1 TIMOTE

¹ In Rundamtu Pathian le kan ruahsan mi Bawipa Jesu Khrih thupek bangtukih Jesu Khrih-ih apostol a si mi keimah Paul in, ² zumnak ih ka fa taktak Timothy, na hnenah Pathian kan Pa le Jesu Khrih kan Bawipa hnen ihsin, zangfahnak, zahngainak le hnangamdaihnak cu um hram seh. ³ Mi hrekkhat in zirhnak danglam an zirh theilonak dingin thu na pek theinak dingah Efesa khua ah rak um ringring aw. Cucu Masidonia peng ka feh zawngih ka lo ngen mi kha a si. ⁴ Anmah cu phuahcawp thuanthu lam le cem ti nei lo pupa suahkehnak ngaihsak lo dingin thu pe hai aw. Cumi cun zumnak ih a um mi Pathian lam tuahṭhatawknak suah loin elawknak a suakter sawn. ⁵ Sikhalsehla, thupek ih tumtah mi cu thinlung thianghlim, sia le ṭha theihnak ṭha le zumnak dik ihsin a suak mi duhdawtnak a si. ⁶ Mi hrekkhat in cupawl cu an pialsan ih thu mumallo relnak lamah an her. ⁷ Ziang an ṭawng tile ziang an nemhnget ti thei loin, Danzirhtu si an duh. ⁸ Sikhalsehla mi in a sidan vekih a hman asile Dan cu a ṭha ti kan thei. ⁹ Hi khal hi kan thei: Dan cu midingfelpawl hrangih tuah mi a si lo ih, dan nei lopawl le thulunglopawl hrang, Pathian ngaihsak lopawl le misualpawl hrang, mithianghlimlopawl le sakhaw zahlotupawl hrang, pale thattupawl le nule thattupawl hrang, mithattupawl hrang, ¹⁰ nu le pa sualnak a tuahtupawl hrang, tawka hurpawl hrang, minung ruk hmangpawl hrang, thuphanper hmangpawl hrang, thuphan thu ih sesam hmangpawl hrang le thil ziangkhal zirhawknak ziktluak dodaltupawl hrangah a si. ¹¹ Cui zirhawknak ziktluak cu thangṭhat tlak Pathian-ih thuthangṭha ropi milin a si ih, cucu Pathian in i kawlter a si. ¹² I caktertu Khrih Jesu, kan Bawipa hnenah lungawithu ka sim a si. Anih cun mirinum ih i siar ruangah rawngbawl dingin in ruat a si. ¹³ Hi hlanah kei cu thangsiattu, mi tiduhdahtu le mi tinatu rak si hman ningla, zum loin thei lo ih ti ka si ruangah zahngainak ka co a si. ¹⁴ Cun, kan Bawipai zangfahnak cu Khrih Jesu ih a um mi zumnak le duhdawtnak thawn nasazetin a rak luangliam. ¹⁵ “Khrih Jesu cu misualpawl run dingin leitlun ah a ra, an lakah misualbik ka si,” ti cu rin tlak mi ṭawngkam a si ih, a pumhlumih pawm thluh ding a si. ¹⁶ Cuti sikhalsehla himi ruangah a si zahngainak ka rak co. Cuti cun kumkhawnunnak an conak dingah tui hnuih amah zumtu dingpawlih zohṭhim ding mi si dingin Jesu Khrih cun a thinsaunak hmuahhmuah cu keimah ah a langter hmaisa a si. ¹⁷ Atu ah catuan Siangpahrang, thi thei lo, hmuh theih lo, Pathian fim umsun hnenah cun upatnak le ropitnak cu a kumkhuaih kumkhua in um seh. Amen. ¹⁸ Ka fapa Timothy, na thuhla an rak phuan cia mi bangin raldonak ṭha cu na do theinak dingah hi thupek hi na hnenah ka lo ap. ¹⁹ Zumnak le sia le ṭha theihnak ṭha cu kaihnget in do aw. Mi hrekkhat tla cun cucu an hlawnhlo ih an zumnak cu a siat mi lawng vekah a cang. ²⁰ An lakah Haimenias le Alexander tla an tel. Pathian thangsiat lo an zir theinak dingah annih cu Setan kut ah ka hlan hai a si.

¹ Curuangah, a hmaisabikah, dilsaknak si seh, thlacamsaknak si seh, midang hrang thlacamsaknak si seh, lungawithu simsaknak si seh mi hmuahhmuah hrangah tuah uh tiah ka lo fawrh a si. ² Pathian ngaihsaknak hmuahhmuah le thil zahum hmuahhmuah tuah in, daite le remawtei kan nunkhawm theinak dingah siangpahrangpawl le thuneitupawl hmuahhmuah hrang khalah thla cam uh. ³ Ziangahtile, himi cu in Rundamtu Pathian hmaiah a ṭha ih cohlan tlak a si. ⁴ Pathian cun mi hmuahhmuah rundam ih an um ding le thutak an theih ding a duh. ⁵ Ziangahtile, Pathian pakhat a um ih, Pathian le minung karlakah remnak Palai pakhat, Minung Khrih Jesu a um. ⁶ Anih cu mi hmuahhmuah tlensalnak hrangah amah le amah a peaw. Cumi cu a tikcucan teah theihter a si. ⁷ Cu mi thu theihter dingah kei cu thusimtu ah le apostol ah le zumnak ah le thutak ah Zentelpawl zirhtu ah ruat ka si. Khrih ah thutak ka sim, thuphan ka per lo. ⁸ Curuangah hmun tinah mipapawl cu an kut thianghlim thlir in, thinhengnak le rinhlelhnak um lo ih thla an cam ding ka duh. ⁹ Cutivek thothoin, nunaupawl khalin a mawi tawk mi hnipuan le lungput ṭha thawn thuamaw hai seh la, samphiar simaw, sui simaw, keplung simaw, a mankhung mi hnipuan thawn simaw thuamaw loin, ¹⁰ nunaupawl cu hnaṭuan ṭha thawn thuamaw sawn hai sehla ka duh. Cucu Pathian ngaihsak tiaw nunaupawlih ti ding mawi a si. ¹¹ Nunau cun tuhlutawknak hmuahhmuah thawn daitei um in zir seh. ¹² Sikhalsehla nunau ih thu zirh ding simaw, mipa tlunih thu a neih ding simaw cu ka siang lo, daiten um sawn seh. ¹³ Ziangahtile Adam cu sersiam hmaisa a si ih, cui hnuah Evi cu siam a si. ¹⁴ Cule, Adam cu bum in a um lo, asinan nunau cu bum in a um ih, dan pahbaltu ah a cang. ¹⁵ Sikhalsehla, zumnak le duhdawtnak le a mawi tawkte in thianhlimnak ih an um peh vivo asile nauhrin ah runhim a si ding.

¹ Mi zokhal in kawhhran hotu si a duh ah cun hnaṭuan ṭha a duh a si ti mi hi rinsan tlak mi ṭawngkam a si. ² Kawhhran hotu cu sawihnawm ding um lo, nupi pakhat nei, fimkhur thiam, supaw thei, nuncan ṭha, khual ṭha, mi zirh thei, ³ sabitti in duh lo, mi tawh hmang lo, sumpai duham lo, minunnem, mi rem lo nei lo, sumpai ngaina lo a si ding a si. ⁴ Mai insang ṭha zetih ukthiam, zahum zetih fate thu hnuaiih ret thei a si ding a si. ⁵ Ziangahtile, mi pakhat in amai insang ziangti ih uk ding ti a theih lo ah cun ziangtin Pathian kawhhran cu a kilkhawi thei ding? ⁶ Zumtu thar si hlah seh, cu lo asile uarawknak thawn a ngaisangaw ding ih, Diabol bangin thiamlo coternak ah a tlu pang ding. ⁷ Cuitlunah a leng lam mipawlih simṭhat mi a si ding a si. Cuti lo cun simsiatnak ah le Diabol-ih thang ah a tlu pang ding. ⁸ Cuvek thothoin, dikhonpawl khal mizahum an si ding a si. Leiphir nei lo, sabitti pham lo le sumpai duham lo an si ding a si. ⁹ Sia le ṭha theihnak thiang ih zumnak thuthup kaihngettu an si ding a si. ¹⁰ Cun, cupawl khal cu hniksak hmaisak sita hai seh la, cui hnuah sawihnawm ding um lo an sile dikhon hna kai hai seh. ¹¹ Cutivek thothoin, an nupipawl khal fimkhur thiam, mirelsiat hmang lo, supaw thei, thil ziangkim ih rinsan tlak an si ding a si. ¹² Dikhonpawl cu nupi pakhat nei, anmai insang le an fate ṭhatei uk theitu si hai seh. ¹³ Ziangahtile, dikhon hna ṭha zetih a ṭuan zotu cun anmai hrangah dinhmun ṭha le Khrih Jesu ih um zumnak lamah cun ralṭhatnak nasazet an nei. ¹⁴ A rei hlanah na hnenih rat beisei in hi thupawl tla na hnenah ka ngan a si. ¹⁵ Sikhalsehla ka cam rei pangah Pathian insang ah nangmah roriin ziangtiih um ding ti na theihtheinak dingah ka ngan. Pathian insang cu thutak ban le ṭhumawknak Pathian nung kawhhran hi a si. ¹⁶ Cun el ding um loin Pathian ngaihsaknak thuthup cu a ropi a si. Pathian cu taksa ah a rung cang, Thlarau in a dingfel ti a langter, vancungmipawl in an hmu, Zentelpawl hnenah phuan a si, leitlun mipawl in an zum ih ropitnak sungah laksoh in a um.

¹ Can neta lamah cun mi hrekkhat zumnak an tlansan ding ih, bumnak thlaraupawl le khawsepawlih zirhnak an ngaihven sawn ding ti atu ah Thlarau cun fiang zetin a sim a si. ² Cuvek mipawl cu depde zetih thuphanper hmang, an sia le ṭha theihnak cu thirling ih dehpit mi vek a si. ³ Nupi pasal neih an kham ih, a zumtu le thutak a theitupawl in lungawithu simnak thawi an cohlan ding mi Pathian sersiam mi sa tla ei lo dingin an kham. ⁴ Ziangahtile, Pathian sersiam mi tinkim hi a ṭha thluh ih, lungawithu simnak thawi kan cohlan a si ah cun, hnawn ding zianghman a um lo. ⁵ Ziangahtile, cumi cu Pathian thu le thlacamnak in thianhlimter a si. ⁶ Zumnak thupawl ah cawm mi si in le zirhnak ṭha fimkhur zetih na rak thlun zo mipawl kha unaupawl na simfiang hai asile Jesu Khrih-ih rawngbawltu ṭha na si ding. ⁷ Asinan Pathian lam thawi a pehparaw lo mi nutarpawlih thuanthu phuahcawp kha hrial aw la, Pathian ngaihsaknak lamah sawizawiaw sawn aw. ⁸ Ziangahtile, taksa sawizawiawknak cun hlawknak malte a nei. Asinan Pathian ngaihsaknak cun thutiamkam atu ih nunnak hrangah le a ra thleng leh ding mi nunnak hrangah a neih ruangah ziangkimah a hlawk a si. ⁹ Hihi rinsan tlak le cohlan thluh tlak ṭawngkam a si. ¹⁰ Ziangahtile, mi hmuahhmuah rundamtu, ahleicein a zumtupawl Rundamtu Pathian nung cu kan ruahsan ruangah nasazetin kan ṭuan ih sawiselnak kan tuar a si. ¹¹ Hi thilpawl hi thu pe hai aw la, zirh hai aw. ¹² Mino na sinak hi zohman in lo nautat hlah hai seh. Cu hnakin ṭawng ah si seh, umtlandan ah si seh, duhdawtnak ah si seh, thlarau ah si seh, zumnak ah si seh, thianhlimnak ah si seh, zumtupawlih zohṭhim ding si sawn aw. ¹³ Ka ra thlen lai hlanlo Cathianghlim siar si seh, mi thapek si seh, mi va zirh si seh nasazetin tuah aw. ¹⁴ Nangmah ih um mi thilpek, elder-pawl na parih kut an suan laiih simsungnak hmang ih pek mi kha thlahthlam hlah. ¹⁵ Mi hmuahhmuah hnenah na ṭhansonak a lang theinak dingah hi thupawl hi ngaihtuah aw la, cupawl ah cun na pumhlum in um aw. ¹⁶ Nangmah ah le na thu zirh mi ah fimkhur aw la, cupawl ah cun um ringring aw. Ziangahtile, cutiih na tuah a si ah cun nangmah le na thu ngaithlatupawl na humhim ding a si.

¹ Kum upadeuh cu na zetin kawk hlah aw la, pa vekin tha pe sawn aw. Cule, minodeuhpawl cu unau vekin tha pe hai aw. ² Nunau kum upadeuhpawl cu nu vekin, minodeuhpawl cu thianhlimnak hmuahhmuah thawn farnu vekin tha pe hai aw. ³ Nuhmei a si ngaingai mi nuhmei cu upat aw. ⁴ Asinan nuhmei, zovek khalin fate asilole tu tla a neih ah cun, cupawl cun a hmaisabikah an inn lamah Pathian ngaihsakdan le an nu le pa rulhsaldan zir hai seh. Ziangahtile, cucu Pathian hmaiah a ṭha ih, pawm tlak a si. ⁵ Nuhmei a si taktak mi, mahlawng ih um cun Pathian a rinsan ih a sun a zan in dilnak le thlacamnak tla a nei ringring. ⁶ Asinan nawmsaknak ih a nungtu nuhmei cu a nun lai khalah a thi a si. ⁷ A tu le fa pawl cu sawihnawm ding um lo an si theinak dingah hi thilpawl hi nunpi dingin thu pe hai aw. ⁸ Asinan zokhal amai mi le sa, ahleicein amai insungsang rori hman a ngaihsak lo a si ah cun zumnak a phatsan ih, zumlotu hnakin a ṭha lo sawn a si. ⁹ Kum sawmruk kim hrih lo mi nuhmei cu nuhmei lakah siartelh ding an si lo. Mi pakhat nupi rak si dah, ¹⁰ hna ṭha ṭuan ruangih simṭhat mi, fate rak cawm pitling, mikhual tla rak thlengter, mithianghlimpawlih ke rak khawlhsak, miharsapawl tla rak bawm, hna ṭha pohpoh taima zetih a rak ṭuan ah cun nuhmei ah siartel aw. ¹¹ Asinan nuhmei nodeuhpawl cu telh hai hlah aw. Ziangahtile, an tisa cakhiarnak a ṭhan tikah, Khrih thawn a hlatawter hai ih, pasal neih an duh lehsal ṭheu. ¹² An zumnak hmaisabik an hlawn ruangah thuṭhen an si. ¹³ Cun, zangzel an zir ih, inn khat hnu inn khat an vaktawi vivo. Cule zangzel lawng si loin mi an rel ih, midang thuhla ah rak hrawlhaw vein, an rel lo ding mi thil tla an rel ṭheu. ¹⁴ Curuangah kum nodeuhpawl cun pasal nei hai sehla, fate nei in insungsang lam kilkhawi hai seh la, sawiselnak ding remcang zianghman ralpa cu hmuter lo hai seh la ka duh. ¹⁵ Ziangahtile, mi hrekkhat Setan lamih an hawikir zo ruangah a si. ¹⁶ Zumtu mipa asilole nunau in nuhmei umpi a neih asile anmah in sawmdawl hai seh la, kawhhran in nuhmei a si taktak mi an sawmdawl theinak dingah kawhhran buaipiter hlah hai seh. ¹⁷ Ṭha teih mi kaihruai theitu elder-pawl, ahleicein thu le zirhnak lamih nasazetih a ṭuantupawl cu a let hnih ih sunlawih tlakih ruah si hai seh. ¹⁸ Ziangahtile, Cathianghlim in, “Cawcang in buh a cil laiah a hmur ṭawn hlah uh,” a ti ih; “Hnaṭuantu cu a hlawhman ngah tlak a si,” tiah a ti fawn. ¹⁹ Elder an heknak cu theihpitu pahnih, asilole pathum hnen ihsi lo cun rak pawm hlah. ²⁰ Elder thil sual tuahtupawl cu elder dangpawl khalin an ṭih theinak dingah mizapi hmaiah kawk aw. ²¹ Pathian le Bawipa Jesu Khrih le hril mi vancungmipawl hmaiah khoh zetin thu ka lo pe a si. Mi pakhat duh sawnin, thleidannak thawn zianghman tuah loin hi thupawl hi thlun aw. ²² Zawi par hmanah awlten na kut suang hlah aw la, midangpawlih sualnakpawl khalah va tel hlah. Thianghlimten nangmah le nangmah kilaw aw. ²³ Ti lawnglawng in loin, na pum ruangah le na dam lo ṭheu ruangah sabitti malten hmang aw. ²⁴ Mi hrekkhatih sualpawl cu an langsar ih, an thuhla cu thuṭhennak hmun ah anmai hlanah a thleng. Cule mi hrekkhat cu nehhnu lawngah an ra lang. ²⁵ Cutivek thothoin mi hrekkhatih hnaṭuan ṭha cu an langsar hngal ih, a langsar hngal lo mi hnaṭuan ṭha khal thuh theih an si cuang lo.

¹ Pathian hmin le a zirhnak cu thangsiat a silonak dingah sal hngawngkawl battu hmuahhmuah in an bawipawl cu upatnak hmuahhmuah co tlak an si ti thei hai seh. ² Cun, sal, zumtu bawi neitupawl cun an bawipawl cu unau an si ruangah nautat hlah hai seh. Cu hnakin hlawknak cotupawl cu zumtu le duhdawt mi an si ruangah nasa sinsinin an bawipawl cu rian sawn hai seh. Hi thupawl hi zirh aw la, fawrh aw. ³ Mi pakhatkhat in zirhnak phundang a zirh ih, thu hrisel, kan Bawipa Jesu Khrih thu le Pathian ngaihsaknak lam zirhawknak vekin a pawm lo a si ah cun, ⁴ anih cu mihngal a si. Zianghman theih mi a nei lo ih, thuelawknak le ṭawngkam sullam thu ih elawk hiarnak hrisel lo a nei sawn. Cu mi ihsin iksiknak, tawhawknak, midang relsiatnak, rinhlelhawknak ṭha lo tla an suak. ⁵ Cutivekih miel hmangpawl cu ruahnaklungthin bawrhhlawh le thutak pai lo, Pathian ngaihsak hi sumpai hlawknak lamzin a si tiih ruattupawl tla an si. Cupawl hnen ihsin nangmah le nangmah thiarfihlimaw aw. ⁶ Asinan lungkim tawknak thawi Pathian ngaihsaknak cu hlawknak ropi a si. ⁷ Ziangahtile, hi leitlun ah zianghman kan kenglut lo ih, zianghman kan kengsuak thei fawn lo ding. ⁸ Cule, rawl le sinfen kan neih mi thawn lungkim tawk uhsi. ⁹ Asinan len a duhtu cun sualfawrhnak sungah, thang sungah le thil atthlak tampi cakhiarnak le mi siatsuah thei cakhiarnak cak zet tampi sungah an tlu. Cumi cun siatralnak le hlohralnak ah mi a hlawnpil. ¹⁰ Ziangahtile, sumpai ngainat cu ṭhatlonak hmuahhmuah ih hrampi a si. Cuvekin mi hrekkhat cun sumpai mi an daw ih, zumnak ihsin an fehpeng ih, riahsiatnak tampi thawn anmah le anmah an suntlangaw. ¹¹ Asinan, nang, Pathian mi, cui thilpawl cu tlansan aw la, dingfelnak, Pathian ngaihsaknak, zumnak, duhdawtnak, tuar theinak, nunnemnak pawl tla cu dawi aw. ¹² Zumnak doawknak ṭha cu do aw. Kumkhawnunnak cu pawk ringring aw. Cu mi hrangah kawh khal na si. Theihpitu tampi hmaiah phuansuahnak ṭha cu na phuang zo a si. ¹³ Pathian, thil ziangkim tinungtu hmaiah le Khrih Jesu, Ponṭias Pilat hmaiih phuansuahnak ṭha theihtertui hmaiah thu ka lo pe. ¹⁴ Kan Bawipa Jesu Khrih a runglang hlanlo, thianghlim le sawihnawm ding um loin hi thupek hi kilaw. ¹⁵ Cucu hi thupek hi kilaw. (v 15) Cucu Pathian in amai can teah thangṭhat mi le Hukim umsun, siangpahrangpawl lakih Siangpahrang le bawipawl lakih Bawi cun Khrih cu a langter leh ding. ¹⁶ Amah lawngin thih theilonak a nei ih, zohman ih naih theih lo tleu ah a um. Amah cu zohman in an hmu lo ih, a hmuh khal an hmu thei lo. A hnenah upatnak le kumkhaw uknak cu um seh. Amen. ¹⁷ Tui san milianpawl kha ngaisangaw lo ding le a hnget lo mi lennakpawl cu rinsan loin, thil hmuahhmuah lungawinak dingih tam zetih mi petu a nung mi Pathian rinsan sawn dingin thu pe hai aw. ¹⁸ Thil ṭha ti dingin, thil ṭha tinak lamih lian dingin le tirhsiang zet le midang hrangah ui lo dingin thu pe hai aw. ¹⁹ Cutin anmai hrangah a ra thleng lai ding mi can hrangah ṭhumawknak ṭha an khawlkhawm thei ding ih, kumkhawnunnak an pawk thei ding. ²⁰ Maw Timothy! Na hnenih kawlter mi thil cu kil ṭha aw la, leitlun thil le sullam nei lo phunnawinakpawl le mi in diklo zetih theihnak an ti mi dokalhnak cu hrial aw. ²¹ Mi hrekkhat in cui theihnak cu ka nei an ti ih zumnak cu an ṭhelh. Zangfahnak na hnenah um seh. Amen.