2 JOHAN
11 Kei, elder John in Pathian hril mi upat tlak nunau le a falepawl hnenah ca ka ngan. Thutak ah ka lo duhdawt a si. Nangmah a lo duhdawtu hi keimah lawng ka si lo. Thutak a theitu hmuahhmuah in an lo duhdaw. 2 Thutak kanmah ih um ringring mi ruangah le kan hnenih kumkhua um ding mi ruangah, ka lo duhdaw a si. 3 Pa Pathian hnen ihsin le Bawipa Jesu Khrih, Pa-ih Fapa hnen ihsin zangfahnak, zahngainak le hnangamdaihnak cu nan hnenah thutak le duhdawtnak thawn um hram seh. 4 Na fale hrekkhat thutak ah an feh rero ti ka rak hmuh ruangah, ka lung a awi zet. Cumi cu Pai hnen ihsin thupek kan rak cohlan zo vek khan a si. 5 Upat tlak nunau, na hnenah thupek thar ka ngan lo. Asinan, atir ihsi kan rak neih mi thupek kha a si. Ka lo ngen mi cu pakhat le pakhat kan duhdawaw ding ti hi a si. 6 A thupekpawl vekih nun hi duhdawtnak cu a si. Himi hi a thupek, cu mi sungih nan nun theinak dingih atir ihsin hna ih nan theih mi cu a si. 7 Ziangahtile, mi bumtu tampi leilung tlunah an ra suak zo. Annih cun Jesu Khrih milai taksa in a ra ti an phuang lo. Cuvek mi cu mi bumtu le Khrih dodaltu a si. 8 Kan rak ṭuan zo mipawl kan hloh lo ih, lawmman famkim kan ngah theinak dingah fimkhur uh. 9 Mi zokhal Khrih-ih zirh mi thlunlotu le Khrih zirhnak ih um ringring lotu cun Pathian a nei lo a si. Khrih zirhnak ih um ringringtu cun Pa a nei ih Fapa khal a nei. 10 Mi zokhal cui zirhnak nei loin nan hnenih a ra thlengtu cu inn sungah lutter hlah uh. Cibai khal buk hlah uh. 11 Ziangahtile, cu pa cibai a buktu cu, cu pai thilti ṭha lo mi ah a tel ve a si. 12 Nan hnenah thil tampi ngan ding ka nei. Cahnah le cati hman ka duh lo. Cu hnakin kan lungawinak a famkim theinak dingah nan hnenah ra in hmatawn ih lo biak ding ka beisei sawn. 13 Pathian hril mi na unaunui falepawl in cibai an lo buk. Amen.