JOHAN

JOHAN

¹ A hramthawkin Thu a um. Cui Thu cu Pathian thawn a um ih, cui Thu cu Pathian a si. ² Cui Thu cu a thawkin Pathian thawn a um. ³ Thil hmuahhmuah hi amah ih sersiam ṭheh mi an si. Cule thil sersiam mi lakah amah ih sersiam lo mi thil zianghman a um lo. ⁴ Amah ah nunnak a um ih, cui nunnak cu minungpawlih tleu a si. ⁵ Cui tleu cu thim lakah a tle nan thim in a theithiam lo. ⁶ Pathian thlah mi pakhat a um ih, a hmin cu John a si. ⁷ Tleu thuhla a theihter theinak dingah anih cu theihtertu si dingin a ra ih, amai zarin mi hmuahhmuah in an zum theinak dingah tleu thu cu a theihter. ⁸ Anih cu cui tleu cu a si lo, cui tleu theihter dingah a ra sawn. ⁹ Cui tleu cu mi hmuahhmuah hnenih tleu petu dingah leitlun ih a ra mi tleu diktak a si. ¹⁰ Amah cu leitlun ah a um ih, leitlun hi amah ih sersiam a si. Asinan leitlun mipawl in amah cu an thei lo. ¹¹ Amai mipawl hnenah a ra nan a mipawl in an cohlang lo. ¹² Asinan amah cohlangtu hmuahhmuah cu Pathian fate ih can theinak a pe hai. Cupawl cu amai hmin zumtupawl an si. ¹³ Annih cu thisen ih hrin an si lo, tisa duhnak ih hrin khal an si lo, mipa duhnak ih hrin khal an si lo, Pathian-ih hrin mi an si sawn. ¹⁴ Cui Thu cu milai ah a rungcang ih, kan lakah a um. Cule kannih in a ropitnak kan rak hmu. Cumi cu Pai Fapa neihsunih ropitnak a si. Amah cu zangfahnak le thutak in a khat. ¹⁵ John in cu pa a theihpi ih, “ ‘Anih cu ka hlanih a rak um zo ruangah, ka hnuih a ratupa cu keimah hnakin a ropisawn a si,’ tiah ka lo sim mi kha amai thu ka sim mi a si,” tiin a aupi. ¹⁶ A famkimnak ihsin zangfahnak tlunih zangfahsinnak cu kan zaten kan co cio. ¹⁷ Ziangahtile, Dan cu Mawsi hmang in pek a si. Zangfahnak le thutak cu Jesu Khrih ihsin a ra. ¹⁸ Zohman in Pathian cu ziangtik hmanah an hmu dah hrih lo. Pai ṭang sungih a um mi Fapa neihsun in amah cu a langfiangter zo. ¹⁹ “Zo na si?” tiih sut dingah Jerusalem ihsin Jew-pawl in puithiampawl le Levi mipawl John hnenih an hei thlah tikah, John in thu a theihter mi cu hihi a si, ²⁰ phehlotein a phuangaw ih, “Keimah cu Khrih ka si lo,” tiah a phuangaw. ²¹ Cule annih in, “Asile zo na si? Elijah teh na si maw?” tiah an sut. Anih in, “Ka si lo,” tiah a ti. “Cui profet teh na si maw?” tiah an sut lala ih, anih in, “Ka si lo,” tiah a let hai. ²² Cule annih in a hnenah, “In rak thlahtupawl kan va simkir theinak dingah zo na si? Nangmah le nangmah teh zo na tiaw?” tiah an ti. ²³ Anih in, “Keimah cu profet Isaiah ih a rak sim mi ‘ BAWIPAI lamzin kha dingter uh,’ tiih ramṭhing ih mi pakhat auaw kha ka si,” tiah a ti. ²⁴ Cui an rak thlah mipawl cu Farasipawlih milai an si. ²⁵ Cule annih in John hnenah, “Nangmah cu Khrih le na si lo, Elijah le na si lo ih, cui profet le na si fawn lo ah cun ziangruangah baptisma na pek?” tiah an sut. ²⁶ John in an hnenah, “Kei cun ti ah baptisma ka pe, sikhalsehla nan lakih a ding mi pakhat nan theih lo mi a um. ²⁷ Ka hnuah ra ih, keimah hnakih mithupisawnpa cu amah hi a si. A kedam hri phawihsaktu ding hmanah ka tlak lo,” tiah a sang hai. ²⁸ Cui thilpawl a cannak hmun cu John in baptisma a pek reronak Jordan tiva khatlam ral Bethabara khua ah a si. ²⁹ A thaisun ah John in Jesu a hnen lam panih a rat kha a hmu ih, “Zoh hnik uh, leitlun sual phurhlotu Pathian Tuufano khi! ³⁰ ‘Mi pakhat cu ka hnuah a ra ih, anih cu ka hlanih a rak um zo ruangah keimah hnakin a thupisawn,’ tiih ka ti mi pa cu amah hi a si. ³¹ Amah cu ka rak thei lo. Asinan amah cu Pathian in Israel-mipawl hnenih a langter theinak dingah ti ah baptisma pe in ka ra a si,” tiah a ti. ³² John in a theihpinak thu cu hitin a sim, “Vancung ihsin Thlarau cu thuro vekin a rung ṭum ih, a parih a fut ringring kha ka hmu. ³³ Amah cu ka thei lo. Asinan ti ah baptisma pe dingih keimah i thlahtu in ‘Thlarau a rung ṭum ding ih, a parih a fut ringring na hmu ding. Cu pa cu Thlarau Thianghlim ih baptisma petupa a si,’ tiah ka hnenih i ti vekin, ³⁴ ka hmu zo ih, hihi Pathian Fapa a si tiah ka theihpi zo,” tiah a ti. ³⁵ A thaisun ah John cu a dungthluntupawl lakih mi pahnih thawn hmunkhat ah an dingtlangsal. ³⁶ Cu tawkih Jesu a feh rero lai kha a hmu ih, John cun, “Zoh hnik uh, Pathian Tuufano khi!” tiah a ti. ³⁷ Cule cui dungthluntu pahnih cun John-ih ṭawng cu an thei ih, Jesu cu an thlun. ³⁸ Cule Jesu cu a her ih amah an thlun kha a hmuh tikah an hnenah, “Ziang nan hawl rero?” tiah a sut hai. Cule annih in, “Rabbi, khui tawkah na um?” tiah an ti. Rabbi tiih sullam cu ‘Zirhtu’ tinak a si. ³⁹ Anih in an hnenah, “Ra uh la zoh uh,” tiah a ti. Cule an feh ih, a umnak hmun cu an va hmu. Cui can cu zan lam nazi pali hrawng a si ruangah cui ni cu a hnenah an camta. ⁴⁰ John-ih ṭawng rak theitu le a thluntu mi pahnih lakih pakhat cu Simon Peter-ih naupa Andru a si. ⁴¹ Cu pa cun a hmaisabikah amai upa Simon a hmu ih, a hnenah, “Messiah kan rak hmu zo,” tiah a sim. Messiah tiih sullam cu ‘Khrih’ tinak a si. ⁴² Cule Andru in Simon cu Jesu hnenah a hruai. Jesu in amah cu a zoh ih, “Nangmah cu Jonah-ih fapa Simon na si. ‘Kefas’ tiih kawh na si ding,” tiah a ti. Kefas tiih sullam cu ‘Peter’ tinak a si. ⁴³ A thaisun ah Jesu cu Galili peng ih feh a duh. Jesu in Filip a tawng ih a hnenah, “I thlun aw,” tiah a ti. ⁴⁴ Filip cu Andru le Peter ih khua, Bethsaida khaw mi a si. ⁴⁵ Filip in Nathanael a tawng ih a hnenah, “A thuhla Mawsi in a Dan bu sungih a ngan mi le profetpawl khalin an rak ngan mi pa kan tawng zo. Amah cu Nazareth, Joseph-ih fapa Jesu a si,” tiah a sim. ⁴⁶ Cule Nathanael in a hnenah, “Nazareth ihsin thil ṭha a suak thei ding maw?” tiah a ti. Cule Filip in a hnenah, “Ra aw la, zoh hnik,” tiah a ti. ⁴⁷ Jesu in a hnen lam panih Nathanael a rat kha a hmuh tikah, “Zoh hnik uh, Israel-mi diktak khi. Amah ah mi bumnak a um lo,” tiah Nathanael-ih thuhla cu a rel. ⁴⁸ Nathanael in a sang ih a hnenah, “Ziangtin saw nang in kei i theih?” tiah a ti. Jesu in a hnenah, “Filip in a lo kawh hlan, theipi kung hnuaiih na rak um laiah khan ka lo hmu,” tiah a sang. ⁴⁹ Nathanael in a sang ih, a hnenah, “Rabbi, nang cu Pathian Fapa na si. Israel Siangpahrang na si,” tiah a ti. ⁵⁰ Jesu in a sang ih a hnenah, “ ‘Theipi kung hnuaiah ka lo hmu,’ tiah ka lo ti ruangah maw na zum? Cupawl hnakih ropisawn thilpawl tla na hmu lai ding,” tiah a ti. ⁵¹ Cule Jesu in Nathanael hnenah, “Na hnenah, thungaiin, thungaiin ka lo sim, hi hnuah vancung awngaw in Pathian vancung mipawl Minung Fapa parih an kai le an ṭum nan hmu leh ding,” tiah a ti.

¹ Cule a ni thumnak ah Galili peng Kana khua ah ṭhitumnak a um ih, cu tawkah Jesu-ih nu a um. ² Jesu le a dungthluntupawl khal cui ṭhitumnak ah cun an sawm. ³ Cule sabitti a cem tikah Jesu-ih nu in a hnenah, “Sabitti an nei nawn lo,” tiah a sim. ⁴ Jesu in a hnenah, “Nunau, nang thawn ziang titlang ding so ka neih? Ka can a thleng hrih lo,” tiah a ti. ⁵ A nu in siahhlawhpawl hnenah, “Nan hnenih a lo sim mi pohpoh tuah uh,” tiah a ti hai. ⁶ Cu tawk hmun ah Jew-pawl in an tithianhlimawknak ih an hman ṭheu mi lung tibel paruk an ret. Bel khat in kalan kul ihsin sawmthum tiang a dawl thei. ⁷ Jesu in an hnenah, “Tibelpawl cu a khat in ti thun uh,” tiah a ti. Cule annih in a khat in an thun. ⁸ Cule anih in an hnenah, “Atu ah vun suak uh la mo puai hotupa hnenah hei keng uh,” tiah a ti. Cule annih in a hnenah an hei keng. ⁹ Cule mo puai hotupa in sabitti ih cang ti cu a teh tikah khui tawk ihsin ra mi a si ti a thei lo. Asinan tikhaitu siahhlawhpawl cun an thei. Mo puai hotupa cun mo neitupa cu a ko. ¹⁰ Cule a hnenah, “Mi kipin a thawk ah sabitti ṭha an suah ih, an rit hnuah sabitti ṭha lo deuh an suah ṭheu. Asinan nang cun atu tiangin sabitti ṭha na ret ṭha hrih lai,” tiah a ti. ¹¹ Jesu in hi hminsinnak hmaisabik hi Galili peng Kana khua ah a tuah. Cutivekin a ropitnak a langter ih, a dungthluntupawl in amah cu an zum. ¹² Cu mi hnuah Jesu cu Kapernaum khua ah a vung feh. A nu, a naulepawl le dungthluntupawl khal a hnenah an feh ve. Cu tawkah ni tampi an cam lo. ¹³ Jew-pawlih Lantapuai a nai thlang ih, Jesu cu Jerusalem ah a hung so. ¹⁴ Cule, temple kulh sungah cawcangpawl, tuupawl, thuropawl zuartu le paisa thlengtupawl tla to in a hmu. ¹⁵ Vuaknak hrihrual a tuah ih, temple kulh sung ihsin an zaten a dawisuak ṭheh. Tuupawl le cawcangpawl khal a dawisuak. Paisa thlengtupawlih paisa a bungdarhsak ṭheh ih, an cabuaipawl a linglet ṭheh. ¹⁶ Thuro zuartupawl hnenah cun, “Hi thilpawl hi hi tawk ihsin lahlo uh. Ka Pai inn cu thil zuarnak le leinak ah cangter hlah uh,” tiah a ti hai. ¹⁷ Cule a dungthluntupawl in, “Na inn hrangih ṭhahnem ka ngainak in i ei thluh,” tiih ngan mi cu an vun mang. ¹⁸ Curuangah, Jew-pawl in an sang ih, “Hi thilpawl na tuahnak hin, kan hnenah ziang hminsinnak so in hmuh?” tiah Jesu cu an ti. ¹⁹ Jesu in a sang ih an hnenah, “Hi temple hi ṭhiatbal uh la, ni thum sungah ka dinsal ding,” tiah a ti hai. ²⁰ Curuangah, Jew-pawl in, “Hi temple cu kum sawmli le kum ruk sung an sak mi a si. Ni thum sungah na dinsal thei ding maw?” tiah an ti. ²¹ Asinan Jesu cun amai taksa temple thu a sim mi a si. ²² Curuangah, mithipawl lak ihsin Jesu thawhter a si hnuah, a dungthluntupawl in hi thu cu an hnenah Jesu in a rak sim zo a si ti an vun mang. Cule, Cathianghlim le Jesu ih thusim mi cu an zum. ²³ Lantapuai canah Jesu Jerusalem ih a um laiih hminsinnak a tuah mipawl an hmuh tikah mi tampi in Jesui hmin an zum. ²⁴ Asinan, mi hmuahhmuah a theih hai ruangah, Jesu cu an hnenah amah le amah a peaw lo. ²⁵ Milai sungah ziang a um ti a theih ruangah milai thu cu zohman ih theihter a ṭul lo.

¹ Farasimi lak ihsin mi pakhat a hmin Nikodemas an ti mi a rak um. Amah cu Jew-pawl lakih hruaitu pakhat a si. ² Cu pa cu zan ah Jesu hnenah a ra ih, a hnenah, “Rabbi, nangmah cu Pathian hnen ihsin a ra mi zirhtu na si ti kan lo thei. Ziangahtile, Pathian in a umpi lo a si ah cun na tuah mi hminsinnakpawl hi zohman in an tuah thei lo ding,” tiah a ti. ³ Jesu in a sang ih a hnenah, “Thungaiin, thungaiin ka lo sim, mi zokhal hrinsal a si lo ah cun Pathian uknak a hmu thei lo ding,” tiah a ti. ⁴ Nikodemas in a hnenah, “Ziangtin mi pakhat cu a upat hnuah hrin a si thei ding? A nui pum sungah a vei hnihnak lut in hrin a si thei ding maw?” tiah a ti. ⁵ Jesu in, “Thungaiin, thungaiin ka lo sim, mi zokhal ti le Thlarau ih hrin a si lo ah cun Pathian uknak sungah a lut thei lo ding. ⁶ Ziangkhal taksa ih hrin mi cu taksa a si ih, ziangkhal Thlarau ih hrin mi cu thlarau a si. ⁷ Na hnenah, ‘Hrinsal nan si tengteng ding a si,’ ka lo ti ruangah na mangbang hlah. ⁸ Thli cu a duhduhnak ah a hrang. A thawm cu na thei nan, khui tawk ihsin a ra ih, khuiah a feh ti cu na thei riai lo. Zokhal Thlarau ih hrinnak a cotu cu cuvekin a si,” tiah a ti. ⁹ Nikodemas cun a sang ih a hnenah, “Ziangtin cui thilpawl cu a cang thei ding?” tiah a ti. ¹⁰ Jesu in a sang ih a hnenah, “Ziangtin nangmah cu Israelmipawlih zirhtu na si ih cui thilpawl cu na theih lo? ¹¹ “Thungaiin, thungaiin ka lo sim, kan rak theih mi kan sim ih, kan rak hmuh mi kan theihter. Asinan nannih in kan thu theihter mi cu nan cohlang lo. ¹² Leitlun thil thuhlapawl ka lo sim ih nan zum lo. Vanram thuhlapawl tla lo sim ningla ziangtin nan zum thei ding? ¹³ Vanram ihsin a rung ṭumtu vanram ih a um mi Minung Fapa siarlo zohman vanram ih kai an um lo. ¹⁴ Mawsi in ramṭhing ah rul a tar bangin Minung Fapa khal tar a si ve ding. ¹⁵ Cutin zokhal amah a zumtu cu siathloral loin kumkhawnunnak an neihnak ding hrangah a si. ¹⁶ “Ziangahtile, Pathian in leitlun mipawl a duhdawtdan cu hiti hin a si, a Fapa neihsun a pe. Cutin Fapa a zumtu zokhal an siathloral lo ding ih, kumkhawnunnak an nei sawn ding. ¹⁷ Ziangahtile, leitlun mipawl thuṭhen dingah Pathian in leitlun ah a Fapa a thlah lo. Amah thawngin leitlun mipawl rundam an si theinak dingah Pathian in a Fapa a thlah a si sawn. ¹⁸ Fapa a zumtu cu thuṭhen a si lo. Asinan a zumlotu cu thuṭhen a si zo. Ziangahtile, Pathian-ih Fapa neihsun hmin a zum lo ruangah a si. ¹⁹ Cule thuṭhennak cu hihi a si, leitlun ah tleu a ra thleng zo. Asinan, an hnaṭuanpawl an ṭhat lo ruangah mi in tleu hnakin thim an duh sawn. ²⁰ Ziangahtile, zokhal thil ṭha lo a tuahtu cun tleu a hua ih, a thilti mipawl langter a silonak dingah tleu ah a ra lo. ²¹ Asinan thutak nunpitu cu a thilti mipawl Pathian hmaiih tuah a si ti langter a si theinak dingah tleu ah a ra a si,”tiah a ti. ²² Cu mipawl hnuah Jesu le a dungthluntupawl cu Judia peng sungah an feh. Cu tawkah an hnenah Jesu cu a cam ih, baptisma mi a pe. ²³ Salim khaw kiang Aenon ah ti tampi a um ruangah John khalin baptisma a pe rero. Cule mi an ra ih, baptisma an co. ²⁴ Ziangahtile, John cu thawngthlak a si hrih lo. ²⁵ John-ih dungthluntu hrekkhatpawl le Jew-pawl kha an thianfaiawknak thu ah elawk an thawk. ²⁶ Cule John hnenah an feh ih a hnenah, “Rabbi, Jordan tiva ralkhat ih na hnenih a rak umtu a thuhla na rak theihter mi pa khan, zoh hnik, baptisma mi a pe rero. Mi hmuahhmuah a hnenah an feh rero a si,” tiah an ti. ²⁷ John in a sang ih, “Van ihsin pek a si lo ah cun mi in zianghman a ngah thei lo. ²⁸ ‘‘Kei cu Khrih ka si lo,’ asinan, ‘Pathian in amai hlanah i thlah a si,’ tiih ka sim mi kha nanmah rori hi i theihpitu nan si. ²⁹ Mo a neitu cu mo neitupa a si. Asinan, mo neitupai rualpa, a aw ngaithla ih ding cun mo neitupai aw a theih ruangah a lung a awi ngaingai. Curuangah, hih ka lungawinak hi a famkim a si. ³⁰ Anih cu a ropi deuhdeuh ding, asinan, kei cu ka ṭumsuk deuhdeuh ding. ³¹ “Tlun lam ihsin a ratu cu ziang hmuahhmuah tlunah a um. Leitlun ih mi cu leitlun mi a si ih, leitlun thu a sim. Vancungram ihsin a ra mi cu ziang hmuahhmuah tlunah a um. ³² Anih cun a hmuh zo mi le a theih zo mi thu a theihter. Asinan zohman in a thu theihter mi cu an pawm lo. ³³ A thu theihter mi a cohlangtu cun Pathian cu a dik a si tiah nemhngehnak tacik a khen. ³⁴ Ziangahtile, Pathian ih thlah mi cun Pathian thu a sim. Pathian in cu pai hnenah a Thlarau cu leitek um loin a pe. ³⁵ Pa in Fapa cu a duhdaw ih, a kut sungah ziang hmuahhmuah a pe thluh zo. ³⁶ Fapa a zumtu in kumkhawnunnak a nei. Fapa a zumlotu cun nunnak a hmu lo ding ih, Pathian thinhengnak cu a parah a um ringring sawn a si,” tiah a ti.

¹ John hnakin Jesu in dungthluntu tamsawn a tuah ih, baptisma a pe tamsawn ti Farasipawl in an thei ti Bawipa in a thei. ² Amah Jesu rori cun baptisma a pe lo nan, a dungthluntupawl in an pe sawn. ³ Judia peng a fehsan ih, Galili peng ah a fehsal. ⁴ Cule Jesu cu Samaria peng a paltlang tengteng a ṭul. ⁵ Curuangah, Jakob in a fapa Joseph hnenih a rak pek dah mi loram kiangih um, Samaria peng ih khua pakhat Saikhar an ti mi cu a thleng. ⁶ Cu tawkah Jakob-ih tikhur a um. Jesu cu a khualtlawnnak ah a bang tuk ruangah tikhur kiangah cun a to. A tikcucan cu sun nazi hleihnih hrawng a si. ⁷ Samaria nunau pakhat cu ti khai dingin a ra. Jesu in a hnenah, “Ka in dingah ti i pe aw,” tiah a ti. ⁸ Ziangahtile, a dungthluntupawl cu rawl lei dingah khaw sungah an rak fehhlo zo. ⁹ Curuangah, Samaria nunaunu in a hnenah, “Nang cu Jew-mi na si ih, kei cu Samaria nunau ka si. Ziangtin saw in ding ti i dil?” tiah a ti. Jew-pawl cu Samariamipawl thawn pehtlaihawknak an neih lo ruangah, cutiih a tinak a si. ¹⁰ Jesu in a sang ih a hnenah, “Pathian thilpek le, ‘Ka in dingah ti i pe aw,’ tiih a lo titupa hi zo a si ti theita cila cu na rak dil zo ding ih, na hnenah nunnak ti a lo pe zo ding nan,” tiah a ti. ¹¹ Nunaunu in a hnenah, “Ka pu, ti khainak ding zianghman na nei lo ih, tikhur le a thuk fawn si, khui tawk ihsin himi nunnak ti cu na neih? ¹² Tikhur in petu kan pa Jakob hnakin nang cu na ropisawn maw si? Amah le a falepawl le a rannungpawl cu himi ihsin ti an in,” tiah a ti. ¹³ Jesu in a sang ih a hnenah, “Zokhal hi ti a intu cu a ti a halsal ding. ¹⁴ Asinan, zokhal a hnenih ka pek ding mi ti a intu cu a ti a hal dah nawn lo ding. Ka pek ding mi ti cu a sungah kumkhawnunnak tiangin a putsuak rero mi cirhti nung ah a cang sawn ding,” tiah a ti. ¹⁵ Nunaunu in a hnenah, “Ka pu, ka ti a hallonak dingah le hi tawkah ti khai in ka ratsal nawn lonak dingah cui ti cu i pe aw,” tiah a ti. ¹⁶ Jesu in a hnenah, “Feh aw, na pasal va ko aw la, hi tawkah rakirsal aw,” tiah a ti. ¹⁷ Nunaunu in a sang ih, “Pasal ka nei lo,” tiah a ti. Jesu in a hnenah, “ ‘Pasal ka nei lo,’ na ti mi cu thudik a si. ¹⁸ Ziangahtile, pasal panga na nei zo ih, atu ih na neih mi pa hi na pasal a si lo. Cumi cu dik zetin na rel a si,” tiah a ti. ¹⁹ Cule nunaunu in a sang ih a hnenah, “Ka pu, nangmah cu profet na si tiah ka lo ti thei. ²⁰ Kan pupapawl cun hi tlang parah Pathian an bia. Asinan nannih cun Jerusalem cu mi in Pathian an biaknak ding hmun a si ding nan ti,” tiah a ti. ²¹ Jesu in a hnenah, “Nunau, i zum aw. Hi tlang par le Jerusalem ih Pa Pathian nan biak lo ding can cu a thleng leh ding a si. ²² Nannih cun nan biak mi zo a si ti nan thei lo. Rundamnak cu Jew-pawl hnenin a rat ruangah kannih cun kan theih mi cu kan bia a si. ²³ A diktakih a betupawl in Pa cu thlarau le a taktak ih an biak can a thleng ding. Cucu tui can hi a si. Ziangahtile, Pa in amah betu dingah cuvek mipawl a hawl a si. ²⁴ Pathian cu Thlarau a si ih, a betupawl in thlarau le a taktakin an be tengteng ding a si,” tiah a ti. ²⁵ Nunaunu in a hnenah, “Khrih an ti mi Messiah a ra ding ti cu ka thei. Amah a rat tikah thil hmuahhmuah kan hnenah a phuang ding,” tiah a ti. ²⁶ Jesu in a sang ih a hnenah, “A lo be rerotu keimah hi amah cu ka si,” tiah a ti. ²⁷ Culai fangah a dungthluntupawl cu an ra thleng. Nunaunu thawi an biakawk rero cu an mang a bang. Asinan, “Ziang na duh?” tiah si maw, “Ziangah hi nu na bia?” tiah si maw zohman in an ti lo. ²⁸ Cule cu nu cu a ti bel a tanta ih, khaw sungah a feh ih, mipi a va sim. ²⁹ “Ra uh la, ka thiltuah zo mi hmuahhmuah i sim thluh theitupa hi ra zoh hnik uh. Cu pa cu Khrih a si ko lo maw?” tiah a ti. ³⁰ Cule, khaw sung ihsin an suak ih a hnenah an ra. ³¹ Asinan culai fangah dungthluntupawl in, “Rabbi, rawl ei aw,” tiah an ngen. ³² Asinan anih in an hnenah, “Nan theih lo mi rawl ei ding ka nei,” tiah a ti. ³³ Curuangah dungthluntupawl cu, “A hrangah mi in rawl ei ding an rak keng zo teh a si pei maw?” tiah pakhat le pakhat an tiaw. ³⁴ Jesu in an hnenah, “I thlahtupai duhzawng tuah le a hnaṭuan ṭhehsuak ding hi ka rawl a si. ³⁵ Nannih in, ‘Fang ahnak dingah thla li a duh hrih lai,’ nan ti a si lo maw? Zoh hnik uh, ka lo sim a si, dak uh la, lopawl khi zoh uh, ah cu in fang an thar zo. ³⁶ Fang attu cun a hlawhman a ngah ih, kumkhawnunnak tiang thlairah a khawm. A tuhtu le a attu an lungawitlang theinak dingah cucu a tuah a si. ³⁷ Cutin, ‘Mi pakhat in a tuh ih, a dang pakhat in a at,’ ti mi cu a dik a si. ³⁸ Nan ṭuanlonak ih fang at dingin ka lo thlah. Midangpawl in hna an ṭuan ih, an ṭuan cia mi ah nannih nan lut,” tiah a ti. ³⁹ Cule nunaunu in, “Ka thiltuah zo mi hmuahhmuah i sim thluh,” tiah a theihter ruangah cui khua ih Samaria mi tampi in Jesu an zum. ⁴⁰ Curuangah, Samariamipawl Jesu hnenih an feh tikah an hnenih cam dingin an ngen. Cule an hnenah ni hnih a cam. ⁴¹ Jesu-ih ṭawngkam rori ruangah mi tamsin in an zum. ⁴² Cule annih in nunaunui hnenah, “Nangmai sim mi ruangah si loin atu ah cun kan zum. Kanmah roriin kan hna in kan theih zo ruangah anih cu leitlun mipawl Rundamtu, Khrih rori a si ti kan thei,” tiah an ti. ⁴³ Cule ni hnih hnuah cu tawk ihsin a fehsuak ih, Galili peng ah a feh. ⁴⁴ Ziangahtile, Jesu amah roriin, profet cu amai khua le ram ah cun upat a hlawh lo tiah a theihter. ⁴⁵ Curuangah, Galili a thlen tikah Galili mipawl in amah cu an cohlang. Galili mipawl khal puai ah an rak feh ve ih, cu tawk Jerusalem puai laiih Jesu ih thiltuah mi hmuahhmuah an rak hmuh zo ruangah a si. ⁴⁶ Curuangah, Jesu cu ti sabitti ih a canternak hmun Galili peng Kana khua ah a thlengsal. Cui canah, bawi pakhat a um ih, a fapa cu Kapernaum khua ah a na. ⁴⁷ Cu pa in Jesu cu Judia peng ihsin Galili peng ah a ra ti a theih tikah a hnenah a feh. A fapa a thih zikte ruangah cu pa cun a fapa ih hnenah rung feh ih damter dingin Jesu cu a ngen. ⁴⁸ Curuangah Jesu in a hnenah, “Hminsinnakpawl le mangbangzapawl hmu hlah uh la nan zum hrimhrim lo ding,” tiah a ti. ⁴⁹ Cui bawi cun a hnenah, “Ka pu, ka fapate a thih hlanah rung aw,” tiah a ti. ⁵⁰ Jesu in a hnenah, “Feh aw, na fapa a nung a si,” tiah a ti. Cule, cu pa cun Jesu in a hnenih a sim mi cu a zum ih a feh. ⁵¹ A vung feh rero laiah a siahhlawhpawl in an rak hmuak ih, “Na fapa a nung a si,” tiah an sim. ⁵² Curuangah anih in a fapa ziang tikcucanah a damdeuh ti thu a sut hai. Cule annih in a hnenah, “Mizan sunhnu nazi pakhat ah a khawsik nat a reh,” tiah an ti. ⁵³ Curuangah, cui can cu Jesu in, “Na fapa a nung a si,” tiih a rak ti cante kha a si ti a pa cun a thei. Cule amah rori le a insungsang zatein Jesu cu an zum. ⁵⁴ Himi cu Judia peng ihsin Galili peng ih Jesu a feh hnuih hminsinnak a tuah a vei hnihnak a si.

¹ Cui thilpawl hnuah Jew-pawlih puai pakhat a um ih, Jesu cu Jerusalem ah a hung so. ² Jerusalem khua ih tuu kawtka kiangah tili pakhat a um ih, cumi cun deubuk panga a nei. Cui tili cu Hebru ṭawng in, ‘Bethesda,’ tiah an ti. ³ Cui deubukpawl ah cun ti cang ding hngakin midamlo, mitcaw, kebai le zengpawl mi tampi an it reirei. ⁴ Ziangahtile, a cancanah vancungmi cu cui tili sungah a rung ṭum ih ti kha a hninter ṭheu. Vancungmi in ti a hninter hnuah ti sungih mi zokhal a lut hmaisabiktu cu ziangvek natnak a neih a si khalle a dam ṭheu. ⁵ Cui hmun ah cun kum sawmthum le kum riat sung nat a tuar mi pa pakhat a um. ⁶ Cu tawkih a ih kha Jesu in a hmuh tikah cui hmun ah kum reipi rak um zo mi a si ti a thei. Jesu in a hnenah, “Tidam na duh maw?” tiah a ti. ⁷ Minapa in a hnenah, “Ka pu, ti a hnin tikah tili sungih rettu ding ka nei lo. Ka fehsung ah midang in in rak ṭum khelh ringring,” tiah a sang. ⁸ Jesu in a hnenah, “Ding aw la, na ihphah la in feh aw,” tiah a ti. ⁹ Cule cu pa cu hmakhatteah tidam a si. Cule a ihphah a la ih a feh, cui ni cu Sabbath Ni a si. ¹⁰ Curuangah tidam mi pa hnenah Jew-pawl in, “Tuisun hi Sabbath Ni a si ih, na ihphah na thiar a thiang lo,” tiah an ti. ¹¹ Anih in an hnenah, “I damtertupa in, ‘Na ihphah la aw la, feh aw,’ i ti,” tiah a sawn hai. ¹² Cule annih in a hnenah, “ ‘Na ihphah la aw la, feh aw,’ a lo titu cu zo a si?” tiah an sut. ¹³ Cui hmun ah cun mi burpi an tam ruangah le Jesu a fehhlo zo ruangah damter mi pa cun zo a si ti a thei lo. ¹⁴ Cui hnuah cu pa cu Jesu in temple kulh sungah a hmu ih a hnenah, “Ngai hnik tidam na si zo. Na parih thil ṭha lo sinsin a thlenlonak dingah va sual nawn hlah,” tiah a ti. ¹⁵ Cu pa cu a fehsuak ih amah damtertu cu Jesu a si tiah Jew-pawl a sim. ¹⁶ Cui thilpawl cu Sabbath Ni ih a tuah ruangah Jew-pawl in Jesu cu an tiduhdah ih thah theidan ding lamzin an hawl. ¹⁷ Asinan Jesu in an hnenah, “Atu tiang ka Pa cu hna a ṭuan ih, kei khal ka ṭuan ve,” tiah a sang hai. ¹⁸ Curuangah anih cun Sabbath Ni a pahbal lawng si loin Pathian cu amai pa ah ret in amah le amah Pathian thawn tlukaw ih a tuahawk ruangah, Jew-pawl in a thahdan ding lamzin an hawl sinsin. ¹⁹ Curuangah Jesu in a sang hai ih an hnenah, “Thungaiin, thungaiin ka lo sim, Pa ih tuah mi hmu lo cun, Fapa hin amahte in zianghman a tuah thei lo. Ziangahtile, ziangkhal Pa in a tuah mi cu, cutivek cun, Fapa khalin a tuah ve a si. ²⁰ Ziangahtile, Pa in Fapa hi a duhdaw ih, amah roriih tuah mi thilpawl hmuahhmuah cu a hmuh. Nan mang a bangnak dingah hipawl hnakih hnaṭuan ropisawn a hmuh lai ding. ²¹ Ziangahtile, Pa in mithipawl a thoter ih, nunnak a pek hai bangin Fapa khalin a duh mi hnenah nunnak a pe. ²² Ziangahtile, Pa in zohman thu a ṭhen lo. Asinan Fapa hnenah thuṭhennak hmuahhmuah cu a hlan thluh zo. ²³ Cuti cun mi hmuahhmuah in Pa an upat bangin Fapa an upat theinak dingah a si. Fapa a upatlotu cu a thlahtu a Pa khal a upat lo. ²⁴ “Thungaiin, thungaiin ka lo sim, ka ṭawng a thei ih, i thlahtu a zumtu cun kumkhawnunnak a nei. Thuṭhennak a tawng lo ding ih, thihnak ihsin nunnak sungah a lut sawn a si. ²⁵ Thungaiin, thungaiin ka lo sim, mithipawl in Pathian Fapa aw an theih ding can cu a thleng ding, cui can cu atu hi a si ih a theitupawl cu an nung ding. ²⁶ Ziangahtile, Pa in amahte ih, nun a neih bangin Fapa hnen khalah amahte ih nun neih theinak ding a pe. ²⁷ Anih cu Minung Fapa a si ruangah, thuṭhen dingih thuneihnak khal a pe zo. ²⁸ “Cu mi ah mangbang hlah uh. Ziangahtile, a can a thleng ding. Cui canah cun thlan sungih a um mipawl hmuahhmuah in a aw an thei ding. ²⁹ Cule thil ṭha a tuahtupawl cu nung dingih thawhsalnak ah le thil ṭha lo a tuahtupawl cu thuṭhen dingih thawhsalnak ah thlan sung ihsin an ra suak ding. ³⁰ Keimai thu in zianghman ka tuah thei lo. Hna ih ka theihdan vekin thu ka ṭhen. Keimai duhnak ka hawl lo ih, i thlahtu ka Pai duhnak ka hawl ruangah ka thuṭhen mi cu a dik a si. ³¹ “Ka cungcangthu keimahte in rel ningla, ka thurel mi cu a diklo. ³² Midang pakhat in keimai thuhla a theihter. Cui ka thuhla a theihter mi cu a dik a si ti ka thei. ³³ “Nannih in John hnenah mi nan thlah ih, John in thutak a theihter. ³⁴ Sihmansehla theihpinak ka co mi hi minung hnen ihsin a si lo. Rundam nan si theinak dingah hi thilpawl hi ka rel sawn a si. ³⁵ John cu a alh mi le a tleu mi meito a si. A tleu ah cun can tawite sung lungawi nan duh. ³⁶ “Asinan John-ih thutheitu hnakih ropisawn thutheitu ka nei. Pa in ka ṭuan ṭheh dingah i pek mi ka ṭuan mipawl rori hin Pa in i thlah ti a theihter. ³⁷ Cule i thlahtu ka Pa in ka thuhla a theihter zo. Ziangtik hmanah a aw nan thei lo ih, a pianhmang khal nan hmu lo. ³⁸ A thlah mi nan zum lo ruangah a thu khal nanmah ah a um ringring lo. ³⁹ “Cathianghlim sungah kumkhawnunnak umih nan ruah ruangah, Cathianghlim ngan mi ṭha zetin nan hawl ciamco. Cucu ka thuhla theihtertu a si. ⁴⁰ Asinan nunnak nei dingah ka hnenih rat nan duh lo. ⁴¹ “Minung hnen ihsin sunlawihnak ka cohlang lo. ⁴² Asinan nanmah ah Pathian duhdawtnak nan nei lo ti ka lo thei. ⁴³ Ka Pai hmin in ka ra ih, nannih in in cohlang lo. Midang cu amai hmin in ra sehla nan rak cohlang ding. ⁴⁴ Pakhat le pakhat hnen ihsin sunlawihnak nan cohlang. Asinan Pathian pakhat lawng hnen ihsin a ra mi sunlawihnak cu nan hawl lo asile ziangtin nan zum thei ding? ⁴⁵ “Pai hnenah kei in sual ka lo puh ding tiah ruat hlah uh. Sual lo puhtu mi pakhat a um, cucu nan rinsan mi Mawsi a si. ⁴⁶ Ziangahtile, Mawsi in ka thuhla a ngan. Mawsi nan zum asile kei khal in zum ding. ⁴⁷ Asinan, a ngan mi nan zum lo asile ziangtin ka thupawl cu nan zum thei ding?” tiah a ti.

¹ Hi thilpawl hnuah Jesu cu Ṭaiberias Tili an ti mi Galili Tili khatlam ralah a va feh. ² Midamlopawl parih a rak tuah mi hminsinnakpawl kha an hmuh ruangah mi burpi in amah cu an thlun. ³ Cule Jesu cu tlang parah a hung kai ih, cu tawkah a dungthluntupawl thawn an totlang. ⁴ Cule Jew-pawlih Lantapuai ti mi cu a nai thlang. ⁵ Cule Jesu cu khua a cuan ih a hnen lam panin mi burpi ra luihlo kha a hmuh tikah, Filip hnenah, “An ei ding sang khuiah kan lei ding?” tiah a ti. ⁶ Asinan cu mi cu Filip hniksaknak ih a ṭawng mi a si. Ziangahtile, a tuah ding mi cu amah in a thei cia. ⁷ Filip in a hnenah, “Mi pakhat in malte ciar co ding hmanah dinari paisa zahnih man, sang cun a daih lo ding,” tiah a sang. ⁸ A dungthluntu lakih pakhat, Simon Peter-ih naupa Andru in Jesu hnenah, ⁹ “Barli sang hlawm nga le nga fa te pum hnih neitu nauhakpate hi tawkah a um. Asinan hi tluk minung tampi hrangah ziang a si tham cuang ding maw?” tiah a ti. ¹⁰ Cule Jesu in, “Mipi kha toter hnik uh,” tiah a ti. Cui hmun ah hrampi tampi a um. Curuangah mipi cu an to. An zaten patling thawngnga hrawng an si. ¹¹ Jesu in sang hlawmpawl cu a la ih, lungawithu a sim hnuah dungthluntupawl hnenah a zem. Cule dungthluntupawl in cu tawkih a to mipawl hnenah an zemsin. Cuvek thothoin nga khal cu mipipawlih duh zat in an zem. ¹² An ei khawp hnuah Jesu in a dungthluntupawl hnenah, “Zianghman hloral lak men lo dingin hlah mi nepnawi cu sarkhawm uh,” tiah a ti. ¹³ Curuangah, barli sang hlawm nga ihsin an eihlah mi nepnawi cu an sarkhawm ih, bawmte hleihnih a khat. ¹⁴ Curuangah, mipi in Jesu ih tuah mi hminsinnak an hmuh tikah, “Leitlun ih a ra ding mi profet cu hi pa hi a si rori,” tiah an ti. ¹⁵ An ra ding ih hranhramin siangpahrang siter dingah in ra hruai ding ti Jesu in a theih ruangah tlang parah amahte lawng a fehsal. ¹⁶ Cule khua a sim tikah a dungthluntupawl cu tili ah an vung suk. ¹⁷ Cule lawng sungah an lut ih, tili paltlang in Kapernaum khaw lam panin an feh. Khua a thim zo nan Jesu cu an hnenah a ra thleng hrih lo. ¹⁸ Cule thlipi nasazetin a hrang ih tilet a tho ciamco. ¹⁹ Cuti cun peng thum peng li hrawng an hei hlau hnuah tili parah an lawng lam panih Jesu a rat rero kha an hmu ih an ṭih. ²⁰ Asinan anih in an hnenah, “Keimah sokhaw ka si; ṭih hlah uh,” tiah a ti hai. ²¹ Cule lawng sungah Jesu cu lungawi zetin an toter ih an lawng khal an fehnak ding ram ah a thleng lohli. ²² A thaisun ah, tili khatlam ralih a ding mi mi burpi in cu tawkah a dungthluntupawl an luhnak siarlo a dang lawng fa te a um lo tile Jesu cu a dungthluntupawl thawn lawng fa te in a feh lo, asinan a dungthluntupawl lawng an feh, ti kha an thei. ²³ Asinan, Bawipa in lungawithu a sim hnuih sang an eikhawmnak hmun kiangah Ṭaiberias khaw lam ihsin a dang lawng fa tepawl an ra thleng. ²⁴ Mi burpi in Jesu le a dungthluntupawl kha cu tawkah an um lo ti an hmuh ruangah cui lawngpawl sungah an lut ih, Jesu hawl dingin Kapernaum khua ah an feh. ²⁵ Jesu cu tili khatlam ralih an hmuh tikah annih in a hnenah, “Rabbi, ziang tikah hi tawkah na rat?” tiah an ti. ²⁶ Jesu in a sang ih an hnenah, “Thungaiin, thungaiin ka lo sim, hminsinnakpawl nan hmuh ruangah si loin sang nan ei ih nan puar ruangah in hawl a si. ²⁷ A siatral thei mi rawl hrangah hna ṭuan hlah uh. Asinan, Minung Fapa in a lo pek ding mi kumkhawnunnak tiangih a daih mi rawl hrangah ṭuan sawn uh. Ziangahtile, Minung Fapa parah Pa Pathian in a tacik a khen zo,” tiah a ti hai. ²⁸ Curuangah, annih in a hnenah, “Pathian hna tla kan ṭuan theinak dingah ziang kan tuah ding?” tiah an ti. ²⁹ Jesu in a sang hai ih an hnenah, “Pathian hnaṭuan cu a thlah mi pa zum hi a si,” tiah a ti hai. ³⁰ Curuangah annih in a hnenah, “Cumi cu kan hmuh ih, nangmah kan lo zum theinak dingah ziang hminsinnak in hmuh ding? Ziang saw na tuah ding? ³¹ ‘An ei dingah van ihsin sang a pek hai,’ tiih ngan vek khan kan pupapawl cun ramṭhing ah mana an ei a si,” tiah an ti. ³² Curuangah, Jesu in an hnenah, “Thungaiin, thungaiin ka lo sim, Mawsi in van sang a lo pe lo. Asinan, ka Pa cun van sang ngaingai a lo pe a si. ³³ Ziangahtile, Pathian-ih sang cu van ihsin a rung mi a si ih, leitlun mipawl hnenah nunnak a pe,” tiah a ti. ³⁴ Curuangah, annih in a hnenah, “Bawipa cui sang cu in pe ringring ṭheu aw,” tiah an ti. ³⁵ Jesu in an hnenah, “Keimah cu nunnak sang ka si. Ka hnenih a ratu cu a ril a rawng dah hrimhrim lo ding. Cule keimah i zumtu cu ziangtik khalah a ti a hal dah hrimhrim lo ding. ³⁶ Asinan, nan hnenah ka lo sim, nannih khalin in hmu zo nan in zum lo. ³⁷ Ka Pa in ka hnenih in pek mi hmuahhmuah cu ka hnenah an ra ding. Cule ka hnenih ratu cu ka dawisuak hrimhrim lo ding. ³⁸ Ziangahtile, keimai duhzawng tuah dingah si loin, i thlahtupai duhzawng tuah dingah van ihsin ka rung ṭum a si. ³⁹ I thlahtu Paih duhzawng cu hihi a si, i pek mipawl hmuahhmuah pakhat hman hloter loin, ni netabikih anmah ka thawhter ding hi a si. ⁴⁰ Zokhal Fapa a hmutu le a zumtu cu kumkhawnunnak an neih ding le ni netabikih anmah ka thawhter ding cu i thlahtupai duhzawng a si,” tiah a ti. ⁴¹ Jesu in, “Kei cu van ihsin a ra mi sang ka si,” a ti ruangah Jew-pawl cu amai thuhla ah an phunzai ruri. ⁴² Annih in, “Hi pa cu Joseph-ih fapa Jesu, a nu le a pa kan theih mi kha a si lo maw? Ziangtin, ‘Van ihsin ka rung ṭum,’ tiah a ti thei,” tiah an ti. ⁴³ Curuangah Jesu in a sang hai ih an hnenah, “Nan lakah phun rero hlah uh. ⁴⁴ I thlahtu Pa in a hip lo ah cun ka hnenah zohman an ra thei lo. Cule ni netabikah amah cu ka thoter ding. ⁴⁵ Profetpawlih cabu sungah, ‘An zaten Pathian in a zirh ding,’ tiih ngan a si. Mi zokhal Pa hnen ihsin a rak theitu le a rak zirtu cu ka hnenah a ra. ⁴⁶ Zohman in Pa an hmu dah lo. Pathian hnen ihsin a ratu lawngin Pa a hmu a si. ⁴⁷ Thungaiin, thungaiin ka lo sim, keimah i zumtu cun kumkhawnunnak a nei. ⁴⁸ Keimah hi nunnak sang cu ka si. ⁴⁹ Nan pupapawl cu ramṭhing ah mana an ei nan an thi. ⁵⁰ Himi hi van ihsin a rung ṭum mi sang a si. Cutin, zokhal a eitu cu a thi lo ding. ⁵¹ Kei cu van ihsin a rung ṭum mi sang nung ka si. Zokhal hi sang a ei asile kumkhua in a nung ding. Cule ka pek ding mi sang cu leitlun mipawl nunnak an ngah theinak ding hrangih ka pek mi ka taksa hi a si,” tiah a ti. ⁵² Curuangah, Jew-pawl in, “Kan ei dingah a taksa cu ziangtin in pe thei ding?” tiah pakhat le pakhat an elaw. ⁵³ Curuangah, Jesu in an hnenah, “Thungaiin, thungaiin ka lo sim, Minung Fapa-ih taksa nan ei lo ih a thisen nan in lo asile nanmahte in nunnak nan nei lo. ⁵⁴ Ka taksa a ei ih, ka thisen a intu cu kumkhawnunnak a nei. Cule ni netabikah amah cu ka thoter ding. ⁵⁵ Ziangahtile, ka taksa cu rawl ngaingai a si ih, ka thisen khal in ding taktak a si. ⁵⁶ Ka taksa a ei ih, ka thisen a intu cu keimah ah a um ringring ih, kei khal amah ah ka um ringring. ⁵⁷ A nung mi Pa in i thlah ih, Pa zarih nung ka si vekin, keimah i eitu cu, keimah zarin a nung ve ding. ⁵⁸ Himi hi van ihsin a ra mi sang a si. Nan pupapawl in mana an rak ei nan an thih vek kha a si lo. Hi sang a eitu cu kumkhua in a nung ding,” tiah a ti. ⁵⁹ Hi mipawl cu Kapernaum khua sinakok ih thu a zirh laiih a sim mipawl an si. ⁶⁰ Cumi cu a dungthluntupawl in an theih tikah, “Hi mi thu cu thu har a si, zo in a theithiam thei ding?” tiah a dungthluntu tampi in an ti. ⁶¹ Jesu in cu mi thu ah a dungthluntupawl an phunzai ti a theih tikah an hnenah, “Hi mi in a lo bahter maw si? ⁶² Minung Fapa hi a hlanih a rak umnak hmun ih a kaisoh hmu sita ula ziang nan bang ding? ⁶³ Nunnak petu cu Thlarau a si. Taksa cu zianghman a ṭhahnem lo. Nan hnenih ka sim mi thupawl tla hi thlarau a si ih, nunnak khal a si. ⁶⁴ Asinan, nanmah lakah mi hrekkhat cun nan zum lo,” tiah a ti. Jesu in atir ihsin a zumlotu cu zo an si tile zo in a phiarsawm ding ti a theih ruangah cutiih a tinak a si. ⁶⁵ Cule anih in, “Curuangah, ka lo sim a si. Ka Pa in a hnenah titheinak a pek lo ah cun, mi zohman ka hnenah a ra thei lo ding,” tiah a ti. ⁶⁶ Cui can thawkin, a dungthluntu tampi cu an kir ih, amah an thlun nawn lo. ⁶⁷ Curuangah, Jesu in a dungthluntu hleihnihpawl hnenah, “Nannih teh fehhlo nan duh maw?” tiah a ti hai. ⁶⁸ Cule Simon Peter in a hnenah, “Bawipa, zawi hnenah so kan feh ding? Nang in kumkhawnunnak thu tla na nei. ⁶⁹ Nangmah cu Khrih, a nung mi Pathian Fapa na si ti kan lo zum zo ih, a theih khal kan lo thei zo,” tiah a ti. ⁷⁰ Jesu in an hnenah, “Nannih dungthluntu hleihnihpawl hi ka lo hril mi nan si lo maw? Asinan, nan lakih pakhat cu Diabol a si,” tiah a sang. ⁷¹ Simon-ih fapa, Judas Iskariot thuhla a simnak a si. Ziangahtile, anih cu dungthluntu hleihnih lakih pakhat amah phiarsawmtu ding pa a si.

¹ Cu mipawl hnuah Jesu cu Galili peng a hrut vivo. Jew-pawl in amah cu that dingin an hawl ruangah Judia peng hrut cu a duh lo. ² Cui canah Jew-pawlih biakbuk puai cu a nai thlang. ³ Curuangah a naulepawl in a hnenah, “Na dungthluntupawl in na tuah mi thilpawl tla an hmuh theinak dingah hi hmun hi suahsan aw la, Judia peng ah feh aw. ⁴ Ziangahtile, mipi ih theih mi si a duhtu zohman in athupten thil ziangkhal a tuah dah kel lo. Hi thilpawl na tuah asile leitlun mipawl hnenah nangmah le nangmah langawter aw,” tiah an ti. ⁵ Ziangahtile, a naulepawl hmanin amah an zum lo. ⁶ Curuangah Jesu in an hnenah, “Ka can cu a ra thleng hrih lo. Asinan nannih ih can cu a remcang ringring. ⁷ Leitlun mipawl in an lo hua thei lo. Asinan kei cu in hua. Ziangahtile, an thilti mipawl tla cu a ṭha lo a si tiih ka theihter ruangah a si. ⁸ Hi puai ah cun va feh uh. Ka can a kim hrih lo ruangah kei cu hi puai ah ka feh hrih lo ding,” tiah a ti hai. ⁹ An hnenih cui thilpawl a sim hnuah Galili ah a tangta. ¹⁰ Asinan, a naulepawl puai ih an feh hnuah anih khal puai ah cun langhngan loin athupten a feh ve. ¹¹ Curuangah Jew-pawl in puai ah amah cu an hawl, “Khuiah a um?” tiah an ti. ¹² Cule mi burpi cu amai thuhla ah an phunzai supso rero. Mi hrekkhat in, “Anih cu miṭha a si,” an ti. Midangpawl in, “Miṭha a si lo, mipi a fehpengter,” tiah an ti. ¹³ Asinan Jew-pawl an ṭih ruangah zohman in a thuhla cu langhnganin an rel lo. ¹⁴ Puai can laifangah Jesu cu temple kulh sungah a hung so ih thu a zirh. ¹⁵ Jew-pawl cu Jesu parah an mang a bang zet ih, “Ziangtin saw hi pa hin zir loin ca a siar thei?” tiah an ti. ¹⁶ Jesu in a sang ih an hnenah, “Ka zirh mi hi keimai ta a si lo, i thlahtui ta a si sawn. ¹⁷ Mi zokhal i thlahtui duhzawng tuah a duh asile ka zirhnak cu Pathian hnen ihsin maw, keimai palung in ka sim ti a thei ding. ¹⁸ Mai palung suak mi thu a simtu cun amah le amah sunlawihawk a duh. Asinan a thlahtu sunlawih a duhtu cu midik a si. Amah ah dingfellonak a um lo. ¹⁹ Mawsi in Dan a lo pe a si lo maw? Nanmah lakah pakhat hmanin Dan nan thlun lo. Ziangah thah dingin in hawl?” tiah a ti hai. ²⁰ Mipi in an sang ih, “Khawsia na nei a si hi! Zo in that dingin a lo hawl?” tiah an ti. ²¹ Jesu in a sang ih an hnenah, “Hna pakhat ka ṭuan ih nan zaten nan mang a bang. ²² Mawsi in nan hnenah serhtan dingin thu a lo pe ih, Sabbath Ni ah mipa serh nan tan. Asinan serhtannak cu Mawsi hnen ihsin a si lo ih, pupapawl hnen ihsin a si. ²³ Sabbath Ni ah mi in serh an tan a si khalle Mawsi Dan a pahbal si lo ah cun, Sabbath Ni ah mi pakhat a pumpuluk in ka damter ruangah ziangah ka parah nan thin a heng? ²⁴ Nan hmuh mi in thuṭhen hlah uh. Dingfelnak thuṭhennak in thuṭhen sawn uh,” tiah a ti. ²⁵ Curuangah, Jerusalem ihsin mi hrekkhatpawl in, “Himi hi thah dingih an hawl mi pa kha a si lo maw? ²⁶ Asinan, zoh hnik uh, ralṭha zetin thu a sim rero ih, a hnenah zianghman an ṭawng lo. Hruaitupawl in hi pa hi Khrih taktak a si tiah an theingah ngaingai teh a si pei maw aw? ²⁷ Asinan khui tawkin hi pa a ra ti le kan thei fawn. Khrih a rat tikah cun zohman in khui tawkin a ra ti an thei lo ding,” tiah an ti. ²⁸ Curuangah, Jesu in temple kulh sungih thu a zirh laiah a au ih, “Keimah cu in thei ih, khui tawk ihsin ka ra ti khal nan thei. Keimai palung in ka ra lo. Asinan i thlahtu cu a dik a si. Amah cu nan thei lo. ²⁹ Asinan keimah cu amai hnen ihsin ka si ruangah amah cu ka thei. Anih in i thlah a si,” tiah a ti. ³⁰ Curuangah, amah kaih theinak ding lamzin an hawl. Asinan amai can a thlen hrih lo ruangah zohman in amah cu an kai lo. ³¹ Asinan mi burpi sung ihsin mi tampi in amah an zum ih, “Khrih a rat tikah hi pai hminsinnak a tuah mipawl hnakin tamdeuh a tuah cuang ding maw?” tiah an ti. ³² Jesui thuhla ah mipi an phunzai ruri ti kha Farasipawl in an thei. Cule amah kai dingah Farasipawl le puithiam sangpawl in temple kiltupawl an thlah. ³³ Curuangah, Jesu in an hnenah, “Nan hnenah malte sung ka um hrih ding. Cule i thlahtui hnenah ka feh ding. ³⁴ In hawl ding ih in hmu lo ding. Ka umnak hmun ah nan ra thei lo ding,” tiah a ti. ³⁵ Curuangah, Jew-pawl cu anmah le anmah lakah, “Kan hmuh theilonak ding hmun khui tawkah saw feh a tum? Grikmipawl zirh dingin Grikmipawl lakih um ram dangih Jew-pawl hnenih feh teh a tum a si pei maw? ³⁶ ‘In hawl ding ih in hmu lo ding. Ka umnak ding hmun ah nan ra thei lo ding,’ a ti mi hi ziang a tinak a si pei?” tiah an tiaw. ³⁷ Ni ropi a si mi puai ni netabik ah Jesu cu a ding ih a au, “Zokhal a ti a hal asile ka hnenah ra seh la in seh. ³⁸ Keimah i zumtu cu Cathianghlim ih a sim vekin, ‘A sungril ihsin a nung mi tiva a luangsuak ding,’” tiah a ti. ³⁹ Asinan, himi cu amah zumtupawl in an co cing ding mi Thlarau thu a sim mi a si. Ziangahtile, Jesu cu sunlawih a si hrih lo ruangah Thlarau Thianghlim cu pek a si hrih lo. ⁴⁰ Curuangah, mi burpi lak ihsin mi tampi in cui ṭawngkam an theih tikah, “Hi pa cu profet a si rori,” tiah an ti. ⁴¹ Midangpawl in, “Hi pa hi Khrih a si,” an ti. Asinan a dangpawl in, “Galili ihsin Khrih cu a ra suak ding maw? ⁴² Cathianghlim in, Khrih cu David tesinfa sungin a ra ding ih, David a rak um dahnak Bethlehem khua in a ra ding, tiah a ti a si lo maw?” tiah an ti. ⁴³ Curuangah, amai ruangah mipi lakah ṭhenawknak a um. ⁴⁴ Mi hrek in amah cu kaih an duh. Asinan zohman in amah cu an kai lo. ⁴⁵ Curuangah temple kiltupawl cu puithiam sangpawl le Farasipawl hnenah an kirsal. Cule annih in temple kiltupawl hnenah, “Ziangah nan rak hruai lo?” tiah an ti. ⁴⁶ Temple kiltupawl in, “Zohman in hi pa vekin thu an sim dah lo,” tiah an ti. ⁴⁷ Curuangah, Farasipawl in an hnenah, “Nannih khal a lo fehpengter zo maw si? ⁴⁸ Hruaitupawl lakah le Farasipawl lakah pakhat talin amah an zum maw? ⁴⁹ Asinan, Dan thei lo hi mi burpi cu camsiat an si,” tiah an ti. ⁵⁰ Zan ih Jesu hnenih a fehtu Nikodemas khal kha anmah Farasipawl lakih mi pakhat a si. ⁵¹ Anih in an hnenah, “Kan Dan in mi pakhat amai kamsuak thu thei hmaisata lo le ziang a tuah ti thei hmaisata loin thu a ṭhen dah kel maw si?” tiah a ti. ⁵² Annih in an sang ih a hnenah, “Nangmah teh Galili peng mi na si maw si? Hawl in zoh hnik hman, Galili ihsin profet a suak lo ti na hmu ding,” tiah an ti. ⁵³ Cule mi kip anmai inn cio ah an tlung.

¹ Cule Jesu cu Olif Tlang ah a feh. ² Khawvan zawngah Jesu cu temple kulh sungah a fehsal ih, mi hmuahhmuah cu a hnenah an ra. Cule a to ih thu a zirh hai. ³ Danzirhtupawl le Farasipawl in a uiret lai an kaih mi nunau pakhat a hnenah an hruai ih, a laifangah an ret. ⁴ Cule annih in Jesu hnenah, “Zirhtupa, hi nu hi a uiret lai roriih kaih mi a si. ⁵ Dan sungah hivek mi cu lung ih dengthat dingin Mawsi in thu in pe. Asinan, nang in teh ziangtin na ti ding?” tiah an ti. ⁶ Hitiih an suhnak cu Jesu kha sual an puh theinak dingah an hniksak a si. Asinan Jesu cu an thusim mi thei lo vekin a kun ih a kutzung in leilung ah ca a ngan. ⁷ Thu an suh peh rero thotho ruangah Jesu cu a hung ding ih an hnenah, “Nan lakih sual neilotu in a hmaisabikah nunaunu cu lungto in deng seh,” tiah a ti. ⁸ Cule a kunsal ih, leilung ah ca a ngansal lala. ⁹ Asinan, cui thu an theih tikah an sia le ṭha theihnak in thil an tisualzia a theihter hai ih, upabik ihsin nautabik tiang pakhat hnu pakhat an suak. Jesu amah lawng a tang ih, nunaunu cu a laifangah a ding. ¹⁰ Jesu cu a hung din tikah nunaunu lawng a hmu. Cule a hnenah, “Nunau, sual a lo puhtupawl kha khuiah saw an um? Zohman in thiamlo an lo coter lo maw?” tiah a ti. ¹¹ Cule nunaunu in, “Bawipa zohman in in coter lo,” tiah a ti. Cule Jesu in a hnenah, “Kei khalin thiamlo ka lo coter lo. Feh aw la, va sual nawn hlah,” tiah a ti. ¹² Cu mi hnuah, Jesu in mipi hnenah, “Keimah cu leitlun tleu ka si. Keimah i thluntu cu thim ah a feh dah lo ding ih, nunnak tleu a nei sawn ding,” tiah a ti. ¹³ Curuangah, Farasipawl in a hnenah, “Nangmai thu cu nangmah in na theihter. Na theihter mi thu cu a diklo,” tiah an ti. ¹⁴ Jesu in a sang hai ih an hnenah, “Keimai thu cu keimah in theihter khal ningla, ka theihter mi thu cu a dik a si. Ziangahtile, khui tawkin ka ra tile khui tawkah ka feh ding ti ka thei. Asinan nannih cun khui tawkin ka ra ih, khui tawkah ka feh ding ti nan thei lo. ¹⁵ Nannih cun minung dan in thu nan ṭhen. Kei cun zohman thu ka ṭhen lo. ¹⁶ Asinan, thu ka ṭhen asile ka thuṭhen mi cu a dik a si. Ziangahtile, keimah lawng ka si lo ih, keimah le i thlahtu ka Pa cu kan lungrual a si. ¹⁷ Nan Dan sung khalah theihpitu pahnih an um asile a dik a si tiah ngan a si. ¹⁸ Keimah cu keimai thu theihtertu ka si ih, i thlahtu Pa khalin ka thu a theihter ve a si,” tiah a ti. ¹⁹ Curuangah, annih in a hnenah, “Na pa cu khuiah a um?” tiah an ti. Cule Jesu in, “Nannih in keimah si seh, ka Pa si seh nan thei lo. Keimah in thei uh la ka Pa khal nan rak thei zo ding,” tiah a sawn hai. ²⁰ Jesu in temple kulh sungih thu a zirh tikah, amah cu thawhhlawm retnak pindan hmaiah a um. Amai can a thlen hrih lo ruangah zohman in an kai lo. ²¹ Curuangah, Jesu in an hnenah, “Ka fehhlo ding ih, nannih in in hawl ding. Nan sualnak ah nan thi ding. Ka fehnak ding hmun ah nan feh thei ve lo ding,” tiah a tisal. ²² Curuangah Jew-pawl in, “ ‘Ka fehnak hmun ah nan feh thei lo ding,’ tiah in ti mi hi, amah le amah a thataw ding a si pei maw?” tiah an ti. ²³ Cule anih in an hnenah, “Nannih cu thuai lam mi nan si. Kei cu tlun lam mi ka si. Nannih cu leitlun mi nan si ih, kei cu hi leitlun mi ka si lo. ²⁴ Curuangah nan sualnakpawl ah nan thi ding tiah nan hnenah ka lo sim. Ziangahtile, keimah cu amah ka si ti nan zum lo asile nan sualnakpawl ah nan thi ding,” tiah a ti. ²⁵ Curuangah, annih in a hnenah, “Zo saw na si?” tiah an ti. Cule Jesu in an hnenah, “Keimah cu atir ihsin nan hnenih ka lo simvek cekci kha ka si. ²⁶ Nanmai thuhla ah rel ding le thuṭhen ding tampi ka nei. Asinan keimah i thlahtu cu midik a si. Amai hnen ihsin ka theih mipawl cu leitlun mipawl hnenah ka sim,” tiah a ti. ²⁷ An hnenih Pai thuhla a sim mi cu an theithiam lo. ²⁸ Curuangah, Jesu in an hnenah, “Nannih in Minung Fapa nan khai hnuah keimah cu amah ka si ti nan thei ding. Keimai palung in zianghman ka tuah lo ih, ka Pai i zirh vekin cui thilpawl cu ka sim sawn a si ti nan thei ding. ²⁹ Keimah i thlahtu cu ka hnenah a um. Amai lungawi zawng thilpawl ka tuah ringring ruangah Pa cun keimah lawng i tan lo,” tiah a ti. ³⁰ Cui thupawl a ṭawng rero laiah mi tampi in amah an zum. ³¹ Curuangah, Jesu in amah zumtu Jew-pawl hnenah, “Ka thu ih nan um ringring asile ka dungthluntu taktak nan si. ³² Thutak nan thei ding ih, thutak cun a lo luatter ding,” tiah a ti hai. ³³ Annih in, “Kannih cu Abraham-ih tesinfa kan si. Zo-ih sal hmanah kan tang dah lo. Ziangtin saw, ‘Nan luat ding,’ na ti thiam?” tiah an sang. ³⁴ Jesu in an hnenah, “Thungaiin, thungaiin ka lo sim, zokhal sual a tuahtu cu sualih sal a si. ³⁵ Sal cu inn ah kumkhua a um ringring lo. Fapa cu kumkhua in a um ringring a si. ³⁶ Curuangah, Fapa in a lo luatter asile nan luat ngaingai ding. ³⁷ Abraham tesinfa nan si ti ka lo thei. Asinan, nan sungah ka thu in hmunram a neih lo ruangah keimah cu that dingin in hawl. ³⁸ Ka Pa hnenih ka hmuh mi ka sim a si. Asinan, nannih cun nan pa hnenih nan hmuh mi nan tuah,” tiah a sawn hai. ³⁹ Annih in an sang ih, “Kan pa cu Abraham a si,” tiah an ti. Jesu in an hnenah, “Nanmah cu Abraham-ih tesinfa nan sile Abraham-ih tuah mi nan tuah ve ding a si. ⁴⁰ Keimah cu Pathian hnen ihsin ka theih mi thutak nan hnenih lo simtupa ka si. Asinan atu ah nannih cun thah in duh. Abraham cun cuvekin a tuah lo. ⁴¹ Nannih cu nan pai tuah mi nan tuah a si,” tiah a ti hai. Curuangah, annih in a hnenah, “Kannih cu nu le pa sualnak ih hrin mi kan si lo. Pa pakhat Pathian kan nei a si,” tiah an ti. ⁴² Curuangah Jesu in an hnenah, “Pathian cu nan pa asile keimah in rak duhdaw ding. Ziangahtile, kei cu Pathian hnen ihsin ka ra suak ih, leitlun ah ka ra. Keimai thuneihnak in ka ra lo, anih in i thlah sawn a si. ⁴³ Ziangruangah so ka sim mi hi nan theihthiam lo? Ziangahtile, ka thu nan rak pawm thei lo ruangah a si. ⁴⁴ Nannih cu nan pa Diabol-ih ta nan si. Nan pai cakhiar zekzeknak tuah nan duh. Anih cu a thawk ihsin tualthat a si. Amah ah thutak a um lo ruangah anih cu thutak ah a ding lo. Anih cu thuphanpertu a si ih thuphanih pa a si. Curuangah thu diklo a rel tikah amai mizia vekin a rel a si. ⁴⁵ Sikhalsehla thutak ka sim ruangah nannih cun keimah in zum lo. ⁴⁶ Nanmah lakah zo talin ka sualnak in theihter thei maw? Asinan, thutak ka sim asile, ziangah saw in zum lo? ⁴⁷ Pathian hnen ihsin a si mi cun Pathian thu a ngaithla. Pathian hnen ihsin nan si lo ruangah nannih cun Pathian thu nan ngaithla lo,” tiah a ti. ⁴⁸ Curuangah, Jew-pawl in Jesu cu an sang ih, “Nang cu khawse nei, Samaria-mi na si kan lo ti tikah kan tidik a si lo maw?” tiah an ti. ⁴⁹ Jesu in, “Khawsia ka nei lo. Kei cun ka Pa ka sunlawih nan, nannih cun in sunlawih ve lo. ⁵⁰ Asinan, keimai sunlawinak ka hawl lo. Mi pakhat in ka sunlawinak a hawl ih, amah cu thuṭhentu a si. ⁵¹ Thungaiin, thungaiin ka lo sim, zokhal ka thu a thlun asile thihnak a hmu dah hrimhrim lo ding,” tiah a ti. ⁵² Curuangah Jew-pawl in Jesui hnenah, “Tu cun khawsia na nei ti kan lo thei. Abraham le profetpawl cu an thi zo. Nang in, ‘Zokhal ka thu a thlun asile thihnak a tep dah hrimhrim lo ding,’ tiah na ti. ⁵³ Nang cu a thi zo mi kan pa Abraham hnakin na ropisawn maw si? Profetpawl khal an thi zo. Zo ah so nangmah le nangmah na tuahawk?” tiah an ti. ⁵⁴ Jesu in, “Keimah le keimah ka sunlawihawk asile ka sunlawinak cu zianghmanlo a si. Ka Pa cu keimah i sunlawihtu a si. Nannih in amah cu kan Pathian a si tiah nan ti. ⁵⁵ Nannih in amah cu nan thei lo. Asinan kei cun amah cu ka thei. ‘Amah cu ka thei lo,’ ka ti asile nanmah vekin kei khal thuphanper ka si ding. Asinan amah cu ka thei ih a thu ka thlun. ⁵⁶ Nan pa Abraham cu ka ni hmu dingah a hlawptlo zet, cule a hmungah ih a lung a awi,” tiah a sang hai. ⁵⁷ Curuangah Jew-pawl in a hnenah, “Nang cu kum sawmnga hman na kim hrih lo ih, Abraham cu na hmu dah zo maw si?” tiah an ti. ⁵⁸ Jesu in an hnenah, “Thungaiin, thungaiin ka lo sim, Abraham um hlanah ka rak um zo,” tiah a ti hai. ⁵⁹ Curuangah amah deng dingah lungto an sar. Asinan Jesu cu a thupaw ih, temple kulh sungin an laifang ihsin a suak ih, cutin a fehhlo.

¹ Jesu cu cutiih a feh rero laiah suahkeh mitcawpa pakhat a hmu. ² Cule a dungthluntupawl in a hnenah, “Rabbi, hi pa in sual a tuah ruangah maw, asilole a nu le pai sual ruangah saw a suah ihsin a mit a cawt?” tiah an sut. ³ Jesu in, “Hi pai sual ruangah si seh, a nu le pai sual ruangah si seh a si lo. Amah ah Pathian hnaṭuanpawl langternak dingah a si sawn. ⁴ Sun a si laiah i thlahtui hna ka ṭuan tengteng a ṭul. Zohman ih hna an ṭuan thei lo can, zan a thleng ding. ⁵ Leitlun ih ka um sung cu keimah hi leitlun mipawlih tleu ka si,” tiah a ti. ⁶ Cui thupawl a rel hnuah, leilung ah a cil a phui ih, a cil in leibek a tuah ih, acui leibek cu mitcawpai mit ah a man. ⁷ Mitcawpai hnenah cun, “Feh aw la, Siloam tili ah na mit va khawlh aw,” tiah a ti. Siloam ih sullam cu ‘Thlah’ tinak a si. Curuangah cu pa cu a feh ih a va khawlh. Cule khawhmu in a tlung. ⁸ Curuangah cu tawkih cu pa mitcaw ih a rak hmu dahtu le a inhnenpawl in, “Hi pa cu tohmun ih kutdawhpa kha a si lo maw?” tiah an ti. ⁹ Mi hrekkhatpawl in, “Amah hi a si ko,” tiah an ti. Asinan midangpawl in, “Amah hi kha pa a bang men,” tiah an ti. Mitcawpa in, “Keimah hi amah kha ka si ko,” tiah a ti. ¹⁰ Curuangah, annih in a hnenah, “Ziangtin na mit a vang?” tiah an ti. ¹¹ Anih in a sang hai ih, “Jesu an ti mi pa in leibek a tuah ih ka mit ah in man. Cule anih in ka hnenah, ‘Siloam tili ah feh aw la, na mit va khawlh aw,’ i ti. Ka va feh ih ka khawlh tikah khua ka hmu thei,” tiah a ti. ¹² Curuangah, annih in, “Cu pa cu khui tawkah a um?” tiah an ti. Anih in, “Ka thei lo,” tiah a ti. ¹³ Annih in hi hlanih a mitcaw dah pa cu Farasipawl hnenah an hruai. ¹⁴ Jesu in leibek a tuah ih a mit a vanter ni cu Sabbath Ni a si. ¹⁵ Farasipawl khalin cu pa cu thu an sutsal. “Ziangtin khua na hmu thei?” tiah an ti. Cule anih in an hnenah, “Anih in ka mit ah leibek i man. Cule ka mit tla cu ka khawlh ih khua ka hmu,” tiah a ti. ¹⁶ Curuangah, Farasi hrekkhatpawl in, “Hi pa cu Sabbath Ni a ulh lo ruangah Pathian hnen ihsi ra mi a si lo,” an ti. A dangpawl in, “Hivek hminsinnak tla cu misual cun ziangtin a tuah thei ding?” tiah an ti. Cule anmai lakah ṭhenawknak a um. ¹⁷ Mitcawpa ih hnenah cun, “Na mit a lo vanter ruangah hin amah cu ziangtin na ruat?” tiah an tisal. Anih in, “Anih cu profet a si,” tiah a ti. ¹⁸ Asinan, Jew-pawl in mit ra vang pai nu le pa an kawh hlan sung cu a mit a rak caw dah ih khua a rak hmu thei a si ti amai thuhla cu an zum lo. ¹⁹ Cule annih in an hnenah an sut ih, “Hi pa hi nan fapa, a suah ihsi a mit a caw nan ti mi pa kha a si maw? Ziangtin atu ah khua a hmu thei?” tiah an ti. ²⁰ A nu le pa in an hnenah, “Hi pa hi kan fapa, a suah ihsi mitcaw a si ti khal kan thei. ²¹ Asinan atu ah ziangtin khua a hmu thei tile zo in a mit a vangter ti kan thei lo. Upa a si ve thlang, amah sut uh. Amai thuhla cu amah in a rel ding,” tiah an ti. ²² Jew-pawl an ṭih ruangah a nu le pa in cui thilpawl an ṭawngnak a si. Ziangahtile, Jew-pawl cun zokhal Jesu cu Khrih a si tiih a pawm asile sinakok sung ihsin kan dawisuak ding tiah lungkimtlangnak an nei zo. ²³ Cu mi ruangah, a nu le pa in, “Upa a si ve thlang, amah sut uh,” tiah an ti. ²⁴ Curuangah hi hlanih a mit a rak caw dah pa cu a vei hnihnak an kosal. Cule a hnenah, “Pathian thangṭhat aw. Hi pa cu misual a si ti kan thei,” tiah an ti. ²⁵ Curuangah, anih in a sang hai ih, “Misual a si le si lo ka thei lo. Thil pakhat ka thei, mitcaw ka rak si dah ih, atu ah khua ka hmu,” tiah a ti hai. ²⁶ Cule annih in a hnenah, “Anih in na parah ziang a tuah? Ziangtin na mit a lo vangter?” tiah an sutsal. ²⁷ Anih in an hnenah, “Ka lo sim zo nan, nan rak ngaithla lo. Ziangruangah theihsal nan duh? Nannih khal hi pai dungthluntu si ve nan duh maw si?” tiah a sang hai. ²⁸ Curuangah, annih in amah cu an zawkzet ih, “Nangmah cu hi pai dungthluntu na si. Asinan kannih cu Mawsi-ih dungthluntu kan si. ²⁹ Pathian in Mawsi a bia ti kan thei. Asinan hi pa cu khui tawk ihsin a ra ti kan thei lo,” tiah an ti. ³⁰ Cu pa cun a sang hai ih an hnenah, “Khui tawk ihsin a ra ti nan theih lo cu khawruahharza thil a si, asinan anih in ka mit a vangter fawn si! ³¹ Atu ah Pathian in misualpawlih aw a ngaithla lo ih, asinan zokhal Pathian a bia ih a duhzawng a tuah asile Pathian in cu pa cu a ngaithla a si ti kan thei. ³² Leilung um thawk ihsin suahkeh mitcaw zohman in a mit an vangter ti theih a si dah lo. ³³ Hi pa hi Pathian hnen ihsin a si lo ah cun zianghman a tuah thei lo ding,” tiah a ti. ³⁴ Cule annih in an sang ih a hnenah, “Nang cu sual pumhlumih suak na si. Nang in thu in zirh ve ding maw si?” tiah an ti. Cule cu pa cu lengah an dawisuak. ³⁵ Jesu in cu pa cu lengah an dawisuak ti a thei ih, cu pa a va tawn tikah a hnenah, “Pathian Fapa na zum maw?” tiah a ti. ³⁶ Anih in a sang ih, “Bawipa, amah ka zum theinak dingah cu pa cu zo a si?” tiah a ti. ³⁷ Cule Jesu in a hnenah, “Amah cu na hmu zo. A lo be rerotu hi a si,” tiah a ti. ³⁸ Cule anih in, “Bawipa! Ka zum a si,” tiah a ti. Cule Jesu cu a bia. ³⁹ Cule Jesu in, “Khawhmulopawl in khua an hmuh theinak dingah le khawhmupawl an mit a cawt theinak dingah hi leitlun ah thuṭhen dingin ka ra a si,” tiah a ti. ⁴⁰ Jesu hnenih um Farasi hrekkhatpawl in cui thupawl an theih tikah a hnenah, “Kannih khal mitcaw kan si ve maw si?” tiah an ti. ⁴¹ Jesu in an hnenah, “Mitcaw rak si uh la cu sual nan nei lo ding. Asinan atu ah, ‘Khua kan hmu a si,’ tiah nan ti ruangah nan sualnak cu a tang lai a si.

¹ “Thungaiin, thungaiin ka lo sim, mi zo si maw kha tuu hruang sungah sangka ihsin si loin hmun dang ihsin a kailuttu cu rukru le suamhmang an si. ² Asinan sangka ihsin a luttu cu tuukhaltu a si. ³ Sangka kiltu in a hrangah sangka a awnsak ih, tuupawl in a aw an thei. Amai tuupawl cu an hmin ciarin a ko hai ih lengah a hruaisuak. ⁴ Amai tuupawl a suah hai tikah, amah cu an hmaiah a feh. A aw an theihthiam ruangah tuupawl in amah cu an thlun. ⁵ Midang cu an thlun hrimhrim lo ding ih an tlansan sawn ding. Ziangahtile, midangpawlih aw cu an theithiam lo,” tiah a ti. ⁶ Jesu in hi tahṭhimnak thu hi an hnenah a sim. Asinan an hnenih a sim mi thu kha ziang a sim ti an theithiam lo. ⁷ Curuangah, Jesu in an hnenah, “Thungaiin, thungaiin ka lo sim, keimah cu tuupawl hrangah sangka ka si. ⁸ Ka hlanih a ratu hmuahhmuah cu rukru le suamhmang an si. Asinan tuupawl in an aw an ngaithla lo. ⁹ Keimah cu sangka ka si. Zokhal keimah ihsin hruang sungih a luh a si ah cun rundam a si ding. Anih cu a lut a suak ding ih, tlimno a hmu ding. ¹⁰ Rukru cu ru ding, that ding le siatsuah ding lawngah a ra. Kei cu nun an neih ih, nun luangliam an neih theinak dingah ka ra a si. ¹¹ “Keimah cu tuukhal ṭha ka si. Tuukhal ṭha cun tuupawl hrangah a nunnak a pe. ¹² Asinan sancawp mi cu tuukhal a si lo ih, tuu cu a ta an si lo. Cinghnia a rat kha a hmuh tikah tuupawl cu a tanta ih a tlan. Cule cinghnia in tuupawl cu a deh ih a ṭekdarhter ṭheh. ¹³ Sancawp mi cu sancawp a si ruangah tuupawl a ngaihsak lo ih a tlansan men. ¹⁴ “Keimah cu tuukhal ṭha ka si. Keimai tuupawl cu ka thei hai ih, annih in kei khal in thei ve. ¹⁵ Pa in keimah i theih vekin kei khalin Pa cu ka thei ve. Tuupawl hrangah ka nun ka pe. ¹⁶ Hi tuu hruang sungih um lo mi tuu dang ka nei lai. Cupawl khal ka hruailuh hai tengteng a ṭul. Annih in ka aw an thei ding. Cule tuukhal pakhat hnuaiah tuurun pakhat ah an cang ding. ¹⁷ Ka laksal dingah ka nun ka pek ruangah a si, Pa in kei i duhdaw. ¹⁸ Zohman in ka hnen ihsin ka nunnak an la lo. Keimah roriin ka pe a si. Ka nunnak pek ding le laksal ding thuneihnak ka nei. Cui thupek cu ka Pa hnen ihsin ka ngah,” tiah a ti. ¹⁹ Cui ṭawngpawl ruangah Jew-pawl lakah ṭhenawknak a umsal. ²⁰ Asinan an lakih mi tampi in, “Anih cu khawsia a nei ih a aa a si. Ziangah a thu nan ngaithla?” tiah an ti. ²¹ Midangpawl in, “Hi thupawl hi khawse nei mi ih ṭawng an si lo. Khawsia in mitcawpawlih mit a vangter thei ding maw?” tiah an ti. ²² Jerusalem ah hlanawknak puai a um ih, cucu thlatang can a si. ²³ Jesu cu temple kulh sungih Solomon-ih hulhliap ah a vak rero. ²⁴ Curuangah, Jew-pawl in Jesu cu an ra kulh ih, a hnenah, “Ziangtik tiang awlawksawng ko in tuah ding? Nangmah cu Khrih na sile fiangten in sim lawlaw aw,” tiah an ti. ²⁵ Jesu in, “Ka lo sim nan, nan rak zum lo. Ka Pai hmin ih ka tuah mipawl in ka thuhla cu an theihter a si. ²⁶ Nan hnenih ka lo sim zo vekin, nannih cu ka tuu run lak ihta nan si lo ruangah, nan zum lo a si. ²⁷ Ka tuupawl cun ka aw an thei ih, kei khalin anmah cu ka thei hai. Cule annih in keimah in thlun. ²⁸ Cule an hnenah kumkhawnunnak ka pe. An hloral dah hrimhrim lo ding ih, zohman in ka kut sung ihta in lawng dah lo ding. ²⁹ Anmahpawl ka hnenih i petu ka Pa cu ziang hmuahhmuah hnakin a ropisawn. Zohman in ka Pai kut sung ihta a lawngsuak thei lo ding. ³⁰ Pa le keimah cu pumkhat kan si,” tiah a sawn hai. ³¹ Curuangah, Jesu cu lungto ih deng dingin, Jew-pawl in lungto an sarsal. ³² Jesu in an hnenah, “Ka Pa hnen ihsin hnaṭuan ṭha tampi ka lo hmuh zo. Cuipawl lak ihsin khui mi bik ruangah saw lungto ih in den ding?” tiah a sawn hai. ³³ Cule Jew-pawl in an sang ih, “Hnaṭuan ṭha ruangah lungto ih lo den kan tumnak a si lo. Pathian na thangsiat le nang cu milai si ve na cingin nangmah le nangmah Pathian ih na tuahawk ruang sawnah a si,” tiah an ti. ³⁴ Jesu in an hnenah, “‘Nannih cu pathianpawl tla nan si tiah ka lo ti,’ tiah nan Dan sungah ngan a si lo maw? ³⁵ Pathian thu an hnenih thleng mipawl hman pathianpawl tla tiih a kawh a si ah cun Cathianghlim cu ṭhiatbal theih a si si lo. ³⁶ Pa in a serhhran mi le leitlun ih a thlah mi cu ka si, ‘Keimah cu Pathian Fapa ka si,’ tiah ka ti ruangah maw, ‘Nang, Pathian thangsiatpa,’ in ti? ³⁷ Ka Pai hna ka ṭuan lo asile in zum hlah uh. ³⁸ Asinan, ka ṭuan asile keimah in zum lo hmanah ka hnaṭuan mipawl tal zum uh. Cutiih nan zum asile Pa cu keimah ah a um ih, Fapa khal Pa ah a um a si, ti nan thei ding ih nan zum ding,” tiah a ti hai. ³⁹ Curuangah amah kaih theinak ding lamzin an hawlsal. Asinan an kut ihsin a tlansuak. ⁴⁰ Cule Jordan tiva ralkhat lam, John in baptisma a pek hmaisakbiknak hmun ah a fehsal ih, cu tawkah a cam. ⁴¹ Mi tampi a hnenah an ra ih, “John in hminsinnak zianghman a tuah lo. Asinan, John in hi pai thuhla a sim mi hmuahhmuah cu a dik a si,” tiah an ti. ⁴² Cule cu tawkah mi tampi in amah cu an zum.

¹ Bethany khaw mi Lazaras an ti mi pa cu a na ih, cui khua cu Mary le a unu Martha teih umnak a si. ² Acui Mary cu, hriak rimhmui Bawipa hnih ih a sam i a ke hnulsaktu kha a si. A natu Lazaras cu a naupa a si. ³ Curuangah a unulepawl in Jesu hnenah thu an hei cah ih, “Bawipa, ngai hnik, na duhdawt mi pa cu a na,” tiah an ti. ⁴ Asinan, Jesu in cumi cu a theih tikah, “Cui natnak cu thihnak dingah a si lo. Pathian sunlawinak ding hrangah a si sawn. Himi ihsin Pathian Fapa cu sunlawih in a um ding,” tiah a ti. ⁵ Jesu in Martha le a naunu Mary le Lazaras te cu a duhdaw hai. ⁶ Curuangah, Jesu in Lazaras a na ti a theih tikah a umnak hmun kelah ni hnih a camta. ⁷ Cui hnuah, a dungthluntupawl hnenah, “Judia peng ah fehsal uhsi,” tiah a ti. ⁸ A dungthluntupawl cun a hnenah, “Rabbi, kan dung reilo teah Jew-pawl in lungto ih lo deng dingin an lo hawl ih, cu tawkah na va fehsal ding maw?” tiah an ti. ⁹ Jesu in, “Ni khat ah nazi hleihnih sung khawvang a um a si lo maw? Zokhal sunvang ih a feh ah cun hi leitlun tleu a hmuh ruangah a bah lo. ¹⁰ Asinan, zokhal zan ih a feh asile tleu amah ih a um lo ruangah a bah a si,” tiah a ti. ¹¹ Cui thupawl a sim hnuah, an hnenah, “Kan rual Lazaras cu a itthat. Asinan, amah va ṭhang dingah ka feh ding,” tiah a ti. ¹² Curuangah, a dungthluntupawl in, “Bawipa, a itthat asile a dam ṭha ko ding,” tiah an ti. ¹³ Jesu in Lazaras-ih thih thu a sim, asinan a dungthluntupawl in itthat ih a cawlh thu a sim a si hmang tiah an ruat. ¹⁴ Curuangah, Jesu in an hnenah, “Lazaras cu a thi a si,” tiah fiangten a sim hai. ¹⁵ “Cule, nan zum theinak dingah nanmai hrangah cu tawkih ka rak um lo cu ka lung a awi. Asinan, a hnenah feh uhsi,” tiah a ti. ¹⁶ Curuangah, Thomas in a rualpi dungthluntupawl hnenah, “Amah thawn kan thih theinak dingah feh ve uhsi,” tiah a ti. Thomas cu Diduma tiah an ko. ¹⁷ Curuangah, cu tawkih an feh tikah, Jesu in Lazaras cu thlan sungah ni li a rak um zo ti a thei. ¹⁸ Bethany cu Jerusalem khaw kiangte peng hnih hrawngah a um. ¹⁹ Jew mi tampi cu Mary le Martha kiangkap ih um mi nunaupawl hnenih um dingah le an naupa thu ah anmah hnem dingin an feh. ²⁰ Curuangah, Martha in Jesu a ra ti a theih tikah, a va tawng. Asinan Mary cu inn sungah a to. ²¹ Cule Martha in Jesui hnenah, “Bawipa, hi tawkah rak umta cila cu, ka naupa hi a rak thi lo ding. ²² Asinan, atu rori khalah Pathian hnen ihsin ziangkhal na dil asile Pathian in a lo pe ding ti ka thei,” tiah a ti. ²³ Jesu in a hnenah, “Na naupa cu a thosal ding,” tiah a ti. ²⁴ Martha in a hnenah, “Ni netabik thawhsalnak ni ah a thosal ding ti ka thei,” tiah a ti. ²⁵ Jesu in a hnenah, “Keimah cu thawhsalnak le nunnak ka si. Keimah i zumtu cu thi khal sehla a nung ding. ²⁶ Cule zokhal nungdam ih keimah i zumtu cu a thi dah hrimhrim lo ding. Cucu na zum maw?” tiah a ti. ²⁷ Martha in a hnenah, “A si, Bawipa, nang cu leitlun ih a ra ding mi Pathian Fapa Khrih na si ti ka lo zum,” tiah a ti. ²⁸ Cui thupawl a ṭawng hnuah Martha cu a feh ih, a naunu Mary cu athupten a ko. A hnenah, “Zirhtupa a ra thleng ih a lo ko,” tiah a ti. ²⁹ Mary in cumi cu a theih tikah zamrang zetin a ding ih a hnenah a feh. ³⁰ Cui canah Jesu cu khua a thleng hrih lo. Martha in a va tawnnak hmun ah a um hrih lai. ³¹ Mary hnemtu Jew-pawl cu Mary thawn inn sungah an um. Mary zamrang zetin a ding ih a fehsuak cu an hmu. Curuangah an hei thlun ve. “Thlan ah ṭap dingin a feh a si hi,” tiah an ti. ³² Cule Mary cu Jesu umnak hmun a va thleng. Jesu a hmuh tikah a ke hramah a bawk ih a hnenah, “Bawipa, hi tawkah rak umta cila cu, ka naupa hi a thi lo ding nan,” tiah a ti. ³³ Curuangah Jesu in Mary le amah rak thluntu Jew-pawl an ṭah ciamco a hmuh tikah a thlarau in riahsia zetin a hrum. ³⁴ Cule, “A ruak cu khuiah nan ret?” tiah a ti. Cule annih in a hnenah, “Bawipa, ra aw la, zoh aw,” tiah an ti. ³⁵ Jesu a ṭap. ³⁶ Curuangah, Jew-pawl in, “Zoh uh, Lazaras cu a va rak duhdaw lawmmam ve,” tiah an ti. ³⁷ Asinan, mi hrekkhatpawl in, “Hi pa hin mitcawpawlih mit a vangter thei. Lazaras thi lo dingin teh a tuah thei lo maw si?” tiah an ti. ³⁸ Curuangah, Jesu cu thlan a thlen tikah a lung sungin riahsia in a hrumsal. Thlan cu puk a si ih, a kaa cu lungto in an khar. ³⁹ Jesu in, “Lungto cu ṭhawn uh,” tiah a ti. Mithipai unu Martha in a hnenah, “Bawipa, a thu zo ding, ziangahtile ni li lai a rei zo,” tiah a ti. ⁴⁰ Jesu in a hnenah, “Na zum ah cun Pathian ropitnak na hmu ding ka lo ti a si lo maw?” tiah a ti. ⁴¹ Curuangah, mithi an retnak hmun ihsin lungto cu an ṭhawn. Cule Jesu cu tlun lam a zoh ih, “Ka Pa, ka thu in ngaithlaksak ṭheu ruangah lungawithu ka lo sim. ⁴² Cun, ka thu in ngaithlaksak ṭheu ti ka thei. Hi tawkih ding mipipawl in nang in i thlah a si ti an zum theinak dingah hi thu hi ka sim a si,” tiah a ti. ⁴³ Cui thupawl a sim ṭheh tikah, aw ring zetin, “Lazaras ra suak aw!” tiah a au. ⁴⁴ Cule, mithipa cu a kut le a ke ruak tuamnak puan thawn tuamawpi in le a hmai cu hmai hnulnak puante ih tuamaw in a ra suak. Jesu in an hnenah, “Phelh uh la, fehter uh,” tiah a ti. ⁴⁵ Curuangah, Mary hnenih a ratu Jew mi tampipawl in Jesu ih tuah mi cu an hmu ih, amah cu an zum. ⁴⁶ Asinan, mi hrekkhatpawl cu Farasipawl hnenah an feh ih, Jesu ih tuah mipawl an va sim. ⁴⁷ Curuangah, puithiam sangpawl le Farasipawl cu thuṭhen dingin an to ih, “Ziangtin kan tuah ding? Ziangahtile, hi pa in hminsinnak tampi a tuah a si. ⁴⁸ Hitiih kan thlah men asile mi hmuahhmuah in amah an zum ding. Cule Rom mipawl an ra ding ih, kan ram le kan miphun an lahlo ding,” tiah an ti. ⁴⁹ Asinan, Kaiafas cu an lakah a um. Anih cu cui kum ah puithiam lubik a si. Anih in an hnenah, “Zianghman nan thei lo. ⁵⁰ Jew miphun hmuahhmuah hlohral hnakin mi pakhat mipi hrangih thih cu kan hrangah a ṭhasawn a si ti nan ruat lo,” tiah a ti. ⁵¹ Cui thu cu amai lungsuak ih a sim mi a si lo. Asinan, cui kum ah amah cu puithiam lubik a si ruangah Jew miphunpawl hrangih Jesu a thih ding thu a rak phuang cia. ⁵² Jew miphun hrang lawngah si loin a ṭekdarh mi Pathian fatepawl pumkhat si dingih hruaikhawm ding thu khal a phuang a si. ⁵³ Curuangah, cui ni ihsi thawkin Jesu that dingah thu an relkhawm. ⁵⁴ Curuangah, Jesu cu Jew-pawl lakah langhnganin a vaksuak nawn lo. Asinan cui hmun ihsin ramṭhing kiangih a um mi khawte Efraim an ti mi ah a feh ih, cu tawkah a dungthluntupawl thawn an um. ⁵⁵ Cule, Jew-pawlih Lantapuai cu a nai. Lantapuai hlanah mi tampi cu anmah le anmah thianfaiaw dingin an khawte ihsin Jerusalem ah an feh so. ⁵⁶ Cule Jesu cu an hawl ih, “Ziangtin nan ruat? Anih hi puai tuahnak ah teh a ra taktak pei maw?” tiah temple kulh sungah ding in pakhat le pakhat an tiaw. ⁵⁷ Puithiam sangpawl le Farasipawl in amah an kaih theinak dingah a umnak theitu pohin a rel pei, tiah thu an pe.

¹ Curuangah, Lantapuai hlan ni ruk ah Jesu cu Bethany khua ah a feh. Cu tawkah mithi zo a thawhter mi pa Lazaras kha a um. ² Curuangah, cu tawkah Jesu hrangah zanriah an timtuah. Martha in tuang a tim ih, Lazaras cu amah thawi rawl eitu lakih pakhat a si ve. ³ Cule, Mary in a mankhung zet mi hriak rimhmui spaiknard taktak litra khat cu a la ih, Jesu-ih ke ah a hnih. Jesu-ih ke cu a sam in a hnulsak. Cui inn cu hriak rimhmui rim in a khat. ⁴ Curuangah, Jesu-ih dungthluntupawl lakih pakhat amah phiarsawm cingtu ding, Simon-ih fapa, Judas Iskariot in, ⁵ “Ziangruangah hi hriak rimhmui cu dinari zathum ah zuar in, a tangka cu miretheipawl an pek lo?” tiah a ti. ⁶ Cutiih a ti cu miretheipawl zawn a ruah ruangah a si lo. Ziangahtile, amah cu rukru a si. Paisa bawm kiltu a si ih, paisa bawm sungih ret mipawl a lak ṭheu. ⁷ Jesu in, “Um ko seh, hi nu in keimah in vui ding ni hrangah hriak rimhmui cu a rak ret ṭha a si. ⁸ Ziangahtile, miretheipawl cu nan hnenah an um ringring ding. Kei cu nan hnenah ka um ringring lo ding,” tiah a ti. ⁹ Curuangah, Jew mi burpi in Bethany ah Jesu a um ti an thei ih, Jesu ruang lawngah si loin, mithi lak ihsin a kaihthawh mi Lazaras khal hmu ve dingah cu tawkah an va feh. ¹⁰ Asinan, puithiam sangpawl cu Lazaras khal that ve dingin thu an relkhawm. ¹¹ Ziangahtile, Lazaras ruangah Jew mi tampi in an fehsan ih, Jesu an zum. ¹² A thaisun ah puai zawh dingih ra, mi tampi in Jerusalem ah Jesu a ra ti an thei ih, ¹³ ṭhulhfau hnah an khiak ih, amah hmuak dingah an feh. “Hosana! BAWIPAI hmin ih a ra mi Israel Siangpahrang cu thangṭhat in um ko seh!” tiah an au. ¹⁴ Jesu in laak note a tawng ih a parah a to. ¹⁵ Cumi cu, “Zion fanu, ṭih hlah; ngai hnik, na Siangpahrang cu laak note parah to in a rat khi!” tiih ngan vek khan a si. ¹⁶ Cui thilpawl cu a thawk ah cun a dungthluntupawl in an theithiam lo. Asinan, Jesu sunlawih ih a um hnuah amai thuhla cu, cuvekin ngan a si tile cui thilpawl cu a parah an tuah a si ti an vun mangsal. ¹⁷ Curuangah, thlan sung ihsin Lazaras a kawhsuak lai le mithi lak ihsin a thawhter laiih a hnenih um mipipawl in an theihpi thu an phuang. ¹⁸ Cu mi ruangah, mipipawl khalin amah cu an ra tawng. Ziangahtile, cui hminsinnak cu a tuah ti an theih ruangah a si. ¹⁹ Curuangah, Farasipawl cu pakhat le pakhat, “Zianghman nan tisuak thei lozia hi nan hmu maw? Zoh hnik uh, leitlun mi hmuahhmuah in, a dung an rak thlun thluh zo hi,” tiah an tiaw. ²⁰ Pathian be dingin puai ih a feh so mipawl lakah Grik mi hrekkhat an tel. ²¹ Curuangah, Galili peng, Bethsaida khaw mi Filip hnenah an feh ih, “Ka pu, Jesu hmuh kan duh,” tiah an ngen. ²² Filip cu a feh ih, Andru a sim. Cule Andru le Filip in Jesu an simsin. ²³ Asinan Jesu in a sang hai ih, “Minung Fapa hi sunlawih ih a um can cu a thleng zo. ²⁴ Thungaiin, thungaiin ka lo sim, sangvut fang cu leilung ah a tlak ih a thihta lo ah cun amah keltein a um. Asinan, a thih a si ah cun rah tampi a suah. ²⁵ A nunnak a duhdawtu cun a nunnak a hloh ding. Cun, hi leitlun ih a nunnak a huatu cun kumkhawnunnak hrangah a nunnak a kilhim ding. ²⁶ Zokhal, keimah i rian asile, i thlun seh. Ka siahhlawh cu ka umnak ah a um ve ding a si. Zokhal, keimah i riantu cu Pa in a sunlawih ding. ²⁷ “Atu hi ka thinkhawruah a har. Ziang ka sim ding? ‘Ka Pa, himi can ihsin i humhim aw,’ ka ti ding maw? Asinan, himi canah himi hrangah hin ka ra a si si. ²⁸ “Ka Pa, na hmin cu sunlawih aw,” tiah a ti. Cule van ihsin aw a rung thang ih, “Ka hmin cu ka sunlawih zo ih, ka sunlawihsal leh ding,” tiah a ti. ²⁹ A kiangih mi burpi dingpawl in cumi cu an thei ih, “Khawpi a ri,” tiah an ti. Midangpawl in, “Vancungmi in a run bia,” tiah an ti. ³⁰ Jesu in a sang ih an hnenah, “Keimai hrangah si loin, nanmai hrangah cui aw kha a rung thleng a si. ³¹ Atu ah leitlun minungpawl hi thuṭhen an si. Atu ah hi leitlun uktu cu hlawnsuak a si ding. ³² Asinan, kei cu leilung ihsin khaikan ka si tikah mi hmuahhmuah ka hnenah ka hip ding,” tiah a ti hai. ³³ Cutiih a sim tikah, ziangti vekin a thi ding ti a langternak a si. ³⁴ Mi burpi in, “Dan cabu sung ihsin Khrih cu kumkhua in a um tlaitluan ding ti kan thei zo. Cuti asile ziangah nang in, ‘Minung Fapa cu an khaikang ding?’ tiah na ti. Cui Minung Fapa cu zo a si?” tiah an let. ³⁵ Curuangah, Jesu in an hnenah, “Tleu cu nan hnenah can tawite sung lawng a um. Tleu nan neih laiah thim in a lo manlonak dingah tleu ah cun feh uh. Thim ih a fehtu cun khui tawkah a feh ti a thei lo. ³⁶ Tleu nan neih laiah tleu fate nan si theinak dingah tleu cu zum uh,” tiah a ti. Cui thupawl a sim ṭheh hnuah Jesu cu a fehhlo ih, an hnen ihsin a relh. ³⁷ An hmaiah hminsinnak tampi a tuah ko nan, amah cu an zum cuang lo. ³⁸ Cumi cu profet Isaiah in, “Bawipa, kan thu sim mi cu zo in an zum? Cun, zawi hnenah BAWIPA in a ban a langter?” tiah a rak ti mi a kim theinak dingah a si. ³⁹ Curuangah Isaiah thothoin, ⁴⁰ “Amah in an mit a cawtter ih, an thinlung tla a ruhter. An mit in an hmuhlonak dingah le an thinlung in an theihthiamlonak dingah cucu a tuah a si. Cuti a si lo ah cun, an hawikir ding ih, ka tidam hai pang ding,” tiah a simsal. Curuangah an rak zum thei lo a si. ⁴¹ Isaiah in Bawipai ropitnak a hmuh ruangah hi thilpawl hi a rel ih, a thuhla khal a phuang. ⁴² Sikhalsehla, hruaitupawl lak ihsin mi tampi in Jesu cu an zum. Asinan, Farasipawl in sinakok sung ihsin in dawisuak pang ding ti an phan ruangah Jesu an zum thu cu langhnganin an phuang ngam lo. ⁴³ Ziangahtile, annih cu Pathian ih lawm hnakin minung ih lawm an duh sawn. ⁴⁴ Cule, Jesu cu a au ih, “Keimah i zumtu cu keimah i zum si loin, i thlahtu a zum sawn a si. ⁴⁵ Keimah i hmutu cun i thlahtu a hmu a si. ⁴⁶ Zokhal keimah i zumtu cu thim ih a tanlonak dingah leitlun ah tleu vekin ka ra zo. ⁴⁷ “Zokhal ka thusim mi a thei ih a zum lo asile thu ka ṭhensak lo. Ziangahtile, leitlun mipawl thuṭhen dingah ka ra lo, leitlun mipawl rundam dingah ka ra sawn a si. ⁴⁸ Zokhal in hnawng ih ka thusim mi cohlanglotu cu thuṭhentu a nei. Ka thusim mipawl in ni netabik ah amah cu thu a ṭhen ding. ⁴⁹ Ziangahtile, keimai palung suak thu ka sim lo. I thlahtu ka Pa in ka sim ding mi le ka phuan ding mi thu i pe sawn a si. ⁵⁰ Cule a thupek cu kumkhawnunnak a si ti ka thei. Curuangah, ka sim mi ziangkhal Pa ih i sim vek cekci in ka phuang a si,” tiah a ti.

¹ Lantapuai hlanah Jesu in hi leitlun suahsan ih, Pai hnenih a feh tikcucan a thleng zo ti a thei. Leitlun ih a maita a si mipawl cu a rak duhdaw hai ih, a cemnet tiangin a duhdaw hai. ² Zanriah an ei laiah Diabol in Simon-ih Fapa, Judas Iskariot-ih thinlungah Jesu phiarsawm dingin hna a rak ṭuan zo. ³ Jesu in Pa in a kut sungah thil ziangkim a pek thluh zozia si seh, amah cu Pathian hnen ihsin a ra ti si seh, Pathian hnenah a feh ding ti khal a theih ruangah, ⁴ zanriah an einak ihsin a tho ih a hnipuan cu a hlit. Hnulawknak puan a la ih a tai ah a vel. ⁵ Cu mi hnuah, kheng kumpi sungah ti a thlet. Cule, dungthluntupawlih ke khawlh a thawk. Cun a tai ih a vel mi puante in a hnulsak hai. ⁶ Simon Peter hnen a thlen tikah, Peter in, a hnenah, “Bawipa, nang in, ka ke i khawlh ding maw?” tiah a ti. ⁷ Jesu in a sang ih a hnenah, “Ka tuah mi hi atu ah cun na theithiam lo. Asinan, nehhnuah na thei leh ding,” tiah a ti. ⁸ Peter in a hnenah, “Ka ke cu ziangtik khalah i khawlhsak hrimhrim lo ding,” tiah a ti. Jesu in, “Ka lo khawlh lo asile ka hnenah zianghman covo na nei lo,” tiah a sang. ⁹ Simon Peter in a hnenah, “Bawipa, ka ke lawng si loin, ka lu le ka kutpawl khal khawlh lawlaw aw,” tiah a ti. ¹⁰ Jesu in a hnenah, “Ti a khawlhaw zotu cu a ke siarlo khawlh a ṭul lo. Anih cu a pumpuluk in a fai a si. Nannih cu nan fai, asinan nan zaten nan fai thluh lo,” tiah a ti. ¹¹ Jesu in zo in i phiarsawm ding ti a theih ruangah, “Nan zaten nan fai thluh lo,” a tinak a si. ¹² Curuangah, an ke a khawlhsak ṭheh hnuah a hnipuan cu a hruh ih a tosal. An hnenah, “Nan parih ka thiltuah mi hi nan theithiam maw? ¹³ Nannih in Zirhtupa tiin le Bawipa tiah in ko. Cucu ka sinak a si ruangah nan tidik a si. ¹⁴ Kei, Zirhtupa le Bawipa in nan ke ka lo khawlhsak zo. Curuangah nannih khalin pakhat le pakhat nan ke nan khawlhsakaw ding a si. ¹⁵ Ziangahtile, nan hnenih ka rak tuah mi vekin nan tuah ve dingah zohṭhim ding ka lo pe zo. ¹⁶ Thungaiin, thungaiin ka lo sim, siahhlawh cu a pu hnakin a ropisawn lo. Cun a thlahtu hnakin thlah mi a ropisawn lo. ¹⁷ Hi thilpawl nan thei ih nan tuah asile mihualvanṭha nan si. ¹⁸ “Nan zate thu ka sim a si lo. Ka hril mi cu ka thei. Sikhalsehla, ‘Keimah thawi sang a eitlangtu in keimah do in a kedil a khai zo,’ ti mi Cathianghlim a famkim theinak dingah a si. ¹⁹ Cu mi a can hlanah atu ihsin ka lo sim cia. Cu mi a can tikah keimah cu amah ka si ti nan zum theinak dingah a si. ²⁰ Thungaiin, thungaiin ka lo sim, ka thlah mi a cohlangtu cun keimah i cohlang a si. Cule keimah i cohlangtu cun keimah i thlahtu khal a cohlang a si,” tiah a ti. ²¹ Jesu in cui thupawl a sim tikah a thinlung khawruah a har ih, “Thungaiin, thungaiin ka lo sim, nan lakih mi pakhat in i phiarsawm ding,” tiah a theihter ih a sim hai. ²² Cule a dungthluntupawl cu pakhat le pakhat an zohaw ih a tisan mi zo a si pei tiah an awlawk a sawng. ²³ A dungthluntu lakih mi pakhat, Jesu-ih a duhdawt mi cun Jesu-ih ṭang a hngohsan. ²⁴ A sim mi cu zo a si tiih sut dingah Simon Peter in cu pa cu theihthiamnak a hei pe. ²⁵ Curuangah, Jesu-ih ṭang hngohsantupa in a hnenah, “Bawipa, cu pa cu zo bik saw a si?” tiah a ti. ²⁶ Jesu in, “Kheng sungah sangphel ka hnim pei ih ka pek ding mi pa hi a si,” tiah a let. Cule Jesu in sangphel a hnim hnuah Simon-ih fapa Judas Iskariot hnenah a pek. ²⁷ Judas in cui sangphel a lak hnuah a sungah Setan a lut. Curuangah, Jesu in a hnenah, “Na tuah ding mi cu zamrangten tuah aw,” tiah a ti. ²⁸ Asinan cabuai kiltu zohman in ziangruangah Judas hnenah cutin a sim ti an thei lo. ²⁹ Judas cu tangka bawm kiltu a si ruangah dungthluntu hrekkhatpawl cun Jesu in, “Puai hrangih kan ṭul mipawl lei a fial,” asilole miretheipawl thil va pek a fial si hmang tiah an ruat. ³⁰ Judas cu sangphel a cohlan hnuah, lengah a suak lohli. Cucu zan a si. ³¹ Cule Judas leng a suah hnuah, Jesu in, “Atu ah Minung Fapa cu sunlawih a si zo. Cule amah ah Pathian in sunlawihnak a co zo. ³² Amah ah Pathian in sunlawinak a co zo asile Pathian khalin anih cu amah ah a sunlawih ding ih a sunlawih lohli ding. ³³ “Falenuh, reilote sung lawng nan hnenah ka um ding. Nannih in in hawl ding. Jew-pawl hnenih, ‘Ka fehnak hmun ah nan feh thei lo ding,’ ka ti hai vek khan nannih hnen khalah cuvek thotho cu atu ah ka lo sim a si. ³⁴ “Nan hnenah thupek thar ka lo pe, pakhat le pakhat duhdawaw uh. Keimah ih ka lo duhdawt vekin nannih khal pakhat le pakhat duhdawaw uh. ³⁵ Pakhat le pakhat tlunah duhdawtnak nan neih a si ah cun cu mi in mi hmuahhmuah in ka dungthluntu nan si kha an lo thei ding,” tiah a ti. ³⁶ Simon Peter in a hnenah, “Bawipa, khui tawkah na feh ding?” tiah a ti. Jesu in a hnenah, “Ka fehnak ah nang in atu ah cun i thlun thei hrih lo. Asinan nehhnuah i thlun leh ding,” tiah a sang. ³⁷ Peter in a hnenah, “Bawipa, ziangah saw atu ah ka lo thlun thei lo? Na hrangah ka nunnak ka thap ding,” tiah a ti. ³⁸ Jesu in a hnenah, “Na nunnak cu ka hrangah na thap ngaingai pei maw? Thungaiin, thungaiin ka lo sim, vei thum tiang i phatsan hlanlo ar a khuang hrimhrim lo ding.

¹ “Nan thinlung har hlah seh. Pathian zum uh la kei khal i zum uh. ² Ka Pai inn ah cennak hmun tampi a um. Rak um lo si sehla ka lo sim zo ding. Nan hrangah hmun timtuah dingah ka feh ding. ³ Cule nan hrangah hmun timtuah ih ka feh asile ka rasal ding. Ka umnak ah nannih khal um ve dingin ka hnenah ka lo hruai ding. ⁴ Cun khui tawkah ka feh ding ti nan thei ih, a lamzin khal nan thei,” tiah a sang. ⁵ Thomas in a hnenah, “Bawipa, na fehnak ding hmun kan thei lo. Ziangtin saw cui zin cu kan theihthei ding?” tiah a ti. ⁶ Jesu in a hnenah, “Keimah hi lamzin, thutak le nunnak cu ka si. Keimah ihsi lo cun zohman Pai hnenah an thleng lo. ⁷ “Keimah in thei zo uh la cu, ka Pa khal nan thei zo ding. Atu ihsi thawkin amah cu nan thei ih, nan rak hmu zo,” tiah a ti. ⁸ Cule Filip in a hnenah, “Bawipa, Pa cu in hmuh aw la, cumi cu kan hrangah a tawk ding,” tiah a ti. ⁹ Jesu in a hnenah, “Filip, nan hnenah hi tluk can rei ka um zo. Nang in in rak thei hrih lo maw si? Keimah i hmutu cun Pa a hmu. Ziangtin, ‘Pa cu in hmuh aw,’ na ti thei? ¹⁰ Keimah Pa ah ka um ih, Pa cu keimah ah a um ti na zum a si lo maw? Nan hnenih ka sim mi thupawl hi keimai palung ih sim ka si lo. Asinan, keimah ih a um mi Pa in hna a ṭuan a si. ¹¹ Keimah cu Pa ah ka um ih, Pa cu keimah ah a um ti kha zum uh. Cu lole ka thiltuah mipawl ruang talah i zum uh. ¹² Thungaiin, thungaiin ka lo sim, keimah i zumtu cu ka thiltuah mipawl a tuah ve ding. Ka Pa hnenih ka feh ruangah hipawl hnakih nasasawn khal a tuah ding. ¹³ Ziangkhal ka hmin ih nan dil mi cu, Fapa ah Pa sunlawih a si theinak dingah ka tuah ding. ¹⁴ Ka hmin in ziangkhal nan dil asile cumi cu ka tuah ding. ¹⁵ “In duhdaw asile ka thupekpawl thlun uh. ¹⁶ Cun, Pa ka ngen ding ih, anih in nan hnenih kumkhua um dingah Bawmtu dang a run lo pe ding. ¹⁷ Anih cu thutak Thlarau a si. Anih cu leitlun mipawl in an hmu lo ih an theih fawn lo ruangah anih cu leitlun mipawl in an cohlang thei lo. Asinan, anih cu nan hnenah a um ih, nan sung khalih a um ding ruangah amah cu nan thei ding. ¹⁸ Nu le pa nei lo bangin ka lo tanta lo ding. Nan hnenah ka ra ding. ¹⁹ Reilo teah leitlun mipawl in in hmu nawn lo ding. Asinan nannih cun in hmu ding. Ka nun ruangah nannih khal nan nung ve ding. ²⁰ Cui ni ah keimah cu ka Pa ah ka um tile nannih cu keimah ah nan um ih, kei cu nanmah ah ka um ti nan thei leh ding. ²¹ Ka thupekpawl a nei ih a thluntu cu keimah i duhdawtu a si. Keimah i duhdawtu cu ka Pa in a duhdaw ding. Cule kei khalin anih cu ka duhdaw ve ding ih, a hnenah keimah rori ka langawter ding,” tiah a ti. ²² Iskariot a si lo mi Judas in Jesui hnenah, “Bawipa, ziangah saw leitlun mipawl hnenah si lo ih, kan hnenih nangmah le nangmah na langawkter ding?” tiah a ti. ²³ Jesu in a sang ih a hnenah, “Zokhal keimah i duhdaw asile ka thu a thlun ding. Cule ka Pa in anih cu a duhdaw ding ih a hnenah kan ra ding ih a hnenah umhmun kan khuar ding. ²⁴ Keimah i duhdawlotu cun ka thu tla a thlun lo. Nan theih mi thu hi keimai ta a si lo. I thlahtu ka Pai ta a si sawn. ²⁵ “Nan hnenih ka um laiah hi thu tla cu ka lo sim zo. ²⁶ Asinan ka hmin in Pa in a run thlah ding mi Bawmtu, Thlarau Thianghlim in thil hmuahhmuah a lo zirh ding ih, ka lo sim zo mi thu hmuahhmuah khal a lo mangter thluh ding. ²⁷ Nan hnenah hnangamdaihnak ka lo tanta. Keimai hnangamdaihnak ka lo pe. Leitlun in hnangamdaihnak a pek vekin ka lo pe lo. Nan thinhar hlah seh, a ṭih khal ṭih hlah uh. ²⁸ “ ‘Ka feh ding ih nan hnenah ka rasal ding,’ tiih nan hnenih ka ti mi cu nan thei. In duhdaw asile, ‘Pai hnenah ka feh ding,’ ka ti mi hi nan lung a awi ding. Ziangahtile, ka Pa cu keimah hnakin a ropisawn. ²⁹ Cule, cu mi a can tikih nan zum theinak dingah atu a can hlan ihsin ka lo sim cia a si. ³⁰ Nan hnenah thu tampi ka sim nawn lo ding. Ziangahtile, hi leitlun uktupa a ra lai rero. Anih cun keimah ah neih mi zianghman a nei lo. ³¹ Asinan, leitlun mipawl in Pa ka duhdaw ti le Pa in thu i pek vekin ka tuah ti an theih theinak dingah a si hi! Ding uh la, hi tawk ihsin feh uhsi.

¹ “Keimah cu sabit hri ngaingai ka si. Ka Pa cu hmuan tuahtupa a si. ² Keimah ih hngeṭek rah a rah lo mi kipin a hlawnhlo. A rah mi hngeṭek kipin rah tamsin a rah theinak dingah a thianfai. ³ Nannih cu nan hnenih ka sim zo mi thu hmang in thenfai nan si zo. ⁴ Keimah ah um ringring uh la, kei khal nanmah ah ka um ringring ding. A hnge cu sabit hri ih a um ringring lo asile rah a rah thei lo. Cuvekin, keimah ih nan um ringring lo asile, nannih khal rah nan rah thei lo ding. ⁵ “Keimah cu sabit hri ka si. Nannih cu a hnge nan si. Zokhal keimah ah a um ringring ih amah ah ka um ringring asile rah tampi a rah. Ziangahtile, keimah tel loin zianghman nan tuah thei lo. ⁶ Mi zokhal keimah ih a um ringring lo asile hnge bangtukin an hlawn ding ih a ro ding. Cule mi in an khawm ih meisa sungah an hlawn ih an kang. ⁷ Keimah ah nan um ringring ih ka thu tla nanmah ih a um ringring asile nan duh mi pohpoh nan dil ding ih, cumi cu nan hrangah tisak a si ding. ⁸ Rah tampi nan rah mi in ka Pa a sunlawih ih, cule ka dungthluntu nan si ding. ⁹ “Pa in i duhdawt vekin kei khalin ka lo duhdaw ve. Ka duhdawtnak ah um ringring uh. ¹⁰ Ka Pai thupekpawl ka thlun ih a duhdawtnak ah ka um ringring. Cuvekin, ka thupekpawl nan thlun asile ka duhdawtnak ah nan um ringring ding. ¹¹ Ka lungawinak nanmah ih a um ringring theinak dingah le nan lungawinak a famkim theinak dingah hi thupawl nan hnenah ka rak lo sim a si. ¹² Ka thupek cu hihi a si. Ka lo duhdawt vekin pakhat le pakhat duhdawaw uh. ¹³ Mi pakhat in a rualpipawl hrangah a nunnak a liam, cu mi hnakih ropisawn duhdawtnak zohman in a nei lo. ¹⁴ Thu ka lo pek mi hmuahhmuah nan tuah asile nannih cu ka rualpi nan si. ¹⁵ Siahhlawh tiah ka lo ko nawn lo. Ziangahtile, siahhlawh cun a pu in ziang a tuah ti a thei lo. Asinan, rual tiin ka lo ko zo. Ziangahtile, ka Pai hnen ihsin ka theih mi hmuahhmuah cu nan hnenah ka lo theihter. ¹⁶ Nannih in in hril lo. Asinan, nan feh ih rah nan suah theinak dingah le nan rah a um ringring theinak dingah le ka hmin in ziangkhal Pai hnenih nan dil mi a lo peknak dingah keimah in ka lo hril ih ka lo ruat hai a si. ¹⁷ Pakhat le pakhat nan duhdawtawk theinak dingah hi thupawl hi ka lo pe. ¹⁸ “Leitlun mipawl in an lo huat asile an lo huat hlanah keimah in hua zo ti thei uh. ¹⁹ Asinan leitlunih ta si uh la cu leitlun mipawl in anmai minungpawl cu an duhdaw ding. Asinan, nannih cu leitlunih ta nan si lo. Leitlun ihsin ka lo hril zo ruangah leitlun mipawl in an lo hua a si. ²⁰ ‘Siahhlawh cu a pu hnakin a ropisawn lo,’ tiih ka lo sim mi thu kha cing ringring uh. Kei in hrem a si ah cun nannih khal an lo hrem ding. Ka thu an lun asile nan thu khal an lo lung ve ding. ²¹ Asinan, ka hmin ruangah hipawl hmuahhmuah hi nan parah an tuah leh ding. Ziangahtile, keimah i thlahtu an thei lo. ²² An hnenah ra loin thusim lo ningla, sual an nei lo ding. Asinan atu ah cun an sual thu ah puhmawh ding an nei lo. ²³ Keimah i huatu cun ka Pa khal a hua a si. ²⁴ An lakah zohman ih an tuah dah lo mi hna ṭuan lo ningla cu sual an nei lo ding. Asinan, atu ah cun keimah le ka Pa cu in hmu zo ih, a huat khal in hua. ²⁵ ‘San um lopiin in hua,’ tiih an Dan cabu sungih ngan mi a famkim theinak dingah in hua a si. ²⁶ “Asinan, Pai hnen ihsin nan hnenih ka run thlah ding mi Bawmtu a rat tikah keimai thu a theihter ding. Anih cu Pai hnen ihsi suak mi thutak Thlarau a si. ²⁷ A thawk ihsin nannih cu ka hnenih nan um ruangah nannih khalin ka thu nan theihter ve ding.

¹ Nan bahlonak dingah hi thupawl ka lo sim cia a si. ² Sinakok lengah an lo dawisuak ding. Zokhal nanmah a lo thattu in Pathian hna ka ṭuan tiih a ruahawk can a ra thleng ding. ³ Pa si seh, keimah si seh in theih lo ruangah hi thilpawl cu nan parah an tuah ding. ⁴ A can a ra thlen tikah cui thilpawl cu nan hnenih ka lo sim cia zo mi a si ti nan cinken theinak dingah hi thupawl hi nan hnenah ka lo sim. Nan hnenih ka um ruangah hi thupawl cu a thawkah ka lo sim lo. ⁵ “Asinan, atu cu i thlahtui hnenah ka feh ding. Asinan zohman in, ‘Khuiah na feh ding?’ tiah in sut lo. ⁶ Asinan, hi thupawl nan hnenih ka sim zo ruangah riahsiatnak in nan thinlung a lo luahkhat. ⁷ Asinan thungai thu ka lo sim, ‘Ka feh ding cu nan hrangah a ṭha. Ziangahtile, ka feh lo asile nan hnenah Bawmtu a rung lo ding. Asinan, ka feh asile amah cu nan hnenah ka thlah ding. ⁸ Amah a rat tikah leitlun mipawl sual thu, dingfelnak thu le thuṭhennak thu a theihter hai ding. ⁹ Keimah in zum lo ruangah sual thu a theiter hai ding. ¹⁰ Ka Pai hnenah ka feh ding ih in hmuh nawn lo ding ruangah anih in dingfelnak thu a theihter ding. ¹¹ Hi leitlun uktupa thuṭhensak a si zo ruangah thuṭhennak thu a theihter ding. ¹² “Nan hnenah thu tampi sim ding ka nei lai hrih. Asinan nannih in atu ah cun nan tlin hrih lo. ¹³ Asinan, thutak Thlarau a rung thlen tikah thutak zate ah a lo hruai ding. Ziangahtile, amai palung suak in thu a sim lo ding. Asinan, a theih mi thu a lo sim ding ih, nan hnenah thil ra thleng ding mipawl a phuang ding. ¹⁴ Anih cun keimah i sunlawih ding. Ziangahtile, anih cun ka ta a la ding ih nan hnenah a phuang ding. ¹⁵ Pa-ih neih mi hmuahhmuah cu ka ta a si. Curuangah, ‘Thlarau cun ka ta cu a la ding ih nan hnenah a phuang ding,’ ka tinak a si. ¹⁶ “Reilo teah in hmu nawn lo ding. Cule reilote hnuah in hmusal ding. Ziangahtile, Pa hnenah ka feh ding,” tiah Jesu in a ti. ¹⁷ Cule a dungthluntu hrekkhatpawl in, “ ‘Rei lote hnuah in hmu nawn lo ding ih, reilote hnuah in hmusal ding.’ ‘Ziangahtile, Pa hnenih ka feh ding ruangah,’ tiih in ti mi hi a tican ziang a si pei?” tiah pakhat le pakhat an tiaw. ¹⁸ Curuangah “ ‘Reilo teah,’ a ti mi hi ziang a si? A ti duhsan kan thei lo,” tiah an ti. ¹⁹ Curuangah Jesu in amah thusuh an duh ti a thei ih, an hnenah, “ ‘Reilo teah in hmu nawn lo ding ih, reilote hnuah in hmusal leh ding,’ ka ti mi cu pakhat le pakhat nan sutaw rero maw si? tiah a ti. ²⁰ Thungaiin, thungaiin ka lo sim, nannih cu nan ṭap nan rak ding nain leitlun mipawl cu an lung a awi ding. Nannih nan riah a se ding ih, asinan nan riahsiatnak cu lungawinak ah a cang ding. ²¹ Nunau in nauhrin nat a tuar tikah a riah a sia. Asinan nau a hrin ṭheh tikah cun a nat tuar mi cu a cing nawn lo. Ziangahtile, leitlun ah fate a hringngah zo ih a lungawi ruangah a si. ²² Atu ah nannih khal nan riah a sia. Asinan, ka lo hmusal leh ding ih, nan thinlung a lungawi ding. Nan lungawinak cu nan hnen ihsin zohman in an lo lawnsak lo ding. ²³ Cule cui ni ah ka hnen ihsin zianghman in dil lo ding. Thungaiin, thungaiin ka lo sim, ka hmin in Pai hnenih nan dil mi hmuahhmuah cu a lo pe ding. ²⁴ Tu tiangah ka hmin in thil zianghman nan dil dah lo. Nan lungawinak a famkim theinak dingah dil uh la nan ngah ding. ²⁵ “Cui thilpawl cu nan hnenah tahṭhimnak tlain ka lo sim a si. Asinan nan hnenih tahṭhimnak ih ka sim lo can a thleng ding. Pai thu cu nan hnenah fiang zetin ka phuang ding. ²⁶ Cui ni ah ka hmin in nan dil ding. Nan hrangah Pa ka lo dilsak ding ka lo ti lo. ²⁷ Ziangahtile, Pa amah roriin a lo duhdaw hai. Keimah in duhdaw ih, Pathian hnen ihsin ka ra ti nan zum ruangah a si. ²⁸ Pai hnen ihsin ka ra suak ih, leitlun ah ka ra. Leitlun tanta in Pai hnenah ka fehsal ding,” tiah a ti. ²⁹ A dungthluntupawl in a hnenah, “Zoh hnik, atu cun fiangten na ṭawng, tahṭhimnak na hmang lo. ³⁰ Tu cun ziang hmuahhmuah na thei ti kan thei. Zohman in thu an lo suh a ṭul nawn lo. Cu mi in Pathian hnen ihsi ra suak na si ti kan zum,” tiah an ti. ³¹ Jesu in an hnenah, “Atu ah in zum maw? ³² Ngai hnik uh, a can a ra thleng rero, atu a ra thleng zo. Cu mi canah cun mi kip mai umnak cioah ṭhekdarh nan si ding ih, keimah lawng in tan ding. Asinan keimah lawng ka si lo, ziangahtile, Pa cu ka hnenah a um. ³³ “Keimah ah hnangamdaihnak nan neih theinak dingah nan hnenah hi thupawl ka lo sim, leitlun ah harsatnak nan nei ding. Asinan ṭih hlah uh. Kei in leitlun ka neh zo,” tiah a sawn hai.

¹ Jesu in hi thupawl a sim ih, van lam a zoh. Cule, “Ka Pa, a tikcu a thleng zo. Na Fapa in a lo sunlawih theinak dingah na Fapa hi sunlawih aw. ² A hnenih na pek mipawl hmuahhmuah hnenah kumkhawnunnak a pek theinak dingah anih cu mi hmuahhmuah parih thuneihnak na pe. ³ Cun, nang Pathian dik pakhat lawng le na thlah mi Jesu Khrih theih hi, kumkhawnunnak cu a si. ⁴ Leilung tlunah ka lo sunlawih zo. Tuah dingih i pek mi hna ka ṭuan ṭheh zo. ⁵ Cule, atu ah ka Pa, leilung a um hlanih nangmah thawi ka neih mi ropitnak khan nangmah thawn i sunlawih aw. ⁶ “Leitlun mipawl lak ihsin ka hnenih in pek mipawl hnenah na hmin ka langter. Annih cu nangmai ta an si ih, ka hnenah in pe zo. Annih in na thu an thlun. ⁷ Ka hnenih in pek mi thil hmuahhmuah hi nangmai hnen ihsin a si ti an thei zo. ⁸ Ziangahtile, nangmah in ka hnenih in pek mi thu hmuahhmuah cu an hnenah ka pe ih an cohlang. Na hnen ihsin ra suak ka si ti an thei taktak ih, nang in i thlah ti khal an zum. ⁹ An hrangah thla ka cam. Leitlun mipawl hrangah thla ka cam lo. Asinan, ka hnenih in pek zo mipawl hrangah thla ka cam, ziangahtile annih cu nangmai ta an si. ¹⁰ Ka thil hmuahhmuah hi na ta an si ih, na thilpawl cu ka ta an si. Anmah ah sunlawih ka si zo. ¹¹ Kei cu leitlun ah ka um nawn lo ding. Sihmansehla annihpawl cu leitlun ah an um hrih ding. Kei cu na hnenah ka ra ding. Thianghlim ka Pa, ka hnenih in pek zo mipawl hi kanmah vekin pumkhat an si ve theinak dingah na hmin in kil hai aw. ¹² Leitlun ah anmah hnenih ka um laiah annih cu na hmin in ka kil hai a si. Ka hnenih in pek zo mipawl cu ka kil hai ih, Cathianghlim a famkim theinak dingah siatralnak fapa siarlo pakhat hman an hloral lo. ¹³ “Cule, atu cun na hnenah ka ra thlang ding. Ka lungawinak anmah ih a famkim theinak dingah hi thupawl tla leitlun ah ka sim a si. ¹⁴ Na thu cu an hnenah ka pe hai zo. Kei cu leitlunih ta ka si lo vekin annih khal leitlunih ta an si lo ruangah leitlun mipawl in anmah cu an hua. ¹⁵ Leitlun ihsin lasuak hai aw tiah thla ka cam lo. Asinan miṭhalopa hnen ihsin kil hai aw tiah thla ka cam. ¹⁶ Kei cu leitlunih ta ka si lo vekin annih khal leitlunih ta an si lo. ¹⁷ Na thutak in thiangter hai aw. Na thu cu thutak a si. ¹⁸ Nang in leitlun ih i thlah vekin, kei khalin leitlun ah anmah cu ka thlah ve hai. ¹⁹ Anmah cu thutak ih thianhlimter an si theinak dingah anmai ruangah keimah le keimah ka tithianghlimaw a si. ²⁰ “Anmai hrang lawngah thla ka cam lo. An thu hmang in keimah i zumtu dingpawl hrang khalah thla ka cam. ²¹ Ka pa, nang keimah ah na um ih, kei nangmah ah ka um vekin an zaten pumkhat an si theinak dingah le kanmah ah pumkhat an si theinak ding hrang khalah si seh, leitlun mipawl in nang in i thlah ti an zum theinak dingah thla ka cam. ²² Cule pumkhat kan si vekin annih khal pumkhat an si ve theinak dingah ka hnenih i pek mi ropitnak kha an hnenah ka pe hai. ²³ Pumkhat ih tuah famkim an si theinak dingah le nang in i thlah ih, in duhdawt vekin annih khal na duhdaw ve hai ti leitlun mipawl in an theihtheinak dingah kei cu anmah ah ka um ih, nang cu keimah ah na um. ²⁴ Ka Pa, ka hnenih i pek mipawl in i pek mi ropitnak an hmuh theinak dingah ka umnak hmun ih an um ve ding ka duh. Ziangahtile, leilung sem hlan ihsin nang cun i duhdaw zo. ²⁵ A dingfel mi ka Pa, leitlun mipawl in an lo thei lo. Asinan kei cun ka lo thei. Cule hipawl in nang in i thlah ti an thei. ²⁶ Nang in kei i duhdawtnak, duhdawtnak kha anmah ah a um theinak dingah le keimah kha anmah ih ka um theinak dingah an hnenah na hmin cu ka than zo ih, ka than vivo lai ding,” tiah a ti.

¹ Jesu in cui thupawl a sim hnuah a dungthluntupawl thawn khaw sung ihsin hmuan umnak Kidron an ti mi tivate ralah a feh. Jesu cu a dungthluntupawl thawn cui hmuan sungah a lut. ² Cui hmun cu Jesu le a dungthluntupawl an feh ṭheunak a si ruangah, Jesu phiarsawmtu Judas khalin cui hmun cu a thei ve. ³ Judas cun puithiam sangpawl le Farasipawl hnen ihsin ralkap bur khat le temple kiltupawl a ngah hnuah cu tawkah meifar, meito le hriamnam tla thawn an feh. ⁴ Jesu in a parih thil thleng ding mipawl hmuahhmuah cu a thei ih, an hnenah a va feh. Cule anih in, “Zo nan hawl?” tiah a ti hai. ⁵ Annih in, “Nazareth Jesu,” tiah an sang. Cule Jesu in an hnenah, “Keimah hi ka si,” tiah a ti. A phiarsawmtu Judas khal anmah hnenah a rak ding ve. ⁶ An hnenih, “Keimah hi ka si,” a ti tikah dung lamah an sip ih, leilung ah an tlu. ⁷ Cule Jesu in, “Zo nan hawl?” tiah a sut hai lala. Annih in, “Nazareth Jesu,” tiah an ti. ⁸ Jesu in, “Keimah hi ka si, tiah ka lo ti zo. Curuangah, keimah in hawl asile hi midangpawl hi cu fehter uh,” tiah a sang. ⁹ “Ka hnenih i pek mipawl pakhat hman ka hloh lo,” tiih a rak ti mi a kim theinak dingah cutiih a tinak a si. ¹⁰ Cule, Simon Peter in a neih mi ralnam cu a zuksuak. Cule puithiam lubikih siahhlawhpa a sat ih, a vawrh lam hna a sahthlak. Cui siahhlawhpai hmin cu Malkha a si. ¹¹ Curuangah, Jesu in Peter hnenah, “Na ralnam kha a kawm sungah thun aw. Ka Pa-ih i pek mi no cu ka in tengteng a ṭul a si lo maw?” tiah a ti. ¹² Cule ralkap bur khat le ralbawi le Jew-pawlih temple kiltupawl in Jesu cu an kai ih an ṭem. ¹³ Cule a hmaisabikah Annas hnenah an fehpi. Ziangahtile, Annas cu cui kum ih puithiam lubik a ṭuantu Kaiafas nupi-ih pa a si. ¹⁴ Kaiafas cu mipi hrangah mi pakhat thih cu a ṭhasawn a si, tiih Jew-pawl ruahnak petu a si. ¹⁵ Simon Peter le a dang dungthluntu pakhat in Jesu kha an thlun. Cui dungthluntu cu puithiam lubik ih theih mi a si ih, puithiam lubikih inn tual ah Jesu thawn a lut. ¹⁶ Asinan, Peter cu sangka kiang lengah a ding. Curuangah puithiam lubik ih a rak theih mi cui dungthluntu cu lengah a va suak. Sangka kiltu salnu cu a bia ih, Peter cu a sungah a hruailut. ¹⁷ Cule, sangka kiltu salnu in Peter hnenah, “Nang khal hi pai dungthluntu lakih mi na si ve ko lo maw?” tiah a ti. Peter in, “Ka si lo,” tiah a ti. ¹⁸ Khua a daih ruangah siahhlawhpawl le temple kiltupawl an ding. Cule meihawl meisa an muah ih, meisa an ai. Peter khal cu an hnenah ding in meisa a ai ve. ¹⁹ Puithiam lubik in Jesu cu a dungthluntupawlih thu le a zirh mi thupawl a sut. ²⁰ Jesu in, “Leitlun mipawl hnenah langhnganin thu ka sim. Jew-pawl an pumkhawm ṭheunak sinakok le temple kulh sungah tla ka zirh ringring. A thupin ziang thu hman ka sim dah lo. ²¹ Ziangah thu i sut? Ka thusim theitupawl kha sut aw. Ngai hnik, annih in ka sim mi an theithiam ṭheh ko,” tiah a ti. ²² Asinan, cui thupawl a sim tikah, a kiangih a ding mi temple kiltupawl lakih pakhat in Jesu cu, “Cuvekin puithiam lubik na sawn ngam maw si?” a ti ih, a kut zaphak in a beng. ²³ Jesu in a hnenah, “A ṭha lo mi ka ṭawng asile a ṭha lo mi cu theihter aw. A dik asile ziangah i beng?” tiah a sawn. ²⁴ Cule Jesu cu an ṭem hnuah Annas in puithiam lubik Kaiafas hnenah a kuat. ²⁵ Cu laiah, Simon Peter cu ding in meisa a rak ai. Curuangah annih in a hnenah, “Nang khal a dungthluntupawl lakih pakhat na si ve ko lo maw?” tiah an ti. Peter in, “Ka si lo,” tiah a phat. ²⁶ Puithiam lubikih siahhlawhpawl lakih pakhat, Peter in a hna a sahtan mi pa-ih sungkhatpa in, “Hi pa thawn hmuan sungah ka lo hmu a si lo maw?” tiah a ti. ²⁷ Peter in a phatsal lala. Cu veten ar a khuang. ²⁸ Zingpit teah Jesu cu Kaiafas hnen ihsin praetorium sungah an hruai. An bawrhhlawhlonak dingah le Lantapuai rawl an ei theinak dingah thuṭhennak inn ah cun an lut lo. ²⁹ Curuangah, Pilat cu an hnenah a va suak ih, “Hi pa dokalh in sual puh ding thu ziang nan keng?” tiah a ti. ³⁰ Annih in an sang ih, “Hi pa hi thil ṭha lo tuahtu si lo sehla na hnenah kan rak thlen lo ding,” tiah an ti. ³¹ Cule Pilat in an hnenah, “Amah cu hruai uh la nan Dan in a thu ṭhen uh,” tiah a ti hai. Curuangah, Jew-pawl in a hnenah, “Mi thah cu kan hrangah Dan in a siang lo,” tiah an ti. ³² Jesu in ziangvekin a thi ding ti a sim mi thu kha a kimnak dingah a si. ³³ Cule Pilat cu praetorium sungah a lutsal ih, Jesu cu a ko. Jesu hnenah, “Jew-pawlih Siangpahrang na si maw?” tiah a ti. ³⁴ Jesu in, “Hi thu i suh mi hi nangmai palung in a si maw, midang in ka thuhla an lo sim mi saw a si?” tiah a sawn. ³⁵ Cule Pilat in, “Kei cu Jewmi ka si lo. Nangmai mipawl le puithiam sangpawl in nangmah cu ka hnenah an lo thlen. Ziang saw na rak tuah i?” tiah a sang. ³⁶ Jesu in, “Ka uknak cu hi leitlun ihsin a si lo. Ka uknak cu hi leitlun ihsin si sehla Jew-pawl hnenih thlen ka silonak dingah ka siahhlawhpawl in an do ding. Asinan, ka uknak cu hi leitlun ihsin a si lo,” tiah a sang. ³⁷ Curuangah, Pilat in a hnenah, “Cuti asile siangpahrang maw na rak si?” tiah a sut. Cule Jesu in, “Na ti vekin siangpahrang ka si ko. Cu mi hrangah ka suak ih, thutak theihter dingah leitlun ah ka ra. Zokhal thutak ih a umtu cun ka aw a thei,” tiah a sawn. ³⁸ Pilat in a hnenah, “Thutak cu ziang a si?” tiah a sut. Cu mi a suh hnuah Pilat cu Jew-pawl hnenah a va suaksal ih an hnenah, “A parah mawhsualnak zianghman ka hmu lo. ³⁹ Asinan, Lantapuai ah mi pakhat nan hnenih lo thlahsak dingin dan nan nei. Curuangah Jew-pawlih Siangpahrang hi nan hnenah thlah ningla nan duh maw?” tiah a ti hai. ⁴⁰ Curuangah, an zaten an ausal ih, “Hi pa cu si hlah seh, Barabbas si sawn seh,” tiah an ti. Barabbas cu suamhmang a si.

¹ Cule Pilat in Jesu cu a hruai ih a vuakter hai. ² Ralkappawl in hling ih an phiar mi lukhum a lu ah an khumter ih, puan sendup an sinter. ³ “Jew-pawlih Siangpahrang, salam kan lo pe,” tiah an ti ih an beng. ⁴ Cule Pilat cu a suaksal ih an hnenah, “Ngai hnik uh, a parah mawhsualnak zianghman ka hmu lo ti nan theihtheinak dingah nan hnenah ka rak hruai,” tiah a ti. ⁵ Curuangah, Jesu cu hling lukhum khum in le puan sendup sin in a ra suak. Pilat in an hnenah, “Zoh hnik uh, hi pa hi!” tiah a ti. ⁶ Puithiam sangpawl le temple kiltupawl in an hmuh tikah an au ih, “Khengbet aw, khengbet aw!” tiah an ti. Pilat in an hnenah, “Amah cu nanmah in hruai uh la khengbet uh. Ziangahtile, amah ah mawhsualnak zianghman ka hmu lo,” tiah a ti. ⁷ Jew-pawl in, “Dan kan nei ih, kan Dan vekin thi tlak a si. Ziangahtile, Pathian Fapa ih a tuahawk ruangah,” tiah an let. ⁸ Cui thu cu Pilat in a theih tikah a ṭih sinsin. ⁹ Pilat cu praetorium sungah a fehsal ih, Jesu hnenah, “Khui tawk ihsin na si?” tiah a ti. Asinan Jesu in a sawn lo. ¹⁰ Curuangah Pilat in a hnenah, “I sawn lo ding maw? Nangmah lo khengbet dingin le lo suah ding thupek theinak thuneihnak ka nei ti na thei lo maw?” tiah a ti. ¹¹ Jesu in, “Tlun lam ihsin pek na si lo ah cun ka tlunah thuneihnak zianghman na nei thei lo. Cu mi ruangah na hnenih i thlentupa cu sualnak nasasawn a nei a si,” tiah a sang. ¹² Cui si cun Pilat in Jesu suah theinak ding lamzin a hawl. Asinan Jew-pawl cu an au ih, “Hi pa na suah asile Kaisar-ih rualpi na si lo. Zokhal siangpahrang ka si a tiawtu cu Kaisar dokalh in a ṭawng a si,” tiah an ti. ¹³ Curuangah, Pilat in cui ṭawngkam a theih tikah Jesu cu lengah a hruaisuak ih, ‘Lungphahzial’ an ti mi hmun ih, thuṭhennak tohkham parah a to. Cui hmun cu Hebru ṭawng in ‘Gabbatha’ an ti. ¹⁴ Cule cui ni cu Lantapuai hrang timlamawk ni a si ih, zing nazi paruk hrawngah Pilat in Jew-pawl hnenah, “Zoh hnik uh, nan Siangpahrang hi!” tiah a ti. ¹⁵ Asinan annih in, “Amah cu lahlo aw, lahlo aw! Khengbet aw!” tiah an au ciamco. Pilat in an hnenah, “Nan Siangpahrang cu ka khengbet ding maw?” tiah a ti hai. Puithiam sangpawl in, “Kaisar siarlo siangpahrang dang kan nei lo,” tiah an sawn. ¹⁶ Cule Pilat in an hnenah Jesu cu khengbet dingin a pe hai. Ralkappawl in Jesu cu an la ih an hruaihlo. ¹⁷ A khraws pu in Jesu cu ‘Luruh Hmun’ an ti mi lamah a feh. Cui hmun cu Hebru ṭawng in ‘Golgotha’ an ti. ¹⁸ Cu tawkah Jesu cu an khengbet. Khatlamah pakhat, khatlamah pakhat amah thawn mi pahnih an khengbet ih, Jesu cu a laiah a si. ¹⁹ Pilat in catar a ngan ih, khraws parah a tar. Cui ca a ngan mi cu, “NAZARETH JESU, JEW-PAWLIH SIANGPAHRANG,” tiin a si. ²⁰ Jesu an khenbetnak hmun cu khawpi ihsin a nai ruangah Jew mi tampi in cui hminsinnak ca cu an siar. Pilat in Hebru ṭawng, Laṭin ṭawng le Grik ṭawng pawl in a ngan. ²¹ Jew-pawlih puithiam sangpawl in Pilat hnenah, “ ‘Jew-pawlih Siangpahrang,’ tin ngan hlah, ‘Jew-pawlih Siangpahrang ka si,’ a ti tiah ngan sawn aw,” tiah an ti. ²² Pilat in, “Ka ngan zo mi cu ka ngan zo mi a si mai,” tiah a sang hai. ²³ Ralkappawl in Jesu an khenbet hnuah a hnipuan tla cu an lak ih, ralkap pakhat ciar hrangah ṭhen li ah an ṭhen. A angki sung hruh lawng a tang. Acui angki cu ṭhit lo mi a pum in a tahih tah mi a si. ²⁴ Curuangah annih in, “A angki cu thlek hlah uhsi. Zo in a co pei ti theihnak ah camcawhfung kan zuk pei,” tiah pakhat le pakhat an tiaw. Cumi cu Cathianghlim sungah, “Ka hnipuan cu an ṭhenaw ih, ka angki hrangah camcawhfung an zuk,” a ti mi a kim theinak dingah a si. Curuangah hi thupawl cu ralkappawl in an tuah. ²⁵ Cule Jesu-ih khraws kiangah a nu, a nu-ih naunu, Kleopas nupi Mary le Mary Magdalin tla an ding. ²⁶ Jesu in a nu le a duhdawt mi dungthluntupa cu tawkih an din kha a hmu ih a nui hnenah, “Nunau, zoh hnik na fapa kha,” tiah a ti. ²⁷ Cule a dungthluntupa hnenah, “Zoh hnik na nu kha,” tiah a ti. Cui can ihsin acui dungthluntupa in anih cu amai inn ah a hruai. ²⁸ Cu mi hnuah, Jesu in atu cun thil ziang hmuahhmuah ṭheh a si zo ti a thei ih, Cathianghlim a kim theinak dingah, “Ka ti a hal,” tiah a ti. ²⁹ Cu tawkah sabitti thur ih khat bel a um. Cui sabitti thur sungah tihawp cu an hnim ih hisop fung zim ah an ṭawn. Cule a kaa ah an hun ret. ³⁰ Jesu in sabitti thur a teh hnuah, “Ṭheh a si zo,” tiah a ti. Cule a lu a kun ih, a thlarau a thlah. ³¹ Cui ni cu Sabbath Ni hrangih timlamawk ni a si. Cui Sabbath Ni cu ni ropi a si. Curuangah, an ruangpawl cu Sabbath Ni ah khraws parih an tanlonak dingah an khenbet mipawlih ke khiak dingin le lathla dingah Jew-pawl in Pilat hnenah an dil. ³² Curuangah ralkappawl an ra ih, Jesu thawi an khenbettlang mi pakhatpai ke an khiak ih a dang pakhatih ke khal an khiak. ³³ Asinan, Jesu hnen an thlen tikah a thi zo ti kha an hmu ih a ke an khiak lo. ³⁴ Asinan, ralkappawl lakih pakhat in Jesu-ih hnak kha a feipi in a hun dawt ih hmakhatteah thisen le ti a suak. ³⁵ Cu mi a hmutu in hi thu cu a theihter a si. A theihter mi thu hi a dik a si. Nan zum theinak dingah a theihter mi thu hi a dik a si ti a thei. ³⁶ Cathianghlim ah, “A ruh pakhat hman khiahsak a si lo ding,” tiih ngan mi a kim theinak dingah cui thilpawl cu a cang a si. ³⁷ Cun, Cathianghlim sung hmun dangah, “An dawh mi pa cu an zoh ding,” tiin a um. ³⁸ Cu mi hnuah, Arimathia khaw mi Joseph in Jesui ruang lathla dingin Pilat a va dil. Cule Pilat in a sen ih, Joseph in Jesui ruang cu a lathla. Joseph cu Jesu dungthluntu pakhat a si. Asinan Jew-pawl ṭih ruangih thupte dungthluntu a si. ³⁹ Hi hlanih Jesui hnenah zan ih a rak feh dahtu Nikodemas khal a feh ve ih mura le aloe rawi mi litra zakhat hrawng rit a keng. ⁴⁰ Jesu ruak cu an la ih Jew-pawl phumawkdan vekin rimhmui hriak thawn puannem pate tlain an tuam. ⁴¹ Jesu an khenbetnak hmun ah hmuan pakhat a um ih, cui hmuan ah cun mithi ruang an phum dah hrih lonak thlan thar pakhat a um. ⁴² Jew-pawlih timlamawk ni a si ruangah le thlan a nai ruangah Jesui ruang cu cui thlan ah an phum.

¹ Zarh khat ih a hmaisabik ni, zingpitte, khua a thim hrih laiah Mary Magdalin cu thlan ah a va feh ih, lungto cu thlan ihsin ṭhawnaw cia in a va hmu. ² Curuangah a tlan ih, Simon Peter le Jesui a duhdawt mi a dang dungthluntu pakhat hnenah a feh. Cule an hnenah, “Bawipa cu thlan ihsin an la zo. Khui tawkah an ret ti kan thei lo,” tiah a ti. ³ Curuangah Peter le cui dungthluntu dang cu an pawksuak ih, thlan ah an feh. ⁴ Cule an pahnih in an tlantlang ih, a dang dungthluntu cu Peter hnakin tlan a cahdeuh ruangah thlan ah a rak thleng hmaisa. ⁵ Cule a vung kun ih a bih tikah puannem pate tla a vun hmu. Asinan thlan sungah cun a lut lo. ⁶ A hnuah Simon Peter cu a ra thleng. Thlan sungah cun a lut ih, puannem pate cu tawkih um le ⁷ a lu tuamnak puante cu puannem patepawl thawn hmunkhat ah um loin zualaw in hmun dangih um cu a hmu. ⁸ Cule thlan ih thleng hmaisatu a dang dungthluntupa khal a sungah a lut ve ih, a hmu ih a zum. ⁹ Ziangahtile, mithi lak ihsin a thosal ding tiih Cathianghlim ih a ti mi cu an thei hrih lo. ¹⁰ Cule dungthluntupawl cu anmai umnak hmun ah an tlungsal. ¹¹ Asinan Mary cu thlan lengah dingin a ṭap rero. Ṭap phahin a kun ih, thlan sung cu a vun bih. ¹² Cule, vancungmi pahnih puan var hruh in Jesu ruang an rak ret dahnak ah khan a lu lamah pakhat, a ke lamah pakhat to in a vun hmu. ¹³ Annih in a hnenah, “Nunau, ziangah saw na ṭah?” tiah an ti. Anih in an hnenah, “Ka Bawipa an lakhlo ruangah ka ṭap. Khui tawkah an ret ti ka thei lo,” tiah a ti. ¹⁴ Cutiih a ti hnuah Mary cu a heraw ih, cu tawkah Jesu ding in a hmu. Asinan Jesu a si ti a thei lo. ¹⁵ Jesu in a hnenah, “Nunau, ziangah na ṭap rero? Zo so na hawl?” tiah a sut. Cule Mary in anih cu hmuan kiltu ah a ruat ih a hnenah, “Ka pu, nangmah in amah cu na rak lahlo asile na retnak hmun i sim aw la, ka la ding,” tiah a ti. ¹⁶ Jesu in a hnenah, “Mary,” tiah a ti. Mary cu a her ih a hnenah, “Rabboni,” tiah a ti. A sullam cu ‘Zirhtu’ tinak a si. ¹⁷ Jesu in a hnenah, “I kai hlah. Ziangahtile, ka Pai hnenah ka feh hrih lo. Asinan ka unaupawl hnenah va feh aw la, ‘Ka Pa le nan Pa, ka Pathian le nan Pathian hnenah ka kai so ding a ti, tiah va sim hai aw,’ ” tiah a ti. ¹⁸ Mary Magdalin cu a feh ih, dungthluntupawl hnenah Bawipa a hmuh thu le cuipawl tla cu a hnenih a sim mi a si thu a sim hai. ¹⁹ Cu mi ni thotho, zarh khat ih ni hmaisabik zan lamah Jew-pawl an ṭih ruangah dungthluntupawl cu hmunkhat ih an umkhawmnak sangka an khar. Jesu a ra thleng ih an laiah a ding ih an hnenah, “Nan hnenah hnangamdaihnak um hram seh,” tiah a ti. ²⁰ Cu mi a ṭawng ṭheh hnuah a kut le a hnak tla a hmuh hai. Dungthluntupawl in Bawipa an hmuh tikah an lung a awi zet. ²¹ Curuangah Jesu in an hnenah, “Nan hnenah hnangamdaihnak um hram seh. Ka Pa in kei i thlah vekin nannih khal ka lo thlah ve a si,” tiah a tisal. ²² Cu mi a ṭawng ṭheh hnuah an parah a thaw a thawt ih an hnenah, “Thlarau Thianghlim co uh. ²³ Zo-ih sualpawl khal nan ngaidam mi cu ngaidam an si ding. Zo-ih sualpawl khal nan ngaidam lo mi cu ngaidam a si lo ding,” tiah a ti. ²⁴ Asinan, dungthluntu hleihnih lakih pakhat a si mi ‘Diduma’ an ti mi Thomas cu Jesu a rat laiah an hnenah a rak um lo. ²⁵ Curuangah a dang dungthluntupawl in a hnenah, “Bawipa cu kan hmu,” tiah an ti. Asinan Thomas in an hnenah, “A kut ah tlawngkhen ih an khennak hmasi ka hmuh ih, tlawngkhen ih an khennak hmasi ah ka kutzung ka ret ih a hnak kha ka kut in ka tham lo ah cun ka zum hrimhrim lo ding,” tiah a ti. ²⁶ Ni riat hnuah Jesu-ih dungthluntupawl cu inn sungah an umsal. Thomas khal cu an hnenah a um. Sangka an khar ko nan Jesu cu a ra thleng ih a laiah a ding. Cule, “Nan hnenah hnangamdaihnak um hram seh,” tiah a ti. ²⁷ Cule Thomas hnenah, “Na kutzung in tham aw la, ka kut tla hi zoh hnik. Na kut suah aw la, ka hnak hi tham aw. Zum loin um hlah, zum aw,” tiah a ti. ²⁸ Thomas in a sang ih a hnenah, “Ka Bawipa le ka Pathian!” tiah a ti. ²⁹ Jesu in a hnenah, “Thomas, i hmuh ruangah na zum. Hmu lo ih a zumtu cu mihualvanṭha an si,” tiah a ti. ³⁰ Cun Jesu in a dang hminsinnak tampi a dungthluntupawlih hmaiah a tuah. Cupawl cu hi cazual sungah ngan a si lo. ³¹ Asinan Jesu cu Khrih, Pathian Fapa a si ti nan zum theinak dingah le nan zum tikah a hmin in nunnak nan neih theinak dingah hipawl hi ngan an si.

¹ Cui thilpawl hnuah Jesu cu Ṭaiberias tili kiangah a dungthluntupawl hnenah a langawtersal. A langawkterdan cu hitin a si: ² Simon Peter, ‘Diduma’ tiih an kawh mi Thomas, Galili peng Kana khaw mi Nathanael, Zebedi-ih fapapawl le a dungthluntu a dang pahnih tla hmunkhat ah an um. ³ Simon Peter in an hnenah, “Kei cu nga kai ah ka feh ding,” tiah a ti. Annih in a hnenah, “Kannih khal na hnenah kan feh ve ding,” tiah an ti. An fehsuak ih, lawng sungah an lut lohli. Cui zan ah cun zianghman an kai lo. ⁴ Zing a thlen tikah Jesu cu ti kapah a ding. Asinan, dungthluntupawl in Jesu a si ti an rak thei lo. ⁵ Curuangah Jesu in an hnenah, “Falenuh, ei ding ziangtal nan nei maw?” tiah a ti hai. Annih in, “Nei lo,” tiah an sang. ⁶ Cule an hnenah, “Nan sur kha lawng ih vawrh lamah vawrh hnik uh la nga nan ngah ding,” tiah a ti hai. Cule an sur cu an hei vawrh ih, nga a tam tuk ruangah an sur an dir thei lo. ⁷ Curuangah Jesu ih duhdawt mi dungthluntu in Peter hnenah, “Bawipa sokhaw a si,” tiah a ti. Simon Peter in Bawipa a si ti a theih tikah a kawr leng a rak phawih ruangah a kawr leng kha a hruh ih, tili sungah a dawp lohli. ⁸ Dungthluntu dangpawl cu khawmual ihsin hla lo pi zathum hrawngah an um ih, sur in nga dir phah reroin lawng fa te in an ra. ⁹ Khawmual parih an hung thlen tikah meihawl ling le a parih em mi nga le sang kha an va hmu. ¹⁰ Jesu in an hnenah, “Atu teih nan kaih mi nga hrekkhat kha rak keng uh,” tiah a ti. ¹¹ Simon Peter cu a feh ih, nga tum zetzet za le sawmnga le pathum thawi a khat mi sur cu lei parah a dirsuak. Nga a tam zet ko nan sur cu a tlek lo. ¹² Jesu in an hnenah, “Ra uh la thawhhlam ra ei uh,” tiah a ti. Asinan dungthluntu zohman in, “Zo na si?” tiah an sut ngam lo. Bawipa a si ti an thei. ¹³ Jesu cu a va feh ih, sang anmah a pe hai. Cuvek thothoin ngasa khal cu a pe hai. ¹⁴ Pathian in mithi lak ihsin Jesu a thawhter hnuah hihi a dungthluntupawl hnenih vei thum a langawkternak a si. ¹⁵ An ei ṭheh hnuah Jesu in Simon Peter hnenah, “Jonah-ih fapa Simon hipawl hnakin i duhdaw sawn maw?” tiah a ti. Simon in a hnenah, “A si, Bawipa, ka lo duhdaw ti na thei,” tiah a ti. Jesu in a hnenah, “Ka tuufanopawl cawm aw,” tiah a ti. ¹⁶ Jesu in a vei hnihnak a hnenah, “Jonah-ih fapa Simon, i duhdaw maw?” tiah a ti. Simon in a hnenah, “A si, Bawipa, ka lo duhdaw ti na thei ko,” tiah a ti. Jesu in a hnenah, “Ka tuupawl khal aw,” tiah a ti. ¹⁷ A vei thumnak Jesu in a hnenah, “Jonah-ih fapa, Simon, i duhdaw maw?” tiah a ti. Jesu in a vei thum tiang rori a hnenah, “I duhdaw maw?” a ti ruangah Peter cu a riah a sia. Cule Jesu hnenah, “Bawipa, ziangkim na thei, ka lo duhdawtzia khal na thei ko,” tiah a ti. Jesu in a hnenah, “Ka tuupawl cawm aw. ¹⁸ Thungaiin, thungaiin ka lo sim, na no laiah cun nangmah le nangmah na tai na ṭawnaw ih na duhnak kipah na feh. Asinan na upat tikah cun na kut na pharh ding ih, midang in na tai a lo ṭawn ding. Cule na feh duhlonak hmun ah a lo hruai ding,” tiah a ti. ¹⁹ Hi thu a sim mi in ziangvek thihnak in Peter in Pathian a sunlawih ding ti a langter. Jesu in cui thu a hnenih a sim hnuah, “I thlun aw,” tiah a ti. ²⁰ Peter cu a her ih, Jesu ih duhdawt mi dungthluntu in an dung ihsin a thlun kha a hmu. Cu pa cu zanriah an ei laiih Jesui ṭang hngohsan tahrat ih, “Bawipa, a lo phiarsawmtu ding cu zo a si?” tiih Jesu suttupa kha a si. ²¹ Peter in cu pa a hmuh tikah Jesu hnenah, “Bawipa, hi pa teh?” tiah a ti. ²² Jesu in a hnenah, “Ka ratsal tiang tang ding ih ka duh mi a si ah teh, na hrangah a pawinak ziang a um? I thlun aw,” tiah a ti. ²³ Curuangah, cui ṭawngkam cu cui dungthluntupa cu a thi lo ding tiah unaupawl lakah a thang. Sikhalsehla, Jesu in, “Cu pa cu a thi lo ding,” tiah a ti lo. “Ka rat tiang tang dingih ka duh mi a si ah teh na hrangah a pawinak ziang a um?” a ti a si. ²⁴ Cui dungthluntupa cu hi thupawl theihtertu le ngantu hi a si. A thu theihter mi cu a dik a si ti kan thei. ²⁵ Jesu ih a tuah mi thil dang tampi a um hrih lai. Pakhat hnu pakhat ngan vivo sehla ngan mi cazualpawl cu leitlun pumpi ah hin a tlem lo ding tiah ka ruat. Amen.