GALATI

GALATI

¹ Minung ih thlah le mi pakhatkhat hmang ih thlah si lo, mithi lak ihsin Jesu kaithotu Pa Pathian le Jesu Khrih-ih Apostol si sawn keimah Paul in, ² ka hnenih a um mi unaupawl hmuahhmuah tla thawn Galatia peng ih a um mi kawhhranpawl hnenah ca ka lo kuat hai a si. ³ Pa Pathian le kan Bawipa Jesu Khrih hnen ihsin zangfahnak le hnangamdaihnak cu nan hnenah um hram seh. ⁴ Anih cu Pathian kan Pa-ih duhnak bangtukin tui san san sia sung ihsin in runsuah theinak dingah kan sualnakpawl hrangah Jesu Khrih cu a rak peaw. ⁵ Pathian kan Pa hnenah ropitnak cu kumkhua in kumkhua tiang um ko seh. Amen. ⁶ Khrih zangfahnak hmang in a rak lo kotu hnen ihsin khati tluk rang ih thuthangṭha danglam ih nan rak ṭhawnhlo mai cu ka mang a bang. ⁷ Cumi cu thuthangṭha taktak a si lo. Nanmah lo buaiter ih, Khrih thuthangṭha lingletter duhtu mi hrekkhat an um sawn a si. ⁸ Sihmansehla kanmah si seh, vancung ihsi a ra mi vancungmi khal si seh nan hnenih kan rak phuan zo mi kalh ih thuthangṭha dang nan hnenih an phuan asile a phuangtu cu camsiat in um seh. ⁹ Hi hlanih, kan rak lo sim zo vekin, atu ah ka lo simsal. Mi pakhatkhat in nan rak cohlan cia zo mi kalh ih thuthangṭha dang nan hnenih a phuan asile a phuangtu cu camsiat in um seh. ¹⁰ Ziangahtile, atu ah minung ih pawm ding maw, Pathian-ih pawm so ka hawl? Asilole minung lungawiter maw ka tum? Ziangahtile, minung ka lungawiter men a si ah cun kei cu Khrih-ih ṭemṭawn sal ka si lo ding. ¹¹ Asinan, u le nau tla, ka rak phuan mi thuthangṭha hi minung ih tuahcawp mi thu a si lo ti ka lo theihter hai a si. ¹² Ziangahtile, cumi cu minung hnen ihsi ka rak ngah mi a si lo. Mi ih in zirh mi khal a si lo ih, Jesu Khrih phuanlangawknak ihsin ka ngah mi a si sawn. ¹³ Ziangahtile, Jew-pawlih biaknak ah hi hlanih ka umdanpawl, Pathian kawhhran cu nasazetin ka rak tiduhdah ih siatsuah ka rak tum ciamco thu kha nan hna in nan rak thei. ¹⁴ Jew-pawlih biaknak lamah cun ka miphunpawl lakah ka khukṭhirual mi tampi ka hleih hai. Kan pupapawlih thurosiahpawl parah nasazetin ṭhahnem ka rak ngai. ¹⁵ Sikhalsehla, amai lungawizawng vekin ka nui pum sungih ka um lai ihsin Pathian cun i serhhran ih, a zangfahnak in i rak ko. ¹⁶ Zentelpawl hnenah Jesu Khrih thuthangṭha ka phuan theinak dingah Pathian in a Fapa ka hnenih phuanlang cu a lungawizawng a si. Kha laiah khan tisa le thisen ka rawn lohli lo. ¹⁷ Ka hlanih apostol a rak si mipawl rawn dingah Jerusalem khalah ka so lo. Arabia Ram ah ka feh lohli sawn ih, Damaskas khua ah ka kirsal. ¹⁸ Cule, kum thum hnuah Peter tawng dingin Jerusalem ah ka hung so ih a hnenah ni hleinga ka cam. ¹⁹ Asinan, Bawipai naupa James siarlo midang apostol zohman ka hmu lo. ²⁰ Atu ah, ngai hnik uh, nan hnenih ka ngan mi thilpawl hi Pathian hmaiah thuphan ka sim lo. ²¹ Cui hnuah, Siria peng le Silisia pengpawl tla ah ka feh. ²² Khrih ih a um mi, Judia peng kawhhranpawl cun pumpak takin in rak thei lo. ²³ Asinan, “Hlanih in rak tiduhdahtupa khan atu ah hlanih siatsuah a rak tum rero mi zumnak thu a phuang,” ti lawng an hna in an rak thei. ²⁴ Cule, keimah ruangah Pathian an thangṭhat.

¹ Cule, kum hleili a rei hnuah Barnabas thawn Jerusalem ah ka hung fehsal. Tita khal ka hnenah ka hruai. ² Cun, ka hnenih Pathian thuphuansuah mi ruangah ka hung feh ih, Zentelpawl hnenih ka phuan mi thuthangṭha cu anmah ka simfiang hai. Sihmansehla, alakih ka tlanlonak dingah le ka tlan zonak kha a lak men a silonak dingah hruaitu ih an ruah mipawl cu a dangten ka simfiang hai. ³ Ka hnenih um Tita cu Grikmi asinan, serhtan tengteng dingin an fial lo. ⁴ Cule, cumi cu a thuptei an hruailuh mi unau deupawl ruangah a si. Cupawl cu sal ih in hruai theinak dingah Khrih Jesu ih zalennak kan neih mi kha thlingthla dingin athupten an lut. ⁵ Thuthangṭha thutak nan hnenih a um peh vivo theinak dingah can malte sung hman cui unau deupawl hnenah kan rak peaw lo. ⁶ Asinan, hruaitu ih ruah mipawl cu ziangvek mi an si khalle ka hrangah a thupi lo. Pathian cun leng lam langdan menin mi a pawm lo. Ziangahtile, hruaitu ih ruah mipawl cun ka phuan mi thu ah bet mi zianghman an nei lo. ⁷ Cu hnakin, serhtan mipawl hrangah thuthangṭha cu Peter hnenih kawlter a si vekin serhtan lo mipawl hrangah thuthangṭha cu ka hnenah kawlter a si ti kha an hmu sawn riangri. ⁸ Ziangahtile, serhtan mipawl hnenih apostol si dingih Peter hnenih a ṭuantu khan Zentelpawl hrangah apostol si dingin keimah ah a ṭuan a si. ⁹ Sutpi ban ih an ruah mi James, Kefas le John tlain ka hnenih pek mi zangfahnak hi an theihhliah tikah kannihpawl hi Zentelpawl hnenih feh dingin le annihpawl cu serhtan mipawl hnenih feh dingin keimah le Barnabas hnenah pawlkawmnak vawrh lam kut in rak pe. ¹⁰ Annih in miretheipawl kan hngilh lo ding lawng an duh. Cu mi rori cu keimah khal ka tuah hiar zet mi a si. ¹¹ Asinan, Peter cu Anṭiok khua a thlen tikah mawhthluk dingih a um ruangah hmaitawn in amah cu ka dokalh. ¹² Ziangahtile, James hnen ihsin mi hrekkhat an ra thlen hlanah cun anih cu Zentelpawl thawn rawl an rak eitlang. Asinan, cupawl an ra thlen tikah serhtan mipawl a ṭih hai ruangah dung a sip ih, a thiarfihlimaw. ¹³ Cule a dang Jew-pawl khal titeraw in amah thawn an um. An titerawknak cun Barnabas khal a hruaipeng. ¹⁴ Sikhalsehla, annih cu thuthangṭha thutak bangtukin ding zetin an feh lo ti ka hmuh tikah an zate hmaiah Peter cu, “Nangmah cu Jew-mi na si. Asinan Jew-pawlih nundan vekin nung loin Zentelpawl vekin na nung. Cuti asile ziangruangah Zentelpawl cu Jew-pawl vekih nunter hramhram na tum? ¹⁵ “Kannih cu suahkeh ihsin Jew-mi kan si ih, Zentel misualpawl kan si lo. ¹⁶ Minung cu Dan thlunnak ruangin thiam a co lo ih, Jesu Khrih zumnak ruang sawnin a si ti thei in, Dan thlunnak ruangin si loin Khrih zumnak ruangin thiam kan co theinak dingah kannih khalin Jesu Khrih cu kan rak zum a si. Ziangahtile, mi zohman Dan thlunnak ruangin thiam an co lo ding. ¹⁷ “Khrih ruangih thiam coter mi si dingih kan hawl laiah kanmah rori khal misual kan si ti a langfiang asile Khrih cu sual karhtertu a si maw? Si lamlam hlah! ¹⁸ Ziangahtile, ka rak siatbal mi thilpawl ka saksal asile keimah le keimah Dan pahbaltu ah ka tuahaw a si. ¹⁹ Ziangahtile, Pathian hrangih ka nun theinak dingah Dan hmang in Dan lamah ka thi a si. ²⁰ Kei cu Khrih hnenah khenbet ka si, sikhalsehla ka nung a si. Asinan, a nungtu cu keimah ka si nawn lo ih, Khrih cu keimah ah a nung sawn a si. Cule atu taksa ih ka nun hi in duhdaw ih ka hrangih peawtu Pathian Fapa zumnak ih nung ka si. ²¹ Pathian zangfahnak cu ka hnawng lo. Ziangahtile, dingfelnak cu Dan ihsin a ra asile Khrih cu alakih thi a si ding,” tiah ka ti.

¹ Maw Galatia miaapawl! An khenbet mi Jesu Khrih thu cu nan hnenah fiang zetin kan rak lo sim zo. Thutak nan lunlonak dingah zo in so lo dawi aa? ² Himi lawng hi nan hnen ihsin zir ka duh, Thlarau cu Dan thlunnak in maw, asilole nan hna in thuthangṭha nan rak thei ih, nan zumnak ruangin so nan co? ³ Hi tluk lawmmam in maw nan rak at? Thlarau in nan rak thawk ih, atu ah tisa in nan netter ding maw? ⁴ Thil khati zat zozai kha teh alak menin maw nan rak tuar, zianghmanlomen maw a si thluh ding? ⁵ Curuangah nan hnenih Thlarau a lo petu le nan lakih thilmakpawl a tuahtu in cumi cu Dan thlunnak ruangah maw, asilole nan hna ih nan rak theih mi nan zumnak ruangah so a tuah? ⁶ Cumi cu, “Abraham cun Pathian a zum ih, cui a zumnak cu a dingfelnakih siarsak a si,” ti Abraham-ih thuhla vek khan a si. ⁷ Curuangah zumnak parah ṭhumaw ih a nung mipawl lawng Abraham-ih fate an si. ⁸ Cule, Cathianghlim in Zentelpawl cu Pathian in zumnak parah ṭhumaw in thiam a coter ding ti rak hmu cia in, “Nangmah ah miphun hmuahhmuah thlawsuah an si ding,” tiah Abraham hnenah thuthangṭha a rak sim cia. ⁹ Cuti a si ruangah zumnak ih a nungtupawl cu a zumtu Abraham thawn hmunkhat ah Pathian in thlawsuah a pe hai. ¹⁰ Ziangahtile, Dan thlunnak parih a ṭhumawtu hmuahhmuah cu camsiatnak hnuaiah an um. Ziangahtile, Cathianghlim in, “Dan bu sungih ngan mi thil hmuahhmuah a tuah ringring lotu pohpoh cu camsiat an si,” tiah a ti. ¹¹ Asinan Pathian hmaiah zokhal Dan ihsin thiam a co lo ti cu a fiang. “Ziangahtile, midingfel cu zumnak in a nung ding,” ti a si. ¹² Dan cu zumnak parah a ṭhumaw lo. Sihmansehla, “Cui thilpawl a tuahtu cu cu mipawl in a nung ding,” ti a si. ¹³ Khrih cu kan hrangah camsiat mi ah cang in, Dan ih camsiatnak ihsin in rak tlensuak zo. Ziangahtile, “Thing parih thlai mi pohpoh cu camsiat mi an si,” tiih ngan a si. ¹⁴ Abraham-ih thlawsuah cu Khrih Jesu thawngin Zentelpawl hnenih a thlen theinak dingah Khrih cun in rak tlen a si. Cuti cun kannih in zumnak thawngin tiamkam mi Thlarau cu kan co a si. ¹⁵ U le nau tla, milai ṭawngdan vekin ka ṭawng ding. Milai thuthlung si hman sehla nemhngeh a si hnuah cun zohman in an phelh dah lo, asilole a bet khal an bet dah lo. ¹⁶ Asinan Pathian in Abraham hnen le a tesinfa hnenah thutiamkampawl a sim. “Na tesinfapawl hnenah,” tiin tesinfa tampi hnenih sim vekin a sim lo. Tesinfa pakhat hnenih sim vekin, “Na tesinfa hnenah,” tiin a sim sawn. Cucu Khrih a si. ¹⁷ Atu ah hihi ka sim a si, Pathian in Khrih ah a rak nemhngeh zo mi thuthlung cu kum zali le sawmthum hnuih rak um mi Dan in a thaihlo thei lo ih, thutiamkam khal zianghmanlo ih cang ko a tuah lo. ¹⁸ Ziangahtile, ro conak cu Dan parih ṭhumaw a si ah cun thutiamkam parih ṭhumaw a si nawn lo. Asinan, Pathian in Abraham hnenah ro conak cu thutiamkam parah ṭhumaw in a pe. ¹⁹ Asile Dan cu ziang hrangih pek a si? Dan pahbalnak ruangah tesinfa runglang hlan sung hrangah thutiamkam betnak a si. Cui tesinfa hnenah cun Pathian in thutiamkam a pe ih, Pathian cun vancungmipawl hmang in remnak tuahtu palai kut in Dan cu a din. ²⁰ Palai cun khatlampawl lawng ai a awh lo ih, Pathian sawn cu pakhat a si. ²¹ Cuti asile Dan cun Pathian thutiamkampawl a dodal maw si? Dodal lamlam hlah! Ziangahtile, nunnak mi pe theitu Dan pek zo rak sita sehla, thungaitein dingfelnak cu Dan parih ṭhumaw a si ding. ²² Asinan, Jesu Khrih zumnak ruangih thutiamkam cu a zumtupawl hnenih pek a si theinak dingah Cathianghlim in mi hmuahhmuah cu sual hnuaiah a rak kharhkhum thluh. ²³ Sikhalsehla, zumnak a ra thlen hlan cu a ra lang leh ding mi zumnak hrangah Dan cun in kharhkhum ih in rak kil a si. ²⁴ Curuangah Khrih hnenih hruai thlen kan si theinak dingah le zumnak ruangah thiam kan co theinak dingah Dan cu in kilkhawitu le in zirhtu a si. ²⁵ Asinan zumnak a ra thlen hnu ah cun kannih cu kilkhawitu le zirhtui hnuaiah kan um nawn lo. ²⁶ Ziangahtile, nan zatein Khrih Jesu zumnak thawngin Pathian fa nan si. ²⁷ Ziangahtile, Khrih sungih baptisma a co zotu nan zatein Khrih in nan rak thuamaw zo a si. ²⁸ Nan zatein Khrih Jesu ah pumkhat nan si ruangah Jewmi ti le Grikmi ti a um lo, sal ti le miluat ti a um lo, mipa ti le nunau ti a um lo. ²⁹ Cule nannih cu Khrih-ih ta nan si le Abraham-ih tesinfapawl nan si ih, thutiamkam bangtukin ro cotu nan si.

¹ Atu ah hihi ka sim mi cu a si, ro cotu cu ziangkim parah hotu sihmansehla nauhak a si sung hmuahhmuah cu sal thawn danglamnak zianghman a um lo. ² Sikhalsehla a pai bikhiah can a thlen hlan sung cu kilkhawitupawl le zohkhentupawlih kut hnuaiah a um a si. ³ Cutivek thothoin kannih hnen khalah a si. Nauhak kan si laiah cun leitlun thuhramthawh zirhawknak hnuaiah sal kan rak si. ⁴ Sikhalsehla a tikcucan a kim tikah Pathian in a Fapa a run thlah ih, nunau sungin Dan hnuaiah a suak. ⁵ Cutin, Dan hnuaiih umpawl tlen dingah le fa sinak kan co theinak dingah a si. ⁶ Cule, fa nan si ruangah Pathian in a Fapa-ih Thlarau cu nan thinlung sungah a run thlah. Cui Thlarau cun, “Abba, ka Pa!” tiah a au. ⁷ Curuangah, nang cu sal na si nawn lo ih, fa na si sawn a si. Fa na si ruangah Khrih zarah Pathian ro cotu na si. ⁸ Cuti sikhalsehla thungaiten, Pathian nan rak theih lo laiah khan pathian a si taktak lo mipawlih sal ah nan rak um. ⁹ Asinan, atu ah cun, Pathian nan rak thei zo. Cuti hnak hmanin Pathian-ih mi theih nan si zo ti sawn ding a si. Ziangtin saw a cak lo mi le ṭhathnemnak nei lo thuhramthawh zirhawknak ah herkir in an sal ih can nan duhsal? ¹⁰ Ni, thla, tikcucan le kum pawl tla nan ul. ¹¹ Nan hrangih nasazetih ka ṭuan mi hi alak a si pang ding ti ka lo phansak. ¹² U le nau tla, kei khal nanmah vek ka si ruangah nannih khal keimah vek si dingin ka lo ngen a si. Nannih in ka hnenah thil ṭha lo zianghman nan rak tuah lo. ¹³ Nan hnenih thuthangṭha ka phuan hmaisakbik ṭumah khan ka taksa a ṭawnṭaihzia kha nan thei. ¹⁴ Cule ka taksa ah hniksaknak um cing khalin nannih in in nautat lo ih, a hnawn khal in hnawng lo. Pathian vancungmi vekin le Khrih Jesu vek roriin in rak cohlang sawn. ¹⁵ Cuti asile, nan rak neih mi lungawinak cu ziang a si? Ziangah cutin ka ti tile thil cang thei si sehla nan mit rori hman phawrhsuak tahratin in rak pe zo ding ti ka lo theihpi. ¹⁶ Thutak ka lo sim ruangah atu ah nan ral ah maw ka can? ¹⁷ Midang, nan hrangih ṭhahnemngaitupawl hin a ṭha zawngin ṭhahnem an ngai lo. An hrangih ṭhahnem nan ngai theinak dingah kan hnen ihsin lo ṭhen an duh. ¹⁸ Asinan, nan hnenih ka um lai lawngah si loin, ziangtik lai khalah thil ṭha hrangih ṭhahnemngai ringring hi a ṭha. ¹⁹ Ka faletla, Pathian in Khrih bang ko a lo thawmngah thluh hlanlo nauhrin nat tuar vekin ka lo vei hai a si. ²⁰ Atu ah hin nan hnenah um in ka aw danglamter ka duh. Ziangahtile, nanmah lo rinhlelhnak ka nei. ²¹ Nannih Dan hnuaiih um a duhtupawl, in sim hnik uh, Dan thu nan ngaithla a si lo maw? ²² Ziangahtile, Abraham in fapa pahnih a nei. Pakhat cu salnu hnen ihsin a si ih, a dang pakhat cu miluatnu hnen ihsin a si, tiah Cathianghlim in a ti. ²³ Salnu cun milai dan in fapa a hring ih, asinan miluatnu cun thutiamkam thawngin fapa a hring. ²⁴ Cui thilpawl cu khaikhinnak thu a si. Ziangahtile, cui nunau pahnih cun thuthlung pahnih ai an awh. Nunau pakhat sawn cun Sinai Tlang ai a awh. Sal si ding mi fa a hring ih, cu nu cu Hagar a si. ²⁵ Ziangahtile, hi Hagar cun Arabia ram ih Sinai Tlang ai a awh. Tuini ih Jerusalem thawn an bangaw ih a sungih um a falepawl thawn sal ah an tang. ²⁶ Asinan tlun lam Jerusalem cu sal a si lo ih, cumi cu kan zateih nu a si. ²⁷ Ziangahtile, “Nang micing, fa hring dah lo, hlim aw! Nang, nauhrin nat tuar dah lo puaksuak in au aw! Ziangahtile, pasal nei nunau hnakin thlauthlak mi nunau in fa a nei tamsawn,” tiih ngan a si. ²⁸ Atu ah u le nau tla, Isak vekin kannih cu thutiamkam fate kan si. ²⁹ Cui canah milai dan ih hrin mi fapa in Thlarau dan ih hrin mi fapa cu a tiduhdah. Tu lai khalah hin cutivek cun a si. ³⁰ Sikhalsehla, Cathianghlim sungah ziangtin a um? “Salnu le a fapa cu dawihlo aw. Ziangahtile, salnu-ih fapa cun ziangti lam khalin a luat mi nu-ih fapa thawn ro an cotlang thei lo ding,” tin a um. ³¹ Curuangah u le nau tla, kannih cu salnu-ih fate kan si lo ih, a luat mi nu-ih fate kan si sawn a si.

¹ Khrih in in zalenter zo ruangah cui zalennak ah cun dinghnget uh la, sal tannak hngawngkawl ah va tangsal nawn hlah uh. ² Ngai hnik uh, kei, Paul in nan hnenah ka lo sim, serh nan tan asile Khrih cu nan hrangah zianghman a ṭhahnem lo ding. ³ Cule, serh a tantu mi kip hnenah Dan thu hmuahhmuah thlun dingih batu a si ti ka theihtersal. ⁴ Dan in thiam a lo coter asile Khrih cu nan hrangah ṭhathnemnak nei lo ah a cang. Zangfahnak cu nan rak tluksan a si. ⁵ Ziangruangah tile kan ruahsan mi zumnak parih ṭhumaw mi dingfelnak cu Thlarau zarah hlawptlo zetin kan hngak a si. ⁶ Ziangahtile, Khrih Jesu ah serhtan si seh, tan lo si seh, zianghman a ṭhahnem lo. Asinan duhdawtnak hmang ih zumnak hnaṭuan mi cun ṭhathnemnak a nei a si. ⁷ Ṭha zetin nan tlan. Thutak thu lung lo dingin zo in a lo kham? ⁸ Hitivek ruahnak cu a lo kotu hnen ihsin a ra lo. ⁹ Thilnu malte in sang hlawm pumpuluk in a thoter. ¹⁰ Lungthinruahnak dang nan nei lo ding tiah Bawipa ah zumhngehnak ka nei. Asinan, buainak a lo petu cu zo a si khalle a parih thuṭhennak cu a tuar ding. ¹¹ Cule, u le nau tla, kei in serhtan thu phuang ningla ziangruangah tiduhdahnak cu ka tuar lai hrih? Cucu phuang ningla, khraws ih mi a tlukbahternak cu a reh ding. ¹² Buainak a lo petupawl cu anmah le anmah satcataw hai sehla ka duh! ¹³ Ziangahtile, u le nau tla, nannih cu zalen dingih kawh mi nan si. Asinan nan zalennak cu nan tisa cakhiarnak tuahnak hrangih remcannak ah hmang loin duhdawtnak in pakhat le pakhat rianawtawn sawn uh. ¹⁴ Ziangahtile, “Nangmah le nangmah na duhdawtawk vekin na inhnen na duhdaw pei,” ti mi thu pakhat ah Dan hmuahhmuah a famkim ṭheh. ¹⁵ Asinan pakhat le pakhat nan keuaw ih, nan eiawk asile pakhat le pakhat nan hlohralawkter lonak dingah ralring uh! ¹⁶ Hihi ka sim a si, Thlarau in nung uh, cule tisa cakhiarnak cu nan tuahsuak hrimhrim lo ding. ¹⁷ Ziangah cutin ka ti tile tisa duhnak cun Thlarau duhnak a dokalh ih, Thlarau duhnak in tisa duhnak cu a dokalh. Annih cu pakhat le pakhat an dokalhaw. Curuangah nannih cun nan tuah duh mi thilpawl nan tuah lo. ¹⁸ Asinan, Thlarau ih hruai mi nan si ah cun, Dan hnuaiah nan um lo. ¹⁹ Atu ah tisa thiltipawl cu hipawl ah hin a langfiang a si. Cupawl tla cu: uiretnak, tenumza hursualtuahnak, tisa cakhiarnak, bawrhhlawhnak, supawklonak, ²⁰ milem biaknak, dawithiamnak, mihuatnak, tawhawknak, thikthusiatnak, thinhengnak, ṭanghmasialnak, lungruallonak, zirhsualnak, ²¹ iksiknak, laithahnak, zuritnak, zu hmun nawmcennak le cuvek thilpawl tla an si. Cuvek thilpawl a tuahtu cun Pathian uknak cu ro ah an co lo ding tiah atu ah ka lo sim cia. Hi hlanih ka rak lo sim vekin atu ah ka lo sim cia. ²² Sikhalsehla Thlarau rah cu duhdawtnak, hlimnak, hnangamdaihnak, thinsaunak, nunnemnak, ṭhatnak, rinumnak, ²³ tangdawrnak, supawktheinak pawl tla an si. Cuvek thilpawl dokalhtu dan a um lo. ²⁴ Khrih-ih ta a si mipawl cun tisa cu a duhhiarnak le a cakhiarnak thawn an khengbet zo. ²⁵ Thlarau zarah nunnak kan neih ruangah Thlarau in kan nung ding a si. ²⁶ Midang hnakih ṭhasawn ah ruataw hlah uhsi la, pakhat le pakhat thinṭeuawter loin pakhat le pakhat iksikaw hlah uhsi.

¹ U le nau tla, mi pakhat sual in a kaih asile nannih thlarau mipawl in cu pa cu nemnak thinlung thawn tungding uh. Ralring aw, cu lo asile sualfawrhnak na tawng ve pang ding. ² Pakhat le pakhat phurrit sawngawtawn uh la, cuti zawngin Khrih dan cu nan kimter a si. ³ Ziangahtile, mi pakhat in zianghman si si loin mithupi ih a ruahawk asile amah le amah a bumaw a si. ⁴ Sikhalsehla, mi kipin anmai hnaṭuan mi cio cekfel hai seh. Cule midang parah si loin amai par lawngah tluangkhawnnak nei seh. ⁵ Ziangahtile, mi kipin mai phur ciar an phur ding a si. ⁶ Pathian thuzirhnak a dawngtu cun a zirhtui hnenah thil ṭha a neih mi hmuahhmuah hlawm ve seh. ⁷ Bum in um hlah uh. Pathian cu ziang siar lo men ding a si lo. Ziangahtile, mi in ziangkhal a tuh mi cu a ah khal a at ding. ⁸ Ziangtin tile amai tisa lamih a tuhtu cun cui tisa ihsin siatralnak a at ding. Asinan, Thlarau lamih a tuhtu cun Thlarau hnen ihsin kumkhawnunnak a at ding. ⁹ Cule thil ṭha tuah dingah thanau hlah uhsi. Ziangahtile, kan bansan lo asile a tikcucan teah kan at leh ding a si. ¹⁰ Curuangah can remcang kan neihdan vekin mi hmuahhmuah hnenah thil ṭha tuah uhsi. Ahleicein zumnak ih kan sungkuapawl hnenah tuah uhsi. ¹¹ Ka kut roriin nan hnenah cafang tumpi pi ih ca ka ngan mi hi nan hmu! ¹² Milai hmuh ih ṭha si a duhtu hmuahhmuah in serhtan dingin an lo fial. Khrih khraws ruangah tiduhdahnak an tuarlonak ding hrang lawngah cumi cu an tuah a si. ¹³ Ziangahtile, serhtannak a cotupawl khalin Dan thu cu an thlun cuang lo. Asinan nan taksa ih tluang an khawn theinak dingah serh nan tan ding an duh. ¹⁴ Sikhalsehla, kei cun kan Bawipa Jesu Khrih-ih khraws siarlo tluangkhawnpi dah lo hram ningla ka duh. Cu mi zarah khawvel hi ka hrangah khenbet a si zo ih, kei khal khawvel hrangah khenbet ka si zo. ¹⁵ Ziangahtile, Khrih Jesu ah serhtan si seh, tan lo si seh, zianghman a ṭhahnem lo. Siamtharnak sawn hi a thupi mi cu a si. ¹⁶ Cule, cui dan vekih a nungtu hmuahhmuah hnenah le Pathian-ih Israel-pawl parah hnangamdaihnak le zahngainak cu um hram seh. ¹⁷ Atu thawkin zohman in i tibuai nawn hlah hai seh. Ziangahtile, Bawipa Jesu-ih hmaphe tla cu ka taksa ah ka pu a si. ¹⁸ U le nau tla, kan Bawipa Jesu Khrih-ih zangfahnak cu nan thlarau ah um seh. Amen.