2 THESALON

¹ Paul, Silas le Timothy in Pathian kan Pa le Bawipa Jesu Khrih ih um, Thessalonika kawhhran mipawl hnenah: ² Pathian kan Pa le Bawipa Jesu Khrih hnen ihsin zangfahnak le hnangamdaihnak cu nan hnenah um seh. ³ U le nau tla, nan zumnak cu nasazetin a ṭhang vivo ih, nan zaten pakhat le pakhat nan duhdawtawktawn cionak cu a luanliam ruangah nanmai thuhla ah ti ding mawi a si vekin Pathian hnenih lungawithu sim ding hrimhrim kan si. ⁴ Cuti cun, tiduhdahnakpawl le harsatnakpawl nan tuarnak hmuahhmuah ih nan tuarfainak le nan zumnak ruangah Pathian kawhhranpawl hnenah kan rak tluangkhawng ṭheu a si. ⁵ Cumi cun Pathian uknak hrangih mi si tlak dingih ruat nan si ti Pathian thuṭhennak dingfel hminsinnak a langfiangter. Nannih khal cu mi hrangih tuar nan si hi! ⁶ Nanmah harsatnak a lo petupawl harsatnak thawi thungrulh hi Pathian hrangah a dingfel mi thil a si. ⁷ Cule, nannih harnak a tuartupawl tla, Bawipa Jesu, a cak mi a vancungmipawl thawi a runglang tikah kanmah thawn a lo cawl hahdamter ding. ⁸ Pathian theilopawl le kan Bawipa Jesu Khrih-ih thuthangṭha a lunglotupawl parih phuba la dingin meialh ah a ra ding. ⁹ Annih cu Bawipai umnak ihsin le a cahnak ropi zet ihsin ṭhen in kumkhaw siatralnak ah hrem an si ding. ¹⁰ Cui canah a mithianghlimpawl in amah Khrih an thangṭhat theihnak dingah a ra ding ih, cu mi ni ah cun zumtu hmuahhmuah in amah cu mak an ti ding. Ziangahtile, nan hnenih kan lo theihter mi thu nan zum ruangah cumi cu a cang ding a si. ¹¹ Cu mi ruangah a lo kotu kan Pathian in cui kawhnak mil ih a lo ruahnak ding le ṭhatnak hrangah a ṭha mi tumtahnak kipin le zumnak hnaṭuan kipin huham thawi a lo tlamtlinternak dingah nan hrangah thla kan cam ringring. ¹² Cuti cun kan Pathian le kan Bawipa Jesu Khrih-ih zangfahnak vekin, kan Bawipa Jesu Khrih hmin cu nanmah ah sunlawih a si thei ding ih, nannih khal amah ah sunlawih nan si thei ding.

¹ U le nau tla, kan Bawipa Jesu a ratsal ding ruangah le a hnenih kan tawnkhawmawktlang ding ruangah, kan thu hi atu ah ngaithla uh tiah kan lo ngen a si. ² Khrih ni a rak thleng zo, tiin kanmai cakuat vek phun ruangah simaw, thlarau ruangah simaw, thu ruangah simaw, nan ruahnaklungthin hnin lohliter hlah uh la, buaiter hlah uh. ³ Zohman in ziangti lam khalin lo bum hlah hai seh. Ziangahtile, tluksannak a ra thlen hmaisat ih, misualralpa, siatralnak fapa, a lang lai hlanlo, cui ni cu a thleng lo ding. ⁴ Anih cu Pathian tiih kawh mi hmuahhmuah asilole an biak mi hmuahhmuah cu do in an tlunah a cawisangaw ding. Cuti cun Pathian vekin Pathian temple hmun thianghlim sungah to in amah rori cu Pathian ka si tiah a tiaw ding. ⁵ Nan hnenih ka um laiah khan hi thilpawl cu ka lo sim ṭheu ti nan cing nawn lo maw si? ⁶ Cun, amai cante ih a ra lang theinak dingah atu ah ziang in a kham hrih ti nan thei. ⁷ Sikhalsehla dan neihlonak thuthup cun atu khalah hna a ṭuan rero zo. Asinan atu ih a khamtu hi lakhloh a si lai hlanlo cu a kham vivo hrih ding. ⁸ Cu mi lakhloh a si tikah dan neilopa cu a ra lang ding. Cule, Bawipa in anih cu a kaa ih thaw in a hloralter ding ih, a ratnak tleu in a ṭhiatbal ding. ⁹ Dan neilopai ratnak cu Setan hnaṭuannak vekin, huham hmuahhmuah, hminsinnak hmuahhmuah le thuphan mangbangza hmuahhmuah thawn a si ding. ¹⁰ Cun, rundam ih an um theinak ding thutak cu an duh lo ruangah a hloral cuahco mipawl hnenah cun a dingfel lo mi bumnak tinkim thawn a ṭuan ding. ¹¹ Cun, himi ruangah, thuphan zum dingin, Pathian in an hnenah theihthiam theilonak nasazet a thlah ding. ¹² Cumi cu thutak zum lo ih dingfellonak ih a nuamaw sawntu hmuahhmuah thiamlo an co thluh theinak dingah a si. ¹³ Asinan, Bawipai duhdawt mi unauletla, Thlarau tithianhlimnak le thutak zumnak ruangin rundam si dingah atir ihsin Pathian in a lo hril zo ruangah nan hrangah Pathian hnenih lungawithu sim ringring ding kan si. ¹⁴ Cu mi hrangah kan Bawipa Jesu Khrih ropitnak co ve dingah Pathian cun kan thuthangṭha hmang in a lo ko hai a si. ¹⁵ Curuangah u le nau tla, dinghnget uh la, thu in simaw, kan cakuat in simaw kan lo zirh mi thurosiahpawl kha kaihnget uh. ¹⁶ Atu ah kan Bawipa Jesu Khrih rori le Pathian kan Pa, in duhdawtu le zangfahnak ruangih kumkhaw thlangamnak le ruahsannak ṭha in petu cun, ¹⁷ nan thinlung tla lo thlangam seh la, ṭawngkam ṭha le hnaṭuan ṭha tinkim ah lo hngetter hram seh.

¹ Anetabikah, u le nau tla, Bawipai thu nan rak sunlawih vek khan, cak zetih karhzai le sunlawih a si theinak dingah thla in camsak uh. ² Cuti cun mithinlungkawi le miṭhalopawl hnen ihsin runhim kan si thei ding. Ziangahtile, mi hmuahhmuah in zumnak an nei thluh si lo. ³ Asinan Bawipa cu a rinum a si, anih cun a lo hngetter ding ih, miṭhalopai hnen ihsin a lo kilhim ding. ⁴ Cule, nanmah thawn pehparin thu kan lo pek mipawl kha nan nunpi ih nan nunpi vivo ding ti Bawipa ah zumhngehnak kan nei. ⁵ Cule Bawipa in nan thinlung kha Pathian duhdawtnak ah le Khrih-ih tuarfainak ah lo hruai seh. ⁶ Atu ah, u le nau tla, kan thu tan mi vekih a nung lo le mawi lo ih a nungtu unau pohpoh hnen ihsin thiarfihlimaw dingin kan Bawipa Jesu Khrih hmin in thu kan lo pe a si. ⁷ Ziangahtile, nanmah roriin ziangvekin kan nun cawng ding nan mawi ti cu nan thei. Kannih cu nan lakah mawilo in kan nung dah lo. ⁸ Zo-ih rawl hman alakin kan ei dah lo. Nan lakah zohman sumpai thu ah kan lo phurritterlonak dingah a sun a zan bang zet le cau zetin hna kan ṭuan sawn a si. ⁹ Thuneihnak kan neih lo ruangah si loin, in cawn ding mi, nan zohṭhim dingah kanmahte kan tuahawk mi a si sawn. ¹⁰ Ziangahtile, nan hnenih kan um lai khalah khan, “Mi pakhatkhat in hnaṭuan a paih lo a si ah cun ei khal ei hlah seh,” ti khalin thu kan lo pe. ¹¹ Ziangahtile, mi ṭhenkhat cu nan lakah mawi loin an um ti kan hna in kan thei. Annih cun hna ṭuan loin, midang thuhla ah an va hrawlhaw rero men. ¹² Atu ah, cuvek mipawl cu daiten hna ṭuan dingin le anmai rawl ei dingin kan Bawipa Jesu Khrih hmin in thu pe in kan fawrh a si. ¹³ Asinan, u le nau tla, thil ṭha tuah cu ning hlah uh. ¹⁴ Cun, mi pakhat in himi cakuat sungih kan thu a lun lo asile, cu pa cu hminsin uh la, a ning a zah theinak dingah kawm hlah uh. ¹⁵ Asinan, ral vek cun ruat hlah uh la, unau vekin nun sim sawn uh. ¹⁶ Atu ah, daihnak Bawipa rori cun a phunphunin hnangamdaihnak lo pe camcin seh la, Bawipa cu nan zate hnenah um hram seh. ¹⁷ Cibaibuknak hi keimah Paul in ka kut roriih ka ngan mi a si. Hitivekih ka ngan hi ka cakuat kipih hminsinnak a si. ¹⁸ Kan Bawipa Jesu Khrih-ih zangfahnak cu nan zate hnenah um hram seh. Amen.