3 JOHAN
11 Kei, elder John in ka duhdawt mi Kaias hnenah ca ka ngan. Ka lo duhdaw taktak a si. 2 Duhdawt mi, thil ziangkim ih na hmuingilnak ding le harhdamnak ṭha na neihnak ding hrangah thla ka cam. Na nun a hmuingil vek khan hmuingil hram aw. 3 Kan unau hrekkhatpawl an ra ih thutak ih na um vekin nangmah ih thutak thuhla an theihter tikah nasazetin ka lung a awi. 4 Ka falepawl thutak ih an feh ti hna ih ka theih tikih ka lungawi hnakih nasasawn lungawinak ka nei lo. 5 Duhdawt mi, unaupawl hrang le mikhualpawl hrangih na tuah mi ziangkimah rinum zetin na tuah ṭheu. 6 Na duhdawtnak thuhla kawhhranpawl hmaiah an rak theihter zo. Pathian mipawlih nundan milin anmahpawl cu an khualtlawnnak ah na hei thlah asile na tiṭha ding. 7 Ziangahtile, annih cu Bawipai hmin ruangah an rak fehsuak. Zentelpawl hnen ihsin zianghman an la lo. 8 Curuangah thutak ih rawngbawltlang kan si theinak dingah cuvek mipawl kha kan cohlang ding a si. 9 Kawhhran hnenah ca ka rak ngan. Asinan, mithupibik si a duhtu Daioṭhefes in in cohlang lo. 10 Curuangah ka rat asile a tuah mi a thiltipawl kha ka phuang ding. Anih cun kanmah dokalh in ṭawng ṭha lo tla a ṭawng. Cui ṭawng ṭha lo lawng cu tawk a ti lo ih, unaupawl khal a cohlang lo. Cule cohlan a duhtupawl khal a dawn hai ih, kawhhran ihsin a suah hai. 11 Duhdawt mi, thil sia kha cawng loin, thil ṭha kha cawng sawn aw. Thil ṭha a tuahtu cu Pathian hnen ihsin a si. Asinan thil sia a tuahtu cun Pathian a rak hmu lo. 12 Mi kipin Demeṭrias thuhla ṭha an rak theihter. A diknak rori khalin a thu cu a fiangter. Kannih khalin amai thu cu kan theihter ve. Kan theihter mi thu cu a dik a si ti nan thei. 13 Ngan ding thil tampi ka nei. Asinan na hnenah cafung le cati ih ngan ka duh lo. 14 Lo hmuh cing ding ka beisei. Cule hmaitawn in kan beaw ding. Na hnenah hnangamdaihnak um hram seh. Hi tawkih kan rualpipawl in cibai an lo buk. Kha tawkih rualpipawl tla an hmin sal in cibai rak buk hai aw.