LEHNAK TE

LEHNAK TE

¹ Aw Theofilas, Jesu in tuah ding le zirh dingih a rak thawk zo mi hmuahhmuah, ² tlun lamih laksoh a si ni tiangih Jesui tuah mi kha na hrangah ka ca hmaisa sungah khan ka rak ngan. A hril cia zo mi apostolpawl cu Thlarau Thianghlim hmang in thu a pe. ³ A tuar hnuah cui a hril mipawl hnenah amah rori a phuanglangaw ih a nung rori a si ti nemhngehnak tampi pe in ni sawmli sung an hnenah a lang. Pathian uknak thu thawi pehparaw mi tla a sim. ⁴ Cule hmunkhat ih an tawnkhawmawknak ah tel in, an hnenah, Jerusalem suahsan lo dingin, Pai thutiam mi hngak sawn dingin thu a pe hai. “ ‘Cucu,’ ka hnen ihsin nan rak thei zo,” tiah a ti. ⁵ Ziangahtile, John cun ti ah baptisma a pe taktak ko, asinan, atu ihsin ni reilo teah Thlarau Thianghlim ah baptisma pek nan si ding,” tiah a ti. ⁶ Curuangah, hmunkhat ih an tawnkhawmawk ṭumah dungthluntupawl in, “Bawipa, tui canah hin Israel-mi hnenah uknak cu na din tharsal ding maw?” tiah an sut. ⁷ An hnenah, “Acui tikcucan le ni cu Pa in amai thuneihnak in a khiah mi a si ih, nannih ih theih ding a si lo. ⁸ Asinan Thlarau Thianghlim nan parih a rung thlen tikah huham nan ngah ding. Cule Jerusalem khua ah, Judia ram hmuahhmuah ah, Samaria ram hmuahhmuah ah le leilung tlun deng tiangin ka thutheitu nan si ding,” tiah a ti. ⁹ Cule, hi thupawl a sim hnuah an zoh laiah laksoh a si ih, mero in a tuam ih an hmu thei nawn lo. ¹⁰ A kaisoh laiah le van lam zoh cuahco ih an um laiah, ngai hnik, mi pahnih puan var sin in an kiangah an rung ding. ¹¹ Cule, “Galili mipawl, ziangah hi tawkah van lam zoh cuahco ih nan um? Nan hnen ihsin van ih a laksoh mi, hi Jesu rori hi atu van ih a kaisoh lai nan hmuh vekin a rakirsal ding,” tiah an ti. ¹² Cule Olif Tlang an ti mi ihsin Jerusalem khua ah an kir. Cui tlang cu Jerusalem khaw kiang teah a si ih, Sabbath Ni ih feh sian zat fang a si. ¹³ Cule inn ah an lut ih, Peter, James, John, Andru, Filip, Thomas, Bartholomeo, Mathai, Alfia fapa James, Zilot an ti mi pa Simon, James-ih fapa Judas pawl tla cu an umnak hmun tlunta pindan ah an hung kai. ¹⁴ Cui mipapawl hmuahhmuah cu lungrualtein catbang lo ih thla cam le midang hrang dilsak in an um. Nunau hrekkhatpawl, Jesui nu Mary le Jesui naupalepawl khal an tel. ¹⁵ Cule cui canah cun Peter cu dungthluntupawl lakah a hung ding. Mipi cu an zatein za le kul hrawng an si. ¹⁶ Peter in, “U le nau pawl, Thlarau Thianghlim in David kaa ihsin hlanih a rak sim cia mi Jesu kaitupawl hruaitu Judas-ih thuhla Cathianghlim ih a sim cia mi cu a kim tengteng a ṭul a si. ¹⁷ Ziangahtile, anih cu kan lakih tel ve mi pakhat a si ih, himi rawngbawlnak ah covo a nei ve. ¹⁸ “Hi pa hin a thilsual tuah mi man ih a ngah mi in lo a lei ih, cu tawkah cun a linglet in a tla. A laifangin a kekkuai ih a sungrilpawl hmuahhmuah an pawt thluh. ¹⁹ Jerusalem ih um mi hmuahhmuah in hi thu cu an thei ṭheh. Curuangah anmai ṭawng in cui lo cu Akeldama tiah an ti. A sullam cu, ‘Thisen lo,’ tinak a si. ²⁰ “Ziangahtile, Sam cazual sungah, ‘A inn cu tanta si seh. A sungah zohman um hlah hai seh,’ tile, ‘Midang in a dinhmun cu la hai seh,’ tiin ngan a si. ²¹ “Curuangah kan hnenih um mi lak ihsin mi pakhat kan hril a ṭul a si. Cu pa cu Bawi Jesu kan lakah suak le lut ih a um sung hmuahhmuah ih kan hnenih um ringring vetu a si pei. ²² John in Jesu baptisma a pek ihsin Jesu kan hnen ihsin laksoh a si ni tiang kan hnenih um mi a si pei. Jesu thawhsalnak theihpitu mi pakhat cu kan ruat tengteng a ṭul,” tiah a ti. ²³ Cule mi pahnih an hril. Pakhat cu Barsabas tiih an kawh mi Joseph, Justus ti tlain an ko, a dang pakhat cu Mathias a si. ²⁴ Cule, “Bawipa, nang cu mi kip thinlung na thei, himi pahnih lakah zo deuh na hril ti in hmuh aw. ²⁵ Judas cun hi rawngbawlnak le apostolpawlih hna cu tluksan in amai cemnetnak panin a feh,” tiah thla an cam. ²⁶ Cule an pahnih hrangah camcawhfung an zuk ih, cui fung cu Mathias parah a tla. Cule amah cu apostol hleikhatpawl lakah an bet.

¹ Pentikos ni a thlen tikah an zaten hmunkhat ah lungrualtein an umkhawm. ² Hmakhatteah vancung ihsin thlipi nasazet hrang vek awn thawm a rung thleng ih, an tokhawmnak inn a khat ṭheh. ³ Cule meisa alh vek a si mi, a ṭhenaw mi lei tla cu an hnenah a lang ih, pakhat cio parah a ṭhumaw. ⁴ Cule an zaten Thlarau Thianghlim in an khat ih, Thlarau in ṭawng phun dangdang ih ṭawng theinak a pek vekin ṭawng an thawk. ⁵ Jerusalem ah vanrang hnuaiih miphun zakip lak ihsin a ra mi sakhaw mi Jew-pawl an um laifang a si. ⁶ Cui thawmvang an theih tikah mipi an rakhawm. A ra mipawl in an ṭawng mi cu anmai ṭawng ciarih ṭawng in an theih ruangah an thinlung a buai. ⁷ Cui thil cang mi ruangah an zaten khawruahhar le mangbang zetin an um ih, pakhat le pakhat, “Zoh hnik, a ṭawng rerotupawl hi Galili mi an si thluh ko lo maw? ⁸ Ziangtin saw kanmai suahkeh ṭawng cioih kan theih? ⁹ Kannih cu Parthian ram, Media ram, Elam ram le Mesopotamia ram ih umpawl, Judia ram le Kappadosia ram, Ponṭas ram le Asia ram, ¹⁰ Frizia ram le Pamfilia ram, Izip ram le Libia ram sung Sairin khaw kiang ihsin a ra mi, Rom khua ihsin a ra mi Jew-mi le an biaknak ih a lut mipawl, ¹¹ Krit tikulh mi le Arabia ram mi tla kan si. Pathian-ih thilmak tuah mipawl an sim tikah kanmai ṭawng cioih kan rak theih,” tiah an tiaw. ¹² An zaten cui thil cang mi ah cun an mang a bang zet ih, an thinlung a buai. Pakhat le pakhat, “Hihi a sullam ziang a si pei?” tiah an sutaw. ¹³ Asinan midangpawl cun hnihsan phahin, “Hipawl hi sabitzu thar in an ri a si hi,” tiah an ti. ¹⁴ Cule, Peter cu apostol hleikhatpawl zawngah a hung ding ih, aw ring zetin thu a sim ih an hnenah hitin a ti, “Nannih Jew-pawl le Jerusalem khaw sungih a um mipawl hmuahhmuah hihi nan theih ding ka duh. Ka ṭawng ngai hnik uh. ¹⁵ Atu hi zing nazi pakua lawng a si lai ih, nan ruah vekin hipawl hi an ri lo. ¹⁶ Cu hnakin, hihi profet Joel in a rak sim cia: ¹⁷ ‘Pathian in, ni netabik canah cun hi thilpawl hi a cang ding, mi hmuahhmuah parah ka Thlarau ka burh ding. Nan fapapawl le nan fanupawl cun profetpawl vekin thu an phuang ding. Nan minopawl in larnak an hmu ding. Nan patarpawl in mang an man ding. ¹⁸ Ka siahhlawh mipapawl le ka siahhlawh nunaupawl tlun khalah cui ni tla ah cun ka Thlarau ka burh ding ih, profetpawl vekin thu an phuang ding. ¹⁹ Tlunvan ah, mangbangza tuah mipawl le thuai lam lei parah hminsinnak tuah mipawl ka hmuh ding. Cui hminsinnakpawl tla cu thisen, meisa le meikhu sah zet pawl tla an si ding. ²⁰ BAWIPAI ni ropi le ni ṭihnung a thlen hlanah ni khi thim ah le thla khi thisen ah a cang ding. ²¹ Cule hitin a cang ding, mi zokhal BAWIPAI hmin a kotu hmuahhmuah rundam an si ding,’ tiin a sim. ²² “Israel-mipawl, hihi ngaithla hnik uh, Pathian in Nazareth Jesu cu nan hnenah thilmakpawl, mangbangzapawl le hminsinnakpawl amah Jesu hmang ih Pathian-ih a tuah mipawl in nanmah roriih nan theih vek khan a nemhnget a si. ²³ Pathian khawkhan cia vek le ziang a cang ding ti a theih cianak vekin, Pathian in Jesu cu nan hnenah a lo pe a si. Nannih in dan nei lopawl kut in nan kai ih nan khengbet ih, nan that a si. ²⁴ Asinan Pathian in thihnakih tuarharnak cu a cemter ih, a thotersal zo. Ziangahtile, a parah thihnak in kaihtan theinak huham a nei lo. ²⁵ Ziangahtile, amah thawi pehparawin David in hitin a sim, “‘Ka hmaiah BAWIPA ka hmu ringring. Ka vawrh lamih a um ruangah, zianghman in i hninter lo ding. ²⁶ Curuangah, ka thinlung a aipuang ih ka lei cu a hlim zet. Ka taksa khal ruahsannak thawn a cawl ding. ²⁷ Ziangahtile, ka thlarau cu Mithikhua ah na tanta lo ding ih, na Mi Thianghlim Pa cu ṭawihral khal na siang lo ding. ²⁸ Nang cun nunnak lamzin i hmuh zo. Ziangahtile, nang cu ka hnenah na um ih lungawinak thawn i khatter ding,’ tiah a ti. ²⁹ “Ka u le ka nau pawl, pareng David a thih thu le an phum thu ralṭha zetin ka lo sim thei a si. Tuini tiang a thlan cu kan hnenah a um. ³⁰ David cu profet a si ih, Pathian in a hnenah thutiamkam a tuah ti a thei. Pathian in a tesinfa lakih mi pakhat a thoter ding ih a tohkham ah a to ding tin sia a sam. Amah cu Khrih a si. ³¹ Khrih thawhsalnak thu cu David in a rak hmu cia ih, a rak sim cia, ‘Pathian in a thlarau cu Mithikhua ah a tanta lo. A taksa khal a ṭawihral lo,’ tiah a ti. ³² Cui Jesu cu Pathian in a thoter a si ti cu kan zate hin a theihpitu kan si. ³³ Curuangah Pathian in Jesu cu a cawisang ih a vawrh lamah a ret. Cule Pa in a tiamkam mi Thlarau Thianghlim cu a hnenah a pe. Curuangah atu ih nan hmuh le nan theih mi hi Jesui burh mi a si. ³⁴ “Ziangahtile, David cu vancung ah a hung kai lo. Asinan David in hitin a ti: ‘BAWIPA in ka Bawipai hnenah, “Ka vawrh lam kapah to aw. ³⁵ Na ralpawl na kepal ih ka canter hlanlo kha tawkah to aw,” ’ tiah a ti. ³⁶ “Curuangah Israel-mi hmuahhmuah in hihi fiangfaiten thei uh, nan khenthat mi Jesu kha Pathian in Lal le Khrih ah a tuah zo a si,” tiah a ti. ³⁷ Mipi in cui thu an theih tikah, an thin a sun na tuk ih, Peter le apostol dangpawl hnenah, “Unaulenuh, ziang so kan tuah ding?” tiah an ti. ³⁸ Cule Peter in, “Nan sualpawl tla ngaidam a si theinak dingah nan sual sir uh, cule nan zaten Jesu Khrih hmin in baptisma co uh, cule Thlarau Thianghlim thilpek nan co ding. ³⁹ Ziangruangah tile thutiamkam cu nanmah, nan fate le hlapi ih a um mipawl hrang khalah a si. Bawipa kan Pathian ih a kawh ding mipawl hmuahhmuah hrang khalah a si,” tiah a ti. ⁴⁰ Ṭawngkam phun dangdangin Peter cun thurawn a pe hai ih an hnenah, “Tulai misualralpawl lak ihsin thiarfihlimaw uh,” tiah a fawrh hai. ⁴¹ Cule lungawi zetih Peter-ih thu a rak cohlangtupawl in baptisma an co ih, cui ni ah mi thawngthum hrawngin an hnenah an ra bet. ⁴² Cule apostolpawlih zirhnak ah le pawlkawmawknak ah, sang phel le thla cam in fekten an umpeh vivo. ⁴³ Mi hmuahhmuah in Pathian an ṭihzah ih, apostolpawl in mangbangza le hminsinnak tampi tla an tuah. ⁴⁴ Zumtupawl hmuahhmuah cu hmunkhat ah an umkhawm ih, ziangkim an neih mi an ṭawmaw. ⁴⁵ Cule thilpawl le an thil neih mipawl cu an zuar ih an ṭuldan cio vekin an zuar man sum cu an zaten an zemaw. ⁴⁶ Ni tin lungrualten temple kulh sungah an tawngkhawmaw. Inn khat hnu inn khat ah sang an phel ih, lungawi le tangdawrnak thinlung thawn rawl an eikhawm. ⁴⁷ Pathian an thangṭhat ih, mi hmuahhmuah hnenin mithmaiṭha an ngah. Cule ni tinten Bawipa in rundam mipawl cu kawhhran ah a bet vivo.

¹ Nikhat cu Peter le John cu thlacam tikcu tlai lam nazi pathum ah temple kulh sungah an feh. ² A suahkeh ihsin a ke a bai mi pa pakhat cu Mawi ti ih an kawh mi temple kulh kawtka ah bawmnak thilpek dil dingah ni tin an ret. Temple kulh sungih lutpawl hnenah bawmnak thilpek a dil. ³ Peter le John temple kulh sungih an luh zik kha a hmuh tikah bawmnak thilpek a dil hai. ⁴ Cu tikah, Peter cun John thawn cu pa cu mit ṭhep loin ṭhaten a zoh ih, “In zoh hnik,” tiah a ti. ⁵ Cule, an hnenih thil pakhatkhat ngah ding beisei in, ṭha zetin a zoh hai. ⁶ Cule Peter in, “Sui le ngun ka nei lo. Asinan ka neih mi ka lo pe, Nazareth Jesu Khrih hmin in ding aw la, feh aw,” tiah a ti. ⁷ Cule Peter cun cu pai vawrh lam kut in a kai ih, a dingter. Hmakhatteah cu pai ke le a kemit ruhpawl a cak. ⁸ A hung tho ih a ke in a ding ih a feh. Cutin feh phah, khir phahin Pathian a thangṭhat ih, anmai zawngah temple kulh sungah a lut. ⁹ Cutiih feh phahih Pathian a thangṭhat cu mi hmuahhmuah in an hmu. ¹⁰ Mawi ti ih an kawh mi temple kulh kawtka ih to i bawmnak thilpek diltu a si ti kha an theih tikah a parih thil cang mi ruangah an mang a bang ih an khawruah a har ngaingai. ¹¹ An damter mi kebaipa cu Peter le John hnenih a um ringring kha an hmuh tikah mi hmuahhmuah cu an mang a bang zet ih, Solomon hulhliap an ti mi ah, an hnenah an ra tlankhawm. ¹² Cumi cu Peter in a hmuh tikah an hnenah, “Israel-mipawl, ziangruangah himi ah nan mang a bang ih, kanmah riangri mit ṭhep lo ih in zoh? Kanmai huham le kanmai Pathian ngaihsaknak ih hi pa fehter ah maw nan ruat? ¹³ Abraham, Isak le Jakob ih Pathian, kan pupapawlih Pathian cun a Siahhlawh Jesu cu a sunlawih zo a si. Anih cu Pilat in suah dingih thu a relcatsak cia zo mi, mipi hnenih nan pek mi pa, Pilat hmai roriah nan rak hnawn mi pa kha a si. ¹⁴ Mi Thianghlim Pa le Mi Dingfel cu nan rak hnawng ih, tualthatpa nan hnenih suah dingin nan dil. ¹⁵ Cule nunnakih Hrampi cu nan that. Asinan Pathian in anih cu mithi lak ihsin a thotersal zo ih, cui thu a theihpitu cu kanmah hi kan si. ¹⁶ Nan hmuh le nan theih mi hi kebaipa hin Jesui hmin ah zumnak a nei ih cahter a si. Jesui hmin a zumnak in nan zate hmaiah a dam pumhlum a si. ¹⁷ “Atu ah, ka u le ka nau tla, nan hruaitupawl khalin thutak theilo piin cui thilpawl cu an rak tuah vekin nannih khalin nan tuah a si ti ka thei. ¹⁸ Asinan, cui thilpawl cu Pathian in a profetpawl hmuahhmuah ih kaa in Khrih in a tuar ding tiih than cia zo mi cu Jesu in a tlamtlinter thluh zo. ¹⁹ Curuangah Bawipai hnen ihsin thawsuah can a thlen theinak dingah le nan sualpawl tla a thaihloh theinak ding hrangah nan sual sir uh la Pathian lamah hawikir uh, ²⁰ cule a hlanih nan hnenih an rak sim zo mi Khrih Jesu cu nan hnenih a run thlah theinak ding hrang khalah a si. ²¹ Pathian ih thil ziangkim a rem thar can a thlen hlanlo, Jesu cu van ah a um ding ti mi cu Pathian in profet thianghlim hmuahhmuah pawlih kaa in leilung um thawk ihsin a rak tiamkam cia zo. ²² Mawsi in kan pupapawl hnenah a sim taktak ruangah cucu ka sim a si, ‘BAWIPA nan Pathian in keimah vek Profet pakhat nan unaupawl lak ihsin nan hrangah ka suakter ding. Nan hnenih a sim mi hmuahhmuah ngaithla uh. ²³ Cule hitin a cang ding, zokhal cui Profet thu a ngaithlalotu cu a miphun ihsin sahthlak a si ding,’ tiah a ti. ²⁴ “Thungaiin, profet Samuel ihsin cu mi hnuih a ra mi profet thusimtu hmuahhmuah in tui san thupawl hi an rak sim cia. ²⁵ Nannih cu profetpawlih fatepawl le Pathian in kan pupapawl hnenih a tuah mi thuthlung ro cotu nan si. Abraham hnenah, ‘Na tesinfa ihsin leitlun mi hmuahhmuah thlawsuah an si ding,’ tiah a sim. ²⁶ Mi zokhal a ṭhatlonak ihsin hawikirsalnak thlawsuah a pek theinak dingah, Pathian in a Siahhlawh Jesu a thawhter hnuah, a hmaisabikah nan hnenah a thlah a si,” tiah a ti.

¹ Mipi hnenih thu an sim rero laiah puithiampawl, temple kiltu bawi le Sadusipawl cu an hnenah an ra thleng. ² Apostolpawl in Jesu thawngin mithi thawhsalnak a um ding ti an zirh le an than ruangah hruaitupawl cu an thin a buai. ³ Cule Peter le John cu an kai ih, khua a tlai zo ruangah thawnginn ah a thaisun tiang an thlak. ⁴ Asinan an thusim theitu mi tampi in an zum. Patling hlir thawngnga hrawng an si. ⁵ Cule hiti hi a rak si, a thaisun ah hruaitupawl, miupapawl le Danzirhtupawl Jerusalem ah an tawngkhawmaw. ⁶ Cu tawkah cun puithiam lubik Annas le Kaiafas le John le Alexander le puithiam lubikih sungkhat dangpawl khal an um. ⁷ Peter le John cu an hruai ih an laiah an ret ih, “Ziang huham in asilole ziang hmin in hihi nan tuah?” tiah an sut. ⁸ Cule Peter cu Thlarau Thianghlim in a khat ih, anih in an hnenah, “Mipi hruaitupawl le Israel upapawl, ⁹ midamlopa parih zangfah thilti kan tuah mi thu ah tuisun ah ziangtin kan damter ti, in sut asile, ¹⁰ nan zaten hihi thei uh, Israel mipi hmuahhmuah khalin thei uh. Nan khenbet mi, Pathian in mithi lak ihsin a kaihthawh mi, Nazareth Jesu Khrih hmin in hi pa cu damngah ververin nan hmaiah a ding a si. ¹¹ Cui Jesu cu, nannih inn saktupawl ih nan hnawn mi lungto, a kilih a pawimawhbik ih ra cang mi a si. ¹² Rundamnak cu zo dang hnen hmanah a um lo. Ziangahtile, vanrang hnuaiih minung lakah rundam kan si theinak dingah hmin pek mi dang a um lo,” tiah a ti. ¹³ Peter le John ih ralṭhatzia an hmu ih, tlawngkai lo le zirnak nei lo an si ti an theih tikah an mang a bang zet. Annih cu Jesu thawi rak um dah rero mi an si ti an thei. ¹⁴ Cule Peter le John ih damter mi pa cu an hnenah a din kha an hmu ih dodalnak zianghman an ṭawng thei lo. ¹⁵ Cule Sanhedrin thuṭhennak ihsin suak dingin thu an pe ih, anmahte lawng thu an rel, ¹⁶ “Hipawl hi ziangtin kan tuah pei? Anmah hmang ih hminsin tlak thilmak tuah mi cu Jerusalem khaw sungih a um mi hmuahhmuah hnenah a feng tuk zo ruangah kan el thei lo. ¹⁷ Asinan hi thu mipi hnenih a karhzailonak dingah Jesui hmin in zo hnen hmanah thu sim nawn lo dingin nasazetin kan hro pei,” tiah an ti. ¹⁸ Cule an kokirsal hai ih Jesui hmin in thu simsal le thu zirhsal nawn hrimhrim lo dingin thu an pe. ¹⁹ Asinan Peter le John in an sang ih an hnenah, “Nanmai thulun maw, Pathian thulun so, Pathian hmaiah dik sawn ti hi nanmah in ṭhen hnik uh. ²⁰ Ziangahtile, kan hmuh mi le kan theih mi cu sim loin kan um thei lo a si,” tiah an ti. ²¹ Cule an hrobet ih an thlah. Mi hmuahhmuah in Pathian ih thiltuah mi ruangah Pathian cu an thangṭhat. Curuangah anmah hrem theinak lamzin an hmu thei lo. ²² Ziangruangah tile himi damnak hminsinnak an tuahsak mi pa cu kum sawmli tlun mi a si. ²³ Peter le John cu thlah an si tikah an rualpipawl hnenah an feh ih, puithiam sangpawl le miupapawl ih an sim mi thupawl cu an va sim. ²⁴ Cui thu an theih tikah Pathian hnenah aw suah in lungrualten, “Maw Bawipa, nang cu lei le van le tifinriat le a sungih um mi hmuahhmuah a tuahtu Pathian na si. ²⁵ Na siahhlawh David-ih kaa in nang cun thu na sim. “ ‘Ziangah so Zentelmipawl hi an thinheng ih, milaipawl hin a ṭhahnem lo mi phiarsawmnak an tuah? ²⁶ BAWIPA le Khrih dokalh dingin lei siangpahrangpawl an ding ih, hruaitupawl hmunkhat ah an pumkhawmaw,’ tiah na rak ti. ²⁷ “Ziangahtile, hriak na thih mi na Siahhlawh thianghlim Jesu dokalh dingah Herod le Ponṭias Pilat cu Zentelmipawl le Israelmipawl thawn an pumkhawmaw ngaingai. ²⁸ Na kut cak le na remruahnak in cangsuak leh dingih na rak khiah cia mi kimter dingah a si. ²⁹ Atu ah, Bawipa, zoh hnik, an mi hro reronak hi hminsin aw, na siahhlawhlepawl in ralṭha zetih na thu an sim theinak dingah bawm hai hram aw. ³⁰ Na Siahhlawh thianghlim Jesu hmin in mi damter dingah le hminsinnakpawl le mangbangzapawl tuah dingah na kut pharh hram aw,” tiah thla an cam. ³¹ Nasazetih thla an cam ṭheh tikah an umkhawmnak hmun cu a hnin. Cule Thlarau Thianghlim in an zaten an khat ih ralṭha zetin Pathian thu an sim. ³² A zumtu mipipawl cu an zaten thinlung le ruahnak hmunkhatten an um. Zohman in an neih mi thil kha ka bul ta a si ti loin an neih mi hmuahhmuah an ṭawmaw. ³³ Huham nasazet thawn apostolpawl cun Bawi Jesui thawhsalnak thu cu an theihter ih an zate parah zangfahnak nasazetin a um. ³⁴ An lakah zohman a tlasam mi an um lo. Ziangahtile, lo neitu le inn neitu pawl in an ram le an inn pawl cu an zuar ih an ngah mi tangka cu an rak keng. ³⁵ Apostolpawlih ke hramah an ret. Cule cui tangka cu mi kip an ṭuldan vek cioin apostolpawl in an zem. ³⁶ Saipras tikulh ih a um mi Levi miphun Joses cu a ra. Apostolpawl in amah cu Barnabas tiah hmin an sak. A tican cu ‘Thazang mi petu’ tinak a si. ³⁷ A neih mi a lo a zuar ih, a tangka cu keng in apostolpawlih ke hramah a ret.

¹ Mi pakhat Ananias an ti mi pa in a nupi Safira thawn an neih mi thil kha an zuar. ² A nupi ih theihpinak thawn a lo man hrekkhat cu a sup ih, a hrekkhat lawng keng in apostolpawlih ke hramah a ret. ³ Asinan Peter in, “Ananias, Thlarau Thianghlim hnenah thuphanper ding le na lo man hrekkhat sup dingin ziangah Setan in na thinlung a lo luah khah? ⁴ Na lo na zuar hlanah, na lo cu na ta a si lo maw? Na zuar hnu khalah, a man cu nangmai thuneihnak hnuaiah a um thotho a si lo maw? Ziangruangah hitivekih ti dingin na thinlung sung ihsin na tum? Milai hnenah thuphan na per a si lo ih, Pathian hnenah thuphan na sim a si,” tiah a ti. ⁵ Cui thu cu Ananias in a theih tikah a tlu ih a thi. Cule cui thu a theitu hmuahhmuah in ṭihnak nasazet an nei. ⁶ Cun, tlangvalpawl an ding ih Ananias-ih ruang cu an tuam, lengah an zawnsuak ih an phum. ⁷ Cui hnu nazi pathum hrawng reiah ziang thil a cang ti thei loin a nupi cu tawnkhawmawknak hmun ah cun a ra lut. ⁸ Peter in a hnenah, “Hi zat hi nan loram nan zuar man zate a si maw?” tiah a sut. A zoh ih, “A si, kan loram man zate a si,” tiah a ti. ⁹ Cu tikah Peter in a hnenah, “Bawipai Thlarau hniksak dingah ziangtin nan lung a kimtlang? Zoh hnik, na pasal phumtupawlih ke tla cu sangka hramah an um. Nang khal an lo zawnsuak ding,” tiah a ti. ¹⁰ Hmakhatteah anih khal Peter ke hramah a tlu ih a thi. Tlangvalpawl an rung lut ih a thi zo ti kha an hmu. An zawnsuak ih a pasal kiangah an phum. ¹¹ Kawhhran mipi hmuahhmuah le cui thu a theitu hmuahhmuah in ṭihnak nasazet an nei. ¹² Apostolpawl in mipi lakah hminsinnak tampi le mangbangza tampi an tuah. Zumtupawl hmuahhmuah cu Solomon Hulhliap ah lungrualten an tawngkhawmaw ṭheu. ¹³ Mipi in an ngaisang zet hai nan zohman an hnenah an tel ngam taktak lo. ¹⁴ Asinan mipa le nunau zumtu tampi cu Bawipai hnenah bet deuhdeuh an si. ¹⁵ Cu mi ruangah, minapawl cu lamzin tluanah an run hruai ih, Peter an kiangih a feh tikah a thlam talin a hliahngah theinak dingah tiin ihkhun parah le pher parah an hlum hai. ¹⁶ A kiangkapih khuapawl ihsin mi burpi Jerusalem ah an ra ih, minapawl le thlarau bawrhhlawh ih zawnzaihter mipawl an rak hruai. Cule an zaten damnak an ngah. ¹⁷ Puithiam lubik le a hnenih umtu Sadusipawl hmuahhmuah cu an ding ih, annih cu thinhengnak in an khat. ¹⁸ Apostolpawl cu an kai ih, mipi thawnginn ah an thlak. ¹⁹ Asinan Bawipai vancungmi in cui zan ah thawnginn sangkapawl cu a awng ih, lengah a suah hai. ²⁰ Cule an hnenah, “Feh uh la temple kulh sungah va ding in hi nunnak thucah hmuahhmuah hi mipi hnenah va sim uh,” tiah a ti hai. ²¹ Apostolpawl in cui thu an theih hnuah, zingpit teah temple kulh sungah an lut ih, mipi thu zirh an thawk. Culai fangah puithiam lubik le a hnenih um mipawl cu an ra thleng. Sanhedrin thuṭhentu le Israel upapawl hmuahhmuah cu thu relkhawm dingin an kokhawm. Thawnginn ihsin Apostolpawl hruai dingah mi an hei thlah. ²² Asinan thawnginn an va thlen tikah, temple kiltupawl cun apostolpawl cu an hmu lo. An kirsal ih, Sanhedrin thuṭhennak ah an sim. ²³ “Thawnginn cu ṭhaten a hrenaw ko. A kiltupawl cu sangka hmaiah an ding. Asinan sangka kan awn tikah a sungah zohman kan hmu lo,” tiah an ti. ²⁴ Cui thu an theih tikah puithiam lubik le temple kiltu bawi le puithiam sangpawl cu ziang a cang a si pei tiah khawruahhar zetin an um. ²⁵ Cule mi pakhat a ra thleng ih, “Zoh hnik uh! Thawng sungih nan thlak mipawl kha temple kulh sungah ding in mipi thu an zirh rero,” tiah a ti. ²⁶ Temple kiltu bawi cu temple kiltupawl thawn an feh ih, apostolpawl cu an run hruai. Mipi in lungto in an deng pang ding ti an ṭih ruangah hranhram cun an hruai lo. ²⁷ Cule apostolpawl cu an run hruai ih, Sanhedrin hmaiah an dinter ih, puithiam lubik in thu a sut hai. ²⁸ An hnenah, “Hi pai hmin in thu zirh nawn lo dingin khoh zetin thu kan lo pe zo a si lo maw? Zoh hnik uh, nan zirhnak in Jerusalem cu nan khatter ṭheh zo. Hi pai thisen mawh kan parih tlakter nan duh a si,” tiah a ti hai. ²⁹ Cule Peter le apostol dangpawl cun an sang ih, “Milai thu hnakin Pathian thu kan lung sawn ding a si. ³⁰ Thing parih nan thlaithat mi Jesu cu kan pupalepawlih Pathian in a thawhter zo. ³¹ Pathian in Israelmipawl sualsirnak a pe ih, an sualpawl tla a ngaidamnak dingah Pathian in anih cu a vawrh lam kapah Lal ah le Rundamtu ah a cawisang zo. ³² Kannih cu cui thupawl a theihpitu kan si. Pathian in a lungtupawl hnenah Thlarau Thianghlim a pe. Thlarau Thianghlim khal cui thupawl theihpitu a si ve,” tiah an ti. ³³ Cui thu an theih tikah an thin a heng tuk lawmmam ih, apostolpawl cu that dingin thu an relcat. ³⁴ Asinan Sanhedrin lakih tel Farasi mi, a hmin Gamaliel, Danzirhtu le mi hmuahhmuah ih upat mi pa cu a hung ding ih, apostolpawl cu can malte sung a lengih suakter dingin thu a pe. ³⁵ Cu ṭheh in an hnenah, “Nannih Israel-mipawl, hipawl parih tuah nan tum mi hi ṭhaten ruat hnik uh. ³⁶ Ziangahtile, kan dung laiah khan Theudas a suak ih, amah le amah mithupi pakhat ka si a tiaw ih, patling zali hrawngin amah an thlun. Asinan amah cu midangpawl in an that ih amah rinsantu hmuahhmuah cu an ṭekdarh ṭheh ih an cem. ³⁷ Cu pai hnuah mi pum siar laiah Galili mi Judas a hung suak ih, mi tampi a hnenah a hip. Cu pa khal cu a hloral ih, amah rinsantupawl khal an ṭekdarh ṭheh. ³⁸ Atu ah hi thu thawn pehparawin nan hnenah ka lo sim a si. Hipawl lak ihsin hnukdawkaw uh. Tibuai duh hlah uh. Ziangahtile, himi hnaṭuannak le khawkhannak cu milai hnenih ra asile zianghmanlo ah a cang ding. ³⁹ Asinan Pathian hnen ihsin a si ah cun nan siatsuah thei cuang lo ding. Pathian dokalh rerotu ah nan cang riangri sawn thei a si,” tiah a ti. ⁴⁰ Cule Sanhedrinpawl in an lungkimpi. Apostolpawl cu an ko ih an vuak hnuah Jesui hmin ih thu sim nawn lo dingin thu an pe ih an thlah. ⁴¹ Cule, Jesui hmin ruangih ningzahnak tuar tlak ih, ruah an si ruangah apostolpawl cu Sanhedrin thuṭhennak ihsin lungawi zetin an fehsuak. ⁴² Ni tinten temple kulh sungah le inn khat hnu inn khat Jesu cu Khrih a si ti zirh le phuan an cawl lo.

¹ Cule, cu laiah dungthluntupawl an ṭhang vivo tikah phunzainak a suak. Jew-mi Grik ṭawng hmang zumtupawl cu Hebru ṭawng hmang zumtupawl parah an phunzai. Ziangahtile, an ni tin rawl zemnak ah Grik ṭawng hmangpawlih nuhmeipawl an thlauthlak ruangah a si. ² Curuangah hleihnihpawl in dungthluntu mi tampi an hnenah an kokhawm ih an hnenah, “Pathian thu thlauthla in cabuai hna kan ṭuan ding cu kan hrangah thil dik a si lo. ³ Curuangah u le nau pawl, nan lak ihsin mi pasarih Thlarau Thianghlim le fimnak ih khat, mi hminṭha hril uh la hih ṭuanvo hi kan pe ding. ⁴ Cule kannih cu thlacam le thu rawngbawl in kan peaw peh vivo ding,” tiah an ti. ⁵ Cule cui thu cun mipi hmuahhmuah ih thinlung a tawng ih, zumnak le Thlarau Thianghlim ih khat Stefen, Filip, Prokoras, Nikanor, Timon, Parmenas le Anṭiok khaw mi Jew biaknak ih a lut mi Nikolas pawl tla an hril. ⁶ Cuipawl cu apostolpawl hmaiah an run hruai ih, apostolpawl in thla an cam hnuah, an parah an kut an suang. ⁷ Cule Pathian thu cu a karhzai ih, Jerusalem ih dungthluntu mipum khal nasazetin an karh. Puithiam tampi in zumnak thu cu an lung. ⁸ Cule Stefen cu zumnak le huham in a khat ih, mipi lakah a nasazet mi mangbangza le hminsinnakpawl a tuah. ⁹ Asinan miluatpawlih sinakok an ti mi sung ihsin dodalnak a suak. Cui dodalnak ah cun Sairin ram, Alexandria khua, Silisia ram le Asia ram tla ih Jew-mi an tel. Cupawl cun Stefen thu an el. ¹⁰ Fimnak le Thlarau ih a ṭawng mi cu an elneh thei lo. ¹¹ Cuiruangah, “Mawsi le Pathian dokalh in thangsiatnak ṭawngkampawl a ṭawng kan thei a si,” tiih thuphanper dingin mi hrekkhat athupten nawhthuh an pe. ¹² Cutin, mipi, miupapawl le Danzirhtupawl kha an cawkphur. Cule Stefen hnenah an ra ih an kai. Cun Sanhedrin thuṭhentu hmaiah an hruai. ¹³ Cule thutheitu diklopawl an ret ih, cupawl cun, “Hi pa hin hi hmun thianghlim le Dan dokalh in thangsiatnak ṭawng a bang dah lo. ¹⁴ Cutiih kan tinak cu Nazareth Jesu in hi hmun hi a ṭhiatbal ding ih, Mawsi ih in pek mi nunphungpawl a thleng ṭheh ding tiih a ṭawng lai kan thei,” an ti. ¹⁵ Sanhedrin thuṭhentu sungih a totu hmuahhmuah in Stefen cu ti keukeu in an zoh ih a hmai cu vancungmi-ih hmai vekin an hmu.

¹ Puithiam lubik in, “Hitiih an ti mi hi a si ngaingai maw?” tiah a ti. ² Cule Stefen in, “U le nau, paletla, i ngai hnik uh! Kan pa Abraham cu Mesopotamia ram ih a um lai, Haran khua ih a um hlanah ropitnak nei Pathian cu a hnenah a runglang ih, ³ a hnenah, ‘Na ram le na sungkhat hnen ihsin suak aw la, ka lo hmuh ding mi ram ah feh aw,’ tiah a ti. ⁴ “Curuangah Khaldia ram mipawl cu a suahsan ih, Haran khua ah a um. A pa a thih hnuah atu ih nan umnak ramah hin Pathian in a ṭhawnter. ⁵ Cule hi tawkah ro zianghman a pe lo. A ke palnak ding hrang daih tawk hmun hman a pe lo. Asinan Abraham in fate a neih lo laiah Pathian in hi ram hi amah le amai hnuih a tesinfapawlih ta si dingin thu a kam. ⁶ Pathian in a hnenah, ‘Na tesinfapawl cu anmai ta a si lo mi ram ah alangte sung an um ding. Uktupawl in sal ah an tuah ding ih kum zali sung nasazetin an zawnzaiter ding. ⁷ Asinan sal ih a tuahtu miphun cu thu ka ṭhen ding. Cui hnuah cui ram ihsin an suak ding ih, hi hmun ah hin keimah in rian ding,’ tiah a ti. ⁸ Cule Pathian in Abraham hnenah serhtan thuthlung a pe. Curuangah Abraham cu Isak a hrin hnu ni riatnak ah Isak-ih serh a tansak. Cutin Isak in Jakob a hring ih, Jakob in pareng hleihnihpawl a hring. ⁹ “Parengpawl in Joseph an iksik ruangah Izip ram ah an zuar. Asinan Pathian cu Joseph hnenah a um. ¹⁰ A harsatnak hmuahhmuah ihsin Pathian in a runsuak ih, Izip Siangpahrang Faraw-ih mithmuh ah duhsaknak le fimnak a pek. Cule Faraw in Joseph cu a ram pumpi tlunah le a inn hmuahhmuah tlunih uktu ah a tuah. ¹¹ “Cule Izip ram le Kanaan ram hmuahhmuah ah pam a tlung ih, cui pam cun harsatnak nasazet a thlen ih, kan pupapawl cun rawl zianghman an nei lo. ¹² Jakob in Izip ah sangvut a um ti a theih tikah kan pupapawl cu a hei thlah. Cucu a hei thlah hmaisakbiknak a si. ¹³ A vei hnihnak an fehnak ah Joseph in a ulepawl hnenah zo a si ti a phuangaw ih, Faraw in Joseph-ih sungkuapawl cu a run thei. ¹⁴ Cui hnuah Joseph in a pa Jakob le a sungkua hmuahhmuah cu a ko ih, an zaten minung sawmsarih le panga an si. ¹⁵ Cule Jakob cu Izip ram ah a vung feh ih, cui ram ah cun a thi. Kan pupapawl khal cui ram ah an thi. ¹⁶ An ruang cu Shekem khua ah an thiar ih, Abraham in Hamor-ih fapapawl hnen ihsin tangka in a rak lei mi thlan ah an phum hai. Hamor cu Shekem-ih pa a si. ¹⁷ “Pathian in Abraham hnenih sesamaw in thu a kam mi a kimnak ding tikcu a nai vivo tikah Izip ram ah cui minungpawl cu an karhzai. ¹⁸ Cule Joseph a theilotu siangpahrang dang a ra suah tiangin an karh sinsin. ¹⁹ Cu pa cun kan unaupawl hnen ihsin fim hrawkhrawl zetin hlawknak a la ih, kan pupapawl cu harsatnak nasazet a pe. An fa suak tharpawl tla thi dingin a hlawnter. ²⁰ “Cui canah Mawsi cu a suak ih, Pathian mit ah Mawsi cu naute mawi zet a si. Thla thum sung a pai inn ah an kilkhawi. ²¹ Mawsi cu an hlawn tikah Faraw Siangpahrang fanu in a sar ih amai fapa dingah a kilkhawi. ²² Izip fimnak hmuahhmuah a zirter ih, a ṭawngkam le a hnaṭuanpawl cu huham nasazet a nei. ²³ “Mawsi cu kum sawmli a kim tikah, a unaupawl, Israel-pawl va leng dingin thu a ruatcat. ²⁴ Cule an lakih mi pakhat cu Izippa in sia zetih a hrem kha a hmuh tikah a va hum ih a unaupai hrangah phuba sam in Izippa cu a that. ²⁵ Cutiih a tuahnak san cu a mipawl in anmah runtu dingah Pathian in a thlah a si ti in thei ding tiah a ruat. Asinan cucu a mipawl in an theithiam lo. ²⁶ A thaisun ah Mawsi cu a sualaw rero mi Israel-mi pahnih hnenah remawkter tum in, ‘Milaipawl, nannih cu unau nan si. Ziangah nannih pakhat le pakhat diklo zetin nan tiawk rero?’ tiah a ti. ²⁷ “Asinan a inhnenpa diklo zetih a titupa cun Mawsi cu a tul ih, ‘Zo in kan tlunih uktu ding le thuṭhentu dingah a lo tuah? ²⁸ Mizansun ih Izippa na thah vekin thah ve i duh maw si?’ tiah a ti. ²⁹ “Mawsi in cu mi a theih tikah, Midian ram ah a tlan. Cu tawkah mikhual in a va um ih, fapa pahnih a nei. ³⁰ “Kum sawmli a kim hnuah, Sinai Tlang kiang ramṭhing ah Bawipai vancungmi cu thingbuk meialh in Mawsi hnenah a runglang. ³¹ Cumi cu Mawsi in a hmuh tikah a hmuh mi ah a mang a bang. Zohhliah dingin a va naih ih, Bawipai aw cun a hnenah, ³² ‘Kei cu na pupapawlih Pathian ka si. Kei cu Abraham-ih Pathian, Isak-ih Pathian le Jakob-ih Pathian ka si,’ tiah a ti. “Cule Mawsi cu a khur ih a zoh ngam lo. ³³ Cule BAWIPA in a hnenah, ‘Na kedam phawih aw, ziangahtile na dinnak hmun hi leilung thianghlim a si. ³⁴ Thungaiin, Izipmipawl in Izip ram ah ka mipawl an zawnzaihternak cu ka hmu zo. An aihramnak ka thei zo ih, anmah runsuak dingah ka ra. Atu ra aw, Izip ram ah ka lo thlah ding,’ tiah a ti. ³⁵ “ ‘Zo in kan tlunih uktu ding le thuṭhentu dingah a lo tuah?’ tiih an hnawn dah mi pa Mawsi cu thingbuk ih a runglangtu vancungmi kut in hruaitu le runsuaktu dingah Pathian in a thlah mi pa kha a si. ³⁶ Anih cun Izip ihsin annih cu a hruaisuak hai ih, Izip ram ah le Tipi Sen sungah mangbangza le hminsinnakpawl tla a tuah. Kum sawmli sung ramṭhing ah mangbangzapawl le hminsinnakpawl tla a tuah. ³⁷ “Israel-mipawl hnenah, ‘BAWIPA nan Pathian in nanmai mi lak ihsin nan hnenah keimah vek Profet ka suakter ding. A thu nan ngaithla pei,’ tiih a titu kha hih Mawsi hi a si. ³⁸ “Ramṭhing ih pungkhawm mipawl hnenah Mawsi cu a um ih, Sinai Tlang parah a hnenih thu a simtu vancungmi thawn an um ih, kan pupapawl hnen khalah a um. Kan hnenih pek dingah nunnak petu Pathian kamsuak thu a dawngsawng. ³⁹ Asinan kan pupapawl in a thu an lung duh lo. Cu hnakin amah cu an hnawng ih an thinlung cu Izip ram ah a kirsal. ⁴⁰ Aaron hnenah, ‘Kan hmaiih fehtu ding pathianpawl in tuahsak aw. Ziangahtile, Izip ram ihsin in hruaisuaktu cui Mawsi cu ziang a cang ti kan thei lo,’ tiah an ti. ⁴¹ Cui canah cawpa note lem an tuah ih, acui cawte lem hmaiah raithawinak an tuah. An kut ih tuah cawp mi thil ah an lung a awi zet. ⁴² Cule Pathian in a hawisan hai ih, profetpawlih cazual sungih ngan vekin van ih arsipawl be dingin a pe. Profet in, ‘Maw nannih Israel-mi tla, kum sawmli sung ram ṭhing ah ran nan thah mi raithawinakpawl le a dang raithawinakpawl tla nan pek tikah, ka hnenah in pe lo, a si lo maw? ⁴³ Molek ih biakbuk le nan Refan pathian-ih nan arsi pathian nan keng a si. Cui milempawl cu nan biak dingah nan tuah. Curuangah nannih cu Babilon pawn lamah ka lo kuathlo ding,’ tin a ngan. ⁴⁴ “Kan pupapawl in ramṭhing ah theihpinak biakbuk an nei. Cumi cu Pathian in Mawsi hnenih a fial vekin le Mawsi ih a hmuh mi pianhmang vekin an sak. ⁴⁵ Cui canah Joshua thawn kan pupapawl in cui biakbuk cu hi ram ah an luhpi. Pathian in miphun dangpawl cu a dawisuak ih, an ram cu an va luah. David san tiang cui theihpinak biakbuk cu an hmang. ⁴⁶ David cu Pathian mithmaiṭha a co ih, Jakob-ih Pathian cennak ding hmun ngah duh in a dil. ⁴⁷ Asinan Pathian inn saktu cu Solomon a si. ⁴⁸ “Sikhalsehla, cungnungbik Pathian cu minung kut ih sak mi temple-pawl ah a um lo. ⁴⁹ “Profetpawl in hitiih an sim vek khan a si. ‘BAWIPA in vancung hi ka laltohkham a si ih, leilung cu ka kepal a si. Ka hrangah ziangvek inn so nan sak ding, asilole ka cawlhnak ding hmun cu khuiah a um? ⁵⁰ Hipawl hi ka kut ih tuah mi an si lo maw?’ tiah a ti. ⁵¹ “Nannih cu nan pupapawl vek nan si. Nannih lunghakpawl le thinlung le hna serhtan lopawl, Thlarau Thianghlim nan do ringring. ⁵² Nan pupapawl in profet pakhat tal an tiduhdah lo mi an um maw? Mi Dingfel Pa rat ding phuangtupawl khal an that. Atu ah cu Pa cu nan zuar ih nan that. ⁵³ Vancungmipawl bawmnak in Dan cu nan dawng. Asinan cui Dan cu nan thlun lo,” tiah a ti. ⁵⁴ Sanhedrin thuṭhentupawl in cui thu an theih tikah an thin a heng tuk ih an hacang an rialhnawh. ⁵⁵ Asinan Stefen cu Thlarau Thianghlim in a khat. Cule van lam a hun zoh ngernger ih, Pathian ropitnak le Jesu cu Pathian kut vawrh lamah ding in a hmu. ⁵⁶ Cule, anih in, “Zoh hnik uh, vancung cu a awngaw ih, Minung Fapa cu Pathian kut vawrh lamih ding in ka hmu,” tiah a ti. ⁵⁷ Sanhedrin thuṭhentupawl cu an hna an phit. Cule ring zetin an au ih, an zaten lungrualten Stefen cu an va zawn. ⁵⁸ Cule khaw lengah an dirsuak ih, lungto in an deng. Theihpitupawl in an puanpawl cu Saul an ti mi mino pakhat pai ke hramah an ret. ⁵⁹ Lungto in an den rero laiah Stefen cu Bawipai hnenah a au ih, “Bawipa Jesu, ka thlarau cohlang aw,” tiah a ti. ⁶⁰ Cule a khuk a bil ih ring zetin a au. “Bawipa, hi sual hi a mawh phurter hai hlah aw,” tiah a ti. Cutiih a ti ṭheh in a itthat.

¹ Stefen an thah cu Saul khal a lung a kim ve. Cui ni ihsin Jerusalem kawhhran cun tiduhdahnak nasazet a tuar thawk. Cule apostolpawl siarlo zumtupawl cu Judia ram le Samaria ram ah an ṭekdarh ṭheh. ² Pathian a ṭihzahtupawl in Stefen cu an phum ih nasazetin an ṭah. ³ Asinan Saul cun nasazetin kawhhran siatsuah a thawk. Inn khat hnu inn khat a feh ih, mipa si seh, nunau si seh a dirsuak ih thawng ah a thlak hai. ⁴ A ṭekdarh mipawl cu an fehnak kipah thu an sim. ⁵ Filip cu Samaria khua ah a vung feh ih an hnenah Khrih thu a sim. ⁶ Cule mipi in Filip ih thilmak tuah mipawl cu an thei ih an hmu. Lungrualten Filip ih thusim cu ṭha zetin an ngai. ⁷ Ziangahtile, thlarau bawrhhlawhpawl cu ring zetih au phahin mi tampi sung ihsin an suak. Mizeng tampi le kebaipawl tla an dam. ⁸ Cule cui khaw sungah lungawinak nasazet a um. ⁹ Cui canah cu tawk khua ah Simon an ti mi pa a rak um. Cu pa cun cui khua ah a dawithiamnak hmang in Samaria ram mipawl nasazetin mangbang ko a tuah. Cu pa cu miropi pakhat ka si tiin a uaraw zet. ¹⁰ Mi hmuahhmuah, mithupibik in misantlailobik tiang ṭha zetin a thu an ngai, “Hi pa hi Pathian-ih huham ropi a si,” an ti. ¹¹ Can reipi a dawithiamnak thawn mipi an khawruahhar ṭheh ko a tuah ruangah a thu ṭha zetin an ngai. ¹² Filip cun Pathian uknak le Jesu Khrih hmin thawi pehparaw mi thuthangṭha a sim. Filip ih thusim mi an zum tikah mipapawl le nunaupawl khalin baptisma an co. ¹³ Cule Simon rori khalin a zum ve ih, baptisma a co. Amah cu Filip hnenah a umpeh vivo. Thilmakpawl le hminsinnakpawl Filip ih a tuah mi a hmuh tikah a mang a bang zet. ¹⁴ Jerusalem ih a um mi apostolpawl in, Samaria-mipawl in Pathian thu an cohlang ti an theih tikah an hnenah Peter le John an thlah. ¹⁵ An va feh ih an thlen tikah Samaria-mipawl Thlarau Thianghlim co dingin thla an camsak. ¹⁶ Ziangahtile, Thlarau Thianghlim cu zo hnen hmanah a thleng hrih lo. Bawi Jesui hmin in baptisma lawng an co lai. ¹⁷ Cule Peter le John in an parah an kut an suang ih, Thlarau Thianghlim an co. ¹⁸ Cui canah apostolpawlih kut suan mipawl parah Thlarau Thianghlim pek a si kha Simon in a hmu ih, an hnenah tangka a pe. ¹⁹ Cule an hnenah, “Ka kut suan mi hmuahhmuah in Thlarau Thianghlim an co theinak dingah hi thuneihnak hi in pe uh,” tiah a ti. ²⁰ Cu tikah Peter in a hnenah, “Pathian thilpek cu tangka ih lei thei dingih na ruah ruangah na tangka cu nangmah thawn siatral seh. ²¹ Pathian hmaiih na thinlung a diklo ruangah hi rawngbawlnak ah nang in telnak na nei lo ih, covo khal na nei lo. ²² Curuangah hi na sualralnak ihsin sirawaw la, Pathian hnenah dil aw. Na thinlung ih na tumtah mi cu a lo ngaidam men thei. ²³ Ziangahtile, thinhnit vekih kha in a lo luahkhat ti le dingfellonak in a lo ṭemṭawn ti kha ka hmu a si,” tiah a ti. ²⁴ Cu tikah Simon in, “Na sim mi thil zianghman ka parih a thlenlonak dingah Bawipai hnenah i dilsak aw,” tiah a sawn. ²⁵ Cule annih in Bawipai thu an theihter ih an sim hnuah, Jerusalem ah an kirsal. An kir phahah Samaria khaw tampi ah thuthangṭha an sim vivo. ²⁶ Cule Bawipai vancungmi in Filip hnenah, “Tho aw la, Jerusalem khua ihsin Gaza khua ih a suk mi zin zawh in thlang lamah feh aw,” tiah a ti. Cui lamzin cu ramṭhing zin a si. ²⁷ Cule Filip cu a tho ih a feh. Ngai hnik, cu tawkah cun Ethiopia mi pa a rak um. Cu pa cu tilper mi a si ih, Ethiopia siangpahrangnu Kandake-ih hlawnthil hmuahhmuah kilkhawitu thuneihnak sang zet nei mi a si. Cu pa cu Pathian be dingah Jerusalem ah a rak feh. ²⁸ A kir lamah, a rangleng ah to in profet Isaiah cabu a siar rero. ²⁹ Cule Thlarau in Filip hnenah, “Hi rangleng hi va naih aw la, a kiangten feh aw,” tiah a ti. ³⁰ Filip cu a hnenah a va tlan ih, profet Isaiah cabu siar reroin a theih tikah, “Na siar rero mi hi a sullam na theithiam maw?” tiah a sut. ³¹ Cule Ethiopia-pa in, “Zo tal ih in simfiang lo ah cun ziangtin saw ka theihthiam thei ding?” tiah a ti. Cule Filip cu a rangleng parah kai in a hnenih to dingin a sawm. ³² A siar rero mi Cathianghlim tla cu, “Anih cu sathattui inn ih tuu an hruai bangin an hruai. Tuufano a hmul mettu hmaiih daitei a um bangin a kaa a ang lo. ³³ Zahthlak zetin an tuah ih, thuṭhensaknak dik a co lo. Leitlun ihsin a nunnak an laksak ruangah a cithlahpawlih thu zo in a sim nawn ding?” ti a si. ³⁴ Tilperpa in Filip cu a sang ih a hnenah, “Hi profet ih sim mi hi zo-ih thu a si ti i sim dingin ka lo ngen a si. Amai thu maw midangih thu so a si?” tiah a ti. ³⁵ Cule Filip cu a kaa a ang ih, cui Cathianghlim in a thawk ih, Jesui thuthangṭha cu a hnenah a sim. ³⁶ Cutin lamzin ah an feh vivo ih, ti umnak hmun an thleng. Cu tikah, tilperpa cun, “Ngai hnik, hi tawkah ti a um! Baptisma co dingah ziang in i kham?” tiah a ti. ³⁷ Cule Filip in, “Na thinlung zatein ka lo sim mi na zum a si ah cun baptisma na co thei ko,” tiah a ti. Cu tikah tilperpa in a sang ih, “Jesu Khrih Pathian Fapa a si ti ka zum,” tiah a ti. ³⁸ Cule anih in rangleng cu cawl dingin thu a pek. Cule Filip le tilperpa cu an pahnih in ti sungah an vung ṭum ih, Filip in baptisma a pek. ³⁹ Ti sung ihsin an hung suah tikah Bawipai Thlarau in Filip cu a lahlo ih, tilperpa in a hmu nawn lo. Cule lungawi zetin lamzin zawh in a feh vivo. ⁴⁰ Asinan Filip cu Azoṭas khua ah an hmu. Cule Filip cu a lan vivo ih, Sisaria khua a thlen tiang khaw kipah thuthangṭha a aupi vivo.

¹ Cui can khalah Saul cun Bawipai dungthluntupawl kha that dingin a hro rero thotho. Puithiam lubik hnenah a va feh. ² Cule Damaskas khua ih, sinakokpawl ih pek ding ca a hnenin a dil. A tumtah mi cu Lamzin zawhtupawl mipa le nunau khal si seh a hmuh mi poh ṭawn ih Jerusalem ih hruai dingah a si. ³ Asinan cutiih khual a tlawn lai, Damaskas khua a hei naih tikah hmakhatteah van ihsin tleu in a kimvel a run tlet. ⁴ Lei ah a tlu ih, “Saul, Saul, ziangah i tiduhdah rero?” tiih a hnenih run titu aw a thei. ⁵ Cule anih in, “Bawipa! Zo na si?” tiah a sut. Cule Bawipa in, “Na tiduhdah rero mi Jesu ka si. Na hrangah fung zum sit cu a har a si,” tiah a ti. ⁶ Saul cun khur le mangbang in, “Bawipa, ziang tuahter i duh?” tiah a ti. Cule Bawipa in a hnenah, “Tho aw la, khawpi sungah lut aw. Cule na tuah ding mi an lo sim ding,” tiah a ti. ⁷ Saul thawi khual a tlawng mipawl cu ṭawng loin cu tawkah cun an ding. Aw cu an thei nan zohman an hmu lo. ⁸ Saul cu leilung ihsin a hung tho ih a mit a hun meng, asinan zohman a hmu thei lo. Cule a kut in an hruai ih, Damaskas khaw sungah an fehpi. ⁹ Ni thum sung khua a hmu lo ih, ziangkhal ei lo le in loin a um. ¹⁰ Cui canah Damaskas khaw sungah dungthluntu pakhat Ananias ti mi pa a um. Larnak in Bawipa cu a hnenah a lang ih, Bawipa in, “Ananias,” tin a ko. Cule anih in, “Ngai hnik, hinah ka um! Bawipa,” tiah a ti. ¹¹ Cule Bawipa in a hnenah, “Tho aw la, ‘Zin ding’ an ti mi ah va feh aw. Judas inn ah Tarsas khua ihsin a ra mi Saul kha va hawl aw. Ngai hnik, anih cu thla a cam lai rero. ¹² A larnak ah cun a mit khua a hmuhsal theinak dingah Ananias an ti mi pa a rung lut ih a parah a kut suang in a hmu,” tiah a ti. ¹³ Asinan Ananias in, “Bawipa, mi tampi hnenin hi pai thuhla hi ka thei zo. Jerusalem khua ih na mithianghlimpawl hnenah thil ṭha lo tampi a tuah zo. ¹⁴ Puithiam lubik hnen ihsin thuneihnak thawn hi tawkah a ra. Na hmin a kotu hmuahhmuah kaih theinak thuneihnak a nei,” tiah a sang. ¹⁵ Asinan Bawipa in a hnenah, “Feh aw, ziangahtile anih cu Zentelpawl hmaiah le siangpahrangpawl hmaiah le Israel-pawl hmaiih ka hmin kengtu ding ka hmanrua ah ka hril zo. ¹⁶ Na va fehnak ding san cu ka hmin ruangih a tuar ding mipawl ka hmuh ding,” tiah a ti. ¹⁷ Cule Ananias cu a feh ih, inn sungah a lut. Saul parah a kut a suang ih, “Unaupa Saul, na rat laiih lamzin ih na hnenih runglang Bawipa Jesu in khua na hmuhsal ih, Thlarau Thianghlim ih na khah theinak dingah i thlah a si,” tiah a ti. ¹⁸ Cule, hmakhatteah a mit ihsin phawhir vek a tla ih hmakhatteah khua a hmu theisal. Cule a tho ih, baptisma a co. ¹⁹ Cule, rawl a ei hnuah a tha a caksal. Damaskas khua ah Saul cu dungthluntupawl hnenah ni tampi a cam. ²⁰ Cule, hmakhatteah Saul in sinakokpawl ah Khrih cu Pathian Fapa a si ti thu a sim. ²¹ Cu mi an theih tikah an zaten an mang a bang zet ih, “Hi pa cu Jerusalem khua ih hih hmin kotupawl siatralter ding tumtupa kha a si lo maw? Mi ṭemṭawn in puithiam sangpawl hnenih thlenpi dingah hi tawkah a ra a si lo maw?” tiah an ti. ²² Asinan Saul cu a cak deuhdeuh. Jesu cu Khrih a si ti a fiangter ih, Damaskas khua ih um mi Jew-pawl mangbang ko a tuah. ²³ Ni tampi a kim hnuah Jew-pawl in Saul that dingin khua an khang. ²⁴ Asinan Saul in an khawkhan mi cu a thei. Amah that dingah kawtkapawl cu a sun a zan in an kil. ²⁵ Cu tikah dungthluntupawl in Saul cu an hruai ih, zan ah khawpi kulh ihsin bawm in an vun ṭhum. ²⁶ Saul cu Jerusalem a va thlen tikah dungthluntupawl kha kawp a va tum. Asinan dungthluntu ah a cang zo ti kha an zum lo ruangah an zaten amah cu an ṭih. ²⁷ Asinan Barnabas in a hruai ih, apostolpawl hnenah a fehpi. Cule an hnenah lamzin ah Saul in ziangtin Bawipa a hmu ih, Bawipa in Saul hnenah ziangtin thu a sim tipawl le Damaskas khua ah Jesui hmin in ralṭha zetih thu a sim thupawl a simfiang hai. ²⁸ Cule Saul cu apostolpawl thawn Jerusalem ah lut le suak in a um. ²⁹ Cule Bawipa Jesu hmin in ralṭha zetin Paul cu thu a sim. Grik ṭawng hmang Jew-pawl thawn thu an elaw ih, annih cun thah an tum. ³⁰ Cucu unaupawl in an theih tikah Sisaria khua ah an fehpi. Cutin Tarsas khua lamah an thlah. ³¹ Cule Judia ram, Galili ram le Samaria ram ih kawhhranpawl hmuahhmuah cu hnangamten an um ih an tha a cak. Bawipa ṭihzah in an nung. Thlarau Thianghlim ih thlangamnak ah mi an karh vivo. ³² Cule hiti hi a rak si, cui canah Peter cu hmun tinah a tlawng ih, Lidda khua khal a va thleng. Cu tawk khua ih a um mi mithianghlimpawl a va leng hai. ³³ Cu tawkah Aenias an ti mi pa a tawng. Cu pa cu zeng nat tuar in kum riat sung ihkhun ah a lum. ³⁴ Peter in a hnenah, “Aenias, Jesu Khrih in a lo damter a si. Tho aw la, na ihphah zual aw,” tiah a ti. Cule hmakhatteah a tho lohli. ³⁵ Cule Lidda le Sharon ih a um mi hmuahhmuah in Aenias cu an hmu ih, Bawipai lamah an hawikir. ³⁶ Cui canah, Joppa khua ah Tabitha an ti mi dungthluntu pakhat a um. Tabitha tiih sullam cu ‘Dorkas’ tinak a si. Cui nunaunu cun thil ṭha tuah le bawmnak thilpek a ṭuan ringring. ³⁷ Cule hiti hi a rak si, cui can hrawngah cu nu cu a na ih a thi. Cule a ruang an khawlh ṭheh hnuah inn tlunta pindan ah an ret. ³⁸ Lidda khua cu Joppa khua thawn a naiawte. Cule Peter cu Lidda ah a um ti an theih tikah dungthluntupawl in a hnenah mi pahnih an hei thlah. Annih cun, “Zangfahten, ra lohli aw,” tiah an ti. ³⁹ Cule Peter cu a tho ih, anmah hnenah a feh. A va thlen tikah, inn tlunta pindan ah cun an hruai. Nuhmeipawl hmuahhmuah cu Peter kiangah an ding ih an ṭap. Dorkas an hnenih a um laiih a tuah mi angkipawl le a dang hnipuanpawl kha an hmuh. ⁴⁰ An zaten Peter in pindan sung ihsin a suahter ṭheh ih a khuk a bil ih thla a cam. A ruang lam a hawi ih, “Tabitha, tho aw,” tiah a ti. Cule a mit a hun meng ih, Peter a hmuh tikah a hung to. ⁴¹ Cule Peter in Dorkas-ih kut in a kai ih a dinter. Cule mithianghlimpawl le nuhmeipawl a ko ih a nung zo a si tiah an hnenah a hmuh hai. ⁴² Cui thu cu Joppa khaw sung hmuahhmuah ah a thang thluh ih, mi tampi in Bawipa an zum. ⁴³ Cule hiti hi a rak si, cu mi hnuah Peter cu Joppa khua ah savun ih thiltuahtu Simon inn ah ni tampi a cam.

¹ Cui canah Sisaria khua ah Kornelias an ti mi pa a um. Amah cu Italy ralkap bur tiih kawh mi ah ralkap za hotu a si. ² Amah le a insangpawl hmuahhmuah cu Pathian ngaihsak mi le ṭihzahtu an si. Bawmnak thilpek hna a ṭuan ih nasazetin Pathian hnenah thla a cam ringring. ³ Ni khat cu zan lam nazi pathum hrawngah larnak a hmu. Cu mi ah cun Pathian vancungmi a hnenih ra fiang zetin a hmu. Vancungmi in, “Kornelias,” tiah a ti. ⁴ Kornelias cun vancungmi cu ti keukeuin a zoh ih a ṭih tuk ih, “Ziang a si, Bawipa?” tiah a ti. Cule vancungmi in, “Na thlacamnak le bawmnak thilpek na ṭuan mipawl cu Pathian hmaiah an hung thleng zo ih, cupawl cu Pathian in a hngilh lo a si. ⁵ Atu ah Joppa khua ah Peter an ti mi Simon ko dingin mi thlah hai aw. ⁶ Cu pa cu savun ih thiltuahtu Simon hnenah a um. A inn cu tifinriat kapah a um. Peter in na tuah ding mi a lo sim ding,” tiah a ti. ⁷ Cule a hnenih thusimtu vancungmi cu a fehhlo. Cui hnuah Kornelias in a inn ih a um mi hnenum pahnih le amah kil ringringtu lak ihsin ralkap pakhat Pathian ngaihsak zet cu a ko hai. ⁸ Kornelias in cui thil hmuahhmuah cu an hnenah a simfiang ih, Joppa khua ah a thlah hai. ⁹ A thaisun cu an tlawngsuak ih, an feh rero lai khua an va thlen zik tikah, Peter cu sun laifang hrawngah thla cam dingin inn parah a hung kai. ¹⁰ Cule a ril a rawng tuk ih, ziang simaw ei a duh. Asinan rawl an timlam rero laiah zelh in a um. ¹¹ Cule van awngaw in, puan hlaipi vek a si mi thil pakhat a kil pali ih ṭawn mi cu leilung ih an run ṭhum cu a hmu. ¹² Cu mi ah cun lei ramsa a phunphun, ke li nei ramsapawl, sahrangpawl le bawkvakpawl le tlunzuang vatepawl an um. ¹³ Cule aw pakhat in Peter hnenah, “Peter, tho aw, that aw la, ei aw,” tiah a ti. ¹⁴ Cule Peter in, “Si lo e, Bawipa! Ziangahtile, a thiang lo mi le a bawrhhlawh mi thil ka ei dah lo,” tiah a ti. ¹⁵ Cule aw cun a vei hnihnak a hnenah, “Pathian in a thianter zo mi cu, thiang lo ah ruat hlah,” tiah a ti. ¹⁶ Cumi cu vei thum tiang a cang. Cule hmakhatteah Pathian in cui puan cu van ah a laksohsal. ¹⁷ Cui hnuah Peter in larnak ih a hmuh mipawlih sullam cu ziang a si pei tiin a ruah rero laiah, ngai hnik, Kornelias ih thlah mipawl cun Simon-ih inn umnak cu an zingzawi hnuah kawtka ah an ding. ¹⁸ Cule annih in an vun auh ih, Peter an ti mi Simon cu tawkih a riah le riah lo an vun sut. ¹⁹ Peter cun a larnak hmuh mi a ruah rero laiah, Thlarau in a hnenah, “Ngai hnik, mi pathum in an lo hawl. ²⁰ Curuangah tho aw, vung ṭum aw la, an hnenah feh aw. Ka thlah mi an si ruangah an hnenih feh dingah rinhlelhnak zianghman nei hlah,” tiah a ti. ²¹ Cule Peter cu Kornelias in a hnenih a thlah mipawl hnenah a vung ṭum ih an hnenah, “Nan hawl mi cu keimah hi ka si. Ziangruangah nan ra?” tiah a sut hai. ²² Cule annih in, “Ralkap za hotu Kornelias hnen ihsin kan ra. Anih cu midingfel le Pathian ṭihzahtu a si ih, Jew-pawl hmuahhmuah in an upat zet. A thianghlim vancungmi in a inn ah lo ko dingin a fial ih, na thusim ngai dingin a lo ko a si,” tiah an ti. ²³ Curuangah Peter in a ko lut hai ih, an riahnak ding hmun a pe. A thaisun ah Peter cu an hnenah a feh. Joppa khua ihsin unau hrekkhatpawl tlain amah an thlun. ²⁴ A thaisun ah Sisaria khua an thleng ih, Kornelias cun a sungkhatpawl le a rualpi ṭhapawl kokhawm in a rak hngak ringring hai. ²⁵ Peter cu inn ih a vung luh zawngah Kornelias in a rak hmuak. Cule Peter ke hramah a bawk ih a bia. ²⁶ Asinan Peter in a kaitho ih, a hnenah, “Ding aw, kei khal minung ka si ve,” tiah a ti. ²⁷ Peter cun cu pa be rero phahin, pindan sungah an lut ih, mi tampi umkhawm kha Peter in a hmu. ²⁸ Cule Peter in an hnenah, “Jew-mi in miphun dang va len le pawlkawm cu sian a si lo ti nan thei ko. Asinan Pathian in mi zokhal mithianglo le mibawrhhlawh ka tilonak dingah i hmuh zo. ²⁹ Curuangah in ra kawh tikah lo el riai loin nan hnenah ka ra. Curuangah, ziangah in rak ko? ti ka lo sut,” tiah a ti. ³⁰ Cule Kornelias in, “A liam zo mi ni li, tuvek canah rawl ka ul. Zan lam nazi pathum ah ka inn ah thla ka cam. Cule, ngai hnik, mi pakhat cu a tleu zet mi hnipuan hruh in ka hmaiah a ding. ³¹ Anih cun, ‘Kornelias, Pathian in na thlacamnak a thei ih, bawmnak thilpek na ṭuan mipawl khal a hngilh lo. ³² Curuangah Joppa khua ah Peter an ti mi pa Simon va ko dingah mi thlah aw. Savun ih thiltuahtu Simon-ih inn ah a riak. A inn cu tifinriat kapah a si. Anih a rat tikah, thu a lo sim ding,’ tiah a ti. ³³ Curuangah na hnenah mi ka rak thlah lohli ih, na rat cu na tiṭha zet a si. Curuangah Pathian-ih thu a lo pek mi hmuahhmuah na sim ding mi ngaithla dingah kan zaten hi tawkah Pathian hmaiah kan rakhawm a si,” tiah a ti. ³⁴ Peter cun ṭawng a thawk ih, “Pathian in mi duhsak hleice a nei lo ti dik zetin ka hmu. ³⁵ Ziangvek miphun a si khalle Pathian a ṭihzahtu le thil dik a tuahtu cu Pathian in a cohlang sawn a si. ³⁶ Ziangkim tlunih Lal, Jesu Khrih zarih Pathian in remnak thuthangṭha Israelmipawl hnenih thucah a kuat mi cu nan thei ko. ³⁷ Judia peng sung hmuahhmuah ah ziang a cang ti nan thei ko. John in baptisma thu a sim hnuah, cui thucah cu Galili peng ihsin a thawk. ³⁸ Nazareth Jesu cu Pathian in Thlarau Thianghlim le huham thawn ziangtin a thuam ti cu nan thei. A hnenih Pathian a um ruangah, anih cu hmun kipah feh in thilṭha a tuah ih, Diabol huham hnuaiih umpawl hmuahhmuah a damter. ³⁹ Cule kannih cu Jew-pawlih ram le Jerusalem khaw sungih a tuah mi hmuahhmuah a theihpitu kan si. Cule amah cu thing parah an khai ih, an that. ⁴⁰ Asinan anih cu Pathian in a ni thumnak ah a thoter ih, langhnganin hmuh ih um dingin a phuanglang. ⁴¹ Mi hmuahhmuah in an hmu lo. Asinan Pathian-ih a rak hril mi kannih a thutheitupawl in kan hmu. Mithi lak ihsin a thawhsal hnuah amah thawn kan ei ih, kan in. ⁴² Cule anih in hi pa cu Pathian in a nung mi le a thi mi parah thuṭhentu ih a ruat mi pa a si thu kha mipi hnenih sim ding le theihter dingah thu in pe. ⁴³ Profet hmuahhmuah in amai thu cu an sim ih, zokhal amah a zumtu cu Jesui hmin in sual ngaidamnak an co ding,” tiah a ti. ⁴⁴ Peter in cui thu a sim rero laiah, a thusim theitu hmuahhmuah parah Thlarau Thianghlim a rung thleng. ⁴⁵ Cule zumtu serhtanpawl, Peter thluntupawl cu cu mi ah an mang a bang zet. Ziangahtile, Pathian in Zentelpawl hnen khalah Thlarau Thianghlim thilpek a burh. ⁴⁶ Ziangruangah tile cupawl in ṭawng phun dangdang ih Pathian an thangṭhat kha an theih ruangah a si. Cule Peter in, ⁴⁷ “Kanmah vekih Thlarau Thianghlim co zotupawl hi ti baptisma co dingin zo in a kham thei ding?” tiah a sang. ⁴⁸ Cule Bawipai hmin in baptisma co dingin thu a pe hai. Cule ni tawkfang an hnenih cam hrih dingin Peter cu an ngen.

¹ Cui canah Judia peng ih um apostolpawl le unaupawl in Zentelpawl khalin Pathian thu an cohlang ve ti an thei. ² Peter cu Jerusalem ih a hung soh tikah, serhtan zumtupawl in Peter cu an do. ³ “Serhtan lo mipawl hnenah na feh ih, an hnenah na ei,” tiah an ti. ⁴ Asinan Peter in a thawk ih an hnenih thil cang mi cu a sangsangten a simfiang hai, ⁵ “Joppa khua ih thla ka cam laiah zelh in ka um ih larnak ka hmu. Thil pakhat puan hlaipi vek a si mi cu a kil pali in an run ṭhum ih ka hnen a thleng. ⁶ Cucu ka bih ih, leitlun um rannung ke li neipawl, sahrangpawl, bawkvakpawl le tlunzuang vatepawl tla ka hmu. ⁷ Cule aw pakhat in, ‘Peter, tho aw, that aw la, ei aw,’ tiah i ti ka thei. ⁸ Asinan kei in, ‘Si lo e, Bawipa! Ziangahtile, a thiang lo mi le a bawrhhlawh mi thilpawl ka kaa sungah a lut dah kel lo,’ tiah ka ti. ⁹ Cule van ihsin aw cun, ‘Pathian in a thianter zo mi cu thianghlim lo ah ruat hlah,’ tiah i tisal. ¹⁰ Cule cumi cu vei thum tiang a cang. Cu ṭheh in a zaten van ah an dirhsoh thluhsal. ¹¹ Ngai hnik, culai fangah Sisaria khua in ka hnenah an rak thlah mi mi pathum kha ka riahnak inn an ra thleng. ¹² Rinhlelhnak zianghman um loin anmah thawn feh dingin Thlarau in i fial. Hi unau parukpawl khal hi ka hnenah an ra ve ih, Kornelias-ih inn ah kan lut. ¹³ Kornelias in a inn ih vancungmi a hmuh thu in sim. Vancungmi cu a ding ih a hnenah, ‘Joppa khua ah mi thlah aw la, Peter tiih an kawh mi Simon cu va ko aw. ¹⁴ Anih in thu a lo sim ding ih, cu mi cun nangmah le na insang hmuahhmuah a lo rundam ding a si,’ tiah a ti. ¹⁵ Cule thusim ka thawh tikah, Thlarau Thianghlim cu atirih kan parih a ra thlen vek khan an parah a thleng ve. ¹⁶ Cule Bawipa in, ‘John cun ti ah baptisma a pek, asinan nannih cu Thlarau Thianghlim ah baptisma in nan um ding,’ tiah a ti mi ka vun mangsal. ¹⁷ Bawipa Jesu Khrih a zumtu kan hnenih Pathian in thilpek in pek mi vek cu an hnen khalah a pe a si. Curuangah Pathian dawn dingah kei cu zo so ka si?” tiah a ti. ¹⁸ Cui thupawl an theih tikah daiten an um. “Pathian in nunnak an co theinak dingah sualsirnak cu Zentelpawl hnen khalah a pe ve a si hi,” tiah Pathian an thangṭhat. ¹⁹ Stefen thawn pehparawih a suak mi tiduhdahnak ruangih a vakdarh mipawl cu Fonisia peng, Saipras tikulh le Anṭiok khua tiang an thleng. Jew-mi hnen lawngah thu an sim, midang zo hnen hmanah an sim lo. ²⁰ Cun, mi hrek cu Saipras tikulh mi le Sairin mipawl an si ih, Anṭiok an thlen tikah Grik ṭawng hmang Jew-pawl hnen khalah Bawipa Jesui thuthangṭha an sim. ²¹ Cule Bawipai kut cu an hnenah a um ih, mi tampi in an zum ih, Bawipai lamah an hawikir. ²² Cui thuthang cu Jerusalem ih um kawhhran hnenah a thleng. Cule annih in Barnabas cu Anṭiok tiangih feh dingin an thlah. ²³ Barnabas a va thlen tikah Pathian zangfahnak rahsuahpawl a hmu ih a lung a awi. An zaten Bawipai hnenih kawp ringring dingin an thinlung in thuṭhencatnak nei dingin tha a pe hai. ²⁴ Anih cu miṭha a si ih, zumnak le Thlarau Thianghlim ih khat mi a si. Cule mi tampi cu Bawipai hnenah bet an si. ²⁵ Cule Barnabas cu Saul hawl dingin Tarsas ah a feh. ²⁶ A va hmuh tikah Anṭiok ah a hruai. Cule hitin a cang, kum khat sung annih cu cui kawhhran thawn an tawngkhawmaw ih, mi tampi an zirh. Cule Anṭiok khua ah dungthluntupawl kha Khristian tiah kawh hmaisabik an si. ²⁷ Cui can hrawngah profetpawl cu Jerusalem ihsin Anṭiok ah an feh. ²⁸ An lakih mi pakhat Akabas an ti mi pa cu a ding. Thlarau in cu pa cu a theihter ih, leitlun pumpi ah pampi a tlung cing ding, tiah a phuang. Cui pampi cu Kaisar Klaudias sanah a thleng. ²⁹ Dungthluntupawl cun mah le tithei tawk cioin Judia peng ih um unaupawl bawmnak pe dingin an relcat. ³⁰ Cule cumi cu an tuah ih, an thilpek cu Barnabas le Saul kut in elder-pawl hnenah an kuat.

¹ Cui can hrawngah Herod Siangpahrang in kawhhran mi hrekkhatpawl se zetih tiduhdah dingah a kai hai. ² Cule John-ih upa James cu ralnam in a that. ³ Cumi cun Jew-pawl a lungawiter ti a hmuh tikah Peter khal a kaibet. Cucu thilnu tel lo sang puai laifangah a si. ⁴ Peter a kaih hnuah thawng sungah a khum. An kil dingah, bur khat ah ralkap pali a um mi ralkap bur lipawl hnenah a pek. Lantapuai ṭheh hnuah Peter cu mipi hmaiah suah ih a thu rel dingin Herod in khua a khang. ⁵ Curuangah Herod in Peter cu thawng a thlak. Asinan kawhhran in amai hrangah Pathian hnenah catloin thla an cam. ⁶ Herod in a thu rel dingih a hruaisuah zik, a mizan ah Peter cu thawnginn ralkap pahnih lakah a it. Thir cikcin pahnih in an khit ih, kiltupawl in thawnginn sangka in an kil. ⁷ Cule, ngai hnik, hmakhatteah Bawipai vancungmi a lang ih, tleu in thawnginn sung cu a tlet. Vancungmi cun Peter-ih hnak a vun beng ih, a ṭhangharhter ih, “Zamrangten tho aw!” tiah a ti. Cule Peter-ih kut ihsin thir cikcinpawl cu an tla. ⁸ Cule vancungmi in a hnenah, “Na puan taiveng aw la, na kedam khal bun aw,” tiah a ti. A ti vekin Peter cun a tuah. Cule vancungmi cun, “Na hnipuan hruh aw la, i thlun aw,” tiah a ti. ⁹ Peter cun vancungmi cu thawnginn lengah a hei thlun. Vancungmi ih a tuah mi cu thungai ah a ruat lo. Larawknak ka hmu a si ding tiah a ruat. ¹⁰ A pakhatnak le a pahnihnak sentari kilnak an hei lan ih, khaw sung fehnak thir kawtka an thleng. Cui kawtka cu a mahte in an hrangah a awngaw ih, cumi cun an suak. Lamzinthler pakhat an zawh ṭheh in hmakhatteah vancungmi cun a tlansan. ¹¹ Cule Peter cu a lung a hung fim ih, “Bawipa in a vancungmi a thlah ih, Herod-ih kut sung ihsin le Jew-pawl in ka parih tuah an beisei mi hmuahhmuah ihsin i runsuak a si ti atu ah cun ka thei taktak thlang,” tiah a ti. ¹² Cule thil a cang mi a theihngah hnuah Mark an ti mi John-ih nu Mary-ih inn ah a feh. Cu tawkah mi tampi pumkhawm in thla an rak cam rero. ¹³ Peter in kawtka sangka a vun king tikah siahhlawhnu Rhoda ti mi cu thlingthla dingin a ra. ¹⁴ Cule cu nu in Peter-ih aw a si ti a theih tikah a lung a awi tuk lawmmam ih, sangka awng sawn loin, inn sungah a tlan ih, kawtka ah Peter a ding tiah a sim hai. ¹⁵ Asinan annih in a hnenah, “Na aa a si hi,” an ti. Sikhalsehla, anih in a si rori tiin a ṭawng rero thotho. Cu tikah annih in, “Cucu a vancungmi a si ding,” tiah an ti. ¹⁶ Asinan, Peter cun catloin a king rero. Sangka an awn tikah Peter an hmu ih an mang a bang. ¹⁷ Daiten um cio dingin Peter cun a kut a hei zap ih, thawnginn sung ihsin Bawipa in a hruaisuahdan kha an hnenah a sim. Cule anih in, “Hi thu hi James le unaupawl hnenah sim uh,” tiah a ti. Cule a suak ih, hmun dangah a feh. ¹⁸ Zing khua a van tikah ralkappawl lakah buainak nasazet a um. Peter parah ziang thil a cang ti an thei lo. ¹⁹ Herod in ṭha zetin a hawl nan a hmuh lo tikah, kiltupawl cu ṭha zetin a zawihnit hai. Cule annih cu thah dingah thu a pe. Cui hnuah Herod cu Judia peng a suahsan ih, Sisaria khua ah can tawkfang a um. ²⁰ Cui canah Herod cu Ṭaiar le Sidon mipawl parah a thin a heng zet. Cui khaw mipawl cu lungrualten a hnenah an ra ih, siangpahrang ihnak pindan kilkhawitu Blasṭas kha anmah ṭanpitu ding le remnak dilsaktu dingah an lem neh. Ziangahtile, an ram mipawlih rawl an ngah mi cu siangpahrang uk mi ram sung ihsin a rat ruangah a si. ²¹ A ni khiah ni ah Herod cu a siangpahrang thuam a hruk ih a thuṭhennak laltohkham parah to in mipi hnenah thu a sim. ²² Cule mipi in, “Cucu Pathian aw a si. Milai aw a si lo,” tiah catloin an au. ²³ Pathian kha sunlawihnak a pek lo ruangah, hmakhatteah Bawipai vancungmi in a vuak. Cule anih cu khukrul in an ei ih a thi. ²⁴ Asinan Pathian thu cu a ṭhang ih a karhzai vivo. ²⁵ Barnabas le Saul cu an rawngbawlnak an ṭheh tikah Jerusalem ihsin an kirsal ih, Mark an ti mi John cu an hnenah an hruai.

¹ Anṭiok kawhhran ah profetpawl le zirhtupawl an um. Cupawl cu Barnabas, Niker an ti mi Simeon le Sairin peng mi Lusias, Herod tetrak thawi a ṭhangliantlang mi Minian le Saul tla an si. ² Cule anmahpawl cu Bawipa lamih rawngbawlnak tuah in le rawlul ih an um laiah, Thlarau Thianghlim in, “Barnabas le Saul kha ka kawhnak san hnaṭuan ṭuan dingah ka hrangah a dangten ret uh,” tiah a ti. ³ Cule rawl an ul ih, thla an cam hnuah an lu parah an kut an suang ih an thlahsuak. ⁴ Cule Thlarau Thianghlim in a thlah hai ih, Seleusia khua ah an vung feh. Cu tawk ihsin Saipras tikulh ah lawng in an feh. ⁵ Salamis khua an um laiah Jew-pawlih sinakokpawl ah Pathian thu an sim. Anmah bawmtu dingah John khal an hruai. ⁶ Cule tikulh pumpi an fang thluh ih, Pafos khua tiang an thleng. Cu tawkah dawithiam le profet deu a si mi Jew-mi pakhat an tawng. A hmin cu Bar Jesu a si. ⁷ Cu pa cu mifim zet ram uktu Serzias Paulas hnenah a rak um. Serzias Paulas cun Pathian thu ngaithlak a duh ruangah Barnabas le Saul cu a ko. ⁸ Asinan anmai ṭawng in dawithiampa tiih kawh mi Elimas cun anmah cu a do hai. Cu pa cun ram uktupa kha zumnak ihsin pialter a duh. ⁹ Cule, Paul ti khalih an kawh mi Saul cu Thlarau Thianghlim in a khat ih, Elimas cu mit ṭhep loin a zoh. ¹⁰ Cule, “Nang cu Diabol fa na si ih, dingfelnak hmuahhmuah ih doral na si. Nang cu hrawkhrawlnak phun zakip le mi bumnak phun zakipin na khat a si. Bawipai lamzin dingpawl merh kawi hi na bansan lo ding maw? ¹¹ Atu ah ngai hnik, Bawipai kut cu na parah a um a si. Na mit a caw ding ih, tawkfang sung cu ni hmu loin na um ding,” tiah a ti. Cule hmakhatteah mero le thim in a tlakhnawh ih a kut ih hruaitu ding duh in a dap dundo. ¹² Ram uktu cun cui thil cang mi a hmuh tikah a zum ih, Bawipai thuhla an zirh mi in a mang a bangter zet. ¹³ Pafos khua ihsin Paul le a rualpipawl cu lawng in an feh ih, Pamfilia ram Perga khua an thleng. Cu tawk ihsin John in a tanta hai ih, Jerusalem ah a kir. ¹⁴ Perga khua ihsin an feh ih, Pisidia ram Anṭiok an thleng. Sabbath Ni ah sinakok ah an lut ih an to. ¹⁵ Dan thupawl le profetpawlih ngan mi thupawl an siar ṭheh hnuah sinakok hruaitupawl in an hnenah mi an hei thlah ih, an hnenah, “Nannih u le nau pawl mipi hrangah thapeknak thu sim ding nan neih asile sim uh,” tiah an ti. ¹⁶ Cule Paul cu a ding ih a kut a hei zap ih thu a sim, “Israelmipawl le nannih Pathian a ṭihzahtupawl tla, i ngai hnik uh! ¹⁷ Israel-mipawlih Pathian in kan pupapawl a rak hril ih, Izip ram ah a langte sung an um laiah annihpawl cu a hlawhtlingter. Cule a ban tha cak in cu tawk ihsin a hruaisuak hai. ¹⁸ Cule kum sawmli hrawng ramṭhing ah thinsauten a kilkhawi hai. ¹⁹ Cule Kanaan ram ih miphun pasarihpawl a siatsuah thluh hnuah, cui ram cu an ro ah camcawhfung zukter in a zem hai. ²⁰ “Cui hnuah profet Samuel can thlen hlan kum zali le sawmnga hrawng Pathian in thuṭhentupawl a pe hai. ²¹ Cule Israel-pawl in siangpahrang an dil ih, Pathian in Benjamin phun Kish-ih fapa Saul cu a pe hai. Anih cun kum sawmli sung a uk. ²² Saul a ṭhawnhloh hnuah Pathian in David kha an siangpahrang ah a canter. Cu pai thu cu Pathian in hitin a ti, ‘Jesse-ih fapa David, ka thinlung vek pu mi ka hmu zo. Anih cun tuahter ka duh mi hmuahhmuah a kimter ding,’ tiah a ti. ²³ A thutiamkam vekin Pathian in Israel-mipawl hrangah David-ih tesinfa sung ihsin Rundamtu Jesu a suahter. ²⁴ A rat hlanah, John in Israel-mipawl hmuahhmuah hnenah sualsirnak baptisma co dingah thu a sim. ²⁵ John in a hnaṭuan a ṭheh zik zawngah, ‘Kei cu zo ah in ruat? Kei cu cu pa ka si lo. Asinan, ngai hnik uh! Anih cu ka hnuah a ra. Kei cu a kedam phawihtu ding hmanah ka tlak lo,’ tiah a ti. ²⁶ “U le nau pawl, Abraham-ih tesinfapawl le nan lakih Pathian ṭihzahtu hmuahhmuahpawl tla, nan hnenah hi rundamnak thucah hi thlen a si. ²⁷ Ziangahtile, Jerusalem ih um mipawl le an hruaitupawl in amah cu an rak theithiam lo. Asinan, Sabbath Ni tinte ih an siar mi profetpawlih thu cu amah thiamlo an coternak in an kimter. ²⁸ Cule thihnak tlak thu zianghman an hmu lo nan, amah cu that aw tiah Pilat an dil. ²⁹ A thuhla rak ngan cia mipawl hmuahhmuah kha an tlamtlinter hnuah khraws par ihsin an lathla ih, thlan ah an phum. ³⁰ Asinan Pathian in anih cu mithi lak ihsin a thoter. ³¹ Cule Galili peng ihsin Jerusalem ih khual a tlawngtupawl in ni tampi sung amah cu an hmu. Atu ah cupawl cu mipi hnenah a thu theihpitu an si. ³² Kan pupapawl hnenih Pathian ih a kam cia mi thuthangṭha cu nan hnenah kan phuang a si. ³³ Jesu a thawhtersalnak in Pathian in kannih an tesinfapawl hnenah cui thutiamkam cu a thlenkimter zo. Cumi cu Sam pahnihnak sungih ngan mi vek kha a si, ‘Nang cu ka Fapa na si. Tuisun ah ka lo hring a si,’ ti in. ³⁴ A ruak cu a ṭawihrallonak dingah Pathian in Jesu cu mithi lak ihsin a thoter. Hihi a sim mi a si, ‘David hnenih ka pek mi a thianghlim mi rin tlak thukampawl kha ka lo pe ding,’ tiah a ti. ³⁵ Curuangah a dang Sam khalah, ‘Na Mi Thianghlim Pa cu ṭawihralter na siang lo ding,’ tiah a ti. ³⁶ “Curuangah Pathian-ih duhdan in David cu amai san minungpawl a ren hnuah a itthat. Cule a pupapawl hnenah phum a si ih, a ruak cu a ṭawihralta. ³⁷ Asinan Pathian ih a thawhtersal mi Jesu cu a ṭawihral lo. ³⁸ Curuangah u le nau pawl, hihi thei uh, Jesu zarih sual ngaidamnak thu cu nan hnenah phuan a si. ³⁹ Mawsi Dan cun thiam a lo coter thei lo. Asinan amah a zumtu hmuahhmuah cu thil hmuahhmuah ihsin Pathian in thiam a coter a si. ⁴⁰ Curuangah, ralring uh; cu lole profetpawl ih an rak sim mi kha nan parah a thleng pang ding. ⁴¹ Profetpawl in, ‘Nannih minautat hmangpawl, ngai hnik uh, nan mangbang uh la hloral uh! Ziangahtile, nanmai sanah hna pakhat ka ṭuan ding. Cumi cu mi in lo sim khal hai sehla, ka hnaṭuan cu nan zum lo ding, tin an sim,’ ” tiah a ti. ⁴² Jew-pawl in sinakok an suahsan tikah Paul le Barnabas cu Zentelpawl in hmai Sabbath Ni ah an thucah sim mi pehsal dingin an ngen. ⁴³ Sinakok khawmnak cu an ṭiak tikah, Jew mi tampi le an biaknak ih a lut mi Zentel Pathian ngaisak mi tampi in Paul le Barnabas cu an thlun. Annih in an hnenah thu an sim ih, Pathian zangfahnak ih um ringring dingin an fawrh. ⁴⁴ A hmai zarh Sabbath Ni ah an khawsen deuhthawin Pathian thu ngai dingin an pumkhawmaw. ⁴⁵ Jew-pawl in mipi tam zet an hmuh tikah an iksik tuk. Cule Paul ih thusim mipawl cu an el ih, a thusim dokalh in ṭawngsia an ṭawng. ⁴⁶ Cu tikah Paul le Barnabas in ralṭha zetin an sawn ih an hnenah, “Pathian thu nan hnenih kan sim hmaisat cu a ṭul a si. Cucu nannih in nan el ih, nanmah le nanmah kumkhawnunnak co tlak ih nan ruahawk lo ruangah, ngai hnik uh, Zentelpawl hnenah kan her thlang a si. ⁴⁷ Ziangahtile, Bawipa in thu in pek mi cu hitin a si, ‘Zentelpawl hnenih tleu si dingah le leitlun deng tiangih rundamnak thlentu si dingah ka lo ret zo,’ a ti,” tiah an ti. ⁴⁸ Cui thu cu Zentelpawl in an theih tikah an lung a awi zet ih, Bawipai thu cu an sunlawih. Cule kumkhawnunnak co dingin Pathian ih a ruat mipawl cun an zum. ⁴⁹ Cule Bawipai thu cu ram pumpuluk ah a thangdarh. ⁵⁰ Asinan Jew-pawl in Pathian ngaihsak mi upat tlak nunaupawl le khaw sungih hotu mipapawl kha an tawkhrawk. Cule Paul le Barnabas dokalh in tiduhdah an thawk ih an ram ihsin an dawisuak. ⁵¹ Cule Paul le Barnabas cun an ke-ih leivut an thingtla ih, Ikoniam ah an feh. ⁵² Cule dungthluntupawl cu lungawinak le Thlarau Thianghlim in an khat.

¹ Cun, hiti hi a rak si, Ikoniam khua ah Paul le Barnabas cu Jew-pawlih sinakok ah an luttlang ih thu an sim. Jew mi tampi le Grik mi tampi in an zum. ² Asinan zumlotu Jew-pawl in Zentelpawl an tawkhrawk ih, unaupawl tlunah thinlung sia nei ko an tuah. ³ Paul le Barnabas cu cu tawkah reipi an rung um ih, Bawipai thu cu ralṭha zetin an sim vivo. A zangfahnak thu an sim mi nemhngehnak ah hminsinnakpawl le mangbangzapawl an kut in tuah theinak a pek hai. ⁴ Asinan khaw sungih mipipawl cu an ṭhenaw ih, mi hrek in Jew-pawl an ṭan, mi hrek in apostolpawl an ṭan. ⁵ Cule Jew-pawl khalin Zentelpawl le an uktupawl thawn apostolpawl cu mualphoter ding le lungto ih deng dingin an dum. ⁶ Cumi cu apostolpawl in an theih tikah Likaonia peng sungih Listra khua, Darbi khua le a kiangkap ram ah an tlan. ⁷ Cu tawkah thuthangṭha an sim vivo. ⁸ Listra khua ah mi pakhat a ke ah tha zianghman um lo, a nu ih a hrinthlak ihsin kebai, vei khat hman feh dah lo pa cu a to. ⁹ Cu pa cun Paul-ih thusim a thei. Paul in cu pa cu a zoh keukeu ih, Bawipa in a damter ding ti zumnak a nei ti kha a hmu. ¹⁰ Cule aw ring zetin, “Na ke in dingten ding aw!” tiah a ti. Cule cu pa cu a hung khir ih a feh. ¹¹ Mipi in Paul ih tuah mi cu an hmuh tikah an au ih, Likaonia ṭawng in, “Pathianpawl minung vekah an cang ih, kan hnenah an rung ṭum a si hi!” tiah an ti. ¹² Barnabas cu Zeus an ti ih, Paul cu thusimtubik a si ruangah Hermes tiah an ko. ¹³ Zeus-ih temple cu khaw lengah a um ih, cu miih puithiam cun mipipawl thawn an hnenih raithawinak thah a duh ruangah cawcangpawl le pangpar kualpawl kawtka ah a rak keng. ¹⁴ Cumi cu apostol Barnabas le Paul in an theih tikah an hnipuan an thlek ih, mipi lakah an tlan ih an au ih, ¹⁵ “Pulenuh, ziangruangah hivek thil tla nan tuah rero? Kannih khal nanmah vek milai menmen kan si ve. Kannih cun a ṭhahnem lo mi hi thilpawl ihsin lei le van le tifinriat le a sungih um mi hmuahhmuah a tuahtu Pathian nung hnenah nan hawikirsal theinak dingah nan hnenah thuthangṭha kan lo sim a si. ¹⁶ Hlanlaiah cun Pathian in miphun hmuahhmuah anmai duh mi lamzin ih feh a siang hai. ¹⁷ Sikhalsehla, thilṭha a tuah mi in amah le amah minung hnenah phuangaw loin a um lo. Van ihsin ruahpi le thlairahpawl anmai can teah in pe. Kan nunnak cu rawl le lungawinak thawn a khatter,” tiah an ti. ¹⁸ Cui thupawl an sim na cing hmanin an hnenah raithawi lo dingin mipi cu an dawn thei ceu. ¹⁹ Cule Jew-pawl cu Anṭiok khua le Ikoniam khua ihsin cu tawkah an ra ih, mipi an lemneh hnuah Paul cu lungto in an deng. A thi zo ah an ruat ih, khaw lengah an hnuksuak. ²⁰ Asinan dungthluntupawl in an kulh vialvi laiah a tho ih, khaw sungah a lut. A thaisun ah Paul le Barnabas cu Darbi khua ah an feh. ²¹ Cule cui khua ah thuthangṭha an sim ih, dungthluntu tampi an tuah. Cui hnuah Listra khua, Ikoniam khua le Anṭiok khua ah an kir. ²² Dungthluntupawlih thinlung cu an hngetter ih, zumnak ah um ringring dingin tha an pe. Cule, “Pathian uknak sungih a luttu ding kannih cun harsatnak tampi tawng ding hrimhrim kan si,” tiah an ti. ²³ Cule kawhhran tinah elder-pawl an ruatsak vivo. Rawlul in thla an cam hnuah zumtupawl cu an zum mi Bawipai hnenah an apta vivo. ²⁴ Pisidia ram an lan hnuah Pamfilia ram an thleng. ²⁵ Perga khua ih thuthangṭha an sim hnuah Attalia khua ah an feh. ²⁶ Cu tawk ihsin Anṭiok khua ah lawng in an feh. Cu tawk hmun cu an rak ṭheh zo mi hna kha ṭuan dingin unaupawl in Pathian zangfahnak ih an rak apnak hmun kha a si. ²⁷ An thlen tikah kawhhran mipawl an kokhawm ih, anmah hmang in Pathian in a tuah mi hmuahhmuah le Zentelmi hnenih zumnak sangka a awnsakziapawl tla an sim. ²⁸ Cule cu tawkah dungthluntupawl hnenah reipi an um.

¹ Judia ram ihsin mi hrekkhat Anṭiok khua ah an ra ih, “Mawsi thupek bangtukin serh nan tan lo asile rundam nan si thei lo ding,” tiah unaupawl cu an zirh. ² Paul le Barnabas cu lungkimlonak nasazet an nei ih, cupawl cu an el. Cule Paul, Barnabas le unau dang hrekkhatpawl cu Jerusalem ah vung feh in hi thu hi apostolpawl le elder-pawl hnenih thlen dingin unaupawl in an relcat. ³ Curuangah, kawhhran in annih cu an thlah ih, Fonisia ram le Samaria ram pal phahin Zentelmipawl Pathian lamah ziangvekin an hawikir zo ti an sim phah vivo. Cui thuthang cun unaupawl hmuahhmuah lung a awiter zet. ⁴ Jerusalem an thlen tikah, kawhhran le apostolpawl le elder-pawl cun an rak hmuak ih, anmah hmang in Pathian ih a rak tuah mi thil zaten an sim. ⁵ Cu tikah Farasi mi zumtu hrekkhatpawl cu an ding ih, “Zentelpawl cu serh an tan tengteng a ṭul. Mawsi dan thlun dingin thu kan pek a ṭul a si,” tiah an ti. ⁶ Cule cui thusuhnak ruatkhawm dingah apostolpawl le elder-pawl cu an tawngawkhawm. ⁷ Reipi an relkhawm hnuah, Peter cu a ding ih an hnenah, “Pulepawl le u le nau pawl, Zentelpawl in thuthangṭha thucah ka kaa ihsin an thei ih an zum theinak dingah hlan deuhah Pathian in kan lak ihsin a hril a si ti nan thei. ⁸ Cule thinlung theitu Pathian cun kan hnenih Thlarau Thianghlim a pek bang khan an hnen khalah pe in a pawm hai a si. ⁹ Zumnak in an thinlung cu a thianfaiter zo ruangah, Pathian in anmah le kanmah karlakah danglamnak a ret lo. ¹⁰ Curuangah kanmah le kan pupapawl ih phurh thei lo mi kawn cu dungthluntupawlih hngawng ah bat in Pathian cu ziangruangah nan hniksak? ¹¹ Asinan Bawipa Jesu Khrih-ih zangfahnak thawngin rundam an si vekin kannih khal rundam kan si ve ding ti kan zum,” tiah a ti. ¹² Mipi zaten daiten an um ih, Barnabas le Paul ih thusim cu an ngai. Anmah hmang in Pathian in Zentelmipawl lakih thilmakpawl le mangbangzapawl a tuah mi hmuahhmuah cu an sim. ¹³ Cule daitei an um hnuah James in a sang hai ih, “U le nau tla, ka thu hi ngai hnik uh. ¹⁴ Amai hmin putu ding mi hril dingah Pathian in a hmaisabik Zentelpawl a vehvaihdan Simon in in simfiang zo. ¹⁵ Cui thu cu profetpawlih thu thaw khalin an milaw a si. Hitiin ngan a si, ¹⁶ ‘Himi hnuah ka kirsal ding ih a tlu zo mi David-ih biakbuk cu ka sak ding. A siatbal mipawl cu ka saksal ding ih ka tungding ding. ¹⁷ Cucu a tang mi minungpawl le ka hmin pu Zentelpawl hmuahhmuah in BAWIPA an hawl theinak dingah a si. Hi thilpawl hmuahhmuah tuahtu BAWIPA in a ti,’ tiah a ti. ¹⁸ “Leilung semtir ihsin Pathian in amai hnaṭuan mi hmuahhmuah cu a thei ṭheh. ¹⁹ Curuangah, Pathian lamih a hawikir mi Zentelpawl hrangah harsatnak pe hlah uhsi. Cucu kei ka thuṭhendan a si. ²⁰ Cu hnakin milempawl ih an bawrhhlawhter mipawl, nu le pa sualnak, hngawng rek ih thah mi sa le sathipawl hrial dingin ca kan kuat sawn pei. ²¹ Ziangahtile, hlanlai san ihsin Dan thu cu khaw tinah an rak sim zo ih, Sabbath Ni tinin sinakokpawl ah an siar,” tiah a ti. ²² Cule apostolpawl, elder-pawl le kawhhran zatein Anṭiok khua ih thlah ding mi anmah lak ihsin hril ding cu thilṭha ah an ruat. Paul le Barnabas thawn feh dingah unaupawl lakih hruaitu Barsabas ti khalih an kawh mi Judas le Silas an hril. ²³ Cule hi cakuat, “Kannih apostolpawl le elder-pawl le unaupawl in Anṭiok khua, Siria ram le Silisia ram ih a um mi Zentel zumtu hnenah ca kan lo kuat. Cibai kan lo buk! ²⁴ Kan hnen ihsin mi hrekkhat nan hnenah ra in an ṭawngkam in harsatnak an lo pe ih, nan thinlung an lo buaiter ti kan thei. “Serh nan tan tengteng ding ih, Dan nan thlun tengteng ding,” an lo ti. Cuvek thupek cu an hnenah kan pe lo. ²⁵ Kan duhdawt mi Barnabas le Paul thawn hril mipawl nan hnenih thlah cu thil ṭha a si ding tiah tawngkhawmaw in lungrualten kan ruat. ²⁶ Barnabas le Paul cu kan Bawipa Jesu Khrih hmin ruangah an nunnak tiang a pe siangtu an si. ²⁷ Curuangah, Judas le Silas cu kan thlah ih, annih in an kaa in kan ngan mi thupawl cu an lo sim ding. ²⁸ Ziangahtile, Thlarau Thianghlim le kannih cun hi thil ṭul pawimawhpawl hnakih ritsawn lo phurhter lo ding cu thil ṭha ah kan ruat. ²⁹ Thil ṭul mipawl tla cu, milem hnenih an hlan mi rawl si seh, sathi si seh, hngawng rek ih thah mi sa si seh, nu le pa sualnak si seh hrial uh. Cui thilpawl nan hrial asile nan tiṭha ding. Damten,” ti hi anmah hnenin an kuat. ³⁰ Cuti cun an ṭiak tikah Anṭiok khua ah an feh. Cule mipi an kokhawm ih, cakuat cu an pe. ³¹ Cui ca an siar ṭheh tikah, thapeknak thucah a si ruangah an lung a awi. ³² Judas le Silas khal cu profet an si ih, unaupawl cu tha an pe ih, thucah tampi hmang in tha an cakter. ³³ Cu tawkih tawkfang an cam hnuah unaupawl in apostolpawl hnenah hnangamten kirsal dingin an thlah. ³⁴ Asinan Silas cun cu tawkih tanta hrih cu ṭha in a ruat. ³⁵ Cule Paul le Barnabas khal Anṭiok khua ah cun an um ih, midang tampi thawn Bawipai thu cu an zirh ih an phuang. ³⁶ Ni tampi hnuah Paul in Barnabas hnenah, “Bawipai thu kan rak sim zonak khaw tinah fehsal in unaupawl ziang an bang ti kan va zoh pei,” tiah a ti. ³⁷ Barnabas in Mark an ti mi John kha an hnenih hruai a duh. ³⁸ Asinan, Pamfilia ram ah anmah tlunsan in hnaṭuannak ih an hnenih feh ve lotu Mark hruai cu Paul in ṭha in a ruat lo. ³⁹ Cuvek lungruallonak nasazet an neih ruangah pakhat le pakhat an ṭhenaw. Barnabas cun Mark a hruai ih, Saipras tikulh lamah lawng in an feh. ⁴⁰ Cun, unaupawl in Paul cu Pathian zangfahnak ah an ap ih, anih in Silas a hril ih an feh. ⁴¹ Cule Siria ram le Silisia ram ih kawhhranpawl an cakter vivo.

¹ Cule Paul cu Darbi khua le Listra khua a thleng. Cule, ngai hnik! Cu tawkah zumtu Jew-nui fapa Timothy ti mi dungthluntu pakhat a um. Asinan a pa cu Grikmi a si. ² Amah cu Listra khua le Ikoniam khua ih unaupawl in an fak zet. ³ Paul in Timothy cu a khualtlawnnak ih hruai a duh ruangah a ko ih serh a tansak. Ziangahtile, cui kiangkap ih Jew-pawl hmuahhmuah in Timothy-ih pa cu Grikmi a si ti an thei. ⁴ Khaw tin an pal phahah Jerusalem ih apostolpawl le elder-pawl in an thlun ding ih an relcatsak mi danpawl cu an pe phah vivo. ⁵ Curuangah kawhhranpawl tla cu zumnak ah an cak sinsin ih, ni tinin mipum an karh. ⁶ Cule Frizia ram le Galatia ram an fang. Thlarau Thianghlim in Asia ram ih thusim ding a kham hai. ⁷ Misia peng an thlen tikah Bithinia ram sung luh an tum. Asinan Thlarau in an luh ding a siang lo. ⁸ Cu tikah, Misia peng hrial in Troas khua ah an feh. ⁹ Cule, zan ah hi larawknak hi Paul hnenah a lang. Masidonia ram ihsin mi pakhat cu ding in, “Masidonia ram ah ra aw la, in ra bawm aw,” tiah a ngen. ¹⁰ Cutin Paul in larnak a hmuh ṭheh veten hmakhatteah Masidonia ram ih feh dingin kan timtuahaw. An hnenih thuthangṭha sim dingin Bawipa in in ko a si hi tiah kan ruatcat. ¹¹ Curuangah Troas khua ihsin lawng in dingten Samothrace khua ah kan feh. Cule a thaisun ah Nipolis khua ah kan feh. ¹² Cu tawk ihsin Rom mipawl um hleicenak Masidonia ram, peng pakhat ih an khawpibik Filipi khua kan feh. Cu tawk khaw sungah ni tawkfang kan cam. ¹³ Cule thla an cam ṭheunak hmun khaw leng tiva kapah Sabbath Ni ah kan feh. Kan to ih, cu tawkih a rakhawm mi nunaupawl hnenah thu kan sim. ¹⁴ Thiatira khaw mi, puan sendup a zuartu Lydia ti mi nu cu Pathian betu a si ih, Paul-ih thusim mipawl ṭhatei ngai dingin Bawipa in a thinlung a awnsak. ¹⁵ Cule amah le a insang zaten baptisma an co ṭheh hnuah, “Bawipa ah mirinum siih in ruah asile ra uh la ka inn ah ra cam uh,” tiah in ngen. Cutin hranhramin in sawm. ¹⁶ Cule hiti hi a rak si, thlacamnak hmun ih kan feh laiah khawse pawlh mi hmai lam thu a simsung theitu siahhlawh nute pakhat in in rak tawng. Hmai lam thu a simsungnak in a pulepawl hrangah tangka tampi a ngah. ¹⁷ Cu nute cun Paul le kanmah in thlun ih, “Hipawl hi Cungnungbik Pathian siahhlawh tla an si. Kan hnenah rundamnak lamzin thu an phuang a si,” tiah a au vivo. ¹⁸ Cutivekin ni tampi a tuah. Paul cu thinna zetin khawse lamah a heraw ih, “Hi nui sung ihsin suak dingin Jesu Khrih hmin in thu ka lo pe,” tiah a ti. Cule hmakhatteah khawsia cun a suahsan. ¹⁹ Asinan a pulepawl in an ruahsan mi hlawknak cu a um nawn lo ti an hmuh tikah Paul le Silas cu an kai ih, thuneitupawl hmaiih dingter dingin dawrhmun ah an dirhlut. ²⁰ Cule khawpi uktu bawipawl hnenah an hruai ih, “Hipawl hi Jew-mi an si ih, kan khaw sungah buainak nasazet an suahter. ²¹ Kannih Rom mi hrangah kan cohlan thei lo mi le kan thlun thei lo mi dan kalh mi nunphung tla an zirh,” tiah an ti. ²² Cule mipi cu Paul le Silas dokalh in an tho. Cule khawpi uktu bawipawl in an hnipuan an thleksak ih, fung thawn vaw dingin thu an pe. ²³ Vei tampi an vuak hnuah thawng sungah an hlawn ih, thawnginn kiltupa cu ṭhatei kil dingin thu an pe. ²⁴ Cui thupek a dawnsawn hnuah Paul le Silas cu thawnginn sungta pindan ah a hlawn hai ih, an ke ah hreng a sut hai. ²⁵ Zanṭim hrawngah Paul le Silas cu thla an cam ih, Pathian thangṭhatnak hla an sak. Cule thawngtlapawl in an ngai. ²⁶ Cule rinlopiah nasazetin ling a hnin ih, thawnginn lungphumpawl a hnin ṭheh. Hmakhatteah thawnginn sangkapawl an awngaw ṭheh ih, thawngtlapawl hmuahhmuah ih thir cikcinpawl tla an phawihaw ṭheh. ²⁷ Cule thawngtla kiltupa cu a ihthahnak ihsin a hung ṭhang tikah thawnginn sangkapawl awngaw in a hmu. Thawngtlapawl an tlan ṭheh zo ah a ruat ih, a ralnam a zuk ih, amah le amah thahawk a tum. ²⁸ Asinan Paul cu aw ring zetin a au ih, “Nangmah le nangmah tuahmawhaw hlah aw, ziangahtile kan zaten hi tawkah kan um thluh ko,” tiah a ti. ²⁹ Cule thawngtla kiltu in meifar a dil ih a tlanlut. Ṭih in a khur rero ih, Paul le Silas ke hramah a bawk. ³⁰ Cule lengah a hruai hai ih, “Pulenuh, rundam si dingah ziang ka tuah ding?” tiah a ti. ³¹ Cule annih in, “Bawipa Jesu Khrih zum aw la, rundam na si ding, nangmah le na insungsang in,” tiah an ti. ³² Cule Bawipai thu cu amah le a inn ih umpawl zate hnenah an sim. ³³ Cui zan lala ah Paul le Silas cu a hruai hai ih an hriamhmapawl cu a khawlhsak. Cule amah le an sungkua zaten baptisma an co cih. ³⁴ A inn ih a hruai hai hnuah an hmaiah rawl a hunsak hai. Amah le a insangpawl hmuahhmuah in Pathian an zum ruangah an lung a awi zet. ³⁵ Cule khua a van tikah, khawpi uktu bawipawl in palik bawipawl an hei thlah ih, “Khapawl kha thlah uh,” tiah an ti. ³⁶ Cule thawngtla kiltupa in cui thupawl cu Paul hnenah a than ih, “Khawpi uktu bawipawl in nanmah lo suah dingin thu in pe zo. Curuangah atu ah nan suak thei a si. Hnangamten feh uh,” tiah a ti. ³⁷ Asinan Paul in palik bawipawl hnenah, “Rom mi kan si ve ko nain thu zianghman zawihliahta loin langhnganin in vua ih, thawng sungah in hlawn. Atu ah athupten in dawihlo ding maw si? A si thei hrimhrim lo! Anmah rori ra in in ra suah hai seh,” tiah a ti. ³⁸ Cule palik bawipawl in cui thu cu khawpi uktu bawipawl an sim tikah Rom mi an si ti an thei ih an ṭih. ³⁹ Cule an va feh ih, thawnginn ihsin an suah hnuah khaw sung ihsin suak dingin an dil. ⁴⁰ Paul le Silas cu thawnginn ihsin an suah hnuah Lydia-ih inn ah an feh. Cu tawkah unaupawl an tawng ih tha an pe. Cule cui khua ihsin an suak.

¹ Paul le Silas cu Amfipolis khawpi le Appollonia khua an tlawngsuak ih, Thessalonika khua an thleng. Cu tawkah Jew-pawlih sinakok a um. ² A tidan ṭheu vekin Paul cu an hnenah a feh ih, Sabbath Ni ni thum sung anmah thawn Cathianghlim sung thu an relkhawm. ³ Khrih cun a tuar tengteng a ṭul ti le mithi lak ihsin a thawhsal tengteng a ṭul ti cu Paul in a simfiang ih a nemhnget. Cule anih in, “Nan hnenih ka phuan mi Jesu hi Khrih cu a si,” tiah a ti. ⁴ Cule mi hrekkhatpawl in an zum ih, Paul le Silas cu an kawp. Pathian ngaihsaktu Grikmi burpi le nunau hotupawl mi tampi in an kawp ve. ⁵ Asinan a thusim pawmlotu Jew-pawl cun an nahsuah ih, dawr hmun ihsin miṭhalopawl kha an sawmkhawm ih, khaw sungah buainak tuah an thawk. Mipi hmaiih hruai ding duh ah Jason-ih inn cu an va luhhnawh ih an hawl. ⁶ An hmuh lo tikah, Jason le unau hrekkhatpawl cu khawpi uktu bawipawl hmaiah an dirsuak ih, “Leitlun linglettertupawl cu hi tawk khalah an ra thleng. ⁷ Annih cu Jason in a rak cohlang hai ih, an zaten Kaisar-ih thupek an dokalh. Siangpahrang dang a um, a hmin cu Jesu a si an ti,” tiah an au. ⁸ Cutiih an au cu mipi le khawpi uktu bawipawl in an theih tikah an buai ṭheh. ⁹ Cule Jason le a dangpawl cu amkhamnak tangka an pekter ih an thlah. ¹⁰ Cule zan ah unaupawl in Paul le Silas cu Beria khua ah an thlah lohli. An thlen tikah, Jew-pawlih sinakok ah an feh. ¹¹ Cu tawkih mipawl cu Thessalonika mipawl hnakin an ṭhasawn. Thu cu hlawptlo zetin an cohlang ih, Paul-ih thusim mi cu a dik maw diklo thei dingah ni tinten fimkhur zetin Cathianghlimpawl an hliakhlai. ¹² Curuangah mi tampi in an zum. Upat tlak Grik nunaupawl le Grik mipa tampi khalin an zum. ¹³ Asinan Thessalonika khua ih Jew-pawl in Paul in Beria khua khalah Pathian thu a sim ti an theih tikah, cu tawk khalah Jew-pawl cu an feh ih, mipi an tawkhrawk. ¹⁴ Cule unaupawl in hmakhatteah Paul kha tifinriat lamah an kuat. Asinan Silas le Timothy cu cu tawkah an rung tang. ¹⁵ Paul cu a thlahtupawl in Athen khua tiang an hruai. Cu tawkah Paul in a rang theibik in Silas le Timothy amai hnenih ra dingin thupek an hnenah a cah hai ih an tlung. ¹⁶ Paul in Silas le Timothy kha Athen khua ihsin a hngah hai laiah, cui khawpi cu milem in a khat ti a hmuh tikah a thinlung a na zet. ¹⁷ Curuangah Jew-pawl le Pathian ngaihsaktu midangpawl cu sinakok sungah thu a relpi. Cule ni tinten dawr hmun ih a tawn mi hmuahhmuah thu a relpi. ¹⁸ Khawruat thiam mifim Epikuras-ih dungthluntupawl le Stoa mipawl khalin an tawng. Cule mi hrek in, “Hi mitlawkciarpa hin ziang sim a duh?” tiah an ti. Midangpawl in, “Ram dang pathianpawlih thuhla a sim a bang,” tiah an ti. Ziangahtile, Jesui thuthangṭha le thawhsalnak thu an hnenih a sim ruangah a si. ¹⁹ Cule Paul cu an kai ih, Areopagus ah an hruai ih, “Na aupi mi zirhnak thar hi ziang a si ti kan thei thei pei maw? ²⁰ Ziangahtile, kan hna ah thil lamdangpawl na run keng. Hi thilpawlih tican theih kan duh,” tiah an ti. ²¹ Athen khaw mi hmuahhmuah le cu tawkih um ram dang mi tla cu an can lawng hmuahhmuah cu thil dang zianghman tuah loin thu thar simnak asilole ngaithlaknak ah an hmang ṭheu. ²² Cule Paul cu Areopagus ah a ding ih an hnenah, “Nannih Athen khaw mipawl, ziangkimah sakhaw ngaihsak zet mi nan si ti ka thei. ²³ Ziangahtile, ka len phahah nan biak mipawl ka zoh ih, biakṭheng pakhat ka hmu. Cui parah cun, ‘ ZOHMANIH THEIH LO MI PATHIAN HNENAH’ tiih ngan mi ka hmu. Curuangah thei lopiih nan biak mi pa hi, nan hnenih ka phuan mi hi a si. ²⁴ Cui Pathian cun leilung le a sungih um mi hmuahhmuah hi a tuah. Anih cu lei le van ih Lal a si ruangah minung kut ih sak mi temple-pawl ah a um lo. ²⁵ Amah in mi hmuahhmuah hnenah nunnak, thaw le thil hmuahhmuah a pek ruangah ṭulsam mi nei vekin minungpawl in an kut ih amah an ren ding khal a ṭul lo. ²⁶ Leitlun pumpuluk ih um dingah thisen pakhat ihsin miphun hmuahhmuah a tuah. Cule tikcucanpawl le an umnak ding hmun ramripawl tla a ruatsak. ²⁷ Anih cu kanmah lakih zo thaw hmanin a hlat lo na cingin, minungpawl in Bawipa cu an hawl ih, an dap ih an hmuhsuak theinak dingah Pathian in hihi a tuah a si. ²⁸ Ziangahtile, amai zarin kan nung, kan cangvai, kan um a si. Thungaiten, nan hla phuahthiam hrekkhatpawl in, ‘Ziangahtile, kannih cu a tefa kan si,’ an ti a si. ²⁹ Cutiih Pathian-ih tefa kan si ruangah Pathian-ih sinak cu minung thiamnak le ruahnak ih tuah mi sui, ngun le lungto milem thawi bangaw ih kan ruat ding a si lo. ³⁰ Hlanlaiah Pathian in an theihlonak kha hmu lo vekin a umsan. Asinan atu ah cun hmun kipih mi hmuahhmuah sual sir dingin thu a pe. ³¹ Ziangahtile, a ruah cia zo mi pa hmang in dik zetih leitlun thu a ṭhen ding ni cu a khiah zo. Cucu amah cu mithi lak ihsin a thawhternak khan Pathian in mi hmuahhmuah hnenah hi thuhla a fengzia a langter a si,” tiah a ti. ³² Mithi thawhsalnak thu an theih tikah mi hrekkhat in an hnihsan. Midangpawl in, “Hi thu hi na hnen ihsin ngaithlaksal kan duh,” tiah an ti. ³³ Cui hnuah Paul cu an hnen ihsin a fehsuak. ³⁴ Mi malte cun Paul an kawp ih an zum. Cuipawl lakah Areopagus sungtel pakhat Dionisias a tel ve. Damaris an ti mi nu pakhat le midang khal an hnenah an tel.

¹ Cui thilpawl a cem hnuah Paul cu Athen khua suahsan in Korinth khua ah a feh. ² Cu tawkah Ponṭas ram ih suak mi Jew-mi pakhat Akuila a tawng. Rom Siangpahrang Klaudias in Jew-mi hmuahhmuah cu Rom khua ihsin suak dingin thu a pek ruangah Akuila cu Italy ihsin a nupi Prisilla thawn tui hlan reilo teah Korinth ah an ra tlan. Paul cu anmah hmu dingin a feh. ³ An hnaṭuan a bangawk ruangah an hnenah a um ih hna a ṭuan. An hnaṭuan cu puanthlam sak a si. ⁴ Cule Sabbath Ni tinten Paul cun sinakok ah thu a relpi hai ih, Jew-pawl le Grikmipawl cu simfiang a tum. ⁵ Silas le Timothy cu Masidonia ram ihsin an ra thlen tikah Thlarau in Paul cu a turhnawh. Curuangah Jew-pawl hnenah Jesu cu Khrih a si ti thu a simfiang. ⁶ An do ih, anmah dokalhnak ṭawngsia an ṭawng tikah Paul cu a hnipuan a thing ih, “Nan thisen cu nanmai lu parah tla seh. Kei cu nan thisen ihsin ka thiang a si. Atu thawkin Zentelpawl hnenah ka feh thlang ding,” tiah a ti. ⁷ Cule Paul in sinakok a suahsan ih, Jasṭas an ti mi pai inn ah a feh. Cu pa cu Pathian betu a si ih, a inn cu sinakok kiang teah a um. ⁸ Cule sinakok hruaitu Krispas cun Bawipa a zum. A insangpawl khalin an zum. Paul-ih thusim mi an theih tikah Korinth khaw mi mi tampi in an zum ih, baptisma an co. ⁹ Zan khat cu larawknak ah Bawipa in Paul hnenah, “Ṭih hlah. Thu sim vivo aw, daiten um hlah. ¹⁰ Ziangahtile, na hnenah ka um. Zohman in na parah lo tuahmawh dingin kut an thlak lo ding. Ziangahtile, hi khua ah minung tampi ka nei,” tiah a ti. ¹¹ Curuangah, Paul cu cu tawkah kum khat le thla ruk a um. Cule an hnenah Pathian thu a zirh hai. ¹² Gallio cu Akhaia ram uktu a si laiah lungrualten Jew-pawl in Paul cu an do. Cule thuṭhennak tohkham ah an hruai. ¹³ Cule, “Hi pa in Dan thawi kalhaw in Pathian be dingah mipi neh ding a tum a si,” tiah an ti. ¹⁴ Cule Paul cu a kaa a an zik zawngah, Gallio in Jew-pawl hnenah, “Nannih Jew-pawl, dingfellonak thu asilole bumawknak siava thu ih phunzai si uh la cu nan thu ka lo ngai ding. ¹⁵ Asinan ṭawngkampawl le hminpawl le nanmai Danpawl thusuhnak tla an tel ih nanmahte in tifel uh. Ziangahtile, kha vek thil thuṭhentu si ka duh lo,” tiah a ti. ¹⁶ Cule thuṭhennak tohkham ihsin a dawisuak hai. ¹⁷ Cule Grikmipawl hmuahhmuah in sinakok hruaitu Sosthenes kha an kai ih, thuṭhennak tohkham hmaiah an vuak. Asinan Gallio cun cui thilpawl cu zianghmanah a siar lo. ¹⁸ Paul cu Korinth khua ah reipi a um hnuah unaupawl hnenah damten a ti ih, Siria ram ah lawng in a feh. A hnenah Prisilla le Akuila khal an feh ve. Thu a tiam zo ruangah Kenkheria khua ah a lu a met. ¹⁹ Cule Efesa khua an thleng ih, cu tawkah Prisilla le Akuila cu a tanta. Paul amah rori sinakok ah a lut ih, Jew-pawl thu a relpi. ²⁰ Jew-pawl in an hnenih can tamdeuh pe dingin an dil tikah a lung a kim lo. ²¹ Asinan, damten ti phahin an hnenah, “Jerusalem ih um cing ding mi puai cu ziangti lam khalin ka hman tengteng a ṭul. Pathian in rem a ti asile nan hnenah ka kirsal ding,” tiah a ti. Cule Efesa khua ihsin lawng in a feh. ²² Cule Sisaria khua ih a ṭum hnuah a hung so ih, kawhhran mipawl cibai a buk. Cule Anṭiok ah a rung suk. ²³ Anṭiok khua ah can tawkfang a hman hnuah khual a tlawngsal. Cule Galatia le Frizia ram hmuahhmuah a sangsangten a tlawng ih, dungthluntupawl hmuahhmuah a cakter vivo. ²⁴ Cu laiah Alexandria khua ih suak Jew-mi pakhat Apollos an ti mi cu Efesa khua ah a ra thleng. Amah cu ṭawngkam thiam zet le Cathianghlim thu thei zet mi a si. ²⁵ Hi pa hi Bawipai lamzin thuhla ah an rak zirh zo mi a si. Cule a thinlungih duhnak nasazet thawn Bawipai thuhla cu dik zetin a zirh. Asinan John-ih baptisma thu lawng a thei. ²⁶ Cule sinakok ah ralṭha zetin thusim a thawk. Asinan Akuila le Prisilla in a thusim an theih tikah a dang deuhah an hruai ih, Pathian lamzin thu cu diksin in an simfiang. ²⁷ Apollos cu Akhaia ram ih feh a duh tikah, unaupawl in cu tawkih dungthluntupawl hnenah an rak cohlan theinak dingah ca an ngansak. A va thlen tikah zangfahnak ruangih zumtupawl kha nasazetin a bawm hai. ²⁸ Ziangahtile, langhnganih elawknak ah Jew-pawl cu Apollos cun a neh neknek hai ih, Jesu cu Khrih a si ti Cathianghlim ihsin a simfiang hai.

¹ Cule hiti hi a rak si, Apollos cu Korinth khua ih a um laiah Paul cu Efesa khua thleng dingin cui ram sung hrut vivoin a tlawng. Cu tawkah dungthluntu hrekkhatpawl tla a hmu. ² Anih in an hnenah, “Nan zum tikah khan, Thlarau Thianghlim nan rak co maw?” tiah a sut hai. Cule annih in, “Thlarau Thianghlim a um le um lo hman kan thei lo,” tiah an ti. ³ Cule Paul in, “Ziang baptisma so nan co?” tiah a ti. Annih in, “John-ih baptisma kan co,” tiah an sawn. ⁴ Cule Paul in, “John cun sualsirnak baptisma a pe taktak ih, a hnu ih a ra ding mi pa zum dingin mipipawl cu a sim. Cu pa cu Khrih Jesu a si,” tiah a ti. ⁵ Cui thu an theih tikah Bawipa Jesu Khrih hmin in baptisma an co. ⁶ Cule, Paul in an parah a kut a suang ih, Thlarau Thianghlim cu an parah a rung thleng. Cule ṭawng phun dangdangin an ṭawng ih, profetpawl vekin thu an phuang. ⁷ An zaten patling hleihnih hrawng an si. ⁸ Paul cu sinakok ah a lut ih, thla thum sung ralṭha zetin thu a sim. Pathian uknak thu mi a relpi ih, mi a fiangter. ⁹ Asinan mi hrekkhat cu an thinlung an hakter ih an zum lo ih, mipi tam zet hmaiah cui Lamzin thu dokalh in ṭawngsia an ṭawng ciamco. Cu tikah anmahpawl cu Paul in a tlansan hai ih, dungthluntupawl kha amah hnenah a hruai ih, Tirannas-ih thuzirhnak inn ah ni tinten thu a relpi hai. ¹⁰ Cutivekin kum hnih sung a um ih, Asia ram sungih a um mi Jew-mi le Grikmi hmuahhmuah in Bawipa Jesu-ih thu an thei. ¹¹ Cule Pathian in Paul kut in thilmak hleicepawl tla a tuah. ¹² Cutin a takpum ihsin pavua le taingerh puan tla cu minapawl hnenah an keng. Cule an natnak in a tlansan ih an sung ihsin khawse siavapawl an suak. ¹³ Asinan khawse siava dawisuak ih hmun kipih vakvai Jew mi hrekkhat cu tawkah an um. Cupawl cun khawse siavapawl parah Bawipa Jesu hmin ko vein, “Paul ih sim mi Jesu hmin in suak dingin thu kan lo pe,” tiah an ti. ¹⁴ Cu tawkah Jew-mi puithiam sang a si ve mi Skeva an ti mi pa a um. A fapa pasarihpawl in cu tivek cun an tuah ciamco. ¹⁵ Cule khawse siava in a let ih an hnenah, “Jesu ka thei, Paul khal ka thei. Asinan nanmah cu zo nan si?” tiah a ti hai. ¹⁶ Khawse siava neitupa cu an parah a khir ih anmah cu a neh thluh. An zate hnakin a caksawn. Cui inn ihsin taklawng le hriamhma thawn an tlansuak. ¹⁷ Cui thu cu Efesa khua ih a um mi Jew-pawl le Grikmipawl hmuahhmuah in an theih tikah Pathian ṭihzahnak cu an zate parah a thleng ih, Bawipa Jesu hmin cu an thangṭhat. ¹⁸ Cule cu tawkah a zumtu mi tampi ra in an sualnak an phuang ih thil ṭha lo an tuah mipawl an phuanglang. ¹⁹ Dawi hmang mi tampi in an cazualpawl an rak kengkhawm ih, mi zapi hmaiah an ur. Cui cazualpawlih man cu an kawm tikah ngun tangka thawngsawmnga a si. ²⁰ Cutivek cun Bawipai thu cun nehnak a ngah ih nasazetin a karhzai sinsin. ²¹ Hi thilpawl a can ṭheh hnuah Paul in Masidonia ram le Akhaia ram tlawngta in Jerusalem ih feh dingin a thinlung sungin a tum. Cule, “Cu tawk ka thlen hnuah Rom khal ka hmuh tengteng a ṭul,” tiah a ti. ²² Cuti cun amah riantu mi pahnih Timothy le Erasṭas cu Masidonia ram ah a thlah hai ih, amah cu Asia ram ah malte sung a rung tang. ²³ Cui can hrawngah Lamzin thuthawn pehparawin buainak nasazet a suak. ²⁴ Ziangahtile, ngun bur thiam Demeṭrias an ti mi pa in Arṭemis khuavangnu-ih temple zuk kha ngun in a tuah ih a tuah thiamtupawl cu hlawknak tampi a pe. ²⁵ Amah in cupawl le cuvek hnaṭuan a ṭuantupawl cu a kokhawm ih an hnenah, “Pulenuh, hi hnaṭuannak ihsin sum lakluhnak ṭha kan nei ti nan thei. ²⁶ Cule Efesa khua lawngah si loin Asia ram pumpi ah hi Paul hin mi tampi cu neh in a hawikirter ti cu nan hmu ih nan thei. Milai in kut ih an tuahcawp mi pathian tla cu pathian an si lo tiah a ti. ²⁷ Kan hnaṭuan hminṭhatnak hi zianghmanlo ah a cang pang ding ti phan a um. Cu lawng si loin Asia ram ih um mi hmuahhmuah ih an biak mi le leilung tlun khua zakip khalih biak mi a ropi zet mi Arṭemis khuavangnu-ih temple khal hi hmuhsuam a si ding ih, a ropitnak khal siatsuah a si pang ding ti phan a um,” tiah a ti. ²⁸ Cumi cu mipi in an theih tikah, thinhengnak in an khat ih, “Efesa khaw mipawlih Arṭemis cu a ropi a si!” tiah an au. ²⁹ Cule khaw sung cu buainak in an khatter. Cule mipi cun Paul thawn khual a tlawngtlang mi Masidonia mi Kaias le Aristarkhas cu an kai ih, lungrualten zohnuam zohnak tualrawnpi ah an tullut. ³⁰ Paul cu mipi lakih luh a duh tikah dungthluntupawl in cutiih a tuah ding an siang lo. ³¹ Cule Asia ram ih thuneitu a rualpi hrekkhatpawl khalin cui zohnuam zohnak hmun ih va feh hrimhrim lo dingin thu an cah ih, an ngen. ³² Mi burpi lakah buainak a um ruangah mi hrek in thu pakhat an au ih, mi hrek in thu dang an au. Mi tamsawn in ziangruangah hmunkhat ah kan ra pumkhawmaw ti an thei lo. ³³ Jew mi hrekkhatpawl in mipi lak ihsin Alexander kha hmai lamah an tul. Cule Alexander cun daitei um dingin mipi cu a kut a zap ih, mipi hmaiih amah le amah humhimawk a duh. ³⁴ Jew-mi a si ti an theih tikah an zaten aw rual zetin nazi pahnih sung hrawng, “Efesa khaw mipawlih Arṭemis cu a ropi a si!” tiah an au. ³⁵ Cui khua ih cazipa in mipi cu a daiter ih, an hnenah, “Nannih Efesa khaw mipawl, Efesa khawpi cu Arṭemis khuavangnui temple le van ihsin a tla mi milem kilkhawitu a si ti thei lo zo tal nan um maw si? ³⁶ Hi thupawl cu zohman ih an el thei lo mi a si ruangah, daiten um uh. Ruatta loin zianghman tuah hlah uh. ³⁷ Ziangahtile, annihpawl cu temple-pawl suamtu an si lo, nan khuavangnu dokalh in ṭawngsia khal an ṭawng lo nan hi tawkah nan rak hruai. ³⁸ Curuangah Demeṭrias le a hnenih um thil ser thiampawl in mi pakhatkhat sual mawhthluk ding an neih asile, thuṭhennak hmun le uktupawl tla an um ko. Cu tawkah pakhat le pakhat sual puhaw hai seh. ³⁹ Cu hnakin nasadeuh tuah nan duh asile dan vekih pumkhawmawknak ah relcat uh. ⁴⁰ Thungaiten tuisun ih thil cang mi ruangah nan hel a si tiah sual in puh ding ti phan a um. Ziangahtile, himi pumkhawmawknak thu ah a san rel thei ding zianghman kan nei lo,” tiah a ti. ⁴¹ Cutiih a ti hnuah pumkhawmnak cu a ṭiakter.

¹ Buainak a cem tikah Paul in dungthluntupawl cu a hnenah a ko ih, damten, tiah a tiih a tanta hai. Cule Masidonia ram lamah khualtlawn a thawk. ² Cui rampawl cu a tlawng vivo ih nasazetin tha a pe hai ih, Greece ram a thleng. ³ Cu tawkah thla thum a um. Cule Siria ram ah lawng ih a feh zik zawngah Jew-pawl in amah dokalh in thil ṭha lo an ruah thup ruangah Masidonia ram ihsin kirsal dingin a ruatcat. ⁴ Beria khaw mi Sopaṭa, Thessalonika khaw mi Aristarkhas le Sekundas, Darbi khaw mi Kaias le Timothy, Asia ram mi Tikhikas le Trofimas tlain Paul cu Asia ram tiang an fehpi. ⁵ Cupawl cu an rak fehsung ih, Troas khua ihsin in rak hngak. ⁶ Thilnu tel lo sang puai a cem hnuah Filipi ihsin lawng in kan feh ih, ni nga hnuah an hnen Troas khua kan thleng. Cu tawkah ni sarih kan cam. ⁷ Zarh khat ih ni hmaisabik ni ah sang phel dingin dungthluntupawl an tawngkhawmaw. A thaizing feh ding a si ruangah Paul cun an hnenah zanṭim tiangin thu a sim. ⁸ An khawmawknak tlunta pindan ah cun meito tampi a um. ⁹ Zuṭikhas an ti mi tlangval pakhat cu sangkate ah a to ih, Paul ih reipi thu a sim laiah a rak itthat. A ihthah ṭhat laiah sawng thumnak ihsin a tla. An vung sar tikah a rak thi zo. ¹⁰ Cule Paul cu a vung ṭum ih tlangvalpai parah a bawk ih a pawm. Cule Paul in, “Buai ruri hlah uh, ziangahtile a sungah a nunnak a um lai a si,” tiah a ti. ¹¹ Cule Paul cu tlunta pindan ah a hung kaisal ih, sang a phel ih a ei. Cule reipi khawvang tiang a ṭawng ih a fehsuak. ¹² Tlangvalpa cu a nung in an hruai ih an hna a ngam zet. ¹³ Assos khua ah lawng in kan fehsung ih, cu tawkah Paul sawm phah ding kan si. Ziangahtile, amai khawkhan cia vekin ke ih rak feh cia a tum ruangah a si. ¹⁴ Assos khua ih in rak tawn tikah lawng parah kan hruai ih, Miṭilin khua ah kan feh. ¹⁵ Cu tawk ihsin lawng in kan feh ih a thaisun ah Khios tikulh kiang kan thleng. A tipsun ah Samos tikulh kan thleng ih, Trozilliam khua ah kan cam. A thiamsun ah Mileṭas khua kan thleng. ¹⁶ Paul cun Asia ram ih cam rei ding a duh lo ruangah lawng in Efesa khua fehlan san a tum. A cang thei asile Jerusalem ah Pentikos puai ni khelh a duh ih a manhlap zet. ¹⁷ Paul in Mileṭas khua ihsin Efesa khua ah mi a thlah ih, kawhhran elder-pawl cu a kokhawm hai. ¹⁸ Cu tawk hmun an thlen tikah an hnenah, “Asia ram kan ra thlen ih a ni hmaisabik ni ihsin ziangvekin nan hnenah ka tikcucan hmuahhmuah ka hmang ti cu nan thei. ¹⁹ Tangdawr zet le vei tam zet mitthli thawn le Jew-pawlih phiarsawm hniksak tuar in Bawipa cu ka rian a si. ²⁰ Nan hlawknak ding zianghman ka sup lo ti nan thei. Mipi hmaiah si seh, inn khat hnu inn khat ah si seh ka phuang ih ka lo zirh. ²¹ Jew-mi le Grikmipawl hnenah Pathian lamah an sual sir dingin le kan Bawipa Jesu Khrih zum dingin fiang zetin thu ka sim. ²² Cule atu ah, ngai hnik uh, Jerusalem khua ih feh dingin thlarau ih ṭemṭawn ka si. Cu tawkah ka parah ziang a cang ding ka thei lo. ²³ Ka theihsun cu, cu tawkin thawngtlaknak le harsatnak in in hngak a si tiah khaw tinah Thlarau Thianghlim in fiang zetin in theihter mi lawng hi a si. ²⁴ Sikhalsehla, cupawl pakhat hmanin i buaiter lo. Ka nunnak khal seherh tlakah ka ruat lo. Ka tlanzuamnak a cemnet tiang lungawinak thawi ka ṭheh ding le Bawipa Jesu hnen ihsi ka ngah mi rawngbawl hna cu a cemnet tiang ṭheh ningla ti lawng hi ka duh a si. Ka rawngbawl hna cu Pathian zangfahnak thuthangṭha fiang zetih sim hi a si. ²⁵ “Pathian uknak thu sim in nan zate lakah ka vak rero. Atu cu, ngai hnik uh, zohman in ka hmel in hmusal nawn lo ding ti ka thei. ²⁶ Curuangah mi hmuahhmuah thisen ihsin ka thiang a si tiah tuisun ah nan hnenah ka phuang a si. ²⁷ Ziangahtile, Pathian-ih thiltum mi hmuahhmuah kha sup loin nan hnenah ka phuang a si. ²⁸ Pathian kawhhran, amai thisen ih a lei mi tuu rual cawm dingin Thlarau Thianghlim in an lakih hotu dingah a lo ruat hai zo ih, curuangah nanmah hrangah le tuu rual zate hrangah fimkhur uh. ²⁹ Ziangahtile, ka feh hnuah nan lakah cinghnia hrang an ra lut ding ih, tuu rualpawl hi an zuah lo ding ti ka thei. ³⁰ Nanmai sung rori ihsi khalin, dungthluntupawl anmah lamih hruai dingin mi an suak ding ih anmah roriih merhkawi mi thuphan an sim ding. ³¹ Curuangah ralring uh, sun le zan mitthli thawn kum thum sung cawl loin mi hmuahhmuah ralrinnak ka lo pek kha cing ringring uh. ³² “U le nau tla, tui canah Pathian hnenah le a lo tuahṭha theitu le mithianghlimpawl hmuahhmuah lakah ro co ding khal a lo pe theitu amai zangfahnak thu sungah ka lo ap a si. ³³ Zo-ih sui si seh, ngun si seh, hnipuan si seh ka daw lo. ³⁴ Hi kutpawl hin keimah le ka hnenih um mipawlih ṭul mi a pesuak ti nan thei. ³⁵ Micaklopawl nan bawm theinak dingah hitivekih hna ṭuan in ziangkimah ka lo hmuh zo. Bawipa Jesu-ih ṭawngkampawl hi cing uh. Anih in, ‘Ngah lam hnakin pek lamah thlawsuah a tamsawn,’ a ti,” tiah a ti. ³⁶ Cule cui thupawl a sim hnuah, Paul cu a khuk a bil ih an zaten thla a campi. ³⁷ Cule an zaten ring zetin an ṭap, Paul cu an pawm ih an hnam. ³⁸ A hmel an hmusal nawn lo ding ti thu a sim ruangah cumi cun an riah a seter cuang. Cule lawng tiang an hei fehpi.

¹ Cule hiti hi a rak si, anmah kan fehsan hnuah lawng in dingten kan feh ih, Kos tikulh kan thleng. A thaisun ah Rhodes tikulh ah kan feh ih, cu tawk ihsin Patara khua ah kan feh. ² Cu tawkah Fonisia ram lamih feh ding mi lawng kan hmu, cui lawng cu kan to ih, kan fehlan. ³ Saipras tikulh kan hmuh hnuah thlang lam ihsin kan lan ih, Siria ram fehtlang in Taiar khua ah kan cawl. Cui khua ah lawng thil phurh mipawl an thlak. ⁴ Cu tawkah dungthluntupawl kan hmu ih an hnenah ni sarih kan cam. Thlarau simnak in cui dungthluntupawl cun Paul hnenah, “Jerusalem ah feh hlah,” tiah an ti. ⁵ Asinan kan umtlang can a cem tikah kan suak ih, kan khualtlawn kan peh. Dungthluntupawl hmuahhmuah cu an nupi le an fatepawl thawn khaw leng tiang in thlun ih, tikapah kan khuk kan bil ih thla kan cam. ⁶ Pakhat le pakhat, damten maw, kan tiawk hnuah kannih lawng parah kan kai ih, annih cu anmai inn ah an kirsal. ⁷ Tipi parih khualtlawn kan ṭheh hnuah Taiar khua ihsin Ptolemais khua kan thleng. Cu tawkah unaupawl kan cibai ih an hnenah ni khat kan cam. ⁸ A thaisun ah kannih cu Paul thawn kan pawksal ih, Sisaria khua kan thleng. Cule mi pasarih lakih pakhat a si mi evangelist Filip inn ah kan lut ih a hnenah kan cam. ⁹ Cu pa cun profet vekih thusim fala him fanu pali a nei. ¹⁰ Cu tawkah ni tampi kan um hnuah Judia ram ihsin profet pakhat Agabas an ti mi a rung. ¹¹ Kan hnenah a ra ih, Paul-ih taikhap a la ih a ke le a kutpawl a ṭawnaw. Cule anih in, “Thlarau Thianghlim in hitin a ti, ‘Hi taikhap neitupa hi Jerusalem khua ah Jew-pawl in an ṭawn ding ih, Zentelpawl kut ah an pe ding,’ a ti,” tiah a ti. ¹² Cui thu cu kannih le cu tawkih um mipawl in kan thei. Curuangah, Paul cu Jerusalem ih feh lo dingin kan ngen ciamco. ¹³ Cule Paul in, “Ziangah nan ṭap ih ka thinlung in kuaiter? Thawngthlak lawng si loin Bawipa Jesu Khrih hmin ruangah Jerusalem ih thih khal ka tiar a si,” tiah a sawn hai. ¹⁴ Kan dawn thei lo ruangah daiten kan um ih, “Bawipa in a duhnak vekin tuah ko seh,” tiah kan ti. ¹⁵ Cui hnuah kan tim kan tuah ih, Jerusalem khua ah kan hung so. ¹⁶ Sisaria khua ihsin dungthluntu hrekkhatpawl khal kan hnenah an tel ve ih kan riahnak ding Manason inn ah in hruai. Amah cu Saipras tikulh mi a si ih, dungthluntu hmaisabikpawl lakih pakhat a si. ¹⁷ Cule Jerusalem khua kan thlen tikah, unaupawl cun lungawi zetin in rak hmuak. ¹⁸ A thaisun ah Paul le kannihpawl cun James kan va leng ih, cu tawkah elder zaten an rak um. ¹⁹ Paul in cibai a buk hai hnuah, a rawngbawlnak ihsin Pathian in Zentelpawl lakih hna a ṭuan mipawl pakhat hnu pakhat a simfiang hai. ²⁰ Cui thu an theih tikah Bawipa an thangṭhat. Cule Paul hnenah, “Unaupa, Jew-pawl lak ihsin mi thawng tampi in an zum zo ih, cupawl cu an zatein Dan thu ih ṭhahnemngai zet an sizia cu na hmu. ²¹ Zentelmipawl lakih um mi Jew-pawl hmuahhmuah cun Dan thlauthla ding le an fatepawl serhtan lo dingin le nunphung khal thlun lo dingin na zirh tiah hipawl hnenah mi hrekkhat in an sim thei zo. ²² Ziangtin kan tuah ding? Na ra thleng zo ti an hna in an thei ding ih, mipi tampi an ra pumkhawm tengteng ding sikhawh. ²³ Curuangah kan lo sim mi vekin tuah tengteng aw. Thukamnak tuah mi patling pali kan hnenah an um a si. ²⁴ Cupawl cu hruai aw la, anmah thawn thianfaiawaw la, an lu meh man tla peksak aw. Cule na thuhla an than mi cu a diklo ti mi hmuahhmuah in an thei ding. Cutin Dan thu na thlun ti le Dan vekin na nung ti an lo thei ding. ²⁵ Asinan zumtu Zentelpawl cun hi thilpawl cu tuah lo dingin ca kan rak kuat zo. Annih cun milem hnenih an hlan mi thil, sa thi le hngawng rek ih thah mi sa, nu le pa sualnakpawl hrial dingin kan relcat zo,” tiah an ti. ²⁶ A thaisun ah Paul in cui mi palipawl cu a hruai hai ih, anmah thawn a thianfaiawaw. Cule temple kulh sungah a lut ih, thianfainak can ziangtik ni ah a cem ding ti le cui canah pakhat cio hrangah thilhlan a pe ding ti tla kha a sim. ²⁷ Ni sarih a kim zik tikah Asia ram ihsin a ra mi Jew-pawl in Paul kha temple kulh sungah an hmu. Cule mipi zatein an cawktho ih, Paul cu an kai. ²⁸ An au ih, “Israel-mipawl, in bawm uh! Hi pa hin kan mipi, Dan le hi hmun dokalh in hmun kipah mi hmuahhmuah thu a zirh. Cuitlunah Grikpawl khal temple sungah a hruai ih, hih hmun thianghlim hi a bawrhhlawhter,” tiah an ti. ²⁹ Cutiih an aunak san cu Efesa khaw mi Trofimas kha Jerusalem ah an hmu ih, Paul in temple sungah a rak luhpi ko ding tiih an ruah ruangah a si. ³⁰ Cui thu cun an khawsen in a cawktho ih, mipipawl cu an ra tlankhawm ih, Paul cu an kai ih temple kulh sung ihsin an dirsuak. Cule kawtkapawl cu an khar lohli. ³¹ Mipi in Paul thah an duh laiah Rom ralkap bur khat hotu bawibik hnenah Jerusalem khaw pumpi a buai luihlo ti thu a thleng. ³² Hmakhatteah cu pa cun ralkap za hotupawl le ralkappawl kha a hruai ih an hnenah an va tlan. Ralbawi hotu le ralkappawl an hmuh tikah Paul an vuak lai cu an cawl. ³³ Cule ralbawi hotupa cu a feh ih, Paul cu a kaih hnuah thir cikcin pahnih thawn ṭawn dingin thu a pek. Cule zo a si ti le ziang a tuah ti a sut. ³⁴ Mipi sung ihsin mi hrekkhat in phun khat in an au ih, mi hrekkhat cun phun dangin an au. Thawmvang a tam tuk ruangah anih in thufiang a thei thei lo ih, Paul cu ralkappawl khemp sungih hruai dingin thu a pek. ³⁵ Mipi nasatukih an buai ruangah Paul cu kaiṭen a thlen tikah ralkappawl in an zawn. ³⁶ Ziangahtile, mipi tam zetin an thlun ih, “That uh!” tiah an au phah vivo. ³⁷ Ralkap khemp sungih an hruai zik zawngah Paul in ralkap hotu bawibik hnenah, “Na hnenah thu ka lo sim thei pei maw?” tiah a sut. Cule anih in, “Grik ṭawng na thiam maw? ³⁸ Hi hlan tawkfangih heltu le ramṭhing ih mithattupawl thawngli hruaitu Izippa kha na si maw?” tiah a ti. ³⁹ Cule Paul in, “Keimah cu Silisia ram khaw pawimawh Tarsas khua ih suak Jew-mi ka si. Mipi hnenih thusim i sen hram dingin ka lo ngen a si,” tiah a ti. ⁴⁰ Thusim theinak pek a si hnuah Paul cu kaiṭen parah ding in mipi hnenah a kut a hei zap ih, daitei an um hnuah Hebru ṭawng in an hnenah thu a sim.

¹ Paul cun, “U le nau le pale tla, atu nan hnenih ka humawknak thu ka sim mi hi ngaithla hnik uh,” tiah a ti. ² An hnenih Hebru ṭawng in thu a sim ti an theih tikah daiten an um sinsin. ³ Cule Paul cun, “Keimah cu Silisia ram Tarsas khaw suak Jew-mi ngaingai ka si. Asinan Gamaliel-ih tlawngta ka si vekin hi khua ah ka ṭhanglian. Anih cun kan pupapawlih dan cu famkim zetin i zirh ṭheh. Tuisun ih nanmah vek hin Pathian hrangih ṭhahnemngai zettu ka rak si ve dah. ⁴ Cule hi Lamzin thluntu mipapawl le nunaupawl kai in thawng ka thlak hai ih thah khal ka that hai. ⁵ Cui thu cu puithiam lubik le Sanhedrin thuṭhentupawl hmuahhmuah in in theihpi. Damaskas khua ih umpawl cu ṭem ih Jerusalem ih hruai ih hrem dingin an hnen ihsin unaupawl hnenih pek ding ca ka ngah hnuin cui khua ah ka feh. ⁶ “Cule hiti hi a rak si, sun lai hrawng Damaskas khua ka thlen zik zawngah rinlopiin van ihsin tleu nasazetin ka kiangkap cu a run tlet. ⁷ Cule lei ah ka tlu ih aw pakhat in ka hnenah, ‘Saul, Saul, ziangah saw i tiduhdah?’ tiah i ti ka thei. ⁸ Cule kei in, ‘Bawipa zo na si?’ tiah ka let. Cule anih in ka hnenah, ‘Na tiduhdah rero mi Nazareth Jesu ka si,’ tiah i ti. ⁹ “Asinan, ka hnenih um mipawl cun tleu an hmu ih ṭihnak in an khat. Asinan ka hnenih ṭawngtupai aw cu fiangfaiten an thei lo. ¹⁰ Cule kei in, ‘Bawipa, ziang ka tuah ding?’ tiah ka ti. Cu tikah Bawipa in ka hnenah, ‘Tho aw la, Damaskas khaw sungah feh aw. Cu tawkah na tuah dingih ka ruat cia mi hmuahhmuah cu an lo sim ding,’ tiah i ti. ¹¹ Cui tleu ih tle cu a natsat tuk ruangah khua ka hmu thei lo. Cule ka hnenih fehpawl in ka kut in in hruai ih, Damaskas khaw sungah ka feh. ¹² “Cu tawkah Ananias an ti mi pa a um. Amah cu Dan vekih Pathian ngaihsak le kha tawkih um Jew-pawl hmuahhmuah ih an fak mi a si. ¹³ Ka hnenah a ra ih ka kiangah a ding. Cule, ‘Unaupa Saul, khua hmu aw,’ i ti. Cu veten amah cu ka zoh. ¹⁴ Cule anih in, ‘Pathian duhzawng thei dingah le Mi Dingfel Pa hmu dingah le a kaa ihsin a aw thei dingah kan pupapawlih Pathian in a lo hril zo a si. ¹⁵ Ziangahtile, nang cu mi hmuahhmuah hnenah amai hrangah na hmuh mi le na theih mi theihpitu na si ding. ¹⁶ Atu hi ziang na hngak? Tho aw la, baptisma co aw. Cule Bawipai hmin ko in na sualpawl khawlhfai aw,’ tiah i ti. ¹⁷ “Cule hiti hi a rak si, Jerusalem ih ka kirsal hnuah temple kulh sungih thla ka cam laiah zelh in ka um. ¹⁸ Jesu ka hmu ih, anih in ka hnenah, ‘Zamrang aw la, Jerusalem khua ihsin suak lohli aw. Ziangahtile, ka thuhla na phuan mi an pawm lo ding,’ tiah i ti. ¹⁹ Cule kei in, ‘Bawipa, sinakok tinih nangmah lo zumtupawl thawng ka thlak hai ih ka vuak haizia cu anmah roriin an thei. ²⁰ Cun, na thutheitu Stefen thisen an suah laiah kei khal an kiang nai teah ka ding. An thah cu ka lung a kim ih, a thattupawlih puanpawl ka rak kilsak,’ tiah ka ti. ²¹ Cule Jesu in ka hnenah, ‘Feh aw, ziangahtile lam hlapi ih Zentelpawl hnenah ka lo thlah ding,’ i ti,” tiah a ti. ²² Cu mi a sim tiang cu Jew-pawl in an ngai. Cule an au ih, “Kha vek mi kha lei par ihsin lahlo uh. Ziangahtile, nung tlak a si lo!” tiah an ti. ²³ Cule annih in au phahin an hnipuan an hlawn ih, thli lakah leivut an theh ciamco. ²⁴ Ralkap hotu bawibik in Paul cu ralkap khemp sungih hruai dingin le ziangruangah mipi cu khativekin an au ti a theih theinak dingah savun hri in vua ih, thusut dingin thu a pe. ²⁵ Cule Paul cu lengah an suah ih, savun hri in an ṭawn. Paul in cu tawkah a kiangih ding ralkap za hotu hnenah, “A thu relsak hrih lo Rom mi pakhat cu vuak a thiang maw?” tiah a sut. ²⁶ Cucu ralbawipa in a theih tikah, ralkap hotu bawibik hnenah a feh ih, “Na thiltuah ding mi ah ralring aw. Ziangahtile, hi pa hi Rom mi sokhaw a si,” tiah a sim. ²⁷ Cu tikah, ralkap hotu bawibik cu, Paul hnenah a feh ih, “Rom mi na si maw? I sim hnik,” tiah a ti. Cule Paul in, “Ka si,” tiah a ti. ²⁸ Cule ralkap hotu bawibik cun, “Rom mi sinak ding hrangah tangka tampi ka pe,” tiah a sawn. Asinan Paul in, “Kei cu ka suah ihsin Rom mi ka si,” tiah a ti. ²⁹ Cu veten Paul vuak le thusuh a tumtupawl cu dungah an sip ṭheh. Ralkap hotu bawibik khalin Rom mi a ṭemṭawn ti a theih tikah a ṭih ve. ³⁰ Ralkap hotu bawibik cun ziangruangah Jew-pawl in Paul an hek ti theih a duh ruangah a thaisun ah Paul cu thir cikcin ihsin a suah ih, puithiam sangpawl le Sanhedrin thuṭhentu zaten tawngkhawmaw dingah thu a pe. Cule Paul cu a run hruai ih an hmaiah cun a ret.

¹ Paul in Sanhedrin thuṭhentupawl cu hmaitawn in a zoh hai ih, “Pulepawl le u le nau pawl, tuini tiang Pathian hmaiah thinlung zate thiang in ka nung a si,” tiah a ti. ² Cule, puithiam lubik Ananias in Paul kiangih a ding mipawl kha a kaa ah beng dingin thu a pe. ³ Cule Paul in a hnenah, “Nang cu si rang hnih mi phar vek na si! Pathian in a lo beng ding. Ziangruangah Dan vekih ka thu ṭhen dingah na to nan Dan kalh zawngin keimah beng dingih thu na pek hai?” tiah a ti. ⁴ Paul kiangih dingtupawl in, “Pathian-ih puithiam lubik na zawkzet ding maw?” tiah an ti. ⁵ Cule Paul in, “U le nau tla, puithiam lubik a si ti ka thei lopi. Ziangahtile, Cathianghlim in, ‘Na mipawl hruaitu dokalh in ṭawngsia ṭawng hlah,’ a ti,” tiah a ti. ⁶ Paul in mi hrekkhat cu Sadusipawl an si ih, mi hrekkhat cu Farasipawl an si ti a theih tikah Sanhedrin thuṭhentupawl hmaiah cun a au ih, “Pulepawl le u le nau pawl, keimah cu Farasi fapa, Farasi ka si. Ruahsannak thu le mithi thawhsalnak thu ah thuṭhen dingih kawh ka si,” tiah a ti. ⁷ Cutiih a ti hnuah Farasipawl le Sadusipawl karlakah thuelawknak nasazet a suak ih, mipi cu an ṭhenaw. ⁸ Ziangahtile, Sadusipawl cun thawhsalnak a um lo, vancungmi si seh, thlarau si seh a um lo tiah an ti. Asinan, Farasipawl cun cupawl hmuahhmuah cu an pawmhnget. ⁹ Cule auaw nasazet a suak ih, Danzirhtu hrekkhat, Farasi lamṭang cu an ding ih nasazetin an el, “Thu sia zianghman hi pa ah kan hmu lo. Vancungmi asilole thlarau in a hnenih thu a sim a si ah cun Pathian cu kan dodal lo pei uh,” tiah an ti. ¹⁰ Elawknak nasazet a suah tikah ralkap hotu bawibik in Paul kha an bawtthlek thluh pang ding ti a phan ruangah ralkappawl kha vung feh ih, Paul kha mipi hnen ihsin hranhramih hruai dingin le ralkap khemp ih fehpi dingin thu a pek. ¹¹ A thaizan ah Bawipa cu Paul kiangah a ding ih, “Paul, hnangamten um aw. Ziangahtile, Jerusalem khua ih ka thu na theihter zo vekin Rom khalah na theihter ding,” tiah a ti. ¹² Khua a van tikah Jew mi hrekkhatpawl khua an khangkhawm. Anmah le anmah siat an camaw ih, “Paul kan thah hlanlo ziang khal ei lo le in loin kan um ding,” tiah an ti. ¹³ Cutiih phiarthupnak a tuahtupawl cu sawmli hnakih tam an si. ¹⁴ Cule puithiam sangpawl le miupapawl hnenah an feh ih, “Kanmah le kanmah siatcamawknak thawn kan ṭemṭawnaw zo. Paul kan thah hlanlo ziangkhal kan ei lo ding. ¹⁵ Curuangah atu ah nanmah le Sanhedrin thuṭhentupawl in ralkap hotu bawibik hnenah dilnak tuah uh la, a thuhla famkimdeuhin zawi kan duh tiin tiawter in Paul kha nan hnenah thaisun ah run hruai tel uh. Cule Paul a ra thlen hlanah amah that dingin kan rak tiar cia ding,” tiah an ti. ¹⁶ Asinan Paul-ih farnu-ih fapa in cutiih an bawhthup thu a theih tikah ralkap khemp ah a lut ih Paul a va sim. ¹⁷ Cule Paul in ralkap za hotu lak ihsin pakhat kha a ko ih a hnenah, “Hi tlangvalpa hi ralkap hotu bawibik hnenah hei hruai aw. Ziangahtile, a hnenah thusim ding a nei,” tiah a ti. ¹⁸ Curuangah a fehpi ih, ralkap hotu bawibik hnenah cun a hruai ih, “Thawngtlapa Paul in a hnenah i ko ih, hi tlangvalpa na hnenih ratpi dingin i dil. Ziangahtile, anih in thu lo sim ding a nei,” tiah a ti. ¹⁹ Cule ralkap hotu bawibik cun tlangvalpa cu a kut in a sirah a hruai ih, “Ziang thu i sim duh?” tiah thu a sut. ²⁰ Cule anih in, “Jew-pawl in thaisun ah Paul kha Sanhedrin thuṭhennak ah run hruai aw tiah lo dil dingin an lung a kim zo. A thuhla kha famkimdeuhin theih an duhawter ding. ²¹ Asinan, an thu lung hlah aw. Ziangahtile, mi sawmli hnak tam in an bawh. Cupawl cu anmah le anmah siatcamaw in an ṭemṭawnaw. Paul an thah hlanlo zianghman an ei lo ding ih, an in lo ding. Atu ah nangmai thutiamkam lawng hngakin an um,” tiah a ti. ²² Cule ralkap hotu bawibik in tlangvalpa cu, “Ka hnenih na sim mi thu hi zohman sim hlah,” tiah thu a pek ih a tlunter. ²³ Cule ralkap hotu bawibik in a ralkap za hotu pahnih cu a ko ih, “Zan nazi pakua ah Sisaria khua tiang feh dingin ralkap zahnih, rang ralkap sawmsarih le fei hmang ralkap zahnih timtuah uh. ²⁴ Paul ih to dingah to mi ṭilvapawl timtuah uh la ram uktu Filix hnenah himten va thlah uh,” tiah thu a pek. ²⁵ Cule ralkap hotu bawibik cun hitin ca a ngan, ²⁶ “Kei, Klaudias Lisias in ram uktu upat tlak Filix na hnenah ca ka ngan a si. Cibai ka lo buk. ²⁷ Jew-pawl in hi pa hi an kai ih thah an tum laiah Rom mi a si ti kha ka thei ih, ralkappawl thawn kan va runsuak. ²⁸ Ziangruangah sual an puh ti theih ka duh ih, Sanhedrin hmaiah ka hruai. ²⁹ An Dan thusuhnak thu ah sual an puh ih, thihnak tlak le thawngtlaknak tlak thu zianghman a um lo ti ka hmu. ³⁰ Jew-pawl in hi pa thahnak ding khua an khang ti ka theih tikah na hnenah ka rak kuat lohli. Amah sual puhtupawl khal amah sual an puhnak thu cu na hmaiih thlen dingin ka sim hai,” tiah a ti. ³¹ Cule ralkappawl cun an hnenih thupek vekin Paul cu an fehpi ih, zan ah Anṭipaṭris khua tiang an hruai. ³² A thaisun ah ralkappawl in Paul hnenih fehtu ding rang ralkappawl cu an tanta ih an ralkap khemp lamah an tlungkir. ³³ Rang ralkappawl cu Sisaria khua an thlen tikah cakuat cu ram uktu hnenah an pek ih, Paul khal cu a hnenah an ap. ³⁴ Cule ram uktupa cun cakuat cu a siar ih khui ram in a si ti a sut ih, Silisia ram ihsin a si ti a thei tikah, ³⁵ Paul hnenah, “Sual a lo puhtupawl an thlen tikah na thuhla cu ka ngaithla leh ding,” tiah a ti. Cule Paul cu Herod-ih praetorium sungah ret dingin thu a pe.

¹ Ni nga hnuah puithiam lubik Ananias cu miupa hrekkhatpawl le sihni Tertullas thawn Sisaria khua ah an rung suk. Cule sihnipa in ram uktupai hnenah Paul sual an puhnak thu cu a thlen. ² Cule Paul cu an ko ih, Tertullas cun Filix hnenah Paul-ih thu cu hitin sim a thawk ih, “Nangmai hnuaiah can reipi sung hnangamten kan um zo ih, na remruahnak in hi miphun ṭhansonak nasazet na thlen zo. ³ Zah tlak miropi Filix, hmun kipah le ziangtik lai khalah lungawinak nasazet thawn kan lo cohlang ringring a si. ⁴ Asinan reipi ka lo hnaihnawklonak dingah zangfahten ṭawngkam malte in ngaithlaksak hram dingin ka lo dil. ⁵ Ziangahtile, hi pa hi buainak tuahtu a si ti kan hmungah zo. Leitlun pumpi ih Jew-pawl hmuahhmuah heltertu le Nazarin mipawl sakhaw dang pakhat hruaitu a si. ⁶ Temple sung bawrhhlawhter khal a tum ih kan kaih. Kanmai Dan vekin thuṭhen kan duh. ⁷ Asinan ralkap hotu bawibik Lisias a ra ih, kan kut ihsin hranhramin a ra hruai. ⁸ Lisias cun Paul sual puhtupawl kha na hnenah ra dingin thu a pe. Amah cu nangmah roriin na zingzawi tikah sual kan puhnak thupawl hmuahhmuah cu na thei kim thei ding,” tiah a ti. ⁹ Cule Jew-pawl khal an lung a kim ih, hi thupawl hi a dik a si, tiah an ti. ¹⁰ Cule ram uktupa in Paul kha thu sim ve dingin a kut a hei zap ih, Paul cun a sang ih a hnenah, “Kum tampi sung hi miphun thuṭhentu na si ti ka lo theih ruangah lungawi zetin keimah le keimah ka humaw a si. ¹¹ Jerusalem ah Pathian be dingin ka hung fehnak hi ni hleihnih hnakin a tam hrih lo ti cu awlten na thei ko ding. ¹² Temple kulh sungah zo thaw hmanih thu kan relkhawm in hmu lo. Sinakok ah si seh, khawpi sungah si seh mipi ka cawkbuai lo. ¹³ Cule atu ih sual in puhnakpawl cu a dikzia khal na hnenah an lo hmuh thei lo ding. ¹⁴ Asinan pawl hran an ti mi Lamzin zulhin Dan bu sung le profetpawlih cabu sungih ngan mi hmuahhmuah zum in in thlahtupawl Pathian ka bia ti na hnenah ka phuang a si. ¹⁵ Midingfelpawl le midingfellopawl cu thihnak ihsin an thosal leh ding tiah anmah vek thothoin Pathian ah ruahsannak ka nei. ¹⁶ Cu mi ruangah, Pathian lamah le minung lamah sia le ṭha theihnak fiang nei dingin ka zuam ringring. ¹⁷ “Kum reipi sung ka um nawn lo hnuah ka miphunpawl hnenah bawmnak thilpek le thilhlan pe dingin ka vung feh. ¹⁸ Jew mi hrekkhat Asia ram ihsin an rung ih, temple kulh sungih keimah le keimah ka thenfaiawk in hmu. Culaiah ka hnenah mi burpi an um lo. Buainak ziangkhal ka tuah lo. ¹⁹ Sual puh ding in neih asile na hmaiah anmah roriin sual in puh hai seh. ²⁰ Cu lo asile hi tawkih a um mipawl hin Sanhedrin hmaiih ka din laiah, keimah ah ziang diklonak an hmu? ²¹ Hi thil pakhat lawng hi a si ko ding. An hmaiih ka din laiah, ‘Mithi thawhsalnak thu ruangah tuisun ah nan hmaiah thuṭhen in ka um a si,’ tiah ka au,” tiah a ti. ²² Cupawl cu Filix in a theih tikah Lamzin thu cu fiang zetin a theih ruangah, “Ralkap hotu bawibik Lisias a rat tikah na thu cu ka relcat leh ding,” tiah thu rel lai cu a banter. ²³ Cule ralkap za hotupa kha Paul kil dingin le zalennak malte pe dingin le a rualpipawl in a ṭulhai mipawl tawlrelsak dingin thu a pe. ²⁴ Ni malte a rei hnuah Filix cu a nupi Drusilla thawn an rakirsal. Drusilla cu Jew-mi a si. Cule Filix cun Paul a ko ih, Khrih zumnak thuhla a sim mi kha a ngaithla. ²⁵ Paul cun dingfelnak thu, supawknak thu le a ra thleng ding mi thuṭhennak thupawl a rel. Cu tikah Filix cun a ṭih ih, “Atu cu, feh hrih ko aw. Can remcang ka hmuh tikah ka lo ko leh ding,” tiah a sawn. ²⁶ Cui canah, Filix cun Paul in a suahnak dingah tangka in pe ding ti a beisei ruangah a ko leuhleuh ih a be ṭheu. ²⁷ Asinan kum hnih a rei hnuah Porsias Fesṭas in Filix-ih ai a run awh. Filix cun Jew-pawl lungawiter a duh ruangah Paul cu thawng sungah a tanta.

¹ Fesṭas cu cui ram a thlennak ni thum a rei hnuah Sisaria khua ihsin Jerusalem khua ah a hung feh. ² Cu tikah puithiam lubik le Jew hruaitupawl in Paul sual an puhnak thuhlapawl cu an sim. ³ Annih cun Paul cu lamzin ah rak bawh ih that dingin khua an khan thup ruangah Jerusalem ih thlah dingin Fesṭas cu an dil. ⁴ Fesṭas in, “Paul cu Sisaria khua ah ka ret ding. Cu tawkah kei khal ka feh cing ding. ⁵ Curuangah nan lakih thuneihnak neitupawl kha ka hnenah nan ra thei a si. Hi pai thu ah sualralnak ziang simaw a um pang asile sual an puh thei ding,” tiah a let. ⁶ Fesṭas cu an lakah ni hra hnakih tam a cam hnuah Sisaria khua ah a suk. A thaisun ah thuṭhennak tohkham parah a to ih, Paul hruai dingin thu a pe. ⁷ Paul a thlen hnuah Jerusalem ihsin a ra mi Jew-pawl cu a kimvelah an ding ih, a dik rori a si tiih an langter thei lo misual nasa zetzet tampi an puh. ⁸ Cu tikah, Paul cu amah le amah a humaw ih, “Jew-pawlih Dan dokalh in si seh, temple dokalh in si seh, Kaisar dokalh in si seh zianghman ka tuah lo,” tiah a ti. ⁹ Asinan Fesṭas cun Jew-pawl lungawiter a duh ruangah Paul cu a sang ih a hnenah, “Jerusalem ah hung so in cu tawkah sual an lo puhnakpawl ka hmaiih suh na duh maw?” tiah a ti. ¹⁰ Cule Paul in, “Thuṭhen ka sinak ding hmun, Kaisar-ih thuṭhennak tohkham hmaiah kei cu ka ding a si. Na theihfiang zet vekin Jew-pawl hnenah ziang thil sual hman ka tuah lo. ¹¹ Cutiih ka tinak san cu dingfellonak le thihnak tlak thil sual ziang simaw tal ka tuah asile thih ka el lo. Asinan hipawl ih sual in puh mi pakhat hman a diklo a si ah cun zohman in an kut ah in pe thei lo. Kaisar hnenah lu ka pu ding,” tiah a ti. ¹² Cule Fesṭas cu a khawnsil upapawl thawn thu an rawnawk hnuah, “Kaisar hnenah na thlen maw? Kaisar hnenah na feh ding!” tiah an sawn. ¹³ Ni malte a rei hnuah Siangpahrang Agrippa le Bernis cu Fesṭas cibaibuk dingin Sisaria khua an ra thleng. ¹⁴ Cu tawkih ni tampi an um hnuah Fesṭas in Paul-ih thuhla cu siangpahrang hnenah a rel, “Filix in thawng a thlakta mi pa hi tawkah hin a um. ¹⁵ Jerusalem ih ka um laiah puithiam sangpawl le Jew-pawlih miupapawl in sual an puh ih amah cu thuṭhen dingin in dil. ¹⁶ Cule kei in an hnenah, ‘Sual an puh mi pa in sual a puhtupawl kha hmaitawn in sual an puh mipawl ihsin amah le amah humawknak can nei seh. Cu mi a tuah hlanah thi dingih pek cu Rom mipawlih nunphung a si lo,’ tiah ka sawn hai. ¹⁷ Hi tawk ka hnenih an rat tikah tlaiter loin a thaisun thuṭhennak tohkham parah ka to ih, cu pa cu rak hruaisuak dingin thu ka pe. ¹⁸ Sual a puhtupawl cu an ding ih an ṭawng tikah ka beisei vekin sual puh thei mi an nei lo. ¹⁹ Cu hnakin anmai biaknak thawn pehparawin le Jesu an ti mi pa a thi ih a nungsal a si tiih Paul in a sim mi thu ah elnak hrekkhat an nei. ²⁰ Cui an thuelnakpawl cu ziangti lamih zawihnit ding ti ka theih lo ruangah Jerusalem ah feh in cu tawkih sual an puhnakpawl rel sehla a duh le duh lo thu ka sut. ²¹ Asinan a thuhla cu Augasṭas-ih relcat dingin hi tawkah in ret uh tiin Paul in a ngen ruangah Kaisar hnenih ka kuat hlan sung ṭhaten kilhim dingin thu ka pek,” tiah a ti. ²² Cu tikah Agrippa cun Fesṭas hnenah, “Keimah rori khalin cu pai thusim ngaithlak ka duh a si,” tiah a ti. Cule Fesṭas in, “Thaisun ah na ngaithla ding,” tiah a ti. ²³ Cule a thaisun ah Agrippa cu Bernis thawn an ra thleng. Tawnkhawmawknak pindan sungah cun ropi zetin an rung lut ih, ralkap hotu bawipawl le khaw sung upapawl in an thlun. Fesṭas-ih thupek in Paul cu an run hruailut. ²⁴ Cule Fesṭas in, “Siangpahrang Agrippa le kan hnenih a um mi hmuahhmuah in hi pa hi nan hmu. Jerusalem khua ah si seh, hi tawk khalah si seh, Jew mi burpi an zaten a thuhla ka hnenah an thlen ih, hi pa cu nung ding a tlak nawn lo. ²⁵ Asinan, hi pa hin thihnak tlak zianghman a tuah lo ti ka hmu. Cun, amah roriin Augasṭas hnenih a thlen ruangah kuat dingin ka ruatcat zo. ²⁶ Asinan ka bawipa Augasṭas hnenih a thuhla ka ngan tikah a cekciih ngan ding zianghman ka nei lo. Curuangah nan zate hmaiah, ahleicein Siangpahrang Agrippa na hmaiah ka hun suahpi. Kan zawihnitngah hnuah ngan ding ziang tal ka neih pangah tiah a si. ²⁷ Ziangahtile, thawngtla pakhat dokalh in sual an puh mi a cekci fiangter lo ih kuat cu a awm lo ding tiah ka ruat,” tiah a ti.

¹ Cule Agrippa in Paul hnenah, “Nangmah hrangah na thuhla na sim ding ka lo siang a si,” tiah a ti. Cule Paul cu a kut a hun pharh ih a thiam thu a rel. ² “Siangpahrang Agrippa, tuisun na hmaiah Jew-pawlih sual in puh mi thupawl hmuahhmuah ihsin ka thiamthu ka rel ding ruangah mihualvanṭha ah ka ruataw. ³ Nang cu Jew-pawl lakih nunphung le elawknak hmuahhmuah thei zettu na si ruangah ka lung a awi hleice a si. Curuangah thinsauten i rak ngaisak hram aw tiah zangfah ka lo dil. ⁴ “Athawktein Jerusalem khua ih ka mipawl lakah ka um a si. Jew-pawl hmuahhmuah in ka nauhak lai ihsin ka nuntu khawsakdan cu an thei. ⁵ Ka nauhak lai ihsin in thei tuk zo. An duh asile kan biaknak ih a fekbik mipawl Farasi pakhat ka sizia cu an simfiang thei. ⁶ Kan pupapawl hnenah Pathian-ih a pek mi thutiam ruahsannak ka neih ruangah atu ah thuṭhen in ka ding. ⁷ Cui thutiam cu kan miphun hleihnihpawl cun a sun a zan ṭhahnemngai zetin Pathian an biak ruangah congah ding ruahsannak an nei. Siangpahrang Agrippa, cui ruahsannak thu ruangah Jew-pawl in sual in puh a si. ⁸ Pathian in mithi a thoter ti cu zum tlak lo ah ziangruangah nan ruah? ⁹ “Thungaiten, Nazareth Jesu hmin dokalh in thil tampi ka tuah ding tiah ka rak ruat dah. ¹⁰ Cumi cu Jerusalem khua ih ka rak tuah dah mi kha a si. Puithiam sangpawl hnen ihsin thuneihnak ka ngah ih mithianghlim tampipawl thawng ah ka thlak. Cule an thah tikah ka lungkimpi hai. ¹¹ Sinakok tinah ka hrem hai ṭheu ih, lohtheihlo in Pathian thangsiatter dingin ka rak zuam. Anmah dokalh in ka thin a heng tuk ih, anmah tiduhdah dingin ram dang khuapawl tiangin ka thleng. ¹² “Cutin, puithiam sangpawl hnen ihsin thuneihnak le thupek thawn Damaskas khua ah ka feh. ¹³ Maw siangpahrang, sun laifangih lamzin ih ka feh rero laiah ni hnakih a tleu sawn mi cun keimah le ka fehpi mipawl kimvelah van ihsin a run tlet kha ka hmu. ¹⁴ Cule kan zaten leilung ah kan tlu ih, Hebru ṭawng in aw pakhat in ka hnenah, ‘Saul, Saul, ziangah i tiduhdah rero? Na hrangah fung zum sit cu a har mi a si,’ i run ti ka thei. ¹⁵ Cule kei in, ‘Bawipa, zo na si?’ tiah ka ti. Cule Bawipa in, ‘Na tiduhdah rero mi Jesu ka si. ¹⁶ Tho aw la, na ke in ding aw. Ziangahtile, na hmuh mi thilpawl le ka lo hmuh lai ding mi thilpawl theihpitu dingah le rawngbawltu si dingah ka lo hril zo. Cu mi ruangah na hnenah ka runglang a si. ¹⁷ Nangmah cu atu ah Jew-pawl le Zentelpawl hnenah ka lo thlah ih, an hnen ihsin ka lo runsuak ding. ¹⁸ Cucu an mit ka vanternak dingah le thim ihsin tleu ah le Setan thuneihnak ihsin Pathian hnenih an kirsal ih sual ngaidamnak an co theinak dingah le keimah in zumnak thawngin mithianghlimpawl thawn ro an cotlang theinak dingah ka lo thlah a si,’ tiah i ti. ¹⁹ “Cuiruangah Siangpahrang Agrippa, van ihsin larnak ka hmuh mi cu lung loin ka um lo. ²⁰ Ahmaisabikah Damaskas khua ih Jew-pawl hnenah, cun Jerusalem khua ih Jew-pawl hnenah, Judia ram hmuahhmuah le Zentelpawl hnen khalah, annih cu an sual sir in Pathian lam hawi dingah le an sual an sirzia langtertu hnaṭuan ṭha ṭuan dingah thu ka sim. ²¹ Himi thupawl ruangah temple kulh sungih ka um laiah Jew mi hrekkhatpawl in in kai ih thah in tum. ²² Asinan Pathian in i bawm ruangah tuisunni tiang mitum le mite pawl hnenah ka ding ih Mawsi le profetpawl in a ra thleng ding an ti mi lawng ka theihter hai. ²³ An ti mi cu Khrih in a tuar ding ih, mithi lak ihsin tho hmaisabik a si ding, Jew-pawl hnen le Zentelpawl hnen khalah tleunak thu a than ding,” tiah Paul in a ti. ²⁴ Cui thupawl thawn a thiamthu a rel laiah Fesṭas cu aw ring zetin a au ih, “Paul, na aa a si hi! Tam tuk na zirnak in a lo atter zo a si,” tiah a ti. ²⁵ Asinan Paul in, “Upat tlak Fesṭas, ka aa riai lo. Thutak thu le ruah tlak thupawl ka sim a si. ²⁶ Ziangahtile, hi thupawl cu siangpahrang in a thei ih a hnenah ralṭha zetin ka sim a si. Ziangahtile, hi thilpawl hmuahhmuah hi a kelkawm ih tuah mi an si ruangah, siangpahrang in a thei ṭheh ti ka theifiang. ²⁷ Siangpahrang Agrippa, profetpawl ih sim mi na zum maw? Na zum ti ka thei,” tiah a ti. ²⁸ Cule Agrippa in Paul hnenah, “Hi can tawite sungah Khristian cang ko i hmin zik leuleu ual,” tiah a ti. ²⁹ Cu tikah Paul in, “Hi ka kut ih thir cikcin siarlo nangmah le tuisun ih ka thu a theitu hmuahhmuah keimah vek nan si zik lawng si loin si pumhlum ding hi Pathian hnenih ka thlacam mi a si,” tiah a ti. ³⁰ Cui thupawl a sim ṭheh tikah siangpahrang, ram uktu le Bernis le a hnenih a totupawl cu an tho. ³¹ Cule hmun dangih an suahsan hnuah pakhat le pakhat, “Hi pa hin thihnak tlak le thawng tlaknak tlak zianghman a tuah lo,” tiah an tiaw. ³² Cule Agrippa in Fesṭas hnenah, “Kaisar hnenah thlen lo sehla cu kan luatter thei mai ding nan,” tiah a ti.

¹ Italy ram ah lawng in kan feh ding tiah an relcat. Cule Paul le a dang thawngtla hrekkhatpawl cu Augasṭas-ih ralkap bur lakih za hotu Julias kut ah an pek. ² Cun, Adaramiṭiam khua ihsin a ra mi Asia ram lawng cawlhnak kipih cawl phah vivo ding mi lawng ah kan to ih, kan feh. Thessalonika khua ihsin Masidonia mi pakhat Aristarkhas khal kan hnenah a tel ve. ³ A thaisun ah Sidon khua kan thleng. Cule Julias in Paul cu ṭha zetin a tuamhlawm ih a rualpipawl in a ṭulhai mi an pek theinak dingah an hnenih va feh a sen. ⁴ Cu tawk ihsin kan pawksuaksal. Thli cu kanmah hmatawn zawngih a hran ruangah Saipras tikulh kapten kan feh. ⁵ Cule Silisia ram le Pamfilia ram naih tifinriat kan lan hnuah Lisia peng ih um Mira khawpi kan thleng. ⁶ Cu tawkah ralkap za hotu in Italy ram ih feh ding mi Alexandria ihsin a ra mi lawng a hmu ih, cui lawng sungah in ret. ⁷ Nuamteten ni tampi kan feh hnuah harsa zetin Sinidas khaw zawn kan thleng. Cu tawk lam ihsin fehbet ding cu thli in in kham ruangah Salmone khatlam ral Khrit tikulh kapten kan feh. ⁸ Harsa zetin cucu kan lan ih, lawngcawlhnak ‘Hmun Mawi’ tiih an kawh mi hmun kan va thleng. Cucu Lasi khawpi kiangah a si. ⁹ Can tampi a liam zo ih atu ah cun lawng thawi khualtlawn cu a ṭihnung. Ziangahtile, rawlulh ni cu a liam zo ruangah Paul in an hnenah ralrinnak a pe hai. ¹⁰ An hnenah, “Pulenuh, kan khualtlawnnak cu ṭihnungza a si ti ka hmu. Lawng le nan phurh mi thilri lawng si loin kan nunnak hrang khalah siatralnak nasatak a si ding,” tiah a ti. ¹¹ Asinan, ralkap za hotu cun Paul-ih thusim mipawl hnakin lawng mawngtu bawi le lawng neitupawlih thu cu a zum sawn. ¹² An lawng cawlhnak cu thlatang canah cawlhnak a ṭhat lo ruangah, mi tamsawn in feh vivo dingin an lungkim. Finik khaw thlen thei ding le cu tawkih thlatang sung um an beisei. Cucu Khrit tikulh ih lawng cawlhnak hmun a si ih, ni tlaknak thlang lam le ni tlaknak sak lam hawi in a um. ¹³ Thlang lam thli nemtei a hung hran tikah an duhthusam hmungah zo ah an ruat. Cule an pawk ih, Khrit tikulh kapin an feh. ¹⁴ Asinan a rei hlanah Zurokhalidon an ti mi thlisia cu tikulh lam ihsin a rung thawk ciamco. ¹⁵ Thlipi cun kan lawng cu a run nuai ih, thli lakah hmai lam kan pan thei nawn lo ruangah kan thlah ih, thli cun in fehpi vivo. ¹⁶ Cule Kalauda an ti mi tikulh fa te kap teih kan tlan laiah harsa zetin vawkkuanglawng cu kan hum. ¹⁷ Cui hnuah vawkkuanglawng cu lawng kimvelah hridai in hnget zetin an ṭawn. Sirṭis vunnel pawng rawtngah pang an phan ruangah lawng puanzar cu an ṭhum. Cule thli in a fehpi vivo. ¹⁸ Thlipi in lawng cu a hlawn sukso tuk ruangah a thaisun ah lawng sungih phurhritpawl hlawn an thawk. ¹⁹ Cule a ni thumnak ah kan kut roriin lawng thilripawl cu kan hlawn. ²⁰ Ni tampi sung ni si seh, arsipawl si seh an lang lo ih, thlipi cu nasazetin a hrang ringring. Anetnakah cun luat dingih kan ruahsannak hmuahhmuah a hlo ṭheh. ²¹ Rawl ei loin ni tampi an um hnuah, Paul cu an lakah a ding ih, “Ruallenuh, nannih in ka thusim rak ngai in Khrit tikulh ihsin rak feh lo nungla cu hitivek siatralnak le hlohnak hi kan tawng lo ding. ²² Asinan atu ah cun thinhnangamten um dingin ka lo ngen hai a si. Ziangahtile, zawi nunnak hman a hlo lo ding. Lawng lawng kan hloh ding. ²³ Ziangahtile, i neitu le a rawng ka bawl mi Pathian-ih vancungmi cu mizan ah ka kiangah a ding ih, ²⁴ ‘Paul, ṭih hlah, nang cu Kaisar hmaiah na ding ding. Cule, ngai hnik, nangmah thawi lawng ih khual a tlawngtu hmuahhmuah ih nunnak cu Pathian in na hnenah a lo pe zo,’ tiah i ti. ²⁵ Curuangah, pulenuh, hnangamten um ko uh. Ziangahtile, Pathian ka zum ih, i sim mi vek cekci in a cang taktak ding. ²⁶ Asinan tikulh pakhatkhat ah in hlawn ding a si,” tiah a ti. ²⁷ A ni hleilitnak zan ah thli cun a suk a so ah Adria tifinriat ah cun in nuai ciamco. Zanṭim hrawngah lawng mawngtupawl in khawmual kan naih thlang ding tiah an ruat. ²⁸ Ti thuk lam an tah tikah ti cu pi za le kul a thuk ti an thei. Malte hladeuh an feh hnuah an tahsal ih, pi sawmkua a thuk ti an thei. ²⁹ Lungpipawl tla kan sawh pang ding ti an phan ruangah lawng mei ihsin thirkawnpi pali an thlak ih, khawvan ding dil in thla an cam. ³⁰ Cule lawng mawngtupawl cu tlansuah an duh ih, lawng hmai lam ihsin thirkawnpipawl thla ding vekin an umawter ih, vawkkuanglawng cu tifinriat sungah nuamteten an thlak. ³¹ Cu tikah Paul in ralkap za hotu le ralkapawl hnenah, “Hipawl hi lawng sungih an um lo asile nan luat thei lo ding,” tiah a ti. ³² Cule ralkappawl in vawkkuanglawng hri cu an satcat ih an fenhloter. ³³ Khua a van zik zawngah an zaten rawl ei dingin Paul in nasazetin a ngen hai. An hnenah, “Zianghman ei lo le rawl lo ih nan hngahnak a ni hleilitnak a si zo. ³⁴ Curuangah rawl ei dingin ka lo fawrh a si. Harhdamnak ṭha nan neihnak dingah nan ṭul a si. Ziangahtile, nan lakah mi zohman in a lu ih a sam phangkhat hman a hloh lo ding,” tiah a ti. ³⁵ Cui thupawl a sim hnuah sang a lak ih an zate hmaiah Pathian hnenah lungawithu a sim. Cule a phel ih ei a thawk. ³⁶ Cumi cun an zaten an hna a ngamter ih, annih khalin rawl an ei ve. ³⁷ Lawng sungih um hmuahhmuah cu mi zahnih le sawmsarihparuk kan si. ³⁸ An ei khawp hnuah lawng zangter dingah sangvutpawl cu tifinriat sungah an hlawn. ³⁹ Cule, khua a van tikah khui khawmual a si ti an thei lo. Asinan, tikelih tikap lei an hmu ih, a cang thei asile cu tawkih an lawng mawnluh an tum. ⁴⁰ Cule thirkawnpipawl cu an satcat ih, tifinriat sungah an tanta. Hri in an ṭawn mi lawng hlaunak cu an phawih. Cule lawng hmai lam puanzar kha thli ih hran dingin an zar ih, tikap lam an pan. ⁴¹ Asinan tifinriat pahnih tawnawknak hmun ah kan thleng ih, lawng cun lei a sawh ih, a hmai lam zum a dawtawhnget ih ṭhawn theih loin a um. Tisuar in a mei cu vuakparh a thawk. ⁴² Thawngtlapawl kha ti leuhsuak in an tlan pang ding ti ralkappawl in an phan ruangah thah an duh. ⁴³ Asinan ralkap za hotupa in Paul humsuak a duh ruangah an thiltum mi cu tuahsuak lo dingin a dawn hai. Tileuh theipawl cu ti sungih dawp hmaisa ih khawmual lamih leuh dingin thu a pek. ⁴⁴ Atang mipawl cu thingphengpawl simaw, a kekkuai mi lawng simaw to in suak dingin thu a pe. Cuti cun an zaten khawmual ah himdamten an thleng.

¹ Himdamten tikap an thlen tikah cui tikulh cu Malṭa tikulh a si ti an thei. ² A ram mipawl cun nasazetin kan parah ṭhatnak an langter ih, cui canah ruah a sur ih a daih tuk ruangah annih cun meisa in tihsak ih ṭha zetin in cohlang. ³ Paul in zanthing tawm khat a khawm ih, meisa ah a thlak. Cule a sat ruangah rul tur nei a suak ih a kut a cuk. ⁴ Cu tawk tikulh ih minungpawl cun a kut ih rul thlaiaw an hmuh tikah pakhat le pakhat, “Hi pa cu tualthat a si tengteng ding. Tifinriat ihsin himdamten a suak ko nan Diknak cun nun sau a siang lo,” tiah an tiaw. ⁵ Cule Paul in rul cu meisa sungah a thinthlak ih amah cu a zianghman a pawi lo. ⁶ A thling ding ih hmakhatteah tlu in a thi ding tiah an ruat ih reipi an zoh. A parah thil dang zianghman a cang lo ti an hmuh tikah an thinlung an thleng ih, “pathian a si,” tiah an ti. ⁷ Cui canah tikulh hotupa Publias an ti mi in cu tawk kiangah loram a nei. Cu pa cun ni thum sung ṭha zetin in cohlang. ⁸ Cule hiti hi a rak si, cui canah Publias-ih pa cu khawsik le santen thi thawh in a na ih a it. Paul cu a lut ih thla a camsak hnuah a parah a kut a suang ih a damter. ⁹ Cutiih a tuah ruangah cui tikulh ih um mina hmuahhmuah cu an ra ih, Paul in a damter hai. ¹⁰ Upatnak tampi in pek. Lawng in feh kan tum tikah kan ṭul mi hmuahhmuah in pe. ¹¹ Thla thum hnuah thlatang sung hmuahhmuah tikulh ih um, Alexander khua ihsin a ra mi, hminsinnak dingih fapa phir zuk cuang mi lawng in kan pawk. ¹² Sirakus khawpi ah kan cawl ih, cu tawkah ni thum sung kan um. ¹³ Cu tawk hmun ihsin suak in kan helkual ih, Rezium khawpi kan thleng. Ni khat hnuah thlang lam thli a hrang ih, a ni hnihnak ah Puteoli khua kan thleng. ¹⁴ Cu tawkah unaupawl kan hmu ih an hnenah ni sarih sung cam dingin in sawm. Cutin Rom khaw lam panin kan feh. ¹⁵ Rom ih unaupawl in kan thuhla an theih tikah Appias bazaar khua le Khualbuk pathum khua tiang in hmuak in an ra. Paul in a hmuh hai tikah Pathian hnenah a lung a awi ih a hna a ngam. ¹⁶ Rom kan thlen tikah ralkap za hotupa in thawngtlapawl cu thawngtla kiltu hotubik hnenah a pek. Asinan Paul cu amah kiltu ralkap pakhat thawn a mahte lawng um dingin a sen. ¹⁷ Cule hiti hi a rak si, ni thum hnuah Paul in Jew-pawl lakih an hruaitupawl a kokhawm ih, an ratkhawm tikah, an hnenah, “U le nau tla, kan mipipawl le kan pupapawl ih nunphung kalh zawngin zianghman ka tuah lo. Asinan Jew-pawl in Jerusalem khua ah in kai ih, Rom mipawl hnenah in ap. ¹⁸ Rom mipawl in in zawihliah tikah thlah in duh. Ziangahtile, thihnak tlak sual ka tuah lo ti kha an hmu. ¹⁹ Sikhalsehla, Jew-pawl in dokalh in an el tikah lotheihlo in Kaisar hnenah lu ka pu. Ka mipipawl dokalhnak zianghman ka nei lo. ²⁰ Curuangah nanmah lo hmuh le nan hnenih thu lo sim ka dilnak san a si. Thir cikcin ih in ṭawnnak san cu Israel-pawlih ruahsannak ruangah a si,” tiah a ti. ²¹ Cule annih in a hnenah, “Nangmai thuthawn pehparawin Judia ram ihsin cakuat zianghman kan ngah lo. Cun, cu tawk ihsin a ra mi unaupawl zohman in na thuhla zianghman an rel lo ih, na thuhla sia zianghman an rel fawn lo. ²² Asinan na ruahdan na hnen ihsin kan ngaithlak a ṭha ding tiah kan ruat. Ziangahtile, hmun kipih um mipawl in hipawlih thuhla dokalhnak an ṭawng ti kan thei,” tiah an ti. ²³ Cule ni an tin hnuah a riahnak hmun ah mi tampi an ra ih, zing ihsin zan lam tiang Pathian uknak thu cu an hnenah a simfiang ih, fimkhur zetin a theihter hai. Mawsi-ih Dan bu le profetpawl ih cabu sung ihsin Jesui thu in hmin thei dingin a zuam. ²⁴ Cule, a sim mi thu cu mi hrek in an zum ih, mi hrek cun an zum lo. ²⁵ Cun, pakhat le pakhat an lung a rual lo. An ṭhenawk hlanah Paul in netabikah thu pakhat a sim, “Thlarau Thianghlim in kan pupapawl hnenah profet Isaiah hmang in thu dik zetin a sim. ²⁶ A sim mi thu cu, ‘Hi minungpawl hnenah va feh aw la, sim aw, “Hna cun nan thei ko ding nan, nan theithiam hrimhrim lo ding. A hmuh cu nan hmu rero ko ding nan theihthiamnak thawn nan hmu hrimhrim lo ding. ²⁷ Ziangahtile, hi minungpawlih thinlung cu a cawlawl ih, hnaset vekin an um ih an mit an sing. Cu lo asile an mit in an hmu ding, an hna in an thei ding ih, an thinlung in an theithiam ding. Cule, an thinlung an hawikir ding ih, ka damter hai ding tiah Pathian in a ti,” ’ ti hi a si. ²⁸ “Curuangah Zentelpawl hnenah Pathian rundamnak cu pek a si zo ti le cumi cu annih in an ngaithla ding ti kha thei uh!” tiah a ti. ²⁹ Cui thupawl a sim hnuah Jew-pawl cu an fehhlo ih, anmah le anmah lakah nasazetin an relkhawm. ³⁰ Cule Paul cu amai san mi inn ah kum hnih kheng a um ih, a hnenih a ratu hmuahhmuah a cohlang hai. ³¹ Ralṭha zet le khamtu zohman um loin Pathian uknak thu sim le Bawi Jesu Khrih thuhla zirh in a um ringring.