JUDA

JUDA

¹ Jesu Khrih-ih ṭemṭawn sal le James-ih unaupa, kei Judas in, Pa Pathian ih tithianghlim mi, Jesu Khrih sungih kilhim mi le kawh mipawl hnenah hi ca hi ka lo kuat a si. ² Nan hnenah zahngainak le hnangamdaihnak le duhdawtnak cu karh sinsin hram seh. ³ Duhdawt mi tla, kan cotlang mi, rundamnak thu nan hnenih ngan ṭenṭo ka tum tikah, mithianghlimpawl hnenah Pathian in kumkhaw daih in vei khat a rak pek mi zumnak hrangah ṭhahnemngai zetih nan beihnak dingah tha lo pe dingin nan hnenih ca ka ngan cu a ṭul rori a si. ⁴ Ziangah cutin ka ti tile athupteih luttu mi hrekkhatpawl in Pathian zangfahnak cu tenumza hursualtuahnak ah an cangter ih, Bawipa Pathian umsun le kan Bawipa Jesu Khrih cu an phatsan fawn. Cupawl cu Pathian ngaihsak lo le hlanlaipi ihsin hivek thuṭhennak co dingih ngan cia mipawl an si. ⁵ Bawipa in Izip ram ihsin ziangtin Israel-mipawl a runsuak ih, cu mi hnuih a zumlotupawl a siatsuah thupawl hi, nan theih zo mi si khal sehla lo theihtersal ka duh. ⁶ Cun, vancungmi an sinak hmaisa rak kai ringring lo ih anmai umnak hmun tlansantupawl cu thuṭhennak ni maksak zet hrangah thim hnuaiah kumkhaw cikcin ih ṭawn in a ret hai a si. ⁷ Cutivek thothoin Sodom khawpi le Gomorrah khawpi le an kiangkap khawpi ih a um mipawl cun anmah vekin an nung ve, nu le pa sualnak ah an peaw ih, tidan lo vekin an pawlaw. Cupawl cu kumkhaw meipi thawi hrem ding mipawlih zohṭhim dingah tarlang an si. ⁸ Cuvek thothoin hipawl, thil bawrhhlawh suangtuahtupawl hin an taksa an bawrhhlawhter, thuneitupawl an nautat ih, huham ropi neipawl an relsia. ⁹ Sikhalsehla, vancungmi cungnungbik Maikal cu Mawsi-ih ruang thu ah Diabol thawn thu an elawk tikah khan Diabol cu a thangsiatzawng in sual a puh ngam lo ih, “Bawipa in lo kawk seh!” tiah a ti. ¹⁰ Asinan cui minungpawl cun an theih lo mi pohpoh cu an relsia. Cule, ramsa aa in thil a theih vekin pianphung sinak ih an theih mi thilpawl ah anmah le anmah an bawrhhlawhawter. ¹¹ Kain lamzin an zawh ih, hlawh hmu dingih Balam a fehsualnak ah cun duhham zetin an tlan ih, Korah-ih helnak sual ih an hlohral ruangah an hmakhua a pit a si! ¹² Cui minungpawl cu nan duhdawtnak puai ih hnawmbal an si. Nan hnenih rawl an ei tikah ṭihnak um riai loin anmahte an ei ding mi la in an ei mai. Annih cu thli in a suk le so ih a hran mi ruahti pai lo khawdur vek, favang canih thingkung rah nei lo vek, vei hnih thi zo, a hram ihsin phawisuah mi vek an si. ¹³ Cupawl cu tifinriat tisuar cak zet vek an si. An mualphonak cu ti parih tiphul vekin a suak. Arsi zuang vek an si. Thim sah mepmep cu an hrangah retsak kumkhua a si. ¹⁴ Cun, Adam ihsin a pasarihnak Enok khalin hipawlih thuhla cu profet vekin a rak phuang, “Ngai hnik, Bawipa cu siarcawklo a mithianghlimpawl thawn a ra ding. ¹⁵ Mi hmuahhmuah parih thuṭhennak thlengter dingah le Pathian ngaihsaklotupawl hmuahhmuah in Pathian ngaihsaklonak hna, Pathian ngaihsak lo cingih an ṭuan mi hmuahhmuah thu ah le cuvek misualpawl in amah dokalh in ṭawng hrohrang an ṭawng mi hmuahhmuah an tisualzia theihter dingah a ra ding,” tiah a ti. ¹⁶ Cupawl cu phunciar hmang, misawisel hmang, anmai cakhiarnak thluntupawl an si. Cule an kaa in pawrhawknak ṭawngkam nasa zetzet an ṭawng ih, mai hlawknak duh ruangah mi va fakawter an si. ¹⁷ Sikhalsehla, duhdawt mi tla, nannih cun kan Bawipa Jesu Khrih-ih apostolpawl in hi hlanih an rak sim mi thupawl kha cing ringring uh. ¹⁸ Can netaah cun mi hnihsantupawl le anmai Pathian ngaihsaklonak cakhiarnak vekih nungtu an um ding tiah an lo sim kha. ¹⁹ Cupawl cu mipeureupawl, khawvel mi, Thlarau neilopawl an si. ²⁰ Asinan, duhdawt mi tla, nannih cu nan zumnak thianghlimbik parah nanmah ten sakṭhaaw vivo uh la, Thlarau Thianghlim ah thla cam uh. ²¹ Kumkhawnunnak ih mi hruaitu kan Bawipa Jesu Khrih-ih zahngainak nan hngah laiah hin Pathian duhdawtnak ah nanmah le nanmah kilhimaw uh. ²² Cun, mi hrekkhat parah lainatnak nei uh la, fimkhur zetin thuṭhenfel thiamnak hmang uh. ²³ Cule, midangpawl cu meisa sung ihsin dirsuak uh la, ṭih cingin runsuak uh; tisa ih tetakte a balhter mi nan hnipuan hman cu hua uh. ²⁴ Atu ah tluknak ihsin a lo kilhim theitu le mawh nei loin a ropitnak hmaiih hlimnak nasazet thawi lo dingter theitu, ²⁵ in Rundamtu Pathian fim umsun hnenah cun thangṭhatnak le cungnunnak, huham le thuneihnak cu atu le kumkhua tiang um seh. Amen.