JEIM

JEIM

¹ Pathian le Bawipa Jesu Khrih-ih ṭemṭawn sal a si mi, keimah James in, hmun dangdangih a ṭekdarh mi, Israel miphun hleihnihpawl kha cibai ka lo buk. ² Ka u le nau tla, hniksaknak a phunphun nan tawn tikah lungawinak hlirah ruat uh. ³ Ziangahtile, nan zumnak hniksaknak cun tuarfainak a suah ti nan thei. ⁴ Nan famkim ih, nan tlamtlin thluh theinak dingah tuarfainak cun ṭuan famkim sehla, cuti cun zianghman nan tlasam lo ding. ⁵ Nan lakah zokhal in fimnak a tlaksam asile, mi hmuahhmuah hnenih siang zet le mi mawhthluk lo ih pe ṭheutu Pathian hnenah dil seh, cule anih cu pek a si ding. ⁶ Asinan ringhlel loin, zumnak in dil seh. Ziangahtile, a ringhleltu cu thli in tifinriat suar suk le so ih a hran mi vek a si. ⁷ Curuangah cutivek mi cun Bawipai hnen ihsin thil zianghman ka ngah ding tiah ruat hlah seh. ⁸ Thinlung phir a neitu cu a nun lamzin tluan hmuahhmuah ah a hnget lo. ⁹ Dinhmun niam unau cu cawisan a si tikah lungawi seh. ¹⁰ Asinan, milianpa cu a dinhmun niamter a si tikah lungawi seh; ziangahtile, hrampi par bangin amah cu a ziamral ding a si. ¹¹ Ziangahtile, ni a suak ih a sat tikah ni cun hrampi a vuaiter ih a par tla an ṭil, cun, a mawinak tla a hloralter. Cutivekin milian cu a lamzin tluanpawl ah a ziamral ding. ¹² Hniksaknak a tuar ṭenṭotu cu mihualvanṭha a si. A tuar ṭenṭo ruangah nunnak lallukhum a co ding. Cui lallukhum cu Bawipa in amah duhdawtupawl hnenih pe dingih a tiamkam mi a si. ¹³ Mi pakhatkhat in sualfawrhnak a tawn tikah, “Pathian in sual i fawrh,” ti hlah seh; ziangahtile, Pathian cu thil ṭha lo thawi sualfawrh theih a si lo ih, mi zokhal sual a fawrh lo. ¹⁴ Mi kip sualfawrhnak cu hitin a si: anmai cakhiarnak in Pathian hnen ihsin a hruaihlo hai ih, cutin ziang in simaw a hip hai. ¹⁵ Cule, cakhiarnak in fa a vun hnuah sual a hring. Cui sual cu a pitlin tikah thihnak a hring. ¹⁶ Ka duhdawt mi u le nau tla, bum in um hlah uh. ¹⁷ A ṭha mi thilpek hmuahhmuah le thilpek famkim hmuahhmuah cu tlun lam ihsin an si ih, tleupawlih Pa hnen ihsi ra an si. Amah ah cun thlengawknak hrimhrim le thlengawknak hlimthlam khal a um lo. ¹⁸ A sersiam mi lakih rah hmaisabik vek kan si theinak dingah Pathian in amai duhzawng in thutak thu in in hring a si. ¹⁹ Curuangah, ka duhdawt mi u le nau tla, mi kipin thu ngaithla dingah cun zamrang mi si uh la, ṭawng dingah le thinheng dingah cun khulfung mi si uh. ²⁰ Ziangahtile, minung thinhengnak in Pathian dingfelnak a hringsuak lo. ²¹ Curuangah bawrhhlawhnak hmuahhmuah le ṭhatlonak a liam mi cu hlawn uh la, nan thlarau a lo rundam theitu phun mi thu cu tangdawrnak thawn rak cohlang uh. ²² Mah le mah bumaw in, thu ngaithlatu men lawng si loin, a tuahtu si sawn uh. ²³ Ziangahtile, mi zokhal tuahtu si lo ih a ngaithla mentu cu thlalang ih a suahpi hmel zohawtu vek a si. ²⁴ Ziangahtile, amah le amah a zohaw ih, a fehsal. Hmakhatteah ziangvek mi a si ti a hngilh. ²⁵ Asinan zokhal zalennak dan famkim cu zoh in, cu mi ih um peh vivo i, a thu ngaithlak mi hngilhsal mentu si loin a tuahtu a si ah cun, cu pa cu a thiltuah mi ah mihualvanṭha a si ding. ²⁶ Nan lakah mi pakhat in biaknak lamih zuamaw zetah a ruataw nan a lei a kil ṭha lo. Cu pa cun amai thinlung a bum ih, a biaknak cu zianghmanlomen a si. ²⁷ Pathian le Pa hmaiih biaknak thianghlim le bawrhhlawh lo cu, nu le pa nei lopawl le nuhmeipawl an harsat canih veh le khawvel mi sinak lak ihsin sawihnawm ding um lo ih mah le mah kilkhawiawk hi a si.

¹ Ka u le nau tla, ropitnak Lal, kan Bawipa Jesu Khrih ah zumnak nan nei. Cui zumnak thawn mi thleidan nei hlah uh. ² Ziangahtile, nan pumkhawmnak ah mi pakhat sui zunghruk hruk in, hnipuan ṭha zet thawn rung lut sehla, cun mirethei hnipuan se ṭiapṭi thawn rung lut ve sehla; ³ cule, hnipuan ṭha hruktu cu nan upat ih, a hnenah, “Nang hi tawkih hmun ṭha ah hin to aw,” nan ti ih, cui mirethei hnenah, “Nang cu khi tawkah khin ding aw,” asilole, “Ka kepal ah to aw,” nan ti a si ah cun, ⁴ nanmah le nanmah lakah thleidanawknak nei in, khawruahnak ṭhalopawl hmang i thuṭhentu ah nan cang lo ding maw? ⁵ Ka duhdawt mi u le nau tla, ngai hnik uh, Pathian in hi leitlun ih miretheipawl hi zumnak ih milian ah le amah duhdawtupawl hnenih a tiamkam mi Pathian uknak ro cotu ah a hril a si lo maw? ⁶ Asinan nannih in miretheipawl cu nan hmuhsuam. Milianpawl cun an lo dekcawk ih, thuṭhennak hmaiah an lo dir ṭheu a si lo maw? ⁷ An lo kawhnak hmin zahum cu an thangsiat a si lo maw? ⁸ Cathianghlim bangtukin, “Nangmah na duhdawtawk vekin, na inhnen na duhdaw ding a si,” a ti mi siangpahrang dan nan thlun famkim asile nan tiṭha a si. ⁹ Asinan mi thleidan nan neih ah cun sual nan tuah ih, dan cun dan pahbaltu ah a lo phuang a si. ¹⁰ Ziangahtile, mi zokhal in Dan thlun thluh in pakhatte a pahbal asile a zate parih mawhsualnak nei ah a cang. ¹¹ Ziangahtile, “Uire hlah,” titu cun, “Tual that hlah,” ti khal a ti thotho. Atu ah na uire lo khal asile tual na thah a si ah cun nang cu Dan pahbaltu ah na cang. ¹² Cuiruangah zalennak danih thuṭhen ding mi vekin ṭawng uh la, tuah uh. ¹³ Ziangahtile, zahngainak langter dahlotui parah zahngainak tel loin thuṭhensak a si ding. Zahngainak in thuṭhennak cu a neh. ¹⁴ Ka u le nau tla, mi pakhat in, zumnak ka nei, ti khal sehla tuahnak a neih lo ah cun ziang a ṭhahnem? Cuvek zumnak cun amah a rundam thei ding maw? ¹⁵ Unaupa asilole unaunu cu taklawng ih um in, a ni tin ei ding rawl nei loin um sehla, ¹⁶ cule, nan lakih pakhat in an hnenah, “Hnangamten feh uh la, hlum le puar in um uh,” ti sehla, an taksa ṭul mipawl a pek si lo ah cun ziang a ṭhahnem? ¹⁷ Cuvek thothoin zumnak khal tuahnak tel lo ih amah lawng a um ah cun a thi a si. ¹⁸ A si, mi pakhat in, “Nang in zumnak na nei ih, kei in tuahnak ka nei. Na zumnak cu na tuahnak tel loin i hmuh aw la, cule kei in ka zumnak cu tuahnak in ka lo hmuh ding,” tiah a ti tla a si men ding. ¹⁹ Pathian pakhat a um ti na zum. Na tiṭha e. Khawsepawl khalin an zum ih, an khur rero! ²⁰ Sikhalsehla, maw nang miaa! Tuahnak tel lo zumnak cu a thi a si ti theih na duh maw? ²¹ Kan pa Abraham in a fapa Isak, biakṭheng parih a hlanlaiah khan tuahnak ruangah thiam a co a si lo maw? ²² A zumnak cu a tuahnakpawl thawn hna a ṭuan ih, cule tuahnakpawl ruangah zumnak cu famkimter a si ti na thei! ²³ Cun, Cathianghlim in, “Abraham in Pathian a zum ih, cucu amai dingfelnak ah ruahsak a si,” a ti mi thu cu a kim zo. Cun, anih cu, Pathian rual, tiih kawh a si. ²⁴ Minung hi tuahnak in thiamcoter a sizia nan thei, zumnak lawngin a si lo. ²⁵ Cuvek thothoin hlawhhlang Rahab khal kha tuahnak parah ṭhumaw in thiam a co a si lo maw? Thuphurtupawl a rak cohlan hnuah zin dangin a rak thlah hai. ²⁶ Ziangahtile, thlarau tel lo taksa cu thi a si vekin, tuahnak tel lo zumnak cu thi a si.

¹ Ka u le ka nau tla, zirhtupawl in thuṭhennak nasasawn kan tawng ding ti thei in nannih lakih mi tampi kha zirhtu va si hlah uh. ² Ziangahtile, kan zaten thil tampi ah kan tlu ṭheu. Zokhal a ṭawngkam ih a tluk lo asile anih cu mipitling a si ih, a taksaruangpi khal a thunun thei a si. ³ Ngai hnik, kan thu an lun theinak dingah, rang kaa tla ah a kakharh kan bun ih, cu mi hmang cun an taksaruangpi cu kan herter ṭheu. ⁴ Lawngpawl khal khi zoh hnik uh, an tum zet ih, a nasazet mi thli cun a fehter. Asinan lawng mawngtu in a duhnak lamlamah lawnghlaunak fa te zetin a her ṭheu. ⁵ Cuvek thothoin lei khal hi taksa peng fa te zet a si ih, nasa zetzetin a uangaw ṭheu. Ngai hnik, meisa fataktein ziang tluk thiltum a kangter thei! ⁶ Cun lei hi meisa a si ih, siarcawklo dingfellonak tuahtu a si. Cutivek cun kan taksa peng lakah a cangvai ih, kan taksa pumpuluk in a bawrhhlawhter. Lei cun kan nun lamtluan a kangter ṭheu. Cui mei cu Gehenna meisa ihsi ra mi a si. ⁷ Ziangahtile, ramsa phun kip le vate phun zakip, bawkvak phun zakip le tifinriat sungih thilnung phun zakip tla cu milai in ngawingam ko an tuah ih, ngam ko an rak tuah. ⁸ Sihmansehla, lei cu zohman in an ngawingamter thei lo. Lei cu khuahkhirh theih lo thil ṭha lo, thihnak tur thawi khat mi a si. ⁹ Cu mi thawn kan Pathian le Pa cu kan thangṭhat ih, cule cu mi thawn Pathian bangnak nei ih tuah mi, milai kan camsiat ṭheu. ¹⁰ Cui kaa thotho ihsin thangṭhatnak le camsiatnak a suak. Ka u le ka nau tla, hi thilpawl tla cu cutivekih si ding a si lo. ¹¹ Cirhti hna pakhat in ti thlum le ti kha a suaktlang maw? ¹² Ka u le ka nau tla, theipi kung in olif rah a rah thei maw, asilole sabit hri in teh theipi rah a rah thei maw si? Curuangah ziang cirhti khalin ti al le ti thiang a suakkawp thei lo. ¹³ Nan lakah zo so mifim le theihnak neitu? Anih cun a thiltuah mipawl cu umtlandan ṭha in, tangdawrnak le fimnak thawn langter seh. ¹⁴ Sihmansehla, nan thinlung sungah iksiknak nasazet le ṭhenṭhekter duhnak thinlung nan neih asile, tluangkhawng hlah uh, thutak dodal in thuphanper hlah uh. ¹⁵ Hi fimnak cu tlun lam ihsin a rung lo ih, leitlun, milai le khawsia hnen ihsin a si sawn. ¹⁶ Curuangah iksiknak le ṭhenṭhek duhnak thinlung a umnak hmun ah, buainak le thil ṭha lo phun zakip a um ṭheu. ¹⁷ Sihmansehla, tlun lam ihsin a si mi fimnak cu a hmaisabik in a thianghlim, cule remnak a duh, a nun a nem, midang hnenah a tuhlutaw, zahngainak le rah ṭha tlain a khat, mi thleidan a nei lo ih, nun deu a nei lo. ¹⁸ Cun, dingfelnak rah cu remnak a tuahtupawl in remnak in an tuh a si.

¹ Nan lakih doawknak le tawhawknak pawl hi khui ihsin an ra? A doaw mi nan taksa pengpawl lakih cakhiarnak ihsi ra suak mi an si lo maw? ² Cakhiarnak nan nei nan, nan cakhiar mi cu nan nei lo. Lai nan that ih neih nan duh, asinan nan ngah thei lo. Nan toaw ih nan doaw, asinan nan nei cuang lo, ziangahtile nan dil lo ruangah a si. ³ Nan dil ih nan ngah lo. Ziangahtile, nan nawmcennak hrangih hmang dingin le nan dil diklo ruangah a si. ⁴ Nannih uire mipapawl le uire nunaupawl! Khawvel thawi rualpitawknak cu Pathian thawi ralawknak a si ti nan thei lo maw si? Cuiruangah mi zokhal khawvel ih rualpi si a duhtu cu Pathian ral a si. ⁵ Cathianghlim in, “Kan sungih a ceng mi Thlarau cun thik khawp tiangin in duh a si,” a ti mi hi alak men i sim ah maw nan ruat? ⁶ Sihmansehla, Pathian cun zangfahnak tamsin a pe. Curuangah anih in, “Pathian in mipuarthaupawl a do ih, tangdawrpawl hnenah zangfahnak a pe,” tiah a ti. ⁷ Curuangah Pathian hnenah tlulut uh. Diabol cu do uh, cule a lo tlansan ding. ⁸ Pathian naih uh la, anih khalin a lo naih ve ding. Nannih misualpawl, nan kut tla khawlhfai uh. Cun nannih thinlung phirneipawl, nan thinlung thianfai uh. ⁹ Lungkuai in um uh, ninghanglungsia in um uh la, ṭap uh! Nan hnihnak cu ninghanlungsiatnak ah cang seh la, nan lungawinak cu riahsiatnak ah cang seh. ¹⁰ Bawipai hmaiah hnuaidawr uh, cule anih in a lo khaisang ding. ¹¹ U le nau tla, pakhat le pakhat relseaw hlah uh. A unau a relsia ih a unau thu a ṭhentu cun Dan a relsia ih Dan cu thu a ṭhen a si. Dan cu thu na ṭhen asile, nang cu Dan thluntu si loin, Dan thuṭhentu na si sawn. ¹² Dan petu pakhat a um, amah cu mi run theitu le mi siatsuah theitu a si. Midang thu va ṭhentu, nang cu zo so na si? ¹³ Atu ah nannih, “Tuisun ah asilole thaisun ah cu mi kha mi khawpi ah kan feh ding ih, cu tawkah cun kumkhat kan um ding, cule kan lei ding ih kan zuar ding, cule kan hlawk ding,” a titupawl, ngai hnik uh, ¹⁴ thaisun ah ziang a cang ding ti nan thei lo. Ziangahtile, nan nunnak cu ziang a si? Nan nunnak cu can malte sung a lang ih a hloralsal mi mero vek a si. ¹⁵ Curuangah, “Bawipa in rem a ti asile, kan nungdam ding ih, cu mi kha mi kan tuah ding,” ti ding nan si. ¹⁶ Asinan atu ah nannih cu duhaw zetin nan tluangkhawng. Cuvek tluangkhawnnak hmuahhmuah cu thil ṭha lo a si. ¹⁷ Curuangah thil ṭha tuah ding thei na cingih a tuah lo ah cun, cucu a hrangah sual a si.

¹ Nannih milianpawl, atu ah ngai hnik uh, nan parih a ra thleng ding mi harsatnak nasazetpawl ruangah ṭap uh la aihram uh. ² Nan lennakpawl tla a siatral ih nan hnipuanpawl tla cu sunhrul in a ei. ³ Nan sui le ngun tla a tlapsiat thluh ih, cui pawlih tlap cu nanmah lo dokalh ih theihpitu an si ding ih, nan titsa cu meisa kang bangin a ei ding. Ni neta can hrangah hlawnthil nan rak khawlkhawm a si. ⁴ Ngai hnik uh, bumnak ruangah nan lo ih nan hlawhfa, fang attupawl kha an hlawh nan pe lo. An hlawhman tla cu an au a si. Fang hlawhfa ih aunak cu Ralkaprual Bawipai hna sungah a lut. ⁵ Leitlun ah nun nuam zetin nan nung ih nuam nan cen; nan thinlung cu ran talh ni vekin nan rak cawm thau. ⁶ Midik cu thiamlo nan coter ih nan that; anih cun a lo dodal hai lo. ⁷ Curuangah u le nau tla, Bawipa a rat tiangin thinsau in um uh. Ngai hnik uh, lo ṭuantu cun thlai in ruah hmaisa le ruah neta a dawn lai hlanlo thinsau zetin a hngak ih, leilung rah sunglawi zet cu a hngak a si. ⁸ Nannih khal thinsau in um uh. Bawipai rat ding a nai ruangah nan thinlung hngetter uh. ⁹ U le nau tla, pakhat le pakhat phunaw hlah uh, Pathian in thiamlo a lo coh pang ding. Ngai hnik uh, Thuṭhentu cu sangka ah a ding a si! ¹⁰ Ka u le nau tla, Bawipai hmin i thu a simtu profetpawl cu harsat tuardan ah le tuarfaidan ah zohṭhim dingah la uh. ¹¹ Ngai hnik uh, a tuartupawl cu milungawi ah kan ruat. Job-ih tuarfainak cu nan hna in nan rak thei zo ih, Bawipa in a netnakah a hrangah ziang a tuahsak ti khal nan hmu zo. Bawipa cun lainatnak tam zet le zahngainak tam zet a nei. ¹² Asinan, ka u le nau tla, a pawimawhbik cu hihi a si: van sal in si seh, lei sal in si seh, a dang ziangkhal in si seh, siasam hlah uh. “A si,” nan ti mi cu “A si,” si seh la, “A si lo,” nan ti mi cu “A si lo,” si seh. Cuti asilole thuṭhennak nan tawng pang ding. ¹³ Nan lakah harsatnak tuar mi an um maw? Thla cam seh. Lungawi an um maw? Thangṭhatnak hla sak seh. ¹⁴ Nan lakah mina an um maw? Elder-pawl ko seh la, Bawipai hmin in amah cu hriak hnih in a parah thla camter seh. ¹⁵ Cule, zumnak ih thlacamnak cun mina a tidam ding ih, Bawipa in amah cu a kaitho ding. Cun sual tuah mi tla a rak neih asile, cupawl cu ngaidam an si ding. ¹⁶ Nan dam theinak dingah pakhat le pakhat nan thil tisualpawl phuangtawnaw uh la pakhat le pakhat thla camsakaw uh. Midingfel ih ṭhahnemngai zet le hmualnei zetih thlacamnak cun thil tampi a rahsuah. ¹⁷ Elijah cu kanmah vek mizia nei milai pakhat a rak si. Ruah sur lo dingin nasazetin thla a cam ih, kumthum le thlaruk sung leitlun ah ruah a sur lo. ¹⁸ Cun, thla a camsal ih van in ruah a pe ih, leilung in rah a suah. ¹⁹ U le nau tla, nan lakih mi pakhatkhat thutak ihsin a peng ih pakhat in cu pa cu a kirtersal asile, ²⁰ misual a lamzin pennak ihsin a kirtertu cun thihnak ihsin cu pai nunnak cu a runsuak ding ih, sual tampi a khuh fawn ding ti thei seh.