2 TIMOTE

¹ Khrih Jesu sungih um mi nunnak thutiam bangtukin, Pathian duhzawng ih Jesu Khrih-ih apostol keimah, Paul in, ² ka duhdawt zet mi ka fapa, Timothy hnenah Pa Pathian le kan Bawipa Khrih Jesu hnen ihsin zangfahnak, zahngainak le hnangamdaihnak cu um hram seh. Lungawithu Simnak le Thapeknak ³ Pupapawl in an rak ren bangin sia le ṭha theihnak thiang thawi ka ren mi, Pathian hnenah ka lung a awi. Cuti cun bang loin sun le zan ka thlacamnak ah ka lo mang ringring. ⁴ Lungawinak thawi ka khah theinak dingah nangmah lo hmuh ka hiar zet. Na mitthlipawl tla ka cing ringring. ⁵ Zumnak diktak na sungih um mi cu ka cing ringring ih, cui zumnak cu atir in na pi Lois hnenah a um ih, cule na nu Zunis hnenah a um. Cucu nangmah khalah a um ti ka theifiang. ⁶ Curuangah na parih ka kut ka suannak ihsin nangmah ih um mi Pathian thilpek cu semalh tharsal dingin ka lo theihtersal a si. ⁷ Ziangahtile, Pathian in ṭihnak thlarau in pe lo ih, thiltitheinak thlarau, duhdawtnak thlarau le a fim mi ruahnaklungthin thlarau in pe sawn a si. ⁸ Curuangah kan Bawipai thuhla theihter cu zahpi hlah aw la, amai thawngtla kei khal hi i zahpi hlah. Thuthangṭha ruangih harsat tuarnak Pathian huham vekin i tuarpi sawn aw. ⁹ Anih cun kan hnaṭuan vek si loin amai tumdan le zangfahnak vek sawnin in rundam ih, kawhnak thianghlim in in ko a si. Cui zangfahnak cu leilung sem hlan in Khrih Jesu ah pek zo kan si. ¹⁰ Asinan in Rundamtu Jesu Khrih langnak zarah, cui zangfahnak cu atu ah langter a si zo. Anih cun thihnak cu a hloter ih, nunnak le thih theilonak cu thuthangṭha hmang in a langter zo. ¹¹ Cui thuthangṭha simtu ah, apostol ah le Zentelpawl zirhtu ah keimah cu ruat ka si. ¹² Cu mi thu ruangah hi thilpawl hi ka tuar a si; sihmansehla, ka ning a zak lo, ziangahtile ka zum mi cu zo a si ti ka thei ih, cui ni hrangih a hnenih ka kawlter mi cu a kilhim thei ti ka theifiang. ¹³ Khrih Jesu ih um zumnak le duhdawtnak in a ziktluak mi thu zohṭhim ding mi ka hnen ihsi na theih mi kha kaihnget aw. ¹⁴ Cui thil ṭha na hnenih kawlter mi cu kan sungih um Thlarau Thianghlim hmang in kilhim aw. ¹⁵ Asia peng ih um mipawl hmuahhmuah in in tlansan ti kha na thei. Cupawl lakah Fikel le Harmokens an tel. ¹⁶ Onisiforas cun i harhtharter ṭheu. Ka cikcinpawl khal in zahpi lo ruangah Bawipa cun a insangpawl hnenah zahngainak pe hram seh. ¹⁷ Rom ih a um laiah, anih cun ngunngaih zetin in hawl ih, in hmu. ¹⁸ Cui ni ah Bawipai hnen ihsin zahngainak a hmuh theinak dingah Bawipa in pe hram seh. Cule, Efesa khua ah anih in ziang tluk nasain i rian ti kha na theifiang a si.

¹ Curuangah nang, ka fapa, Khrih Jesu ih um zangfahnak ah cak zetin um aw. ² Cule, thutheitu tampi lakah ka hnen ihsin na theih mi thupawl kha mirinum, midang va zirhsawngsin theitu dingpawl hnenah kawlter aw. ³ Curuangah, Jesu Khrih ralkap ṭha vekin harsatnak cu tuar aw. ⁴ Ralkap si dingih amah a hriltu a lungawiter theinak dingah zohman in raldo laiah hi nunsung khawsaknak thupawl thawn a hnawihnihaw lo. ⁵ Cun, mi pakhat in zuamawknak ah zuam ve-in, dan vekih a zuam lo asile nehnak lukhum pek a si lo. ⁶ Lo ṭuantu bang zetih a ṭuantu cu a rah sengtu hmaisabik a si ding a si. ⁷ Ka sim mi hi ruat aw. Bawipa cun thil ziangkimah theihthiamnak lo pe hram seh. ⁸ Ka thuthangṭha bangtukih mithi lak ihsi kaihthawh mi David tesinfa Jesu Khrih kha cing ringring aw. ⁹ Cui thuthangṭha ruangah thil ṭha lo tuahtu bangin cikcin ih ṭemṭawnnak tiang harsatnak ka tuar. Asinan Pathian thu cu ṭemṭawn a si lo. ¹⁰ Curuangah Khrih Jesu ih a um mi rundamnak cu kumkhaw ropitnak thawn annih khalin an co ve theinak dingah hril mipawl hrangah thil ziangkim hi ka tuar a si. ¹¹ “Ziangahtile, amah thawi kan thihtlang asile, amah thawn kan nungtlang ding. ¹² Kan tuar asile, amah thawn kan uk ve ding. Amah kan phatsan asile, anih khalin in phatsan ve ding. ¹³ Kan zum lo a si khalle, anih cu a rinum ringring, amah le amah a phatsanaw thei lo,” ti ṭawngkam hi rinsan tlak a si. ¹⁴ Hi thupawl hi zumtupawl cingkengter ringring hai aw. Hlawknak si lo, a ngaithlatupawl siatnak sawn a si mi thu menmenih an elawklonak dingah Bawipai hmaiah na zetin thu pe hai aw. ¹⁵ Pathian pawm mi vekin nangmah le nangmah Pathian hnenih peaw dingin nasazetin taima aw. Hnaṭuantu ningzak lo, Pathian thu dik zetih ṭhenfeltu si sawn aw. ¹⁶ Asinan leitlun thil le sullam nei lo phunnawinakpawl cu hrial aw. Ziangahtile, cupawl cun Pathian ngaihsak lo sinsinnak lamah an lo hruai ding. ¹⁷ Cun, an thu cun khensa mi ei vekin a ei ding. Cupawl lakah Haimenias le Fileṭas an tel. ¹⁸ Annih cun, “Thawhsalnak cu a thleng zo,” tiin thutak cu an ṭhelh. Cuti cun mi hrekkhatpawlih zumnak an hloralter. ¹⁹ Sihmansehla, Pathian lungphum cu a ding ringring ih, hi tacik hi a nei, “Bawipa in amai tapawl cu a thei,” ti le “Khrih hmin saltu pohpoh cun dingfellonak tlansan seh,” ti mi hi. ²⁰ Asinan inn ropi sungah sui le ngun bungbelpawl lawng an um lo ih, thing le lei bungbelpawl khal an um. A hrekkhat cu sunlawih ding mi an si ih, a hrekkhat cu sunlawih lo ding mi an si. ²¹ Curuangah hi mipawl ihsin mi a thianfaiawk asile, anih cu sunlawih tlak bungbel, tithianhlim le Bawipai hman tlak le hnaṭuan ṭha tinkim hrangih timlam mi bungbel a si ding. ²² Nolai cakhiarnakpawl khal tlansan aw la, thinlung thiang ih Bawipa a kotupawl thawn dingfelnak, zumnak, duhdawtnak, hnangamdaihnak cu dawi sawn aw. ²³ Sikhalsehla, atthlak le sullam nei lo thusuhnakpawl cun buainak a suakter ti na theih ruangah cupawl cu hrial aw. ²⁴ Cun, Bawipai siahhlawh cun mi a elbuai ding a si lo. Mi hmuahhmuah hnenah a nun a nem ding, mi a zirh thei ding ih, thinsaunak a nei sawn ding a si. ²⁵ Dokalhtupawl cu nunnem zetin nun sim hai aw. Cuti cun Pathian in anmah cu thutak theihnak lamah sirawknak a pe hai mahna. ²⁶ Cule, cuti cun, ṭhangharhsal in amai duhzawng ti dingih rak kaitu Diabol-ih thang sung ihsin an tlansuak thei ding.

¹ Cule hi khal hi thei aw, ni netaah cun can ṭihnungza a ra thleng ding. ² Ziangahtile, mah le mah ngainaawtu, tangka ngainatu, pawrhawk hmang, mihngal, mithangsiat hmang, nu le pai thu lung lo, lungawi hna thiam lo, thianghlim lo, ³ suahpi duhdawtnak nei lo, remnak siatsuahtu, diklo zetih mihek hmang, supaw thei lo, minunrawng, thil ṭha duhlotu, ⁴ miphatsan hmang, pawisak nei lo, miduhaw, Pathian duhdawt hnakin nawmcen ngaina sawntupawl an si ding. ⁵ Pathian ngaihsak hmel an pu nan, a huham cu an el. Cuvek mipawl cu va tlansan aw. ⁶ Ziangahtile, cupawl cu innpawl ah lut thupin, nunau aapawl tla sal ah an kai ih, cuvek nunaupawl cu sualpawl ih nen mi le cakhiarnak phun zakipih hruai rero mi an si. ⁷ Cupawl cu zir rero na cingih thutak theihnak ih thleng ban thei lopawl an si. ⁸ Cun, Jannes le Jambres in Mawsi an do vek khan hipawl khalin thutak an do. Ruahnaklungthin se thluh zo mi, zumnak thu ih tling lo mi an si. ⁹ Asinan, Jannes le Jambres atzia a lang vek khan an atzia mi hmuahhmuah hmaiah phuansuah a si ding ruangah hlapi cu an feh thei lo ding. ¹⁰ Asinan nang cun ka zirh mi thu, ka umtudan, ka tumtah mi, ka zumnak, ka thinsaunak, ka duhdawtnak, ka tuarfainak, ¹¹ tiduhdahnakpawl le harsatnakpawl Anṭiok, Ikoniam le Listra khawpawl ah ka parih a thleng mi, ziang tiduhdahnakpawl ka tuar ti khal na thei thluh zo. Asinan cu mipawl hmuahhmuah sung ihsin Bawipa in i runsuak a si. ¹² A si, Khrih Jesu ah Pathian ngaihsak ih nun a duhtu hmuahhmuah cun tiduhdahnak an tuar ding. ¹³ Asinan miṭhalopawl le mibum hmangpawl cu mi bum in le bum ih um in an sual sinsin ding. ¹⁴ Sikhalsehla, nang cu na zir zo mi le a dik a si tiih na theih mi thilpawl kha zo hnen ihsin ka zir ti thei in cu mi ah um peh vivo aw. ¹⁵ Cule, nauhakte na si lai ihsin Cathianghlim cu na rak thei zo. Cu cun Khrih Jesu zumnak ruangih rundamnak ngah ding tiangin a lo fimter thei a si. ¹⁶ Cathianghlim hmuahhmuah hi Pathian thawtkhumnak in pek a si ih, zirhawknak hrangah si seh, kawkawknak hrangah si seh, remṭhatawknak hrangah si seh, dingfelnak zirhawknak hrangah si seh a hlawk a si. ¹⁷ Cuti cun Pathian mi cu a tling mi le hnaṭuan ṭha hmuahhmuah tuah dingah thawm famkim a si thei ding.

¹ Curuangah a runglangnak le a uknak ih mithi le minungpawl thuṭhentu ding Bawipa Jesu Khrih le Pathian hmaiah thu ka lo pe a si. ² Thu cu sim aw! A tikcu ah si seh, a tikcu lo khalah si seh tiar ringring aw; thinsaunak hmuahhmuah le zirhnak hmuahhmuah thawn an mawhzia theihter aw, kawk aw la, tha pe aw. ³ Ziangahtile, zirhnak ziktluak minungpawl in an tuar thei lo can a ra thleng ding ruangah an hna za diremternak ah anmai cakhiarnak vekin zirhtupawl anmai hnenah an khawm sawn ding. ⁴ Cule, thutak ihsin an hna cu an her ding ih, phuahcawp thuanthu lamah an fehpeng ding. ⁵ Asinan nang cu thil ziangkimah fimkhur aw, harsatnakpawl cu tuar ṭenṭo aw, evangelist hna cu ṭuan aw la, na rawngbawlnak zaten hlensuak aw. ⁶ Ziangahtile, kei cu atu ah in ding thilhlan vekin burh in ka rak um rero zo a si. Cun ka fehsuah can cu a nai zo. ⁷ Doawknak ṭha cu ka do zo. Ka hna cu ka ṭheh zo ih, zumnak cu ka kilhim zo. ⁸ Atu thawkin dingfelnak lallukhum cu ka hrangah ret a si zo. Cucu Bawipa, Thuṭhentu dingfel cun cui ni ah i pe ding. Ka hnen lawngah si loin a langnak hngakhlaptupawl hmuahhmuah hnen khalah a pe ding. ⁹ Ka hnenih rat zang tum hramhram aw. ¹⁰ Ziangahtile, Demas cun tulai khawvel a ngainat ruangah i tlansan ih, Thessalonika khua ah a feh. Kresen cu Galatia peng ah a feh ih, Tita khal Dalmaṭia peng ah a feh. ¹¹ Luke lawng ka hnenah a um. Mark kha sawm aw la, na zawngah rak hruai ve aw. Ziangahtile, anih cu rawngbawlnak ah miṭhahnem a si. ¹² Cun, Ṭaikhikas cu Efesa khua ah ka rak thlah zo. ¹³ Troas khua, Karpas hnenih ka kawrcung fual ka tan mi kha, na rat tikah cazualpawl thawn rak keng aw la, ahleicein savun cazualpawl kha run keng aw. ¹⁴ Dar soser thiam, Alexander in ka parah thil ṭha lo tampi a tuah. Bawipa in a hnaṭuan mipawl vekin thungrul seh. ¹⁵ Kan thupawl a dodal nasat ruangah nang khal a parah ralring aw. ¹⁶ Humawknak thu ka rel hmaisak ṭumah khan zohman in in dinpi lo ih, an zaten in tlansan thluh sawn. An parah mawh thleng lo dingin Pathian hnenah thla ka cam. ¹⁷ Cuti va si hman sehla, thuthangṭha cu keimah hmang in sim kim a si theinak dingah le Zentelpawl hmuahhmuah in an ngaithlakngah theinak dingah Bawipa cun i dinpi ih, cahnak i pe. Kiosa kaa sung ihsin i runsuak. ¹⁸ Cule, Bawipa cun hnaṭuan ṭha lo tinkim ihsin i runsuak ding ih, a vancung uknak sung tiang i kilhim ding. A hnenah ropitnak cu kumkhua in kumkhua tiang um seh. Amen. ¹⁹ Prisilla le Akuila le Onisiforas tei insungsang kha cibai i buk sakaw. ²⁰ Erasṭas cu Korinth khua ah a cam ih, Trofimas cu Mileṭas ah dam loin ka tanta. ²¹ Thlatang hlanah ra tlawn thei tum hramhram aw. Zubulas, Pudens, Linas, Klaudia le unaupawl hmuahhmuah in cibai an lo buk. ²² Bawipa Jesu Khrih cu na thlarau hnenah um seh. Zangfahnak na hnenah um hram seh. Amen.