Filipae

Na Kekedee Sa Paul Fua

Wane Famamana Ki ’I Filipae

’I Filipae te fere baita ana lofaa ’i Masedonia ne ta’ena kulu saea ana kula wane Grik ki.

Ana Acts 16 nia fata sulia kada sa Paul nia ’adomia fikute wane famamana ki fuana ka tatae mai laona fere ne. Sa Paul to laona beu ni kanie ana fere baita ’i Rom ana kada nia kedea na buko ne. Laona buko ne, sa Paul doria kai saea tangolana fikute wane famamana ki ’i Filipae, sulia kera kwai’adomi ana bali ana malefo. Sa Paul doria kera kai to kwaimani faida kwailiu. Ma nia ka saea fuada kera kai to marabibi dia sa Jesus. Nia saea laugo fuada ne manatalae kera ka to ngasi ana God, sui boroi ’ana kera ka dao to’ona ’afitaie, dia ne sa Paul dao to’ona ka suina. Ma nia ka fabasu kera fasia lekalae burina famanatalae susuke. Na famanata susuke, kera wane Jiu ne saea wane ki tafau kera kai rosuli taki sa Moses ma ’ole ’ungelae (circumcision) fua kera ka faeelea God. Boroi ma, sa Paul saea kulu ka fito’ona go kwaimanie baita God. Kulu saitamana kulu ’ado lea fainia sa Jesus, ma kulu saitamana kulu ka ’o’olo na ’i maana God, sulia kulu famamana sa Christ na. Ma nia nao si mamana dia kulu rosulia taki Jiu ki.

Ru talingai ki laona buko ne:

Maurilana sa Paul 1:1-26

Kulu ka leka burina maurilana sa Christ 1:27–2:18

Na farongoe sulia wane kwaimani sa Paul ki 2:19-30

God fa’o’olosia wane ki sulia famamanae kera ki 3:1–4:9

Fatae ana tangolae ki 4:10-23

¹Nau sa Paul fainia sa Timoti, na ro wane ni rao sa Jesus Christ ki. Karo kekede kau fua mulu wane ki tafau ne mulu famamana sa Jesus Christ, ma mulu ka to laona mae fere baita ’i Filipae. Karo kekede laugo fuana wane kwaitalai kamulu ki fainia wane ne kera kwai’adomi ana fikute wane famamana ki laugo.

²Nau ku foa fua ne God na Maa kia ma na ’Aofia sa Jesus Christ kai kwatea na kwaiofeie ma na aroaroe fua mulu.

Sa Paul foa fuada

³Nau ku tangoa ’asiana na God nau fua mulu, ana kada ki tafau ne nau ku manata to’omulu. ⁴Ma nau ku eele ’asiana ana kada nau ku foa fua mulu tafau, ⁵sulia nau ku manata to’ona kwai’adomie ki ne mulu sasida fuaku ana raoe ana Farongoe Lea, ana safalilana na mai kada mulu famamana, leleka ka dao ’i ta’ena. ⁶Ana kada nai, God nia safali ana raoe lea ne nia sasida ki ’i laona maurilamulu, ma nau ku saitamana nia kai faali’afua lau leleka ka fasuia na raoe nai ana fa dangi sa Jesus Christ kai oli mai ana. ⁷Nia ka bobola ne nau ku eele ’urinai suli kamulu, sulia nau ku kwaimani amulu, ma mulu ka kwai’adomi aku fainia na raoe ne God kwatea fuaku. Kamulu kwai’adomi aku ana kada nau ku to laona beu ni kanie, ma ana kada nau ku ’ainitalo ana na Farongoe Lea ma nau ku firu susia. ⁸Nau ku manata to’omulu ’asiana sulia na kwaimanie baita nau fua mulu dia laugo na kwaimanie sa Jesus Christ fua mulu. God alafafia na ru ne nau ku saea nia mamana.

⁹Nau ku foa laugo fua ne na kwaimanie kamulu kai bulao daudonga. Nau ku foa fua mulu kai saitamana lea ana God, ma mulu kai saitamana lea ana abulolae ne lea ma abulolae ne ta’a, ¹⁰fua ne mulu kai bobola fuana fililana ru lea ki ma ka ’o’olo. ’Urinai ne, mulu kai to ’o’olo ana fa dangi sa Jesus Christ kai oli mai ana. ¹¹Nau ku foa fua na maurilamulu ka ’o’olo tafau sulia na kwai’adomie ne sa Jesus Christ nia sasia fua mulu. Ma kada na maurilamulu nia ’o’olo ’urinai, wane ’oro ki kera kai tangoa God.

Na maurie mamana

¹²Wanefuta nau ki ’ae, nau ku doria mulu kai saitamana na ’afitaie be dao to’oku ki ana kada ne, nia ’adomi lea ’asiana aku fuana ’ainitalolae ana na Farongoe Lea. ¹³Sulia na wane ni omee ne kera folo ’i seki laona lume baita na kingi, ma wane ’oro ’e’ete ki, kera saitamana ga ’ada ana ne nau ku to laona beu ni kanie sulia nau na wane rao sa Jesus Christ. ¹⁴Ma sulia laugo ne nau ku to laona beu ni kanie, ru ne ka radua ’orolana wane ki ne kera famamana ’Aofia, fua ne kera ka farongo nonira’a ana Farongoe Lea, ma nao kera si mau.

^15-17Tani wane ’ainitalo ana sa Jesus Christ sulia kera kwaifi aku. Na manatada fua ’ainitaloe ana sa Jesus Christ nao si lea. Sulia kera doria ’ainitalolae kera ana sa Jesus kwate ma kera ka talingai ka liufi nau. Kera sasi ’urinai sulia kera doria kera kai kwatea lau tani ’afitaie fuaku kada ne nau ku to laona beu ni kanie. Ma tani wane lau, kera to ana na manatae wane lea ki fuana ’ainitalolae ana na Farongoe Lea. Kera ’ainitalo ania sulia na kwaimanie kera fuaku, ma sulia kera saitamana God ne fili nau fuana susilana na Farongoe Lea. ¹⁸Ma nia lea ga ’ana. Sui boroi ’ana na manatae wane kera ka lea naoma ka ta’a, kera ’ainitalo sulia sa Jesus Christ. Nau ku eele ’asiana, sulia kera ’ainitalo sulia sa Jesus Christ.

Ma na eele nau nao si sui, ¹⁹sulia nau ku saitamana mulu foa fuaku, ma na kwai’adomie na Anoeru sa Jesus Christ kai luge nau fasia laona beu ni kanie. ²⁰Nau ku doria, ma nau ku famamana ne nao nau si sasia ta ru ne kai kwate nau kai ’eke fafia maana God. Safali mai ’i nao leka ka dao ana kada ne, nau nao si mau fuana ’ainitalolae sulia sa Christ, ma nau nao si doria ne nau kai mau. Sui boroi ’ana nau ku mauri ’ua naoma nau ku mae, nau ku doria wane ki kai tangoa sa Jesus Christ sulia ru ne nau ku sasida ki.

²¹Fuana te ne wane ki ka mauri? Ma fuaku, nau ku mauri fuana raoe fua sa Jesus Christ. Ma dia nau ku mae, nia lea sulia nau kai to fainia sa Jesus Christ ’i langi. ²²Boroi ma nau si saitamana ta te ne nau ku filia. Sulia nau ku doria nau mauri ’ua, fua ne nau ku ulafu ’aku ana raoe fuana sa Christ. ²³Ma nau ku doria laugo nau ku mae, fua ne nau kai to fainia sa Jesus Christ, sulia nia lea ’asiana fuaku. Nau si saitamana te ne nau ku doria. ²⁴Boroi ma nia lea go ne nao nau si mae ’ua, fua nau ku ’adomi kamulu. ²⁵Nau ku saitamana ru nai, ma nia ne kwate ma nau ku saitamana nau kai mauri ’ua ’aku fai kamulu, fua ne nau ku fanikila na famamanae kamulu ki. Ma kada famamanae kamulu ki ngasi, mulu kai eele. ²⁶Kada nau oli kau siamulu, mulu kai tangoa sa Jesus Christ ka tasa sulia nau.

²⁷Ma dia ta te boroi ’ana ka fuli fuaku, abulolamulu kai ’o’olo ka leka sulia na Farongoe Lea sulia sa Jesus Christ. Mulu kai sasi ’urinai, ma dia nau ku leka kau siamulu naoma ka nao, nau kai rongo ga ’aku kau sulia falafala lea kamulu ki. Ma nau kai saitamana ne famamanae kamulu ki ngasi, ma mulu kai too ana te manatalae, ma te kwaidorie go fuana raoe oku fuana Farongoe Lea, fua ne wane ’oro ki kera kai famamana. ²⁸Nao mulu si mau ana malimae kamulu ki. Sulia ru ne fatainia na fuada, ne kera kai ngalia na kwaiketoie kera, ma mulu kai ngalia maurie firi. God kai sasi ’urinai. ²⁹Nau ku saea ru ne ki sulia God fili kamulu fua ne mulu kai famamana sa Jesus Christ, ma mulu kai nonifi laugo fuana. ³⁰’I nao mai, kamulu ada to’ona ne nau ku nonifi. Ma ana kada ne mulu rongoa kera sasi ’urinai laugo aku.1:30 Acts 16:19-40 Ma mulu ka nonifi laugo ’urinai.

Leka sulia falafala sa Christ

¹Nau ku saitamana ne okue kamulu fainia sa Jesus Christ ne fanikila kamulu, ma na kwaimanie nia fua mulu ne gwale kamulu. Ma nau ku saitamana laugo ana ne mulu ka ’ado fainia na Anoeru Abu, ma mulu ka kwai’ogiri, ma mulu ka kwaimani amulu kwailiu. ²Sulia ru nai ki, nau ku amasi kamulu, mulu kai kwatea manatalae kamulu ki ma kwaidorie kamulu ki ka alua na te ru, ma mulu ka kwaimani amulu kwailiu ka baita lau. Dia mulu sasi ’urinai, na eelelae nau ka fi baita lau. ³Ma nao kamulu si fulia lau ta ru sulia manatalamulu ne kamulu doria mulu kai baita, ma mulu ka doria tangolamulu talamulu. Boroi ma mulu kai fatu’ua kamulu talamulu, ma nia lea fua mulu kai manata fuana wane ’e’ete ki ka lea liufi kamulu talamulu. ⁴Mulu ka to fasia manatalae sulia te ki ne kamulu dorida, boroi ma mulu kai manata laugo sulia na kwaidorie wane ’e’ete ki. ⁵Manatalae kamulu ki kai dia na manatana sa Jesus Christ.

⁶Sui boroi ’ana sa Christ ne God mamana na, nao nia si manata fua nia ka to tari ’ana ana fulina fainia God.

⁷Nia lukasia na ana ru ki tafau, ma ka futa ana nonina wane, ma ka alua wane ni rao ’o’oni ga ’ana.

⁸Ma nia ka fatu’u nia ’ana talana.

Nia ro na ’ana sulia kwaidorie God, sui boroi ’ana kera ka foto’ia ana ’airarafolo ma ka mae.

⁹Ma sulia na ru ne, God ka fabaita nia ka tasa, ma ka kwatea na sataeru fuana ne ’initoa ka liufia sataeru ki tafau.

¹⁰Ma fuana na fa’initolae ana na satana sa Jesus, na ru mauri ki tafau ne kera to ’i langi, ma ’i ano, ma na fere wane mae ki, kera kai boruru fuana.

¹¹Ma kera tafau kera kai farongo ana sa Jesus Christ ne na ’Aofia, ma ana ru nai kera kai fa’initoa God na Maa.

Mulu kai tala madakwa dia na kwesu

¹²Nia ne wane kwaimani lea nau ki ’ae, nia lea ’asiana fua mulu kai rosulia na fatae nau ki fua mulu, dia be mulu sasia ana kada nau ku to fai kamulu. Ma ana kada ne, mulu kai sasi ngangata fua rolae sulia na fatae nau ki, ana kada nau ku to tau fasi kamulu. Nia lea fua te te wanea amulu kai sasi ngangata ’uria rolae sulia God ana fa’initoe. Ma mulu ka to ana ta tolae ne bobola fua wane ne God famaurida fasia ta’alae ki. ¹³Kamulu saitamana sasia ru ne sulia God nia rao laona mangomulu. Nia kwate ma mulu ka doria rolae sulia, ma nia kwate ma mulu kai bobola fua rolae sulia te ki ne nia doria mulu kai sasida.

¹⁴Ma ana ru ki tafau ne mulu sasida, mulu kai to fasia na ngunungunue fainia olisusue, ¹⁵fua ne mulu kai to ’o’olo, ma nao kera si dao to’ona ta ru fuana fafilamulu. Sui boroi ’ana mulu ka to ’ua laona molagali ne safitana wane ne abulolada ta’a, mulu to na dia wele God ki. Nia lea fuana mulu kai dia na kwesu ki ne tala fuada laona molagali rorodoa ne, ¹⁶sulia mulu farongo ana fatae ne kwatea na maurie firi fuada. Ma dia mulu sasi ’urinai, nau kai eele ka baita ’asiana ana fa dangi sa Jesus Christ kai oli mai ana, sulia raoe nai kamulu ki kai fatainia ne raoe nau ki ’i safitamulu nao si ’o’oni.

¹⁷Na raoe kamulu fuana Christ ma famamanae kamulu ki nia dia na afafue ne mulu kwatea fuana God. Ma dia God nia doria nau kai mae fua mulu, na mangoku kai dia na afafue ne kera alu oku ana fainia afafue kamulu ki. Dia nia ’urinai, nau kai eele laugo dia ne mulu eele sulia afafue ne mulu sasia. ¹⁸Ma ka ’urinai laugo, mulu kai eele fai nau.

Sa Timoti fainia sa Epafroditus

¹⁹Nau ku manata ngado ana ’Aofia kai ’adomi nau fua nau ku odua kau sa Timoti ’ali’ali siamulu, fua ne ana kada nia kai oli mai ’i seki, ma ka farongo nau ana na tolae kamulu ki, nau kai eele ’asiana. ²⁰Nao ta wane lau ne to fai nau ne kwaimani amulu ka dia sa Timoti. Nia doria ’asiana fua ka saitamana dia mulu to lea ga ’amulu ana mangomulu naoma ka nao. ²¹Wane ’e’ete ki, kera manata ga ’ada sulia na kwaidorie kera ki, ma ka nao lau na kwaidorie sa Jesus Christ. ²²Ma sa Timoti be kamulu saitamana raoe lea nia ki, sulia nia dia na wele mamana nau fuana ’adomilaku fua ’ainitalolae ana Farongoe Lea. ²³Nia ne, ana kada nau ku saitamana ta te ne kai fuli fuaku ’i seki, nau ku doria kwate nia ’ali’ali kau siamulu. ²⁴Ma nau ku famamana na ’Aofia kai sasia ka ngwaluda fuaku fua nau leka ’ali’ali laugo kau siamulu.

²⁵Ma nau ku manata laugo fua nau eta kwatea kau wanefuta kia sa Epafroditus, na wane be mulu kwatea mai ’i seki fua ’adomilaku. Nia rao fai nau fuana God, ma nia ka ’adomi nau, ma karo ka firu sualia malimae kulu ki. ²⁶Sa Epafroditus doria ’asiana adalae to’omulu tafau. Ma nia ka manata ’abero, sulia kamulu rongoa mai sae nia matai ’i seki. ²⁷Nia matai mamana, ma ka karangi mae. Boroi ma God ka manatai nia, ma ka gura nia na. ’Urinai, God ka manatai nau laugo, sulia dia ne nia mae na, ma liodilae nau kai baita lau. ²⁸Ma nia ne kwatea nau ku doria olitailana kau siamulu, fua mulu kai eele kada mulu ada to’ona. Ma nao nau si ’abero lau sulia. ²⁹’Urinai ne, mulu kai kwalo nia ana eelelae baita, sulia nia ne wanefuta kia sulia na famamanae kia ana na ’Aofia. Mulu kai fuusi baita laugo ana wane ki tafau ’uri nia. ³⁰Sulia nia nonimabe fuana maelae ma ka karangi mae ana kada nia rao fuana sa Jesus Christ. Nia ka kwai’adomi aku talamulu, sulia nia ’afitai fua mulu fua ’adomilaku ana kada ne.

Na ’o’oloe mamana

¹Wanefuta nau ki ’ae, mulu ka eele sulia ’adoe kamulu fainia na ’Aofia. Sui boroi ’ana nau ku kedea tafau fatae ne ki ’i nao, nia lea fuana nau ku kedea lau, sulia ne fatae nau ki kai ’adomi kamulu, kada ne tani wane ki kai sasi ’uria talai garoe amulu. ²Mulu kai susuli kamulu fasia wane ta’a nai ki. Kera abulo ta’a. Kera famanata kera ka saea fua ne kulu kai rosulia na taki ana ’ole ’ungelae fua ne kulu wane God ki. ³Kulu, ma nao lau kera, ne wane God ki na, sulia kulu fosia God ana Anoeru Abu, ma kulu ka eele sulia na ru ne sa Jesus Christ sasida fuaka ki. Nao kulu si fito’ona go falafala Jiu ki dia ’ole ’ungelae fua kulu ka dia wane God ki. ⁴Sui boroi ’ana nau ku rosulia na falafala nai ki, nao nau si fito’ona go ru nai ki. Ma dia sa ti ne kwaisae nia wane God sulia nia ka rosulia na falafala dia ’ole ’ungelae, nau na ne nau ku liufia ana rolae sulia falafala ’urinai ki. ⁵Kada kwalu maedangi ki burina nau ku futa mai ana, go kera ka ’ole ’unge na aku. Ma nau ku futa mai ana wane Jiu mamana, sulia nau ku leka mai fasia na kwalafa sa Benjamin. Ma nau ku leka ’o’olo na sulia na taki Jiu ki, sulia nau boroi ta wane laugo ana Farasi ki. ⁶Ma sulia na kwaidorie nau ’e nikila ’asiana fuana falafala Jiu ki, nau ku famalagaigaia wane ne kera famamana sa Jesus ki. Ma nau ku rosulia tafau na taki sa Moses ki, ma nao nau si garo ana ta taki.

⁷’I nao nau ku manata sae ru nai ki kera lea fuaku. Boroi ma ta’ena, nau ku saitamana ru nai ki ne ru ’o’oni ki ga ’ana, sulia na ru sa Jesus Christ sasida fuaku ki. ⁸Nia mamana! Nau ku dao to’ona ru ne nau ku sasida ’i nao ki, ru ’o’oni ki go ana tafau. Boroi ma na ru ne talingai ka mamana ne fua nau kai saitamana lea ana na ’Aofia nau sa Jesus Christ. Ma sulia nia ne kwate ma nau ku fasia ru ki tafau ne nau ku sasida ’i nao. Ma nau ku manata sulia ru nai ki dia ga ’ana ru ta’a ki. Nau ku sasi ’urinai fua nau ’ado fainia sa Jesus Christ, ⁹ma nau ku alua na te ru fainia. Nao nau si ’o’olo ’i maana God sulia na te ne nau talaku nau ku sasia fuana rolae sulia taki Jiu ki. Boroi ma God saea nau ku ’o’olo sulia na famamanae nau ana sa Jesus Christ. God na ne fa’o’olosia wane ki sulia famamanae kera ki. ¹⁰Na ru talingai ne nau ku doria na ne malingailana sa Jesus Christ fainia na nikilalae God ne fatainia ana tataelae nia fasia na maea. Ma nau ku doria laugo ’adolae fainia ana nonifie nia, ma nau ku sasi laugo dia ne nia mae. ¹¹Nau dori sasia ru ne ki fua God kai tae nau fasia maea.

¹²Nao nau si saea ne nau ku malingainia tafau ana sa Jesus naoma nau ku ’o’olo tafau na. Boroi ma nau ku faisusu ’uria malingailana sa Jesus Christ ma nau ku to ’o’olo tafau sulia nia fili nau fua sasilae ’urinai. ¹³Wanefuta nau ki ’ae, nau ku saitamana ru nai ki tafau nao si fuli ’ua fuaku. Boroi ma te ru na ne nau ku sasia, nau ku manata buro ana na ru ne suina ki ’i buriku, ma nau ku sasi ngangata ’uria daolae to’ona te ne nau si dao ’ua to’ona. ¹⁴’Urinai nau ku sasi ngangata na fua nau kai ngalia na kwaiarae ana God kada kai riisi nau ’uria ’i langi, sulia nau ku famamana sa Jesus Christ. Ma ru nai na ne kwaiarae nau.

¹⁵Kulu tafau go ne kulu nikila ana famamanae kia ki, kulu too laugo ana manatalae ’urinai ’i laona maurilaka. Ma dia tani wane amulu nao si ala go fafia ru ne nau ku saea ki, God ne kai fatai madakwa ana na taale ne ’o’olo. ¹⁶Aia, nia lea fua kulu ka rosulia ru mamana ne kulu ro na mai sulia ’i nao ki, leleka ka dao ana kada ne.

¹⁷Wanefuta nau ki, mulu leka na ’amulu burina falafala nau ki. Mulu ka sasi laugo dia sa ti ne kera leka ’o’olo sulia na falafala ne kalu fatainia fua mulu. ¹⁸Nau ku fata na fua mulu ana kada ’oro ki ’i nao, ne wane ’oro kera ka saea kera famamana sa Jesus Christ, boroi ma abulolada fatainia ne kera malimae ana Farongoe Lea sulia na maelana sa Jesus Christ ana ’airarafolo. Ma nau ku saea lau fua mulu ana angie ma kwaimanataie. ¹⁹Kera leka ga ’ada ’uria kula ni kwaekwaee. Na ru talingai fuada ne kwaidorie ana nonida. Nia lea fua kera ka ’eke sulia ru kera sasida ki, boroi ma kera eele ga ’ada sulida. Ma te ru go ne kera manata sulia ru laona molagali ne ’i ano ki. ²⁰Boroi ma kulu ne, na fere mamana kia nia ’i langi. Ma kulu ka kwaimakwali ana daolana mai na ’Aofia kia sa Jesus Christ ne famauri kia, ma nia kai oli mai fasia ’i langi. ²¹Ma nia kai talana nonika ne ngwatautau ma kai mae, ma nia kai kwatea nonika ka ngwasinasina dia nonina. Nia kai rokisi kulu ’urinai ana nikilalae baita ne nia too ana fuana gwaungaie fafia ru ki tafau.

¹Wanefuta nau ki ’ae, sulia ru ’urinai ki ne, mulu kai uu ngasi ana ’Aofia. Nau ku kwaimani ’asiana amulu, ma nau ku doria adalae to’omulu. Nau ku eele baita ’asiana suli kamulu.

Leka sulia na falafala ana aroaroe

²Iu, ma kamoro ni Iudia fainia ni Sintike, nau ku amasi kamoro fuamoro ka sui fasia olisusue, sulia kamoro ro waisasina na ana ’Aofia. ³Ma ’oe, na wane kwaimani nau laona raoe ’Aofia, nau ku gani ’oe fua ’oko ’adomia ro keni nai ki, sulia keroa rao nikila fai nau, ma sa Klement, ma fainia wane ’oro ki fuana ’ainitaloe ana Farongoe Lea. God kedea na satada tafau laona buko ana maurie firi.

⁴Mulu ka eele ana kada ki tafau sulia na okue kamulu fainia na ’Aofia. Ma nau ku saea lau, mulu ka eele!

⁵Mulu ka fatainia gwarimabelae fuana wane ki tafau, sulia na ’Aofia kai dao ’ali’ali na mai. ⁶Mulu to fasia na manata ’aberolae ana ta ru. Boroi ma mulu fosia lalau God, mulu ka gani ’uria te ki ne mulu bobo ’urida, ma mulu ka tangoa. ⁷Ma na aroaroe God kai to ’i laona maurilamulu ma ’i laona manatalae kamulu, fua mulu ka to fasia na ’aberolae ma na maue. Ma God kai kwatea na aroaroe nia fua mulu, sulia kamulu to ’ado fainia sa Jesus Christ. Ma na aroaroe nia nao ta wane si malingainia kali’afu ana.

⁸Wane kwaimani ki ’ae, na fatae ’isi nau fua mulu na ne. Mulu manata sulia ru mamana ki, ma ru ne wane ki fuusi baita ana, ma ru ’o’olo ki, ma ru ne falu fasia ta’alae, ma ru lea ki. ⁹Mulu rosulia na famanatae ne nau ku kwatea fua mulu. Ma mulu sasi sulia na abulolaku ne kamulu ada to’ona nau ku to ana, ma nau ku fata ana. Ma God ne kwatea aroaroe fuaka, nia kai to fai kamulu.

Sa Paul tangoda fua kwai’adomie kera ki

¹⁰Sulia na ’adolae nau fainia na ’Aofia, nau ku eele ’asiana fafia na kwatea be kamulu kwatea fuaku lau. Tau na mai ’afitai fua mulu ka fatainia kwaimanie kamulu ki fuaka, sulia nao mulu si to ana ta kadamanga fuana kwatelana. ¹¹Nao nau si ’uga go ne nau olikokoru ana ta ru. Sulia nau saitamana suina falafala fua nau ku eele firi. ¹²Ana tani kada ki, nau ku siofa. Ma ana tani kada, nau ku to ana ru ’oro ki. Ma nau ku susulia na te ne manata tolilae ana kada ki tafau, boroi ’ana kada ana abusue naoma ana fioloe, ma ana kada nau ku too ana ru ’oro ki naoma kada nau ku too ana bara ru ki. ¹³Nau ku bobola ga ’aku fainia sasilana ru nai ki tafau, sulia sa Jesus Christ ne fanikila nau.

¹⁴Ma sui boroi ’ana ka ’urinai, na kwai’adomie ne mulu kwatea fuaku ana kada nau ku too ana ’afitaie, nia lea ’asiana. ¹⁵Kamulu wane ’i Filipae ki, mulu saitamana tafau na, kamulu go wane famamana ki ne mulu ’adomi nau. Ana kada be mulu ka fi eta rongoa na Farongoe Lea, ana kada be nau ku leka fasi kamulu laona lofaa ’i Masedonia, nao lau ta fikute wane ne kera kwate malefo fuaku. Te fili kamulu go be mulu ’adomi nau. ¹⁶Ma ana kada nau ku doria kwai’adomie ki laona fere ’i Tesalonika, kamulu be mulu kwate malefo fuaku ana ro kada. ¹⁷Nau si fata lau ’uri fua ne nau ku ngali firi na ana te ki ne mulu kwatea fuaku. Boroi ma nau ku doria lalau na kwaiarae God fua mulu kai baita. ¹⁸Aia, nau ku ngalia ru ki tafau ne mulu kwatea mai fuaku, ma ka baita liufia ru nau ku dorida ki. Nau si doria na ta ru, sulia sa Epafroditus kwatea tafau na kwai’adomie kamulu fuaku. Ru nai ka dia ta afafue ne moko lea, ne God eele fafia. ¹⁹Ma God ne nau ku rao fuana, nia kai kwatea fua mulu ru ki tafau ne mulu bobo ’urida fasia ru lea ’oro nia ki. Nia kai kwatea ru nai ki fuaka sulia sa Jesus Christ. ²⁰Kulu tafau kulu tangoa God na Maa kia toto firi! Iu ka.

Fatae ’isi ki

²¹Nau ku kwatea kau fata lealae nau fua mulu tafau ne mulu famamana sa Jesus Christ. Ma na wane famamana ki ne kalu to kau ’i seki, kera tafau laugo kera kwatea kau na fata lealae kera ki fua mulu. ²²Na wane ki tafau ne kera famamana ne kera to ’i seki ’i Rom, ma ka tasa fasia wane kwaimani kia ki ne kera to ’i laona lume na kingi baita ’i Rom, kera kwatea laugo kau fata lealae kera ki.

²³Nau ku foa fua ne na ’Aofia sa Jesus Christ kai kwatea kwaiofeie nia fua mulu tafau.