh,” tiah a sang hai. ⁶¹ Asinan annih in a hnenah, “Nan sungkhat lakah cuvek hmin nei zohman an um lo,” tiah an ti. ⁶² A pa Zakhariah in naute cu hmin ziangvek sak a duh ti theih an duh ih, theihthiamnak an hmuh. ⁶³ Cule anih in cangannak calung a dil hai ih, “A hmin cu John a si,” tiah a ngan. Cule an zaten an mang a bang. ⁶⁴ Culeveten Zakhariah-ih kaa cu awnsak a si ih, a lei cu a phawihaw. Cule a ṭawng ih, Pathian a thangṭhat. ⁶⁵ An kiangkapih umpawl hmuahhmuah in an ṭih ih, cui thu hmuahhmuah cu Judia peng, tlangpar ram hmuahhmuah ah a thang ṭheh. ⁶⁶ Cui thu a theitu hmuahhmuah in an thinlung ah acui thu cu an ret cio. Cule, “Hi naute cu ziangvek mi ah hung cang leh tak pei maw?” tiah an ti. Bawipai kut cu cui naute hnenah a um. ⁶⁷ A pa Zakhariah cu Thlarau Thianghlim in a khat ih, profet vekin thu a sim. ⁶⁸ Anih cun, “Bawipa cun a mipawl a rak vehvai ih a tlen hai zo ruangah Israel Pathian cu thangṭhat in um seh. ⁶⁹ A siahhlawh David tesinfa ihsin kan hrangah rundamnak ki a suakter zo. ⁷⁰ Leilung thawhtirte ihsin a profet thianghlimpawlih kaa ihsin a tiamkam cia vekin a cangsuak a si. ⁷¹ Kan ralpawl hnen ihsin le in huatupawl hmuahhmuah ih kut ihsin rundam kan si ding in rak tiamkam. ⁷² Cumi cu kan pupapawl parih zahngainak neih ding le a thuthlung thianghlim hngilh lo dingin thu a rak tiamkam. ⁷³ Kan pa Abraham hnenah sesam in thu a rak tiamkam. ⁷⁴ Kan ralpawl kut sung ihsin in runsuah hnuah ṭihnak um loin amah kan rian ding tiah sia a sam. ⁷⁵ Kan nun sung hmuahhmuah thianhlimnak le dingfelnak in a hmaiah kan rian ding. ⁷⁶ Cule, nang, ka fa, Cungnungbikih profet tiah kawh na si ding. Ziangahtile, nang cu a hrangah a lamzin rak sialtu dingah Bawipai hmaiah na feh ding. ⁷⁷ A mipawl in an sual ngaidam an sinak thawngin rundam an si ti an theihnak dingah Bawipai hmaiah na feh ding. ⁷⁸ Kan Pathian-ih zahngainak muril ruangin tlun lam ihsin kan hnenah ni a rung tlang zo. ⁷⁹ Thim lakih to mi le thihnak phenthlam hnuaiih to mipawl parih tle dingah le hnangamdaihnak lamzin sungih kan ke hruai dingah in rak vehvai zo,” tiah a ti. ⁸⁰ Naute cu a ṭhang ih, thlarau lamah a cak. Cule langhnganin Israel-pawl hnenih a lang hlan sung hmuah cu ramṭhing ah a um.

¹ Cu laiah cun hiti hin a rak si, Kaisar Augasṭas in leitlun mi hmuahhmuah hmin khum thluh dingin thu a pe. ² Cucu Siria ram ah Kurinia cu ram uktu a si laiih hmin khum hmaisabik a si. ³ Mi kip hmin pe dingin anmai khua cio ah an feh. ⁴ Cule Joseph khal cu Galili peng, Nazareth khua ihsin Judia ram David-ih khua Bethlehem ah a feh. Ziangahtile, amah cu David-ih tesinfa le sungkua a si. ⁵ Joseph cu a nupi si dingih hamnak an rak tuah zo mi fa hring zikte Mary thawn cui hmun ah cun an feh. ⁶ Cule, hiti hin a si, cu tawkih an um laiah Mary-ih nau hrin tikcu a kim. ⁷ A fatir fapa a hring ih, puan in a vel. Riahbuk ah an hrang hmun a um lo ruangah naute cu rankheng sungah a hlum. ⁸ Cui ram ah cun tuukhalpawl cu zan ah an tuupawl kil in ram lakah an um. ⁹ Cule, ngai hnik, Bawipai vancungmi pakhat cu an hnenah a runglang ih, Bawipai ropitnak in an kimvel cu a run tlet. Cule an ṭih ngaingai. ¹⁰ Asinan, vancungmi cun an hnenah, “Ngai hnik uh, nan hnenah lungawinak maksak thuthangṭha ka run phuan ruangah ṭih hlah uh. Cui thuthangṭha cu mi hmuahhmuah hrangah a si ding. ¹¹ Ziangahtile, tuini ah David khua ah nan hrangah Rundamtu a suak. Amah cu Bawi Khrih a si. ¹² Hihi nan hrangah theihthiamnak a si ding. Puan ih vel mi nausente cu rankheng sungah an hlum kha nan hmu ding,” tiah a ti. ¹³ Cule, hmakhatteah cui vancungmi thawn vancungmi burpi an runglang ih hitin Pathian an thangṭhat, ¹⁴ “Cungnungbik hmun ah Pathian cu thangṭhat si ko seh. Leitlun ah daihnak um ko seh. Minung hnenah a duhsaknak um ko seh,” tiah an ti. ¹⁵ Cule, hiti hin a rak si, vancungmipawl cu an hnen ihsin van ih an feh thluh tikah tuukhalpawl cun, “Atu ah Bethlehem khua tiang va feh uhsi la, Bawipai in rak sim mi thil cang mi cu va zoh hnik uhsi,” tiah pakhat le pakhat an tiaw. ¹⁶ Cuti cun, zamrang zetin an feh ih, Mary, Joseph le rankheng sungih hlum mi nausente cu an va hmu. ¹⁷ Naute an hmuh hnuah cui naute thuhla vancungmi ih an rak sim mi cu an than. ¹⁸ Cule tuukhalpawl ih sim mi thu a theitu hmuahhmuah cu an theih mi parah an mang a bang thluh. ¹⁹ Asinan, Mary in cui thil hmuahhmuah cu ruat phah reroin a thinlung ah a ret. ²⁰ Tuukhalpawl cu an theih mi le an hmuh mi thil hmuahhmuah ruangah Pathian sunlawih le thangṭhat in an kirsal. Vancungmi ih a rak sim cia vekin cui thil hmuahhmuah cu a kim a si. ²¹ Naute serhtannak ding ni ni riat a kim tikah Jesu tiah hmin an sak. Mary in a pum sungih a vun hlanah vancungmi in a rak sak cia mi hmin a si. ²² Cule, Mawsi Dan vekin Mary-ih thianfaiawk ni a kim tikah Joseph le Mary in naute cu Bawipa hnenih hlan dingin Jerusalem ah an fehpi. ²³ Cumi cu Bawipai Dan sungah, “Fatir mipa pohpoh cu BAWIPAI hrangih ruat mi an si an ti ding,” tiih ngan mi vek khan a si. ²⁴ Bawipai Dan sungih a sim mi vekin, “Thuro khuah khat asilole laileng note pahnih,” thawinak hlan ding a si. ²⁵ Ngai hnik, Simeon an ti mi pa pakhat cu Jerusalem ah a rak um. Amah cu midingfel le Pathian ngaihsak mi, Israel hnemtu ding a rak hngak ringringtupa a si. Cule Thlarau Thianghlim cu a parah a um. ²⁶ Thlarau Thianghlim in a hnenah Bawipai Khrih a hmuh hlanlo amah cu a thi lo ding tiah a rak phuangsuak cia. ²⁷ Amah cu Thlarau in a hruai ih temple kulh sungah a lut. Cule a nu le a pa in naute Jesu cu Dan ih a tidan kel in temple sungah an ratpi. ²⁸ Cu tikah, Simeon in naute cu a kut in a cawi ih, Bawipa a thangṭhat, ²⁹ “Cungnungbik Bawipa, atu ah na thu vekin na siahhlawh kei cu hnangamten i fehter thlang aw. ³⁰ Ziangahtile, na rundamnak cu ka mit roriin ka rak hmu zo. ³¹ Cumi cu mi hmuahhmuah mithmuh ah na rak timtuah. ³² Anih cu Zentelpawl tlettu ding tleu le na mi Israel-pawlih ropitnak a si ding,” tiah a ti. ³³ Simeon in naute-ih cungcangthu a sim mi ah Joseph le a nu cu an mang a bang. ³⁴ Cule Simeon in thlawsuah a pe hai ih, naute nu Mary hnenah, “Ngai hnik, hi naute cu Israelmi lakah mi tampi tluter ding le tungdingsaltu dingih ruat a si. Cule anih cu an simsiat ding mi hminsinnak a si ding. ³⁵ Cutin, mi tampi thinlung ih khawruah mi tla langter a si ding ih, ralnam in na thinlung khal a suntlang ding,” tiah a ti. ³⁶ Cu tawkah cun Asher hrin, Fanuel-ih fanu, Anna an ti mi profet nunau pakhat khal a rak um. Cu nu cu a tar zet. Pasal a neih hnuah a pasal thawn kum sarih an rak umtlang. ³⁷ Amah cu nuhmei a si ih, kum sawmriat le kum li hrawng a si. Cu nu cu temple kulh sung ihsin suak loin sun le zan, rawlul le thlacam in Pathian a bia. ³⁸ Cui can laifangah cun cu nu khal cu a ra lut ih, Pathian hnenah thangṭhatnak a hlan. Jerusalem khua ih tlensalnak a rak hngakhlaptupawl hmuahhmuah hnenah cui naute-ih thuhla a sim hai. ³⁹ Cule Bawipai Dan vekin Joseph le Mary in thil hmuahhmuah an tuah ṭheh hnuah Galili peng, anmai khua Nazareth ah an tlungsal. ⁴⁰ Nauhak cu a ṭhang ih, thlarau lamah a cak, fimnak in a khat ih, Pathian zangfahnak cu a parah a um. ⁴¹ Kum tinten a nu le a pa cu Jerusalem khua ah Lantapuai ah an feh ṭheu. ⁴² Cule, anih cu kum hleihnih a kim tikah an nunphung vekin Jerusalem khua ih Lantapuai ah cun an feh. ⁴³ Lantapuai nipawl tla a cem tikah an tlungsal. Nauhak Jesu cu Jerusalem khua ah a tangta. Cucu Joseph le Jesui nu in an rak thei lo. ⁴⁴ Asinan, an tlunpi mipawl lakih um ve ah an rak ruat ih, ni khat sung an feh. Cule an sungkhatpawl le an rualpipawl lakah Jesu cu an hawl. ⁴⁵ An hmuh lo tikah Jerusalem khua ah an kirsal ih, Jesu cu an hawl. ⁴⁶ Cule hiti hi a rak si, ni thum hnuah, Jesu cu temple kulh sungah zirhtupawl lakah to in an thu ngaithla le anmah thu sut ih a um lai kha an va hmu. ⁴⁷ A ṭawng mi a rak theitu hmuahhmuah cun a thu theihzia le a thu sandan pawl ah an mang a bang zet. ⁴⁸ A nu le a pa in amah an hmuh tikah an khawruah a har zet. Cule a nu in a hnenah, “Fapa, ziangah kan hnenah hihi na tuah? Zoh hnik, na pa le kei cun thinhar in kan lo hawl rero,” tiah a ti. ⁴⁹ Cule anih in an hnenah, “Ziangah saw in hawl? Ka Pai hna ka buaipi a ṭul a si ti nan rak thei lo maw si?” tiah a ti. ⁵⁰ Asinan an hnenah ziang a ṭawng ti an rak theithiam lo. ⁵¹ Cui hnuah Jesu cu a nu le a pa thawn Nazareth khua ah a feh ih an thu lung in a um. Asinan, a nu cun cui thil hmuahhmuah tla cu a thinlung ah a ret. ⁵² Cule, Jesu cu fimnak ah le ruangrai ah le Pathian le minung duhsaknak ah a ṭhang vivo.

¹ Kaisar Tiberius ih ram a uknak a kum hleingatnak ah, Ponṭias Pilat cu Judia peng uktu a si. Herod in ramṭhen pali lakih pakhat Galili peng a uk. A unaupa Filip in ramṭhen pali lakih pakhat Ituria le Trakhoniṭis peng a uk. Cule, Lisanias in ramṭhen pali lakih pakhat Abilin peng a uk. ² Anas le Kaiafas cu puithiam lubik an si. Cui canah ramṭhing ah Zakhariah-ih fapa John hnenah Pathian thu a rak thleng. ³ John cu Jordan tiva kiangkap ram hmuahhmuah ah a feh ih, sual ngaidamnak ding hrangah sualsirnak baptisma thu a sim. ⁴ Cumi cun profet Isaiah in a cazual sungih a rak ngan mi, “Ramṭhing ih mi pakhat au aw cun, ‘Bawipai hrangah lamzin sial uh. A zinpawl kha dingter uh. ⁵ A kuarnak kip kha silh khat uh, tlang le mual kipin rawnter uh. Lamzin kawi cu dingter uh la, lamzin bingbopawl tla cu rualter uh. ⁶ Cule mi hmuahhmuah in Pathian rundamnak an hmu ding,’ ” tiah a ti mi cu a tlamtlingter. ⁷ John cun amai baptisma co dingih a ra suak mi mi burpi hnenah, “Nannih cu tur nei rul cithlah nan si. A ra thleng lai ding mi thinhengnak ihsin tlansuak dingah zo in so ralrinnak a rak lo pe? ⁸ Curuangah nan sual nan sir taktakzia cu nan rah in langter uh. ‘Abraham cu kan pa a si,’ tiin nan thinlung sung in ruat thawk hlah uh. Nan hnenah ka lo sim a si, Pathian cun hi lungtopawl ihsin Abraham hrangah tesinfa tla a tuah thei a si. ⁹ Thingkungpawl hramah hreitlung ret a si zo. Curuangah rah ṭha a rah lo mi thingkung kipin hau thluk an si ding ih, meisa sungah paih an si ding,” tiah a ti. ¹⁰ Cule, mi burpi in, “Cuti asile ziang kan tuah ding?” tiah an sut. ¹¹ Cu tikah John in an hnenah, “Angki zun hnih neitu cun a neilotu kha ṭhen seh. Rawl a neitu khalin cutivek thothoin tuah seh,” tiah a sang hai. ¹² Siahkhawngtupawl khal John-ih baptisma co dingin a hnenah an ra ih, “Zirhtupa, ziang kan tuah ding?” tiah an ti. ¹³ Cule anih in an hnenah, “An lo fial mi hnakih tam in va khawng hlah uh,” tiah a ti hai. ¹⁴ Ralkappawl khalin, “Ziang kan tuah ding?” tiah an sut. Cule anih in an hnenah, “Zo hnen hmanin hranhramin paisa la hlah uh. Diklo zetin sual mi puh hlah uh la, nan hlawh tawkah nan lungkim tawk uh,” tiah a ti. ¹⁵ Mipi cun Khrih ruahsannak thawn John hi Khrih a si maw si lo tiah an zaten an thinlung khawruahhar in an um. ¹⁶ Cu laiah John in an zate hnenah a sang hai ih, “Kei cun ti ah baptisma ka lo pe. Asinan kei hnakih a nasasawn Mi a ra lai ding. Kei cu a kedam hri phawihsaktu ding hmanah ka tlak lo. Anih cun Thlarau Thianghlim ah le meisa ah baptisma a lo pe ding. ¹⁷ A kut ah sangvut zapnak ṭangṭa a um ih, sangvut cilnak hruih cu a thianfai ṭheh ding. Amai sangvut cu cuam sungah a thun ding. Asinan a hi cu zohman ih mih thei lo mi meisa in a urkang thluh ding,” tiah a ti. ¹⁸ Cun, John cun a dang thazang peknak thu tampi thawn mipi hnenah a phuang. ¹⁹ Asinan, John in Herod tetrak kha a unau Filip-ih nupi Herodias a ṭhit ruangah le thil ṭha lo dangdang a tuah mipawl hmuahhmuah ruangah a kawk. ²⁰ Herod cun a thil tisual mi hmuahhmuah tlunah John cu thawng sungah a thlakbet. ²¹ Mi hmuahhmuah baptisma an co tikah, hitin a rak si, Jesu khal baptisma a co ve. Thla a cam laifangah van cu a rak awngaw. ²² Cule Thlarau Thianghlim cu Jesu parah taksa pianhmang nei in thuro vekin a rung ṭum. Cule van ihsin aw pakhat in, “Nang cu ka duhdawt zet mi ka Fapa na si. Na parah ka lung a awi zet,” tiah a ti. ²³ Jesu rawngbawl a thawh tikah kum sawmthum hrawng a si. Mi in Jesu cu Joseph-ih fapa ah an ruat. Joseph cu Heli-ih fapa a si. ²⁴ Heli cu Matthat-ih fapa a si, Matthat cu Levi-ih fapa a si, Levi cu Melkhi-ih fapa a si, Melkhi cu Janna-ih fapa a si, Janna cu a dang Joseph-ih fapa a si. ²⁵ Joseph cu Mattathias-ih fapa a si. Mattathias cu Amos-ih fapa a si, Amos cu Nahum-ih fapa a si, Nahum cu Esli-ih fapa a si, Esli cu Naggai-ih fapa a si. ²⁶ Naggai cu Maath-ih fapa a si, Maath cu Mattathias-ih fapa a si, Mattathias cu Semei-ih fapa a si, Semei cu a dang Joseph-ih fapa a si, Joseph cu Judah-ih fapa a si. ²⁷ Judah cu Joanan-ih fapa a si, Joanan cu Rhesa-ih fapa a si. Rhesa cu Zerubbabel-ih fapa a si, Zerubbabel cu Shealtiel-ih fapa a si. Shealtiel cu Neri-ih fapa a si. ²⁸ Neri cu Melkhi-ih fapa a si, Melkhi cu Addi-ih fapa a si, Addi cu Kosam-ih fapa a si, Kosam cu Elmodam-ih fapa a si, Elmodam cu Er-ih fapa a si. ²⁹ Er cu Joshua-ih fapa a si, Joshua cu Eliezar-ih fapa a si, Eliezar cu Jorim-ih fapa a si, Jorim cu Matthat-ih fapa a si, Matthat cu Levi-ih fapa a si. ³⁰ Levi cu Simeon-ih fapa a si, Simeon cu Judah-ih fapa a si, Judah cu Joseph-ih fapa a si, Joseph cu Jonan-ih fapa a si, Jonan cu Eliakim-ih fapa a si. ³¹ Eliakim cu Melea-ih fapa a si, Melea cu Menan-ih fapa a si, Menan cu Mattatha-ih fapa a si, Mattatha cu Nathan-ih fapa a si, Nathan cu David-ih fapa a si. ³² David cu Jesse-ih fapa a si, Jesse cu Obed-ih fapa a si, Obed cu Boaz-ih fapa a si, Boaz cu Salmon-ih fapa a si, Salmon cu Nahshon-ih fapa a si. ³³ Nahshon cu Amminadab-ih fapa a si, Amminadab cu Ram-ih fapa a si, Ram cu Hezron-ih fapa a si, Hezron cu Perez-ih fapa a si, Perez cu Judah-ih fapa a si. ³⁴ Judah cu Jakob-ih fapa a si, Jakob cu Isak-ih fapa a si, Isak cu Abraham-ih fapa a si, Abraham cu Terah-ih fapa a si, Terah cu Nahor-ih fapa a si, ³⁵ Nahor cu Seruk-ih fapa a si, Seruk cu Reu-ih fapa a si, Reu cu Peleg-ih fapa a si, Peleg cu Eber-ih fapa a si, Eber cu Shelah-ih fapa a si. ³⁶ Shelah cu Kainan-ih fapa a si, Kainan cu Arphasad-ih fapa a si, Arphasad cu Shem-ih fapa a si, Shem cu Noah-ih fapa a si, Noah cu Lamek-ih fapa a si. ³⁷ Lamek cu Methuselah-ih fapa a si, Methuselah cu Enok-ih fapa a si, Enok cu Jared-ih fapa a si, Jared cu Mahalalel-ih fapa a si, Mahalalel cu Kenan-ih fapa a si. ³⁸ Kenan cu Enosh-ih fapa a si, Enosh cu Seth-ih fapa a si, Seth cu Adam-ih fapa a si ih, Adam cu Pathian fapa a si.

¹ Jesu cu Thlarau Thianghlim ih khat in Jordan tiva ihsin a kir ih, Thlarau in ramṭhing ah a hruai. ² Cu tawkah Diabol in ni sawmli sung sual a fawrh. Cui sung hmuahhmuah cu zianghman a ei lo. Cui can a cem tikah Jesu cu a ril a rawng. ³ Cule Diabol cun a hnenah, “Nangmah cu Pathian Fapa na sile hi lungto hi rawl ih cang dingin thu pe aw,” tiah a ti. ⁴ Cule Jesu in a hnenah, “Cathianghlim sungah, ‘Milai cu rawl lawngin a nung lo ding. Pathian ṭawngkam tinin a nung sawn ding,’ tiah ngan a si,” tiah a let. ⁵ Cule Diabol in Jesu cu tlang sangpi parah a hruai so ih, leitlun ram hmuahhmuah cu can malte sungah Jesu cu a hmuh. ⁶ Cule Diabol cun a hnenah, “Hi thuneihnak hmuahhmuah le an ropitnak hmuahhmuah tla hi ka lo pe ding. Ziangahtile, hipawl cu ka hnenih pek ṭheh zo an si ih, ka duhduh hnenah pe thei ka si. ⁷ Curuangah, keimah i biak asile hipawl hmuahhmuah hi na ta an si thluh ding,” tiah a ti. ⁸ Cu tikah, Jesu in a sang ih a hnenah, “Setan ka dungah feh aw. Ziangahtile, Cathianghlim in, ‘BAWIPA na Pathian na be ding ih, amah lawng na rian ding,’ a ti,” tiah a ti. ⁹ Cule Diabol cun Jesu cu Jerusalem ah a hruai. Cule temple kulh a sannakbik ah a ret ih, “Pathian Fapa na sile hi tawk ihsin dawpthla aw. ¹⁰ Ziangahtile, Cathianghlim in, ‘Nangmah lo kilkhawitu dingah Pathian in a vancungmipawl thu a pe ding. ¹¹ Cule na ke in lungto khawng lo dingin an kut in an lo dawm ding,’ a ti,” tiah a ti. ¹² Cu tikah, Jesu in a sang ih a hnenah, “Cathianghlim in, ‘BAWIPA na Pathian na hniksak lo pei,’ a ti,” tiah a let. ¹³ Diabol cun sual a fawrhnak hmuahhmuah a ṭheh tikah Jesu cu can tawkfang sung a fehsanta. ¹⁴ Cule, Jesu cu Thlarau huham thawn Galili ah a tlung. Cui ram kiangkap hmuahhmuah ah Jesui hmin cu a thang ṭheh. ¹⁵ An sinakokpawl ah thu a zirh hai ih, mi hmuahhmuah in Jesu cu an thangṭhat. ¹⁶ Cule Jesu cu a ṭhanlennak Nazareth khua ah a thleng, a ti ṭheu dan vekin Sabbath Ni ah sinakok sungah a lut ih ca siar dingin a ding. ¹⁷ Cu tawkah profet Isaiah-ih cazual kha an pe. Cui cazualpi cu a pharh ih, ¹⁸ “ BAWIPAI Thlarau cu ka parah a um. Ziangahtile, miretheipawl hnenih thuthangṭha sim dingah hriak i thih zo. Thinlung kekkuai mipawl damter dingah, saltang mipawl hnenah suahnak thu sim dingah le mitcawpawl in khua an hmuh theisalnak dingah, nehsawh tuarpawl zalenter dingah le ¹⁹ BAWIPAI duhsak kum thu phuang dingah i rak thlah a si,” tiih ngan mi kha a siar. ²⁰ Cule cui cazual cu a zualsal ih, siahhlawhpai hnenah a pesal. Cule Jesu cu a to. Sinakok sungih a um mi hmuahhmuah ih mit cun ṭha zetin Jesu cu an zoh. ²¹ Cule Jesu in an hnenah, “Tuisun ah hi Cathianghlim sungih ngan mi cu nan hna theih ah a tlamtling a si,” tiah sim a thawk. ²² Cule mi hmuahhmuah in Jesu cu an theihpi ih, a kaa sung ihsin a suak mi zangfahnak ṭawngkampawl ah an mang a bang. Annih in, “Hi pa hi Joseph-ih fapa kha a si lo maw?” tiah an ti. ²³ Jesu in an hnenah, “Hi thufim hi ka hnenah nan ṭawng tengteng ding, ‘Sibawipa, nangmah le nangmah damawter aw. Kapernaum khua ih na tuah ti kan theih mipawl kha hih na khua ah hin tuah aw,’ tiah in ti ding,” tiah a ti hai. ²⁴ Cule anih in, “Thungai thu ka lo sim, Profet zokhal amai khaw mipawl in an cohlang lo. ²⁵ “Asinan thungai thu ka lo sim. Elijah san laiah kum thum le thla ruk sung van kharpit a si ih, ram hmuahhmuah ih pam a tlun laiah Israel ram ah nuhmei tampi an rak um. ²⁶ Sihmansehla, acui nuhmeipawl pakhat hnen hmanah Elijah cu thlah a si lo. Sidon ram Zarefath khua ih nuhmeinui hnen lawngah thlah a si. ²⁷ Profet Elisha san laiah Israel ram ah miphar tampi an rak um. Siriami Naaman siarlo zohman thianter mi an rak um lo,” tiah a ti. ²⁸ Cui thu an theih tikah sinakok sungih a um mi hmuahhmuah cu an thin a heng zet. ²⁹ An ding ih Jesu cu khaw pawnah an tulsuak ih an khaw umnak tlang zim kham ihsin hlawnthla dingin an hruai. ³⁰ Asinan, Jesu cu mi burpi lak ihsin a fehhlo. ³¹ Cule, Jesu cu Galili peng Kapernaum khua ah a vung feh ih, Sabbath Ni ah thu a zirh hai. ³² Thuneihnak thawn a ṭawng ruangah a thuzirh mi ah an mang a bang zet. ³³ Cui Sinakok sungah khawse bawrhhlawh thlarau nei pa pakhat a rak um. Cule ring zetin a au ih, ³⁴ “Ha! Nazareth Jesu, kanmah ten um nung, nang le kannih ziang so tiawk ding kan neih? Kanmah siatsuah dingah maw na rat? Zo na si ti ka lo thei, nang cu Pathian-ih Mi Thianghlim Pa na si,” tiah a ti. ³⁵ Cule, Jesu in a kawk ih, “Daiten um! A sung ihsin suak aw,” tiah a ti. Khawsia in cu pa cu mipi hmaiih a hlawnthluk hnuah a parah zianghman tuahmawh loin a suahsan. ³⁶ An zaten an mang a bang ih, “Ziang ṭawngkam a si? Anih cun thlarau bawrhhlawhpawl cu thuneihnak le huham thawn thu a pe ih an suak,” tiah pakhat le pakhat an tiaw rero. ³⁷ Cule Jesui hmin cu acui ram kiangkap hmun zakipah a thang ṭheh. ³⁸ Jesu cu sinakok sung ihsin a suak ih, Simon-ih inn sungah a lut. Culai fangah Simon nupi-ih nu cu bese zetin khawsik nat tuar in a um. Cule Jesui hnenah amah cu bawm dingin an dil. ³⁹ Cule Jesu cu cu nui kiangah a ding ih a khawsik nat cu a kawk. Cule a khawsik nat cu a reh. A tho lohli ih anmah cu a rian. ⁴⁰ Ni a tlak zawngah nathrik phunphun thawi natnak a tuartu hmuahhmuah a hnenah an rak hruai. An par ciarah a kut a rak suang ih a damter hai. ⁴¹ Mi tampi sung ihsin khawsepawl khal cun, “Nang cu Pathian Fapa Khrih na si,” tiah au phahin an suak. Cule Jesu in a rak kawk hai. Khawsepawl in amah cu Khrih a si ti an theih ruangah an ṭawng ding a siang hai lo. ⁴² Khua a van tikah Jesu in cui hmun cu a suahsan ih, ramṭhing ah a feh. Mi burpi in amah cu an hawl. A umnak hmun an va thlen tikah anmah fehsan lo dingin an kham. ⁴³ Asinan Jesu in, “Khaw dang khalah Pathian uknak thuthangṭha cu ka phuang ding a si. Ziangahtile, cu mi hrangih thlah mi ka si,” tiah a ti. ⁴⁴ Cule, Galili peng ih sinakokpawl ah thu a sim.

¹ Cule hiti hin a rak si, ni khat cu Genesareth tili kapih Jesu a din laiah mi burpi cun Pathian thu ngai dingin amah an ra pan luihlo. ² Cu laiah Jesu in tili kapih lawng cawl pahnih a hei hmu. Ngakaitupawl cu lawng sung ihsin an suak ih an surpawl an khawlh rero. ³ Jesu cu lawng pakhat deuh sungah a lut. Cui lawng cu Simon-ih ta a si. Cule tili kap ihsin lawng cu malte hladeuh ih ṭhawn dingin Jesu in Simon cu a dil. Cule a to ih lawng sung ihsin mi burpi cu thu a zirh hai. ⁴ Thusim a ṭheh tikah, Simon hnenah, “Ti thuknak lamah na lawng ṭhawn aw la, nga kai dingin nan surpawl cu thlak uh,” tiah a ti. ⁵ Cule Simon in a hnenah, “Hotupa, zanvar taima zetin kan zuam mengmang nan zianghman kan kai lo. Asinan, na thu vekin sur cu ka thlak hnik ding,” tiah a sang. ⁶ Cutiih an tuah tikah nga tampi an awk ih an sur tlek a thawk. ⁷ Cu tikah, lawng dangih a um mi an nga kaihpipawl kha anmah bawm dingin an kut an hei zap. Cule an ra ih an lawng pahnih pil zik tiangin nga an khatter. ⁸ Cumi cu Simon Peter in a hmuh tikah Jesui khuk hramah a bawk ih, “Bawipa, i fehsan aw. Ziangahtile, kei cu misual ka si,” tiah a ti. ⁹ Ziangahtile, amah le a nga kaihpipawl hmuahhmuah cu an awh mi ngapawl kha an rak la ih, cu mipawl ruangah an mang a bang zet. ¹⁰ An awh mi cun Simon-ih nga kaihpi Zebedi-ih fapa James le John khal an mang a bangter. Cule Jesu in Simon hnenah, “Ṭih hlah, tuini thawkin milai na kai thlang ding,” tiah a ti. ¹¹ An lawngpawl tili kapih an dinter hnuah cupawl cun ziang hmuahhmuah an tlansan ih, Jesu cu an thlun. ¹² Cule hiti hi a rak si, khaw pakhat ih Jesu a um laiah, ngai hnik, a taksa pumpuluk ih a phar mi pa pakhat cu Jesu a hmuh tikah a hmaiah a bawk ih, “Bawipa na duh ah cun i thiangter thei a si,” tiah a dil. ¹³ Jesu cun a kut a suah ih a tham, “Ka duh a si, thiang aw,” tiah a ti. Hmakhatteah a phar nat cu a hlo. ¹⁴ Cule, Jesu in cu pai hnenah, “Zohman sim hlah. Asinan va feh aw la, puithiam hnenah na taksa va hmuh aw. Na thian zo ruangah mi in an lo theihpinak dingah Mawsi-ih thupek vekin thawinak va pe aw,” tiah a fial. ¹⁵ Cule, Jesui hmin cu a thang sinsin. Cun, Jesui thu ngaithla dingin le an natnak tla damter dingah mipi tampi cun amah an ra pankhawm. ¹⁶ Jesu cu ramṭhing ah feh in thla a cam ṭheu. ¹⁷ Cun, ni khat cu thu a zirh rero laiah hitin a cang. Farasipawl le Danzirhtupawl cu cu tawkah an to. Cuipawl cu Galili peng khaw tin kipin le Judia peng le Jerusalem khua tla ihsin a ra mi an si. Anmah damter dingah Bawipai huham cu cu tawkah a um. ¹⁸ Cule, ngai hnik, mi hrekkhat in a zeng mi pa pakhat cu a ihphah thawn an run zawn. Jesu hmaiih hlum dingin luhpidan ding lamzin an rak hawl. ¹⁹ Mi burpi ruangah luhpi theinak ding lamzin an hmu lo. Cule inn tlunah an kai ih mizengpa cu a ihphah thawn inn tlun ihsin mi burpi laifang Jesui hmaiah an run thlak. ²⁰ Jesu in an zumnak a rak hmuh tikah anih in mizengpai hnenah, “Mi pa, na sualpawl tla ngaidam ṭheh a si zo,” tiah a ti. ²¹ Danzirhtupawl le Farasipawl in an thinlung sungin, “Hi Pathian thangsiattupa hi zo a si? Pathian siarlo midang zo in so sual ngaidam thei?” tiah an ruat thawk. ²² Jesu in an ruahnak a theih tikah a sang hai ih an hnenah, “Nan thinlung sungin ziang nan ruat? ²³ ‘Na sualpawl tla ngaidam ṭheh a si zo,’ ti maw, ‘Tho aw la, feh aw,’ ti a awl sawn?” ²⁴ Sikhalsehla Minung Fapa in leitlun ah sualpawl ngaidam theinak thuneihnak a nei a si ti nan theihnak dingah hihi tuah a si,” tiah a ti. Cule Jesu in mizengpai hnenah, “Na hnenah ka lo sim, tho aw, na ihphah la aw la, na inn ah tlung aw,” tiah a ti. ²⁵ Hmakhatteah mizengpa cu mipi hmaiah a tho ih a ihnak cu a la ih, Pathian thangṭhat phahin a inn ah a tlung. ²⁶ An zaten an mang a bang ih, Pathian an thangṭhat. Ṭihnak in an khat ih, “Tuisun ah hminsin tlak thil tla kan rak hmu a si hi,” tiah an ti. ²⁷ Cui hnuah Jesu cu a feh ih, Levi an ti mi siahkhawngtupa cu siahkhawnnak buk ih a to lai kha a hei hmu. Cule Jesu in a hnenah, “I thlun aw,” tiah a ti. ²⁸ Levi cu a ding ih, ziang hmuahhmuah tanta in Jesu cu a thlun. ²⁹ Cule Levi in Jesui hrangah amai inn ah puai ropi a tuah. Cu tawkah siahkhawngtu burpi le midangpawl tla Jesu le a thluntupawl hnenah rawl an ei ve. ³⁰ Asinan Farasipawl le Danzirhtupawl cu a dungthluntupawl dokalh in an phunzai. “Ziangruangah siahkhawngtupawl le misualpawl thawi ei le in ih nan um?” tiah an ti. ³¹ Jesu in, “Miharhdampawl in sibawi an ṭul lo. Minapawl lawngin an ṭul a si. ³² Midingfelpawl ko dingin ka ra lo, misualpawl an sual sir dingih ko dingah ka ra sawn,” tiah a ti hai. ³³ Cule annih in a hnenah, “John-ih dungthluntupawl cu rawl an ul ṭheu ih thla tla an cam ṭheu. Farasipawlih dungthluntupawl khal cutivekin an tuah. Asinan, ziangruangah nangih dungthluntupawl cu an ei ih an in?” tiah an ti. ³⁴ Cule anih in an hnenah, “Mo neitupa an hnenih a um laiah mo lawmtupawl cu rawl nan ulter thei ding maw? ³⁵ Asinan, an hnen ihsin mo neitupa lakhlohsak ni a thleng leh ding. Cu tikah rawl an ul leh ding,” tiah a ti. ³⁶ An hnenah hi thuṭhimnak hi a sim, “Zohman in hnipuan hlun cu hnipuan thar belcawng in an belh kel lo. An belh asile hnipuan thar in a dirtlek ding ih, a thar le a hlun khal cu an milaw lo ding. ³⁷ Cun, zohman in sabitti thar kha savun thawl hlun sungah an thun kel lo. An thun asile sabitti thar in savun thawl hlun cu a kekter ding. Cule sabitti cu a dawk ding ih, savun thawl hlun khal cu a siat ding. ³⁸ Asinan sabitti thar cu savun thawl thar sungih thun tengteng ding a si. Cutiih thun asile an pahnih in an siat lo ding. ³⁹ Zokhal sabitti hlun in zotu in a thar a hiar lohli lo. Ziangahtile, ‘Sabitti hlun cu a ṭhasawn,’ a ti,” tiah a sim.

¹ Cule hiti hi a rak si, Sabbath Ni hmaisa a cem hnu, a neta Sabbath Ni ah Jesu cu sangvut lo lakin a feh. A dungthluntupawl in sangvut vui an sik, an kut in an nuai ih a fang cu an ei. ² Cu tikah Farasi mi hrekkhatpawl in an hnenah, “Ziangruangah Dan in Sabbath Ni ih tuah a sian lo mi nan tuah?” tiah an ti. ³ Jesu in an hnenah, “David le a hnenih um mipawl an ril a rawn tikah David in ziang a tuah ti nan rak siar lo maw? ⁴ Pathian inn sungah David cu a lut ih, sangserh cu a la ih a ei. Cui sang cu Dan in puithiampawl lawng ei dingih a sian mi a si. David cun a thluntupawl khal cui sang hrekkhat cu a pe ve,” tiah a ti. ⁵ Cule Jesu in an hnenah, “Minung Fapa cu Sabbath tlun khalah Lal a si,” tiah a ti. ⁶ Cun, hiti hi a rak si, a dang Sabbath Ni ah Jesu cu sinakok sungah a lut ih thu a zirh. Cu tawkah a vawrh lam kut a ro mi pa pakhat a rak um. ⁷ Danzirhtupawl le Farasipawl in Jesu kha sual an puh theinak dingah Sabbath Ni ah a damter pei maw, damter lo tiah ṭhaten an zohhliah. ⁸ Asinan Jesu in an thinlung ih an ruah mi a thei ih a kut a ro mi pai hnenah, “Tho aw la, a laifangah hin ra ding aw,” tiah a ti. Curuangah cu pa cu a tho ih cu tawkah cun a ra ding. ⁹ Cule Jesu in an hnenah, “Dan in Sabbath Ni ah thil ṭha tuah maw, thil ṭha lo tuah in siang? Mi nunnak runsuah ding maw, thah ding in siang? tiah ka lo sut,” tiah a ti hai. ¹⁰ A kiangkapih mi hmuahhmuah cu a zohkual hai ih, cu pai hnenah cun, “Na kut hawi hnik,” tiah a ti. A kut cu a hun hawi ih, khatlam vekin a dam. ¹¹ Danzirhtupawl le Farasipawl cu an thin a heng tuk lawmmam ih, Jesui parah ziang an tuah ding ti pakhat le pakhat an relkhawm. ¹² Cun, hiti hi a rak si, cu laiah Jesu cu thla cam dingin tlang parah a feh ih, Pathian hnenah zanvar in thla a cam. ¹³ Khua a van tikah a hnenah a dungthluntupawl a kokhawm ih, mi hleihnih a hril. Cupawl cu apostolpawl ti khalin a ko hai. ¹⁴ Peter ti khalih hmin a pek mi Simon le a naupa Andru, James le John, Filip le Bartholomeo, ¹⁵ Mathai le Thomas, Alfias-ih fapa James, Zilot an ti mi pa Simon, ¹⁶ James-ih fapa Judas le Jesu phiarsawmtu ih a cangtu Judas Iskariot tla an si. ¹⁷ Jesu cu anmah thawn a rung suk ih, hmun rawn ah a ding. A thusim mi ngai dingah le an natnakpawl damter dingah Judia peng hmuahhmuah ihsin si seh, Jerusalem khua ihsin si seh, tipi kapih a um mi Taiar khawpi le Sidon khawpi tla ihsin a rakhawm mi mipi tampi le a dang dungthluntu mibur cu an um. ¹⁸ Thlarau bawrhhlawhpawl ih zawnzaihter mipawl tla damter an si. ¹⁹ Jesu sung ihsin huham a suak ih an zaten a damter hai ruangah mi burpi in amah tham dingin an hawl. ²⁰ Cule a dungthluntupawl a zoh hai ih, “Nannih mitangdawrpawl mihualvanṭha nan si. Ziangahtile, Pathian uknak cu nanmai ta a si. ²¹ Nannih atu ih rilrawngpawl mihualvanṭha nan si. Ziangahtile, nan tlai leh ding. Nannih atu ih a ṭap mipawl mihualvanṭha nan si. Ziangahtile, nan hni leh ding. ²² Minung Fapa ruangah mi in an lo hua ih, an pawlkawmnak sung ihsin an lo suah, an lo hmuhsuam ih, nan hmin an simsiat tikah mihualvanṭha nan si. ²³ Cui ni ah cun lungawi uh la, aipuang in khir uh. Ziangahtile, ngai hnik, vancungram ih nan lawmman cu a ropi a si. Cutivekin an pupapawl in profetpawl an rak tuah a si. ²⁴ “Asinan, nannih milianpawl nan hmakhua a pit a si. Ziangahtile, nannih cun nunnawmnak nan rak ngah zo. ²⁵ Nannih atu ih mikhawpkhampawl nan hmakhua a pit a si. Ziangahtile, nan ril a rawng leh ding. Nannih atu ih hni reropawl nan hmakhua a pit a si. Ziangahtile, nan ṭap in nan aihram leh ding. ²⁶ Mi hmuahhmuah in an lo lawm tikah nan hmakhua a pit a si. Ziangahtile, nan pupapawl in cutivekin profet deupawl parah an rak tuah. ²⁷ “Asinan, nannih ka thu a ngaithlatupawl ka lo sim a si, nan ralpawl duhdaw uh la, a lo huatupawl parah thil ṭha tuah uh. ²⁸ A lo camsetupawl thlawsuah pe uh la, siava zetih a lo tuahsetupawl hrangah thla cam uh. ²⁹ Na biang khatlam a lo bengtu hnenah na biang khatlam khal tun aw. Na kawrfual latu hnenah, na angki sunghruh khal a lak ding el hlah. ³⁰ A lo diltu pohpoh cu pe aw. Mi in na thil neih mi a lo laksak asile dilsal nawn hlah. ³¹ Mi in nan parah tuah hai seh ti nan duh vekin nanmah khalin an parah tuah ve uh. ³² “Nanmah a lo duhdawtupawl lawng nan duhdawt asile ziang lawmnak na ruahsan thei ding? Ziangahtile, misualpawl khalin anmah duhdawtupawl cu an duhdawt ve a si. ³³ Nan parih thil ṭha a tuahtu par lawngih thil ṭha nan tuah asile ziang lawmnak nan ruahsan thei ding? Ziangahtile, misualpawl khalin cuvekin an tuah ve a si. ³⁴ Ka ngahsal leh ding tiah na beisei mi hnen lawngih na cawih asile ziang lawmnak na beisei thei ding? Ziangahtile, misualpawl khalin ngah kim lehsal dingin cuvekin an tuah ve a si. ³⁵ Asinan, nan ralpawl duhdaw uh la an hrangah thil ṭha tuah uh. Ngah lehsal ding beisei loin cawih uh. Cule nan lawmman cu a ropi ding ih, cungnungbikih fate tla nan si ding. Ziangahtile, Pathian amah rori cu lungawi hna a thiam lo mi le miṭhalopawl par khalah a ṭha a si. ³⁶ Curuangah nan Pa zah a ngai vekin zah ngai ve uh. ³⁷ “Thuṭhen hlah uh, cule nanmah khal thuṭhen nan si lo ding. Thiamlo mi coh hlah uh, cule nannih khal thiamlo an lo coh hrimhrim lo ding. Mi ngaidam uh, cule ngaihdam nan si ve ding. ³⁸ Pe uh la pek nan si ve ding. Tahnak dik, nem le sawihnget in, liam thluahthlo in nan ṭang sungah mi in an lo pe ding. Ziangahtile, mi na tahnak khan tah na si ve ding,” tiah Jesu in a ti. ³⁹ An hnenah hi thuṭhimnak khal a sim, “Mitcaw in mitcaw a hruai thei ding maw? An pahnih in khur sungah an tla lo ding maw? ⁴⁰ Dungthluntu cu a zirhtupa hnakin a cungnung sawn lo. Asinan, zokhal famkim ko zirhngah mi cu a zirhtupa tluk a si ding. ⁴¹ “Nangmai mit sungih thingtluan hman ruat loin ziangah saw na unaupai mit sungih mithnawm fa te cu na zoh? ⁴² Ziangtin na unaupai hnenah, ‘Unaupa, na mit sung ihsin na mithnawm fa te kha lo cawihsak i siang hram aw,’ tiah na ti thei? Nangmai mit sungih thingtluan cu na hmu hrimhrim lo. Nang cu midepde na si. Nangmai mit sungih thingtluan kha la hmaisata aw la, cule na unaupai mit sungih mithnawm fa te na cawih ding mi cu fiangten na hmu thei ding. ⁴³ “Ziangahtile, thingkung ṭha in rah sia a rah dah lo ih, thingkung sia khalin rah ṭha a rah dah ve lo. ⁴⁴ Thingkung hmuahhmuah cu a rah in theih thei a si. Ziangahtile, hling kung ihsin thei rah an lo dah lo. Hling bur ihsi khalin sabit rah an lo dah lo. ⁴⁵ Miṭha in a thinlung sungih hlawnthil ṭha a khawl mi a suah ih, miṭhalo in a thinlung sungih hlawnthil ṭha lo a khawl mi a suah. Ziangahtile, a thinlung sungih a luangliam mi cu kaa in a ṭawngsuak a si. ⁴⁶ “Ka lo sim mipawl tuah si loin ziangah so, ‘Bawipa, Bawipa,’ tiah in kawh? ⁴⁷ Zokhal ka hnenah ra in ka sim mi thupawl a thei ih a tuahtu cu ziangvek mi a si ti ka lo hmuh ding. ⁴⁸ Cu pa cu thuk zet lai tahratin lungpi parih ṭohram buntu inn saktupa thawn an bangaw. Ti a lik tikah cui inn cu tilian nasazetin a sawh. Asinan lungpi parah ṭohram a bun ruangah cui inn cu a hnin thei lo. ⁴⁹ Asinan, ka sim mi thu a thei ih a tuahlotu cu mi pakhat ṭohram bun mi um lo ih leilung parih inn a saktu thawn an bangaw. Cui inn cu tilian in a sawh tikah hmakhatteah a tlu. Tilian in acui inn cu a siatter thluh,” tiah a ti.

¹ Jesu cu a thu ngaitu mipi hnenih a ṭawng hmuahhmuah a ṭheh tikah Kapernaum khawpi sungah a lut. ² Cu tawkah ralkap za hotupai a duh zet mi siahhlawhpa cu a na ih a thi zikte. ³ Cui ralbawipa in Jesui thuhla a theih tikah, a hnenah a siahhlawh ra damter dingin va dil dingah, Jew miupapawl a hei thlah. ⁴ Jesui hnen an thlen tikah nasazetin an dil. “Na tuahsak dingah hi pa cu a tlak a si. ⁵ Ziangahtile, anih cun kan miphun a duhdaw ih kan hrangah sinakok a sak,” tiah an ti. ⁶ Cule Jesu cu an hnenah a feh. Ralbawipai inn ihsin a hlat nawn lonak hmun an thlen tikah ralkap za hotupa cun a rualpipawl a thlah ih, “Bawipa, nangmah le nangmah harsaawter hlah. Ziangahtile, ka luangpi hnuaiih nang ra lut dingah kei ka tlak lo. ⁷ Curuangah a si, keimah khal na hnenih ra ding tlak ah ka ruataw lo. Asinan, kam khatte ṭawngsuak aw la, ka siahhlawh cu a dam mai ding. ⁸ Ziangahtile, keimah khal mi thuneihnak hnuaiih um ka si ve. Ka kut hnuaiah ralkap tla ka nei. Pakhat hnenah, ‘Feh aw,’ ka ti le a feh. A dang pakhat hnenah, ‘Ra aw,’ ka ti le a ra. Ka siahhlawh hnenah, ‘Hihi tuah aw,’ ka ti le a tuah,” tiah a ti. ⁹ Jesu in cui ṭawngkampawl a theih tikah cui ralbawipai parah a mang a bang ih a dungih a thluntu mipi lamah a hawi ih, “Ka lo sim a si, Israel-mi lakah hivek zumnak nasa ka hmu hrih lo,” tiah a ti. ¹⁰ Ralbawipai thlah mipawl inn ih an kirsal tikah, a na mi siahhlawhpa cu harhdam in an va hmu. ¹¹ Cule a thaisun ah hiti hi a rak si, Jesu cu Nain an ti mi khua ah a feh. A dungthluntu mi tampi le mi burpi cu a hnenah an feh ve. ¹² Khaw sung luhnak kawtka kiang a thlen tikah, ngai hnik, mithi pakhat an rak zawn. A thi mi cu nuhmeinui fapa neihsun a si. Nuhmeinui hnenah cun khaw sung mi mi tam zet an um. ¹³ Bawipa in cu nu cu a hmuh tikah, a parah lainatnak a nei. Cule a hnenah, “Ṭap hlah aw,” tiah a ti. ¹⁴ Cule Jesu cun a va naih ih, ruak kuang cu a tham. Cule a ruak kuang zawntupawl cu an ding. Jesu in, “Tlangval, tho aw ka lo ti,” tiah a ti. ¹⁵ Cule a thi mi pa cu a hung to ih, ṭawng a thawk. Cule Jesu in cu pa cu a nui hnenah a pe. ¹⁶ Cule mi hmuahhmuah in an ṭih ih, Pathian an thangṭhat. Mi hrekkhat in, “Kan lakah profet ropi a suak zo, an ti.” A dangpawl in, “Pathian in a mipawl a rung vehvai zo a si,” tiah an ti. ¹⁷ Cui Jesui thuhla cu Judia peng hmuahhmuah le a kiangkap ram hmuahhmuah ah a thang thluh. ¹⁸ John-ih dungthluntupawl in cui thu hmuahhmuah cu John an sim. ¹⁹ Cule John in a dungthluntupawl lak ihsin mi pahnih a hnenah a ko ih, Jesui hnenah, “Nangmah hi a ra ding mi pa cu na si maw? Asilole a dang kan rak thlir hrih ding saw?” tiah va sut dingah a hei thlah hai. ²⁰ Cupawl cu Jesui hnen an thlen tikah, “ ‘Nangmah hi a ra ding mi pa cu na si maw? Asilole a dang kan rak thlir hrih ding saw?’ tiih ra lo sut dingin baptisma petu John in na hnenah in rak thlah a si hi,” tiah an ti. ²¹ Cui can fangah cun Jesu in mi tampi-ih nathrik si seh, natsia si seh, khawse ṭha lo neipawl si seh a rak damter. Mitcaw tampi tla khua a hmuter hai. ²² Cu tikah Jesu in a let hai ih an hnenah, “Va feh uh la nan hmuh mi thil le nan rak theih mi thilpawl hi John hnenah va sim uh. Mitcawpawl in khua an hmu, kebaipawl an feh, mipharpawl tla an thiang, hnasetpawl in an thei thei ih, mithipawl tla an tho, miretheipawl hnenah thuthangṭha phuan a si. ²³ Keimah ruangih a tlubahlotu cu mihualvanṭha a si,” tiah a ti. ²⁴ John ih a thlah mipawl an tlun hnuah Jesu in John-ih thuhla mipi hnenih sim a thawk. “Ramṭhing ah ziang zoh dingah nan va feh? Thli ih a sem hnin rero mi phai kung zoh dingah maw? ²⁵ Ziang zoh dingah saw nan va feh? Hnipuan nem a hruhtupa zoh dingah maw nan feh? Ngai hnik, hnipuan ropi hruhtupawl le nunnuam zetih a nungtupawl cu siangpahrang innpawl ah an um. ²⁶ Ziang zoh ding bikah saw nan feh? Profet zoh ding ah maw? Nan hnenah ka lo sim, a dik a si. John cu profet hnakin a ropisawn. ²⁷ ‘Ngai hnik, na hmaiah ka palai ka thlah. Amah in na lamzin cu na hmaiah a sial ding,’ tiih a thuhla an ngan mi pa cu hi pa hi a si. ²⁸ “Ziangahtile, nan hnenah ka lo sim, nunau hrin lakah baptisma petu John hnakih profet ropi an um lo. Asinan, Pathian uknak ih mitenaubik cu John hnakin a ropisawn a si,” tiah a ti. ²⁹ Cule mipi zate le siahkhawngtupawl in cumi cu an thei ih, Pathian cu a dik a si tiah an rak phuang. Annihpawl cu John-ih baptisma cotupawl an si. ³⁰ Asinan Farasipawl le Danthiampawl in anmah hrangih Pathian thiltum mi cu an rak hnawng. Annihpawl cu John-ih baptisma pek mi an si lo. ³¹ Cule Bawipa in, “Tui san minungpawl hi ziang thawn ka khaikhin hai pei? Ziang thawn an bangaw? ³² Anmah cu dawrhmun ih a to mi nauhakpawl tla an bang. Pakhat le pakhat auhaw in, ‘Phirivau kan rak lo tumsak nan, nan lam lo. Mithi ṭahnak hlapawl tla kan lo saksak nan nan rak ṭap lo tiin an ti mi vek a si.’ ³³ “Ziangahtile, baptisma petu John cu rawl ei lo le sabitzu in loin a rat tikah, ‘Khawsia a nei,’ tiah nan ti. ³⁴ Minung Fapa cu ei le in in a ra. Cule nannih in, ‘Ngai hnik uh, hi pa cu rawl pham le sabitzu phampa a si ih, siahkhawngtupawl le misualpawl ih rualpi a si,’ tiah nan ti. ³⁵ Asinan, mifimpawlih ṭawngkam cu mifim hmuahhmuah in an theithiam,” tiah a ti. ³⁶ Farasi pakhat in Jesu kha a hnenih rawl ei dingin a sawm. Curuangah Jesu cu Farasipai inn ah a feh ih rawl ei dingin a hil. ³⁷ Cule, ngai hnik, khaw sungih misual nunau pakhat in Farasipai inn ah Jesu cu rawl a hil ti a theih tikah alabasṭa lung ih tuah mi thawl in hriak rimhmui a rak keng. ³⁸ Jesui dung lam a ke hramah ding in a ṭap ih a mitthli thawn Jesui ke cu khawlh a thawk. Cule a lu-ih sam in a mitthli cu a hnul, a ke cu a hnam ih hriak rimhmui a culh. ³⁹ Cumi cu rawl ei sawmtu Farasipa in a hmuh tikah a thinlung sungtein, “Hi pa hi profet ngaingai asile a ra thamtu nunaunu hi zo a si ti le ziangvek nunau a si ti a thei ding. Ziangahtile, hi nu cu misual a si,” tiah a ruat. ⁴⁰ Cule Jesu in a sang ih a hnenah, “Simon, na hnenah thu lo sim ding mi ka nei,” tiah a ti. Cu tikah anih in, “Zirhtupa, i sim aw,” tiah a ti. ⁴¹ Cule Jesu in, “Paisa cawihtu pakhat hnenah mi pahnih in leiba an nei. Pakhat in dinari paisa zanga a bak ih, a dang pakhat in dinari paisa sawmnga a bak. ⁴² A rulhsalnak ding zianghman an neih lo tikah an pahnih in a ngaidam hai. Cuti asile, i sim hnik, zo sawnin cu pa cu a duhdaw deuh ding?” tiah a ti. ⁴³ Simon in a sang ih, “A ngaidam tamdeuh mi a si ding tiah ka ruat,” tiah a ti. Cu tikah Jesu in a hnenah, “Na thuṭhen mi cu a dik a si,” tiah a ti. ⁴⁴ Jesu cu nunaunui lamah a her ih, Simon hnenah cun, “Hi nu hi na hmu maw? Na inn sungah ka rung lut ih, nang in ka ke khawlhnak ding hrang ti i rak pe lo. Asinan hi nu cun a mitthli thawn ka ke a rak khawlh ih a lu-ih sam in a hnul. ⁴⁵ Nang cun hnamnak thawn cibai i buk lo. Asinan hi nu cun ka rung luh ihsin ka ke hnam a cawl hrih lo. ⁴⁶ Nang cun ka lu hriak i thih lo. Asinan anih cun ka ke ah hriak rimhmui i culh. ⁴⁷ Hipawl hmuahhmuah ruangah, na hnenah ka lo sim, a sual tam zet tla ngaidam a si ruangah anih cun nasazetin a duhdaw a si. Malte lawng ngaihdam mi cun a duhdaw dem ve,” tiah a ti. ⁴⁸ Cule Jesu in cu nui hnenah cun, “Na sualpawl cu ngaidam a si zo,” tiah a ti. ⁴⁹ Amah thawi rawl hiltlangtupawl in, “Sualpawl khal ngaidamtu hi pa hi zo a si?” tiah an thinlung sungtein ti an thawk. ⁵⁰ Cule Jesu in nunaunui hnenah, “Na zumnak in a lo rundam zo. Hnangamten va feh aw,” tiah a ti.

¹ Cui hnuah hiti hin a rak si, Jesu cu Pathian uknak lungawinak thuthangṭha sim le phuang in khawpi le khawte ah a tlawng vivo. A dungthluntu hleihnih khal a hnenah an um. ² Cule hrekkhat thlarau sual ih luhhnawh damter mipawl le an nat damter mipawl tla cu Jesui hnenah an um. A sung ihsin khawsia pasarih a dawisuahsak mi Magdalin tiih kawh mi Mary, ³ Herod-ih thilri kilkhawitu Khuza-ih nupi Joana le Susanna le midang tampi tla cu tawkah cun an rak um. Cupawl tla cun an neih mi thilri in Jesu rawng an rak bawlsak. ⁴ Khaw tin ihsin mipi tam zet Jesui hnenah an ra ih, an pumkhawmawk tikah an hnenah hi tahṭhimnak hi a sim. ⁵ “Thlaici vawrhtu cu a thlaici vawrh dingin a fehsuak. Thlaici a vawrh tikah a hrekkhat cu lamzin kap tluanah an tla, mi in an pal ih tlunzuang vatepawl in an rak ei ṭheh. ⁶ A hrekkhat cu lung parah an tla. A hnawng mi a tlaksam ruangah a keuh veten a ro. ⁷ Cule thlaici hrekkhatpawl cu hlingrul lakah an tla ih, hlingrul thawn an ṭhangtlang ih hling kungpawl tla in an dip ṭheh. ⁸ Cun, a dang cu leiram ṭhatnak ah an tla ih an ṭhang. Cule a let zakhat in rah a rah,” tiah a ti. Cui thu a sim ṭheh hnuah, “Theih theinak hna a neitu cun thei seh!” tiah a ti. ⁹ “Cui tahṭhimnakih tican cu ziang a si?” tiah a dungthluntupawl in Jesu an sut. ¹⁰ Jesu in, “Pathian uknak thuthuppawl theih theinak cu nan hnenah pek a si zo. Asinan midang hnenah cun tahṭhimnak in sim a si. ‘An hmu nan theihthiamnak thawn an hmu lo. An hna in an thei nan an theithiam lo.’ Cutiih cang dingin tahṭhimnak in ka sim a si. ¹¹ “Hi tahṭhimnakih tican cu hitin a si. Thlaici cu Pathian thu a si. ¹² Lamzin kap tluanih a tla mi cu Pathian thu a ngaithlatupawl an si. Cule an zum ih, rundam an silonak dingah Diabol cu a ra ih an thinlung sung ihsin thu cu a lakhlohsak hai. ¹³ Lung parih a tla mi thlaici tla cu Pathian thu an rak ngaithlak tikah lungawi zetin a cohlangtu an si. Asinan an thinlung sungah hram a neih lo ruangah can tawite sung lawng an zum ih, hniksaknak an tawn tikah an tluhlo. ¹⁴ Cule, hlingrul lakih a tla mi cu hipawl hi an si. Pathian thu an rak thei. Cule anmai duhdan in an feh, hi leitlun nun khawruah harnak, lennak le nawmnak pawl tlain a zap ih an pitling lo. ¹⁵ Asinan leiram ṭha parih a tla mi cu hipawl hi an si. Thinlung ṭha le dik an nei ih, Pathian thu an theih tikah an kaihnget ih, tuarfainak thawn rah an suah. ¹⁶ “Mi zohman in meito vang tahratin kho in an khuh dah lo. Ihkhun hnuai khalah an ret dah lo. A luttu hmuahhmuah in tleu an hmuh theinak dingah meito vannak parah an ret sawn a si. ¹⁷ Ziangahtile, lang leh lo dingih thuh mi zianghman a um lo. Theih leh lo ding mi le tleu ih langsuak leh lo ding mi thuthup zianghman a um lo. ¹⁸ Curuangah thu nan ngaithlakdan ah fimkhur uh. Ziangahtile, a neitu zokhal tamsinin pek a si ding. A neilotu zokhal a neih vekih lang mi hman a hnen ihsin laksak a si ding,” tiah a ti. ¹⁹ Cui canah, a nu le a naupalepawl cu a hnenah an ra. Asinan mipi an tet tuk ruangah a hnen an thleng thei lo. ²⁰ Cule mi hrekkhatpawl in Jesui hnenah, “Na nu le na naupalepawl cu nangmah lo hmuh duh in lengah an ding,” tiah an sim. ²¹ Cule anih in an hnenah a sang ih, “Pathian thu a ngaithla ih a tuahtu cu ka nu le ka naupale tla an si,” tiah a ti hai. ²² Cule ni khat cu hiti hi a rak si, Jesu cu a dungthluntupawl thawn lawng sungah an lut ih an hnenah, “Tili khatlam ralah feh uhsi,” tiah a ti hai. Cule lawng in an feh. ²³ Cutiih lawng ih an feh rero laiah cun Jesu cu a rak itthat. Tili parah thli sia a rung hrang ih an lawng cu ti in a khah ruangah an dinhmun cu ṭihnungza a si. ²⁴ Dungthluntupawl cu Jesui hnenah an va feh ih an ṭhang. Cule, “Hotupa, Hotupa, kan pil cuahco a si,” tiah an ti. Cule Jesu cu a hung tho ih thli le tisuar cu a kawk. Cule thli cu a cawl ih, tili cu a dai khepkhep. ²⁵ Cule anih in a dungthluntupawl hnenah, “Nan zumnak cu khuiah a si?” tiah a ti. An ṭih ih an mang a bang. Cule pakhat le pakhat, “Hi pa hi ziangvek minung so a si, thli le ti pawl hmanin a thupek an lun hi!” tiah an tiaw. ²⁶ Jesu le a dungthluntupawl cu Galili peng ralkhat ih um Gadara ram an thleng. ²⁷ Jesu cu khawmual parih a suah tikah khawsepawl ih reipi an pawlh mi pa pakhat in a rak tawng. Cu pa cu hnipuan zianghman a hruh lo, inn khalah a um lo, thlan lakah a um. ²⁸ Jesu a hmuh tikah a au ih, Jesui ke hramah a bawk. Cule aw ring zetin, “Cungnungbik Pathian Fapa Jesu, nang thawn ziang tiawk ding kan neih? I hrem hram hlah aw, ka lo dil a si,” tiah a ti. ²⁹ Ziangahtile, Jesu in thlarau bawrhhlawh kha cu pai sung ihsin suak dingin thu a rak pek zo ruangah a si. Vei tampi khawsia in cu pa cu a kaihrem. Ke hrennak le thir cikcinpawl tlain an ṭemṭawn ih an kil. Asinan cikcin tla cu a catter ih, khawsia in cu pa cu ramṭhing ah a dawisuak ṭheu. ³⁰ Jesu in a hnenah, “Na hmin zo a si?” tiah a sut. Cule anih in, “Lizon,” tiah a ti. Ziangahtile, khawsia tampi a sungih an luh ruangah a si. ³¹ Khur thuk zet sungih feh dingin thu pe lo dingin Jesui hnenah an dil. ³² Culai fangah tlang parah vawk rual tampi cu rawl an ei rero. Khawsepawl cun Jesui hnenah vawk rual sungih luh siang dingin an dil. Cule a siang hai. ³³ Cu pai sung ihsin khawsepawl cu an suak ih, vawk rual sungah an lut. Cui vawk rual tla cu khamhrap ihsin tili sungah an tlanthla ih an pil ṭheh. ³⁴ Vawk kiltupawl in thil cang mi an hmuh tikah an tlan ih, cui thuhla cu khaw sungah le ram lakah an than ciamco. ³⁵ Thil cang mi zoh dingah mipi an va feh. Jesui hnen an va thlen tikah a sung ihsin khawsepawl a dawisuahsak mi pa cu hnipuan hruh le lungfim in Jesui ke hram ih to in an va hmu. Cule an ṭih. ³⁶ A rak hmutupawl in ziangtin khawse pawlh mi pa a dam ti kha cupawl hnenah an rak sim. ³⁷ Cule Gadara ram mipi hmuahhmuah in an ṭih tuk ruangah Jesu kha anmah suahsan dingin an dil. Jesu cu lawng sungah a lut ih a umnak hmun kelah a kirsal. ³⁸ Khawsepawl ih an suahsan mi pa in Jesui hnenih um dingin a dil. Asinan Jesu in a tlunter. ³⁹ Cule, “Na inn ah va tlung aw la, na parah Pathian in ziang tluk thil ropi tla a rak tuah ti kha va sim aw,” tiah a ti. Cule cu pa cu a feh ih, Jesu in a parih thil ropi a rak tuah mipawl tla cu cui khaw pumpulukah a thansuak ṭheh. ⁴⁰ Cule hiti hin a rak si, an zaten amah an rak beisei ruangah Jesu a rakirsal tikah mipi in lungawi zetin an rak cohlang. ⁴¹ Cule, ngai hnik, sinakok uktu Jairas an ti mi pa cu cu tawkah cun a ra thleng ih, Jesui ke hramah a bawkkhup. Cule a inn ih ra dingin Jesu cu a dil. ⁴² Ziangahtile, a fanu neihsun kum hleihnih mite cu a thih zik ruangah a si. Jesu cu a va feh ih, mipi in an nawr luihlo. ⁴³ Cui laiah, cu tawkah cun kum hleihnih sung thiput nat tuar nunau pakhat a rak um. A nunkhawsaknak ding hmuahhmuah sibawipawl hnenah a hmang thluh nan zohman in an damter thei lo. ⁴⁴ Jesui dungin a thlun ih a kawrfual zim a tham. Cule hmakhatteah a thiput cu a reh. ⁴⁵ Jesu in, “Zo in i tham?” tiah a ti. An zatein an el cio tikah Peter le amai hnenih um mipawl in, “Hotupa, mipi in an lo tul ih an lo nawr luihlo sikhawh, ziangah, ‘Zo in i tham?’ na ti,” tiah an ti. ⁴⁶ Cule Jesu in, “Mi pakhatkhat in i tham a si. Ziangahtile, ka sung ihsin huham a suak ti ka thei,” tiah a ti. ⁴⁷ Nunaunu in a thupaw thei lo ti a hmuh tikah ṭhia phah reroin a ra ih, Jesui hmaiah a bawkkhup. Cu nu cun mi hmuahhmuah hmaiah ziangruangah Jesu a tham ti le hmakhatteah ziangti vekin a dam ti cu Jesui hnenah a phuang. ⁴⁸ Jesu in cu nui hnenah, “Ka fanu, na thinphang hlah, na zumnak in a lo damter zo, hnangamten va feh aw,” tiah a ti. ⁴⁹ Cutiih Jesu thu a sim rero laiah sinakok uktupai inn ihsin mi pakhat a ra thleng. Cule, “Na fanu a thi zo; Zirhtupa cu hnaihnawk rero nawn hlah,” tiah a ti. ⁵⁰ Cui thu cu Jesu in a theih tikah Jairas hnenah a sang ih, “Phang hrimhrim hlah, a zum lawng zum men aw la, na fanute cu a dam ding,” tiah a ti. ⁵¹ Cule Jairas-ih inn a va thlen tikah Peter, James, John le cui nunaunute-ih nu le pa siarlo zohman luhter Jesu in a siang lo. ⁵² Cule inn sungih a um mi an zaten nunaunute cu an ṭah ih an rak rero. Cule Jesu in, “Ṭap hlah uh, anih hi a thi lopi, a itthat a si,” tiah a ti. ⁵³ Nunaunute a thi zo ti an theih ruangah nautat phah nawnin an hnihsan. ⁵⁴ Cule an zaten lengih a suahter hnuah, cu nu cu a kut in a vun kai ih, a ko, “Nute, tho aw,” tiah a ti. ⁵⁵ A thlarau a rakirsal ih, nunaunu cu a tho lohli. A ei ding rawl pe dingin thu a pe hai. ⁵⁶ Cule, a nu le a pa cu an mang a bang zet. Asinan Jesu in a nu le a pai hnenah a thiltuah mi cu zohman sim lo dingin a tiam hai.

¹ Jesu in a dungthluntu hleihnihpawl cu hmunkhat ah a kokhawm ih, khawsia hmuahhmuah parah le nat damter theinak huham le thuneihnak tla a pe hai. ² Cule Pathian uknak thu sim ding le mina damter dingah anmahpawl cu a thlah. ³ Cule anih in an hnenah, “Nan khualtlawnnak hrangah zianghman keng hlah uh, kianghrawl si seh, zal si seh, rawl si seh, paisa si seh, angki zun hnih si seh keng hlah uh. ⁴ Ziangvek inn sungih nan luh khal asile cu tawk ihsin nan fehsuak hlanlo acui inn ah va cam uh. ⁵ Mi zokhal in an lo cohlang lo asile acui khua ihsin nan suahsal tikah anmah dokalhnak thutheihpinak ah nan ke-ih leivut cu thingthlata uh,” tiah a ti. ⁶ Dungthluntupawl cu an fehsuak ih, khaw khat hnu khaw khat an feh. Thuthangṭha an phuang ih hmun kipah mi an damter. ⁷ Cui canah, Herod Tetrak in Jesu-ih thiltuah mi hmuahhmuah a theih tikah a khawruah a har zet. Ziangahtile, mi hrekkhat in, “John cu mithi lak ihsin a thosal a si,” tiah an ti. ⁸ Mi hrekkhat in, “Elijah a runglangsal a si hi,” an ti. Cun, midangpawl in, “Khuahlan profet pakhatkhat a thosal a si,” an ti. ⁹ Herod in, “John-ih lu cu ka tan zo, asinan, a thu ka theih rero mi pa cu zo a si?” tiah a tiih Jesu hmuh ding a hiar zet. ¹⁰ Apostolpawl an ratlungsal ih an tuah mi hmuahhmuah cu Jesu an ra sim. Cule annih cu a hruai hai ih, Bethsaida khaw kiang ramṭhing ah anmah vial lawng an feh. ¹¹ Mipi in cui thu an theih tikah Jesu cu an thlun. Cupawl cu Jesu in a rak cohlang hai ih, Pathian uknak thu an hnenah a sim. Cule damnak a ṭul mipawl a damter hai. ¹² Ni a tlak zik tikah dungthluntu hleihnihpawl cu an ra ih Jesui hnenah, “Hi hmun hi ramṭhing a si ruangah mipipawl hi, hi kiangkapih khuapawl le lo lakah rawl le riahnak tla hawl dingin thlah hai aw,” tiah an ti. ¹³ Asinan Jesu in an hnenah, “An ei ding rawl pe uh,” tiah a ti. Cule annih in, “Hi mipi hmuahhmuah hrangah va feh ih, rawl kan va leisak lo ah cun, kanmah cun sang hlawm nga le nga pahnih lawng kan nei,” tiah an ti. ¹⁴ Ziangahtile, cu tawkah cun patling hlirah thawngnga hrawng an si. Jesu in a dungthluntupawl kha, “Mipi hi sawmnga bur ciarin toter uh,” tiah a fial hai. ¹⁵ A fial mi vekin an tuah ih, mipi zaten an to. ¹⁶ Cule Jesu in sang hlawm nga le nga pahnih cu a la ih van lam zoh in lungawithu a sim ih a phel. Cule mipi zem dingah a dungthluntupawl a pe. ¹⁷ Mipi zatein an ei ih an khawh hnuah an hlah mi nepnawipawl cu an sar ih bawmte hleihnih a khat. ¹⁸ Cule, hiti hin a rak si, Jesu amahte lawng thla a cam laiah, a dungthluntupawl cu a hnenah an um. Cule, “Mipi in keimah hi zo in ti?” tiah a sut hai. ¹⁹ Annih in, “Baptisma petu John a si an lo ti. Asinan, mi hrekkhatpawl in Elijah a si an lo ti. Cule midangpawl in khuahlan laiih profet pakhatkhat a thosal mi a si an lo ti,” tiah an sang. ²⁰ Cule, Jesu in an hnenah, “Nannih in teh kei hi zo in ti?” tiah a sut hai. Peter in, “Nangmah cu Pathian-ih Khrih na si,” tiah a sang. ²¹ Jesu in cui thu cu zohman sim lo dingin hnget zetin a tiam ih thu a pe hai. ²² Cule, anih in, “Minung Fapa in thil tampi a tuar ding. Miupapawl, puithiam sangpawl le Danzirhtupawl in an hnawng ding ih an that ding. Cule a ni thumnak ah thawhtersal a si ding,” tiah a ti. ²³ Cule an zate hnenah, “Zokhal keimah i thlun duhtu cun amah le amah elaw in, ni tin amai khraws la in i thlun seh. ²⁴ Ziangahtile, zokhal a nunnak humhim a duhtu cun a nunnak a hloh ding. Asinan mi zokhal keimai ruangih a nunnak a hlohtu cun a nunnak a humhimngah ding. ²⁵ Ziangahtile, mi pakhat in leitlun pumpi hi nei in amah siatral in hloral sehla a hrangah ziang hlawknak a um? ²⁶ Zokhal keimah le ka thu a zahpitu cu Minung Fapa in a ropitnak, a Pai ropitnak le a vancung mithianghlimpawlih ropitnak thawn a rat tikah cu pa cu a zahpi ve ding. ²⁷ Thungai thu ka lo sim, ‘Hi tawkih a ding mi mi hrekkhat cu Pathian uknak an hmuh hlanlo thihnak tep hrimhrim lo ding mi an um,’” tiah a ti. ²⁸ Cule, hiti hin a rak si, hi thu a sim hnu ni riat hrawngah Jesu in Peter, John le James tla a hruai hai ih, thla cam dingin tlang parah a kai. ²⁹ Thla a cam rero laiah a hmel langdan a hung thlengaw ih a hnipuan cu a var tukih a tlet in a tle. ³⁰ Cule, ngai hnik, mi pahnih cu amah thawn an beaw rero. Cute pahnih cu Mawsi le Elijah an si. ³¹ Cute pahnih cu ropitnak thawn an runglang ih, Jesu in Jerusalem khua ih a ṭhehfel ding mi thuhla an rel. Cumi cu a fehsuah ding thu a si. ³² Asinan, Peter le a rualpipawl cu an sing ngutngo. An hung ṭhang tikah a ropitnak le a hnenih mi pahnih ding an hmu. ³³ Cule, hiti hi a rak si, cute pahnih in Jesu an fehsan zawngah Peter in Jesui hnenah, “Hotupa, hi tawkih um hi kan hrangah a ṭha. Thlam pathum in kan sak pei. Na hrangah pakhat, Mawsi hrangah pakhat, Elijah hrangah pakhat,” tiah a ti. Ziang ka ṭawng ti khal a rak thei lo. ³⁴ Cutiih a ṭawng rero laiah mero a rung zam ih a run hliap hai. Mawsi le Elijah mero sungih an luh lai cu an ṭih. ³⁵ Cule mero sung ihsin aw pakhat in, “Hihi ka duhdawt zet mi ka Fapa a si, a thu ngaithla uh,” tiah a run ti. ³⁶ Cui aw a reh tikah Jesu lawng an rak hmu. Cui canah, an hmuh mi thilpawl zianghman zohman sim loin daiten an rak um. ³⁷ Cule, hiti hi a rak si, a thaisun tlang par ihsin an rung ṭum tikah mipi tam zetin Jesu kha an rak hmuak. ³⁸ Cule, zoh hnik, mipi lak ihsin mi pakhat a au ih, “Zirhtupa, ka fapa i ra zohsak hram dingin ka lo dil a si. Ziangahtile, amah cu ka neihsun fapa a si. ³⁹ “Ngai hnik, thlarau in a kaihrem ih, a ausuak hruak ṭheu. A caihter ih a kaa ihsin cilbuanra a suak. Cutin nasazetin a tuahmawh hnuah nuamnaiten a suahsan ṭheu. ⁴⁰ Cui thlarau cu dawisuak dingin na dungthluntupawl ka dil hai nan an rak dawisuak thei lo,” tiah a ti. ⁴¹ Cule Jesu in a sang ih, “Maw nannih tui san minung zumnak nei lo le thutak ihsin a pengpawl, ziangtik tiang saw nan hnenah ka um ding ih, ziangtik tiang saw ka lo zawi ding? Na fapa cu hi tawkah rak hruai hnik,” tiah a ti. ⁴² Nauhakpate a rat laiah khawsia in a thluk ih a caihter ciamco. Cule Jesu in thlarau bawrhhlawh cu a kawk ih, nauhakpate cu a damter. Cule nauhakpate cu a pai hnenah a pesal. ⁴³ Cule Pathian-ih maksaknak ah cun an zaten an mang a bang zet. ⁴⁴ “Hi thu tla hi ṭhaten ngaithla hnik uh. Ziangahtile, Minung Fapa hi mi kut ah phiarsawm a si zikte thlang,” tiah a ti. ⁴⁵ Asinan, a sim mi cu an rak theithiam lo. An theihthiam theilonak dingin cumi cu an hnen ihsin thuh a si. A sim mi thuhla ah amah suh an ngam lo. ⁴⁶ Cule dungthluntupawl cu an lakah zo a thupibik ding tiin an rak elaw rero. ⁴⁷ Jesu in an thinlung sungih khawruah mi a thei ih, nauhak pakhat a la ih a kiangah a dinter. ⁴⁸ Cule an hnenah, “Zokhal hi nauhakte ka hmin ih a cohhlangtu cun, keimah i cohlang a si. Cule zokhal keimah i cohlangtu cun i thlahtu a cohlang a si. Ziangahtile, nan zate lakih a thupilobik cu mithupi a si ding,” tiah a ti. ⁴⁹ John in a sang ih, “Hotupa, kanmah in thlunlotu mi pakhat na hmin in khawse dawisuaktu kan hmu ih, kanmah in thlun lo ruangah kan khamta,” tiah a ti. ⁵⁰ Cule Jesu in, “Kham hlah uh. Ziangahtile, in dodallotu cu kan lamṭang a si,” tiah a ti. ⁵¹ Cule hiti hin a rak si, van ih laksoh a si ding can a nai thlang tikah Jerusalem ih feh dingah hngetkhoh zetin a tum. ⁵² Cule a hmaiah palai tla a thlah sung. A hrangah timtuah cia dingin an va feh ih, Samaria peng khawte pakhat ah an lut. ⁵³ A mithmai cu Jerusalem khaw lam pan dingih a lang ruangah cui khaw mipawl in an rak cohlang lo. ⁵⁴ Cumi cu a dungthluntu James le John in an hmuh tikah annih in, “Bawipa, Elijah ih a rak tuah dah vekin hi mipawl kangral thluhtu dingah van ihsin meisa rung tla dingin ko nungla na duh maw?” tiah an ti. ⁵⁵ Asinan, Jesu cu a her ih anmah cu a kawk hai, “Ziangvek thlarau nan nei ti nan thei lo. ⁵⁶ Minung Fapa cu minung nunnak siatsuah dingah a ra lo. Rundam dingah a ra sawn,” tiah a ti. Cule khaw dangah an feh. ⁵⁷ Cule, hiti hin a rak si, lamzin ih an feh rero laiah mi pakhat in a hnenah, “Bawipa, na fehnak kipah ka lo thlun ding,” tiah a ti. ⁵⁸ Cule Jesu in a hnenah, “Sihalpawl in kua an nei. Tlunzuang vatepawl khalin bu an nei. Asinan, Minung Fapa cun lu retnak ding hmun hman a nei lo,” tiah a ti. ⁵⁹ Mi pakhat hnenah Jesu in, “I thlun aw,” tiah a ti. Asinan, cu pa in, “Bawipa, va feh ih, ka pa va phum hmaisakta i siang hram aw,” tiah a ti. ⁶⁰ Jesu in a hnenah, “Mithipawl in an mithi cu phum hai seh. Asinan, nang cu va feh aw la, Pathian uknak thu va simphuang aw,” tiah a ti. ⁶¹ Cule a dang pakhat khalin, “Bawipa, ka lo thlun ding. Asinan, ka inn ih umpawl damten maw, tiin ka va thlah hmaisata ding,” tiah a ti. ⁶² Jesu in cu pai hnenah, “Zokhal leilehnak hal kai tahratih, dung lam a zohtu cu Pathian uknak hrangah a tlak lo,” tiah a ti.

¹ Cui hnuah, Bawipa in a dang sawmsarihpawl kha a ruat hai ih amah a fehnak ding khaw kip le hmun kipah pahnih pahnih in a hmaiah a rak thlah hai. ² An hnenah cun, “Thungaiten, fang ah ding cu a tam zet. Asinan hnaṭuantu an mal. Curuangah, fang ah ding neitu Bawipai hnenah a fang ahnak hmun ih hnaṭuantupawl a thlah theinak dingah thla cam uh. ³ Va feh uh! Ngai hnik uh, cinghnia rual lakih tuufano rual vekin ka lo thlah hai a si. ⁴ Paisa bawm si seh, zal si seh, kedam si seh keng hlah uh. Lamzin ah zohman cibai buk hlah uh. ⁵ “Nan luhnak inn kipah a hmaisabikah, ‘Hi inn ah daihnak um hram seh,’ tiah ti uh. ⁶ Cu tawkah daihnak fapa a um asile nan daihnak cu a parah a um ding. A um lo asile nan hnenah a kirsal ding. ⁷ Cui inn ah cun um uh la an lo pek mi poh kha ei uh la in uh. Ziangahtile, hnaṭuantu cu a ṭuan man hmu tlak a si. Inn khat hnu inn khat ṭhawn dualdo hlah uh. ⁸ “Cule, ziangvek khua ih nan luh tik khalah an lo cohlang asile nan hmaiih an ret mi pohpoh kha cu ei uh. ⁹ Cui khaw sungih minapawl cu damter uh la an hnenah, ‘Pathian uknak cu nan kiang nai teah a thleng zo a si,’ tiah sim uh. ¹⁰ Asinan, ziangvek khua khalih nan luh tikah an lo cohlang lo asile an khaw sung lamzinpawl ah feh uh la, ¹¹ ‘Kan parih a kawp mi nan khaw leivut cu nanmah lo dokalhnak hminsinnak ah kan thingthla a si. Asinan hihi thei uh, Pathian uknak cu nan kiang nai teah a thleng zo,’ tiah va ti uh. ¹² Asinan nan hnenah ka lo sim, cui ni ah cui khua hnakin Sodom ih tuar mi cu a dem sawn ding. ¹³ “Khorazin, na hmakhua a pit. Bethsaida, na hmakhua a pit. Ziangahtile, nan hnenih huham ih tuah mi thil tampi kha Taiar khua le Sidon khua ah tuah rak si sehla buri sin in vutcam lakah to in an sual an sirnak a rei tuk zo ding. ¹⁴ Asinan, thuṭhennak ah cun nan tuar mi hnakin Taiar khua le Sidon khua ih tuar mi cu a dem deuh sawn ding. ¹⁵ Cule, nang Kapernaum khua, van tiang khaisan na si nan Mithikhua ah dirhthlak na si ding. ¹⁶ “Nan thu a lo ngaithlatu cu ka thu ngaithlatu a si. Nanmah a lo hnawngtu cu keimah i hnawngtu a si. Cule keimah i hnawngtu cu i thlahtu a hnawng a si,” tiah a ti. ¹⁷ Cun mi sawmsarihpawl cu lungawiten an ratlungsal ih, “Bawipa, na hmin in khawsepawl khal kan thuthu in an um,” tiah an ti. ¹⁸ Cule, anih in an hnenah, “Nimthlakau vekin vancung ihsin Setan a tla ka hmu. ¹⁹ Ngai hnik uh, rul le tlangkaikuangpawl pal theinak le nan ralpawlih huham thiltitheinak hmuahhmuah neh theinak thuneihnak cu nan hnenah ka lo pe a si. Zianghman in an lo tuahmawh hrimhrim lo ding. ²⁰ Sikhalsehla, nan thuthu ih thlarau sualpawl an um ruangah nan lungawi hlah uh. Nan hmin vancung ih ngan a si zo ruangah nan lungawi sawn uh,” tiah a ti. ²¹ Cui can fang teah Jesu cu Thlarau ah a lung a awi ih, “Maw ka Pa, lei le van ih Lal, ka lo thangṭhat a si. Ziangahtile, nang cun hi thilpawl tla hi mifim le mithiampawl hnen ihsin na thup ih mi menmen hnen tla ah na rak phuang. A si, ka Pa, cutivekih na tuah mi cun na lung a lo awiter zet a si. ²² Ka Pa in thil ziang hmuahhmuah ka hnenah i pe zo. Ka Pa siarlo zohman in Fapa hi an thei lo. Fapa siarlo zo dang hmanin Pa cu an thei lo. Fapa in a hnenih Pa phuanlang a duh mi pa khal cun a thei ve,” tiah a ti. ²³ Cule Jesu cu a dungthluntupawl lamah a her ih, a dangten thu a sim hai, “Nan hmuh mi thilpawl a hmutu mit cu mit hualvanṭha a si. ²⁴ Ziangahtile, ka lo sim a si, profet tampi le siangpahrang tampi in nan hmuh mi thilpawl hi hmuh an rak hiar zet nan an rak hmu lo. Nan hna ih nan theih mi thilpawl hi theih an rak duh zet nan an rak thei lo,” tiah a ti. ²⁵ Cule, ngai hnik, Danthiam pakhat cu Jesu hniksak dingin a ding ih, “Zirhtupa, kumkhawnunnak co dingah ziang ka tuah ding?” tiah a ti. ²⁶ Jesu in a hnenah, “Dan sungah ziangtin ngan a si? Ziangti vekin na siar?” tiah a ti. ²⁷ Cule Danthiampa cun, “BAWIPA na Pathian cu na thinlung zate, na nunnak zate, na cahnak zate le na ruahnak zatein na duhdaw pei. Cule nangmah le nangmah na duhdawtawk vekin na inhnen na duhdaw pei, a ti,” tiah a sang. ²⁸ Cule Jesu in a hnenah, “Na sang dik a si. Cutivekin tuah aw la, na nung ding,” tiah a ti. ²⁹ Asinan, Danthiampa cun midingfel a si ti langawkter a duh ruangah, “Ka inhnen cu zo a si?” tiah a ti. ³⁰ Cu tikah Jesu in a sang ih, “Mi pakhat cu Jerusalem khua ihsin Jeriko khua ah a vung feh ih, suamhmangpawl a tawng dukdi hai ih, suamhmangpawl cun a hnipuan an hlihsak ṭheh, bese zetin an vuak, thi ziktein an tanta ih an fehsan. ³¹ Puithiam pakhat cu cui lamzin zawh in a vung feh ngelcel. Cu pa a hmuh tikah khatlam kapin a hrial ih a fehsan. ³² Cuvek ṭhiamṭhiamin cu tawk hmun ah Levi mi pakhat a va thleng ve. Cu pa cu a va zohta ih khatlam kapin a hrial ih a fehsan ve. ³³ Asinan Samariapa pakhat cu khualtlawng in cu pai umnak hmun a va thleng. Cule, cu pa a hmuh tikah a parah lainatnak a nei. ³⁴ A va pan ih a hriamhmapawl ah hriak le sabitzu a tawih hnuah a tuamsak. Amai ṭilva parah a toter ih, khualbuk ah a hruai. Cule a tuamhlawm. ³⁵ A thaisun a fehsuah zawngah dinari paisa pahnih a suah ih, khualbuk kiltui hnenah a pe. Cule a hnenah, ‘Hi pa hi run tuamhlawm aw la, na cembet mi hmuahhmuah cu ka rakirsal tikah ka lo rulsal ding,’ tiah a ti. ³⁶ “Hite pathum lakah suamhmangpawl kut sungih a thlengtupai inhnen cu zo bik hi a si ding tiah na ruat?” tiah a ti. ³⁷ Cule Danthiampa cun, “A parih zahngainak neitupa hi a si,” tiah a ti. Cun, Jesu in a hnenah, “Feh aw la, cutivekin va tuah ve aw,” tiah a ti. ³⁸ Cule hiti hin a rak si, Jesu cu a dungthluntupawl thawn khual an tlawng vivo ih, khaw pakhat ah a lut. Martha ti mi nunaunu pakhat in Jesu cu a inn ah a cohlang. ³⁹ Cu nu in Mary ti mi naunu a nei. Mary cu Jesui ke hramah to in a thu a ngaithla. ⁴⁰ Asinan, Martha cu ei in tawlrel in a buai zet. Cule Jesui hnenah a feh ih, “Bawipa, ka naunu in ei in tawlrel hna keimah lawng i tun ṭheh hi pawi na ti lo maw si? Curuangah i ra bawm dingin sim aw,” tiah a ti. ⁴¹ Cule Jesu in a sang ih a hnenah, “Martha, Martha, thil tampi thuhla ah dawnhar le thinbuai in na um a si hi. ⁴² A ṭul mi cu thil pakhat lawng a si. Acui thil ṭha cu Mary in a hril zo. Cumi cu a hnen ihsin lawnsak a si lo ding,” tiah a ti.

¹ Cule, hiti hin a rak si, Jesu cu hmun pakhat ah thla a cam rero ih, a ṭheh tikah a dungthluntupawl lakih pakhat in, “Bawipa, John in a dungthluntupawl a zirh vekin thlacamdan in zirh ve aw,” tiah a ti. ² Cule Jesu in an hnenah, “Thla nan cam tikah hitin cam uh, ‘Vancung ih a um mi kan Pa, na hmin thianghlim seh. Na uknak thleng hram seh. Vancung ih na duhnak tuah a si bangin leitlun khalah na duhnak tuah si hram seh. ³ Kan ṭul mi rawl ni tin in pe aw. ⁴ Kan parih leibatu kip kan ngaidam vekin, kan sualnakpawl tla in ngaidam ve aw. Cule hniksaknak sungah in hruai loin miṭhalopa hnen ihsin in run sawn aw,’ tiah nan ti pei,” tiah a ti. ⁵ Cule Jesu in a dungthluntupawl hnenah, “Nan lakih mi pakhat in rualpi neita hnik sehla, cu pa cu zanṭim laifangah a rualpipai hnenah feh tahratin, ‘Ka rual, sang hlawm thum in i cawih hram aw. ⁶ Ziangahtile, ka rualpi pakhat a khualtlawnnak ihsin ka hnenah a ra thleng ih zianghman pek ding ka nei lo,’ tiah a va ti. ⁷ “Cule inn sungih um mi pa in a sangih, ‘I hnaihnawk hlah; sangka ka hren zo ih ka falepawl thawn kan it zo; thil lo pe dingin ka tho thei nawn lo,’ tiah a ti. ⁸ Nan hnenah ka lo sim, a rualpi a si ruangah tho in a pe lo ding. Asinan ningzak lo ih a dil hrat ruangah a tho ding ih a ṭul zat in a pe ding. ⁹ “Cun, nan hnenah ka lo sim, dil uh la, pek nan si ding; hawl uh la, nan hmu ding; king uh la, awnsak nan si ding. ¹⁰ Ziangahtile, a diltu zokhal a ngah ding. A hawltu cun a hmu ding, a kingtu cu sangka awnsak a si ding. ¹¹ “Nannih lakah pakhat cu pa si in a fapa in sang dil bang hnik sehla, a fapa hnenah lungto a pe pei maw? Asilole nga dil bang hnik sehla nga aiah rul a pe pei maw? ¹² Asilole arti dil bang hnik sehla tlangkaikuang a pe pei maw? ¹³ Nannih cu miṭhalo nan si nacingin nan falepawl hnenah thilpek ṭhapawl pek nan thiam a si ah cun vancung ih a um mi nan Pa cun amah diltupawl hnenah Thlarau Thianghlim cu ziang tlukin so a pek sinsin ding?” tiah a ti. ¹⁴ Cule Jesu in a ṭawng thei lo mi khawsia pakhat a dawisuak. Cule hiti hin a rak si, khawsia a suah tikah ṭawng thei lo pa cu a rak ṭawngsuak. Cu tikah mipi an mang a bang. ¹⁵ Asinan mi hrekkhat in, “Khawsepawlih lal Beelzabub thawngin khawsepawl a dawisuak a si,” tiah an ti. ¹⁶ Midangpawl in sualfawrhnak ah van ihsin thilmak hminsinnak a hnenah an dil. ¹⁷ Asinan, anih in an ruahnakpawl tla a thei ih, an hnenah, “Ziang ram khal ṭhenaw ih amah le amah a doaw mi cu a siatral ding. Cule insungsang khal amah le amah a doaw mi cu a tlu ding. ¹⁸ Setan khalin amah le amah doaw in a ṭhenaw asile ziangtin a uknak cu a dingsuak thei ding? Nannih in Beelzabub thawngin khawsepawl a dawisuak in ti ruangah cucu ka ṭawng a si. ¹⁹ Beelzabub thawngin khawsepawl ka dawisuak asile nan fapalepawl in teh zo thawngin an dawisuak? Cu mi ruangah anmahpawl cu nan thuṭhentu an si ding. ²⁰ Asinan, kei in Pathian kutzung hmang in khawsepawl ka dawisuak asile Pathian uknak cu nan hnenah a thleng zo taktak a si. ²¹ “Micakpa pakhat in hriamnam thawi a inn a kilven laiah cun a thilripawl cu an him a si. ²² Asinan, amah hnakih caksawn mi pakhat in a ra do tikah a neh ih a rinsan mi a ralthuam hmuahhmuah cu a lawnsak. Cule a lawn mi thilripawl cu a zemdarh ṭheh. ²³ Ka lamih a ṭanglotu cu i dodaltu a si ih i finkhawmpilotu cun a ṭhekdarh a si. ²⁴ “Mi pakhat sung ihsin thlarau bawrhhlawh a suah tikah cui khawsia cu cawlhnak hawl in ramcar hmunpawl tla ah a vak rero nan a hmu lo. Cule, ‘Ka suahsan mi inn ah ka kirsal ding,’ tiah a ti. ²⁵ Cutin a va feh ih, acui inn cu phiahfai le ceimawi in a hmu. ²⁶ Cule a feh ih, amah hnakih sualralsawn a dang khawsia pasarih tla a va hruai ih, cui hmun ah cun an lut ih, an um. Cu pai cemnetnak cu a thawk hnakin a sesawn,” tiah a ti. ²⁷ Cule, hiti hin a rak si. Cui thupawl Jesu in a sim rero laiah mipi lakin nunaunu pakhat a au ih, Jesui hnenah, “Nangmah vunnak pum neitu le na fawh mi hnawi neitu nunaunu cu mihualvanṭha a si,” tiah a ti. ²⁸ Asinan Jesu in, “A si lo, Pathian thu a ngaithla ih a thluntupawl sawn hi mihualvanṭha an si,” tiah a ti. ²⁹ Cule mipi pumkhawmaw an pun deuhdeuh tikah Jesu in hitin thusim a thawk, “Hi mi san minungpawl hi miṭhalo an si. Hminsinnak an hawl. Sikhalsehla, profet Jonah-ih hminsinnak siarlo thilmak hminsinnak dang pek an si lo ding. ³⁰ Jonah cu Nineveh khaw mipawl hnenih hminsinnak a si vekin Minung Fapa khal cu tui san minungpawl hnenah hminsinnak a si ve ding. ³¹ Thuṭhennak ni ah cun thlang lam siangpahrangnu khal tui san minungpawl thawn a tho ding ih thiamlo a coh hai ding. Ziangahtile, Solomon-ih fimnak ngaithla dingah leilung deng ihsin a ra. Ngai hnik, Solomon hnakih ropisawn hi tawkah hin a um a si. ³² Nineveh khaw mipawl cu thuṭhen ni ah tui san minungpawl thawn an ding ding ih thiamlo an coh ding. Ziangahtile, Jonah in thu a sim tikah an sual an sir. Cule, ngai hnik, Jonah hnakih ropisawn hi tawkah hin a um a si. ³³ “Mi zohman in meito vang tahratin a thupnak hmun ah le kho hnuaiah an ret dah lo. Cu hnakin a ra luttupawl in tleu an hmuh theinak dingah meito vannak parah an ret sawn ṭheu a si. ³⁴ Mit cu taksaruangpumih meito a si. Curuangah na mit a harhdam tikah tleu in na taksaruangpum a luahkhat ding. Asinan, na mit in nat ṭha lo a neih tikah thim in na taksaruangpum a luahkhat ding. ³⁵ Curuangah, na sungih um mi tleu cu thim a silonak dingah ralring aw. ³⁶ Na taksaruangpum cu khui tawk hman thim loin tleu in a luahkhat thluh asile ziang hmuahhmuah cu a tleu a si. Cumi cu a lo tlettu meito tleu vek a si,” tiah a ti. ³⁷ Thusim a ṭheh tikah Farasipa pakhat in Jesu cu rawl ei a sawm. Cuiruangah Jesu cu a feh ih rawl a hil. ³⁸ Jesu cu zanriah a ei hlanih a hnimpilawk hmaisakta lo kha Farasipa in a hmuh tikah a mang a bang. ³⁹ Cule Bawipa in a hnenah, “Atu ah nannih Farasipawl cun no le kheng leng lam lawng nan khawlhfai ṭheu. Asinan nan sung lam cu duhhamnak le sualralnak in a khat. ⁴⁰ Nannih miaapawl, leng lam a tuahtu in sung lam khal a tuah a si lo maw? ⁴¹ Asinan nan neih mi thil ihsin bawmnak thilpek cu pe uh. Cule, ngai hnik uh, ziang hmuahhmuah cu nan hrangah a fai a si. ⁴² “Asinan, nannih Farasipawl nan hmakhua a pit! Ziangahtile, kutinan, remhmui le thlai phun zakipah ṭhenhra ṭhenkhat nan pe ko. Asinan diknak le Pathian duhdawtnak langter ding cu nan ngaihthah. A dangpawl khal kha tuah ṭhulh cuang loin hipawl tla hi tuah zo ding nan si. ⁴³ “Nannih Farasipawl nan hmakhua a pit a si! Ziangahtile, sinakok sungah tonak pawimawhbik ih to le dawrhmunpawl tla ih upatnak pek nan ngaina. ⁴⁴ “Nannih Danzirhtupawl le Farasipawl nan hmakhua a pit! Nannih cu midepde nan si. Ziangahtile, nannih cu a lang lo mi thlan vek nan si. A parih a fehtupawl in thlan a um le um lo an thei lo,” tiah a ti. ⁴⁵ Cule Danthiam pakhat in Jesu cu, “Zirhtupa, hi thu na sim mi hin kannih khal in hmuhsuam ve a si,” tiah a sang. ⁴⁶ Cule Jesu in, “Nannih Danthiampawl nan hmakhua a pit a si! Ziangahtile, nannih cun phurh a har zet mi phurrit zet kha mi parah nan suang. Asinan nanmah cun nan kutzung pakhatte hmanin cui phur cu nan tham lo. ⁴⁷ “Nan hmakhua a pit! Ziangahtile, nan pupapawl in an rak thah mi profetpawl hrangah thlanpawl tla nan sak. ⁴⁸ Thungaiten nan pupapawlih tuah mi cu nan theihpi ih nan lungkimpi. Ziangahtile, annih in an rak that ih, nannih in an thlanpawl tla nan sak. ⁴⁹ Curuangah Pathian in a fimnak in profetpawl le apostolpawl ka run thlah ding. A hrekkhat cu an that ding ih, a hrekkhat cu an tiduhdah ding. ⁵⁰ Curuangah leilung hramthawk ihsin profetpawl hmuahhmuah ih thisen an suah mi cu tui san minungpawl hnenah hlam a si ding. ⁵¹ Thungai thu ka lo sim, Abel thisen ihsin temple le biakṭheng karlakih an thah mi Zakhariah-ih thisen tiang tui san minungpawl parah hlam a si ding. ⁵² “Nannih Danthiampawl nan hmakhua a pit! Ziangahtile, theihnak tawhfung nan lakhlo ih nanmah ngai le nan lut fawn lo. A lut rerotupawl cu nan kham fawn si,” tiah a ti. ⁵³ Cui thupawl a sim hnuah, Danzirhtupawl le Farasipawl in thinheng in Jesu thu el an thawk. Thu tampi rel dingih nasazetih fawrh an tum. ⁵⁴ Jesu cu sual an puh theinak dingah a kaa ihsin a suak mi ṭawngkam ih awhdan ding an hawl ih ṭha zetin an bawh ringring.

¹ Cui canah mipi siarcawklo cu an tawngkhawmaw ih pakhat le pakhat an palaw cupco. Cule Jesu in a dungthluntupawl hnenah a hmaisabikah hitin thusim a thawk, “Farasipawlih thilnu hi va ralring uh. Cumi cu depdetnak a si. ² Ziangahtile, lang leh lo dingih khuh mi zianghman a um lo, cun theih leh lo dingih thuh mi khal zianghman a um lo. ³ Curuangah, thim lakih nan ṭawng mi ziangkhal tleu ah theih a si leh ding ih, pindan sungtabik ih hna kiang teih nan rak ṭawng thektho mi khal mipi hnenah langhnganin aupi a si leh ding. ⁴ “Cule, Jesu in, ruallenuh, ka lo sim a si, taksapum an thah hnuah tuah thei mi dang a nei nawn lotupawl kha va ṭih hlah uh. ⁵ Asinan nan ṭih ding mi cu zo a si ti ka lo hmuh ding. Taksapum a thah hnuah Gehenna meisa sungih mi hlawn theinak thuneitu kha ṭih uh. A si, ka lo sim a si, cu pa cu va ṭih uh. ⁶ Sunṭam vate panga cu assarion pahnih ah an zuar a si lo maw? Cui sunṭam vate pakhatte khal Pathian in a hngilh lo. ⁷ Asinan, Pathian cun nan lu parih sam hman a zaten a siar ṭheh a si. Curuangah ṭih hlah uh. Nannih cu sunṭam vate tampi hnakin nan man a khung sawn a si. ⁸ “Ka lo sim a si, zokhal milai hmaiih i ṭantu cu Minung Fapa khalin Pathian-ih vancungmipawl hmaiah a ṭan ve ding. ⁹ Asinan mi zokhal milai hmaiih i hnawngtu cu Pathian vancungmipawl hmaiah hnawn a si ve ding. ¹⁰ Cule zokhal Minung Fapa dokalhih a ṭawngtu cu ngaidam a si ding. Asinan, Thlarau Thianghlim a thangsiattu cu ngaidam a si lo ding. ¹¹ “Cun, sinakok ih mipi hmaiah si seh, uktupawl le thuneitupawl hmaiah si seh an lo hruai tikah ziangtin, asilole, ziang ka sang ding tiin le ziang ka ṭawng ding tiin nan dawnhar hlah uh. ¹² Ziangahtile, Thlarau Thianghlim in nan ṭawng ding mi cu cui tikcu teah cun a lo zirh ding,” tiah a ti. ¹³ Mipi lakih mi pakhat in Jesui hnenah, “Zirhtupa, rothil i zem ve dingin ka upa hi sim aw,” tiah a ti. ¹⁴ Asinan, Jesu in cu pai hnenah, “Milaipa, zo in nanmai karlakih thuṭhentu asilole ro ṭhentu dingah in ruat?” tiah a ti. ¹⁵ Cule Jesu in an hnenah, “Ralring uh la duhhamnak ihsin nanmah le nanmah kilvengaw uh. Ziangahtile, mi pakhatih nunnak cu a thilri tampi neih mi ah a telcih lo,” tiah a ti. ¹⁶ Cui hnuah Jesu in an hnenah hi tahṭhimnak hi a sim, “Milian pakhat pai lo in thlairah tampi a suah. ¹⁷ Cu tikah, cui milianpa cun amahte in a ruat ih, ‘Ka thlairah retnak ding hmun ka neih lo ruangah ziangtin ka tuah ding? ¹⁸ “ ‘Cule hitin ka tuah ding, ka thlairah innpawl ka bal pei ih, tumdeuhin ka sak pei. Cu tawkah cun ka thlairah le ka thilri hmuahhmuah cu ka ret pei. ¹⁹ Cui sin, ka thlarau hnenah, “Maw ka thlarau, nang cun kum tampi hrang daih thilri tampi na khawl zo. Cawl huahhi men aw la, ei le in in nuam zetin nung aw, ka ti ding,” ’ tiah a ti. ²⁰ “Asinan Pathian in a hnenah, ‘Nang miaapa! Tuizan rori ah na thlarau cu laksak na si ding. Cule nangmah hrangih na rak khawl mi thilripawl hi zo in a co ding?’ tiah a ti. ²¹ “Cutivekin mai hrang lawngah hlawnthil khawl ih, Pathian lamih lianlotu cu, cu pa vek an si,” tiah a ti. ²² Cule Jesu in a dungthluntupawl hnenah, “Curuangah nan hnenah ka lo sim, nunnak thu ah, ziang ka ei ding? tiah dawnhar hlah uh. Nan taksapum thu ah, ziang ka hruh ding? ti khalin dawnhar hlah uh. ²³ Rawl hnakin nunnak a thupisawn ih, hnipuan hnakin taksapum a thupisawn a si. ²⁴ Tlangakpawl khi ruat hnik uh. Thlaici an tuh lo ih an at lo. Thilri retnak inn le thlairawl retnak inn khal an nei lo. Asinan Pathian in a cawm hai. Nannih cu cui vatepawl hnakin a let tampi in nan man a khungsawn a si lo maw? ²⁵ Nanmah lakah dawnharnak ruangah zo in amai san lam dawng khat bet thei? ²⁶ Cutivek thil fa te men hman nan tuah thei lo asile ziangah saw thil dangdang hrangah nan dawnhar rero? ²⁷ “Lily par tla ziangtin an ṭhang ti ruat hnik uh. Hna an ṭuan lo, pat khal an hnuk lo. Asinan ka lo sim a si, Solomon rori hman a ropitnak hmuahhmuah ih a thawmawk lai hmanah hi lily parpawl lakih pakhatte vek men hman a tluk lo. ²⁸ Nannih zumnak malpawl, tuisun ah lo sungah a um ih, thaisun ah mi in thuk sungih an paih mi hrampi hman Pathian in cu tlukih a thawm asile nannih tla cu nasa sinsinin a lo thuam lo ding maw? ²⁹ Ziang nan ei ding ih ziang nan in ding ti hawl hlah uh. Cu mi thu ah dawnhar in um hlah uh. ³⁰ Ziangahtile, cui thilpawl hmuahhmuah tla cu leitlun ih miphunpawl in an hawl a si. Asinan, nan Pa in cui thilpawl nan ṭul ti a thei. ³¹ Asinan, Pathian uknak cu hawl sawn uh la, cui thilpawl hmuahhmuah tla cu a lo pebet ding. ³² “Tuurun fa te tla, ṭih hlah uh. Ziangahtile, nan hnenih uknak lo pek cu nan Pai lungawi zawng a si. ³³ Nan neih mipawl tla zuar uh la miretheipawl hnenah bawmnak thilpek pe uh. A hlun thei lo mi paisa bawm nanmai hrangah tuah uh. Nan hlawnthil cu cemral theilonak hmun, rukrupawl thlen theilonak hmun le tlap ih a siatsuah theilonak hmun vancung ah ret uh. ³⁴ Ziangahtile, nan hlawnthil umnak ah nan thinlung khal a um ve ding. ³⁵ “Hnaṭuan dingih tiar cia bangin nan puan taiveng uh la, nan meito tla alhter ringring uh. ³⁶ An pu cu nupi ṭhitnak puai ihsin a ra tlung ih, sangka a king tikah awng lohli dingih a hngaktupawl vekin um uh. ³⁷ An pu a rat tikah rak hngak ringring ih a hmuh mi siahhlawhpawl cu mihualvanṭha an si. Thungai thu ka lo sim, anih cu a puan a veng ding ih, rawl ei dingin a toter hai hnuah amah rori a ra ding ih, rawl a pe hai ding. ³⁸ Zan sentari kil ṭum hnihnak ah simaw, ṭum thumnak ah simaw, an pu rat hngak ringring ih a hmuaktu siahhlawhpawl cu mihualvanṭha an si. ³⁹ Asinan, hihi thei uh, intekpa in rukru rat ding can kha rak thei sehla cu a ralring ding ih, rukru cu a inn sungah a lutter lo ding. ⁴⁰ Curuangah, nannih khal tiar ringring uh. Ziangahtile, nan rin lo canah Minung Fapa cu a ra ding,” tiah a ti. ⁴¹ Cule Peter in a hnenah, “Bawipa, hi tahṭhimnak hi kanmah vial lawng maw in sim, asilole mi hmuahhmuah?” tiah a sut. ⁴² Cu tikah Bawipa in, “A pu in a sumkiltu dingih a ret mi, a tikcu teih an co ding mi rawl petu ding sumkiltu rinsan tlak le fim cu zo so a si? ⁴³ A pu a rat tikah a ṭuan ding mi hna ṭuan reroih a hmuh mi siahhlawh cu mihualvanṭha a si. ⁴⁴ Thungai thu ka lo sim, cui sal cu a pu in a thilri neih mi hmuahhmuah uktu ah a ret ding. ⁴⁵ Asinan cui siahhlawh in a thinlungtein, ‘Ka pu cu a ra cing lo ding,’ tiah a ti. Cule sal dangpawl mipa si seh, nunau si seh vuak a thawk ih ei le in le ri in a um. ⁴⁶ Cui siahhlawhpai pu cu a rin lo ni le a theih lo canah a ra ding. Cule a pu cun a salpa cu tan hnih ah a sattan ding ih zumlotupawlih co vek a coter ding. ⁴⁷ “A pu-ih duhzawng a thei ko nan rak timlamaw lo le a pu-ih duhzawng a tuahlotu siahhlawh cu vei tampi vuak a si ding. ⁴⁸ Asinan, theilopiin vuak tlak mi thil a tuahtu cu malte lawng vuak a si ding. Ziangahtile, zokhal tampi pek a si mi pa cu tampi dil a si ding. Cule tampi an kilter mi pa cu tampi an dil ding. ⁴⁹ “Leitlun ah meisa thla dingin ka ra. Rak alh thawk zo sehla ka va duh tak em! ⁵⁰ Baptisma co ding mi pakhat ka nei. Cu mi tifel a si hlan sung cu ka thaw a pit tuk! ⁵¹ Leitlun ah remnak thlen dingih ra ah in ruat maw? Ka lo sim a si, a si lamlam lo. Ṭhenawknak thlen dingah a si sawn. ⁵² Ziangahtile, tuisi thawkin inn pakhat ih um minung panga cu an ṭhenaw ding. Pathum in pahnih an dokalh ding ih pahnih in pathum an dokalh ding. ⁵³ Pa in a fapa a do dingih, fapa in a pa a do ding. Nu in a fanu a do dingih, fanu in a nu a do ding. Ni in a mo a do dingih, mo in a ni a do ding,” tiah a ti. ⁵⁴ Cule Jesu in mipi hnenah, “Nitlaknak lam ihsin khawdur a rat nan hmuh tikah, ‘Ruah a sur ding,’ tiah nan ti lohli. Cule a sur ngaingai. ⁵⁵ Cule thlang lam ihsin thli a hung hran nan hmuh tikah, ‘Ni a sa ding,’ nan ti ih a sa ngaingai. ⁵⁶ Nannih midepdepawl! Nannih in lei le van langdan cu nan theithiam. Asinan ziangah saw tui can hi nan theihthiam lo. ⁵⁷ “A si, ziangruangah nanmah roriin a dik mi cu nan ṭhen mai lo. ⁵⁸ Na doralpa thawn thuṭhentu hnenih nan feh laiah lam lakah amah thawi remawk na ti theipatawp suah in zuam aw. Cu lo asile na doralpa cun thuṭhentu hmaiah a lo dir ding ih, thuṭhentupa in a kut hnuai bawi hnenah a lo thlen ding. Cule anih in thawnginn sungah a lo khum ding. ⁵⁹ Ka lo sim a si, lepton tiang na pek ṭheh thluh lai hlanlo cu tawk ihsin ziangti lam khalin na suak lo ding,” tiah a ti.

¹ Galili mipawl in raithawinak an hlan laiah Pilat in a that hai tiih Jesui hnenih simtu mi hrekkhat culai fangah an rak um. ² Cule Jesu in a sang hai ih an hnenah, “Cui Galili mipawl in cuvek tla an tuar ruangah a dang Galili mipawl hmuahhmuah hnakin an sual sawn tiah nan ruat maw si? ³ Ka lo sim a si, an sual sawn cuang hrimhrim lo. Asinan nannih khal nan sual nan sir lo asile cutivekin nan zaten nan hloral thluh ding. ⁴ Siloam ih dawlsang in minung hleiriat a nen ih an thi. Cupawl cu Jerusalem ih a um mi hmuahhmuah hnakin an sual sawn a si tiah nan ruat maw si? ⁵ Ka lo sim a si, an sual sawn cuang hrimhrim lo. Asinan nannih khal nan sual nan sir lo asile cutivekin nan zaten nan hloral thluh ding,” tiah a ti. ⁶ Jesu in an hnenah hi tahṭhimnak khal a sim, “Mi pakhat in a sabit hmuan sungah thei kung pakhat a phun. Cui thei kung lamah cun a va feh ih a parah cun a rah a hawl. Cule a rah zianghman a hmu lo. ⁷ Cu tikah anih in a hmuan kiltupa hnenah, ‘Zoh hnik, kum thum sung rori hi thei kung ah a rah ka hawl ih, zianghman ka hmu lo. Hau men aw. Ziangah saw leiram a luah lak men?’ tiah a ti. ⁸ “Cule hmuan kiltupa in a sang ih a hnenah, ‘Bawipa, tui kumte cu zuah hrih ko aw. A kimvelin ka lai ding ih ekdawm ka burh hrih ding. ⁹ Rah a rah khal a si men thei. Rah a rah lo thotho asile nehhnuah na hau ding,’ ” tiah a ti. ¹⁰ Cule Sabbath Ni ah sinakok pakhat ah Jesu cu thu a zirh. ¹¹ Cule, ngai hnik, nunau pakhat kum hleiriat sung ṭawnṭaihnak thlarau in a ngawrter mi a um. Cu nu cu a el tla a kun ih dingten a um thei hrimhrim lo. ¹² Jesu in cu nu a hmuh tikah a hnenah a ko ih, “Nunaunu, na natnak ihsin thlah na si,” tiah a ti. ¹³ Cu nui parah a kut a suang ih hmakhatteah dingten a um thei ih, Pathian a thangṭhat. ¹⁴ Jesu in Sabbath Ni ah mi a damter ruangah sinakok uktupa cu a thin a heng ih mipi hnenah, “Minung hrangah hnaṭuannak ding ni ruk a um. Curuangah cu mi sungah ra uh la damawter uh. Sabbath Ni ah cun si hlah seh,” tiah a ti. ¹⁵ Cu tikah Bawipa in a sang ih a hnenah, “Nang, midepde! Nan zatein Sabbath Ni ah nan caw le nan laak pawl an rawl einak ihsin phawih in ti pe dingin nan hruai ciar a si lo maw? ¹⁶ Cule, ngai hnik, Abraham-ih tesinfa hi nunaunu cu Setan in kum hleiriat sung a ṭawnhrem a si. Sabbath Ni ah cu nu cu cui ṭemṭawnnak ihsin phawihsak a si lo ding maw?” tiah a ti. ¹⁷ Himi thupawl a sim ṭheh tikah, amah dodaltu hmuahhmuah cu an ning a zak. Cule mi hmuahhmuah cu thil ropi a tuah mipawl hmuahhmuah ah an lung a awi. ¹⁸ Cule Jesu in, “Pathian uknak cu ziang thawn a bangaw? Ziang thawn ka khaikhin ding? ¹⁹ Mi pakhat in a lak ih a lo sungih a vawrh mi anṭam ci pakhat thawn a bangaw. Cui ci cu a ṭhang ih, buk tumpi ah a cang. Cule tlunzuang vatepawl tla a hngeṭekpawl ah an riak,” tiah a ti. ²⁰ Cule Jesu in a simsal ih, “Pathian uknak cu ziang thawn ka khaikhin pei? ²¹ Vancung uknak cu nunau pakhat in thilnu keng tahratin sangphut saton thum sungah a phum ih, cui thilnu in sangphut hmuahhmuah a thawhter vek a si,” tiah a ti. ²² Jesu cu Jerusalem lam panin a feh laiah khawpi le khawte pawl tla a pal phah ih thu a zirh phah vivo. ²³ Cule mi pakhat in a hnenah, “Bawipa, mi malte lawng maw rundam an si ding?” tiah a sut. ²⁴ Cu tikah, Jesu in an hnenah, “A fiak mi kawtka ihsin luh ding zuam uh. Asinan, ka lo sim a si, ‘Ziangahtile, mi tampi in lut dingin an hawl ding nan an lut thei lo ding.’ ²⁵ Intekpa cu vei khat a tho ih, sangka a khar hnuah, nannih cun leng lamih din le king nan thawk ding ih, ‘Bawipa, Bawipa, sangka in rak awn aw,’ tiah nan ti ding. Cule anih in nan hnenah, ‘Khui lam ihsi ra mi nan si ti ka lo thei hai lo,’ tiah a lo sang ding. ²⁶ Cu tikah nannih in, ‘Na hnenah kan ei ih, kan in zo, nang in kan lamzinpawl tla ah in rak zirh,’ tiah nan ti ding. ²⁷ Asinan anih in, ‘Ka lo sim a si, khui lam mi nan si ti ka lo thei lo. Nannih ṭhatlonak a tuahtupawl ka hnen ihsin tlan uh,’ tiah a lo ti ding. ²⁸ Nannihpawl cu a lengah hlawnhlo nan si ding ih, Abraham, Isak, Jakob le profetpawl hmuahhmuah kha Pathian uknak sungih an um kha nan hmu lai ding. Cu tikah nan ṭap ding ih, nan hacang nan rial ding. ²⁹ Cule annih cu ni suah, ni tlak, sak lam le thlang lam ihsin an ra ding ih, Pathian uknak ah an to ding. ³⁰ Cule, ngai hnik, a netabik a si mipawl hi a hmaisabik an si ding ih, a hmaisabik a si mipawl hi a netabik an si ding,” tiah a ti. ³¹ Cui ni ah Farasi hrekkhatpawl Jesu hnenah an ra ih, “Hi tawk ihsin fehhlo aw. Ziangahtile, Herod in lo thah a duh, hi tawk hmun hi suahsan aw,” tiah an ti. ³² Jesu in an hnenah, “Va feh uh la khaih sihal kha va sim uh, ‘Ngai hnik, tuisun le thaisun cu khawsepawl ka dawisuak ding ih, minapawl tla ka damter lai ding. Cule a ni thumnak ah ka hnaṭuan cu ka ṭhehfel ding a ti,’ tiah va sim uh. ³³ Sikhalsehla, tuisun, thaisun le tipsun cu ka feh vivo lai ding. Ziangahtile, Jerusalem khaw lengih profet thih ding cu thil cang thei a si lo. ³⁴ “Maw Jerusalem, Jerusalem, profetpawl na that ih na hnenih Pathian in a thlah mipawl cu lungto in na dengthat! Arpi in a fatepawl a thla thuaiih a awp vekin na falepawl cu vei ziangzat meng so lo khawmsak ka rak tum. Asinan na rak duh lo! ³⁵ Ngai hnik! Nan inn cu ṭhing reprepin tlansan a si. Thungai thu ka lo sim, ‘ BAWIPAI hmin ih a ratu cu thangṭhat in um seh,’ tiih nan ti lai hlanlo tuisi thawkin in hmu nawn hrimhrim lo ding,” tiah a ti.

¹ Cule, hiti hin a rak si, Sabbath Ni ah Jesu cu Farasipawl lakih mipawimawh pakhatih inn ah rawl ei dingin a feh. Cule Danthiampawl le Farasipawl cun Jesu cu an thlir ringring. ² Cule, ngai hnik, mithlingpa pakhat cu Jesui hmaiah a rak um. ³ Cule, Jesu in Danthiampawl le Farasipawl hnenah, “Sabbath Ni ah mi damter Dan in a siang maw?” tiah a sut hai. ⁴ Cupawl cu daiten an rak um. Cule cu pa cu a vun kai ih a damter hnuah a fehter. ⁵ Cun, Jesu in an hnenah, “Nanmai lakah nan laak asilole nan cawcang cu Sabbath Ni ah khur sungah tla sehla a suah lohli lotu ding nan um maw?” tiah a sut hai. ⁶ Cule cui thu ah zianghman an sawn thei lo. ⁷ Sawm mipawl in tonak ṭhabikbik an hril ti Jesu in a hmuh tikah an hnenah hi tahṭhimnak hi a sim, ⁸ “Mi pakhatkhat in mo lawmnak puai ih a lo sawm tikah tonak ṭhabik ah va to hlah uh. Ziangahtile, nangmah hnakih mithupisawn tla a rak sawm a si thei. ⁹ Nan pahnih a lo sawmtu intekpa khan nan hnenah ra tahratin, ‘Hi pa hi na tonak rak kian aw,’ a lo ti asile a niambik tonak ah ningzak zetin na ṭhawn leh ding. ¹⁰ Asinan an lo sawm tikah feh aw la, tonak niambik ah to aw. Cutiih na um asile nangmah a lo sawmtupa a rat tikah, ‘Ka rual tonak ṭhadeuh ah hung to aw,’ tiah a lo ti ding. Cu tikah na rawl hilpipawl hmaiah upatnak na co ding. ¹¹ Ziangahtile, zokhal amah le amah a cawisangawtu cu niamter a si ding ih, amah le amah hnuai a dawrtu cu cawisan a si ding,” tiah a ti. ¹² Cule Jesu in amah sawmtu pai hnen khalah cun, “Thaithawh si seh, zanriah si seh na do tikah na rualpipawl, na unaupawl, na sungkhatpawl, na inhnen milianpawl kha va sawm hlah. Cutiih na sawm asile annih khalin an lo sawm ve leh ding ih an lo rul leh ding. ¹³ Asinan, rawl ei puai na tuah tikah miretheipawl, piangsualpawl, kebaipawl le mitcawpawl kha va sawm hai aw. ¹⁴ Annihpawl cun an lo rulhsal thei lo ding ruangah nang cu mihualvanṭha na si. Ziangahtile, midingfelpawl an thawhsal tikah nang cu rulhsal na si leh ding,” tiah a ti. ¹⁵ Cui thu cu rawl einak hmun ih Jesu thawi a to ve mi pa pakhat in a theih tikah Jesui hnenah cun, “Pathian uknak sungih rawl a eitu ding cu mihualvanṭha a si,” tiah a ti. ¹⁶ Asinan Jesu in cu pai hnenah, “Mi pakhat in zanriah ropi a timtuah ih, mi tampi a rak sawm. ¹⁷ Zanriah ei a cut tikah a rak sawm cia mipawl hnenah a siahhlawhpa a hei thlah, ‘Ra thlang uh, ziangkim tiar cia thluh a si zo,’ tiah a sim hai. ¹⁸ “An zaten lungkhat pu in puhmawh ding tuah an thawk. A pakhatnak in a hnenah, ‘Lo ka rak lei ih, va feh ih ka va zoh a ṭul. I ngaithiam dingin ka lo dil a si,’ tiah a ti. ¹⁹ “A dang pakhat in, ‘Cawcang hal nga ka rak lei ih, cupawl hniksak dingah ka fehta ding, i ngaithiam dingin ka lo dil a si,’ tiah a ti. ²⁰ “Cule a dang pakhat in, ‘Nupi ka rak ṭhi ih, curuangah ka ra thei lo ding,’ tiah a ti. ²¹ “Cui siahhlawhpa cu a kir ih, cui thupawl cu a bawipai hnenah a sim. Cu tikah intekpa cu a thin a heng ih a siahhlawh hnenah, ‘Zamrang zetin khaw sungih lamzinpipawl ah le inlak zinpawl ah va feh aw la, miretheipawl, mipiangsualpawl, kebaipawl le mitcawpawl cu hi tawkah rak hruai hai aw,’ tiah a fial. ²² “Cule cui siahhlawhpa cun, ‘Bawipa na thupek vekin ka tuah ṭheh zo. Asinan hmun lawng a um hrih lai,’ tiah a ti. ²³ “Cu tikah, a bawipa in a siahhlawhpai hnenah, ‘Khaw leng zalam zinpi le lo zinpawl ah va feh aw la, ka inn a khah theinak dingah hranhramin mi ratter aw. ²⁴ Ziangahtile, ka lo sim a si, ka rak sawm cia mipawl pakhat hmanin ka zanriah an tep lo ding,’ a ti,” tiah a sim. ²⁵ Mipi tam zetin Jesu cu an thlun vivo laiah an lamah Jesu cu a her ih an hnenah, ²⁶ “Zokhal ka hnenih ra cun a nu le a pa, a nupi le a fatepawl, a unaupawl le a farnulepawl, cuitlunah amai nunnak khal a huat lo a si ah cun ka dungthluntu a si thei lo. ²⁷ Cule zokhal amai khraws pu lo ih i thluntu cu ka dungthluntu a si thei lo. ²⁸ “Nanmah lakah pakhatkhat in dawlsang sak a duh asile a hmaisabikah tota in cu mi sak ṭhehnak dingah a daih a nei maw, nei lo tiin a man a tuakta a si lo maw? ²⁹ Cutiih a tuah lo asile lungphum a phum hnuah a sak ṭheh thei lo ding. Cule a hmutu hmuahhmuah in cu pa cu nautat an thawk dingih, ³⁰ ‘Hi pa hin dawlsang a hei thawk ve nan a ṭheh thei lo a si hi,’ tiah an ti ding. ³¹ “Asilole siangpahrang pakhat cu a dang siangpahrang do ding a tum asile minung thawngkul thawn amah do dingih a ratu siangpahrang cu minung thawnghra thawn a rak do thei ding le thei lo ding to hmaisaih ruatta loin a um ding maw? ³² A do thei lo asile cui siangpahrang cu hlapi ih a um laiah remawknak dil dingah palai a thlah ding a si. ³³ Cutivek thothoin nannih lakah zokhal a neih mi hmuahhmuah a tantalotu cu ka dungthluntu a si thei lo ding. ³⁴ “Cite cu a ṭha. Asinan cite in a alnak hlohta hnik sehla ziangtin al ko nan tuahsal thei ding? ³⁵ Leiram hrangah si seh, ekdawm hrangah si seh a ṭha lo. Mi in an hlawn men. Theih theinak hna a neitu cun thei seh!” tiah Jesu in a ti.

¹ Cule siahkhawngtupawl hmuahhmuah le misualpawl cu a thu ngaithla dingin Jesui kiangah an ra. ² Cu tikah Farasipawl le Danzirhtupawl cu an phunzai ruri ih, “Hi pa hin misualpawl a cohlang ih an hnenah rawl tla a ei a si,” tiah an ti. ³ Cule Jesu in an hnenah hi tahṭhimnak thu hi a sim, ⁴ “Nanmah lakah mi pakhat in tuu zakhat a nei ih, cu mi lakih pakhat cu hlo bang sehla, tuu sawmkua le pakua cu ramṭhing ah tanta in a hlo mi tuu pakhat cu a hmuh lai hlanlo a feh ding ih a hawl lo ding maw? ⁵ A hmuh tikah a lung a awi ngaingai ih a liang parah a suang. ⁶ Cule a inn a va thlen tikah a rualpipawl le a inhnenpawl kokhawm tahratin an hnenah, ‘I lungawipi uh. Ziangahtile, a hlo mi ka tuu cu ka hmu zo,’ tiah a ti. ⁷ Nan hnenah ka lo sim, cutivekin sual sir a ṭul lo mi midingfel sawmkua le pakua hnakin sual a sir mi misual pakhat parah vancung ah lungawinak a tamsawn ding a si. ⁸ “Asilole, nunau pakhat in darakma pahra nei in pakhat hloter sehla meito vang tahratin a inn a phiat ding ih a hmuhsal hlanlo ngunngaih zetin a hawl lo ding maw? ⁹ Cule, a hmuh tikah, a rualpipawl le a inhnenpawl a kokhawm ih, ‘I lungawipi uh, ziangahtile ka hlohter mi darakma kha ka hmusal zo a si,’ tiah a ti. ¹⁰ Nan hnenah ka lo sim, cutivek thothoin a sirawtu misual pakhat ruangah Pathian vancungmipawl umnak ah hlimnak a um a si,” tiah a ti. ¹¹ Cule Jesu in hitin a sim, “Mi pakhat in fapa pahnih a nei. ¹² A nautadeuh in a pai hnenah, ‘Ka pa ka co ding mi rothilpawl kha i pe aw,’ tiah a ti. Curuangah an pa cun a rothil hmuahhmuah cu a ṭhen ih a fapa pahnihte cu a zem hai. ¹³ “Cule ni reilo teah a fapa nautasawn cun a thilri neih mi hmuahhmuah cu a khawm ih ram hlapi ah a feh. A lennak cu cu tawk ram ah a duhduhin a hmangral ṭheh. ¹⁴ A neih mi hmuahhmuah a hman ṭheh hnuah cui ram ah pam nasazet a tlung ih tlaksam a thawk. ¹⁵ Cu tikah, cui ram mi mi pakhat hnenah a hna ṭuansak dingah a feh ih, cu pa cun a lo ah vawk rawl petu dingah a hei kuat. ¹⁶ Vawk rawl thawi pum puarawkter a duh nan zohman in rawl an pe lo. ¹⁷ “A hun theihfiangawk tikah, ‘Ka pai san mi hlawhfa tampipawl cun ei cawk loin rawl an nei. Hi tawkah kei cu rilrawng in ka thi ding! ¹⁸ Ka tho pei ih ka pai hnenah ka feh ding. Cule a hnenah, “Ka pa, kei cu van le na parah ka sual zo. ¹⁹ Na fapa tiih kawh ding khalah ka tlak nawn lo. Na san mi hlawhfapawl vekin i tuah aw,” tiah ka va ti pei,’ tin a ruat. ²⁰ “Cule a tho ih a pai hnenah cun a feh. Asinan lam hlapi ih a rat rero lai kha a pa in a hei hmuh tikah a lainat tukih a va tlan. A fapa-ih hngawng in a pawm ih a hnam. ²¹ Cule a fapa in a hnenah, ‘Ka pa, van le na parah ka sual zo. Na fapa tiih kawh ding ka tlak nawn lo,’ tiah a ti. ²² “Asinan a pa in a siahhlawhpawl hnenah, ‘Puan ṭhabik rak keng uh la sinter uh. Zunghruk hrukter uh la kedam hrukter uh. ²³ Cawm thau mi cawpa note kha rak hruai uh la that uh. Cule kan ei ding ih, kan nuamaw ding. ²⁴ Ziangahtile, hi ka fapa cu a thi zo nan a nungsal a si. A hlo zo nan, atu ka hmusal zo,’ tiah a ti. Cule nawmawknak cu tuah an thawk. ²⁵ “A fapa upasawn cu lo ah a rak um. Lo ihsin a ra ih, inn kiang a ra thlen tikah awnmawi thawmvang le lam thawmvang tla a thei. ²⁶ Cu tikah hnenum pakhat a ko ih, ‘Cucu ziang a si?’ tiah a sut. ²⁷ Cule acui hnenum cun a hnenah, ‘Na naupa a ratlungsal zo. Damte le himtei a ra thlensal thei ruangah na pa in cawm thau mi cawpa note a thah,’ tiah a sim. ²⁸ “Fapa upasawn cu a thin a heng tukih inn sungah a lut duh lo. Curuangah a pa cu lengah a va suak ih, inn sungih rung lut dingin a lem. ²⁹ Cule anih in a sang ih a pai hnenah, ‘Ngai hnik, kum hiti zat ka lo rian ih, na thupek mi vei khat hman ka pahbal dah lo. Asinan ka rualpipawl thawn kan nawmawk venak dingah mepa note pakhat khal i rak pe dah lo. ³⁰ Asinan hlawhhlangpawl thawn kawmaw in na rothilpawl thehral thluhtu himi na fapa a ra tlunkir veten cawm thau mi cawpa note a hrangah na thahsak,’ tiah a ti. ³¹ “A pa cun a hnenah, ‘Ka fapa, nang cu ka hnenah na um ringring ih ka neih mi hmuahhmuah hi nangmai ta a si. ³² Asinan na naupa cu a thi ih a nungsal; a hlo ih, kan hmusal. Curuangah lungawi ih nawmawknak tuah hi a dik hrimhrim a si,’ a ti.”

¹ Jesu in a dungthluntupawl hnenah, “Milian pakhat in sumkiltu pakhat a nei. Cui sumkiltu cun na thilri a dendarh men a si tiah milianpai hnenah an hek. ² Cule a sumkiltu cu a ko ih a hnenah, ‘Na thuhla ka theih mi hi ziangtin a si? Sumkiltu na si thei nawn lo ding ruangah na sumkilnak cazin i pe aw,’ tiah a ti. ³ “Cu tikah sumkiltu cun a thinlung sungin, ‘Ka Bawipa in ka hnaṭuan ihsin i banter ding ruangah ziang ka tuah pei? Leilung ka lai thei si lo, kutdawh ding le ka ning a zak fawn. ⁴ Sumkiltu sinak ihsin banter ka si tikah an innpawl ih in cohlan theinak dingah ziang ka tuah ding ti ka thei,’ tiah a ti. ⁵ “Curuangah a bawipai hnenih leiba neitu hmuahhmuah cu a hnenah a kokhawm hai ih a pakhatnak pai hnenah, ‘Ka bawipai hnenah ziang zat leiba na nei?’ tiah a sut. ⁶ “Cule cu pa in, ‘Hriak bath zakhat,’ tiah a ti. Sumkiltupa in, ‘Na leiba cazin cu rak keng in rung to aw la, sawmnga tiin ngan lohli aw,’ tiah a ti. ⁷ “Cun, sumkiltupa cun a dang pakhat hnenah, ‘Nang teh ziang zat na bak?’ tiah a sut. Cule anih in, ‘Sangvut kor zakhat,’ tiah a ti. Cule sumkiltupa cun a hnenah, na leiba cazin cu rak keng aw la, sawmriat tiin ngan aw,’ tiah a ti. ⁸ “Cui sumkiltu diklopa cu fim zetih thil a ti ruangah a bawipa in a fak. Ziangahtile, hi leitlun mipawl cu anmai sanah cun tleu fatepawl hnakin an fimsawn a si,” tiah a ti. ⁹ Cule Jesu in, ‘Nan hnenah ka lo sim a si, nan sumpai a cem tikah, kumkhaw cennak hmun sungih lo cohlangtu ding rualpi nan neih theinak dingah leitlun sumsaw in rualpi tuah uh. ¹⁰ “Thil fatebik parih rinumtu cu thil tampi parah a rinum a si. Cule thil fatebik parih a diklotu cu thil tampi par khalah a diklo. ¹¹ Curuangah leitlun sumsaw par hmanah nan rinum lo asile lennak taktak cu zo in nan hnenah a lo ap ding? ¹² Cun, midang thilri parih nan rinum lo asile nanmai ta cu zo in so a lo pe ding? ¹³ “Siahhlawh zohman in bawi pahnih a riankawp thei lo. Ziangahtile, pakhat a hua ding ih pakhat a duh ding asilole pakhat parah rinum tahratin pakhat deuh cu a hmuhsuam ding. Pathian le sumpai nan riankawp thei lo,” tiah a ti. ¹⁴ Sumpai duhtu Farasipawl khalin cui thupawl hmuahhmuah cu an theih tikah Jesu cu an hnihsan. ¹⁵ Cule Jesu in an hnenah, “Nannih cu minung hmaiih mah le mah midingfel vekih umawterpawl nan si. Asinan Pathian in nan thinlung a thei. Ziangahtile, minung in thupi ih an ruah mi cu Pathian mithmuh ah cun fihnungza a si. ¹⁶ “John a ra thlen tiang Dan thupawl le profetpawlih thu cu phuan a si. John san thawk ihsin Pathian uknak thu cu phuan a si ih, mi kipin cui Pathian uknak sungah cun thahrum suah in an lut. ¹⁷ Dan sungih ngan mi thai khatte hlohral hnakin lei le van hlohral a awlsawn. ¹⁸ “Zokhal nupi ma ih midang ṭhitu cu uire a si. Cule zokhal a pasal ih mak mi nu a ṭhitu cu a uire ve a si. ¹⁹ “Milian pakhat cu puan sendup le puannem pate sin in ni tin nuam zetin a nung. ²⁰ A taksa pumpuluk hmasia thawi a khat mi kutdawh pakhat, Lazaras an ti mi pa cu a kawtka ah an ret. ²¹ Cui milianpai rawl einak cabuai par ihsin a tla mi rawl ṭilfuan cu ei a hiar zet. Cuitlunah uicopawl an ra ih a hmasiapawl tla cu an liahsak. ²² “Cule hiti hin a rak si, cui kutdawhpa cu a thi ih, vancungmipawl in Abraham-ih ṭang sungah an hruai. Milianpa khal cu a thi ve ih an phum. ²³ Mithikhua ah cun tuarnak rapthlak zet tuar phahin van lam a hun zoh ih hla zetah Abraham le a ṭang sungih Lazaras kha a hun hmu. ²⁴ Cule, a au ih, ‘Ka pa, Abraham! Ka parah zahngai hram aw la, Lazaras kha a mehtawk zim ti ah hnim ih ka lei daihter theinak dingah thlah aw. Ziangahtile, hi meialh sungah hin ka tuar a na tuk a si,’ tiah a ti. ²⁵ “Asinan Abraham in, ‘Ka fapa, nang cu na nun laiah na thil ṭhapawl na rak co zo zia le cutivek thothoin Lazaras in thil ṭha lopawl a rak cozia kha cing aw. Cule atu ah anih cu hnem a si ih, nang cu tam zet na tuar rero a si. ²⁶ Cupawl hmuahhmuah hleiah, kannih le nanmai karlakah a kau zet mi hawrkuam a um. Curuangah hi tawk hmun ihsin nan hnenih rat an duh khalle an ra thei lo. Kha tawk lam ihsin kan hnen lamih rat an duh khalle an ra thei lo,’ tiah a ti. ²⁷ “Cu tikah, milianpa cun, ‘Cuti asile ka pa, ka lo dil a si. Ka pai inn ah Lazaras kha hei thlah hram aw. ²⁸ Ziangahtile, unau panga ka nei. Hi tuarnak hmun ih an rat ve lonak dingah Lazaras khan ralrinnak va pe seh,’ tiah a ti. ²⁹ “Abraham in a hnenah, ‘Na unaupawl in Mawsi cabupawl le profetpawlih cabupawl tla an nei ko. An sim mi kha rak ngaithla hai seh,’ tiah a ti. ³⁰ “Sikhalsehla, milianpa cun, ‘A si lo, ka pa Abraham! Mithi hnen ihsin an hnenah pakhat a va feh asile an sual an sir ding,’ tiah a ti. ³¹ “Cule, Abraham in a hnenah, ‘Mawsi le profetpawlih thu an rak ngaithlak lo ah cun mithi lak ihsin mi pakhat thosal khal sehla an lung duh cuang lo ding,’ a ti,” tiah Jesu in a sim.

¹ Cule, Jesu in a dungthluntupawl hnenah, “Mi tlubahtertu thil cu ra thleng lo thei a si lo. Asinan cui tluknak rak kengtu cu a hmakhua a pit a si! ² Hi nauhaktepawl lakih pakhat a tlukter asile a hngawng ah riallung thlaih tahratin tifinriat sungah hlawn sehla a hrangah a ṭhasawn a si. ³ Fimkhur uh. Na unaupa in na parah thil a tisual asile kawk aw; a sual a sir asile amah cu ngaidam aw. ⁴ Cule na parah ni khat ah vei sarih thil a tisual ih, vei sarih rori na hnenah rakirsal in, ‘Ka sual ka sir,’ a ti a si ah cun amah cu na ngaidam ding a si,” tiah a ti. ⁵ Apostolpawl in Bawipai hnenah, “Kan zumnak pungter aw,” tiah an ti. ⁶ Cule Bawipa in, “Anṭam ci vek zumnak nan neih asile hi thingtheihmu kung hnenah, ‘Na hram thawn phawng aw la, tifinriat sungah va phunaw aw,’ nan ti ding ih nan thu a lo lung ding. ⁷ “Thuṭhimnakah nanmah lakih pakhatkhat in siahhlawh pakhat a nei ih, cui siahhlawh cun lei a let, asilole tuu a khal. Lo ihsin a ra tlun tikah, ‘Va feh lohli aw la, rawl ei aw,’ tiah zo in a ti ding. ⁸ A ti lo ding, cu hnakin, ‘Ka zanriah timtuah aw. Tiar cia in um aw la, ka ei ih ka in laiah i rian aw. Cu mi hnu lawngah na ei in na in leh ding,’ a ti sawn ding a si lo maw? ⁹ Cui siahhlawh cun a thupek mipawl a tuah ruangah a siahhlawhpai hnenah cun lungawithu a sim pei maw? A sim ding ka zum lo. ¹⁰ Cutivek thothoin thu ka lo pek mi hmuahhmuah nan tuah ṭheh tikah, ‘Kannih cu a tling lo mi sal kan si. Kan ṭuanvo lawng kan ṭuan a si,’ tiah ti uh,” tiah a sim. ¹¹ Cule, hiti hin a rak si, Jesu cu Jerusalem lamih a feh phahah Samaria peng le Galili peng ramri a paltlang. ¹² Khaw pakhat ih a luh tikah miphar pahrapawl in Jesu cu an rak hmuak ih hla nawnah an ding. ¹³ Cule, “Jesu, Hotupa, kan parah zahngai hram aw!’ tin an au. ¹⁴ Jesu in a hmuh hai tikah an hnenah, “Va feh uh la, puithiampawl hnenah nanmah le nanmah va hmuhaw uh,” tiah a ti. Cule hiti hin a rak si, an feh laifangah an phar nat cu a thiang. ¹⁵ Anmah lakih mi pakhat in a dam ti a hmuhawk tikah a kirsal ih aw ring zetin Pathian a thangṭhat. ¹⁶ Cu pa cu Jesui ke hramah a bawk ih, Jesui hnenah lungawithu a sim. Cu pa cu Samaria-mi a si. ¹⁷ Cule, Jesu in a sang ih, “Mi pahra thianter an si lo maw? A dang pakuapawl teh khuiah saw an si? ¹⁸ Hi ram dang mi siarlo zohman Pathian thangṭhat dingah an rakir lo,” tiah a ti. ¹⁹ Cule Jesu in a hnenah, “Tho aw la, feh aw. Na zumnak in a lo damter zo,” tiah a ti. ²⁰ Pathian uknak cu ziang tikah a ra thleng ding? tiah Farasipawl in Jesu an sut. Cule anih in a sang hai ih an hnenah, “Pathian uknak cu hmuh theih in a ra lo. ²¹ ‘Ngai hnik, hi tawkah a um,’ asilole ‘Ngai hnik, khi tawkah a um khi,’ an ti lo ding. Ziangahtile, ngai hnik uh, Pathian uknak cu nan sungah a um a si,” tiah a ti. ²² Cule a dungthluntupawl hnenah, “Minung Fapa-ih ni, ni khat tal nan hmuh duh zet can a ra thleng leh ding. Asinan, cumi cu nan hmu lo ding. ²³ Cule annih in nan hnenah, ‘Hi tawkah zoh hnik!’ asilole ‘Khi tawkah zoh hnik!’ tiah an lo ti a si khalle feh hlah uh la, a thlun khal thlun hlah uh. ²⁴ Ziangahtile, nimthlakau van khatlam kap ihsin khatlam deng tiang a tletsuak vekin Minung Fapa-ih ni ah cun a si ve ding. ²⁵ Asinan anih cu thil tampi a tuar hmaisata ding ih, tui san minungpawl in an hnawng ding. ²⁶ “Noah san laiah a rak si vek khan Minung Fapa san khalah a si ve ding. ²⁷ Noah lawng sungah a luh ih, tilik a tlung ih, mi hmuahhmuah an hlohral lai hlanlo minungpawl cu an ei, an in, an ṭhiaw ih an hamaw. ²⁸ “Lot-ih san lai khalah cutivek thothoin a rak si. An ei an in, an lei, an zuar, an phun, inn an sak. ²⁹ Asinan Sodom khua ihsin Lot a suah ni ah van ihsin meisa le kat a sur ih, cumi cun an zaten a run that ṭheh. ³⁰ “Minung Fapa a runglang ni ah cun cutivek thothoin a si ding. ³¹ Cui ni ah inn parih um cun inn sungih a thilri la dingin rung ṭum hlah seh. Lo ih a umtu khal cutivekin a thilri la dingin tlungkir hlah seh. ³² Lot-ih nupi kha cing ringring uh. ³³ Zokhal a nunnak hum a duhtu cun a hloh ding. Zokhal a nunnak hlohtu cun a nunnak cu a humngah ding. ³⁴ Ka lo sim a si, cui zan ah ihkhun pakhat ah mi pahnih an ittlang ding. Pakhat cu lak a si ding ih, pakhat cu tanta a si ding. ³⁵ Nunau pahnih riallung an rialtlang ding. Pakhat cu lak a si ding ih, pakhat cu tanta a si ding. ³⁶ Mi pahnih cu lo ah an um ding. Pakhat lak a si ding ih a dang pakhat cu tanta a si ding,” tiah a ti. ³⁷ Dungthluntupawl cun an sang ih a hnenah, “Bawipa, cumi cu khui tawkah a si ding?” tiah an sut. Cu tikah Jesu in, “Mithi ruak umnak kipah mulukawlh an khawmaw ding,” tiah a ti hai.

¹ Cule Jesu in beidawng lo ih thla an cam ringringnak dingah an hnenah tahṭhimnak pakhat a sim. ² “Khaw pakhat ah Pathian ṭihzah lo le milai khal hmaizahnak nei lo thuṭhentu pakhat a rak um. ³ Cui khua ah cun nuhmei pakhat a um. Cu nu cu a hnenah a ra ih, ‘I dodaltu kha phulei i samsak aw,’ tiah a ti. ⁴ “Thuṭhentupa cun can reipi sung acui thu cu a relsak duh lo. Asinan cui hnuah thuṭhentupa cun a thinlung sungin, ‘Pathian ṭihzahnak ka nei lo ih minung hmaizahnak khal ka nei lo. ⁵ Asinan, hi nuhmeinu hin i ra hnaihnawk ruangah phulei ka samsak ding. Cu lo asile a ra ringring ding ih i bangter ding,’ tiah a ruat,” tiah a sim. ⁶ Cule Bawipa in, “Thuṭhentu diklopai sim mi hi ngaithla hnik uh. ⁷ Annih cu reipi rak ngaithlaksak menmen khal sehla, Pathian amah roriih hril mipawl in a hnenah a sun a zan an au asile phulei samsak loin a um ding maw? ⁸ Ka lo sim a si, zamrang zetin phulei a samsak ding. Sikhalsehla Minung Fapa a rat tikah leitlun ah zumnak a hmu pei maw?” tiah a ti. ⁹ Jesu in hi tahṭhimnak hi mah le mah dingfel ih zumhngehnak neitu le midang hmuhsuamtupawl hnenah a sim. ¹⁰ “Mi pahnih cu thla cam dingin temple kulh sungah an feh. Pakhat cu Farasi a si ih, a dang pakhat cu siahkhawngtu a si. ¹¹ Farasipa cu amahte in a ding ih hitin thla a cam, ‘Maw Pathian, kei cu midangpawl vekin mi thil lawng, midiklo le uire mi ka si lo ruangah le hi siahkhawngtu vek ka si lo ruangah na hnenah lungawithu ka lo sim. ¹² Zarh khat ah vei hnih rawl ka ul ih ka ngah mi hmuahhmuah sung ihsin ṭhenhra ṭhenkhat ka pe,’ tiah a ti. ¹³ “Asinan siahkhawngtupa cu hlat nawnah a ding ih, van lam hman hawih ngam loin a ṭang a cumaw ih, ‘Maw Pathian, kei misual parah hin zahngai hram aw,’ tiah a ti. ¹⁴ “Ka lo sim a si, cu pa cu Farasipa hnakin Pathian in thiam a coh sawn ih a inn ah a tlung. Ziangahtile, zokhal mah le mah khaisangawtu cu niamter a si ding ih, zokhal mah le mah tang a dawrtu cu khaisan a si ding,” tiah a ti. ¹⁵ Jesui tham dingah nautepawl tla a hnenih an rak hruai kha a dungthluntupawl in an hmuh tikah an rak kawk. ¹⁶ Asinan, Jesu in nauhaktepawl a hnenah a ko hai ih, “Nauhaktepawl kha ka hnenih rat siang uh la kham hlah uh. Ziangahtile, Pathian uknak cu hivek mipawlih ta a si. ¹⁷ Thungai thu ka lo sim, ‘Zokhal nauhakte in Pathian uknak a cohlan vekih a cohlanglotu cu cui uknak sungah a lut hrimhrim lo ding,’ ” tiah a ti. ¹⁸ Uktu pakhat in Jesu kha, “Zirhtu ṭha, kumkhawnunnak co dingah ziang ka tuah pei?” tiah a sut. ¹⁹ Cule Jesu in a hnenah, “Ziangah kei cu miṭha i ti? Pathian siarlo zohman miṭha an um lo. ²⁰ Thupekpawl na thei ko a si lo maw: ‘Uire hlah,’ ‘Mi that hlah,’ ‘Rukru hlah,’ ‘A diklo mi theihpinak pe hlah,’ ‘Na nu le na pa upat aw,’ tipawl tla an si kha,” tiah a ti. ²¹ Cu tikah cu pa in, “Ka no lai ihsin hi thupekpawl hmuahhmuah cu ka rak thlun zo,” tiah a ti. ²² Cumi cu Jesu in a theih tikah a hnenah, “Thil pakhat na sam hrih lai. Na neih mi hmuahhmuah zuar ṭheh aw la, na ngah mi tangka kha miretheipawl zem aw. Cutin, vanram ah hlawnthil na nei ding. Cule ra aw la, i thlun aw,” tiah a ti. ²³ Asinan cui thu a theih tikah a riah a se zet. Ziangahtile, cu pa cu milian zet a si. ²⁴ Jesu in a riah a se zet ti a hmuh tikah, “Milianpawl Pathian uknak sungih luh cu a har zet a si. ²⁵ Pathian uknak sungih milian luh hnakin ṭhim hnakua sungih kalauk luh a awlsawn,” tiah a ti. ²⁶ Cui thu a theitupawl in, “Cuti asile zo so rundam si thei ding?” tiah an ti. ²⁷ Cule Jesu in, “Minung hrangih thil cang thei lo mipawl tla, Pathian hrangah cun a cang thei a si,” tiah a ti. ²⁸ Cule Peter in, “Ngai hnik, ziang hmuahhmuah tanta in nangmah kan lo thlun,” tiah a ti. ²⁹ Cu tikah Jesu in an hnenah, “Thungai thu ka lo sim, zokhal a inn si seh, a nu le a pa si seh, a unau si seh, a nupi si seh, a falepawl si seh Pathian uknak ruangih a tlansantu cun, ³⁰ ttui canah a let tampi hlawknak a ngah ding ih, a ra thleng lai ding mi sanah kumkhawnunnak a ngah ding,” tiah a ti. ³¹ Jesu in a dungthluntu hleihnihpawl kha a hnenah a hruai hai ih an hnenah, “Ngai hnik uh, Jerusalem ah kan hung feh ding. Cule, profetpawl in Minung Fapa-ih thuhla an rak ngan mipawl hmuahhmuah kha a kim ṭheh ding. ³² Ziangahtile, Minung Fapa cu Zentelpawl kut ah thlen a si ding ih, annih in hnihsuahsainak ah an hmang ding, an hmuhsuam ding ih, cil an phui ding. ³³ An vaw ding ih an that ding. Cule a ni thumnak ah a thosal ding,” tiah a ti. ³⁴ Cui thupawl cu a dungthluntu hleihnihpawl in pakhat hman an theithiam lo. Cui thupawl cu an hnen ihsin thuh a si ih, a ṭawng mipawl ziang a si ti khal an thei lo. ³⁵ Cule, hiti hin a rak si, Jesu cu Jeriko khua a thlen zik zawngah mitcaw pakhat cu lamzin kapah a to ih kut a dawh. ³⁶ Cui mitcawpa in mi tampi feh thawm a theih tikah, “Cucu ziang a si?” tiah a sut. ³⁷ Cule annih in, “Nazareth Jesu a feh a si,” tiah an sim. ³⁸ Cu pa cun, “David fapa, Jesu ka parah zahngai hram aw,” tiah a au. ³⁹ Cu tikah, hmaiih a fehtupawl in cu pa cu daitei um dingin an rak kawk. Asinan anih cun, “David fapa, ka parah zahngai hram aw!” tiah a au nasa sinsin. ⁴⁰ Jesu cu a ding ih cu pa cu a hnenih rak hruai dingin thu a pe. A kiang a ra thlen tikah Jesu in thu a sut, ⁴¹ “Ziang lo tuahsak ding na duh?” tiah a sut. Cule anih in, “Bawipa, khawhmuh ka duh,” tiah a ti. ⁴² Cule Jesu in a hnenah, “Khua hmu aw, na zumnak in a lo damter zo,” tiah a ti. ⁴³ Cu pa cu hmakhatteah khua a hmu ih, Pathian thangṭhat phahin Jesu cu a thlun. Cumi cu mi hmuahhmuah in an hmuh tikah Pathian an thangṭhat.

¹ Jesu cu Jeriko khaw sungah a lut ih a feh lan vivo. ² Cule, ngai hnik, cu tawkah a hmin Zakia an ti mi pa a rak um. Amah cu siahkhawngtupawl hotu a si ih, milian zet a si. ³ Jesu cu zo a si ti hmuh a duh nan mi an tam tuk ruangah a hmu thei lo. Ziangahtile, Zakia cu pa niamte a si. ⁴ Curuangah Jesu ih a zawh ding lamzin ah hmai lamah a rak tlan cia ih, Jesu hmu dingin thei kung parah a rak kai. ⁵ Cu tawk hmun ih Jesu a thlen tikah tlun lam a hun zoh ih, Zakia cu a hmu. Cule a hnenah, “Zakia, zamrang in rung ṭum aw. Ziangahtile, tuisun na inn ah ka thleng ding,” tiah a ti. ⁶ Cule Zakia cu zamrang zetin a rung ṭum ih lungawi zetin Jesu cu a cohlang. ⁷ Cumi cu mipi in an hmuh tikah an zaten an phunzai ih, “Misualpai hnenih thleng dingin a rak feh zo khi,” tiah an ti. ⁸ Cule, Zakia cu a ding ih Bawipai hnenah cun, “Zoh hnik, Bawipa, ka neih mi thilri ih a hrek cu miretheipawl ka pe ding. Cun, zawi hnen ihsi khalin ziangkhal diklo ih ka rak lak asile a let li in ka rulsal ding,” tiah a ti. ⁹ Cule, Jesu in a hnenah, “Tuisun ah hi inn ah rundamnak a thleng zo. Ziangahtile, hi pa khal hi Abraham-ih tesinfa a si ve. ¹⁰ Ziangahtile, Minung Fapa cu a hlo mipawl hawl ding le run dingah a ra a si,” tiah a ti. ¹¹ Cui thupawl an rak ngaithlak laiah Jesu in a bet ih, tahṭhimnak pakhat a sim. Ziangahtile, amah cu Jerusalem a naih thlang ih, mipi in Pathian uknak cu hmakhatteah a lang ding tiah an ruat. ¹² Curuangah anih in, “Bawi pakhat cu ram hlapi ah amai hrangah uknak va cohlang tahratin ra tlungkirsal dingin a feh. ¹³ Cule a siahhlawh pahrapawl tla a ko hai ih, mina khat hrawng fingfing a pe hai. Cule an hnenah, ‘Ka rakirsal hlanlo himi tangka thawn sum rak dawng uh,’ tiah a ti. ¹⁴ “Asinan cui bawi cu amai ram sung mipawl in an hua ih, ‘Hi pa ih in uk ding cu kan duh lo,’ tiah a simtu ding palai a dangin an hei thlah. ¹⁵ “Cule hiti hin a rak si, cui bawi cun uknak cohlangngah in a ra tlunkirsal tikah tangka a rak pek mi a siahhlawhpawl khan an sumdawnnak in ziang zat ciar an rak ngah ti theih duh ah a hnenih ko dingin thu a pe. ¹⁶ “A pakhatnak pa cu a hnenah a ra ih, ‘Bawipa, mina khat i pek mi in a dang mina hra a hlep ka ngah,’ tiah a ti. ¹⁷ “Acui bawi cun a hnenah, ‘Na tiṭha riai, nang cu siahhlawh ṭha na si. Thil fa te zet parih na rinum ruangah khaw hra tlunah thuneihnak na nei ding,’ tiah a ti. ¹⁸ “Cule a pahnihnak pa a ra ih, ‘Bawipa, mina khat i pek mi in a dang mina nga a hlep ka ngah,’ tiah a ti. ¹⁹ “Cu pai hnen khalah acui bawi cun, ‘Nang khal khaw nga na uk ding,’ tiah a ti. ²⁰ “Cun, a dang pakhat a ra ih, ‘Bawipa, ngai hnik, hi tawkah na mina a um. Pavua in ka tuam ih ka ret ṭha. ²¹ Nang cu mitikherkher na si ruangah ka lo ṭih. Na rak ret lo mi na lasuak ih, na tuh lo mi na at,’ tiah a ti. ²² “Cule cui bawi cun a hnenah, ‘Nang cu siahhlawh ṭha lo na si. Nangmai ṭawng mi in thu ka lo ṭhen ding. Mitikherkher ka si ih ka rak ret lo mi ka lasuak, ka tuh lo mi ka at ti na thei. ²³ Cuti asile ziangruangah ka tangka cu paisa retnak hmun ih na rak ret lo? Rak retta cila cu ka ra tlunkirsal tikah ka tangka cu a ṭhang thawn ka rak la ding nan,’ tiah a ti. ²⁴ “Cule cui bawi cun a kiangih a ding mipawl hnenah, ‘A hnen ihsin mina khat cu la uh la mina hra neitupai hnenah pe uh,’ tiah a ti. ²⁵ Cule annih in a hnenah, ‘Bawipa, anih cun mina hra a nei zo si!’ tiah an ti. ²⁶ ‘Ka lo sim a si, thil a neitu kip cu pekbet an si ding. A neilotu cu a neihsunte hman a hnen ihsin laksak a si ding. ²⁷ Asinan ka uk ding a duhlotu ka doralpawl cu hi tawkah rak hruai uh la ka hmaiah hin that uh,’ a ti,” tiah Jesu in a sim. ²⁸ Jesu in hi thu a sim hnuah a dungthluntupawl hmaiah Jerusalem lam panin a feh. ²⁹ Cule hiti hin a rak si, Jesu cu Olif Tlang kiang, Betfat khaw kiang le Bethany khaw kiang a thlen tikah a dungthluntu pahnih a hei thlah ih, ³⁰ an hnenah, “Nan hmaiih khua ah khin va feh uh. Cu tawkih nan va luh tikah zohman ih to dah lo mi laak note an hren mi nan hmu ding. A hri phawih uh la rak hruai uh. ³¹ Mi pakhatkhat in, ‘Ziangah nan phawih?’ tiah a lo suh asile, ‘Bawipa in a hai,’ tiah va ti uh,” tiah a ti. ³² Cutin a thlah mi pahnihte cu an feh ih, Jesu ih a sim vek cekci in ziangkim cu an va hmu. ³³ Laak note cu an phawih rero laiah a neitupawl in, “Ziangruangah laak note cu nan phawih?” tiah an ti. ³⁴ Cu tikah annih in, “Bawipa in a hai,” tiah an ti. ³⁵ Cule laak note cu Jesui hnenah an hei hruai ih a parah an puan tla an rak phah. Cule a parah Jesu cu an toter. ³⁶ Cutiih a feh laiah a fehnak lamzin ah cun mipi in an puanpawl an phah vivo. ³⁷ Olif Tlang ihsin a suknak zawn an thlen tikah a dungthluntu mi burpi zaten lungawi an thawk. Cule an rak hmuh zo mi huham ih tuah mi thilpawl hmuahhmuah ruangah aw ring zetin Pathian an thangṭhat. ³⁸ “ BAWIPAI hmin ih a ratu Siangpahrang cu thangṭhat in um seh, vancung ah daihnak um sehla cungnungbik ah thangṭhatnak um ko seh,” tiah an ti. ³⁹ Cule mi burpi lakih Farasi hrekkhatpawl in Jesui hnenah, “Zirhtupa, na dungthluntupawl hi kawk hai aw,” tiah an ti. ⁴⁰ Cule Jesu in an hnenah, “Ka lo sim a si, hipawl daitei an um asile hmakhatteah lungtopawl an ausuak ding,” tiah a sang hai. ⁴¹ Jerusalem khawpi kiang a thlen tikah khua cu a hei zoh ih a ṭah, ⁴² “Tuini nangmai ni talah hin na hrangih daihnak a lo tuahsaktu thilpawl hi thei aw la, maw! Asinan cupawl cu na mithmuh ihsin thuh an rak si zo. ⁴³ Ziangahtile, na ralpawl in na kimvelah ralkulh tuah in an lo kulh ding ih hmun kip ihsin an lo kharhkhum can a ra thleng ding. ⁴⁴ Nangmah le na phar kulh sungih a um mi na falepawl leilung ah an lo thlu ding. Cule na hnenah lungto pakhat parah a dang pakhat suangaw in an tan lo ding. Ziangahtile, Pathian in a lo vehvaih can na rak theih lo ruangah a si,” tiah a ti. ⁴⁵ Cun Jesu cu temple sungah a lut ih, temple kulh sungih thilzuarpawl le leitupawl dawisuah a thawk. ⁴⁶ An hnenah, “Cathianghlim sungah, ‘Ka inn cu thlacamnak inn a si,’ tiah ngan a si. Asinan nannih in suamhmangpawl umnak puk ah nan can a si,” tiah a ti. ⁴⁷ Ni tinten Jesu cun temple kulh sungah thu a zirh. Asinan puithiam sangpawl, Danzirhtupawl le mipi hruaitupawl in Jesu thah theidan ding an hawl. ⁴⁸ Asinan, mi hmuahhmuah in a thusim mi ṭha tukih an ngaithlak ruangah a tidan ding zianghman an hmu thei lo.

¹ Cule hiti hin a rak si, ni khat cu Jesu in temple kulh sungah mipipawl kha thu a zirh ih, thuthangṭha a sim rero. Cu laiah puithiam sangpawl le Danzirhtupawl cu miupapawl thawn a hnenah an ra. ² Cule a hnenah, “In sim hnik, ziang thuneihnak in hi thilpawl hi na tuah? Hi thuneihnak na hnenih lo petu cu zo a si?” tiah an ti. ³ Cu tikah, anih in a sang hai ih an hnenah, “Kei khalin thu pakhat ka lo sut ve ding ih in sang uh, ⁴ ‘John-ih baptisma kha van lam ihsin maw, minung hnen ihsin a si?’ ” tiah a sawn hai. ⁵ Cumi cu anmah ten an relkhawm ih, “‘Van ihsin a si,’ kan ti asile, ‘Cuti asile ziangah amah cu nan zum lo,’ in ti ding. ⁶ ‘Minung hnen ihsin a si,’ kan ti asile mi hmuahhmuah in lungto in in deng ding. Ziangahtile, John cu profet a si tiah an zumhngeh mi a si fawn si,” tiah an tiaw. ⁷ Cule annih in, “Khui lam ihsin a si ti kan thei lo,” tiah an sawn. ⁸ Jesu in an hnenah, “Kei khalin ziang thuneihnak in hi thilpawl ka tuah ti ka lo sim ve lo ding,” tiah a ti hai. ⁹ Cule Jesu in hi tahṭhimnak hi mipi hnenah sim a thawk, “Mi pakhat in sabit hmuan a tuah. Cui a sabit hmuan cu hmuan ṭuanhlawh a duhtupawl hnenah a peta ih, ram hlapi ah reipi khualtlawng in a feh. ¹⁰ Cule sabit rah lawh a cut tikah hmuan ṭuanhlawhtupawl in sabit rah hrekkhat tla an pek dingah a siahhlawh pakhat cu an hnenah a hei thlah. Asinan hmuan ṭuanhlawhtupawl in cu pa cu an vuak ih a kut lawngin an thlah. ¹¹ Cun, siahhlawh dang pakhat a thlahsal. Asinan cu pa khal cu an vuak ih, mualpho ningzak ih an tuah hnuah kut lawngin an thlah lala. ¹² A pathumnak a thlahsal. Cu pa khal cu an rak tuahmawh ih an rak dawisuak thotho. ¹³ “Cu tikah, sabit hmuan neitupa cun, ‘Ziangtin ka tuah pei? Ka duhdawt mi ka fapa hi ka hei thlah ding ih, amah an hmuh tikah an ṭihzah ko ding,’ tiah a ti. ¹⁴ “Asinan hmuan ṭuanhlawhtupawl in a fapa cu an rak hmuh tikah, pakhat le pakhat an relkhawm ih, ‘Hi pa hi ro cotupa a si, ra uh, kan that ding ih a ro co ding mi cu kan ta a si ding,’ tiah an tiaw. ¹⁵ Cutin sabit hmuan lengah an hlawn ih an rak that. Cuti asile sabit hmuan neitupa in hmuan ṭuanhlawhtupawl parah ziang a tuah pei? ¹⁶ A ra ding ih hmuan ṭuanhlawhtupawl cu a that ding ih a sabit hmuan cu hmuan ṭuanhlawhtu dang hnenah a pe ding a si,” tiah a ti. Cumi cu mipi in an theih tikah, “Cuvek cu thleng hrimhrim hlah seh!” tiah an ti. ¹⁷ Jesu in anmah cu a zoh hai ih, “Cathianghlim sungih, ‘Inn saktupawl ih an hnawn mi lung cu a kilih lung pawimawhbik ah a cang,’ tiah ngan mi kha a sullam ziang a si? ¹⁸ “Zokhal cui lung parih a tlatu cu a kekkuai ding ih, cui lung ih a tlakngah mi cu leivut vekin a cip neknek thluh ding,” tiah a ti. ¹⁹ Culai fangah puithiam sangpawl le Danzirhtupawl in Jesu kaihdan ding lamzin an hawl. Ziangahtile, hi tahṭhimnak cu anmah ṭawngsan a si ti an theih ruangah a si. Asinan mipi an ṭih. ²⁰ Hruaitupawl in Jesu cu an bawh ringring. Amai ṭawng mi ih awk dingin le amah cu ram uktu-ih uknak le thuneihnak ih an thlen theinak dingah midik vekih umawter thlingthlatupawl an hei thlah. ²¹ Cule thlingthlatupawl in Jesu cu, “Zirhtupa, nang cun minung mithmai zoh loin dik zetin thu na sim ih na zirh. Pathian lamzin cu thutak a sinak vekin na zirh ti kan thei. ²² Kaisar hnenih ngunkhuai pek hi Dan in a siang maw, siang lo?” tiah an sut. ²³ Asinan Jesu in an mi bumnak cu a thei. Cule an hnenah, “Ziangah in hniksak rero? ²⁴ Dinari paisa cu i rak hmuh hnik uh. Hihi zo-ih zuk a si ih ziang a nganaw?” tiah a sut hai. Cule annih in, “Kaisar-ih zuk le hmin,” tiah an sang. ²⁵ Cule Jesu in an hnenah, “Kaisar-ih tapawl cu Kaisar hnenah pe uh la, Pathian-ih tapawl cu Pathian hnenah pe uh,” tiah a ti. ²⁶ Mipi hmaiih a ṭawng mi in Jesu cu an awk thei hrimhrim lo. A thu lehnak ah an mang a bang zet ih, daiten an um. ²⁷ Thawhsalnak a um lo titu Sadusi mi hrekkhat cu Jesu hnenah an ra ih thu an sut, ²⁸ “Zirhtupa, Mawsi in kan hrangah hitin a rak ngan, ‘Mi pakhat cu nupi a nei ih, fate nei loin a thih asile a nupi cu a naupa in a ṭhi pei ih a u hrangah ci a thlahsak pei,’ tiah a ti. ²⁹ Cuti asile unau pasarih an rak um. Upabik in nupi a ṭhi ih, fate nei loin a thi. ³⁰ Cule a pahnihnak pa in cu nu cu a ṭhi ih, fa nei loin a thi ve. ³¹ A pathumnak ihsin a pasarihnak tiang cutivek thothoin cu nu cu an run ṭhi vivo nan fate nei loin an thi ṭheh. ³² Cule netabikah cu nu khal a thi ve. ³³ Cuti a si ruangah thawhsalnak ah cu nu cu zo bikih nupi a si ding? Ziangahtile, an pasarihten cu nu cu nupi ah an nei cio fawn si,” tiah an ti. ³⁴ Cule Jesu in a sang ih an hnenah, “Tui san minungpawl cu an ṭhiaw ih, ṭhitumnak khal an tuah. ³⁵ Asinan, a ra thleng lai ding mi san le mithi lak ihsin thawhsalnak co tlak ih ruah mipawl cu an ṭhiaw lo ding ih, ṭhitawknak khal a um nawn lo ding. ³⁶ An thi thei nawn lo ding. Ziangahtile, vancungmipawl thawn an bangaw ding. Annih cu thawhsalnak fate an si ruangah Pathian fate an si. ³⁷ Mithipawl an thosal ti cu Mawsi khalin Bawipa kha Abraham-ih Pathian, Isak-ih Pathian, Jakob-ih Pathian tiin thingbuk ih a kawhnak khan a langter zo. ³⁸ Ziangahtile, anih cu mithipawlih Pathian si loin a nung mipawlih Pathian a si. Ziangahtile, amah ah cun mi hmuahhmuah cu an nung thluh a si,” tiah a ti. ³⁹ Danzirhtu mi hrekkhatpawl in, “Zirhtupa, ṭha zetin na ṭawng a si,” tiah an sawn. ⁴⁰ Cui hnu cun ziang thu hman an sut ngam nawn hrimhrim lo. ⁴¹ Jesu in an hnenah, “Ziangtin saw Khrih cu David-ih fapa, tiah mi in an ti thei? ⁴² Ziangahtile, David amah roriin Sam cazual sungah, ‘BAWIPA in ka Bawipai hnenah, “Ka vawrh lam kapah to aw, ⁴³ na ralpawl tla na kepal ih ka retngah hlanlo cu,” ’ tiah a ti. ⁴⁴ “Cutiih David in Khrih cu Bawipa tin a kawh asile ziangtin amah cu David-ih Fapa a si thei ding?” tiah a ti. ⁴⁵ Mi hmuahhmuah in a thu an ngaithlak laiah Jesu in a dungthluntupawl hnenah, ⁴⁶ “Danzirhtupawl khi va ralring uh. Annih cu an kawrfualpi thawi tawihvah le dawr tluanah mi ih upatnak pek ding an ngaina. Sinakok sungah tonak pawimawhbik ah to an duh ih, puai hmun ah hmun sangbik an duh. ⁴⁷ Nuhmeipawlih inn an lawngih, mi bumnak ah rei zetzet thla an camawter. Hipawl hin thuṭhennak nasasawn an tuar ding,” tiah a ti.

¹ Cule Jesu in a hun zoh ih milianpawl in thawhhlawm bawm sungih an thawhhlawm an thlak lai kha a hmu. ² Nuhmei rethei pakhat in lepton pahnih a thlak mi cu a hei hmu. ³ Cule Jesu in, “Thungai thu ka lo sim, hi nuhmei retheinu hin midang hmuahhmuah hnakin a thla tamsawn a si. ⁴ Ziangahtile, hipawl hmuahhmuah tla cun an neih hleifuan lawng Pathian thawhhlawm ah an thla. Asinan anih cun a retheihnak sung ihsin a nunnak dingih a neih mi zaten a thla a si,” tiah a ti. ⁵ Mi hrekkhatpawl in temple thuhla ah lungto mawi zetzet le thilpekpawl thawn an ceimawizia thupawl tla an rel. ⁶ Cu tikah Jesu in, “Nan hmuh mi thilpawl tla hi lungto pakhat parih lungto suangaw mi pakhat hman tang loin hlawn ṭheh an si leh ding,” tiah a ti. ⁷ Cule annih in Jesu cu an sut ih, “Zirhtupa, cui thilpawl cu ziang tikah a thleng ding? Cui thilpawl a ra thlen zik tikah ziang hminsinnak a um ding?” tiah an ti. ⁸ Jesu cun, “Zohman ih an lo bumlonak dingah va ralring uh. Ziangahtile, ka hmin in mi tampi an ra ding ih, ‘Keimah hi Khrih ka si,’ tiin le, ‘A can khal a nai zo,’ tiah an ti ding. Cu tikah an dung va thlun hlah uh. ⁹ Raldoawknak thupawl le uknak cuhbuaiawknak thupawl nan theih tikah ṭih hlah uh. Ziangahtile, cui thilpawl tla cu a ra thleng hmaisa ding. Asinan, a cemnetnak cu a thleng lohli lo ding,” tiah a ti. ¹⁰ Cule anih in an hnenah, “Miphun pakhat in a dang miphun pakhat a do ding ih, ram pakhat in a dang ram pakhat a do ding. ¹¹ Cun, hmun dangdang ah ling nasazetin a hnin dingih, hmun dangdang ah pam tla a tlung dingih, hremnak tla a suak ding. Cule van ihsin thil ṭihnungpawl le hminsinnak rapthlak taktak tla a lang ding. ¹² “Asinan, cui thilpawl hmuahhmuah tla a thlen hlanah an lo kai ding ih, an lo tiduhdah ding. Sinakok le thawng sungah an lo thlen ding. Ka hmin ruangah siangpahrangpawl le uktupawl hmaiah an lo hruai ding. ¹³ Cumi cun nan hrangah an hnenih thutheitu sinak can remcang a lo pe ding. ¹⁴ Curuangah ziangtin kan sang ding tiih ruat cia lo dingin nan thinlung hngetter uh. ¹⁵ Ziangahtile, nan ralpawl in an lo dodal ih an lo el neh theilonak dingah ṭawng thiamnak le fimnak ka lo pe ding. ¹⁶ Nan nu le nan pa, nan unaupawl le nan sungkhatpawl le nan rualpipawl in an lo phiarsawm ding ih, mi hrekkhat tla cu an lo that ding. ¹⁷ Cule ka hmin ruangah mi hmuahhmuah in an lo hua ding. ¹⁸ Sikhalsehla, nan lu parih samphang pakhat hman a hloral hrimhrim lo ding. ¹⁹ Tuarfainak in nan nunnak nan kilhim ding. ²⁰ “Ralkappawl in Jerusalem an kulh nan hmuh tikah a siatnak a nai a si ti thei uh. ²¹ Cu tikah Judia peng ih a um mipawl cu tlang parah tlan hai seh. Khaw sung ih a umtupawl khal tlansuak thluh hai seh. Cule khaw lengih a um mipawl cu khaw sungah lut hlah hai seh. ²² Ziangahtile, cui nipawl tla cu Cathianghlim ih a rak sim cia mi hmuahhmuah a tlamtlinnak phubalak ni a si. ²³ Cui canih favun mipawl le nausen hnawifawp neitupawl cu an hmakhua a pit ding. Ziangahtile, Judia ram ah harsatnak nasazet a thleng ding ih, cui minungpawl parah thinhengnak a thleng ding. ²⁴ Cule annih cu ralnam hriam in an tlu ding ih, miphun zakip hnenah sal ih hruai an si ding. Zentelpawl can a kim hlanlo Jerusalem khawpi cu an ke hnuaiah an palbet ding. ²⁵ “Ni, thlapi le arsipawl parah hminsinnakpawl an lang ding. Cule leilung tlunah miphun zakip cu khawruahhar thinpit in an um ding. Tifinriat hrum le tisuarpawl tlain mipi a buaiter ding. ²⁶ Leitlun ih a ra thleng ding mi thilpawl cu zoh in an ṭih ih, milai thinlung cu cak loin a um. Ziangahtile, van ih huhampawl tla an hnin ṭheh ding. ²⁷ Cu tikah Minung Fapa cu huham le ropitnak nasa zetzet thawn mero parih a rat an hmu ding. ²⁸ Cui thilpawl tla thlen a thawk tikah tlun lam zoh uh la, nan lu tla sangter uh. Ziangahtile, nan tlensalnak ni cu a nai a si,” tiah a ti. ²⁹ Cule Jesu in an hnenah tahṭhimnak pakhat a rak sim, “Theipi kung le thingkung hmuahhmuah tla khi zoh hnik uh. ³⁰ Hnah note an suah nan hmuh tikah ṭhal can a nai thlang ti nan thei. ³¹ Cuvekin cui thilpawl a ra thlen nan hmuh tikah Pathian uknak a nai a si ti thei uh. ³² “Thungai thu ka lo sim, cui thil hmuahhmuah a kim thluh lai hlanlo hi miphun hi a hloral hrimhrim lo ding. ³³ Lei le van cu an hloral ding, asinan ka thu cu a hloral hrimhrim lo ding. ³⁴ “Ralring uh. Nan parah cui ni cu rinlopiih a thlenlonak dingah zu hmun nawmcennak, zuritnak le himi nun hrang khawruahharnak in nan thinlung lo phurritter hlah seh. ³⁵ Ziangahtile, cui ni cu leilung tlunih um minungpawl hmuahhmuah parah thang vekin a thleng ding. ³⁶ Curuangah nannih cu a ra thleng ding mi cui thilpawl hmuahhmuah lak ihsin luat ding ih siar tlak nan si theinak dingah cat bang loin thla cam uh la hngak ringring uh,” tiah Jesu in a ti. ³⁷ Cui canah, sun ah Jesu in temple kulh sungah thu a zirh. Cule zan ah cun a suak ih, Olif Tlang tiih an kawh mi ah a va riak. ³⁸ Cule mi hmuahhmuah cu zingpit ah Jesui thu ngaithla dingin temple kulh sungah an ra.

¹ Lantapuai an ti mi thilnu tel lo sang puai cu a nai thlang. ² Puithiam sangpawl le Danzirhtupawl in mipi an ṭih ruangah Jesu thah thei dan ding lamzin an hawl. ³ Cu tikah dungthluntu hleihnih lakih a tel ve mi Judas Iskariot sungah Setan a lut. ⁴ Cule Judas cu puithiam sangpawl le temple kiltupawl hnenah a feh ih, ziangtin Jesu cu an hnenah a thlen thei ding ti thu a va rawn hai. ⁵ Cule annih cu an lung a awi zetih amah cu tangka pe dingin an lung a kim. ⁶ Judas khal a lung a kim ve. Cule mipi an um lo lai can teah Jesu phiarsawmdan ding can remcang a hawl. ⁷ Cule thilnu tel lo sang puai tuah sungah Lantapuai tuufano thah ni a rak thleng. ⁸ Cule Jesu in Peter le John kha a thlah ih an hnenah, “Va feh uh la, kan ei ding hrangah Lantarawl va timlam uh,” tiah a ti. ⁹ Annih in a hnenah, “Cumi cu khui tawkih kan timlam ding saw na duh?” tiah an sut. ¹⁰ Cu tikah anih in an hnenah, “Ngai hnik uh, khawpi sungih nan luh tikah tibel cawipa in a lo tawng ding ih, amah cu a luhnak inn tiang va thlun uh. ¹¹ Cule intekpai hnenah, ‘Zirhtupa in na hnenah, “Ka dungthluntupawl thawn Lantarawl ka einak ding mikhual pindan cu khui tawkah a si?” a lo ti,’ tiah va ti uh. ¹² Cule, intekpa in inn tlunta pindan tumpi, kan ṭul mi tinkim thawn a lo hmuh ding. Cu tawkah cun Lantarawl va timlam cia uh,” tiah a ti. ¹³ Dungthluntupawl cu an feh ih, Jesu ih a rak sim cia vek cekci in ziang hmuahhmuah cu an hmu ih, cu tawkah Lantarawl cu an timtuah. ¹⁴ A tikcu a kim tikah Jesu cu apostol hleihnihpawl thawn cabuai a kil. ¹⁵ Cule anih in an hnenah, “Ka tuar hlanah hi Lantarawl hi nanmah thawn eitlang ding hi ka rak duh zet. ¹⁶ Ziangahtile, nan hnenah ka lo sim a si, Pathian uknak sungah Lantapuai a tlamtlin lai hlanlo hi rawl hi ka eisal nawn lo ding,” tiah a ti. ¹⁷ Jesu in no cu a la ih, lungawithu a sim. Cule, “Hihi la uh la zemaw uh. ¹⁸ Ziangahtile, nan hnenah ka lo sim, Pathian uknak a ra thlen hlanlo sabitti cu ka in nawn hrimhrim lo ding,” tiah a ti. ¹⁹ Cun, sang a la ih, lungawithu a sim hnuah a phel ih a pe hai. Cule, “Himi hi nan hrangih ka pek mi ka taksapum a si. Keimah in cin ringringnak dingah himi hi run tuah uh,” tiah a ti. ²⁰ Cuvek thothoin zanriah an ei ṭheh hnuah no khal cu a la ih, “Hi no hi nan hrangih ka thlet mi ka thisen ih nemhngeh mi thuthlung thar a si. ²¹ Asinan, ngai hnik uh, keimah i phiarsawmtupai kut cu hi cabuai parah keimah thawn a um a si. ²² Pathian khawkhan cia mi vekin Minung Fapa cu a feh ko ding. Asinan Minung Fapa phiarsawmtupai hmakhua cu a pit a si!” tiah a ti. ²³ Cu tikah a dungthluntupawl cu an lakih zo bik in cumi cu a tuah ding tiah anmah le anmah lakah suhawk an thawk. ²⁴ Cun, dungthluntupawl lakah zo so mithupibik ih ruah ding a si, tiin anmai lakah an elaw rero. ²⁵ Cule Jesu in an hnenah, “Zentelpawlih siangpahrangpawl cu an uk mipawl parah an lal zet. Cutiih mipi parih thuneihnak neitupawl cu mibawmtupawl tiah an ko. ²⁶ Nannih lakah cun cutivekin si hlah seh. Nan lakih mithupibik cu nautasawn vekin um sehla, hruaitu a si mi cu riantu vekin um seh. ²⁷ Ziangahtile, rawl einak cabuai ih a totu maw, rawl zemtu a thupisawn? Cabuai ih rawl ei ih a totu a thupisawn a si lo maw? Asinan kei cu nan lakah riantu vekin ka um a si. ²⁸ Nannih cu sualfawrhnakpawl ka tawn canah ka hnenih a umtupawl nan si. ²⁹ Cun ka uknak dingah ka Pa in thuneihnak ka hnenih i rak pek zo vekin kei khalin nan uknak dingah nan hnenah thuneihnak ka lo pe ve. ³⁰ Ka uknak sungih ka cabuai ah nan ei ih nan in theinak dingah le laltohkhampawl parah to in Israel miphun hleihnihpawl tla thu nan ṭhen theinak dingah cui thuneihnak cu nan hnenah ka lo pe a si,” tiah a ti. ³¹ Cule Bawipa in, “Simon, Simon! Ngai hnik, Setan in sangvut thlei vekih lo thlei dingin nangmah lo neih a rak duh a si. ³² Asinan, na zumnak cak lo ih a umlonak dingah na hrangah thla ka cam. Cule ka hnen lamih na hawikirsal leh tikah na unaupawl hngetter aw,” tiah a ti. ³³ Simon in a hnenah, “Bawipa, nangmah thawn thawnginn sungah le thihnak khalah si seh feh dingin ka tiar a si,” tiah a ti. ³⁴ Cu tikah Jesu in, “Peter, ka lo sim a si, anih cu ka thei lo tiah, vei thum i phatsan hlanlo tuini ah ar a khuang hrimhrim lo ding,” tiah a ti. ³⁵ Cule Jesu in a dungthluntupawl hnenah, “Paisa bawm, zal le kedam keng lo ih ka lo thlah laiah khan ziang tal tlaksam mi nan nei maw?” tiah a sut hai. Cule, annih in, “Tlaksam mi zianghman kan nei lo,” tiah an ti. ³⁶ Curuangah, Jesu in an hnenah, “Atu cu paisa bawm neitu cun keng seh. Cuvek thothoin zal a neitu khalin keng seh, ralnam a neilotu cun a hnipuan zuar seh la ralnam lei seh. ³⁷ Ziangahtile, nan hnenah ka lo sim a si, Cathianghlim in, ‘Amah cu dan pahbaltupawl lakah an telhcih a si,’ tiih a ti mi cu keimah ah a tlamtlin a ṭul ding. Ziangahtile, ka cungcangthu cu a cemnetnak a thleng zikte thlang,” tiah a ti. ³⁸ Cule annih in, “Bawipa, zoh hnik, hi tawkah ralnam pahnih a um,” tiah an ti. Cu tikah anih in an hnenah, “Cucu a tawk a si,” tiah a ti. ³⁹ Jesu cu a fehsuak ih, a ti ṭheu dan vekin Olif Tlang parah a feh. A dungthluntupawl khalin amah cu an rak thlun ve. ⁴⁰ Cu tawk hmun a thlen tikah an hnenah, “Sualfawrhnak sungih nan luhlonak dingah thla cam uh,” tiah a ti. ⁴¹ Cule an hnen ihsin lung den ban tluk a hlatnak hmun ah a va feh ih a khukbil tahratin thla a cam. ⁴² “Ka Pa, na duh asile hi tuarnak no hi ka hnen ihsin lahlo hram aw. Asinan keimai duhnak vek si loin, nangmai duhnak vekin si ko seh,” tiah a ti. ⁴³ Cule van ihsin vancungmi pakhat cu a hnenah a runglang ih, Jesu cu tha a rung pe. ⁴⁴ A thin a har tuk ruangah nasa sinsinin thla a cam. Cule, a thlan cu nasazetih thisen leilung parih fawr mi vekin a fawr. ⁴⁵ A thlacamnak ihsin a tho ih a dungthluntupawl hnenah a va feh. Cu tikah an riahsiat ruangih an ihthah ṭheh kha a hmu. ⁴⁶ Cule an hnenah, “Ziangruangah nan itthat? Sualfawrhnak ih nan luhlonak dingah tho uh la thla cam uh,” tiah a ti. ⁴⁷ Cutiih Jesu a ṭawng rero laiah, ngai hnik, mi burpi cu an kiang nai teah an ra thleng. Hleihnih lakih pakhat Judas an ti mi pa in mi burpi cu a hruai hai ih, Jesu hnam dingin a hei pan. ⁴⁸ Asinan Jesu cun a hnenah, “Judas, Minung Fapa hi hnamnak in maw na phiarsawm?” tiah a ti. ⁴⁹ Jesui hnenih a um mi dungthluntupawl in ziang a cang ding ti an hmuh tikah a hnenah, “Bawipa, ralnam thawn kan do pei maw?” tiah an ti. ⁵⁰ Cule anmah lakih pakhat in puithiam lubikih siahhlawhpa cu a sat ih, a vawrh lam hna a sahthlak. ⁵¹ Cu tikah Jesu in a sang ih, “Tawk seh,” tiah a ti. Cule a hna cu a tham ih a damter. ⁵² Cule Jesu in a hnenih a ra mi puithiam sangpawl, temple kiltu bawipawl le miupapawl hnenah cun, “Suamhmang kai ding bangin ralnam le talhtum thawn maw nan rat? ⁵³ Temple kulh sungah ni tinten nan hnenah ka rak um nan in rak kai lo. Asinan, atu hi nanmai can le thim thuneihnak can a si,” tiah a ti. ⁵⁴ Cule Jesu cu an kai ih, puithiam lubikih inn sungah an hruai. Asinan Peter cun hlat nawnin a rak thlun. ⁵⁵ Tual laifangah meisa an tikih hmunkhat ah an tokhawm. Peter khal an lakah a rak to ve. ⁵⁶ Cutiih Peter meisa kiangih a to lai cu hnenumnu pakhat in a hmuh tikah ṭhaten a zohhliah ih, “Hi pa khal hi Jesui hnenih tel ve mi a si,” tiah a ti. ⁵⁷ Asinan Peter in, “Nunau, cu pa cu ka thei lo,” tiah a el. ⁵⁸ Cui hnu malte reiah a dang pakhat in Peter cu a hmu ih, “Nang khal an lakih mi pakhat na si ve,” tiah a ti. Cu tikah Peter cun, “Milaipa, ka si lo sokhaw!” tiah a ti. ⁵⁹ Cule nazi pakhat hrawng a rei hnuah a dang mi pakhat in, “Hi pa hi Jesui hnenih rak um ve mi rori a si. Ziangahtile, anih khal hi Galili peng ihsin a si,” tiah hngetkhoh zetin a ti. ⁶⁰ Cu tikah Peter in, “Milaipa, ziang na ṭawng ti ka thei lo!” tiah a ti. Cutiih a ṭawng rero laiah hmakhatteah ar a khuang. ⁶¹ Cule Bawipa cu a heraw ih, Peter cu a zoh. Cule Peter cun, “Ar a khuan hlanah nang in, ka thei lo, tiah vei thum i phatsan ding,” tiih Bawipa in a ti mi kha a vun mangsal. ⁶² Cule Peter cu lengah a suak ih nasazetin a ṭap. ⁶³ Cule, a kiltupawl in Jesu cu an hmuhsuam ih an thawng. ⁶⁴ A hmai an tuam hnuah a hmaiah an beng ih, “Profet vekin ṭawng hnik! A lo veltu hi zo a si?” tiah an ti. ⁶⁵ Amah dokalh in thangsiatnak a dang tampi khal an ṭawng. ⁶⁶ Khua a van veten miupapawl, puithiam sangpawl le Danzirhtupawl cu an tawngawkhawm ih, Jesu cu Sanhedrin ah an hruai ih, ⁶⁷ “Khrih na si maw, in sim hnik!” tiah an ti. Cule Jesu in an hnenah, “Ka lo sim asile nan zum hrimhrim lo ding. ⁶⁸ Thu ka lo suh asile ziangti lam khalin in sang lo ding ih in thlah cuang fawn lo ding. ⁶⁹ Atu thawk ihsin Minung Fapa cu Pathian-ih huham vawrh lamah a to thlang ding,” tiah a ti. ⁷⁰ Cu tikah an zaten, “Cuti asile Pathian Fapa na si maw?” tiah an ti. Cule anih in an hnenah, “Nan sim mi cu ka si ko,” tiah a ti. ⁷¹ Cule annih in, “Thu theihpitu dang kan ṭul nawn maw si? Ziangahtile, amai ṭawngkam rori kanmah roriin kan thei zo,” tiah an ti.

¹ Cule mipi an zaten an ding ih, Jesu cu Pilat hnenah an hruai. ² Jesu cu sual puh an thawk ih, “Hi pa hin ram mipipawl a hruaipeng ti kan hmu. Kaisar hnenih ngunkhuai pek ding a kham ih, amah le amah Siangpahrang Khrih ka si a tiaw,” tiah an ti. ³ Cule Pilat in a hnenah, “Jew-pawlih Siangpahrang na si maw?” tiah a sut. Jesu in a sang ih a hnenah, “Na sim vek khan a si ko,” tiah a ti. ⁴ Cu tikah Pilat in Puithiam sangpawl le mipi hnenah, “Hi pai mawhsualnak zianghman ka hmu lo,” tiah a ti. ⁵ Sihmansehla annih cun ṭan an la sinsin ih, “Hi pa hin Galili peng ihsin a thawk ih hi tawk hmun tiang, Judia peng hmuahhmuah ah thu a zirh ih, mipi a cawktho thluh,” tiah an ti. ⁶ Pilat in Galili ti mi hmin a theih tikah, hi pa hi Galili mi a si maw? tiah a sut. ⁷ Cule Pilat in Jesu cu Herod-ih thuneihnak sungih mi a si ti a theih tikah Herod hnenah a hei kuat. Culai fangah amah Herod rori cu Jerusalem khua ah a rak um. ⁸ Herod in Jesu a hmuh tikah a lung a awi zet. Ziangahtile, a thuhla tampi a rak thei zo ih, amah hmuh a duhnak a rei zo. Jesui tuah mi thilmak hrekkhat tal hmuh ding a rak duh. ⁹ Cu tikah, Herod in Jesu cu thu tam zet a sut nan zianghman a rak let lo. ¹⁰ Cule Puithiam sangpawl le Danzirhtupawl an ding ih nasazetin Jesu cu sual an puh. ¹¹ Jesu cu Herod le a ralkappawl in an hmuhsuam ih, hnihsuah sainak ah an hmang. Puan mawi zet an sinter ih, Pilat hnenah an kuatkirsal. ¹² Cui ni rori ah Herod le Pilat cu rualpi ah an cang. Ziangahtile, cui hlanah cun pakhat le pakhat doral an rak si. ¹³ Cule Pilat in puithiam sangpawl, mipi hruaitupawl le mipipawl cu a kokhawm. ¹⁴ Cule an hnenah, “Hi pa hi mipi hruaipengtu pakhat vekin sual nan puh ih ka hnenah nan rak hruai. Ngai hnik uh, nan hmaiah hi pa cu ka zingzawi fel zo. Asinan amah dokalh ih sual nan puhnak hmuahhmuah ah hi pai mawhsualnak pakhat hman ka hmu lo. ¹⁵ Herod khalin a hmu lo, a hnenah nanmah cu ka rak lo thlahsal kha. Cule, ngai hnik uh, anih khalin thihnak tlak Jesui tuah mi zianghman a hmu riai lo. ¹⁶ Curuangah amah cu ka hrem hnuah ka thlah ding,” tiah a ti. ¹⁷ Ziangahtile, cui Lantapuai ah Herod in mipi hnenah mi pakhatkhat a suah tengteng a ṭul. ¹⁸ Asinan mipi cu rual zetin an au ih, “Kha pa kha that aw la, Barabbas kha in suahsak aw,” tiah an ti. ¹⁹ Barabbas cu khawpi sungih helnak ih a tel vetu le lai a thah ruangih thawngthlak mi a si. ²⁰ Pilat in Jesu suah a duh ruangah mipi hnenah a simsal. ²¹ Asinan annih in, “Cu pa cu khengbet aw, khengbet aw!” tiah an au. ²² A vei thumnak Pilat in an hnenah, “Ziangruangah anih cu ka khengbet ding? Ziang thil ṭha lo tuah mi a nei? Amah ah thihnak tlak zianghman ka hmu lo. Curuangah amah cu ka hrem ding ih ka thlah ding,” tiah a ti. ²³ Asinan, mipi in aw ring zetin Jesu cu khengbet dingin nasazetin an dil. Mipi auaw le puithiam sangpawlih auaw tla cun a neh. ²⁴ Cule Pilat in an dil vekih tuah dingin thu a ṭhen. ²⁵ Helnak le lai thah ruangih thawng an thlak mi pa cu suahsak an duh vekin Pilat cun a suahsak hai. Asinan, an duhdan vekin Jesu cu an hnenah a pe. ²⁶ Cule, Jesu an hruai laiah Sairin ram mi Simon cu ram ihsin a rat kha an tawng ih an rak kaih. Cule Jesu ih dungah khraws an putter. ²⁷ Mi burpi in Jesu an thlun. Cupawl lakah awm cum tahratih Jesu a ṭah rerotu nunau hrekkhat an tel. ²⁸ Jesu cu an lamah a her ih, “Jerusalem fanuletla, ka hrangah ṭap hlah uh. Nanmah hrang le nan falepawl hrangah ṭap sawn uh. ²⁹ Ziangahtile, ngai hnik uh, ‘A cing mi cu mihualvanṭha a si, favun dah lo mi pum le naute ih fawh dah lo mi hnawi tla cu hualvanṭha an si,’ tiih an ti nipawl tla cu a thleng leh ding. ³⁰ Cu tikah mi in tlangpawl hnenah, ‘In nen uh,’ tiin le tlang fa tepawl hnenah, ‘In khuh uh,’ ti an thawk ding. ³¹ Ziangahtile, a hring mi thingkung hnenah hivek thilpawl tla an tuah asile a ro mi thingkung hnenah teh ziang an tuah pei?” tiah a ti. ³² A dang misualral pahnih khal that dingin Jesu thawn an hruai ve. ³³ Kalvary an ti mi hmun an va thlen tikah Jesu thawn cui misualral pahnih cu a vawrh lamah pakhat, a keh lamah pakhat tiin an khengbet. ³⁴ Cu tikah Jesu in, “Ka Pa, hipawl hi ngaidam aw. Ziangahtile, ziang an tuah ti an thei lo,” tiah a ti. Cule a hnipuan cu an ṭhen ih, camcawhfung zuk in an zemaw. ³⁵ Mipi cun ding in an zoh. Anmah thawn hruaitupawl khalin Jesu cu an nautat ve ih, “Midangpawl cu a run. Amah cu Pathian-ih hril mi Khrih asile amah le amah runaw seh,” tiah an ti. ³⁶ Cule ralkappawl khalin an hmuhsuam ve. Amah hnenah an feh ih, sabitti thur an pe. ³⁷ Cule, “Nangmah cu Jew-pawlih Siangpahrang na si le nangmah le nangmah runaw aw,” tiah an ti. ³⁸ A lu tlunah, “HI PA HI JEW-PAWLIH SIANGPAHRANG A SI,” tiah Grik ṭawng, Laṭin ṭawng le Hebru ṭawng pawlih ngan mi ca cu an tar. ³⁹ Cu tawkih an thlai mi misualral pahnih lakih pakhat in, “Nangmah cu Khrih na si le nangmah le nangmah runawaw la, cule kannih khal in run aw,” tiah Jesu cu a thangsiat. ⁴⁰ Asinan a dang pakhat in cu pa cu a sang ih a kawk, “Pathian na ṭih lo mawsi, hi pa thawi bangrep mi thuṭhennak na co hi? ⁴¹ Kannih cun kan thiltuah mi thawn milaw in kan tuar ih, dik zetin kan tuar a si. Asinan, hi pa cun thilsual zianghman a tuah lo,” tiah a ti. ⁴² Cule anih cun Jesui hnenah, “Bawipa na uknak ih na rat tikah i cing ringring hram aw maw!” tiah a ti. ⁴³ Cu tikah Jesu in a hnenah, “Thungai thu ka lo sim, tuini ah Paradise ah ka hnenah na um ding,” tiah a ti. ⁴⁴ Cui can cu sun nazi hleihnih hrawng a si ih, zan lam nazi pathum tiang leitlun hmuahhmuah ah thimkhawzing a tlung. ⁴⁵ Cule ni a thim. Temple hmun thianghlim sungih puanzar cu a laifangin a tlek. ⁴⁶ Jesu cu ring zetin a au ih, “Ka Pa, na kut sungah ka thlarau ka lo hlan,” tiah a ti. Cutiih a ti hnuah a thlarau a thlah. ⁴⁷ Cui canah, ralkap za hotu in thil cang mi a hmuh tikah Pathian a thangṭhat. Cule, “Hi pa cu midingfel rori a si,” tiah a ti. ⁴⁸ Cun, hi thil zoh dingih a rakhawmtu mipi zatein thil cang mipawl an hmuh tikah an awm an cum ih an tlungkir. ⁴⁹ Amah Jesu a theitu hmuahhmuah le Galili peng ihsin a thluntu nunaupawl tla cu hla nawn ah an ding ih, cui thilpawl cu an thlir. ⁵⁰ Cule, zoh hnik, cu tawkah cun Judia peng Arimathia khaw mi Joseph an ti mi pa a rak um. Amah cu khawnsil sungtel a si ih, miṭha le midingfel a si. ⁵¹ Anih cun khawnsil thu relcat mi le an thilti mi cu a lung a kim lo. Amah cu Pathian uknak rak hngaktu khal a si. ⁵² Cu pa cu Pilat hnenah a feh ih, Jesui ruang cu a va dil. ⁵³ Joseph in Jesui ruang cu a lathla ih puannem pate in a tuam. Cule zohman an phum dah lonak lungpi a virh mi thlan sungah a ruang cu a phum. ⁵⁴ Cui ni cu timlamawk ni a si ih, Sabbath Ni a thawk zikte. ⁵⁵ Galili peng ihsi Jesu thawi a ratlangtu nunaupawl khalin an thlun ih, thlan le Jesui ruang a retdan tla an hmu. ⁵⁶ Cule an tlungkir ih, rimhmui le hriak rimhmui pawl tla an timtuah. Cule thupek vekin Sabbath Ni cu an cawl.

¹ Zarh khat ih a hmaisabik ni zingthlapit khawfingcah zawngah cui nunaupawl cu a dang nunaupawl thawn an rak timtuah cia mi hriak rimhmuipawl tla keng in thlan ah an va feh. ² Lung cu thlan ihsin hrilh a rak si zo ti kha an hmu. ³ Cule, a sungah an vung lut ih, Bawipa Jesu-ih ruang cu an hmu lo. ⁴ Cule, hiti hin a rak si, cu mi ruangih khawruahhar zetih an um laiah, ngai hnik, mi pahnih cu hnipuan tleu hruh in an kiangah an rung ding. ⁵ Nunaupawl cun an ṭih tukih lei ah an bawk. Cu tikah mi pahnih cun, “Ziangah a nung mi cu mithi lakih nan hawl? ⁶ Anih cu hi tawkah a um lo, a tho zo sokhaw! Galili peng ih a um laiah nan hnenih a lo sim mi thu kha cing uh. ⁷ ‘Minung Fapa hi misualpawl kut sungah an pe ding ih an khengbet ding. Cule a ni thumnak ah a thosal ding,’ a ti kha,” tiah an ti. ⁸ Cule nunaupawl cun a ṭawng mi kha an vun mangsal. ⁹ Thlan ihsin an kirsal ih, cui thu hmuahhmuah cu apostol hleikhat hnenah le midang hmuahhmuah hnenah an sim. ¹⁰ Cui thu apostolpawl hnenih va simtu cu Mary Magdalin le Joana, James-ih nu Mary le an hnenih a rak um ve mi a dang nunaupawl tla an si. ¹¹ An sim mi thu cu apostolpawl in thulolakmen ah an ruat ih an rak zum lo. ¹² Asinan, Peter cu a ding ih, thlan ah cun a va tlan. Cule kun tahratin a vun zoh ih, puannem pate tan mi lawng a hmu. Cu tikah thil cang mi thu ah mangbang zetin inn ah a tlung. ¹³ Cule, ngai hnik, cui ni thothoah Jerusalem khawpi ihsin peng sarih hrawng a hla mi Emmaus ti mi khaw lamah an lakih mi pahnih cu an rak feh. ¹⁴ Acui thil cang mi hmuahhmuah cu an reltlang rero. ¹⁵ Cule hiti hin a rak si, cui thu cu an ṭawng ih an reltlang rero laiah Jesu amah roriin a hei naih hai ih an hnenah a feh ve. ¹⁶ Asinan, amah an theihthiamlonak dingah an mit cu huhsak an si. ¹⁷ Cule Jesu in an hnenah, “Feh phahih nan reltlang rero mi kha ziang thu saw a si? Ziangruangah mithmaisia zetin nan um?” tiah a sut hai. ¹⁸ An lakih mi pakhat Kleopas an ti mi pa in a sang ih a hnenah, “Jerusalem khua ah mikhual sisiin tunai teih cu tawkih thil cang mipawl a theilotu cu nangmah lawng hi maw na si?” tiah a ti. ¹⁹ Jesu in an hnenah, “Ziang thil maw?” tiah a ti. Cu tikah annih in a hnenah, “Nazareth Jesui thuhla, amah cu Pathian le minung hmuahhmuah hmaiah thilti ah le ṭawngkam ah a nasazet mi profet a si. ²⁰ Puithiam sangpawl le kan hruaitupawl in amah cu thah dingih thuṭhensak dingin an pe ih an rak khengbet. ²¹ Asinan kannih cun amah cu Israel tlentu ding a si tiah kan rak ruahsan. Cuipawl hmuahhmuah tlunah, tuisun cu cui thilpawl a cannak ih a ni thumnak a si. ²² Kan lakih nunau hrekkhatpawl in mangbang zet ko in tuah. Zingthlapitah thlan ah an va feh. ²³ Asinan a ruang an hmu lo. Cule an tlungkirsal ih, vancungmipawl laraw kan hmu. Annih in, amah cu a nung zo tiah in sim, tiah an ti. ²⁴ Cu tikah kan lakih mi hrekkhatpawl cu thlan ah an va feh ih, nunaupawl ih an sim mi vekin an va hmu. Asinan amah Jesu taktak cu an rak hmu lo,” tiah an ti. ²⁵ Cule Jesu in an hnenah, “Miaapawl, profetpawl ih an rak sim mi hmuahhmuah hi nan va zum har lawmmam ve! ²⁶ Khrih cun cupawl cu a tuar tengteng ding ih a ropitnak sungah a lut ding a si lo maw?” tiah a ti. ²⁷ Cule Mawsi cabupawl ihsin a thawk ih, profet cabupawl hmuahhmuah sungih amai thu an ngan mi Cathianghlim hmuahhmuah kha an hnenah a simfiang. ²⁸ An feh tumnak khua an thlen zik zawngah Jesu cu hladeuh feh hrih ding vekin a umawter. ²⁹ Cu tikah annih in, “Kan hnenah riak aw, khua a sim ih a thim thlang fawn,” tiah an kai. Cule an hnenah riak dingin a lut. ³⁰ Cule hiti hin a rak si, an hnenah rawl hil ih a to laiah sang a la ih, lungawithu a sim, cule a phel ih an hnenah a pe hai. ³¹ Cu tikah an mit a hung vang ih amah Jesu a si kha an theithiam. Cule an mithmuh ah a hlo. ³² Cule anmah le anmah, “Lamzin ih kan hnenih a ṭawng le Cathianghlim in rak simfian laiah khan kan thinlung meisa kang vekin kan sungah a um tho a si lo maw?” tiah an tiaw. ³³ Annih cu acui can roriah an tho ih, Jerusalem ah an kirsal. Cule cu tawkah mi hleikhatpawl le an hnenih um mipawl an rak umkhawm kha an va hmu. ³⁴ Cupawl cun, “Bawipa cu a rak thosal ngaingai, Simon hnenah a lang zo,” tiah an rak ti. ³⁵ Cule annih in lamzin ih thil cang mipawl le sang a phel tikih amah an rak theihthiam thu an sim ve. ³⁶ Cutiih cui thilpawl an rel rero laiah Jesu amah rori cu an laiah a ding ih an hnenah, “Nan hnenah hnangamdaihnak um hram seh,” tiah a ti. ³⁷ Asinan annih cu an lau tuk ih ṭihnak in an khat, thla hmu ah an ruataw. ³⁸ Cu tikah anih in an hnenah, “Ziangah nan thin a phan? Ziangah saw nan thinlung sungih nan rinhlelh? ³⁹ Ka kut le ka ke tla hi zoh hnik uh! Keimah rori ka si ko. I tham hnik uh la i zoh hnik uh. Ziangahtile, thla cun taksa le ruh a nei lo. Kei cun in hmuh vekin taksa le ruh ka nei a si,” tiah a ti. ⁴⁰ Cutiih a ṭawng ṭheh hnuah a kut le a ke pawl tla a hmuh hai. ⁴¹ Cule annih cu an mang a bangih an lungawinak ruangah zum loin an um thotho tikah anih in an hnenah, “Hi tawkah rawl ziang tal nan nei maw?” tiah a ti. ⁴² Cule annih in ngasa em hmin cia le khuai thlar khat an pe. ⁴³ Cumi cu a la ih an hmaiah a ei. ⁴⁴ Cule, anih in an hnenah, “Nan hnenih ka um laiih ka lo sim mi thupawl tla cu hiti hin a si, Mawsi Dan bu sungah si seh, profetpawlih cabu sungah si seh, Sam bu sungah si seh keimai thu an rak ngan mi hmuahhmuah cu a tlamtling thluh ding,” tiah a ti. ⁴⁵ Cu tikah Cathianghlim an theihthiam theinak dingah an theihthiamnak a awnsak hai. ⁴⁶ Cule, anih in an hnenah, “Cathianghlim in hitin a ti. Khrih in a tuar tengteng ding ih a ni thumnak ah mithi lak ihsin a thosal ding. ⁴⁷ Sualsirnak le sualpawl ngaidamnak thu cu Jerusalem ihsi thawkin miphun hmuahhmuah hnenah amai hmin in sim a si ding. ⁴⁸ Nannih cu hi thupawl theihpitu nan si. ⁴⁹ Ngai hnik uh, Ka Pai thutiam cu nan parah ka run thlah. Asinan tlun lam ihsin huham thawi thawm nan si lai hlan lo Jerusalem ah rak um uh,” tiah a ti. ⁵⁰ Cule Jesu in Bethany khua tiang a hruaisuak hai. Cu tawkah a kut a thlir ih thlawsuah a pek hai. ⁵¹ Cule hiti hin a rak si, mal a sawm hai laiah an hnen ihsin anih cu ṭhen a si ih, vancung ah laksoh in a um. ⁵² Amah an biak hnuah Jerusalem ah lungawi zetin an tlungkir. ⁵³ Cule an tikcu hmuahhmuah cu temple kulh sungah Pathian thangṭhatnak le Pathian hnenih lungawithu simnak ah an hmang. Amen.