Titus

Titus

¹ Miy mi Pawlu mi sàay Fay, miy kèrge yèk yey. Mi nit yey tèem Yeesu Kristu ɗi ngam ha a nit ây carri daw Fay aw goosi, ha mi cèngnini daw yèk takundi yey ’mèmsi ni tolnji Fay. ² Tèem yey gòyge a jàk dànda gûyrra tâam timgbàri. Fay tâa ti rèengde ba gi, wasnage gûyrra maan diga mgbàr màrra. ³ A mgbàr yey gòyni gi, lòni nà yèk wàa a Yèk Kâwrra. Fay Tooy saanum worro gàagim mi sak yèk maan, ey hîigim tèem yey. ⁴ Mi kèbumfarre Titus, hàm mum takundi a yèk goosum worro kpolo. Nge Fay Tooy Ɓèl ni Yeesu Kristu Nitsaanum worro aw hîim mbâr waw ni tâam mbâri! ⁵ Mi woome nà a Kereta, ngam ha mu mbangsi jày ngaske tèerra, ngam ha mu cat daw toonji ây da nit goosum ây, mu ii daw a riiy ây pî, kà yey kàlum dum nà mgban gi. ⁶ Toonji nit goosum ây ta e tâa ni yèk kana a hak wàa ba, e tâa ni kin kpolo. A hàm ta wàa sey aw tâa ni goosum di Fay, ta aw tâa ni yèk makta a hak waw ba. Dikri waw sey e tâa mbâra, aw rak tuy. ⁷ Nit tiɗàm kpees waw da nit kimjum ây ta e tâa ni yèk kana a hak wàa ba, ngam ey faarre tèem Fay. Ta e tâa nit ’misum hay ba, koo nit anda ngòlnji, koo nit râmrum mbàl, koo nit hàargum gbàaci, koo nit yiɗum kpàarra jày ni tèem makta ba, ⁸ amma e tâa nit ngota ni-wooy ây, nit yiɗum jàk mbâri, nit dànda ni hakkilo, nit gòyrra ɗèm, nit tolla Fay, nit mòosum hak wàa. ⁹ Sey e tâa nit mòorra yèk takundi yey kàlnjuwan gi. Hû go kpàa ge kpàa mgbèngda da nit ây kana ni yèk mbâriya gi, su ge sun daw da nit hàanjum ây. ¹⁰ Ngam a nit hàanjum ây aw dii dèy, hayye a tîim ni-Yude ây goose gi. Aw yèergirre yèy ɓa hû go, aw rûfrirre da nit ây ni yèk waw èege còycum. ¹¹ Ndika njangda yèy da nit ây kà yey gi! Aw mboysirre gbaa lang da nit ây kana, ni kàlnjum jàk yey tâa ti gesi nirri e kàlnji ba, ha aw kpàa jày ngam hak waw. ¹² Nit kana a tîim waw lòni nà yèy mgban, gàaye: A ni-Kereta ây aw rèengde koo ningàa, aw dii kà jàk mòorgum ây maktiya, aw kûurgirre taski, aw dànde sey riirra tiriici gbè. ¹³ Yèk yey gàa nit maan gi takundi ɗi. Hû go sey mu kpân daw da nit ây gi ni tikpânni, ha aw mòo yèk goosum takundi, ¹⁴ ngam ta aw ii tuy a rakta saga ni-Yude ây, ni yèk mgbèngda nit ây irgi, woogifa yèk takundi gi ba. ¹⁵ Jày pî dii ɓetkumya da nit ây tâage ni tinîir burriya gi. Amma da nit ây tâage ni tinîir ’miskumya, ni nit ây èege goosum, cen jày tâagi daw ɓetkumya ba, ngam dànjum waw ni cèngsum a tinîir waw ɗa dii ’miskumya. ¹⁶ Aw seedirre aw cèngni Fay, amma tèem waw hàanjurre. Aw a nit mamji ây ɗi, a nit hàwrra yèk ây gi, aw gaw get a tèerra tèem mbâri koo kpolo ba.

¹ Amma muy, yèe jàk yey getnji ni yèk kàlnjum takundi gi! ² Gàa da toonji ây, aw tâa ni dànda tèes, aw tâa mbâra a nis nit ây, aw tâa nit hakkilo ây, aw gòy mbâra a goosum, a yiide, a èfta tinîiri ɗa. ³ Gàa daw da mâynji kin ây ngaa, aw mbir kà yey gesi a dikri nit ta Fay, ta aw cîinji yèy, aw tâa tinjoorgurum mbàl ba. Sey aw kàlnji yèk mbâra, ⁴ ha aw kàl daw da kin sapri ây, aw yiɗi maa rra waw ni hàm ta waw, ⁵ aw dàn ni hakkilo, aw mòosi hak waw, aw tâa kin tèerra tèem a àay waw, aw tâa kin mbâr ây, aw rak daw tuy da maa rra waw, ngam ta yèk Fay e tâa maasumya ba. ⁶ Hû go mgbèng daw da lor ây ɗa, aw tâa ni hakkilo. ⁷ Muy ngaa, sey mu ir jàk kàlnum da nit ây ni tèem mbâri. Mu kàlnjirre go, yèe ni takundi, ni gòyrra tèes, ⁸ mu yèe ni yèk yey getke, tâa nirri ge kpàaw hàanjum ba gi, ha lawsam e mòo daw da nit yiir ta wey, ngam gaw kpàa yèerra yèk maarra a hak worro ba. ⁹ Gàa daw da sàay ây, aw rak daw tuy da nit ɓèl ta waw a jày pî, aw tâa mbâra a nis waw, ta aw hàanji daw ba, ¹⁰ ta aw atkiri daw jày da nit ɓèl ta waw ba, amma aw kàlni jàk mbâra a mòorra tèem waw, ngam ha koo a jâ pî aw gòyni yèk Fay èngnin gi, yèk Tooy saanum worro. ¹¹ Ngam Fay lòni mbâr wàa getke e saani nit ây pî, ¹² ye tâa mbâr maan nàtnarre ha ot hàw tèem yey tâa ti diknji ni yèk Fay ba, ot hàw jàk gayrum nit kparri ây, ha ot dik ni hakkilo, ni gòyrra ɗèm, ot tolu di Fay a mgbàr yey, ¹³ ha ot waa ni jàk dànda kâwrriya a unji yey ge lòrra ’mita Fak ɓèl, ni Yeesu Kristu Nitsaanum worro gi. ¹⁴ Yeesu gi hîi hak wàa ngam worro, ha e sàasina a tèem makta pî, ha e ɓetkinina, ot tâa yòot nit ta wàa, ot rîi kpèw a tèem mbâri. ¹⁵ Sey mu kàl yèk ây gi, mu mgbènggi daw da nit kimjum ây, mu yèe daw ni kpèw kpèw. Ta mu woo koo wuna e luusum ba.

¹ Ɓaysi daw pî, aw ûuni hak waw a gin wûun ây ni nit tiɗàm kpees ây, aw rak daw tuy, aw kîr a tèerra tèem mbâra pî. ² Ta aw maasu koo di wuna ba, ta aw tâa nit tilètnjurum ây ba, amma aw tâa nit mgbergum yèk ây, aw lòni fetkum tinîiri da nit ây pî. ³ Ngam orro ɗa ot dii nà mgban ray, nit hàanjum ây, ot dii nà a ot gbeerra, ot dii nà kà sàay ây a gayrum jàk ây ni yiɗum jàk ây ’nang ’nang. Ot dii ot tâarre nà a tèem makta, a ngèeri. Aw yiinarre nà, orro ɗa ot yiinjirre a tîim worro. ⁴ Amma ye tâa Fay Tooy saanum worro lòni mgbergum wàa, ni yiide wàa a gin nit ay gi, ⁵ de saanina, ti tâa ngam ot tèe tèem gòyrra ɗèm ba, amma ngam ’maton wàa. Saaninage a kòlla ni kpàasum cukti, Jungci Delliya insinage fûuya. ⁶ Fay hîina gbaarra Jungci Delliya ni Yeesu Kristu Nitsaanum worro, ⁷ ngam ha ot kpàa gòyrra ɗèm a ɗàm kpees Fay ni mbâr wàa, ha ot kpàa jàk koyrra tâage gûyrra tâam timgbàri, kà yey dànna gi. ⁸ Yèk yey yèk takundi ɗi. Mi yiɗi, mu gòy kpèw a yèerra jàk ây gi, ngam ha a nit ây goosu di Fay aw ii hak waw a tèerra tèem mbâri. Kà yey dele, mgbaa ge mgbaanji daw da nit ây. ⁹ Amma kpâa a gbusum yèk ray a futnji wosom ây, ni tilètnjum, ni tihàanjum a yèk mgbèngda. Ngam yèk ây gi aw mgbaanji koo jâ ba, jàk ɓa hû go ɗi. ¹⁰ Sey mu yèew nak kpolo koo nak cuk di nit yey ɗòlnjiri da nit ây kana, a dat maan mu woowa. ¹¹ Ngam mu cèngnige, nirri kà yey ire nit mbita jàk maarra, ii kiita a hak wàa. ¹² Ye gim tèefa Artema koo Ticiku a gin wey, sey mu kîra dàarra a gin mum a Nikopolis. Ngam mi dàne ɓella cot iiy a farra. ¹³ Mgbaanji daw mbâra a dikta wooy waw da Jena nit còycum a yèk kiita gi, ni Apollo, ta jày e âyrra daw ba. ¹⁴ Ndika a nit ta worro ɗa aw èngni tèerra tèem mbâri, aw hâr mgbaanjum a jàk gayam ây ’nang ’nang, ngam ta aw tâa ɓa hû go ba. ¹⁵ A nit tâanjum ta mum aw kèbumfarre. Kèbi daw da nit ây yiɗina a goosum di Fay gi. Mbâr wàa e tâanji ni un pî!