HEBRU

HEBRU

¹ A liam cia zo mi canah a phunphun le lamzin dangdangin profetpawl hmang ih pupapawl hnenih thu rak simtu Pathian in, ² hi ni netapawl ah a Fapa hmang in kan hnenah thu a rak sim. Amah cu thil hmuahhmuah rocotu ah Pathian in a ruat ih, amah hmang thothoin leilungpawl tla hi Pathian cun a rak tuah. ³ Amah cu Pathian ropitnakih tleu le a sinak mizia langsuahnak diktak a si. Thil ziangkim hi a thiltitheinak thu in a khaidinghnget thluh. Kan sualnakpawl tla amah roriin a thianfai hnuah tlun sang Cungnungbik kut vawrh lamah a to. ⁴ A cungnung mi hmin cu ro ah a congah ruangah vancungmipawl hnakin a cungnungsawn a si. ⁵ Ziangahtile, “Nangmah cu ka Fapa na si, tuisun ah ka lo hring a si,” tiin le “A hrangah Pa ka si ding ih, amah cu ka hrangah Fapa a si ding,” tiin vancungmi zawi hnenah saw a sim dah? ⁶ Cun, hrin hmaisabik mi cu leitlun ih a hruai luh tikah khan, “Pathian vancungmi hmuahhmuah in amah cu be hai seh,” tiah a ti. ⁷ Cule, vancungmipawl thu ah, “Anih in a vancungmipawl cu thlarau ah le a rawngbawltupawl cu meisa alh ah a cangter hai,” tiah a ti. ⁸ Sihmansehla, Fapa thuhla ah cun hitin a sim, “Maw Pathian, na laltohkham cu kumkhuaih kumkhua tiang a si, dingfelnak kianghrawl cu na uknak ram kianghrawl a si. ⁹ Dingfelnak na rak ngaina ih, dan neih lo cu na hua. Curuangah Pathian, na Pathian cun na rualpipawl hleih in lungawinak hriak a lo thih a si.” ¹⁰ Cun, “Nang, BAWIPA in atir in leilung hram na rak ṭoh ih, van tla khi na kutsuak an si. ¹¹ Cupawl tla cu an hloral leh ding, asinan nang cu na hmun ringring. Cupawl hmuahhmuah cu sinfen bangin an hlun thluh leh ding. ¹² Cun, cupawl cu puan bangin na zual ding ih, an danglam ding. Asinan nang cu na hmun ringring, na kumpawl khal an cem lo ding.” ¹³ Sihmansehla, vancungmi zawi hnenah saw, “Na ralpawl na kepal ih ka retngah hlanlo, ka kut vawrh lamah to aw,” tiih a sim dah? ¹⁴ Annihpawl hmuahhmuah tla cu rundamnak ro cotu dingpawl hrangih rawngbawl dingih thlah mi rawngbawltu thlarau an si lo maw si?

¹ Curuangah kan tawlhhlolonak dingah hna ih kan theih mi thilpawl kha nasa sinsinin kan ngaihsak ding a si. ² Ziangahtile, vancungmipawl hmang ih thu sim mi hman a hngeh ih dan pahbalnak le thulunlonak tinkim in a dik mi thungrulhnak an co a si ah cun, ³ hi tlukih rundamnak ropi hi kan thlauthlak a si ah cun ziangtin saw kan luat thei ding? Cui rundamnak thu cu a hmaisabikah Bawipa in a phuang ih a theitupawl in kan hnenah an rak nemhnget. ⁴ Pathian khalin hminsinnakpawl le mangbangzapawl in si seh, thilmak a phunphun le amai duhdan vekih Thlarau Thianghlim thilpekpawl thawn anmah cu a theihpi hai. ⁵ Ziangahtile, kan phuan mi, a ra thleng ding mi leilung cu vancungmipawlih thu hnuaiah a ap lo. ⁶ Asinan mi pakhat in hmun pakhat ah, “Minung hi ziang so a si ih na ngaihsak? Asilole minung fapa teh hi ziang so a si ih na kilkhawi ṭheu? ⁷ Anih cu vancungmipawl hnakih malte niamdeuhin na tuah; ropitnak le upatnak na khumter ih, na kut ih tuah mipawl tlunah na ret. ⁸ A thuthu ih um dingin a ke hnuaiah thil hmuahhmuah cu na ret,” tiin a phuang. Cutiih ziang hmuahhmuah a ke hnuaiih na ret ruangah a hnuaiih ret lo i a tan mi zianghman a um lo. Asinan atu ah cun thil ziangkim a hnuaiah ret in a um ti kan hmu hrih lo. ⁹ Sikhalsehla, thihnak tuar ruangih ropitnak le upatnak khumter mi, Pathian zangfahnak ruangin mi kip hrang thihnak a teh theinak dingah vancungmipawl hnakih niamter sawn mi Jesu cu kan hmu a si. ¹⁰ Fa tampi ropitnak ih hruailuh an sinak ah hin ziangkim a hrangih um le ziangkim amah ruangih um Pathian hrangah cun harsatnakpawl ruangih an rundamnak hrampi famkimter hi a awm hrimhrim a si. ¹¹ Ziangahtile, tithianghlimtu le tithianghlim mipawl cu an zaten mi pakhatih ta an si, cuiruangah annihpawl cu unaupawl tiih kawh ding a zahpi lo, ¹² “Ka unaupawl hnenah na hmin cu ka phuang ding ih, pumkhawm mipawl lakah nangmah thangṭhatnak hla ka sak ding,” tiah a ti. ¹³ Cule, “Amah ah ka zumnak ka ṭhum ding,” tiah a tisal. Cun, “Ngai hnik uh, keimah le Pathian ih i pek mi nauhakpawl hi,” tiin a simsal lala. ¹⁴ Nauhakpawl cu taksa le thisen cotu an si ruangah thihnak ruangih thihnak parih thuneitu Diabol cu a siatbal theinak dingah milai sinak cu a co ve. ¹⁵ An nun sung hmuahhmuah thih ṭihnak sal ih tangpawl a runsuak theinak dingah a si. ¹⁶ Ziangahtile, a taktak ah cun a bawm ṭheu mipawl hi vancungmipawl an si lo ih, Abraham cithlahpawl an si sawn. ¹⁷ Curuangah milai sualnakpawl hrangih tlawnlungawithawinak tuah dingin, Pathian lam thilpawl ah zahngainak le mirinum Puithiam Lubik a si theinak dingah ziangkimah a unaupawl vekih tuah cu a ṭul a si. ¹⁸ Amah roriin sualfawrhnak a tuar zo ruangah sualfawrhnak tuartupawl cu a bawm thei hai a si.

¹ Curuangah, van lam kawhnak a cotu unau thianghlimpawl, kan phuan mi, Apostol le Puithiam Lubik Khrih Jesu cu ruat hnik uh. ² Mawsi cu Pathian insang hmuahhmuah parih a rinum bangin anih cu amah rettui parah a rinum a si. ³ Ziangahtile, inn saktu cun a sak mi inn hnakin upat a hlawh sawn bangin, anih cu Mawsi hnakin upatnak co tlak sawnah ruah a si. ⁴ Ziangahtile, inn pohpoh cu mi pakhatkhat i sak mi an si, asinan thil ziangkim a saktu cu Pathian a si. ⁵ Mawsi cu leh hnuih an run rel leh ding mi thilpawl theihpitu a si theinak dingah, Pathian insang hmuahhmuah parah siahhlawh rinum taktak a si. ⁶ Sihmansehla, Fapa bangin Khrih cu Pathian insang parah a rinum a si, rinhngehnak le ruahsannak ih lungawinak cu anet tiang kan kaihhnget a si ah cun kanmah hi Pathian insang cu kan si. ⁷ Curuangah Thlarau Thianghlim in, “Tuisun ah a aw nan theih asile, ⁸ ramṭhing i hniksaknak ni ih Pathian thin an hengter vek khan, nan thinlung hakter hlah uh. ⁹ Nan pupapawl in in hniksak, in zuam ih, ka tuah mi thilpawl kum sawmli sung an hmu. ¹⁰ Cuti a si ruangah hi san minungpawl parah ka thin a heng ih, kei in, ‘An thinlung a fehpeng ringring, ka lamzinpawl khal an thei lo,’ tiah ka ti. ¹¹ Cutin ka thinaithawk in, ‘Ka cawlhnak sungah an lut lo ding,’ tiah sia ka sam,” tiah a ti vek khan a si. ¹² U le nau tla, a nung mi Pathian tlansan dingin nan lakih zohman a thinlung sungah zumlonak le thinlung sual a umlonak dingah fimkhur uh. ¹³ Sikhalsehla, ‘Tuisun,’ tiih kawh a si laiah pakhat le pakhat ni tin fawrhawtawn uh. Cu lole nan lakih mi zo simaw sual bumnak ruangah a thinlung hakter a si pang ding. ¹⁴ Ziangahtile, a thawkih kan neih mi zumhngehnak kha a net tiang kan kaihnget asile Khrih ṭawmpitu kan si. ¹⁵ Cathianghlim in, “Tuisun ah a aw nan theih asile a thin an hengter lai vek khan nan thinlung hakter hlah uh,” tiih a sim mi vek kha a si. ¹⁶ Ziangahtile, hna ih an theih hnu khalih a thinhengter thothotupawl kha zo an si? A taktak in cupawl cu Izip ram ihsin Mawsi ih a hruaisuah mipawl kha an si lo maw? ¹⁷ Cun, kum sawmli sung kha zawi parah saw a thin a heng? Thil sual tuahtupawl, an ruang khal ramṭhing ih rilpawl parah khan a si lo maw? ¹⁸ Cule, a zumlotupawl hnenah siarlo, zo hnenah so a cawlhnak ih lut lo dingih sia a sam? ¹⁹ Cuti a si ruangah an zumlonak ruangah an lut thei lo ti kan hmu a si.

¹ Amai cawlhnak ih luh theinak thutiamkam a um hrih lai ruangah, cui cawlhnak ah cun zokhal thleng lo si lo dingin fimkhur uhsi. ² Ziangahtile, kan hnenih phuan a si bangin thuthangṭha cu an hnenah phuan a si. Asinan, cui thu a ngaithlatupawl in an theih mi thu cu zumnak thawi an kawp lo ruangah an hlawkpi lo. ³ “Ka thin a heng ih, sia ka rak sam bangin, ‘Ka cawlhnak ah an lut lo ding,’ ” tiih a ti vek khan a si. Sihmansehla, leilung lungphum phum a si thawk ihsin hna cu ṭuan ṭheh a si zo ruangah kannih a rak zum zotupawl hi cui cawlhnak ah cun kan lut lai rero a si. ⁴ Ziangahtile, hmun pakhat ah ni sarih ni thu hi, “Cun, ni sarih ni ah cun Pathian cu a hnaṭuannak hmuahhmuah ihsin a rak cawl,” tiih sim a si. ⁵ Cun, cui hmun lala ah, “Ka cawlhnak ah an lut hrimhrim lo ding,” a ti leh fawn. ⁶ Curuangah mi hrekkhat an luh theinak dingah cui cawlhnak cu a um lai hrih a si, thuthangṭha a rak ngaithla hmaisatupawl kha thulunlonak ruangah cawlhnak ah cun an rak lut lo. ⁷ “Tuisun ah a aw nan theih asile nan thinlung hakter hlah uh,” tiah a sim zo bangin, can reipi hnuah David hmang i ṭawng in, ‘Tuisun,’ tiin ni dang a ruatsal. ⁸ Ziangahtile, Joshua in annihpawl kha cawlhnak a rak pe hai zo si sehla cu, cu mi hnuah ni dang thu a sim nawn lo ding. ⁹ Curuangah Pathian mipawl hrang ah cun cawlhnak cu a um lai a si. ¹⁰ Ziangahtile, zokhal Pathian cawlhnak ah lut i, cawl zotu cun Pathian tidan bangin a hnaṭuannakpawl ihsin a cawl ve. ¹¹ Curuangah cui thulunlonak zohṭhim ih zohman kan tluklonak dingah cawlhnak ih lut dingin zuam uhsi. ¹² Ziangahtile, Pathian thu cu a nung ih huham a nei, ralnam kap hnih hriam hnak khalin a hriam sawn. Nunnak le thlarau, ruh pehzawmawknakpawl le thlik hman ṭhenphel ko in a sun thei. Khawruah mipawl le thinlung ih tumtah mipawl tla a thei thei. ¹³ Pathian mithmuh ah a sersiam mi zianghman lang lo a um lo. Cu hnakin, kan thuhla kan thlennak ding pai mithmuh ah cun ziangkim hi taklawng le awngaw cia in a um thluh sawn a si. ¹⁴ Cuti cun vanpawl ih fehtlang zo, Puithiam Lubik ropi, Pathian Fapa Jesu kan neih ruangah kan zumnak phuansuah mi hi kan kaihnget pei uh. ¹⁵ Ziangahtile, kan cahlonakpawl in tuarpi thei lotu Puithiam Lubik nei kan si lo ih, kanmah vekin phunzakipih sualfawrhnak rak tawng zo na cing i sual tuah lo nei kan si sawn. ¹⁶ Cuiruangah zahngainak kan co theinak dingah le kan ṭul canah in bawm dingin zangfahnak kan hmuh theinak dingah zangfahnak laltohkham cu ralṭha zetin naih uhsi.

¹ Ziangahtile, puithiam lubik pohpoh cu minung lak ihsin hril mi an si ih, thilpekpawl le sualpawl hrangih thawiawknakpawl a hlan theinak dingah Pathian lam thil ah minung hrangah ruat an si. ² Anih khal cu cahlonak in a tuam ve ruangah theih mi nei lo le zinpeng zawhtupawl parah zawnruahnak a nei thei. ³ Cuvek mi an si ruangah mipi sualnakpawl hrangih thawinak an hlan vek thothoin anmai sualnakpawl hrang khalah an hlan a ṭul a si. ⁴ Aaron vekih Pathian kawhnak cotu siarlo, zohman in hi upat conak cu anmai hrangah an la dah lo. ⁵ Cuvekin, Khrih khal Puithiam Lubik si dingin amah le amah a cawimawiaw lo. Sihmansehla, Pathian in a hnenah, “Nang cu ka Fapa na si, tuisun ah ka lo hring zo,” tiah a sim sawn a si. ⁶ Cule hmun dangah, hiti khalin a sim, “Nangmah cu, Melkhizedek-ih sidan vekin, a kumkhuain puithiam na si,” ti khalin a sim. ⁷ Anih cun taksa ih a um laiah, thihnak ihsin amah rundam theitui hnenah nasazetih ṭap in le mitthli thawn thlacamnak le dilnak a hlan tikah, Pathian a ṭih ruangah a thlacamnak cu ngaihthlaksak a si. ⁸ Anih cu Fapa si ko hman sehla, a tuar mi thilpawl ihsin thulunnak a zir thotho. ⁹ Cule, Pathian in famkim ko a tuah hnuah cun, a thu a ngaitupawl hmuahhmuah hrangah catuan rundamnak hrampi ah a cang. ¹⁰ “Melkhizedek-ih sidan bangin,” anih cu Pathian i kawh mi Puithiam Lubik a si. ¹¹ Melkhizedek thu ah hin rel ding tampi kan nei. Sikhalsehla, nan thu theihthiam a har tuk ruangah lo simfiang ding a harsa zet. ¹² Ziangahtile, a tikcu ruat ah cun zirhtu si thei zo hial ding nan si nan, Pathian thu hramthawkpawl zirhtu ding nan ṭul sawn riangri ih, rawl hak si loin, hnawiti ṭul lai mi nan rak si. ¹³ Ziangahtile, hnawiti ih a nungtu pohpoh cu, nausente a si lai ruangah, dingfelnak thu cu a theifiang thei lo. ¹⁴ Asinan rawl hak cu pitlingpawl hrangah a si. Cupawl cun a sia le a ṭha thleidang thiam dingin an theihtheinakpawl cu an hman ṭheu ruangah an theihtheinakpawl cu an rak sawizawi zo.

¹ Curuangah Khrih thurin hramthawkpawl cu tanta in, thilti thipawl ihsi sirawknak, Pathian parih zumnak, ² k h a w l h f a i a w k n a k p a w l zirhawknak, kut suan thu, mithi thawhsalnak le catuan thuṭhennak zirhawknak lungphum cu phumsal nawn loin, pitlin lam pan uhsi. ³ Pathian in in sian asile, cucu kan ti vivo ding. ⁴ Ziangahtile, vei khat tleunak rak pek zo mi, van lam thilpek tep zotu, Thlarau Thianghlim ṭawmpi zotu, ⁵ Pathian thu ṭha le a thleng lai ding mi sanih thiltitheinakpawl a tep zotupawl cu, ⁶ an tluk asile, sualsirnak ih titharsal ding cu an hrangah a cang thei lo mi a si. Ziangahtile, Pathian Fapa cu an khengbet tharsal ih an mualphoter a si. ⁷ Ziangahtile, leilung, a parih tla ṭheu mi ruahti a intu le a ṭuantupawl hrangih a ṭhahnem mi thlai rahsuah ṭheutu cun Pathian hnen ihsin malsawm a dawng a si. ⁸ Asinan hling le hrampi hling nei suahtu cu hnawn a si ih camsiat tuar a nai a si; a netnak ah urkang a si ding. ⁹ Sihmansehla, duhdawt mi tla, cutin kan lo sim nan, nannih cu thil ṭhasawn, rundamnak thawn thlurhaw mi thilpawl nan tuah kan beisei. ¹⁰ Ziangahtile, amai hmin ih mithianghlimpawl rawng nan bawlsak rero lai bangin, nan bawlsak zonak tla ah duhdawtnak hnaṭuan le nan hnaṭuan mipawl hngilh dingin Pathian cu mifello a si lo. ¹¹ Cun, rinhmainak um lo beiseinak famkim ah nan zaten a net tiang taimaknak bangrep nan suah fingfing kan duh. ¹² Cutin mize si lo, rinnak le thinsaunak ruangin thutiampawl congahtupawl cawngtu nan si sawn ding kan duh. ¹³ Ziangahtile, Pathian in Abraham hnenih thu a tiam tikah, amah hnakih ropisawn hmin sal ih sesamnak ding a neih lo ruangah, amah le amah salaw in, ¹⁴ “Mal ka lo sawm tengteng ding ih, cule ka lo pungzaiter tengteng ding,” tiah a ti. ¹⁵ Cuti cun thinsau takih a tuar hnuah thutiamkam cu a congah. ¹⁶ Ziangahtile, milaipawl cun thungaiten anmah hnakih ropisawn hmin sal in sia an sam ṭheu; cule an sesamnak cun an elawknak thu tinkim a cemter ih an thu rel mi a nemhnget ṭheu. ¹⁷ Cutin Pathian in a thiltum a danglam thei lozia cu a thutiam ro cotupawl hnenah nasa sinsinih langter a duh ruangah cucu sesamnak in a nemhnget. ¹⁸ Danglam thei lo cui thil pahnih ah cun, Pathian cu thuphanper thei a si lo ruangah kannih himnak hmuzotupawl hin thapeknak nasazet nei in, kan hmaiih ret mi ruahsannak cu kan kaihhnget theinak dingah himi hi Pathian in a tuah a si. ¹⁹ Cui ruahsannak cu nunnak hrangah thirkawnpi vekin kan nei ih cumi cu hnget le rin tlak mi a si ih puanzar sungah a lut. ²⁰ Cu tawkah cun Melkhizedek-ih sidan vekih catuan Puithiam Lubik, hmaihruaitu, Jesu cu kan hrangah a lut a si.

¹ Ziangahtile, hi Melkhizedek cu Salem siangpahrang, Cungnungbik Pathian-ih puithiam a si, siangpahrangpawl a thahnak ihsin a ra tlungkir mi Abraham cu a rak hmuak ih mal a sawm. ² Cu pai hnenah Abraham in a rallaksum hmuahhmuah ah ṭhenhra ṭhenkhat a pe. A hmaisaah a hmin ih sullam cu ‘dingfelnak siangpahrang,’ a si ih, cule Salem siangpahrang ti khal a si, cu miih sullam cu ‘daihnak siangpahrang,’ tinak a si. ³ Amah cu pa nei lo, nu nei lo, thlahsawngawknak nei lo, um thawk ni a nei lo ih, nun cemnetnak a nei fawn lo, cuti cun Pathian Fapa vekih tuah mi a si ih, puithiam a si ringring. ⁴ Atu ah anih hi ziang tluk miropi a si ti ruat hnik uh, pareng Abraham hmanin a rallaksum ih ṭhenhra ṭhenkhat cu a hnenah a pe. ⁵ Cun puithiam sinak a cotu Levi fapapawl cun mipi hnen ihsin ṭhenhra ṭhenkhat co theinak cu Dan bangtukin thupek an nei taktak. An unaupawl cu Abraham ihsin suak mi si khal hai sehla ṭhenhra ṭhenkhat cu an unaupawl lak ihsin a si an co. ⁶ Sihmansehla Levi hrin ihsin thlahsawngawknak zawi a si lo mi pa in Abraham-ih ṭhenhra ṭhenkhat a co ih, thutiamkampawl neitu cu mal a sawm a si. ⁷ A tesawn cu a tumsawn in malsawm a pe ti hi el ding zianghman a um lo. ⁸ Cun, hi tawkah a thi thei mi minungpawl in ṭhenhra ṭhenkhatpawl an co, asinan cu tawkah cun a nung ringring tiih phuan mi pa in ṭhenhra ṭhenkhat a co. ⁹ Cun, ṭhenhra ṭhenkhat cotu Levi khalin Abraham hmang in ṭhenhra ṭhenkhat a rak pe ve zo ti theih a si. ¹⁰ Ziangahtile, Melkhizedek in a rak hmuah laiah a pai ṭhalbe ah a rak um zo. ¹¹ Curuangah famkimnak cu Levi-ih puithiam sinak ihsin co theih si sehla cu, (cu mi hnuaiah mipipawl in Dan an ngah ruangah), Aaron-ih sidan vekih kawh si loin, Melkhizedek-ih sidan vekin puithiam dang rung um ding cu ziang saw a ṭul betnak a um? ¹² Ziangahtile, puithiam sinak cu a thlengawk ruangah Dan khal thleng a ṭul ve. ¹³ A thu an sim mi pa hi hrin dang a si. Cui hrin lakah zohman in biakṭheng ah rawng an bawl dah lo. ¹⁴ Ziangahtile, kan Bawipa cu Judah hrin ihsin suak mi a si ti cu a fiang. Cui hrin thuhla ah Mawsi in puithiam sinak thawi pehparaw mi ziang thu hman a rel lo. ¹⁵ Melkhizedek sinak bangpi puithiam dang a rung um zo a si ah cun kan sim zo mi thu hi a fiang sinsin. ¹⁶ Amah cu milai thlahsawngawknak ih a phut mi bangtuk si loin, tisiat thei lo nunnak thiltitheinak zulhin a ra sawn. ¹⁷ Ziangahtile, “Nang cu Melkhizedek-ih sidan vekin a kumkhuain puithiam na si,” tiin a phuang. ¹⁸ Ziangahtile, thupek um hmaisa cu a cah lo le a ṭangkai lo ruangah hnawn in a um. ¹⁹ Ziangahtile, Dan in zianghman a tifamkim lo, asinan ruahsannak ṭhasawn a thlengter ih, cu mi ihsin Pathian kan naih thei a si. ²⁰ Cun anih cu sesamnak um loin puithiam ih tuah a si lo. ²¹ Ziangahtile, annih cu sesamnak um loin puithiam ih tuah an si. Sikhalsehla Jesu cu sesam in puithiam ih tuah a si. A hnenah Pathian in, “BAWIPA in sia a sam zo ih, a lung a thleng lo ding. ‘Nang cu Melkhizedek sidan vekin a kumkhuain puithiam na si,’ ” tiah a ti. ²² Cuti cun, nasa sinsinin, Jesu cu thuthlung ṭhasawn hrangah amkham ah a rungcang. ²³ Cun, thihnak ruangih an pehzawm vivo thei ṭheu lo ruangah puithiam tampi an rak um zo a si. ²⁴ Asinan anih cu a nun ringring ruangah thleng theih lo mi puithiam sinak a nei. ²⁵ Cutin, an hrangih dilsak dingin a nun ringring ruangah, amai zarih Pathian hnenih ratupawl cu a net tiangin a rundam thei a si. ²⁶ Ziangahtile, cuvek Puithiam Lubik, thianghlim, pawitawk lo, bawrhhlawh kai lo, misualpawl lakih fihlim le vanpawl hnakih sangsawn cu kan hrangah a tling tawk a si. ²⁷ Anih cu, cui puithiam lubikpawl vekin ni tin, amai sualnak hrangah thawiawknak pek hmaisakta le mipi sualnak hrangih thawiawknak a pek a ṭul lo. Ziangahtile, amah le amah a hlanawk ah khan vei khat ah a ṭheh zo. ²⁸ Ziangahtile, Dan cun cahlonak nei milai cu puithiam lubik ah a tuah, asinan Dan hnu ih rak um sesamnak cun kumkhua ih tifamkim mi Fapa cu puithiam lubik ah a ruat a si.

¹ Atu ah kan sim miih tum mi bik cu hihi a si: vanpawl ah khin Cungnungbik laltohkham vawrh lam ih a totu cuvek Puithiam Lubik cu kan nei. ² Anih cu minungih sak mi silo, Bawipai sak mi hmun thianghlim le biakbuk diktakih rawngbawltu a si. ³ Ziangahtile, puithiam lubik pohpoh cu thilpekpawl le thawiawknakpawl hlan dingih ruat an si. Curuangah hi Puithiam Lubik khalin ziangsimaw hlan ding a neih ve a ṭul. ⁴ Ziangahtile, Dan bangih thilpek hlantu puithiampawl an um ruangah, amah hi leitlun ih um rak si sehla puithiam a si lo ding. ⁵ Cupawl cun van lam thilpawlih lem le thlam rawng an bawl, cuiruangah Mawsi in biakbuk a sak zik laiah khan, “Tlang parih zohṭhim ding mi hmuhter na si vekin tuah aw,” tiin Pathian in a hnenah thu a pe. ⁶ Asinan atu ah cun amah cu thutiamkam ṭhasawnpawl parih din mi thuthlung ṭhasawn Palai khal a si bangin rawngbawlnak ṭhasawn a co zo a si. ⁷ Ziangahtile, cui thuthlung hmaisa cu sawisel ding rak um lo ta sehla cu a pahnihnak hrangah can remcang hawl a ṭul lo ding. ⁸ Anmah ah mawhsualnak a hmuh ruangah BAWIPA in, “Ngai hnik, Israel insang le Judah insang hnenih thuthlung thar ka tuahnak ding ni a thleng zik thlang. ⁹ Izip ram ihsin kut in ka hruaisuah hai laiah an pupapawl hnenih ka tuah mi thuthlung vek a si lo ding. Ziangahtile, ka thuthlung ih an um lo ruangah a si; cun ka ngaihsak hai lo, tiah BAWIPA in a ti. ¹⁰ Ziangahtile, cui nipawl hnuah cun Israel insang hnenih ka tuah ding mi thuthlung cu hihi a si, tiah BAWIPA in a ti. Ka danpawl cu an ruahnak ah ka ret ding ih an thinlung ah ka ngan ding. Cun, an Pathian ka si ding ih, annih cu ka mi an si ding. ¹¹ Cun, mi kipin, ‘BAWIPA cu thei aw,’ tiin an inhnen le an unau an zirh hrimhrim lo ding, ziangahtile a tebik ihsin a tumbik tiang keimah in thei ding. ¹² Ziangahtile, an dingfellonak parah zah ka ngai ding ih, an sualnakpawl le dan lo i an nunnakpawl khal ka cingkeng nawn lo ding,” tiin a sim. ¹³ “Thuthlung thar,” tiih a simnak in thuthlung hmaisa cu a hlunter zo. Cun atu ih a hlun rero mi le ziam rero mi cu a cemral cing ding a si.

¹ Thungaitein, thuthlung hmaisa khalin Pathian rawngbawlnak cin le dan pawl le leitlun ah hmun thianghlim a nei ve. ² Ziangahtile, biakbuk cu an sak ih, tawntirbik ah menorah meito, cabuai le sangserh a um. Cucu, “Hmun Thianghlim,” tiah an ko. ³ Cun, puan zar pahnihnak sung lamah Hmun Thianghlimbik an ti mi pindan cu a um. ⁴ Cu tawkah cun sui kheng kum, sui ti lawn mi thuthlung bawm a um, cu mi sungah mana an retnak sui bel, a cerh mi Aaron-ih kianghrawl le thuthlung lung phengpawl tla an um. ⁵ Cule, cui thuthlung bawm parah cun tlawnlungawithawinak hmun khuh in Cherub ropipawl an um. Hi thilpawl tla hi atu ah a cipciar in kan rel thei hrih lo ding. ⁶ Cui thilpawl cu cutivekih timtuah a si tikah puithiampawl cu Pathian rawngbawl in biakbuk tawntir ah cun an lut ṭheu. ⁷ Asinan a sangtu ah cun puithiam lubik amah lawng kum tin veikhat thisen keng in a lut ṭheu. Cu tawkah cun amai hrangah le mipi in thei lo ih thilsual an tuah mipawl hrangah thisen cu a hlan ṭheu. ⁸ Thlarau Thianghlim cun biakbuk hmaisa sawn a din sung cu Hmun Thianghlimbik ih luhnak lamzin cu langter a si hrih lo ti a theihter. ⁹ Cui thil cu tui can hrangah hmuhsaknak a si. Cu tawkah cun thilpekpawl le thawiawknakpawl an hlan ṭheu mipawl khan a betu ih sia le ṭha theihnak a famkimter thei lo ti a hmuhsak. ¹⁰ Cupawl cu ei le in, serh le sang khawlhfaiawkdan phunphun le tuahṭhatsalnak can a thlen hlanih taksapum hrangih an parih phut mi dan le dun an si. ¹¹ Sikhalsehla, Khrih cu thil ṭha ra thleng dingpawlih Puithiam Lubik si in a ra ih, biakbuk, kut ih sak lo, sersiam mipawl lakih tel lo, ropisawn le famkimsawnah cun, ¹² kan hrangah catuan tlensalnak a ngah hnuah, me thisen le caw no thisen si lo, amai thisen rori sawn thawn hmun thianghlimbik ah kumkhaw daih in veikhat a lut. ¹³ Ziangahtile, cawcang le me thisen le cawla-ih ra ziam mi vutcam, serh le sang danih mibawrhhlawh parih theh mi hmanin a taksa thianghlim ko a faiter a si ah cun, ¹⁴ catuan Thlarau zarih amah le amah bawrhhlawh kai lo ih Pathian hnenih hlanawtu, Khrih thisen cun a nung mi Pathian rian dingah nan sia le ṭha theihnak cu thilti thi lak ihsin ziang tlukin a lo faiter sinsin pei? ¹⁵ Cun, thuthlung hmaisa hnuaiih Dan pahbaltupawl thihnak hmang in a tlen hai zo ruangah, kawh mipawl cun catuan ro co ding thutiam cu an co theinak dingah anih cu thuthlung thar Palai a si. ¹⁶ Ziangahtile, rocahnakca a umnak ah rocahnakca tuahtu a thih a ṭul hrimhrim a si. ¹⁷ Ziangahtile, thuthlung cu mi an thih hnu lawngah hmual a nei. A tuahtu a dam sung cu hmual a nei lo. ¹⁸ Curuangah thuthlung hmaisa khal kha Pathian in thisen thawn a din a si. ¹⁹ Ziangahtile, mi hmuahhmuah hnenah Mawsi in Dan thu bangtukin a thupek tinkim a sim laiah khan, caw note thisen le me thisen cu ti thawn, sahmul puan sen thawn, hisop fung thawn a la ih, cazual le mipi hmuahhmuah cu a theh hai. ²⁰ “Himi hi Pathian in nan hnenih a lo pek mi thuthlung thisen cu a si,” tiah a ti. ²¹ Cuvek thothoin biakbuk le rawngbawlnak ih hman mi thilri hmuahhmuah cu thisen in a theh. ²² Cule, Dan thu zulhin thil ziangkim deuhthaw hi thisen in a faiter. Cun, thisen suak loin ngaidamnak a um lo. ²³ Curuangah van ih thil um pianzia kengpawl hman cui thilpawl hmang ih thenfai a ṭul a si ah cun, van thil taktakpawl sinsin cu hipawl hnakih ṭhasawn thawiawknak in thenfai a ṭul a si. ²⁴ Ziangahtile, Khrih cu kut ih sak mi hmun thianghlimpawl, a taktak bangpi a si mi ah lut loin, kan aiawh in Pathian hmaiih ding dingin vancung roriah a lut sawn a si. ²⁵ Mai thisen si lo keng in kum tin Hmun Thianghlimbik ih lut ṭheutu puithiam lubik vekin, Khrih cu amah le amah hlanaw leuhleuh dingin a lut ve lo. ²⁶ Cu tin si lo sehla, leilung umtir ihsin a tuar leuhleuh zo ding. Asinan atu san cem zawngah amah rori a thawiawknak in sual hloter dingah veikhat a runglang a si. ²⁷ Minung cu vei khat thi dingih ruat a si. Cui hnuah thuṭhennak a um ding. ²⁸ Cuvek thothoin, Khrih cu mi tampi sualnak phur dingah vei khat hlan a si. Amah a rak hngaktupawl hnenah rundamnak ih hruailut dingin sual phur dingah si loin a vei hnihnak a ra lang leh ding.

¹ Ziangahtile, Dan cu a ra thleng lai ding mi, thil ṭhapawlih thlam lawng a si ih, cui thil ṭhapawl bangpi cu a si lo. Curuangah kum tintei thawiawknak kel an hlan ṭheu mipawl cun a hlantupawl cu ziangtik hmanah famkim ko a tuah thei lo. ² Cutin rak si lo sehla, a betupawl cu vei khat ah thenfai an si ding ih, sual theihawknak an neih nawn lo ding ruangah thilhlan cu an bansan zo lo ding maw? ³ Asinan cui thawiawknakpawl cun kum tinte sualpawl a thei nawntersal ṭheu. ⁴ Ziangahtile, cawcangpawl thisen le mepawlih thisen in sualpawl a lahlo thei lo. ⁵ Curuangah leitlun ih Jesu a rat tikah khan, “Thawinak le thilhlan cu na duh lo ih, ka hrangah taksaruangpum i timtuahsak sawn a si. ⁶ Meiur thilhlanpawl le sual hrang thawinakpawl ah cun lungawinak na nei lo. ⁷ Cu tikah, kei in, ‘Cazual sungih ka thuhla ngan a si bangin, ngai hnik, maw Pathian, na duh mi tuah dingah ka ra ka ti,’ ” tiah a sim. ⁸ A hmaisaah, “Thawinak le thilhlan ah le meiur thawinak le sual hrang thawinak pawl cu na duh lo ih, cu mipawl ah lungawinak na nei fawn lo,” tiah a sim. Cuipawl cu Dan vekih hlan mi an si. ⁹ Cun anih in, “Ngai hnik, maw Pathian, na duh mi tuah dingah ka ra,” tiah a ti. A pahnihnak thuthlung a din theinak dingah a hmaisa thuthlung cu a lahlo. ¹⁰ Cui Pathian duhnak a tuahnak in Jesu Khrih in a taksa kumkhaw daih ih veikhat a hlannak ruangin tithianghlim kan si. ¹¹ Cun, puithiam pohpoh cu ni tin rawngbawl in le sualnak lahlo thei dah lo mi thawiawknak kel hlan leuhleuh in an ding. ¹² Asinan anih cu sualpawl hrangih thawinak pakhat kumkhaw daih in a hlan hnuah, Pathian kut vawrh lamah a to. ¹³ Cui si thawkin a ralpawl cu a kepal vekih ret thluh an si hlanlo a hngak. ¹⁴ Ziangahtile, thianhlimter rero a si mipawl cu thilhlan pakhat in kumkhua tiangin a famkimter hai a si. ¹⁵ Cumi cu Thlarau Thianghlim khalin in theihter a si. A hmaisabikah Thlarau Thianghlim cun, ¹⁶ “Himi hi, cui nipawl hnuih anmah thawi thuthlung ka tuah ding mi cu a si, tiah BAWIPA in a ti. An thinlung ah ka Danpawl cu ka ret ding ih, an ruahnaklungthin ah ka ngan ding,” tiah a ti. ¹⁷ Cuitlunah a simbet ih, “An sualnakpawl le dan lo i an nun danpawl cu ka cing nawn lo ding,” tiah a ti. ¹⁸ Atu ah, cu bangpawl ngaidamnak a umnak hmun ah sual hrangih thilhlan a um nawn lo. ¹⁹ U le nau tla, Jesui thisen zarah hmun Thianghlimbik ih lut dingah ralṭhatnak kan nei ih, ²⁰ cucu a taksa a si mi puanzar hmang in nundan thar le nundan nung in dinsak zo ruangah le ²¹ Pathian sungkua tlunah Puithiam Lubik kan neih ruangah, ²² kan thinlung ih sia le ṭha theihnak ṭha lo cu thehfaisak zo a si ruangah le kan taksa khal cu tithianghlim ih khawlhsak zo a si ruangah zumnakhnget famkim nei in le thinlung dik pu in Pathian naih uhsi. ²³ Thutiamtu cu a rinum ruangah kan phuan mi kan zumnak hi hnin dualdo loin kaihnget uhsi. ²⁴ Duhdawtnak lamah le hnaṭuan ṭha ṭuannak lamah pakhat le pakhat cawkthoaw dingin ngaihtuah uhsi. ²⁵ Mi hrekkhat tidan vekin, kan khawmawknak bansan loin, pakhat le pakhat thazang peawtawn uhsi. Ni cu a nai deuhdeuh ti nan theih bangin thazang peaw sinsin uh. ²⁶ Ziangahtile, thutak theihnak kan co hnuah, kan sual hrim vivo asile, sualpawl hrangah thawinak a um nawn lo ih, ²⁷ thuṭhennak ṭihnung zet rung thleng ding mi le dodaltupawl kangraltu ding thinhengnak mei lawng ruahsan ding a tang sawn a si. ²⁸ Mawsi Dan a hmuhsuamtupawl cu theihpitu pahnih simaw, pathum simaw an um asile, zahngainak tel loin an thi ṭheu. ²⁹ Pathian Fapa a ke hnuaiih a palbettu, amah tithianhlimnak thuthlung thisen cu thil thianghlim lo ih a ruattu le zangfahnak Thlarau a hmuhsuamtu cu ziangvek hremnak nasasin tuar tlakih nan ruah? ³⁰ Ziangahtile, “Phuba lak cu keimai ta a si, keimah in ka thungrul ding,” tile, “BAWIPA in a mipawl thu a ṭhen ding,” ti lehtu Bawipa cu kan thei. ³¹ A nung mi Pathian kut ih tlak cu ṭihnungza a si. ³² Sihmansehla, tui hlan, eng nan rak co hnuih buainak nasazet nan tuar lai kha cing ringring uh. ³³ A canah cun hmuhsuamnak le harsatnak tuar in, miih zohnuam menah an lo tuah ih, can dang leh ah cun, cutiih an tuah mipawl tuarpitu nan si. ³⁴ Ziangahtile, ṭemṭawn ih ka um tikah ka parah lainatnak nan nei. Cun, a ṭhadeuh mi le rei a daih mi thil van ah nan nei ti nan theih ruangah nan thilri an lo lawnsak lai khalah lungawi zetin nan um. ³⁵ Curuangah lawmman nasazet nei, nan zumhngehnak cu hlawnhlo hlah uh. ³⁶ Ziangahtile, Pathian duhzawng nan tuah hnuah, a lo tiamkam mi nan co theinak dingah tuarfainak nan ṭul a si. ³⁷ Thutiam cu, “Reilote hnuah a ra ding pa cu a ra ding, a rei lo ding. ³⁸ Cule, midingfel cu zumnak in a nung ding, asinan a dungtawlh asile a parah ka thinlung cu lungawinak a nei lo,” ti hi a si. ³⁹ Sihmansehla, kannih cu hloral dingih dungtawlh mipawl lak i mi kan si lo ih, nunnak humhim dingih zumtupawl lakih mi kan si sawn a si.

¹ Cule, zumnak cu ruahsan mi thilpawl a um rori a si ti theihnak, thil hmuh lo mipawl theihfengnak cu a si. ² Cuvek zumnak an neih ruangah khuahlan upapawl khan fak an hlawh. ³ Tlolakpi tla hi Pathian kamsuak thu ih sersiam an si ih, cuti cun hmuh mi thilpawl tla hi hmuh thei mi thilpawl ihsi sersiam mi an si lo ti zumnak in kan thei. ⁴ Zumnak in Abel cun Kain hnakin thawinak ṭhasawn Pathian hnenah a hlan ih, cu mi ruangah midingfel a si ti theihpinak a ngah ih, a thilpek mipawl cu Pathian in a theihpi. Cule, cu mi ruangah Abel cu a thi zo ko nan thu a sim rero lai thotho a si. ⁵ Zumnak ruangah Enok cu thihnak hmu lo dingin lakhlo a si, “Pathian in a lakhlo ruangah hmuh a si nawn lo.” Lakhlo a si hlanah, anih cu Pathian lungawitertu a si ti theihpinak a rak nei. ⁶ Sihmansehla, zumnak tel loin Pathian cu lungawiter theih a si lo. Ziangahtile, a hnenih a ratu cun amah cu a um rori a si ti le anih cu taima zetih amah hawltupawl lawmman petu a si ti a zum tengteng ding a si. ⁷ Zumnak in Noah cun a hmuh dah hrih kel lo mi thilpawl thu ah ralrinnak pek a si hnuah Pathian ṭihzahnak thawn a sungkuapawl rundamnak dingah lawng a timtuah. Cui a zumnak cun leitlun mipawl cu thiamlo a coter ih, zumnak ruangih um mi dingfelnak ro cotu ah a cang. ⁸ Zumnak in Abraham cu ro a co ding mi ram ih feh dingin kawh a si tikah, thu a lung. Khuiah a feh ding ti hman thei loin a pawksuak. ⁹ Zumnak in Abraham cu ram tiam ah khan mi ram ah mikhual in a um. Amah thawi thutiam bangrep co ve mi Isak le Jakob tla thawn puanthlam ah an ceng. ¹⁰ Pathian sak le tuah mi lungphum nei khawpi a hngah ruangah a si. ¹¹ Zumnak in Sarah khalin thutiamtu cu a rinum a si tiih a ruah ruangah farai theinak cahnak a ngah ih, farai thei nawn lo dingin a kum a luan hnuah fa a hring. ¹² Curuangah, amah cu mithi vek si hman sehla, mi pakhat ihsin, van arsi vekih tam le siarcawklo tifinriat kapih vunnel zatih tam an suak a si. ¹³ Cuipawl hmuahhmuah cu thutiampawl congah loin zumnak ih an nun hnuah an rak thi. Asinan thutiampawl cu hlaral ihsin an hmu ih, zumhngehnak an nei ih an rak hmuak. Leitlun ih an nun laiah mikhual le khualtlawng mi an si ti khal an phuang. ¹⁴ Ziangahtile, cuvek thu a simtupawl cun anmai ram ding an hawl a si ti an fiangter. ¹⁵ Cun, an suahsan mi ram cu seherh taktak hai sehla, kirsalnak can remcang an rak hmu zo tengteng ding. ¹⁶ Asinan annih cun ram ṭhasawn an duh, cucu van ih um mi a si. Cule Pathian cun an hrangah khawpi a rak timtuahsak cia zo ruangah an Pathian tiih kawh ding a ning a zak lo. ¹⁷ Zumnak in Abraham cun, hniksak a si tikah khan Isak a hlan. Thutiampawl cotu cun a fapa neihsun cu a hlan a si. ¹⁸ Isak thuhla ah Pathian in, “Isak ah na cithlah cu zawi a si ding,” tiah a ti. ¹⁹ Pathian cun mithi lak ihsi hmanin Isak cu a kaitho thei a si tiin Abraham cun a ruat. A fapa cu thi zo hnu nungsal mi vekin a hmu lehsal. ²⁰ Zumnak in Isak cun thil ra thleng ding mi thu ah Jakob le Isau mal a sawm. ²¹ Zumnak in Jakob in a thih zawngah, Joseph-ih fapa pahnih tla mal a sawm veve ih, a kianghrawl zim vawk phahin Pathian a bia. ²² Zumnak in Joseph cun a thih zawngah, Israel thlahpawl an suah ding thu a phuang ih, a ruh thu thawn pehparawin thu a pe. ²³ Zumnak in Mawsi nu le pa cun Mawsi a suah tikah khan naute hmel ṭha a si ti an hmuh ruangah siangpahrang thupek khal ṭih loin thla thum sung an thup. ²⁴ Zumnak in Mawsi cun a pitlin tikah Faraw fanu-ih fapa tiih kawh ding cu a el. ²⁵ Reilote sung sual nawmnak cen ih um hnakin Pathian mipawl thawi tiduhdah tuar cu a hril sawn. ²⁶ Lawmman pek ding mi a thlir ruangah, Khrih ruangih hmuhsuamnak cu Izip ram ih hlawnthilpawl hnakin lennak ropisawnah a ruat. ²⁷ Zumnak in siangpahrang thinhengnak ṭih loin Izip ram a tlansan; ziangahtile, hmuh theih lo pa a hmuh ruangah a tuar ṭenṭo a si. ²⁸ Zumnak in fatir siatsuahtu in anmah a dai hai lonak dingah Lantapuai le thisen theh kha a hmang. ²⁹ Zumnak in Tipi Sen cu lei ro parih feh vekin an fehtlang, cucu Izipmipawl in ti ve an tum ih, an pilhlo thluh. ³⁰ Zumnak in Jeriko kulh kha ni sarih an hel hnuah a cim. ³¹ Zumnak in hlawhhlang Rahab cu thlingthlatupawl kha ṭhatei a rak cohlan hai ruangah thulunglopawl thawn a hloral ve lo. ³² Cun, ziang ka simbet hrih ding? Gideon-ih thu, Barak-ih thu, Samson-ih thu, Jepthah-ih thu, David-ih thu khal le Samuel le profetpawlih thuhla sim ningla can in i daih lo ding. ³³ Cupawl cun zumnak in ram tla an la, diktakin thu an ṭhen, thutiampawl an co, kiosa kaa tla an cipter, ³⁴ meisa thiltitheinak an mitter ih, ralnam hriam ihsin an luat ih, cahlonak ihsin cahter an si, raldonak ah miralṭha an si ih, ramdang ralkappawl an ṭekvaiter. ³⁵ Nunaupawl in an mithipawl nunnak ih kaihthawhsal in an ngah. Cun, midangpawl cu a ṭhasawn mi thawhsalnak an ngah theinak dingah runsuahnak el in, hrem an tuar. ³⁶ Cule, a dangpawl khalin hmuhsuamnak le vuaknak harsatnak an tuar. A si, cuitlunah ṭemṭawnnak le thawngtlak khal an tuar. ³⁷ Lungto ih den an si ih, ah phel in an um. Sualfawrh an si ih, ralnam ih thah an si. Tuu vun le me vun sin in an vakvai ih, rethei zet le tiduhdah tuar in le tuahsiat in an um. ³⁸ Cupawl hrangah cun leitlun hi umnak tlak a si lo. Thlaler le tlang lakah an vakvai ih, lungpuk le leikua sungah an um. ³⁹ Cupawl hmuahhmuah cun zumnak ruangah fak an hlawh nan thutiam mi cu an co lo. ⁴⁰ Ziangahtile, kanmah tel loin annih cu famkimter an silonak dingah, Pathian in kan hrangah thil ṭhasawn in pe a si.

¹ Curuangah kannih khal hi tluk nasa theihpitupawl mero tlain in kulh ruangah, thilrit tinkim le awltei in awktu sual cu hlitthla in, kan hmaiih um mi tlanzuamawknak ah cun tuarfainak thawn tlan uhsi. ² Kan zumnak hrampi le famkimtertu Jesu lam cu zoh in tlan vivo uhsi. Anih cun a hmaiih um mi hlimnak ruangah ningzahnak cu zianghmanah siar loin khraws cu a tuar. Cule, Pathian laltohkham kut vawrh lamah a to. ³ Ziangahtile, nan thinlung tla cau le bang ih a umlonak dingah misualpawl hnen ihsin cu tluk dokalhnak a tuartu, amah cu ruat uh. ⁴ Sual do in thisen suak tiang nan ṭang hrih lo. ⁵ Fale hnenih sim vekih nan hnenih sim mi thapeknak thu cu nan rak hngilh zo. Anih in, “Ka fapa, BAWIPAI nunsimnak cu hmuhsuam hlah, a lo kawk tikah na thanau fawn hlah; ⁶ ziangahtile, BAWIPA in a duhdawt mi cu nun a sim ṭheu ih, a cohlan mi fa kipin a vaw ṭheu,” tiah a ti. ⁷ Nunsimnak nan tuar asile Pathian in fale vekin a lo ruat tinak a si. Ziangahtile, pai nun sim lo mi fa an um dah kel maw? ⁸ Asinan fale hmuahhmuah ih an tuar mi nunsimnak nan tuar lo a si ah cun fangai si loin, fasawn nan si tinak a si. ⁹ Cuitlunah nun simtu taksa dan ah pa kan nei cio ih, cupawl cu kan ṭihzah, thlaraupawlih Pa hnenah nasa sinsinih tuhlutaw in, kan nung lo ding maw? ¹⁰ Ziangahtile, tisa papawl tla cun ni malte sung cu anmai ṭha tidan in nun in sim ngai, asinan anih cun kan hlawknak dingah le a thianhlimnak ṭawmpitu kan si theinak dingah nun in sim sawn a si. ¹¹ Cule, ziangvek nunsimnak khal hi tuar laiah cun lungawium in a lang lo ih, riahsiatumza in a lang sawn ṭheu. Cuti sihmansehla, neh hnuah cu mi ih sawizawi mipawl cun hnangamumza dingfelnak rah an suah ṭheu. ¹² Curuangah a kham mi kut le a cak lo mi khuk cu cakter uh. ¹³ Cun, nan ke hrangah lamzin dingter uh, cuti cun kebai mi cu tuahmawh ih um loin tidam in a um sawn ding. ¹⁴ Thianhlimnak le mi hmuahhmuah thawi remawknak cu dawi uh, thianhlimnak loin zohman in Bawipa an hmu lo ding. ¹⁵ Taima zetin zoh ringring uh, cu lo asile Pathian zangfahnak co ban loin nan um pang ding. A kha mi hram a cerhsuak mi in a lo buaiter pang ding ih, cumi cun mi tampi a bawrhhlawhter pang ding. ¹⁶ Nu le pa sualnak tuah in simaw, rawl vei khat ei menih a fatir sinak covo a zuartu Isau bangih Pathian ṭih lo mi nan um pang ding. ¹⁷ Ziangahtile, cui hnuah malsawmnak ro co duh in, mitthli tlain nasazetin dil hman sehla, sirawknak can remcang a hmuh lo ruangah anih cu hnawn a si ti nan thei. ¹⁸ Ziangahtile, nannih cu tham theih mi le meisa ih kang mi, dum le thim umnak, thlipi hrannak tlang, ¹⁹ cun, tawtawrawt awn le thusim thawm umnak tlang, cui thawm a theitupawl in an hnenih thu sim nawn lo dingih an dilnak hmun thleng nan si lo. ²⁰ Ziangahtile, “Ramsa hmanin cui tlang cu a dai asile lungto ih denthat, asilole thal ih saithat a si ding,” tiih thupek cu an tuar thei lo. ²¹ Cun, an thil hmuh mi cu ṭih a nung zet ih, Mawsi khalin, “Ka ṭih tukih ka khur a si,” tiah a ti. ²² Asinan nannih cu Zion Tlang, a nung mi Pathian khawpi, van Jerusalem le siarcawklo vancungmi burpi hnenah nan thleng zo. ²³ Van ih hmin ngan a si mi fatir kawhhran le lungawi zetih pumkhawmawpawl hnenah si seh, mi hmuahhmuah Thuṭhentu Pathian hnenah si seh, famkimter a si mi midikpawlih thlarau hnenah si seh, ²⁴ thuthlung thar Palai Jesu hnenah le Abel thisen hnakih thu ṭhasawn simtuih thisen theh mi hnenah nan thleng sawn a si. ²⁵ Nan hnenih thusimtu kha hnawng lo dingin fimkhur uh. Ziangahtile, lei tlunah an hnenih thusimtu rak hnawngtupawl cu thuṭhennak in an luat lo asile, van ihsin thu run simtu kan hawi sanah cun kan luat lo sinsin ding. ²⁶ Cu laiah a aw cun leilung a hninter. Asinan atu ah cun, “Leilung lawng si loin, van khal vei khat ka hninter leh ding,” tiah a rak tiamkam. ²⁷ Cun hi thu, “Vei khat,” ka hninter leh ding ti mi ṭawngkam in, hnin theih lo mi thilpawl cu an um ringring theinak dingah, a hnin thei mi, sersiam mi thilpawl ṭhawnhlo an sinak ding a sawh duh a si. ²⁸ Curuangah hnin theih lo mi ram kan co ding ruangah, zangfahnak nei uhsi, cu mi ihsin upatnak le Pathian ṭihzahnak thawn cohlan tlakin Pathian rawng kan bawl thei ding. ²⁹ Ziangahtile, kan Pathian cu meialh a si.

¹ Unau duhdawtawknak cu peh vivo uh. ² Mikhual zoh ṭhat cu thlahthlam hlah uh. Ziangahtile, cuvek tuah in mi hrekkhatpawl in thei loin vancungmipawl an rak mikhual a si. ³ Ṭemṭawn mipawl cu an hnenih ṭemṭawn si ve bangin cing ringring uh la, tuahsiat a tuartupawl cu nanmah khal taksa ih um nan si ve bangin cing ringring hai uh. ⁴ Ziangkimah ṭhitumnak hi sunlawih si seh la, ihkhun cu bawrhhlawhter si hlah seh; cun nu le pa sualnak a tuahtupawl le uirepawl cu Pathian in thu a ṭhen hai ding. ⁵ Nan umtlandan cu duhhamnak tel lo mi si seh; nan thil neih mipawl ah diriam tawk uh. Ziangahtile, amah in, “Ka lo tanta dah lo ding ih, ka lo thlauthla dah fawn lo ding,” tiah a ti. ⁶ Curuangah, “BAWIPA cu i bawmtu a si ih, ka ṭih lo ding. Mi in ka parah ziang so an tuah thei ding?” tiah ralṭha zetin kan ti thei. ⁷ Pathian thu nan hnenih a lo simtu, nan hotupawl cu cing ringring uh la, an nuncan rahsuah tla cu ruat in an zumnak cu cawng uh. ⁸ Jesu Khrih cu mizan, tuisun le a kumkhua in a kel ringring a si. ⁹ Zirhawknak phunphun le danglam in hruaihloawter hlah uh. Ziangahtile, thinlung zangfahnak ih hngehter cu thil ṭha a si; rawl in hngetter hlah uh, rawl cun a luahkhah mipawl hrangah hlawknak a pe lo. ¹⁰ Biakṭheng kan nei, cu mi ah cun biakbuk rawngbawltupawl cun ei theinak an nei lo. ¹¹ Ziangahtile, an thisen, puithiam lubik in sual hrangah hmun thianghlimbik sungih a luhpi mi rannungpawlih ruang cu khemp lengah ur a si. ¹² Curuangah Jesu khalin, amai thisen roriin mipi a thianhlimter theinak dingah kulh kawtka leng lamah cun a tuar ve. ¹³ Curuangah amah an hmuhsuamnak cu phur in, khemp lengah a hnenah feh uhsi. ¹⁴ Ziangahtile, hi tawkah a hmun ding mi khawpi kan nei lo ih, a ra um lai ding mi khawpi cu kan hawl sawn a si. ¹⁵ Curuangah Khrih zarah Pathian hnenah thangṭhatnak thawinak cu catbang loin hlan uhsi. Cui thawinak cu a hmin thangṭhatnak kan hmur rah cu a si. ¹⁶ Cutivek thawinak parah Pathian a lungawi ruangah thil ṭha tuah le hlawmawknak cu hngilh hlah uh. ¹⁷ Ziangahtile, annih cun an hnaṭuandan Pathian hnenih rel ṭheh leh ding an si bangin nan thlarau an kilkhawi a si. Thinnatnak thawn si loin, lungawinak thawn lo kilkhawi hai seh. Ziangahtile, an thin a nat asile nan hrangah hlawknak a um lo. ¹⁸ Kan hrangah thla cam uh. Ziangahtile, thil ziangkimah dik zetih nun duh in sia le ṭha theihnak ṭha kan nei ti kan theifiang. ¹⁹ Nan hnenah ka rat cing theinak dingah, cumi cu tuah dingin ka lo ngen nasasin a si. ²⁰ Atu ah hnangamdaihnak Pathian, Tuukhaltu ropi a si mi, kan Bawipa Jesu, catuan thuthlung thisen zarah mithi lak ihsi a kaithosaltu khan, ²¹ a duhzawng nan tuah theinak dingah thil ṭha ṭuannak tinkim ah lo famkimter hram seh. Cule Jesu Khrih zarah, anih cu nanmah ah ṭuan hram seh, cucu a lungawizawng zet a si. Cui Jesu Khrih hnenah ropitnak cu kumkhua in kumkhua tiang um seh. Amen. ²² Cun, u le nau tla, ca tawite ka lo kuat ruangah hi thapeknak thu hi ngaithla hram dingin ka lo ngen hai a si. ²³ Kan unaupa Timothy kha an suah zo ti rak thei uh. A rat cing asile amah thawn kan ra lo hmu ding. ²⁴ Nan hruaitupawl hmuahhmuah le mithianghlimpawl hmuahhmuah kha cibai in rak buksak uh. Italy ih umpawl in cibai an lo buk. ²⁵ Nan zate hnenah zangfahnak um hram seh. Amen.