1 Jon

Na Etana Kekedee Fasia

Sa Jon

Na lifurongo sa Jon na ne kedea buko ne. Nia ta te wane ana akwala ma ro fafurongo be sa Jesus ki, ma nia be kedea laugo Farongoe Lea sa Jon. Laona kekedee ne, nia saea fuana wane famamana ki kera kai uu ngasi ana falafala God ki, ma kera ka madafia famanatalae susuke ki. Ana kada nai, tani wane susuke kera saea sa Jesus nao si koso mai ana noni wane mamana. Sa Jon doria wane famamana ki fua lekalae burina famanatalae sa Jesus Christ be lifurongo ki fata na mai sulia. Na lifurongo be ki, kera ada to’ona na sa Jesus kada nia to. Ma kera ka bobola fuana famanatalae sulia.

Na ru talingai ki laona buko ne:

Sa Jesus Christ ne na Fatae ana Maurie 1:1-10

Na fatae totongai sulia na kwaimanie 2:1-17

Na Malimae sa Jesus Christ 2:18-29

Kwaimanie fua mulu kwailiu 3:1-24

Na wane famanata susuke ki 4:1-6

God fatainia na taale fua kulu ka kwaimani ’akulu kwailiu 4:7-21

Na fitoe kulu ana sa Jesus liufia na molagali 5:1-21

Sa Jesus Christ ne na Fatae ana Maurie

¹Nau ku kekede kau fua mulu sulia na Fatae ana maurie. Ma nia to ’ua na mai ana safalilana molagali. Boroi ma kada ne, kalu lifurongo ki rongoa na, ma kalu ka ada to’ona na ana maamalu. Ma kalu ka samo na to’ona ana ’abamalu. ²Na Maurie mamana ne ka alua na wane, ma kalu ka ada to’ona na. Nia ne kalu ka fata sulia, ma kalu ka farongo kamulu sulia na Maurie firi ne nia to fainia God na Maa. Ma God ka fatainia na Maurie mamana ne fua malu. ³Kalu ada to’ona ma kalu ka rongoa na Christ ne na Fatae ana Maurie mamana nai, ma kalu ka farongo laugo ana fua mulu, fua ne mulu kai ’ado fai kalu laona maurie ne kalu to ana fainia na Maa ma sa Jesus Christ na Wele nia. ⁴Ma kalu kedea na ru ne ki fua mulu fua na eelelae kulu kai to firi.

Tolae laona madakwalae

⁵Ma na farongoe ne kalu rongoa fasia na Wele God ma kalu ka saea fua mulu ne ’uri: God na madakwalae sulia nia lea ka tasa ’asiana, ma ka nao ta maerodo ana. ⁶Ma dia kulu saea ne kulu ’ado na fainia God, ma kulu ka to ’ua ga ’akulu laona maerodo, kulu suke ’asiana ana fatalaka, ma falafala kulu ki nao si to sulia mamanae. ⁷Boroi ma dia kulu to laona madakwalae, dia God ne nia to laona madakwalae, ’urinai kulu ’ado fai kulu kwailiu, ma na maelana sa Jesus, na Wele nia, ka fafalu kia fasia ta’alae ki tafau.

⁸Ma dia kulu saea nao kulu si fulia go ta garoe, kulu suke kulu tala kulu. Dia kulu fata ’urinai, tama nao kulu si saitamana go na mamanae God. ⁹Boroi ma dia kulu fulangainia na garoe kia ki fuana God, nia kai manatalugea garoe kia ki, ma ka fafalu kia fasia na ta’alae ki tafau, sulia nia kai famamana na eta fata nia fua sasilana na ru nai, ma nia ka sasia na ru ’o’olo. ¹⁰Ma dia kulu saea nao kulu si fulia go ta garoe, tama kulu saea God na wane susuke go ana, ma na fatalana God ka nao si to go laona maurilaka.

Christ nia lafua na ta’alae kia ki

¹Wele nau ki ’ae, nau ku kedea ru ne ki fua mulu, fua ne mulu kai to fasia abulo ta’alae. Boroi ma dia ta wane ka abulo ta’a, sa Jesus Christ saitamana ’adomi nia. Sulia nia ne wane ’o’olo, nia saitamana ka gania Maa kia fua ’adomi lakulu. ²Ma sa Jesus Christ na ne afafue fua lafulana ta’alae kia ki. Ma nao lau ta’alae kia ki taifilia go, boroi ma ta’alae wane ki tafau.

³Ma dia kulu rosulia fata totongaie God ki, kulu ka saitamana mamana ana ne kulu saitamana God. ⁴Ma na wane ne saea nia saitamana God, boroi ma nao nia si rosulia go na fata totongaie nia ki, na wane nai nia suke ’asiana, ma nao nia si saitamana go mamanae God. ⁵Sui boroi ’ana sa ti ne ka rosulia fatalana God, nia na wane ne kwaimani mamana ana God. Ma ru ne fatainia ne kulu ’ado fainia God nia ’uri: ⁶Sa ti ne saea nia ’ado fainia God, nia kai sasi sulia na falafala sa Jesus Christ.

Na fatae totongai sulia na kwaimanie

⁷Wane kwaimani nau ki ’ae, na fatae totongai ne nau ku kedea kau fua mulu, nao lau ta ru falu, boroi ma na fatae totongai ’ua be mulu saitamana ’ua na mai, ana safalilana kada mulu famamana. Ma na fatae totongai nai na ne farongoe be mulu rongoa ka suina, ne mulu kai kwaimani amulu kwailiu. ⁸Ma na fatae totongai nai ne nau ku kedea kau fua mulu ne falu laugo, sulia maurie sa Christ ma na maurie kamulu ne fatainia na mamanae ana fatae totongai nai, sulia na maerodo karangi suina, ma na madakwalae mamana ka tala na laona maurilamulu.

⁹Ma sa ti ne ka saea nia to laona madakwalae God, boroi ma nia malimae ana wanefuta nia, nia to ga ’ana ’ua laona maerodo. ¹⁰Ma sa ti boroi ’ana ne kwaimani ana wanefuta nia, nia to laona madakwalae God. Ma nao ta ru laona maurilana saitamana sasia nia ka fulia ta ru garo. ¹¹Ma sa ti ne nia malimae ana wanefuta nia, nia to ’ua laona maerodo. Ma nia ka leka laona maerodo, ma nao nia si saitamana na kula ne nia leka ’uria, sulia na maerodo farodoa na maana.

Nao mulu si doria ru ta’a ki laona molagali ne

^12-14Wele nau ki ’ae, nau ku kekede fua mulu, sulia God nia manatalugea na ta’alae kamulu ki sulia sa Christ, ma kamulu saitamana God na Maa. Ma nau ku kekede fua mulu na maa ki, sulia ne mulu saitamana sa Christ ne nia to ’ua na mai ana safalilana molagali. Ma nau ku kekede fua mulu wane fi baita ki, sulia mulu nikila, ma na fatalana God ka to amulu, ma mulu ka liufia na ana sa Saetan ne ta’a.

¹⁵Nia ne nau ku saea fua mulu, nao mulu si kwaimani ana falafala ta’a ki ana maurie ne ma ru ta’a ki laona molagali. Dia mulu kwaimani ana molagali, nao mulu si kwaimani ana God na Maa. ¹⁶Na kwaidorie fuana ru ta’a ki, ma ru ne wane ki kera ada to’ona ma kera ka doria, ma toorue ne wane ki manatada lafuda fainia, ma ru ta’a ki tafau laona molagali, nao ta ru ada si leka go mai fasia na Maa. Kera leka tafau go mai fasia na molagali. ¹⁷Boroi ma na molagali ma ru laona ki tafau ne wane ki kera doria kai funu. Boroi ma sa ti ne sasi sulia na kwaidorie God, nia kai too ana maurie firi.

Na Malimae sa Jesus Christ

¹⁸Wele nau ki ’ae, suilana molagali nia karangi na! Ma mulu rongoa tafau na be na Malimae sa Jesus Christ kai dao mai. Ma ana kada ne, malimae ’oro nia ki kera dao na. Nia ne, kulu ka saitamana ne suilana molagali nia karangi ka dao na. ¹⁹Malimae nai ki kera leka na fasi kulu, sulia nao kera si mamana go laona fikute wane famamana kulu. Ma dia kera to laona fikute wane famamana kulu, kera ’ado ga ’ada ’ua fai kulu. Boroi ma, kera leka na fasi kulu ’urinai, nia fatainia ne kera tafau nao lau wane mamana ki ana fikute wane kulu.

²⁰Boroi ma fua mulu, sa Christ na wane abu nia kwatea na Anoeru Abu, fua ne kamulu tafau go mulu kai saitamana na mamanae. ²¹Nau ku kekede fua mulu, nao lau sulia ne mulu ulafusia na mamanae. Nau ku kekede fua mulu, sulia mulu saitamana na mamanae, ma mulu ka saitamana laugo ne nao ta sukee si leka mai fasia na mamanae.

²²’Uri ma sa ti ne na wane susuke? Ta wane boroi ’ana ne saea sa Jesus nao lau wane famauri ne God filia. Na wane ’urinai, nia ne na malimae sa Jesus Christ, sulia nia noni’ela ana God na Maa ma na Wele nia. ²³Ma wane ki tafau ne kera noni’ela ana na Wele, kera noni’ela laugo ana na Maa. Boroi ma wane ki tafau ne kera saea kera famamana na Wele, kera ’ado laugo fainia na Maa.

²⁴Mulu konia laona manatamulu na farongoe ne mulu rongoa ’ua na mai. Ma dia mulu konia na farongoe nai, mulu kai ’ado fainia na Wele ma na Maa sulia dangi ki. ²⁵’Urinai kulu ka too ana na maurie firi ne sa Christ eta fata ana fuana kwatelana fuaka.

²⁶Nau ku kedea kau na ru ne ki fua mulu, fua mulu kai madafia na wane ne kera sasi ’uria suke lamulu ki. ²⁷Boroi ma fua mulu, sa Christ nia kwatea na Anoeru Abu. Nao mulu si nani na ’uria ta wane ne kai famanata lau amulu, sulia na Anoeru Abu to na fai kamulu. Ma na Anoeru Abu ne sa Christ kwate fua mulu, nia famanata kamulu na ana ru ki tafau. Ma ru ki tafau ne nia famanata kamulu ana nia mamana, ma nao si garo. Nia ne mulu kai ’ado fainia sa Christ, dia na Anoeru Abu famanata kamulu ana.

Kulu na wele God ki

²⁸Wele nau ki ’ae, mulu ’ado fainia sa Christ, fua ne ana kada nia kai oli mai, nao kulu si mau, ma nao kulu si agwa lau fasi nia ana ’ekelae ana fa Dangi nia kai dao ana. ²⁹Mulu saitamana sa Christ nia ’o’olo. Nia ne, mulu ka saitamana laugo wane ki tafau ne kera sasia na ru ’o’olo ki, kera ne wele God ki.

¹Mulu manata basi sulia na kwaimanie God na Maa fuaka! Na kwaimanie nia baita ’asiana, nia ne nia ka sae kulu ana wele nia ki, ma nia mamana na. Na wane laona molagali ki nao kera si saitamana ne kulu wele God ki, sulia nao kera si saitamana God. ²Wane kwaimani nau ki ’ae, kulu wele God ki na, ma God nao si fatainia ’ua fuaka ne nia kai rokisi ’uta akulu. Boroi ma kulu saitamana ana kada ne sa Jesus Christ kai oli mai, kulu kai dia nia, sulia kulu kai ada to’ona mamana na. ³Ma wane ki tafau ne kera kwaimakwali ’urinai ana sa Christ, kera susuli kera talada fua kera ka to falu, dia sa Christ ne nia falu.

⁴Ma wane ki tafau ne kera abulo ta’a, kera ’oia taki God ki, sulia ne abulo ta’alae na ne ’oilana taki God ki. ⁵Ma mulu saitamana na ne, sa Jesus Christ nia leka mai fua ka lafua ta’alae kulu ki, ma nia nao si too ga ana ta ta’alae. ⁶Ma sa tifaida ne kera ’ado fainia sa Christ, nao nia si to tari ga ’ana fuana abulo ta’alae. Ma sa ti ne ka to tari ga ’ana fuana abulo ta’alae, nao nia si malingainia ma nao si saitamana sa Christ.

⁷Wele nau ki ’ae, mulu si famamana ta wane ne suke kamulu sulia ru ne: Sa ti ne sasi rulana ’o’olo, nia ’o’olo ’i maana God, dia laugo sa Christ ne nia ’o’olo. ⁸Ma sa ti ne ka to tari ga ’ana fua abulo ta’alae, nia na wele sa Saetan, sulia sa Saetan abulo ta’a safali na mai ana safalilana molagali. Aia, na Wele God nia leka mai fuana takalongailana na ru ne sa Saetan sasida ki.

⁹Ma wele God ki tafau, nao kera si to tari ga ’ada ana na abulo ta’alae, sulia kera too na ana maurie God ani kera. Ma ka ’afitai fua kera to tari ga ’ada fua abulo ta’alae, sulia God na ne Maa kera. ¹⁰Nia ne ka fatainia na ’e’etelana wele God ki tafau fasia wele sa Saetan ki: Ta wane ne nao si abulo ’o’olo, ma nao si kwaimani ana na wanefuta nia, nia nao lau na wele God.

Kwaimanie fua mulu kwailiu

¹¹Na farongoe be mulu rongoa na mai ana safalilana nia ’uri: Kulu kwaimani akulu kwailiu. ¹²Ma nao kulu si dia lau sa Kein, na wane sa Saetan, be nia ka saungia na sasina sa Abel. ’Uta ne sa Kein ka saungia? Sulia na ru sa Kein sasida ki kera ta’a, ma na ru sa Abel sasida ki kera ’o’olo.3:12 Jenesis 4:1-16¹³Wane kwaimani ki ’ae, nao mulu si kwele, dia wane ta’a ki laona molagali kera malimae amulu.

¹⁴Kulu saitamana na ana na ru ne: ’i nao mai, kulu to ’i farana nikilalae ana maea, boroi ma kada ne kulu too na ana maurie firi. Kulu saitamana na ru nai, sulia kulu kwaimani ana wanefuta kia ki. Ma sa ti ne nao si kwaimani ana na wanefuta nia, nia to ’ua farana nikilalae ana maea. ¹⁵Ma dia sa ti ne ka malimae ana na wanefuta nia, nia na wane sauwanee. Ma mulu ka saitamana ne wane sauwanee nao si too ana maurie firi.

¹⁶Kada sa Jesus Christ nia mae fuaka, nia fatainia na falafala fua ne kulu ka kwaimani ana wane ki. Nia lea fua kulu ka nonimabe fua maelae fuana wanefuta kia ki. ¹⁷Dia ta wane ne too ana ru ki tafau ne nia bobo ’urida, ma nia ka ada to’ona na wanefuta nia ka bobo ’uria ta ru, boroi ma nao nia si manataia go na wane nai, ma nao si ’adomia go, nia ’afitai ka fata mamana ne nia kwaimani ana God. ¹⁸Wele nau ki ’ae, nao kulu si kwaimani ga ana fatae ’o’oni. Kulu kai fatainia na kwaimanie mamana kia ana ru ne kulu sasida ki.

¹⁹Kada kulu kwaimani ’urinai, nia ne kwate kulu ka saitamana ne kulu too ana na mamanae, ma nao kulu si manata ’abero kada kulu fosia God. ²⁰Dia na manatalakulu nia keto kia, kulu saitamana manatana God ne baita ka liufia na manatalakulu, ma nia saitamana ru ki tafau. ²¹’Urinai wanefuta lea ki ’ae, dia manatalakulu nao si keto kia, nao kulu si mau kada kulu fosia God. ²²Ma kulu ka ngalia ta te boroi ’ana ne kulu gania God ’uria, sulia kulu rosulia fatae totongai nia ki, ma kulu ka sasia ru ne faeele nia ki. ²³Aia, na fatae totongai nia ka ’uri: Kulu famamana sa Jesus Christ na Wele nia, ma kulu ka kwaimani akulu kwailiu, dia be sa Jesus Christ nia fata totongai mai ana fua kulu. ²⁴Ma sa ti ne ka rosulia fatae totongai God ki, nia ’ado ana God, ma God ka ’ado laugo ani nia. Ma sulia na Anoeru Abu ne nia kwatea fuaka, kulu saitamana na ne God nia ’ado akulu.

Na Anoeru mamana ma na anoeru susuke

¹Wane kwaimani nau ki ’ae, nao mulu si famamana na fatae ana wane ki tafau ne kera saea kera too ana na Anoeru Abu. Boroi ma mulu ilito’oda basi fua mulu kai dao to’ona dia ne anoeru ne kera too ana nia safali mai fasia God. Sulia na profet susuke ’oro ki kera leka na ana kula ki tafau. ²Mulu kai saitamana ne na Anoeru Abu nia ana naoma ka nao ne ’uri: Wane ki tafau ne farongo ana sa Jesus Christ ne leka mai ma ka alua na wane, na wane nai nia too ana Anoeru ne leka mai fasia God. ³Boroi ma dia ta wane ne tofea na ru nai sulia sa Jesus, nia si too ga ana na Anoeru ne nia leka mai fasia God. Na anoeru ne nia too ana, nia leka lalau mai fasia na Malimae sa Jesus Christ. Ma mulu rongoa ka suina ne na Malimae sa Jesus Christ kai dao mai, ma ana kada ne nia to na laona molagali.

⁴Wele nau ki ’ae, kamulu na ne na wane God ki, ma mulu ka liufia profet susuke ki. Sulia na Anoeru Abu ne to ani kamulu, nia nikila ka tasa ana sa Saetan ne nia to ana wane ta’a ki laona molagali. ⁵Ma profet susuke nai ki, kera fata sulia na ru ana ta’alana na molagali, ma na wane ta’a ne laona molagali ki kera ka rosulida, sulia profet ne ki kera wane ana unita wane ta’a laona molagali ne. ⁶Boroi ma kulu na ne wane God ki. Ma sa ti ne saitamana God, nia ka rosuli kulu. Ma sa ti ne nao lau na wane God, nao nia si rosuli kulu. Nia ne sasi kulu ka ada saitamana na ’e’etelana ’i safitana na Anoeru mamana ma na anoeru susuke.

Na kwaimanie nia safali mai fasia God

⁷Wane kwaimani nau ki ’ae, kulu kwaimani akulu kwailiu, sulia na kwaimanie nia safali mai fasia God. Ma sa ti ne ka kwaimani, nia na ne wele God, ma nia ka saitamana laugo ana God. ⁸Ma sa ti boroi ’ana ne nao si kwaimani, nao nia si saitamana God, sulia God ne nia kwaimani. ⁹Ma God ka fatainia na kwaimanie nia fuaka ana kwatelana mai te Wele mutai nia laona molagali, fua ne kulu ka too ana mauri mamana suli nia. ¹⁰Aia, na kwaimanie mamana nao lau ne kulu kwaimani ana God, boroi ma God ne kwaimani akulu, ma nia ka kwatea mai na Wele nia fua nia dia na afafue fua nia ka manatalugea ta’alae kia ki.

¹¹Wane kwaimani nau ki ’ae, sulia God nia kwaimani akulu ’urinai, kulu ka kwaimani laugo akulu kwailiu. ¹²Nao ta wane si ada to’ona ’ua God. Boroi ma dia kulu kwaimani akulu kwailiu, God ka ’ado fai kia ma na kwaimanilae nia kai fatai mamana laona maurilakulu.

¹³Ma kulu ka saitamana ne kulu ’ado fainia God ma nia ka ’ado fai kulu, sulia nia kwatea na Anoeru Abu nia fuaka. ¹⁴Ma kalu ka ada to’ona na Wele nia, ma kalu ka saea fuana wane ki ne God na Maa nia kwatea na mai fua ne ka famauria wane ki tafau laona molagali. ¹⁵Ma dia ta wane ka fata fola ana sa Jesus ne na Wele God, nia ’ado fainia God, ma God ka ’ado laugo fainia. ¹⁶Ma kulu saitamana na, ma kulu ka fito’ona na kwaimanie ne God nia too ana fuaka.

God ne na kwaimanie, ma sa ti ne ka kwaimani, nia ka ’ado na fainia God, ma God ka ’ado fainia. ¹⁷Kulu saitamana ne kwaimanie God nia ’o’olo na laona maurilakulu kada kulu nao si mau ana God ana fa dangi nia kai keto kulu. Kulu nao si mau, sulia kada nai ne kulu to laona molagali ne, maurilakulu nia dia na maurilana sa Jesus Christ ¹⁸Ti boroi ’ana ne God nia kwaimani ana, nao nia si mau. Kada kwaimanie ’e ’o’olo laona maurilakulu, nao kulu si mau na. Boroi ma sa ti ne nia mau ana kada ki sui, nia mau ana kwaekwaee, ma ru nai fatainia ne kwaimanie God nia nao si ’o’olo ’ua laona maurilana.

¹⁹Kulu kwaimani akulu kwailiu sulia God na ne eta kwaimani akulu. ²⁰Dia ta wane ne saea nia kwaimani ana God, boroi ma nia ka malimae ana na wanefuta nia, nia na wane susuke ga ’ana. Dia nao nia si kwaimani ana wanefuta nia, na wane ne nia ada to’ona, tama nia ’afitai ’asiana fua nia ka kwaimani ana God ne nao nia si ada to’ona. ²¹Ma na fatae totongai ne God kwatea fuaka nia ’uri: Sa ti boroi ’ana ne ka kwaimani ana God, nia ka kwaimani laugo ana na wanefuta nia.

Fitoe kulu ki ana sa Jesus liufia na molagali

¹Wane ki tafau ne kera famamana ne sa Jesus nia na Christ, na wane ne God filia, kera na ne wele God ki. Ma wane ki tafau ne kwaimani ana na Maa, kera ka kwaimani laugo ana wele nia ki. ²Aia, kulu saitamana ne kulu kwaimani ana wele God ki kada kulu kwaimani ana God, ma kulu ka rosulia fatae totongai nia ki. ³Ma dia kulu kwaimani ana God, kulu ka fatainia ana rolae sulia fatae totongai nia ki. Ma fatae totongai nia ki si ’afitai go fua kulu, ⁴sulia ne wele God ki tafau, kera liufia ta’alae ki laona molagali. Ma kulu ka liufia na ta’alae sulia na famamanae kia ana sa Jesus. ⁵Taifilia go wane ne kera famamana sa Jesus na Wele God, kera liufia na ta’alae.

Na farongoe sulia sa Jesus ne mae fuaka

⁶Sa Jesus Christ na wane ne nia leka mai fainia kafo ana siuabue ma ’abu ana maelana. Nao nia si leka mai fainia kafo go taifilia, boroi ma nia leka mai fainia ro ru nai ki tafau go, kafo ma ’abu. Ma na Anoeru Abu ka farongo laugo ana, sulia na Anoeru nia fata ana na mamanae. ⁷Olu ru ne ki kera fatai madakwa ana sa Jesus fuaka: ⁸Na Anoeru Abu, ma kafo, ma ’abu. Ma olu ru nai ki, kera fatainia go te ru.

⁹Kulu famamana fatalana na wane. Boroi ma na fatalana God ne nikila ka tasa, ma nia ka fata famamana tafau sulia na Wele nia. ¹⁰Sa ti ne ka famamana Wele God, nia ka famamana te ne God nia faorai ana. Boroi ma sa ti ne nao si famamana faoraie God, nia saea God na wane susuke, sulia nao nia si famamana te ne God saea sulia na Wele nia. ¹¹Ma fatae ne God ka famamana sulia na Wele nia ne ’uri: God kwatea na maurie firi fuaka, ma na maurie ne ka safali mai fasia na Wele nia. ¹²Ma sa ti boroi ’ana ne ’ado fainia na Wele God, nia too ana maurie firi. Ma sa ti ne nao si ’ado fainia na Wele God, nia nao si too laugo ana maurie firi.

Maurie firi

¹³Nau ku kedea na ru ne ki fua mulu wane ne famamana Wele God, fua ne mulu kai saitamana ne mulu too na ana maurie firi. ¹⁴Ma kulu saitamana lea ana ne God rongoa folae kia ki, ana kada kulu gani ’uria ta ru ne leka sulia na kwaidorie nia. ¹⁵Nia rongo kia ga ’ana ana kada ki tafau ne kulu gani ana. ’Urinai, kulu saitamana laugo ne nia kwatea fuaka na te ne kulu gania fasia.

¹⁶Ma dia ’oe ada to’ona ta wane famamana nia abulo ta’a, boroi ma God nao si kwate nia go ’uria kula ni kwaekwaee sulia ta’alae ne nia fulia, ’oe foa fuana, go God kai famauri nia. Boroi ma tani ta’alae, God kai kwatea ti ne sasida ’uria kula ni kwaekwaee. Tifaida ne sasia ta’alae nai ki, nao nau si saea fua mulu ka foa fuada. ¹⁷Na ru ta’a ne wane ki sasida, kera na abulo ta’alae. Boroi ma tani abulo ta’alae nao si talaia wane ki ’uria kula ni kwaekwaee.

¹⁸Kulu ka saitamana wele God ki nao kera si to tari ana abulo ta’alae, sulia sa Jesus na Wele God nia ada sulida, ma sa Saetan ne ta’a nia ’afitai ’asiana ka sasia ta ru ka falida.

¹⁹Aia, kulu saitamana na ne kulu wane God ki, ma sa Saetan ka gwaungai fafia tani wane ’e’ete ana molagali ne. ²⁰Ma kulu ka saitamana laugo ne Wele God nia leka na mai, ma ka kwatea na malingai rue fuaka, fua ne kulu ka saitamana na God mamana. Ma kulu ka ’ado fainia na God mamana sulia kulu ’ado fainia sa Jesus Christ na Wele nia. Nia na ne God mamana, ma nia kwatea maurie firi fuaka.

²¹Wele nau ki ’ae, mulu ada suli kamulu talamulu fasia na ru ne tani wane kera saea ana god ki, boroi ma nao lau na God mamana.