KOLOSE

KOLOSE

¹ Kei Paul, Pathian duhzawng ih Jesu Khrih-ih apostol le kan unaupa Timothy cun, ² Kolose khua ih um, Khrih ih mithianghlimpawl le mirinum unaupawl hnenah: Pathian kan Pa le Bawi Jesu Khrih hnen ihsin zangfahnak le hnangamdaihnak cu nan hnenah um seh. ³ Nan hrangih thla kan cam tinten, Pathian le kan Bawipa Jesu Khrih-ih Pa hnenah lungawithu kan sim ṭheu. ⁴ Khrih Jesu parih nan zumnak le mithianghlimpawl hmuahhmuah hnenih duhdawtnak nan neih mi kan theih ruangah lungawithu kan simnak a si. ⁵ Van ah nan hrangih ret mi ruahsannak ruangah cui zumnak le duhdawtnak cu nan nei. Cui ruahsannak cu thuthangṭha thutak thu ah khan nan rak thei zo. ⁶ Cui thuthangṭha cu nan rak ngaithlak le a takih Pathian zangfahnak nan rak theih ni cinin cui thuthangṭha cu leitlun pumpi ih a thlen vekin nan hnen khalah a thleng ve. Cule nanmah ih rah a suah bangtukin leitlun pumpi khalah rah a suah a si. ⁷ Cucu duhdawt mi kan siahhlawhpi, Epafras hnen khalih nan rak zir vekin anih cu nan hrangah Khrih rawngbawltu mirinum a si. ⁸ Anih cu Thlarau hnen ihsin nan ngah mi nan duhdawtnak thu kan hnenih thantu a si. ⁹ Himi ruangah nan thuhla kan theih ni thawkin thlarau lam fimnak hmuahhmuah le thlarau lam theihthiamnak hmuahhmuah thawn a duhzawng theihnak ih nan khah theinak dingah kannih khal nan hrangih thlacam kan bang lo. ¹⁰ Pathian nan theihnak cu a ṭhan ih hnaṭuan ṭha tinkim khalah nan ṭhan ih, ziangkimah Bawipai lungawi tlakih nan nun theinak ding hrangah thla ka cam ṭheu. ¹¹ Ziangvek can khalih thinsau le ziangvek can khalih hlim zetih mi dawrhtheinak nan neih theinak dingah a huham ropi zulhin thiltitheinak hmuahhmuah thawn a lo cakter a si. ¹² Tleu ah mithianghlimpawl ro conak ih ṭawm ve tlakih in tuahtu, Pa hnenah lungawithu kan sim a si. ¹³ Anih cun thim thuneihnak sung ihsin in runsuak ih, a duhdawt mi a Fapa-ih uknak sungah in ṭhawn zo. ¹⁴ Fapa ah cun a thisen zarah sualpawl ngaidamnak, tlensalnak kan nei. ¹⁵ Anih cu hmuh thei lo Pathian bangnak nei, sersiam mi hmuahhmuah lakah fatir a si. ¹⁶ Ziangahtile, amah in thil ziangkim a sersiam, van ih a um mipawl, lei ih a um mipawl, hmuhtheihpawl le hmuhtheihlopawl, laltohkhampawl simaw, lalnakpawl simaw, uktupawl simaw, thuneitupawl simaw khal amai siam an si. Thil hmuahhmuah hi amai hrangah amah in a sersiam. ¹⁷ Cule, anih cu thil hmuahhmuah hlanah a um ih, thil hmuahhmuah hi amah in hmunkhat ah a kaikhawm thluh. ¹⁸ Cun, amah cu taksaruangpi ih lu a si ih, taksaruangpi cu kawhhran hi a si. Anih cu bulhrampi a si ih, thil ziangkimah cungnungbik a si theinak dingah mithipawl lak ihsin fatir a si. ¹⁹ Ziangahtile, famkimnak hmuahhmuah a sungih a um ding cu Pa-ih lungawizawng a rak si. ²⁰ Cule, thil ziangkim leitlun ih thilpawl si seh, van ih thilpawl si seh amah thawn a remawkter theinak dingah a khraws thisen zarah remnak a rak tuah. ²¹ Cun, nannih cu thil ṭha lo tuahnak ruangah Pathian hnen ihsin ṭhen mi le nan ruahnaklungthin ah a ral nan rak si dah. ²² Asinan, atu ah cun thianghlim le sawihnawm ding um lo le mawhthluk ding um loin Pathian in amai hmaiih a lo hlan theinak dingah thihnak hmang in a Fapa taksa cun amah thawn a lo remawter zo a si. ²³ Hramhnget bun le fek zetih zumnak ih nan um peh vivo ih thuthangṭha ruahsannak ihsin nan ṭhawnhlo lo asile Pathian in amai hmaiah a lo hlan ding a si. Cumi cu hna ih nan rak theih mi thuthangṭha, van hnuaiih sersiam tinkim hnenih an phuan mi kha a si ih, kei, Paul hi cui thuthangṭha rawngbawltu ah ka cang. ²⁴ Atu ah nan hrangih ka tuarnakpawl ah ka lung a awi. Khrih-ih harsatnak baksam mipawl cu amai taksa a si mi kawhhran ruangah ka taksa ah ka silhkhat rero lai a si. ²⁵ Pathian thu tlamtlingter dingah Pathian in nan hrangah ṭuanvo ka hnenih i pek bangtukin kei cu kawhhran rawngbawltu ih tuah ka si. ²⁶ Thuthup, kum tampi le san tampi a rak thupaw mi cu atu ah a mithianghlimpawl hnenah langter a si. ²⁷ Cui thuthup ropi ih lenzia kha Zentelpawl lakah Pathian in mithianghlimpawl hnenah langter a duh, cucu nan sungih um mi Khrih, ropitnak ih ruahsannak a si. ²⁸ Mi kip Khrih Jesu ah famkim zetih kan hlan theinak dingah fimnak hmuahhmuah thawn mi kip nun sim in le zirh in amai thu kan phuang. ²⁹ Cu mi hrangah nasazetin hna ka ṭuan. Khrih-ih hnaṭuannak ka sungih cak zetih a ṭuandan zulhin nasazetin ka ṭang a si.

¹ Ziangahtile, nanmah le Laodisia khua ih umpawl le taksa ih ka hmel hmulotu hmuahhmuah hrangah ziang tlukin ṭan ka la ti hi nan theih ka duh. ² Cuti cun an thinlung cu thazang pek mi si in, duhdawtnak ah pehzawmaw in, cule theihthiamnakhnget famkimih lennak hmuahhmuah cu an nei ding ih, Pa le Khrih-ih ta a si mi Pathian thuthup cu an thei famkim ding. ³ Khrih ah cun fimnak le theihnak hlawnthil hmuahhmuah cu thuh in a um. ⁴ Cun, zohman in ṭawngkam thiamnak ih an lo bumlonak dingah hihi ka lo sim a si. ⁵ Ziangahtile, taksa in nan hnenah ka um lo nan, thlarau in nan hnenah ka um. Mawitei nan um le Khrih ih nan zumnak a hngehzia ka theih tikah ka lung a awi zet. ⁶ Curuangah Bawipa Khrih Jesu cu nan rak cohlan zo bangin, amah ah cun um ringring uh. ⁷ Amah ah hram bunaw in le sakṭhaaw in, zirh nan si zo bangin zumnak ah hnget zetin um uh la, luangliam in lungawithu sim uh. ⁸ Ralring uh, cu lo asile mi in Khrih zirhnak vek si lo, milai fimnak le bumawknak thulolak menmen, minung thurosiah le leitlun thu hramthawh zirhawknak hmang in rallak in an lo la pang ding. ⁹ Ziangahtile, Pathian famkimnak hmuahhmuah Khrih ah taksa in a um a si. ¹⁰ Cun, nannih cu amah ah nan famkim. Anih cu uktu hmuahhmuah le thuneitu hmuahhmuah ih lu a si. ¹¹ Khrih serhtannak ah cun tisa sualnakpawl hmuahhmuah tla cu hlit in, nannih khal amah ah cun kut thawi serhtan si lo serhtan mi nan si. ¹² Baptisma ah amah thawn phum in nan um ih, mi thi lak ihsin amah kaithotu Pathian-ih hnaṭuan zumnak ruangah amah thawn kaihthawh in nan um. ¹³ Cule, nan sualnakpawl le taksa ih serhtan lo nan sinak ih thi nan rak si laiah khan Khrih thawn hmunkhat ah a lo nungter ih, nan thil tisualpawl hmuahhmuah a lo ngaidam a si. ¹⁴ Kanmah dokalhtu le kan ral a si ṭheu mi, kut ih ngan mi thupekpawl cu phiathlo in, cumi cu la in khraws ah a khengbet. ¹⁵ Cule, uktupawl le thuneitupawl cu hnukthla in khraws hmang in cupawl cu a neh ih langsar zetin a mualphoter hai a si. ¹⁶ Curuangah, ei thu ah simaw, in thu ah simaw, ni serh thu ah simaw, thla thar thu ah simaw, Sabbath thu ah simaw zohman in thu lo ṭhen hlah hai seh. ¹⁷ Cupawl tla cu thil ra thleng ding mipawlih thlam a si, asinan a taktak cu Khrih-ih ta a si. ¹⁸ Hnuaidawrterawk le vancungmi biak duhtu in nan lawmman hloh dingin lo bum hlah seh. Cuvek mi cu a hmuh lo mi thilpawl sungah a hrawlhaw ih, a tisa ruahnaklungthin pu in zianghmanlo in a puarthau. ¹⁹ Cuvek mi cun lu cu a pawkhnget lo. Taksa hmuahhmuah ṭhannak cu Lu ihsin a si. Pathian ih a ṭhanterdan vekin taksa cu a ṭhang. Hlikhlawkpawl le thahripawl tlain taksaruangpi cu an cawmdawl ih hmunkhat ah an kaikhawm. ²⁰ Curuangah hi leitlun thuhramthawh zirhawknakpawl cu Khrih rualah nan thihsan zo. Cuvek mi si na cingin ziangruangah leitlun mipawl vek menih leitlun thupekpawl hnuaiih nan tlukluh: ²¹ “Tham hlah,” “Tep hlah,” “Kai hlah,” tipawl tla hi? ²² Cupawl hmuahhmuah cu hman phah ih cemral men ding an si. Ziangahtile, cupawl cu minung thupekpawl le zirhnakpawl parih ṭhumaw mi an si. ²³ Hi thilpawl tla cu fim hmelpu vekin an lang ih, cu mi ah cun phuahcawp biaknak, hnuaidawrawkternak le mai taksa hremawknak pawl tla an tel. Asinan, tisa cakhiarnak neh dingin huham an nei lo.

¹ Curuangah, Khrih thawi kaihthawh ih nan um zo a si ah cun, Pathian vawrh lam Khrih tonak ih um tlun lam thilpawl kha hawl uh. ² Leitlun thilpawl parah si loin, tlun lam thilpawl parah nan ruahnaklungthin cu ret uh. ³ Ziangahtile, nannih cu nan thi zo ih, nan nunnak cu Khrih hnenah Pathian ah thuh in a um a si. ⁴ Kan nunnak a si mi, Khrih a runglang tikah nannih khal amai hnenah ropiin nan lang ding. ⁵ Curuangah leitlun ih nan taksa peng um mi: nu le pa sualnak, thianhlimlonak, sup theih lo cakhiarnak, cakhiarnak ṭha lo, milem biak a si mi duhhamnakpawl tla cu that uh. ⁶ Ziangahtile, cui thilpawl ruangah Pathian thinhengnak cu thulung lo fatepawl parah a thleng a si. ⁷ Cui thilpawl ih nan um laiah cun, nannih khal cui thilpawl ah nan rak nung dah. ⁸ Asinan atu ah cun hi thilpawl hmuahhmuah: th inlingnak, thinhengnak, lungput siava, mi thangsiatnak, ṭawng bawrhhlawh nan kaa ihsi suak mipawl tla cu hlitthla uh. ⁹ Minung hlun cu a thiltipawl thawn nan hlihthlak zo ruangah pakhat le pakhat bumaw nawn hlah uh. ¹⁰ Cun, minung thar cu nan hruh zo a si. Cui minung thar cu amah sersiamtu bangnak cu keng in theihnak lamah tuah thar in a um. ¹¹ Cu mi ah cun Grikmi simaw, Jew-mi simaw, serhtan mi simaw, serhtan lo mi simaw, barbaros mi simaw, Sikithia mi simaw, sal simaw, miluat simaw a um lo. Cu hnakin, Khrih cu ziangkim si sawnin ziangkimah a um a si. ¹² Curuangah nannih cu Pathian hril mi, thianghlim le duhdawt mi vekin lainatnak, ngilneihnak, hnuaidawrnak, nunnemnak, mi dawrhtheinakpawl tla hruh uh. ¹³ Pakhat le pakhat zawiawtawn uh la, pakhat le pakhat ngaithiamawtawn uh. Mi pakhatkhat in midang hnenah pawntam ding a neih a si khal le Khrih hmanih a lo ngaidam bangin ngaidamaw ve uh. ¹⁴ Cule, hi mipawl hmuahhmuah tlunah duhdawtnak hruh uh, cucu famkim zetih a lo ṭawntu a si. ¹⁵ Cun, Pathian hnangamdaihnak in nan thinlung lo uk hram seh. Cu mi hrangah taksaruangpum pakhat ih kawh nan si, cun lungawi hna khal thiam uh. ¹⁶ Khrih thu cu fimnak hmuahhmuah thawn nanmah ah khatliam seh. Pakhat le pakhat thangṭhatnak hlapawl, Pathian hlapawl, thlarau lam hlapawl in zirhaw uh la, nun khihhmuhaw uh. Bawipai hnenah nan thinlung sungin zangfahnak thawn hla sak uh. ¹⁷ Cule, nan tuah mi pohpoh cu ṭawngkam in simaw, tuahnak in simaw, Bawipa Jesu hmin in tuah uh la, Pathian le Pa hnenah amai zarah lungawithu sim uh. ¹⁸ Nupipawl, thil awm a si vekin Bawipa ah nanmai pasal hnenah tlulut uh. ¹⁹ Pasalpawl, nan nupi duhdaw uh la, an parah siakha hlah uh. ²⁰ Falepawl, Bawipai lungawi zawng a si ruangah ziangkimah nan nu le nan pa ih thu lung uh. ²¹ Palepawl, nan faletla thinhengter hlah uh. Cu lo asile an bei a dawng pang ding. ²² Salpawl, ziangkimah taksa lamih nan bawipawlih thu lung uh. An lo zoh lai lawngah an lungawiter tum loin, thinlung takin le Pathian ṭih sawnin an thu lung uh. ²³ Cun, ziangkhal nan tuah asile milai hnenih tuah vekin si loin, Bawipai hnenih tuah vekin nan thinlung zaten tuah uh. ²⁴ Bawipai hnen ihta ro co ding mi cu lawmman ah nan co ding ti nan theih ruangah cuvekin tuah uh. Ziangahtile, Bawi Khrih rian nan si si. ²⁵ Sikhalsehla, thil a tuahsualtu cun cui a thil tuahsual mi man cu a ngah ding. Pathian cun mi thleidan a nei si lo.

¹ Bawiletla, nannih khalin van ah Bawi nan nei ve ti thei in nan salpawl hnenah a dik mi le a bangran mi pe uh. ² Catbang loin nasazetin thla cam uh la, lungawithu sim phahin ngaihven uh. ³ Khrih thuthup sim dingin Pathian in sangka in awnsak theinak dingah kan hrang khalah thla in camsak uh. Cui thuthup ruangah cikcin ih ṭawn ka si. ⁴ Cui thuthup cu ka sim ding vekih ka simsuak theinak dingah thla cam uh. ⁵ Leng lam mipawl hnenah fim zetin um uh la, a ṭha theibik in nan can hmang uh. ⁶ Mi tin hnenah ziangtiih san ding a si ti nan theih theinak dingah nan ṭawngkam cu ci thawi alter mi rawl vekin, zangfahnak tel mi si ringring seh. ⁷ Ka thuhla hmuahhmuah cu Ṭaikhikas in a lo sim ding. Amah cu Bawipa ah duhdawt mi unau, rawngbawltu rinum le siahhlawhpi a si. ⁸ Himi tumtahnak rori hrangah nan hnenah amah cu ka rak thlah a si. Cuti cun nan thuhla a thei thei ding ih nan thinlung tla a lo thlangam thei ding. ⁹ Nan lakih mi pakhat, mirinum le duhdawt mi unaupa Onesimas thawn ka rak thlah a si. Annih in hi tawkih thil cang mi hmuahhmuah an lo sim thei ding. ¹⁰ Ka thawngtlakpi Aristarkhas khalin cibai a lo buk. Cun, Barnabas-ih tupa Mark khalin cibai a lo buk. Amai thuhla ah thupekpawl tla nan rak dawn zo kha: nan hnenih a rat asile rak cohlang uh. ¹¹ Cule, Jasṭas an ti mi Jesu khalin cibai a lo buk. Annihpawl hi serhtan mi an si. Annihpawl lawng hi Jewmi Pathian uknak hrangih ka hnaṭuanpi umsun le ka hna in ngamtertu an si. ¹² Epafras, nan lakih mi, Khrih ih ṭemṭawn hin cibai a lo buk. Pathian duhzawng tinkim ah nan khah theinak dingah le famkim ih nan din theinak dingah nan hrangah ṭhahnemngai zetin thlacamnak thawn nasazetin ṭan a la. ¹³ Ziangahtile, anih cu nanmai hrangah le Laodisia khua ih umpawl le Hierapolis khua ih umpawl hrangah a tha a tho zet ti theihpitu ka si. ¹⁴ Duhdawt mi sibawi Luke le Demas in cibai an lo buk. ¹⁵ Laodisia khua ih unaupawl le Nimfas le cu pai inn ih kawhhranpawl kha cibai in buksak uh. ¹⁶ Cun, hi cakuat hi nan lakih siar a si hnuah Laodisia kawhhran mipawl lak khalah siarter ve uh. Cuvek thothoin nannih khalin Laodisia khua ih ka cakuat mi kha rak siar ve uh. ¹⁷ Cule, Arkhippas hnenah khan, “Bawipa ah na cohlan mi rawngbawlnak hlensuak dingin fimkhur aw,” tiah sim aw. ¹⁸ Hi cibaibuknak hi keimah Paul in ka kut roriih ka ngan mi a si. Cikcin ih ṭawn ka si hi mang ringring uh. Zangfahnak nan hnenah um seh. Amen.