1 PITER

1 PITER

¹ Jesu Khrih-ih apostol, kei Peter in, Ponṭas, Galatia, Kappadosia, Asia le Bithinia peng pawl ih a ṭekvai mi, mikhual vekih a rak um mipawl hnenah ca ka ngan a si. ² Pa Pathian-ih theih cianak bangtukih hril mi nan si ih, Jesu Khrih thisen theh cotu dingah le thulung dingah Thlarau ih tithianghlim nan si. Nan parah zangfahnak um seh la, nan hnangamdaihnak cu karh seh. ³ Pathian le kan Bawipa Jesu Khrih-ih Pa cu thangṭhat in um seh. Mithi lak ihsin Jesu Khrih a thawhsalnak zarah ruahsannak nung nei dingin a nasazet mi a zahngainak in in hringsal ih, ⁴ a ṭawihral thei lo mi, a bawrhhlawh lo mi le a cuai thei lo mi ro nan co ding mi cu van ah ret cia in a um. ⁵ Zumnak ruangih rundamnak, can netaah langter dingih timtuah cia mi cu co dingin Pathian huham ih kilven nan si. ⁶ Cu mi ah cun nasazetin nan hlim. Atu ah a ṭul a si ah cun harsatnak phunzakip ruangah can reilote sung cu riahsia in nan um hrih a si men thei. Cuticing khalin nasazetin nan hlim thotho. ⁷ Meisa ih hniksak zo mi sui hman a siatral ding. Asinan nan zumnak cu cui sui hnakin a man a khung sawn. Curuangah Khrih a runglang tikah nan zumnak hniksaknak cun thangṭhatnak, upatnak le sunlawihnak a thlen ding. ⁸ Khrih cu nan hmu dah lo nan, nan duhdaw. Atu ah amah cu hmu dah lo hman uh la nan zum thotho ih, kaa ih rel theih lo hlimnak thawn nan hlim ih, cumi cu a sunglawi zet mi a si. ⁹ Nan zumnak ih a hmuitin mi, nan thlarau rundamnak nan co ruangah nan hlim a si. ¹⁰ Cui rundamnak cu profetpawl in ngunngaih zetin an rak hliakhlai ih, an rak hawl. Nan hnenih a thleng ding mi zangfahnak cu an rak phuang cia. ¹¹ Cui profetpawl hnenih um, Khrih Thlarau cun Khrih ih a tuar ding mipawl le cu mi hnuih sunlawih a si ding thu cu a theihter cia. Profetpawl cun cumi cu ziang a si ti theihsuah tum in le ziang tikah a thleng ding ti an hawl. ¹² Profetpawlih an rak phuan mi thu kha anmai hrangah si loin kanmai hrangah rawng an bawl sawn a si ti cu Pathian in profetpawl hnenah a rak phuanglang. Khrih thu profetpawlih an phuan mi cu Pathian in van ihsin a run thlah mi, Thlarau Thianghlim thawi nan hnenih thuthangṭha simtupawlih an sim mi thu kha a si. Vancungmipawl khalin cui thilpawl cu bih an hiar zet ve. ¹³ Curuangah hnaṭuan dingin nan puantaiveng ih nan um vekin nan ruahnaklungthin cu fimkhur uh. Jesu Khrih a runglang tikih nan hnenih a run ken ding mi zangfahnak parah cun nan ruahsannak zaten ṭhum uh. ¹⁴ Nan rak theih lo laiih nan hlanlai cakhiarnak bangtukih um loin, zawnlung mi fale vekin um uh. ¹⁵ A lo kotu a thianhlim bangin, nannih khal nan nuntu khawsakdan hmuahhmuah ah thianghlim uh. ¹⁶ Ziangahtile, “Kei ka thianhlim ruangah nannih khal thianghlim ve uh,” tiih ngan a si. ¹⁷ Cun, thleidan nei loin mi tin an tuah mi vekih thu a ṭhentu, Pa hnenih thla nan cam asile, hi leitlun ih nan um sung hmuah amah ṭihzahtein nan can liamter uh. ¹⁸ Nan pupapawl hnen ihsi thurosiah hmang ih nan ngah mi ṭhathnemnak nei lo nan nundan lak ihsin thil siatthei mi, sui le ngun ih tlen nan si lo ih, ¹⁹ sawihnawm ding um lo le bawrhhlawh kai lo tuufano thisen vek a si mi, a sunglawi mi Khrih thisen thawi tlen nan rak si sawn ti nan thei. ²⁰ Thungaiin Pathian in leilung hram a bun hlanah acui Khrih cu a rak ruat cia nan, tui can neta lamah nanmai hlawknak ding hrangah a langter a si. ²¹ Nan zumnak le ruahsannak cu Pathian ih a ṭhumawk theinak dingah, Khrih cu mithi lak ihsin Pathian in a kaitho ih, ropitnak a pe. Amah zarah Pathian zumtu nan si. ²² Thlarau zarah thutak nan thlunnak hmang in nan thinlung cu nan thiangfaiter zo ih, unau duhdawtnak taktak nan nei. Curuangah thinlung thiangten pakhat le pakhat nasazetin duhdawaw uh. ²³ A siat thei mi ci hmang in si loin, kumkhuaih a nung mi le a hmun mi, a siat thei lo mi, Pathian thu hmang in hrinsal mi nan si sawn. ²⁴ Ziangahtile, “Taksa hmuahhmuah hi hrampi vek an si ih, an ropitnak hmuahhmuah khal hrampi par vek men a si. Hrampi cu an vuai ih, a par cu a ṭil. ²⁵ Sikhalsehla, BAWIPAI thu cu kumkhua in a hmun.” Nan hnenih phuan mi thuthangṭha cu cui thu cu a si.

¹ Curuangah, midang parih lungput siava hmuahhmuah, bumawknak hmuahhmuah, titerawknak, iksiknak le midang relsiatnak hmuahhmuah tla cu bansan in, ² naute suakpek vekin zianghman rawi lo hnawiti thiang, Pathian thu cu hal uh, cu mi ah cun nan ṭhanglian thei ding. ³ Bawipa cu zangfahnak ih khat a si ti nan teh zo ruangah cucu hal uh. ⁴ A nung mi lungto hnenih feh vekin a hnenah nan thleng zo. Amah cu milaipawl in an rak hnawng nan Pathian in a hril, a man a khung zet. ⁵ Jesu Khrih zarah Pathian cohlan tlak thlarau lam raithawinakpawl hlan dingin, nanmah rori khal cu a nung mi lungtopawl bangin thlarau lam inn, amai puithiam thianghlim si dingin amah Pathian in a lo sak rero a si. ⁶ Curuangah Cathianghlim sung khalah, “Ngai hnik uh, Zion ah cun ka hril mi, a mankhung zet mi, a kilih lung pawimawhbik cu ka ret, amah zumtu cu an mualpho hrimhrim lo ding,” ti mi a um a si. ⁷ Curuangah nannih a zumtu hrangah cun anih cu a sunglawi. Sikhalsehla, a zumlotupawl hrangah cun, “Inn saktupawl ih an hnawl mi lung cu a kilih lung pawimawhbikah a cang.” ⁸ Cun, “Amah cu bahnak lung le tluknak lungpi cu a si.” Thu an lun lo ruangah thu ah cun an tlu ih, cu mi ding hrangih ruat mi khal an rak si. ⁹ Sikhalsehla, thim sung ihsin amai tleu mak zet sungih a lo kotui tlinzia cu nan phuansuah theinak dingah nannih cu hril mi miphun, siangpahrang hrin puithiam, miphun thianghlim le amai mihleice nan si. ¹⁰ Hlanah cun Pathian-ih minung nan rak si lo, asinan atu ah cun Pathian-ih minung nan si. Hlanah cun zahngainak nan rak co lo nan, atu ah cun zahngainak nan co zo. ¹¹ Ka duhdawt mi tla, mikhual le khual tlawng lai mi nan si ruangah, thlarau a do ṭheutu tisa cakhiarnakpawl ihsin thiarfihlimaw dingin ka lo ngen hai a si. ¹² Zentelpawl lakih nan nundan cu mawi zetin si seh. Atu ah thil ṭha lo tuah hmang vekin an lo rel, sikhalsehla, thil ṭha nan tuah mipawl an hmuh mi ruangah thuṭhen dingin Pathian a rat ni ah amah cu an thangṭhat leh ding. ¹³ Curuangah, milai tuah mi dan hmuahhmuah ah Bawipai ruangah tuhlutaw uh. Siangpahrang dan cu thuneitu sangbik a si khalle tuhlutaw uh. ¹⁴ Thil ṭha lo tuahtupawl hrem ding le thil ṭha tuahtupawl lawm dingin siangpahrang ih a thlah mi ram uktupawl hnen khalah tuhlutaw uh. ¹⁵ Thil ṭha nan tuah tikah miaapawl in thei lo ih thu diklo an ṭawng mi dai ko in nan tuah thei ding, cucu nan tuah dingah Pathian duh mi a si. ¹⁶ Mizalenpawl vekin um uh la, asinan, nan zalennak cu sual khuhnak ah hmang loin, Pathian siahhlawh vekin um sawn uh. ¹⁷ Mi hmuahhmuah upat uh la, unaupawl cu duhdawt uh. Pathian ṭihzah uh la, siangpahrang cu upat uh. ¹⁸ Salpawl, ṭihzah zetnak thawn nan bawipawl hnenah tuhlutaw uh. Miṭha le minunnem mi hnen lawngah si loin, mihrohrangpawl hnen khalah tuhlutaw uh. ¹⁹ Ziangahtile, mi pakhat in Pathian a theih ruangah a tuar lo ding mi tuar in thinnatnak a tuar ṭenṭo asile cucu Pathian lungawizawng a si. ²⁰ Nan tisualnak ruangah kutthlak nan tawn tikah, tuar ṭenṭo hman uh la ziang lawmnak a um? Asinan thil ṭha nan tuah ih, cu mi ruangih nan tuar tikah, nan tuar ṭenṭo asile cucu Pathian lungawizawng a si. ²¹ Ziangahtile, Khrih khalin kan hrangih a tuar ruangah cuvek ti dingih kawh nan si. A keneh tla nan thlun theinak dingah zohṭhim ding in tanta, ²² “Anih cun sual a tuah lo ih, a kaa khalah hrawkhrawlnak hmuh a si lo.” ²³ Mi in an zawkzet tikah, a rak zawkzet ve lo, a tuar lai khalah a rak hro ve lo. Dik zetih thuṭhentui hnenah amah le amah a peaw sawn. ²⁴ Cutin kannih sual lamih a rak thi zo mi in, dingfelnak lamih kan nun theinak dingah anih cun amai taksa roriin thing parah kan sualpawl cu a phur. An vuaknak hriamhma in a lo tidam zo. ²⁵ Ziangahtile, nannih cu tuu bangin zinpeng nan rak zawh. Sikhalsehla, atu ah cun nan nunnak Kilvengtu le Tuukhaltu hnenah nan rak kirsal zo.

¹ Cutivekin, nannih nupipawl, pasal hrekkhatpawl tla cu Pathian thu lung lo khal hai sehla, thusimnak si loin nupilepawlih nundan in neh an si theinak dingah nanmai pasal hnenah tuhlutaw cio uh. ² Ṭihzah zet teih nan nundan thianghlim an hmuh tikah neh an si ding. ³ Nan ceiawknak cu leng lam ceiawkdan, samphiar simaw, sui thawi thuamawk simaw, hnipuan ṭha hruh simaw si loin, ⁴ nunnemnak le thinlung tangdawrnak hnipuan siat thei lo cun sung lam minung cu thuam sawn uh. Cucu Pathian mithmuh ah a hlu zet mi a si. ⁵ Ziangahtile, cuvekin hlanlaiih nunau thianghlim, Pathian rinsantupawl khal kha anmai pasal hnen cio ah tuhlutaw in an rak ceiaw. ⁶ Annihpawl khal kha Sarah bangin an tuhlutaw. Sarah in Abraham-ih thu a ngai ih, bawipa tiah a ko. Thil ṭha nan tuah i, ṭih ruangah si loin nan pasal nan upat asile Sarah-ih fate nan si ding. ⁷ Cuvek thothoin, nannih pasalletla, nan thlacamnakpawl tla kham ih a umlonak dingah theihthiamnak thawn nan nupipawl thawn cengtlang uh la, bel kuai awl sawn le zangfahnak nunnak ro lo copitu an si bangin upat uh. ⁸ Netabikah, nan zaten ruahnaklungthin hmunkhat in um uh. Pakhat le pakhat lainat aw uh la, unau vekin duhdaw aw uh. Thinlung nem nei uh la, nelum zetin um uh. ⁹ Thil ṭha lo cu thil ṭha loin thungrul hlah uh la, hmuhsuamnak cu hmuhsuamnak in thungrul fawn hlah uh la, mal rak sawm sawn uh. Ziangahtile, malsawmnak ro co dingin Pathian in a lo ko a si ti nan thei. ¹⁰ Ziangahtile, “Nunnak a duhdawtu le ni ṭha tla hmuh a duhtu cun, thil ṭha lo ihsin a lei kilveng seh la, a hmur khalin hrawhhrawlnak ṭawng lo dingin kilveng seh. ¹¹ Thil ṭha lo tlansanin thil ṭha tuah seh. Remnak hawl in, dawi seh. ¹² Ziangahtile, BAWIPAI mit cu midingfel parah a um ih, a hna in an thlacamnak a ngaithla ṭheu. Asinan, BAWIPAI mithmai cun thil ṭha lo tuahtupawl a dokalh.” ¹³ Cule, thil ṭha tuahtupawl cawngtu nan si ah cun zo in so a lo tina ding? ¹⁴ Asinan dingfelnak ruangah tuar ding nan sile mihualvanṭha nan si. “Ṭih an nunnak cu ṭih hlah uh la, a buai khal buai hlah uh.” ¹⁵ Cu hnakin, Bawipa Pathian cu nan thinlung in ṭihzah sawn uh. Cun, nan sungih a um mi ruahsannak nan neihnak san a lo suttu pohpoh hnenah nunnemnak le upatnak thawn sang dingin rak tiar uh. ¹⁶ Thil ṭha lo tuahtu si vekih an lo relsiat tikah sia le ṭha theihnak thiang nei in sang uh la, cuti cun Khrih ih nan umdan ṭha relsetupawl cu ningzak in an um ding. ¹⁷ Ziangahtile, Pathian remtizawng a si ah cun, thil sia tuah ruangih tuar hnakin thil ṭha tuah ruangih tuar cu a ṭhasawn. ¹⁸ Ziangahtile, Pathian hnenih in hruai theinak dingah Khrih khalin sualpawl hrangah veikhat mi hmuahhmuah hrangah a rak tuar zo. Midingfel cun midingfel lo hrangah a tuar ih, taksa ah cun thah a si ko nan, Thlarau in a tinung a si. ¹⁹ Thawnginn sungih thlaraupawl hnen khalah cui Thlarau hmang in a feh ih thu a phuang. ²⁰ Cui thlaraupawl cu hlanlai Noah san, lawng timlam a si lai, Pathian in thinsaunak thawi a hngah hai lai ih, thungailopawl kha an si. Cui lawng ah cun mi malte, mi pariat nunnak lawng ti hmang in rundam an si. ²¹ Cu mi in a hmuhsak mi baptisma cun Jesu Khrih thawhsalnak ruangah tui canah rundam in kan um. Cui baptisma cu taksa bawrhhlawh hlawnhlohnak men si loin, sia le ṭha theihnak thiang nei in, Pathian lamih tiamkamnak hi a si sawn. ²² Vancungmipawl, thuneihnakpawl le huhampawl cu Jesu in amai thuthu ih um dingin a tuah hnuah, van ah a feh ih, Pathian kut vawrh lamah a um.

¹ Khrih cun a taksa in kan hrangah a rak tuar ruangah nannih khal cuvek ruahnaklungthin thawn thuamaw uh. Ziangahtile, taksa ih a rak tuar zotu cun sual a bansan zo a si. ² Cuti cun a tang lai mi a taksa nunnak can cu milai cakhiarnak lamah nung nawn loin, Pathian duhzawng lamah a nung sawn thlang ding. ³ Ziangahtile, hi hlanih kan nunpi mi, Zentelpawlih duhzawng: tenumza hursual tuahnak, cakhiar zekzeknak, zu ritnak, zu hmun nawmcennak, zu intlangnak, tenumza milem nan biaknak pawl kha a liam zo. ⁴ Cu mi ah anmah thawn nawmcennak ih nan um nawn lo ruangah danglam an ti ih, an lo thangsiat a si. ⁵ Minung le mithi pawl thuṭhensak dingih a tiar tui hnenah an thuhla anmah roriin an thlen ding. ⁶ Cu mi ruangah, Pathian duhzawng in thlarau ih an nun theinak dingah atu ih a thi zo mipawl khal milai dan in taksa ah thuṭhen sikhal hai sehla, thuthangṭha cu an hnenah sim a rak si. ⁷ Sikhalsehla, thil hmuahhmuah cemnetnak cu a nai zo; curuangah fimvar uh la, cuti cun thla nan cam theinak dingah thununaw uh. ⁸ Cule, “Duhdawtnak in sual tampi a khuh ruangah,” thil dang hmuahhmuah hnakin pakhat le pakhat duhdawtawknak hi uar uh. ⁹ Phunzai loin pakhat le pakhat ṭha zetin mikhualawtawn uh. ¹⁰ Mi tinin thilpek nan co fingfing bangtukin, Pathian zangfahnak lamzin phunphun kilkhawitu ṭha vekin pakhat le pakhat rawngbawlsakaw uh. ¹¹ Jesu Khrih zarah Pathian cu ziangkimah thangṭhat ih a um theinak dingah mi pakhatkhat in thu a sim asile Pathian thu a sinak vek roriin sim seh la, mi pakhatkhat in rawng a bawl asile Pathian in titheinak a pek vekin bawl seh. Ropitnak le huham cu kumkhua in kumkhua tiang amai ta a si. Amen. ¹² Duhdawt mi tla, nanmah hniksaknak dingih meisa vek tuarnak ra thleng mi hi, thil danglam zet nan parih ra thleng vekin ruat hlah uh. ¹³ Sikhalsehla, a ropitnak a runglang tikah nasazetih nan lungawi sinsin theinak dingah, Khrih-ih tuarnakpawl tuarpitu nan si ruangah aipuang uh. ¹⁴ Ropitnak Thlarau le Pathian Thlarau cu nanmah ih a um ruangah Khrih hmin ruangih hmuhsuam nan tuar asile mihualvanṭha nan si. Annih lamah cun Khrih cu thangsiat a si ih, nannih lamah cun sunlawih a si. ¹⁵ Asinan nan lakih mi zokhal tualthattu a si ruangah simaw, fifir a si ruangah simaw, thil ṭha lo tuahtu a si ruangah simaw, midang thu ih hrawlhawk hmangtu a si ruangah simaw tuar hlah seh. ¹⁶ Sikhalsehla, mi pakhatkhat in Khristian a si ruangah a tuar asile a ningzak hlah seh la, cu hnakin, hi thu ruangah Pathian thangṭhat sawn seh. ¹⁷ Ziangahtile, thuṭhennak cu Pathian insang ihsin thawh a cu zo. Kanmah ihsin a thawh hmaisak asile Pathian thuthangṭha lunglotupawlih cemnetnak cu ziangvek a si pei? ¹⁸ Cule, “Midingfelpawl hman harsa zetih rundam an si ah cun Pathian ngaihsaklotupawl le misualpawl parah cun ziangvek tak thleng pei maw?” ¹⁹ Curuangah Pathian duhdan vekih a tuartupawl cun, thil ṭha tuah vivoin an nunnak cu Sersiamtu rinum hnenah ap hai seh.

¹ Nan lakih elder-pawl kha kei, nan elder-pi, Khrih-ih tuarnakpawl theihpitu le a runglang leh ding mi ropitnak co vetu ding mi hin tha ka lo pe hai a si. ² Nan lakih Pathian tuu rualpawl kha kawhhran hotu nan si bangin cawm uh. Ti ding a si ruang men lawngih ti si loin, duhnak hrimhrim sawnin, a diklo mi hlawknak duh menah si loin thatho zetin rian sawn uh. ³ Nan kilkhawi dingah Pathian in nan hnenih a lo pek mi parah lalawter loin tuu rualpawlih zohṭhim ding mi si sawn uh. ⁴ Cule tuukhaltu Lubik a runglang tikah a ziamral thei lo mi ropitnak lallukhum nan ngah ding. ⁵ Cuvek thothoin, nannih minopawl, kum upadeuhpawl hnenah tuhlutaw uh. A si, nan zaten pakhat le pakhat hnenah tuhlutawtawn uh la, tangdawrnak thawn thuamaw uh. Ziangahtile, “Pathian in mipuarthaupawl a do ih, tangdawrpawl hnenah zangfahnak a pe ṭheu.” ⁶ Curuangah, a tikcu teih a lo khaisan theinak dingah, Pathian kutcak hnuaiah tangdawr uh. ⁷ Anih in a lo ngaihsak ruangah nan mangbangnak hmuahhmuah cu amai parah ṭhum uh. ⁸ Nan doralpa Diabol cu a huk rero mi kiosa bangin a deh ding hawl ih a tawihvah rero ruangah fimvar uh la, ralring uh. ⁹ Leitlun hmun dangih a um mi nan unaupawl hnenah cutivek tuarnak cu a thleng ve ti thei in, amah cu do uh la, zumnak ah dinghnget uh. ¹⁰ Sikhalsehla, zangfahnak hmuahhmuah ih Pathian, a kumkhaw ropitnak co dingih Khrih Jesu ih a lo kotu khan reilote sung nan tuar hnuah a lo tuahṭha famkim ding ih, a lo tungding ding. A lo cakter ding ih, a lo hngetter ding. ¹¹ A hnenah ropitnak le huham cu kumkhua in kumkhua tiang um seh. Amen. ¹² Nan dinhngehnak Pathian zangfahnak a dik a si ti theihter ding le tha lo pe dingin nan hnenah tawite ca ka run ngan a si. Cucu kan unaupa mirinum a si ti ka theihfiang mi Silvinas-ih bawmnak in tawitein ka run ngan a si. ¹³ Nanmah thawi bangrepih hril mi, Babilon khua ih um nu in cibai a lo buk. Cuvek thothoin ka fapa Mark khalin cibai a lo buk hai. ¹⁴ Duhdawtaw tei hnamawknak in pakhat le pakhat cibai bukaw uh. Nannih Khrih Jesu ih um mipawl hmuahhmuah hnenah hnangamdaihnak um hram seh. Amen.