Marku

Marku

¹ E rri yey kày ɗaa Yèk Kâwrra Yeesu Kristu. ² Kère nà mgban a defterre Isaya nit lònum yèk Fay: Hû go gàa Fay: E rri yey mi tèefarre nit tèer mum a ɗàm kpees wey, ha e mgbar ot wey. ³ Gûn nirri bimde a nûri: Mbangsin ot Nitcoorra, gòynin ot wàa mbâra! ⁴ Mbire hû go. Yuhanna taye a tîim nûri. Iirre baptisma da nit ây, sakɗe yèy da mûsa nit ây, gàarre: Inin tinîir wun, ngorin baptisma, ha Fay e yaafunu jàk maarra! ⁵ A ni-dees Yude ây, ni ni-Yerusalem ây pî aw dàararre a gin wàa. Ye lònin jàk maarra waw, de iirra daw baptisma a sîirra Yurdun. ⁶ Yuhanna mgbabe lurra yuurra ni gimsi ngeeloba, cîirre lurra wàa a kpàang ni kûu. Riirre hàay ni num wûsi. ⁷ A sakta yèy de gàa: Nit kana dàa ge dàara a dat mum, hòmimge mbinum. Mi get, mi ûu mi bot koo naan wàa ba. ⁸ Miy mi iirra dunde baptisma ni sòo gbè, amma ey nit dikta a dat mum ii ge iirra dun baptisma ni Jungci Delliya. ⁹ Mgbàr maan Yeesu anage a Nasaret a dees Galile, dàara a sîirra Yurdun. Yuhanna de iiwrra baptisma. ¹⁰ Yeesu ye naa a sòo, de rabe faktiturum kuplige. Jungci Delliya cirarre kà tigurfi, de lege a gin wàa. ¹¹ Gûn de ana a faktiturum de gàa: Muy mu Hàm mbâr mum ɗi mi yiɗumde, mu kâwsimde tinîiri. ¹² Kòsòng Jungci Delliya nàrru di Yeesu a tîim nûri. ¹³ Unji ra naan dii a farra. Seyɗan rûfrurre. Ey tâaye a tîim jàk nûr ây. A malayka ây aw tâanjirre ni ey, aw mgbaanjurre. ¹⁴ Ye leknuwan di Yuhanna a kultuma, Yeesu taye a dees Galile. De sage Yèk Kâwrra anga a gin Fay, de gàa: ¹⁵ Unji gerre, wûun Fay hèerage. Inin tinîir wun, goosin Yèk Kâwrra! ¹⁶ Yeesu ye gîre a cewci sòo ɓèl a Galile, de kpàa Simon ni Andere kaa wàa. Aw ’màktirre tidepni a sòo ɓèl, ngam aw a nit depta cîici ɗi. ¹⁷ De gàa daw: Dàaran, un furrimi! Ii gim iinu nit depta nit ây, kà yey depnu cîici a sòo gi. ¹⁸ De woofan tidepni waw yaale, de furruwan. ¹⁹ Ye dige ɗàm kpeesi càa, de kpàa hàm ta Jebede, Yakuba ni Yuhanna kaa wàa. Aw dii a koombowal waw, aw mbangsisirre tidepni. ²⁰ Yeesu de ’naasi daw. De woon too waw ni nit tèenjum ta wàa a koombowal, de diknjin ni Yeesu. ²¹ Yeesu ni lor ta wàa aw dige a Kafernahum. A unji wuysum de lege a àay gin kimjum, de kàlnji daw da nit ây. ²² Yèk wàa tâa daw ’nang da nit rakta ây, ngam ey ti kàlnji daw kà nit còycum ây ba, amma yèerre ni mbinum dèy. ²³ Yooge yooge nit tindòom de lege a àay gin kimjum. ²⁴ De bime de gàa: Ji tâanjina ni muy ya, Yeesu ni-Nasaret? Mu dàara ha mu gbeesina yi? Mi cèngnumge. Muy mu ana a gin Fay, mu nit della wàa ɗi. ²⁵ Yeesu lèrru di tindòom makta gi, de gàaw: Tâa baak baak, yuu a gin nit yey gi! ²⁶ Jungci tindòom de yûusu di nit maan dèy. De yuu a gin wàa ni tibimni ɓèl. ²⁷ Tâa daw ’nang da nit ây, ha de yèenjin a tîim waw: Jàk ji rri hûy ya? Yèk yey yèk kàlnjum fûuya ɗi ni mbinum! Nit yey ûuni koo tindòom ây, aw raguge. ²⁸ Yèk maan yeskige mgban mgban a dees Galile pî koo u hâ. ²⁹ Yeesu ye yuu a àay gin kimjum unji maan, de dige a àay Simon ni Andere kaa wàa. Yakuba ni Yuhanna aw diknjige ni ey. ³⁰ Sàr wàa di Simon kûurre àyci mâarra isi. Yeesu ye kpèrra, de kàluwan yèk àyci wàa. ³¹ De lege a gin nit àyci. De mòow a kàn, de aanjuwa. Ayci wàa ndòoye. De ane e kàmra daw tiriici. ³² Tuma ye gàa e lugi, a nit ây de ’maaran nit àyci ây ni nit tindòom ây pî a gin Yeesu. ³³ A ni-riiy ây maan pî aw kimjige a ɓeeri àay. ³⁴ Yeesu de ndòose nit àyci ây dèy, koo ni àyci ’nang ’nang. Yuuni tindòom ây ɗa da nit ây dèy. Njanggi yèerra yèy da jungci tindòom ây, ngam aw cèngnuge. ³⁵ Ndamji birit Yeesu dàme, de taye a tîim nûri. Waarre Fay a farra. ³⁶ A nit tâanjum ta wàa ni Simon aw furre, aw kàmuwa. ³⁷ Ye kpàawan de gàawan: A nit ây aw kàmumde. ³⁸ Amma ey de goosi daw: Difan ot tay a riiy ây gi tâage gaarra, ha mi kàl daw Yèk Kâwrra a farra ɗa. Ngam tèem yey de dàama. ³⁹ Hû go de dige a àay gin kimjum ây a dees Galile pî. De sage yèk wàa, de yuuni tindòom ây da nit ây ɗa. ⁴⁰ Nit rak isi de dàara a gin Yeesu, gbâygirre a ɗàm kpees wàa. De waaw de gàa: Mu dii ni mbinum. Gum kpàa mu ndòosimi, to mu yiɗi go. ⁴¹ Tinîir Yeesu àyuge ngam nit àyci gi. De parre kàn wàa, de banggurra de gàaw: Mi mgbaanjumge, sey mu ndòo a àyci wey! ⁴² Rak isi woowe di nit maan yaale, ndòoye. ⁴³ Yeesu de gàaw: Koyi! De mgbènggu de gàaw: ⁴⁴ Raksi mbâra, ta mu sak koo jâ di nirri ba. Amma dik mu kàlni is wey di nit daprum, mu ’maa jàk hîiri kà yey gàa Fay a defterre Muusa, ngam kàlnum àyci wey ndòoye. ⁴⁵ Amma nit maan ye taye, de sage jàk yey kpètku gi koo di wuna, ha Yeesu ti kpàa lekta a riiy ba sey ni fûucu. De diifa a nûri. Koo hû go a nit ây aw dàararre a gin wàa koo u hâ.

¹ A dat unji ’nang ’nang Yeesu koysa a Kafernahum. Aw rage dii a àay. ² A nit ây dèy aw kimjige a àay maan, koo a ɓeeri gin tâarra cen. Yeesu sak dawrre yèk Fay. ³ A nit ây de dàaran, de ’maaran nit wuta isi. A nit ây naan tokuwa. ⁴ Ye tâa aw kpàa orri kày gaw tîiw a ɗàm kpees Yeesu ba ngam mûsa nit ây, de naan de kpulin kpiiri a fak àay a gin tâa ey gi. De cinin a kpongna gi nit wuta isi nà ni jingi gin kûurra wàa. ⁵ Yeesu ye rabe goosum waw, de gàaw di nit wuta isi: Hàm mum, jàk maarra wey yaafige. ⁶ A nit còycum ây aw tâarre ton a farra. De dànin a tinîir waw de gàan: ⁷ Ngam jâ ey yèerre hûy ya? Ey maasi nîir Fay. Wun ge kpàa orri yaafum jàk maarra ya? Sey Fay gbè. ⁸ Kòsòng Yeesu cèngnige dànda waw. De gàa daw: Ngam jâ dànnu hûy a tinîir wun ya? ⁹ Jàk jâ hòmge àyrra, to mi gàaw go di nit wuta isi «jàk maarra wey yaafige», koo mi gàaw go «an mu at jingi wey, mu digi» ya? ¹⁰ Ndika un cèngni, Hàm nirri dii ni mbinum ha e yaafi jàk maarra a deesi. De gàaw di nit wuta isi: ¹¹ Mi gàamde, ani at jingi wey, mu koyi! ¹² Nit wuta isi nà de ane, de arre jingi wàa yaale, de yuu a nis nit ây pî, ha de tâa daw ’nang pî. De ’misin nîir Fay. De gàan: Ot haa kpàarra jày kà yey ba. ¹³ Yeesu diksi bak a cewci sòo ɓèl. A nit ây pî aw dàara a gin wàa. Ey kàlnji dawrre. ¹⁴ Ye furre a orri, de rabe Lewi hàm Alfa tâarre a àay gin jomnum. De gàaw: Furrimi! De ane de furruwa. ¹⁵ Yeesu de lege a àay Lewi e rii nàam. A nit ngota jomorrgol ây, ni nit makta ây dèy aw riinjirre ni Yeesu, ni lor ta wàa. Ngam aw dii dèy a nit ây futku gi. ¹⁶ A nit còycum ây a tîim ni-Farisa ây a ye rabuwan riinjirre ni nit makta ây ni nit ngota jomorrgol ây, de gunin da lor ta wàa: Ngam jâ ey riinji ni nit ngota jomorrgol ây ni nit makta ây ɗa ya? ¹⁷ Yeesu ye rage de gàa daw: A nit ây tâage kpèw aw cen ni gayam dikta a gin nit ndòosum ba, sey a nit ây tâage ni àyci. Mi dàara ha mi ’naasi nit ây tâage ɗèm ba, amma nit ây tâage ni jàk maarra. ¹⁸ Unji kana a lor ta Yuhanna, ni ni-Farisa ây aw coorre riirra tiriici ngam nîir Fay. A nit ây de dàaran, de gunin di Yeesu: Ngam jâ a lor ta Yuhanna, ni lor ta ni-Farisa ây aw coorre riirra tiriici, amma a lor ta wey aw coorre riirra ba ya? ¹⁹ Yeesu de goosi de gàa daw: A nit ’naasum ây a siir ata maanji gaw kpàa coorra riirra tiriici, to nit ata maanji tâanjirre go ni aw gi yi? Gaw coo riirra ba, ye tâan ni nit ata maanji gi. ²⁰ Amma unji dàa ge dàara ye gaw at nit ata maanji a gin waw. Unji maan coo gaw coo riirra tiriici. ²¹ Cen nirri ge còosi ɗolnji jàk joorra woy fûuya a lurra mgbanti ba. Gàa go nirri mbir go hûy, ɗolnji jàk joorra fûuya dàng go, sûu ge sûunji lurra mgbanti, gin còosum ii ge iisirra ngata. ²² Cen nirri ge duk mbàl fâarra a jòong woy mgbuurra ba. To nirri mbir go hûy, fâarra mbàl wa ge walsifa jòong. Jòong ni mbàl ɗa cuk mbo gaw mboyi. Sey nirri e duk fâarra mbàl a jòong mbâra. ²³ Yeesu ni lor ta wàa aw hòmde a tîim hèmna ây unji wuysum. A lor ta wàa de hòyin tirri aw tufi. ²⁴ A ni-Farisa ây de gunuwan di Yeesu: Kà kà tèen lor ta wey jày njangge yèk mgbèngda a unji wuysum gi ya? ²⁵ Yeesu de gàa daw: Un haa janggum a defterre Fay jày mbire Dawda ni nit tâanjum ta wàa ba yi? Ngam ye ày daw fey amma tiriici cenda daw ba, ²⁶ de legin a àay Fay, de kûnggin tàarri woy yey hîin hîiri a farra gi. Tàat maan sey a nit daprum ây gbè gaw kûnggi. Amma Dawda de kûngge, hîiye da nit ta wàa ɗa. Mgbàr maan Abiyata tâage nit ɓèl daprum a àay Fay. ²⁷ Yeesu de gàa daw bak: Fay ii unji wuysum ngam mbâr nirri. Amma ti mbangsi nirri ngam unji wuysum gbè ba. ²⁸ Hû go ɗi, Hàm nirri tâage nit ɓèl a unji wuysum ɗa.

¹ Yeesu lege bak a àay gin kimjum. Nit wuta kàn dii a farra. ² A nit ây aw gopɗe di Yeesu, to ey ndòo ge ndòosu go a unji wuysum, ngam aw kàm yèy a hak wàa. ³ De gàaw di nit wuta kàn: An mu gòy a tîim! ⁴ De gun daw: Gesi mbita jàk mbâri a unji wuysum yi? Koo mbita jàk makta yi? Gesi saanum jungci nirri koo ɓàta nirri yi? Aw tâa baak baak. ⁵ Yeesu gînirre nis wàa a gin waw ni ngòlnji, ngam ndèkta tinîir waw àyuge. De gàaw di nit wuta kàn: Pat kàn wey! De parre. Kàn wàa ndòoye. ⁶ A ni-Farisa ây de yuun, de digin aw yèenji ni nit ta Herode kày gaw ɓàru di Yeesu. ⁷ Yeesu woo gin maan, de taye ni lor ta wàa ot sòo ɓèl a Galile. Mûsa nit ây dèy aw furrurre. Aw anage a dees Galile, ni dees Yude. ⁸ Aw anage ɗa a dees Yerusalem, a dees Idumaya, a riiy ây a dat sîirra Yurdun, ni cewci Tiiru ni Sidon. Mûsa nit ây aw dàarage a gin Yeesu, ngam aw rage jày mbire ey. ⁹ Yeesu de gàa da lor ta wàa: Digin un kàmma hàm koombowal, mi gòy a sòo ngam ta nit ây aw èwnjim ba. ¹⁰ Ndòosi nà nit ây dèy. Yòo jày a nit àyci ây pî aw hâtɗe dikta a gin wàa ngam aw banggurra. ¹¹ A nit tindòom ây ye rabuwan, aw yaa a ɗàm kpees wàa. Aw bimde aw gàa: Muy mu Hàm Fay ɗi! ¹² De njanggi daw dèy, ta aw lònu ey wun ɗi go ba. ¹³ Yeesu naa a gopri. De ’naase nit ây yiɗi gi aw dàara a gin wàa. ¹⁴ De carre nit ây ra sàm cuk ngam aw tâanji ni ey, ngam e tèe daw a tèem yèerra yèk Fay, ¹⁵ ha aw kpàa mbinum aw yuuni tindòom makta ây ɗa. ¹⁶ Aw rri yey a nit cata ây ra sàm cuk: Simon nit yey Yeesu ’naasu Piyèr kà gàarra kpata, ¹⁷ Yakuba ni Yuhanna kaa wàa, a hàm ta Jebede, Yeesu ’naasi daw Bowanèrge kà gàarra a nit dûurra kà buun, ¹⁸ ni Andere, ni Filip, ni Bartolomi, ni Matta, ni Toma, ni Yakuba hàm Alfa, ni Tadde, ni Simon nit yiɗum dees wàa, ¹⁹ ni Yuda Iskariyo, nit mòorra Yeesu ni gâra. ²⁰ Yeesu ye ire a àay, mûsa nit ây aw kimjasa bak a gin wàa, ha ey ni lor ta wàa aw kpàa riirra tiriici ba. ²¹ A kor ta wàa dàaran ay ye ragin yèk maan, de hèeran aw arruwa. Ngam aw gàarre: Ey doogige. ²² A nit còycum ây aw anage a Yerusalem, de gàan: Yeesu dii ni Belsebu wûun tindòom makta ây. Ey hîigu mbinum e yuungi tindòom ây gi. ²³ Yeesu de ’naasi daw, de yèe daw ni rèenjum yèy de gàa: Kà kà Seyɗan ge mànsi hak wàa ya? ²⁴ To wûun ɗòlnji go ni nit ta wàa, wûun maan ge gòy ba. ²⁵ A nit àay kpolo aw ɗòlnji go a tîim waw, àay maan ge gòy ba. ²⁶ Hû go ɗa, to Seyɗan haa go gbàaci ni hak wàa, ɗò ge ɗòlnji cuk, mbinum wàa lòo ge lòo. ²⁷ Cen nirri ge kpàa lekta a àay nit kpèw kpèw e at jàk wàa ba. Sey to ɗàaw go ’mèmda nit kpèw kpèw gi, a dat maan kpàa ge kpàa ata jàk ta wàa tâagu a àay gi. ²⁸ Yeesu de gàa: Takundi mi gàanurre, nirri kpàa ge kpàa jàk yaafum a jàk maarra wàa ni yèk maasum pî. ²⁹ Amma nit yey maase Jungci Delliya gi, ge kpàa jàk yaafum ba sam, ngam ey tèeye jàk maarra woy yey tâa ge lòo ba gi. ³⁰ Yeesu gàa kà yey, ngam aw gàawe nà ey dii ni jungci tindòom. ³¹ Nuu wàa ni kaa rra wàa di Yeesu aw dàarage, aw gòye a gbaa. Aw tèe nirri ngam e ’naasuwa. ³² Mûsa nit ây aw tâarre a cewci Yeesu. De gàawan: Goosi, nuu wey ni kaa rra wey aw gòyrre a gbaa, aw ’naasumde. ³³ Yeesu de goosi daw de gàa: Wun tâage nuu mum ya, ni kaa rra mum gi ya? ³⁴ De gîne nis wàa a gin nit ây mgbaagu dèy, de gàa: Aw rri yey a kaa rra mum ni nuu mum. ³⁵ Ngam koo wun tèege jày yiɗi Fay gi, ey tâage kaa mum, koo say mum, koo nuu mum.

¹ Yeesu kàlnji bak a taga sòo. Mûsa nit ây dèy de kimjan a gin wàa, ha de lege a koombowal, e tâa a fak sòo. A nit ây pî de tâan a deesi a cewci sòo. ² Yeesu yèe daw jày dèy ni rèenjum yèy. A ye kàlnji daw hû go, de gàa: ³ Raksin! Nit yòorra yòoci tayge ngam yòorra yòoci. ⁴ A ye yòo gi, yòot kana de yaa a cewci orri. A jooy ây de dàan de atin. ⁵ Yòot kana yaa a gòok ây a gin tâa soori càa. De ɓuge yaale, ngam soori ti yeng ba. ⁶ Unji ye mâaye larruge, de kòyrre ngam sisi wàa ti cir ba. ⁷ Yòot kana yaa a fur cikci. Cikci ye ’mirre, de èwnju ha jàk ɓukta ti nîi koo jâ ba. ⁸ A yòot ây kana aw yaa a soor mbâra. De ɓugin. De ’mirrin de njòrin woy yey yòoci ra taan, woy kana yòoci ra yira, woy kana ngaa yòoci temèrre. ⁹ Yeesu de gàa daw: Nit yey tâage ni tuk rakni, sey e ragi! ¹⁰ Yeesu ye woo mûsa nirri gi, a nit tâanjum ta wàa ni lor ta wàa ra sàm cuk de gunuwan e lòni daw rèenjum yèy nà. ¹¹ De gàa daw: Un un kpàa ot cèngnum jày tâage fûurriya a wûun Fay. Amma a nit ây kana gi kpàa gaw kpàa yèy ni rèenjum yèy, ¹² ngam koo aw rapɗe go ni nisi, gaw kpàa ba, koo aw raksirre go ni tuy, gaw cèngni ba. To aw cèngni go ngin, gaw ini ngin tinîir waw a gin Fay, Fay yaa ge yaafi daw jàk maarra. ¹³ Yeesu de gàa daw: Un cèngni rèenjum yèk yey ba. Kà gun rak rèenjum yèk kana ây ya? ¹⁴ Nit yòorra yòoci tâa kà nit yòorra yèk Fay. ¹⁵ A nit ây kana aw rèenji kà cewci orri a gin yaa yèk Fay gi. Ye ragin yèk maan, Seyɗan de dàara e atfa yaale yèk yey leke a tinîir waw gi. ¹⁶ A nit ây kana aw rèenji ni soor yey tâage càa a gòok ây a gin yaa yòoci gi. Ye ragin yèy, de ngorin yaale ni tinîir kâwrra. ¹⁷ Amma aw dii kà jàk ɓukta sisi cen, regi regi. Aw kpàa go ’màari koo ɗàari ana go ngam yèk Fay, mgbò gaw mgbòl yaale aw yaa. ¹⁸ A nit ây kana aw rèenji ni gin yey yaa yòoci a fur cikci gi. Aw ngaa aw rakɗe yèk Fay. ¹⁹ Amma ye tâa jàk kparri, ni rûfta yèk bèebi, ni jàk yiɗum kana aw lege a tinîir waw aw loosi dawrre, è gaw èwnjifa yèk Fay a tinîir waw. A nit ây gi gaw rep koo jâ ba. ²⁰ A nit ây kana aw rèenji ni soor mbâra a gin yaan yòot ây gi. Aw rake yèk Fay, ngorge mbâra. Re gaw rep jàk mbâri kà yòoci, woy yey ra taan, woy kana ra yira, woy kana ngaa temèrre kpolo. ²¹ Yeesu de gàa daw: Nirri ge ’maara pittirla e lekni a pakrak, koo u fur takrak ya? Un cèngni, sey iirra njet. ²² Jày pî tâage kuptumya ku ge kupli. To nirri fûuni go jày, lò ge lòt mgbàr kana. ²³ Nit yey tâage ni tuk rakni, sey e ragi! ²⁴ Yeesu de gàasirra: Iin hakkilo a jàk yey raknu gi! Kà yey hîinu di nit kana, hû go Fay ge hîinu ɗa, ii ge iisirra dun. ²⁵ Nirri dii go ni jày, kpàa ge kpàasirra jàk kana. Amma nit yey èege jày, a gaw arri koo jày tâagurra càa gi. ²⁶ Yeesu de gàa bak: Wûun Fay rèenji ni nirri còke yòoci a hèmna wàa. ²⁷ Ye koye, e kûu ni tuma e an ni ndamji. Mgbàr maan yòoci ’mitɗe. Nirri gi ti cèngni kày ’mirri ba. ²⁸ Soori ey ni hak wàa hîige jàk nîirra, màrra ɓukta, nden aasum, a dat maan njòta yòoci. ²⁹ Amma yòoci ye nîiye, nit maan di ge dik e njaa, ngam wakli naaye. ³⁰ Ni jâ got rèenjini wûun Fay ya? Ni yèk hâ got getnjini ya? ³¹ Tâa kà yòot mutar. Yòot maan hòme luurra da yòot ây lang a kparri. ³² Amma aw còk go, ’mi ge ’mirri ha e hòm daw daw waas ây pî. Ii ge ii jalnji yâktiya, ha a jooy ây aw iirra àay waw a farra. ³³ Yeesu yèe daw kà yey ni rèenjum yèy dèy, kày gaw kpàaw rakta a nit ây. ³⁴ Ti yèe daw jày ba, sey ni rèenjum yèk ây ’nang ’nang. Amma a ye tâa ey kpolo wàa ni lor ta wàa, de lòni daw jày pî. ³⁵ Unji maan mbona ciiye. Yeesu de gàa da lor ta wàa: Dàan ot yew a taga sòo. ³⁶ De woon mûsa nit ây, de diknjin ni Yeesu a koombowal yey tâa ey gi, aw yewi. Koombowal ây kana ɗa dii a sòo. ³⁷ Hiski ɓèl de ana dèy, gîirarre sòo a koombowal, ha koombowal kèle e mûu ni sòo. ³⁸ Yeesu dii gaarra a gin kûta koombowal, kûurre, iirra hak wàa a gin iirra hay. De mûysuwan de gàawan: Nitkàlnjum, ot gbeerre, ge ngòlum ba yi? ³⁹ Yeesu ye mûye, de kpânu di hiski, de gàaw di sòo: Gòy, tâa baak baak! Hiski de gòye. Jày pî tâaye baak baak. ⁴⁰ De gàa da lor ta wàa: Ngam jâ tolnu ya? Kà kà un dii ni goosum ba ya? ⁴¹ Tolnji ɓèl mòo dawge. De gàanjin: Nit yey nit ji rri ya? Ngam koo hiski ni sòo ɓèl aw raguge.

¹ Aw kpèrre a taga sòo ɓèl a riiy ni-Gerasina ây. ² Yeesu ye cire a koombowal, nit tindòom yuura a gook geb ây, de dàara a gin wàa. ³ Nit maan gin tâam wàa dii a gook geb ây. Koo wuna ti get e cîiw ni yuma titefki ba. ⁴ Ngam aw cîiwe nak mûsi jày ni titefki a nay, ni yuma titefki a kàn. Ey ’nunsifarre yuma titefki, hòysifarre titefki a nak wàa. Cen nirri ni kpèw kpèw wàa ti get e ûunu ba. ⁵ Tuma ni unji tâarre a gook geb ây, ni fak gopri ây. Taasirre, ngòsirre is wàa ni gòok ây. ⁶ Ye rabe di Yeesu kpâarriya, de ’nòo e yaa a ɗàm kpees wàa. ⁷ De bime ni tibimni ɓèl de gàa: Ji tâanjina ni muy ya, Yeesu Hàm Fay hòmge pî? Mi waamde ni nîir Fay, ta mu riisim ’màari ba. ⁸ Yèe kà yey ngam Yeesu gàawe: Jungci tindòom, yuu a gin nit yey! ⁹ Yeesu de gunu: Kà tâam nîir wey ya? De goose de gàaw: Nîir mum Mûsa ɗi, ngam ot mûuye dèy. ¹⁰ De waaw di Yeesu dèy, ta e màn daw da jungci tindòom ây a riiy maan ba. ¹¹ Mûsa gicim ây dèy aw dii a kpàang gopri, aw faarre. ¹² A tindòom ây de waan di Yeesu, de gàawan: Tèena a gin gicim ây, ot lek a is waw. ¹³ Yeesu de hîi daw orri. A tindòom ây de yuun a is nirri nà, de legin a is gicim ây gi. A gicim ây de lamran a kpàang gopri, de yaan a sòo ɓèl de wutkin a farra. Aw dii jày ge kpèt ujinè cuk. ¹⁴ A hàm faat gicim ây de ’nòon. De kàlin yèk yey da nit ây tâage a riiy ɓèl ni riiy kaa ây. A nit ây de digin gopta jàk yey mbirge gi. ¹⁵ De dàaran a gin Yeesu. De kpàawan nit yey tâage nà ni mûsa tindòom ây tâarre ton, mgbabe lurra, dànde mbâra. Aw tole pî. ¹⁶ A nit rapta jàk yey de sagin da nit ây yèk nit tindòom nà, ni gicim ây gi. ¹⁷ De waawan di Yeesu e yuu a riiy waw. ¹⁸ Ye yiɗi lekta a koombowal, nit tindòom nà de waaw, aw tâanji ni ey. ¹⁹ Yeesu ti goosu ba. Amma de gàaw: Koy a gin nit ta wey, mu kàl daw kày mbire Nitcoorra a hak wey, kày gobum ’maton ɗa. ²⁰ De dige, de ɗaa kàlla a dees maan înin riiy ra kày mbiru Yeesu gi. Da nit ây pî tâa daw ’nang. ²¹ Yeesu yewsage ni koombowal a taga sòo ɓèl gi. Mûsa nit ây aw kimjage a gin wàa a cewci sòo. ²² Wûun a àay kimjum de dàara, nîir wàa Yayru. Ye rabu di Yeesu, de ûu a ɗàm kpees wàa. ²³ De waaw dèy de gàa: Hàm mum hàm nikin gàarre e wurri. Ndògòn, dàara mu banggurra kàn ha mu ndòosuwa, ta e wut ba. ²⁴ Yeesu de diknji ni Yayru. Mûsa nit ây dèy furre mu gàa aw èwnjurre. ²⁵ Kin kana dii ni àyci yuurra njîim yeri ra sàm cuk. ²⁶ Ey riiye nà ’màari a gin nit ndòosum ây ’nang ’nang, lòosige bèeb wàa pî. Amma àyci wàa ti ndòo ba, dikɗe ɗàm kpeesi. ²⁷ A ye rage yèk Yeesu, de lege a mûsa nirri, e dàara a dat wàa. De mâaw a lurra wàa. ²⁸ Ngam ey dàne, to mi mâa go koo lurra wàa gbè, ndòo gim ndòo. ²⁹ Kòsòng yuurra njîim wàa gbèeye. Kin nà rage, is wàa ndòoye. ³⁰ Yeesu ye rage, kpèw kpèw atnjige a is wàa, de dûre a tîim mûsa nit ây, de gune: Wun mâage lurra mum ya? ³¹ A lor ta wàa de goosin de gàawan: Mu kpàa kày èwnjum aw a nit ây, mu gun: Wun mâagim ya? ³² Amma Yeesu gopɗe, ha e kpàa nit mbita jàk yey gi. ³³ Kin maan tolle, malle, ngam cèngnige jày mbirgu gi. De dàara e yaa a ɗàm kpees wàa. De sagu jày mbirgu pî. ³⁴ Yeesu de gàaw: Hàm mum, goosum wey ndòosumge. Taysi mbâra, ’màari wey lòoye! ³⁵ Ye tâa Yeesu yèerre kà yey, a nit ta wàa di Yayru nà aw dàarage. De kàluwan: Hàm wey wurre, ta mu loosu di Nitkàlnjum ba. ³⁶ Yeesu ti ii tuy a yèk waw ba. De gàaw di Yayru: Mi yiɗi mu tol ba, sey mu goosi gbè! ³⁷ Ti woo da nit ây aw diknji ni ey ba, sey Piyèr, ni Yakuba, ni Yuhanna kaa wàa di Yakuba. ³⁸ Ye kpèrrin a àay Yayru, Yeesu de kpàa mûsa nit ây aw yèerre unggunggung. Aw umde dèy, aw taasirre. ³⁹ De lege a àay de gun daw: Ngam jâ gbaanu yèy umnu ya? Hàm ti wut ba, amma kûu kûuye. ⁴⁰ De wâskuwan. De yuuni daw pî. De arre too wàa ni nuu wàa di hàm, ni nit tâanjum ta wàa. De legin a gin tâa hàm gi. ⁴¹ De mòow di hàm nà a kàn, de gàa: Talita kumi, kà gàarra hàm mum, mi gàamde, ani! ⁴² Kòsòng hàm nikin nà de ane. De ɗaa gîta. Yer wàa dii ra sàm cuk. De tâa daw ’nang. ⁴³ Yeesu de njang daw dèy, ta aw sak yèk maan koo di wuna ba. De gàa daw: Kàmin tiriici, un hîiw di hàm gi e rii!

¹ Yeesu de ane a farra, de taye a riiy yey ’mirre gi. A lor ta wàa aw taynjige ni ey. ² A unji wuysum de kàlnje a àay gin kimjum. Mûsa nit ây dii a farra. Yèk wàa kpul daw jungci isi, de gàan: Nit yey u hâ kpàara jàk ây gi, ni còycum yey ya? Kay, nit yey mbine tèerra jàk kayeefi! ³ Naa ey tâage nit hewrum kpiiri gi naa? Ti tâa hàm wàa di Mariya, ɓèl waw da Yakuba, ni Yose, ni Yuda, ni Simon ba yi? A say rra wàa ɗa aw dii ni orro ay gi ba yi? Ngam maan aw hàwu goosum di Yeesu. ⁴ Ey de gàa daw: Di nit lònum yèk Fay aw coorre koo u hâ pî, sey a riiy wàa ni tîim kor ta wàa, ni nit àay rra wàa tâa gaw coow ba. ⁵ Ey ti kpàa tèerra kayeefi a riiy wàa koo kpolo ba, sey iirra daw kàn da nit àyci ây kpolo kpolo, e ndòosi daw. ⁶ De tâaw ’nang, ngam a nit ây aw goosi koo jâ ba. Yeesu dige a cewci riiy maan pî, kàlnji dawrre da nit ây. ⁷ De kimje da lor ta wàa ra sàm cuk. De tèe daw cuk cuk. De hîi daw mbinum aw yuuni tindòom makta ây da nit ây. ⁸ De njanggi daw, ta aw mòo koo jâ ngam diknum a orri ba, koo tiriici, koo kurra tiriici, koo seede, sey suu gbè gaw mòo, ⁹ aw lekni naan a nay, amma ta aw mgbap lurra cuk ba. ¹⁰ Yeesu de gàa daw bak: Un lek go a àay nirri, tâan a farra ha mgbàr yey gun an un taysi gi. ¹¹ To a gin kana a nit ây aw hàwnu go ngota, aw rak dun ba, woofan riiy maan, yuun un gbòsi sèerrèm a nak wun, ngam kàlnum daw jàk maarra waw mbirin gi. ¹² A lor ta wàa de tayin. De kàlin da nit ây aw ini tinîir waw. ¹³ Aw yuuni tindòom ây dèy da nit ây. De fingjirran num da nit àyci ây dèy, aw ndòosi dawge. ¹⁴ Yèk Yeesu kpèrre a gin Herode wûun ni-Yude ây, ngam yèk wàa gîre koo u hâ. A nit ây kana ye ragin yèk maan, de gàan: Yuhanna nit iirra baptisma gûysige. Ngam maan dii ni mbinum tèerra tèem kayeefi ây gi. ¹⁵ A nit ây kana aw gàarre: Ey Eliya ɗi. A nit ây kana ngaa aw gàarre: Ey nit lònum yèk Fay ɗi, a tîim nit ây lòni yèk Fay mgban. ¹⁶ Herode ye rage yèk maan, de gàa: Ey Yuhanna nit iirra baptisma ɗi. Mi njaa mgban hak wàa, amma e gûysige. ¹⁷ Ngam mgbàr kana Herode tèeye aw mòow di Yuhanna, aw ’mèmu aw leknu a kultuma. Ey mbire nà kà yey ngam yèk Herodiya, kin yey ngore a gin kaa wàa Filip. ¹⁸ Unji kana Yuhanna gàawe nà di Herode: Ti gesum mu at kin kaa wey ba. ¹⁹ Yòo jày Herodiya dii ni ngòlnji a gin Yuhanna. Kàmde e ɓàruwa, amma ti kpàa orri ba. ²⁰ Ngam Herode tolurre di Yuhanna, cèngnuge dii nit ɗèm ni takundi, delliya a ɗàm kpees Fay. Herode faawe mbâra. A ye rage yèk Yuhanna, tinîir wàa taaye, ti sumni kày ge mbir ba. Koo hû go yiɗirre rakta yèk wàa. ²¹ Amma unji della kpèrre di Herodiya a unji ɓaysum kpàarra wûun. Herode ’naase nit raknjum ta wàa, nit ɓèl sooje ây, ni nit ɓèl ây a dees Galile, de ii daprum. ²² Sapri wàa di Herodiya de lege a gin tâa wûun ni nit ta wàa. De sii siiri, delu di Herode ni nit tâanjum ta wàa. De gàaw di sapri: Gunim jày yiɗum pî, hîi gim hîimu. ²³ Herode hàa ni tihàani de gàa: Hîi gim hîim jày pî, koo jày tâagim mîi got mîinji. ²⁴ Sapri nà de yuuye, de dige e gun di nuu wàa: Jàk jâ gim gunuwa? De goosi de gàaw: Gun hak Yuhanna nit iirra baptisma. ²⁵ Sapri de isa digèrrige a gin wûun, de gàaw: Mi yiɗi mu hîim kòsòng hak Yuhanna nit iirra baptisma kuru a gàngna. ²⁶ Yèk yey àyuge di Herode wûun. Amma ngam hàaye a tuk nit ây, ti yiɗi hàwrra ba. ²⁷ De tèe sooje e ’maara hak Yuhanna. Sooje nà taye a kultuma, de lege a gin Yuhanna de njaa hak wàa, ²⁸ de ’maara hay a gàngna, de hîiw di sapri nà. Ey ngaa de hîiw di nuu wàa. ²⁹ A lor ta wàa di Yuhanna ye ragin yèk yey, de dàaran de arrin is wàa, de siptuwan a gebi. ³⁰ A lor ta Yeesu aw koyrage, aw kimji ni ey. De kàluwan jày mbirin gi kàlnjin gi pî. ³¹ Yeesu de gàa daw: Dàan ot dik orro kpolo worro a tîim nûri, un wuysi càa. Ngam a nit ây dèy aw dàararre aw tayrarre, ha Yeesu ni lor ta wàa aw kpàa tâarra aw rii koo tiriici ba. ³² De tayin ni koombowal aw kpolo waw a gin tâam baak baak. ³³ A ye tayin, a nit ây dèy aw rap dawge aw cèngsi dawge. A nit ây a riiy ɓèl ây pî aw yuuye aw ’nòo a cewci sòo, de ɗàan daw kpeesi, de kimjin ni aw. ³⁴ Yeesu ye yuu a koombowal, de rabe nit ây dèy gi. Tinîiri de àyu, ngam aw dii kà mgbâay ây hàm faaci cen. De kàlnji daw jày dèy. ³⁵ Unji ye ciiye, a lor ta wàa aw hèewrrage de gàawan: Ay gi tîim nûri ɗi, unji ɗa ciiye. ³⁶ Was daw da nit ây gi aw dik a riiy ây, aw sàa jàk tiriici aw rii. ³⁷ Yeesu de goosi de gàa daw: Un gun hîi daw tiriici! De gàawan: Ot dik ot sàara tàarri ngam kurra ra cuk, ot hîi da nit ây kà yey aw rii yi? ³⁸ De gun daw: Tàarri mèn diinu ya? Digin un gopra! Ye kpàan, de gàawan: Tàarri kèrèw, ni cîici cuk. ³⁹ De hîi daw orri, aw tâani daw pî kim kim a bàsi jèngrèng. ⁴⁰ De tâan ton ton nit ây temèrre temèrre, nit ây ra kèrèw ra kèrèw. ⁴¹ Yeesu de arre tàarri kèrèw ni cîici cuk nà. De toole nisi u faktiturum, de gàa mbew di Fay. De cèenje tàarri, de hîi daw da lor ta wàa, ha aw mîinji daw da nit ây. De gèlnje daw ɗa cîici cuk nà da nit ây pî. ⁴² Aw pî aw riiye, aw ole. ⁴³ De atin yaatum tàarri, de mûunin tuuni ra sàm cuk, ni ngirra cîici ɗa. ⁴⁴ A nit ây riige tàarri aw dii nihun ây ujinè kèrèw, cen sakta nikin ây ni hàm ây. ⁴⁵ A dat maan Yeesu gàa da lor ta wàa, aw lek a koombowal ngam aw ɗàaw aw yewsi a taga sòo ɓèl, a cewci riiy Betsayda, ha e wasra da mûsa nit ây. ⁴⁶ Ye was daw gi, de taye a gopri ngam e waa Fay. ⁴⁷ Ye cii mbona, a lor ta wàa aw dii a tîim sòo ni koombowal waw. Yeesu dii a deesi ey kpolo wàa. ⁴⁸ De rabe lor ta wàa aw riirre ’màari a kûta koombowal, ngam hiski wâarre a ɗàm kpees waw. Tuma ndamji Yeesu dàararre a gin waw, nafrarre a fak sòo. Dii mu gàa hò hòm daw. ⁴⁹ A lor ta wàa ye rabuwan nafrarre a fak sòo, de dànin ey nit gebi ɗi, de taasin. ⁵⁰ Aw pî aw rabu, de tolin. De gàa daw yaale: Miy ɗi, ta un tol ba, mòosin tinîir wun! ⁵¹ De lekfa a gin waw a koombowal. Hiski de woofa wâarra. De tâa daw ’nang. ⁵² Ngam ha mgbàr maan aw cèngni yèk kayeefi tàarri nà ba. Tinîir waw dii ndèktiya bak. ⁵³ A ye kpèrrin a taga dees Genesaret, de gbalin koombowal a cewci sòo. ⁵⁴ Ye yuun a koombowal gi, kòsòng a nit àyci ây aw cèngsu di Yeesu. ⁵⁵ Aw ana a dees maan pî, aw ’nòorarre a gin Yeesu. Ye ragin a gin tâa ey, aw ’maararre nit àyci ây ni aari. ⁵⁶ Koo u hâ pî dige Yeesu gi, a riiy kaa ây ni riiy ɓèl ây, ni gbaa gbaa, a nit ây aw iirre nit àyci ây a tîim luumu. De waawan ha nit àyci ây aw bangda a pètki lurra wàa. Koo wun banggurra ya, àyci wàa ndòowe.

¹ A ni-Farisa ây ni nit còycum ây anga a Yerusalem de kimjan a gin Yeesu. ² De rabin lor ta wàa kana aw riirre ni kàn ’miskumya, aw kòl ba. ³ Ngam a ni-Farisa ây ni ni-Yude ây pî aw futɗe yèk hàar waw. Aw riirre nàam ba, sey aw kòl go kàn. ⁴ Aw koyrra go luumu, gaw riiy jày ba sey aw poo go sòo. Aw mòo hàar kana dèy ɗa kà kòlla sey, ni taang, ni taasaw. ⁵ A ni-Farisa ây ni nit còycum ây de gunuwan di Yeesu: Ngam jâ a lor ta wey yewin yèk hàar wosom ây ya? Kà kà riin aw ni kàn ’miskum gi ya? ⁶ Yeesu de goosi de gàa daw: Isaya nit lònum yèk Fay yèe nà takundi a hak wun, un nit tibiw ây ɗi, ye kère kà yey: A nit ây gi aw coomde ni mgbelyèy, amma tinîir waw kpâanji ni miy. ⁷ Aw daprimde ɓa hû go, ngam aw kàlnjirre jày gàan a nit ây. ⁸ Yeesu de gàa: Un un woofa yèk mgbèngda Fay ngam mòorra yèk hàar nit ây. ⁹ Kay, un mbine hàwrra yèk mgbèngda Fay ngam un fut yèk kàlnjum wun! ¹⁰ Muusa gàa: Coo too wey ni nuu wey. Nit yey njàmge too wàa ni nuu wàa, kpàa ge kpàa kiita wurra. ¹¹ Amma un un kàlnjirre, nirri kpàa go mgbaanjum di too wàa koo di nuu wàa e gàa «jàk yey korban ɗi, kà gàarra jàk yey gesi ngin mi hîim gi, hîi gim hîi di Fay», ¹² hû go un njangguge mgbaanjum di too wàa ni nuu wàa. ¹³ Kà yey un mboysirre yèk Fay ni yèk hàar wun. Un tèerre jàk ây kana dèy hû go ɗa. ¹⁴ Yeesu de ’naasi mûsa nit ây aw hèera a gin wàa, de gàa daw: Raksimin un pî ha un cèngni jàk yey. ¹⁵ Cen jàk yey leke a mgbelyèk nirri e ’miskunu ba. Amma jàk yey yuuga a mgbelyèk nirri gi, ey ge ’miskunuwa. ( ¹⁶ Nit yey tâage ni tuk rakni, sey e ragi!) ¹⁷ Yeesu ye ɗòlnjin ni mûsa nit ây, de lege a àay. A lor ta wàa de gunuwan e lòni daw yèk maan. ¹⁸ De goosi de gàa daw: Kay, un ɗa un kpàawrre cèngnum jày ba yi? Ndika un cèngni, jày pî lek go a mgbelyèk nirri ge ’miskunu ba. ¹⁹ Ngam jàk yey ge lek a tinîir wàa ba, sey a himni, ge yuunufa a ɓutki. Yeesu gàa kà yey ɗa ngam e mbârsi tiriici pî. ²⁰ De gàa bak: Jàk yey yuuga a mgbelyèk nirri ey ge ’miskunuwa. ²¹ Ngam a tinîir nirri ana dànda maktiya, yey ge ’maaw a mboysum lori ni sapri, ni oori, ni ɓàta nirri, ²² ni njeenu, ni gayrum jàk ây, ni kperrem, ni gâra, ni haanum tuy, ni ngèeri, ni maasum yèy, ni ’misum hay, ni ray ɗa. ²³ Maarra yey pî ge ana a tinîiri, ge ’miskunu di nirri. ²⁴ Yeesu ane a farra, de taye a cewci riiy Tiiru. De lege a àay nirri, ti yiɗi koo wuna e cèngni a gin tâa ba. Amma ey ti kpàa fûurra ba. ²⁵ Kin kana dii ni hàm nikin. Hàm maan tâa ni tindòom. Ye rage yèk Yeesu, de dàara de ûu a ɗàm kpees wàa. ²⁶ Kin maan ni-èca yèk Fay ɗi, a yòot ni-Siriya Feniki ây. De waaw di Yeesu e yuunu tindòom di hàm wàa. ²⁷ Yeesu de gàaw: Woo daw da hàm ây aw ol ɗà ɗa. Ti del ata tiriit waw aw còoni da dun ây ba. ²⁸ Kini nà de goosi de gàaw: Hû go ɗi, Nitcoorra. Amma a dun ây hû riin woy yaatum hàm ây a deesi. ²⁹ Yeesu de gàaw: Ngam yèk yey yèem gi koyi, tindòom yuuwe di hàm wey. ³⁰ Kini nà ye kpèrre a àay, kpàawe di hàm wàa kûurre kpu a jingi. Tindòom yuuwe di hàm. ³¹ Yeesu ane a dees Tiiru. De jòle a riiy Sidon, e isa a cewci sòo ɓèl a Galile. De arre ot dees yey înin riiy ra. ³² A nit ây de ’maawran nit gbukrum, ti kpàawrre yèerra ɗa ba. De waawan e banggurra kàn di nit yey. ³³ De digin aw cuk ni Yeesu, de kpâan a mûsa nit ây. Yeesu de lekni mbèerri kàn wàa a tuk nirri nà. De yîme ticèkti, de mâaw a rèeng wàa. ³⁴ De toole nisi a faktiturum, de bage de gàa: Effata, kà gàarra faari! ³⁵ Kòsòng tuk ta wàa di nirri nà pole. Jày cîigu rèeng wàa ɗa patige. Ey yèerre mbâra. ³⁶ Yeesu de njanggi daw, ta aw sak yèk maan di nirri ba. Koo ye njanggi daw dèy, aw iisirra yèerra dèy. ³⁷ A nit ây ye ragin, jungci isi kpul dawge, de gàan: Jàk yey tèe gi pî, mbâriya tèeye. Mbire ha a nit gbukrum ây aw ragi, ni nit ây tâa nà aw yèerre yèy ba, kòsòng ɗa aw yèerre.

¹ Mgbàr maan mûsa nit ây kimjisi bak. Tiriici lòo dawge. Yeesu de ’naase da lor ta wàa, de gàa daw: ² Tinîir mum àyimde, ngam a nit ây gi aw tâanji ni miy ay gi unji taan, aw cen ni jàk riirra ba. ³ To mi was daw go aw koy kà yey gi, yaa gaw yaa fey a orri, ngam a nit ây kana aw dàarage kpâarriya. ⁴ A lor ta wàa de gunuwan: U hâ got kpàara tiriici ay gi a tîim nûri, ha e get daw pî ya? ⁵ Yeesu de gun daw: Tàarri mèn diinu ya? De goosin: Tàarri jòròs. ⁶ De gàa da mûsa nit ây aw tâa ton ton a deesi. De arre tàarri jòròs nà, de gàa mbew di Fay. De cèenje tàarri, de hîi daw da lor ta wàa ngam aw mîinji da mûsa nit ây. A lor ta wàa ngaa de tèen hû go. ⁷ Aw dii ɗa ni cîici càa, Yeesu de mbârsi ɗa. De gàa da lor ta wàa ngaa aw mîinji daw. ⁸ Aw pî aw riiye aw ole. De atin yaatum tiriici, de mûunin pakrak jòròs. ⁹ A nit ây riige gi aw dii jày ge kpèt ujinè naan. Yeesu de was daw aw koyi. ¹⁰ De lege a koombowal ni lor ta wàa, de yewin aw dik a dees Dalmanuta. ¹¹ A ni-Farisa ây de dàaran, de ɗaan hàanjum yèy di Yeesu. De faawan ray, de gunuwan e tèerra daw jàk kayeefi ni mbinum Fay. ¹² Yeesu bage a mîis tinîir wàa, de gàa: Ngam jâ a nit ây tâarra yey kàmin kayeefi ya? Takundi gàami, koo jâ rèenji ni kayeefi gaw kpàa ba sam! ¹³ Ye hèese, de ire a koombowal, de yewe a taga sòo ɓèl. ¹⁴ A lor ta Yeesu aw hèntige ata tiriici, sey tàarri kpolo rgaskirra daw a koombowal. ¹⁵ Yeesu yèe yèy, de mgbèng daw de gàa: Faasin hak wun a njàngna ni-Farisa ây ni njàngna Herode. ¹⁶ De yèenjin a tîim waw de gàan: Ey yèerre hûy ngam ot arra tàarri ba. ¹⁷ Yeesu ye cèngni dànda waw, de gun daw: Ngam jâ yèenjunu a tîim wun yèk hèntum tàarri ya? Ha kòsòng un rakɗe ba, un ɓaysirre ba yi? Tinîir wun dii ndèktiya yi? ¹⁸ Un dii ni nisi un gopɗe ba yi? Un dii ni tuy un rakɗe ba yi? Un ɓaysi jàk yey ba yi? ¹⁹ A ye mîinjim tàarri kèrèw nà ngam nit ây ujinè kèrèw, tuuni mèn kimjunu woy yaatum ya? De goosuwan: Ra sàm cuk ɗi. ²⁰ Yeesu de gunsi daw: A ye mîinjim tàarri jòròs nà ngam nit ây ujinè naan, pakrak mèn kimjunu woy yaatum ya? De goosuwan: Jòròs ɗi. ²¹ De gàa daw: Hû go rri go, kà tâa un cèngsi ba ya? ²² Yeesu ni lor ta wàa aw dàarage a riiy Betsayda. A nit ây aw ’maara nit râay a gin Yeesu. Aw waawe e banggurra kàn. ²³ De mòow di nit râay a kàn. De ’maaw a dat àay ây. De yîmurra ticèkti a nis wàa, de burrurra kàn. De gunuwa: Mu rapɗe jày yi? ²⁴ De gobe de gàa: Mi rapɗe nit ây kà kpiiri, amma aw gîtɗe. ²⁵ Yeesu de busurra kàn a nis wàa. Nit râay ɓelsige, ndòoye. De rabe jày pî kayang kayang. ²⁶ Yeesu de gàaw: Ta mu lek a àay ây a riiy yey ba. De tèew e koy a gbaa wàa. ²⁷ A dat maan Yeesu ni lor ta wàa aw dige a riiy kaa ây a cewci Kaysariya Filippe. A orri de gun daw: A nit ây kà gàan miy wun ɗi ya? ²⁸ De goosuwan: A nit ây kana aw gàarre, mu Yuhanna nit iirra baptisma ɗi. A nit ây kana aw gàarre, mu Eliya ɗi. A nit ây kana ngaa aw gàarre, mu nirri kpolo ɗi a tîim nit ây lòni nà yèk Fay. ²⁹ Yeesu de gun daw bak: Amma un kà gàanu mi wun ɗi ya? Piyèr de goosu de gàaw: Muy mu Kristu ɗi. ³⁰ Yeesu de njang daw, ta aw sak yèk yey koo di wuna ba. ³¹ De ɗaa daw lònum yèk wurra wàa da lor ta wàa, de gàa: Sey Hàm nirri e rii ’màari dèy. A toonji ây, ni nit ɓèl ta waw da nit daprum ây, ni nit còycum ây hà gaw hàwuwa, aw ɓàruwa. Amma a unji taanti gû ge gûysi. ³² Yeesu yèe yèk yey tolnji cen. Piyèr de arru ni ey aw tâa kpolo waw, de njangguwa a yèk maan. ³³ Yeesu de dûre a gin lor ta wàa, de kpânu di Piyèr de gàaw: Hèesi a gin mum, Seyɗan! Ngam dànda wey ti ana a gin Fay ba, amma a gin nirri. ³⁴ De ’naase nit ây ni lor ta wàa bak a gin wàa, de gàa daw: To nirri yiɗi go e diknji ni miy, sey e hàanji hak wàa, e tok minjum kpiir wàa, e furrimi. ³⁵ Ngam nit yey yiɗi e saani jungci wàa gi, gbee ge gbeesi. Amma nit yey gbeesi jungci wàa ngam mum ni ngam yèk Kâwrra gi, saa ge saani jungci wàa. ³⁶ Nirri kpàa go deesi lang, amma gbeesi go jungci wàa, ji ge mbirurra ya? ³⁷ Malla ji ge hîi nirri, ngam sàasunum jungci wàa ya? ³⁸ To lawsam mòow go di nirri, ngam mum ni yèk mum ɗa a tîim nit ây woogifa yèk Fay, a nit tèem maarra ây, hû go ngaa lawsam mòo ge mòow di Hàm nirri a gin nit ây a unji mgbàr yey ge dàara a ’mita Too wàa, ’mèmsa ni malayka ta Fay.

¹ Yeesu iisirra yèerra de gàa: Takundi mi gàanurre, a nit ây kana a tîim nit ây gòyge ay gi gaw wut ba, sey to aw rap go wûun Fay dàararre ni mbinum. ² A dat unji yira Yeesu arre Piyèr, ni Yakuba, ni Yuhanna. De ’maa daw a fak gopri ɓèl aw naan gbè. Is wàa di Yeesu de bunje kayang a nis waw. ³ Lurra ta wàa ire burriya tal tal, koo nirri kpolo a deesi ge mbin iirra burriya kà yey ba. ⁴ Eliya ni Muusa aw lòtɗa dawge, de yèenjin ni Yeesu. ⁵ Piyèr de gàaw di Yeesu: Nitcoorra, a gin mbâra tâana ay gi. Woona ot mbangsi ndûkci ây taan, kpolo ngam wey, kpolo ngam Muusa, kpolo ɗa ngam Eliya. ⁶ Ti cèngni kày ge gàa ba. Ngam ey ni nit ây cuk aw tolle dèy. ⁷ Titurum dàa butɗa dawge. Gûn ana a titurum de gàa: Yey hàm mbâr mum ɗi, mi yiɗurre. Raguwan! ⁸ Kòsòng a lor ta Yeesu de gobin a cewci waw. Aw rap koo nit kana ba, sey Yeesu kpolo wàa dii ni aw. ⁹ A ye cisan a gopri, Yeesu de mgbènggi daw ta aw sak koo di wuna jàk yey rabin gi ba, sey to Hàm nirri gûysi go a wurra. ¹⁰ Aw raguge. Amma aw gunjirre: Ji tâage gûysum a wurra ya? ¹¹ De gunuwan di Yeesu de gàan: Ngam ji gàan a nit còycum ây, sey Eliya e dàara ɗà ya? ¹² De goosi daw: Takundi ɗi, Eliya ɗàa ge ɗàara dikta ha e mbangsi jày pî. Amma kà kère nge Hàm nirri rii ge rii ’màari dèy, gaw haawrra ya? ¹³ Koo hû go mi gàanurre, Eliya dàarage nà, a nit ây aw mbiru jày yiɗin gi, kà yey gàa yèk defterre a hak wàa. ¹⁴ A ye kpèrran a gin lor ta wàa kana, de kpàan mûsa nit ây dèy aw mgbaa dawrre. A nit còycum ây aw hàanjirre ni aw. ¹⁵ A nit ây ye rabuwan di Yeesu, de tâa daw ’nang. De ’nòon a gin wàa, de gàawan: Soko! ¹⁶ Yeesu de gun da lor ta wàa tâage a farra: Yèk jâ hàanjunu ni aw ya? ¹⁷ Nirri kpolo a tîim nit ây nà de goosi de gàa: Nitkàlnjum, mi ’maara hàm mum, ngam tibûu mòowrre, ti kpàawrre yèerra ɗa ba. ¹⁸ Koo u hâ anurre go, taanurre kpum a deesi, tibufkum fâawrre a yèy, riisirre temgi, is wàa gbòkɗe yòm. Mi waa da lor ta wey aw yuunu tibûu maan, amma aw kpàaw yuunum ba. ¹⁹ Yeesu de goosi de gàa daw: Kay, un yòot èca goosum gi! Ha ningàa gim tâanji ni un ya? Ha ningàa gim èf tinîir mum ngam wun ya? ’Maamran hàm maan a gin mum! ²⁰ De ’maawran. Tibûu nà ye rabu di Yeesu, de malsu di hàm gbòk gbòk. Hàm yaaye kpum a deesi, sângjirre, tibufkum iiwrre a yèy. ²¹ Yeesu de gunu di too wàa: Diga ningàa mòow jàk yey di hàm gi ya? Too wàa de gàaw: Diga a kaa wàa. ²² Nak mûsi jày tibûu yaanurre a ebi koo a mîis sòo, ngam ha e gbeesuwa. Too wàa de gàa bak: To mu mbin go, ndògòn gopna ni ’maton, mgbaanji dorro! ²³ Yeesu de gàaw: Gim mbin go, gàamu. Amma mbinda pî dii a gin nit yey goose gi. ²⁴ Kòsòng too wàa di hàm bime de gàa: Mi goosirre hû go, amma mgbaanjim a èca goosum mum! ²⁵ Yeesu rabe mûsa nit ây aw hèerarre a gin waw. De kpânu di àyci tibûu, de gàaw: Mu tibûu yey njanggu yèerra, gbukrunu ɗa, mi gàamde: Yuu a gin hàm yey, ta mu leksirra a gin wàa ba! ²⁶ Tibûu de taase, de tòru di hàm mgbew, de yuu a gin wàa. Hàm tâa mu gàa wurre, ha a nit ây dèy de gàan wurre. ²⁷ Amma Yeesu de mòow a kàn, de aanjuwa. Hàm de gòye ti. ²⁸ Yeesu ye kpèrre a àay, a lor ta wàa de gunuwan ye tâan aw kpolo waw: Ngam jâ ɗi tâa orro ot kpàaw yuunum àyci tibûu gi ba ya? ²⁹ Yeesu de goosi daw: Sey ni waarra Fay nirri ge kpàaw yuunum yòot tindòom kà yey. ³⁰ Aw ane a farra, de hòmin a dees Galile. Yeesu ti yiɗi koo wuna e cèngni a gin tâa ba, ³¹ ngam kàlnji da lor ta wàa. De gàa daw: Hîi gaw hîiw di Hàm nirri a kàn nit ây, ɓà gaw ɓàruwa, amma unji taanti gû ge gûysi. ³² A lor ta wàa aw roonji jàk yey yiɗi yèerra ba. Aw tolu gunda di Yeesu. ³³ Aw kpèrre a Kafernahum. Ye tâan a àay, Yeesu de gune da lor ta wàa: Ji yèenjunu a orri ya? ³⁴ Amma de tâan baak baak, ngam a orri aw gunjige wun ge tâa nit ɓèl a tîim waw ya. ³⁵ Yeesu de tâa ton. De ’naasi da lor ta wàa aw hèera, de gàa daw: To nirri yiɗi go e tâa tiɗàm kpeesi, sey e tâa nit futa u daarri, e ir nit tèerra tèem da nit ây pî. ³⁶ Yeesu de arre hàm, de gòynu a tîim waw de kabuwa, de gàa daw: ³⁷ Koo wun ngorgu di hàm kpolo kà yey gi ngam nîir mum, ngorimge dim. Nirri ngorim go, tâa dim ngore gbè ba, amma ngoru di Too mum tèegima gi ɗa. ³⁸ Yuhanna de gàaw di Yeesu: Nitkàlnjum, ot kpàaye nirri kpolo, yuunirre tindòom ây ni nîir wey. Orro ot njangguge, ngam ey ti ’mèmsi ni orro ba. ³⁹ Yeesu de goosi daw: Ta un njanggu ba. Ngam koo wun tèege kayeefi ni nîir mum gi, ge kpàa maasum dim a dat maan ba. ⁴⁰ Nirri ti yiina go ba, nit worro ɗi. ⁴¹ Nirri njoosi dun go sòo ngam un nit ta Kristu ɗi, takundi mi gàanurre, kpàa gun kpàa jàk mbâri a tèem wàa. ⁴² Yeesu de gàa bak: Nit yey iigu timgbòlnji di nit luurriya a tîim nit ây goosim dim gi, hòmu della aw cîiwrra ɗekli ɓèl a gûn wàa, aw ’màktufa a sòo ɓèl. ⁴³ To kàn wey leknum go a jàk maarra, njaafa kpòt. Lekta a gin gûyrra tâam timgbàri ni kàn kpolo, hò ge hòmum della ni yaarra ni kàn cuk a eb ɓèl tâa ti kûyrre ba. ( ⁴⁴ A farra a fûk riirra nit ây gaw wut ba. Ebi ge woofa akta ba.) ⁴⁵ To nak wey leknum go a jàk maarra, njaafa kpòt. Lekta a gin gûyrra tâam timgbàri ni nak tiseleng hò ge hòmum della ni yaarra a eb ɓèl ni nak ta wey cuk. ( ⁴⁶ A farra a fûk riirra nit ây gaw wut ba. Ebi ge woofa akta ba.) ⁴⁷ To nis wey kpolo leknum go a jàk maarra, hòlfa kpògòt. Lekta a wûun Fay ni nisi kpolo hò ge hòmum della ni yaarra a eb ɓèl ni nis ta wey cuk gi. ⁴⁸ A farra a fûk riirra nit ây gaw wut ba. Ebi ge woofa akta ba. ⁴⁹ Ebi ndaa ge ndaa nirri kà ndaarra sama. ⁵⁰ Sama jàk mbâra ɗi. Amma to sama gbeesi go ngangji wàa, ni jâ gun ngaksisi ya? Tâan kà sama a tîim wun, tâanjin mbâra, ta tilètnjum e tâa a tîim wun ba.

¹ Yeesu ana a farra, de taye a dees Yude ni ɗàm kpees sîirra Yurdun. A nit ây aw kimjisi bak a gin wàa. De kàlnji daw kà yey rûu ey. ² A ni-Farisa ây kana de dàaran ngam aw rûfuwa, de gunuwan: Gesi ha nirri e mànfa kin wàa, aw ɗòlnji yi? ³ Yeesu de gun daw: Kà kàlnu Muusa ya? ⁴ De goosin de gàan: Muusa hîi orri ha nirri e kèr ɗerrewol ɗòlnjum, e hîiw di kin wàa, aw ɗòlnji. ⁵ Yeesu de gàa daw: Ngam yèk ndèkta tinîir wun Muusa de hîinu orri kà yey. ⁶ Amma a ɗaarra Fay mbangsi jày pî, de mbangse nihun ni nikin. ⁷ Ngam maan nihun woo ge woofa too wàa ni nuu wàa, e ’mèmsi ni kin wàa, ⁸ aw ɗa cuk i gaw ir isi kpolo. Gaw tâasirra cuk a dat maan ba, amma isi kpolo. ⁹ Hû go jày ’mèmsi Fay, ta nirri e ɗòlnjifa ba. ¹⁰ Ye tâan a àay, a lor ta wàa de gunsuwan a yèk maan. ¹¹ Yeesu de gàa daw: Nit yey mànge kin wàa e asirra kin kana, ey ire tikàm kin. ¹² Hû go ɗa, kin yey woogifa maa wàa e wàr di nit kana, ey ire tikàm toonji. ¹³ A nit ây de ’maawran hàm ây di Yeesu ngam e bangda daw kàn. Amma a lor ta wàa de kpânin daw. ¹⁴ Yeesu ye rabe kà yey, de ngòlu de gàa daw da lor ta wàa: Woon daw da hàm ây aw dàara a gin mum, ta un njang daw ba. Ngam wûun Fay dii daw da nit ây tâage kà hàm ây gi. ¹⁵ Takundi mi gàanurre: To nirri ti ngor go wûun Fay kà hàm ba, ge lek a farra ba sam. ¹⁶ De arre hàm ây de kabi daw. De banggirra daw kàn a hay, de mbârsi daw. ¹⁷ Yeesu dikɗe a orri. Nirri de dàara ni ’nòocu, de gbâyge a ɗàm kpees wàa, de gunu: Nitkàlnjum mbâri, ji gim tèe ha mi kpàa gûyrra tâam timgbàri gi ya? ¹⁸ Yeesu de gàaw: Ngam jâ gàam dim nit mbâri ya? Nit mbâri cen, sey Fay gbè. ¹⁹ Mu cèngni yèk mgbèngda wàa: Ta mu ɓàr nirri ba, ta mu ii njeenu ba, ta mu oo oori ba, ta mu yèe yèk rèeng a hak nirri ba, ta mu ngor jàk nirri ni gâra ba, coo too wey ni nuu wey. ²⁰ Ey de goosi de gàaw: Nitkàlnjum, mi mòo yèk ây gi pî diga a tâam lor mum. ²¹ Yeesu goburre ni yiide, de gàaw: Jày kpolo âygumda. Dik mu sàani jày tâagum gi pî, mu hîi da nit èca ây. Hû go kpàa gum kpàa bèebi dèy a faktiturum. A dat maan dàara mu furrimi! ²² A rakta yèk yey tinîir nit maan àyuge. De taye ni ngòlnji, ngam jàk ây diiwe dèy ni ɓèlla. ²³ Yeesu de gobe da lor ta wàa mgbaagu gi, de gàa daw: Kay, kpâaye dèy ha nit bèeb ây aw lek a wûun Fay gi! ²⁴ Yèk wàa tâa daw ’nang da lor ta wàa. Amma Yeesu de gàa daw bak: Hàm ta mum, lekta a wûun Fay kpâaye sam! ²⁵ Lekta nit bèebi a wûun Fay hòme àyrra ni yuurra ngeeloba a kpongna ndoongor. ²⁶ De tâa daw ’nang dèy da lor ta wàa. De gunjin a tîim waw: Hû go rri go, wun ge kpàa saarra ya? ²⁷ Yeesu de gop daw de gàa: Jàk yey nirri ge kpàaw mbita ba, amma Fay mbi ge mbiri. Ngam Fay ey mbirge jày pî. ²⁸ Piyèr de gàaw: E rri yey orro ot woofage jàk ây pî ot furrumde. ²⁹ Yeesu de gàa: Takundi mi gàanurre, to nirri woofa go àay wàa, koo kaa rra wàa, koo say rra wàa, koo nuu wàa, koo too wàa, koo hàm ta wàa, koo hèmna ta wàa, ngam mum ni ngam Yèk Kâwrra, ³⁰ kpàa ge kpàasirra nak temèrre a tâarra yey àay ây, ni kaanji ây, ni saynji ây, ni nuu, ni hàm ây, ni hèmna ây, koo a ɗàarra ɗàari. A mgbàr yey ge dàara a ɗàm kpeesi gi kpàa ge kpàa gûyrra tâam timgbàri. ³¹ Amma a nit tiɗàm kpees ây i gaw ir u daarri, a nit ây tâage u daarri ngaa tâa gaw tâa tiɗàm kpees ây. ³² A ye mòon ot dikta Yerusalem, Yeesu ɗàa dawrre kpeesi. De tâa daw ’nang da lor ta wàa. A nit ây futnji ni aw aw tolle. De ’naase da lor ta wàa ra sàm cuk kpolo waw. De kàl daw jày ge kpèrru a ɗàm kpeesi càa. ³³ De gàa daw: E rri yey ot naarre a Yerusalem. Hîi gaw hîiw di Hàm nirri a kàn nit ɓèl ta waw da nit daprum ây, ni nit còycum ây. Hii gaw hiitu aw yaanu a kiita wurra, hîi gaw hîiw a kàn nit ây èege yèk Fay. ³⁴ Aw ngaa wâ gaw wâskuwa, yî gaw yîmurra ticèkti, lè gaw lèfu ni timbii, aw ɓàruwa. Amma unji taanti gû ge gûysi. ³⁵ A dat maan Yakuba ni Yuhanna a hàm ta Jebede de hèewrran di Yeesu, de gàawan: Nitkàlnjum, ot yiɗi mu mbitna jày waam ot gi. ³⁶ Yeesu de gun daw: Ji waanu mi mbitnu ya? ³⁷ De goosuwan: A ye gum tâa a wûun ni ’mita wey, hîina orri ha ot tâa nit kpolo a riina wey, nit kpolo ngaa a mgbaala wey. ³⁸ Amma Yeesu de gàa daw: Un cèngni jày gun waa gi ba. Kpàa gun kpàa njoonum ni kop ’màar yey gàa mi njoo gi yi? Goo gun goosi un kpàa baptisma kà yey gàa mi kpàa gi yi? ³⁹ De goosuwan: Eeye, kpàa got kpàa. Yeesu de gàa daw: Takundi, njoo gun njooni kop ’màar yey gim njoo miy gi. Kpàa gun kpàa baptisma kà yey gim kpàa gi. ⁴⁰ Amma tâarra a riina mum ni mgbaala mum, miy gim hîi ba. Tâam yey waatirre da nit ây mbangse Fay ngam waw gi. ⁴¹ A lor ta wàa kana ra ye ragin yèk Yakuba ni Yuhanna, de anin ni ngòlnji a gin waw. ⁴² Yeesu de ’naasi daw pî a gin wàa, de gàa daw: Un cèngni, a nit ây gàan daw a wûun ây ɗi gi aw ndak dawrre da nit ta waw ni ndakcu. A nit ɓèl ây ngaa aw har dawrre jày ni hacu. ⁴³ Amma ta un mbir kà aw ba. To nirri kpolo a tîim wun yiɗi go tâarra nit ɓèl, sey e ir nit tèerra tèem wun. ⁴⁴ To nirri a tîim wun yiɗi go tâarra tiɗàm kpeesi, sey e ir sàay wun. ⁴⁵ Hàm nirri ɗa ti dàara ngam aw tèewra jày ba, amma ngam ey e tèerra daw, e hîi jungci wàa ha e sàasi nit ây dèy. ⁴⁶ Yeesu ni lor ta wàa ye kpèrrin a Yeriko, de hòmin a riiy maan ni mûsa nit ây dèy. Nit râay tiwaargum jày tâarre a cewci orri. Nîir wàa Bartime, hàm Time. ⁴⁷ Ye rage Yeesu ni-Nasaret hòmde, de bime de gàa: Yeesu hàm Dawda, gobim ’maton! ⁴⁸ A nit ây dèy de kpânuwan ha e tâa baak baak. Amma ey de iisirra bimda: Hàm Dawda, gobim ’maton! ⁴⁹ Yeesu de gòye, de gàa: ’Naasuwan! De ’naasuwan di nit râay nà, de gàawan: Mòo tinîiri, ani, ey ’naasumde. ⁵⁰ De botfa lurra wàa ndul, de ane de dàara a gin Yeesu. ⁵¹ Yeesu de gunu: Ji yiɗum mi mbirum ya? Nit râay de goose de gàaw: Nitkàlnjum, mbirim ha mi kpàasi nis mum! ⁵² Yeesu de gàaw: Tayi, goosum wey ndòosumge. Nis wàa de ɓelse yaale, de furru di Yeesu a orri.

¹ A ye hèerran a Yerusalem a cewci Betfage ni Betaniya, de kpèrrin a gopri korrom. Yeesu de tèe da lor ta wàa cuk, ² de gàa daw: Digin a àay ây a ɗàm kpees wun. Un kpèt go a farra, kpàa gun kpàa hàm wamde cîirriya woy yey tâa nirri ti haa naarra ba. Njelan un ’maara. ³ To nirri gunnu go «ji mbitnu hûy ya», gàawan: Nitcoorra dii ni gayam maan, i ge insa dun yaale. ⁴ De digin kan, de kpàan hàm wamde a cewci orri, cîirriya a nin àay. De njelan. ⁵ A nit ây gòyge a farra, de gunin daw: Ngam ji njelnu hàm wamde ya? ⁶ De goosin kà yey gàa daw Yeesu gi. A nit ây nà de woon daw. ⁷ De ’maaran hàm wamde a gin Yeesu. De iirran lurra waw a mârngi wamde. De naarra. ⁸ A nit ây dèy de parrin lurra ta waw a orri. ⁹ A nit ɗàarra kpees ây ni nit ây futka u daarri aw bime, aw gàa: Dàara ɗaga! ’Mita e tâaw di nit yey dàaga ni nîir Fay! ¹⁰ ’Mita dii a wûun too worro Dawda, nit yey dàaga gi! ’Mita e tâaw di Fay a faktiturum! ¹¹ Yeesu kpèrre a Yerusalem. De lege a àay Fay. Ye gbèese gînum nis wàa a jày pî a farra, de tayin a Betaniya ni lor ta wàa ra sàm cuk, ngam tuma kèle lukcu. ¹² Ni ndamji ye yuuran a Betaniya, fey àyuge di Yeesu. ¹³ De rabe jâaci kpâarriya ni waasi. De dige e gop mba nîirre go. Amma ye kpèrre a fur jâaci, de kpàa sey waasi gbè, ngam cot nîirra jâaci ɗi ba. ¹⁴ Yeesu de lèrru di jâat maan de gàaw: Ta nirri e haasirra riirra jàk repta a gin wey ba ha tâam timgbàri! A lor ta wàa aw rage yèk yey. ¹⁵ Ye kpèrrin a Yerusalem, Yeesu de lege bak a àay Fay. De ɗaa mànda da nit sàangum jàk ây ni nit sàarra jàk ây a farra. De tusfa taabul ta waw da nit bunjum seede ây, ni tifokta ta waw da nit sàangum tigurfi ây. ¹⁶ Ti woo koo wuna e hòm ni tokta jày a àay Fay ba. ¹⁷ De kàlnji daw da nit ây de gàa: Gàa nà kà yey a defterre Fay: Aay mum gaw ’naasi àay gin waarra Fay ngam nit dees ây pî. Amma un un inu di àay yey gook gin tâam nit ngorgum jàk ây! ¹⁸ A nit ɓèl ta waw da nit daprum ây, ni nit còycum ây ye ragin yèk maan, de kàmin orri ha aw gbeesu di Yeesu. Amma aw toluge, ngam kàlnjum wàa tâa daw ’nang da nit ây pî. ¹⁹ A ye cii mbona, Yeesu ni lor ta wàa de yuun a riiy ɓèl maan. ²⁰ Ni ndamji a ye hòmin a orri, Yeesu de kpàa jâaci nà gbòge yòm ha sisi. ²¹ Piyèr de ɓayse yèk jâaci nà, de gàaw di Yeesu: Nitkàlnjum, e rri yey jâaci nà lètmu gi gbòge. ²² Yeesu de gàa da lor ta wàa: Goosin di Fay! ²³ Takundi mi gàanurre: To un gàaw go di gopri yey «an, mu tay mu yaa a sòo ɓèl», un hàanji go a tinîir wun ba, amma un goosi jày gàanu gi, jàk maan mbi ge mbiri. ²⁴ Ngam maan mi gàanurre: A waarra Fay to un gunde go koo jàk hâ, goosin un kpàa mgban, jàk maan tâa ge tâanu hû go. ²⁵ Un waarre go Fay, to jày tâanjunu ni nirri, yaafuwan di nit maan, ngam ha Too wun a faktiturum e yaafunu, un yew go a yèk mgbèngda wàa. ( ²⁶ Amma to un yaafi daw go da nit ây kana ba, Too wun a faktiturum ɗa ge yaafunu jàk maarra wun ba.) ²⁷ De isin bak a Yerusalem. Yeesu ye gîre a mîis àay Fay, a nit ɓèl ta waw da nit daprum ây, ni nit còycum ây, ni nit raknjum ây de dàaran a gin wàa. ²⁸ De gunuwan: Ni mbinum hâ tèenum jàk ây gi ya? Wun hîigum mbinum tèerra kà yey ya? ²⁹ Yeesu de gàa daw: Miy ɗa gu gim gunnu jày kpolo. Un goosim go, miy ngaa kà gim kàlnu ni mbinum yey tèenim jàk ây gi. ³⁰ Iirra baptisma Yuhanna ana a gin Fay yi? Malla a gin nirri yi? Kàlimin! ³¹ De yèenjin a tîim waw de gàan: To ot gàaw go «ana a gin Fay», gu ge gunna: Ngam jâ tâa un goosu di Yuhanna ba ya? ³² To ot gàa go «ana a gin nirri», hû go ot tole da nit ây. Ngam a nit ây pî aw raptuge di Yuhanna nit lònum yèk Fay takundi ɗi. ³³ Hû go de goosin di Yeesu, de gàawan: Ot cèngni ba. Yeesu de gàa daw: Yow, miy ɗa gim kàlnu ni mbinum yey tèenim jàk ây gi ba.

¹ Yeesu yèe dawge ni rèenjum yèy. De gàa: Nirri gage hèmna timgbokcum. De njèrre ni njèrra, de cèe gin ɗuusum, de jâa àay yâktiya ngam waatum hèmna gi. De hîi da nit ây kana aw baruwa, ha aw mîinji jàk nîirra ni ey. De taye a dees kana kpâarriya. ² Cot hapta jàk nîirra ye kpèrre, de tèe nit tèem wàa a gin nit bata ây nà ngam e ngoruwa woy wàa, e koynuwa. ³ De mòowan di nit tèem nà de lutkuwan, aw hîiw koo jâ ba. ⁴ A dat maan nit hèmna de tèesifa nit tèem kana. A nit bata ây de taawan a hay kpum, de njàmruwan. ⁵ Nit hèmna de tèesifa nit kana bak. Dey ngaa de ɓàruwan. Kà yey mbirin da nit tèem ây dèy. Da nit ây kana aw lurri dawge, da nit ây kana ngaa aw ɓàri dawge. ⁶ Ngasurra di nit hèmna nà nirri kpolo gbè, hàm kâwsum tinîir wàa. A gbèeni de tèew a gin nit bata ây nà. Ey dàne: Coo gaw coow di hàm mum gi. ⁷ A ye kpèrra, de yèenjin a tîim waw de gàan: Ey tâage nit koyrra hèmna too wàa. Dàan ot ɓàruwa, ha hèmna e tâa woy worro. ⁸ De mòowan, de ɓàruwan, de narrin is wàa aw ’màktufa a ɓutki. ⁹ Yeesu de gàa daw: Ji ge mbir nit hèmna gi ya? Ey dàa ge dàara e gbeesi da nit bata ây. Hîi ge hîi hèmna maan da nit ây kana. ¹⁰ Mi dàne un janggige yèk yey a defterre Fay: Gòok yey a nit jâarra ây ’màktifa, e irge gòok tigòyni àay. ¹¹ E rri yey jày tèe Tooy Ɓèl, tâana ’nang a nis worro. ¹² A nit ɓèl ta waw da ni-Yude ây de kàmin orri ha aw mòow di Yeesu, ngam aw cèngsige ey yèe ni rèenjum yèk yey a hak waw. Amma aw tolle mûsa nit ây. Hû go de woowan, de tayin. ¹³ Aw tèerage a gin Yeesu nit ây kana a tîim ni-Farisa ây ni nit ta Herode, ngam aw mòow a yèk wàa. ¹⁴ De dàaran de gàawan: Nitkàlnjum, ot cèngni, muy mu nit takundi ɗi. Mu tolle yèk nit ây ba, mu raptirre nis nit ây ’nang ’nang ba, mu kàlnjirre ot Fay ni takundi. Kàlna to gesi go hîirra jomorrgol di Kaysara wûun ɓèl gi. Ndika ot hîi naa, koo ta ot hîi ba? ¹⁵ Yeesu ye cèngni yèk tibiw waw, de gàa daw: Ngam jâ rûfim un ya? ’Maamran seede sarrdi kpolo ha mi raptuwa! ¹⁶ De ’maawran. De gun daw: Foto hak wun ɗi yey gi, ni kèta nîir wuna? De goosuwan: Foto Kaysara wûun ɗi. ¹⁷ Yeesu de gàa daw: Hîisuwan di Kaysara jày tâage jàk wàa, hîisuwan di Fay ngaa jày tâage jàk wàa. Yèk yey tâa daw ’nang. ¹⁸ A ni-Saduki ây aw dàara a gin Yeesu. A nit ây maan aw gàarre, gûysum a wurra cen. De gunuwan de gàan: ¹⁹ Nitkàlnjum, Muusa kère jàk yey ngam worro: Nirri wut go, woofa go kin hàm cen, sey kaa wàa e koyrra kin maan mba ge kpàa go hàm, ha e gòynu yòot ɓèl wàa wutke gi. ²⁰ A hàm tooy kpolo aw tâa nà jòròs. Màrra arre kin, de wurre hàm cenu ba. ²¹ Cukti wàa de koyrra kin maan. Ey ngaa de wurre hàm cenu ba. Taanti waw ɗa koyrrage kin wàa, de wurre, ²² ha aw jòròs pî aw arruge di kin maan, aw woofa hàm ba. A dat waw pî kin ɗa wurre. ²³ Amma unji gûysum a wurra, kin maan kin wun ge tâa ya? Ngam aw jòròs pî aw arruge. ²⁴ Yeesu de goosi daw de gàa: Un dòpɗe, ngam un cèngni yèk defterre koo mbinum Fay ba. ²⁵ Ngam ye gaw gûysi a nit ây wutke gi, nihun ni nikin gaw atnji ba. Amma tâa gaw tâa kà malayka ta Fay a faktiturum. ²⁶ A yèk nit wurra ây ni gûysum waw, un haa janggum a defterre Muusa yèk waas cikci ba yi? A farra Fay gàawe di Muusa: Miy tâage Fak waw da Abraham, ni Isak, ni Yakob. ²⁷ Fay ti tâa Fak nit wutiya ây ba, amma Fak nit beenga ây ɗi. Kà yey un dòpnjirre dèy. ²⁸ Nit còycum kpolo aw hàanjirre ni Yeesu. De rabe kày goosi daw mbâra da ni-Saduki ây. De hèewrra de gunuwa: Yèk hâ hòmge ’mita a yèk mgbèngda gi ya? ²⁹ Yeesu de goosu: E rri yey yèk mgbèngda woy hòmge pî: Raksin, ni-Israyel ây, Tooy Ɓèl Fak worro ey tâage kpolo gbè. ³⁰ Yiɗi Fak wey Tooy Ɓèl ni tinîir wey pî, ni jungci is wey pî, ni dànda wey pî, ni kpèw kpèw is wey ɗa pî. ³¹ E rri yey yèk cukti a yèk mgbèngda: Yiɗi nit tâanjum wey kà yey yiɗum hak wey. Cen yèk mgbèngda kana hòmge da woy ây cuk gi ba. ³² Nit còycum nà de gàaw di Yeesu: Nitkàlnjum, yèk yey dele, takundi gàamu. Fay Tooy Ɓèl ey ɗi kpolo gbè, fak kana cen. ³³ Sey nirri e yiɗi Fay ni tinîir wàa pî, ni dànda wàa pî, ni kpèw kpèw is wàa pî. Sey e yiɗi nit tâanjum wàa kà hak wàa. Yey hòme della di aksum tikukri ni jàk gurfum di Fay. ³⁴ Yeesu ye rage kày goose mbâra gi, de gàaw: Muy mu kpâa a wûun Fay ba. A dat maan cen nirri haasurra gunda yèk kana di Yeesu ba. ³⁵ A ye kàlnje Yeesu a àay Fay, de gune: Kà kà a nit còycum ây gàan Kristu gi hàm Dawda ɗi ya? ³⁶ Ngam Dawda ni hak wàa ye yèe ni Jungci Delliya, de gàa: Tooy Ɓèl gàa di Nitcoorra mum: Tâa a riina mum, ha mi ii nit yiir ta wey a gin nafta nak wey. ³⁷ Yow, Dawda ni hak wàa ’naasu Nitcoorra. Kà tâani Kristu hàm wàa gi ya? Yèk Yeesu del dawge da mûsa nit ây. ³⁸ Yeesu ye kàlnje yèy de gàa: Faasin hak wun a gin nit còycum ây. Aw yiɗi gîta ni lurra ɓèl. Aw yiɗi a nit ây aw kèbi daw kèpri a luumu. ³⁹ Aw yiɗi ɗa tâarra a ɗàm kpeesi a àay gin kimjum, ni gin tâam màrra a riirra tiriici. ⁴⁰ Aw atkirre jày tâagi daw da kin wurra ây, aw yâksirre waarra Fay a nis nit ây. Kpàa gaw kpàa kiita woy hòmge àyrra. ⁴¹ Yeesu tâarre ton gaarra a gin hîirra seede a àay Fay. Gopɗe da nit ây kày iin seede a sey. A nit bèeb ây kana aw ii seede dèy. ⁴² Kin wurra ni-èca dàarage, hîiye sunku cuk. ⁴³ Yeesu de ’naase da lor ta wàa, de gàa daw: Takundi mi gàanurre, kin wurra yey ni èca wàa hîi hîiri hòme da nit ây pî. ⁴⁴ Ngam a nit ây kana aw hîi a ’mita seede waw. Amma ey koo a èca wàa hîiye seede yey tâagu, jày ge mgbàani is wàa pî.

¹ Yeesu ye yuu a àay Fay, nirri kpolo a tîim lor ta wàa de gàaw: Nitkàlnjum, gop jâarra àay yey ni gòok ây delliya! ² Yeesu de goosu: Mu rabe jâarra kpaksum àay yey yi? Gòoy kpolo ge ngasɗa a fak gòok kana ba, kpu gaw kpulgifa pî a deesi. ³ Yeesu tâarre a gopri korrom, ini nis wàa a cewci àay Fay. Piyèr, ni Yakuba, ni Yuhanna, ni Andere aw gbè tâanji ni ey. De gunuwan: ⁴ Kàlna, ningàa ge mbir jàk yey yèemu gi ya? Ji ge lòni kpèta jàk ây gi ya? ⁵ Yeesu de gàa daw: Faasin hak wun, ta koo wuna e rûfnu ba. ⁶ Ngam a nit ây dèy dàa gaw dàara ni nîir mum, gaw gàa: Miy mi Kristu ɗi. Rû gaw rûfi nit ây dèy. ⁷ A ye gun rak tapnjum bàpri ni yèk bàpri, ta jungci isi e kpulnu ba. Sey jàk ây gi e mbiri, amma lòorra kparri ɗà kpèrra ba. ⁸ Nit dees ây a gaw an a gin nit dees ây kana. Wûun a ge an a gin wûun kana aw tapnji bàpri. Deesi yûu ge yûu a gin kana ’nang ’nang. Fek ɓèl ii ge ii. A jàk ây gi pî tâa ge tâa kà ɗaarra ’màari a ciisum hàm. ⁹ Amma un faasin hak wun! Ngam ’maa gaw ’maanu a kiita nit ɓèl raknjum ây, lu gaw lutnu a àay gin kimjum ta waw. Gò gaw gòynunu a ɗàm kpees ngomna ây ni wûun ây ngam yèk mum, ha un lòni seedamku a gin waw. ¹⁰ Amma màrra sey aw sak Yèk Kâwrra da nit dees ây pî. ¹¹ Ye gaw ’maanu a ɗàm kpees nit hiitum ây, ta un dànji kà gun yèe ya ba. Amma unji maan kpèrra go, yèen yèk yey kpàanu gi. Ngam yèk yey ge ana a gin wun ba, amma a ge ana a gin Jungci Delliya. ¹² Nirri hîi ge hîi kaa wàa koo ɓèl wàa aw ɓàruwa. Hû go ɗa tooy hàm hîi ge hîi hàm wàa. A hàm ây ngaa a gaw anda daw da too rra waw ni nuu rra waw, aw ɓàri daw. ¹³ A nit ây pî yii gaw yiinu ngam nîir mum. Amma nit yey èfke tinîir wàa ha gbèeni gi, kpàa ge kpàa saarra. ¹⁴ Yeesu de gàa bak: Ye gun rap jàk kpulla jungci isi, ni mboysum jàk ây tâarre a gin yey tâa ti gesu ba, sey nit janggum yèk yey a cèngni jàk ây gi! Mgbàr maan a nit ây tâage a dees Yude gi, sey aw ɗul aw ’nòo a gopri. ¹⁵ Nirri dii go a fak àay, ta e cir ngam ata jàk ta wàa ba. ¹⁶ Nirri dii go a hèmna, ta e ir u gbaa e at lurra wàa ba. ¹⁷ Amma ’màari dii daw da kin himni ây, ni nikin ây âwsi hàm ây a mgbàr maan! ¹⁸ Waan Fay ngam ta jàk ây gi e mbir a cot ngisim ba. ¹⁹ Mgbàr maan ’màari dèy ii ge ii, kà yey tâa ti haa iirra ba diga Fay ɗaa mbangsum jày ha kòsòng. Ge haasirra iirra hû go ba. ²⁰ To Tooy Ɓèl atnjifa go ngin a unji ’màar ây gi ba, koo nirri kpolo ge kpàa saarra ba. Amma atnjifage unji ây maan yèk nit ta wàa carre gi. ²¹ To nirri dàara go e gàanu «e rri yey Kristu ay gi», koo «e rri yey go Kristu ay go», ta un goosu ba. ²² Ngam Kristu rèengda rèeng ây, ni nit lònum yèk rèeng ây a gaw ani, aw lòni jàk kayeefi ây ngam rûfnum da nit ây carre Fay gi, to gaw kpàa go orri. ²³ Faasin hak wun! E rri yey mi ɗàanu kàlla jàk ây gi pî diga màrra. ²⁴ Amma mgbàr maan a dat ’màari nà, unji ku ge kupti yiriya kurrum, corri ɗa woo ge woofa kayngum. ²⁵ A tibiskum ây a faktiturum yaa gaw yaari, kpèw kpèw jàk ây gòyni faktiturum gi yûu gaw yûu. ²⁶ A dat maan ra gaw rap Hàm nirri dàararre a titurum ni ’mita wàa, ni mbinum dèy. ²⁷ Tèe ge tèera malayka ta wàa a gbèeni deesi pî, ha aw kimji da nit ta wàa carre gi. ²⁸ Engnin a yèk futifay. A jalnji ây aw baararre go, aw gosi waasi, un cèngnige cot iiy hèerage. ²⁹ Hû go un ngaa a ye gun rap jàk ây gi aw mbitɗe go, cèngnin Hàm nirri hèera a nin. ³⁰ Takundi mi gàanurre, a nit ây tâarra yey gaw wut ba, sey to jàk ây gi pî mbir go. ³¹ Faktiturum ni deesi lòo ge lòo, amma yèk mum ge lòo ba sam. ³² Amma koo wuna ti cèngni mgbàr maan ni unji maan ba, koo a malayka ây a faktiturum, koo Hàm nirri aw cèngni ba, sey Tooy Ɓèl gbè. ³³ Mûyin, un faasi hak wun! Ngam un cèngni unji kpèta jàk ây gi ba. ³⁴ Tâa ge tâa kà nirri tay go kpâarriya woo àay wàa, e hîi orri da nit tèem ta wàa koo wuna ni tèem wàa. E gàaw di nit waatum àay e waati mbâra. ³⁵ Hû go mûyin, ngam un ɗa un cèngni mgbàr koyrra nit àay ba, koo ni mbona, koo tîim tuma, koo tuma ndamji, koo ndamji birit. ³⁶ To ey koyra go a ye tâa un cèngni ba, ta e kpàanu un kûurre ba. ³⁷ Jày gàam dun gi, mi gàarre da nit ây pî: Mûyin!

¹ Ngase unji cuk ha daprum Paska ni riirra tiriici njàngna cen. A nit ɓèl ta waw da nit daprum ây, ni nit còycum ây aw kàme orri ha aw mòow di Yeesu ni gâra, ngam aw hîi aw ɓàruwa. ² De yèenjin de gàan: Ta ot mbir jàk yey a mgbàr daprum ba, ngam ta mûsa nit ây aw an ni yèy ba. ³ Yeesu dii a Betaniya a àay Simon nit rak isi. A ye tâa e rii tiriici, nikin de dàara ni kîrnga num mbâra, num mgbirgumya înuwan narrdi, sàar maan àye dèy. De gèlu di kîrnga, de tuusurra num maan a hay di Yeesu. ⁴ A nit ây kana a tîim waw de ngòl daw, de yèenjin: Ngam jâ mboysifa num mgbirgumya gi ya? ⁵ Num yey gesi ngin aw sàani kurra ra taan, aw hîi da nit èca ây. De kpânuwan di kin maan. ⁶ Amma Yeesu de gàa daw: Woowan di kini gi e mbiri. Ngam jâ yèergu un ya? Jàk mbâri mbirimda. ⁷ Ngam nit èca ây aw dii a tîim wun unji pî. Un yiɗi go, gun tèe daw mbâri koo mgbàr hâ. Amma miy gim tâanji ni un unji pî ba. ⁸ Kin yey tèe jày mbine ey. Fingjimdage num mgbirgumya gi a is mum, ha e mbangsim a siptunum mum. ⁹ Takundi mi gàanurre, koo u hâ gaw sak Yèk Kâwrra a deesi gi pî, kà gaw kàl ɗa jày mbire kin yey ngam aw ɓaysunuwa. ¹⁰ Yuda Iskariyo, nirri kpolo a tîim lor ta Yeesu ra sàm cuk, de dige kàlla da nit ɓèl ta waw da nit daprum ây, e hîi daw Yeesu a kàn waw. ¹¹ Ye ragin hûy, del dawge. De gàawan hîi gaw hîiw seede. Yuda kàme ot mbâra ha e hîi daw Yeesu a kàn waw. ¹² A ɗaarra daprum tàarri njàngna cen, unji gûurra hàm mgbâay ngam daprum Paska, a lor ta Yeesu de gunuwan: U hâ yiɗumu ot dik, ot mbangsi a gin gum rii tiriit Paska ya? ¹³ Yeesu de tèe da lor ta wàa cuk, de gàa daw: Tayin a riiy ɓèl gi, a farra kpàa gun kpàanji ni nirri tokrarre jòong sòo. Furruwan di nit maan. ¹⁴ A àay yey ge lek gi, gàawan di nit àay maan: Nitkàlnjum gunguma: U hâ tâa gin riirra tiriit Paska ni lor ta mum ya? ¹⁵ Ey kà ge kàlnunu minjum àay woy ’mitiya u fay, mbangsumya ni gin tâam ây pî. A farra gun mbangsi dot gin riirra tiriit Paska. ¹⁶ A lor ta wàa nà de tayin de legin a riiy ɓèl, de kpàan jày pî kà yey gàa daw Yeesu gi. De mbangsin tiriit Paska a farra. ¹⁷ Ye cii mbona, Yeesu ni lor ta wàa ra sàm cuk de digin a àay maan. ¹⁸ Ye tâan aw rii tiriici, Yeesu de gàa daw: Takundi mi gàanurre, nirri kpolo a tîim wun riinjina tiriici gi mòo ge mòom ni gâra. ¹⁹ Tinîiri de ày daw da lor ta wàa, de gunuwan kpolo kpolo: Dim gàa muy yi? ²⁰ Yeesu de goosi de gàa daw: Nirri kpolo ɗi a tîim wun ra sàm cuk, bûuge tàarri e atni nàam a sek kpolo ni miy. ²¹ Hàm nirri wu ge wut kà yey tâa yèk hak wàa kètiya a defterre Fay gi. Amma ’màari waawrre di nit yey ge mòow di Hàm nirri ni gâra gi. Hò ge hòmu ngin della di nit maan, to aw kpàaw go ngin ba. ²² A ye riin gi, Yeesu de arre tàarri de gàa mbew di Fay, de cèenje de hîi da lor ta wàa, de gàa daw: Arrin! Yey tâage is mum gi. ²³ De arre ɗa kop ni jàk njoorray, de gàa mbew di Fay, de hîi daw. Aw pî aw njooye. ²⁴ De gàa daw: Yey tâage njîim mum, njîim raknjunum nit ây ni Fay, ge tuu ngam nit ây dèy. ²⁵ Takundi mi gàanurre, gim njoosirra sòo repta timgbokcum gi niyey ba, ha mgbàr yey gim njoo woy fûuya a wûun Fay. ²⁶ A dat maan de kâan ndûu ’misunum nîir Fay. De yuun de tayin a gopri korrom. ²⁷ Yeesu de gàa da lor ta wàa: Un pî mgbò gun mgbòl ngam mum un woomfa. Ngam dii kètiya a defterre Fay: Ɓà gim ɓàru di hàm faaci, a mgbâay ây ye gaw yeski a cewci pî. ²⁸ Amma a dat ye gim gûysi a wurra gi, ɗàa gim ɗàanu dikta a dees Galile. ²⁹ Piyèr de gàaw: Koo aw pî aw mgbòl go aw woomfa gi, miy gim mgbòl ba. ³⁰ Yeesu de goosu: Takundi mi gàamde, ni tuma yey ɗoko tigòmja e bim nak cuk, muy hà gum hàlim nak taan. ³¹ Amma Piyèr yèesirra ɓàng de gàa: Koo kpèrrim go ot wutnji ni muy, gim hàlum ba sam. Hû go gàawan a lor ta wàa pî. ³² Aw kpèrre a gin înin Gecemane. Yeesu de gàa da lor ta wàa: Tâan ay gi, mi dik mi waara Fay. ³³ De arre Piyèr, ni Yakuba, ni Yuhanna. De ɗaaw kpulla jungci isi di Yeesu, de taaw tinîiri. ³⁴ De gàa daw: Tinîiri àyimde, yiɗi e ɓàrimi. Tâan ay gi, waatin! ³⁵ De dige a ɗàm kpeesi càa, de ûu a deesi e waa Fay. De gàa, nge àyrra mgbàr yey e hòm e woomi, to ge tâa go. ³⁶ De gàa bak: Too mum, a gin wey jày pî mbi ge mbiri. Arrimfa kop ’màar yey. Amma mbir kày yiɗum muy, naa kày yiɗi miy ³⁷ Yeesu de ira a gin lor ta wàa taan nà. De kpàa daw aw kûurre. De gàaw di Piyèr: Simon, mu kûurre yi? Koo njamdi kpolo mu kpàaw waanjum ni miy ba yi? ³⁸ Mûyin, waan Fay, ngam ta un lek a jàk rûfta ba. Takundi, tinîir nirri yiɗi goosum, amma is wàa dàngge. ³⁹ Yeesu de tayse, de waa Fay kà yey waa mgban nà. ⁴⁰ De isa a gin lor ta wàa. De kpàa daw aw kûurre bak. Nistikûum bûri daw nisi dèy, aw cèngni jày gaw goosu ba. ⁴¹ A ye isa nak taanti, de gàa daw: Ha yey un kûurre bak un wuysirre yi? Gerre kan! Saa’i kpèrre, e rri yey gaw hîiw di Hàm nirri a kàn nit makta ây. ⁴² Anin ot tay! E rri yey nit mòorra mum ni gâra hèera gaarra. ⁴³ Yeesu a ye yèe bak, Yuda nirri kpolo a tîim lor ta wàa ra sàm cuk nà, de kpèrran ni nit ây dèy. Aw dii ni ɓet ɓèl, ni suu ây. Aw ana a gin nit ɓèl ta waw da nit daprum ây, ni nit còycum ây, ni toonji ây. ⁴⁴ Yuda nit mòorra Yeesu ni gâra, raknjige ni nit ây e ii daw ticèngsunum, gàaye: Nit yey gim kabu gi ey ɗi. Mòowan, un ’maaw ni faacu. ⁴⁵ De hèewrra yaale di Yeesu, de gàaw: Soko, Nitkàlnjum! De kabuwa. ⁴⁶ A nit ây de yaawrran gbi di Yeesu, de mòowan. ⁴⁷ Nirri kpolo a tîim nit ây gòyge a farra, de nduu ɓet ɓèl, de njaa tuk nit tèem wàa di nit ɓèl daprum. ⁴⁸ Yeesu de gàa da nit ây mòogu gi: Kay, un dàara ni ɓet ɓèl ni suu ây, un mòom kà nit ngorgum jày! ⁴⁹ Unji pî mi tâarre nà a tîim wun, waam mi kàlnji nà a àay Fay, un mòom ba. Amma mbire kà yey ngam e gbèe jày gàa a defterre Fay. ⁵⁰ A lor ta wàa pî de woowfan, aw ɗul aw ’nòo. ⁵¹ Lor kana furru di Yeesu, butɗe godo gbè a is wàa. De mòowan. ⁵² De woowrra daw godo wàa, de ’nòo isi kpong. ⁵³ Aw ’maawe di Yeesu a àay nit ɓèl daprum. A nit còycum ây, ni toonji ây, ni nit ɓèl ta waw da nit daprum ây ɗa aw kimji a farra. ⁵⁴ Piyèr futfa dawrre kpâarriya, ha de lege a ɓeeri àay maan. De tâanji ni lor ây e aw ebi. ⁵⁵ A nit ɓèl ta waw da nit daprum ây, ni nit raknjum ây pî aw kàme yèk seedamku a hak Yeesu, ha aw yaanu a kiita wurra, amma aw kpàa kà yiɗin ba. ⁵⁶ A nit ây dèy aw ’maara yèk seedamku rèeng a hak Yeesu, amma yèk waw ti getnji ba. ⁵⁷ A nit ây kana de anin aw seedi yèk rèeng a hak wàa, de gàan: ⁵⁸ Ot rage ey gàaye: Aa gim aasifa àay Fay jâan nit ây ni kàn gi. Jâa gim jâasi woy kana unji taan, ge tâa jâarra ni kàn nirri ba. ⁵⁹ Koo a yèk yey ɗa seedamku waw ti raknji ba. ⁶⁰ Nit ɓèl daprum de ane kat, de gòye a tîim nit ây, de gàaw di Yeesu: Gum ɓoo mu goosi koo jâ a yèk ây ’maaran a hak wey ba yi? ⁶¹ Amma Yeesu de tâa baak baak, ti ɓoo koo jâ ba. Nit ɓèl daprum de gunu bak: Muy tâage Kristu Hàm Fay yi? ⁶² Yeesu de goose: Miy ɗi. Un ra gun rap Hàm nirri tâarre a riina Fak mbinum. Ra gun rabu ɗa dàararre ni titurum. ⁶³ De ngòlu di nit ɓèl daprum, de ngase lurra wàa de gàa: Ji got kàm nit seedum ây bak ya? ⁶⁴ Un rage kày maase nîir Fay. Ji dànnu ya? Aw pî aw taanuge a kiita wurra, de gàan: Gerre ɓàta! ⁶⁵ A nit ây kana de yîmurran ticèkti di Yeesu, de burruwan nisi, de cubuwan de gàawan: Lòni nit yey mbirgum gi! A lor ây a àay kiita de mòowan, de lòsuwan. ⁶⁶ Piyèr dii a ɓeeri. Sapri tèerra tèem di nit ɓèl daprum de dàara. ⁶⁷ A ye rabu di Piyèr awrre ebi, de gobu teng teng de gàaw: Muy ɗa mu tâanjirre nà ni Yeesu ni-Nasaret! ⁶⁸ Amma Piyèr de hàle de gàa: Mi cèngni ba, mi rak jày gàam gi ba. De yuu a gbaa. ⁶⁹ Amma sapri tèerra tèem nà de gopsu bak, de gàa da nit ây gòyge a farra: Ey nirri kpolo ɗi a tîim nit ta Yeesu! ⁷⁰ Piyèr de hàlsirra bak. A dat maan càa, a nit ây gòyge a farra de gàawan: Takundi, muy mu nirri kpolo ɗi a tîim waw, ngam muy mu ana a Galile. ⁷¹ Amma Piyèr de gàa: Mi hàa ni hàacu, jày e ɓàrimi, mi cèngnu di nit yey gàanu gi ba! ⁷² A ye gbèese yèerra, tigòmja de bime nak cukti. Piyèr de ɓayse kày gàaw nà Yeesu gi: Ɗoko tigòmja e bim nak cuk, muy hà gum hàlim nak taan. De ume ti umni àyrriya.

¹ Ndamji ye kayge gi, a nit ɓèl ta waw da nit daprum ây de yèenjin ni toonji ây, ni nit còycum ây, ni nit raknjum ây kana pî. De ’mèmin Yeesu, de ’maawan aw hîiw a kàn Pilatu. ² Pilatu de gunu: Muy tâage wûun ni-Yude ây yi? De goosi de gàaw: Hû go gàa muy. ³ A nit ɓèl ta waw da nit daprum ây de ’maaran yèk ây dèy a hak Yeesu. ⁴ Pilatu de gunsu bak: Gum ɓoo koo jâ ba yi? ⁵ Amma Yeesu ti goosi koo jâ ba, ha de tâaw ’nang di Pilatu. ⁶ A daprum Paska pî Pilatu hû waa e yuuni nit kulkultuma kpolo, yey waasin a nit ây gi. ⁷ Nirri kpolo dii a kultuma, nîir wàa Barabba, ni nit ɗàar ây, ngam aw ɓàre nà nirri a ɗàar waw. ⁸ Mûsa nit ây de naan a àay Pilatu. De ɗaan waarra e mbir daw kà woy mgban. ⁹ Pilatu de gun daw: Un yiɗi mi woonu wûun ni-Yude ây yi? ¹⁰ Gun daw kà yey ngam cèngnige, a nit ɓèl ta waw da nit daprum ây aw hîiwe di Yeesu a kàn wàa yèk ngèeri gbè. ¹¹ Amma a nit ɓèl ta waw da nit daprum ây de kpèwsin mûsa nit ây, ha aw waa e woo daw Barabba. ¹² Pilatu de gun daw: Ji yiɗunu mi mbiru di nit yey ’naasunu wûun ni-Yude ây ya? ¹³ De bimin de gàan: Gbalu a minjum kpiiri! ¹⁴ De gàa daw: Maarra ji mbire ya? Amma a nit ây de iisirran bimda de gàan: Gbalu a minjum kpiiri! ¹⁵ Pilatu yiɗi mbita jày ge del daw da nit ây, de woo daw Barabba. A sooje ây de lurruwan di Yeesu ni timbii. Pilatu de hîi daw aw gbalu a minjum kpiiri. ¹⁶ A sooje ây de ’maan Yeesu a ɓeeri ɓèl a gin tâam wûun. De kimjan mûsa sooje ây pî. ¹⁷ De mgbapsuwan di Yeesu lurra cal. De arrin cikci aw yuu tikangni hay, de iiwrran. ¹⁸ De ɗaan kèpta kèpri de gàan: Soko, wûun ni-Yude ây! ¹⁹ De lurruwan ni suu a hay, de yîmurran ticèkti. De gbâygin a ɗàm kpees wàa, mu gàa coo coowan. ²⁰ Ye wâskuwan hû go, de borruwan lurra cal nà, de mgbapsusurran lurra wàa. De yuunuwan, de ’maawan ngam ha aw gbalu a minjum kpiiri. ²¹ De kpàanjin ni nirri koyrarre a hèmna, nîir wàa Simon ni-Kirene, too waw da Aleksanda ni Rufu. De ndaguwan e tokfa minjum kpiir Yeesu. ²² Aw ’maa di Yeesu a gin înuwan Golgata, kà gàarra gin sek hay. ²³ Aw yiɗi aw njoosu mbàl jamjumya ni ticèeri, ngam ta e àyu dèy ba. Amma ey hàwe njoorra. ²⁴ De gbaluwan a fak minjum kpiiri. De haan saasa a lurra ta wàa, ngam cèngnum wun ge kpàa go lurra maan gi. ²⁵ A naarra unji a sooje ây de gbaluwan di Yeesu a fak minjum kpiiri. ²⁶ Aw kère yèk hak wàa a fak minjum kpiiri nà kà yey: Wûun ni-Yude ây. ²⁷ De gbalnjuwan ni nit ây cuk, nit ngorgum jàk ây, kpolo a cewci riina, kpolo a cewci mgbaala. ( ²⁸ Tâa kà yey ngam ha e gbèe jày gàa nà a defterre Fay: Aw saguge a tîim nit tèem makta ây.) ²⁹ A nit hòmda ây a farra de ɓòtin hay, de kiruwan de gàan: Kayto, muy mu nit yey gàage, aa gum aasifa àay Fay mu jâasi unji taan, ³⁰ saani hak wey, mu cir a minjum kpiiri gi! ³¹ Kà yey ɗa a nit ɓèl ta waw da nit daprum ây, ni nit còycum ây wâskuwan de gàan: Ey saanige nit ây kana, ge kpàaw saanum hak wàa ba yi? ³² To ey tâage go Kristu wûun ni-Israyel ây, sey e cir kòsòng a minjum kpiiri, ngam ha ot rabu ot goosuwa! A nit ây gbalnjin ni ey ɗa aw njàmruge. ³³ Kulpi ii a deesi pî diga unji a tîim hay ha unji mbona. ³⁴ A unji mbona Yeesu bime ni tibimni ɓèl, de gàa: Eloyi eloyi lama sabaktani, kà gàarra Fak mum Fak mum, ngam jâ woomfa dim ya? ³⁵ A nit ây kana a tîim nit ây gòyge a farra ye ragin kà yey, de gàan: Raksin, ’naasirre Eliya! ³⁶ Nirri kpolo a tîim waw de ’nòo, de bûura ndàksi jày a mgbewnji mbàl, de ii a samsi. De hîiw di Yeesu ha e sûu. De gàa: Dàan ot raptuwa to Eliya dàa ge dàara go, e cinu a minjum kpiiri gi. ³⁷ Yeesu de bime ni tibimni ɓàng, de woofa yîngda de wurre. ³⁸ Jimda jàk joorra woy minjum a àay Fay ngarre a tîim, diga u fay ha u furi. ³⁹ Nit ɓèl waw da sooje ây gòyge a ɗàm kpees Yeesu gi ye rabe kày wurre, de gàa: Takundi, nit yey Hàm Fay ɗi! ⁴⁰ A nikin ây ɗa aw gòyrre a farra kpâarriya. Aw gopɗe. A tîim waw aw dii Mariya sàni-Magdala, ni Salome, ni Mariya nuu wàa di Yakuba woy kaa, ni Yose. ⁴¹ A nikin ây gi aw furru nà di Yeesu, aw tèewrra tèem mgbaanjum ye tâa nà a Galile gi. A nikin ây kana dèy aw naanjige ni Yeesu a Yerusalem. ⁴² Mbona ciiye. Tâa mgbàr mbangsum unji wuysum ni-Yude ây. ⁴³ Yosef ni-Arimatiya de dàara. Ey nit raknjum wûun ɗi, aw coowrre, waarre a wûun Fay. De mòo tinîiri de lege a gin Pilatu. De waaw is Yeesu. ⁴⁴ De tâaw ’nang di Pilatu ye rage, Yeesu wurre gi. De ’naase nit ɓèl waw da sooje ây. De gunu to Yeesu wut go diga mgban. ⁴⁵ Ye rage yèk nit ɓèl waw da sooje ây nà, de woow orri di Yosef e cini is Yeesu. ⁴⁶ Yosef de sàa jàk joorra woy ɓèl burriya. De cini is Yeesu a minjum kpiiri. De forgu ni jàk joorra nà. De iiw a mîis gebi cèerriya a kpata. De kiwsa gòok ɓèl, e kuptini nin gebi. ⁴⁷ Mariya sàni-Magdala, ni Mariya nuu wàa di Yose ɗa aw gobe a gin iiwan gi.

¹ Ye tâa unji wuysum ni-Yude ây hòme, Mariya sàni-Magdala, ni Salome, ni Mariya nuu wàa di Yakuba de sàan num mgbirgumya, ngam ha aw dik aw fingjurra a is Yeesu ni ndamji. ² Ni ndamji birit a dat unji wuysum, mgbàr màrra a asaweerre, aw dige a gebi. Unji ɓarrarre. ³ De gunjin a tîim waw: Wun ge kiwsifa dot gòok ɓèl a nin gebi gi ya? ⁴ Ngam gòok maan ’mirre dèy. De gobin, de kpàan, gòok ɓèl nà kiwrige mgban. ⁵ De cirin a gebi. De rabin hàm lori tâarre ton a cewci riina waw. Ey mgbapɗe lurra ɓèl burriya. De kpul daw jungci isi, de tolin. ⁶ De gàa daw: Ta un tol ba! Un kàmde Yeesu ni-Nasaret nit yey gbaluwan a minjum kpiiri gi. Ti cenda ay ba, gûysige. Gobin e rri yey a gin iiwan nà. ⁷ Amma digin un kàl yèk yey da lor ta wàa hayye di Piyèr. Yeesu ɗàa ge ɗàanu dikta a dees Galile. A farra kpàa gun kpàawa kà yey gàanu nà mgban. ⁸ De yuun kènu a gebi de ’nòon. Aw malle, tinîir waw taarre. Aw kàl koo jâ di nirri ba, ngam aw tole. ( ⁹ Yeesu ye gûyse, de lòrrurra di Mariya sàni-Magdala ni ndamji a dat unji wuysum. Yeesu yuunu nà mgban tindòom ây jòròs. ¹⁰ Mariya de dige e sak daw da nit ây tâanji nà ni ey. De kpàa daw aw dii ni ngòlnji, aw umrirre. ¹¹ Amma ye ragin Yeesu gûysige, Mariya rabuge, aw ngor ba. ¹² A dat maan Yeesu lòtɗa dawge da lor ta wàa cuk ni is kana ’nang, a ye tâan a orri aw dikɗe a riiy kaa gi. ¹³ De iran aw sak yèk maan da nit ây kana. Amma aw ɗa aw ngor ba. ¹⁴ A gbèeni de lòtɗa daw da lor ta wàa ra sàm kpolo a ye riin tiriici. De yèe daw ngam èca goosum waw. De yèe daw ɗa ngam tinîir waw ndège, ngam aw ngor yèk nit ây rapku a dat gûysum ba. ¹⁵ De gàa daw: Digin a gin nit ây a deesi lang, sagin Yèk Kâwrra koo di wuna. ¹⁶ Nit yey goosu di Fay, ngorge baptisma gi, kpàa ge kpàa saarra. Amma nit yey hàwge goosum, kiita Fay mòo ge mòowa. ¹⁷ E rri yey kayeefi ây gaw mbir a nit ây goose gi: Yuu gaw yuuni tindòom ây ni nîir mum, yèe gaw yèe ni yèk fûuya ’nang ’nang. ¹⁸ Aw mòo go jòoy ni kàn, aw njoo go jàk tiwurra, ge mbir daw koo jâ ba. Ba gaw bangda daw kàn da nit àyci ây ha aw ndòosi daw. ¹⁹ Yeesu Nitcoorra ye gbèesi yèerra hû go, de naase a faktiturum e tâa a riina Fay. ²⁰ A lor ta wàa de tayin, de sagin Yèk Kâwrra koo u hâ. Nitcoorra ngaa tèenjirre ni aw, gòynirre sakta yèk waw ni lònum jàk kayeefi ây ɗa.)