2 PITER

¹ Jesu Khrih-ih ṭemṭawn sal le apostol a si mi, Simon Peter in, kan Pathian le Rundamtu Jesu Khrih dingfelnak zarih kanmai neih mi vek zumnak sunglawi neitupawl hnenah: ² Pathian le kan Bawipa Jesu theihnak ruangah nan hnenah zangfahnak le hnangamdaihnak cu tam sinsin hram seh. ³ A ropitnak le a ṭhatnak maksak hmang ih in kotu theihnak zarah nunnak le Pathian ngaihsaknak hrangih kan ṭul mi hmuahhmuah cu a Pathian sinak huham cun in pe zo a si. ⁴ Cui thilpawl hmang in a nasazet mi le a sunglawi zet mi thutiamkampawl cu in pe. Cakhiarnak ruangih leitlun ih siatnak thleng mi ihsin nan tlansuak ih, Pathian mizia ṭawmpitu nan si theinak dingah cui thutiamkampawl tla cu pek kan si. ⁵ Cutivek a si ruangah nan zumnak ah ṭhatnak bet dingin nasazetin taimak suah uh la, nan ṭhatnak ah theihnak bet uh. ⁶ Cule, nan theihnak ah cun supawknak bet uh la, supawknak ah cun tuarfainak bet uh la, nan tuarfainak ah cun Pathian ngaihsaknak bet uh. ⁷ Cun, Pathian ngaihsaknak ah cun unau lainatawknak bet uh la, unau lainatawknak ah cun duhdawtnak bet uh. ⁸ Ziangahtile, cui thilpawl cu nanmah ah a um ih, a ṭhan vivo asile kan Bawipa Jesu Khrih nan theihnak ah ṭhahnem lo le rah nei loin nan um lo ding. ⁹ Asinan cui thilpawl neilotu cu mitcaw a si. Hlapi a hmu thei lo ih, hi hlanih a sualpawl khawlhfaisak a si ti a hngilh. ¹⁰ Curuangah, u le nau tla, a lo kawhnak le a lo hrilnak fiang dingin taimak suah sinsin uh. Ziangahtile, cu mi nan tuah asile nan tlu dah riai lo ding. ¹¹ Ziangahtile, cuti cun, kan Bawipa le Rundamtu Jesu Khrih ih kumkhaw uknak sungih luh theinak cu nasazetih pek nan si ding. ¹² Cu mi ruangah, atu ih thutak nan neih mi hi nan thei ih, cu mi ah cun hngehter si khal uh la, cui thilpawl tla cu nannih lo theihtersal ringring ding hi ka daithlang lo ding. ¹³ A si, hi puanthlam ih ka um sung cu lo theihtersal ṭheu ih, lo cawhphur cu dikin ka ruat. ¹⁴ Ziangahtile, kan Bawipa Jesu Khrih in i hmuhter zo bangin hi ka puanthlam hi a rei hlanah ka hlitaw ding ti ka thei. ¹⁵ Cuitlunah, ka feh suah hnu khalah cui thilpawl nan cin ringring theinak dingah taimak ka suah sinsin ding. ¹⁶ Ziangahtile, kan Bawipa Jesu Khrih-ih huham le a ratsalnak ding thupawl kan lo theihter laiah khan, hrawkhrawl zetih phuahcawp thuanthu kan thlun lo ih, a cungnunnak mit roriih hmutu kan si sawn. ¹⁷ Ziangah cutin ka ti tile Ropitnak Nasazet ihsi a ra suak mi aw cun, “Hihi ka duhdawt zet mi ka Fapa a si, a parah ka lung a awi zet,” ti thu a hnenih a rung thlen laiah khan Pa Pathian hnen ihsin sunlawihnak le ropitnak a dawng a si. ¹⁸ Tlang thianghlim ah a hnenih kan um laiah, van ihsi a rung thleng mi cui aw cu kan rak thei. ¹⁹ Cule, a hnget sinsin mi simsungnak thu kan nei. Khua a van hlan le deirel arsi cu nan thinlung sungih a suah hlanlo simsungnak thu cu thim lakih tleu mi tle vekih nan ngaihven asile nan tiṭha a si. ²⁰ Cathianghlim sung ih simsungnak thu hrimhrim hi mi pakhatkhat hrilhfiahnak ihsi ra um a si lo ti hi a hmaisabikah thei uh. ²¹ Ziangahtile, simsungnak thu cu milai duhzawng ih ra a si dah lo. Cu hnakin, Thlarau Thianghlim ih a hruai hai vekin, Pathian mithianghlimpawl in an rak phuang a si sawn.

¹ Sihmansehla, mipi lakah profet diklo an um vek khan nan lakah zirhtu diklo an um leh ding. Annih cun, mi siatsuah thei zirhnaksual cu athuptein an run kenglut ding ih, anmah leitu Bawipa rori hman an phatsan ding. Curuangah, anmah ten cawp le cilh ih siatralnak cu an parah an thlengter ding. ² Cule, mi tampi in an hursualnak lamzinpawl tla cu an run thlun ding ih, anmai ruangah thutak lamzin cu relsiat in a um ding. ³ Duhhamnak ruangah thuphan thu in anmai hlawknak hrangah an lo hmang ding. Hlanih an parih thuṭhen mi cu a ding ringring ih, an siatralnak khal a itthat dah lo. ⁴ Ziangahtile, sual a tuahtu vancungmipawl cu Pathian in a zuah hai lo ih, an thu ṭhen dingin mithi khua ah a thlak ih, thim cikcin sungah ṭawn in a khum sawn hai. ⁵ Cun, amah ngaihsaklopawlih umnak leitlun cu ti a likter ih, hlanlai leilung cu a zuah lo. Asinan, dingfelnak thusimtu, Noah cu midang pasarih thawn a runhim a si. ⁶ Cule, Sodom khawpi le Gomorrah khawpi cu vutcam ah a cangter ih, amah Pathian ngaihsak lo rung um leh ding pawlih zohṭhim dingah hloral dingin thiamlo a coter. ⁷ Cule, cin le dan nei loin duhtawk ih hursualnak ih nungpawl ruangih thinnazettu, midingfel Lot cu a runsuak a si ah cun, ⁸ (Ziangahtile, cui midingfelpa cu an lakih a um tikah, dan nei lo ih an nundanpawl tla ni tin a mit in a hmu ih, a hna in a theih tikah a dingfel mi a thinlung cu a na zet ṭheu a si). ⁹ Bawipa cun amah ngaihsaktupawl sualfawrhnak ihsin runsuahdan le midingfellopawl thuṭhen ni hrangih dantat dingih retdan a thei. ¹⁰ Asinan, thuneitupawl nautat in, cakhiarnak bawrhhlawh cu dawi in, anmah bawrhhlawhtertu taksa cakhiarnak vekih nungtupawl tla cu hrem dingih retdan a thei sinsin. Cupawl cu miralṭha le maithuduh an si ih, huham ropi neipawl relsiat khal an ṭih lo. ¹¹ Cahnak le huham nei nasasawn vancungmipawl hmanin miropipawl an relse dah lo ih, Bawipai hmaiah thuneitupawl an relse dah lo. ¹² Asinan, hi bangpawl tla hi, pianphung ihsi khawruahnak nei lo ramsa, kai tahratih hlohralter ding fang vek men hi an si. An theih lo mi thil an relsia ih, anmai siatnak ah cun nasazetin an hloral ding. ¹³ An dingfellonak man cu an ngah ding. Sun ih nawmcennak tuah cu nuam an ti. Nan hnenih puai an hman tikah kawr rawngkai vek le bawrhhlawh kai vek hi an si ih, mibum hi nuam an ti zawng tak a si. ¹⁴ An mit cu uiretnak in a khat ih, sual an bansan thei lo. Mihngetlopawl an thlemthlu ih, duhhamnak thinlung an zirhaw ih, annih cu camsiat fa an si. ¹⁵ Dingfellonak hlawhman ngainatu, Bosor-ih fapa Balam-ih lamzin an thlun ih, lamzin dik cu tlansan in, an fehpeng. ¹⁶ Asinan, anih cu amai sualralnak ruangah nun sim in a um ih, ṭawng thei lo mi laak cu minung ṭawng in a ṭawng ih, profetih atnak cu a rak kham. ¹⁷ Cu mipawl cu ti um lo mi tikhur le thlipi ih a hran mi khawdur vek an si. Thim sah mepmep cu an hrangah retsak kumkhua a si. ¹⁸ Ziangahtile, thulolakmen cu titeraw zetih rel in, sual ih a um mipawl lak ihsi tlansuak zo pawl cu tisa caknak le tenumza hursual tuahnak hmang in an lemkir ṭheu. ¹⁹ Zirhtu diklopawl cun anmah rori siatnak sal ah tang cingin, midang hnenah luatnak ding thu an tiamkam. Ziangahtile, milai cu thil ziang in simaw a neh asile cui a nehtu thilih sal a si. ²⁰ Cuipawl cun kan Bawipa le Rundamtu Jesu Khrih theihnak ruangah khawvel bawrhhlawhnak ihsin an tlansuak hnuah, cu mi thothoah lutsal in, neh ih an um a si ah cun, an nundan netasawn cemnetnak cu a hmaisa hnakin a se sawn. ²¹ Ziangahtile, dingfelnak zin theih hnuih an hnenih pek mi thupek thianghlim an tlansan hnakin, dingfelnak zin kha rak thei lo lawlaw hai sehla an hrangah a ṭhasawn. ²² Sikhalsehla, “Uico cu amai luak lamah a kirsal,” cun, “A khawlhaw fai zo mi vawkpi cu ciarbek lakah khawlhaw dingin a kirsal,” tiah a dik mi thufim ih a ti vekin an parah a tlamtling a si.

¹ Duhdawt mi tla, atu ah nan hnenah hi cakuat a pahnihnak hi ka ngan. A pahnih in nan ruahnaklungthin thiang lo cawktho dingah hi thupawl lo theihtersal dingin ka ngan a si. ² Profet thianghlimpawl in hi hlanih an rak sim mi thupawl le kannih apostolpawl hmang ih kan Bawipa le Rundamtui thupek cu nan cinken ringring theinak ding hrang khalah ka ngan a si. ³ Hihi thei hmaisa uh: ni netapawl tla ah cun hnihsantupawl an ra suak ding ih, anmai cakhiarnak bangtukin an nung ding. ⁴ Cule annih in, “A ratsalnak ding thutiamkam cu khuiah so a si? Ziangahtile, sersiam thawk ihsin thil hmuahhmuah hi anmai sidan keltein kan pupapawl an ihthah ni ihsi khan an um a si,” tiah an ti ding. ⁵ Ziangah cutin an ti tile, Pathian kamsuak thu in hlanlaiah vanpawl tla an rung um ih, leilung khal ti ihsin le ti hmang in tuah a si ti hi an ngaihthah hrim a si, ⁶ cui ti cun leilung cu a khuh thluh ih, cui leilung cu a siatsuahta. ⁷ Sikhalsehla, cui thu thotho cun atu ih vanpawl le leilung hi meisa i urkang dingin Pathian ngaihsaklopawl thu a ṭhen ni le an siatral ding ni hrangah a zuah hai. ⁸ Asinan, duhdawt mi tla, Bawipai ruahdan ah cun ni khat hi kum thawngkhat vek a si ih, kum thawngkhat khal hi ni khat vek a si ti mi thil pakhat hi hngilh hlah uh. ⁹ Mi hrekkhat in muang ih an ruah bangin Bawipa cu a thutiamkam mi thu ah a muang lo; zohman an siatral ding a duh lo ih, mi hmuahhmuah an sual sir ding a duh sawn ruangah, kanmah lamah thinsau in a um hrih sawn hi a si. ¹⁰ Sikhalsehla, Bawipai ni cu zan ih fifir a rat vekin a ra thleng ding. Cui ni ah cun vanpawl cu awn ring zet thawn an hloral ding ih, thil bulhrampawl tla cu meisa ih em zup in an um ding. Leilung le a sungih thil um mipawl cu an kangral ṭheh ding. ¹¹ Hi thilpawl hmuahhmuah cu cutivekin an siatral ding ruangah, Pathian ngaihsak le nundan thianghlim ih nung ding mi nan si lo maw? ¹² Pathian ni cu hngakhlap zetih hngak ih nan um laiah, cutivek cun nung uh. Cui ni ah cun vanpawl tla cu meisa in a kangral ding ih, thil bulhrampawl tla cu meisa ih em zup an si ding. ¹³ Sikhalsehla, a thutiamkam bangin, dingfelnak umnak hmun van thar le lei thar cu kan hngak a si. ¹⁴ Curuangah, duhdawt mi tla, cuvek thilpawl tla nan hngah ruangah bawrhhlawh kai lo le sawihnawm ding um lo le hnangam zetih nan um a hmuh theinak dingah taimak suah uh. ¹⁵ Cule, kan duhdawt mi, kan unaupa Paul khalin a hnenih fimnak pek a si vekih nan hnenih ca a ngan vek khan kan Bawipai thinsauzia cu rundamnak ah ruat uh. ¹⁶ A cakuat mipawl hmuahhmuah khalah hi thupawl hi a ngan. A thu ngan mi hrekkhat tla cu theihthiam a har ih, cupawl cu zirlo mipawl le mihngetlopawl in an siat phahnak dingih Cathianghlim dang an lakpen bangin an lapeng ṭheu. ¹⁷ Curuangah, duhdawt mi tla, nannih in cui thupawl tla cu nan rak theih cia zo ruangah fimkhur uh. Cu lo asile nanmah khal misualralpawlih sualralnak ah hruai in nan um ding ih, nan dinhngehnak ihsin nan tlu pang ding. ¹⁸ Cu hnakin, kan Bawipa le in Rundamtu Jesu Khrih-ih zangfahnak ah le theihnak ah cun rak ṭhang sawn uh. Atu le a kumkhua in amai hnenah ropitnak cu um seh. Amen.