Ni-Filippi ây
11 Miy mi Pawlu ni Timote, ot sàay rra Yeesu Kristu, ot kèpfa dunde, dun nit ta Fay goosu di Yeesu Kristu, tâage a Filippi gi, ni nit tiɗàm kpees ây ni nit tèerra tèem mgbaanjum ây a tîim wun ɗa. 2 Nge Fay Too worro, ni Yeesu Kristu Nitcoorra aw hîinu mbâr waw ni tâam mbâri! 3 Mi gàarre mbew di Fak mum, koo ningàa ye ɓaysim dun gi. 4 Unji pî a waar mum, mi waarre ni tinîir kâwrra ngam wun pî, 5 ye tâa un lege a tèem yeskunum Yèk Kâwrra diga mgbàr màrra ha niyey gi. 6 Mi cèngni mbâra, Fay ɗaage tèem mbâra a tinîir wun gi, gbèe ge gbèesi tèem maan ha a unji dàarra Yeesu Kristu. 7 Ɗèm ɗi ha mi dàn kà yey a hak wun pî, ngam mi ɓaysunurre a tinîir mum. Koo a tâam mum a kultuma, koo a tèem mum ngam gòynum ni kpèwsum Yèk Kâwrra, un pî un ’mèmsi ni miy a mbâr Fay. 8 Fay seedimde, kày luknim un nisi ngam yiide yey kpàana a gin Yeesu Kristu gi. 9 E rri yey jày waami di Fay, nge yiide wun e iisirra dikta ɗàm kpeesi ɗàm kpeesi a cèngnum takundi, ni rakta jày pî, 10 ha un mbin geta jàk yey delge, ni jày tâa ti del ba gi, ngam ha un tâa ni tinîir burriya, cen yèk kana a hak wun a unji Kristu ba, 11 ha un tâa ni jàk repta dèy a gòyrra ɗèm, anga a gin Yeesu Kristu gi, ngam coorra ni ’misunum Fay. 12 Un kor ta mum, mi yiɗi un cèngni, jày kpètkim gi iisirra ’maarra Yèk Kâwrra ɗàm kpeesi, 13 ha a sooje ây a àay wûun ni nit ây kana pî aw cèngni, yèk leknum mum leknim aw a kultuma gi, ngam tèem Kristu ɗi. 14 Mûsa kor goosum ây dèy aw ii dànda tinîir waw a gin Nitcoorra ngam tâam mum a kultuma gi, aw iisirrarre mòorra tinîiri, aw yèerre yèk Fay tolnji cen. 15 A nit ây kana aw sakɗe yèk Kristu ngam ngèeri koo ngam lètnjunum, a nit ây kana aw sakɗe ni dànda mbâra. 16 A nit ây yo go aw yèerre ni yiide, aw cèngni, Kristu iimi ngam mi gòyni Yèk Kâwrra. 17 Amma a nit ây kana aw sakɗe yèk Kristu ngam aw hàanjini yèy, ti tâa ni tinîir burriya ba, aw dànde aw iisimda ’màari a tâam mum a kultuma gi. 18 Ji mbirge kà yey ya? Koo kà ya, koo ni tibiw koo ni takundi, to aw sakɗe go yèk Kristu gi, kâwimde. Kâ ge kâwim bak, 19 ngam mi cèngni, jàk yey gi i ge ir jàk mbâra a saanum mum, yèk waarra waar wun di Fay ni mgbaanjum Jungci Yeesu Kristu. 20 A dànda mum mi waatirre, ngam ta lawsam e mòom koo a jâ ba, amma diga mgban ha kòsòng mi gòyrre tolnji cen koo ningàa, ha Kristu e tâa ’mitiya a is mum, koo mi gûyrre go koo mi wutɗe go. 21 Ngam Kristu tâagim gûyrra mum, wuta ngaa tâagim kà kpàarra bèebi. 22 Amma to gûyrra mum ni isi ’maararre go jàk repta a tèem mum, mi cèngni jày gim cat gi ba. 23 Hû go dànda mum mîinji cuk, ye tâa mi yiɗi mi woofa deesi gi mi dik mi tâanji ni Kristu, ngam kà yey hò ge hòm della. 24 Amma to mi gûyrre go bak, hòme della ngam wun. 25 Ye tâa mi cèngni mbâra kà yey, tâa gim tâa ay gi mi tâanji ni un pî, ngam mi mgbaanjunu un iisirra dikta ɗàm kpeesi, un tâa ni kâwum a goosum. 26 Mi difa go bak a gin wun, ii gun iisirra râanum hak wun a gin Yeesu Kristu ngam mum. 27 Amma tâan tâam yey ge getnji ni Yèk Kâwrra Kristu gi, ngam koo mi difa go mi rapnu, koo mi difa go ba, mi rak yèk wun un gòyrre kpèw a jungci kpolo, un hâtɗe ni tinîiri kpolo ngam goosum yey hîi Yèk Kâwrra gi. 28 Ta un tol da nit yiir ta wun koo càa ba. Hû go tâa ge tâa daw jàk kàlnum a gbeerra waw, amma a gin wun lò ge lòni saarra yey anga a gin Fay. 29 Un un kpàa mbâri, naa ngam un goosu di Kristu gbè, amma ngam un rii ’màari a nîir wàa. 30 Un un lege a gbàat Fay, a gbàat yey rapnu nà mgban a gin mum, raknu ɗa a gin mum kòsòng gi.
21 Hû go to kpèwsum tinîiri diinu go takundi a gin Kristu, koo rûusum ni yiide, koo ’mèmsum a Jungci Delliya, koo mgbaanjum a ’maton gi, 2 mûunimin kâwum tinîiri, ha un ’mèmsi a dànda kpolo, a yiide kpolo, ni tinîiri kpolo, ni hakkilo kpolo a tîim wun. 3 Ta un mbir koo jâ ni tihàanjum, koo ni ’misum hak wun ɓa hû go ba, amma ni ûunum hay koo wuna e raptu di nit kana hòmuge. 4 Ta koo wuna e gop jàk ta wàa ba, amma e gop jàk nit ây kana ɗa. 5 Tâan ni dànda tinîir mbâra a tîim wun, kà yey tâa dànda tinîir Yeesu Kristu mbâra gi. 6 Ey dii nà a tâam Fay, ti dàn tâarra titenten ni Fay gi kà jàk mòorra ni kpèw kpèw ba. 7 Amma hîi hak wàa e tâa kà sàay, ire titenten ni nit ây, mbitɗe nà jày kà nirri. 8 Ey ûuni hak wàa, rakɗe tuy di Fay ha kpèrre a wurra, wurre a minjum kpiiri. 9 Ngam maan Fay aanjuge, hîiwe nîir yey hòmge ’mita da nîir ây pî, 10 ha jày pî tâage a faktiturum, ni deesi, ni mîis deesi aw gbâygi aw coo nîir Yeesu, 11 ha mgbelyèk nit ây pî aw lòni Yeesu Kristu tâage Nitcoorra, ngam ’mita Fay Tooy Ɓèl. 12 Un nit ây yiɗim dun gi, un ragim tuy koo ningàa, naa ye tâami gbè a tîim wun, amma ye tâa ɗa mi cenda a farra ba. Mi gàanurre, tèen tèem saarra wun ni tolnji, ni timalni isi. 13 Ngam Fay ey tèerre tèem wàa a tinîir wun, ha un yiɗi un tèe kày tâa mbâr yiɗum wàa gi. 14 Tèen jày pî cen hûungum, cen hàanjum a tinîiri, 15 ha un tâa ɓetkumya ni tinîir burriya, un tâa hàm ta Fay cen yèk kana a hak wun, a tîim yòot nit makta ây jòlge orri gi, un fin a farra kà jàk kayngum ây a kparri. 16 Mòon yèk gûyrra, ha mi râani hak mum a unji dàarra Kristu, ngam ta mi ’nòo ’nòori ɓa hû go ba, mi hâr tèerra tèem ɓa hû go ba. 17 Koo mi tuusi go njîim mum kà jàk hîiri, ye tâa mi daprirre yèk goosum wun a ɗàm kpees Fay gi, kâwim tinîir mum, mi kâwsirre ɗa ni un pî. 18 Hû go un ngaa tinîir wun kâwnuge. Un kâwsirre ɗa ni miy. 19 Mi dànde to Yeesu Nitcoorra yiɗi go gi, tèe gim tèefa Timote yaale a gin wun, ngam a ye gim rak yèk wun, mi kpàa suunji a tinîir mum. 20 Nit kana cenim kà ey raknje ni miy, dànje a tinîir wàa takundi yèk tâam wun gi. 21 Aw pî aw kàmde tèem Yeesu Kristu ba, sey jàk hak waw. 22 Amma un cèngni, kà lòni Timote tèem wàa tèenje ni miy gi, kà hàm ni tooy a sakta Yèk Kâwrra. 23 Mi dànde mi tèewfa yaale, a ye gim rap mbâra jày ge tâa a ɗàm kpees mum gi. 24 Amma mi cèngni mbâra a gin Nitcoorra, di gim difa ɗàm kpeesi càa a gin wun miy ni hak mum. 25 Mi dànde, gesi mi tèesufa Epafroditu a gin wun, kor yey ’mèmse ni miy a tèem ni gbàat mum ngam Fay, nit yey tèewra un ngam ha e mgbaanjim a gayam mum gi. 26 Un pî un lugu nisi, dànda ana a tinîir wàa ngam un rage nà, kûu àyci. 27 Takundi, kûu nà àyci ha kèle wucu. Amma Fay mgbaanjuge ni ’maton wàa, ti tâa dey gbè ba amma dim ɗa, ngam ta tinîiri e iisimda àyrra ba. 28 Kà yey mi tèesufarre yaale, ngam tinîir wun e kâwnu bak a ye gun rabu gi, miy ngaa àyrra tinîir mum a ge atnjimda. 29 Ey kpètfa go, ngoruwan mbâra ni tinîir kâwrra ngam Nitcoorra, coon da nit ây tâage kà yey gi! 30 Ey kèlle nà wucu ngam tèerra tèem Kristu. Ti rapti jungci wàa kà jàk ɓèl ba, ngam ha e mûuni mgbaanjum yey âygirra dun a tèem wun a gin mum gi.
31 Yèk kana ngasimdage, kor ta mum, kâwsin tinîir wun a tâam wun tâanu a gin Nitcoorra gi! Kèta yèk yey bak ti loosim ba, ii ge iisirra dun ɗa gòyrra mbâra a goosum. 2 Faasin hak wun a gin nit ây tèege tèem makta, rrèpni ɓa hû go gi. Aw a dun ây ɗi! 3 Orro ot nit rrèpnum ây ɗi takundi, ot daprurre di Fay ni Jungci wàa, ot râanirre yèk Yeesu Kristu, orro ot ii dànda tinîir worro a jàk isi ba. 4 Miy ɗa to mi yiɗi go, ii gim ii dànda tinîir mum a jàk isi. To nit kana dàn go, jày diiwe a isi e râani gi, miy mi hòmuge. 5 Aw rrèpnimge a unji nan nan a dat yey kpàamin gi, mi ni-Israyel ɗi a yòot Benyamin, mi ni-Hebra takundi ɗi a tîim ni-Hebra ây, a tèerra tèem yèk mgbèngda mi ni-Farisa ɗi. 6 To tâa go yèk hâta a tèerra tèem gi, mi ɗàa daw nà ɗàari da nit kimjum ây. To tâa go yèk gòyrra ɗèm a yèk mgbèngda gi, mi furre mbâra, yèk kana cen a hak mum. 7 Amma jàk yey tâagim nà jàk bèebi ha mi râani gi, kòsòng mi raptu kà jàk gbeerra ngam Kristu. 8 Takundi, mi raptirre jày pî kà jàk gbeerra, ngam cèngnum Yeesu Kristu Nitcoorra mum hòm daw dèy da jàk ây gi. Yèk wàa de woomfa jày tâagim gi pî, mi gopɗe kà jày a bûuri, ngam ha mi kpàa Kristu, 9 ha mi ’mèmsi kpolo ni ey, mi gòy ɗèm naa ni mbinum mum a futa yèk mgbèngda, amma ni goosum di Kristu, ha mi gòy ɗèm a ɗèm yey hîiw Fay di nit yey goosu gi. 10 Mi yiɗi mi cèngnuwa, ni mbinum gûysum wàa ɗa. Mi yiɗi mi ’mèmsi a riirra ’màar wàa, mi rèenji ni ey a wurra wàa, 11 mi dànde koo kà ya mi kpèt ha a gûysum a wurra. 12 Mi ɗà mi mòo bèeb gbèeni ba, mi ɗà mi tâa getiya ba, amma mi ’nòorre mba gim tèksi go bèeb maan, ye tâa Kristu ɗàagim mòocu gi. 13 Un kor ta mum, mi sak hak mum kà nit yey kpàage jày ba. Amma jày kpolo mbirmi, mi hèntirre jày tâage a daarri gi, mi sûurre is mum ’nèng a ɗàm kpeesi. 14 Mi ’nòorre mi iirre nis mum u gbèeni, ha mi kpàa bèeb yey ge hîi Fay, ye ’naasina diga faktiturum ni Yeesu Kristu. 15 Hû go ot nit ây tâage getiya gi, ndika ot ’mèmsi a dànda yey. Koo un ii go dànda wun ’nang a jàk kana, Fay lò ge lònunu jàk maan ɗa. 16 Amma a tâam yey kpètna gi, sey ot fut a ot maan. 17 Un kor ta mum, furrin dikri mum! Raptin da nit ây dike kà yey kpàanu a gin worro gi. 18 Ngam a nit ây dèy aw tâaye, dikri waw lònirre aw a nit ây yiige minjum kpiir Kristu ɗi. Mi saknu nà yèk yey nak mûsi jày, kòsòng mi saksirra dunde ɗa ni ti umni. 19 Gbèeni nit ây gi tâage gbeerra, himni waw tâagi daw Fak waw, lawsam waw tâagi daw ’mita. Tinîir waw mûuye ni dànda jàk kparri. 20 Amma orro, gin tâam worro tâana a faktiturum. Ot waatirre dàarra Nitsaanum worro, Yeesu Kristu Nitcoorra ye ge ana a farra gi. 21 Ey i ge inu di is lawsam worro, ha e rèenjunu ni is ’mita wàa. Ngam ni mbinum wàa kpàa ge kpàa e ûuni jàk ây pî a gin wàa.
41 Ngam maan un kor ta mum yiɗim dun gi, lugim un nisi, kâwsim un tinîiri, tâam un jàk râanum mum gi, gòyin kpèw kà yey a ’mèmsum wun ni Nitcoorra! 2 Mi waa dawrre da Ewodiya ni Sintike, mi mgbèng dawrre aw ’mèmsi tinîiri kpolo a gin Nitcoorra. 3 Mi waamde ɗa, nit tèenjum mum takundi, mgbaanji daw da nikin ây gi. Aw hâtɗe nà ni miy a tèem yeskunum Yèk Kâwrra, ni Kelementu ɗa ni nit ây kana tèenji ni miy gi. Nîir waw dii kètiya a defterre jungci. 4 Kâwsin tinîir wun yèk Nitcoorra koo ningàa! Mi gàarre bak, kâwsin tinîir wun! 5 Kàlnin fetkum tinîir wun a gin nit ây pî! Nitcoorra dàa ge dàara kènu. 6 Ta un loosi tinîir wun e taanu koo a jâ ba. Amma a jày pî lònin waar wun di Fay ni jàk gunda wun, un ’mèmsini ni gàarra mbew. 7 Mbâr Fay, hòmge cèngnum pî yey ge kpàa nirri e cèngni gi, e faanu tinîir wun ni dànda wun a gin Yeesu Kristu! 8 Un kor ta mum, dànin a jày pî tâage mbâra getke ’misum gi, jày tâage takundi, ni jày getke coorra, ni jày tâage ɗèm, ni jày tâage ɓetkumya, ni jày delge gi, ni yèk yey tâage kâwrriya gi. 9 Tèen jàk yey èngnunu a gin mum, ngotnu gi, raknu a mgbelyèk mum, rapnu mi tèerre gi. Hû go Fak mbâri tâa ge tâanji ni un. 10 Tinîir mum kâwimde dèy yèk Nitcoorra, ngam kòsòng un asi bak dànda a hak mum. Un dàne nà kà yey mgban, amma un kpàa orri ba. 11 Ti tâa ngam jày èegim de yèemi kà yey ba, ngam mi èngni tâarra koo kà ya, ha tinîir mum kûurre. 12 Mi mbini tâarra nit èca, mi mbini tâarra ni jày dèy. Mi èngnige tâarra a jày pî, koo a oca koo a fey, koo tâarra nit bèebi, koo tâarra nit fòon. 13 Mbi gim mbin mbita jày pî ni mbinum yey hîim Kristu gi. 14 Amma un tèe mbâra ye ’mèmsunu ni miy a ’màar mum gi. 15 Un ni-Filippi ây, un cèngni nge diga ɗaarra yeskunum Yèk Kâwrra, ye woomi dees Makedoniya gi, cen nit kimjum ây kana ’mèmsi ni miy a yèk hîirra jày ni ngota jày ba, sey un gbè. 16 Ngam koo ye tâami a Tessaloniki gi, un hîimfa jày a gayam mum ji ge hòm nak kpolo. 17 Ti tâa miy kàmde ha mi kpàa jày ba, amma mi kàmde jàk repta a goosum wun, yey ge iisirra jày a mbâr wun. 18 Amma mi kpàa jày pî, diim dèy, mi dii ni oca, ye ngormi jàk yey tèena un a kàn Epafroditu gi. Hîir wun mgbirgige kâwrriya, kà jàk gurfum ngotiya, delliya a gin Fay. 19 Fak mum mûu ge mûununu gayam wun pî ni Yeesu Kristu, kà yey tâa gbaarra bèeb wàa, ni ’mita wàa. 20 ’Mita e tâaw di Fay Too worro tâam timgbàri ha tâam timgbàri! Amen. 21 Kèbin daw da nit della ta wàa di Fay pî ni nîir Yeesu Kristu! A kor goosum ây tâanji ni miy aw kèpfa dunde. 22 A nit della ta wàa di Fay pî aw kèpfa dunde, hayye a nit ây a àay Kaysara wûun gi. 23 Mbâr Yeesu Kristu Nitcoorra e tâanji ni un pî!