1 JOHAN

¹ Atir ihsin a rak um mi nunnak Thu cu nan hnenah kan phuang a si. Cumi cu kan hna ih kan rak theih zo mi, kan mit roriih kan rak hmuh zo mi, kan zohhliah zo mi le kanmai kut roriih kan rak tham zo mi a si. ² Cui nunnak cu phuanlang a si ih kan rak hmu zo. Cui thu cu kan theihter a si. Cui kumkhawnunnak cu nan hnenah kan phuang a si. Cui kumkhawnunnak cu Pai hnenah a rak um ih, cumi cu kan hnenah a phuanglang zo. ³ Nannih khal kanmah thawn pawlkawmawknak nan neih theinak dingah, kan rak hmuh zo mi le hna ih kan rak theih zo mi cu nan hnenah kan phuang a si. Kan pawlkawmawknak cu Pa le a Fapa Jesu Khrih thawn a si. ⁴ Nan lungawinak a famkim theinak dingah cui thilpawl tla nan hnenah kan ngan a si. ⁵ Fapa hnen ihsin hna ih kan rak theih mi thucah le nan hnenih kan phuan mi cu hihi a si: Pathian cu tleu a si ih, amah ah cun thim hrimhrim a um lo. ⁶ Amah thawn kan pawlkawmaw kan ti ih, thim ih kan feh thotho asile thuphan kan per ih, thutak kan nunpi lo. ⁷ Amah cu tleu sungih a um vekin tleu sungih kan feh asile, pakhat le pakhat kan pawlkawmaw a si. A Fapa, Jesu Khrih thisen in kan sualnak hmuahhmuah cu a khawlhfai. ⁸ Sual kan nei lo kan ti asile, kanmah le kanmah kan bumaw ih kan sungah thutak a um lo. ⁹ Kan sualpawl tla kan phuan asile, kan sualpawl in ngaidam ding le kan dingfellonak hmuahhmuah khawlhfai dingah anih cu a rinum in a dik a si. ¹⁰ Sual kan tuah lo kan ti asile Pathian cu thuphanper ah kan tuah ih, a thu cu kan sungah a um lo.

¹ Ka faletla, sual nan tuahlonak dingah hi thupawl tla hi nan hnenah ka ngan a si. Pakhatkhat in sual a tuah asile kan aiawh in Pa hnenih thu in simsaktu midingfel Jesu Khrih kan nei. ² Anih cu kan sualpawl hrangih tlawnlungawithawinak a si. Kanmai sualpawl hrang lawngah si loin, leitlun mipawl hmuahhmuah hrang khalah a si. ³ A thupekpawl tla kan thlun asile, cu mi in amah Jesu Khrih kan thei ti kan thei. ⁴ “Amah cu ka thei zo,” tiah a titu in a thupekpawl tla a thlun cuang lo asile, cu pa cu thuphanper a si ih, a sungah thutak a um lo. ⁵ Sikhalsehla, zokhal Pathian thu a thlun asile, Pathian duhdawtnak cu amah ah a famkim taktak a si. Cuti zawngin amah ah kan um ti kan thei. ⁶ Amah ah ka um a si, a titu cun Jesui nundan vekin a nung tengteng ding a si. ⁷ U le nau tla, nan hnenah thupek thar ka ngan lo. Atir ihsi nan rak neih mi thupek hlun kha a si sawn. Cui thupek hlun cu atirte ihsin hna ih nan rak theih zo mi thu kha a si. ⁸ Nan hnenah thupek thar ka ngansal. Cumi cu amah ah le nanmah ah a dik a si. Ziangahtile, thim cu a cemral rero ih, tleu diktak cu a ra vang zo. ⁹ Tleu ah ka um a ti ih, a unaupa a huatu cu atu tiangin thim ah a um lai hrih. ¹⁰ A unaupa a duhdawtu cu tleu ah a um ih, amah ah tluknak zianghman a um lo. ¹¹ Asinan, a unaupa a huatu cu thim ah a um ih, thim sungah a feh. Thim in a mit tla a cawtter zo ruangah khui tawkah ka feh ti a thei lo. ¹² Falenuh, amai hmin ruangah Pathian in nan sualpawl tla a lo ngaithiam zo. Curuangah nan hnenah ca ka ngan a si. ¹³ Palenuh, atir ihsin a um mi pa cu nan rak theih zo ruangah, nan hnenah ca ka ngan a si. Minopawl, miṭhalopa cu nan rak neh zo ruangah nan hnenah ca ka ngan a si. Falenuh, Pa cu nan rak theih zo ruangah nan hnenah ca ka ngan a si. ¹⁴ Falenuh, atir ihsin a um mi pa cu nan rak theih zo ruangah nan hnenah ca ka rak ngan zo. Minopawl, nannih cu nan cak. Pathian thu cu nanmah ah a um ringring. Miṭhalopa cu nan rak neh zo ruangah nan hnenah ca ka rak ngan zo. ¹⁵ Hi leilung si seh, leilung tlun thilpawl si seh duhdaw hlah uh. Leilung a duhdawtu cu amah ah Pai duhdawtnak a um lo. ¹⁶ Ziangahtile, hi leilung ih um mi thil hmuahhmuah pawl: tisa cakhiarnak, mit cakhiarnak le hngalnak nunpawl tla hi Pai hnen ihsin an ra lo. Leilung ihsin a ra mi an si. ¹⁷ Hi leilung le a cakhiarnakpawl tla cu an cemral rero. Asinan, Pathian duhnak a tuahtu cu kumkhua in a hmun ringring ding a si. ¹⁸ Falenuh, atu hi can netabik a si. Khrih dodaltu a ra ding tiin hna ih nan rak theih zo vekin atu hmanah Khrih dodaltupawl tampi an rak suak zo. Curuangah atu hi can netabik a si ti kan thei. ¹⁹ Kan hnen ihsin an fehsuak, asinan annih cu kanmai mi an si lo. Ziangah cutin ka ti tile, kanmai mi rak si hai sehla cu kanmai hnenah an rak tang ding. An rak fehsuak zo ruangah an zaten kanmai mi an si lo ti cu a fiang. ²⁰ Mi Thianghlim Pa in hriak a lo thih zo ih, thil ziangkim nan thei. ²¹ Thutak nan theih lo ruangah nan hnenah ca ka rak ngan a si lo. Asinan thutak nan thei ih thutak sung ihsin thuphan a suah lo ruangah nan hnenah ca ka rak ngannak a si sawn. ²² Thuphanpertu cu zo a si? Jesu cu Khrih a si ti hnawngtu cu thuphanpertu a si. Pa le Fapa hnawngtu cu Khrih dodaltu a si. ²³ Zokhal Fapa hnawngtu cun Pa a nei lo. Asinan zokhal Fapa a ṭantu cun Pa khal a nei a si. ²⁴ Atir ihsin hna ih nan rak theih zo mi kha nanmah ah um ringring seh. Atir ihsin hna ih nan rak theih zo mi nanmah ih a um ringring asile nannih cu Fapa ah le Pa ah nan um ringring ding. ²⁵ Hihi Pathian in kan hnenih thu in rak tiamkam mi a si. Kan hnenah kumkhawnunnak in rak tiamkam. ²⁶ Hi thilpawl, nanmah a lo bumtupawlih thuhla tla cu nan hnenah ka rak ngan a si. ²⁷ Pathian in hriak a rak lo thih tikah, cui hriak thihnak cu nanmah ah a um ringring a si. Midang ih zirh nan ṭul lo. Hriak a rak lo thih tikah, cui hriak thihnak cun thil ziangkim a lo zirh a si. Cucu thudik a si, thuphan a si lo. Cu mi hriak thihnak ih a rak lo zirhdan vekin amah ah nan um ringring ding. ²⁸ Falenuh, atu ah Fapa ah cun um ringring uh. Amah a ra lang tikah a hmaiih kan ral a ṭhatnak ding le kan ning a zahlonak dingah amah ah um ringring uh. ²⁹ Anih cu midingfel a si ti nan theih asile dingfelnak a tuahtu zokhal Pathian-ih hrin a si ti nan thei.

¹ Ngai hnik, Pa in kan hnenih in rak pek mi duhdawtnak maksak hi, Pathian faletla tiin amah in in kawh theinak dingah cui duhdawtnak cu kan hnenah in pe zo a si. Curuangah, hi leitlun mipawl in amah cu an rak theih lo ruangah, annih in kanmah in thei lo. ² Ka duhdawt mi tla, atu ah kannih cu Pathian fate kan si ih ziangvek kan si lai ding ti hmuh kan si hrih lo. Asinan Fapa a ra lang tikah cun amah kan bang leh ding ti kan thei. Ziangruangah tile amah cu a sinak vekin kan hmu leh ding. ³ Mi zokhal amah ah cui ruahsannak neitu cun Khrih a thian vekin amah le amah a thianfaiaw ṭheu. ⁴ Mi zokhal sual a tuahtu cun Pathian dan khal a pahbal a si. Ziangahtile, Pathian dan pahbal cu sual a si. ⁵ Kan sualpawl lahlo dingah, Pathian in a Fapa a phuanglang zo ti nan thei. Amah ah sual zianghman a um hrimhrim lo. ⁶ Mi zokhal Khrih ih a um ringringtu cun sual a tuah lo. Mi zokhal sual tuah peh vivotu cun Khrih cu a rak hmu dah lo ih a theih khal a thei lo. ⁷ Falenuh, zohman in lo bum hlah hai seh. Dingfelnak a tuahtu cu Khrih a dingfel vekin a dingfel a si. ⁸ Sual a tuahtu cu atir ihsin sual a rak tuahtu Diabol hnen ihsin a si. Pathian Fapa a runglangnak san cu Diabol-ih hnaṭuan ṭhiatbal dingah a si. ⁹ Pathian-ih ci cu amah ah a um ringring ruangah, zokhal Pathian hrin mi cun sual a tuah peh vivo lo. Pathian hrin a si ruangah sual a tuah peh vivo thei lo. ¹⁰ Pathian fatepawl le Diabol fatepawl an langfiangnak cu himi ah hin a si. Zokhal dingfelnak a tuahlotu cu Pathian hnen ihsin a si lo ih, a unaupa a duhdawlotu khal Pathian hnen ihsin a si lo. ¹¹ Atir ihsin nan rak theih mi thucah cu, pakhat le pakhat duhdawtaw ding kan si, ti hi a si. ¹² Kain vek si ding kan si lo. Anih cu miṭhalopa hnen ihsin a si ih, a naupa a that. Ziangah a naupa a that? Ziangahtile, a thiltuah mipawl cu an ṭha lo ih a naupa-ih thiltuah mipawl cu an dingfel. ¹³ Ka u le ka nau tla, leilung tlun mipawl in an lo huat tikah nan mangbang hlah uh. ¹⁴ Kannih cu unaupawl kan duhdawt ruangah thihnak ihsin nunnak ah kan rak lan zo ti kan thei. A unaupa a duhdawtlotu cu thihnak ah a tang hrih lai tinak a si. ¹⁵ Zokhal a unaupa a huatu cu tualthat a si. Tualthat zokhal amah ah kumkhawnunnak a um lo ti nan thei. ¹⁶ Jesu Khrih in kan hrangah a nunnak a pe, cu mi ah Pathian duhdawtnak hi ziang a si ti kan thei. Kannih khal unaupawl hrangah kan nunnak tla pe ve ding kan si. ¹⁷ Zokhal hi leitlun thil le ri nei in, a unaupa tlasam in a hmu ih, cu pai parah lainatnak a neih lo asile, ziangtin Pathian duhdawtnak cu amah ah a um ringring thei ding? ¹⁸ Falenuh, thu lawngin le kaa lawngin duhdawaw hlah uhsi. Tuahnak in le thungaingaiin kan duhdawaw sawn pei. ¹⁹ Cutiin, thutak ih ta kan si ti kan thei ding ih, cu mi in Pathian hmaiah kan thinlung ṭihphang loten a umter ding. ²⁰ Kan thinlung in thiamlo in coh tinten, Pathian cu kan thinlung hnakin a tumsawn a si. Anih cun thil ziangkim a thei. ²¹ Duhdawt miletla, kan thinlung in thiamlo in coh lo asile Pathian hmaiah ralṭhatnak kan nei. ²² Kan dil mi ziangkhal, a hnen ihsin kan ngah. Ziangahtile, a thupekpawl kan thlun ih, a lungawitertu thilpawl tla kan tuah ringring. ²³ A thupek cu hihi a si: a Fapa Jesu Khrih hmin kan zum ding le kan hnenih thu in pek vekih pakhat le pakhat kan duhdawtawk ding hi a si. ²⁴ Pathian-ih thupekpawl a thluntu cu Pathian ah a um ringring ih, Pathian khal amah ah a um ringring. Kan hnenih in rak pek mi Thlarau zarin anih cu kanmah ah a um ringring a si ti kan thei.

¹ Duhdawt mi tla, thlarau kip hi zum hlah uh. Pathian hnen ihsin an si le si lo thei dingah thlaraupawl tla cu zawihliah hmaisata uh. Ziangahtile, profet deu tampi hi leitlun ah an ra suak zo. ² Pathian Thlarau nan theih theidan cu hihi a si: Jesu Khrih cu milai taksa in a ra ti a phuangtu thlarau kip cu Pathian hnen ihsin a si. ³ Jesu Khrih cu milai taksa in a ra ti a phuanglotu thlarau kip cu Pathian hnen ihsin a si lo. Cucu Khrih dodaltui thlarau a si. Khrih dodaltu a ra ding tin nan rak thei zo. Atu ah cui thlarau cu leitlun ah a um zo a si. ⁴ Falenuh, nannih cu Pathian hnen ihsin nan si. Nan sungih umtu cu leilung ih umtu hnakin a ropit sawn ruangah annihpawl cu nan rak neh zo. ⁵ Annih cu leilung ihsin an si. Curuangah, annih cun leilung thil thuhla an rel. Leitlun mipawl in an thu an ngaithla. ⁶ Kannih cu Pathian hnen ihsin kan si. Pathian a theitu cun in ngaithla ih, Pathian hnen ihsin a si lo mi cun in ngaithla lo. Cu mi in thutak phuangtu thlarau le mi bumtu thlarau cu kan thei thei. ⁷ Duhdawt mi tla, duhdawtnak cu Pathian hnen ihsin a si ruangah pakhat le pakhat kan duhdawaw ding a si. Zokhal mi a duhdawtu cu Pathian hrin a si ih, Pathian a thei. ⁸ Mi a duhdawlotu cun Pathian a thei lo. Ziangahtile, Pathian cu duhdawtnak a si. ⁹ Pathian in in duhdawtzia a rak langterdan cu hitin a si. A Fapa zarin kan nun theinak ding hrangah Pathian in a Fapa neihsun cu hi leitlun ah a thlah. ¹⁰ Duhdawtnak cu hihi a si. Pathian kan rak duhdawt si loin, Pathian in in rak duhdaw ih a Fapa cu kan sualpawl hrangih tlawnlungawithawinak a si theinak dingah Pathian in a Fapa a thlah ti a si sawn. ¹¹ Duhdawt mitla, cutivekin Pathian in in rak duhdawt ruangah, pakhat le pakhat duhdawaw ve ding kan si. ¹² Zohman in ziangtik khalah Pathian an rak hmu dah lo. Pakhat le pakhat kan duhdawtawk asile Pathian cu kanmah ah a um ringring ih a duhdawtnak cu kanmah ah a rak famkimter zo. ¹³ Pathian in kan hnenah a Thlarau in rak pek zo ruangah, cu mi in kannih cu Pathian ah kan um ti le kanmah ah Pathian a um ti kan thei. ¹⁴ Pa in Fapa cu leitlun Rundamtu si dingah a rak thlah ti mi cu kan rak hmu ih, cumi cu kan theihter a si. ¹⁵ Zokhal Jesu cu Pathian Fapa a si ti phuangtu cu amah ah Pathian a um ih, amah khal Pathian ah a um. ¹⁶ Pathian in kan hrangih a neih mi duhdawtnak cu kan rak thei zo ih cumi cu kan rak zum zo. Pathian cu duhdawtnak a si. Mi zokhal cui duhdawtnak ih a um ringringtu cu Pathian ah a um ih, Pathian khal amah ah a um. ¹⁷ Cuti cun Pathian in thu a ṭhen ni ih ralṭhatnak kan neih theinak dingah Pathian in a duhdawtnak cu kan lakah a rak famkimter zo. Ziangahtile, kannih cu amai nundan vekin hi leilung tlunah kan nung a si. ¹⁸ Duhdawtnak ah ṭihnak a um lo. Duhdawtnak famkim cun ṭihnak a dawihlo. Ṭihnak cu hremnak thawn an fehtlang. Ṭihnak a neitu cu duhdawtnak in a famkimter hrih lo. ¹⁹ Amah in in rak duhdawt hmaisak ruangah amah cu kan duhdaw a si. ²⁰ Mi pakhat in, “Pathian ka duhdaw,” ti siin a unaupa a huat asile amah cu thuphanper a si. Ziangahtile, a hmuh mi a unaupa hman a duhdaw lo asile, a hmuh dah lo mi Pathian cu ziangtin a duhdaw thei ding? ²¹ Amah hnen ihsin kan neih mi thupek cu hihi a si: Pathian a duhdawtu cun a unaupa khal duhdaw seh.

¹ Jesu cu Khrih a si ti zumtu zokhal Pathian-ih hrin mi a si. Hringtupa a duhdawtu cun Pai hrin mi pohpoh khal a duhdaw ringring ding a si. ² Pathian kan duhdawt ih a thupekpawl tla kan thlun. Cu mi in, Pathian fatepawl tla kan duhdaw a si ti kan thei. ³ Hihi Pathian kan duhdawtnak cu a si, a thupekpawl tla kan thlun. A thupekpawl tla cu phurrit an si lo. ⁴ Ziangahtile, Pathian hrin mi pohpoh cun leilung a neh. Leilung a nehtu kan nehnak cu kan zumnak hi a si. ⁵ Leilung nehtu cu zo a si, Jesu cu Pathian Fapa a si ti zumtu a si lo maw? ⁶ Anih cu ti le thisen ihsi a ra mi Jesu Khrih a si. Anih cu ti ihsi lawngin a ra lo ih, ti le thisen ihsin a ra a si. Thlarau cu thutak a si ruangah, theihtertu cu Thlarau a si. ⁷ Van ah thutheitu pathum an um. Cupawl tla cu: Pa, Thu le Thlarau Thianghlim an si. Cui Pathumpawl cu pakhat an si. ⁸ Leitlun ah thutheitu pathum an um. Cupawl tla cu: Thlarau, ti le thisen an si. Cui pathumpawl cu pakhat ah an lungrual. ⁹ Milai thutheihternak hman kan cohlang a si ah cun Pathian thutheihternak cu a ropisawn a si. Ziangahtile, Pathian-ih thutheihternak cu a Fapa thu a theihter mi hi a si. ¹⁰ Fapa a zumtu cun amah ah theihternak a nei. A zumlotu cun Pathian in a Fapa thuhla a rak theihter mi a zum lo ruangah Pathian cu thuphanper ah a tuah. ¹¹ Theihternak thu cu hihi a si. Pathian in kan hnenah kumkhawnunnak in rak pe zo. Cui nunnak cu a Fapa ah a um. ¹² Fapa a neitu cun nunnak a nei. Pathian Fapa a neilotu cun nunnak a nei lo. ¹³ Kumkhawnunnak kan nei ti nan theihnak dingah le Pathian Fapa hmin nan zum theinak dingah Pathian Fapa hmin a zumtu nan hnenah hi thilpawl tla ka ngan a si. ¹⁴ Amah ih kan neih mi ralṭhatnak cu hihi a si. Amai duhnak thawn milaw ih ziangkhal kan dil asile anih in in ngaithla a si. ¹⁵ Ziangkhal a hnenih kan dil mi cu in ngaithla a si ti kan thei. Cu mi kan theih asile a hnenih kan dil mi cu kan ngah ding a si ti kan thei. ¹⁶ Mi pakhatkhat in thihnak ih mi hruaitu si lo sual a unaupa in a tuah rero lai a hmuh asile a hrangah thla camsak seh. Cule Pathian in thihnak ih mi hruaitu sual si lo a tuahtui hnenah cun nunnak a pe ding. Thihnak ih mi hruaitu sual a um. Cu mi hrangah thla camsak seh ka ti lo. ¹⁷ Dingfellonak hmuahhmuah hi sual a si. Thihnak ih mi hruaitu si lo sual a um. ¹⁸ Zokhal Pathian hrin mi cun sual a tuah peh vivo lo ti kan thei. Pathian hrin mi cun amah le amah a kilhimaw. Miṭhalopa in amah cu a tham thei lo. ¹⁹ Kannih cu Pathian hnen ihsin kan si ti le leitlun pumpi hi misualralpai kut sungah a um ti kan thei. ²⁰ Pathian Fapa cu a ra ih a dik mi pa kan theih theinak dingah, anih in theihthiamnak in rak pe zo ti kan thei. Kannih cu a dik mi pa ah kan um. Cu pa cu a Fapa Jesu Khrih a si. Anih cu Pathian dik le kumkhawnunnak a si. ²¹ Falenuh, milempawl ihsin kilhimaw uh. Amen.