1 KORIN

1 KORIN

¹ Jesu Khrih-ih apostol si dingah Pathian duhzawng ih kawh mi keimah Paul le kan unaupa Sosthenes in, ² Korinth khua ih um Pathian kawhhran, Khrih Jesu ih tithianhlim mi, anmah le kanmah ih Bawipa Jesu Khrih hmin hmun kip ih a kotu hmuahhmuah, mithianghlim si dingih a kawh mipawl hnenah, ³ kan Pa Pathian hnen le kan Bawipa Jesu Khrih hnen ihsin zangfahnak le hnangamdaihnak cu nan hnenah um hram seh. ⁴ Khrih Jesu ah nan hnenih Pathian zangfahnak pek mi ruangah nan hrangah Pathian hnenah lungawithu ka sim ringring. ⁵ Ziangahtile, nannih cu ziangtinkimah nan ṭawng mi hmuahhmuah ah le nan theihnak hmuahhmuah ah Pathian in a lo lianter a si. ⁶ Cumi cu Khrih thu theihpinak nanmah ih hngehterih a um vek khan a si. ⁷ Cutin kan Bawipa Jesu Khrih runglang ding hngakhlap zetih nan hngah laiah hin thilpek pakhatte hman nan tlasam lo. ⁸ Anih cun kan Bawipa Jesu Khrih-ih ni ah sawihnawm ding um lo nan si theinak dingah a cemnet tiang a lo hngetter ding. ⁹ A Fapa, Jesu Khrih kan Bawipa thawi pawlkawmawknak sungih a lo kotu Pathian cu a rinum a si. ¹⁰ U le nau tla, nan zaten nan ṭawng mi bangrep in, nan lakah ṭhenawknak um loin le thinlung bangrep le thutitluknak bangrep in nan pehzawmawk famkim thluh theinak dingah kan Bawipa Jesu Khrih hmin in ka lo ngen a si. ¹¹ Ziangahtile, u le nau tla, nan lakah tawhawknak a um ti kha cu Khaloi tei insungsang ih mi hrekkhatpawl in in sim. ¹² Hihi ka lo sim a si, “Mi kipin, ‘Kei cu Paul-ih pawl ka si;’ ‘Kei cu Apollos-ih pawl ka si;’ ‘Kei cu Kefas-ih pawl ka si;’ ‘Kei cu Khrih-ih pawl ka si,’ ” tiah nan ti. ¹³ Khrih cu ṭhen in a um maw si? Paul cu nan hrangah khenbet a si maw? Asilole nannih cu Paul-ih hmin in baptisma nan co maw si? ¹⁴ Nan lakah Khrispas le Kaias siarlo zohman baptisma ka lo pek lo ruangah Pathian hnenah ka lung a awi. ¹⁵ Curuangah zohman in Paul in amai hmin in baptisma a pe tiah an ti thei lo. ¹⁶ Stefanas tei insungsang khal baptisma ka rak pe hai. Cu lo midang baptisma ka pek mi ka thei lo. ¹⁷ Ziangahtile, Khrih in kei cu baptisma pe dingah i thlah lo ih, thuthangṭha phuang dingah i thlah sawn a si. Asinan minung fimnak ṭawngkam thawn a si lo. Cuti a si lo ah cun Khrih-ih khraws cu zianghmanlo ih canter a si pang ding. ¹⁸ Ziangahtile, khraws thu sim cu a hloral rero mipawl hrangah cun atthlak a si. Asinan kannih rundam mipawl hrangah cun cumi cu Pathian huham a si. ¹⁹ Ziangahtile, Cathianghlim in, “Mifimpawlih fimnak cu ka siatbal ding ih thutheithiampawlih theihthiamnak cu ka hnawng ding,” tiah a ti. ²⁰ Khui tawkah mifim cu a um? Danthiam cu khuiah a um? Tui san mieltu cu khuiah so? Hi leitlun fimnak cu Pathian in atnak ah a canter a si lo maw? ²¹ Ziangahtile, Pathian fimnak ah leitlun mipawl in anmai fimnak in Pathian an rak theih lo hnuah thusim atthlak hmang ih a zumtupawl rundam cu Pathian lungawizawng a si. ²² Jew-pawl cun hminsinnak an ngen ih, Grikpawl cun fimnak an hawl. ²³ Asinan kannih cun Khrih khenbeh thu kan sim a si. Cucu Jew-pawl hrangah tluknak a si ih, Grikmipawl hrangah cun atthlak a si. ²⁴ Asinan kawh mi Jew-pawl le Grikmipawl hrangih kan phuan mi cu Khrih a si, cui kan phuan mi cu Pathian huham le Pathian fimnak a si. ²⁵ Ziangahtile, Pathian-ih atnak cu minung fimnak hnakin a fimsawn. Cule Pathian-ih cahlonak cu minung cahnak hnakin a caksawn. ²⁶ U le nau tla, Pathian in a lo kawh laiah khan ziangvek mi nan si ti kha cing ringring uh. Milai tahnak ih tahah cun mifim, thiltithei le micungnung hrin khal nan tam lo. ²⁷ Asinan mifimpawl ningzakter dingah Pathian in leitlun ih thil aapawl a hril. Micakpawl ningzakter dingah Pathian in leitlun ih thil caklopawl a hril. ²⁸ Thil um mipawl zianghmanlo ih an can theinak dingah leitlun ih thil pawimawh lopawl, nautat mi thilpawl le thil um lopawl cu Pathian in a hril a si. ²⁹ Curuangah Pathian hmaiah zohman an tluangkhawng thei lo. ³⁰ Amah Pathian ruangah nannih cu Khrih Jesu ah nan um. Khrih cu Pathian hnen ihsin kan hrangah fimnak, dingfelnak, thianhlimnak le tlensalnak ih tuah a si. ³¹ Curuangah Cathianghlim in, “A tluangkhawngtu cun BAWIPA ah tluangkhawngaw seh,” a ti mi vekih a si theinak dingah cutin a tuah a si.

¹ U le nau tla, nan hnenah Pathian thu theihter dingih ka rat tikah khan ṭawngkam thiam zet le fimnak thawn ka ra lo. ² Ziangahtile, nan lakah Jesu Khrih le khenbet ih a um thu siarlo a dang zianghman thei lo dingin thutitluknak ka nei. ³ Nan hnenih ka um laiah khan cak lo, ṭih le nasazetih khur in ka um. ⁴ Ka ṭawng mi le ka phuan mipawl tla hi mihip thei minung fimnak ṭawngkam thawn a si lo. Cu hnakin ka ṭawngkampawl cun Thlarau le huham an langter sawn a si. ⁵ Cuti cun nan zumnak cu minung fimnak ah ding loin, Pathian huham ih a din sawn theinak dingah a si. ⁶ Asinan mipitlingpawl lakah cun fimnak thu kan sim. Cui fimnak cu tui san fimnak a si lo ih a hloral ding mi tui san uktupawl hnen ihsi khalin a si lo. ⁷ Cu hnakin Pathian fimnak cu thuthup hmang in kan sim sawn a si. Cumi cu, leilung sem hlan ihsin kan ropitnak ding hrangih Pathian ih a ruat cia mi le a thuh mi fimnak a si. ⁸ Cumi cu tui san uktu pakhat hmanin an thei lo; rak thei hai sehla cu, ropitnak Lal cu an khengbet lo ding. ⁹ Asinan Cathianghlim in, “Pathian in amah duhdawtupawl hrangih a rak timtuah cia mi thilpawl cu zawi mit khalin a hmu dah lo ih, zawi hna khalin a thei dah lo. Zohman in a thinlung sungin a ruat dah lo,” a ti vek khan a si. ¹⁰ Asinan Pathian in kan hnenah cumi cu a Thlarau in a phuanglang zo. Ziangahtile, Thlarau cun thil hmuahhmuah a hawlsuak ih, Pathian-ih thil thukpawl khal a hawlsuak a si. ¹¹ Ziangahtile, minungih ruahnak cu zo in a thei? Amai sungih a um mi a thlarau lawngin amai ruahnak cu a thei a si. Cutivek thothoin Pathian Thlarau siarlo zohman in Pathian ruahnak an thei lo. ¹² Kan hnenah Pathian in alakih in pek mi thilpawl kan theih theinak dingah leitlun thlarau si loin Pathian hnen ihsin a ra mi Thlarau kan co zo a si. ¹³ Cule cui thilpawl kan sim tikah minungih in zirh mi fimnak ṭawngkampawl thawn kan sim lo. Thlarau Thianghlim ih in zirh mi ṭawngkam hmang in kan sim sawn a si. Thlarau lam thupawl tla cu thlarau lam thupawl hmang in kan khaikhin. ¹⁴ Khawvel mi cun Pathian Thlarau thilpawl a cohlang lo. Ziangahtile, cupawl cu a hrangah cun atthlak an si ih a theih khal a thei thei lo. Ziangahtile, cui thilpawl cu thlarau lawngin a thleidang thei a si. ¹⁵ Asinan thlarau mi cun thil ziangkim a ṭhenfel thiam. Asinan amah cu zohman in an ṭhenfel thiam lo. ¹⁶ Ziangahtile, “Amah zirh thei dingin zo in BAWIPAI thinlung a thei?” Asinan kannih cun Khrih-ih thinlung kan nei a si.

¹ U le nau tla, thlarau mipawl hnenih sim vekin nan hnenah thu ka sim thei lo. Nan hnenah cun tisa mi le Khrih ih nausenpawl hnenih sim vekin thu ka lo sim sawn a si. ² Rawl hak nan rak ei thei lo ruangah rawl hak si loin hnawi ka rak lo pe. Atu khalah rawl hak nan ei thei hrih cuang lo. ³ Ziangahtile, nannih cu tisa mi nan si hrih lai. Ziangahtile, iksiknak, doawknak le ṭhenawknak cu nan lakah a um. Cuti a si ruangah nannih cu tisa mi nan si lo maw? Khawvel mipawl vekin nan nung a si lo maw? ⁴ Ziangahtile, mi pakhat in, “Kei cu Paul-ih pawl ka si,” a ti ih, a dang pakhat in, “Kei cu Apollos-ih pawl ka si,” a ti. Cutiih nan ti tikah nannih cu tisa mi nan si lo maw? ⁵ Paul cu zo a si? Apollos cu zo a si? Kannih cu Bawipa in ṭuanvo in pek fingfingdan vekin nanmah zumnak ih a lo hruaitu rawngbawltu men lawng kan si. ⁶ Kei in ka phun ih, Apollos in ti a tawih. Asinan, a ṭhangtertu cu Pathian a si. ⁷ Curuangah a phuntu le ti tawihtu cu an thupi lo. A ṭhangtertu Pathian lawng hi a thupi a si. ⁸ A phuntu le ti tawihtu cu pumkhat an si. Cule mi kipin an hnaṭuan mi vekin lawmman an ngah fingfing ding. ⁹ Ziangahtile, kannih cu Pathian thawi hnaṭuantlangtu kan si. Nannih cu Pathian-ih lo nan si. Pathian-ih inn khal nan si. ¹⁰ Pathian in ka hnenih zangfahnak i pek vekin inn sak thiam mifim bangin kei in lungphum ka phum. Midang in cu mi parah an sak. Asinan mi kipin cu mi parah ziangtin an sak ti kha ralring hai seh. ¹¹ Ziangahtile, zohman in phum zo mi lungphum siarlo a dang lungphum a phum thei lo. Cui lungphum cu Jesu Khrih a si. ¹² Cui lungphum parah zokhal in sui in si maw, ngun in si maw, lung mankhung in si maw, zanthing in si maw, hrampi in si maw, fangkuang in si maw a sak asile, ¹³ Pathian in mi kip hnaṭuan cu fiangten a langter ding. Ziangahtile, cui ni in cucu a langter ding. Ziangahtile, cumi cu meisa in a phuanglang ding. Meisa in mi kip hnaṭuan cu ziangvek a si ti a hniksak ding. ¹⁴ Zokhal a hnaṭuan, cui lungphum parih a sak mi a tan asile lawmman a ngah ding. ¹⁵ Zokhal a hnaṭuan mi a kang asile a hloh ding. Asinan amah cu meisa sung ihsi luat vekin rundam a si ding. ¹⁶ Nannih cu Pathian temple nan si ih, nan sungah Pathian Thlarau a ceng ti nan thei lo maw? ¹⁷ Zokhal Pathian temple a siatsuahtu cu Pathian in a siatsuah ve ding. Ziangahtile, Pathian temple cu a thianghlim a si. Cui temple cu nanmah hi nan si. ¹⁸ Zokhal amah le amah bumaw hlah seh. Nan lakih mi pakhatkhat in tui sanah mifim ih a ruahawk asile mifim a si theinak dingah miaa ah cangta seh. ¹⁹ Ziangahtile, hi leitlun fimnak cu Pathian hmaiah cun atthlak a si. Ziangahtile, Cathianghlim in, “Pathian in mifimpawl cu anmai hrawkhrawlnak in a awk hai,” tiah a ti. ²⁰ Cuitlunah Cathianghlim in, “Mifimpawlih ruahnak tla cu zianghmanlomen an si ti BAWIPA in a thei,” tiah a ti. ²¹ Curuangah zokhal milai ah tluangkhawng hlah seh. Ziangahtile, thil hmuahhmuah hi nan ta a si. ²² Paul si seh, Apollos si seh, Kefas si seh, leitlun si seh, nunnak le thihnak si seh, tui um mi thilpawl le a ra lai ding mi thilpawl si seh, thil hmuahhmuah hi nan ta a si. ²³ Cule nannih cu Khrih ta nan si ih, Khrih cu Pathian ta a si.

¹ Curuangah kannih cu Khrih sal le Pathian thuthup kiltu ah mi in in ruat hai seh. ² Cuitlunah sumkiltu cu mirinum an si a ṭul. ³ Nanmah in si maw, milai thuṭhennak in si maw thu in ṭhen asile, cucu ka hrangah thil tenau zet a si. Thungaitein, keimah le keimah khal thu ka ṭhenaw lo. ⁴ Ziangahtile, keimah le keimah zianghman mawhthlukawknak ka nei lo. Asinan cumi cun thiam i coter cuang lo, thu i ṭhentu cu Bawipa a si. ⁵ Curuangah Bawipa a rat hlanlo, a tikcu a kim hlanah zianghman thuṭhen hlah uh. Anih cun thim lakih thuh mi thilpawl kha tleu sungah a lasuak ding ih, thinlung ih tumtah mipawl khal a langter ding. Cule mi kipin Pathian ih lawm an co ding. ⁶ U le nau tla, Cathianghlim sungih ngan mi nan lan lo ih kanmah ah nan zir theinak dingah cui thupawl tla cu nan ṭhatnak dingah keimah le Apollos ah ka ben a si. Cule nan lakah zohman in pakhat hril tahratin a dang pakhat dokalh in nan puarthaulonak dingah a si. ⁷ Ziangahtile, zo in midang hnakih danglamdeuh dingin a lo tuah? Na dawn lo mi thil na neih mi ziang a um? Na dawn asile dawng lo vekin ziangah saw na uarawk? ⁸ Atu ah nannih cun a hleifuan in nan nei ih nan lian. Kan tel loin siangpahrang vekin nan uk. Kannih khal nanmah thawn kan uk theinak dingah nannih hin uk ngaingai uhla ka duh. ⁹ Ziangahtile, thah dingih ruat cia mi vekin kannih apostolpawl hi Pathian in anetabikah in ret tiah ka ruat. Ziangahtile, kannih cu leilung tlun le vancungmipawl le milaipawl ih zohnuamih tuah mi kan si. ¹⁰ Kannih cu Khrih ruangah miaa kan si. Asinan nannih cu Khrih ah mifim nan si. Kannih cu kan cak lo, asinan nannih cu nan cak. Nannih cu upat nan si, asinan kannih cu nautat kan si. ¹¹ Atu can tiang rori hin rilrawng le tihal in kan um, hni le puan ṭet hnianghniten kan um, mi in an kuttum in in thawng, inn khal kan nei lo. ¹² Kan kut in hnaṭuan har zet ṭuan in kan um. In hmuhsuam tikah thlawsuah kan pe, in tiduhdah tikah kan tuar cuahco. ¹³ In thangsiat tikah ṭawngkam thlumte thawn kan sawn. Kannih cu leitlunih hnawmhne vekah le thil hmuahhmuah ih bawrhhlawh vekah tuisunni tiangin kan cang. ¹⁴ Hi thilpawl tla hi nan ningzahnak dingah ka ngan lo, ka duhdawt zet mi ka falepawl vekin ralrinnak ka lo pe sawn a si. ¹⁵ Ziangahtile, Khrih ah zirhtu mi thawnghra nei khal uhla, pa cu tampi nan nei lo. Ziangahtile, Khrih Jesu ah thuthangṭha hmang in ka lo hrin mi nan si. ¹⁶ Curuangah keimah i cawng dingin ka lo ngen a si. ¹⁷ Cu mi ruangah Timothy cu nan hnenah ka rak thlah. Amah cu Bawipa ah mirinum le ka duhdawt zet mi ka fapa a si. Amah in Khrih-ih ka nundanpawl cu a lo theihtersal ding. Cui ka nundan cu hmun kip ih kawhhran kip ka zirh vek khan a si. ¹⁸ Nan hnenah keimah ra lo dingah nan ruat ih mi hrekkhat cu nan puarthau. ¹⁹ Bawipa in rem a ti asile nan hnenah ka ra cing ding. Cule mipuarthaupawlih ṭawngkampawl tla si loin an huham cu ka thei ding. ²⁰ Ziangahtile, Pathian uknak cu ṭawngkam ah a um lo ih huham sawnah a um a si. ²¹ Ziang so nan duh? Nan hnenah funghreu thawn ka ra ding maw? Asilole duhdawtnak le tangdawrnak thinlung thawn so ka rat ding?

¹ Nan lakah nu le pa sualnak a um tiah hmun tampi ah mi in an rel. Cui nu le pa sualnak cu Zentelpawl lak hmanah a um dah lo. Mi pakhat in a pai nupi a laksak. ² Cule nanmah cu nan puarthau lai hrih. Cuvek a tuahtu cu nan lak ihsin lakhlo a si theinak dingah riahse ding sawn nan si. ³ Ziangahtile, thungaiten kei cu nan hnenah taksa in ka um lo nan thlarau in ka um. Nan hnenih um vekin cuvek a tuahtupa cu thu ka ṭhensak zo a si. ⁴ Kan Bawipa Jesu Khrih-ih humham le ka thlarau thawn hmunkhat ih nan um khawm tikah kan Bawipa Jesu hmin in, ⁵ cu pa cu Bawipa Jesui ni ah a thlarau rundam a si theinak dingah a taksa cu siatral dingin Setan hnenah pe uh. ⁶ Nan uarawk hi a ṭha hrimhrim lo. Thilnu malte in sang hlawm zaten a thoter thluh ti nan thei lo maw? ⁷ Curuangah nannih cu thilnu rawi lo mi nan si vekin sang hlawm thar nan si theinak dingah thilnu hlun kha thaihlo uh. Ziangahtile, kan lanta tuufano a si mi Khrih cu kan hrangih hlan a si zo. ⁸ Curuangah thilnu hlun, midang parih lungput siava le sualralnak thawn si loin thilnu rawi lo sang, diknak le taknak thawn puai cu tuah uhsi. ⁹ Nan hnenih ca ka lo kuat mi sungah nu le pa sualnak a tuahtupawl cu kawm hlah uh tiah ka rak ngan. ¹⁰ Cutiih ka ti tikah leitlun mi nu le pa sualnak a tuahtupawl, miduhhampawl, mibum hmangpawl le milem bepawl, kawm hlah uh ka tinak a si lo. Cuti sita sehla leitlun nan suahsan a ṭul ding. ¹¹ Asinan atu ah unaupa tiih nan kawh mi in nu le pa sualnak a tuah, a duhham, milem a bia, mi hmuhsuam a hmang, zu a ri, mi a bum asile kawm hlah uh. Amah thawn rawl khal eitlang hrimhrim hlah uh tiah ca ka rak lo kuat zo. ¹² Ziangahtile, a leng lam mipawl thuṭhen dingah kei in ziang tuah ding ka nei? Nannih cun kawhhran sung mipawl thu nan ṭhen ding a si lo maw? ¹³ Asinan a leng lam mipawl cu Pathian in thu a ṭhen hai a si. Curuangah cui miṭhalopa cu nan lak ihsin dawisuak uh.

¹ Nan lakih pakhat in midang thawn thuhla a neih asile mithianghlimpawl hnenah si loin midingfellopawl hnenah acui thu cu an rel dingah a thlen ngam ding maw? ² Mithianghlimpawl in leitlun mipawlih thu an ṭhen ding ti nan thei lo maw? Leitlun mipawl nanmah in thu nan ṭhensak asile thuhla fa tepawl tla cu thu nan ṭhen thei a si lo maw? ³ Vancungmipawl hman an thu kan ṭhen leh ding ti nan thei lo maw si? Cuti a si ruangah hi dam sung nun thilpawl tla cu ziang tlukin kan ṭhen sinsin ding. ⁴ Curuangah nannih in himi nun thuhla ah thuṭhen ding nan neih asile kawhhran sungih mitenau ih ruah mipawl kha thuṭhentu dingah ruat uh! ⁵ Nan ning a zahnak dingah cucu ka ṭawng a si. Nan lakah mifim pakhat tal an um lo maw si? Unau le unau lakih thubawtcat theitu pakhatte tal an um lo maw? ⁶ Unau in a unau kha acozah thuṭhennak ah a fehpi sawn riangri. Zumlotupawlih hmaiah a si sapbai. ⁷ Curuangah atu ah nan lakah thilsual pakhat a um. Ziangahtile, pakhat le pakhat acozah thuṭhennak ah nan feh. Ziangruangah mi in nan parih thil sual an tuah nan sian men lo? Ziangruangah nan thilri hloh cu nan tuar sawn men lo? ⁸ Cuti lamlam si loin, nannih cun thil sual nan tuah ih mi nan bum. Cumi cu nanmai unaupawl lala hnenah nan tuah a si. ⁹ Midingfellopawl in Pathian uknak an co lo ding ti nan thei lo maw si? Bum in um hlah uh, nu le pa sualnak a tuahtupawl, milem betupawl, uirepawl, mihurpawl, tawkahurpawl, ¹⁰ rukrupawl, miduhhampawl, zuripawl, ṭawng siakha hmangpawl le mibum hmangpawl cun Pathian uknak cu ro ah an co lo ding. ¹¹ Cun, nan lakih mi hrekkhat cu cuvek mi nan rak si dah. Asinan, nannih cu Bawipa Jesui hmin le kan Pathian Thlarau ih khawlh mi, thianhlimter mi le thiamcoter mi nan si. ¹² Thil ziangkim hi ka hrangah tuah a thiang, asinan thil ziangkim hi ka hrangah hlawknak an si thluh kher lo. Thil ziangkim hi ka hrangah tuah a thiang, asinan ziang thuneihnak hnuai hmanah ka um lo ding. ¹³ Rawl cu pumpi hrangah a si ih, pumpi cu rawl hrangah a si. Asinan Pathian in an pahnih in a siatralter ding. Taksaruangpum cu nu le pa sualnak hrangah a si lo, Bawipai hrangah a si sawn. Cule Bawipa cu taksaruangpum hrangah a si. ¹⁴ Pathian in Bawipa cu mithi lak ihsin a thoter ih, kannih khal a huham in in thoter leh ding. ¹⁵ Nan taksaruangpum tla cu Khrih-ih taksa pengpawl an si ti nan thei lo maw si? Khrih-ih taksa pengpawl tla cu la tahratin hlawhhlang taksa peng ah ka tuah ding maw? Tuah lamlam hlah! ¹⁶ Cuti asile, hlawhhlang thawi a pehzawmawtu cu amah thawn taksa pumkhat ah an cang ti nan thei lo maw? Ziangahtile, Pathian in, “An pahnih cu taksa pumkhat ah an cang ding,” tiah a ti. ¹⁷ Asinan Bawipa a pehzawmtu cu acui Bawipa thawn thlarau pakhat an si. ¹⁸ Nu le pa sualnak cu tlansan uh. Minung in a tuah mi a dang sualnak ziangkhal taksaruangpum lengah a si, asinan nu le pa sualnak a tuahtu cu amai taksaruangpum ah a sual a si. ¹⁹ Asile, nan taksaruangpum cu Pathian hnen ihsi nan neih mi nan sungih um Thlarau Thianghlim-ih temple a si ti le nanmah cu nanmai ta nan si lo ti nan thei lo maw? ²⁰ Ziangahtile, nannih cu man ih lei mi nan si. Curuangah Pathian-ih ta a si mi nan taksaruangpum le nan thlarau in Pathian cu sunlawih uh.

¹ Atu cu ka hnenih nan rak ngan mi thupawl thawn pehparawin ka ngan ding, mipa hrangah nunau dai lo cu a ṭha a si. ² Sikhalsehla nu le pa sualnak hrial dingah mipa kipin nupi bul nei cio hai seh la, nunau kipin pasal bul nei cio hai seh. ³ Pasal in a nupi hnenah a co ding awm duatnak pe seh. Cutivek thothoin nupi khalin a pasal hnenah tuah ve seh. ⁴ Nupi in amai taksaruangpum parah thuneihnak a nei lo ih a pasal in a nei sawn. Cutivek thothoin pasal khalin amai taksaruangpum parah thuneihnak a nei lo ih, a nupi in a nei sawn. ⁵ Can tawite sung rawlulhnak le thlacamnak ih nan pekawk theinak dingah tiih lungkimtlangnak nan neih ti dah lo ah cun khat le khat nupa ihtlangnak kha elaw hlah uh. Setan in sual a lo fawrhlonak dingah hmunkhat ah umtlangsal uh. Cu lo asile, supawk theinak nan tlaksam ruangah Setan in sual a lo fawrh pang ding. ⁶ Pathian in i sen ruangah hihi ka sim a si. Pathian-ih thupek cu a si lo. ⁷ Mipa hmuahhmuah hi keimah vekin um hai sehla ka duh. Asinan mi kipin anmai thilpek fingfing Pathian hnen ihsin an nei. Mi pakhat in thilpek pakhat a nei ih, midang in thilpek dang a nei ve. ⁸ Curuangah nupi pasal nei lopawl le nuhmeipawl hnenah keimah vekih an um asile a ṭha tiah ka sim. ⁹ Asinan an cakhiarnak an supawk thei lo a si ah cun nupi pasal nei lawlaw hai seh. Ziangahtile, nupi pasal neih cu cakhiarnak nasazet thawi an um rero hnakin a ṭhasawn. ¹⁰ Nupi pasal a neiciatupawl hnenah keimai thupek si loin Bawipai thupek ka lo pe hai, nupi in a pasal ṭhen hlah seh. ¹¹ A ṭhen asile pasal nei loin um lan seh. Asilole a pasal thawn remawsal hai seh. Cun pasal khalin a nupi ṭhen hlah seh. ¹² A dangpawl hnenah Bawipai sim mi si loin keimah in ka sim, unau zokhal in zumlotu nupi a rak nei ih cu nu in amah thawi umtlang a lungkim asile cu nu cu ṭhen hlah seh. ¹³ Cule zumlotu pasal a neitu nunau kha a pasal in amah thawi umtlang a lungkim asile tan hlah seh. ¹⁴ Ziangahtile, zumlotu pasal cu a nupi ruangah thianhlimter a si. Cun, zumlotu nupi khal a pasal ruangah thianhlimter a si. Cuti rak si lo sehla, nan fatepawl cu an bawrhhlawh ding. Asinan annih cu atu ah an thianghlim. ¹⁵ Asinan zumlotu in a ṭhen asile ṭhen ko seh. Cu mi thu ah cun, unaupa asilole unaunu cu ṭemṭawn a si lo. Asinan Pathian in kannih cu remawtei nung dingah in ko a si. ¹⁶ Ziangahtile, maw nupi, na pasal na rundam ding le ding lo na thei maw si? Asilole, maw pasal, na nupi na rundam ding le ding lo ziangtin na thei? ¹⁷ Sikhalsehla, Pathian in mi kip hnenih a zem vekin le Bawipa in mi kip a kawh hai vekin um hai seh. Cumi cu kawhhran hmuahhmuah hnenih thu ka pek mi a si. ¹⁸ Serhtan a co mi, Pathian ih kawh mi an um maw? An um asile serhtan lo mi ah cang hlah seh. Serhtan lo mi, Pathian ih kawh mi an um maw? An um asile serhtan hlah seh. ¹⁹ Serhtan si seh, tan lo si seh, zianghman a si lo. Pathian thupek thlun lawng hi a thupi mi a si. ²⁰ Mi kipin Pathian in a kawh laiih a sinak vek khan um ko hai seh. ²¹ Pathian in a lo kawh laiah nang cu sal na si maw? Cu mi in na khawruah lo harter hlah seh. Asinan luatter theih na si le cumi cu hmang sawn aw. ²² Ziangahtile, sal a si laiah Pathian in Bawipa ah a kawh mi cu Bawipai miluat a si. Cutivek thothoin miluat a si laiah Pathian in Bawipa ah a kawh mi cu Khrih-ih sal a si. ²³ Nannih cu man ih lei mi nan si. Milai sal ah cang hlah uh. ²⁴ U le nau tla, mi kipin Pathian in a lo kawh laiih nan sinak ah khan Pathian thawn umtlang ringring uh. ²⁵ Nupi pasal nei hrih lo pawlih thuhla ah cun Pathian hnen ihsin thupek ka nei lo. Asinan rinsan tlak mi si dingah Bawipai hnen ihsin zahngainak ka rak co ruangah ka ruahnak ka pe a si. ²⁶ Tulai harsatnak ruangah mipa cu a si kel vek khan um ko sehla a ṭha tiah ka ruat. ²⁷ Nupi ah ṭemṭawn na si maw? Phawihnak hawl hlah. Nupi ihsin mizalen na si maw? Nupi hawl hlah. ²⁸ Asinan nupi na neih asile thil na tisual lo. Fala him pakhat in pasal a neih asile thil sual a tuah lo. Asinan nupi le pasal a neitupawl cun himi nun ah harsatnak an tawng ding. Asinan, kei cun cu mi ihsin lo luatter ka duh. ²⁹ Asinan, u le nau tla, hihi ka sim a si, can a tawi zo a si. Atu thawkin nupi neipawl in nei lo vekin nung hai seh. ³⁰ A ṭap mipawl in ṭap lo vekin; aipuang mipawl in aipuang lo vekin; cule thil leitupawl khalin zianghman nei lo vekin um hai seh. ³¹ Hi leitlun thil a hmangtupawl khalin hmang tam tuk lawmmam lo vekin um hai seh. Ziangahtile, hi leitlun milai umtudan hi a hloral rero a si. ³² Nannih cu dawnharnak ihsin luat uh la ka lo duhsak. Nupi neilotu cun ziangtin Bawipai lung ka awiter ding tiin Bawipai thilpawl a ngaihtuah. ³³ Asinan nupi neitu cun ziangtin ka nupi lung ka awiter ding tiin leitlun thilpawl a ngaihtuah. ³⁴ Nupi le fala him lak khalah danglamnak a um. Pasal nei lo nunau cun a taksaruangpum le a thlarau a thianhlim theinak dingah Bawipai thilpawl a ngaihtuah. Asinan pasal nei nunau cun a pasal a lungawiter theinak dingah leitlun thilpawl a ngaihtuah. ³⁵ Himi hi nanmai hlawknak ding hrangah ka sim a si. Nan hmaiih thangkam ka tum a si lo. Mawi zetin nan nun ih, zianghmanin lo hnaihnawk lo ih, Bawipa lawng nan ren theinak dingah hihi ka sim a si. ³⁶ Asinan mipa zokhal a fala himte parah mawi loin ka um tiah amah le amah a ruahawk ih, a pasal neih kum khal a luan cuahco ih, cu nu in pasal neih a ṭul a si ah cun cu pa cun a duh vekin tuah ko seh. Thil sual a tuah lo. Neiaw hai seh. ³⁷ Sikhalsehla mipa in a thinlung in hngetkhoh zetin a ding, ṭulnak a nei lo, asinan amai duhnak tlunah thuneihnak a nei thei ih, cule a thinlung in cui fala him cu ṭhi lo dingih a ruahcat asile a tiṭha a si. ³⁸ Curuangah nupi ṭhitu cun a tiṭha a si. Asinan nupi ṭhilotu in a tiṭha sinsin. ³⁹ Nupi cu a pasal a nun sung hmuah cu Dan in a pasal ah a ṭemṭawn. Asinan a pasal a thih asile Bawipa ih um mi rori a duh mi zokhal nei dingah a zalen a si. ⁴⁰ Sikhalsehla, kei ka ruahdan ah cun midangih nupi si lotei a um asile a lungawi sawn ding. Cule kei khalin Pathian Thlarau nei ah ka ruataw ve a si.

¹ Cule milempawl hnenih an hlan mi thilpawl thuhla ah cun kan zaten theihnak kan nei ti kan thei. Theihnak cun mi a tluangkhawngawter. Asinan duhdawtnak cun mi a tuahṭha. ² Cun, mi pakhatkhat in thil ziang simaw thei ih a ruahawk asile a theih ding vekin a thei hrih lo. ³ Asinan Pathian a duhdawtu cu Pathian in a thei. ⁴ Milempawl hnenih hlan mi thilpawl ei thuhla ah cun leitlun ah milem cu zianghman a si lo ti le Pathian amah pakhat siarlo a dang Pathian a um lo ti kan thei. ⁵ Van ah si seh, lei ah si seh pathian tiih an kawh mipawl tampi an um ih, cule ‘pathian’ tampi, ‘bawi’ tampi an um. ⁶ Asinan, kannih hrangah cun Pathian pakhat, Pa lawng a um. Thil hmuahhmuah hi amai hnen ihsin an si ih, kannih cu amai hrangah kan um. Kan hrangah Bawi pakhat Jesu Khrih a um ih, thil hmuahhmuah hi amah ruangih um le kannih khal amah thawngih nung kan si. ⁷ Cuti sikhalsehla mi kipin cui theihnak cu an nei lo. Mi hrekkhatpawl cun atu tiangin milem hmaiih an thawi mi rawl an ei tikah milem hnenih hlan mi a si ti ruat in an ei. Cumi cun an sia le ṭha theihnak cu a cak lo ruangah an sia le ṭha theihnak cu a bawrhhlawhter. ⁸ Asinan rawl cun Pathian hnenah dinhmun ṭha ah in ret cuang lo. Ziangahtile, kan ei khal asile ṭhatdeuhnak kan nei cuang lo ih, kan ei lo a si khalle kan siatphah cuang lo. ⁹ Sikhalsehla, himi nan zalennak hin a cak lo mipawl a tlukterlonak dingah va fimkhur uh. ¹⁰ Ziangahtile, nang cun theihnak na nei ih, milem biaknak inn ah rawl ei dingih na to kha a sia le ṭha theihnak a cak lo mi pa in a lo hmu a si ah cun milem hmaiih hlan mi thilpawl cu ei dingah a ral a ṭhater lo ding maw? ¹¹ Na theihnak ruangah a hrangih Khrih a thi mi a cak lo mi unaupa kha a hloral ding maw? ¹² Nannih in unaupawl parah cutivekih thil nan tisual ih a cak lo mi a sia le ṭha theihnak nan tuahmawh tikah Khrih parah thil nan tisual a si. ¹³ Curuangah, rawl in ka unau a tlukter ding a si ah cun ka unau ka tlukterlonak dingah ziangtik hmanah sa ka ei nawn lo ding.

¹ Keimah, Paul cu apostol ka si lo maw? Mizalen ka si lo maw? Kan Bawipa Jesu Khrih cu ka hmu zo a si lo maw? Cule nannih cu Bawipa ih ka ṭuan suah mi nan si lo maw? ² Midangpawl in apostol ih in ruah lo a si khalle nan hnenah cun rinhlelh ding um loin apostol ka si hrimhrim. Ziangahtile, nanmah hi Bawipa ah apostol ka sinak tacik cu nan si. ³ I zawihliahtupawl hnenih ka humawknak cu hitin a si, ⁴ kannihpawl tla hi in le ei theinak kan nei lo maw si? ⁵ Apostol dangpawl, Bawipai naulepawl le Kefas bangin zumtu nupi hruai theinak kan nei ve lo maw si? ⁶ Asilole pumcawmnak hrangah hnaṭuan lo dingin kei le Barnabas lawng hi thuneihnak nei lo kan si cuangce maw si? ⁷ Zo saw mahte tumaw ih, ralkap a ṭuan? Zo saw sabit hmuan a tuah ih a rah ei lo um? Zo saw tuukhal tahratih tuu hnawi in lo ih um? ⁸ Cui thu tla cu milai vekin ka sim maw? Dan khalin cuvekin a sim a si lo maw? ⁹ Ziangahtile, Mawsi Dan sungah, “Cawcang in fang a cil rero laiah a hmur ṭawn hlah,” tiih ngan a si. Pathian in cawcangpawl lawng maw a ngaihsak? ¹⁰ Asilole Pathian in cumi cu kanmai hlawknak ding hrangah a sim a si lo maw? Rinhlelh ding um loin cui thu cu kan hlawknak dingih ngan a si. Lei lettu cun fang ah ding ruahsannak a nei ih, ruahsannak thawi fang a ciltu in a cil mi fang ei ding a ruahsan a si lo maw? ¹¹ Nan hnenah thlarau lam thilpawl kan tuh zo asile nan hnen ihsin leitlun thilpawl tla seng khal nungla, cucu thil pipa a si maw? ¹² Midangpawl in nan parah nan neih mi thil co theinak an neih a si ah cun kannih hi nei sinsin ding kan si lo maw? Sikhalsehla, cui thuneihnak cu kan hmang ve lo. Cu hnakin Khrih thuthangṭha kan dawnkhamlonak dingah thil ziangkim hi kan tuar ṭenṭo sawn a si. ¹³ Temple sungih thil thianghlimpawl lakih rawngbawltupawl cun cui thil thianghlimpawl cu an ei ih, biakṭheng ih rawngbawltupawl cun biakṭheng thilpawl an co ve ti nan thei lo maw? ¹⁴ Cutivek thothoin thuthangṭha simtupawl cu thuthangṭha ihsin pum cawmaw dingin Bawipa in thu a rak pe zo. ¹⁵ Asinan, hi thilpawl hi kei cun pakhat hman ka hmang lo. Ka parah cuvekih nan tuah dingah hi thupawl tla hi ka ngan lo. Ziangahtile, Bawipa ih ka tluangkhawnnak hi mi pakhatkhat in zianghmanlo ih an canter hnak cun thih hi ka hrangah a ṭhasawn. ¹⁶ Ziangahtile, thuthangṭha hi phuang hman ningla tluangkhawn ding zianghman ka nei lo. Ziangahtile, phuang loin ka um thei lo. Thuthangṭha hi ka phuang lo a si ah cun ka hmakhua a pit ding! ¹⁷ Curuangah cui rawngbawl hna cu keimai duhhrilnak in ka ṭuan asile lawmman ka ngah ding. Ka duhhrilnak si lo ih ka ṭuan asile ṭuanvo hleice Pathian in i kilter tinak a si. ¹⁸ Cuti asile ka lawmman cu ziang a si? Ka lawmman cu hihi a si, thuthangṭha ka phuan tikah Khrih thuthangṭha cu hlawh la loin ka phuang. Cutivekih thuthangṭha ka phuan tikah ka thuneihnak cu thuthangṭha ah ka hmang thluh lo tinak a si. ¹⁹ Ziangahtile, kei cu mi hmuahhmuah hnen ihsin miluat si khal ningla mi a tam thei patawpih ka ngah theinak dingah mi hmuahhmuah ih sal ah keimah le keimah ka tuahaw. ²⁰ Jew-pawl ka ngah theinak dingah Jew-pawl hnenah cun Jew vekin ka um. Dan hnuaiih umpawl ka ngah theinak dingah Dan hnuaiih um mipawl hnenah cun Dan hnuaiih um vekin ka um. ²¹ Dan neilopawl ka ngah theinak dingah Dan neilopawl hnenah cun Dan nei lo mi vekin ka um. Pathian hmaiah Dan nei lo cu ka si lo, asinan kei cu Khrih dan hnuaiih um mi ka si. ²² Micaklopawl ka ngah theinak dingah micaklopawl hnenah cun micaklo vekin ka um. Ziangmawtital ih mi hrekkhat ka run theinak dingah mi hmuahhmuah hnenah thil ziangkimah ka cang. ²³ Nanmah thawn thuthangṭha ah covo neitu ka si theinak dingah thuthangṭha ruangah hipawl hi ka tuah a si. ²⁴ Tlan zuamawknak ih mi an tlan tikah an zaten an tlan. Asinan mi pakhat lawngin nehman laksawng a ngah ti nan thei lo maw? Curuangah nehman laksawng ngah dingin tlan uh. ²⁵ Zuamawknak ih mi a zuamtu cun thil ziangkimah a supaw. A siat thei mi nehman lukhum ngah dingah cutin an tuah. Asinan kannih cun a siat thei lo mi nehman lukhum ngah dingah cutin kan tuah ve a si. ²⁶ Curuangah mi pakhat hmuitin mi nei lo ih a tlan vek menin ka tlan lo. Cun, mi pakhat thli a thawng rerotu vek menin ka thawng lo. ²⁷ Midang hnenih thu ka phuan hnuah Pathian in tling lo i tilonak dingah ka taksaruangpum cu nasazetin ka thunun ih ka thuhnuai ah ka ret.

¹ U le nau tla, kan pupapawlih thuhla thei lo ih nan um ka duh lo. An zaten mero hnuaiah an um ih, tifinriat an tansuak. ² Mawsi hnenah an zaten mero sungah le tifinriat sungah baptisma an co. ³ An zaten thlarau rawl bangrep an ei. ⁴ Cule an zaten thlarau ti bangrep an in. Ziangahtile, anmah a rak thluntu thlarau lam Lungpi ihta cu an in. Cui Lungpi cu Khrih a si. ⁵ Asinan mi tamsawn in Pathian lung an awiter hrimhrim lo. Ziangahtile, Pathian in an ruakpawl tla cu ramṭhing ah a ṭhekdarh ṭheh. ⁶ Annih in thil ṭha lopawl nasazetih an cak vekih kan cak ve lonak dingah cui thil cang mi thuhlapawl tla cu kan hrangah kan zohṭhim ding mi an si. ⁷ Anmah lakih mi hrekkhat in milem an biak vekin be ve hlah uh. Cathianghlim in, “Cui minungpawl cu ei le in dingah an to ih nuamcen dingah an ding,” tiah a ti. ⁸ Cule an lakih mi hrekkhatpawl in nu le pa sualnak an rak tuah vekin kannih cun tuah hlah uhsi. Cule ni khat ah anmah lakih mi thawngkul hluanthum cu an tlu ih an thi. ⁹ An lakih mi hrekkhatpawl in Khrih an hniksak vekin hniksak ve hlah uhsi. Pathian in anmah cu rul tur neipawl a cuk thatter. ¹⁰ Cule anmah lakih mi hrekkhat an phunzai vekin phunzai hlah uhsi. Anmahpawl cu siatsuahtu in a siatsuah thluh hai. ¹¹ Kan zohṭhim dingah cui thil hmuahhmuah cu an parah a thleng a si. San cemnakih a rak man mi kanmahpawl ralrin peknak ah hi thu hmuahhmuah tla hi ngan an si. ¹² Curuangah dingih a ruatawtu cu ralring seh, cu lo asile a tlu pang ding. ¹³ Mi zo cio par khalih a thleng mi siarlo nan parah sualfawrhnak a thleng lo. Asinan Pathian cu a rinum. Anih cun nan tuar thei lo ding mi sualfawrhnak nan hnenih thlenter a siang lo ding. Cui sualfawrhnak nan tuar theinak dingah tlansuahnak lamzin a lo tuahsak ding. ¹⁴ Curuangah ka duhdawt mi tla, milem biaknak ihsin tlan uh. ¹⁵ Mifimpawl hnenih thusim vekin ka lo sim a si. Ka lo sim mi thu hi nanmah hrangah thuṭhen uh. ¹⁶ Thlawsuah kengtu no kha thlawsuah kan pe. Cui no cu Khrih thisen ih kan pawlkawmawknak hi a si lo maw? Sang kan phel tikah khan Khrih taksaruangpum ah kan pawlkawmaw a si lo maw? ¹⁷ Sang hlawm pakhat a um. Curuangah kannih cu tampi si hman nungla taksaruangpum pakhat kan si. Ziangahtile, kan zatein cui sang hlawm pakhat cu kan ṭawmaw a si. ¹⁸ Taksa lamih Israel a si mipawl khi zoh hnik uh; raithawinak sa a eitupawl kha biakṭheng ṭawmpitu an si ve lo maw? ¹⁹ Cuti asile, ka sim mi cu ziang a si? Milem cu ziang simaw a si, ka ti maw si? Asilole, milempawl hnenih an thawi mi kha ziang simaw a si ka tinak a si maw? ²⁰ Asinan ka lo sim mi cu, Zentelpawlih thawiawknak thilpawl cu Pathian hnenah si loin khawsepawl hnenah an thawi a si, ti hi a si. Khawsepawl thawn pawlkawmawknak nan neih ding ka duh lo. ²¹ Bawipai no le khawsepawlih no cu nan inkawp thei lo ding. Bawipai cabuai ta le khawsepawl cabuai ta khal nan eikawp thei lo ding. ²² Bawipa cu thikthu se ko kan tawkhrawk maw? Kannih cu amah hnakin kan caksawn maw? ²³ Thil ziangkim hi ka hrangah tuah a thiang. Asinan thil ziangkim tuah hi ka hrangah hlawknak a si lo. Thil ziangkim hi ka hrangah tuah a thiang. Asinan thil ziangkim in mi a tuahṭha lo. ²⁴ Zohman in amai hlawknak lawng hawl hlah seh. Asinan mi kipin midang hlawknak ding hawl sawn hai seh. ²⁵ Sa zuarnak ih an zuar mi poh cu nan sia le ṭha theihnak ruangah thu zianghman sut loin ei uh. ²⁶ Ziangahtile, “Leilung le a sungih a um mi hmuahhmuah cu BAWIPAI ta an si.” ²⁷ An lakih zumlotu pakhatkhat in rawl ei a lo sawm ih feh nan duh asile nan sia le ṭha theihnak ruangah thu zianghman sut loten nan hmaiih an lo hun mi pohpoh cu ei uh. ²⁸ Asinan mi pakhatkhat in na hnenah, “Himi cu milem hnenih hlan mi sa a si,” a lo ti asile a lo simtupai ruangah le a sia le ṭha theihnak ruangah cumi cu ei hlah aw. Ziangahtile, “Leilung le a sungih a um mi hmuahhmuah cu Bawipai ta an si.” ²⁹ Nangmai sia le ṭha theihnak hrangah si loin cu pai “Sia le ṭha theihnak,” ruangah ka sim a si sawn. Kei cu mizalen ka si. Curuangah, ziangah saw midang pakhatih sia le ṭha theihnak in kei cu thu i ṭhen ding? ³⁰ Lungawithu simnak thawn ka ei asile ziangruangah cu mi hrangih lungawithu ka sim mi ah anih in keimah dokalh in ṭawng ṭha lo a ṭawng? ³¹ Curuangah nan ei ah si seh, nan in ah si seh, ziangtinkim nan tuahnak ah mi in Pathian an thangṭhat theinak ding hlirah tuah uh. ³² Jew-pawl hnenah si seh, Grikpawl hnenah si seh, Pathian kawhhran hnenah si seh tluknak ding zianghman tuah hlah uh. ³³ Thil ziangkimah mi hmuahhmuah lung ka awiter. Ka tuah vekin nan tuah ding a si. Keimai hlawknak ka hawl lo. Cu hnakin, mi tampi rundam an si theinak dingah mi tampi-ih hlawknak ka hawl sawn a si.

¹ Keimah, Paul in Khrih nun ka cawn vekin nannih khalin i cawng ve uh. ² U le nau tla thil ziangtinkimah in mang ih nan hnenih ka lo peksawngsin mi vek khan thurosiah cu nan kaihhnget ruangah ka lo lawm a si. ³ Asinan hihi nan theih dingah ka duh, mipa kipih lu cu Khrih a si; nunau-ih lu cu mipa a si; cule Khrih-ih lu cu Pathian a si. ⁴ Mipa zokhal a lu khuh tahratih thlacamtu asilole profet vekih thusimtu cun a lu a upat lo a si. ⁵ Asinan nunau zokhal lu khuh loin thla a cam asilole profet vekih thu a simtu cun a lu a upat lo a si. Ziangahtile, cutiih a tuah asile a lu a metkawlh mi nunau thawn a bangrep a si. ⁶ Ziangahtile, nunau in a lu a khuh lo asile a lu khal metkawlh lawlaw seh. Asinan nunau hrangah lu ziahkawlh asilole lu mehkawlh cu ningzahthlak a si. Curuangah nunau cu a lu khuh seh. ⁷ Mipa cu Pathian-ih hmuihmel le ropitnak a si ruangah a lu khuh hrimhrim hlah seh. Asinan nunau cu mipa-ih ropitnak a si. ⁸ Ziangahtile, mipa cu nunau ihsin a si lo. Asinan nunau cu mipa ihsin a si. ⁹ Mipa cu nunau hrangih sersiam a si lo. Asinan nunau cu mipa hrangih sersiam a si. ¹⁰ Curuangah, nunau cun vancungmipawl ruangah a lu parah thuneihnak hminsinnak nei seh. ¹¹ Sikhalsehla Bawipa ah cun mipa cu nunau lakah a zalen lo ih, nunau khal mipa lakah a zalen lo. ¹² Ziangahtile, nunau cu mipa ihsi ra um mi a si. Cutivek thothoin mipa khal nunau ihsin a ra um mi a si ve. Asinan thil ziangkim hi Pathian hnen ihsi ra um mi an si. ¹³ Nunau in lu khuh loin Pathian hnenih thla a cam ding cu a mawi maw mawi lo? Nanmah ten thu ṭhenaw hnik uh. ¹⁴ Mipa sam saupi zuah cu amai hrangah a ningzahthlak a si ti leitlun zephung khalin a lo zirh a si lo maw? ¹⁵ Asinan nunau in sam saupi a neih asile cucu a ropitnak a si. Ziangahtile, a khuhawknak dingah Pathian in sam a pe. ¹⁶ Asinan, cu mi thu ah mi pakhatkhat in a el duh asile a dang nunphung kan nei lo. Pathian kawhhranpawl khalin nunphung dang an nei lo. ¹⁷ Asinan, hmunkhat ih nan pumkhawmawknak hi ṭhatsinnak hrangah si loin siatsinnak hrangah a si ruangah cui thu nanmah ka lo zirh tikah khan ka lo lawm lo. ¹⁸ Ziangahtile, a pakhatnak ah kawhhran ih nan ratkhawm tikah nan lakah ṭhenṭheknak a um a si tiah ka thei. Cui ka theih mi cu ka zum nawn ko. ¹⁹ Ziangahtile, nan lakih Pathian ih a pawm mipawl langter an si theinak dingah nan lakah fehsualpawl khal an um tengteng ding. ²⁰ Curuangah hmun pakhat ih nan ratkhawm tikah, cumi cu Bawipai zanriah ei dingah a si lo. ²¹ Ziangahtile, mi tinin nan ei tikah mai bul zanriah nan ei hmaisa cio. Cule mi pakhat cu rilrawng in a um ih, a dang pakhat cu a ri. ²² Einak le innak dingah inn nan nei a si lo maw? Pathian kawhhran cu nan hmuhsuam ih thil zianghman neilopawl cu an ning nan zakter a si lo maw? Nan hnenah ziang ka sim ding? Himi ah ka lo lawm ding maw? Ka lo lawm lo a si. ²³ Ziangahtile, Bawipai hnen ihsin ka ngah mi cu ka lo pesin a si. Bawipa Jesu in phiarsawm a si zan ah sang kha a lak ih, ²⁴ lungawithu a sim hnuah a phel. Cule, “La uh la ei uh. Hihi nan hrangih ka phel mi ka taksapum a si. Keimah in cin ringringnak dingah himi hi tuah uh,” tiah a ti. ²⁵ Cutivek thothoin zanriah a ei hnuah Jesu in no cu a lak ih, “Hi no hi ka thisen ih thuthlung thar a si. Hi no nan in tinten keimah in cin ringringnak dingah in uh,” tiah a ti. ²⁶ Ziangahtile, hi sang nan ei tinte le hi no nan in tinten Bawipai thihnak cu a ratsal hlanlo nan phuanglang a si. ²⁷ Curuangah mi zokhal himi Bawipai sang le no tlaklopi in a ei ih a intu cu Bawipai taksa le thisen parah thil a tisual a si. ²⁸ Asinan mi pakhat in amah le amah cekfelaw seh. Cule cui sang cu ei seh la cui no cu in seh. ²⁹ Ziangahtile, tlaklopi in a ei ih a intu cu amah thuṭhennak hrangah a ei ih a in a si. Anih cun Bawipai taksaruangpum thuhla cu a theihliah lo. ³⁰ Himi ruangah hin nan lak ihsin mi tampi cu cak lo le dam loin an um ih, mi tampi cu an thi. ³¹ Asinan kanmah le kanmah thu kan ṭhenawk asile Pathian in thu in ṭhen lo ding. ³² Asinan Bawipa in thu in ṭhen tikah leitlun mipawl thawi thiamlo in coterlonak dingah nun in sim a si. ³³ Curuangah ka u le ka nau tla, Bawipa zanriah ei dingih nan ratkhawm tikah pakhat le pakhat hngakaw uh. ³⁴ Cule, zokhal hmunkhat ih nan khawmawk tikah Pathian in thiamlo a lo cohlonak dingah zokhal a ril a rawn asile inn ah ei seh. A tang lai mi thupawl cu ka rat tikah ka tifel leh ding.

¹ U le nau tla, atu ah thlarau lam thilpekpawl thuhla thawn pehparawin thei lo ih nan um ding ka duh lo. ² Zentelmi nan rak si laiah cun an lo hruainaknakah khan, a ṭawng thei lo mi milempawl hnenah hruai nan si ti nan thei. ³ Curuangah zohman in Pathian Thlarau in, Jesu cu camsiat si seh, tiah an ṭawng lo. Cucu nan theih ding ka duh. Cule Thlarau Thianghlim ihsi lo cun zohman in, Jesu cu Bawi a si, tiah an ti thei lo. ⁴ Thilpek a phunphun a um, asinan Thlarau cu pakhat a si. ⁵ Rawngbawlnak a phunphun a um, asinan Bawipa cu pakhat a si. ⁶ Cun, hnaṭuandan a phunphun a um, asinan thil ziangkim mi hmuahhmuah hnenih a ṭuantu Pathian cu pakhat a si. ⁷ Hlawk tawnnak ding hrangah Thlarau in a pek mi thilpek cu phuanlang a si. ⁸ Ziangahtile, Thlarau in mi pakhat hnenah fimnak thu a pe. Cui Thlarau thothoin a dang pakhat hnenah theihnak thu a pe. ⁹ Cui Thlarau thotho cun a dang hnenah zumnak a pe. Cui Thlarau thothoin midang hnenah tidamnak thilpekpawl a pe. ¹⁰ A dang hnenah thilmakpawl tuah theinak, a dang hnenah profet vekih thusim theinak, midang hnenah thlarau thleidan theinak, midang hnenah ṭawng phun dangdangih ṭawng theinak, cule a dang hnenah ṭawng phun dangdang leh theinak a pe. ¹¹ Asinan cupawl hmuahhmuah cu Thlarau bangrep le pakhat ih cangvaihnak a si. A duhdan vekin mi kip hnenah thilpekpawl cu a zem fingfing. ¹² Taksaruangpum cu pakhat lawng si khal sehla peng tampi a nei. Taksa pengpawl hmuahhmuah tla cu tam hman hai sehla taksaruangpum pakhat a si. Khrih khal cuvek a si ve. ¹³ Ziangahtile, Jew-pawl si seh, Grikpawl si seh, salpawl si seh, miluatpawl si seh, kan zaten taksaruangpum pakhat ah Thlarau pakhat in baptisma in rak pe. Kan zaten Thlarau pakhat ah in dingin in tuah. ¹⁴ Ziangahtile, taksaruangpum cun peng pakhat lawng a nei lo ih peng tampi a nei a si. ¹⁵ Ke in, “Kei cu kut ka si lo ruangah taksaruangpi ih ta ka si lo,” ti hnik sehla, cutiih a ti ruangah taksaruangpi ih ta a si lo ngaingai maw? ¹⁶ Cule, hna in, “Kei cu mit ka si lo ruangah taksaruangpi-ih ta ka si lo,” ti hnik sehla, cutiih a ti ruangah taksaruangpi ih ta a si lo ngaingai maw? ¹⁷ Taksaruangpumpi hi mit si thluh hnik sehla, ziangtin a ngaithla thei ding? Taksaruangpumpi hi hna si thluh hnik sehla, ziangtin rim a hnim thei ding? ¹⁸ Asinan, atu ah Pathian in amai duhdan vekin taksa peng zaten taksaruangpi ah a ret cio hai. ¹⁹ Taksa peng an zatein peng pakhat lawng sita hnik sehla, taksaruangpi cu khuiah saw a um ding? ²⁰ Atu ah taksa peng cu tampi a um nan taksaruangpi cu pakhat a si. ²¹ Mit in kut hnenah, “Ka lo ṭul lo,” tiah a ti thei lo. Lu in ke hnenah, “Ka lo ṭul lo,” tiah a ti thei fawn lo. ²² Taksaruangpi-ih siat awl sawn zet a bang mi peng hrekkhatpawl tla hi a ṭulbik mi sawn an si. ²³ Upat tlak lem lo ih kan ruah mi taksa pengpawl, cupawl cu kan upat nasasawn ṭheu. Cun, kan taksa peng zahpi mipawl kha mawiten kan thuam. ²⁴ Asinan a mawi mi kan taksa peng hrekkhatpawl cun ṭul mi an nei lo. Pathian in taksa pengpawl cu pumkhat ah remten a kawm. Upatnak a tlasam mi taksa pengpawl cu upatnak tamsawn Pathian in a pe. ²⁵ Taksaruangpi ah ṭhenṭhekawknak a umlonak dingah cutivekin a tuah. Cui taksa pengpawl cun pakhat le pakhat bangrep in ngaihsakawktawnnak an neih sawnnak dingah a si. ²⁶ Taksa peng pakhat in a tuar tikah taksa peng hmuahhmuah in an tuarpi ve. Asilole taksa peng pakhat cu upat a si tikah taksa peng hmuahhmuah in an lungawipi ve. ²⁷ Cule nannih cu Khrih-ih taksaruangpum nan si. Pumpak cio hi cui taksaruangpumih peng nan si fingfing. ²⁸ Pathian in a pakhatnak ah apostolpawl, a pahnihnak ah profetpawl, a pathumnak ah zirhtupawl, cui hnuah thilmakpawl, cui hnuah tidamnak thilpekpawl, cun mi bawm theinakpawl, mi hoha theinakpawl le ṭawng phun dangdang ṭawng theinakpawl cu kawhhran ah a ret. ²⁹ An zaten apostol an si maw? An zaten profet an si maw? An zaten zirhtu an si maw? An zaten thilmak tuahtu an si maw? ³⁰ An zaten tidamnak thilpekpawl an nei maw? An zaten ṭawng phun dangdangin an ṭawng maw? An zaten cui ṭawng phun dangdang cu an let maw? ³¹ Asinan, thilpek ṭhabikpawl cu nasazetin cak uh. Cuitlunah lamzin ṭhasin ka lo hmuh ding.

¹ Minung ṭawngpawl le vancungmi ṭawng tlain ṭawng hman ningla duhdawtnak ka neih si lo ah cun kei cu dar awn vek men le darsumsel awn vek men ka si. ² Cule profet vekih thusim theinak thilpek nei in, thuthuppawl hmuahhmuah tla theithiam in le theihnak hmuahhmuah nei in, cule tlangpawl ṭhawn theinak zumnak hmuahhmuah tla nei hman ningla duhdawtnak ka neih si lo ah cun zianghmanlomen ka si. ³ Miretheipawl cawmnak ah ka neih mi thil hmuahhmuah pe thluh in, ka taksaruangpi hi ur dingah pe hman ningla duhdawtnak ka neih si lo ah cun ka hrangah hlawknak zianghman a um lo. ⁴ Duhdawtnak cu a thin a sau ih ngil a nei. Duhdawtnak cun mi a iksik lo, a duhaw lo ih, a puarthau fawn lo. ⁵ Duhdawtnak cu mawi loin a nung lo, amai hlawknak lawng a hawl lo, awlten a thin a heng lo ih, midangih thil ṭha lo tuah mi a cing ringring lo. ⁶ Dingfellonak ah a lung a awi lo ih, thutak ah a lung a awi sawn. ⁷ Ziangkim a khuh thluh, ziangkim a zum, ziangkim a ruahsan ih, ziangkim a tuarsuak thei. ⁸ Duhdawtnak cu a cem dah lo. Asinan profet vekih thusimnak hi um khal sehla a hloral leh ding. Ṭawng phun dangdangih ṭawng theinak hi um khal sehla a cem leh ding. Theihnak a um khalle a hloral leh ding. ⁹ Ziangahtile, kim loin kan thei ih, kim loin profet vekin thu kan sim. ¹⁰ Asinan a famkim mi a ra thlen tikah cun a kim lo mi hi hlohralter a si leh ding. ¹¹ Nauhakte ka si laiah nauhak vekin ka ṭawng, nauhak bangtukin ka theithiam ih, nauhak vekin ka ruat. Asinan, ka pitlin tikah cun nauhak thilpawl cu ka hlawn thluh. ¹² Ziangahtile, atu ah cun dar thlalang sungah kan hmu duadi a si. Asinan cu tik canah cun hmaitawn in kan hmu leh ding. Atu ah cun famkim loin ka thei. Asinan cu tik canah cun Pathian ih i theih thluh vekin thil ziangkim ka thei thluh leh ve ding. ¹³ Atu ah hi thil pathum, zumnak, ruahsannak le duhdawtnak pawl tla an um. Asinan hipawl lakih a ropibik cu duhdawtnak a si.

¹ Duhdawtnak cu dawi uh la thlarau lam thilpekpawl tla cu nasazetin cak uh. Ahleicein profet vekih thusim hi cak uh. ² Ziangahtile, ṭawng dangih a ṭawngtu cun minung hnenah a ṭawng lo ih, Pathian hnenah a ṭawng sawn a si. Ziangahtile, zohman in a ṭawng mi cu an theithiam lo. Sihmansehla a thlarau ah cun thuthuppawl tla a sim a si. ³ Asinan profet vekih thusimtu cun minung hnenah tuahṭhatnak thu, thapeknak thu le hnangamnak thu a sim. ⁴ Ṭawng dangih a ṭawngtu cun amah le amah a tuahṭhaaw. Asinan profet vekih thusimtu cun kawhhran a tuahṭha. ⁵ Nan zaten ṭawng dangdangin ṭawng uhla ka duh. Asinan profet vekih thu nan sim ding cu ka duh sawn. Ziangahtile, ṭawng dangdangih ṭawngtu in kawhhran tuahṭhatnak dingah a let lo a si ah cun profet vekih thusimtu cu a ropisawn a si. ⁶ Ka u le ka nau tla, atu ah ṭawng dangdang thawi ṭawng in nan hnenah ra hnik ningla, cumi cun ziang hlawknak a lo pe ding? Pathian ih a phuansuah mi si seh, theihnak thawn si seh, profet vekih thusimnak in si seh, asilole zirhnak in si seh nan hnenih ka sim lawngah cumi cun a lo hlawkter a si. ⁷ Nunnak nei lo mi thil phirivau asilole ṭingṭang hmang in aw an suah tikah anmai aw dik an suah lo asile zohman in phirivau an tum ti le ṭingṭang an tum ti an thei thei lo ding. ⁸ Tawtawrawt khalin aw fiang a suah lo asile zo so raldo dingah a tim a tuah ding? ⁹ Cutivek thothoin nan hnen khalah a si. Nannih in theihthiam awl mi ṭawngkampawl nan lei in a ṭawng lo asile ziang nan ṭawng ti ziangtin an thei ding? Ziangahtile, thli lakih ṭawng rero men nan si. ¹⁰ Rinhlelh ding um loin leilung tlunah ṭawng phun dangdang tam zet a um. Cupawl cun sullam an nei fingfing. ¹¹ Curuangah mi pakhat in ka hnenah a ṭawng ih a ṭawng miih sullam ka theih lo ah cun a hrangah kei cu ram dang mi vek ka si ding ih, anih khal ka hrangah ram dang mi vek a si ve ding. ¹² Cutivek thothoin nan hnen khalah a si. Thlarau lam thilpekpawl tla nasazetin nan cak. Curuangah cutiih nan caknak ah kawhhran tuahṭhat thiam zettu si ding cu cak uh. ¹³ Curuangah ṭawng dangih a ṭawngtu cun a leh theinak dingah thla cam seh. ¹⁴ Ziangahtile, ṭawng dangih thla ka cam asile ka thlarau in thla a cam, asinan ka theihthiamnak cun rah zianghman a suah lo. ¹⁵ Curuangah, ziang ka tuah ding? Thlarau thawn thla ka cam ding ih, theihthiamnak thawn khal ka cam ding. Thlarau thawn hla ka sak ding ih, theihthiamnak thaw khalin ka sak ding. ¹⁶ Cu lo asile, na thlarau thawn Pathian na thangṭhat tikah a leng lam mi cu tawkih a umtupa cun ziang na sim ti a theithiam lo. Pathian hnenih lungawithu na sim tikah cu pa cun ziangtin, “Amen,” tiah a ti thei ding. ¹⁷ Ziangahtile, lungawithu cu na sim ṭha taktak ko nan cu pa cu na tuahṭha cuang lo. ¹⁸ Nannihpawl hmuahhmuah hnakin ṭawng phun dangdangih ka ṭawng tamsawn ruangah ka Pathian hnenah ka lung a awi. ¹⁹ Sikhalsehla kawhhran sungah cun ka ṭawngkam in midangpawl khal ka zirh theinak dingah ṭawng dangih kam thawnghra ka ṭawng hnakin ka theihthiamnak thawi ṭawng kam nga ṭawng ka duh sawn. ²⁰ Ka u le nau tla, theihthiamnak ah nauhak hlah uh. Asinan midang parih lungput ṭha lo thu lamah cun nausente si uh la theihthiamnak lamah cun pitling uh. ²¹ Dan bu sungah hitin ngan in a um, “Hi minungpawl hnenah ram dang ṭawngpawl a ṭawngtu le ram dang mipawlih hmur hmang tahratin ka ṭawng ding. Cutin tuah khal ningla in ngaithla cuang lo ding,” tiah Bawipa in a ti. ²² Curuangah ṭawng phun dangdang cu zumtupawl hrangah si loin zumlotupawl hrangih hminsinnak a si. Asinan profet vekih thusim theinak cu zumlotu hrangah si loin zumtu hrangah a si. ²³ Curuangah kawhhran mi hmuahhmuah hmun pakhat ah rakhawm in nan zaten ṭawng phun dangdangih nan ṭawng asile cu tawkah zir lo mi asilole zumlotu an rat tikah nannih cu miaa an si an lo ti lo ding maw? ²⁴ Asinan kawhhran mi zaten profet vekih thu an sim a si ah cun zumlotu asilole zir lo mi a ra luh tikah an zaten anih cu a sualnak an theisuakawter ding ih an zaten an hmusuakawter ding. ²⁵ Cuti cun a thinlung ih thuthuppawl cu Pathian in a theihter ding. Cule a bawkkhup ding ih, Pathian a be ding. Cun, nan hnenah Pathian a um taktak a si, tiah a ti ding. ²⁶ Ka u le ka nau tla, ziangtin a si ding? Nan khawmawk tikah pakhat cioin thangṭhatnak hla sak ding si seh, thu zirh ding si seh, ṭawng dang si seh, Pathian-ih thuphuansuah mi si seh, ṭawng dang leh theinak si seh nan nei. Thil ziangkim hi tuahṭhat tawnawknak hrangah tuah si seh. ²⁷ Mi pakhatkhat in ṭawng dangin a ṭawng asile mi pahnih asilole a tambik ah mi pathum si hai seh. Pakhat hnu pakhat ṭawng hai seh la midang pakhat in an ṭawng let seh. ²⁸ Asinan lettu a um lo asile, a ṭawngtu cu kawhhran sungah daiten um seh. Amah le amah hnenah le Pathian hnenah ṭawng seh. ²⁹ Profetpawl cun pahnih asilole pathum in thu sim hai seh la a dangpawl in thu rak ṭhenfel hai seh. ³⁰ A kiangih to midang hnenah Pathian hnen ihsin thuphuansuah a dawn asile a hmaisa pa cu daiten rak um men seh. ³¹ Ziangahtile, mi kipin an zir ih thazang an ngah theinak dingah nan zaten profet vekin pakhat hnu pakhat thu nan sim thei. ³² Profetpawl cun anmai thlarau an uk thei a si. ³³ Ziangahtile, Pathian cu buainak Pathian a si lo ih, mithianghlimpawlih kawhhran hmuahhmuah ah daihnak a um vekin, anih cu daihnak Pathian a si sawn. ³⁴ Kawhhran hmuahhmuah sungah nan nunaupawl cu daiten um hai seh. Ziangahtile, annih cu ṭawng sen an si lo. Dan ih a sim vekin, annih cu thulung in um sawn men hai seh. ³⁵ Thil ziangkhal zir an duh asile inn ah an pasal sut hai seh. Ziangahtile, nunau hrangah kawhhran sungih ṭawng cu ningzakza a si. ³⁶ Pathian thu cu nanmah hnen ihsin maw a thawk? Asilole nanmah hnen lawngah maw a rat? ³⁷ Mi zokhal amah le amah profet le thlarau miih a ruahawk asile nan hnenih ka ngan mi thupawl hi Bawipai thupek an si ti thei seh. ³⁸ Asinan mi pakhatkhat in cumi cu a theihthiam lo asile thei loin um men seh. ³⁹ Curuangah, u le nau tla, profetpawl vekih thusim ding hi nasazetin cak uh la ṭawng phun dangdangih ṭawng ding hi kham hlah uh. ⁴⁰ Thil ziangkim hi mawi zet le fel zetin tuah si seh.

¹ Cuitlunah, u le nau tla, keimah Paul in nan hnenih ka rak phuan zo mi, nan rak cohlan zo mi le nan dinnak khal a si mi thuthangṭha cu nan hnenih phuansal ka duh. ² Nan hnenih ka rak phuan mi thu kha nan cin ringring ih nan zumnak kha ṭhathnemnak nei lo a si lo ah cun cui thuthangṭha in rundam nan si. ³ Ziangahtile, a hmaisabikah keimah khalih ka rak cohlan ve mi cu nan hnenah ka rak lo pesawngsin. Cumi cu hitin a si, Cathianghlim ih a sim vekin Khrih cu kan sualnakpawl hrangah a thi. ⁴ An phum ih, Cathianghlim ih a sim vekin a ni thumnak ah a thosal. ⁵ Cule, anih cu Kefas hnenah a lang. Cun mi hleihnihpawl hnenah a lang. ⁶ Cui hnuah, vei khatte unau zanga lenglopawl hnenah a lang. Cupawl lakih a tamsawn cu atu tiang an nung lai. Asinan a hrekkhatpawl cu an itthat zo. ⁷ Cui hnuah, James hnenah a lang. Cun, apostolpawl hmuahhmuah hnenah a lang. ⁸ Anetabikah, a tikcucan lo ih suak nausen vek a si mi keimah hnen khalah a lang ve. ⁹ Ziangahtile, kei cu apostolpawl hmuahhmuah lakah a thupilobik ka si. Pathian kawhhran ka tiduhdah ruangah apostol tiih kawh tlak hman ka si lo. ¹⁰ Asinan, Pathian zangfahnak ruangin keimah cu ka si vekin ka si. Ka parih zangfahnak i pek mi cu rahsuah nei lo a si lo. An zate hnakin tamsawn ka ṭuan. Asinan, a ṭuantu cu keimah ka si lo. Ka hnenih um Pathian zangfahnak in a ṭuan sawn a si. ¹¹ Curuangah, keimah in si seh, annih in si seh, cui thuthangṭha cu kan phuang. Cule nannih in cucu nan rak zum. ¹² Mithi lak ihsin Khrih cu a thosal ti hi kan phuang. Cutin kan phuang ko na cingin nanmah lakih mi hrekkhat cun mithi thawhsalnak a um lo, tiah nan ti. Ziangtin cutin nan ti thei? ¹³ Mithi thawhsalnak a um lo asile Khrih khal a thosal lo tinak a si ding. ¹⁴ Cule Khrih a thawhsal lo asile kan thusim mi cu zianghmanlomen a si ih, nan zumnak khal zianghmanlomen a si. ¹⁵ A si, kannih cu Pathian thu theihtertu diklo kan si. Ziangahtile, mithi an thawhsal taktak lo a si ah cun Pathian in a thawhter lo mi Khrih cu a thoter a si tiah Pathian thuhla kan rak theihter. ¹⁶ Ziangahtile, mithi an thawhsal lo a si ah cun Khrih khal a thosal lo tinak a si ding. ¹⁷ Khrih cu thawhter a si lo ah cun nan zumnak cu ṭhathnemnak nei lo a si ding ih nanmah khal nan sualnakpawl ah nan rak um hrih lai tinak a si ding. ¹⁸ Cule Khrih ih a itthat mipawl khal an hloral tinak a si ding. ¹⁹ Hi nun sung hrang lawngah Khrih ah ruahsannak kan neih asile midang hmuahhmuah hnakih zangfahumzabik kan si ding. ²⁰ Asinan atu ah Khrih cu mithi lak ihsin a thosal ih a itthat mipawlih rah hmaisabikah a cang. ²¹ Mi pakhat ruangin thihnak a ra ih, mithi lak ihsin thawhsalnak khal mi pakhat ruangin a ra. ²² Adam ah mi hmuahhmuah an thih vekin Khrih ah mi hmuahhmuah nunter an si ding. ²³ Sihmansehla mi kipin anmai can cioah an tho ding. Khrih cu rah hmaisabik a si. Cui hnuah, Khrih a ratsal tikah Khrih ta a si mipawl cu an tho ding. ²⁴ Cu tikah Khrih in uknak hmuahhmuah, thuneihnak hmuahhmuah le huham tla zianghmanlo ah a cangter ding ih a uknak cu Pa Pathian hnenih a hlan hnuah san cemnak cu a ra thleng ding. ²⁵ Ziangahtile, anih cun a ralpawl hmuahhmuah a ke hnuaiih a ret thluh hlanlo a uk ding. ²⁶ Siatbal ding mi anetabik ral cu thihnak a si. ²⁷ Ziangahtile, “Pathian in thil hmuahhmuah cu Khrih-ih ke hnuaiih a ret,” tikah amah le amah cu a retaw lo. Amah cu thil hmuahhmuah Khrih hnuaiih rettu a si. Cathianghlim in, “Thil hmuahhmuah cu Khrih-ih ke hnuaiah a ret a si,” tiah a ti tikah cui thu cu a fiang a si. ²⁸ Fapa hnuaiah thil ziangkim ret thluh a si tikah, Fapa hnuaiih thil ziangkim ret thluhtu Pathian ih hnuaiah Fapa amah rori khal a retaw ding ih, cule Pathian cu ziangkim ih ziangkim a si thei ding. ²⁹ Mithi thawhsalnak a um lo asile, a thi mipawl aiawh ih baptisma a cotupawl hin ziang an tuah ding? Ziangruangah a thi mipawl aiawh in baptisma an co? ³⁰ Cule ziangruangah kannihpawl hi ṭihphang ih kan um ringring? ³¹ Khrih Jesu kan Bawipa ah nanmah ih hmaihngalnak ka neih mi thawngin, ni tin ka thi a si, ti ka nemhnget. ³² Milai sualawkdan vekih Efesa khua ah sahrangpawl thawn kan rak sualawk asile ka hrangah hlawknak ziang a um? Mithi an thawhsal lo asile, “Kan ei pei ih kan in pei. Ziangahtile, thaisun ah kan thi ding,” tiah kan ti pei. ³³ Bum in um hlah uh, “Miṭhalopawl thawi kawmawknak cun nuncan ṭha a siatsuah.” ³⁴ Dingfelnak ah ṭhangharh uh la thilsual tuah hlah uh. Ziangahtile, mi hrekkhat cun Pathian an thei lo. Cui thu cu nan ning a zahnak dingah ka sim a si. ³⁵ Asinan mi hrekkhat in, “Mithipawl cu ziangti vekin thawhter an si? Ziang taksaruangpum thawn an tho?” tiah an ti ding. ³⁶ Nang miaa! Na tuh mi thlaici kha a thih lo ah cun a nung thei lo. ³⁷ Asinan thlaici na tuh tikah a ra um ding mi a kung kha na tuh lo. Sangvut si seh, thlaici dang si seh, a ci lawng na tuh a si. ³⁸ Asinan Pathian in cui thlaici hrangah a duhdan vekin kung a pe hai ih, thlaici hmuahhmuah hrangah anmai kung cio a pe fingfing. ³⁹ Taksa hmuahhmuah hi taksa phun khat an si lo. Minung taksa a dang, ramsa taksa a dang, nga taksa a dang, vate taksa khal a dang. ⁴⁰ Van taksa a um ih, lei taksa khal a um. Asinan van taksa ropitnak cu a dang ih, lei taksa ropitnak khal a dang. ⁴¹ Ni ropitnak a dang ih, thla ropitnak a dang, arsi ropitnak khal a dang. Arsi le arsi khal ropitnak ah cun an bangaw lo. ⁴² Mithi thawhsalnak khal cutivek thotho a si. Taksaruangpum cu ṭawih thei in tuh a si ih, ṭawih thei loin thawhter a si. ⁴³ Taksaruangpum cu santlailo zetih tuh a si ih, ropi zetin thawhter a si. Cak lo zetih tuh a si ih, huham nei ih thawhter a si. ⁴⁴ Lei taksaruangpum cu lei taksaruangpum in tuh a si ih, thlarau taksaruangpum ih thawhter a si. Lei taksaruangpum a um ih, thlarau taksaruangpum khal a um. ⁴⁵ Cumi cu Cathianghlim in, “Milai hmaisa Adam cu a nung mi lei taksaruangpum ah a cang,” tiih a ti vek khan a si. Adam neta cu nunnak petu thlarau a si. ⁴⁶ Sikhalsehla, milai hmaisabik cu thlarau lam milai a si lo. Anih cu lei milai a si. Cui hnuah thlarau lam milai a ra. ⁴⁷ Milai hmaisabik cu leilung mi, leivut ihsin tuah mi a si. A pahnihnak milai cu van ihsin a ra mi Bawipa cu a si. ⁴⁸ Leivut ih tuah mi milaipawl cu cui leivut ih tuah mi milaipa vek kha an si. Cule vancung ih um mipawl cu cui van milaipa vek kha an si. ⁴⁹ Leivut ih tuah mi milai bangnak kha kan put bangin van milaipa bangnak khal kan pu ding a si. ⁵⁰ U le nau tla, atu ah hihi ka sim a si, milai taksa le thisen cun Pathian uknak cu ro ah a co thei lo. Cutivek thothoin a ṭawih thei mi in a ṭawih thei lo khal a co thei lo. ⁵¹ Ngai hnik, thuthup ka lo sim, kan zaten kan itthat ṭheh lo ding, asinan kan zaten tidanglam kan si ding. ⁵² Tawtawrawt netabik a awn tikah reilote sungah, mitṭhep karah tidanglam kan si ding. Ziangahtile, tawtawrawt a awn ding ih mithipawl cu ṭawih thei loin an tho ding ih, tidanglam an si ding. ⁵³ Ziangahtile, a ṭawih thei mi hi taksaruangpum hin a ṭawih thei lo mi a hruh tengteng ding. A thi thei mi hi taksaruangpum hin a thi thei lo mi a hruh tengteng ding. ⁵⁴ Cule a ṭawih thei mi hi taksaruangpum hin a ṭawih thei lo mi a hruh ih a thi thei mi hi taksa hin a thi thei lo mi a hruh tikah, Cathianghlim in, “Thihnak cu nehnakin a dawlh ṭheh,” a ti mi cu a thleng kim ding. ⁵⁵ “Maw Thihnak, na hmanrua cu khuiah a um? Maw Mithikhua, khuiah saw na nehnak cu?” ⁵⁶ Thihnak ih hmanrua cu sual a si. Sual ih huham cu Dan hi a si. ⁵⁷ Asinan kan Bawipa Jesu Khrih zarih nehnak in petu Pathian hnenah lungawithu um hram seh. ⁵⁸ Curuangah, ka duhdawt mi u le nau tla, nan hnaṭuannak cu Bawipa ah a lak a si lo ti nan theih ruangah dinghnget uh la ṭhawn theih loin um uh la, cule catbang loin Bawipai hnaṭuannak ah peaw sinsin uh.

¹ Atu ah mithianghlimpawl hrangih thawhhlawm khawn thu thawn pehparawin Galatia peng ih um kawhhranpawl hnenih thu ka rak pek vek khan nannih khalin tuah ve uh. ² Zarh khat sungih ni hmaisabik ni ah mi kipin Pathian ih malsawm a lo pekdan cio vekin sumpai rak thawh fingfing uh la rak khawl cia uh. Cutin nan hnenih ka rat tikah sumpai nan khawn a ṭul nawn lo ding. ³ Cule ka rat tikah siang zetih nan thilpek cu Jerusalem khua ih fehpitu dingah nan ca sungih nan remti mipawl cu ka thlah hai ding. ⁴ Keimah rori feh a remcan asile annih cu ka hnenah an feh ve ding. ⁵ Masidonia peng ka paltlang hnuah nan hnen ka thleng ding. Ziangahtile, Masidonia peng cu ka paltlang ding a si. ⁶ Ka khualtlawnnak khuitawk hmun khalih in thlah theinak dingah thlatang sung hmuahhmuah nan hnenah ka cam khal a si men thei. ⁷ Ziangahtile, atu ka feh phahih nanmah lo hmuh men cu ka duh lo. Neta ah Bawipa in i sian asile nanmai hnenih can tawkfang cam ding ka beisei a si. ⁸ Asinan Pentikos puai tiang Efesa khua ah ka cam ding. ⁹ Ziangahtile, a ropi le a hlawhtlinnak sangka cu ka hrangah a awngaw. Asinan dodaltu tampi khal an um ve. ¹⁰ Timothy a ra thlen asile ṭihnak um lo ih nan hnenih a um theinak dingah rak ngaihsak uh. Ziangahtile, anih cu keimah in Bawipai hna ka ṭuan vekin a ṭuan. ¹¹ Cuiruangah zohman in amah cu hmuhsuam hlah hai seh. Ka hnenih a rat theinak dingah hnangamten thlah uh. Ziangahtile, amah cu unaupawl thawn ka rak hngakhlap zet. ¹² Kan unaupa Apollos thu thawn pehparawin unaupawl thawn nan hnenih ra dingin nasazetin tha ka pe. Asinan, atu ah cun rat a duh lo. Can remcang a neih tikah a ra leh ding. ¹³ Ralring uh, zumnak ah dinghnget uh, pacang zetin um uh la, cak zetin um uh. ¹⁴ Nan tuah mi hmuahhmuah cu duhdawtnak in tuah uh. ¹⁵ U le nau tla, Stefanas tei insungsang cu Akhaia peng ih rah hmaisabik an si ti nan thei. Annih cu mithianghlimpawl rawngbawlsaknak ah an rak peaw zet. ¹⁶ Cuvek mipawl hnenah le zokhal kan hnaṭuanpi a si mi le nasazetih hna a ṭuantupawl hnenah tuhlutaw dingin ka lo ngen a si. ¹⁷ Stefanas, Fortunaṭas le Akhaikas an rak thlen ruangah ka lung a awi. Ziangahtile, nan rak tuah lo mipawl kha an rak pe thluh. ¹⁸ Ziangahtile, annih cun ka thlarau le nan thlarau cu tha thar an pe. Curuangah kha vek mipawl kha cu rak lawm uh. ¹⁹ Asia peng ih kawhhranpawl hmuahhmuah in cibai an lo buk. Akuila le Prisilla in, an inn ih a um mi kawhhranpawl thawn nasazetin Bawipa ah cibai an lo buk. ²⁰ Unaupawl hmuahhmuah in cibai an lo buk. A thianghlim mi hnamawknak thawn cibai bukaw uh. ²¹ Keimah, Paul in hi cibaibuknak hi ka kut roriin ka ngan. ²² Zokhal Bawipa Jesu Khrih a duhdaw lo asile, anih cu Anathema in um seh. Maranatha! ²³ Bawipa Jesu Khrih zangfahnak cu nan hnenah um seh. ²⁴ Khrih Jesu ih um mi nan zate hnenah ka duhdawtnak cu um hram seh. Amen.