Ni-Roma ây

Ni-Roma ây

¹ Miy mi Pawlu mi sàay Yeesu Kristu ɗi, mi nit yey ’naasim Fay ha mi tâa ni tèerriya, carrim ngam sakta Yèk Kâwrra wàa, ² yey ɗàa nà yèerra ni mòonjum kàn ni mgbelyèk nit lònum ây a defterre wàa delliya gi. ³ Yèe yèk maan a hak Yeesu Kristu Hàm wàa, Nitcoorra worro, anga a yòot Dawda a tâam wàa ni isi. ⁴ Amma a tâam wàa ni Jungci Delliya, Fay gûysu a wurra, gòynu ni mbinum e tâa Hàm wàa. ⁵ Ni ey Fay hîina ot tâa nit tèerra ây ngam ’mita nîir wàa, ha ot ’maa daw a goosum ni rakta tuy da nit ây anga koo a dees hâ. ⁶ Un ɗa un ’mèmsi ni aw, ye tâa Fay ’naasunu un tâa nit ta wàa di Yeesu Kristu. ⁷ Mi kèpfa dunde dun nit ây pî tâage a Roma. Fay yiɗunu gi ’naasunu un tâa nit della ta wàa. Nge ey Too worro gi ni Yeesu Kristu Nitcoorra, aw hîinu mbâr waw ni tâam mbâri! ⁸ Màrra mi gàawrre mbew di Fak mum ni nîir Yeesu Kristu ngam wun pî, ye tâa aw yèerre yèk goosum wun a deesi lang. ⁹ Fay Fak yey tèemi ngam wàa ni tinîir mum pî, a sakta Yèk Kâwrra Hàm wàa gi, ey seedimde a hak mum kày ɓaysim dun a waar mum unji pî cen hèntum. ¹⁰ Mi waawrre koo ningàa, ha e hîim ot mbâra mi difa a gin wun to yiɗi go gi. ¹¹ Un lugim nisi ha mi difa mi rapnu, ngam ha mi hîinu hîiri ni Jungci Delliya, mi kpèwsunu, ¹² kà gàarra ye gim tâa a tîim wun, ot suusinji tinîir worro miy a goosum wun, un ngaa a goosum mum. ¹³ Un kor ta mum, mi yiɗi un cèngni, nge nak mûsi jày mi kàmde orri mi difa a gin wun, ngam ha tèem mum e lòni jàk repta a tîim wun ɗa, kà yey lòni a tîim ni-dees ây kana. Amma ha kòsòng jày njanggimde. ¹⁴ Ngam gesi mi dik sakta yèk Fay a tîim nit ây pî, a tîim ni-Girèk ây ni ni-riiy ây kana, a tîim nit ây tâage còycumya ni nit ây tâa aw cèngni jày ba. ¹⁵ Kà yey mi yiɗirre dèy mi difa mi saknu Yèk Kâwrra, dun nit ây tâage a Roma gi ɗa. ¹⁶ Gim ii lawsam a Yèk Kâwrra gi ba, ngam mbinum Fay ɗi ha e saani daw da nit ây pî goosu gi, màrra da ni-Yude ây, a dat maan da yòot ni-riiy ây kana. ¹⁷ Ngam Yèk Kâwrra lòni kày gòyni daw Fay ɗèm da nit ây ni goosum. Gòyrra ɗèm maan ana a goosum, ’maarre ɗa a goosum. Gàarre kà yey a defterre wàa: Nit gòyrra ɗèm gû ge gûy ni goosum. ¹⁸ Fay lòna ngòlnji wàa a gin nit ây pî hàanju gi, tèege tèem makta, butkifa yèk takundi ni tèem makta waw gi. ¹⁹ Ngam jày ge kpàa nirri e cèngni a gin Fay, dii lòtiya a tîim waw, ngam Fay lòna dawge. ²⁰ Koo ye tâa nirri ti rabu di Fay ba, ey dii lòtiya ni tèem wàa diga mbangsum kparri. Hû go a nit ây kpàa gaw kpàa cèngnum mbinum wàa tâam timgbàri, kày tâa ey gi, ha aw tâa cen hàanjum a yèk maan. ²¹ Koo ye tâa aw cèngnu di Fay, aw coow kà yey gesi ba, aw gàaw mbew ba. Amma dànda waw ire jàk ɓa hû go, tinîir waw raya ɗi kupti kulpiya. ²² Aw râanirre hak waw aw gàarre aw còycige, amma aw a rak ây ɗi. ²³ Aw ini ’mita Fay yey tâa ge gbee ba gi ni tirèenjunum nirri ge gbee gi, ni tirèenjunum jooy ây, ni jàk tinak ây, ni jòoy ây. ²⁴ Ngam maan Fay woo dawge ɗa aw fut gayam tinîir waw a tèerra tèem ’miskum, ha aw mboynji is waw a tîim waw. ²⁵ Aw bunji yèk Fay takundi ni yèk rèeng. Aw coorre aw daprirre di jàk mbangsumya, hòmi di Tooy mbangsum jày pî gese ’mita e tâaw tâam timbàri gi! Amen. ²⁶ Kà yey Fay woo dawge ɗa aw fut jàk gayrum yey maage gi. A kin ta waw aw woofa kûunjum ni nihun ây kà yey gesi gi, aw kûunji a tîim waw kà yey tâa ti gesi ba. ²⁷ Hû go a nihun ây ɗa aw woofa kûunjum ni nikin ây kà yey gesi gi, aw mòonji ni gayam a tîim waw, ha aw mbitɗe jàk lawsam nihun ni nihun. Aw kpàa mgban kiita a hak waw a gbeerra ot waw. ²⁸ Ye tâa ti deli daw aw cèngsu di Fay ba, Fay de woo daw aw fut a dànda waw tâa ti del ba, ha aw tèe jày tâa ti gesi ba. ²⁹ Aw mûuni ni tèem yey tâa ti gòy ɗèm ba, ni tèem makta, ni gayrum jàk ây, ni gbokri, ni ngèeri, ni ɓàta nirri, ni tilètnjum, ni tibiw, ni kperrem, ni tiyaynjurum. ³⁰ Aw yèerre yèk makta a hak nit ây kana, aw yiiwrre di Fay, aw riisi dawrre ’màari da nit ây, aw ’misirre hak waw, aw râangirre a jàk ta waw, aw mbangsirre tèem makta ây, aw rakɗe tuy da too rra waw ni nuu rra waw ba. ³¹ Aw cèngni koo jâ ba, aw gòy koo a yèk waw ba, aw èe yiide, aw èe ’maton. ³² Aw koo ye tâa aw cèngni yèk mgbèngda Fay, nge a nit ây mbirge kà yey gi aw gerre wuta, aw futɗe mbita jàk ây gi, aw ɓòlmirre ɗa da nit ây tèege tèem maan.

¹ Ngam maan mu nit yey hiiti daw da nit ây kana, koo mu wun ɗi ya, gum kpàaw hàanjum yèk wey ba. Ngam a jày hiitum di nit kana, muy ngaa mu yaanirre hak wey a kiita, ye tâa muy ɗa mu mbitɗe kà ey gi. ² Ot cèngni, Fay hii ge hiiti daw ni yèk takundi da nit ây mbirge jàk ây gi. ³ Mu nit yey hiiti daw da nit ây mbirge jàk ây gi, amma muy ɗa mu mbitɗe kà aw, mu dànde gum yâa a kiita Fay gi yi? ⁴ Koo mu luusirre gbaarra mgbergum Fay, ni woorra wàa, ni èfta tinîir wàa gi? Mu cèngni, nge mgbergum Fay ’maamde a inum tinîiri ba yi? ⁵ Amma ye tâa mu dii ni tinîir ndèktiya, mu hàwrre inum tinîir wey gi, mu kimjirre ngòlnji Fay a hak wey ha unji ngòlnji wàa, a ye ge lòrra kiita wàa ɗèm gi. ⁶ Ey kà ge kànsu koo di wuna kày tâa tèem wàa. ⁷ Hîi ge hîi gûyrra tâam timgbàri da nit ây futke tèerra tèem mbâri, kàmge ’mita, ni coorra, ni jungci yey tâa ge lòo ba gi. ⁸ Amma ii ge ii ngòlnji wàa ngaktiya da nit ây hàanje, hàwge rakta tuy a yèk takundi, rake tuy a tèem makta gi. ⁹ ’Màari ni jàk àyrriya kpè ge kpèt daw da nit ây pî tèege jàk makta, màrra da ni-Yude ây, a dat maan ɗa da yòot ni-riiy ây kana. ¹⁰ Amma ’mita, ni coorra, ni tâam mbâri tâa ge tâa daw da nit ây pî tèege tèem mbâri, màrra da ni-Yude ây, a dat maan ɗa da yòot ni-riiy ây kana. ¹¹ Ngam Fay ti raptirre nis nit ây ’nang ’nang ba. ¹² A nit ây pî tèege jàk maarra a èca cèngnum yèk mgbèngda gi, gbee gaw gbee ɗa a èca cèngnum yèk mgbèngda. A nit ây pî tèege jàk maarra a cèngnum yèk mgbèngda, kpàa gaw kpàa kiita ni yèk mgbèngda. ¹³ Ngam ti tâa a nit ây rake gbè yèk mgbèngda, tâage nit gòyrra ây ɗèm a ɗàm kpees Fay ba, amma a nit ây tèege jày gàa yèk mgbèngda gi. ¹⁴ To a nit ây èege yèk Fay ni yèk mgbèngda, aw tèerre go ni hakkilo waw jày gàa yèk mgbèngda gi, aw mbangsirre yèk mgbèngda ngam hak waw. ¹⁵ Kà yey aw kàlnirre, tèem yèk mgbèngda kètiya ɗi a tinîir waw. Dànjum tinîir waw ɗa kàlnirre kà yey, ye tâa dànda waw yèe dawrre koo suusi dawrre. ¹⁶ Dànjum waw gi lò ge lòt a unji yey ge hiiti Fay ni Yeesu Kristu jày fûuge pî a tinîir nit ây, kà yey gàa Yèk Kâwrra sakmi gi. ¹⁷ Amma muy mu nit yey înge hak wey mu ni-Yude ɗi gi, mu gòyrre mu wuysirre a yèk mgbèngda, mu râanirre ngam Fak wey. ¹⁸ Mu cèngni jày yiɗi Fay, yèk mgbèngda ɗa kàlnjumde ha mu ɗòlnji jàk mbâri ni jày tâa ti diknji ba. ¹⁹ Mu gàarre ni hak wey muy mu nit nàta râay ây ɗi, mu kayang ɗi da nit ây tâage a kulpi, ²⁰ mu nit mgbèngda ɗi da nit ây tâa aw cèngni jày ba, mu nit kàlnjum hàm ây ɗi. A yèk mgbèngda gi mu dii ni jàk kàlnum mbâra a takundi ni cèngnum jày. ²¹ Amma muy mu nit yey kàlnji di nit kana, naa mu woofa kàlnjum hak wey naa? Muy mu nit yey sake di nit kana ta e oo ba, naa mu oorre naa? ²² Muy mu nit yey gàage di nit kana, ta e ii njeenu ba, naa muy mu iirre njeenu naa? Mu nit yey yiige jàk mâri, naa mu atɗe jày a àay mâri naa? ²³ Muy mu nit yey râani ni yèk mgbèngda, naa mu mboysirre ’mita Fay ni yewrra a yèk maan naa? ²⁴ Gàarre kà yey a defterre Fay: Ngam yèk wun a nit ây èege yèk Fay aw maasurre nîir wàa. ²⁵ Rrèpnum jàk mbâra ɗi, to mu tèenirre go jày gàa yèk mgbèngda gi. Amma to mu yewrre go yèk maan, rrèpnum wey ire mu gàa mu rrèpni ba. ²⁶ Amma to nit yey tâa ti rrèpni ba mòorre go jày gàa yèk mgbèngda gi, Fay ge sagu a èca rrèpnum wàa kà nit rrèpnum ba yi? ²⁷ Ɗo nit yey tâa ti rrèpni diga kpàarra wàa ba tèerre go jày gàa yèk mgbèngda gi, hii ge hiitum dum ni-Yude yewge a yèk maan, koo ye tâa mu dii ni yèk maan mgban kètiya a defterre, mu rrèpni gi. ²⁸ Ngam ni-Yude yey lòni tâam wàa ni isi gbè, tâa ni-Yude takundi ba. Rrèpnum ɗa to lòt go a isi gbè, ti tâa rrèpnum takundi ba. ²⁹ Amma to nirri tâa go ni-Yude ni tinîiri, ey tâage ni-Yude takundi. Rrèpnum ɗa to tâa go a tinîiri ni Jungci Fay, e tâage rrèpnum takundi, ti tâa ni yèk kèta a defterre ba. Ni-Yude takundi kpàa ɓòlmum wàa a gin Fay, ti tâa a gin nit ây ba.

¹ Jâ tâage hòmda ni-Yude ây da ni-riiy ây kana ya? Malla ji ge mbira daw rrèpnum gi ya? ² Hòmda waw dii dèy cewci lang! Ngam Fay hîi dawge yèk wàa. ³ Kà ya? Eca gòyrra waw da nit ây tâa aw gòy a goosum ba, a ge atnjifa gòyrra mbâr Fay gi yi? ⁴ Oow, ge tâa hû go ba sam! Fay lò ge lòt Fak mbâri takundi ɗi, amma a nit ây pî a nit rèengda rèeng ây ɗi, kà yey gàa a defterre wàa: Fak mum sey mu tâa ɗèm a yèk wey, mu suni daw a ye gaw hiitum gi. ⁵ Amma to tèem makta worro a èca gòyrra ɗèm lònirre go gòyrra Fay ɗèm gi, kà got gàa ya? Fay èe gòyrra ɗèm ye iina kiita gi yi? Mi yèerre kà nirri. ⁶ Ge tâa hû go ba sam! To Fay èe go ngin gòyrra ɗèm gi, kà ge hiiti kparri gi ya? ⁷ Amma to rèeng mum iisirra go jàk ’mita a takundi wàa gi, ngam jâ tâami saktiya kà nit mbita jàk maarra gi ya? ⁸ Ngam jâ tâa got gàa «dàan ot tèe jàk makta ha jàk mbâri e lòt gi» ba ya? Ngam a nit maasum ây kana aw gàamde mi gàarre hûy. A nit ây gàage kà yey gi, takundi aw aw gesi yaarra a kiita. ⁹ Kà ya? Orro ot ni-Yude ây ot hòm daw della da yòot ni-riiy ây kana yi? Ti tâa hû go ba sam. Ngam mi ɗàa ’maarra yèy a hak ni-Yude ây ni ni-riiy ây kana, nge aw pî aw sàay jàk maarra ɗi. ¹⁰ Gàarre kà yey a defterre Fay: Cen nit gòyrra ɗèm koo kpolo ba. ¹¹ Cen nit cèngnum jày ba. Cen nit kàmda Fay ɗa ba. ¹² Aw pî aw jòle, aw mboye. Cen nit tèerra jàk mbâri koo kpolo ba. ¹³ Mîrngi waw dii kà geb kuplumya, ni rèeng ta waw rûfrinin tirûfni. Yèk ây anga a mgbelyèk waw dii kà larri jòoy. ¹⁴ Mgbelyèk ta waw mûu ni maasum ngaktiya. ¹⁵ Kàn ta waw kîtɗe a ɓàta nirri. ¹⁶ Aw woorre fòon ni jàk gbeesum ây a ot ây hòmin gi pî. ¹⁷ Aw cèngni ot tâam mbâri ba. ¹⁸ Tolnji Fay ceni daw ba. ¹⁹ Ot cèngni, nge jày gàa yèk mgbèngda gi pî yèerre da nit ây tâage ûunumya a yèk mgbèngda, ngam ha e fanti daw mgbelyèk waw da nit ây pî, ta aw hàanji ba, ha kparri pî e lòt dii ni mamji a ɗàm kpees Fay. ²⁰ Ngam koo nirri kpolo ge kpàaw gòyrra ɗèm a ɗàm kpees Fay ni tèem yèk mgbèngda ba. Yèk mgbèngda hîirre cèngnum jàk maarra di nirri gbè. ²¹ Amma kòsòng Fay lòna dot ot gòyrra ɗèm cen yèk mgbèngda. Defterre yèk mgbèngda ɗàa nà yèerra yèk maan, ’mèmsa ni nit lònum ây. ²² Fay ge gòyni daw ɗèm da nit ây pî ni goosum di Yeesu Kristu, to aw goosi go gi. Ngam ’nangjum ti tâa a tîim waw ba, ²³ aw pî aw mbire jàk maarra, aw èe ’mita yey gesi e tâa daw a gin Fay gi. ²⁴ Amma a mbâr wàa hîi daw gòyrra ɗèm ni sàasum yey sàasi daw Yeesu Kristu gi. ²⁵ Fay gòynu a kparri e tâa nit hûta jàk maarra, ni njîim wurra wàa da nit ây goosu gi. Hû go Fay yiɗi e kàlni ɗèm wàa, ye tâa èfe tinîir wàa, woofa dawge iirra kiita da nit ây ngam jàk maarra waw mbirin nà mgban gi. ²⁶ Yiɗi ɗa a tâarra yey e kàlni ɗèm wàa ni gòynum ɗèm da nit ây goosu di Yeesu. ²⁷ Ɗo u hâ tâa ’misum hay gi ya? Cen ba sam! Ngam jâ? Ngam yèk mgbèngda hâ? Ngam yèk mgbèngda yey kàlge tèerra tèem di nirri yi? Oow, amma ngam yèk mgbèngda a goosum. ²⁸ Orro ot cèngni, nirri kpàa ge kpàa gòyrra ɗèm ni goosum, ti tâa ni tèem yèk mgbèngda ba. ²⁹ Fay Fak ni-Yude ây ɗi gbè yi? Ti tâa Fak waw da yòot ni-riiy ây kana ba yi? Eeye, Fak yòot ni-riiy ây kana ɗi ɗa. ³⁰ Ngam Fay Fak kpolo ɗi, gòyni daw ɗèm ni goosum da nit ây rrèpni gi, ni nit ây tâa aw rrèpni ba gi ɗa. ³¹ Hû go ot mboysifarre yèk mgbèngda ni goosum yi? Oow, ti tâa hû go ba sam! Amma ot gòynirre jày gàa yèk mgbèngda gi.

¹ Ɗo ji got gàa a hak Abraham wosom worro gi ya? ² To Abraham kpàa go ngin gòyrra ɗèm ni tèem wàa gi, râa ge râani ngin hak wàa, amma ge kpàaw râanum a ɗàm kpees Fay ba. ³ Ji gàa a defterre gi ya? Gàa: Abraham goosuge di Fay, Fay de sagu nit gòyrra ɗèm. ⁴ Nirri tèe go tèem, gaw rapti bèeb tèem wàa kà jàk hîiri ba, amma jày gesu e kpàa gi ɗi. ⁵ To nirri tèe go jày ba, amma goosu go di Tooy gòynum ɗèm da nit makta ây gi, tâa ge tâa saktiya nit gòyrra ɗèm ɗi ni goosum wàa. ⁶ Kà yey gàa Dawda ɗa, ye yèe yèk kâwum tinîir nit ây sagi daw Fay ɗèm cen raptum tèem waw gi: ⁷ Kâwum tinîiri dii daw da nit ây yaafi daw Fay mamji waw, butkifa daw jàk maarra waw gi. ⁸ Kâwum tinîiri diiw di nit yey tâa Fay Tooy Ɓèl ti sak jàk maarra wàa ba gi. ⁹ Kâwum yey tâa ngam nit rrèpnum ây gbè yi? Koo ngam nit èca rrèpnum ây ɗa yi? Ngam ot gàaye: Fay sagu di Abraham nit gòyrra ɗèm ɗi a goosum wàa. ¹⁰ Ningàa sagu kà yey ya? A dat yey rrèpni gi yi, koo ye tâa ɗà ti rrèpni ba yi? Ti tâa a dat maan ba, amma ɗoko ye rrèpni gi. ¹¹ Kpàa rrèpnum a is wàa kà ticèngsunum a gòyrra ɗèm, ngam goosum yey tâagu mgban ɗoko ye rrèpni gi, ha e tâa tooy nit èca rrèpnum ây pî gaw goosu di Fay gi, aw tâa saktiya nit gòyrra ây ɗèm ɗi kà yey. ¹² Abraham tâage ɗa tooy nit rrèpnum ây gi, ti tâa kpàage rrèpnum gbè ba, amma futke ɗa a goosum yey tâagu di too worro Abraham, ye tâa nà ɗà rrèpni ba gi. ¹³ Fay yèewe nà yèk mòonjum kàn di Abraham ni hàm ta wàa, gàawe kpàa gaw kpàa kparri kà jàk koyrra waw. Ti yèew yèk maan ngam tèem yèk mgbèngda ba, amma ngam gòye ɗèm ni goosum. ¹⁴ To a nit ây mòoge yèk mgbèngda kpàage go ngin jàk koyrra gi, goosum tâa ge tâa ngin jàk ɓa hû go, yèk mòonjum kàn ɗa ge mboy ngin nà. ¹⁵ Ngam yèk mgbèngda ’maararre ngòlnji Fay. A gin tâa yèk mgbèngda cen gi, yewrra a yèk mgbèngda ɗa cen. ¹⁶ Kà yey sey a nit ây goose gi aw kpàa jàk koyrra. Ngam gesi nà jàk koyrra e tâa hîir Fay ɗi a mbâr wàa, ha yèk mòonjum kàn e gòy ngam hàm ta Abraham pî, tâage hàm ta wàa naa ni yèk mgbèngda gbè amma ni ’mèmsum a goosum wàa gi ɗa. Hû go Abraham tâagina pî too worro, ¹⁷ kà yey tâa kètiya a defterre Fay, gàa: Mi iim mu tâa tooy yòot nit ây dèy. Hû go ey tâagina too worro a ɗàm kpees Fay, goosuge di Fay Tooy Ɓèl gûysi daw da nit ây a wurra gi, ’naasi di jày tâa ti tâa ba ha e tâa gi. ¹⁸ Abraham goosu di Fay ni mòorra jàk dànda, koo a gin yey tâa jàk dànda cen ba gi, ngam ha e ir tooy yòot nit ây dèy, kà yey gàaw Fay: Hû go ge tâa mûsa yòot ta wey. ¹⁹ A mgbàr maan dii ni yeri ji ge ii temèrre, rapti is wàa wàrfige, faat kpàani hàm di kin wàa Sara ɗa wurre. Amma koo hû go ti loo a goosum wàa ba. ²⁰ Ti hàanji ni èca goosum a yèk yey yèew Fay ni yèk mòonjum kàn gi ba, amma goosum wàa kpèwsuge, de ’misi nîir Fay. ²¹ Suuwe mbâra, nge jàk yey yèe Fay ni yèk mòonjum kàn gi, ge mbin tèerra ɗa. ²² Ngam maan Fay de sagu nit gòyrra ɗèm ɗi. ²³ Ye gàa «sagu nit gòyrra ɗèm» gi, ti tâa ngam hak wàa gbè ba, ²⁴ amma gàarre ngam worro ɗa, dot nit ây got kpàa gòyrra ɗèm a ɗàm kpees Fay, ot nit ây goosu di Fay Tooy gûysum di Yeesu Nitcoorra worro a wurra gi. ²⁵ Ngam hîiwe e wut yèk jàk maarra worro, gûysu ha ot kpàa gòyrra ɗèm.

¹ Ye tâa ot kpàa gòyrra ɗèm ni goosum, tâam mbâri diina ni Fay ngam Yeesu Kristu Nitcoorra worro. ² Ni ey kpàana ot lekta a mbâr Fay ni goosum. Ot gòyrre a mbâr maan, ot kâwsirre tinîiri a jàk dànda worro iina a ’mita Fay gi. ³ Ot kâwsi tinîiri a jàk yey gbè ba, amma a riirra ’màar worro ɗa, ngam ot cèngni, riirra ’màari ’maararre èfta tinîiri, ⁴ èfta tinîiri ’maararre gòyrra mbâra, gòyrra mbâra ngaa ’maararre jàk dànda. ⁵ Jàk dànda ge mòosina lawsam ba, ngam yiide Fay lege a tinîir worro ye hîina Jungci Delliya gi. ⁶ Ngam a ye tâana nà bak dàngdiya a jàk maarra gi, Kristu wurre yèk nit ây hàanju di Fay a mgbàr yey gòyni gi. ⁷ Kpâa dèy ha nirri kpolo e wut ngam nit gòyrra ɗèm gi. Mba ngam nit mbâra nirri ge tol wuta ba. ⁸ Amma Fay lònage yiide wàa a gin worro, ngam ye tâana nà ot nit mbita jàk maarra ây ɗi gi, Kristu wurre ngam worro. ⁹ Ye tâa ot kpàa gòyrra ɗèm ni njîim wurra wàa, sakko saa ge saanina a ngòlnji Fay ɗa. ¹⁰ Ye tâa Fay raknjisi ni orro ni yèk wurra Hàm wàa, a mgbàr yey tâana nà nit yiir ta wàa gi, sakko kòsòng ye tâana raknjusumya ni ey, saa got saa ni jungci Hàm wàa. ¹¹ Ti gbèe ni raknjusum gbè ba, amma ot kâwsirre ɗa tinîiri a gin Fay yèk Yeesu Kristu Nitcoorra worro, nit yey hîigina kòsòng raknjum ni Fay gi. ¹² Jàk maarra lege a kparri yèk nirri kpolo, nîir wàa Adam. Jàk maarra gi ’maara wurra. Hû go wurra yeskige a gin nit ây pî, ngam aw pî aw mbire jàk maarra. ¹³ Ɗoko Fay hîi yèk mgbèngda gi, jàk maarra dii mgban a kparri, amma ti sak jàk maarra gi ba, ye tâa ɗà ti hîi yèk mgbèngda ba. ¹⁴ Koo hû go, diga Adam ha Muusa, wurra wûuni a hak nit ây, koo ye tâa aw mbir jàk maarra yey rèenji ni woy Adam gi ba. Ey tâage jàk kàlnum nit yey ge dàara gi. ¹⁵ Amma jàk maarra yey mbire Adam gi, ti rèenji ni hîir Fay hîi a mbâr wàa gi ba. Ngam a nit ây dèy aw wurre yèk jàk maarra nirri kpolo. Amma mbâr Fay tèe jày hòmgu di yey gi, ye tâa hîi gbaarra hîir wàa da nit ây dèy ni nirri kpolo, Yeesu Kristu gi. ¹⁶ Hîir Fay ɗa ’nangji ni jàk maarra yey mbire nirri kpolo gi. Ngam kiita yey furre jàk maarra nirri kpolo, yaani daw da nit ây pî a kiita. Amma hîir Fay hîigi ngam jàk maarra nit ây dèy gi, ’maara gòyrra ɗèm. ¹⁷ Ye tâa wurra wûuni a hak nit ây yèk jàk maarra nirri kpolo gi, sakko a nit ây pî kpàage gbaarra mbâr Fay ni hîir gòyrra ɗèm gi, wûu gaw wûuni a gûyrra tâam timgbàri ngam nirri kpolo Yeesu Kristu. ¹⁸ Ngam maan, kà yey yaani daw jàk maarra nirri kpolo da nit ây pî a kiita, hû go ɗa tèem ɗèm nirri kpolo, Yeesu Kristu gi, gòyni daw ɗèm da nit ây pî ha aw gûyi. ¹⁹ Kà yey ini daw èca rakta tuk nirri kpolo da nit ây dèy nit mbita jàk maarra gi, hû go ɗa rakta tuk nirri kpolo gòyni dawrre ɗèm da nit ây dèy. ²⁰ Yèk mgbèngda lege, ngam ha jàk maarra e iisirra ’mita. Amma a gin yey iisirra jàk maarra ’mita gi, mbâr Fay hòmge ’mita dèy. ²¹ Ngam kà yey wûuni nà jàk maarra ni wurra gi, hû go ɗa mbâr Fay wûunde a gòyrra ɗèm, ha e ’maana a gûyrra tâam timgbàri ni Yeesu Kristu Nitcoorra worro.

¹ Hû go ji got gàa ya? Got tâasi bak a jàk maarra ngam ha mbâri e iisirra ’mita yi? ² Ge tâa kà yey ba! Ngam ot nit ây wutke mgban a jàk maarra gi, kà got gûy bak a jàk maarra gi ya? ³ Koo un cèngni, nge orro pî kpàage baptisma a ’mèmsum ni Yeesu Kristu gi, ot kpàa baptisma a ’mèmsum ni wurra wàa ba yi? ⁴ Hû go ni baptisma ot tâa siptumya ni ey a wurra, ngam ha kà yey gûyse Kristu a wurra ni mbinum ’mita Too wàa gi, orro ɗa ot ’mèmsi ni ey a jungci fûuya. ⁵ Ngam ye tâa ot ’mèmsi ni ey a wurra yey rèenji ni wurra wàa gi, ’mè got ’mèmsi ɗa ni ey a gûysum yey rèenji ni gûysum wàa. ⁶ Ot cèngni mbâra, nge nit mgbanti yey mgbapna nà gi dii gbalnjumya ni Kristu a minjum kpiiri, ngam ha is jàk maarra worro e tâa mboysumya, ta ot tâasirra sàay jàk maarra ba. ⁷ Ngam nit yey wutke gi, njele a jàk maarra. ⁸ Ye tâa ot ’mèmsi ni Kristu a wurra wàa, ot goosirre gû got gûynji ni ey ɗa. ⁹ Ngam ot cèngni, Kristu ye gûyse a wurra gi ge wusirra bak ba, wurra ge haasirra wûunda a hak wàa ba. ¹⁰ Ye wurre gi, wurre nak kpolo ngam jàk maarra nit ây, gerre ngam koo ningàa. Amma a jungci yey gûye kòsòng gi, gûyrre ngam Fay. ¹¹ Hû go un ɗa raptin hak wun, un dii wutiya a jàk maarra, amma un dii beengiya ni Yeesu Kristu ngam Fay. ¹² Ngam maan ta jàk maarra e wûuni a is wun ge wut gi ba, ha un ragu tuy di gayam isi ba. ¹³ Ta un ii jàk ta wun a isi titèeni tèem èca gòyrra ɗèm a jàk maarra ba, amma hîin hak wun di Fay, mu gàa un nit ây gûysa a wurra ɗi, un ii jàk ta wun a isi titèeni tèem ɗèm ngam Fay. ¹⁴ Ta jàk maarra e tâa wûun a hak wun ba, ngam un tâa ûnumya a yèk mgbèngda ba, amma a mbâr Fay. ¹⁵ Ɗo kà ya? Got mbir jàk maarra, ngam ot tâa ûunumya a yèk mgbèngda ba, amma a mbâr Fay gi yi? Ge tâa hû go ba sam. ¹⁶ Un cèngni mbâra, to un hîi go hak wun sàay a jày ha un ragu tuy gi, takundi ra gun ragu tuy, un ir sàay jàk maan, koo di jàk maarra yey ge ’maa a wurra gi, koo a tâam gòyrra ɗèm, a rakta tuy di Fay. ¹⁷ Ot gàa mbew di Fay, ngam un nit ây tâage nà mgban sàay jàk maarra, un rakɗe tuy ni tinîiri pî a jàk kàlnjum kà yey kpàanu gi. ¹⁸ Un njele a tèem jàk maarra, un ire sàay a tèem gòyrra ɗèm. ¹⁹ Mi yèerre yèk yey kà nirri, ngam yèk dàngda is wun. Kà yey iinu nà mgban jàk ta wun a isi sàay jàk ’miskumya, ni sàay jàk makta ngam tèerra tèem èca yèk mgbèngda gi, hû go ɗa kòsòng iin jàk ta wun a isi sàay a tèem gòyrra ɗèm, ha un tâa delliya a ɗàm kpees Fay. ²⁰ Ngam ye tâanu nà mgban sàay jàk maarra gi, un tâa nà sàay a tèem gòyrra ɗèm ba. ²¹ Jàk repta jâ repnu nà a tâam wun mgban gi ya? Un rebe jàk ây mòosunu lawsam kòsòng gi! Ngam gbèeni jàk ây gi wurra ɗi. ²² Amma kòsòng ye tâa un tâasirra sàay jàk maarra ba, un sàay Fay ɗi gi, un repɗe jàk yey ’maagunu a tâam delliya a ɗàm kpees wàa. Gbèeni jàk yey gi gûyrra tâam timgbàri ɗi. ²³ Ngam bèeb tèem jàk maarra wurra ɗi. Amma hîir Fay hîi a mbâr wàa gi, gûyrra tâam timgbàri ɗi a ’mèmsum ni Yeesu Kristu Nitcoorra worro.

¹ Un kor ta mum, un cèngni yèk mgbèngda ni jày yiɗim gàarra gi, un cèngni, nge yèk mgbèngda dii ni mbinum a hak nirri sey a ye tâa beengiya gi ba yi? ² Nikin dii a mbinum yèk mgbèngda yey ’mèmi ni maa wàa, a ye tâa maa wàa dii beengiya gi. Amma to maa wàa wut go, ey njele a mbinum yèk mgbèngda yey ’mèmi nà ni maa wàa gi. ³ Hû go to dik go di maa kana a ye tâa maa wàa dii beengiya gi, ’naa gaw ’naasu kin tikàm toonji. Amma to maa wàa wut go, ey njele a yèk mgbèngda yey ’mèmi nà ni maa wàa gi. Ngam maan to dik go di maa kana, gaw ’naasu kin tikàm toonji ba. ⁴ Kà yey kor ta mum, un ɗa un dii wutiya a yèk mgbèngda ni wurra is Kristu, ngam ha un tâa nit ta wàa di nit yey gûyse a wurra gi, ha un rep jàk mbâra ngam Fay. ⁵ Ngam a ye tâana nà a tâam isi, yèk mgbèngda hengsirre nà gayam jàk maarra, ha gayam maan tèerre ni jàk is ta worro lang, ha rebe jày ’maagina a wurra gi. ⁶ Amma kòsòng ot njele a yèk mgbèngda, ye tâa ot wurre nà a jày ’mèmgina gi, ha ot tèewrra di Fay ni mbinum jungci fûuya, naa ni mbinum yèk mgbèngda mgbanti. ⁷ Ɗo ji got gàa ya? Yèk mgbèngda jàk maarra ɗi yi? Ti tâa hû go ba sam! Amma sey ni yèk mgbèngda cèngnim jàk maarra. Ngam gim cèngni ngin jày tâage gayam makta ba, sonaa yèk mgbèngda gàagim «ta mu ii gayam ba». ⁸ Jàk maarra ye kpàa orri ni titèeni yèk mgbèngda gi, de aanje koo gayam hâ a gin mum. Ngam to yèk mgbèngda cenda go ngin ba, jàk maarra ge tâa ngin wutiya. ⁹ Mgban ye tâa yèk mgbèngda cenim ba, mi gûyrre. Amma ye dàara yèk mgbèngda gi, jàk maarra de anse e gûyi, ¹⁰ miy ngaa mi wurre. Hû go yèk mgbèngda yey gesi e ’maam a gûyrra gi, de kpàami ’maamde a wurra. ¹¹ Ngam jàk maarra ye kpàa orri ni titèeni yèk mgbèngda, de rûfim ha e ɓàrim ni erra. ¹² Koo hû go yèk mgbèngda jàk delliya ɗi, yèk wasta ɗa delliya ɗi, ɗèm ɗi, mbâriya ɗi. ¹³ Ɗo jàk yey tâage mbâriya gi irim jàk tiwurra yi? Ti tâa hû go ba sam! Amma jàk maarra ɓàrim ni jàk yey tâage mbâriya gi, ngam ha e lòt jàk maarra ɗi, e ir jàk maarra ɗi ’mitiya dèy ni titèeni yèk mgbèngda. ¹⁴ Orro ot cèngni, yèk mgbèngda jàk Jungci ɗi. Amma miy mi nit isi ɗi, dàngdiya, sàanumya a jàk maarra. ¹⁵ Mi cèngni jày tèemi gi ba. Ngam jày yiɗim gi mi tèe ba, amma mi tèerre jàk yey yiimi gi. ¹⁶ Amma to mi yiɗi go jàk yey tèemi gi ba, mi cèngsi yèk mgbèngda jàk mbâra ɗi. ¹⁷ Kà yey ti tâa miy tèege jàk maan ba, amma jàk maarra yey tâage a gin mum gi ɗi. ¹⁸ Mi cèngni, cen jàk mbâri tâage a gin mum ba, kà gàarra a is mum. Ngam koo ye tâa mi dii ni yiɗum tèerra jàk mbâri, mi mbin tèerra ba. ¹⁹ Ngam jàk mbâri yiɗim tèerra gi, mi tèe ba. Amma jàk makta yey tâa mi yiɗi tèerra ba, de tèemi. ²⁰ To mi tèe go jàk yey tâa mi yiɗi ba gi, ti tâa miy tèege jàk maan ba, amma jàk maarra yey tâage a gin mum gi ɗi. ²¹ Hû go mi kpàa mbinum jày a gin mum, ngam ye tâa mi yiɗi tèerra jàk mbâri gi, jàk makta hèemdarre. ²² A tinîir mum yèk mgbèngda Fay kâwsimde. ²³ Amma a jàk ta mum a isi, mi kpàa mbinum kana haarre gbàaci ni mbinum jàk yey tâage a dànda mum gi. Mbinum kana gi cîimde a mbinum jàk maarra yey tâage a jàk ta mum a isi. ²⁴ Kayto! Miy mi tiriit ’màari ɗi, wun ge njelim a is yey ’maagim a wurra gi ya? ²⁵ Mi gàawrre mbew di Fay, ngam ey mbirim kà yey ni Yeesu Kristu Nitcoorra worro. Hû go miy ni dànda mum mi sàay ɗi a yèk mgbèngda Fay, amma ni is mum mi sàay ɗi a mbinum jàk maarra.

¹ Kòsòng yèk yaanum a kiita censirra daw da nit ây ’mèmse ni Yeesu Kristu gi ba. ² Ngam mbinum Jungci yey ’maaga gûyrra ni Yeesu Kristu, ey njelgim a mbinum jàk maarra yey ’maagim nà a wurra gi. ³ Jàk yey tâa yèk mgbèngda ti mbin nà tèerra ba, ngam dii dàngdiya yèk nirri, Fay tèege, de tèera Hàm wàa rèenje ni is nirri is jàk maarra gi, ngam ha e atfa jàk maarra, e yaanu a kiita di jàk maarra tâage a is nirri gi, ⁴ ha jàk yey gune yèk mgbèngda e gbèe a gin worro, dot nit ây tâa ot diksi bak a jày yiɗi isi gi ba, amma a jày yiɗi Jungci Fay. ⁵ Ngam a nit is ây aw dànde jàk isi, amma a nit Jungci ây aw dànde jàk Jungci. ⁶ Dànda jàk isi ’maarre a wurra, amma dànda jàk Jungci ’maarre a gûyrra ni tâam mbâri. ⁷ Dànda jàk isi yiiri ɗi a gin Fay, ngam ti ûunirre hay a yèk mgbèngda Fay ba, ge kpàaw ɗa ûunum ba. ⁸ A nit ây futke jày yiɗi isi, gaw kpàaw aw delu di Fay ba. ⁹ Un un futɗe jày yiɗi isi gi ba, amma jày yiɗi Jungci Fay, ngam Jungci maan dii tâarre a tinîir wun. Amma to nirri èe go Jungci Kristu, ey nit wàa ɗi ba. ¹⁰ To Kristu tâa go a tinîir wun, is wun dii wutiya yèk jàk maarra, amma Jungci gûyrre a gin wun, ngam Fay gòynunu ɗèm. ¹¹ To Jungci Fay gûysu di Yeesu a wurra gi tâarre go a tinîir wun, Fay Tooy Ɓèl gûysu di Yeesu Kristu a wurra gi, gû ge gûysunu is ta wun ɗa ni Jungci wàa tâage a tinîir wun. ¹² Ngam maan kor ta mum, ot tâa ni ndakcu ha ot fut jày yiɗi isi gi ba. ¹³ To un gûyrre go a tâam wun kà yey yiɗi isi, wu gun wurri. Amma to un ɓàrfa go ni Jungci jày tèenunu ni isi gi, gû gun gûyi. ¹⁴ A nit ây pî wooge Jungci Fay e nàrri daw gi, aw a hàm ta Fay ɗi. ¹⁵ Ngam un kpàa Jungci sàay ha un tol bak ba, amma un kpàa Jungci yey înunu hàm ta Fay, un ’naasi «abba» kà gàarra «Tooy». ¹⁶ Jungci Fay seedininarre a jungci is worro, nge orro ot hàm ta Fay ɗi. ¹⁷ Ye tâa orro ot hàm ây ɗi gi, kpàa got kpàa ɗa jàk koyrra a gin Fay. ’Mè got ’mèmsi ni Kristu a jàk koyrra maan. Ngam to ot riinji go ’màari ni Kristu, ’mè got ’mèmsi ɗa a ’mita wàa. ¹⁸ Mi dànde, nge ’màar ây riina kòsòng gi ge get e rèenji ni ’mita yey ge lòna dot Fay gi ba. ¹⁹ A jàk ây pî mbangse Fay, aw waatirre dèy ha e lòna hàm ta wàa. ²⁰ Ngam a jàk mbangsum ây a kparri aw dii ûunumya a gin gbeerra, ti tâa ni yiɗum waw ba, amma ngam Fay ûuni daw. Woogi daw ɗa jàk dànda, ²¹ ha a jàk mbangsum ây ɗa a kparri aw njel a tâam sàay a gin gbeerra gi, aw lek a ’mita tâam tiròom ’mèmsa ni hàm ta Fay. ²² Ot cèngni, a jàk mbangsum ây pî a kparri aw bakrirre, aw rakɗe àyrra dèy ha kòsòng, kà nikin rake àyrra a ciisum hàm. ²³ Ti tâa a jàk mbangsum ây gbè ba, amma orro ɗa ot nit ây kpàage mgban Jungci Delliya kà jàk màrra a hîir ta Fay, ot bakrirre a tinîir worro, ot waatirre tâarra hàm ta wàa, ha e saanina is worro. ²⁴ A jàk dànda kà yey ot kpàa saarra mgban. Amma to nirri rap go jày dàne gi, ge tâasi jàk dànda ba. Wun ge ii jàk dànda wàa a jày rabe gi ya? ²⁵ Hû go ot iirre jàk dànda worro a jày tâa ot ɗàa ot rap ba, ot waatirre jàk maan ni èfta tinîiri. ²⁶ Jungci Fay ɗa mgbaanjinarre a dàngda worro, ngam ot cèngni kày gesi ot waaw di Fay ba. Amma Jungci ni hak wàa waarre Fay ngam worro ni tibakni yey tâa nirri ge kpàaw yèerra ba. ²⁷ Fay Tooy gatkum tinîir nirri ey cèngni jày yiɗi gàarra Jungci gi, ye tâa waarre kà yey yiɗi ey ngam nit della ta wàa. ²⁸ Orro ot cèngni, nge jàk ây pî tèerre ngam jàk mbâri da nit ây yiɗu di Fay, ’naasi daw kà yey yiɗe gi. ²⁹ Da nit ây cèngni daw Fay diga mgban gi ɗàa daw cata aw rèenji ni Hàm wàa, ngam ha Hàm wàa e tâa hàm màrra a tîim kor ây dèy. ³⁰ Da nit ây ɗàa daw Fay cata gi, ’naasi daw ɗa. Da nit ây ’naasi daw gi, gòyni daw ɗa ɗèm. Da nit ây gòyni daw ɗèm gi, hîi daw ɗa ’mita. ³¹ Ɗo ji got gàa bak a yèk maan ya? Ye tâa Fay tâanjirre ni orro, wun ge anda dot ni yèy ya? ³² Fay ye tâa ti atnjufa ’màari di Hàm mbâr wàa ba, amma woowe e wut ngam worro, kà tâa ge hîina jày pî ni ey ba ya? ³³ Wun ge ’maa yèy a hak waw da nit ây carri daw Fay gi ya? Cen nirri ba sam, ngam Fay ey ge gòyni daw ɗèm. ³⁴ Wun ge yaanina a kiita ya? Cen nirri ba sam, ngam Yeesu Kristu wutke gi, gûysige ɗa a wurra, tâarre a riina Fay, waarre ngam worro. ³⁵ Ji ge ɗòlnjina ni yiide Kristu ya? ’Màari yi, koo jàk àyrriya, koo ɗàari, koo fey, koo èca jày, koo jàk tiwurra, koo ɓet ɓèl yi? ³⁶ Gàarre kà yey a defterre Fay: Ngam wey aw gàarre aw ɓàarina unji pî, aw raptinarre kà mbâay gûurra ây. ³⁷ Amma a jàk ây gi pî ot sunde dèy ni nit yey yiɗina gi. ³⁸ Mi cèngni mbâra, koo wurra, koo gûyrra, koo malayka ây, koo wûun ây, koo jàk tâarra yey, koo jày ge dàara gi, koo jàk kpèw kpèw ây, ³⁹ koo jàk ây u fay, koo jàk yengda ây a deesi, koo jàk mbangsum kana a kparri, ge kpàaw e ɗòlnjina ni yiide yey lòna dot Fay ni Yeesu Kristu Nitcoorra worro gi ba.

¹ Takundi gàami, miy mi nit ’mèmsum ɗi ni Kristu, mi rèengde rèeng ba. Ɗànjum tinîir mum seedimde ni Jungci Delliya, kàlimde hû go ɗa, ² nge mi dii ni ngòlnji dèy, àyrra ti suumde a tinîir mum ba. ³ Ngam mi yiɗi ngin, miy ni hak mum mi tâa lètiya mi ɗòlnji ni Kristu, mba ge mgbaanji daw go ngin kà yey da kor ta mum tâage yòot kpolo ni miy, ha aw saa. ⁴ Aw tâage yòot ni-Israyel ây, nîir waw a hàm ta Fay ɗi. Fay lòni ɗa ’mita wàa a tîim waw, aw dii ni yèk wasta wàa, ni yèk mgbèngda wàa, ni ot daprum a ɗàm kpees wàa, ni yèk ây a yèk mòonjum kàn ɗa. ⁵ Aw a hàm ta wosom ây ɗi diga Abraham, ni Isak, ni Yakob. Kristu ɗa lòrre a yòot waw ni isi, nit yey tâage hay a jày pî. ’Mita e tâaw di Fay tâam timgbàri! Amen. ⁶ Gim gàa, yèk Fay yèe nà a hak waw gi ir jàk ɓa hû go ba. Ngam ti tâa aw pî ’naasin daw ni-Israyel ây, tâage ni-Israyel ây takundi ba. ⁷ Koo ye tâa aw a yòot ta Abraham ɗi gi, aw pî aw tâa hàm ta wàa takundi ba. Ngam gàa a defterre Fay: Sey a hàm ta Isak gim ’naasi yòot wey. ⁸ Yèk yey yiɗi gàarra, ti tâa a hàm ây a kpàarra ni isi tâage hàm ta Fay ba. Amma a hàm ây kpàan daw a yèk mòonjum kàn gi, daw gaw sak yòot wàa takundi. ⁹ Ngam kà yey gàa yèk mòonjum kàn nà: A dat yeri kpolo kà mgbàr yey gàami gi i gim ira, Sara kpàa ge kpàa hàm nihun. ¹⁰ Ti tâa kà yey ni hàm wàa di Sara gbè ba, amma ni hàm ta wàa di Rebeka ɗa kpàage fûri ni Isak wosom worro gi. ¹¹ A ye tâa ɗa a hàm ta wàa aw kpàa ba, aw ɗà aw tèe jàk mbâri koo jàk makta ba, Fay de gbèesi dànda wàa de carri daw, ¹² ngam ha yèk wàa e gòyi, ti tâa ni tèerra tèem ba amma ni ’naasum yey ’naasu Fay di nirri gi, de gàaw di Rebeka: Ɓèlnji tèe ge tèewrra tèem di kaanji. ¹³ Gàarre kà yey a defterre Fay: Mi yiɗu di Yakob, amma mi yiiwrre di Esuwa. ¹⁴ Ɗo ji got gàa ya? Fay Tooy èca ɗèm ɗi yi? Ti tâa hû go ba sam! ¹⁵ Ngam gàawe nà di Muusa: Ii gim ii mbâr mum di nit yey yiɗim gi, go gim gobu ni ’maton di nit yey yiɗim gi ɗa. ¹⁶ Hû go to Fay carru go di nirri, ti tâa ni yiɗum wàa di nirri koo ni wet wàa ba, amma ni ’maton Fay ɗi. ¹⁷ A defterre, Fay gàawe nà di Farong: Mi iimi wûun, ngam ha mi kàlni mbinum mum a gin wey, ha nîir mum e yeski a deesi lang. ¹⁸ Hû go Fay gopɗe ’maton di nit yey yiɗe gi, ndèksurre tinîiri di nit yey yiɗe gi. ¹⁹ A yèk yey gum gàam: To tâa go kà yey, Fay kà ge yèe daw bak da nit ây gi ya? Wun ge njang jày yiɗe Fay gi ya? ²⁰ Mu nirri, mu wun ɗi ha mu hàanju di Fay ya? Taang kà ge gàaw di kin yey mbangsu gi «ngam jâ jâam dim kà yey» ya? ²¹ Di kin jâarra ti jâam orri cenu, ha e jâa ni mûta bàan kpolo taang delliya koo taang kana hû go ngam dukta jày ba yi? ²² Kà gum gàa a hak Fay gi ya? Ngam koo ye tâa yiɗi ngin e kàlni ngòlnji wàa, e cèngnini mbinum wàa gi, de èfe tinîir wàa dèy a gin nit ây gese aw kpàa kiita ngòlnji wàa aw gbee gi, ²³ ha e kàlnina kày tâa gbaarra ’mita wàa dot nit ây kpàage ’maton wàa, dot nit ây ɗàana mbangsum ngam ’mita wàa, ²⁴ dot nit ây ’naasina gi, ti tâa a tîim ni-Yude ây gbè ba, amma a tîim nit ây èege nà yèk wàa gi ɗa. ²⁵ Gàa kà yey a defterre Hoseya: ’Naa gim ’naasi daw nit ta mum da nit ây tâa nà aw tâa nit ta mum ba. ’Naa gim ’naasi daw nit yiɗum ta mum da nit ây tâa nà mi yiɗi daw ba. ²⁶ A gin gàan daw nà «un tâa nit ta Fay ba», a farra ’naa gaw ’naasi daw hàm ta Fak beengiya. ²⁷ Isaya bime nà a hak ni-Israyel ây, gàa: Koo ye tâa sakri ni-Israyel ây dii kà kaksoori a cewci sòo ɓèl, sey a nit ây càa gaw saa gbè. ²⁸ Ngam Tooy Ɓèl gbèe ge gbèesi tèem wàa pî yaale a deesi, kà yey gàa yèk wàa. ²⁹ Tâa kà yey ɗàana gàarra Isaya nà: To Tooy Ɓèl Tooy mbinum a jàk ây pî woona go ngin hàm ây ba, tâa got tâa ngin kà riiy Sodom, rèe got rèenji ngin ni riiy Gomorra. ³⁰ Ji got gàa bak ya? A nit ây èege nà yèk Fay, tâa aw kàm gòyrra ɗèm ba, aw kpàa gòyrra ɗèm kà gàarra ɗèm yey tâage ni goosum gi. ³¹ Amma a ni-Israyel ây kàmge nà gòyrra ɗèm ni tèem yèk mgbèngda gi, aw kpèt a jày gàa yèk mgbèngda waw ba. ³² Ngam ji rri ya? Ngam aw kàm gòyrra ɗèm a ɗàm kpees Fay ni goosum ba, amma ni tèem yèk mgbèngda. Aw mgbòle a gòok timgbòlnji, ³³ kà yey gàa a defterre Fay: E rri yey mi iirre gòok timgbòlnji, ni kpata yaanum a Siyona. Nit yey goosu gi, lawsam ge mòow ba.

¹ Un kor ta mum, mi yiɗi ni tinîir mum pî, ha nit ta mum ni-Israyel ây aw saa, mi waarre Fay ngam waw. ² Ngam gàa gim gàa a hak waw, aw dii ni rîirra kpèw a ɗàm kpees Fay, amma a rîirra waw kpèw gi aw cèngnu mbâra ba. ³ Ye tâa aw èe cèngnum kày gòyni daw Fay ɗèm da nit ây a ɗàm kpees wàa gi, aw kàmde gòyrra ɗèm ni hak waw. Hû go aw ûuni hak waw a gòynum ɗèm Fay ba. ⁴ Kristu tâage nit gbèesum jày gàa yèk mgbèngda, ngam ha koo wun goosuwa ge kpàa gòyrra ɗèm a ɗàm kpees Fay. ⁵ E rri yey jày kère Muusa a yèk gòyrra ɗèm ni yèk mgbèngda gi, gàa: Nit yey tèege jày gàa yèk mgbèngda gi, gû ge gûy ni erra. ⁶ Amma a yèk gòyrra ɗèm ni goosum, gàarre kà yey: Ta mu gàa a tinîir wey ba: Wun ge naa a faktiturum, ngam e cina Kristu ya? ⁷ Ta mu gàa ɗa ba: Wun ge cir a gook yengdiya gbèeni cen, ngam e naasa Kristu a tîim nit ây wutke gi ya? ⁸ Amma ji gàa ya? Gàa: Yèk Fay dii gaarra a gin wey, a mgbelyèk wey ni tinîir wey. Yèk maan tâage yèk goosum yey sakna gi. ⁹ To mu lònirre go ni mgbelyèk wey nge Yeesu tâage Nitcoorra, mu goosirre go a tinîir wey nge Fay gûysu a wurra gi, saa gum saa. ¹⁰ Ngam ni tinîir wàa nirri ge goosi ha e kpàa gòyrra ɗèm. Ni mgbelyèk wàa nirri ge lòni goosum wàa ha e kpàa saarra. ¹¹ Gàa a defterre Fay: Koo wun goosu di Kristu gi, lawsam ge mòow ba. ¹² Ngam ’nangjum cen a tîim ni-Yude ây ni yòot ni-riiy ây kana ba. Aw pî aw dii ni Nitcoorra kpolo, hîige gbaarra mbâr wàa koo di wun ’naasu gi. ¹³ Ngam gàarre a defterre Fay: Koo wun ’naase nîir Nitcoorra ya, kpàa ge kpàa saarra. ¹⁴ Amma kà gaw ’naasi nîir Nitcoorra, to aw goosu go ba ya? Kà gaw goosu, to aw rak go yèk wàa ba ya? Kà gaw rak yèk wàa, to nit sakta cen go ba ya? ¹⁵ Kà gaw sak yèk maan, to nit tèerriya cen go ba ya? Gàarre a defterre Fay: Ji hòmge della da nak nit ây dike sakta yèk kâwrra gi ya? ¹⁶ Amma ti tâa aw pî ngorge Yèk Kâwrra ba. Isaya gàa mgban: Tooy Ɓèl, wun goose a sakta yèk worro ya? ¹⁷ Hû go goosum ana a sakta yèy, sakta yèy ngaa ana a yèk Kristu. ¹⁸ Ɗo gim gun: Mba ni-Israyel ây aw rak yèk maan ba yi? Oow, aw rage. Ngam gàa a defterre Fay: Gûn nit sakta ây yeski a deesi lang, yèk ta waw kpèrre ha a gbèeni kparri. ¹⁹ Gu gim gun bak: Mba ni-Israyel ây aw cèngni yèk maan ba yi? Oow, aw cèngnige, kà yey ɗàa nà gàarra Muusa gi: Aa gim aanjunu ngèeri ni nit ây tâa aw tâa nit ta mum takundi ba. Aa gim aanjunu ngòlnji ni nit ây tâa aw cèngni jày ba. ²⁰ Isaya ɗa ti tol gàarra a yèk yey gàa Fay ba: A nit ây tâa aw kàmim ba, aw kpàame. Mi lòni hak mum a gin nit ây tâa aw gunim ba. ²¹ Amma a hak ni-Israyel ây gàarre: Unji pî mi patɗe kàn mum mi mgbaasa daw da nit ây hàwge rakta tuy, hàanje gi.

¹ Kà yey mi gàarre: Mba Fay ’màktifa daw da nit ta wàa yi? Oow, ti tâa hû go ba. Ngam miy ɗa mi ni-Israyel ɗi anga a kpàam Abraham, a yòot Benyamin. ² Fay ti ’màktifa daw da nit ta wàa cèngni daw diga màrra gi ba. Un cèngni jày gàa defterre a yèk Eliya ye waa Fay ngam ni-Israyel ây ba yi? ³ Gàa: Un ɓàre nit ây lòni yèk wey, aw aasifa gin gûurra jàk gurfum ây tâage woy wey, miy kpolo mum ngaskirra, aw kàmde aw ɓàrimi. ⁴ Amma ji gàawra Fay ya? Gàawra: E rri yey mi woonjirra ngam mum nihun ây ujinè jòròs tâa aw gbâygi a ɗàm kpees mâr Bayal aw coow ba. ⁵ Kà yey ngasɗa ɗa kòsòng ngirra nit ây càa, cat daw Fay a mbâr wàa gi. ⁶ Carri daw ngam mbâr wàa, ti tâa ngam tèem waw ba. To naa hû go ba, mbâr wàa ge tâa ngin mbâri ɗi ba. ⁷ Ɗo ji got gàa ya? Jày kàmin ni-Israyel ây gi, aw kpàa ba. Amma da nit ây a tîim waw carri daw Fay gi, aw kpàa jàk maan. A ngirra nit ây kana tinîir waw ir daw ndèktiya. ⁸ Dii kètiya kà yey, gàa: Fay hîi dawge jungci nistikûum, ta aw rap ni nis waw ba, ta aw rak ni tuk waw ha niyey gi ba. ⁹ Dawda ɗa gàaye: Nge siir waw e ir daw tidokri ni jàk timòoni, ha aw yaa aw kpàa kiita. ¹⁰ Nis waw e kupti daw kulpiya, ngam ta aw rap ba. Mârngi waw ngaa e tâa daw ûurriya koo ningàa. ¹¹ Kà yey gu gim guni: A ni-Israyel ây ye mgbòlin gi, aw gbeeye yi? Ti tâa hû go ba sam! Amma ngam yèk yaarra waw saarra de dàara daw da nit ây èege yèk Fay, ha e aanji daw ngèeri da ni-Israyel ây gi. ¹² Ye tâa yaarra waw ’maara daw mbâri dèy da nit ây a kparri, gbeerra waw ngaa ’maara daw jàk bèebi da nit ây èege yèk Fay, sakko kà ge tâa mbâr maan a isum waw pî a gin Fay gi ya? ¹³ Kòsòng mi yèenurre dun nit ây èege nà mgban yèk Fay, ye tâa mi nit tèerriya ɗi ngam nit ây èege yèk wàa. Mi raptirre tèem mum jàk ’mitiya ɗi, ¹⁴ mi yiɗi koo kà ya mi aanji daw ngèeri da yòot ta mum ni-Israyel ây gi, ha mi saani daw da nit ây kana a tîim waw. ¹⁵ Ngam ye tâa ’màktum waw ’maara raknjum Fay ni nit ây a kparri, kà ge tâa ngota waw a gin wàa, sonaa gûysum a wurra gi ba ya? ¹⁶ To cèerra tàat màrra tâa go jàk delliya ngam Fay, woy ngaskirra ɗa jàk delliya ɗi ngam wàa. To sisi jày tâa go delliya ngam wàa gi, kàn jàk maan ɗa delliya ɗi ngam wàa. ¹⁷ A ni-Israyel ây aw aw dii kà korrom còktiya tâage kàn ta wàa kana njaarriya. Muy mu nit yey èege nà yèk Fay, mu dii kà kàn njaarra a korrom nûri, aw leknumda a gin yey njaan nà kàn ây kana a korrom còktiya gi. Hû go mu ’mèmsi ɗa ni jàk mbâra anga a sisi korrom maan. ¹⁸ Kà yey ta mu ’misi hak wey ngam kàn ây njaan gi ba. Kà ge tâa ’misum hak wey ya? Ngam ti tâa muy mòogu di sisi ba, amma sisi mòogum dum. ¹⁹ Mba gàa gum gàa: Amma a kàn ây kana gi aw dii njaarriya, ha aw leknimda a farra. ²⁰ Hû go ɗi, Fay njaa dawge ngam aw goosi ba, e leknumda a farra ngam muy mu goosige. Koo hû go ta mu ’misi hak wey ba, amma toli. ²¹ Ngam ye tâa Fay ti woo daw njaarra da kàn ây mgban tâage kàn takundi gi ba, ge woom dum ɗa njaarra ba. ²² Rapti mgbergum Fay, ni ndèkta wàa ɗa! Ey dii ndèktiya a gin nit ây yaage a jàk maarra gi, amma dii ni mgbergum a hak wey, to mu gòyrre go a mgbergum wàa koo ningàa. To naa hû go ba, njaa ge njaam dum ɗa. ²³ Aw a ni-Israyel ây gi ɗa, to aw hàanjisirra go goosum bak ba, le ge leknisi daw a korrom a gin yey tâan nà mgban gi. Ngam Fay dii ni mbinum e mbir kà yey. ²⁴ Ngam ye tâa njaame a korrom nûri amma leknumge a korrom còktiya gi, sakko kà tâa ge leknisi daw da kàn mgban ây a korrom còktiya, korrom sisi waw ba ya? ²⁵ Un kor ta mum, ngam ta un dàn yèk kana ni hak wun ba, mi yiɗi un cèngni yèk yey tâage nà fûurriya gi, nge tinîir ni-Israyel ây kana ir daw ndèktiya, ha a mgbàr yey mûsa nit ây èege yèk Fay aw lekɗa. ²⁶ A dat maan a ni-Israyel ây pî saa gaw saa, kà yey gàa a defterre Fay: Nitsaanum a ge ana a Siyona, hèe ge hèenifa tèem makta a gin hàm ta Yakob. ²⁷ Yey tâage yèk wasta gim ii ni aw gi: A gim atfa daw jàk maarra waw. ²⁸ A hàwrra Yèk Kâwrra a ni-Israyel ây aw a nit yiir ta Fay ɗi ngam yèk wun. Amma a cata wàa cat daw gi aw a nit yiɗum ta wàa ɗi ngam yèk wosom ta waw. ²⁹ Fay ge asi jày hîi gi ba, ge ini yèk wàa a gin nit ây ’naase gi ba. ³⁰ Ngam mgban un un nit ây èege nà yèk Fay un ragu tuy ba, amma kòsòng un kpàa ’maton wàa ngam èca rakta tuk waw da ni-Israyel ây. ³¹ Kà yey aw aw hàwrre rakta tuy kòsòng, ngam ye tâa un un kpàarre ’maton Fay gi, ha aw ɗa aw kpàa ’maton maan. ³² Ngam Fay fanti dawge da nit ây pî a èca rakta tuy, ha e ii daw ’maton da nit ây pî. ³³ Kay, gbaarra bèeb Fay ’mirre, còycum wàa ni cèngnum jàk wàa yengge! Wun ge gatki yèk kiita ta wàa ya? Wun ge cèngni tèem ta wàa ya? ³⁴ Ngam gàa a defterre Fay: Wun ge kpàa cèngnum jàk dànda Tooy Ɓèl ya? Wun ge tâa nit yèenjum wàa ya? ³⁵ Malla wun ge hîiw jày, ha e kpàa jàk kana a gin wàa ya? ³⁶ Ngam a gin wàa ana jày pî, jày pî dii ni ey, jày pî dii ngam wàa. ’Mita e tâaw di Fay ha tâam timgbàri! Amen.

¹ Ngam maan un kor ta mum, ye tâa Fay lòni ’maton wàa kà yey gi, hîiwan is ta wun e tâa kà jàk gûurra beengiya, delliya, kâwrriya a ɗàm kpees wàa, e tâage daprum wun takundi ngam wàa. ² Ta un getnjini hak wun a dikri tâarra yey ba, amma bunjin dànda wun e tâa fûuya, ha un kpàa un gerru di jày yiɗi Fay, un cèngni jày tâage mbâra, delliya, ngotiya a ɗàm kpees wàa gi. ³ Ngam mbâr yey kpàam a gin Fay gi mi gàanurre dun pî, ta koo wuna e dàn yèk hak wàa e hòmu di jày gese gi ba, amma sey e dàn yèk hak wàa kày ge getnji ni goosum yey hîiw Fay gi. ⁴ Ngam ot dii ni jàk ây dèy a is worro, amma a jàk ây pî a isi gi aw tèerre tèem kpolo ba. ⁵ Hû go orro ot nit ây dèy ɗi ot tâa kà isi kpolo a gin Kristu, ot ’mèmsi kà jàk ây a isi kpolo. ⁶ Ot dii ni hîir ây ’nang ’nang, kà yey hîina Fay a mbâr wàa gi. To nirri kpolo kpàa go hîir lònum yèk Fay, sey e lòni kà yey ge getnji ni goosum wàa. ⁷ To nirri kpàa go hîir tèerra a tèem mgbaanjum, sey e tèe tèem mgbaanjum. To nirri kpàa go hîir kàlnjum, sey e kàlnji. ⁸ To nirri kpàa go hîir kpèwsunum da nit ây, sey e kpèwsi daw. To nirri kpàa go hîirra hîir ây, sey e tèe cen dànjusum. Nit yey tâage tiɗàm kpeesi, sey e rîi kpèw a tèem maan. Nit yey tâage nit iirra ’maton, sey e ii ’maton ni tinîir kâwrra. ⁹ Sey yiide wun e tâa cen tibiw. Yiin tèem makta, un ’mèm a tèem mbâra. ¹⁰ Yiɗinjin a tîim wun ni yiide kor ây, coonjin mbâra! ¹¹ Rîin kpèw a jày pî ta un loo ba, tâan hèmdiya a tinîiri ni Jungci Delliya, tèen tèem Nitcoorra! ¹² Kâwsin tinîiri a jàk dànda wun, èfin tinîir wun ɗa a riirra ’màari, mòon waarra Fay, ta un woofa ba! ¹³ Mgbaanjin daw a gayam waw da nit della ta Fay, furrin ngota niwooy ây koo ningàa! ¹⁴ Mbârsin daw da nit ây ɗàagunu ɗàari gi. Mbârsin daw, ta un maasi daw ba. ¹⁵ Kâwsinjin tinîir wun ni nit ây kâwse tinîiri gi, umin ni nit ây umge gi! ¹⁶ Raknjin a tîim wun! Ta un ’misi hak wun ba, amma ’mèmsin ni nit ây ûuni hay. Ta un dàn ni hak wun nge un còycige gi ba. ¹⁷ Ta un kànsu tèem makta di nirri ni tèem makta ba. Kàmin tèerra jày tâage mbâra a ɗàm kpees nit ây pî! ¹⁸ To gun kpàaw go, haawan tâanjum mbâra ni nit ây pî! ¹⁹ Un nit ây yiɗim dun gi, ta un insi jàk makta ni hak wun ba, amma woofan jàk maan e tâa a kiita ngòlnji Fay. Ngam gàarre a defterre wàa: Miy mi Tooy Ɓèl mi Tooy kànsum kiita ɗi, ji gim jingsu jày di nirri. ²⁰ Gàa bak: To fey àyurra go di nit yiir wey, hîiw tiriici e rii. To sòo ɓòyurre go, hîiw e njoo. Ngam to mu mbitɗe go kà yey gi, mu mòosurre lawsam, mu gàa mu kimjurrarre kîngsum a hak wàa. ²¹ Ta un woo jàk makta e sunnu ba, amma sunin jàk makta ni mbita jàk mbâri.

¹ Sey koo wuna e ûuni hak wàa a gin nit ây tâage ni mbinum gi. Ngam a wûun ây pî aw kpàa mbinum waw a gin Fay. A nit ây tâage ni mbinum gi, Fay iigi daw. ² Hû go to nirri an go ni yèy a gin nit ây tâage ni mbinum, ande yèy a jày gòyni Fay. Amma a nit ây ange ni yèy gi, aw ’maararre kiita a hak waw. ³ A nit tiɗàm kpees ây aw tâa nit tolsum ây a tèem mbâri ba, amma a tèem makta. To mu yiɗi go tolla da nit ây tâage ni mbinum gi ba, sey mu tèe jàk mbâri. Hû go kpàa gum kpàa ɓòlmum a gin waw. ⁴ Ngam aw a nit tèerra tèem ây ɗi ngam Fay, ha aw mgbaanjum a jàk mbâri. Amma to mu tèe go tèem makta, toli daw, ngam ye tâa aw dii ni ɓet ɓèl a kàn waw, ti tâa yèk ɓa hû go ba. Aw aw tèerre tèem ngam Fay, ha aw lòni ngòlnji wàa a hiitum da nit ây tèege tèem makta gi. ⁵ Kà yey gesi mu ûuni hak wey a gin waw, naa ngam tolla ngòlnji Fay gbè, amma ngam yèk dànjum tinîir wey ɗa. ⁶ Ngam maan ɗa un jingde jomorrgol, ye tâa aw a nit tèerra tèem ây ngam Fay ɗi. Aw aw mòorre a tèerra tèem kà yey cen woorra. ⁷ Hîisuwan koo di wuna jày gesu gi! Jinggin jomorrgol di nit ngota jomorrgol, jinggin seede duwan di nit ata seede duwan, tolin di nit yey gese un tolu gi, coowan di nit yey gese un coow gi. ⁸ Tèen jày gesi gi pî, ta un fut kiri koo di wuna ba, sey yèk kiri yiide ngam yiɗunjum a tîim wun. Ngam nit yey yiɗe nit tâanjum wàa gi, gbèesi jày gàa yèk mgbèngda. ⁹ Koo ye tâa yèk mgbèngda gàa «ta mu ii njeenu ba, ta mu ɓàr nirri ba, ta mu oo oori ba, ta mu ii ngèeri ba», a yèk ây gi ni yèk ây kana pî aw ’mèmsi a yèk yey kpolo tâage hay gàage: Yiɗi nit tâanjum wey kà yey yiɗum hak wey. ¹⁰ Nit yey yiɗe nit tâanjum wàa gi, ge mbiru jàk makta ba. Ɗo yiide tâage tigbèesunum jày gàa yèk mgbèngda gi pî. ¹¹ Mi gàanurre kà yey, ngam un cèngni a tâam yey tâana gi, nge unji gerre ha un mûyi a nistikûum. Ngam kòsòng saarra worro hòmna tâarra gaarra ni mgbàr yey goosina gi. ¹² Tuma ’mirre, gin ndamji hèerarre. Hû go dàan ot bot ot woofa tèem kulpi, ot mgbap jàk bàpri ây got haani ni erra a kayang gi. ¹³ Dàan ot dik dikri worro a unji kà yey gese gi, ta e tâa a mòorgum oca, koo a râmrum mbàl, koo a iirra njeenu, koo a haanum tuy, koo a tilètnjum, koo a ngèeri ba. ¹⁴ Amma ngorin jungci fûu tâage a gin Yeesu Kristu Nitcoorra gi. Ta un woo is wun e aanjunu jàk gayrum ba.

¹ Ngoruwan di nit yey dàngge a goosum di Fay gi, cen yèenjum a jàk dànda wàa. ² Ngam nit kpolo dii ni goosum ha e rii jày pî, amma nit yey dàngge a goosum gi, ge rii sey wasnàam gbè. ³ Nit yey riige jày pî gi, ta e luusu di nit yey tâa ti rii jày pî ba. Nit yey tâa ti rii jày pî ba, ta e hiitu di nit yey riige jày pî gi, ngam Fay ngoruge. ⁴ Muy mu wun ɗi, ha mu hiitu di lor nit ɓèl kana ya? Ngam gòyrra wàa koo yaarra wàa a gin nit ɓèl wàa tâaye. Amma ey gò ge gòyi, ngam Nitcoorra dii ni mbinum e gòynuwa. ⁵ Nit kpolo dàni, a unji ây kana aw hòm daw ’mita da unji ây kana. Nit kana ɗa dànde, a unji ây pî aw getnji kpolo. Sey koo wuna e cèngsi jàk dànda wàa a yèk maan. ⁶ Nit yey rapti unji kana hòmu ’mita di unji kana gi, mbitɗe kà yey ngam coonum di Nitcoorra. Nit yey riige jày pî gi, riiye ngam Nitcoorra, ye tâa gàawrre mbew di Fay ngam maan. Nit yey tâa ti rii jày pî ba, woofa riirra ngam Nitcoorra, ye tâa ey ɗa gàawrre mbew di Fay. ⁷ Ngam cen nirri kpolo a tîim worro ge gûy ngam hak wàa ba. Cen nirri ge wut ngam hak wàa ba. ⁸ Ot gûyrre go, ngam Nitcoorra gûyna. Ot wutɗe go, ngam Nitcoorra wutna. Hû go koo ot gûyrre go, koo ot wutɗe go, orro ot nit ta Nitcoorra ɗi. ⁹ Ngam Kristu wurre, gûysige, ha e tâa Nitcoorra waw da nit ây wutke gi ni nit ây gûyge gi. ¹⁰ Amma muy, ngam ji hiitumu di kor wey ya? Muy ɗa, ngam ji luusumu di kor wey ya? Orro pî gò got gòy a ɗàm kpees Fay a gbaat kiita wàa. ¹¹ Ngam dii kètiya a defterre Fay: Miy mi Tooy Ɓèl mi gàarre a jungci mum, takundi a nit ây pî gbâ gaw gbâygi a ɗàm kpees mum, mgbelyèk nit ây pî ’mi gaw ’misi nîir mum. ¹² Kà yey koo wuna a tîim worro goo ge goosi yèk hak wàa a ɗàm kpees Fay. ¹³ Hû go ta ot hiitinji bak a tîim worro ba. Amma ndika un gbèesi dànda wun a yèk yey, ta un iiw timgbòlnji ni gin yaarra di kor wun ba. ¹⁴ A gin Nitcoorra mi cèngni mbâra, cen jày tâage ’miskumya ni hak wàa ba. Sey to nirri raptu go di jàk maan kà jàk ’miskumya gi, jàk ’miskumya ɗi ngam wàa. ¹⁵ To mu àysu go tinîiri di kor wey yèk tiriit yey riim gi, mu woofage tèerra ni yiide. Ta mu gbeesu di nit yey wurre Kristu ngam wàa gi ba. ¹⁶ Ta mu woow di nirri e maasum a jàk yey tâagum jàk mbâra ba. ¹⁷ Ngam wûun Fay ti tâa ni riirra tiriici koo ni njoorra jàk njoorra ba, amma gòyrra ɗèm ɗi, ni tâam mbâri, ni kâwum tinîiri hîi Jungci Delliya gi. ¹⁸ Nit yey tèege tèem ngam Kristu kà yey gi, delu di Fay, dii mbâra ɗa a nis nit ây. ¹⁹ Hû go dàan ot kàm tâam mbâri, ni jày ge mgbaanjina a tîim worro a goosum gi. ²⁰ Ta mu mboysifa tèem Fay ni yèk tiriici ba. A tiriit ây pî dele ngam riirra, amma jàk makta ɗi to nirri iiw go timgbòlnji di kor wàa yèk riirra tiriit kana. ²¹ Kà yey hòme della to mu woofa go riirra jooci ni njoorra mbàl, ngam ta mu yaanu di kor wey a jàk maarra ba. ²² Goosum yey tâagum gi, sey mu mòo ngam hak wey a ɗàm kpees Fay. Kâwum diiw di nit yey tâa ge hiiti hak wàa a jày dàne gi ba. ²³ Amma to nirri rii go jàk yey hàanje a tinîir wàa gi, yaa mgban a kiita, ngam ey ti tèe ni goosum ba. Amma tèem yey tâa ti ana a goosum ba, jàk maarra ɗi.

¹ Orro ot nit ây tâage kpèw gi, gesina ot mgbaanji daw dàngda waw da nit ây dàngge a goosum, ta ot kàm delsum hak worro ba. ² Sey koo wuna a tîim worro e kàm jày ge delu di nit tâanjum wàa yèk mbâr wàa, ha e mgbaanju dikta ɗàm kpeesi a goosum. ³ Ngam Kristu ɗa ti kàm jày ge delu di hak wàa ba. Mbire kà yey tâa kètiya a defterre Fay gi, gàa: Fak mum, tinjàmni nit ây njàmrum aw gi yaa a hak mum. ⁴ Jày pî tâage mgban kètiya a defterre Fay gi, kère ngam e kàlnjina ha ot kpàa jàk dànda a gin Fay ni èfta tinîiri, ni yèk kpèwsum yey hîina defterre wàa gi. ⁵ Nge Fay a gin yey ana èfta tinîiri ni kpèwsum gi, e hîinu tâam mbâra ni raknjum a tîim wun kà yey kàlnunu Yeesu Kristu, ⁶ ha un ’misu di Fay Tooy Yeesu Kristu Nitcoorra worro, ni tinîiri kpolo, ni gûn kpolo! ⁷ Ngam maan ngotnjin a tîim wun, kà yey ngori dun ɗa Kristu ngam e ’misu di Fay gi. ⁸ Amma mi gàarre, Kristu ire nit tèerra tèem mgbaanjum da ni-Yude ây ngam e lòni takundi Fay, ha e gbèesi jàk ây yèe nà Fay ni yèk mòonjum kàn da wosom ta waw gi. ⁹ Dàarage ɗa ngam a nit ây èege nà yèk Fay gi aw kpàaw ’misum di Fay yèk ’maton wàa, kà yey gàa a defterre wàa: Ngam maan ’mi gim ’misum a tîim nit ây èege yèk wey, kâa gim kâani ndûu ni nîir wey. ¹⁰ Gàarre ɗa: Kâwsin tinîir wun un nit ây èege yèk Fay, ’mèmsa ni nit ta wàa! ¹¹ Gàarre bak: ’Misuwan di Tooy Ɓèl, un nit ây pî èege yèk wàa gi! Yòot nit dees ây pî sey aw ’misuwa. ¹² Isaya ɗa gàa: Yòot Yessa dàa ge dàara, a ge an e wûun daw da nit ây èege yèk Fay, ii gaw ii jàk dànda waw a gin wàa. ¹³ Nge Fay Tooy hîirra jàk dànda gi e mûununu ni kâwum tinîiri, ni tâam mbâri pî a goosum, ha jàk dànda wun e iisirra ’mita ni mbinum Jungci Delliya. ¹⁴ Un kor ta mum, mi cèngni mbâra a hak wun, un mûu ni mbâri, ni cèngnum jày pî, kpàa gun kpàa un yèenji a tîim wun. ¹⁵ Mi kèrfa dun yèk ây ’nang ’nang, mi tol koo jâ ba, ngam ha mi ɓaysunu jày cèngnunu diga mgban. Mi mbire ɗa hû go ngam yèk mbâr yey hîim Fay gi, ¹⁶ ha mi tâa nit tèerra tèem Yeesu Kristu a gin nit ây èege yèk Fay, mi tèerre tèem wàa a Yèk Kâwrra, ngam ha a nit ây èege yèk wàa aw ir jàk gurfum ngotiya a ɗàm kpees wàa, ɓetkumya ni Jungci Delliya. ¹⁷ Hû go a gin Kristu mi kpàa râanum tèem mum tèemi ngam Fay gi. ¹⁸ Mi tolle yèerra jàk kana sey jàk yey tèe Kristu ni miy, ngam ’maarra da nit ây èege yèk Fay gi a rakta tuy. Mbire kà yey ni yèerra yèy, ni tèerra tèem, ¹⁹ ni mbinum jàk lònum ây ni kayeefi ây, ni mbinum Jungci Delliya. Kà yey mi gîre koo a cewci hâ diga Yerusalem ha Illiriku, mi sage Yèk Kâwrra Kristu. ²⁰ Mi lekni hak mum a sakta Yèk Kâwrra a gin tâa aw haa rakta nîir Kristu ba, ngam ta mi jâa a gin yey tare nit kana ba, ²¹ amma mi mbire kà yey gàa a defterre Fay: Da nit ây tâa aw sak daw yèk wàa ba, ra gaw rabu. A nit ây tâa aw rak yèk wàa ba, cè gaw cèngnu. ²² Jày njanggim dikta a gin wun nak mûsi jày, ngam tèem kà yey. ²³ Amma kòsòng tèem kana ngasimda a dees ây ay gi ba. Diga yeri mûsi jày un lugim nisi ɗa, mi yiɗi mi difa a gin wun mi rapnu, ²⁴ a ye gim dik a Espaniya gi. A dikta maan mi dànde hòmda a gin wun, ha un isnim a farra, a ye gim tâanji ni un unji càa, gim kpàa kâwum a gin wun gi. ²⁵ Amma yey gi mi dikɗe a Yerusalem, ha mi tèe tèem ngam nit della ta wàa di Fay tâage a farra gi. ²⁶ Ngam del dawge da ni-Makedoniya ây ni ni-Akaya ây, aw kimji seede ngam nit èca ây a tîim nit della ta wàa di Fay tâage a Yerusalem. ²⁷ Takundi del dawge kà yey, gesi daw ɗa aw mbit daw jàk mbâri da nit èca ây gi. Ngam to a nit ây èege yèk Fay aw kpàa go jàk mbâri ni Jungci Delliya a gin ni-Yerusalem ây, gesi aw tèe daw ɗa tèem da ni-Yerusalem ây, aw mgbaanji daw a gayam is waw. ²⁸ A ye gim gbèesi tèem maan, mi hîi daw go da ni-Yerusalem ây hîir yey kpàama a kimjum seede gi, fu gim futfa ot gin wun a dikta Espaniya. ²⁹ Mi cèngni, mi difa go a gin wun gi, ’maa gim ’maafa dun gbaarra mbâr Kristu. ³⁰ Un kor ta mum, mi gàanurre ni nîir Yeesu Kristu Nitcoorra worro, ni yiide yey hîi Jungci Delliya gi, ’mèmsin ni miy ot rîi kpèw a waarra Fay ngam mum, ³¹ ha mi saa a kàn nit ây hàwgu rakta tuy di Fay, tâage a dees Yude, ngam ha mi kpàa tèerra tèem mgbaanjum mum a gin nit della ta wàa di Fay tâage a Yerusalem, tèem maan ɗa e tâa ngotiya a gin waw. ³² Kà yey kpàa gim kpàafa kpèta a gin wun ni kâwum tinîiri, mi wuysi ɗa a gin wun, to Fay yiɗi go gi. ³³ Fay Fak tâam mbâri e tâanji ni un pî! Amen.

¹ Mi lònunurre Foybe kor worro nikin, tèege tèem mgbaanjum da nit kimjum ây tâage a Kenkereya gi, ² ngam ha un ngoru mbâra ni nîir Nitcoorra, kà yey gesi daw da nit della ta wàa di Fay, un mgbaanju koo a tèem hâ gesu e tèe gi. Ngam ey mgbaanji dawge da nit ây dèy, mgbaanjimge dim ɗa. ³ Kèbin daw da Piriskilla ni Akila, nit ây tèenje ni miy a tèem Yeesu Kristu gi. ⁴ Aw aw hîi hak waw ngam saanum jungci mum. Yèk maan ti tâa miy gbè gàagi daw mbew ba, amma a nit kimjum ây pî a tîim nit ây èege nà yèk Fay gi ɗa. ⁵ Kèbin daw ngaa da nit kimjum ây a àay waw. Kèbuwan di Epaynetu nit yey yiɗim, tâage nit màrra a goosum nîir Kristu a dees Asiya gi. ⁶ Kèbuwan di Mariya, kin yey hàrge dèy a tèerra tèem ngam wun. ⁷ Kèbin daw da Andaraniku ni Yuniya anga a yòot kpolo ni miy, tâanje nà a kultuma ni miy. Daw aw coo dawrre a tîim nit ây tèe daw Yeesu gi, aw ɗàagim goosum di Kristu. ⁸ Kèbuwan di Ampiliyatu, nit yiɗum mum a gin Nitcoorra. ⁹ Kèbuwan di Urbanus, ni tèenjum ni orro a tèem Kristu. Kèbuwan di Estaki nit yey yiɗim gi. ¹⁰ Kèbuwan di Apelles nit gòyrra mbâra a gin Kristu. Kèbin daw da nit àay rra wàa di Aristobulu. ¹¹ Kèbuwan di Herodiyon anga a yòot kpolo ni miy. Kèbin daw da nit àay rra wàa di Narkissu, goosu di Nitcoorra gi. ¹² Kèbin daw da Tarifayna ni Tarifosa, hàrge tèerra tèem Nitcoorra gi. Kèbuwan di Perside kin yiɗumya, hàrge dèy a tèerra tèem Nitcoorra ɗa. ¹³ Kèbuwan di Rufu, gòyge mbâra a gin Nitcoorra, ni nuu wàa tâagim ɗa kà nuu mum gi. ¹⁴ Kèbin daw da Asinkiritu, ni Felegon, ni Hermes, ni Patoroba, ni Hermas, ni kor goosum ây tâanji ni aw gi. ¹⁵ Kèbin daw da Filologus, ni Yuliya, ni Nèriyu ni say wàa, ni Olimpas, ni nit della ta wàa di Fay pî tâanje ni aw gi. ¹⁶ Kèpnjin a tîim wun ni tikapni kor goosum ây! A nit ta Kristu kimje gi pî aw kèpfa dunde. ¹⁷ Un kor ta mum mi gàanurre, faasin hak wun a gin nit ây ’maarga tilètnjum, iirge timgbòlnji da nit goosum ây ni jàk ây tâa ti getnji ni kàlnjum yey kpàanu un gi ba. Kpâanjin ni aw! ¹⁸ Ngam a nit ây gi aw tèerre tèem Kristu Nitcoorra worro ba, amma sey tèem himni waw. Aw rûfnirre tinîir nit ây tâa aw cèngni jày ba, ni yèerra yèk ây kâwrriya, ni delsum yèy. ¹⁹ Amma yèk rakta tuk wun di Nitcoorra kpèrre koo u hâ a gin nit ây pî. Hû go tinîir mum kâwimde yèk wun, mi yiɗi un tâa nit còycum ây a tèerra jàk mbâri, un faasi hak wun a jàk makta ha un tâa ɓet ɓet. ²⁰ Fay Fak tâam mbâri nà ge nàmu di Seyɗan yaale a pàal nak wun. Mbâr Yeesu Kristu Nitcoorra worro e tâanji ni un! ²¹ Timote nit tèenjum ni miy, ’mèmsa ni Lukiyu, ni Yason, ni Sosipataru anga a yòot kpolo ni miy gi aw kèpfa dunde. ²² Tèrtiyu nit kèta ɗerrewol mum kèpfa dunde ɗa ni nîir Nitcoorra. ²³ Gayu a gin nit yey cirmi gi, a gin kimjum nit goosum ây pî, kèpfa dunde. Erastu nit waatum bèeb riiy yey, ni Kawartu kor worro ɗa aw kèpfa dunde. ( ²⁴ Nge mbâr Yeesu Kristu Nitcoorra worro e tâanji ni un pî! Amen.) ²⁵ Dàan ot ’misu di Fay tâage ni mbinum e kpèwsunu a goosum wun, ni Yèk Kâwrra yey sagim gi tâage yèk Yeesu Kristu, lòni jày tâage fûurriya diga mgbàr ây dèy hòmge gi, ²⁶ amma kòsòng lòrre a kayang ni defterre ta waw da nit ây lòni yèk Fay, tâa cèngnumya a gin nit dees ây pî kà yey gàa Fak tâam timgbàri gi, ngam ha aw goosu aw ragu tuy. ²⁷ ’Mita e tâaw ni Yeesu Kristu tâam timgbàri ha tâam timgbàri di Fay kpolo tâage Fak còycum gi! Amen.