1 THESALON

¹ Paul, Silas le Timothy in, Pa Pathian le Bawipa Jesu Khrih ih a um mi Thessalonika kawhhran mipawl hnenah: kan Pa Pathian le Bawipa Jesu Khrih hnen ihsin zangfahnak le hnangamdaihnak nan hnenah um seh. ² Kan thlacamnak tla ah nan hmin sal in nan zate hrangah Pathian hnenah lungawithu kan sim ringring. ³ Zumnak ih nan hnaṭuan le duhdawtnak ruangih nasazetih hna nan ṭuanzia le kan Bawipa Jesu Khrih ah ruahsannak ruangih nan tuarfainakpawl kha kan Pathian le Pai hmaiah catbang loin kan cing ringring. ⁴ Duhdawt mi u le nau tla, Pathian ih a lo hrilnak kha kan thei. ⁵ Ziangahtile, nan lakah nanmai hlawknak ding hrangah ziangvek minung kan si ti nan theih bangin, kan thuthangṭha cu thu lawngin nan hnenah a thleng lo ih, huham le Thlarau Thianghlim le theihfengnak nasazet thawn a thleng sawn a si kha! ⁶ Cun, harsatnak nasazet tuar in Thlarau Thianghlim ihsin lungawinak thawn thu cu nan rak cohlang ih nannih cu kanmah le Bawipa cawngtu ah nan cang. ⁷ Curuangah nannih cu Masidonia peng le Akhaia peng ih zumtupawl hmuahhmuah ih zohṭhim mi nan si. ⁸ Ziangahtile, nan hnen ihsin Masidonia peng le Akhaia peng lawngah Bawipai thu cu a thang lo ih, hmun tin khalah Pathian lamih nan zumnak cu a thangsuak a si. Curuangah zianghman kannih ih rel a ṭul lo. ⁹ Ziangahtile, nan hnenih kan rat laiah ziangvekin in zoh ṭha ti le a nung mi le a dik mi Pathian rian dingah milempawl ihsin Pathian lamah ziangtin nan kir ti thupawl tla anmah roriin in sim a si. ¹⁰ Cule, van ihsi rung ṭum ding mi Pathian Fapa nan hngah thu khal in sim. Amah cu Jesu, mithi lak ihsin kaihthawh mi, thinhengnak ra thleng ding mi lak ihsin in runsuaktu a si.

¹ Ziangahtile, u le nau tla, nan hnenih kan ratnak kha a lak men a si lo ti nanmah roriin nan thei. ² Nan theih vekin a hlanah, Filipi ah harsatnak tuar in le ningzakza ih tuah in kan um. Sikhalsehla, cui hnuah, dodalnak tam zet thawn Pathian thuthangṭha nan hnenih sim dingah kan Pathian ah kan ral a ṭha a si. ³ Ziangahtile, nan hnenih thapeknak thu kan phuan mi hi bumnak thu men simaw, bawrhhlawhnak thu simaw, hrawkhrawlnak thu men simaw ihsi suak a si lo. ⁴ Cu hnakin, thuthangṭha kil tlak ah Pathian ih in pawm vekin, minung lungawiter tum loin, kan thinlung hniksaktu Pathian lungawi zawngin thu kan phuang sawn a si. ⁵ Ziangahtile, nan theih bangin ziangtik hmanah fakdernak ṭawngkam kan hmang dah lo ih, duhhamnak thup hmang kan si dah lo ti khal nan thei. Pathian cu in theihpitu a si. ⁶ Khrih-ih apostol kan si vekin phurrit lo pek theinak kan nei ko nan minung lakah si seh, nanmah le midangpawl lak khalah sunlawinak kan hawl dah lo. ⁷ Sikhalsehla, nu, nau pawm in amai fate a duat vekin nan lakah nunnem zetin kan um sawn a si kha. ⁸ Cuti cun, nannih cu kan hrangah duhnung zet mi nan si ruangah nasazetin kan lo ngaihtuah ih, nan hnenih Pathian thuthangṭha sim lawng si loin, kanmai nunnak khal lo pek kan duh a si. ⁹ Ziangahtile, u le nau tla, kan ṭuan bangzia le kan harsatdan pawl kha nan cing ringring. Nan lakah zohman sumpai thu ah nan phur kan lo rihterlonak dingah a sun a zan in hna kan ṭuan. Cutivek cun, nan hnenah Pathian thuthangṭha kan lo sim. ¹⁰ Zumtu nannihpawl lakah ziangti vekin thianghlim le dik le sawihnawm ding um loin kan nung ti kha Pathian le nannih hi in theihpitu nan si. ¹¹ Pa in a falepawl parih a tuah bangin nanmah lakah zokhal ziang tlukin tha kan lo pe, kan lo hnem ih kan lo theihter cio ti nan theih vekin, ¹² cuti cun a uknak le a ropitnak sungih a lo kotu Pathian lungawi tlakih nan nun theinak ding hrangah a si. ¹³ Kan hnen ihsin nan rak theih mi Pathian thu nan rak cohlan tikah milai thu vekin si loin, a zumtu nanmah hnen khalih hmualnei zetih ṭuantu Pathian thu diktak a sinak vekin nan rak cohlang sawn a si. Himi ih ruangah catbang loin Pathian hnenah lungawithu kan sim. ¹⁴ Ziangahtile, nannih, u le nau tla, Khrih Jesu ih a um mi Judia peng ih Pathian kawhhranpawl cawngtu ah nan cang. Annih in Jew-pawl hnen ihsin an tuar bangin nannih khal nan khawpipawl hnen ihsin cuvek thil cu nan tuar ve a si. ¹⁵ Cui Jew-pawl cun Bawipa Jesu le anmai profetpawl an that ih kannih khal in tiduhdah. Cule, Pathian lung an awiter lo ih, mi hmuahhmuah an dokalh. ¹⁶ Zentelpawl rundam an si theinak dingih an hnenih thusim annih cun in kham ih, cutin an sual tahnak cu an kimter ringring. An parah thinhengnak cu a zaten a thleng thluh. ¹⁷ Asinan u le nau tla, thinlung lamah si loin taksa in reilote sung kan ṭhenaw. Hmaitawn ih lo hmuh ding hi kan hiar zet, lo hmuh ding khal kan tum a si. ¹⁸ Curuangah nan hnenih rat kan rak duh ṭheu. Keimah Paul rori khal vei khat rat ka rak tum ih, cui hnuah ka tum lehsal nan Setan in in kham. ¹⁹ Ziangahtile, kan ruahsannak, asilole kan lungawinak, asilole kan lungawinak lallukhum cu ziang a si? Bawipa Jesu Khrih a rat tikah, a hmaiah nanmah rori hi nan si lo ding maw? ²⁰ Ziangahtile, nanmah hi kan ropitnak le kan lungawinak cu nan si.

¹ Curuangah kan tuar thei nawn lo tikah keimah lawng hi Athen khua ah tangta sehla a ṭha ding tiah kan ruat. ² Cule, kan unaupa Timothy, Pathian rawngbawltu le Khrih thuthangṭha ih kan hnaṭuanpi hi lo hngetter ding le nan zumnak thu ah tha lo pe dingin kan rak thlah. ³ Cuti cun, tui canih harsatnakpawl hin zohman a hninter lo ding. Ziangahtile, hivek tuar dingih ruat mi kan si ti cu nanmah roriin nan thei. ⁴ Nan hnenih kan um lai khalah khan harsatnak kan tuar cing ding tiah kan lo sim cia zo. Kan sim vek taktakin a rak thleng ti nan thei. ⁵ Himi ruangih ka tuar thei nawn lo tikah nan zumnak thei dingin amah kha ka run thlah a si. Cu lo asile ziangti zawngin simaw sualfawrhtu cun sual a lo fawrh pang ding ti ka phang ih, nasazetih kan hnaṭuan cu a lakah a cang pang ding. ⁶ Asinan, atu ah Timothy cu nan hnen ihsin kan hnenah a ra thleng zo. Nan zumnak le nan duhdawtnak thuhla ah thu lungawium zet in rak sum. A ṭha lamih in man ringring thupawl si seh, nasazetih hmuh kan lo hiar vekin nannih khalin hmuh in hiar ve ti thupawl tla in sim. ⁷ Curuangah, u le nau tla, kan harsatnak le vansannak hmuahhmuah ah nan zumnak ruangah nan cungcangthu ah hnangam zetin kan um. ⁸ Bawipa ih nan dinhngeh ruangah atu ah cun kan nung hlunhlo a si. ⁹ Curuangah nanmah hrangah Pathian hnenah ziang lungawithu so kan simsal thei ding? Kan Pathian hmaiah nanmah ruangah lungawinak phunzakip thawn kan lung a awi a si. ¹⁰ Nan hmel kan hmuh theinak dingah le nan zumnak lamih tlaksam mi kan lo silhkhah theinak dingah a sun a zan cawl loin thla kan cam. ¹¹ Atu ah kan Pathian le Pa rori le kan Bawipa Jesu Khrih in nan lam panin kan lamzin in hruai hram seh. ¹² Cun, nanmah lamih duhdawtnak kan neih vekin, pakhat le pakhat nan duhdawtawknak le mi hmuahhmuah nan duhdawtnak cu Bawipa in karhzaiterin luangliamter hram seh. ¹³ Cuti cun kan Bawipa Jesu Khrih, a mithianghlimpawl hmuahhmuah thawi a rat tikah kan Pathian le Pa hmaiah nan thinlung cu thianhlimnak ah sawihnawm ding um loin lo dinhnget hram seh.

¹ Cui hleiah, u le nau tla, nan umtudan ding le Pathian nan lungawiterdan ding kan hnen ihsin nan ngah zo vekin nei sinsin dingin Bawipa Jesu ah kan lo ngen ih, kan lo fawrh a si. ² Bawipa Jesu thawngin ziang thupekpawl kan lo pe ti cu nan thei. ³ Ziangahtile, Pathian duhzawng ih nan serh thianhlimawknak ding cu hihi a si: nu le pa sualnak hrial uh. ⁴ Nan lakih mi tinin amai taksa cu thianhlimnak le zahumnak ah ziangtin a nei thei ding ti thei seh. ⁵ Pathian theilotu Zentelpawl bangin cakhiar zekzeknak ah um hlah uh. ⁶ Cuti cun mi zohman in a unau parah thil tisual hlah seh la a hnen ihsin thil zianghman bumnak in la hlah seh. Ziangahtile, ralrinnak kan lo pek le kan lo theihter zo bangin, Bawipa cu cuvek titupawl hmuahhmuah phuleisamtu a si. ⁷ Ziangahtile, Pathian in bawrhhlawh dingin si loin, thianghlim dingin in ko sawn a si. ⁸ Curuangah himi ziang siarlotu cu milai ziangsiarlo a si lo ih, a Thlarau Thianghlim in petu Pathian ziangsiarlo a si sawn. ⁹ Asinan unau duhdawtnak thu ah cun nan hnenih ka ngan nan ṭul lo. Ziangahtile, pakhat le pakhat duhdawawtawn dingin nanmah rori kha Pathian in a lo zirh. ¹⁰ Masidonia peng ih um mi unaupawl hmuahhmuah hnenah cucu nan tuah taktak ko nan, u le nau tla, nasa sinsinih tuah dingin kan lo ngen a si. ¹¹ Cun, thu kan lo pek zo bangin daiteih nun zuam uh la, nanmai hnaṭuan cio ṭuan in le nanmai kut roriin hna ṭuan uh. ¹² Cuti cun leng lam mipawl hmuh ah mawi zetin nan nung thei ding ih, cutin tlaksam mi zianghman nan nei lo ding. ¹³ Sikhalsehla, u le nau tla, midang ruahsannak neilopawl vekih nan riah a siatlonak dingah a itthat mipawl thuhla thei lo ih nan um ka duh lo. ¹⁴ Ziangahtile, Jesu cu a thi ih a thosal ti kan zum asile Jesu ih a itthat mipawl cu Pathian in amai rual in a run hruai hai leh ding a si. ¹⁵ Cuiruangah Bawipai thu in hihi nan hnenah kan lo sim a si. Kannih Bawipai rat tiang nungih a tangtupawl in a itthatpawl cu kan khelh hrimhrim lo ding. ¹⁶ Ziangahtile, Bawipa amah rori cu authawm thawn, vancungmi lubikih aw thawn le Pathian tawtawrawt aw thawn van ihsin a rung ṭum ding. Cule, Khrih ih mithipawl cu an tho hmaisa ding. ¹⁷ Cui hnuah, kannih nung ih a rak umtupawl cu boruak ah Bawipa tawng dingah anmahpawl thawn hmunkhat ah mero lakah laksoh in kan um ding. Cuti cun Bawipai hnenah a kumkhua in kan um ding. ¹⁸ Curuangah hi thupawl tla hin pakhat le pakhat hnemawtawn uh.

¹ Sikhalsehla, u le nau tla, a tikcu le a can thu ah cun ka lo ngansak nan ṭul lo. ² Ziangahtile, Bawipai ni cu zan ih rukru a rat vekin a ra ding ti famkim zetin nanmah roriin nan thei. ³ Ziangahtile, mi in, “Daihnak le himnak,” tiih an ti lai takah, nunau fahrin nat tuar vekin hmakhatteah siatralnak an parah a thleng ding ih, an tlansuak thei hrimhrim lo ding. ⁴ Asinan, u le nau tla, nannih cu cui ni in rukru bangin a lo kaihngahnak dingah thim ah nan um lo. ⁵ Nan zaten tleu fate le sunvang fate nan si; zan fate kan si lo ih, thim fate khal kan si lo. ⁶ Curuangah midangpawl vekin itthat hlah uhsi, ralring in le harhvang in um sawn uhsi. ⁷ Ziangahtile, a itthatpawl cu zan ah an itthat ṭheu ih, zuripawl khal zan ah an ri ṭheu. ⁸ Asinan kannih sun ih ta a si mipawl hi cun zumnak le duhdawtnak cu awmphaw ah hmang in, cun rundam si theihfengnak cu lukhum ah hmang in harhvang in um uhsi. ⁹ Ziangahtile, Pathian in thinhengnak tuar dingah si loin, kan Bawipa Jesu Khrih zarah rundamnak co dingah in ruat sawn a si. ¹⁰ Kan men ah simaw, kan ihthah ah simaw, amah thawi kan nuntlang theinak dingah anih cu kan hrangah a thi. ¹¹ Curuangah nan tuah rero zo bangin, pakhat le pakhat hnemaw uh la, pakhat le pakhat tuahṭhaaw uh. ¹² Cule, u le nau tla, nan lakih bang zetih hna a ṭuantu le Bawipa ah nan hotupawl le nun a lo zirhtupawl kha ṭihzah dingah ka lo ngen a si. ¹³ Cun an hnaṭuannak ruangah duhdawtnak ah nasazetin anmah cu ngaisang dingin ka lo ngen a si. Cule, nanmah lakah remawtein um uh. ¹⁴ Atu ah u le nau tla, mizangzelpawl cu ralrinnak pe uh la, thanaupawl kha tha pe uh, a ṭawnṭai mipawl cu sawmdawl uh la, mi hmuahhmuah hnenah nan thinsau uh tiah kan lo fawrh a si. ¹⁵ Zohman in sual cu sual in zo hnen hmanah va thungrul loin, nanmai lakah le mi hmuahhmuah hnenih tuah dingih a ṭha mi kha va dawi ringring sawn uh. ¹⁶ Lungawi ringring uh. ¹⁷ Catbang loin thla cam uh. ¹⁸ Ziangkimah lungawithu sim uh; ziangahtile, cucu Khrih Jesu ah nanmai hrangah Pathian duhzawng a si. ¹⁹ Thlarau mitter hlah uh. ²⁰ Profet vekih thuphuannak cu ziangsiarlo in um hlah uh. ²¹ Thil ziangkim hniksak uh la, a ṭha mi cu fekten kai uh. ²² Thil ṭha lo vekih lang mi hmuahhmuah cu hrial uh. ²³ Cun, hnangamdaihnak Pathian rori cun famkimten lo thianghlimter in, nan thlarau, nan thinlung le nan taksa pumhlum cu kan Bawipa Jesu Khrih a rat tikah sawihnawm ding um loin humhim in um hram seh. ²⁴ Cumi cu a lo kotu a rinum vekin, a tuah khal a tuah ding. ²⁵ U le nau tla kan hrangah thla cam uh. ²⁶ Unau zaten a thianghlim mi hnamawknak thawn cibai i buksak uh. ²⁷ Hi cakuat hi unau mithianghlimpawl hmuahhmuah hnenah siar dingin Bawipai hmin in ka lo ngen a si. ²⁸ Kan Bawipa Jesu Khrih-ih zangfahnak cu nan hnenah um hram seh. Amen.