Na Ruana Kekedee Sa Paul Fua
Wane Famamana Ki ’I Tesalonika
Nia nao si tau go ’i burina ne sa Paul kedea etana buko fuana wane famamana ki ’i Tesalonika, nia ka kedea laugo buko ne. Iu, na ru baita ne sa Paul fata susia na famanatalae ne wane ki kera saea sa Christ nia oli mai ka suina. ’Urinai sa Paul ka fata madakwa ana ne nia nao si mamana. Nia saea ’i naona sa Christ ka oli mai, na Wane Ta’a ana sa Saetan kai dao fatai mai.
Sa Paul saea fuana wane famamana ki, kera kai uu ngasi ana fitoe kera ki, ana kada ilitoe ki dao mai fuana famalagaigaida. Ma kera kai inau ana raoe ngangata, fua ne kera kai dao to’ona fanga fuada talada, ka dia sa Paul fainia ro wane kwaimani nia ki kera sasia. Ma kera ka inau ana raoe lea.
Ru talingai ki laona buko ne:
Famanatalae sulia olilana mai sa Christ 1:1–2:17
Famanatalae sulia raoe wane famamana ki fuana sasilana 3:1-18
11Nau sa Paul fainia sa Silas ma sa Timoti ne kalu kekede kau fua mulu wane famamana ki ’i Tesalonika, na wane God Maa kia ma fainia na ’Aofia sa Jesus Christ.
2Kalu foa fua God na Maa kia ma na ’Aofia sa Jesus Christ kai kwaiofei amulu ma kai kwatea na aroaroe fua mulu.
God kai ketoa wane ki ana kada sa Jesus Christ nia oli mai
3Wanefuta nau ki ’ae, nia bobola fua malu kalu ka ’idufa tangoa God suli kamulu. Ru nai nia bobola sulia na famamanae kamulu ki ne bulao ka baita, ma na kwaimanie kamulu fua mulu kwailiu bulao ka baita laugo. 4Ma sulia na falafala kamulu ’urinai, kalu fata lea suli kamulu fuana wane famamana God ki ana tani fere ki. Kalu fata lea sulia na ngangatae ana famamanae kamulu ki, sui boroi ’ana mulu ka dao to’ona na ’afitaie ’oro ki, sulia tani wane kera famalagaigai kamulu.
5Aia, mulu ka uu ngasi ana famamanae kamulu ki, sui boroi ’ana mulu ka dao to’ona ’afitaie ’oro ki, nia fatainia ne God kai ketoa wane ki tafau ana ’o’oloe. Nia ka kwate mulu kai bobola na fuana tolae laona ’initoe Nia, ne kera famalagaigai kamulu fafia. 6Ma kwaiketoilae God nia ’o’olo. Nia kai kwatea na nonifie fuana wane ne kera famalagaigai kamulu ana kada ne. 7Ma nia kai lafua na nonifie ki fasi kamulu ma kalu laugo. Nia kai sasi ’urinai ana kada na ’Aofia sa Jesus kai leka mai fasia ’i langi fainia na ’ainsel mamana nia ki, 8ma fainia meamea ana ere. Ma ana kada nai, nia kai kwatea kwaekwaee fuana sa ti ne kera noni’ela ana God ma kera nao si rosulia na Farongoe Lea sulia na ’Aofia kia sa Jesus. 9Na kwaekwaee nia fuada ne nia kai malangisida sulia dangi firi. Ma kera kai to fasia na ’Aofia fainia na raralana ma na nikilalae baita nia. 10Ma ru nai ki kai fuli ana kada ne nia mai ’ua ana fa dangi ne na ’Aofia kai oli lau mai. Nia kai oli lau mai laona molagali ne fua ne wane nia ki ne kera famamana, kera kai tango nia, ma kera kai fuusi baita ana. Ma mulu kai to laugo faida, sulia mulu famamana farongoe ne kalu farongo kamulu ana.
11Nia ne sasia ma kalu ka foa fua mulu ana kada ki tafau. Kalu foa fua God kai kwatea na abulolae kamulu ki ka bobola fainia na maurie ne nia fili kamulu ’uria. Ma kalu ka foa lau fuana nikilalae nia kai ’adomi kamulu fua mulu ka saitamana sasilana ru lea ne mulu doria sasilana ki. Kamulu doria sasilana ru lea nai ki sulia mulu famamana sa Jesus. 12Kalu foa ’urinai fua kamulu kai tangoa na ’Aofia kia sa Jesus, ma nia kai tango kamulu laugo. Ma na ru ne ki kai fuli sulia na kwaiofeie God ma na ’Aofia sa Jesus Christ.
2Na Wane Ta’a
1Aia, wanefuta ki ’ae, kalu doria mulu kai saitamana lea ana na olilana mai na ’Aofia kia sa Jesus Christ fainia na oku lakulu siana. Kalu amasi kamulu 2fasia rongolae sulia sa ti ne saea fua mulu ne na fa Dangi na ’Aofia kai oli mai ana, nia dao ka suina. Na fatae ’urinai kwate mulu ka manata ’abero ma mulu ka mau. Nao mulu si famamana fatae nai ki, sui boroi ’ana tani wane kera saea ne na Anoeru Abu ne farongoda, naoma kera saea ne na fatae nai ka safali mai fasi kalu ana kada kalu fata ana fatalana God, naoma kera ka saea ne kalu kekede mai sulia. 3Ma nao mulu si famamana fatae ki ne sakatafa mai fasia wane fatalada susuke ki. Sulia na ro ru ki ne kai fuli sui na maedangi ne sa Jesus ka oli mai ka fi dao. Etana ru ne, na wane ’oro ki kera kai abulo fasia God. Ma ruana ru ne na Wane Ta’a ana sa Saetan kai dao tafa mai, boroi ma God kai alua laona kula ni kwaekwaee. 4Wane Ta’a ana sa Saetan kai tatae sualia na mamala god ki tafau ne tani wane kera saea ana God, ma nia kai saea nia ’initoa ka liufia na ru ki tafau ne wane ki kera fosida. Ma nia kai gouru laona Beu Abu God, ma ka saea nia na ne God.
5Nau ku fata tafau na sulia ru ne ana kada be nau ku to ’ua mai fai kamulu. Ma alamia nao mulu si manata buro ’ua ana ’oto? 6Ma te ru ne susia Wane Ta’a nai. Mulu saitamana ka suina ru nai. Wane Ta’a nia bobola fainia kai dao mai ana kada God ’olea go fuana. 7Na nikilalae ana ta’alae rao agwa ga ’ana kada ne, ma nia ka to agwa ’ua, leka ka dao ana kada ne kera kai lafua na ru ne susia. 8Ana kada nai, na Wane Ta’a fi dao fatai mai. Sui, ana kada na ’Aofia sa Jesus nia dao, nia kai saungia Wane Ta’a nai ’ana na fatae ne leka mai fasia ngiduna, ma ana nikilalae ana raralana. 9Aia, na Wane Ta’a nai kai dao fatai ma nia too ana na nikilalae ana sa Saetan, ma nia kai sasia kwalukaela fanadae ne nia suke ga ’ana ’anida ki. 10Ma nia kai rao laugo ana kwalukaela sukee ta’a ki fua sukelana wane ne kera leka na ’uria kula ana maea firi. Kera kai mae sulia kera noni’ela ana na Farongoe mamana. Sulia dia kera famamana na Farongoe mamana, God saitamana ka famaurida. 11Ma sulia kera noni’ela ana na Farongoe mamana, God kai sasia kera ka famamana na ’ada na sukee baita Wane Ta’a nai. 12Ma sulia na ru nai, God kai ketoa sa tifaida ne nao si famamana go ana na Farongoe mamana ma kera ka eele ga ’ada fainia na garoe kera ki.
God fili kamulu fuana maurie
13Wanefuta ki ’ae, na ’Aofia kia nia kwaimani amulu ’asiana. Nia bobola fua kalu ka tangoa God ana kada ki tafau, sulia nia tau na mai ana safalilana, God fili kamulu na fua ka luge kamulu fasia na kwaekwaee. Nia luge kamulu ana na nikilalae Anoeru Abu ne fafalu kamulu. Ma God luge kamulu ana famamanae kamulu ana na Farongoe mamana. 14God nia sae kamulu fua mulu kai too ana maurie firi, ana kada be kalu ’ainitalo ana Farongoe Lea fua mulu. ’Urinai ne mulu kai ’ado ana ’initoe fainia na ’Aofia kia sa Jesus Christ. 15Ma sulia na ru ne ki na, wane kwaimani kalu ki, mulu kai fangasia famamanae kamulu ki, ma mulu kai dau ngasi ana famanatalae mamana be kalu farongo ana fua mulu, ma kalu kedea kau fua mulu.
16-17Kalu foa fua na ’Aofia kia sa Jesus Christ ma God na Maa kia ka radu kamulu, ma ka fanikila kamulu fua mulu kai sasi lea, ma mulu kai fata lea ana kada ki tafau. Sulia God kwaimani akulu, ma ka gwale kia firi, ma kulu ka kwaimakwali ana manata fitoe ana ru lea ki.
3Fo fua malu
1Wanefuta nau ki ’ae, te ru lau nau ku saea fua mulu, mulu kai foa fua malu, fua na ’ainitaloe kalu ana fatae na ’Aofia kai takalo ’ali’ali, ma na wane ’oro ki kera kai famamana, ma kera kai fata lea sulia, dia laugo ne mulu sasia sena. 2Mulu kai foa laugo fua God kai ada suli kalu fasia na wane ta’a ki. Sulia na wane ’oro ki nao si famamana Farongoe na ’Aofia. 3Boroi ma na ’Aofia, nia famamana ga ’ana ana fatae nia ki, ma nia kai fanikila kamulu ma ka ada suli kamulu fasia sa Saetan. 4Ma na ’Aofia kwatea kalu ka fitomulu ne mulu nonimabe ana rolae sulia na te ne kalu fata sulia fua mulu. 5Kalu ka foa laugo ne na ’Aofia ka ’adomi kamulu fua ne mulu kai saitamana lea ana na kwaimanie God, ma mulu kai ngasi ana famamanae kamulu ki, ka dia sa Jesus Christ ana kada nia liufia ’afitaie ki.
Nia bobola fua kulu ka rao
6Wanefuta ki ’ae, sulia na nikilalae ne na ’Aofia kia sa Jesus Christ nia kwatea fua malu, nia ne kalu ka fata totongai fua mulu ’uri: Mulu kai to fasia na wane famamana ne kera noni’ela ana raoe, ma kera ka aburongo ana na ru ne kalu famanata kamulu ’anida ki. 7Kamulu saitamana tafau na ne fulina kamulu ka sasi sulia na ru ne kalu sasia ki. Ana kada kalu to mai fai kamulu, nao kalu si noni’ela ana raoe. 8Ma kalu si ngali ’o’oni go ana ta fanga ana ta wane, boroi ma na ru ki tafau go ne kalu folida. Ana dangi ma rodo, kalu rao nikila fua nao mulu si dao to’ona ta ’afitaie ana adalae suli kalu. 9Kalu rao ’urinai, sui boroi ’ana kalu too ana nikilalae fuana ngali ’o’onilae ana fanga fasi kamulu. Kalu sasi ’urinai, fua ne mulu kai sasi sulia na falafala kalu ana raoe. 10Ma kada be kalu to fai kamulu, na famanatalae kalu fua mulu nia ’uri, “Sa ti boroi ’ana amulu ne noni’ela ana raoe, nao mulu si kwatea ta fanga fuana.”
11Kalu kekede ’urinai, sulia kalu rongoa tani wane amulu sena, kera noni’ela ana raoe. Ma kera ka liu ’o’oni ga ’ada fuana ’oifoloe ana raoe tani wane ’e’ete ki. 12Ana satana na ’Aofia sa Jesus Christ, kalu fata totongai kau fuada, ma kalu ka falamaada kau ne kera kai to ’o’olo ma kera kai sasia tani raoe fua ne kera ka ngalia ru ki ne kera bobo ’urida. 13Ma kamulu laugo wanefuta ki, nao mulu si noni kulua ana sasilana ru lea ki.
14Ma sa ti amulu ne si ro go sulia te ki ne kalu saea kau laona kekedee ne, mulu kai ada saitamana, ma nao mulu si ’ado fainia, fua nia kai ’eke. 15Ma ka ’urinai boroi ’ana, nao mulu si kwaisae nia ta malimae amulu. Mulu ka fata kwai’adomi ana, sulia nia ta wanefuta laugo amulu.
Fatae ’isi ki
16Kalu foa fua na ’Aofia, wane ni kwatelana aroaroe fuaka, nia kai kwatea aroaroe fua mulu ana kada ki tafau, ma kai to fai kamulu.
17Ma nau sa Paul ne, nau tala kedea na ru ’isi ne ki. ’Urinai nau ku fasuia na kekedee nau ki tafau. Ma nia ka fatainia ne kekedee ne leka mai fasi nau.
18Nau ku foa fua na kwaiofeilae na ’Aofia kia sa Jesus Christ kai to fai kamulu tafau.