2 KORIN

2 KORIN

¹ Pathian duhzawng ih Jesu Khrih-ih apostol, keimah Paul le kan unaupa Timothy in Korinth khua ih Pathian kawhhran le Akhaia peng hmuahhmuah ih mithianghlimpawl hmuahhmuah hnenah ca kan lo kuat. ² Pathian kan Pa le Bawipa Jesu Khrih hnen ihsin zangfahnak le hnangamdaihnak cu nan hnenah um hram seh. ³ Kan Bawipa Jesu Khrih-ih Pa a si mi Pathian, zahngainak tla ih pa le lamzin phun zakipih in thlangamtu Pathian cu thangṭhat in um seh. ⁴ Pathian ih in thlangamnak in harsatnak phun zakip a tuartupawl kan thlangam ve theinak dingah anih cun kan harsatnak hmuahhmuah ah in thlangam ṭheu a si. ⁵ Ziangahtile, Khrih tuarnak cu kanmah ih a luanliam vekin Khrih zarah Pathian thlangamnak cu kanmah ah a luangliam a si. ⁶ Harsatnak kan neih asile, cucu nan thlangamnak le nan runsuahnak hrangah a si. Cumi cun kan tuar mi vek harsatnak tuar theinak a lo pe thei a si. Asinan Pathian in in thlangam asile cu mi khal cu nanmai thlangamnak le runsuahnak hrangah a si. ⁷ Tuarnakpawl ih telvetu nan si ih, thlangamnak khalih telvetu nan si ti kan theih ruangah kan ruahsannak cu a hnget a si. ⁸ U le nau tla, Asia peng ih kan parih a thleng mi harsatnakpawl kha thei lo ih nan um ding kan duh lo. Kha tiih kan phurh thei lo ding mi phurrit nasazet kan parih a rung thlen ih, cu mi ruangah nun ding hman ruahsan lo tiangih kan um kha nan theih kan duh a si. ⁹ Kanmah le kanmah rinsanaw loin, mithi kaithotu Pathian kan rinsan sawn theinak dingah thi dingih thu ṭhensak mi vekin kan um. ¹⁰ Cui Pathian cun kha vek thihnak rapthlak ihsin in runsuak zo. Atu khalah in run. In runsuak leh ding tiah amah ah ruahsannakhnget kan nei. ¹¹ Pathian zangfahnak thilpek ruangah mi tampi in kanmai ruangah Pathian an thangṭhat ding. Nannih khalin kan hrangah thlacamnak in in rak bawmkhawm. ¹² Kan tluangkhawndan cu hitin a si, milai fimnak si loin, Pathian zangfahnak ruang sawn ih nundan tluangtlamte le Pathian ṭihnak nun dik zetih hi leitlun ih kan nun ṭheu kha, kan sia le ṭha theihnak in in theihpi ih, nannih lak sinsin tla ah cun cutivekin kan um sinsin a si kha. ¹³ Ziangahtile, nan siar mi le nan theihthiam mi siarlo thil dang zianghman nan hnenah kan ngan lo. A cemnet tiang khalin ziangkim nan theihthiam thluh ka zum a si. ¹⁴ Cutivekin nannih cun ziangmaw zat cu in rak theithiam zo. Bawipa Jesui ni ah kannih cu nan tluangkhawnnak kan si bangin nannih khal kan tluangkhawnnak nan si ding ka beisei. ¹⁵ Cucu ka theihfiang ruangah a vei hnihnak hlawknak nan neih theinak dingah nan hnenih rat hmaisak ka rak tum. ¹⁶ Masidonia peng ka tlawn zawngah ka lo tlawng phah ding ih, Masidonia ihsin nan hnenah ka kirsal ding tiah ka rak tum. Cule nannih in Judia peng ah in thlah uh la tiah ka rak ruat. ¹⁷ Cu mi ka tumtah tikah awltlawng tukin ka ti pang maw? Ka tumtah mi thilpawl hi milai tidan vek menih tum in, a si, a si tithul, a si lo, a si lo tithul, dualdo maw ka si? ¹⁸ Asinan, Pathian cu mirinum a si vekin nan hnenih kan ṭawng mi thupawl hi, a si tithul, a si lo tithul, dualdo a si lo. ¹⁹ Pathian Fapa, Jesu Khrih thu cu Silas le Timothy le kei in nan hnenah kan rak phuang. Cu mi ruangah amai thuhla kan sim mi cu a si tithul, a si lo tithul dualdo si loin, amah ah cun, a si, ti lawng hi a si ringring. ²⁰ Ziangahtile, Pathian thutiamkam hmuahhmuah tla hi amah ah cun, ‘A si,’ ti a si thluh. Kanmah ruangah mi in Pathian an thangṭhat theinak dingah amah ah cun, ‘Amen,’ ti a si. ²¹ Atu ah nannih le kannih Khrih ih in hngettertu le hriak in thihtu cu Pathian a si. ²² Anih cun tacik in khen ih, kan thinlung sungah hamnak ah Thlarau Thianghlim in rak pe a si. ²³ Ka lo anhaiterlonak dingah Korinth ah ka rasal nawn lo. Ka sim mi a dik a si ti ka nunnak ih i theihpitu cu Pathian a si. ²⁴ Nan zumnak parah Bawi vekih lo uk kan duh lo. Cu hnakin, nan hlim theinak dingah kannih cu nan hnaṭuanpi kan si sawn. Ziangahtile, nannih cu zumnak in nan dinghnget a si.

¹ Asinan, thinna cing cun nan hnen ra lo tlawngsal nawn lo dingin thu ka ruatcat zo. ² Ziangahtile, nan thin ka lo natter asile, zo in ka lung i awiter ding? Thin ka natter mi nanmahpawl thotho kha ka lung i awitertu ding nan si lo maw? ³ Nan hnen ka ra thlen tikah ka lung i awitertupawl in ka riah in siatterlonak dingah hiti hin ka ngan a si. Ka lungawinak cu nan zateih lungawinak a si tiah zumhngehnak ka nei. ⁴ Ziangahtile, riahsia zet le thinhar zetin nan hnenah mitthli tampi thawn ca ka ngan. Nan thinnatnak dingah a si lo. Cu hnakin ka lo duhdawt zet ti nan theihnak dingah a si sawn. ⁵ Asinan, mi pakhat in thinnatnak a suahter asile keimah lawng ka thin in nater a si lo ih, nan zaten tawkfang cu nan thin a lo nater a si. Ka nat lutuk lonak dingah malte lawng ka rel a si. ⁶ Cuvek mi hrangah cun mi tampi in dantatnak an pek mi hi a tawk a si. ⁷ Cu pa cu ngaidam le thlangamter sawn ding nan si. Cu lo asile nasazetih thinnatnak in cu pa cu a dawlh pang ding. ⁸ Curuangah amah nan duhdawtnak kha nemhnget dingin ka lo ngen hai a si. ⁹ Cu mi ruangah nan hnenah thil ziangtinkimah thu nan ngai le ngai lo ka lo hniksak theinak dingah ca ka rak ngan a si. ¹⁰ Ziang thil khalih mi nan ngaidam mi cu kei khalin ka ngaidam ve. Ziangahtile, ziang thil khal ka rak ngaidam asile ka ngaidam mi pa cu, nanmah ruangah Khrih hmaiah ka ngaidam a si. ¹¹ Cu lo asile Setan in kan hnen ihsin remcannak a ngah pang ding. Ziangahtile, Setan-ih khawkhandan cu kan thei a si. ¹² Thu dangah, Troas khawpi ih Khrih thuthangṭha phuang dingih ka feh tikah Bawipa in ka hrangah sangka a awng ti ka hmu. ¹³ Cu tawkah ka unaupa Tita ka hmuh lo ruangah ka thinlung a cawl hahdam thei lo. Cule, an hnenah damten tiah ka ti hai ih, Masidonia lamah ka rak feh sawn. ¹⁴ Atu ah, Khrih ah nehnak ih in hruai ringringtu le kanmah hmang ih hmun zakipih amah theihnak rimhmui vekih hmuitertu Pathian hnenah lungawithu um hram seh. ¹⁵ Ziangahtile, kannih cu rundam lai rero mipawl hnenah le a hloral lai rero mipawl hnenah Pathian hrangah Khrih rimhmui kan si. ¹⁶ Mi hrekkhat hnenah cun thihnak dingih thihnak rim kan si ih, mi hrekkhat hnenah cun nunnak dingih nunnak rim kan si. Cui thilpawl hrangah zo so a tling ding? ¹⁷ Ziangahtile, mi tampi in sumpai hlawknak hrangih Pathian thu an hman vekin kannih cun kan hmang ve lo. Cu hnakin, thungaithlak in, Pathian hnenih mi vekin Pathian hmaiah Khrih ruangah thu kan sim sawn a si.

¹ Mah le mah fakawk kan thawksal maw? Asilole midangpawl in nan hnenih pek ding mi faknak capawl simaw, nanmah hnen ihsin faknak capawl an ṭul vekin kan ṭul ve maw si? ² Nannih cu kan thinlung sungih ngan mi kan cakuat nan si. Mi kipin cui ca cu an thei ih an siar. ³ Nannih cu kan rawngbawlnak, Khrih-ih cakuat, cati thawi ngan mi si lo, a nung mi Pathian Thlarau thawi ngan mi sawn, lungphengpawl parih ngan mi si lo, milai thinlung par sawnih ngan mi nan si ti fiang zetih langter a si. ⁴ Cutivek zumhngehnak cu Khrih zarah Pathian lamah kan nei a si. ⁵ Kannih cu thil ziang khal kanmah ihsin a suak tiih ruataw dingin kan tlak tiah ka ti lo. Pathian lawng hi kan haidaihnak a si sawn. ⁶ Pathian cun thuthlung thar rawngbawltu tling ah in tuah. Cangan mi rawng kan bawl lo ih, Thlarau rawng kan bawl sawn a si. Ziangahtile, cangan mi cun mi a that, asinan Thlarau cun nunnak mi a pe. ⁷ Mawsi hmel langdan a ropit ruangah Israel-pawl cun a hmel cu an zoh ringring thei lo ih, cui ropitnak cu a hloral vivo. Sikhalsehla, thihnak thlentu rawngbawlnak, lungpheng parih kher ih ngan mi hman a ropit a si ah cun, ⁸ Thlarau rawngbawlnak cu ziang tluk ropi sinsin so a si pei? ⁹ Ziangahtile, thiamlo mi cohtu rawngbawlnak hman a ropit a si ah cun dingfelnak thlentu rawngbawlnak cu nasa sinsinin a ropi ding. ¹⁰ Ziangahtile, thiamlo mi cohtu rawngbawlnak cu Pathian in ropi ko a rak tuah zo. Sikhalsehla, dingfelnak thlentu rawngbawlnak ih ropitnak cu a nasat tuk ruangah thiamlo mi cohtu rawngbawlnak ih ropitnak cu zianghmanlo ah a cang. ¹¹ Ziangahtile, a hloral mi hman a ropit a si ah cun a hmun ringring mi cu a ropi nasa sinsin a si. ¹² Cuvek zumhngehnak kan neih ruangah ralṭha zetin thu kan sim a si. ¹³ Cumi cu Mawsi ih a rak tuah mi vek a si lo. Anih cun Israel-mipawl in a hloral cuahco mi ropitnak kha a cemnet tiang an zoh ringring lonak dingah puan in a hmai a hup. ¹⁴ Asinan an ruahnaklungthin mit a caw. Ziangahtile, hmai huhnak cu Khrih ah lakhloh a si zo nan, tuisunni tiangin thuthlung hlun an siar tikah cui hmai huhnak cu a um lai thotho. ¹⁵ Sikhalsehla, tuisunni tiangin Mawsi cabu an siar tikah khuhnak cun an thinlung a khuh lai thotho. ¹⁶ Zokhal siseh Bawipa lamih a herawk tikah khuhnak cu lakhlohsak a si ding. ¹⁷ Bawipa cu Thlarau a si ih, Bawipai Thlarau umnak ah zalennak a um. ¹⁸ Sikhalsehla, kannih cu kan zatein hmai khuh loin, thlalang sungih hmuhawk vekin Bawipai ropitnak cu kan hmu. Bawipai Thlarau zarah ropitnak ihsin ropit sinsinnak ah, amah bangnak ah tidanglam in kan um lai rero a si.

¹ Curuangah, kannih cun hi rawngbawlnak hi zahngainak kan co vekin kan co ruangah kan bei a dawng lo. ² Cu hnakin ningzakza thilthuppawl cu kan bansan, hrawkhrawl in kan um lo, Pathian thu khal mi bumnak ah kan hmang lo ih, thutak cu fiang zetin kan sim sawn a si. Cuti cun Pathian mithmuh ah, mi kip sia le ṭha theihnak hmaiah kanmah le kanmah kan awngaw thluh sawn a si. ³ Sikhalsehla, kan thuthangṭha hi khuh ih a um a si ah cun a hloral rero mi hnenah a si ding. ⁴ Khrih thuthangṭha ropi ih tleu in anmah cu a tlet theilonak dingah hi khawvel pathian in zumlotupawlih ruahnaklungthin mit cu a cawtter. Khrih cu Pathian-ih hmuihmel a si. ⁵ Ziangahtile, kannih cu kanmai thuhla kan phuang lo. Khrih Jesu Bawi a si thu le Jesu ruangah kannih cu nanmai siahhlawh kan si thu tla kan phuang sawn a si. ⁶ Ziangahtile, Pathian in thim lak ihsin tleu cu tle dingin thu a pe. Cui Pathian cu Jesu Khrih hmel ih Pathian ropitnak theihnak ihsi a ra mi tleu pe dingah kan thinlung sungah a rung tleu. ⁷ Asinan, huham nasazet cu kanmah ihsi suak si loin, Pathian hnen ihsi suak a si sawn ti langter dingin cui hlawnthil cu leibel sungah kan nei a si. ⁸ Kil i kip ihsin rekbet kan si, asinan palbek cu kan si lo; mangbangvansang in kan um, asinan kan bei a dawng lo; ⁹ tiduhdah in kan um, asinan Pathian in in thlauthla lo; hlawnthluk in kan um, asinan kan thi lo. ¹⁰ Jesui nunnak kha kan taksaruangpum ih a lang theinak dingah Bawipa Jesui thihnak cu kan taksaruangpi in kan phur ringring. ¹¹ Ziangahtile, Jesui nunnak cu a thi thei mi kan taksaruangpi ih a lang theinak dingah Jesu ruangah kannih a nungpawl hi thi dingih hlan kan si ringring. ¹² Curuangah thihnak cun kanmah ah a ṭuan ih, asinan nunnak cun nanmah ah a ṭuan. ¹³ Cathianghlim in, “Ka zum ruangah ka rel,” tiih a ti vekin, kannih khal cuvek zumnak thinlung kan nei ih, kan zum ruangah kan rel a si. ¹⁴ Bawipa Jesu a thotertu cun Jesu zarah kannih khal in thoter ding ih, nanmah thawn a hnenah in hlan ding ti kan thei. ¹⁵ Ziangahtile, mi tam sinsin hnenih a thleng mi zangfahnak cun Pathian ropitnak ah lungawithu simnak luangliam a suahternak dingah hipawl hmuahhmuah hi nanmai hlawknak ding hrangah a si. ¹⁶ Curuangah kan bei a dawng lo. Kan leng lam minung cu ṭumsuk vivo hmansehla, kan sung lam minung cu ni khat hnu ni khat tharter vivo a si. ¹⁷ Ziangahtile, reilote sung hrang lawng a si mi, harsatnak kan tuar mipawl tete hin ropitnak nasazet kumkhaw hrangah in tuahsak nasa deuhdeuh a si. ¹⁸ Curuangah, hmuh thei mi thilpawl kan zoh lo ih, hmuh thei lo mi thilpawl kan zoh sawn. Ziangahtile, hmuh thei mi thilpawl cu a langte sung um mi an si ih, hmuh thei lo mi thilpawl cu kumkhua a hmun mi an si.

¹ Ziangahtile, kan lei inn, hi puanthlam hi siatral hmansehla vancung ah kut ih sak lo mi inn, Pathian hnen ihsin, kumkhuaih um ding mi cu kan nei a si ti kan thei. ² Curuangah vancung ih kan inn thawi thawmawk ding duhnak nasazet nei in, hi lei inn ah hin kan aihram ṭheu a si. ³ Cutiih thawm kan si tikah cun taklawng ih hmuh kan si lo ding. ⁴ Ziangahtile, hi puanthlam ah hin phurrit phur in kan aihram ṭheu a si. Thawm lo ih um kan duh ruangah si loin, nunnak in thihnak cu a dawlh thluh theinak dingah thawm ih kan um ding kan duh ruangah a si sawn. ⁵ Cu mi hrangih in timtuahtu cu amah Pathian a si. Anih cun hamnak hrangah Thlarau khal in pe. ⁶ Curuangah hi taksa ih kan um laiah hin Bawipai hnenah cun kan um lo ti thei in ngaihngam zetin kan um a si. ⁷ Ziangahtile, hmuh mi in feh loin, zumnak in kan feh sawn a si. ⁸ Ngaihngam zetin kan um a si. A si, taksa ah um loin Bawipai hnenih um cu kan duh sawn a si. ⁹ Curuangah, kannih cun kan umnak lei ih kan um ah simaw, um lo ah simaw, amah lungawiter kan tum a si. ¹⁰ Ziangahtile, kan zaten Khrih thuṭhennak tohkham hmaiah kan lang leh tengteng ding. Mi kipin an taksa ih an rak tuah mi thilpawl a sia si seh, a ṭha si seh an tuah mi vekin an co ding. ¹¹ Bawipa ṭihzah cu ziang a si ti kan theih ruangah mi kan lem ṭheu a si. Asinan, Pathian cun in theifiang tuk ih, nan sia le ṭha theihnak khalin in theihfiang zet ka zum. ¹² Ziangahtile, nan hnenah kanmah le kanmah kan rel mawiaw lehsal a si lo. Thinlung lam si loin, a langdan men tluangkhawnpitupawl nan si sawn theinak dingah kanmah ah tluangkhawn ding nan hmuh theinak ding can remcang kan lo pe sawn a si. ¹³ Ziangahtile, kan mumallo asile Pathian hrangah a si ih, kan lungfim asile nanmai hrangah a si. ¹⁴ Mi hmuahhmuah hrangah mi pakhat a thi. Curuangah mi hmuahhmuah cu an thi. Cui thu kan theihfeng ruangah Khrih duhdawtnak cun duh lo theih loin in fial a si. ¹⁵ Cule a nung mipawl cu anmai hrangah nung nawn loin an hrangih thitu le thosaltu hrangih an nun sawn theinak dingah anih cu mi hmuahhmuah hrangah a thi a si. ¹⁶ Cuti a si ruangah tuisi thawkin tisa lam dan in mi zohman kan thei nawn lo. A liam cia mi canah Khrih cu tisa lam dan in rak thei zo hman nungla atu thawk ihsi cun cutivek zawng cun kan thei nawn lo. ¹⁷ Curuangah, mi zokhal Khrih ih a um ah cun sersiam thar a si. Thil hlunpawl cu an hloral ih, ngaihnik, thil hmuahhmuah cu a thar ah an cang a si. ¹⁸ Cule, thil ziangkim hi Pathian hnen ihsin an si. Anih cun Jesu Khrih zarah amah thawn in remawter zo ih, kan hnenah remawknak rawngbawl hna in rak pe. ¹⁹ Cumi cu Khrih ah Pathian in leitlun hi amah thawn a remawkter ih, an thil tisualpawl tla cu anmai thil tisual ah a siarsak lo. Cui remawknak thu cu kan hnenah in ap a si. ²⁰ Curuangah, kannih cu Khrih palai kan si. Pathian in kanmah hmang ih a lo ngen bangtukin Khrih aiawh in, Pathian thawn remaw uh, tiah kan lo ngen a si. ²¹ Ziangahtile, Khrih ah Pathian dingfelnak kan si theinak dingah sual a theihih thei lo cu kan aiah sual ah a tuah a si.

¹ Cule, kannih, amai hnaṭuanpipawl in Pathian zangfahnak cu zianghmanlomen hrangih nan cohlanlonak dingah kan lo ngen a si. ² Ziangahtile, anih in, “Cohlan tikcu ah ka rak lo ngaithla ih, rundamnak ni ah ka rak lo run,” tiah a ti. Ngai hnik, atu hi cohlan tikcu a si, ngai hnik, atu hi rundamnak ni cu a si. ³ Mi in kan rawngbawlnak an sawisellonak dingah mi tluknak ding thil zianghman kan tuah hrimhrim lo. ⁴ Cu hnakin, ziangtinkimah Pathian rawngbawltu kan sizia kan langter sawn a si. Tuarfainak in si seh, harsatnak in si seh, tlaksamnak in si seh, thinharnak in si seh, ⁵ vuaknak in si seh, thawngthlaknak in si seh, buainak in si seh, ṭuanbangnak in si seh, it lo ih kilvennak in si seh, rawlulhnak in si seh, ⁶ thianhlimnak in si seh, theihnak in si seh, thinsaunak in si seh, ngilneihnak in si seh, Thlarau Thianghlim in si seh, a der si lo duhdawtnak taktak in si seh, ⁷ thutak thu in si seh, Pathian huham in si seh, vawrh lam le keh lam ih dingfelnak hriamhrei in si seh, ⁸ upatnak le nautatnak in si seh, relsiatnak le relṭhatnak in si seh, midik sisiin mibumtupawl vek in, ⁹ theih zet mi si na cingin, mi ih theih lo mi vekih thi cuahco vekin, ngai hnik, kan nung fawn si, hrem mi vek sisiin, thah cu si loin, ¹⁰ riahsia vek sisiin, asinan lungawi ringringin, mirethei vek sisiin, mi tampi liantertu si tho si in, zianghman nei lo vek si si, ziangkim nei thotho si in, hipawl hmuahhmuah ah hin Pathian rawngbawltu kan sizia kan langter ṭheu. ¹¹ Maw nannih Korinth mipawl, nan hnenah tlang zetin kan rak ṭawng ih, nan hrangah kan thinlung khal kau zetin kan rak awng a si. ¹² Kannih in kan lo phit lo, asinan nanmah le nanmah nan phitaw. ¹³ In lehrulhnak dingah nannih khal kanmah lamah kau zetin awngaw uh. Fale hnenih thusim vekin ka lo sim a si. ¹⁴ Zumlotupawl thawn a bangrep lo mi hngawngkawl battlang hlah uh. Ziangahtile, dingfelnak le dan lo ih nunnak in ziang ṭawmawknak an nei? Tleu le thim in ziang pawlkawmawknak an nei? ¹⁵ Cun, Khrih le Belial in teh ziang lungrualnak an nei? Asilole a zumtu in a zumlotu thawn cotlang mi thil ziang an nei? ¹⁶ Cule, Pathian nung temple le milempawl tlain ziang lungrualnak an nei? Ziangahtile, nannih cu a nung mi Pathian temple nan si. Cumi cu Pathian in, “An lakah ka ceng ding ih, an lakah ka tlangleng ding. An Pathian ka si ding ih, annih cu ka mi an si ding,” tiah a ti mi vek khan a si. ¹⁷ Curuangah, Bawipa in, “An lak ihsin suak uh la, thiarfihlimaw uh. A thianghlim lo mi thil tham hlah uh. Cule ka lo cohlang ding,” tiah a ti. ¹⁸ “Cun, kei cu nan Pa ka si ding ih, nannih cu ka fanu le ka fapa tla nan si ding,” tiah Ziangkimtithei BAWIPA in a ti.

¹ Curuangah, duhdawt mi tla, thutiamkampawl kan neih ruangah taksa le thlarau bawrhhlawhtertu hmuahhmuah lak ihsin thianfaiaw uhsi. Pathian ṭihzahnak kan neih bangin kan thianhlimnak cu famkimter uhsi. ² In cohlang uh. Zo hnen hmanah thilsual kan tuah lo. Zohman kan siatsuah lo ih, zohman kan bum lo. ³ Cumi cu nanmah thiamlo lo cohnak ah ka sim a si lo. Ziangahtile, thih le thihtlang, nun le nungtlang dingin kan thinlung sungah nan um ti thu hi hlanah ka rak lo sim zo. ⁴ Nanmah hnenih ṭawng ding cu nasazetin ka ral a ṭha. Nanmah ruangih ka tluangkhawnzia hi a nasa a si. Hnangamnak in ka khat ih, kan harsatnak hmuahhmuah ah ka hlimnak cu a khatliam a si. ⁵ Ziangahtile, Masidonia peng kan thlen tikah kan taksa in cawlhhahdam can a rak nei lo ih, kil i kipin zawnzaihnak in pe sawn. Leng lamah sualawknak tla a um ih, sung lamah ṭihphannakpawl tla a um. ⁶ Sikhalsehla, dinhmun niampawl thlangamtu Pathian in Tita-ih ratnak in in thlangam a si. ⁷ Cun, Tita-ih ratnak in in thlangam lawng si loin, amah nan rak thlangamnak ruang khalah a sibet. Anih in keimah hmuh nan hiarzia, nan thinnatzia, in humzia pawl tla in rak sim. Curuangah ka lungawinak a nasa sinsin. ⁸ Ziangahtile, ka ca lo kuat mi khan nan riah ka lo seter. Cu mi thu ah rak siraw zo khal ningla, atu ah cun ka siraw lo. Ziangahtile, khaih ca ka lo kuat mi khan nan riah a lo seter nan can tawite sung lawng a si ti ka thei. ⁹ Atu ah ka lung a awi a si. Nan riah a siat ruangah si loin, nan riah siatnak in sualsirnak ih a lo hruai ruangah a si sawn. Ziangahtile, kanmai ruangah zianghman nan hlohlonak dingah Pathian duhdan vekin riahsiatter nan si. ¹⁰ Ziangahtile, Pathian hnen ihsi a ra mi riahsiatnak cun rundamnak ih hruaitu sualsirawknak a suakter. Cu mi ah pawi ti ding a um lo. Asinan leitlun ihsi a ra mi riahsiatnak cun thihnak a thlen. ¹¹ Ziangahtile, ngai hnik uh, cuvek thil cu nan hnenah a rak thleng a si. Pathian hnen ihsi ra mi riahsiatnak cun nanmah ah thil ṭha tuah dingih taimaknak si seh, mah le mah humhimawk duhnak si seh, sual parih thinhengnak si seh, ṭihnak si seh, thil ṭha tuah hiar duahdonak si seh, humhim duhnak le sual cawhkuan peknakpawl tla a suah. Hi thu ah cun thil ziangkimah nannih cu nan thiang a si ti nanmah le nanmah nan langfiangawter zo. ¹² Curuangah, nan hnenah ca ka rak ngan ko nan, cumi cu thil sual tuahtupa ih ṭhatnak dingah simaw, thil a tisualnak pa ih ṭhatnak ding hrang khalah a si lo. Cu hnakin, Pathian mithmuh ih kan lo ngaihsaknak nan hnenih a lang theinak dingah a si sawn. ¹³ Curuangah, nan hnangamnak ah kan hna a ngam. A si, Tita-ih lungawinak ah kan lungawinak a nasa sinsin. Ziangahtile, nan zaten a thlarau tha thar nan rak pe. ¹⁴ Ziangahtile, a hnenah nanmai thu ih ziang thil khalih tluang ka khawn a si khalle ka ning a zak lo. Asinan nan hnenah thil ziangkim dik zetih kan lo sim zo bangin Tita hnenih kan tluangkhawnnak khal a dik a si ti a lang. ¹⁵ Cun, nan zateih thu nan lunzia, ṭih le khur phah cingih amah nan cohlanziapawl tla Tita in a hngilh lo ih nanmah a lo ngainatnak cu a nasa sinsin. ¹⁶ Thil ziangkimah nanmah ah lo rinsan ngamnak ka neih ruangah ka lung a awi.

¹ Cuitlunah, u le nau tla, Masidonia peng ih kawhhranpawl Pathian in a zangfahnak a pek kha nan theih ding kan duh. ² Annih cu harsatnakpawl tlain hniksaknak nasazet an tawng ko nan, nasazetin an lung a awi. An rethei zet ko na cingin lian tak vekin tam zet an rak pe. ³ Ziangah cutin ka ti tile an ti thei tawkin an pe ti ka theihpi hai a si. Anmai palung suak roriin an ti thei tawk lan tiangin pek an duh. ⁴ Mithianghlimpawl hrangih an thawhhlawm cohlang dingin le mithianghlimpawl rennak ah tel ve dingin nasazetin in ngen. ⁵ Cumi cu kan beiseidan lo lam piin an rak tuah. Bawipai hnenah anmah le anmah an rak peaw hmaisa sawn ih, kanmai hnen khalah Pathian duhdan vekin anmah le anmah an rak peaw. ⁶ Cu mi ruangah, nan thawhhlawm kha Tita in a taw a rak thawh zo vekin nan thawhhlawm khawnkhawm mi kha ṭheh lawlaw ko lo bawm dingin amah cu nasazetin kan rak ngen. ⁷ Asinan, nannih cu ziangkimah, zumnak ah si seh, thusim ah si seh, theihnak ah si seh, taimaknak hmuahhmuah ah si seh, kanmah in duhdawtdan ah si seh nan khatliam a si. Curuangah, khaih thawhhlawm khalah khan khatliam uh. ⁸ Thupek zawngin ka lo sim a si lo ih, midangpawlih taimaknak thawn khaikhin in nan duhdawtnak takzia ka hniksak sawn a si. ⁹ Ziangahtile, kan Bawipa Jesu Khrih zangfahnak cu nan thei. Anih cu milian a si ko na cingin nanmai ruangah mirethei ah a cang. Cutiih a retheihnak cu milian nan si theinak ding hrangah a si. ¹⁰ Cun, himi thu ah thurawn ka lo pe a si. Ziangahtile, hihi nan hrangah hlawknak a si. Kan dung kum ah nannih cu a pe hmaisabiktu nan si lawng si loin, pek a duh hmaisabiktu khal nan si. ¹¹ Curuangah, atu ah pesuak taktak thlang uh. Pek hiarnak a rak um zo bangin, nan neih mi hmang in pesuak uh. ¹² Ziangahtile, duhnak lungthin a um hmaisak asile mi in a neih lo mi si loin, a neihdan izirin a pek mi cu Pathian in a cohlansak a si. ¹³ Ziangahtile, midangpawl cu an zangkhai ih, nannih phurrit nan phur ding ka tinak a si lo. ¹⁴ Cu hnakin, thil ziangkim bangran ding ka duh sawn a si. Atu ah nan neih liam cun an tlaksamnak a silhkhahsak ding ih, annih ih neih liam cun nan tlaksamnak a lo silhkhahsak ve ding. Cutin thil ziangkim a bangran thei ding. ¹⁵ Cumi cu Cathianghlim in, “Tampi a khawmtu in a hleifuan in a nei lo ih, malte a khawmtu khal a tlasam cuang lo,” tiih a ngan vek kha a si. ¹⁶ Asinan nanmah ka lo ngaihsaknak vek Tita thinlung sungih rettu Pathian hnenah lungawithu um seh. ¹⁷ Ziangahtile, anih cun kan ngennak cu a cohlang ngaingai ih, ngaihsaknak thinlung khal a nei betsin. Amai duhhrilnak roriin nan hnenah a ra. ¹⁸ Cule thuthangṭha rawng a bawlnak ah kawhhran hmuahhmuah in an lawm mi unaupa pakhat amai zawngah kan rak thlah. ¹⁹ Cu lawng si loin, kawhhranpawl in an thawhhlawm thawn amah cu kan hnenih tlawng ve dingin an hril. Midang bawm nan paihzia theihter ding le Bawipa amah rori thangṭhat a si theinak dingah cui thawhhlawm cu kan fingkhawi a si. ²⁰ Hi a tam zet mi thawhhlawm kan fingkhawinak thu ah mi ih sawihnawm hrial kan duh. ²¹ Bawipai mithmuh lawngah si loin milai mithmuh khalah thil dik tuah kan duh a si. ²² Cule, cute pahnih zawngah kan unaupa pakhat cu kan rak thlah ve. Amah cu a phunphunin kan hniksak hnuah mitaima zet a si ti kan thei. Amah cu nanmah lo rinsannak nasazet a neih ruangah atu ah cun a taima sinsin. ²³ Tita thuhla an suh asile, amah cu ka hnaṭuanpi a si. Nanmah lakih keimah thawi hnaṭuan a si. Asilole, kan unaupawl thuhla an suh asile annih cu kawhhranpawlih palai le Khrih-ih ropitnak an si. ²⁴ Curuangah an hnenah le kawhhranpawl hmaiah nan duhdawt hai ti langternak le nanmai ruangih kan tluangkhawnnak san tla hmuh hai uh.

¹ Ziangahtile, mithianghlimpawl hrangih rawngbawlsaknak thu thawn pehparawin nan hnenih ca ka ngan a ṭul hrimhrim lo. ² Ziangahtile, ren ding nan hiarzia cu ka thei ih, cu mi ruangah Masidonia peng mipawl hnenah, “Akhaia peng mipawl cu kan dung kum khat lai ihsin an tiar cia zo,” tiah ka lo tluangkhawnpi zawk rero. Ṭhahnem nan ngainak cun mi tampi a rak cawktho. ³ Sikhalsehla, himi thuhla ih kan rak lo tluangkhawnpinak cu a lak men a silonak dingah le “Rak tiar cia uh,” tiih ka rak lo cah vekih nan tiar cianak dingah nan hnenah unaupawl hi ka rak thlah a si. ⁴ Cuti a si lo ah cun, Masidonia peng mipawl keimai zawngih an rat pangih timlamaw hrih lo ih an lo hmuh pang asile, nannih si loin, kanmah sawn hi lo rinsan zetih kan lo tluangkhawnpinak ah hin kan ning a zak ding. ⁵ Curuangah nan rak tiamkam cia, nan sian zet mi thawhhlawm cu, timlam cia si dingin unaupawl cu nan hnenah a hlankhanin ra dingin fawrh ṭul in ka ruat. Cu lawngah nan thawhhlawm cu hnek cawp ih pek mi si loin, siang zetih pek mi a si thei ding. ⁶ Asinan, malte a tuhtu cun malte a at ding ih, tampi a tuhtu cun tampi a at ve ding ti hi ka sim a si. ⁷ Mi kipin ui cingin le pek lo theih lo a si ti ruat khalin pe loin, an thinlung ih an ṭhencat vekin pe ciar hai seh. Ziangahtile, Pathian in lungawinak thinlung thawi petu a duhdaw a si. ⁸ Cun, nannih in ziangtinkimah haidaih tawk zet nei camcinin le hnaṭuan ṭha tinkim nan ṭuansuak theinak dingah Pathian cun zangfahnak hmuahhmuah nan parah a lo vur thei a si. ⁹ Cumi cu Cathianghlim in, “Anih cun a rak thehdarh ih, miretheipawl hnenah a rak pe. A dingfelnak cu kumkhua in a hmun ringring,” tiih a ngan vek khan a si. ¹⁰ Atu ah, thlaici tuhtu hnenih thlaici petu le rawl hrangih sang lo petu cun nan tuh mi thlaici cu karhter in, nan dingfelnak rahpawl tla cu ṭhangter hram seh. ¹¹ Siang zetih nan pek theinak dingah ziangtinkimah Pathian in lo lianter hram seh. Cumi cun kanmah ruangah mi in Pathian hnenah lungawithu a simter ding. ¹² Ziangahtile, hi sawmdawlawknak nan rawngbawlnak hin mithianghlimpawlih tlaksamnak a silhkhahsak lawng si loin, mi tampi ih Pathian hnenih lungawithu tampi simnak ah a cang. ¹³ Hi rawngbawlnak hin Khrih-ih thuthangṭha cu nan lung ih, cui thuthangṭha ah nan tlukluhzia le an hrang le mi hmuahhmuah hrangih siang zetih tampi nan zemsuah ṭheuzia a langfiangter ruangah Pathian an thangṭhat a si. ¹⁴ Cule nan parih Pathian zangfahnak luangliam ruangah nan hrangih thla an cam tikah lo hmuh ding an duh zet a si. ¹⁵ Ṭawngkam ih sim thei lo a thilpek ruangah Pathian hnenah lungawithu um seh.

¹ Nan mithmuh ih zam ih um, nan hnen um lo tikih nanmah lamih ralṭha zet pa, keimah, Paul in Khrih zaidamnak le nemnak in atu ah ka lo ngen hai a si. ² Nan hnen ka um tikah minung nundan ih nung ih i ruattupawl dokalh in rinsanawknak thawn ralṭha zetih um ka tum. Cutivekih ralṭhat ka ṭullonak dingah ka lo ngen a si. ³ Ziangahtile, kannih cu taksa in kan nung ko nan, taksa dan in kan do ve lo. ⁴ Ziangahtile, raldonak ih kan hman mi hriamhreipawl tla cu milai hriamhrei an si lo. Hauhruang kulh hnget zetpawl ṭhiatbalnak dingah Pathian zarih thiltitheinak hriamhrei a si sawn. ⁵ Cui hriamhrei in elnakpawl si seh, Pathian theihnak dokalh ih mahte khaisangaw mi thil sang pohpoh tla cu kan ṭhiatbal ih, khawruahnak kipin Khrih thulunnak sal ah kan hruai a si. ⁶ Nan thulunnak a famkim tikah thulunlonak hmuahhmuah dantat dingin kan tiar a si. ⁷ Leng lam langdan lawng nan zoh ṭheu a si lo maw? Mi pakhatkhat in Khrih ta si roriih zumhngehnak a neihawk asile amah cu Khrih ta a si vekin kannih khal Khrih ta kan si ve ti ruatkirsal seh. ⁸ Ziangah cutin ka ti tile nanmah lo siatsuahnak dingah si loin, nanmah lo tuahṭhatnak ding sawnah Bawipa in thuneihnak in rak pek mi hi tluangkhawnpi deuh hlek hman ningla ka ning a zak lo. ⁹ Ka cakuat mipawl hmang in lo ṭhihṭhaih tum vekih ka langlonak dingah a si. ¹⁰ Ziangahtile, mi hrekin, “A cakuatpawl cu an khohkhah zet ih, hmual an nei zet. Asinan, amah ngaingai a um tikah cun a taksa cu a ṭawnṭai ih, a thusim tla zianghman a si lo,” tiah an ti ruangah a si. ¹¹ Cuvek mi cun hihi ruat seh, nan hnenih kan um lo tikah cakuatpawl tla kan ngan ih, nan hnenih kan um tikih kan thiltipawl tla cu kan cakuat sung ta vek kha a si ding. ¹² Ziangahtile, mi hrekkhat cun anmah le anmah an rel mawiaw tawn. Cupawl lakah kan siar telaw ngam lo ih, anmahpawl thawn kan khaikhinaw ngam fawn lo. Asinan annih cu anmah lakah pakhat le pakhat an tahaw ih, an khaikhinaw. Cutiih an tuah cu a fim hna lo a si. ¹³ Sikhalsehla kannih cun Pathian in kan ṭuannak ding bial in zem mi siarlo cu tluangkhawnpi loin, Pathian in kan hnenih in zem mi hnaṭuannak ramri ih a huap mi sung lawngah kan tluangkhawng sawn ding. Cui ramri cu nan hnen tiang khal a huap. ¹⁴ Ziangahtile, nannih tiang kan run lo bial hi kan bial ban lopi run bial kan si lo. Thungaiten, Khrih thuthangṭha thawn nan hnen tiang kan ra thleng a si. ¹⁵ Ramri lan in, cumi cu midangih hnaṭuan mi ah kan tluangkhawng lo. Cu hnakin, nan zumnak a ṭhan tikah Pathian in nanmah hmang in nan lakah kan hnaṭuannak cu nasazetin a kauter ding ti hi kan ruahsan sawn. ¹⁶ Cucu bial dangih midangpawlih hna ṭuan cia mi ih kan tluangkhawnlonak dingah le nan umnak ralkhat lam tiangih thuthangṭha kan sim theinak dingah a si. ¹⁷ Sikhalsehla, “Zokhal a tluangkhawn asile BAWIPA ah tluangkhawng seh.” ¹⁸ Ziangahtile, amah le amah a relmawiawtu cu Bawipa in a pawm lo ih, amah Bawipa ih relmawi mi lawng a pawm a si.

¹ Aa zetih ka ṭawng tikah malte tal in rak zawi thei uhla ka va duh tak em! A zawi khal in zawi taktak a si. ² Ziangahtile, Pathian thiknak thawn ka lo thik hai a si. Ziangahtile, nannih cu Khrih hnenah a thianghlim mi fala him vekih ka lo hlan theinak dingah pasal pakhat hrangah ka lo ham zo. ³ Asinan, rul in a hrawkhrawlnak in Evi a bum bangin Khrih ih nan taknak ihsin nan ruahnaklungthinpawl tla a bawrhhlawhter pang ding ka phang. ⁴ Ziangahtile, kan phuan mi si lo Jesu dang thu phuang nan hnenah an ra ding ih, nan co dah lo mi thlarau cu nan co ding ih, nan rak cohlan zo mi si lo thuthangṭha dang kha a ṭha tiin nan cohlang pang ding ti ka phang! ⁵ Ziangahtile, apostol thupibikpawl hnakin fa te hman ka niam ce cuang lo tiin ka ruat. ⁶ Asinan, thusim thiam lo khal ningla, theihnak ah cun cuvek ka si lo. Thil ziangkimah cipciar zetin nan lakah kannih cu langter zo kan si sawn a si kha. ⁷ Cawisan nan si theinak dingah keimah le keimah hnuaidawrawter in nan hnenah man la loin Pathian thuthangṭha ka rak phuan ruangah thil sual ka tuah maw? ⁸ Nanmah ka lo ren theinak dingah kawhhran dangpawl ka ram ih, an hnen ihsin hlawhman tla ka la. ⁹ Cule, nan hnenih ka rak um laiah ka tlaksam tikah khan zohman ka phurritter lo. Ziangahtile, ka tlaksam mi cu Masidonia peng ihsi a ra mi unaupawl in in silhkhahsak ṭheh. Nan hrangah phurrit ka silonak dingah thil ziangkimah keimah le keimah ka rak kilaw zo. Cutivekin ka kilaw peh vivo ding. ¹⁰ Khrih thutak keimah ah a um a si. Curuangah, Akhaia pengpawl tla ih hitiih ka tluangkhawnnak hi zohman in in kham thei lo ding. ¹¹ Ziangruangah nan phur ka lo ritter lo? Ka lo duhdawt hai lo ruangah maw? Ka lo duhdawt ti cu Pathian in a thei. ¹² Mi hrekkhat cu kanmah bangih an lang theinak dingah an tluangkhawng. Tluangkhawnnak can remcang duhtupawl hnen ihsin can remcang cu ka sahcatsak theinak dingah ka tuah mi hi ka tuah peh vivo ding. ¹³ Ziangahtile, cuvek mipawl cu anmah le anmah Khrih apostol ah an tuahaw cawp ih, apostol deu le mibum hmang hnaṭuantu an si. ¹⁴ Mangbang ding a um lo! Ziangahtile, Setan amah rori hman tleu vancungmi vekah a tuahaw a si. ¹⁵ Curuangah a siahhlawhpawl khal dingfelnak siahhlawhpawl vekih an tuahawk tikah thilmak a si lo. An cemnetnak ding cu anmai hnaṭuan mi vekin a si ding. ¹⁶ Ka simsal a si, zohman in miaa ah i ruat hlah hai seh. Cutivekih in ruah ceng asile malte tal ka tluangkhawn thei venak dingah miaa cohlan vekin i cohlang uh. ¹⁷ Hitiih ka ṭawng mi hi Bawipai thupek ih ka ṭawng mi a si lo. Mah le mah rinawknak thawi ka tluangkhawn tikah miaa vekih ṭawng ka si. ¹⁸ Mi tampi cu tisa dan in an tluangkhawng. Curuangah kei khal ka tluangkhawng ve ding. ¹⁹ Ziangahtile, nannih cu mifim nan si ruangah miaapawl cu lungawi zetin nan zawi. ²⁰ Ziangahtile, mi pakhat in sal ah a lo hruai ah si seh, a lo eiral thluh ah si seh, nan neih mi thil a lo laksak ah si seh, amah le amah a khaisanawk ah si seh, nan hmai a lo beng ah si seh lungawi zetin nan zawi a si. ²¹ A hlanah cak lo vekih kan rak lang thuhla a rel ka ning a zak. Sihmansehla, zo vek khalih an ngam mi cu, miaa bangin sim men sehla, kei khalin ka ngam a si. ²² Hebrumi an si maw? Kei khal ka si ve. Israel-mi an si maw? Kei khal ka si ve. Abraham tesinfa an si maw? Kei khal ka si ve. ²³ Khrih siahhlawh an si maw? Aa zetin ṭawng men sehla, kei cu annih hnakin ka si sinsin. Annih hnakin ka ṭuan bang sawn, siar cawk lo vuaknak, annih hnakih thawngtlak leuhleuhnak, vei tampi thi zikteih umnak tuartu ka si. ²⁴ Vei sawmthum le vei kua vuaknak kha Jew-pawl hnen ihsin ṭum nga ka tuar. ²⁵ Fungfek tlain vei thum vuak ka si. Vei khat lungto ih den ka si. Lawng siatnak vei thum ka tawng. Ni khat le zan khat sung tifinriat parah ka rak um. ²⁶ Atu le atu khual ka tlawng. Tivapawl ah ṭihphannak, suamhmangpawl hnen ihsin ṭihphannak, keimai mipawl hnen ihsin ṭihphannak, Zentelpawl hnen ihsin ṭihphannak, khawpi sungih ṭihphannak, ramṭhing ih ṭihphannak, tifinriat ih ṭihphannak, unau deupawl hnen ihsin ṭihphannak tla ka rak tawng. ²⁷ Bang zet ko hnaṭuannak le nasazetih hnaṭuannak si seh, atu le atu it lo ih kilawknak, rilrawn le tihalnak, atu le atu rawl lo ih umnak, khawsik le hnipuan lo ih umnak pawl tla ka rak tuar. ²⁸ Hi bang a leng lam thilpawl hleiah kawhhranpawl hmuahhmuah ka ngaihtuah hainak in ni tin i nen. ²⁹ Micaklopawl cah lopi loin ka um dah maw? Mi an tluk tikah tuar loin ka um dah maw? ³⁰ Ka tluangkhawng ding ceng asile ka cahlonak lam thilpawl hi a si ka tluangkhawnpi sawn ding. ³¹ Pathian le kan Bawipa Jesu Khrih-ih Pa, kumkhuaih thangṭhat ding mi cun thuphan ka per lo ti a thei. ³² Damaskas khawpi ah Siangpahrang Areṭas hnuaiih ram uktu khan kaih i duh ruangah Damaskas khawpi cu a kilter. ³³ Cule an hauhruang kulh mi tukvirh ihsin bawm in in ṭhum ih, a kut sung ihsin ka tlansuak.

¹ Tluangkhawn hi ka hrangah hlawknak a um lo taktak. Sikhalsehla, Bawipai larawknakpawl le a phuanawknakpawl cu ka hun rel hnik pei. ² Khrih ah mi pakhat ka thei. Kan dung kum hleili laiah khan cu pa cu van thumnak ah laksoh in a um. Cu pa cu taksaruangpum thawn a si maw, taksaruangpum tel lo in a si maw ka thei lo, Pathian in a thei. ³ Cun, ka theih mi pa cu taksaruangpum thawn a si maw, taksaruangpum tel lo in a si maw ka thei lo. Pathian in a thei. ⁴ Cu pa cu Paradise sungah laksoh in a um ih, minung ih rel theih lo mi, sim sian lo ṭawngkam tla a rak thei. ⁵ Cuvek mi cu ka tluangkhawnpi ding. Sikhalsehla, keimah ah cun ka ṭawnṭaihnak siarlo tluang ka khawng lo ding. ⁶ Tluangkhawn duh khal ningla miaa ka si lo ding. Ziangahtile, thudik ka sim ding a si. Asinan, ka supaw ding. Cuti a si lo ah cun mi in keimah ih an hmuh vek hnak le ka hnen ihsi an theih mi hnakih sang in in ruat pang ding. ⁷ Cule, ka hnenih thuphuansuah mi a ropit tuk ruangih keimah le keimah ka cawisanawklonak dingah ka taksa ah hling pek ka si. Cui hling cu kutthak i hnawttu Setan palai a si. Cuti lo cun, sang tukah ka retaw pang ding. ⁸ Cui hling cun i suahsan dingin, Bawipa hnenah vei thum ka rak dil. ⁹ Cule, Bawipa in ka hnenah, “Ka zangfahnak hi na hrangah a tawk. Ziangahtile, ka cahnak cu cahlonak ah hin famkim ko tuah a si,” tiah i ti. Curuangah Khrih huham cu ka parih a um ringring theinak dingah ka ṭawnṭaihnakpawl ah hin lungawi zetin tluang ka khawng sawn ding. ¹⁰ Curuangah Khrih ruangah ṭawnṭaihnakpawl ah si seh, hmuhsuamnakpawl ah si seh, tlaksamnakpawl ah si seh, tiduhdahnakpawl ah si seh, vansannakpawl ah si seh ka lung a awi a si. Curuangah ka cah lo tinten ka cak ṭheu a si. ¹¹ Kei cu nanmah ih loh theih lo ih in nawrnak ruangah tluangkhawnnak ah miaa ah ka cang. Ziangahtile, kei cu nannih ih simfak zo ding mi ka si. Ziangahtile, keimah cu zianghmanlote si hman ningla apostol mithupi zetpawl hnakin ka tenau ce lo. ¹² Apostol sinak hminsinnakpawl tla cu nan lakah thinsau ringringten ka tuah. Cupawl cu hminsinnak, mangbangza le huham ih tuah mi thilpawl tlain ka rak tuah a si. ¹³ Keimah rori hi nan hrangih phurrit ka rak silonak siarlo ziang lam talah kawhhran dangpawl hnakih nan niam cenak a um maw? Himi ka tisualnak ah hin i ngaidam uh! ¹⁴ Ngai hnik uh, nan hnen ra tlawng dingih vei thum ka tiarnak a si. Nan thil neih mi hawl ka si lo ih, nanmah lo hawl ka si sawn ruangah nan hrangah phurrit ka si lo ding. Ziangahtile, falepawl in nu le pa hrangah thil an khawlsak ding a si lo ih, nu le pa in fale hrangah an khawlsak sawn ding a si. ¹⁵ Kei ih ka lo duhdawtnak cu a tam sinsin ih, nannih ih in duhdawtnak cu mal deuhdeuh khal sehla, kei cun nan nunnak hrangah lungawi zetin ziangkhal ka hmang ding ih, keimah le keimah khal ka hmang ralaw thluh ding. ¹⁶ Sikhalsehla a hlanah sumpai thu ah nan phur ka lo ritter lo ti hi thudik a si. Cui canah mifim ka si vekin, fimthiam zetin ka lo kaingah hai a si. ¹⁷ Nan hnenih ka rak thlah mi pakhatkhat hmang in nan hnen ihsin hlawknak lak mi ka nei maw? ¹⁸ Nan hnenih va feh dingin Tita kha ka rak ngen ih, amah thawn unaupa pakhat ka rak thlah. Tita cun nan hnen ihsin hlawknak ziangtal a la maw? Kannih cu thinlung bangrepih nungtlang mi le zin bangrep zawhtlang mi kan si lo maw si? ¹⁹ Nan hmaiah kanmah le kanmah humaw reroah in rak ruat lehsal a si maw? Khrih ah Pathian hmaiah kan ṭawng a si. Sikhalsehla, duhdawt mi tla, kan tuah mi hmuahhmuah hi nan ṭhatnak ding hrangah a si. ²⁰ Ziangahtile, nan hnenih ka rat tikah ka beisei vekin ka lo hmu lo ding ih, nannih khalin nan beisei vekin in hmu lo pang ding ti ka phang. Cuti asilole nan lakah tawhawknak si seh, iksiknak si seh, thinhengnak si seh, ṭhenṭhekawknak si seh, relsiatawknak si seh, mi thuhla rel thekthonak si seh, hngalnak si seh, hnawkbuainak si seh a um pang ding. ²¹ Cuti a silo ah cun, ka ratsal tikah ka Pathian in nanmai ruangah hnuai i dawrter pang ding ti ka phang. Cun, hi hlan ihsi sual a tuahtupawl, bawrhhlawhnak le nu le pa sualnak, tenumza hursualtuahnakpawl ihsin a siraw lo, mi tampi cu ka ṭah hai pang ding ti ka phang.

¹ Hihi nan hnenih ka rat a vei thumnak a si ding. “Theihpitu pahnih si maw, pathum si maw ih kaa in kamsuak thu tinkim cu hngehter a si ding.” ² A vei hnihnak nan hnenih ka um laiah khan ralrinnak ka rak lo pe zo. Atu nan hnenah ka um lo nan, nan hnenih um vekin ka lo sim sung ciasal. Ka rat asile hi hlanih thilsual a rak tuah zotupawl le a dang hmuahhmuahpawl khal ka zuah hai lo ding. ³ Nanmah lamah cak lo si loin, thiltithei zet sawn a si mi Khrih cu keimah hmang in a ṭawng taktak maw, ṭawng taktak lo ti theihfiangnak nan hawl ruangah ka zuah hai lo ding. ⁴ Ziangahtile, Khrih cu cak lo in khenbet sihmansehla Pathian huham in a nung a si. Cu tivek thothoin, kannih khal amah ah kan cak lo nan amah thawn Pathian huham in nanmah lamah kan nung ding a si. ⁵ Zumnak ah nan um maw um lo ti kha nanmah le nanmah cekaw uh la, nanmah le nanmah hniksakaw uh. Tling lo nan si lo ah cun, Jesu Khrih cu nan sungah a um ti nan thei lo maw? ⁶ Asinan kannih cu tling lo kan si lo ti nan thei ding tiah ka zum. ⁷ Atu ah thil ṭha lo nan tuahlonak dingah Pathian hnenah thla ka cam. Cutiih thla ka camnak san cu kannih hi Pathian ih pawm mi kan sizia lang dingah si loin, nanmah in thil zahum nan tuahsuaknak ding hrangah a si sawn. Tling lo vekin lang khal nungla cutivekin thla ka cam a si. ⁸ Ziangahtile, kannih cun thutak ṭan ding lo cun, thutak dokalh ding zawngin zianghman kan tuah thei lo. ⁹ Ziangahtile, kannih kan cah lo laiih nannih nan cah tikah kan lung a awi. Cun, famkim ih tuah nan si theinak ding hrang khalah thla kan cam. ¹⁰ Curuangah siatsuahnak dingah si lo in tuahṭhatnak ding hrang sawnih Bawipa in ka hnenih thuneihnak i pekdan izirin nan hnenih ka um tikah cui thuneihnak hmang in na tukih nun ka lo simlonak dingah nan hnenih ka um lo laiah hi thupawl tla hi ka ngan a si. ¹¹ Netabikah, u le nau tla, lungawiten um uh. Nanmah le nanmah famkimawter uh la, nanmah le nanmah tha peaw uh. Ruahnaklungthin hmunkhat pu uh la, remawten um uh. Cule duhdawtnak le remnak Pathian cun a lo umpi ding. ¹² Hnamawknak thianghlim thawn pakhat le pakhat cibai bukaw uh. ¹³ Mithianghlim hmuahhmuah in cibai an lo buk. ¹⁴ Bawipa Jesu Khrih-ih zangfahnak, Pathian duhdawtnak le Thlarau Thianghlim-ih pawlkawmnak cu nan zate hnenah um seh. Amen.