EFESA

EFESA

¹ Pathian duhzawng ih Jesu Khrih-ih apostol a si mi keimah Paul in Khrih Jesu-ih mirinum, Efesa khua ih mithianghlimpawl hnenah ca ka lo kuat a si. ² Pathian, kan Pa le Bawipa Jesu Khrih hnen ihsin zangfahnak le hnangamdaihnak cu nan hnenah um seh. ³ Kan Bawi Jesu Khrih-ih Pathian le Pa cu thangṭhat in um seh. Anih cun van hmun tla ah thlarau lam malsawmnak hmuahhmuah thawn Khrih ah mal in sawm. ⁴ Cutivek thothoin, Pathian in leilung hram a bun hlan in duhdawtnak ruangah amai hmaiih thianghlim le sawihnawm ding um lo kan si theinak dingah Khrih ah in rak hril zo. ⁵ Pa Pathian in a lungawizawng amai duhdan bangtukin Jesu Khrih in amai hnen roriah fa si dingin in rak ruat. ⁶ A zangfahnak ropi kan thangṭhat theinak dingah cutivekin a tuah a si. Cui zangfahnak cu a Duhdawt Mi ah cun alakin in rak pe. ⁷ A zangfahnak a luanliam bangtukin amah ah cun a thisen zarah sualpawl ngaidamnak, tlensalnak kan nei. ⁸ Cui zangfahnak cu fimnak hmuahhmuah le theihthiamnak hmuahhmuah thawn Pa Pathian in a khatliam in in vur a si. ⁹ A lungawizawng zulhih amah le amah ih a thilti tum, a duhnak thuthup cu kan hnenah in theihter zo. ¹⁰ Cumi cu, famkimnak can bikhiah ṭhen a thlen tikah Khrih ah cun ziangkim, van ih thil um mipawl le leitlun ih thil um mipawl hmunkhat ih a hruaikhawm theinak dingah a si. ¹¹ Amai tumtahnak in a rak remruat cia ruangah Khrih ah ro conak khal kan rak ngah a si. Anih cu thil ziangkim amai duhdan vekih tuahsuaktu a si. ¹² Cutin, Khrih parih ruahsannak a rak nei hmaisatu kannihpawl hi mi in a ropitzia an thangṭhatnak kan rak si ding. ¹³ Nannih khalin thutak thu nan rundamnak thuthangṭha nan hna ih nan rak theih tikah Khrih cu nan zum. Amah nan zum hnuah Pathian in tiamkam mi Thlarau Thianghlim in tacik a lo khen. ¹⁴ Pathian in a lei ih, a neih mipawl a tlen lai hlanlo Thlarau Thianghlim hi kan ro co ding mi ih hamnak a si. Cu cun Pathian ropitzia thangṭhat ko in tuah. ¹⁵ Bawipa Jesu nan zumnak le mithianghlimpawl hmuahhmuah nan duhdawtzia cu ka thei. ¹⁶ Cu mi ruangah ka thlacamnak tla ah ka lo mang ih, nan hrangih lungawithu sim ka bang lo. ¹⁷ Kan Bawipa Jesu Khrih-ih Pathian, sunlawinak Pa cun amah thei dingah fimnak le phuanlangnak Thlarau lo pe hram seh. ¹⁸ A lo kawhnak ruahsannak le a ro co ding khatliam ropitzia cu ziang a si ti mithianghlimpawl lakih nan theihtheinak dingah nan theihthiamnak mit tla vanter si hram seh. ¹⁹ Cule a huham nasazetih hna a ṭuan bangin kannih zumtupawl lamih a huham ropi zet cu nan theihtheinak ding hrang khalah thla ka cam. ²⁰ Cui huham hmang in Pathian cun Khrih ah a ṭuan ih anih cu mithipawl lak ihsin a kaitho. Cule van hmunpawl ah a vawrh lamah a toter. ²¹ Anih cu Pathian in uktu hmuahhmuah le thuneitu hmuahhmuah si seh, huham hmuahhmuah le lalnak hmuahhmuah le tui san lawng si loin a ra thleng lai ding mi san khalih hminsak mi hmuahhmuah ih hmin tlun sangpi ah a toter. ²² Cule, Pathian in thil ziangkim cu Khrih-ih ke hnuaiah a ret ih, kawhhran hrangah thil ziangkim tlunih lu si dingah Pathian in a ruat. ²³ Cui kawhhran cu a taksaruangpum a si ih, ziangkim ih ziangkim tlamtlingtertu amah ih famkimnak cu a si.

¹ Cun, nannih thil tisualnak le sualnakpawl tla ih thi zo mi kha a lo nungter zo. ² Cu mipawl ah cun, kha laiah khan, nannih cu hi khawvel dan vekin, boruak ih thuneihnak lal, atu ih thulung lo fatepawl lakih hna a ṭuan rerotu thlarau duhzawng in nan rak nung. ³ Cu mipawl lakah kannih khal kan zaten a liam cia mi canah kan tisa cakhiarnak tuah in, tisa le ruahnaklungthin cakhiarnak tuah in kan rak um dah ve. Cule midangpawl vek thothoin kan suahkeh in thinhengnak fate kan rak si. ⁴ Asinan, zahngainak tam zet neitu Pathian in a duhdawtnak maksak thawi in rak duhdawt ruangah, ⁵ sual ih thi kan rak si lai hmanah, Khrih thawn hmunkhat ah in nungter. Zangfahnak ih rundam nan si. ⁶ Cule, Pa Pathian in in kaithotlang ih Khrih Jesu ah van hmunpawl ah khin hmunkhat ah in toter. ⁷ Cuti cun a thleng lai ding mi sanpawl ah Khrih Jesu thawngin kanmah lamih a ngilneihnak in a zangfahnak len natsatzia a langter theinak dingah a si. ⁸ Ziangahtile, zangfahnak in zumnak thawngih rundam nan si, cucu nanmah ihsi suak a si lo, Pathian thilpek a si. ⁹ Ṭuannak ruangah a si lo, cuiruangah zohman an tluangkhawng thei lo ding. ¹⁰ Ziangahtile, kannih cu amai kutsuak, hna ṭha tla ṭuan dingin Khrih Jesu ah sersiam mi kan si, cui hna ṭhapawl tla cu kan tuah dingah Pathian in a hlankhanin a rak timtuah cia. ¹¹ Curuangah, nannih hlanah suahkeh ihsi Zentelmi si cia, taksa ah kut ih serhtan an ti mipawl in serhtan lo tiih an lo kawh mi nan si ti kha cing ringring uh. ¹² Cu laiah nannih cu Khrih nei loin, Israel khua le ti ihsin a leng mi si in, tiamkam thuthlungpawl ah mikhual si in, ruahsannak nei lo le leitlun ah Pathian nei loin nan rak um. ¹³ Asinan atu ah cun Khrih Jesu ah hla zetih a rak um dah mi nannih cu Khrih thisen in nai teah a lo umter a si. ¹⁴ Ziangahtile, amah cu kan remawknak, pahnih pakhat ih tuahtu, in ṭhentu a laifangih phar ṭhiattu a si. ¹⁵ Anih cun ralawknak, Dan thupekpawl zirhawknak hmang ih an peksawngsin mi hman a taksa in a hloralter ih, cutin amah ah mi pahnih cu minung thar pakhat ah tuah in remawknak a tuah a si. ¹⁶ Ralawknak cu amah ah a thah zo i ruangah pahnih cu khraws ruangin Pathian ah taksa pumkhat ah a remawter thei ding. ¹⁷ Cun, anih cu a ra ih nannih hla zetih um mipawl hnenah le nai teih a um mipawl hnenah remawknak thuthangṭha a sim. ¹⁸ Ziangahtile, amah thawngin Thlarau pakhat in Pa hnenih luh theinak kan nei veve. ¹⁹ Curuangah, atu ah cun mikhual le ram dang mi nan si nawn lo ih, mithianghlimpawl thawi ram khat mi le Pathian sungkua nan si sawn a si. ²⁰ Lungphum a si mi apostolpawl le profetpawl parih sak mi nan si ih, Jesu Khrih amah rori cu a kilih lung pawimawhbik ah a cang. ²¹ Amah ah cun sak mi inn pumpi in rem zetih buntlang thluh a si ih, Bawipa ah temple thianghlim si dingin a ṭhang vivo. ²² Nannih khal amah ah Thlarau in Pathian cennak hmun dingah sakkhawm mi nan si.

¹ Himi ruangah keimah, Paul hi nannih Zentelpawl hrangah Khrih Jesu ih thawngtla ka si. ² Pathian zangfahnak kilkhawi hna cu nan hlawknak ding hrangah pek ka si kha nan rak thei ko ding. ³ Hi hlanah tawiteih ka rak ngan zo vek khan, thuthup cu phuansuahnak in ka hnenah i theihter zo. ⁴ Cu mi nan siar tikah, Khrih thuthup ka theihzia nan theithiam thei ding. ⁵ Cumi cu atu ih amai apostol thianghlimpawl le profetpawl hnenih Thlarau in a phuanlang vekin san dangpawl ah minung fapapawl hnenah theihter a rak si lo. ⁶ Cumi cu, thuthangṭha ruangah Khrih Jesu ah Zentelpawl ro copitu an si ding le taksa bangrep le a thutiam copitu an sinak ding tla hi a si. ⁷ A huham hnaṭuan hmualnei zetin ka hnenih pek a si mi Pathian zangfahnak thilpek vekin cui thuthangṭha rawngbawltu ah ka cang. ⁸ Mithianghlim hmuahhmuah lakih a tebik hnakih tesawn keimai hnenah hawlsuah banrual lo mi Khrih-ih lennak cu Zentelpawl hnenih ka phuan theinak dingah hi zangfahnak hi ka hnenih pek a si. ⁹ Cun, Jesu Khrih hmang ih ziangkim sersiamtu Pathian hnenih leilung semtir ihsin thuh ih a um mi ṭawmawknak thuthup cu mi hmuahhmuah hmuter dingin cui zangfahnak cu in pe. ¹⁰ Van hmunpawl tla ih uktupawl le thuneitupawl hnenah atu ah kawhhran hmang in Pathian fimnak thu ah tampi theihter a si theinak ding khalah a si fawn. ¹¹ Cumi cu, Pa Pathian in Khrih Jesu kan Bawipa ah a rak hlensuah mi a catuan thiltum vek khan a si. ¹² Amah ah cun ralṭhatnak le ngam zetih luh theihnak cu amah zumnak ruangin kan nei. ¹³ Curuangah nan hrangih harsatnakpawl ka tuarnak ah nan beidawng lo dingin ka lo ngen. Cui harsat tuarnak cu nan sunlawinak a si. ¹⁴ Himi ruangah kan Bawipa Jesu Khrih-ih Pai hnenah ka khuk ka bil ṭheu. ¹⁵ Van le leitlun ih sungkua hmuahhmuah cu amai hminsak mi an si. ¹⁶ A Thlarau in nan sung lam minung cu a thiltitheinak in a cahternak dingah a ropitnak lendan zulhih lo pe dingin thla ka cam. ¹⁷ Cule, zumnak in Khrih cu nan thinlung sungih a cen theinak ding hrang khalah thla ka cam. Nannih cu duhdawtnak ih hram bun mi le phunhngeh mi nan si. ¹⁸ Cuti cun, mithianghlimpawl hmuahhmuah thawn theih banrual lo Khrih duhdawtnak kauhzia, sauzia, thukzia le sanzia cu ziang a si ti nan theithiam thei ding. ¹⁹ Cui theih banrual lo Khrih duhdawtnak cu thei dingin Pathian famkimnak hmuahhmuah thawi khahter nan si ding. ²⁰ Kanmah ih hnaṭuan ṭheu a huham bangtukin, kan dil le kan ruah mi hmuahhmuah hnakih nasasawnih titheitu hnenah, ²¹ Ropitnak cu amai hnenah Khrih Jesu ruangah san hmuahhmuah ah, kumkhuaih kumkhua tiangin kawhhran ah um seh. Amen.

¹ Cuiruangah, kei, Bawipai thawngtla hin, kawh nan sinak mil ih nung dingah ka lo ngen a si. ² Phahniamawknak le lungnemnak hmuahhmuah thawn, thinsaunak thawn duhdawtnak in pakhat le pakhat zawiaw uh. ³ Remnak ih ṭemkhawm in Thlarau ih pumkhatnak kaihhngeh ding nasazetin zuam uh. ⁴ Kawh nan sinak ah ruahsannak pakhat ih kawh nan si bangin taksa pakhat, Thlarau pakhat a um, ⁵ Bawi pakhat, zumnak pakhat le baptisma pakhat a um ih, ⁶ ziangkim tlunih um, ziangkim fangsuaktu le nan zate sungih um, mi hmuahhmuah ih Pa le Pathian, pakhat lawng a um. ⁷ Sikhalsehla, Khrih ih thilpek tahdan bangtukin zangfahnak cu kanmah bulpak hnen cioah pek a si. ⁸ Curuangah hitin a sim, “Tlunsang ih a kaisoh ah khan kaihtang mipawl cu a hruai ih thilpek tla minung hnenah a pe,” tiah a ti. ⁹ “A kai so,” ti hi ziang a tinak a si? Lei hmun hnuai lam khalah a vung suk hmaisa tinak a si. ¹⁰ Thil hmuahhmuah a famkimter theinak dingah a sukthlatu kha van hmuahhmuah tlun khalih kai sotu thotho kha a si. ¹¹ Cule, anih in mi hrekkhat cu apostol sinak, mi hrekkhat cu profet sinak, mi hrekkhat cu evangelist sinak, mi hrekkhat cu pastor le zirhtu sinak thilpek tla a pe. ¹² Mithianghlimpawl tlamtlinternak dingah, rawngbawl hnaṭuannak dingah, Khrih taksa tuahṭhatnak dingah le, ¹³ kan zaten zumnak le Pathian Fapa theihnak ah kan lung a rual ih, Khrih ih famkimnak ruangam tahnak ah mipitling kan si tiang hrangah a pe a si. ¹⁴ Cuti cun, minungpawlih bumawknak le fim hrawkhrawlnak in minungpawl bum tahrat ih hruaipen tumtupawlih zirhnak thli hrang kipin khatlam le khatlamih a hranpet rero mi nauhak kan si nawn lo ding. ¹⁵ Cu hnakin, duhdawtnak in thutak cu sim in, lu a si mi Khrih ah ziangtinkimah kan ṭhanglian thei ding. ¹⁶ Amah Khrih hnen ihsin taksaruangpi zaten hmunkhat ah rem zetih pehzawmawin an kaikhawmaw. Taksa peng kipin anmai hna fingfing ṭha zetin an ṭuan ih, cutin hlikhlawk kipin taksaruangpi cu hmunkhat ah a kaikhawm ṭheh. Curuangah taksaruangpi cu duhdawtnak ah amah ten a ṭhang ih, a tuahṭhaaw. ¹⁷ Curuangah himi hi ka sim ih Bawipa ah ka theihter a si, ruahnaklungthin mumallo pu Zentel dangpawl nundan vekin nannih cu nung nawn hlah uh. ¹⁸ Cupawl cu an thinlung mit a cawt ruangah le anmah ih theihlonak um ruangah an theihthiamnak cu a thim ih, Pathian nunnak ihsin ṭhenhran in an um. ¹⁹ Cupawl cun zianghman pawisak nei loin anmai duhdan dan in an nung ih, thil bawrhhlawh tinkim duham zetih tuah dingin anmahte tenumza hursual tuahnak ah an peaw. ²⁰ Asinan Khrih thu zirh nan sidan cu cutivek a si lo. ²¹ Jesu ah thutak a um vekin nan hna in a thu nan rak thei ih amah ih zirh zo mi nan si ah cun, ²² bum caknak zulhih a se thluh mi nan hlanlai umdan minung hlun cu hlitthla uh. ²³ Cule nan khawruahnak thlarau tharter uh. ²⁴ Dingfelnak le thianhlimnak diktakih Pathian in amah vekih a sersiam minung thar cu hruk uh. ²⁵ Cuti a si ruangah thuphan sim cu bansan in, “Mi kipin amai inhnen thawn thudik rel seh.” Ziangahtile, kannih cu pakhat le pakhat taksa peng kan sitawn cio. ²⁶ ““Nan thinheng uh la, sual tuah hlah uh:” nan thinhengnak cu ni in tlakpi hlah seh. ²⁷ Diabol cu hmun kian fawn hlah uh. ²⁸ Rukruk hmang mi cun ru nawn hlah seh. Mitlasam hnenih pek ding a neih theinak dingah a kut in thil ṭha tuah in hna ṭuan sawn seh. ²⁹ Zohman in ṭawngsia nan kaa ihsin suakter hlah uh. Cu hnakin a theitupawl hnenih Pathian zangfahnak pe theitu ding, tuahṭhatawknak dingih hman ding thil ṭha suak sawn seh. ³⁰ Cun, Pathian Thlarau Thianghlim cu riahseter hlah uh, tlensalnak ni hrangah nannih cu cui Pathian Thlarau Thianghlim-ih tacikkhen nan si. ³¹ Siatkhatnak, thinhengnak, thinlingnak, aukionak, mirelsiatnakpawl hmuahhmuah cu nan hnen ihsin hlawnhlo uh, lungput siava hmuahhmuah thawn. ³² Cule, pakhat le pakhat parah ngilnei in lainatnak neitawn uh. Khrih ruangah Pathian in a lo ngaidam bangin pakhat le pakhat ngaidamawtawn uh.

¹ Curuangah, duhdawt zet mi fale vekin Pathian tidan cawngtu si uh. ² Cule, Khrih khalin in rak duhdaw ih rimhmui si dingah Pathian hnenah amah le amah thilhlan ah le thawiawknak ih a pekawk vekin duhdawtnak ah um uh. ³ Asinan, mithianghlim ih nan can zo vekin nu le pa sualnak le thianhlimlonak hmuahhmuah, asilole, duhhamnakpawl tla cu nan lakah um hrimhrim hlah seh. ⁴ Thil bawrhhlawhpawl, thu atthlak relnakpawl, capoh thu relnakpawl, cupawl cu a mawi lo a si. Cu hnakin lungawithu sim sawn uh. ⁵ Ziangahtile, nu le pa sualnak tuahtu si seh, mithianghlimlo si seh, miduhham si seh (cumi cu milem betu a si), hipawl in Khrih le Pathian uknak ram ah ro co zianghman an nei lo ti nan thei. ⁶ Zohman in zianghmanlo thu men in lo bum hlah hai seh. Ziangahtile, hi thilpawl ruangah Pathian thinhengnak cu thulung lo fatepawl parah a thleng ṭheu. ⁷ Curuangah an hnenih teltu va si hlah uh. ⁸ Ziangahtile, a hlanah nannih cu thim nan rak si dah, asinan atu ah cun Bawipa ah tleu nan si. Tleu fa vekin nung uh. ⁹ Ziangahtile, Thlarau rah cu ṭhatnak hmuahhmuah, dingfelnak hmuahhmuah le thutak hmuahhmuah pawl tla ah a um a si. ¹⁰ Bawipai cohlan tlak cu ziang a si ti theihfiang zuam uh. ¹¹ Cule, rah nei lo mi thim thilti a tuahtupawl thawn pawlkawmaw hlah uh la, an diklozia theifiangter sawn uh. ¹² Ziangahtile, annih ih a thuptei an tuah mi thilpawl cu rel men ding hman ningzahthlak a si. ¹³ Asinan thil ziangkim tleu ih a theihfiangter mipawl cu an langfiang a si. Ziangahtile, thil ziang khal langfiang ko a tuahtu cu tleu a si. ¹⁴ Curuangah, “Nang itthat ṭhang aw la, mithi lak ihsin tho aw. Cule Khrih in tleu a lo pe ding,” tiah a ti. ¹⁵ Curuangah miaapawl vekin nung loin, mifimpawl vekin fimkhurten nung uh. ¹⁶ Ni tla an ṭhat lo ruangah a ṭha theibik in nan can hmang uh. ¹⁷ Curuangah aa hlah uh la, Bawipai duhzawng cu ziang a si ti theithiam sawn uh. ¹⁸ Cun, sabitzu ri hlah uh, ziangahtile, cumi cun pawisaklonak ah mi a hruai. Cu hnakin Thlarau in khat sawn uh. ¹⁹ Thangṭhatnak hlapawl, Pathian hlapawl le thlarau lam hlapawl tlain beawtawn uh la, Bawipai hnenah hlasak le nan thinlung sungten hlaseh in um uh. ²⁰ Ziangtinkim ruangah Pa a si mi Pathian hnenah kan Bawipa Jesu Khrih hmin in lungawithu sim ringring uh. ²¹ Pathian nan ṭihzah ruangah pakhat le pakhat tlulutawtawn uh. ²² Nupipawl, Bawipai hnenih nan tlukluh vekin nanmai pasal hnenah tlulut uh. ²³ Ziangahtile, Khrih cu kawhhran lu a si bangin pasal cu nupi-ih lu a si ih, Khrih cu taksaruangpum Rundamtu a si. ²⁴ Curuangah kawhhran cu Khrih hnenih a tlukluh vekin nupipawl ziangkimah anmai pasal hnenah tlulut hai seh. ²⁵ Pasalpawl, Khrih khalin kawhhran a rak duhdaw ih, cu mi hrangih amah rori a pekawk bangin nan nupi duhdaw uh. ²⁶ Cutin, kawhhran cu ti thawi khawlh vekin thu hmang in Khrih cun a thianghlimter in a faiter a si. ²⁷ Cuti cun, kawhhran ropi cu bal kai lo, sawngkawr lo le cuvek thil zianghman pu loin amai hnenih a hlan theinak dingah, kawhhran cu thianghlim le sawihnawm ding um lo a si theinak dingah a khawlhfai a si. ²⁸ Curuangah mipapawl in an nupi cu anmai taksaruangpum vek roriih duhdaw ding an si. A nupi a duhdawtu cu amah le amah a duhdawaw a si. ²⁹ Ziangahtile, zohman in amai taksa a hua dah lo, Bawipa in kawhhran a cawm ih a duat bangin a cawm ih a duat sawn a si. ³⁰ Ziangahtile, kannih cu Khrih-ih taksaruangpum, a titsa le a ruhpawlih peng kan si. ³¹ “Ziangahtile, himi thu ruangah mipa in a nu le pa a fehsan ding ih, a nupi a kawp ding. Cule an pahnih in taksa pumkhat ah an cang ding,” tiah Cathianghlim in a ti. ³² Hihi thuthup ropi a si, sikhalsehla Khrih le kawhhran thuhla ka sim a si. ³³ Ziangkhal va si sehla, nanmah lakah Mi pakhatkhat in amah le amah a duhdawtawk bangin a nupi duhdaw seh, cun nupi khalin a pasal upat seh.

¹ Nauhakpawl, Bawipa ah nan nu le nan pa ih thu lung uh. Ziangahtile, cucu thil dik a si. ² “Na nu le na pa upat aw,” cumi cu thutiamkamnak thawi thupek hmaisabik a si. ³ “Cui thutiamkam cu na ṭhatnak ding le leitlun ih na dam reinak ding hrangah a si.” ⁴ Cun, nannih palepawl, nan falepawl thinheng dingin tuah hlah uh la, annih cu Bawipai nun zirhnak le nunsimnak ah kaihruai sawn uh. ⁵ Salpawl, Khrih-ih thu nan lun bangin, ṭih le khur in le thinlung takin, taksa lamih nan bawipawl hnenah thulung mi si uh. ⁶ An lo zoh lai lawngah an lungawiter tum loin, Khrih sal nan si vekin nan thinlung sung ihsin Pathian duhzawng tuah sawn uh. ⁷ Duhsaknak ṭha thawn minung hnenah si loin, Bawipai hnenih hnaṭuan vekin ṭuan uh; ⁸ sal si seh, miluat si seh zokhal thil ṭha a tuahtu cun Bawipai hnen ihsin cu mi vek cu a ngahsal ding ti nan thei. ⁹ Cun, nannih bawipawl, cutivek thothoin an parah tuah uh. Nannih ih Bawi khal van ah a um ti le anih in mithleidan a nei lo ti thei in annih cu hro hlah uh. ¹⁰ Ka u le nau tla, anetabikah, Bawipa ah le a cahnak ih thiltitheinak ah cun cak zetin um uh. ¹¹ Diabol-ih phiarthupnakpawl tla do in nan din theinak dingah Pathian ralthuam cu hruk uh. ¹² Ziangahtile, kan buan mi hi titsa le thisen an si lo, uktupawl, thuneitupawl, hi khawvel thim tlunih uktupawl le van hmunpawl tla ih thlarau sualralpawl tla an si sawn. ¹³ Curuangah, ni ṭha lo ni ih nan khamawk theinak dingah le ziangkim nan tuah hnu khalih nan din theinak dingah Pathian ralthuam cu la uh. ¹⁴ Curuangah dinghnget uh la, nan tai cu thutak in khap uh la, dingfelnak awmphaw hruh uh. ¹⁵ Cun, remnak thuthangṭha timlamnak cu nan ke ah bun uh. ¹⁶ Cupawl hmuahhmuah tlunah zumnak phaw cu la uh la, cumi cun miṭhalopai kah mi thalfung alh hmuahhmuah cu nan mit thei ding. ¹⁷ Cule, rundamnak thir lukhum le Thlarau ralnam a si mi Pathian thu cu la uh. ¹⁸ Thlacamnak tinkim le dilnak tinkim in ziangtik lai khalah Thlarau ah thla cam uh. Cun, mithianghlimpawl hmuahhmuah hrangah taimaknak hmuahhmuah le dilnak hmuahhmuah thawn ngaihven uh. ¹⁹ Cule, ka kaa ka an tikah, phuan ding mi thu cu ka hnenah pek a si ih, cutin ralṭha zetin thuthangṭha thuthup cu ka theihter theinak ding hrang khalah in dilsak uh. ²⁰ Kei cu thuthangṭha ruangah cikcin ih ṭawn mi palai ka si. Ka sim ding vekih ralṭha zetih ka sim theinak dingah thla in camsak uh. ²¹ Asinan, nannih khalin ziangtin ka um ti ka thuhla nan theih theinak dingah Bawipa ah duhdawt zet mi unau le rawngbawltu rinum Ṭaikhikas in thil ziangkim a lo theihter ding. ²² Himi hrangah kan thuhla tla nan theih theinak dingah le nan thinlung tla a lo thlangam theinak dingah amah hi nan hnenah ka rak thlah a si. ²³ Pa Pathian le Bawi Jesu Khrih hnen ihsin hnangamdaihnak le zumnak thawi duhdawtnak cu unaupawl hnenah um hram seh. ²⁴ Kan Bawipa Jesu Khrih catbang lo ih duhdaw taktaktu hmuahhmuah hnenah zangfahnak um hram seh. Amen