Yèk lòta
11 E rri yey yèk lònum Yeesu Kristu yey hîiw Fay gi, ngam e lòni da nit tèerra tèem wàa jày gese e tâa a ɗàm kpeesi càa gi. Kristu tèega di malayka wàa a gin nit tèerra tèem wàa Yuhanna, ngam e sagu yèk yey. 2 Yuhanna tâage nit seedum yèk Fay, sage yèk seedamku Yeesu Kristu ye rage gi pî. 3 Kâwum diiw di nit yey jangge, rake yèk lònum ây gi, futke yèk ây tâage kètiya a defterre yey. Ngam mgbàr kpèta jàk maan hèerage. 4 - 5 Miy mi Yuhanna mi kèpfa dunde, dun nit kimjum ây tâage a riiy jòròs a Asiya. Fay tâage kòsòng gi, ey tâage nà mgban, ey ge dàara gi ɗa, ’mèmsa ni jungci ây jòròs tâage a ɗàm kpees gbaat wûun wàa, ni Yeesu Kristu nit seedum mbâra, nit màrra a gûysum a tîim nit ây wutke gi, wûun waw da wûun ây a deesi, nge aw pî aw hîinu mbâr waw ni tâam mbâri! Yeesu ey yiɗinage, sàasinage a jàk maarra worro ni njîim wàa, 6 ey iigina dorro wûun, iigina nit daprum ây di Fay Too wàa. A gin Yeesu gi tâa ’mita ni mbinum tâam timgbàri ha tâam timgbàri. Amen. 7 Raptin, dàa ge dàara a titurum ây! A nit ây pî ni nit ây baagu gi ɗa ra gaw rabu. Mûsa yòot nit dees ây pî u gaw umi ngam wàa. Hû go ge tâa, amen. 8 «Miy tâage Alfa ni Omega, ɗaarrenji ni gbèerrenji,» hû go gàa Fay Tooy Ɓèl tâage kòsòng gi, ey tâage nà mgban, ey ge dàara gi ɗa, ey tâage wûun a jày pî. 9 Miy mi Yuhanna, kor wun, mi nit ’mèmsum ni un ɗi a riirra ’màari, a wûun Yeesu, a èfta tinîiri ɗa a gin wàa. Aw ’maamra ay gi a deesi a tîim sòo înuwan Patmos, ngam yèk Fay ni yèk seedamku Yeesu. 10 A unji wuysum Nitcoorra, Jungci Fay dii a gin mum, de rakmi gûn ɓèl a dat mum kà ti uta, 11 gàarre: Jày rapmu gi kèri a ɗerreeji ây, tèenifa daw da nit kimjum ây a riiy jòròs gi, a Efesu ni Samirna, ni Pergamu, ni Tiyatira, ni Sardes, ni Filadelfiya, ni Lawdikiya. 12 De dûrmi ha mi raptu di jày yèegima gi. De rapmi timòoni ebi jòròs mbangsumya ni kangeerri, 13 a tîim timòoni eb ây gi ɗa jày rèenji kà Hàm nirri, mgbapɗe lurra yâktiya ha a nay ni jàk cîirra a gbetki mbangsumya ni kangeerri. 14 Hak wàa ni gimsi wàa dii burriya kà jòmsi, burriya kà gòok buun. Nis wàa dii kà pètki ebi. 15 Nak wàa rèenji kà titefki nîige caliya a ebi, gûn wàa ngaa kà jota sòo a sîirra ây dèy. 16 A kàn riina wàa mòorre tibiskum ây jòròs. Ɓet ɓèl riirriya cewci cuk yuura a mgbelyèk wàa. Tiigi wàa dii kà unji finge diɓel diɓel ni kpèw kpèw wàa pî. 17 Ye rapmi gi, de yaami a nak wàa kà nit wuta. De banggimda kàn riina wàa de gàa: Ta mu tol ba! Miy tâage nit màrra, ni nit gbèeni. 18 Mgban mi wurre nà, amma kòsòng mi dii beengiya, mi gûyrre tâam timgbàri ha tâam timgbàri. Mi dii ni tifaarunum nin wurra ni gin tâam nit ây wutke gi. 19 Hû go kèr jày rapmu gi pî, koo jày tâage kòsòng, koo jày ge tâa a dat maan gi. 20 Yey tâage jàk fûurra yèk tibiskum ây jòròs rapmu a kàn riina mum gi, ni yèk timòoni ebi jòròs mbangsumya ni kangeerri gi: A tibiskum ây jòròs nà gi aw tâage malayka ta waw da nit kimjum ây a riiy jòròs. Timòoni ebi jòròs gi ɗa aw tâage nit kimjum ây a riiy jòròs.
21 Yuhanna, kèrufa ɗi malayka waw da nit kimjum ây a Efesu: E rri yey jày gàa nit yey mòoge tibiskum ây jòròs a kàn riina wàa, gîrge a tîim timòoni ebi jòròs mbangsumya ni kangeerri gi: 2 Mi cèngni tèem wun, ni hâta wun, ni èfta tinîir wun. Mi cèngni, gun kpàaw ngota nit makta ây ba, un gopnji dawrre da nit ây gàage ni hak waw a nit ây tèe daw Yeesu ɗi gi, amma aw tâa hû go ba. Un kpàa daw a nit rèengrum rèeng ây ɗi. 3 Mi cèngni, un èfɗe tinîiri, un gòyrre a riirra ’màari ngam nîir mum, un loo ba. 4 Amma mi dii ni yèk kana, tâam a hak wun, ye woofa un yiide wun woy màrra. 5 Ɓaysin yiide wun a gin yey tâanu nà, yaara un gi, inin tinîir wun, un tèe tèem woy màrra nà! Amma to un ini go tinîir wun ba, dàa gim dàara mi tusfa timòoni eb wun a gin tâam wàa. 6 Amma yey ɗa tâanu jàk mbâri, ye yiinu tèem waw da nit Nikolawi ây. Miy ɗa mi yiirre tèem waw. 7 Nit yey tâage ni tuk rakni, sey e rak jây gàa Jungci Delliya da nit kimjum ây gi! Nit yey sunge gi, hîi gim hîiw orri e rii nîirra futifak gûynum yey tâage a gin Fay a Paradi. 8 Yuhanna, kèrufa di malayka waw da nit kimjum ây a Samirna: E rri yey jày gàa nit yey tâage nit màrra, nit gbèeni, nit yey wutke nà, gûyrre. 9 Mi cèngni ’màar wun ni èca wun, amma koo hû go un nit bèeb ây ɗi. Mi cèngni yèk maasum yey yèen dun a nit ây gàan ni hak waw, a ni-Yude ây ɗi gi, amma aw tâa hû go ba, kimjum waw ’mèmsi ni Seyɗan. 10 Ta un tol ’màar yey gàanu un rii gi ba. Ngam Seyɗan le ge lekni nit ây kana a tîim wun a kultuma ha e get dun rûfta. Rii gun rii ’màari unji ra. Gòyin mbâra ha wurra, hîi gim hîinu tikangni hak wun, gûyrra tâam timgbàri. 11 Nit yey tâage ni tuk rakni, sey e rak jày gàa Jungci Delliya da nit kimjum ây gi! Nit yey sunge gi, dey wurra cukti ge kpàaw ba. 12 Yuhanna, kèrufa di malayka waw da nit kimjum ây a Pergamu: E rri yey jày gàa nit yey tâage ni ɓet ɓè1 riirriya cewci cuk gi: 13 Mi cèngni, un dii a gin tâam wûun Seyɗan. Amma un mòorre nîir mum, un hàl goosum dim ba, koo a mgbàr yey ɓàruwan di Antipas nit seedum mum mbâra a gin wun, a gin tâam Seyɗan. 14 Amma mi dii ni yèk kana a hak wun, ye tâa un dii a farra ni nit ây mòoge yèk kàlnjum Balaama, nit yey kàlnju di Balak gàaw, e ii timgbòlnji a ɗàm kpees ni-Israyel ay, aw yaa a jàk maarra, ha aw rii joot daprum a mâri, aw iiri njeenu. 15 Hû go un ɗa un dii ni nit ây mòoge yèk kàlnjum nit ta wàa di Nikolawi. 16 Inin tinîir wun! To ti tâa go hû go ba, dàa gim dàara a gin wun kènu, haa gim haa gbàaci ni nit ây maan ni ɓet ɓè1 a mgbelyèk mum gi. 17 Nit yey tâage ni tuk rakni, sey e rak jày gàa Jungci Delliya da nit kimjum ây gi! Nit yey sunge gi, hîi gim hîiw tàat Mannu fûurriya, hîi gim hîiw ɗa hàm gòok burriya ni nîir fûuya kètiya a farra. Cen nirri ge cèngni nîir maan ba, sey nit yey ngorge gi. 18 Yuhanna, kèrufa di malayka waw da nit kimjum ây a Tiyatira: E rri yey jày gàa Hàm Fay, nit yey tâage ni nisi kà pètki ebi, ni nak wàa kà titefki caliya gi: 19 Mi cèngni tèem wun, ni yiide wun, ni goosum wun, ni mgbaanjum wun, ni èfta tinîir wun, ni tèem wun kòsòng gi hòmu ’mita di woy màrra. 20 Amma mi dii ni yèy a hak wun, ye tâa un woowe orri di Ijabel, kin yey gàa ni hak wàa nge nit lònum ɗi gi, ha e kàlnji daw, e rûf daw da nit tèem ta mum, aw iiri njeenu, aw rii joot daprum a mâri. 21 Mi hîiwe orri di kini gi ha e ini tinîir wàa, amma ey hàwrre inum tinîiri a iirra njeenu. 22 E rri yey taa gim taanu a jingi ni àyci, ni nit ây iige njeenu ni kini gi ɗa, le gim lekni daw a ’màar ɓèl, to aw ini go tinîir waw a tèem ta waw ni ey gi ba. 23 Ɓà gim ɓàr a hàm ta wàa ɗa aw wurri. Hû go a nit kimjum ây pî cè gaw cèngni, nge miy tâage nit cèngnum jàk dànda a tinîir nit ây pî, kà gim kànsu koo di wuna a tîim wun kày tâa tèem wàa. 24 Amma un dun nit ây ngaskirra a Tiyatira gi, tâa un un ’mèmsi a yèk kàlnjum maan ba, tâa un lek a jày gàan «jàk cèngnum a yèk yengda Seyɗan» gi ba, miy mi gàanurre, gim toksirra dun koo titokri kana ba. 25 Mòon jày tâagunu gi, ha ye gim ira! 26 Nit yey sunge, futke tèem mum ha gbèeni gi, dey hîi gim hîiw mbinum a hak nit dees ây. 27 Ey faa ge faa daw ni kpèw kpèw, ni sàwri titefki, ni kpèw kpèw kà aasum tijâam mbètètèt, 28 ni mbinum kà yey ngorma ɗa a gin Too mum. Hîi gim hîiw tibiskum ndamji. Nit yey tâage ni tuk rakni, sey e rak jày gàa Jungci Delliya da nit kimjum ây gi!
31 Yuhanna, kèrufa di malayka waw da nit kimjum ây a Sardes: E rri yey jày gàa nit yey tâage ni jungci ta Fay jòròs, ni tibiskum ây jòròs gi: Mi cèngni tèem wun, un dii ni nîiri nge un gûyrre, amma un wurre. 2 Mûyin, kpèwsin jày ngaskirra dun a tinîiri càa gi, kèle wucu! Ngam mi kpàarra a gin wun tèem yey getke a ɗàm kpees Fak mum ba. 3 Ɓaysin kà yey ngotnu, raknu nà a Yèk Kâwrra gi, furrin yèk maan, inin tinîiri! To un mûy go ba, di gim difa a gin wun kà oori, gun cèngni unji maan gim difa a gin wun gi ba. 4 Amma un a Sardes un dii ni nit ây kana a tîim wun, tâa aw ’miskini lurra waw a tèerra jàk maarra ba. Aw gî gaw gîtnji ni miy ni lurra burriya, ngam aw getke. 5 Nit yey sunge gi, mgba ge mgbabi lurra burriya. Miy gim yuunifa nîir wàa a defterre jungci ba, gò gim gòyni nîir wàa a ɗàm kpees Too mum ni malayka ta wàa. 6 Nit yey tâage ni tuk rakni, sey e rak jày gàa Jungci Delliya da nit kimjum ây gi! 7 Yuhanna, kèrufa di malayka waw da nit kimjum ây a Filadelfiya: E rri yey jây gàa nit della gi, nit takundi, nit yey tâage ni tifaarunum wûun Dawda gi. To ey faari go, cen nirri ge fanti ba. To fanti go, cen nirri ge faari ba. 8 Mi cèngni tèem wun. Ye tâa un dii ni kpèw kpèw càa un furre yèk mum, un hàl nîir mum ba. E rri yey mi woonu nin faarumya a ɗàm kpees wun, cen nirri ge kpàaw fantum ba. 9 ’Maa gim ’maafa dun nit ây anga a kimjum Seyɗan, gàage ni hak waw a ni-Yude ây ɗi gi, amma aw tâa hû go ba, ngam aw rèengde rèeng. Ii gim ii daw ha aw ûu a ɗàm kpees wun, ha aw cèngni ɗa, mi yiɗunuge. 10 Ngam un furre yèk mum a yèk èfta tinîiri, miy ɗa faa gim faanu a mgbàr yey ge dàara jàk rûfta a kparri lang, ha e rûf da nit ây tâage a deesi gi. 11 Dàa gim dàara yaale. Mòon jàk yey tâagunu gi, ngam ta nirri e ngotnu tikangni hak wun tâagunu jàk sunda gi ba. 12 Nit yey sunge gi, ii gim iiw e tâa jàk tigòynum a àay Fak mum. Ey ge yuu a farra ba sam. Kè gim kèr a hak wàa nîir Fak mum, ni nîir riiy Fak mum, Yerusalem fûuya ge ana a faktiturum a gin Fak mum, ge cira gi. Kè gim kèr ɗa nîir mum fûuya a hak wàa. 13 Nit yey tâage ni tuk rakni, sey e rak jày gàa Jungci Delliya da nit kimjum ây gi! 14 Yuhanna, kèrufa di malayka waw da nit kimjum ây a Lawdikiya: E rri yey jày gàa nit yèerra yèk Amen, nit seedum mbâra takundi, nit yey tâage ɗaarrenji a jày pî mbangse Fay gi: 15 Mi cèngni tèem wun, un tâa toynjiya ba, un tâa hèmdiya ba. Ndika un tâa toynjiya koo hèmdiya. 16 Amma ye tâa un dii a tîim, un tâa hèmdiya koo toynjiya ba, yî gim yîmfa dun a mgbelyèk mum. 17 Un gàarre: Orro ot nit bèeb ây ɗi, ot kpàaye jày dèy, orro gayam jàk kana cenna ba. Amma un un cèngni nge un kâwum cennu ba yi? Un èe ’maton, un tâa nit èca ây, un râay ây ɗi, un tâa isi kpong. 18 Mi gàa dunde: Sàan a gin mum kangeerri woy hèsumya a ebi, ngam ha un tâa ni bèebi! Sàan ɗa lurra burriya, ngam ha un mgbabi, ta lawsam is wun kpong e lòt ba! Sàan ɗa ticèer nisi, ngam un iirra a nis wun ha un rabi! 19 Da nit ây yiɗim daw gi mi yèe dawrre, mi ûuni dawrre. Sey un tâa mbâriya, un ini tinîir wun a tèerra jàk maarra! 20 E rri yey mi gòyrre a nin mi taarre. To nirri rak go gûn mum, e faarim nin, le gim lek a gin wàa mi riinji ni ey, ey ngaa e riinji ni miy. 21 Nit yey sunge gi, hîi gim hîiw orri e tâanji ni miy a gbaat wûun mum, kà yey sunim miy gi, mi tâanji ni Too mum a gbaat wûun wàa. 22 Nit yey tâage ni tuk rakni, sey e rak jày gàa Jungci Delliya da nit kimjum ây gi!
41 A dat maan mi rabe jàk kana. E rri yey nin a faktiturum faarumya. Gûn yey rakmi nà mgban kà gûn ti uta yèegima gi de gàa: Naara ay! Kà gim kàlnum jày gàa e mbir a ɗàm kpeesi gi. 2 Kòsòng Jungci Fay dii a gin mum. De rapmi gbaat wûun dii a faktiturum. Tooy tâarre a gbaat maan. 3 Ey rèenji kà della gòok yaspa ni gòok sardisa, cullum mgbaawe di gbaat wûun rèenji kà della gòok amiradi. 4 A cewci gbaat wûun gi a gbaat ây kana aw dii ra cuk sàm naan. A toonji ây ra cuk sàm naan aw tâarre a gbaat ây maan, aw mgbapɗe lurra burriya. Aw iirre tikangni hak wûun mbangsumya ni kangeerri. 5 A gbaat wûun nà gi tâyrra buun, ni dûurra buun, ni tibimni ây de anan. Bingda eb ây jòròs aw dii a ɗàm kpees gbaat wûun gi aw tâage jungci ta Fay jòròs. 6 A ɗàm kpees gbaat wûun sòo ɓèl dii wet wet a farra kà darrugal. Gaarra a cewci gbaat wûun gi, jàk ây naan tâage ni jungci aw mûu ni nis ây dèy, a ɗàm kpeesi ni daarri. 7 Jàk màrra tâage ni jungci nà rèerre kà tidîisi, jàk cukti ngaa rèerre kà hàm naay, tiigi wàa di jàk taanti rèerre kà nirri, jàk naanti ngaa rèerre kà wâw ange gi. 8 Koo wuna a tîim jàk ây naan tâage ni jungci gi, aw dii ni kapci ây yira. Is waw pî mûu ni nis ây, u gbaa ni mîisi ɗa. Aw aw wuysirre tuma ni unji ba, aw kâarre ndûu aw gàarre: Della, della, della diiw di Fay Tooy Ɓèl, tâage ni mbinum a jày pî, tâage nà mgban, tâage kòsòng, ge dàara gi ɗa. 9 Ye tâa jàk ây naan tâage ni jungci aw kâarre ndûu ngam aw ’misini aw coo, aw gàa mbew di Tooy tâage a gbaat wûun, gûyrre tâam timgbàri ha tâam timgbàri gi, 10 a toonji ây ra cuk sàm naan nà aw gbâygirra a ɗàm kpees Tooy tâage a gbaat wûun, aw ’misurre di Tooy gûyrra tâam timgbàri ha tâam timgbàri, aw ’màktirre tikangni hak waw a ɗàm kpees gbaat wûun, aw gàarre: 11 Tooy Ɓèl, Fak worro, muy getke ngota ’misum, ni coorra, ni mbinum, ngam muy mbangse jàk ây pî, ni yiɗum wey tâan a jàk ây gi mbangsumya!
51 A kàn riina wàa di Tooy tâage a gbaat wûun nà gi, de rapmi defterre kètiya u mîisi ni daarri, fantumya ni mèn ticèngsunum ây jòròs. 2 De rapmi ɗa malayka kpèwnjiya gunde ni gûn ɓèl, gàarre: Wun getke ha e faari defterre gi, ha e pati mèn ticèngsunum ây gi ya? 3 Amma cen nirri a faktiturum, koo a deesi, koo a mîis deesi ge mbin faarum defterre maan ha e raptu u mîisi ɓa. 4 De ummi dèy, ngam aw kpàa koo nirri kpolo getke, e faari defterre yey e raptu u mîisi ba. 5 Nirri kpolo a tîim toonji ây nà de gàamra: Ta mu um ba! E rri yey tidîisi ana a yòot Yuda ni gbaa Dawda, ey sune. Kpàa ge kpàa faarum defterre ni mèn ticèngsunum ây jòròs gi. 6 De rapmi hàm mgbâay gòyrre gaarra a gbaat wûun nà, a tîim jàk ây naan tâage ni jungci nà, ni tîim toonji ây nà gi. Hàm mgbâay maan dii mu gàa gûurriya, dii ni dîw ây jòròs, ni nis ây jòròs, aw tâage jungci ta Fay jòròs tèerriya a deesi lang. 7 De dàara e ngor defterre a kàn riina Tooy tâage a gbaat wûun gi. 8 Hàm mgbâay ye ngore defterre nà, a jàk ây naan tâage ni jungci gi, ni toonji ây ra cuk sàm naan gi aw ûu a ɗàm kpees wàa. Koo wuna a tîim waw dii ni tindingding, ni kpeela kangeerri mûunumya ni jàk gurfum mgbirgumya yey tâage waarra waar nit goosum ây di Fay. 9 Aw kâarre ndûu fûuya, aw gàarre: Muy getke ngota defterre, ha mu peti mèn ticèngsunum ây, ngam mu dii gûurriya, ni njîim wey sàasunum nit ây ngam Fay, anga a yòot nit ây pî, ni yèk nit ây ’nang ’nang pî, ni ’mèmsum nit ây pî, ni nit dees ây pî. 10 Muy iigi daw wûun, muy iigi daw nit daprum ây ngam Fak worro. Wûu gaw wûuni a deesi. 11 De gopmi, de rakmi gûn malayka ây dèy. Mûsa sakri waw dii ujinè ra nak ujinè ra, ujinè nak ujinè. Aw gòyrre a cewci gbaat wûun ditètè ni jàk ây tâage ni jungci, ni toonji ây gi. 12 Aw bimde ni gûn ɓèl aw gàarre: Hàm mgbâay gûurriya gi ey getke ngota mbinum, ni bèebi, ni còycum, ni kpèw kpèw, ni coorra, ni ’mita, ni mbâri. 13 De rakmi jàk mbangsum ây pî tâage a faktiturum, ni deesi, ni mîis deesi, ni sòo ɓèl, aw gàarre: Di Tooy tâage a gbaat wûun, ni Hàm mgbâay, mbâri, ni coorra, ni ’mita, ni mbinum e tâa daw tâam timgbàri ha tâam timgbàri! 14 A jàk ây naan tâage ni jungci gi de gàan: Amen. A toonji ây nà ngaa de ûun aw coo.
61 De rapmi Hàm mgbâay patirre mèn ticèngsunum màrra a tîim ticèngsunum ây jòròs a defterre nà gi, de rakmi ɗa jày kpolo a tîim jàk ây naan tâage ni jungci gi gàarre ni gûn kà dûurra buun: Dàara! 2 De rapmi kpis burriya. Nit ɗata a kpis maan dii ni sâang, aw hîiwe tikangni hay ɗa. De taye sunda, ngam ey nit sunda ɗi. 3 Hàm mgbâay de pati mèn ticèngsunum woy cukti. De rakmi jàk cukti a tîim jàk ây tâage ni jungci, gàarre: Dàara! 4 Kpis kana de lòrra caliya. Di nit ɗata a kpis maan aw hîiwe mbinum ngam e atfa tâam mbâri a deesi, ha a nit ây aw ɓàtnjiri. Aw hîiwe ɗa ɓet ɓèl. 5 Hàm mgbâay de pati mèn ticèngsunum woy taanti. De rakmi jàk taanti a tîim jàk ây tâage ni jungci, gàarre: Dàara! De rapmi kpis yiriya. Nit ɗata a kpis maan dii ni tigeni a kàn wàa. 6 De rakmi kà gûn jày kpolo a tîim jàk ây naan tâage ni jungci, gàarre: Tigeni mayrrorri kpolo ngam seede tèem unji kpolo, tigeni tirri taan ngam seede tèem unji kpolo. Amma ta un mboysifa sàar num ni sàar mbàl timgbokcum ba! 7 Hàm mgbâay de pati mèn ticèngsunum woy naanti. De rakmi gûn jàk naanti a tîim jàk ây tâage ni jungci, gàarre: Dàara! 8 De rapmi kpis kana kpàlliya. Di nit ɗata a kpis maan aw înu nîir wàa wurra. Gin tâam nit ây wutke gi furruge. Aw hîiwe mbinum a ngirra ngirra deesi ha e ɓàri da nit ây ni ɓet ɓèl, ni fey, ni àyci. A jàk nûr ây ɗa mòo gaw mòori da nit ây. 9 Hàm mgbâay de pati mèn ticèngsunum woy kèti. De rapmi u fur gin gûurra jàk gurfum, jungci nit ây ɓàrin daw.@ngam yèk Fay ni yèk seedamku yey mòon gi. 10 De bimin ni gûn ɓèl de gàan: Tooy Ɓèl, Tooy della, Tooy takundi, ha ningàa gum kànsi daw kiita njîim worro da nit ây ɓàrgina, tâage a deesi gi ya? 11 Koo di wuna a tîim waw aw hîi daw lurra burriya, de gàan daw, aw waa càa ha mûsa nit tèenjum ta waw ni kor ta waw, gàan aw ɓàri daw kà aw gi, e gerri. 12 Ye rapmi Hàm mgbâay pati mèn ticèngsunum woy yiti, deesi de yûuye dèy ni ɓèlla, unji de ire yiriya kà buhu gimsi, kirmum corri ngaa de ire kà njîim. 13 A tibiskum ây a faktiturum de yaaran a deesi kà yaatum ɓool jâaci, ye yûusu hiski ɓèl gi. 14 Faktiturum de hèesi kà kata ɗerrewol. A gopri ây ni dees ây a tîim sòo pî aw hèesige a gin tâan nà gi. 15 A wûun ây a deesi, ni nit ɓèl ây, ni nit ɓèl ta waw da sooje ây, ni nit bèeb ây, ni nit kpèw kpèw ây, ni sàay ây, ni tiròom ây pî de fûun a gook ây ni ɓàtki gòok ây a gopri. 16 De gàan da gopri ây ni gòok ɓèl ây: Yaarran dorro un kuptina, ha ot fûu a nis Tooy Ɓèl tâage a gbaat wûun gi, ni a ngòlnji wàa di Hàm mgbâay ɗa! 17 Ngam unji ngòlnji waw kpèrrage, unji ɓèl ɗi. Wun ge kpàaw gòyrra ya?
71 A dat maan de rapmi malayka ây naan aw gòyrre a gbèeni ây naan a deesi, aw mòorre hiski ây naan, ngam ta hiski e wâa a deesi koo a fak sòo koo a kpiir hâ ba. 2 De rapmi malayka kana ana a ɓani unji, mòorre ticèngsunum wàa di Fak gûyrra. De bimi ni tibimni ɓèl da malayka ây naan nà, kpàage mbinum ha aw mboysu di deesi, aw mboysu di sòo ɓèl gi, 3 de gàa: Ta un mboysu di deesi, koo di sòo ɓèl, koo da kpiir ây ɗà ba, sey to ot iirra daw go ticèngsunum a tiigi waw da nit ta Fay. 4 De rakmi sakri nit ây iirran daw ticèngsunum, aw dii ujinè temèrre ni ujinè ra naan sàm naan a tîim yòot ni-Israyel ây pî. 5 Aw iirra dawge ticèngsunum da nit ây ujinè ra sàm cuk a yòot Yuda, da nit ây ujinè ra sàm cuk a yòot Ruben, da nit ây ujinè ra sàm cuk a yòot Gada, 6 da nit ây ujinè ra sàm cuk a yòot Aser, da nit ây ujinè ra sàm cuk a yòot Neftali, da nit ây ujinè ra sàm cuk a yòot Manassa, 7 da nit ây ujinè ra sàm cuk a yòot Simeyon, da nit ây ujinè ra sàm cuk a yòot Lewi, da nit ây ujinè ra sàm cuk a yòot Issakar, 8 da nit ây ujinè ra sàm cuk a yòot Jabulon, da nit ây ujinè ra sàm cuk a yòot Yosef, da nit ây ujinè ra sàm cuk a yòot Benyamin. Daw pî aw iirra dawge ticèngsunum Fay. 9 A dat maan de rapmi mûsa nit ây dèy ni ɓèlla, ha nirri ge kpàaw sakta ba, aw ana a gin nit dees ây pî, ni yòot nit ây pî, ni ’mèmsum nit ây pî, ni yèk nit ây ’nang ’nang pî, aw gòyrre a ɗàm kpees gbaat wûun ni ɗàm kpees Hàm mgbâay. Aw mgbapɗe lurra ɓèl burriya, aw mòorre waas dibinooje a kàn waw. 10 Aw bimde ni gûn ɓèl aw gàarre: Saarra diina a gin Fak worro tâage a gbaat wûun, dii a gin Hàm mgbâay ɗa! 11 A malayka ây pî aw gòyrre a cewci gbaat wûun ditètè, ni toonji ây, ni jàk ây naan tâage ni jungci gi, de ûunin tiigi waw a ɗàm kpees Fay a gbaat wûun nà gi, de coowan, 12 aw gàarre: Amen! Mbâri, ni ’mita, ni còycum, ni mbew, ni coorra, ni mbinum, ni kpèw kpèw dii a gin Fak worro tâam timgbàri ha tâam timgbàri, amen! 13 Nirri kpolo a tîim toonji ây de gunim: A nit ây gi mgbapke lurra ɓèl burriya gi aw wun ɗi ya, u hâ anan ɗa ya? 14 De gàami: Nitcoorra mum, muy mu cèngnige. Ey de gàam: Aw tâage nit ây yuuga a ’màar ɓèl, aw kòle lurra waw, aw bosi burriya a njîim Hàm mgbâay. 15 Ngam maan aw dii a ɗàm kpees gbaat wàa di Fay, aw daprirre a àay wàa tuma ni unji. Tooy tâage a gbaat wûun gi bu ge burri daw a gin tâam wàa. 16 Aw gaw haasirra rakta àyrra fey ba, gaw haasirra rakta ɓòyrra sòo ba, unji koo jàk eb hâ ge mâasirra daw ba. 17 Ngam Hàm mgbâay yey tâage gaarra a gbaat wûun faa ge faa daw, ’maa ge ’maa daw a nis sòo gûynum. Fay pi ge pitfa daw rîsim pî a nis waw.
81 Hàm mgbâay ye pate mèn ticèngsunum woy jòsti a defterre gi, tâarra ɗong ii a faktiturum jày ge kpèt ngirra njamdi kpolo. 2 De rapmi malayka ây jòròs gòyge a ɗàm kpees Fay gi aw hîi daw ti uta ây jòròs. 3 Malayka kana de dàara de gòye a gin gûurra jàk gurfum, mòorre kpeela gurfunum mbangsumya ni kangeerri. Aw hîiwe jàk aksum dèy mgbirgumya, ngam ha e gurfi a gin gûurra jàk gurfum mbangsumya ni kangeerri, tâage a ɗàm kpees gbaat wûun gi, ha e ’mèmsini gurfum maan ni waar nit della ta Fay pî. 4 Tufki jàk gurfum a kàn malayka gi ’mèmsige ni waarra nit della ta wàa di Fay, naa a ɗàm kpees Fay. 5 Malayka de arre kpeela nà, de mûuni ni ngong ebi tâage a gin gûurra jàk gurfum gi, de tuuse a deesi. De ii dûurra buun, ni gûn ây, ni tâyrra buun, deesi de yûuye. 6 A malayka ây jòròs tâage ni ti uta ây jòròs nà aw mbangsi ha aw uri. 7 Malayka màrra de ure ti uta wàa. Gòok buun, ni ebi, ’mèmsa ni njîim de yaaran a deesi. Mîinjum deesi woy taanti de age, mîinjum futifak ây woy taanti de agin, bàsi jèngrèng pî ɗa de age. 8 Malayka cukti de ure ti uta wàa. Jày kà gopri ɓèl akɗe ni ebi de yaa a sòo ɓèl. Mîinjum sòo ɓèl woy taanti de ire njîim. 9 Mîinjum jàk ây woy taanti a sòo ɓèl tâage beengiya gi, de wurrin. Mîinjum mûsa koombowal ây woy taanti tâage a sòo ɓèl ɗa de gbeen. 10 Malayka taanti de ure ti uta wàa. Tibiskum ɓèl akɗe kà tibingni ebi, de yaara a mîinjum sîirra ây ni nis sòo ây woy taanti. 11 Tibiskum maan aw ’naasurre Tiɗalla. Mîinjum sòo pî woy taanti ire ɗalliya. A nit ây dèy ni ɓèlla ye njoon sòo ɗalliya nà gi, de wurrin. 12 Malayka naanti de ure ti uta wàa. Mîinjum unji woy taanti, ni mîinjum corri woy taanti, ni mîinjum mûsa tibiskum ây woy taanti ɗa aw ire luktiya, ngam a ngirra njamdi ây woy taanti a unji ta e kayngi ba, hû go ɗa a ngirra njamdi ây woy taanti ni tuma. 13 De gopmi, de rakmi wâw ande ha u fay, bimde ni gûn ɓèl: ’Màari, ’màari, ’màari dii daw da nit ây tâage a deesi, ngam yèk gûn ti uta ây ngaskirra a gin malayka ây taan gaw urgi.
91 Malayka kèti de ure ti uta wàa. De rapmi tibiskum a faktiturum yaara a deesi, aw hîiwe tifaarunum gook ebi yengdiya. 2 Ye faari gook ebi yengdiya gi, tufki de yuura a gook maan kà tufki eb ɓèl, de but daw di unji ni hiski, de lugin. 3 A hàay ây de yuuran a tufki, de yeskin a deesi. Aw hîi daw kpèw kpèw kà ndâay ây. 4 Aw gàa daw, ta aw mboysu di bàsi, koo di jàk ɓukta hâ, koo di futifak hâ ba, sey aw mboysi daw da nit ây gbè tâa ticèngsunum Fay ceni daw a tiigi waw ba. 5 Aw hîi daw orri ha aw ɓàt daw da nit ây gi ba, sey aw riisi daw ’màari corri kèrèw. Ayrra maan dii kà àyrra ndâay tap go di nirri. 6 Mgbàr maan a nit ây kà gaw kàm wuta, amma gaw kpàa ba. Koo ye tâa aw yiɗi wuta gi, wurra ’nòo ge ’nòo daw. 7 A hàay ây nà aw rèerre kà kpis ây mâtiya kèlge lekcu a bàpri. A hak waw aw dii ni tikangni hay kà kangeerri. Tiigi waw rèerre kà tiigi nit ây. 8 Aw dii ni gimsi hay kà gimsi hak nikin ây. Temgi waw dii kà temgi tidîisi. 9 Aw dii ni pòong kà lurra titefki. Jota kapci waw dii kà jota tinàni ây dèy nàrrin kpis ây ye sapnin a bàpri gi. 10 Aw dii ni sâay kà pètki sâak ndâay. A sâay dii daw kpèw kpèw waw, ha aw riisini daw ’màari da nit ây corri kèrèw. 11 Wûun waw da hàay ây tâage malayka a gook ebi yengdiya gi, nîir wàa ni yèk Hebra Abaddon, ni yèk Girèk Apolliyon, kà gàarra Timboysum. 12 ’Màar màrra hòme. E rri yey ’màar ây kana cuk aw furrarre u daarri. 13 Malayka yiti de ure ti uta wàa. De rakmi gûn ana a dûunji ây naan a gin gûurra jàk gurfum mbangsumya ni kangeerri gi, yey tâage a ɗàm kpees Fay. 14 Gûn maan gàawrre di malayka yiti mòoge ti uta, urge gi: Pati daw da malayka ây naan tâage ’mèmdiya a cewci sîirra ɓèl a Efratis. 15 De patin daw da malayka ây naan nà gi, yey mbangsin ngam yer maan, ni cot maan, ni unji maan, ni saa’i maan, ha aw ɓàr mîinjum nit ây woy taanti. 16 Mûsa nit ɗata kpis ây a bàpri aw dii ujinè ra cuk nak ujinè ra. Kà yey rakmi sakri waw. 17 A àyrra ndaram mi rap daw da kpis ây ni nit ây ɗargi daw kà yey: Aw dii ni pòong tapnjunum bàpri caliya kà ebi, waagbesiya, gbâaya. Hak kpis ây dii kà hak tidîis ây. A mgbelyèk waw ebi, ni tufki, ni jàk hengda aw yuurarre. 18 Jàk tiriisunum ’màari taan gi, ebi, ni tufki, ni jàk hengda yuuga a mgbelyèk waw gi aw ɓàre mîinjum nit ây woy taanti a deesi. 19 Ngam mbinum waw da kpis ây gi dii daw a mgbelyèk waw ni sâak waw. Sâak waw dii ni hay, rèerre kà jòoy ây. Ni hak maan riisinin ’màari da nit ây gi. 20 Ngirra nit ây tâa aw ɓàt daw ni tiriisunum ’màar ây gi ba, aw ini tinîiri a tèem yey tèe@n ni kàn waw gi ba, ha aw woofa coorra tindòom ây ni mâr ây ba, ye mbangsin mâri ni kangeerri, ni sarrdi, ni titefki cal, ni gòoy, ni kpiiri, tâa ti kpàawrre raptum koo rakta koo dikta ba. 21 A nit ây gi aw ini tinîir waw a ɓàrgum nirri ba, koo a yèk dîw, koo a iirra njeenu, koo a oori ba.
101 De rapmi malayka kana kpèwnjiya cirarre a faktiturum, titurum burrurre, cullum tâa a hak wàa, tiigi wàa finde kà unji, nak wàa dii kà jàk tigòynum goose ni ebi. 2 Malayka gi mòorre hàm defterre faarumya a kàn wàa. De nafe nak riina wàa a sòo ɓèl, nak mgbaala a deesi. 3 De bime ni tibimni ɓèl kà gusta tidîisi. Ye bime gi, a dûurra buun ây jòròs aw goosirre ni yèk waw. 4 Ye goosin a dûurra buun ây jòròs kà yey gi, mi gàarre ngin mi kèri. De rakmi gûn a faktiturum gàamrarre: Fûuni yèk yey yèen a dûurra buun ây jòròs gi, ta mu kèr ba! 5 Malayka yey rapmi gi, gòyge a fak sòo ɓèl ni deesi gi, de aanje kàn riina wàa u faktiturum. 6 De hàa tihàani ni nîir Fay gûyge tâam timgbàri ha tâam timgbàri, mbangse faktiturum ni jàk ây tâage a farra gi, ni deesi ni jàk ây tâage a farra, ni sòo ɓèl ni jàk ây tâage a farra ɗa, de gàa: Tòorra ge tâasirra ba! 7 Amma a mgbàr yey ge ur malayka jòsti ti uta wàa gi, yèk Fay fûurriya gbèe ge gbèe kà yey kàle da nit lònum ây, nit tèem ta wàa gi. 8 Gûn yey rakmi nà u faktiturum, de yèesima bak de gàamra: Dik mu ngor hàm defterre faarumya a kàn malayka gòyge a fak sòo ɓèl ni deesi gi. 9 De anmi mi dik a gin malayka nà, de gunmi e hîim hàm defterre gi. De gàam: Ngo mu rii! Ɗa ge ɗalum a himni wey, amma a mgbelyèk wey kâ ge kâwi kà num wûsi. 10 De ngormi hàm defterre a kàn malayka nà, de riimi a mgbelyèk mum, de kâwim kà num wûsi. Ye mirmi gi, de ɗalim a himni. 11 Gûn kana de gàamra: Sey mu ɗaasi lònum yèk Fay yèege a hak ’mèmsum nit ây dèy, ni nit dees ây, ni yèk nit ây ’nang ’nang, ni wûun ây dèy.
111 Aw hîime samsi rèerre kà suu tigeni, de gàamin: An mu gerri àay Fay, ni gin gûurra jàk gurfum, mu sak nit ây cooge a farra. 2 Amma woofa kpatigbaa a àay Fay! Ta mu gerru ba, ngam dii hîirriya da nit ây èege yèk Fay, mbo gaw mboysifa della riiy wàa corri ra naan sàm cuk. 3 Tèe gim tèefa nit seedum ta mum cuk, aw mgbapɗe lurra buhu, lò gaw lòni yèk Fay unji ujinè kpolo ni temèrre cuk ni ra yira. 4 A nit seedum ây gi aw tâage korrom ây cuk, aw tâage timòoni ebi cuk, aw gòyrre a ɗàm kpees Tooy deesi. 5 To nirri gàa go e riisi daw ’màari, ebi yuu ge yuura a mgbelyèk waw e aksu di nit yiir waw gi. Kà yey sey nirri e wurri, to gàa go e riisi daw ’màari. 6 A mgbàr yey gaw lòni yèk Fay gi, tâa gaw tâa ni mbinum ha aw njanggu di faktiturum ta buun e yaa ba. Tâa gaw tâa ni mbinum a sòo ha aw inu e tâa njîim, aw dii ni mbinum ɗa ha aw riisu ’màar ây di deesi, kà yey yiɗin gi pî. 7 Ye gaw gbèesi seedamku waw, jàk timòorgum yey yuuga a gook ebi yengdiya nà, haa ge haa gbàaci ni aw, su ge sun daw e ɓàt daw. 8 Is waw kûu ge kûu a tîim àay ây a riiy ɓèl, a gin yey gbaluwan di Nitcoorra waw a minjum kpiiri gi. Nîir riiy maan ni yèk rèenjum aw înurre Sodom, koo Ejip. 9 A nit ây anga a ’mèmsum nit ây pî, ni yòot nit ây pî, ni yèk nit ây ’nang ’nang pî, ni nit dees ây pî, ra gaw rapti is nit ây cuk wutke gi unji taan ni ngirra, gaw woo aw sipti daw ba. 10 A nit ây tâage a deesi, kâ ge kâwi daw yèk wurra nit ây cuk gi. Sii gaw sii siiri, hîi gaw hîinji jàk ây a tîim waw, ngam nit lònum ây cuk gi aw riisi daw nà ’màari da nit ây tâage a deesi. 11 Amma a dat unji taan ni ngirra, tiyîngni ana a gin Fay, dàa lekɗa dawge da wurra ây nà, de anin de gòyin ni nak waw. Tolnji ɓèl mòo dawge da nit ây rapke kà yey gi. 12 De ragin gûn ɓèl a faktiturum, gàara dawrre da nit lònum ây cuk gi: Naaran ay! De naafan ni titurum a faktiturum. A nit yiir ta waw aw rapti dawrre. 13 Mgbàr maan deesi yûuye dèy, ngirra mîinjum ra a riiy maan de yaaye, a nit ây ujinè jòròs de wurrin a farra ngam yûurra deesi gi. A nit ây ngaskirra gi aw tolle, de ’misin nîir Fay tâage a faktiturum. 14 Yey tâage ’màar cukti hòmge gi, ’màar taanti furrarre yaale. 15 A dat maan malayka jòsti de ure ti uta wàa. Gûn ɓèl ây de bimin a faktiturum de gàan: Kòsòng Fay Tooy Ɓèl worro tâa wûun a kparri ni Kristu wàa. Wûu ge wûuni tâam timgbàri ha tâam timgbàri. 16 A toonji ây ra cuk sàm naan tâage a gbaat waw a ɗàm kpees Fay nà gi, de ûunin tiigi waw aw coo Fay, 17 de gàan: Fay, Tooy Ɓèl tâage ni mbinum a jày pî, tâage kòsòng, tâage nà mgban, ot gàamde mbew, ngam mu arre mbinum wey woy ɓèl, mu wûunde. 18 A nit dees ây aw ane ngòlnji, amma mgbàr ngòlnji wey kpèrrage, ha mu hiiti daw da nit ây wutke gi, mu kànsi daw bèeb loca tèem waw da sàay rra wey nit lònum ây, ni nit della ta wey, ni nit ây tolge nîir wey, koo hàm ây koo nit ɓèl ây, ha mu gbeesi daw ɗa da nit ây mboyse deesi gi. 19 @Aaay Fay a faktiturum faarige, akota jàk wasta Fay finde a farra. De ii tâyrra buun, ni gûn ây, ni dûurra buun, ni yûurra deesi, ni gòok buun woy ɓèl.
121 Jàk lòta ɓèl lòrre a faktiturum. E rri yey nikin, unji burruge kà lurra, corri dii a nak wàa, hak wàa dii ni tibiskum ây ra sàm cuk tâagu tikangni hay. 2 Ey ɗa kin himni ɗi, taasirre ngam àyrra a ’màar ciisum hàm. 3 Jàk lòta kana lòrre a faktiturum. E rri yey tiim woy ɓèl caliya dii ni hak ây jòròs, ni dîw ây ra, ni tikangni ây jòròs a hak ta wàa. 4 Ni sâak wàa arre mîinjum woy taanti a tibiskum ây tâage a faktiturum, de ’màkta daw a deesi. Tiim de gòye a ɗàm kpees kini nà kèlge kpàacu hàm, ngam kpàa go gi e rii hàm maan. 5 Kin nà de kpàa hàm nihun, yey ge faa daw da nit dees ây pî ni suu titefki. Amma aw arre hàm maan aw ’maawe a gin Fay, a gbaat wûun wàa. 6 Kin ey de ’nòo a tîim nûri, a gin yey Fay mbangsu gin tâam wàa, ngam ha aw ɗiru a farra unji ujinè kpolo ni temèrre cuk ni ra yira. 7 Gbàaci de ii a faktiturum. Mikayel nit ɓèl malayka ây ni malayka ta wàa aw haarre ni tiim nà. Ey ɗa ni malayka ta wàa aw haarre, 8 amma aw sun daw ba. A dat maan gin tâam ti ngasurra di tiim ni malayka ta wàa a faktiturum ba. 9 De yuunufan di tiim ɓèl nà, jòoy mgbanti înuwan Ticîinjum yèy koo Seyɗan yey rûfke kparri lang, de ’màktuwan a deesi ni malayka ta wàa. 10 De rakmi gûn ɓèl a faktiturum gàarre: Kòsòng jàk saarra worro, ni kpèw kpèw, ni wûun Fak worro, ni mbinum Kristu wàa kpèrrage. Ngam ti@’maarum yèk kiita a hak kor ta worro, yey ’maage kiita a hak waw a ɗàm kpees Fak worro tuma ni unji gi, aw yuunufage a faktiturum, aw ’màktufage. 11 A kor ta worro aw sunige ngam yèk njîim Hàm mgbâay, ni yèk seedamku waw. Yiɗum di Fay hòm daw di yiɗum jungci waw, koo ha a wurra. 12 Hû go kâwsin tinîir wun, un ni-faktiturum ây ni jày pî tâage a farra gi! Amma ’màari diinu dun ti deesi ni sòo ɓèl ɗa, ngam Seyɗan cirfa dunge, mûu ni ngòlnji ɓèl ye tâa cèngnige mgbàr wàa luuye. 13 Tiim nà ye kpàa aw ’màktuwa a deesi, de mànu di kin yey ròoge hàm nihun nà gi. 14 De hîiwan kapci wâw ɓèl di kin maan, ngam ha e an a ɗàm kpees jòoy maktiya nà, e ’nòo a tîim nûri a gin tâam wàa, a gin yey gaw ɗiru yeri taan ni ngirra gi. 15 Jòoy maktiya gi de tuusufa sòo kà sîirra a mgbelyèk wàa a dat kini nà, ngam e sîinuwa. 16 Amma deesi de mgbaanju di kini nà, de hàange de mire sîirra sòo yey tuusa tiim a mgbelyèk wàa gi. 17 Tiim de ane ni ngòlnji a gin kini nà, de dige haarra gbàaci ni yòot ta wàa ngaskirra gi, a nit ây futke yèk mgbèngda Fay, tâage ni yèk seedamku Yeesu gi. 18 Tiim nà de gòye a cewci sòo ɓèl.
131 De rapmi jàk timòorgum naararre a sòo ɓèl, dii ni hak ây jòròs, ni dîw ây ra, dii ɗa ni tikangni hak wûun ra a dîw ta wàa. A nîir timaasunum di Fay aw dii kètiya a hak ta wàa. 2 Jàk timòorgum rapmi gi rèenji ni jàk tuma, nak wàa rèerre kà nak wani, mgbelyèk wàa ngaa kà mgbelyèk tidîisi. Tiim de hîiw di jàk timòorgum nà kpèw kpèw wàa, ni gbaat wûun wàa, ni mbinum ɓèl ɗa. 3 Hay kpolo a tîim hak ta wàa di jàk timòorgum nà dii ni nuki kà nuki wurra, amma nuki maan ndòosige. De tâa daw ’nang da nit ây a deesi pî ye raptuwan di jàk timòorgum gi, de furruwan. 4 De coowan di tiim nà ngam hîiwe mbinum di jàk timòorgum. Aw coowe ɗa di jàk timòorgum, de gàan: Wun getnji ni jàk timòorgum gi ya? Wun ge kpàaw haarra gbàaci ni ey ya? 5 Jàk timòorgum nà kpàa yèerra yèk tiɗèpsum ha e maasini nîir Fay, kpàa mbinum ha e tèe tèem wàa corri ra naan sàm cuk. 6 De hàange mgbelyèk wàa e yèe e maasu di Fay, de maase nîir Fay ni gin tâam wàa, ni nit ây tâage a faktiturum ɗa. 7 Aw hîiwe mbinum ha e haa gbàaci ni nit della ta Fay, e sun daw. Kpàa mbinum maan a gin yòot nit ây pî, ni ’mèmsum nit ây pî, ni nit yèerra yèk riiy ây ’nang ’nang pî, ni nit dees ây pî. 8 A nit ây tâage a deesi lang aw coowe. A nit ây gi nîir waw ti tâa kètiya a defterre jungci diga ɗaarra mbangsum kparri ba, a defterre Hàm mgbâay gûurriya gi. 9 Nirri tâa go ni tuk rakni, sey e ragi! 10 Nit yey gàan aw mòow a bàpri, mòo gaw mòow aw ’maaw ’mèmdiya. Nit yey gàan aw ɓàru ni ɓet ɓèl, takundi, ɓà gaw ɓàru ni ɓet ɓèl. E rri yey sey nit della ta wàa di Fay aw èf tinîir waw, aw gòy a goosum. 11 De rapmi jàk timòorgum kana yuura a deesi, dii ni dîw ây cuk kà dîw hàm tifiiri, amma yèerre kà tiim nà. 12 Ey tèerre tèem mbinum pî woy jàk timòorgum màrra nà a ɗàm kpees wàa. Ey mbitɗe ha deesi ni nit ây tâage a farra aw coow di jàk timòorgum màrra nà, yey tâage ni nuki wurra ndòose gi. 13 Ey tèerre jàk kayeefi ɓèl ây, mbitɗe ha ebi e ana a faktiturum, e cira a deesi a ɗàm kpees nit ây. 14 E rûf daw da nit ây tâage a deesi, rûf dawrre ni lònum jàk kayeefi ây kpàa tèerra a ɗàm kpees jàk timòorgum màrra nà. Ey gàa dawrre da nit ây aw mbangsi jàk tirèenjunum, ngam coonum di jàk timòorgum yey tâage ni nuki ɓet ɓèl amma gûyge gi. 15 Ey kpàa mbinum ngam e hîiw tiyîngni di jàk tirèenjum wàa di jàk timòorgum màrra nà, ha e yèe. Ey mbitɗe ɗa ha aw ɓàt daw da nit ây pî tâa aw coow di jàk tirèenjum wàa di jàk timòorgum màrra nà ba. 16 Ni mbinum wàa mbit dawrre da nit ây pî, koo da hàm ây ni nit ɓèl ây, koo da nit bèeb ây ni nit èca ây, koo da tiròom ây ni sàay ây, ha aw ngor ticèngsunum a kàn riina waw koo a tiigi waw. 17 Nirri ge kpàaw sàarra jày koo sàanum ba, sey to tâa go ni ticèngsunum nîir jàk timòorgum nà, koo ni sakri nîir maan. 18 E rri yey sey nirri e tâa ni còycum. Nit yey tâage ni cèngnum, sey e sak sakri jàk timòorgum nà, ngam sakri nirri ɗi, dii temèrre yira ni ra yira sàm yira.
141 De rapmi e rri yey Hàm mgbâay gòyrre a gopri Siyona, ’mèmsa ni nit ây ujinè temèrre kpolo ni ujinè ra naan sàm naan, tâage ni nîir wàa ni nîir Too wàa kètiya a tiigi waw gi. 2 De rakmi gûn a faktiturum kà jota sòo dèy, kà dûurra ɓèl a yaarra buun. Gûn yey rakmi gi rèenji ɗa kà gûn tindingding taan a nit ây. 3 Aw kâarre ndûu fûuya a ɗàm kpees gbaat wûun gi, ni ɗàm kpees jàk ây naan tâage ni jungci, ni toonji ây gi. Cen nirri ge kpàaw èngnum kâarra ndûu maan ba, sey nit ây ujinè temèrre kpolo ni ujinè ra naan sàm naan tâage sàasumya a deesi gi. 4 A nit ây gi aw ’miskini hak waw ba, aw kûunji ni nikin ây ba, aw dii ɓetkumya. Aw furrurre di Hàm mgbâay gi a gin digi lang. Aw tâage nit sàasumya a tîim nit ây, ha aw tâa nit màrra ây di Fay ni Hàm mgbâay ɗa. 5 Yèk rèeng ti haa yuurra a mgbelyèk waw ba, aw cen ni jàk maarra ba. 6 De rapmi malayka kana fiwrre a tîim faktiturum, dii ni Yèk Kâwrra tâam timgbàri ha e sak da nit ây tâage a deesi, ni nit dees ây pî, ni yòot nit ây pî, ni nit yèerra yèk riiy ây ’nang ’nang pî, ni ’mèmsum nit ây pî. 7 De gàa ni gûn ɓèl: Toluwan di Fay, ’misuwan, ngam unji kiita wàa kpèrrage! Coowan di Tooy Ɓèl mbangse faktiturum, ni deesi, ni sòo ɓèl, ni nis sòo ây gi! 8 Malayka cukti de futwa di malayka màrra, de gàa: Babilon riiy ɓèl yaaye, yaaye! Njoosi dawge mbàl wàa da nit dees ây pî, mbàl gayam iirra njeenu. 9 Malayka taanti de furra a dat wàa, de gàa ni gûn ɓèl: Nit yey coogu di jàk timòorgum ni jàk tirèenjum wàa, ngorge ɗa ticèngsunum a tiigi wàa koo a kàn wàa gi, 10 njoo ge njoo mbàl ngòlnji Fay, mbàl yey tâage cen ɓaanjum ni sòo gi, sòoni a tinjooni ngòlnji wàa gi. Rii ge riisi rèeng a ebi ni jàk hengda a ɗàm kpees malayka ta Fay, ni ɗàm kpees Hàm mgbâay. 11 Tufki eb ’màari gi naarre u fay tâam timgbàri ha tâam timgbàri. A nit ây coogu di jàk timòorgum ni jàk tirèenjum wàa, ngorge ticèngsunum nîir wàa gi, gaw wuysi a farra tuma ni unji ba. 12 E rri yey a nit della ta wàa di Fay futke yèk mgbèngda wàa, gòyge a goosum di Yeesu gi, sey aw èf tinîir waw. 13 De rakmi gûn a faktiturum, gàamde: Kèr kà yey: Kâwum dii daw da nit ây wutke gi, wutke ngam Nitcoorra diga kòsòng gi ha a ɗàm kpeesi. Jungci Delliya gàa: Hû go ɗi go, wu gaw wuysi a loca tèem waw, ngam tèem mbâr waw tèen gi diknjirre ni aw. 14 De rapmi bak, e rri yey titurum burriya, a titurum gi nirri tâarre a farra rèerre kà Hàm nirri, dii ni tikangni hay mbangsumya ni kangeerri a hak wàa, dii ni tikpeeni riirriya ɗa a kàn wàa. 15 Malayka kana de yuura a àay Fay, bimde ni gûn ɓèl di nit yey tâage a titurum nà gi, gàawrre: Pat tikpeeni wey mu kpee, ngam wakli naaye, jàk nîirra a deesi gerre kpeerra! 16 Nit tâarra a titurum de parre tikpeeni wàa a deesi, ha jàk nîirra a deesi pî tâaye kpeerriya. 17 Malayka kana de yuura a àay Fay a faktiturum, ey ɗa dii ni tiripni riirriya. 18 Malayka kana ɗa de yuura a gin gûurra jàk gurfum. Ey dii ni mbinum a ebi. De bime ni gûn ɓèl di malayka tâage ni tiripni riirriya gi, de gàaw: Pat tiripni wey riirriya, mu ripni repta timgbokcum a deesi, ngam nîiye. 19 Malayka nà de parre tiripni wàa a deesi, de ribe repta timgbokcum, de ’màkti a gin kâarra ɓèl tâage ngòlnji Fay gi. 20 De nafnjin repta maan a gin kâarra yey tâage a dat riiy ɓèl gi. Njîim de yuu a gin kâarra nà, de sîi kilomèeta temèrre taan. Yengda sîirra maan dii mèeta kpolo ni ngirra.
151 De rapmi bak jàk lòta kana woy ɓèl a faktiturum, jàk kpulla jungci isi. A malayka ây jòròs aw dii ni ’màar ây jòròs woy gbèeni. Ngam ngòlnji Fay gbèe ge gbèe ni ’màar ây nà. 2 De rapmi ɗa sòo ɓèl kà darrugal hamjumya ni ebi. A nit sunda ây di jàk timòorgum nà ni jàk tirèenjum wàa, ni nit yey lòtke a sakri nîir wàa gi, aw gòyrre a sòo ɓèl nà kà darrugal gi, aw mòorre tindingding ây hîi daw Fay gi. 3 Aw kâarre ndûu Muusa sàay Fay, ni ndûu Hàm mgbâay, aw gàarre: Fay Tooy Ɓèl, mu wûun nit ây a deesi, mu dii ni mbinum a jày pî, tèem wey tèem ɓèl ɗi, tèem kpulla jungci isi, ot ta wey ot ɗèm ɗi, ot takundi ɗi! 4 Nitcoorra, wun tâa ge tolum ba ya? Wun tâa ge ’misi nîir wey ba ya? Ngam muy gbè tâage delliya. A nit ây a deesi lang dàa gaw dàara aw gbâygi a ɗàm kpees wey aw coomu, ngam tèem wey tèem ɗèm lòrre. 5 A dat maan de rapmi àay Fay, àay seedamku a faktiturum faarirre. 6 A malayka ây jòròs tâage ni ’màar ây jòròs gi aw yuurarre a farra. Aw mgbapɗe lurra ɓèl burriya diɓel diɓel, aw kapɗe gbetki waw ni jàk mbangsumya ni kangeerri. 7 Jàk kpolo a tîim jàk ây naan tâage ni jungci, de hîi daw da malayka ây jòròs kpeela kangeerri ây jòròs mûuge ni ngòlnji Fay, Fak gûyrra tâam timgbàri ha tâam timgbàri. 8 Aay Fay mûu ni tufki yey anga a gin Fay ni ’mita wàa, ni mbinum wàa. Cen nirri ge kpàaw lekta a farra ba, sey to ’màar ây jòròs ’maaran malayka ây jòròs gi gbèe go.
161 De rakmi gûn ɓèl ana a àay Fay, gàa dawrre da malayka ây jòròs: Digin un tuusi kpeela ây jòròs mûuge ni ngòlnji Fay, a deesi! 2 Malayka màrra de dige de tuuse kpeela wàa a deesi. Nuki ɓèl ây àyrriya de ii da nit ây tâage ni ticèngsunum jàk timòorgum nà, cooge jàk tirèenjum wàa gi. 3 Malayka cukti ɗa de tuuse kpeela wàa a sòo ɓèl. Sòo nà de ire njîim kà njîim wurra, a jàk ây tâage a farra pî aw wurre. 4 Malayka taanti ngaa de tuuse kpeela wàa a sîirra ây ni nis sòo ây. Pî de irin njîim. 5 De rakmi malayka yey wûunge a sòo ây gàarre: Mu Tooy della tâage kòsòng, tâage nà mgban, muy tâage ɗèm, ngam mu hiiti daw da nit ây gi kà yey, 6 ye tâa aw ɓàt daw da nit della ta wey ni nit lònum ây, aw tuusi njîim waw. Mu hîi daw njîim aw njoo, ngam aw getke kà yey. 7 De rakmi gûn gin gûurra jàk gurfum, gàarre: Hû go ɗi, Fay Tooy Ɓèl tâage ni mbinum a jày pî, kiita ta wey ɗèm ɗi, takundi. 8 Malayka naanti de tuuse kpeela wàa a unji. Unji kpàa mbinum e riisi daw ’màari da nit ây ni mâarra wàa. 9 Unji nîisi daw isi da nit ây ni mâarra dèy. De maasin nîir Fay tâage ni mbinum a ’màar ây gi, aw ɗa aw ini tinîir waw ba, aw ’misu di Fay ba. 10 Malayka kèti ngaa de tuuse kpeela wàa a gbaat wûun jàk timòorgum nà, ha wûun wàa de kupte kulpi. A nit ây aw riisirre rèeng waw ngam àyrra gi. 11 De maasin nîir Fay tâage a faktiturum, ngam yèk àyci waw ni nuki ta waw, aw ini ɗa tinîir waw a tèem ta waw ba. 12 Malayka yiti de tuuse kpeela wàa a sîirra ɓèl înuwan Efrati. Sòo maan de ’nòo mgbèng, ha de ire orri ngam wûun ây gaw ana a ɓani unji aw dàara gi. 13 De rapmi tindòom makta ây taan aw rèerre kà faal ây, aw yuura a mgbelyèk tiim nà, ni mgbelyèk jàk timòorgum nà, ni mgbelyèk nit lònum yèk rèeng nà. 14 Aw tindòom Seyɗan ɗi, tèege jàk kayeefi ây, aw dikɗe a gin wûun ây tâage a deesi lang, ha aw kimji daw ngam bàpri a unji ɓèl, unji Fay tâage ni mbinum a jày pî. 15 Raksin! E rri yey dàa gim dàara kà oori. Kâwum diiw di nit yey mûyge, faase lurra ta wàa, ngam ta e gîr isi kpong, ha a nit ây aw rabu lawsam wàa ba! 16 A tindòom ây de kimjin daw da wûun ây a gin înin ni yèk Hebra Harmagedong. 17 Malayka jòsti ɗa de tuuse kpeela wàa a faktitola. Gûn ɓèl de ana a gbaat wûun a àay Fay, gàarre: Yey gbèeye. 18 De ii tâyrra buun, ni gûn ây, ni dûurra buun, deesi de yûuye dèy ni ɓèlla. Diga ye tâan a nit ây, yûurra deesi ti haa iirra ni kpèw kpèw kà yey ba. 19 Riiy ɓèl gi mîinji ’nang ’nang taan, a riiy ɓèl nit dees ây pî aw yaaye. Fay ɓaysige yèk Babilon riiy ɓèl ha e hîiw kop mûunumya ni mbàl, e njoo mbàl aanjum ngòlnji Fay. 20 A dees ây a tîim sòo pî aw gbeeye, a gopri ây ɗa aw kpàasirra daw ba. 21 Gòok buun woy ɓèl ni gòok bûta ây jày gaw ii kilo ra naan, de anan a faktiturum de yaarran daw da nit ây. A nit ây de maasuwan di Fay yèk ’màar gòok buun gi, ngam ’màar maan àye dèy.
171 Malayka kpolo a tîim malayka ây jòròs tâage ni kpeela ây jòròs nà gi, de dàara de yèemda, de gàam: Dàara mi kàlnum kiita kin ɓèl tikàm toonji, kà gàarra riiy ɓèl tâage a sòo ây dèy. 2 A wûun ây a deesi aw iiye nà njeenu ni ey. Da nit ây tâage a deesi ɗa râmsi dawge ni mbàl njeenu wàa. 3 Jungci Fay de mòomi, malayka ngaa de ’maam a tîim nûri. De rapmi kin, ɗatɗe jàk timòorgum wongjiya, dii ni nîir maasum ây dèy kètiya a is wàa, dii ni hak ây jòròs, ni dîw ây ra. 4 Kin nà mgbapɗe lurra cal ni lurra wongjiya, lèerre tilèem jàk kangeerri, ni hàm gòok ây delliya, ni tiɗoon ây burriya, dii ni tinjooni kangeerri a kàn wàa, mûunumya ni jàk njengji ni jàk ’miskum a njeenu wàa gi. 5 Nîiri ni yèk fûurra dii kètiya a tiigi wàa, gàarre: Babilon riiy ɓèl, nuu waw da kin tikàm toonji ây ni jàk njengji ây a deesi. 6 Mi rabu di kini gi, njîim nit della ta wàa di Fay ni nit seedum ta Yeesu râmurre. Ye kpàami hûy gi, de tâam ’nang dèy. 7 Malayka nà de gàam: Ngam jâ tâam ’nang gi ya? Sa gim sagum yèk fûurra kin yey ni jàk timòorgum yey ɗatɗa gi, tâage ni hak ây jòròs, ni dîw ây ra gi. 8 Jàk timòorgum yey rapmu gi tâa nà mgban, censirra kòsòng ba, yuu ge yuura a gook ebi yengdiya gi, di ge dik a gin gbeerra. A nit ây tâage a deesi, nîir waw cen kètiya a defterre jungci diga ɗaarra kparri gi ba, tâa ge tâa daw ’nang ye gaw rabu di jàk timòorgum tâa nà mgban, ti censirra kòsòng ba, amma tâa ge tâasirra. 9 E rri yey sey nirri e tâa ni cèngnum, ni còycum ɗa. A hak ây jòròs nà gi aw tâage gopri ây jòròs, a gin yey tâa kini nà. Aw a wûun ây ɗi jòròs. 10 Kèrèw a tîim waw aw yaaye, kpolo wûunde kòsòng, woy yey ngaskirra gi ɗa dàara ba, dàara go gi tòo ge tòo càa. 11 Jàk timòorgum yey tâage nà mgban ti censirra kòsòng ba, ey tâage wûun nan nanti amma dii a tîim wûun ây jòròs nà, ey dikɗe a gin gbeerra. 12 A dîw ây ra rapmu gi aw tâage wûun ây ra. Aw ɗà aw ngor wûun waw ba, amma kpàa gaw kpàa mbinum wûun waw ’mèmsa ni jàk timòorgum, njamdi kpolo. 13 Daw pî dànda waw dii kpolo, hîi gaw hîi kpèw kpèw waw ni mbinum waw di jàk timòorgum nà. 14 Aw haa gaw haa gbàaci ni Hàm mgbâay, amma Hàm mgbâay su ge sun daw, ngam ey tâage Nitcoorra da nit coorra ây, wûun da wûun ây. Su gaw sun daw ni nit ta wàa ’naase gi, carre gi, mòoge mbâra ni ey. 15 Malayka nà de gàam bak: A sòo ây rapmu gi a gin tâa kin tikàm toonji nà, aw ’mèmsum nit ây ɗi, ni mûsa nit ây, ni nit dees ây, ni nit yèerra yèk riiy ây ’nang ’nang. 16 A dîw ây ra ni jàk timòorgum nà rapmu gi, yii gaw yiiw di kin tikàm toonji gi, a gaw at jàk ta wàa pî ha e tâa isi kpong, rii gaw rii joot wàa, a gaw aksi is wàa ni ebi. 17 Ngam Fay ii a tinîir waw ha aw mbir jày yiɗi ey gi. Aw tèerre jày ni dànda kpolo, aw hîiw wûun waw di jàk timòorgum nà, ha a mgbàr yey ge gbèe yèk Fay gi. 18 Kin yey rapmu gi, ey tâage riiy ɓèl yey tâage ni mbinum wûun a hak wûun ây a deesi.
181 A dat maan de rapmi malayka kana ana a faktiturum cirarre, dii ni mbinum dèy, ’mita wàa kayngirre a deesi. 2 De bime ni gûn ɓèl de gàa: Babilon riiy ɓèl yaaye, yaaye, ire gin tâam tindòom ta Seyɗan, gin lekta tindòom makta ây pî ni gin lekta koo jooy hâ tâage maktiya, njengjiya! 3 Ngam a nit dees ây pî aw njooye mbàl gayrum wàa a iirra njeenu. A wûun ây a deesi aw ii njeenu ni ey, a nit sàangum ây a deesi aw kimji bèebi a gbaarra jàk ta wàa dèy. 4 De rakmi gûn kana ana a faktiturum gàarre: Un nit ta mum, yuun a gin wàa gi un hèesi, ngam ta un ’mèmsi a jàk maarra ta wàa ba, ta un riinji ’màari ni ey ba! 5 Ngam jàk maarra ta wàa kpèrre ha a faktiturum, Fay ɗa ɓaysige tèem makta wàa. 6 Hîisuwan kà yey hîinu nà gi! Kànsuwan tèem wàa gi, iisurran nak cuk! Sòonsurran nak cuk a tinjooni yey sòoni gi! 7 Hîiwan ’màari dèy ni ti umni ɗa kà yey ’mise ey hak wàa, ɗèpse a gbaarra jàk ta wàa gi! Ngam a tinîir wàa gàarre: Miy mi wûun ɗi ay gi, mi kin wurra ɗi ba, gim cèngni umda rîsim ba sam. 8 Ngam maan ’màar ta wàa dàa gaw dàara a unji kpolo, àyci wurra, ni ti umni, ni fey. A ge ak ni ebi, ngam Fay Tooy Ɓèl hiitu gi dii ni kpèw kpèw. 9 A wûun ây a deesi iige njeenu ni ey, ɗèpsi ni ey a gbaarra jàk ta wàa gi, a ye rabin tufki akta wàa gi aw umi aw taasi ngam wàa. 10 Aw gòyrre kpâarriya ngam tolnji ’màar wàa, aw gàarre: Kayto, kayto, Babilon riiy ɓèl, riiy kpèw kpèw, kiita wàa kpèrrage a unji kpolo! 11 A nit sàangum ây a deesi u gaw umi àyrra tinîiri ngam wàa, ngam koo wuna ge sàasirra jàk ta wàa a dat maan ba: 12 jàk mbangsumya ni kangeerri, ni sarrdi, ni hàm gòok ây delliya, ni tiɗoon ây burriya, ni jàk joorra burriya, ni jàk joorra caliya, ni jàk joorra wongjiya, ni siliki, ni kpiir mgbirgum pî, ni koo jàk hâ mbangsin ni temgi àanga, ni kpiir della ây, ni titefki cal, ni jamdi, ni gòok diɓel diɓel, 13 jàk kâwsum tiriici, ni tingaksunum nàam, ni jàk gurfum, ni num mgbirgum, ni kpiir gurfunum, ni mbàl timgbokcum, ni num korrom, ni ɗèeri, ni tit ble, ni naay ây, ni mgbâay ây, ni kpis ây, ni jàk tinàni ây, ni sàay ây, ni nit ây. 14 Gàa gaw gàa di Babilon nà: Repta jàk nîirra yey gayrum gi censirra a gin wey ba, ni jàk gbakta ây pî, ni jàk raptum ây delliya pî aw gbeeme, gum haasirra kpàarra ba sam! 15 A nit sàangum ây kpàage bèeb waw a Babilon gi gò gaw gòy kpâarriya ngam tolnji ’màar wàa, u gaw umi àyrra tinîiri, 16 aw gàa: Kayto, kayto, riiy ɓèl mgbapke lurra burriya, ni lurra caliya, ni lurra wongjiya, lèege tilèem ni jàk kangeerri, ni hàm gòok ây delliya, ni tiɗoon ây burriya ɗa, 17 ngam bèebi dèy kà yey gbeeye a unji kpolo. A nit ɓèl ây a koombowal ni nit diknjum ta waw pî, ni nit ây kurge koombowal, ni nit ây tèege tèem a farra pî, aw gòyrre kpâarriya. 18 Ye rabin tufki akta Babilon gi, de bimin de gàan: Riiy hâ tâage kà riiy ɓèl yey ya? 19 De yòon soori a hak waw, de umin àyrra tinîiri, de bimin de gàan: Kayto, kayto, raptuwan ’màar riiy ɓèl gi! A nit ây tâage ni koombowal pî aw kpàaye jày dèy a bèeb riiy maan gi, amma gbeeye a unji kpolo. 20 Faktiturum, kâwsi tinîir wey ngam gbeerra riiy yey gi! Kâwsin tinîir wun, un nit della ta wàa di Fay, ni nit ây tèe dun Yeesu gi, ni nit ây lòni yèk Fay, ngam Fay kànsuge kiita tèem maarra yey tèe dun nà gi! 21 Malayka kana kpèwnjiya de arre gòok ɓèl kà ɗekli, de ’màkte a sòo ɓèl de gàa: Kà yey gaw ’màktu di Babilon riiy ɓèl ni kpèw kpèw, gaw haasurra kpàarra ba sam. 22 Gûn nit taarra tindingding ây, ni gûn nit kâarra ndûu ây, ni gûn nit uta tiwela ây, ni gûn nit uta ti uta ây gaw haasirra rakta a riiy yey ba. Da nit mbangsum ây mbangse koo jàk hâ gaw haasirra daw kpàarra ba. Dûurra nàmda jàk nàmda gaw haasirra rakta a riiy yey ba sam. 23 Kayang pittirla ge haasirra kayngum a riiy yey ba, gaw haasirra rakta gûn nit ata maanji ni gûn maanji ba sam. A nit sàangum ây a riiy yey aw tâa nà nit ɓèl ây a deesi, tèem dîw riiy yey ɗa rûf daw da nit dees ây pî. 24 Mu Babilon mu kpàa kiita kà yey, ngam a gin wey kpàan njîim nit ây lòni yèk Fay, ni nit della ta wàa, ni njîim nit ây pî ɓàrin daw a deesi gi.
191 A dat maan de rakmi gûn ɓèl a faktiturum kà gûn mûsa nit ây dèy, gàarre: Halleluya! Saarra worro, ni ’mita, ni mbinum dii a gin Fak worro. 2 Kiita ta wàa ɗèm ɗi, takundi. Ngam ey hiitu di kin ɓèl tikàm toonji yey mboysi daw da nit ây a deesi ni njeenu wàa gi, kànsurra njîim sàay rra wàa. 3 De gàa bak: Halleluya! Tufki akta Babilon, kin yey riiy ɓèl gi, naarre u fay tâam timgbàri ha tâam timgbàri. 4 A toonji ây ra cuk sàm naan nà, ni jàk ây naan tâage ni jungci gi, de ûun aw coow di Fay tâage a gbaat wûun gi, de gàan: Amen, Halleluya! 5 Gûn de ana a gbaat wûun de gàa: ’Misin di Fak worro, un sàay rra wàa pî, un nit ây tolgu gi, un hàm ây ni nit ɓèl ây! 6 De rakmi gûn kà gûn mûsa nit ây dèy, kà gûn sòo ây dèy, kà dûurra buun ɓèl, gàarre: Halleluya, ngam Tooy Ɓèl Fak worro tâage ni mbinum a jày pî, ɗaa wûunda. 7 Dàan ot kâwsi tinîiri, ot ii tijaga, ot ’misuwa, unji siir ata maanji wàa di Hàm mgbâay iiye! Maanji wàa ngaa mbangsige hak wàa, 8 kpàa orri ha e mgbap lurra ɓèl burriya diɓel diɓel, ngam lurra yey gi kàlnirre gòyrra ɗèm nit della ta wàa di Fay. 9 Malayka nà gi de gàam: Kèri: Kâwum dii daw da nit ây ’naasin daw a tiriit ata maanji wàa di Hàm mgbâay. De gàam bak: Yey tâage yèk Fay takundi. 10 De ûumi a ɗàm kpees nak wàa di malayka nà ngam mi coowa. Amma ey de gàam: Ta mu mbir kà yey ba! Ngam miy ɗa mi sàay ɗi kà muy, ’mèmsa ni kor ta wey tâage ni yèk seedamku Yeesu. Sey mu coo Fay! Seedamku Yeesu tâage jungci yey hîige lònum yèk Fay gi. 11 A dat maan de rapmi faktiturum faarige. E rri yey kpis burriya. Nit yey ɗargirra gi aw înuge nit mbâri, nit takundi. Ni ɗèm wàa e hiiti, waa e haa gbàaci. 12 Nis wàa rèerre kà rèeng ebi, hak wàa dii ni tikangni hak wûun ây dèy, ey dii ni nîir kètiya. Cen nirri ge cèngni nîir maan ba, sey ey ni hak wàa cèngni. 13 Ey mgbapɗe lurra ɓèl bûurriya a njîim, nîir wàa yèk Fay. 14 A sooje ây tâage a faktiturum de furruwan, aw ɗatɗe kpis ây burriya, aw mgbapɗe lurra ɓèl burriya tal. 15 A mgbelyèk nirri gi ɓet ɓèl riirriya yuurarre, ngam e njaani da nit dees ây ni erra, faa ge faa daw ni suu titefki, na ge nafnji gin kâarra mbàl timgbokcum, mbàl ngòlnji Fay tâage ni mbinum a jày pî. 16 Nîiri dii kètiya a lurra wàa ni kuur wàa, gàarre: Wûun da wûun ây, Nitcoorra da nit coorra ây. 17 De rapmi malayka kana gòyrre a tîim unji, de bime ni gûn ɓèl, de gàa da jooy ây pî ange u fay: Dàaran un kimji a tiriit Fay woy ɓèl, 18 un rii joot wûun ây, ni joot nit ɓèl ta waw da sooje ây, ni joot nit mbinum ây, ni joot kpis ây, ni joot nit ɗata waw gi, ni joot tiròom ây ni sàay ây, ni joot hàm ây ni nit ɓèl ây. 19 De rapmi jàk timòorgum nà, ni wûun ây a deesi ni sooje ta waw, aw kimjage ngam aw ii bàpri ni nit ɗata kpisi nà, ni sooje ta wàa. 20 Nit ɗata kpisi nà ni sooje ta wàa de mòon jàk timòorgum nà, ’mèmsa ni nit lònum yèk rèeng yey tèege jàk kayeefi a ɗàm kpees wàa gi, rûfni nà da nit ây ngorge ticèngsunum jàk timòorgum, cooge jàk tirèenjum wàa gi. Daw ɗa cuk de ’màktin daw beengiya a eb ɓèl yeerriya, ngongjiya. 21 Nit ɗata kpisi nà de ɓàri daw da nit ây ngaskirra gi ni ɓet ɓèl yuuga a mgbelyèk wàa nà. Mûsa jooy ây pî aw riiye joot waw aw ole.
201 De rapmi malayka kana ana a faktiturum cirarre, mòorre tifaarunum gook ebi yengdiya nà a kàn wàa, ni yuma titefki ɗa. 2 De mòo tiim nà, jòoy mgbanti tâage Seyɗan, tindòom gbeesum gi, de ’mèmu e tâa ’mèmdiya yeri ujinèerre. 3 De ’màktu a gook ebi yengdiya gi, de fantufa, de iirra mèn ticèngsunum a nin maan, ngam ta e yuu e rûfsirra da nit dees ây ba, ha yeri ujinèerre e gbèe. A dat maan sey aw patu aw woow unji càa. 4 De rapmi gbaat wûun ây ni nit ây tâage a farra, aw hîi daw mbinum ha aw ii kiita. De rapmi ɗa jungci nit ây njaan daw hay yèk seedamku Yeesu ngam yèk Fay, tâa aw coo di jàk timòorgum nà koo di jàk tirèenjum wàa ba, tâa aw ngor ticèngsunum wàa a tiigi waw koo a kàn waw ba gi. Aw gûysirre, aw wûunde ni Yeesu Kristu a yeri ujinèerre nà. 5 Ngirra nit ây wutke gi gaw gûysi ba, ha yeri ujinèerre nà e gbèe. Yey tâage gûysum màrra. 6 Kâwum dii daw da nit ây kpàage ’mèmsum a gûysum màrra, aw a nit della ta wàa ɗi di Fay. Wurra cukti cen ni mbinum a hak waw ba, amma tâa gaw tâa nit daprum ta Fay ni Kristu, wûu gaw wûuni ni Kristu a yeri ujinèerre nà. 7 Yeri ujinèerre ye ge gbèe gi, pa gaw patu di Seyɗan a ti ’mèmni wàa. 8 Yuu ge yuu e rûf da nit dees ây pî tâage Gong ni Magong gi, kà gàarra wûun dees ây, a cewci naan ha e kimji daw ngam bàpri. Mûsa waw tâa ge tâa kà kaksoori a sîirra. 9 Aw di gaw dik aw yeski a deesi lang, aw mgbaa gin tâam nit della ta wàa di Fay, ni riiy yiɗum wàa gi. Amma ebi a ge ana a faktiturum, e cira e aksi daw. 10 ’Mà gaw ’màktufa di Seyɗan, tindòom yey rûfki daw da nit ây nà gi, a eb ɓèl gongjiya, a gin tâa jàk timòorgum ni nit lònum yèk rèeng nà gi. Rii gaw rii ’màari tuma ni unji, tâam timgbàri ha tâam timgbàri. 11 A dat maan de rapmi gbaat ɓèl burriya, gbaat wûun. Nit yey tâage a farra gi dey deesi ni faktiturum ’nòon a nis wàa, aw kpàasirra daw ba. 12 De rapmi nit ây wutke nà, nit ɓèl ây ni hàm ây, aw gòyrre a ɗàm kpees gbaat wûun. De faarirran daw defterre ây. Aw faarirra daw ɗa defterre kana tâage defterre jungci. Nit yey tâage a gbaat wûun nà de hiiti daw da nit ây wutke gi a tèem waw, kày tâa kètiya a defterre ây gi. 13 Sòo ɓèl de kànsi wurra nit ây tâage a farra gi. Wurra ni gin tâam wàa ɗa de kànsin wurra nit ây tâage a farra gi. Koo wuna pî kpàa kiita kà yey tâa tèem wàa. 14 Wurra ni gin tâam wàa aw ’màktifa daw a eb ɓèl. Eb ɓèl gi tâage wurra cukti. 15 Koo wun tâage nîir wàa cen kètiya a defterre jungci gi, aw ’màktufa a eb ɓèl.
211 De rapmi faktiturum fûuya, ni deesi fûuya. Faktiturum màrra ni deesi màrra aw hòme, sòo ɓèl ɗa censirra ba. 2 De rapmi Yerusalem fûu riiy ɓèl delliya, mbangsumya kà maanji lèege tilèem ngam nit ata wàa, ana a faktiturum a gin Fay, cirarre. 3 De rakmi gûn ɓèl ana a gbaat wûun nà gàarre: E rri yey gin tâam Fay dii a tîim nit ây! Ey tâa ge tâanji ni aw, aw i gaw ir nit ’mèmsum ni ey, ey ɗa tâa ge tâanji ni aw, tâa ge tâa Fak waw. 4 Pi ge pirri daw rîsim a nis waw pî, wurra ge haasirra iirra ba, koo àyrra tinîiri, koo ti umni, koo ’màari. Ngam jàk ây tâage mgban gi pî aw hòme. 5 Tooy tâage a gbaat wûun nà gi de gàa: E rri yey mi mbangsisirre jàk ây pî fûuya. De gàam: Kèri, ngam yèk ây gi yèk gòyrra mbâra ɗi, takundi. 6 De gàam bak: Jày pî gbèeye! Miy tâage Alfa ni Omega, ɗaarrenji ni gbèerrenji. Hîi gim hîiw ɓa hû go a nis sòo sòo gûynum di nit yey ɓòyu gi. 7 Nit yey sunge gi, kpàa ge kpàa jàk koyrra ây gi, miy tâa gim tâaw Fak wàa, ey ɗa tâa ge tâa hàm mum. 8 Amma da nit ây tolge gi, ni nit ây tâa aw goosi ba, ni nit njengji ây, ni nit ây ɓàari nirri, ni nit ây iirge njeenu, ni nit gbèrrèm ây, ni nit ây coorge mâri, ni nit ây pî rèengri rèeng, gin titâam waw tâa ge tâa a eb ɓèl ngongjiya, e tâage wurra cukti. 9 Malayka kpolo a tîim malayka ây jòròs, mòoge kpeela ây jòròs mûuge ni ’màar gbèeni ây jòròs nà gi, de dàara e yèemda, de gàam: Dàara, mi kàlnum maanji wàa di Hàm mgbâay. 10 Jungci Fay de mòomi, malayka nà de ’maam a fak gopri ɓèl yâktiya. De kàlnim Yerusalem riiy ɓèl delliya, anga a faktiturum a gin Fay, 11 cirga ni ’mita wàa, kayngirre jarr kà gòok delliya, kà gòok yaspa tâage burriya kà darrugal. 12 Riiy maan dii ni njoknjum gòok ây ’mitiya yâktiya, ni nin ây ra sàm cuk. A malayka ây ra sàm cuk aw dii a nin ây gi. Nîir yòot ni-Israyel ây ra sàm cuk aw dii kètiya a nin ây ra sàm cuk nà. 13 A nin ây gi aw dii taan u ɓani unji, u lekni unji ngaa taan, a cewci riina ngaa taan, a cewci mgbaala ɗa taan. 14 Njoknjum gòok ây nà dii ni gòok tigòyni ây ra sàm cuk. Nîir nit ây ra sàm cuk tèe daw Hàm mgbâay nà gi, dii kètiya a farra. 15 Malayka yèegimda gi, dii ni suu tisakni mbangsumya ni kangeerri, ngam ha e sakni riiy ɓèl nà, ni nin ây gi, ni njoknjum gòok ây ɗa. 16 Riiy maan dii ni cewci ây naan, kpàklum getnji ni wàrngum. Malayka de sagu di riiy maan ni suu tisakni nà gi, ii kilomèeta ujinè cuk ni temèrre cuk. Kpàklum maan, ni wàrngum maan, ni yâkta maan getnji titenten. 17 De sagu ɗa njoknjum gòok ây nà, yâkta maan ii mèeta ra jòròs sàm cuk. Yey tâage tisakni nirri, getnji ni tisakni malayka. 18 Njoknjum gòok ây gi, ni gòok yaspa mbangsin. Riiy ɓèl gi, ni kangeerri mbâra mbangsin kà darrugal. 19 A gòok ây gòyni njoknjum gòok ây a riiy maan gi, ni gòok ây pî tâage delliya mbangsin. Gòok tigòyni màrra yaspa ɗi, gòok tigòyni cukti ngaa safira, gòok tigòyni taanti kalkedon, gòok tigòyni naanti amiradi, 20 gòok tigòyni kèti onissu, gòok tigòyni yiti sardiyu, gòok tigòyni jòsti kirisoliti, gòok tigòyni nan nanti beril, gòok tigòyni ngaskàmji topas, gòok tigòyni ratinji kirisoparasu, gòok tigòyni woy ra sàm kpoloti iyasintu, gòok tigòyni woy ra sàm cuktinji ɗa ametisti ɗi. 21 A nin ây ra sàm cuk tâage tiɗoon ɓèl burriya ra sàm cuk. Koo nin hâ aw mbangsi ni tiɗoon ɓèl burriya kpolo. Ot riiy maan ni kangeerri mbâra mbangsin kà darrugal. 22 Mi rap àay Fay a riiy maan ba, ngam Fay Tooy Ɓèl tâage ni mbinum a jày pî, ni Hàm mgbâay ɗa aw tâage àay maan a farra. 23 Gayam kayngum unji koo corri cen a farra ba, ngam ’mita Fay kayngirre a riiy maan, Hàm mgbâay ngaa ey tâage pittirla. 24 A nit dees ây gî gaw gîr a kayang riiy ɓèl gi, a wûun ây a deesi ’maa gaw ’maa ’mita bèeb waw a riiy maan. 25 A nin ây gaw fanti ba sam, ngam tuma ge haa lukta a farra ba. 26 ’Maa gaw ’maa a riiy maan bèeb waw ni ’mita waw da nit dees ây. 27 Koo jàk ’miskum hâ, koo nit ây tèege jàk njengji, koo nit ây rèengri rèeng gaw lek a farra ba, sey a nit ây nîir waw tâage kètiya a defterre jungci a gin Hàm mgbâay gi.
221 Malayka nà gi de kàlnim sîirra ɓèl sòo gûynum, finde diɓel diɓel kà darrugal, ɗuurarre a gbaat wûun Fay ni gin Hàm mgbâay, 2 sîirre a ot riiy maan. Futifak gûynum dii a taga sîirra maan diɗaɗa, repɗe jàk nîirra nak ra sàm cuk a yeri kpolo. Waas ta wàa ticèer ndòosum ɗi da nit dees ây. 3 Jàk tikperrem ge tâa a riiy maan ba. Gbaat wûun Fay ni Hàm mgbâay tâa ge tâa a farra, a sàay rra wàa di Fay coo gaw coowa. 4 Ra gaw rabu nis wàa. Nîir wàa tâa ge tâa kètiya a tiigi waw. 5 Tuma ge luk a farra ba, gayam kayngum pittirla koo kayang unji cen, ngam Fay Tooy Ɓèl ka ge kayngi daw, aw wûu gaw wûuni tâam timgbàri ha tâam timgbàri. 6 A dat maan malayka nà de gàam: Yèk ây gi mbâra ɗi, takundi. Fay Tooy Ɓèl hîige Jungci wàa da nit ây lòne yèk wàa, ey tèega malayka wàa ngam e kàlni da sàay rra wàa jày gesi e mbir a ɗàm kpeesi càa gi. 7 Yeesu gàarre: E rri yey mi dàararre kènu! Kâwum diiw di nit yey futke yèk lònum a defterre yey. 8 Mi Yuhanna, miy tâage nit rakta ni nit gopta jàk ây gi. Ye rakmi gopmi gi, de ûumi a ɗàm kpees malayka yey kàlnim jàk ây nà gi, ngam mi coowa. 9 De gàam: Ta mu mbir kà yey ba! Ngam miy mi sàay Fay ɗi ɗa kà muy, ’mèmsa ni kor ta wey nit lònum ây gi, ni nit ây futke yèk defterre yey. Sey mu coow di Fay! 10 De gàam bak: Ta mu fûuni yèk lònum tâage a defterre yey gi ba, ngam unji jàk ây gi hèerage. 11 Nit tèerra tèem makta, sey e fut tèerra tèem makta. Nit ’miskumya, sey e fut ’miskunum hak wàa. Nit yey gòyge ɗèm ɗa, sey e fut tèerra tèem ɗèm. Nit yey tâage delliya a ɗàm kpees Fay, sey e fut tâarra delliya. 12 E rri yey mi dàararre kènu. Mi ’maararre jàk koyrra yey gim hîi koo di wuna kày tâa tèem wàa gi. 13 Miy tâage Alfa ni Omega, nit màrra ni nit daarri, ɗaarrenji ni gbèerrenji. 14 Kâwum dii daw da nit ây kòlge lurra waw ɓetkini gi, ngam kpàa gaw kpàa orri aw rii repta futifak gûynum, aw lek a nin ây a riiy fûuya gi. 15 Amma a nit njengji ây, ni nit gbèrrèm ây, ni nit ây iirge njeenu, ni nit ây ɓàari nirri, ni nit ây coorge mâri, ni nit ây pî rèengri rèeng, yiɗi yèk rèeng gi, gò gaw gòy a gbaa. 16 Miy Yeesu, mi tèega malayka mum, ha e kàlnu yèk seedamku ây gi a gin nit kimjum ây tâage a riiy ’nang ’nang. Mi ana a yòot Dawda, tibiskum ndamdamji bururus. 17 Jungci Delliya ni Maanji ɗa aw gàarre: Dàara! Nit yey rake gi, sey ey ɗa e gàa: Dàara! Di nit yey ɓòyu sòo, sey e dàara. Nit yey yiɗe kpàarra sòo gûynum, sey e ngor ɓa hû go. 18 Miy Yuhanna mi kàl dawrre da nit ây rake yèk lònum ây tâage a defterre yey gi: To nirri iisirra go jàk kana a yèk ây gi, Fay ɗa ii ge iisurra a kiita wàa ’màar ây tâage kètiya a defterre yey. 19 To nirri atnjifa go jày a yèk lònum ây tâage a defterre yey, Fay ɗa a ge atfa jày tâagu woy wàa a futifak gûynum, ni jày tâagu woy wàa a riiy ɓèl delliya gi, tâage kètiya a defterre yey. 20 Nit seedunum yèk ây gi gàarre: Takundi, mi dàararre kènu. Orro ɗa ot gàawrre: Yeesu Nitcoorra, dàara! 21 Mbâr Yeesu Nitcoorra e tâanji ni un pî!