Luka

Luka

¹ Mi kèbumfarre Tewfil, nit ɓèl mum. A nit ây dèy aw ɗaa kèta jày mbirge a tîim worro. ² Aw kère yèk maan kà yey saknan a nit ây rapku diga ɗaarra, tâage nit sakta Yèk Kâwrra gi. ³ Hû go Tewfil nit mbâri, miy ngaa mi dàne, dele mi kèrumfa kà yey futnje yèk maan, a dat ye cèngnim jày pî ni orrey, ⁴ ngam ha mu cèngni takundi a yèk yey kàlum aw nà mgban. ⁵ Mgbàr maan Herode tâa wûun a dees Yude. Nit daprum kana a àay Fay dii a tîim ni-Abiya ây, nîir wàa Jakariya. Kin wàa ana a yòot Aarong, nîir wàa Elisabet. ⁶ Aw ɗa cuk a nit gòyrra ây ɗèm ɗi a ɗàm kpees Fay, aw futɗe yèk mgbèngda Tooy Ɓèl pî mbâriya. ⁷ Amma aw cen ni hàm ba, ngam Elisabet nduri ɗi. Aw ɗa cuk aw wàrfige. ⁸ Unji daprum wàa di Jakariya kpèrre, ha e dapri a ɗàm kpees Fay. ⁹ Kà hàar waw da nit daprum ây ey lòtke a saasa, ngam e lek a àay Fay e gurfi jàk gurfum. ¹⁰ Mûsa nit ây pî aw waarre Fay a gbaa, a ye gurfe jàk gurfum. ¹¹ Malayka Fay de lòrrurra di Jakariya, de gòye a cewci riina a gin gûurra jàk gurfum. ¹² Jakariya ye raptu gi, jungci isi de kpuluwa, tolnji de mòowa. ¹³ Malayka de gàaw: Jakariya, ta mu tol ba, ngam Fay ngore waar wey. Kin wey Elisabet kpàa ge kpàa hàm nihun, mu înu nîir wàa Yuhanna. ¹⁴ Yèk yey ge kâwsum, ge ɗòtkum tinîiri. Kpàarra hàm yey kâ ge kâwsi tinîir nit ây dèy. ¹⁵ Ngam hàm yey tâa ge tâa nit ɓèl a ɗàm kpees Fay. Ge njoo mbàl ni jàk râmda ba. Mûu ge mûu ni Jungci Delliya diga mbengsi wàa. ¹⁶ I ge insa da ni-Israyel ây dèy a gin Tooy Ɓèl Fak waw. ¹⁷ Di ge dik a ɗàm kpees Fay ni jungci ni mbinum kà Eliya, ngam e raknjisi hàm ây ni too rra waw. E insa da nit hàanjum ây ha aw dàn kà nit gòyrra ây ɗèm, ngam e mbangsi tinîir nit ây ha aw hèerra gaarra a gin Nitcoorra. ¹⁸ Jakariya de gàaw di malayka: Kà gim cèngni, yèk yey takundi ɗi go ya? Ngam mi wàrfige, kin mum ɗa dii ni yeri dèy. ¹⁹ De goosi de gàaw: Miy tâage Gabriyel gòyge a ɗàm kpees Fay. Ey tèegima ha mi ’maamra yèk kâwrra yey. ²⁰ Ye tâa mu ngor yèk mum ba yey ge gbèe a unji kana, tâa gum tâa muukaw, gum kpàa yèerra ba ha mgbàr yey ge gbèe jàk maan gi. ²¹ A nit ây aw waawrre a gbaa di Jakariya. De tâa daw ’nang, ngam ey tòora yuurra a àay Fay. ²² Ye yuura gi, ti kpàawrre yèerra ba. A nit ây de dànin, jày lòrrurrage a àay Fay. Ey yèe dawrre ni kàn, ngam ire muukaw. ²³ Unji tèem wàa di Jakariya ye gbèe a àay Fay, de koye. ²⁴ A dat maan càa kin wàa Elisabet de ii himni. De fûu corri kèrèw a àay, de gàa: ²⁵ E rri yey jày tèe Tooy Ɓèl. Ey gobim a mgbàr yey, ye arrimfa wâskum nit ây a hak mum gi. ²⁶ Cot yiti ye hòme, Fay de tèera Gabriyel malayka a Nasaret a dees Galile, ²⁷ a gin sapri înuwan Mariya, ûsuwan di lor kana a yòot Dawda, nîir wàa Yosef. ²⁸ Malayka de lege a gin Mariya de gàaw: Kâwsi tinîir wey, ngam Fay hîime mbâri, tâanjirre ni muy! ²⁹ Jungci isi de kpulu di Mariya a yèk yey. De dàne a kèpri yey jày yiɗi gàarra gi. ³⁰ Malayka de gàaw: Mariya, ta mu tol ba, ngam mu kpàa mbâr Fay. ³¹ Ii gum ii himni, mu kpàa hàm nihun mu înu nîir wàa Yeesu. ³² Tâa ge tâa nit ɓèl, aw înu Hàm wàa di Fay tâage a faktitola. Fay Tooy Ɓèl ii ge iiw a gbaat wûun wosom wàa Dawda. ³³ Tâa ge tâa wûun ɓèl a yòot Yakob tâam timgbàri. Wûun wàa ge lòo ba. ³⁴ Mariya de gàaw di malayka: Kà ge tâa jàk yey ya? Ngam mi ɗà mi cèngni is nihun ba. ³⁵ Malayka de goosu: Jungci Delliya dàa ge dàara a gin wey, Fay tâage a faktitola ɗa tèe ge tèera mbinum wàa a gin wey. Hû go hàm yey gum kpàa gi ’naa gaw ’naasu Hàm Fay. ³⁶ E rri yey Elisabet kor wey ii himni a wàrfi wàa, cot yiti wàa ɗi yey. Kin maan ’naasuwan mgban nduri gi. ³⁷ Cen jày ge hòmu di Fay tâa ge kpàaw mbita ba. ³⁸ Mariya de gàaw: Mi sàay Tooy Ɓèl ɗi. Sey e mbir kà yey gàa gi. Malayka de taye e woowa. ³⁹ A dat maan Mariya de ane, de dige digèrrige a riiy cewci gopri a dees Yude. ⁴⁰ De lege a àay Jakariya, de kèbu di Elisabet. ⁴¹ Elisabet ye rage gûn Mariya, hàm de yûu a mîis himni wàa. Tinîir wàa di Elisabet mûu ni Jungci Delliya, ⁴² de bime ɓàng de gàa: Fay mbârsumge a tîim nikin ây mbâr yey ge taaw di hàm himni wey gum kpàa gi. ⁴³ Miy mi ji rri, ha nuu wàa di Nitcoorra mum e dàara a gin mum ya? ⁴⁴ Ngam ye rakmi gûn wey a tuk mum, hàm sii ni dellum a himni mum. ⁴⁵ Kâwum dii agin wey, ngam muy mu goosige jàk yey gàa Tooy Ɓèl gi ge mbiri. ⁴⁶ Mariya de gàa: Mgbel yèk mum ’misirre nîir Tooy Ɓèl. ⁴⁷ Tinîir mum ngaa kâwrimde a gin Fay, Tooy saanum mum. ⁴⁸ Ngam ey ina nisi, gobim dim mi sàay wàa. A yòot nit ây pî gàa gaw gàam mi kpàa mbâri. ⁴⁹ Fak mbinum tèemda tèem ɓèl, nîir wàa delliya. ⁵⁰ Mbâr wàa dii a gin nit ây tolgu gi diga wor waynji ha wor waynji. ⁵¹ Tèeye tèem mbinum ni kàn wàa, yeskini da nit ây ’misi hak waw gi. ⁵² Fay cinifa daw da nit ɓèl ây a gin tâam waw, ey aanji da nit ây ûuni hak waw, ii daw a gin tâam ɓèl. ⁵³ Olsi da nit fek ây ni mbâri, woo da nit bèeb ây kàn kpong. ⁵⁴ Mgbaanji da lor ta wàa ni-Israyel ây, ngam ɓaysige tèem mbâr wàa, ⁵⁵ kà yey yèe nà mgban ni wosom worro Abraham, ni yòot wàa. Yèk maan tâa ge tâa koo ningàa. ⁵⁶ Mariya tâanji ni Elisabet corri taan. De koyse a gbaa wàa. ⁵⁷ Unji ciisum Elisabet ye kpèrre, de kpàa hàm nihun. ⁵⁸ A nit tâanjum ta wàa ni kor ta wàa ye ragin, nge Fay tèe tèem ɓèl ni mbâr wàa a gin Elisabet, de kâwsin tinîir waw ni ey. ⁵⁹ Ye kpèrre unji nan nan, de digin aw rrèpnu di hàm. De yiɗin aw înu Jakariya, nîir too wàa. ⁶⁰ Amma nuu wàa de gàa: Ge tâa hû go ba, Yuhanna gun înuwa. ⁶¹ De gàawan: Cen nirri a tîim kor ta wey înuwan nîir yey ba. ⁶² De yèewan di too wàa ni kàn, kà yiɗe e înu nîir hàm ya. ⁶³ De gune aw ’maawra gin kèta, de kère: Nîir wàa Yuhanna. De tâa daw ’nang da nit ây pî. ⁶⁴ Kòsòng jày cîigu rèeng wàa di Jakariya patige, de yèese yèy, de ’mise nîir Fay. ⁶⁵ Tolnji de mòo daw da nit tâanjum ta wàa pî. Yèk yey yeskige a cewci gopri a dees Yude lang. ⁶⁶ A nit ây pî rake yèk maan, de dànin a tinîir waw de gàan: Mbinum hàm yey kà ge tâa ya? Ngam aw rapti kàn Tooy Ɓèl dii ni ey. ⁶⁷ Jakariya too wàa di hàm mûu ni Jungci Delliya. De lòni yèy de gàa: ⁶⁸ ’Misin nîir Tooy Ɓèl, Fak ni-Israyel ây! Ey ina nis wàa a gin nit ta wàa, sàasi dawge. ⁶⁹ Ey hîina nit saanum ni mbinum a yòot Dawda, sàay wàa, ⁷⁰ kà yey yèe nà diga mgban ni mgbelyèk nit lònum ta wàa. ⁷¹ Gàa kà yey, ha ot saa a gin nit bàpri ta worro, ni a kàn nit yiir ta worro pî. ⁷² Hû go kàlnige mbâr wàa a gin wosom ta worro, ɓaysige yèk raknjum wàa delliya ni aw, ⁷³ ngam hàa nà ni tihàani a gin Abraham wosom worro, ⁷⁴ pa ge patina a kàn nit bàpri ta worro, e hîina orri ot dapru tolnji cen, ⁷⁵ ni tinîir burriya, ni gòyrra ɗèm a ɗàm kpees wàa a unji gûyrra worro lang. ⁷⁶ Muy mu hàm yey ’naa gaw ’naasum nit lònum yèk Fay tâage a faktitola, ngam di gum dik a ɗàm kpees Nitcoorra, mu mbangsi ot wàa. ⁷⁷ Mu kàl daw da nit ta wàa, ge saani daw, e yaafi daw jàk maarra waw. ⁷⁸ Ngam Fak worro mûu ni mbâri, ni ’maton. Ey hîina kayngum kà ɓata unji a faktitola, ⁷⁹ ha e kayngi da nit ây tâage a kulpi, ni nit ây mòo daw tolnji wurra, ha e mòonina a ot mbâri. ⁸⁰ Hàm maan ’mirre, iisirra còycum a jungci wàa. Dii a nûri ha a unji lòta wàa a gin ni-Israyel ây.

¹ Mgbàr maan Kaysara Agustu hîi orri ngam kèta nîir nit ây a dees wàa lang. ² Kèta maan ɗaage màrra. Mbire a yer Kireniyu ye tâa ngomna a Siriya. ³ A nit ây pî de anin aw dik kèta nîir waw, koo wuna a riiy wàa. ⁴ Nit kana nîir wàa Yosef ɗa ane a Nasaret a dees Galile, de taye a Baytilam a dees Yude. Riiy maan tâage riiy Dawda, Yosef ana a yòot wàa. ⁵ De dige kèta nîir wàa ni Mariya maanji wàa ûri, iige himni gi. ⁶ Ye tâan a Baytilam, unji kpàarra hàm gerre. ⁷ Mariya de ciise hàm nihun màrra. De foru ni jàk joorra, de iiw kpu a tumna tikukri, ngam aw kpàa gin tâam a àay cita ni-wooy ây ba. ⁸ A hàm faat ây aw dii a dees maan. Aw waatirre tikukri waw ni tuma a nûri. ⁹ E rri yey malayka Fay lòtɗa dawge. Kayang Fay ni ’mita wàa mgbaa dawrre. De tolin dèy. ¹⁰ Malayka de gàa daw: Ta un tol ba! Ngam mi ’maara dun yèk kâwrra dèy mi kàlnu, kâ ge kâwsi tinîir nit ây pî: ¹¹ Unji yey kpàan Nitsaanum a riiy Dawda. Ey tâage Kristu Nitcoorra. ¹² E rri yey kày gun cèngni: Kpàa gun kpàaw hàm bengsi ni focu a jàk joorra kpu a tumna. ¹³ Yooge yooge mûsa malayka ây de lòrran ɗa a faktiturum, de mgbaawan di malayka yey yèegi daw da hàm faat ây gi, de ’misin nîir Fay de gàan: ¹⁴ ’Mita dii a gin Fay a faktitola, tâam mbâri dii a deesi da nit ây yiɗe gi. ¹⁵ A malayka ây ye naasin a faktiturum, woon daw da hàm faat ây gi, de yèenjin a tîim waw de gàan: Dàan ot dik a Baytilam, ot gop jàk yey mbirge gi, kàlna Fay. ¹⁶ De digin digèrrige, de kpàan di Mariya, ni Yosef, ni hàm bengsi kpu a tumna. ¹⁷ Ye rabin di hàm, de sagin da nit ây yèk yey kàl daw malayka a hak hàm nà. ¹⁸ Tâa daw ’nang da nit rakta ây pî a jàk yey sagin daw a hàm faat ây. ¹⁹ Mariya mòo yèk yey pî a tinîir wàa, dànde a yèk maan. ²⁰ A hàm faat ây de koyin. De ’misin Fay, de coon nîir wàa a jàk yey ragin, ni jàk yey raptin gi ɗa. Ngam jàk maan mbire pî kà yey kàl daw malayka. ²¹ Ye kpèrre unji nan nan, unji rrèpnum hàm gerre, de înin nîir wàa Yeesu. Nîir maan malayka kàlgu nà di nuu wàa, ye tâa ɗà fûru ba. ²² Mgbàr ɓetkunum waw ye gbèeye, kà yey gàa a yèk mgbèngda Muusa, Yosef ni Mariya de ’maan hàm a àay Fay a Yerusalem, aw kàlnu a ɗàm kpees Fay. ²³ Ngam dii kètiya a yèk mgbèngda Fay: Aw kpàa go hàm nihun ây màrra, sey aw în daw hàm della ta wàa di Fay. ²⁴ De hîin ɗa jàk gurfum, dii kà yey gàa yèk mgbèngda Fay, tigòlkòyrra cuk toonji ni nuunji, koo gàmri tigurfi cuk. ²⁵ Nit kana dii a Yerusalem nîir wàa Simon. Ey nit mbâri ɗi ni takundi, tolle Fay, waatirre Nitsaanum ni-Israyel ây ge dàara gi. Jungci Delliya tâa ni ey. ²⁶ Jungci Delliya gàawe nà, ge wut ba sey to rap go Kristu Fay ge tèewra a deesi gi. ²⁷ Jungci paawe di Simon e dik a àay Fay. De kpàanjin a farra ni too wàa, ni nuu wàa di Yeesu. Aw ’maara hàm waw ngam aw mbir kà yey gàa a yèk mgbèngda. ²⁸ Simon de arru di hàm a kàn. De ’mise nîir Fay de gàa: ²⁹ Tooy Ɓèl, woow di sàay wey e wut ni tâam mbâri kà yey gàa yèk wey. ³⁰ Ngam nis mum rabe tèem saanum wey, ³¹ yey mbangsum a ɗàm kpees nit ây pî, ³² e tâa kayang ngam kàlnum dum Tooy Ɓèl da nit ây èege yèk wey, hîi ge hîi ’misum da nit ta wey, ni-Israyel ây. ³³ Tâa daw ’nang di too wàa ni nuu wàa a yèk yey yèe Simon a hak hàm waw. ³⁴ De mbârsi daw, de gàaw di Mariya nuu wàa di hàm: Fay carre hàm yey e tâa jàk yaanum ni jàk gòynum da ni-Israyel ây dèy, tâa ge tâa kà jàk lònum anga a gin Fay, a nit ây dèy hàa gaw hàanji. ³⁵ Mbi ge mbir e lòni jàk dànda fûurriya a tinîir nit ây. Dum ngaa Mariya, ngòlnji hàm wey baa ge baam tinîiri. ³⁶ Kin kana dii a farra, nîir wàa Anna hàm Fanuyel a yòot Aser, lònirre yèk Fay. Ey wàrfige dèy, tâanji nà ni maa wàa yeri jòròs a dat sapta wàa. ³⁷ Maa wàa ye wurre, ti wàr di maa kana ba ha kpèrre yeri ra nan nan sàm naan. Dikɗe a àay Fay koo ningàa, daprirre tuma ni unji, waarre Fay, coorre riirra tiriici. ³⁸ Ey ɗa kpèrra a saa’i maan, de ’mise nîir Fay. De yèe yèk hàm yey da nit ây waati Fay ngam e saani Yerusalem. ³⁹ Too wàa ni nuu wàa di Yeesu ye gbèen jày pî gàa a yèk mgbèngda Fay gi, de irin a Nasaret riiy waw a dees Galile. ⁴⁰ Hàm de ’mirre, de kpàa kpèw kpèw, mûu ni còycum a tinîir wàa. Mbâr Fay tâa ni ey. ⁴¹ Too wàa ni nuu wàa di Yeesu hû waan aw dik yeri pî a Yerusalem, ngam iirra daprum Paska. ⁴² Yer wàa di Yeesu ye kpèrre ra sàm cuk, de digin daprum kà yey rûun mgban. ⁴³ Daprum ye gbèeye de koyin, amma Yeesu tâa bak a Yerusalem. Too wàa ni nuu wàa aw cèngni ba. ⁴⁴ De dànin, Yeesu dii a tîim nit koyrra ây, de digin unji kpolo ha aw kàmuwa a gin kor ta waw ni nit rûunjum ây. ⁴⁵ Ye tâa aw kpàaw ba, de isin a Yerusalem, aw kàmu a farra. ⁴⁶ A dat unji taan de kpàawan a àay Fay, tâarre a tîim nit kàlnjum ây, raksi dawrre gun dawrre jày. ⁴⁷ A nit ây pî tâage a farra, de tâa daw ’nang kày cèngni jày dèy, ni goosum wàa a yèk ây. ⁴⁸ Too wàa ni nuu wàa di Yeesu ye rabuwan, de naa daw hay. Nuu wàa de gàaw: Ngam jâ mbirum dot hûy ya? E rri yey miy ni too wey ot kàmumde kè ot umi. ⁴⁹ De gàa daw: Ngam jâ kàmim un kà yey ya? Un cèngni, gerre mi tâa a àay Too mum ba yi? ⁵⁰ Aw rak jày yiɗi e yèe daw a yèk yey ba. ⁵¹ De koye ni aw a Nasaret. Rak dawrre tuy. Nuu wàa mòo yèk maan pî a tinîir wàa. ⁵² Yeesu ’mirre, iisirra còycum, kpàa mbâri a ɗàm kpees Fay ni nit ây.

¹ Jàk kana mbire a yeri ra sàm kèrèw a wûun Kaysara Tiberiyu. Pontu Pilatu tâage ngomna a dees Yude, Herode wûuni a Galile, Filip kaa wàa ngaa tâage wûun a dees Itureya ni Tarakoniti, Lisaniya ngaa wûuni a Abilene. ² Hannas ni Kayafas tâage nit ɓèl daprum ây. Mgbàr maan Fay ’naasu di Yuhanna hàm Jakariya a tîim nûri. ³ Yuhanna de ane, de gîre a cewci sîirra Yurdun pî. De kàle da nit ây: Inin tinîir wun, ngorin baptisma, ha Fay e yaafunu jàk maarra! ⁴ Hû go gbèe jày gàa a defterre Isaya nit lònum: Gûn nirri bimde a nûri: Mbangsin ot Nitcoorra, gòynin ot wàa mbâra! ⁵ Gin yengda pî sey e mûu, gopri ni kpòosi pî sey aw ciri, ot kpèerriya e tâa ti, a ot ây mboyge gi sey aw tâa ’nàpkumya! ⁶ Koo wuna ra ge rap kày ge saani Fay da nit ây. ⁷ A nit ây dèy dàaga a gin Yuhanna ngam aw ngor baptisma. De gàa daw: Un yòot jòoy gi! Wun kàlgunu, un ’nòo a kiita ngòlnji Fay ge dàara gi ya? ⁸ Mbirin jàk yey ge getnji ni inum tinîir wun! Ta un gàa kà yey ba: Orro ot yòot ta Abraham ɗi. Miy mi kàl dunde: Fay dii ni mbinum ha e ini gòok ây gi a hàm ây di Abraham. ⁹ Kòsòng lomba dii kpu a sisi futifay. Koo futifak hâ tâa ti repɗe jàk nîirra mbâri ba, njaa gaw njaafa aw ’màktifa a ebi. ¹⁰ A nit ây de gunuwan di Yuhanna de gàan: Orro kà got mbir ya? ¹¹ De goosi de gàa daw: Nirri kpàa go lurra cuk, sey e ɗòlurra kpolo di nit yey tâa ti cenu ba. Tiriici diiw go di nirri, sey e mîinji ni nit yey èege gi. ¹² A nit ngota jomorrgol ây ɗa de dàaran a gin wàa ngam aw kpàa baptisma, de gàawan: Nitkàlnjum, orro kà got mbir ya? ¹³ De goosi daw: Ta un ngor bèebi e hòm kà yey gàan dun gi ba. ¹⁴ A sooje ây de gunuwan: Orro ngaa kà got mbir ya? De gàa daw: Ta un ndagu di nirri un ngoru jày ba. Tâan ni tinîir kâwrra a bèeb tèem wun! ¹⁵ A nit ây aw waarre, aw dànde a tinîir waw, mba Yuhanna tâage go Kristu Nitsaanum. ¹⁶ De gàa da nit ây pî: Miy mi iirra dunde baptisma ni sòo gbè. Amma nit kana hòmimge mbinum dàa ge dàara. Miy mi get, mi ûu mi bot koo naan wàa ba. Ey ii ge iirra dun baptisma ni Jungci Delliya, ni ebi. ¹⁷ Mòorre tifaarunum tirri a kàn wàa, roo ge roonji yòoci ni gasa. Ha ge has yòot tirri e duk a dooy wàa. Amma gasa su ge sutfa ni eb yey tâa ge kûy ba. ¹⁸ Ni yèk kana dèy kàl daw Yuhanna Yèk Kâwrra da nit ây. ¹⁹ Yèewe di Herode wûun ni-Yude ây ɗa, ngam arre Herodiya kin kaa wàa, mbire ɗa jàk maarra ây dèy. ²⁰ Amma Herode iisirra mbita jàk maarra kana, de leknu di Yuhanna a kultuma. ²¹ A nit ây pî ye kpàan baptisma, Yeesu ɗa dàarage e ngor baptisma. Ye tâa waarre Fay, faktiturum kuplige. ²² Jungci Delliya cira a hak wàa kà tigurfi. Gûn de ana a faktiturum de gàa: Muy mu Hàm mbâr mum ɗi, mi yiɗumde. Mu kâwsimde tinîiri. ²³ Yeesu ye ɗaa tèem wàa, yer wàa kpèrre ra taan. Aw raptuge kà hàm Yosef. Yòot wosom ta wàa aw futnjirre kà yey: ²⁴ Eli, Mattas, Lewi, Melki, Yannay, Yosef, ²⁵ Mattatiya, Amos, Nahum, Esli, Nanggay, ²⁶ Mayat, Mattatiya, Semeyin, Yoseki, Yoda, ²⁷ Yowanan, Rèsa, Sorobabel, Salatiya, Nèri, ²⁸ Melki, Addi, Kosam, Elmada, Era, ²⁹ Yeesu, Eliyesa, Yorim, Mattas, Lewi, ³⁰ Simeyon, Yuda, Yosef, Yonam, Eliyakim, ³¹ Meleya, Menna, Matasa, Natan, Dawda, ³² Yessa, Yobe, Boos, Sala, Naaso, ³³ Aminadab, Adamin, Arni, Hesorom, Farès, Yuda, ³⁴ Yakob, Isak, Abraham, Tara, Nakor, ³⁵ Seruku, Ragaw, Falek, Ebera, Sala, ³⁶ Kaynam, Arfasa, Sem, Nuhu, Lamek, ³⁷ Matusala, Enoki, Yaretu, Maleliyel, Kaynam, ³⁸ Enos, Setu, Adam yey mbangsu Fay.

¹ Yeesu mûuye ni Jungci Delliya. De ira a sîirra Yurdun, Jungci de ’maaw a tîim nûri. ² Unji ra naan Seyɗan rûfurre. Yeesu ti riirre tiriici ba. A gbèerra unji ây maan fey àyuge. ³ Seyɗan de gàaw: To muy mu Hàm Fay ɗi go, gàa daw da gòok ây gi aw ir tàarri. ⁴ De goosi de gàaw: Yèk yey kètiya ɗi a defterre Fay: Nirri ge gûy ni tàarri gbè ba. ⁵ Seyɗan de naanu a fak gopri, de kàlnu mûsa wûun kparri lang nde kpolo, ⁶ de gàaw: Hîi gim hîim mbinum ni ’mita wûun yey pî. Ngam dim hîimin, miy ɗa mi hîi di nit yey yiɗim gi. ⁷ To mu gbâygi go a ɗàm kpees mum mu coomi, a jàk ây gi pî tâa gaw tâa woy wey. ⁸ Yeesu de goosi de gàaw: Gàa a defterre Fay: Di Fak wey Tooy Ɓèl dey gum gbâygi mu coowa, dey gbè gum dapri. ⁹ Seyɗan de ’maaw a Yerusalem, de gòynu a fak àay Fay, de gàaw: To muy mu Hàm Fay ɗi go, yaafa u furi, ¹⁰ ngam kètiya ɗi: Fay gàa ge gàa daw da malayka ta wey aw faam, ¹¹ to gaw togum ni kàn waw, ngam ta nak wey e mgbòl a gòoy ba. ¹² Amma Yeesu de goosi de gàaw: Kètiya ɗi ɗa: Ta mu rûfu di Fak wey Tooy Ɓèl ba. ¹³ Seyɗan ye gbèe jàk rûfrum ta wàa pî di Yeesu, de woow de taye ha mgbàr kana. ¹⁴ Yeesu isi a dees Galile, mûu ni mbinum Jungci Delliya. Yèk wàa yeskige a dees maan pî. ¹⁵ De kàlnje a àay gim kimjum ta waw. A nit ây pî aw ’misurre. ¹⁶ Yeesu dige a Nasaret, a riiy yey ’mirre gi. Kà rûurra wàa de lege a àay gim kimjum a unji wuysum. De ane e janggi defterre. ¹⁷ De hîiwan defterre Isaya nit lònum yèk Fay. De faari, de kpàaw a gin yey gàa: ¹⁸ Jungci Tooy Ɓèl dii a gin mum. Fay carrimge ngam mi sak Yèk Kâwrra da nit èca ây. Tèemige, ha mi kàl yèk njella da nit kultuma ây, ni ɓelsum nisi da nit râay ây, ngam mi ’maa da nit riirra ’màar ây a mbâri, ¹⁹ ha mi kàl yer Tooy Ɓèl ge hîi mbâr wàa. ²⁰ Yeesu de fantise defterre, de hîisu di nit tèerra tèem a àay maan, de tâa ton. A nit ây pî tâage a àay gin kimjum, de iiwan nisi di Yeesu teng teng. ²¹ De ɗaa yèerra de gàa: Yèk yey janggim gi raknu ni tuk wun, jàk maan gbèeye niyey. ²² A nit ây pî aw ’misurre. Tâa daw ’nang a yèk mbâri yey yuuga a gin wàa. De gàan: Ey tâage hàm Yosef gi ba yi? ²³ Yeesu de gàa daw: Yèe gun yèem ni yèk rèenjum yey: Nit ndòosum, ndòosi hak wey! Un yiɗi un gàam: Orro ot rage jày tèem pî a Kafernahum. Tèe kà yey ay a riiy wey ɗa! ²⁴ De iisirra yèerra de gàa: Mi kàl dunde, gaw ngoru di nit lònum yèk Fay a riiy wàa ba. ²⁵ Takundi gàami dun: A kin wurra ây aw dii dèy a dees Israyel mgbàr Eliya. Amma ye tâa yeri taan ni corri yira buun ti yaa ba, fek ɓèl ii a deesi lang, ²⁶ Fay ti tèew di Eliya a gin kin kana ba, sey a gin kin wurra a Sarepta a dees Sidon. ²⁷ A nit rak is ây ɗa aw dii dèy a dees Israyel mgbàr Elisa nit lònum yèk Fay. Amma koo nirri kpolo a tîim waw ti kpàa ndòosum àyci wàa ba, sey Nayman ni-Siriya. ²⁸ A nit ây pî tâage a àay gin kimjum ye ragin yèk yey, de ngòl daw. ²⁹ De anin, de yuunuwan a riiy waw. De ’maawan a fak gopri yey jâan àay rra waw, ngam aw tusufa e yaa. ³⁰ Amma ey de hòme a tîim waw, e tay a gin kana. ³¹ Yeesu dige a Kafernahum a dees Galile. De kàlnji daw da nit ây a unji wuysum. ³² Kàlnjum wàa kpul daw jungci isi, ngam ey yèerre ni mbinum. ³³ Nit tindòom dii a farra, a àay gin kimjum. De bime ɓàng de gàa: ³⁴ Hey, ji tâanjina ni muy ya, Yeesu ni-Nasaret? Mu dàara ha mu gbeesina yi? Mi cèngnumge, muy mu nit delliya ɗi anga a gin Fay. ³⁵ Yeesu de kpânu di tindòom makta, de gàaw: Tâa baak baak, yuu a gin nit yey gi! Tindòom de yaanu di nit maan a tîim nit ây, de yuu a gin wàa, ti mbiru jàk àyrra koo càa ba. ³⁶ De tâa daw ’nang da nit ây pî, de yèenjin de gàan: Kà tâa yèk yey ya? Ngam ey gàa dawrre ni kpèw kpèw, ni mbinum da tindòom ây aw yuu, aw yuurre. ³⁷ Yèk Yeesu yeski a dees maan pî. ³⁸ Yeesu yuuye a àay gin kimjum, de dige e lek a àay Simon înuwan Piyèr. Sàr wàa di Simon kûurre àyci mâarra isi dèy. De waawan di Yeesu, e ndòosuwa. ³⁹ De ûuwrra, de kpânu di àyci maan. Ayci de ndòowa. Kin maan de ane yaale, e kàmra daw tiriici. ⁴⁰ Unji ye gàa e leki, de ’maaran nit àyci ây ’nang ’nang dèy a gin Yeesu. De banggirra daw kàn da nit àyci ây pî, de ndòosi daw. ⁴¹ A tindòom makta ây aw yuu da nit ây dèy. Aw bime aw gàa: Muy mu Hàm Fay ɗi! Amma Yeesu de kpân daw, ti woo daw aw yèe ba, ngam aw cèngnu ey tâage Kristu. ⁴² Ye kayge ndamji, Yeesu de yuu e tay a nûri. Mûsa nit ây de kàmuwan. Ye kpàawan, de gàawan ta e tay a gin kana e woo daw ba. ⁴³ Amma ey de gàa daw: Sey mi dik mi sak Yèk Kâwrra wûun Fay a riiy ây kana ɗa. Ngam maan Fay de tèema. ⁴⁴ De kàle Yèk Kâwrra a àay gin kimjum ây da ni-Yude ây.

¹ Mgbàr kana Yeesu dii a cewci sòo ɓèl Genesaret. A nit ây dèy de hèewrran he de èwnjuwan, ngam rakta yèk Fay. ² De rabe koombowal ây cuk a cewci sòo. A nit depta cîit ây aw yuuye, aw kòle tidepni waw. ³ Yeesu de lege a koombowal Simon înuwan Piyèr, de waaw e hèesifa càa a cewci sòo. De tâa a koombowal e kàlnji daw da nit ây. ⁴ Ye gbèe yèerra, de gàaw di Simon: Kurfa koombowal a gin tâa yengdiya, ’màktin tidepni wun ngam depta cîici. ⁵ Simon de goosi de gàaw: Nitkàlnjum, ot loo depta tuma tuma, ot mòo cîici koo kpolo ba. Amma ye tâa muy gàage, di gim dik mi ’màkti tidepni. ⁶ Ye mbirin kà yey, de mòon cîit ây dèy, ha tidepni ta waw gàarre e ngarri. ⁷ De ’naasin da nit ây a koombowal kana ni kàn, aw dàara aw nàtnji daw. De dàaran, de mûunin koombowal ây cuk, ha aw kèle lèmcu a sòo. ⁸ Simon Piyèr ye rabe kà yey, de gbâyge a ɗàm kpees Yeesu, de gàaw: Nitcoorra, hèesi a gin mum, ngam miy mi nit makta ɗi! ⁹ Tâawe ’nang di Simon ni nit ây tâanjin gi pî, ngam mûsa cîit ây debin gi. ¹⁰ Tâa daw ’nang ɗa da Yakuba ni Yuhanna hàm ta Jebede, nit tâanjum ây ni Simon. Yeesu de gàaw di Simon: Ta mu tol ba, diga niyey tâa gum tâa nit depta nit ây kà yey depmu cîici gi. ¹¹ Ye kurin koombowal ây a cewci sòo, de woofan jàk ta waw pî, de furruwan di Yeesu. ¹² Yeesu dii a riiy kana. Nit rak isi de rabu, de gbâyge a deesi a ɗàm kpees wàa, de waaw de gàaw: Nitcoorra, gum kpàa mu ndòosimi, to mu yiɗi go. ¹³ Yeesu de parre kàn wàa de banggurra, de gàa: Mi yiɗige, àyci wey e ndòo. Rak isi nà woowe di nit maan yaale, ndòoye. ¹⁴ Yeesu de mgbènggu de gàaw: Ta mu sak yèk yey koo di wuna ba. Amma dik mu kàlni is wey di nit daprum a àay Fay, mu hîi hîiri kà yey gàa Fay a defterre Muusa, ngam kàlnum àyci wey ndòoye. ¹⁵ Amma yèk Yeesu iisirra yeskum. Mûsa nit ây dèy aw dàara ngam aw rak yèy a gin wàa, e ndòosi daw ɗa a àyci waw. ¹⁶ Yeesu de woo daw e tay a nûri ey kpolo wàa, e waa Fay a farra. ¹⁷ Mgbàr kana Yeesu kàlnji dawrre da nit ây. A ni-Farisa ây ni nit ây kàlnje yèk mgbèngda Muusa, anga a dees Galile, ni dees Yude, ni Yerusalem, aw tâarre a farra. Mbinum Fay dii a gin Yeesu ngam ndòosum da nit àyci ây. ¹⁸ A nit ây de tokran nit wuta isi ni jingi. Aw kàmi orri ha aw leknu a àay, aw iiw a ɗàm kpees Yeesu. ¹⁹ Amma ye tâa aw kpàa orri ha aw leknu a gin wàa ba, ngam mûsa nit ây, de naan a fak àay aw kpul kpongna. De cinuwan di nit àyci ni jingi wàa a tîim nit ây a ɗàm kpees Yeesu. ²⁰ Yeesu ye rabe goosum a tinîir waw, de gàaw ɗi nit maan: Soob mum, jàk maarra wey yaafumge. ²¹ A nit còycum ây ni ni-Farisa ây de dànin a tinîir waw de gàan: Wun ɗi nit yey maase nîir Fay ya? Wun ge mbin yaafum jàk maarra ya? Sey Fay gbè. ²² Amma Yeesu ye cèngsi dànda waw, de gàa daw: Ngam jâ dànnu kà yey a tinîir wun ya? ²³ Jàk jâ hòmge àyrra, to nirri gàaw go di nit kana “jàk maarra wey yaafumge”, koo gàaw go “an, mu digi” ya? ²⁴ Ndika un cèngni, Hàm nirri dii ni mbinum ha e yaafi jàk maarra a deesi. De gàaw di nit wuta isi: Mi gàamde, an mu at jingi wey, mu koyi! ²⁵ Nit wuta isi nà de ane yaale a ɗàm kpees nit ây, de arre jingi wàa, de koye. ’Misirre nîir Fay. ²⁶ De tâa daw ’nang da nit ây, de ’misin nîir Fay. Aw pî aw tole, de gàan: Ot rabe jàk kayeefi unji yey! ²⁷ A dat maan Yeesu ye yuu, de rabe nit ngota jomorgol tâarre a àay gin jomnum, nîir wàa Lewi. De gàaw: Furrimi! ²⁸ Ey de woofa jàk ây pî. De ane de furruwa. ²⁹ Lewi de kàmurra tiriici a àay wàa. A nit ngota jomorrgol ây dèy, ni nit ây kana ɗa aw riinji ni aw. ³⁰ A ni-Farisa ây, ni nit còycum ây de hûungin a gin lor ta Yeesu, de gàan: Ngam jâriinjunu, njoonjunu ni nit ngota jomorrgol ây, ni nit makta ây ya? ³¹ Yeesu de goosi de gàa daw: A nit ây tâage mbâra aw cen ni gayam dikta a gin nit ndòosum ba, sey a nit ây tâage ni àyci. ³² Mi dàara ha mi ’naasi nit ây gòyge ɗèm ba, amma nit ây tâage ni jàk maarra, ha aw ini tinîir waw. ³³ A nit ây de gàawan di Yeesu: A lor ta Yuhanna aw coorre riirra tiriici nak mûsi jày, aw waarre Fay kà lor ta ni-Farisa ây. Amma a lor ta wey aw riirre, aw njoorre. ³⁴ Yeesu de gàa daw: Kpàa gaw kpàa gàarra da nit ’naasum ây a siir ata maanji, aw coo riirra tiriici, to nit ata maanji tâanjirre ni aw gi yi? ³⁵ Amma unji kana dàa ge dàara, ye gaw at nit ata maanji a gin waw. Unji maan gaw coo riirra tiriici. ³⁶ Yeesu de yèe daw ni rèenjum yèy de gàa: Cen nirri ge gûu jàk joorra a lurra woy fûuya, e còosi a lurra mgbanti ba. Gàa go nirri mbir go hûy, lurra fûuya mboye, jàk joorra ge getnji ni lurra mgbanti ba. ³⁷ Cen nirri ge duk mbàl fâarra a jòong woy mgbuurriya ba. Gàa go nirri mbir go hûy, fâarra mbàl wa ge walsifa jòong. Mbàl tuu ge tuu, jòong ngaa mboye. ³⁸ Amma koo wuna ge mbir kà yey ba. Sey nirri e duk mbàl fâarra a jòong mbâri. ³⁹ To nirri njoo go mbàl woy mgbanti, ge yiɗi mbàl fâarra ba. Ngam gàa ge gàa: Woy mgbanti hòmge kâwrra.

¹ Yeesu hòmde a tîim hèmna ây unji wuysum. A lor ta wàa de hòyin tirri, de karin ni kàn aw tufi. ² A nit ây kana a tîim ni-Farisa ây de gàan: Kà kà tèenu jày njangge yèk mgbèngda a unji wuysum gi ya? ³ Yeesu de goosi de gàa daw: Un haa janggum a defterre Fay jày mbire Dawda ni nit tâanjum ta wàa ba yi? Ngam ye àyu fey, ⁴ de lege a àay Fay, e at tàat yey hîin hîiri a farra gi. E kûngge, de hîi da nit tâanjum ta wàa ɗa. Tàat maan sey a nit daprum ây gbè gaw kûnggi. ⁵ Yeesu de gàa daw: Hàm nirri ey tâage nit ɓèl unji wuysum. ⁶ A unji wuysum kana Yeesu de lege a àay gin kimjum, de kàlnji daw. Nit kana dii a farra, kàn riina wutiya. ⁷ A nit còycum ây ni ni-Farisa ây aw faawrre di Yeesu, to ey ndòo ge ndòosi go nirri a unji wuysum gi, ngam ha aw kpàa yèy a hak wàa. ⁸ Amma Yeesu ye cèngni jàk dànda waw, de gàaw di nit wuta kàn nà: An mu gòy a tîim! De ane de gòye ti. ⁹ Yeesu de gàa daw: Mu gunurre jày kpolo: Gesi nirri e tèe jàk mbâri a unji wuysum koo jàk maarra yi? E saani jungci nirri, koo e ɓàr nirri yi? ¹⁰ De gîni nis wàa a gin nit ây pî, de gàaw di nit wuta kàn: Pat kàn wey! De parre. Kàn maan de tâasi kà kàn cukti. ¹¹ Ngòlnji de mûu a tinîir nit ây kana. De yèenjin a tîim waw kày gaw mbiru jày di Yeesu. ¹² Mgbàr maan Yeesu naa a gopri ngam e waa Fay. De waa tuma tuma ha ndamji. ¹³ Ye kayge gi, de ’naase da lor ta wàa. De catɗa a tîim waw nit ây ra sàm cuk, de în daw nit tèerra ây a tèem wàa. ¹⁴ Di Simon de înu Piyèr, ni kaa wàa Andere, ni Yakuba ni Yuhanna, ni Filip, ni Bartolomi, ¹⁵ ni Matta, ni Toma, ni Yakuba hàm Alfa, ni Simon nit yiɗum dees wàa, ¹⁶ ni Yuda hàm Yakuba, ni Yuda Iskariyo nit yey irge nit mòorra Yeesu ni gâra. ¹⁷ Yeesu ye cisa a gopri, de gòye a beey. A nit futa ta wàa dèy, ni mûsa nit ây anga a dees Yude pî, ni Yerusalem, ni Tiiru ni Sidon riiy yey tâage a cewci sòo ɓèl, aw dii a farra. ¹⁸ Aw dàarage ngam aw rak yèk wàa, ha e ndòosi daw da nit àyci ây. Da nit ây riige ’màari ni tindòom makta, Yeesu yuuni dawge ɗa. ¹⁹ A nit ây pî aw hèesa ha aw banggurra, ngam mbinum yuura a gin wàa, ndòosi dawge a àyci waw pî. ²⁰ Yeesu de ine nis wàa a gin lor ta wàa, de gàa daw: Kâwsin tinîir wun un nit èca ây, ngam gin tâam wun dii a wûun Fay! ²¹ Kâwsin tinîir wun un nit fek ây, ngam Fay o ge olsunu. Kâwsin tinîir wun un nit ây umri gi, ngam wàa gun wâasi. ²² Kâwsin tinîir wun, to a nit ây aw yiinu go, aw ɗòlfa dun go ni aw, aw lètnu go, aw yuununu go kà nit makta ây yèk Hàm nirri. ²³ Mgbàr maan tâan ni tinîir kâwrriya, siin ni ɗotkum a tinîir wun. Ngam bèeb tèem wun dii dèy a faktiturum. A wosom ta waw aw mbire nà maarra kà yey da nit ây lòni yèk Fay gi. ²⁴ Amma ’màari waanurre dun nit bèeb ây, ngam un kpàa nà kâwum wun mgban. ²⁵ ’Màari waanurre dun nit oca ây, ngam fey à ge àynu! ’Màari waanurre dun nit ây wâase gi, ngam bi gun biri, un umi. ²⁶ ’Màari waanurre, to a nit ây pî aw yèerra dun go delliya. Ngam kà yey mbirin wosom ta waw da nit lònum yèk rèeng ây. ²⁷ Amma mi gàanurre, un nit ây rakim gi: Yiɗin nit bàpri ta wun, mbirin daw jàk mbâri da nit yiir ta wun. ²⁸ Mbârsin da nit ây maasunu gi, waan Fay ngam nit ây njàmgunu gi. ²⁹ To nirri lòsum go a kpalnga kpolo, inu woy cukti ɗa. To nirri at go godo wey, woow e at lurra wey ɗa. ³⁰ Koo wun waagum go jày ya, sey mu hîiwa. To nirri arrum go jày tâagum gi, ta mu gunsu ba. ³¹ Kà yey yiɗunu a nit ây aw mbitnu gi, un ɗa mbirin daw hû go. ³² To un yiɗi go da nit ây yiɗunu gi, wun ge gàanu mbew ya? Ngam a nit makta ây ɗa aw yiɗirre da nit ây yiɗi daw gi. ³³ To un mbir go jàk mbâri da nit ây mbirgunu mbâri gi, wun ge gàanu mbew ya? Ngam a nit makta ây ɗa aw mbitɗe kà yey. ³⁴ Un hîi go kiri da nit ây dànnu gaw hîisunu jàk maan, wun ge gàanu mbew ya? Ngam a nit makta ây ɗa aw hîirre da nit ây, ngam aw hîisi daw kà woy maan. ³⁵ Amma yiɗin nit bàpri ta wun, mbirin mbâra da nit ây, hîin kir yey dànnu gun haa kpàasum ba! Jàk koyrra wun dii dèy, tâa gun tâa hàm ta Fay tâage a faktiturum. Ngam ey mbitɗe mbâri koo da nit ây tâa aw gàarre mbew ba, ni nit ây tâage nit kperrem ây ɗa. ³⁶ Tâan ni ’maton, kà yey tâa Too wun ni ’maton gi. ³⁷ Ta un hiiti da nit ây kana ba, ngam ta Fay e hiitunu ba. Ta un mòo nirri ni kiita ba, ngam ta Fay e mòonu a kiita ba. Yaafin da nit ây kana, Fay yaa ge yaafunu ɗa. ³⁸ Hîin, Fay hîi ge hîinu. Hîi gaw hîinu a taasaw èftiya mbâra, mûurriya, yûugumya. Fay hîi ge hîinu a kàn wun kà yey hîinu da nit ây kana. ³⁹ Yeesu de yèe daw ni rèenjum yèy, de gàa: Nit râay ge kpàaw nàta nit râay kana yi? Aw cuk ɗa gaw yaa a goo ba yi? ⁴⁰ Nit èngnum ge hòmu di nit kàlnjum wàa ba. Nit yey gbèese èngnum, tâa ge tâa kà nit kàlnjum wàa. ⁴¹ Ngam jâ raptum pòong a nis kor wey ya, amma mu rap ɓulnji a nis wey ba ya? ⁴² Kà gum gàaw di kor wey “kor mum, woo mi yuunumfa pòong a nis wey”, amma muy mu rapɗe ɓulnji a nis wey ba ya? Mu nit tibiw ɗi, yuuni ɗà màrra ɓulnji a nis wey, ha mu rap mbâra, mu yuunufa pòong a nis kor wey! ⁴³ Futifak mbâra ge rep jàk nîirra maktiya ba. Futifak yey tâage maktiya ɗa ge rep jàk nîirra mbâra ba. ⁴⁴ Futifay pî cè gaw cèngsu a nîirra wàa. Cen nirri ge hap nîirra jâaci a cikci ba, ge kar nîirra timgbokcum a ngèwci ba. ⁴⁵ Nit mbâri yuu ge yuuni jàk mbâri a tinîir wàa mbâriya. Nit makta ɗa yuu ge yuuni jàk maarra a tinîir wàa maktiya. Ngam mgbelyèk nirri yèerre jàk yey mûuge a tinîir wàa. ⁴⁶ Yeesu de gàa daw bak: Ngam jâ ’naasim un Nitcoorra Nitcoorra, amma un mbitɗe jày gàami dun ba ya? ⁴⁷ Koo wun dàaga a gin mum, rake yèk mum, tèege kà yey gàa gi, kà gim kàlnu ni nit yey rèenje gi. ⁴⁸ Rèenji ni nit jâarra àay cèege yengdiya ha a kpata, jâage fur àay ni gòoy. Buun ɓèl ye yaara gi, sòo de sîira, de dènggu di àay, ti mbiru koo jâ ba, ngam jâarra maan mbâriya ɗi. ⁴⁹ Amma nit yey rake yèk mum, tâa ti tèe kà yey gàa yèk maan ba, ey rèenji ni nit jâarra àay, tâa ti cèe ba, jâage a deesi gbè, gòoy cen. Sòo ye sîira, de dènggu di àay maan, de yaa yaale, de mboye pî.

¹ Yeesu ye gbèese yèerra yèk wàa pî a tuk nit ây, de dige a Kafernahum. ² Nit tèem wàa di nit ɓèl sooje ây dii ni àyci, kèle wucu. Nit ɓèl sooje ây yiɗurra di nit maan dèy. ³ Ye rage yèk Yeesu, de tèefa toonji ni-Yude ây a gin wàa, aw waawa e dàara, e ndòosu di nit tèem wàa. ⁴ Ye kpèrran a gin Yeesu, de waawan de gàan: Ndògòn, nit ɓèl sooje ây yey gesi mu mgbaanjuwa. ⁵ Ngam ey yiɗi da nit ta worro, ey jâagina àay gin kimjum gi. ⁶ Yeesu de taynji ni aw. Ye hèera a àay, nit ɓèl sooje ây de tèefa soob ta wàa, de gàawan: Nitcoorra, nit ɓèl sooje ây gàa, ta mu loosi hak wey ba. Ngam mi get ha mu lek a àay mum ba. ⁷ Hû go mi raptu di hak mum, mi get mi difa a gin wey ba. Amma yèe yèy kpolo, ha àyci nit tèem mum e ndòo. ⁸ Ngam miy mi dii a kàn nit ɓèl kana, mi dii ɗa ni sooje ây a kàn mum. Mi gàaw go di nirri “digi”, di ge digi. Mi gàaw go di nit kana “dàara”, dàa ge dàara. Mi gàaw go di nit tèem mum “tèe jàk yey”, tèe ge tèe hû go. ⁹ De tâaw ’nang di Yeesu ye rage yèk yey. De dûre a gin mûsa nit ây futku gi, de gàa daw: Mi gàanurre, koo a tîim ni-Israyel ây mi haa kpàarra goosum kà yey a tinîir nirri ba. ¹⁰ A nit ây tèefa daw nit ɓèl sooje ây ye iran a àay, de kpàawan àyci wàa ndòowe di nit tèem nà. ¹¹ Yeesu de dige a riiy kana înuwan Nayin. A lor ta wàa ni mûsa nit ây dèy aw diknji ni ey. ¹² Ye hèeran a nin riiy maan, e rri yey a nit ây aw tokrarre wurra ha aw sipti, hàm kpolo ɗi gbè di kin wurra. A nit ây dèy aw furrurre di nuu wàa. ¹³ Yeesu Nitcoorra ye rabu di kin maan, tinîir wàa de àyuwa, de gàaw: Ta mu um ba! ¹⁴ Yeesu de hèera e mâaw di titokni wurra. A nit ây toke wurra de gòyin. De gàa: Lori, mi gàamde, ani! ¹⁵ Wurra nà de ane de tâa ton, de ɗaa yèerra yèy. Yeesu de gàaw di nuu wàa: Ngosi hàm wey! ¹⁶ Tolnji de mòo daw da nit ây, de ’misin nîir Fay de gàan: Nit lònum ɓèl kpèrra a tîim worro. Fay dàara e mgbaanji da nit ta wàa. ¹⁷ Yèk Yeesu yeski a dees Yude ni riiy ây a cewci dees maan pî. ¹⁸ A lor ta wàa di Yuhanna de saguwan yèk Yeesu pî. Yuhanna de ’naasirra nit ây cuk a tîim lor ta wàa, ¹⁹ de tèe daw a gin Yeesu Nitcoorra ngam aw gunuwa: Muy tâage nit yey ge dàara nà, koo ot waarre nit kana yi? ²⁰ A nit ây nà cuk gi ye kpèrran a gin Yeesu, de gàawan: Yuhanna nit iirra baptisma tèega dorro a gin wey, gàa: Muy tâage nit yey ge dàara gi, koo ot waarre nit kana yi? ²¹ Mgbàr maan Yeesu ndòosi nit ây dèy a àyci waw ni ’màar ta waw, yuuni tindòom ây, ɓelsi daw nisi da nit râay ây dèy. ²² Yeesu de goosi de gàa daw da lor ta Yuhanna: Digin, un kàlu di Yuhanna jày rapnu gi, raknu gi: A nit râay ây aw rapɗe, a nit èskum ây aw dikɗe mbâra, a nit rak is ây aw kpàarre ndòosum, a nit gbukrum ây aw rakɗe, a nit ây wutke gi aw gûysirre, da nit èca ây aw sak dawrre Yèk Kâwrra. ²³ Kâwum diiw di nit yey tâa ti ir u daarri ngam mum ba. ²⁴ A nit ây tèera daw Yuhanna ye koyin gi, Yeesu de yèe da mûsa nit ây yèk Yuhanna, de gàa: Ji yuunu raptum a nûri ya? Samsi yey yûusu hiski gi yi? ²⁵ Koo ji yuunu raptum ya? Nit mgbapta lurra woy mbâra yi? A nit mgbapta lurra delliya, ni nit tiɗèpsum ây aw dii a àay wûun ây. ²⁶ Koo ji yuunu raptum ya? Nit lònum yèk Fay yi? Mi gàanurre: Takundi, un rabe nit yey hòmgi daw da nit ây lòni yèk Fay. ²⁷ Yuhanna ey tâage nit yey kèrin nà yèk hak wàa gi, ye gàa Fay: E rri yey mi tèefarre nit tèer mum a ɗàm kpees wey, ha e mgbar ot wey. ²⁸ Mi gàanurre, a nikin ây aw haa kpàarra nirri hòmgu ’mita di Yuhanna ba. Amma nit yey hòmge luurra a wûun Fay gi, ey hòmgu ’mita di Yuhanna. ²⁹ A mûsa nit ây ni nit jomnum ây ye ragin nà yèk Yuhanna, aw kàlni takundi a yèk Fay ni mbâr wàa, aw ngore nà baptisma a gin wàa. ³⁰ Amma a ni-Farisa ây ni nit còycum ây a yèk mgbèngda Muusa, aw hàwe jày yiɗi Fay a hak waw, ngam aw ngor baptisma a gin Yuhanna ba. ³¹ Yeesu de gàa bak: Ni ji gim getnjini yòot nit ây tâarra yey ya? Ni ji rèenjin ya? ³² Aw rèenji ni hàm ây tâage a luumu, ye ’naasnjin aw gàa: Ot urfa dun jàk uta, amma un sii ba, ot ’naasi ndûu wurra, amma un um ba. ³³ Ngam Yuhanna nit iirra baptisma dàarage, ti riirre nàam ba, ti njoorre mbàl ba, un gàa: Ey dii ni tindòom. ³⁴ Hàm nirri dàarage, ey riirre njoorre, un gàarre: E rri yey nit riirra tiriici dèy ni tinjoorgum mbàl, soob waw da nit ngota jomorrgol ây ni nit makta ây. ³⁵ Amma còycum Fay cèngnumya ɗi a gin nit ây ngorge gi pî. ³⁶ Nirri kpolo a tîim ni-Farisa ây ’naasuge di Yeesu aw riinji ni ey. De lege a àay ni-Farisa nà, de tâa ton ha e rii nàam. ³⁷ Kin kana mbirge jàk maarra dii a riiy maan. Ye rage, Yeesu tâa a àay ni-Farisa nà riirre nàam, de ’maara kîrnga ni num mgbirgumya. ³⁸ De lekfa a àay, de gòye a dat Yeesu a nak wàa, de ume. De dàngsu nak Yeesu ni rîsim wàa. De pirrufa nay nà ni gimsi hak wàa, de pèwurra tipèwni, e fòogurra num mgbirgumya a nak Yeesu. ³⁹ Ni-Farisa ye rabe jàk yey, de yèe a tinîir wàa de gàa: Nit yey to tâa go ngin nit lònum yèk Fay, cè ge cèngni ngin kin yey banggurra gi, kin makta ɗi. ⁴⁰ Yeesu de gàaw di ni-Farisa nà: Simon, mi dii ni yèy ha mi kàlum. Simon de gàaw: Kàlimi, Nitkàlnjum. ⁴¹ Yeesu de gàa: A nit ây cuk aw arre nà kiri a gin nit bèebi. Nit kpolo arre seede jày ge ii kurra ra kèrèw, nit cukti ɗa jày ge ii kurra kèrèw. ⁴² Ye tâa jày ceni daw aw jinggu ba, nit maan de woofa daw pî. Kà yey kàlim, wun ge hòmu yiɗum di nit bèebi a tîim waw ɗa cuk ya? ⁴³ Simon de goosi de gàaw: Mi dànde, nit yey woowfa dèy gi. Ey ge hòmu yiɗum di nit bèebi gi. Yeesu de gàaw: Hû go ɗi, mu dàni mbâra. ⁴⁴ De dûri cewci kini nà, de gàaw di Simon: Mu rabu di kin yey yi? Ye lekma a àay wey, mu èenim sòo kòlni nay. Amma ey dàngsim nak mum ni rîsim, pirrimfa ni gimsi hak wàa. Muy mu kabim tikapni kà hàar worro ba. ⁴⁵ Amma ey ye lekra gi, ti woofa coorra ni pèwrra tipèwni a nak mum ba. ⁴⁶ Muy mu fòogimda num a hak mum ba. Amma ey fòogimda nak mum ni num mgbirgumya. ⁴⁷ Hû go mi gàamde: Yiide kin yey dii dèy, kàlnige jàk maarra ta wàa dèy tâagu gi, yaafige. Amma nit yey kpàage yaafum càa, yiide wàa ɗa dii càa. ⁴⁸ De gàaw di kini nà: Jàk maarra wey yaafige. ⁴⁹ A nit ây riinji ni ey de yèen a tinîir waw de gàan: Wun ɗi nit yey ha e yaafi jàk maarra ya? ⁵⁰ Yeesu de gàaw di kin maan: Goosum a tinîir wey saanumge. Taysi mbâra!

¹ A dat maan càa, Yeesu de dige a riiy ɓèl ây ni riiy kaa ây. De sage Yèk Kâwrra wûun Fay. A lor ta wàa ra sàm cuk aw tâanjirre ni ey. ² A nikin ây kana, yuuni daw nà tindòom makta ây, ndòosi daw a àyci ây gi ɗa aw tâanjirre ni ey. Di Mariya sàni-Magdala dey yuunu nà tindòom ây jòròs, ³ Yowanna kin wàa di Huja nit ɓèl a àay wûun Herode, ni Susanna, ni kin ây kana dèy. Aw mgbaanji dawrre ni bèeb ta waw di Yeesu ni lor ta wàa. ⁴ Mûsa nit ây anga a riiy pî aw kimja a gin Yeesu. De yèe daw jày ni rèenjum yèy. ⁵ De gàa: Nit yòorra yòoci taye ngam yòorra yòoci. A ye yòo gi, yòot kana de yaa a cewci orri. A nit ây de nafɗan, a jooy ây de dàan de atin. ⁶ Yòot kana yaa a soori a fak kpata. Ye ɓuge, de kòyrre ngam soori ti tâa yengdiya ba. ⁷ Yòot kana ɗa yaa a tîim cikci ây. De ’mitnjin, cikci de èwnjuwa. ⁸ Yòot kana yaa a soor mbâra. De ɓugi, de ’mirre de njòre yòoci temèrre. Yeesu ye gbèe yèerra yèk yey, de bime de gàa: Nit yey tâage ni tuk rakni, sey e ragi! ⁹ A lor ta wàa de gunuwan de gàan: Ji yiɗi gàarra rèenjunum yèk yey ya? ¹⁰ Yeesu de gàa daw: Un un kpàa ot cèngnum jày tâa fûurriya a yèk wûun Fay. Amma a nit ây kana gi sey ni rèenjunum yèy gaw kàl daw, ngam koo aw rapɗe go ni nisi, gaw rap ba, koo aw raksirre go ni tuy gaw cèngsi ba. ¹¹ E rri yey jày yiɗi gàarra yèk rèenjum yey: Yèk Fay tâa kà yòoci. ¹² A nit ây kana aw rèenji ni cewci orri a gin yaa yòoci gi. Ye ragin yèk Fay, Seyɗan dàara e atfa yèy a tinîir waw, ngam ta aw goosi aw saa ba. ¹³ A nit ây kana aw rèenji ni soor yey a fak kpata. Ye ragin yèk Fay, de ngorin ni tinîir kâwrra. Aw sisi ceni daw ba. Aw goosirre unji càa, amma mgbàr yey ge dàara daw jàk rûfrum, woo gaw woofa yèk Fay. ¹⁴ A nit ây kana aw rèenji ni gin yey yaa yòoci a tîim cikci ây gi. Ye ragin yèk Fay, de digin. Amma jàk kparri, ni yèk bèebi, ni kâwrra jàk ây ye loosi daw tinîiri, de èwnjifan yèk Fay a tinîir waw, gaw rep jàk nîirra mbâra ba. ¹⁵ A nit ây kana aw rèenji ni soor mbâra a gin yaa yòoci gi. Aw rake yèk Fay ngorin gi, aw mòo ni tinîir ɓetkumya ni dànda mbâra. Aw repɗe jàk mbâri a èfta tinîir waw. ¹⁶ Yeesu de gàa daw: Cen nirri ge beng ebi a pittirla e kupti ni sey, koo e ii u mîis takrak ba, amma ii ge ii njet, ngam ha kayngum maan e fin da nit lekta ây a àay. ¹⁷ Jày fûuge lang lò ge lòt mgbàr kana a nis nit ây. Yèk fûurriya ɗa lò ge lòt mgbàr kana, e tâa cèngnumya. ¹⁸ Hû go iin hakkilo a jày raknu gi! Ngam nirri dii go ni jày, kpàa ge kpàasirra jàk kana. Amma nit yey èege jày, a gaw arru koo jàk yey dàne tâawe càa gi. ¹⁹ Nuu wàa ni kaa rra wàa di Yeesu de dàaran a gin wàa. Aw kpàa orri aw kpèt a gin wàa ba, ngam mûsa nit ây dii dèy a farra. ²⁰ A nit ây de kàluwan de gàan: Nuu wey ni kaa rra wey aw gòyrre a gbaa, aw yiɗi un kpàanji. ²¹ Yeesu de goosi de gàa daw: A nit ây rake yèk Fay, mbirge kà yey gàa yèk maan, aw tâage a kaa rra mum koo nuu mum. ²² Unji kana Yeesu de lege a koombowal ni lor ta wàa, de gàa daw: Dàan ot yew a taga sòo ɓèl gi. ²³ Ye kurin koombowal, kûum mòowe di Yeesu. Hiski ɓèl de ana e kpàa daw a tîim sòo, ha koombowal gàarre e mûu ni sòo. Aw kèle gbeecu. ²⁴ A lor ta wàa de hèewrran aw mûysu di Yeesu, de gàawan: Nitkàlnjum Nitkàlnjum, ot gàarre ot gbee! Yeesu de ane; de kpânu di hiski ni yûurra sòo. Sòo ni hiski de gòyin, de tâan baak baak. ²⁵ Yeesu de gàa da lor ta wàa: U hâ tâa goosum tinîir wun ya? De tâa daw ’nang de tolin, de yèenjin de gàan: Nit yey nit ji rri ya? Ngam yèerre di hiski ni sòo, aw ragurre. ²⁶ De kurin aw dik a cewci Gerasina. Riiy maan dii a ɗàm kpees Galile. ²⁷ Yeesu ye cire a koombowal, nit kana a riiy maan de dàara a gin wàa. Nit yey dii ni tindòom makta. Diga mgban ti mgbapɗe lurra ba, ti tâarre a àay ba, amma tâarre a gook geb ây. ²⁸ Ye rabu di Yeesu, de bime ɓàng, de yaa a ɗàm kpees wàa, de taasi de gàa: Ji tâanjina ni muy ya, Yeesu Hàm Fay a faktiturum? Mi waamde, ta mu riisim ’màari ba. ²⁹ Yèe kà yey, ngam Yeesu gàawe nà di tindòom, e yuu a gin wàa. Tindòom mòowe nà diga mgban. Aw’mèmu nà di nit maan ni yuma titefki, aw gbalu nà ni tigbalni a nay. Amma ey ’nunsifarre ti’mèmni. Tindòom ’maawrre a nûri. ³⁰ Yeesu de gunu: Kà tâam nîir wey ya? De gàaw: Mûsa tâam nîir mum. Gàa kà yey, ngam a tindòom ây dèy leke nà a gin wàa. ³¹ A tindòom ây de waawan di Yeesu, ta e gàa daw aw cir a gook yengdiya, aw tâa a farra ha mgbàr kiita ba. ³² Mûsa gicim ây dèy aw dii aw faarre a kpàang gopri. A tindòom ây nà de waawan di Yeesu, e woo daw aw lek a is gicim ây. ³³ De hîi daw orri. A tindòom ây de yuun a gin nirri nà, de legin a is gicim ây. Mûsa gicim ây pî de lamin aw yaa a sòo. De wutkin a farra. ³⁴ A hàm faat gicim ây ye rabin jàk yey mbirge gi, de ’nòon. De digin aw sakra yèk maan a riiy ɓèl, ni riiy kaa ây tâage a cewci riiy maan. ³⁵ A nit ây de digin aw gop jàk yey mbirge gi, de kpèrrin a gin Yeesu. De kpàawan di nit yey yuuw mûsa tindòom ây nà tâarre a ɗàm kpees Yeesu, mgbapɗe lurra, dànde mbâra ni hakkilo. De tolin. ³⁶ A nit ây tâage a farra rapke jàk yey pî, de sagin daw kày kpàa ndòosum nit yey tâage nà ni tindòom ây gi. ³⁷ A ni-Gerasina ây pî de waawan di Yeesu e yuu a dees waw, e tayi. Ngam aw tole dèy. Yeesu de lege a koombowal e iri. ³⁸ Di nit yey yuuwan tindòom ây nà, de waaw di Yeesu aw diknji ni ey. Amma Yeesu de wasu de gàaw: ³⁹ Koy mu sak da nit ây jày pî mbirum Fay. De dige e kàl a riiy maan pî jày tèew Yeesu gi. ⁴⁰ Yeesu ye ira, a mûsa nit ây de ngoruwan ni tinîir kâwrra. Ngam aw pî aw waawrre nà. ⁴¹ Nit kana nîir wàa Yayru de dàara. Nit maan wûun ɗi a àay gin kimjum. De ûu a ɗàm kpees Yeesu, de waaw e dàara a àay wàa. ⁴² Ngam dii ni hàm nikin yer wàa ra sàm cuk, gàarre e wurri. Yeesu ye taynji ni ey, mûsa nit ây aw èwnjurre. ⁴³ Kin kana dii ni àyci yuurra njîim yeri ra sàm cuk. Cen nirri mbinge e ndòosu ba. ⁴⁴ De dàara a dat Yeesu, de mâa pètki lurra wàa. Yuurra njîim wàa de ndòo yaale. ⁴⁵ Yeesu de gune: Wun mâagima? A nit ây de hàlin. Piyèr de gàaw: Nitkàlnjum, mûsa nit ây aw kimjarre a gin wey, aw èwnjumde. ⁴⁶ Yeesu de gàa: Nirri mâame, ngam mi cèngni kpèw kpèw yuu a gin mum. ⁴⁷ Kin maan ye cèngni, ge kpàaw fûurra ba, de dàara ni timalni, de ûu a ɗàm kpees Yeesu. De sagu a tuk nit ây pî jày mbirgu nà mâanurra gi, kày ndòosi ɗa àyci wàa yaale. ⁴⁸ Yeesu de gàaw: Hàm mum, goosum a tinîir wey ndòosumge. Taysi mbâra! ⁴⁹ Yeesu ye yèe kà yey, nit kana ana a àay Yayru de gàaw: Hàm wey wurre. Ta mu loosu di Nitkàlnjum ba. ⁵⁰ Yeesu ye rage kà yey, de goosi de gàaw di Yayru: Ta mu tol ba, goosi a tinîiri, hàm wey saa ge saa! ⁵¹ Ye kpèrrin a àay, Yeesu ti woo koo wuna e leknji ni ey ba, sey Piyèr, ni Yuhanna, ni Yakuba, ni too wàa ni nuu wàa di hàm. ⁵² A nit ây pî aw umde aw taasirre. Yeesu de gàa daw: Ta un um ba! Hàm ti wut ba, amma kûu kûuye. ⁵³ De wâskuwan, ngam aw cèngni hàm wurre. ⁵⁴ De lege, de mòow di hàm nikini nà a kàn, de bime de gàa: Hàm mum, ani! ⁵⁵ Jungci wàa di hàm de koyra. De ane yaale. Yeesu de gàa daw, aw hîiw jày di hàm e rii. ⁵⁶ De tâa daw ’nang di too wàa ni nuu wàa. De mgbèng daw, ta aw sak koo di wuna jàk yey mbirge gi ba.

¹ Yeesu de kimji daw da lor ta wàa ra sàm cuk, de hîi daw mbinum ngam aw yuuni tindòom makta ây pî, ha aw ndòosi àyci da nit ây. ² De tèe daw aw kàl da nit ây yèk wûun Fay, aw ndòosi daw àyci. ³ De gàa daw: Ta un mòo koo jâ ngam diknum a orri ba, koo suu, koo kurra, koo tiriici, koo seede. Ta nirri a tîim wun e mòo lurra cuk ba. ⁴ Un lek go a àay nirri, tâan a farra ha mgbàr yey gun an un tay gi. ⁵ To a gin kana aw ngotnu go ba, yuun a riiy maan, gbòsin sèerrèm a nak wun, ngam un kàlni daw aw mbire jàk maarra, ye hàwnun ngota gi. ⁶ A lor ta wàa de tayin, de gîrin a riiy ây pî aw sak Yèk Kâwrra. De ndòosin da nit àyci ây koo u hâ. ⁷ Herode wûun ni-Yude ây ye rage jày pî mbire Yeesu gi, ti cèngni jày ge gàa ba, ngam a nit ây kana aw yèerre a hak Yeesu, Yuhanna gûysige a wurra. ⁸ A nit ây kana de gàan, Eliya ey lòtka. A nit ây kana ɗa de gàan: Nirri kpolo ɗi a tîim nit ây lòni nà yèk Fay, gûyse. ⁹ Herode de gàa: Yuhanna dey njaam nà hak wàa. Amma wun ɗi nit yey rakmi yèk ây a hak wàa ya? De kàme orri e rabu di Yeesu. ¹⁰ A nit ây tèe daw Yeesu ye koyran, de saguwan jày mbiran gi. Yeesu de arri daw aw dik a Betsayda, aw tâa aw kpolo waw. ¹¹ Amma mûsa nit ây ye cèngnin gi, de furrufan. Yeesu de ngori daw mbâra, de sagi daw yèk wûun Fay. De ndòosi daw da nit ây tâage ni àyci. ¹² A ye gàa unji e leki, a lor ta wàa ra sàm cuk de dàaran, aw gàaw: Was daw da nit ây gi aw dik a riiy ây ni àay ây, ha aw kpàa gin kûurra, ni tiriici. Ngam ay gi a nûri tâana. ¹³ Amma Yeesu de gàa daw: Un gun hîi daw aw rii! De gàawan: Sey tàarri kèrèw ni cîici cuk tâagina. Koo mu yiɗi ot dik ot sàara tiriici ngam mûsa nit ây gi pî yi? ¹⁴ Ngam mûsa nit ây aw dii nihun ây gaw kpèt ujinè kèrèw. De gàa daw da lor ta wàa: Tâanin daw da nit ây kim kim, ra kèrèw ra kèrèw. ¹⁵ De iin daw da mûsa nit ây pî kà yey gàa daw gi. ¹⁶ Yeesu de arre tàarri kèrèw ni cîici cuk nà. De toole nisi u faktiturum, de gàa mbew di Fay ngam tiriit maan. De mîinje tàarri ni cîici nà, de hîi daw da lor ta wàa ha aw ii a ɗàm kpees nit ây. ¹⁷ Aw pî aw riiye aw ole. De atin yaatum tiriici, de mûunin tuuni ra sàm cuk. ¹⁸ Yeesu ye waa Fay ey kpolo wàa, a lor ta wàa de dàaran a gin wàa. De gun daw: Mûsa nit ây kà gàan, mi wun ɗi ya? ¹⁹ De goosin de gàawan: A nit ây kana aw gàarre, mu Yuhanna nit iirra baptisma ɗi. A nit ây kana aw gàarre, mu Eliya ɗi. A nit ây kana ɗa aw gàarre, mu nirri kpolo ɗi a tîim nit ây lòni nà yèk Fay, gûyse. ²⁰ De gàa daw: Amma un kà gàanu mi wun ɗi ya? Piyèr de goosi de gàaw: Muy mu Kristu Fay ɗi. ²¹ Yeesu de njang daw, ta aw sak yèk yey koo di wuna ba. ²² De gàa daw: Sey Hàm nirri e rii ’màari dèy. A toonji ây, ni nit ɓèl ta waw da nit daprum ây, ni nit còycum ây ha gaw hawrra aw ɓàruwa. Amma a unji taanti gû ge gûysi. ²³ Yeesu de gàa da nit ây pî: To nirri yiɗi go e diknji ni miy, sey e hàanji hak wàa, e tok minjum kpiir wàa unji pî, e furrimi. ²⁴ Nit yey yiɗi saanum jungci wàa, gbee ge gbeesi. Amma nit yey gbeesi jungci wàa ngam yèk mum, saa ge saani. ²⁵ Nirri kpàa go jày a deesi lang, amma mboysi go hak wàa ha e gbee gi, ji ge tâaw di nit maan ya? ²⁶ To lawsam mòow go di nirri ngam yèk mum, hû go lawsam mòo ge mòow di Hàm nirri a gin nit maan gi, ye ge dàara ni ’mita wàa, ni ’mita Too wàa, ni malayka ây delliya gi. ²⁷ Mi gàanurre: Takundi, a nit ây kana aw dii a tîim nit ây gòyge ay gi, gaw wut ba, sey to aw rap go wûun Fay. ²⁸ A dat yèerra yèk ây gi, jày ge ii unji nan nan, Yeesu de arre Piyèr, ni Yuhanna, ni Yakuba aw diknji. De naan a fak gopri ngam e waa Fay. ²⁹ A ye waa gi, tiigi wàa ire ’nang. Lurra wàa ire burriya, finde ɓel ɓel. ³⁰ E rri yey a nit ây cuk aw lòrrage, Muusa ni Eliya, aw yèenjirre ni Yeesu. ³¹ Aw lòrrurra ni ’mita waw, aw yèenji ni ey yèk gbèerra unji wàa, ye gàa e dik e wut a Yerusalem gi. ³² Piyèr ni nit ây tâanjin gi, kûum bûtiya mòo dawge. Amma aw mûyrre, aw rabe ’mita wàa di Yeesu, ni ’mita nit ây nà cuk tâanjin gi. ³³ A nit ây nà ye gàan aw ɗòlnji ni Yeesu, Piyèr de gàaw: Nitkàlnjum, a gin mbâra tâana ay gi. Woona ot mbangsi ndûkci ây taan, kpolo woy wey, kpolo woy Muusa, kpolo ɗa woy Eliya. Ey ni hak wàa ti cèngni jày gàa gi ba. ³⁴ A ye yèe kà yey, titurum dàa butɗa dawge. A lor ta Yeesu de tolin, ye tâan a tîim titurum nà gi. ³⁵ Gûn ana a titurum de gàa: Yey tâage Hàm mum catmi gi. Raguwan! ³⁶ A ye gbèe yèerra gûn, de kpàawan di Yeesu ey kpolo wàa. Mgbàr maan de tâan baak baak, aw sak koo jâ di nirri a jàk yey rabin gi ba. ³⁷ Ndamji maan ye cisan a gopri, mûsa nit ây de kpàanjin ni aw. ³⁸ Nit kana dii a tîim waw, de bime de gàa: Nitkàlnjum, mi waamde, mu gobu di hàm mum hàm nihun, ey dim kpolo. ³⁹ E rri yey tibûu mòowrre, yooge yooge e bimi, ey yûugu ha tibufkum e fâaw a yèy. Tibûu maan ti woowrre mgban mgban ba, sey to riisu go ’màari. ⁴⁰ Mi waa daw da lor ta wey ha aw yuunu tibûu maan, amma aw kpàaw yuunum ba. ⁴¹ Yeesu de goosi de gàa: Kay, un yòot èca goosum jòlge orri gi! Ha ningàa gim tâanji ni un ya? Ha ni-ngàa gim èf tinîir mum ngam wun ya? De gàaw di too wàa di hàm gi: ’Maawra hàm wey ay gi! ⁴² Hàm ye hèewrra di Yeesu, tibûu de taanu e yûusuwa. Yeesu de kpânu di àyci tibûu nà, de ndòosu di hàm, de hîisu di too wàa. ⁴³ De tâa daw ’nang da nit ây, de ’misin nîir Fay. De naa daw hay koo di wuna a jày tèe Yeesu pî. De gàa daw da lor ta wàa: ⁴⁴ Raksin mbâra yèk yey a tuk wun: Hîi gaw hîiw di Hàm nirri a kàn nit ây. ⁴⁵ Amma a lor ta wàa aw cèngni yèk yey ba. Yèk maan fûu a gin waw, ngam ta aw cèngsi ba. Aw tolu gunsum di Yeesu. ⁴⁶ Dànda ane a tîim lor ta Yeesu, wun ge tâa nit ɓèl a tîim waw ya. ⁴⁷ Yeesu ye cèngni dànda a tinîir waw, de arre hàm kaa e gòyni a ɗàm kpees wàa, ⁴⁸ de gàa daw: Koo wun ngorgu di hàm yey ngam nîir mum ya, ngorimge dim. Nit yey ngorgim dim, ngoru di Too mum tèegima gi. Nit yey hòmge luurra a tîim wun, ey tâage nit ɓèl gi. ⁴⁹ Yuhanna de gàaw di Yeesu: Nitkàlnjum, ot rabe nirri yuunirre tindòom ni nîir wey. Ot njangguge ngam ti futnarre ba. ⁵⁰ Yeesu de goosi de gàaw: Ta un njanggu ba! To nirri ti tâa go nit yiir wun ba, ey nit tâanjum wun ɗi. ⁵¹ Ye tâa unji naasum Yeesu a faktiturum hèerage, de gòyni tinîir wàa e dik a Yerusalem. ⁵² De tèe nit ây cuk a ɗàm kpees wàa. De digin a riiy kana a dees Samariya, ha aw mbangsi gin cita wàa. ⁵³ Amma a ni-riiy ây maan aw ngoru di Yeesu ba, ngam dikɗe ot Yerusalem. ⁵⁴ A lor ta wàa Yakuba ni Yuhanna ye rabin kà yey, de gàan: Nitcoorra, mu yiɗi ot ’naasi ebi a faktiturum e cira, e aksi da nit ây gi yi? ⁵⁵ Amma Yeesu de dûri a gin waw, de kpân daw. ⁵⁶ De tayin a riiy kana. ⁵⁷ Ye digin a orri, nit kana de gàaw di Yeesu: Mi yiɗi mi furrum a gin gum diki lang. ⁵⁸ Yeesu de gàaw: A gbaw ây aw dii ni gooy, a jooy ây ɗa aw dii ni àay waw. Amma Hàm nirri gin kûunum hak wàa cenu ba. ⁵⁹ De gàaw di nit kana: Furrimi! Nit maan de gàaw: Woom mi ir, mi dik mi sipta too mum ɗà. ⁶⁰ Yeesu de gàaw: Woo daw da nit wuta ây aw sipti wurra waw. Amma muy, tay mu sak yèk wûun Fay. ⁶¹ Nit kana ɗa de gàaw: Nitcoorra, mi yiɗi mi furrum. Amma woom mi ir, mi wasra da nit àay rra mum. ⁶² Amma Yeesu de gàaw: To nirri mòo go kàn wàa a gbala naay, e dûr u daarri, ey ti get a tèem wûun Fay ba.

¹ A dat maan Yeesu Nitcoorra de carre nit ây ra jòròs, de tèe daw cuk cuk a ɗàm kpees wàa a riiy ây pî dàne e diki. ² De gàa daw: Tirri nîiye dèy a hèmna, amma a nit njaarra ây aw dii càa. Hû go waan di Tooy hèmna, ha e tèe nit njaarra ây a hèmna wàa gi. ³ Digin! E rri yey mi tèenurre kà hàm mgbâay ây a tîim jàk mòorgum ây. ⁴ Ta un at kurra seede ba, koo kurra tiriici, koo naan. Ta un gòy a orri ngam kèpta nirri ba. ⁵ Un lekɗe go a àay nirri, gàan: Ot lekfarre, ta un tol ba! ⁶ To nirri tâa go nit mbâra a farra, mbâr kèpri wun tâa ge tâa a hak nit maan. Ti tâa go hû go ba, mbâr kèpri wun i ge ir a gin wun. ⁷ Tâan a àay yey leknu gi, riin, njoon jày gaw hîinu gi, ngam nit tèerra tèem gesi e kpàa bèeb tèem wàa. Ta un lekri àay ni àay ba. ⁸ Koo a riiy hâ leknu ya, aw ngotnu go, riin koo jâ iin a ɗàm kpees wun. ⁹ Ndòosin nit àyci ây tâage a riiy maan gi. Gàan da nit ây: Wûun Fay hèera dunge. ¹⁰ To un lek go a riiy kana, aw ngotnu go ba, yuun a ot waw un gàa: ¹¹ Koo sèerrèm riiy wun yey mòogirra dot a nak worro, ot gbòsɗa dunge. Amma cèngnin nge wûun Fay hèerage! ¹² Mi gàanurre: A unji gbèeni, àyrra kiita riiy yey hàwgunu ngota gi, hò ge hòm di kiita Sodom. ¹³ ’Màari waamde, dum riiy Korajin! ’Màari waamde, dum Betsayda! Ngam to tèem kayeefi ây mbirge nà a tîim nit ta wun gi, to tâa go ngin tèerriya a Tiiru ni Sidon, i gaw ini ngin tinîir waw ni mgbapta lurra buhu, ni lèerra tangsama a isi. ¹⁴ A unji gbèeni, kiita wun hò ge hòm àyrra di kiita Tiiru ni Sidon. ¹⁵ Muy mu riiy Kafernahum, mu dànde aa gaw aanjum ha a faktiturum yi? Yaa gaw yaanum ha a gook yengdiya a gin tâam nit ây wutke gi. ¹⁶ De gàa da lor ta wàa: Nit yey rake yèk wun, ra ge rak yèk mum ɗa. Nirri hàwnu go, hà ge hàwim dim ɗa. Nit yey hàwgim gi, hàwe di Too mum tèegima gi. ¹⁷ A nit ây ra jòròs tèe daw nà Yeesu gi, aw ira ni tinîir kâwrra. De gàan: Nitcoorra, koo tindòom ây aw raknage tuy ngam nîir wey. ¹⁸ Yeesu de gàa daw: Mi rabe Seyɗan yaara a faktiturum kà tâyrra buun. ¹⁹ E rri yey mi hîinu mbinum, to un naf go a jòoy ni ndâay, gaw mbitnu jày ba. Un sun ɗa mbinum Seyɗan a yiir wàa pî, cen jày ge mbitnu ba sam. ²⁰ Amma ta tinîir wun e kâwnu ngam tindòom ây raknu tuy gi ba. Sey un kâwsi tinîir wun ngam nîir wun dii kètiya a faktiturum. ²¹ Mgbàr maan tinîir Yeesu mûu ni kâwum Jungci Delliya, de gàa: Mbew, Tooy faktiturum ni deesi, ngam mu fûuni jàk ây gi da nit ây tâage còycumya ni nit ây cèngni jày, mu lòni jàk ây maan da hàm ây. Hû go ɗi, Tooy, ngam kà yey delum dum. ²² Jày pî Too mum hîigimi. Cen nirri cèngnu di Hàm gi ba, sey Tooy. Cen nirri cèngnu di Tooy ba, sey di Tooy ba, sey Hàm ni nit yey Hàm yiɗi e lònu gi. ²³ Yeesu de dûre, de yèe da lor ta wàa gbè, de gàa daw: Mbâri dii a nis wun, ngam un rapɗe jàk yey. ²⁴ Ngam mi gàanurre, a nit ây dèy lòni yèk Fay gi, ni wûun ây aw yiɗi nà rapta jàk yey rapnu gi, amma aw rap ba. Aw yiɗi nà rakta jàk yey raknu gi, amma aw rak ba. ²⁵ Nit kàlnjum yèk mgbèngda Muusa, de dàara ngam e rûfu jày di Yeesu. De gàa: Nitkàlnjum, kà gim mbir ha mi kpàa gûyrra tâam timgbàri ya? ²⁶ Yeesu de gàaw: Ji tâage kètiya a yèk mgbèngda gi ya? Kà rakmu a ye janggum gi ya? ²⁷ De goosi de gàaw: Yiɗi Fak wey Tooy Bèl ni tinîir wey pî, ni jungci is wey pî, ni kpèw kpèw wey pî, ni dànda wey ɗa pî. Yiɗi nit tâanjum wey kà yey yiɗum hak wey. ²⁸ Yeesu de gàaw: Mu goosi mbâra. Mbir hû go, kpàa gum kpàa gûyrra tâam timgbàri! ²⁹ Amma nit maan yiɗi gòynum hak wàa, de gunu: Wun tâage nit tâanjum mum ya? ³⁰ Yeesu de goosu ni rèenjum yèy de gàa: Nit kana ana a Yerusalem e dik a Yeriko. A nit ngorgum jàk ây de kpàawan a orri, de borruwan lurra de lutkuwan, aw woowfa kèle wucu. ³¹ Nit daprum a àay Fay de dàara a ot maan. Ye rabu di nirri gi, de hòme e digi. ³² Nit Lewi yòot nit tèem a àay Fay ɗa ye dàara, de rabuwa, de hòme e digi. ³³ Amma ni-Samariya de kpètɗa a gin maan a dikta wooy wàa. Ye rabu gi, tinîir wàa de àyuwa. ³⁴ De hèera a gin wàa, de kòlu nuki ta wàa ni sòo ticèeri, de iiwrra num e ’mèmu ni ti’mèmni. De naanu a wamde wàa, de ’maaw a àay gin cita ni-wooy ây, de faaw a farra. ³⁵ Ni ndamji ye gàa e diki, de yuuni seede temèrre naan, de hîiw di nit tèem a àay ni-wooy ây, de gàaw: Faaw mbâra di nit yey gi. Mu sàa go jày hòmu di seede yey, a ye gim koyra gi, ji gim jinggum. ³⁶ Yeesu de gunu di nit kàlnjum nà: A tîim nit ây gi taan gi, wun dànmu tâage nit tâanjum di nit yey leke a kàn waw da nit ngorgum jàk ây gi ya? ³⁷ De goosi de gàaw: Mi dànde, nit yey tâage ni ’maton, mbirgu mbâra gi. Yeesu de gàaw: Dik muy ɗa, mu mbir hû go! ³⁸ Yeesu ni lor ta wàa ye digin a orri, de legin a riiy kana. Nikin dii a farra nîir wàa Marta, de ngoru mbâra a àay wàa. ³⁹ Mariya kaa wàa di Marta, ey tâarre a ɗàm kpees Yeesu Nitcoorra, raksirre yèk wàa. ⁴⁰ Amma Marta loorre ni tèerra tèem a àay. De dige e gàaw di Yeesu: Nitcoorra, mu rabu di kaa mum kày woom mi loo a tèerra tèem miy kpolo ba yi? Gàawa e mgbaanjim. ⁴¹ Nitcoorra de gàaw: Marta Marta, mu loosi tinîir wey ni dànda a jàk ây dèy, mu ràmde a tèem ɗa, ⁴² amma sey jày kpolo getki. Mariya carre jàk yey tâage mbâra, koo wuna ge ngosu ba.

¹ Mgbàr maan Yeesu waa Fay a gin kana. Ye gbèese gi, nirri kpolo a tîim lor ta wàa de gàaw: Nitcoorra, kàlnjina waarra Fay, kà yey kàlnji Yuhanna da lor ta wàa. ² Yeesu de gàa daw: Un waarre go, gàan: Tooy, nîir wey e tâa delliya, wûun wey e dàara! ³ Hîina tiriici ha e getna unji pî. ⁴ Yaafina jàk maarra worro, ngam orro ɗa ot yaafirre da nit ây pî mbirgina jàk maarra. Ta mu leknina a ’màar jàk rûfrum ba. ⁵ Yeesu de gàa daw: Nirri kpolo dii go a tîim wun ni sooba, dik go a gin wàa ni tîim tuma, e gàaw: Sooba, hîimda kiri tàarri taan, ⁶ ngam soob mum dàarage wooy a gin mum, jày cenim mi hîiw ba. ⁷ Soob wàa ge goosi a mîis àay e gàawra yi: Ta mu loosim ba, ngam mi fanti nin àay mgban. A hàm ta mum aw kûurre ni miy. Gim kpàaw anda mi hîim ba. ⁸ Mi gàanurre: Koo hàw go anda e hîiw ngam soob wàa ɗi gi, a ge an e hîiw kà yey ge gerru, a gbaarra waar wàa. ⁹ Mi gàanurre: Waan Fay, hîi ge hîinu. Kàmin, kpàa gun kpàa. Gàan “mi lekfarre”, faa ge faarunu nin. ¹⁰ Ngam koo wun waage ya, ngo ge ngori. Nit yey kàmge gi, kpàa ge kpàa. Nit yey gàage “mi lekfarre” gi, nin faa ge faaruwa. ¹¹ Wun tâage too hàm a tîim wun, to hàm wàa waaw go cîici, hîi ge hîiw jòoy kà cîici yi? ¹² Koo waaw go bàat ɗeeki, hîi ge hîiw ndâay yi? ¹³ To un nit ây tâage maktiya un cèngni go hîirra jàk mbâra da hàm ta wun, sakko kà tâa Too wun a faktiturum tâa ge hîi daw Jungci Delliya da nit ây waagu gi ba ya? ¹⁴ Yeesu yuunige tindòom yey iigu muukaw di nirri. Tindòom ye yuuw di nit maan, de kpàa yèerra yèy. De tâa daw ’nang da mûsa nit ây. ¹⁵ Amma a nit ây kana a tîim waw de gàan: Ni mbinum Belsebu wûun tindòom ây yuungi tindòom ây gi. ¹⁶ A nit ây kana de kàmin e lòni daw jàk kayeefi ni mbinum Fay, ngam aw rûfu jày. ¹⁷ Amma ey ye cèngni jàk dànda a tinîir waw, de gàa daw: Koo wûun hâ ɗòlnje cuk ni hak wàa ya, mbo ge mboyi, a nit àay rra wàa ɗa ɗò gaw ɗòlnji aw yaa. ¹⁸ Hû go ɗa, to Seyɗan haarre go gbàaci a hak wàa, wûun wàa kà ge gòy ya? Ngam un gàarre, mi yuuni tindòom ây ni mbinum Belsebu. ¹⁹ To tâa go mi yuungirre tindòom ây ni mbinum Belsebu, ni mbinum hâ yuungin a nit ta wun ya? Hû go aw tâage nit hiitum yèk wun. ²⁰ Amma to tâa go mi yuungirre tindòom ây ni mbinum Fay, hû go ɗa wûun Fay dàarage a gin wun. ²¹ To nit kpèw kpèw faarre go àay ni ndofi, jàk ta wàa tâa ge tâa mbâra. ²² Amma to nit kana hòmu go kpèw kpèw, dàara a gin wàa, sunu go, ngo ge ngoru ndof wàa a gin yey ii tinîir wàa, a ge at jàk ta wàa e mîinjifa da nit ây. ²³ Nit yey tâa ti tâanji ni miy ba, nit yiir mum ɗi. Nit yey tâa ti mgbaanjimde kimjum nit ây ba, ye ge yeskinifa daw. ²⁴ Gàa go tindòom makta yuu go a gin nirri, gî ge gîr a gin tâa sòo cenda ba, e kàm gin wuysum. To ti kpàa go ba, gàa ge gàa: Sey mi ir a àay mum yuuma gi. ²⁵ Ye ira gi, de kpàaw àay maan ɓètiya, mbangsumya mbâra. ²⁶ A dat maan di ge dik e kàmra tindòom ây kana jòròs hòmgu maarra dey gi, ha aw lek a gin nit maan aw tâa a farra. Tâam nit maan hò ge hòmu maarra di woy mgban. ²⁷ Yeesu ye yèe yèk yey, kin kana a tîim mûsa nit ây de bime de gàa: Mbâri diiw di himni yey kpàagum gi, ni nêwri yey âwmu gi! ²⁸ Yeesu de gàaw: Amma jày hòmge gi. Mbâri dii da nit ây rake yèk Fay, mòoge a tinîir waw gi. ²⁹ A ye kimjan mûsa nit ây, Yeesu de ɗaa yèerra yèy de gàa: Yòot nit ây tâarra yey aw yòot maktiya ɗi. Aw kàmde jàk kayeefi, amma gaw kpàa jàk kayeefi kana ba, sey jàk kayeefi yey mbirge ni Yona. ³⁰ Ngam kà yey tâa daw nà Yona nit kayeefi da ni-Niniwe ây, hû go ɗa Hàm nirri tâa ge tâa nit kayeefi di yòot yey. ³¹ A unji kiita wûun nikin yey anga cewci fombina, gò ge gòy a ɗàm kpees yòot nit ây gi, yaa ge yaani daw kiita. Ngam ey dàarage diga gbèeni deesi, ha e rak còycum Salomu. E rri yey nit hòmgu ’mita di Salomu dii ay gi. ³² A unji kiita a ni-Niniwe ây a gaw an a ɗàm kpees yòot nit ây gi aw yaani daw kiita. Ngam a ni-Niniwe ây aw ini tinîir waw ye ragin sakta yèk Yona. E rri yey nit hòmgu ’mita di Yona dii ay gi. ³³ Koo wuna ge mòosi ebi a pittirla e ii a gin fûurriya ba, koo e ii a mîis taang ba, amma ii ge ii njet a gin iirra pittirla, ngam ha a nit lekta ây a àay aw rap kayngum maan. ³⁴ Nis wey dii kà pittirla isi. To nis wey rapɗe go mbâra, is wey lang tâa ge tâa ni kayang. To nis wey ti rapɗe go mbâra ba, is wey ɗa tâa ge tâa ni kulpi. ³⁵ Hû go ii hakkilo, ta kayngum yey tâage a is wey e tâa kulpi ba! ³⁶ Kà yey to is wey pî dii go ni kayngum, cen gin kana ge tâa ni kulpi a farra ba, is wey pî tâa ge tâa kayngumya, kà yey finum kayngum pittirla gi. ³⁷ Yeesu ye gbèe yèerra kà yey, ni-Farisa kana de ’naasu ha aw riinji ni ey. De lege, de tâa a àay e rii nàam. ³⁸ Ni-Farisa nà ye rabu di Yeesu, riirre nàam ti kòl kàn ba, de tâaw ’nang. ³⁹ Yeesu Nitcoorra de gàaw: Un ni-Farisa ây un kòlle dat sey, ni dat taasaw, amma a mîis tinîir wun un mûu ni oori, ni kperrem. ⁴⁰ Un rak ây ɗi! Fay mbangse daarri gi, ey mbangse mîisi ɗa ba yi? ⁴¹ Hû go hîin jày tâage a mîis sek wun kà hîiri da nit èca ây, ha jày pî e tâa kòlliya a gin wun! ⁴² Amma ’màari waanurre, dun ni-Farisa ây, un hîirre jày kpolo a jày kpètke ra, a waas minti, ni bàsi ticèeri, ni hàlci koo tupti. Amma un woofage yèk gòyrra ɗèm a ɗàm kpees Fay, ni yiide ngam wàa. Sey un tèe jàk ây gi, cen woorra woy ngasta. ⁴³ ’Màari waanurre, dun ni-Farisa ây, ngam un yiɗi gin tâam màrra a àay gin kimjum ây, ni kèpri a luumu. ⁴⁴ ’Màari waanurre, ngam un dii ’miskumya kà gebi, nirri ti rabu ba. A nit ây nafki a farra, aw cèngni gebi ɗi ba. ⁴⁵ Nirri kpolo a tîim nit ây kàlnji yèk mgbèngda Muusa de gàaw di Yeesu: Nit kàlnjum, ye gàam kà yey, mu njàmnage dorro ɗa! ⁴⁶ De goosi de gàaw: ’Màari waanurre, dun nit kàlnjum yèk mgbèngda Muusa, ngam un toksirra titokri bûtiya da nit ây, amma un un bangda a titokri maan koo ni mbèerri kàn wun ba! ⁴⁷ ’Màari waanurre, ngam un sèerre geb fûuya da nit ây lòni nà yèk Fay, ɓàrin nà a wosom ta wun! ⁴⁸ Hû go un lònirre tèem wosom ta wun. Tèem waw delnu a tinîir wun. Ngam aw ɓàrgi daw da nit lònum ây maan, un un delsirre geb ta waw. ⁴⁹ Ngam maan Fay gàa nà a còycum wàa: Tèe gim tèefa a gin waw nit lònum ây ni nit tèerra ây. Da nit ây kana ɓà gaw ɓàt daw, da nit ây kana ɗa ɗàa gaw ɗàa daw ɗàari, ⁵⁰ ngam ha Fay e gun a hak yòot nit ây tâarra yey njîim nit lònum ây pî, tuusin nà diga ɗaarra mbangsum kparri, ⁵¹ diga njîim Abel ha njîim Jakariya, yey ɓàrin a tîim gin gûurra jàk gurfum ni àay Fay. Mi gàanurre: Takundi, njîim nit ây gi Fay gu ge gun a hak yòot nit ây tâarra yey. ⁵² ’Màari waanurre, dun nit kàlnjum ây a yèk mgbèngda Muusa, ngam un arre tifaarunum cèngnum jày. Un ni hak wun un lek a farra ba, un njang dawrre ɗa da nit ây yiɗi lekta gi. ⁵³ Yeesu ye yuu a àay maan, a nit còycum ây ni ni-Farisa ây de ɗaawan futa ni sipki, aw gungu jày dèy. ⁵⁴ De faawan, ha aw kpàa yèk maktiya a mgbelyèk wàa, aw mòowa.

¹ Mgbàr maan a nit ây dèy ha gaw kpàaw sakta ba, aw kimja ha aw nafnjirre ni nay. Yeesu de yèe màrra da lor ta wàa, de gàa: Faasin hak wun a njàngna ni-Farisa ây kà gàarra burma waw! ² Jày pî tâage kuptumya, ku ge kupli. Jày pî tâage fûurriya, tâa ge tâa cèngnumya. ³ Hû go jày pî yèenu a kulpi, ra gaw rak a kayang. Yèk yey yaynjunu a tuy a ara gi, bi gaw bim a gbaa. ⁴ Mi gàanurre, un soob ta mum, ta un tol da nit ây gaw ɓàr isi gi ba. Ngam a dat maan gaw kpàaw mbita jàk kana ba. ⁵ Amma kà gim kàlnu wun gun tolgi: Tolin Fay! Ey dii ni mbinum ɓàta, a dat maan e ’màktifa a eb Seyɗan. Mi gàanurre, toluwan dey! ⁶ A ticîit ây kèrèw sàanin dalla cuk ba yi? Koo kpolo a tîim waw tâa hèmtumya a ɗàm kpees Fay ba. ⁷ Koo gimsi hak wun saktiya ɗi kpolo kpolo pî. Hû go ta un tol ba! Un un hòm daw da ticîit ây ba yi? ⁸ Mi gàanurre ɗa, koo wun lònim a ɗàm kpees nit ây ey nit mum ɗi, Hàm nirri ɗa lò ge lòni yèk wàa a ɗàm kpees malayka ta Fay. ⁹ Amma koo wun hàlgim a ɗàm kpees nit ây, miy ɗa hà gim hàlu a ɗàm kpees malayka ta Fay. ¹⁰ Nit yey yèegu yèk makta di Hàm nirri ya, kpàa ge kpàa jàk yaafum. Amma nit yey maasu di Jungci Delliya, ge kpàa jàk yaafum ba. ¹¹ To aw ’maanu go a àay gin kimjum ây, a ɗàm kpees wûun ây ni nit ɓèl ây, ta un loosi tinîir wun un dànji, ji gun goosi un yèe ya gi ba. ¹² Ngam Jungci Delliya kà ge kàlnunu mgbàr maan jày gesi un yèe gi. ¹³ Nirri kpolo a tîim mûsa nit ây de gàaw di Yeesu: Nitkàlnjum, gàaw di ɓèl mum, e mîinji bèeb too worro ni miy. ¹⁴ Yeesu de gàaw: Nirri, wun iigim nit hiitum koo nit mîinjum bèebi a tîim wun ya? ¹⁵ De gàa daw da nit ây: Faasin hak wun a gayrum jàk ây pî! Ngam gûyrra nirri ge tâa ni gbaarra bèeb wàa ba. ¹⁶ Yeesu de yèe daw ni rèenjum yèy, de gàa: Hèmna nit bèebi ’maawrarre tiriici dèy ni wakli. ¹⁷ Nit maan de dàne a tinîir wàa de gàa: Ji gim mbir ya? Ngam cen gin iirra tiriit mum pî tâagim gi ba. ¹⁸ De gàa: Mi cèngni jày gim mbirgi. Aa gim aasifa dooy rra mum, mi jâasi daw ’mitiya, mi kimji a farra tiriit mum ni jàk ta mum pî. ¹⁹ Gàa gim gàaw di hak mum: Hàk mum, mu dii ni jày dèy, yey ge gerrum yeri mûsi jày. Wuysi, rii, njoo, kâwsi tinîir wey! ²⁰ Amma Fay de gàaw di nit maan: Mu ray ɗi! Ni tuma yey jungci wey woo ge woom. Jàk yey kimjum gi, woy wun ge tâa ya? ²¹ Hû go kpè ge kpèrru di nit yey kimji bèebi ngam hak wàa gi, ge tâa ni bèebi a ɗàm kpees Fay ba. ²² Yeesu de gàa da lor ta wàa: Ngam yèk yey mi gàanurre, ta un loosi tinîiri a dànda yèk jungci wun un gàa ji gun rii ya, koo yèk is wun un gàa ji gun mgbap ya gi ba. ²³ Ngam jungci hòmu di tiriici, isi ngaa hòmu di lurra. ²⁴ Gobin daw da tigaak ây, aw còkɗe hèmna ba, aw ripɗe jàk wakli ba, dooy ceni daw ba, amma Fay riisi dawrre. Un gun hòm daw da jooy ây ba yi? ²⁵ Wun ɗi a tîim wun, ge kpàaw e iisirra a yer wàa unji kpolo ni loca dànda tinîir wàa ya? ²⁶ To gun kpàa go mbita jày hòmge luurra ba, ngam jâ loosunu tinîir wun dànda a jàk ây kana ya? ²⁷ Raptin daw da bista jàk ây kày ’mirrin gi, aw fetɗe jòmsi aw yuu ba. Amma mi gàanurre, koo Salomu ni ’mita wàa lang ti haa mgbapta lurra delge kà bista jàk ây gi ba. ²⁸ To Fay delsi dawrre go da bista jàk ây kà yey gi, aw gòyrre unji yey, ni ndamji aw uf aw ’màktifa daw a ebi, kà tâa Fay ge mgbapsunu ba ya, un nit èca goosum ây gi? ²⁹ Ta un loo dànda, ji gun rii ya, ji gun njoo ya ba. Ta un mboysi tinîir wun a yèk maan ba. ³⁰ A nit kparri ây èege yèk Fay aw kàmjirre jàk ây gi pî. Amma un un dii ni Too wun a faktiturum, ey cèngni jàk gayam ta wun pî. ³¹ Hû go kàmin wûun wàa, ey hîi ge hîinu jàk ây kana ɗa. ³² Ta un tol ba, koo ye tâa un dòor kaa ɗi! Ngam delu di Too wun a faktiturum, e hîinu wûun wàa. ³³ Sàanin jàk ta wun, hîin seede maan da nit èca ây! Iin ngam hak wun kurra seede yey tâa ge mgbanti ba, kimjin bèebi a faktiturum yey tâa ge gbèe ba, a gin tâa oori ge hèera e oo ba, a gin tâa fûy ge mboysi ba. ³⁴ Ngam a gin tâa bèeb wun, tinîir wun ɗa a farra ge tâa. ³⁵ ’Mèmin kpàang wun kà nit tèem, pittirla wun ɗa e tâa ɓètiya! ³⁶ Un ɗa tâan kà nit ây waage nit ɓèl waw, ye ge ira a siir ata maanji, ngam dàara go e taa a nin, aw faaru yaale. ³⁷ Mbâri dii da nit tèem ây maan, to nit ɓèl waw koyra go, e kpàa daw aw waawrre gi. Mi gàanurre, takundi, nit ɓèl waw bu ge bunji lurra wàa, e ii daw aw rii, hîi ge hîi daw tiriici. ³⁸ Koo koyra go ni tîim tuma, koo a dat tîim tuma, kpàa daw go aw waawrre, mbâri dii a gin nit tèem ây maan. ³⁹ Ragin: To nit àay cèngni go ngin mgbàr yey ge dàara oori gi, ge woow nirri e lek a àay wàa ba. ⁴⁰ Hû go tâan mbangsumya! Ngam Hàm nirri dàa ge dàara a mgbàr yey tâa un dàn ba. ⁴¹ Piyèr de gunu di Yeesu: Nitcoorra, dorro yèemu yèk rèenjum yey gi yi? Koo da nit ây pî yi? ⁴² De gàaw: Tâan kà nit tèem mbâra ni hakkilo, yey gòynu nit ɓèl wàa e faa da nit tèem ây kana, e hîi daw tiriici e gerri daw a àyrra fek waw. ⁴³ Kâwum diiw di nit tèem maan, to nit ɓèl koyra go, e kpàaw tèerra hû go gi. ⁴⁴ Mi gàanurre, takundi, nit ɓèl wàa gò ge gòynu di nit tèem nà e faa jàk ta wàa pî. ⁴⁵ Amma to nit tèem maan gàa go a tinîir wàa: Nit ɓèl mum ge kîra koyrra ba, e ɗaa lutkum da nit tèem ây kana, nihun ây koo nikin ây, e rii e njoo ha e râmuwa, ⁴⁶ nit ɓèl wàa ko ge koyra unji kana tâa nit tèem ti dàn ba, mgbàr yey tâa ti cèngni ba. Nit ɓèl wàa ’mè ge ’mèmsu a kiita ni nit èca goosum ây, gûu ge gûuwa. ⁴⁷ Nit tèem yey cèngni jày yiɗi nit ɓèl wàa, amma ti mbangsi ha e tèe kà yey yiɗi nit ɓèl wàa ba, kpàa ge kpàa tiluni dèy. ⁴⁸ Amma ni tèem yey tâa ti cèngni jày yiɗi nit ɓèl wàa ba, tèe jày getke luta, lu gaw lurru càa. Koo di wun hîiwan dèy ya, dèy gaw kàm a gin wàa. Koo di wun ’maawran dèy ya, dèy gaw gun a gin wàa, e hòmu di woy mgban. ⁴⁹ Yeesu de gàa: Mi dàara ha mi ’màkti ebi a deesi. Mi yiɗi ngin e goosi yaale! ⁵⁰ Amma sey mi kpàa baptisma ’màari. Hû go mi èf tinîir mum, ha unji maan e kpèrri. ⁵¹ Un dàne mi dàara, ha mi ii tâam mbâri a deesi yi? Mi gàanurre, ti tâa hû go ba, sey ɗòlnjum. ⁵² Mi gàanurre, diga niyey gi a nit ây kèrèw a àay kpolo ɗò gaw ɗòlnji. A nit ây taan ɗò gaw ɗòl ni nit ây cuk, a nit ây cuk ngaa ni nit ây taan. ⁵³ Tooy ɗò gaw ɗòlnji ni hàm nihun, hàm nihun ɗa ɗò gaw ɗòlnji ni too wàa. Nuu hàm nikin ɗò gaw ɗòlnji ni sapri wàa, sapri ɗa ɗò gaw ɗòlnji ni nuu wàa. Nuu ɗò gaw ɗòlnji ni kin hàm wàa, waanji ɗa ɗò gaw ɗòlnji ni nuu maa wàa. ⁵⁴ Yeesu de gàa ɗa da mûsa nit ây: To hiski ana go a lekni unji, un gàarre: Buun yaa ge yaa. Tâa ge tâa hû go. ⁵⁵ To hiski ana go a cewci mgbaala a lekni unji, un gàarre: Dòorròm ii ge ii. Tâa ge tâa hû go. ⁵⁶ Un nit tibiw ây gi! Un cèngni jàk ây lòtki a deesi ni faktiturum. Kà tâa gun cèngni yèk jàk ây mbirge mgbàr yey ba ya? ⁵⁷ Ngam jâ un ni hak wun un cèngni jàk takundi ba ya? ⁵⁸ Mu diknjirre go ni nit lètnjum wey a gin wûun, kàm raknjum ni ey a orri. Ngam ta nit lètnjum wey e ’maam a gin nit hiitum ba. Ta nit hiitum ɗa e hîim a kàn sooje, ey ngaa e leknum a kultuma ba. ⁵⁹ Mi gàamde, gum yuu a farra ba, sey to mu jing go jàk maan pî koo kà luuya ha gbèeni.

¹ Mgbàr maan a nit ây kana aw dàara a gin Yeesu, de kàluwan yèk ni-Galile ây. Pilatu ɓàri dawge a unji gûurra jàk gurfum di Fay. ² Yeesu de goosi de gàa daw: Un dàne, ni-Galile ây maan ɓàrin daw gi, jàk maarra waw hòmgi jàk maarra ni-Galile ây kana pî yi? ³ Mi gàanurre, ti tâa hû go ba. Amma to un ini go tinîir wun ba, un ɗa pî gbee gun gbee kà aw. ⁴ Koo un dànde, a nit ây ra sàm nan nan yaarra daw àay yâktiya a Silowa, ɓàri daw gi, jàk maarra waw a ɗàm kpees Fay hòmgi jàk maarra nit ây pî tâage a Yerusalem gi yi? ⁵ Mi gàanurre, ti tâa hû go ba. Amma un to un ini go tinîir wun ba, un ɗa pî gbee gun gbee kà aw. ⁶ Yeesu de yèe daw ni rèenjum yèy de gàa: Nit kana gage nà jâaci a hèmna wàa. De dàara, e kàm nîirra a jâat maan, amma ti kpàarre ba. ⁷ De gàaw di nit tèem hèmna wàa: E rri yey yeri taan mi dàararre kàmda nîirra a jâat yey, mi kpàararre ba. Njaafa! Ngam jâ ey njangde gin còkta jàk kana ya? ⁸ Nit tèerra tèem wàa de goosi de gàaw: Nitcoorra, woow ni yer yey kpolo, mi cèew a cewci wàa, mi iirra tikara bii. ⁹ Hû go to rep go, yow. To ti rep go ba, yer kana mu njaafa. ¹⁰ Yeesu kàlnjirre a àay gin kimjum a unji wuysum. ¹¹ E rri yey kin kana dii a farra ni àyci yeri ra sàm nan nan. Dii ûurriya, ti kpàawrre gòyrra ti ba. ¹² Yeesu ye rabu gi, de ’naasu de gàaw: Mu kini gi, mi arrumfa àyci wey! ¹³ De banggurra kàn di kin maan. Kini nà de gòye ti yaale, de ’mise nîir Fay. ¹⁴ De ngòlu di nit ɓèl a àay gin kimjum, ngam Yeesu ndòosi nit àyci a unji wuysum, de gàa da nit ây: A unji yira gesi nirri e tèe tèem. Hû go dàaran a unji ây maan, un kpàa ndòosum àyci wun, naa a unji wuysum. ¹⁵ Yeesu Nitcoorra de goosi de gàa: Un nit tibiw ɗi! Koo wuna a tîim wun njelle gus wàa, koo wamde wàa a unji wuysum, e ’maa e njoosa ba yi? ¹⁶ Amma kin yey yòot Abraham ɗi, Seyɗan ’mèmu ni àyci yeri ra sàm nan nan, ti gesi patum a ti ’mèmni wàa a unji wuysum ba yi? ¹⁷ Yeesu ye yèe kà yey, lawsam de mòo daw da nit yiir ta wàa pî. Amma kâwi daw da mûsa nit ây a jàk ây delliya tèe Yeesu gi pî. ¹⁸ Yeesu de gàa daw: Ni ji rèenji wûun Fay ya, ni ji gim getnjini ya? ¹⁹ Rèenji ni yòot mutar luurriya amma ’mitɗe digèrrige, yey arre nirri e còk a daw wàa. De ’mirre, de tâa futifay. A jooy ây aw dàara aw iirra àay waw a farra. ²⁰ Yeesu de gàa bak: Ni ji gim rèenjini wûun Fay ya? ²¹ Rèenji ni njàngna yey arre nikin e hamji a tigeni ɗèeri taan, ha de fâase pî. ²² Yeesu dige a riiy ây ’nang ’nang, futɗe a ot Yerusalem ni kàlnjum yèk Fay. ²³ Nirri kpolo de gunu: Nitcoorra, a nit saarra ây aw cen dèy ba yi? Yeesu de gàa daw: ²⁴ Hàrin ha un lek a nin luurriya! Ngam mi gàanurre, a nit ây dèy kà gaw kàm lekta, amma gaw kpàa ba. ²⁵ To nit àay an go e fanti nin, gò gun gòy a gbaa un ɗaa taarra a nin, un gàa: Nitcoorra, faarina! Goo ge goosi e gàanu: Mi cèngni a gin ana un go ba. ²⁶ A dat maan ɗaa gun ɗaa gàarra: Ot riiye ot njooye a gin kpolo ni muy, mu kàlnji da nit ây a ot ây a riiy worro. ²⁷ Nit àay nà gàa ge gàanu: Mi cèngni a gin ana un go ba. Hèesin a gin mum, un nit tèerra tèem makta ây gi! ²⁸ A farra u gun umi un riisi temgi, a ye gun rap Abraham, ni Isak, ni Yakob, ni nit lònum ây pî a wûun Fay. Amma un ’mà gaw ’màktifa dun a gbaa. ²⁹ A gaw ana a ɓani unji ni lekni unji, ni cewci mgbaala ni cewci riina, tâa gaw tâa aw rii tiriici a wûun Fay. ³⁰ A nit ây tâage u daarri, tâa gaw tâa tiɗàm kpees ây. A nit ây tâage tiɗàm kpees ây ngaa i gaw ir u daarri. ³¹ Mgbàr maan a ni-Farisa ây kana aw dàara aw kàlu jày di Yeesu, de gàawan: Dik a gin kana, ngam Herode yiɗi e ɓàrum. ³² De gàa daw: Digin un sak di gbawa maan: E rri yey mi yuunirre tindòom ây, mi ndòosirre àyci ây unji yey ha ni ndamji, unji taanti gbèe gim gbèesi tèem mum. ³³ Amma yey mi dik unji yey, ni ndamji, ni ndamji yo go ɗa, ngam ge tâa nit lònum yèk Fay e wut a gin kana ba, sey a Yerusalem. ³⁴ Yeesu de gàa bak: Yerusalem Yerusalem, muy mu ɓàre nit ây lòni nà yèk Fay, mu aa daw ni gòoy da nit ây tèera daw Fay a gin wey gi! Nak mèn kàmmi kimjum da nit ta wey kà ɗeeki kimji hàm ta wàa a mîis kapci gi ya? Amma un un yiɗi ba. ³⁵ E rri yey àay wun i ge ir âwa. Mi gàanurre, gun rabim ba sam, ha mgbàr yey gun gàa: Mbâri e tâaw di nit yey dàaga ni nîir Nitcoorra gi!

¹ Yeesu lege a àay nit ɓèl ni-Farisa a unji wuysum ngam e rii nàam. A nit ây tâage a farra aw rapturre. ² Nit kana dii a ɗàm kpees wàa ni àyci futa isi. ³ Yeesu de yèe daw da nit kàlnjum ây a yèk mgbèngda Muusa, ni ni-Farisa ây, de gàa: Orri dii ngam ndòosum nirri a unji wuysum yi? Koo orri cenda ba yi? ⁴ De tâan ɗong. Yeesu de mòow di nit àyci de ndòosuwa, de woow e digi. ⁵ Yeesu de gàa daw bak: Wun ɗi a tîim wun, to hàm wàa koo gus wàa yaa go a gooy, ge yuunu yaale koo a unji wuysum ba ya? ⁶ A nit ây aw kpàaw kày gaw goosu a yèk maan ba. ⁷ Yeesu de yèe daw ni rèenjum yèy, ye rabe da nit ’naasum ây aw catɗe gin tâam màrra a gin riirra tiriici, de gàa daw: ⁸ To nirri ’naasum go a riirra tiriici, ta mu at gin tâam màrra ba. Mba aw ’naasi nit kana hòmum dum ’mita, dàarage. ⁹ To nit àay yey ’naasunu ɗa cuk dàara go e gàam “hîiw gin tâam di nit yey”, hû go muy ni lawsam gum at gin tâam woy daarri. ¹⁰ Amma to aw ’naasum go, sey mu dik mu at gin tâam woy daarri, ngam nit yey ’naasum gi dàara go, gàa ge gàam: Sooba, dàara mu tâa a ɗàm kpeesi! Hû go kpàa gum kpàa mbâri a nis nit ây tâanjunu riinjunu gi. ¹¹ Ngam koo wun ’misi hak wàa ya, Fay luu ge luusuwa. Amma nit yey luusi hak wàa, Fay ’mi ge ’misuwa. ¹² Yeesu de gàaw di nit yey ’naasu gi: Mu kpàa gotiriici ni ndamji koo ni mbona, ta mu ’naasi da soob ta wey ba, koo kaa rra wey, koo kor ta wey ba, koo a nit tâanjum ta wey tâage ni bèebi dèy. Ta mu ’naasi daw ba, ngam ta aw ɗa aw ’naasum aw jinggum ba. ¹³ Amma to mu kpàa go tiriici, ’naasi da nit èca ây, ni nit ây mboy daw isi, ni nit èskum ây, ni râay ây. ¹⁴ Mbâri diimu, ngam jày cenda daw aw jinggum ba. Fay ji ge jinggum a mgbàr gûysum nit ây tâage ɗèm a ɗàm kpees wàa. ¹⁵ Nirri kpolo a tîim nit ây tâanjin gi ye rage yèk Yeesu, de gàaw: Kâwrra tinîiri diiw di nit yey riige tiriici a wûun Fay! ¹⁶ Amma Yeesu de gàa: Nirri mbangse tiriici dèy. De ’naase mûsa nit ây. ¹⁷ Ye gbèe mbangsum tiriici, de tèe nit tèem wàa ha e kàl daw da nit ’naasum ây: Dàaran, ngam jày pî mbangsumya ɗi! ¹⁸ Amma aw pî de ’mèmsin gûn kpolo, de hàwin. Nit màrra de gàa: Mi sàa hèmna, sey mi dik mi gopra. Mi waamde, yaafimi. ¹⁹ Nit kana de gàa: Mi sàa gus ây cuk cuk kèrèw, mi dikɗe mi haani daw batnum. Mi waamde, yaafimi. ²⁰ Nit kana ɗa de gàa: Mi arre maanji. Hû go gim kpàa orri mi difa ba. ²¹ Nit tèem nà de ira, de sagu di nit ɓèl wàa jàk ây gi. Ngòlòm de mòow di nit àay, de gàaw di nit tèem wàa: Yuu kènu a ot ây ni àay ây, mu ’maara daw da nit èca ây ay gi, ni nit ây mboy daw isi, ni râay ây, ni nit èskum ây. ²² Nit tèem nà de dige. Ye koyra gi, de gàaw di nit ɓèl wàa: Nitcoorra, a nit ây aw dàarage, amma gin tâam ngasɗa bak. ²³ Nit ɓèl de gàaw: Yuu a dat àay ây ni a gin ’mèmsi orri, mu ndagi daw da nit ây aw dàara, ngam ha àay mum e mûu. ²⁴ Mi gàanurre: Koo nirri kpolo a tîim nit ’naasum ây gi ge haaw riirra a tiriit mum ba. ²⁵ Mûsa nit ây aw diknji ni Yeesu a orri. De dûre de gàa daw: ²⁶ Koo wun dàaga a gin mum ya, sey e yii di too wàa, ni nuu wàa, ni kin wàa, ni hàm ta wàa, ni kaa rra wàa, ni say rra wàa, ni jungci wàa ɗa. To naa hû go ba, ge kpàaw tâarra lor mum ba. ²⁷ Nit yey tâa ti tok minjum kpiir wàa e furrim ba, ge kpàaw tâarra lor mum ba. ²⁸ Ngam wun ɗi a tîim wun to yiɗi go jâarra àay ɓèl, ge tâa ɗà e dàn to seede wàa ge get go e gbèesini àay maan ba ya? ²⁹ Mba ɗaa go jâarra fur àay maan, ge kpàaw gbèesum ba. A nit ây rapku gi pî wâ gaw wâskuwa, ³⁰ aw gàa: Nit yey ɗaa jâarra àay, amma ti kpàaw gbèesum ba! ³¹ Wûun hâ to yiɗi go dikta bàpri a gin wûun kana, ge tâa ɗà e dàn, to ge kpàaw go haarra ni sooje ta wàa ujinè ra, ni wûun yey dàaga a gin wàa ni sooje ây ujinè ra cuk ba ya? ³² To cèngni go ge kpàaw haarra ba, tèe ge tèefa a gin wûun maan ye tâa dii kpâarriya gi, e gunu raknjum ha aw woofa bàpri. ³³ Hû go tâa koo wuna a tîim wun, ti woofa go jàk ta wàa pî ba, ge kpàaw tâarra lor mum ba. ³⁴ Sama jàk mbâra ɗi. Amma to gbee go ngangji wàa, ni jâ gaw ngaksisi ya? ³⁵ Ge tèe koo jâ ba, koo a hèmna, koo a jàk kana, sey aw ’màktifa a gbaa. Nit yey tâage ni tuk rakni, sey e ragi!

¹ A nit jomnum ây ni nit makta ây dèy, aw hèerage a gin Yeesu ngam aw rak yèk wàa. ² A ni-Farisa ây ni nit còycum ây de hûungin de gàan: Nit yey ngotɗe da nit makta ây mbâra, e riinji ni aw. ³ Yeesu de yèe daw ni rèenjum yèy de gàa: ⁴ Wun ɗi a tîim wun tâage ni mgbâay ây temèrre, to gbeerra go kpolo, ge woofa mgbâay ây ra ngaskàm sàm ngaskàm kpolo a nûri, e dik e kàmra woy gbeege gi ha e kpàasa ba ya? ⁵ To kpàasa go gi, to ge tokra a gûn ni kâwum tinîiri. ⁶ Ye ge kpèsa a àay, ’naa ge ’naasi da soob ta wàa ni nit tâanjum ta wàa, e gàa daw: Dàan ot kâwsi tinîiri, ngam mi kpàasi mgbâay mum yey gbeege gi. ⁷ Yeesu de gàa: Mi gàanurre, hû go kâwum tâa ge tâa a faktiturum, to nit makta kpolo ini go tinîir wàa, ge hòm kâwum da nit mbâr ây ra ngaskàm sàm ngaskàm kpolo, tâa aw cen ni gayam inum tinîir waw gi ba. ⁸ Yeesu de gàa bak: To nikin dii go ni seede ra, gbeerra go kpolo, ge ɓèr ebi e ɓèt àay wàa, e kàm mbâra seede yey gbeegu gi ha e kpàasi ba yi? ⁹ To kpàasi go, ’naa ge ’naasi da soob ta wàa ni nit tâanjum ta wàa, e gàa daw: Dàan ot kâwsi tinîiri, ngam mi kpàasi seede mum yey gbeegim gi. ¹⁰ Yeesu de gàa: Mi gàanurre, hû go ɗa kâwum dii a gin malayka ta Fay, to nit makta kpolo ini go tinîir wàa gi. ¹¹ Yeesu de gàa: Nit kana dii ni hàm nihun ây cuk. ¹² Lor kaa de gàaw di too wàa: Too mum, hîim bèeb yey ge tâa woy mum gi! Tooy de mîinji daw jày tâagi jàk koyrra waw gi. ¹³ A dat maan càa lor kaa nà de kimje jàk ta wàa pî, e sàani e dik a dees kana kpâarriya. A farra de gbeese seede wàa a wâsam maktiya. ¹⁴ Ye lòose bèeb ta wàa pî, fek ɓèl ii a dees maan, de rii ’màari. ¹⁵ De dige e leksi di nit kana a riiy maan. Nit yey ngaa de tèew faarra gicim a nûri. ¹⁶ Ey yiɗi ngin riirra kangsi jàk ây riin a gicim ây, amma aw èenuge. ¹⁷ Ye kpàasi dànda wàa mbâra, de gàa: A nit tèem ây a àay too mum aw dii ni tiriici dèy, amma miy mi wutɗe fey ay gi. ¹⁸ A gim an mi koy a gin too mum, mi dik mi gàaw: Too mum, mi mbire jàk maarra di Fay ni a gin wey ɗa, ¹⁹ mi get ha mu ’naasim hàm wey bak ba. Sey mu iim mi tâa kà nirri kpolo a tîim nit tèem ta wey. ²⁰ De ane de koye a gin too wàa. Ye tâa kpâarriya, too wàa de rabufa ni ’maton, de ’nòofa e dunggu di hàm wàa, de pèwrra tipèwni. ²¹ Hàm wàa nà de gàaw: Too mum, mi mbire jàk maarra di Fay ni a gin wey ɗa, mi get ha mu ’naasim hàm wey bak ba. ²² Amma tooy de gàa da nit tèem ta wàa: ’Maaran kènu lurra woy yey hòmge della gi, mgbapsuwan di hàm mum, leknurran tikòori a mbèerri kàn wàa, leknurran naan a nay! ²³ ’Maaran hàm gusi woy mgbòktiya, gûun, ha ot rii ot kâwsi tinîir worro! ²⁴ Ngam hàm mum dànmi nà wurre gi gûyrre, mi gàarre nà gbeeye, mi kpàasuge. De ɗaan kâwsum tinîir waw. ²⁵ Ɓèl wàa di lor kaa nà koyrarre a hèmna. Ye hèera a gbaa, de rage ti uta ni siirra siiri. ²⁶ De ’naase lori kpolo de gunu: Ji mbirge ya? ²⁷ De gàaw: Kaa wey koyga, too wey de gûu hàm gusi woy mgbòktiya, ngam kpàasu mbâra. ²⁸ De ngòlu di ɓèl wàa, de hàwe lekta a àay. Too wàa de yuura, de waaw e legi. ²⁹ Hàmi nà de gàaw: E rri yey mi tèemde tèem yeri mûsi jày, mi haa yewrra yèk wey ba. ³⁰ Amma hàm wey yey gbeesi bèeb ta wey a gin nikin ây, ye koyra de gûumu hàm gusi woy mgbòktiya. ³¹ Too wàa de gàaw: Muy mu hàm mum, mu tâanjirre ni miy unji pî. Jày tâagim gi pî, woy wey ɗi. ³² Gesi ngin ot ii daprum ot kâwsi tinîir worro mbâra, ngam kaa wey dànmi nà wurre gi gûyrre, mi gàarre nà gbeeye, mi kpàasuge.

¹ Yeesu de gàa daw da lor ta wàa: Nit bèebi dii ni nit faarra jàk ta wàa. Ye rage nge nit maan mboysirre bèeb wàa, ² de ’naasu e gunu: Ji rakmi a hak wey ya? Hîisim ɗerrewol tisakni jàk tèem wey, ngam gum kpàaw tâasum nit faarra bèeb mum ba! ³ Nit faarra bèebi nà de gàa a tinîir wàa: Kà gim mbir ya? Ngam nit ɓèl mum yuunimde a tèem faarra bèeb wàa. Tèerra tumri àyrriya gim mbin ba. Waargum ɗa, lawsam mòo ge mòom. ⁴ De gàa: Mi cèngni jày gim mbirgi ye gaw mànim a tèem faarra bèebi, ha a nit ây aw ngorim a àay waw. ⁵ De ’naase da nit ây furri daw nit ɓèl wàa kiri. De gàaw di nit màrra: Kà atmu kiri a gin nit ɓèl mum ya? ⁶ Nit maan de goosi de gàaw: Taang num temèrre. Nit faarra bèebi nà de gàaw: At ɗerrewol kir wey kènu, tâa ton mu kèr ra kèrèw! ⁷ De gàaw di nit cukti: Muy ɗa, kà tâa kiri a hak wey ya? De goosi de gàaw: Buhu tirri temèrre. Nit faarra bèebi nà de gàaw: At ɗerrewol kir wey, kèr ra nan nan. ⁸ Nit ɓèl de ɓòlmu di nit burma nà a faarra bèebi, ngam tèe ni gâra. Ngam a nit kparri ây ni kor ta waw aw hòme gâra da nit kayang ây gi. ⁹ Yeesu de gàa: Mi gàanurre, mòon sooba di bèeb burma a kparri gi ngam hak wun, ngam ye ge lòo gi, aw ngotnu mbâra a gin tâam timgbàri. ¹⁰ Nit yey mòoge jày càa mbâra, tâa ge tâa nit mòorra mbâra a jày dèy ɗa. Nit burma a jày càa, nit burma ɗi a jày dèy ɗa. ¹¹ Hû go to un mòo go bèeb yey ’mèmsi ni burma mbâra ba, wun ge hîinu bèebi woy takundi ya? ¹² Un mòo go bèeb nit kana mbâra ba, wun ge hîinu woy wun ya? ¹³ Cen nit tèem kpolo ge kpàaw tèerra a gin nit ɓèl ây cuk ba, ngam yii ge yiiw di nit kpolo, yi ge yiɗu di nit kana, ’mè ge ’mèmsi ni nit kpolo, luu ge luusu di nit kana. Gun kpàaw tèerra tèem Fay ni tèerra tèem bèebi ɗa cuk ba. ¹⁴ A ni-Farisa ây aw yiɗirre seede. Ye ragin yèk yey pî, de wâskuwan di Yeesu. ¹⁵ De gàa daw: Un un gòynirre hak wun a ɗàm kpees nit ây kà nit ɗèm ây, amma Fay cèngni tinîir wun. Ngam jày dànin a nit ây jàk ’mitiya ɗi, jàk ɓa hû go ɗi a ɗàm kpees Fay. ¹⁶ Yèk mgbèngda Muusa ni yèk nit ây lòni nà yèk Fay dii tâarre a tîim wun ha unji Yuhanna. Diga mgbàr maan aw saknurre Yèk Kâwrra wûun Fay. Koo wuna hâtɗe e lek a farra. ¹⁷ Amma lòorra faktiturum ni deesi hòme tâarra koyɗum di jày kpolo koo kà luuya, e yaa a yèk mgbèngda gi. ¹⁸ Koo wun màngifa kin wàa e at kin kana, ire tikàm kin. Koo wun atke kin ɗòlnjumya ni maa wàa, ire tikàm kin ɗa. ¹⁹ Yeesu de gàa bak: Nit kana dii ni bèebi dèy, mgbapɗe lurra delliya woy àyrra sàari, ɗèpsirre unji pî a gbaarra bèeb wàa. ²⁰ Nit èca kana nîir wàa Lajaru, dii ni nuki ây a isi lang, kûurre a ɓeeri nit bèebi nà. ²¹ Yiɗi ngin e kpàa jàk riirra a yaatum tàat nit bèebi. A dun ây aw dàararre aw ɗaagi nuki ta wàa. ²² Nit èca nà ye wurre, a malayka ây de arruwan aw ’maaw a gin Abraham. Nit bèebi nà ɗa de wurre, de siptuwan. ²³ Riirre ’màari dèy a gin tâam nit ây wutke gi. De rapti kpâarriya, de kpàaw Abraham ni Lajaru a gin wàa. ²⁴ De ’naase de gàa: Abraham tooy, raptim ’maton, tèewra di Lajaru e buura mbèerri kàn wàa a sòo, e suusinim rèeng mum, ngam mi riirre ’màari dèy a rèeng eb yey! ²⁵ Amma Abraham de gàaw: Hàm mum, ɓaysi mu kpàa nà mbâri a ye tâamu nà beengiya gi. Lajaru ey kpàa nà mgban ’màari, amma kòsòng mgbàawrrage e wuysi, muy ngaa mu riirre ’màari. ²⁶ ’Mòktum yengdiya dii a tîim worro ni un. To nirri yiɗi go e yewfa a gin wun, ge kpàaw ba. To nirri a tîim wun ɗa yiɗi go e yewra ay gi, ge kpàaw ba. ²⁷ Nit bèebi nà de gàa: Mi waamde tooy, tèewfa di Lajaru a àay too mum, ²⁸ ngam a kaa rra mum aw dii a nihun ây kèrèw, ha e sagi daw yèk yey, ngam ta aw dàara a gin riirra ’màar yey gi ba. ²⁹ Abraham de gàaw: Aw dii ni yèk Muusa, ni yèk nit lònum ây. Sey aw ragi daw. ³⁰ Nit maan de gàaw: Amma Abraham tooy, to nirri kpolo a tîim nit ây wutke gi difa go a gin waw, i gaw ini tinîir waw. ³¹ Amma Abraham de gàaw: To aw rak go yèk Muusa ni yèk nit lònum ây ba, koo nirri a tîim nit ây wutke gi gûysi go, gaw ngor ba.

¹ Yeesu de gàa da lor ta wàa: Timgbòlnji diiw di nirri koo ningàa. Amma ’màari waawrre di nit yey iige timgbòlnji gi! ² Hòmu ngin della di nit maan aw cîiwrra ɗekli ɓèl a gûn wàa, aw ’màktufa a sòo ɓèl, ni iirra timgbòlnji di nirri kpolo a tîim nit luusa ây gi. ³ Faasin hak wun! To kor wey mbirum go jàk maarra, yèewa. To ini go tinîir wàa, yaafuwa. ⁴ Gàa go mbirum jàk maarra nak jòròs a unji kpolo, ira go a gin wey nak jòròs e gàam “yèk yey àyimge, mi woofage”, yaafuwa! ⁵ A nit ây tèe daw Yeesu gi de gàan: Nitcoorra, iisirra dot goosum! ⁶ Nitcoorra de goosi de gàa: To un dii go ni goosum koo luurriya kà yòot mutar gi, un gàa go di mgbala yey “uf, mu dik mu gak a sòo ɓèl”, ra ge raknu. ⁷ Wun ɗi a tîim wun, to nit tèem wàa bara go hèmna koo faara go faaci, koyra go e gàaw “dàara yaale mu tâa mu rii” ya? ⁸ Amma hò ge hòmu gàarra di nit maan: Mbangsi mu tèe tèem tiriici, mu hîim mi rii mi njoo. A dat maan muy ɗa mu rii mu njoo. ⁹ Gàa ge gàaw mbew di nit tèem wàa, ngam tèe kà yey gàaw gi yi? ¹⁰ Hû go un ɗa un tèe go jày gàanim dun gi, gàan: Orro ot nit tèem ɓa hû go ɗi, ot tèeye jày gesi nà gi gbè. ¹¹ Yeesu dikɗe a ot Yerusalem, hòmde a tîim dees Samariya ni Galile. ¹² Ye gàa e leki a riiy kana, de kpàanjin ni nit rak is ây ra, aw gòyrre kpâarriya. ¹³ De bimin de gàan: Yeesu Nitkàlnjum, gopna ’maton! ¹⁴ Yeesu de rapti daw, de gàa daw: Digin un kàlni is wun da nit daprum ây! Ye digin gi, rak is waw de ndòo daw. ¹⁵ Nirri kpolo a tîim waw ye rabe is wàa ndòoye, de ira de ’mise nîir Fay ni gûn ɓèl. ¹⁶ De ûu a ɗàm kpees Yeesu, de gàaw mbew. Ey ni-Samariya ɗi. ¹⁷ Yeesu de gàa: Da nit ây ra ndòosim ba yi? U hâ tâan nit ây ngaskàm kpolo gi ya? ¹⁸ Cen nirri irga e ’misi nîir Fay ba, sey ni-wooy gi yi? ¹⁹ Yeesu de gàaw: An mu tay! Goosum a tinîir wey saanumge. ²⁰ A ni-Farisa ây de gunuwan di Yeesu: Ningàa ge dàara wûun Fay gi ya? De goosi de gàa daw: Wûun Fay ge dàara ha nirri e rap ni nisi ba. ²¹ Gaw gàa ɗa “e rri yey ay gi”, koo “e rri yey go” ba. Ngam wûun Fay dii a tîim wun. ²² Yeesu de gàa da lor ta wàa: Mgbàr kana dàa ge dàara, un yiɗi rapta unji kpolo a unji wûun Hàm nirri, amma gun rap ba. ²³ Gàa gaw gàanu “raptin ay gi” koo “raptin ay go”. Ta un dik a farra ba, ta un fut daw ba. ²⁴ Hàm nirri tâa ge tâa a unji dàarra wàa kà yey tâyi buun a cewci kpolo a faktiturum, kaynge ha cewci kana. ²⁵ Amma sey e rii ’màari dèy ɗà, yòot nit tâarra yey hà gaw hàwuwa. ²⁶ Unji dàarra Hàm nirri tâa ge tâa kà yey tâa nà a mgbàr Nuhu. ²⁷ A nit ây aw riirre nà, aw njoorre nà, aw atɗe kin, aw hîirre sapri ta waw aw arri, ha unji yey lege Nuhu a koombowal gi. Mûurra sòo de ii a deesi, de gbeese da nit ây pî. ²⁸ Kà yey tâa nà ɗa a mgbàr Ludu. A nit ây aw riirre, aw njoorre, aw sàarre aw sàanirre jày, aw còkɗe jày, aw jâarre àay. ²⁹ Amma unji yey yuu Ludu a Sodom gi, ngongji ebi yaara a faktiturum, gbeesi daw da nit ây pî. ³⁰ Hû go ɗa ge tâa a unji yey ge lòt Hàm nirri gi. ³¹ Unji maan to nirri dii go a fak àay, amma jàk ta wàa dii a mîis àay gi, ta e lek e asi ba. Hû go ɗa nit yey tâage a hèmna, ta e ira a àay ba. ³² Ɓaysin yèk kin Ludu! ³³ Nit yey kàmgi e saani jungci wàa gi, gbee ge gbeesi. Amma nit yey gbeesi jungci wàa gi, kpàa ge kpàasi. ³⁴ Mi gàanurre, a tuma maan a nit ây cuk kûu gaw kûu a jingi kpolo, Fay a ge atɗa kpolo, e woofa kpolo. ³⁵ A nikin ây cuk nà gaw nàm tirri, Fay a ge atɗe kpolo, e woofa kpolo. ( ³⁶ A nihun ây cuk tâa gaw tâa a hèmna, Fay a ge atɗa kpolo, e woofa kpolo.) ³⁷ A lor ta wàa de gunuwan de gàan: U hâ ge mbir jàk yey ya? Yeesu de gàa daw: A gin tâa wurra jàk ây, a farra gaw kimjin a teel ây.

¹ Yeesu yèe daw ni rèenjum yèy, ngam ha e kàl daw gesi ngin aw waa Fay koo ningàa, ta aw loo ba. ² De gàa: Nit hiitum dii a riiy kana, ey ti tolle Fay ba, lawsam ti mòowrre a gin nirri ba. ³ Kin wurra kana dii a riiy maan. Dàararre a gin wàa koo ningàa, e gàaw: Mgbaanjima a kiita ni nit lètnjum mum! ⁴ Nit hiitum nà de hàwe nak mûsi jày. Amma a dat maan de gàa a tinîir wàa: Koo ye tâa mi tolle Fay ba, lawsam ti mòomde a gin nirri ba, ⁵ amma ngam kin wurra yey loosimde, sey mi mgbaanju a kiita ni nit lètnjum wàa. Ngam to tâa go hû go ba, dàa ge dàara e hamda. ⁶ Yeesu Nitcoorra de gàa: Raksin jày gàa nit hiitum yey maktiya gi. ⁷ Hû go Fay ge mgbaanji daw da nit ây carre gi, taasi a gin wàa tuma ni unji ba yi? Tòo ge tòo e mgbaanji daw yi? ⁸ Mi gàanurre: Mgbaa ge mgbaanji daw kènu. Amma Hàm nirri ye ge dàara gi, ge kpàa goosum a tinîir nit ây a deesi yi? ⁹ Yeesu de yèe daw ni rèenjum yèy da nit ây kana dànge ni hak waw, aw nit ɗèm ây ɗi gi, aw raptirre da nit ây kana kà jàk ɓa hû go. De gàa: ¹⁰ A nit ây cuk aw dige waarra a àay Fay. Nit kpolo ni-Farisa ɗi, nit cukti ngaa nit ngota jomorrgol ɗi. ¹¹ Ni-Farisa de gòye ey kpolo wàa e waa Fay, de gàa: Mi gàamde mbew, Fay, ngam mi tâa kà nit ây kana ba, kà nit ây ngorge jày ba, kà nit makta ây ba, kà nit ây iirge njeenu ba, koo kà nit ngota jomorrgol yey ba. ¹² Mi coorre riirra tiriici nak cuk a asaweerre pî. Mi hîirre jày kpolo a jày kpàami ra pî. ¹³ Amma nit ngota jomorrgol de gòye kpâarriya, ti tooli nis wàa u faktiturum ba, taarre gbetki wàa, e gàa: Fay, gobim ’maton, dim nit mbita jàk maarra gi! ¹⁴ Mi gàanurre: Nit yey koye gbaa wàa, gòyrre ɗèm a ɗàm kpees Fay, hòmu di ni-Farisa. Ngam koo wun ’misi hak wàa ya, Fay luu ge luusuwa. Amma nit yey luusi hak wàa, Fay ’mi ge ’misuwa. ¹⁵ A nit ây de ’maawran hàm kaa ây di Yeesu, ha e bangda daw kàn. A lor ta wàa ye rabin kà yey, de kpânin daw. ¹⁶ Amma Yeesu de ’naasi daw da hàm kaa ây de gàa: Woon daw aw dàara a gin mum, ta un njang daw ba, ngam wûun Fay dii daw da nit ây tâage kà hàm ây gi. ¹⁷ Takundi mi gàanurre, to nirri ti ngor go wûun Fay kà hàm ba, ge lek a farra ba sam. ¹⁸ Nit ɓèl kana de gunu di Yeesu de gàa: Nitkàlnjum mbâra, ji gim tèe ha mi kpàa gûyrra tâam timgbàri gi ya? ¹⁹ De goosi de gàaw: Ngam jâ gàam dim nit mbâri ya? Nit mbâri cen, sey Fay gbè. ²⁰ Mu cèngni yèk mgbèngda wàa: Ta mu ii njeenu ba, ta mu ɓàr nirri ba, ta mu oo oori ba, ta mu yèe yèk rèeng a hak nirri ba, coo too wey ni nuu wey. ²¹ Nirri nà de gàaw: Mi mòo yèk ây gi pî diga tâam lor mum. ²² Yeesu ye rage kà yey, de gàaw: Jày kpolo âygumda. Dik mu sàani jày tâagum gi pî, mu hîi da nit èca ây. Hû go kpàa gum kpàa bèebi dèy a faktiturum. A dat maan dàara mu furrimi! ²³ Nirri nà ye rage yèk yey, de àyu a tinîir wàa ngam jàk ây diiwe dèy ni ɓèlla. ²⁴ Yeesu ye rabu gi, de gàa: Kay, kpâaye dèy ha nit bèeb ây aw lek a wûun Fay gi! ²⁵ Lekta nit bèebi a wûun Fay hòme àyrra ni yuurra ngeeloba a kpongna ndoongor. ²⁶ A nit ây rake yèk yey de gàan: Wun ge kpàa saarra ya? ²⁷ Yeesu de gàa: Jàk yey tâa nirri ge kpàaw mbita ba, Fay mbi ge mbiri. ²⁸ Piyèr de gàaw: E rri yey orro ot woofage jày tâagina pî, ot furrumde. ²⁹ Yeesu de gàa daw: Takundi mi gàanurre: Koo wun woogifa àay wàa, koo kin wàa, koo kaa rra wàa, koo too wàa, koo nuu wàa, koo hàm ta wàa ngam yèk wûun Fay, ³⁰ kpàa ge kpàasirra jàk ây gi nak mûsi jày a tâarra yey, ni mgbàr gûyrra tâam timgbàri ge dàara gi. ³¹ Yeesu de arre lor ta wàa ra sàm cuk kpolo waw, de gàa daw: E rri yey ot dikɗe a Yerusalem. A farra jày pî kèrin nà nit lònum ây a hak Hàm nirri gi gbèe ge gbèe. ³² Ngam hîi gaw hîiw a kàn nit ây èege yèk Fay. Aw wâ gaw wâskuwa, njà gaw njàmuwa, yî gaw yîmurra ticèkti. ³³ Lè gaw lèfu ni timbii, aw ɓàruwa. Amma unji taanti gû ge gûysi. ³⁴ A lor ta wàa aw rak yèk maan mbâra ba. Tâa fûurriya a gin waw, aw cèngni jày gàa daw gi ba. ³⁵ Yeesu hèera a Yeriko. Nit râay tâarre a cewci orri e waargi jày. ³⁶ Ye rage mûsa nit ây aw hòmde gi, de gune: Ji mbirge ya? ³⁷ De kàluwan, Yeesu ni-Nasaret hòmge a orri. ³⁸ De bime de gàa: Yeesu hàm Dawda, gobim ’maton! ³⁹ A nit ây dike a ɗàm kpees Yeesu de kpânuwan e tâa baak baak. Amma ey de iisirra bimda: Hàm Dawda, gobim ’maton! ⁴⁰ Yeesu de gòye, de gàa aw ’maawrra a gin wàa. Ye hèera, Yeesu de gunu de gàaw: ⁴¹ Ji yiɗum mi mbirumda ya? Nit râay nà de gàaw: Nitcoorra, mbirim ha mi kpàasi nis mum! ⁴² Yeesu de gàaw: Nis wey e ɓelsi! Goosum wey ndòosumge. ⁴³ Nis wàa de ɓelse yaale. De furru di Yeesu, ’misirre nîir Fay. A nit ây pî ye rabin jàk yey, aw ɗa de ’misin nîir Fay.

¹ Yeesu ye lege a Yeriko de hòme a tîim riiy maan. ² Nit kana dii a farra nîir wàa Jakayu, wûun nit ngota jomorrgol ây ɗi, bèebi diiwe dèy. ³ Yiɗige e cèngnu di Yeesu. Amma ti kpàaw rapta ba yèk mûsa nit ây, ngam ey nit ràwsiya ɗi. ⁴ De ’nòo a ɗàm kpeesi e naa a fak mgbala, ha e rabu di Yeesu a ye ge hòm a orri gi. ⁵ Yeesu ye kpètɗa a gin maan, de toolufa de gàaw: Muy Jakayu, cira kènu, ngam ni-yey sey mi cir a àay wey! ⁶ De cira yaale, de ngoru di Yeesu ni tinîir kâwrra. ⁷ A nit ây pî rapku gi de hûungin de gàan: Yeesu lege e tâa a àay nit mbita jàk maarra. ⁸ Jakayu de gòye de gàaw di Yeesu: Nitcoorra, e rri yey mîi gim mîinji jàk ta mum ni nit èca ây. To tâa go mi arre jày a gin ni-rri ni burma, hîi gim hîisu nak naan. ⁹ Yeesu de gàaw: Niyey yèk saarra dàara a àay yey, ngam ey ɗa yòot Abraham ɗi. ¹⁰ Hàm nirri dàarage, e kàm e saani jày gbeege gi. ¹¹ Yeesu de iisirra yèerra ni rèenjum yèy da nit ây rake gi. Ngam hèerra a Yerusalem, a nit ây aw dànde wûun Fay lò ge lòt kòsòng. ¹² Hû go de gàa: Nit tiròom kana ane e dik a dees kana kpâarriya, ngam e kpàara wûun ni hak wàa, e koyra. ¹³ Nit maan de ’naase nit tèem ta wàa ra, de hîi daw koo di wuna kurra kpolo, de gàa daw: Tèenin ni seede yey ha mi koyra. ¹⁴ Amma a nit ây tâage a dees wàa aw yiiwrre, de tèefan tèeri a dat wàa, de gàan: Ot yiɗi nit yey e tâa wûun worro ba. ¹⁵ Nit maan a dat ye kpàara wûun gi, de koyra. De gàa aw ’naasa daw da nit tèem ta wàa hîi daw seede nà, ha e raptu jày kpàarran ni seede maan gi. ¹⁶ Nit màrra de dàara de gàaw: Nit ɓèl mum, kurra wey kpolo nà ’maarage kurra ra. ¹⁷ Wûun nà de gàaw: Yowa, mu nit tèem mbâra ɗi, mu tèeni mbâra a jày càa, ii gim iim mu faa riiy ra. ¹⁸ Nit cukti de dàara de gàa: Nit ɓèl mum, kurra wey kpolo nà ’maarage kurra kèrèw. ¹⁹ De gàaw dey ngaa: Ii gim iim mu faa riiy kèrèw. ²⁰ Nit kana de dàara de gàa: Nit ɓèl mum, e rri yey kurra wey kpolo hîim dim gi, mi sûmi mi fûunifa. ²¹ Mi tolumge ngam muy mu nit ngaktiya ɗi, mu atɗe jày tâa mu ii ba, mu ripɗe jày tâa mu còk ba. ²² Wûun nà de gàaw: A yèk wey yèemu gi hii gim hiitum, muy mu nit tèem makta ɗi! Mu cèngni, miy mi nit ngaktiya ɗi, nge mi atɗe jày tâa mi ii ba, mi ripɗe jày tâa mi còk ba. ²³ Ngam jâ tâa mu iifa kurra mum a àay iirra seede ba ya? Hû go mi koyra go ngin, gim kpàaw ngin seede mum iisimdage. ²⁴ De gàa da nit ây gòyge a farra: Arrin kurra yey tâage a gin wàa, un hîiw di nit yey tâage ni kurra ra nà! ²⁵ De gàawan: Nit coorra, nit yey dii nà mgban ni kurra ra. ²⁶ De gàa daw: Mi gàanurre, nit yey tâage ni jày, kpàa ge kpàasirra jàk kana. Di nit yey èege jày, a gaw arru koo jày tâagurra càa gi. ²⁷ Amma da nit yiir ây tâa aw yiɗi mi tâa wûun waw ba, ’maaran daw ay gi, gûun daw a ɗàm kpees mum! ²⁸ Yeesu gbèeye yèerra yèk yey. De mòo orri e ɗàa daw kpeesi ot Yerusalem. ²⁹ Ye hèerra a Betfage ni Betaniya, a cewci gopri yey înuwan gopri korrom, de tèe da lor ta wàa cuk, ³⁰ de gàa daw: Digin a àay ây a ɗàm kpees wun. Un kpèt go a farra, kpàa gun kpàa hàm wamde cîirriya, yey tâa nirri ti haa naarra ba. Njelan, un ’maara. ³¹ To nirri gunnu go: Ngam jâ njelnu ya, gàawan: Nitcoorra dii ni gayam maan. ³² A lor ta wàa cuk tèe daw nà, de kpàan kà yey gàa daw gi. ³³ A ye njelin hàm wamde nà, a nit ta wamde de gunin: Ngam jâ njelnu ya? ³⁴ De gàan: Nitcoorra dii ni gayam maan. ³⁵ De ’maaran hàm wamde nà a gin Yeesu. De iirran lurra ta waw a mârngi wàa. De naanuwan di Yeesu a farra. ³⁶ Ye dige gi, a nit ây de parrin lurra ta waw a orri a ɗàm kpees wàa. ³⁷ Ye gàa e lek a Yerusalem, de cira a gopri korrom. Mûsa lor ta wàa pî de ragin kâwum a tinîiri, de ’misin nîir Fay ni tibimni dèy, ngam tèem mbinum yey rabin a gin Yeesu. ³⁸ De gàan: ’Mita e tâaw di wûun yey dàaga ni nîir Tooy Ɓèl! Tâam mbâri e tâa a faktiturum, ’mita ngaa a gin Fay! ³⁹ A ni-Farisa ây kana tâage a tîim nit ây, de gàawan di Yeesu: Nitkàlnjum, kpâni daw da lor ta wey aw tâa ɗong. ⁴⁰ De goosi de gàa daw: Mi gàanurre, aw tâa go ɗong gi, koo a gòok ây bi gaw bimi. ⁴¹ Yeesu de hèera a àay ây. Ye raptu di riiy maan, de ume. ⁴² De gàa: Ndika mu cèngni ngin niyey jày tâagum mbâr wey! Amma ye tâa mu hàwe, dii fûurriya a nis wey. ⁴³ Unji kana kpè ge kpèrra a gin wey, a nit yiir ta wey hèe gaw hèera a jâarra bàan yey mgbaagum gi ngam tapnjum bàpri, rii gaw riisum ’màari cewci pî. ⁴⁴ Yaa gaw yaani àay rra wey ni hàm ta wey pî, gaw woorra gòoy a fak gòoy ba, ngam mu cèngsi mgbàr yey yiɗi Fay e saanum ba. ⁴⁵ Yeesu de lege a àay Fay, de ɗaa mànda da nit sàangum ây a farra. ⁴⁶ De gàa daw: Gàa a defterre Fay: Aay mum ge tâa àay gin waarra Fay. Amma un un inu di àay yey gook gin tâam nit ngorgum jàk ây. ⁴⁷ Yeesu de kàlnji daw unji pî a àay Fay. A nit ɓèl ta waw da nit daprum ây, ni nit còycum ây, ni toonji ni-Yude ây de kàmin orri aw gbeesuwa. ⁴⁸ Amma aw kpàa kày gaw mbiru ba, ngam a nit ây pî aw ii tuk waw a yèk Yeesu.

¹ Unji kana a mgbàr yey kàlnji Yeesu a àay Fay, sakɗe ɗa Yèk Kâwrra gi, a nit ɓèl ta waw da nit daprum ây, ni nit còycum ây, ni toonji ây de dàaran, ² de gunuwan de gàan: Sakna, ni mbinum hâ tèenum jàk ây gi ya? Wun hîigum mbinum maan ya? ³ Yeesu de goosi de gàa daw: Miy ɗa gu gim gunnu jày kpolo, un kàlimi: ⁴ Iirra baptisma Yuhanna ana a gin Fay naa, malla a gin nirri yi? ⁵ De yèenjin a tîim waw de gàan: To ot gàaw go “ana a gin Fay”, gu ge gunna: Ngam jâ tâa un goosu di Yuhanna ba ya? ⁶ To ot gàa go “a gin nirri ana”, a nit ây pî còo gaw còona ni gòoy. Ngam a nit ây pî aw cèngni a tinîir waw, Yuhanna nit lònum yèk Fay ɗi. ⁷ De goosin de gàan: Ot cèngni a gin ana go ba. ⁸ Yeesu de gàa daw: Yow, miy ɗa gim kàlnu ni mbinum yey tèenim jàk ây gi ba. ⁹ Yeesu de yèe da nit ây ni rèenjum yèy, de gàa: Ni-rri gake hèmna timgbokcum. De hîi da nit bata ây aw baruwa, aw mîinji jàk nîirra ni ey. De taye a dees kana kpâarriya, de tâa a farra. ¹⁰ Cot hapta jàk nîirra ye kpèrre, de tèefa nit tèem a gin nit bata ây nà, ngam aw hîiwra jàk repta woy wàa. Amma a nit bata ây de lutkuwan di nit tèem maan, de woowan kàn kpong. ¹¹ A dat maan nit hèmna de tèesifa nit tèem kana. Dey ngaa de lutkuwan, de njàmruwan, de woowan kàn ɓa hû go. ¹² De tèefa bak nit tèem kana. Dey ngaa de baawan de yuunuwan a dat hèmna. ¹³ Nit hèmna nà de gàa: Kà gim mbir ya? Tèe gim tèefa hàm mum yiɗim gi. Mba gaw coow go dey gi. ¹⁴ Amma a nit bata ây ye rabuwan di hàm maan, de yèenjin a tîim waw de gàan: Ey tâage nit koyrra a hèmna too wàa. Dàan ot ɓàruwa, ngam ha hèmna e tâa woy worro! ¹⁵ De yuunuwan a hèmna, de baruwan. Amma nit hèmna ji ge mbir daw da nit ây gi ya? ¹⁶ Dàa ge dàara e ɓàt daw da nit bata ây gi, e hîi hèmna wàa da nit ây kana. A nit ây ye ragin kà yey, de gàan: Jày kà yey ge tâa ba! ¹⁷ Yeesu de gobi daw de gàa: Ji yiɗi gàarra yèk kèta yey a defterre Fay ya: Gòok yey a nit jâarra ây ’màktifa, e irge gòok tigòyni àay. ¹⁸ Koo wun yaagirra a gòok yey ya, hò ge hòyi. Amma koo di wun yaarra gòok maan ya, nà ge nàmuwa. ¹⁹ A nit còycum ây, ni nit ɓèl ta waw da nit daprum ây de kàmin orri aw mòow di Yeesu unji maan. Amma aw tolle da nit ây, ngam a nit ây aw cèngni, Yeesu yèe rèenjum yèk yey a hak waw. ²⁰ De faawan di Yeesu ni gàra. De tèefan nit sipki ây rèenji ni hak waw kà nit gòyrra ây ɗèm, ngam aw mòow di Yeesu a yèk wàa, ha aw hiiw a kàn ngomna ni mbinum wàa. ²¹ De gunuwan di Yeesu de gàan: Nitkàlnjum, ot cèngni, jày yèemu gi ni jày kàlnjum gi, mbâriya ɗi. Mu raptirre nis nit ây ’nang ’nang ba, amma ni takundi kàlnjum ot Fay. ²² Gesi ha ot hîi jomorrgol di Kaysara wûun ɓèl gi yi, koo ti gesi ba? ²³ Amma Yeesu cèngsi gâra waw, de gàa daw: ²⁴ Kàlnimin seede sarrdi kpolo! Foto hak wun ɗi yey gi, ni kèta nîir wuna? De goosin de gàawan: Foto Kaysara wûun ɗi. ²⁵ Yeesu de gàa daw: Hû go ɗi go, hîisuwan di Kaysara jày tâage jàk wàa, hîisuwan di Fay ngaa jày tâage jàk wàa! ²⁶ Aw kpàa orri kày gaw mòow a yèk wàa a tîim nit ây ba. De tâa daw ’nang a jày goosi daw gi. De tâan ɗong. ²⁷ A ni-Saduki ây kana aw dàara a gin Yeesu. A nit ây maan aw gàarre, gûysum a wurra cen. De gunuwan ²⁸ de gàan: Nitkàlnjum, Muusa kètna kà yey: To nirri dii go ni kaa wàa nihun, to wut go woofa kin hàm cen, sey kaa wàa e koyrra kin maan mba ge kpàa go hàm, ha e gòynu yòot ɓèl wàa wutke gi. ²⁹ A hàm tooy kpolo aw tâaye nà jòròs. Nit màrra arre kin, de wurre hàm cenu ba. ³⁰ Cukti wàa de koyrra kin maan, de wurre ey ɗa. ³¹ Taanti waw ɗa de koyrra kin maan. Hû go aw jòròs pî aw arruge, aw wutkige, aw woofa hàm ba. ³² A dat waw pî kin maan ɗa wurre. ³³ Amma unji gûysum a wurra, kin maan kin wun ge tâa ya? Ngam aw ɗa jòròs aw arruge. ³⁴ Yeesu de goosi de gàa daw: A nit tâarra yey aw atɗe kin, aw hîirre sapri ta waw aw arri. ³⁵ Amma a nit ây getke kpèta a gûysum a wurra gi, ni unji jungci tâam timgbàri, gaw atnji ba. ³⁶ Ngam gaw wusirra wurra ba, tâa gaw tâa kà malayka ây, aw tâa hàm ta Fay, ngam gûysi dawge a wurra. ³⁷ Amma yèk gûysum a wurra, koo Muusa kàli nà yèk yey a waas cikci, ye ’naasu di Tooy Ɓèl: Fak Abraham, Fak Isak, ni Fak Yakob. ³⁸ Ngam Fay ti tâa Fak nit wutiya ây ba, amma Fak nit beenga ây ɗi. Ngam a nit ây pî a gin wàa gûyin. ³⁹ A nit ây a tîim nit còycum ây de gàan: Nitkàlnjum, mbâra gàamu. ⁴⁰ A dat maan aw tolu gunda jày di Yeesu. ⁴¹ Yeesu de gun daw: Kà kà gàan a nit ây, Kristu gi hàm Dawda ɗi ya? ⁴² Ngam Dawda ni hak wàa gàa a defterre Ndûu: Tooy Ɓèl gàa di Nitcoorra mum: Tâa a riina mum, ⁴³ ha mi ii nit yiir ta wey aw tâa gin nafta nak wey. ⁴⁴ To Dawda ’naasu go Nitcoorra, kà tâani hàm wàa gi ya? ⁴⁵ Ye tâa a nit ây pî aw ragurre, Yeesu de gàa da lor ta wàa: ⁴⁶ Faasin hak wun a gin nit còycum ây! Aw yiɗirre gîta ni lurra ɓèl, aw yiɗi a nit ây aw kèbi daw kèpri a luumu. Aw yiɗi tâarra a ɗàm kpeesi a àay gin kimjum, ni gin tâam màrra a riirra tiriici. ⁴⁷ Aw atkirre jày tâagi daw da kin wurra ây. Aw yâksirre waarra Fay a nis nit ây. Kpàa gaw kpàa kiita woy hòmge àyrra.

¹ Yeesu gopɗe a cewci wàa, de rabe nit bèeb ây aw iirre seede a gin hîirra hîiri a àay Fay. ² De rabe ɗa kin wurra ni-èca hîi sunku cuk a gin iirra seede gi. ³ Yeesu de gàa: Takundi mi gàanurre, kin wurra yey a èca wàa hîi jày hòme da hîir nit ây pî. ⁴ Ngam aw pî aw hîi a gbaarra bèeb ta waw, amma ey hîiye a jày tâagu càa ge mgbàani is wàa pî gi. ⁵ A nit ây kana de yèen yèk della àay Fay, kày jâan àay maan ni gòok ây delliya, ni iirra jàk hîir ây ɗa a farra. Yeesu de gàa daw: ⁶ Mgbàr kana dàa ge dàara, gòoy ge ngasɗa a fak gòok kana ba a jàk ây raptunu gi. Kpu gaw kpulgifa pî a deesi. ⁷ A nit ây de gunuwan: Nitkàlnjum, ningàa ge mbir jàk yey ya? Ji ge lòni kpèta jàk yey gi ya? ⁸ Yeesu de gàa: Faasin hak wun, ta aw rûfnu ba! Ngam a nit ây dèy dàa gaw dàara ni nîir mum, aw gàa “miy mi Kristu ɗi”, koo aw gàa “unji gbèeni hèerage”. Ta un furri daw ba. ⁹ To un rak go tapnjum bàpri, koo anda yèy, ta jungci isi e kpulnu ba. Ngam sey jàk ây gi e ɗaa mbita, amma lòorra kparri ɗà kpèrra ba. ¹⁰ De gàa daw: Nit dees ây a gaw an a gin nit dees ây kana, wûun a ge an a gin wûun kana, aw tapnji bàpri. ¹¹ Deesi yûu ge yûu dèy a gin kana ’nang ’nang, fek ɓèl ni àyci ây maktiya ɗa dàa ge dàara. Kayeefi ɓèl ni jàk ây ’nang ’nang lò ge lòt a faktiturum, ha e tolsi da nit ây. ¹² Amma ɗoko jàk ây gi pî e mbirgi, ɗàa gaw ɗàanu ɗàari, mòo gaw mòonu aw hîinu a kàn nit ɓèl ây a àay gin kimjum, aw leknunu a kultuma, ’maa gaw ’maanu a ɗàm kpees wûun ây, ni ngomna ây ngam nîir mum. ¹³ A ’màar ây maan kpàa gun kpàa lònum seedamku. ¹⁴ Ɓaysin a tinîir wun, ta un dànji, kà gun goosi a yèk hak wun gi ya ba. ¹⁵ Ngam hîi gim hîinu yèy ni còycum a jàk ây maan, ha a nit yiir ta wun gaw kpàanu hàanjum aw sunnu ba. ¹⁶ Koo too wun ni nuu wun, ni kaa rra wun, ni kor ta wun, ni soob ta wun hîi gaw hîinu a kàn nit ây. Ɓà gaw ɓàr nit ây kana a tîim wun. ¹⁷ A nit ây pî yii gaw yiinu ngam nîir mum. ¹⁸ Amma koo gimsi kpolo a hak wun ge gbeerra ba. ¹⁹ Ni mòorra mbâra, ni èfta tinîiri kpàa gun kpàa jungci wun. ²⁰ Un rap go Yerusalem mgbaa ni mûsa nit bàpri ây gi, cèngnin mboyrra riiy yey hèerage. ²¹ A nit ây tâage a dees Yude gi, sey aw ɗul aw ’nòo a gopri. A nit ây tâage a Yerusalem, sey aw yuu a nûri. A nit ây tâage a nûri, ta aw lekra a Yerusalem ba. ²² Ngam unji ây maan tâage unji kànsum kiita a riiy yey, ha jày pî gàa a defterre Fay e gbèe. ²³ ’Màari dii daw da kin himni ây ni nikin ây âwsi hàm ây a mgbàr maan! ’Màar ɓèl ii ge ii a dees yey, ni ngòlòm Fay a gin yòot nit ây yey. ²⁴ Ɓà gaw ɓàri daw ni ɓet ɓèl, ’maa gaw ’maa daw ’mèmdiya a dees ni-riiy ây kana pî. A nit ây èege yèk Fay mbo gaw mboysifa Yerusalem. Aw tâa a farra ha mgbàr mbinum nit èca yèk Fay e gbèe. ²⁵ Jàk lòta tâa ge tâa a unji, ni corri, ni tibiskum ây ɗa. Ayrra tinîiri mòo ge mòo da yòot ni-riiy ây a deesi ha aw toli, ngam dûurra ni kèlmum sòo ɓèl. ²⁶ Tinîir nit ây ’nu ge ’nuni, ngam tolnji a jàk ây ge dàara a deesi gi, ngam mbinum a faktiturum yûu ge yûu. ²⁷ A dat maan ra gaw rap Hàm nirri dàararre a titurum ni ’mita wàa, ni mbinum dèy. ²⁸ To jàk ây gi mbitɗe go, anin, toolin hak wun, ngam saarra wun hèerage. ²⁹ Yeesu de yèe daw ni rèenjum yèy de gàa: Raptin jâaci ni futifak ây lang! ³⁰ To gosirre go waasi, un cèngni ni hak wun, cot iiy hèerage. ³¹ Hû go ɗa un un rap go jàk ây gi, cèngnin, wûun Fay hèerage. ³² Takundi mi gàanurre: A nit ây tâarra yey gaw wut ba, sey to jàk ây gi pî mbir go. ³³ Faktiturum ni deesi lòo ge lòo, amma yèk mum ge lòo ba sam. ³⁴ Amma faasin hak wun, ngam ta tinîir wun e loosunu ni gbaarra jàk kparri, ni râmda mbàl, ni dànda a jày ge mgbàani is wun, ha unji maan e lòtɗa dun pus kà tiɓòoni ba. ³⁵ Ngam unji maan dàa ge dàara a gin nit ây tâage a deesi lang. ³⁶ Hû go mûyin, ta un kûu ba! Waan unji pî, ha un kpàa saarra a jàk ây gi pî kèga tâacu, ha un kpàa gòyrra a ɗàm kpees Hàm nirri. ³⁷ Ni unji Yeesu kàlnji dawrre a àay Fay. Ni tuma yuurre e kûu a gopri yey înuwan gopri korrom. ³⁸ A nit ây pî aw dàmrarre a gin wàa a àay Fay, ha aw raguwa.

¹ Daprum riirra tàarri njàngna cen, daprum Paska hèerage. ² A nit ɓèl ta waw da nit daprum ây, ni nit còycum ây de kàmin orri ha aw ɓàru di Yeesu. Amma aw tolle da nit ây. ³ Seyɗan de lege a tinîir Yuda înuwan Iskariyo, nirri kpolo a tîim lor ta Yeesu ra sàm cuk. ⁴ De dige a gin nit ɓèl ta waw da nit daprum ây, ni nit ɓèl ta waw da nit faarra àay Fay, aw yèenji kày ge mbir ha e hîi daw Yeesu a kàn waw gi. ⁵ De kâwi daw tinîiri, de raknjin hîi gaw hîiw seede. ⁶ Yuda de goose, de kàmi orri e mòow di Yeesu ni gâra e hîi daw, ta mûsa nit ây aw cèngni ba. ⁷ Unji daprum Paska mgbàr riirra tiriici njàngna cen, unji gûurra hàm mgbâay, kpèrrage. ⁸ Yeesu de tèe Piyèr ni Yuhanna, de gàa daw: Digin un mbangsina gin riirra tiriit Paska! ⁹ De gunuwan: U hâ yiɗum ot mbangsi ya? ¹⁰ De gàa daw: Un lek go a riiy ɓèl gi, kpàa gun kpàanji ni nirri tokɗe jòong sòo. Furruwan a àay yey ge leki. ¹¹ Gàawan di nit àay maan: Nitkàlnjum gàa ot gunum: U hâ tâa àay gin riirra tiriit Paska ni lor ta mum ya? ¹² Kà ge kàlnunu àay tinjoknjum ɓèl ni gin tâam ây pî. A farra gun mbangsi ot rii. ¹³ Piyèr ni Yuhanna de tayin, de kpàan kà yey gàa daw gi. De mbangsin gin riirra tiriit Paska. ¹⁴ Saa’i riirra ye kpèrra, Yeesu ni nit tèerra ta wàa de tâan a àay maan aw rii. ¹⁵ De gàa daw: Gayimde dèy, ha ot riinji tiriit Paska yey ni un, ɗoko mi lek a riirra ’màari gi. ¹⁶ Ngam mi gàanurre: Gim haasirra riirra tiriit yey ba, ha mgbàr yey ge gbèe jày pî a wûun Fay. ¹⁷ Yeesu de arre kop ni jàk njoorray, de gàa mbew di Fay, de gàa daw: Arrin un njoo a tîim wun. ¹⁸ Mi gàanurre, gim njoosirra sòo repta timgbokcum gi niyey ba, sey ye ge dàara wûun Fay gi. ¹⁹ De arre ɗa tàarri, de gàa mbew di Fay, de cèenje de hîi daw de gàa: Yey tâage is mum, (ge tâa hîirriya ngam wun. Mbirin jàk yey, ngam un ɓaysinimi! ²⁰ Hû go mbire ɗa ni kop a dat riirra tiriici, de gàa: Kop yey tâage jàk raknjunum fûuya ni njîim mum, ge tuu ngam wun gi.) ²¹ Amma e rri yey nit yey ge mòom ni gâra tâanjirre ni miy ay gi. ²² Hàm nirri wu ge wut kà yey gàa Fay a hak wàa. Amma ’màari waawrre di nit yey ge hîiw a kàn nit ây gi! ²³ A lor ta wàa de gunjin a tîim waw: Wun ge tâa nit mbita jàk yey ya? ²⁴ Lètnjum ii a tîim lor ta wàa, wun ge hòm tâarra nit ɓèl a tîim waw ya. ²⁵ Yeesu de gàa daw: A wûun ây a deesi aw ndak dawrre da nit ta waw ni ndakcu. A nit ɓèl ây aw yiɗi, a nit ây aw ’naasi daw nit mbâr ây tèege tèem mbâri. ²⁶ Amma un ta un mbir kà aw ba. Nit yey hòmge ’mita a tîim wun, sey e tâa kà nit luurriya. Nit tiɗàm kpeesi sey e tâa kà nit tèem. ²⁷ Ngam wun hòmge ’mita ya, nit yey tâage e rii gi yi, koo nit yey tèege tèem tiriici yi? Naa nit riirra ɗi naa? Amma miy mi tâarre a tîim wun kà nit tèem. ²⁸ Un un tâanjige ni miy a riirra ’màar mum diga màrra. ²⁹ Kà yey hîim Too mum wûun, hû go hîi gim hîinu dun ɗa, ³⁰ ha un riinji un njoonji ni miy a wûun mum, tâa gun tâa a gbaat ây un hiiti da yòot ni-Israyel ây ra sàm cuk. ³¹ Yeesu de gàaw: Simon Simon, Seyɗan gune mbinum ha e teklunu kà teklum gasa tirri. ³² Amma mi waa Fay ngam wey, ngam ta goosum wey e lòo ba. Mu ira go, kpèwsi daw tinîiri da kor ta wey! ³³ Piyèr de gàaw: Nitcoorra, di gim diknji ni muy koo a kultuma, koo a wurra. ³⁴ Yeesu de gàaw: Piyèr, mi gàamde, tuma yey tigòmja ge bim ba, sey to mu hàlim go nak taan, mu gàa mu cèngnim ba. ³⁵ Yeesu de gàa daw: Ye tèenim dun nà mgban kurra seede cen, koo kurra tiriici, koo naan, un haa èerra jày yi? De gàawan: Oow, ot haa èerra koo jâ ba. ³⁶ De gàa daw: Amma kòsòng to nirri dii go ni kurra seede, ni kurra tiriici, sey e arri. To nirri èe go ɓet ɓèl, sey e sàani lurra wàa, ha e sàa ɓet maan. ³⁷ Ngam mi gàanurre, gesi mi gbèesi jàk yey gàa a defterre Fay: Aw saguge a tîim nit makta ây. Ngam jày gàa defterre Fay a hak mum gi sey e gbèe. ³⁸ De gàawan: Nitcoorra, e rri yey ɓet ɓèl ây cuk. De gàa daw: Gerre. ³⁹ Yeesu yuu e dik a gopri korrom kà rûurra wàa. A lor ta wàa de furruwan. ⁴⁰ Ye kpèrre a farra, de gàa daw: Waan Fay, ngam ta un lek a jàk rûfta ba. ⁴¹ Yeesu de hèesirra càa, kpâarriya kà gin còorra gòoy. De gbâyge e waa Fay, ⁴² de gàa: Tooy, to mu yiɗi go, hèenimfa kop ’màar yey gi. Amma mbir kà yey yiɗum muy, naa kà yey yiɗi miy.( ⁴³ Malayka de ana a faktiturum de lòrrurra, e kpèwsuwa. ⁴⁴ Yeesu ye tâa ni àyrra tinîiri, de rîise e waa Fay bak. Dòorròm wàa de yure a deesi kà ɗuurra njîim.) ⁴⁵ Ye ane a waarra Fay, de ira a gin lor ta wàa, de kpàa daw aw kûurre, ngam tinîir waw ày dawrre. ⁴⁶ De gàa daw: Ngam jâ kûunu ya? Anin un waa Fay, ngam ta un lek a jàk rûfta ba. ⁴⁷ Yeesu ye yèe bak kà yey, mûsa nit ây aw dàanjani Yuda, nirri kpolo a tîim lor ta wàa ra sàm cuk. De ɗàara daw kpeesi, de hèewrra di Yeesu, de kabuwa. ⁴⁸ Yeesu de gàaw: Yuda, muy ni tikapni gum hîi daw Hàm nirri aw mòow yi? ⁴⁹ A nit ây tâanji ni Yeesu ye rabin jàk yey gàa e mbir gi, de gàawan: Nitcoorra, ot njaa daw ni ɓet ɓèl yi? ⁵⁰ Nirri kpolo a tîim waw de njaa tuk riina di nit tèem wàa di nit ɓèl daprum. ⁵¹ Yeesu de gàa daw: Woofan mbita kà yey! De banggurra tuk nit maan, de ndòosuwa. ⁵² De gàa daw da nit ɓèl ta waw da nit daprum ây, ni nit ɓèl waw da nit faarra àay Fay, ni toonji ây dàaga a gin wàa gi: Un yuura ni ɓet ɓèl, ni suu ây, un mòom mu gàa mi nit ngorgum jày ɗi yi? ⁵³ Unji pî mi tâanjirre nà ni un a àay Fay, un haa pata kàn un mòom ba. Amma yey tâage unji wun, ni unji mbinum kulpi. ⁵⁴ Ye mòowan di Yeesu gi, de ’maawan a àay nit ɓèl daprum. Piyèr futfa dawrre kpâarriya. ⁵⁵ A nit ây aw yee ebi a ɓeeri aw awi. Piyèr de lege e tâa a tîim waw. ⁵⁶ Sapri tèerra tèem dii a àay maan, de rabu di Piyèr tâarre a cewci ebi, de gobu teng teng de gàa: Nit yey ɗa tâanjirre nà ni nit yey ’maaran gi. ⁵⁷ Amma Piyèr de hàle de gàa: Mu kini gi, mi cèngnu di nit maan ba! ⁵⁸ A dat maan càa, nit kana de rabu di Piyèr de gàaw: Muy ɗa mu nit kpolo ɗi ni aw. Amma Piyèr de gàaw: Miy ɗi ba. ⁵⁹ Ye tâasirra càa, nit kana de yèe ni sembe de gàa: Takundi, nit yey ɗa tâanjirre nà ni nit maan, ngam ey ni-Galile ɗi. ⁶⁰ Piyèr de gàa: Mu nirri gi, mi cèngni jày gàam gi ba. Ye yèe kà yey, tigòmja de bime yaale. ⁶¹ Yeesu Nitcoorra de dûra de raptu di Piyèr. Piyèr de ɓaysi yèk Nitcoorra gàaw nà: Unji yey ɗoko tigòmja e bim gi, hà gum hàlim nak taan. ⁶² De yuu a gbaa, de ume ti umni àyrriya. ⁶³ A nit ây faagu di Yeesu de wâskuwan, de cubuwan. ⁶⁴ De burruwan nisi, de lòsuwan de gàan: Lònina, wun lòskum go! ⁶⁵ De njàmruwan ni yèk ây dèy. ⁶⁶ Ndamji ye kayge gi, a toonji ta waw da ni-Yude ây, ni nit ɓèl ta waw da nit daprum ây, ni nit còycum ây de kimjin. De ’maawan di Yeesu a tîim nit raknjum ta waw. ⁶⁷ De gunuwan: Muy tâage Kristu gi yi? Kàlna! De gàa daw: Koo to mi kàlnu go, gun goosi ba. ⁶⁸ To mi gunnu go jàk kana ɗa, gun kàlim ba. ⁶⁹ Diga kòsòng Hàm nirri tâa ge tâa a riina Fak mbinum. ⁷⁰ Aw pî de gàan: Muy tâage kan Hàm Fay gi yi? Yeesu de goosi de gàa daw: Kà yey gàanu gi, miy tâage ey. ⁷¹ De gàan: Ji got kàm nit seedum ây bak ya? Ngam orro ot rage yèk yey a mgbelyèk wàa.

¹ Mûsa nit ây pî de anin de ’maawan di Yeesu a gin Pilatu. ² De ’maafan yèy a hak Yeesu de gàan: Ot kpàawe nit yey mboysirre nit ta worro, njangnarre hîisum jomorrgol di Kaysara wûun ɓèl gi. Gàarre ɗa, ey tâage Kristu wûun ni-Yude ây. ³ Pilatu de gunu de gàa: Muy tâage wûun ni-Yude ây gi yi? Yeesu de goosi de gàaw: Kà yey gàamu muy. ⁴ Pilatu de gàa daw da nit ɓèl ta waw da nit daprum ây, ni mûsa nit ây: Mi kpàa yèk makta koo kpolo a gin nit yey ba. ⁵ A nit ây de iisirran ndèksum yèy de gàan: Nit yey yûusirre da nit ây, kàlnji dawrre jày a dees ni-Yude ây pî, diga Galile ha dàaga ay gi. ⁶ Pilatu ye rage yèk yey, de guni to nit maan ni-Galile ɗi go. ⁷ Ye cèngni, Yeesu ana a dees wûun Herode, de insufa a gin Herode, ngam ey ɗa dii a Yerusalem mgbàr maan. ⁸ Herode ye rabu di Yeesu, de kâwu dèy ngam kàmurre diga mgban e rabuwa, ngam rage nà jày dèy a hak wàa. E dàni, e rabu ɗa a tèerra jàk kayeefi. ⁹ De gunu jàk ây dèy. Amma Yeesu ti goosi koo jâ ba. ¹⁰ A nit ɓèl ta waw da nit daprum ây, ni nit còycum ây tâage a farra de ’maaran yèk àyrriya a hak Yeesu. ¹¹ Herode ni sooje ta wàa de njàmruwan di Yeesu, de wâskuwan. De mgbapsu lurra woy di el di el, de inu a gin Pilatu. ¹² Herode ni Pilatu de mòonjin sooba unji maan. Ngam mgban nà aw a nit yiinjum ây ɗi. ¹³ Pilatu de ’naasi nit ɓèl ta waw da nit daprum ây, ni toonji ây, ni mûsa nit ây aw kimja. ¹⁴ De gàa daw: Un ’maama nit yey kà nit rûfrum nit ây. E rri yey mi kàme yèk hak wàa a ɗàm kpees wun, mi kpàarra jày getke mi iiw kiita a yèk ây ’maara un koo kpolo ba. ¹⁵ Koo Herode ɗa ti kpàaw yèk kiita maan ba. Yòo maan de insura a gin worro. Nit yey ti mbir koo jâ getke aw ɓàru ba. ¹⁶ Hû go lè gim lèfuwa, mi woowa.( ¹⁷ (Ngam Pilatu woo dawrre nit kultuma kpolo a daprum Paska kpèrra go lang.) ¹⁸ Amma aw pî aw ’mèmsi gûn kpolo, de bimin aw gàa: Ɓàru di nit yey, mu woona Barabba! ¹⁹ Aw leknu nà di nit maan a kultuma, ngam ɗàa ɗàari a Yerusalem, ɓàre nirri ɗa. ²⁰ Pilatu de gun daw bak da nit ây, ngam yiɗi e woow di Yeesu. ²¹ Amma aw de bimin de gàan: Gbalu a minjum kpiiri, gbalu a minjum kpiiri! ²² Pilatu de gàa daw nak taanti: Kà rri ya, maarra ji mbire ya? Mi kpàaw jày getke ha aw ɓàru gi ba. Lè gim lèfuwa mi woowa. ²³ A nit ây de ndaguwan, de bimin de gàan, aw gbalu a minjum kpiiri. Gbaarra bimda waw de sunu di Pilatu. ²⁴ De gàa: E tâa kà yey yiɗunu gi ²⁵ De woo daw nit yey tâage a kultuma nà ngam ɗàari ni ɓàta nirri gi, nit yey gunuwan gi. De hîi daw Yeesu ha aw mbiru kà yey yiɗin gi. ²⁶ Ye ’maawan di Yeesu, de kpàanjin ni Simon ni-Kirene, koyrarre a hèmna. De toksurran minjum kpiiri ha e tokfa a dat Yeesu. ²⁷ Mûsa nit ây dèy de furruwan di Yeesu, a nikin ây aw umde aw taasirre ngam wàa. ²⁸ Yeesu de dûri de gàa daw: Un kin ni-Yerusalem ây, umimin ba! Amma umin ngam hak wun ni hàm ta wun. ²⁹ Ngam unji kana dàa ge dàara ye gaw gàa: Kâwum dii daw da kin ndur ây, ni himni kin ây tâa aw haa kpàarra hàm ba, ni nêwri ây tâa aw haa âwsum hàm ba! ³⁰ Mgbàr maan gàa gaw gàa di gopri: Yaara a gin worro! Aw gàa di kpòosi: Kuptina! ³¹ Ngam to aw mbitɗe go kà yey a futifak jèngrèngya, kà ge tâa a kpiir kòyrriya ya? ³² De ’maafan nit makta ây cuk, aw ’mèmsi daw ni Yeesu ngam aw ɓàt daw. ³³ Ye kpèrrin a gin înuwan Sek Hay, de gbaluwan di Yeesu a minjum kpiiri a farra ni nit makta ây nà, kpolo a cewci riina wàa, kpolo ɗa a cewci mgbaala wàa. ³⁴ (Yeesu de gàa: Tooy, yaafi daw, ngam aw cèngni jày mbirin gi ba.) De mîinjin lurra ta wàa ni haarra saasa. ³⁵ A nit ây aw gòyrre aw gopɗe. A nit ɓèl ta waw da ni-Yude ây de njàmruwan di Yeesu de gàan: Saanige da nit ây kana, sey e saani hak wàa ɗa, to ey tâage go Kristu catiya a gin Fay gi. ³⁶ A sooje ây ɗa de hèeran de wâskuwan. De hîiwan sòo mgbewrriya, ³⁷ de gàan: To muy tâage go wûun ni-Yude ây, saani hak wey! ³⁸ Aw kère yèk wàa a fak kpiiri kà yey: Ey tâage wûun ni-Yude ây. ³⁹ Nirri kpolo a tîim nit makta ây nà gbalnjin daw ni Yeesu gi, de njàmuwa de gàa: Muy mu Kristu ɗi ba yi? Saani hak wey ni orro ɗa! ⁴⁰ Amma nit cukti de yèew de gàa: Muy gum tol Fay ba yi, ye tâa kiita wey dii kpolo ni nit yey ba yi? ⁴¹ Orro ot kpàa kiita kà yey tâa tèem worro. Amma ey ti mbir jàk maarra koo jâ ba. ⁴² De gàaw di Yeesu: Ɓaysim a ye gum lek a wûun wey! ⁴³ Yeesu de gàaw: Takundi mi gàamde, niyey tâa gum tâanji ni miy a Paradi, a wûun Too mum. ⁴⁴ Unji a tîim hay, kulpi de kupti deesi lang ha unji mbona. ⁴⁵ Unji ye kupti kà yey, jimda jàk joorra timinjunum a àay Fay de ngarre kpaak a tîim. ⁴⁶ Yeesu de bime ɓàng de gàa: Tooy, mi woo jungci mum a gin wey! Ye yèe kà yey, de woofa yîngda. ⁴⁷ Nit ɓèl waw da sooje ây ye rabe jàk yey mbirge gi, de ’mise nîir Fay de gàa: Takundi, nit yey nit ɗèm ɗi a ɗàm kpees Fay! ⁴⁸ Mûsa nit ây kimji ngam gopta yèk maan, ye rabin jày mbirge gi, de koyin, aw cupsirre gbetki. ⁴⁹ A nit ây pî tâanji nà ni Yeesu, ni nikin ây futku nà diga Galile aw gòyrre kpâarriya, aw raptirre jàk ây gi. ⁵⁰ Nit kana nîir wàa Yosef, nit raknjum wûun ɗi, nit ɗèm nit mbâra, ⁵¹ waarre wûun Fay. Ey ana a Arimatiya a dees Yude. Ti raknji ni nit ây mòogu di Yeesu, ni jày mbirin gi ba. ⁵² De dige a gin Pilatu, de waaw is Yeesu ha e sipti. ⁵³ De cini is Yeesu a minjum kpiiri, de forgu ni jàk joorra woy ɓèl burriya, de iiw a mîis geb cèerriya a kpata. Geb maan aw haa iirra nirri a farra ba. ⁵⁴ Jàk yey mbire ye hèera mgbàr mbangsum jày ngam unji wuysum. ⁵⁵ A nikin ây dàaga nà ni Yeesu diga Galile, de futfan di Yosef. Aw rabe gebi, kày iiwan is Yeesu gi. ⁵⁶ De koyin, de mbangsin urrdi ni num mgbirgumya. De wuysin a unji wuysum kà yey gàa yèk mgbèngda gi.

¹ Ni ndamji birit a dat unji wuysum, mgbàr màrra a asaweerre, a nikin ây de digin a gebi, de ’maan num mgbirgumya nà mbangsin gi. ² De kpàawan gòok ɓèl a nin gebi gi kiwrumya. ³ Ye legin a gebi nà, aw kpàaw is Yeesu Nitcoorra ba. ⁴ De kpul daw jungci isi, ye rabin nit ây cuk ni lurra di el di el, aw gòyrre a cewci waw. ⁵ A nikin ây nà de tolin, de ciinjin nis waw a deesi. A nit ây nà cuk gi de gàan daw: Ngam jâ kàmnu nit beengiya a tîim nit ây wutke gi ya? ⁶ (Ti cenda ay ba, gûysige.) Ɓaysin yèk yey yèenu nà ye tâa a Galile gi, ⁷ ye gàa, sey aw hîiw di Hàm nirri a kàn nit makta ây, aw gbalu a minjum kpiiri, unji taanti gû ge gûysi. ⁸ A nikin ây de ɓaysin yèk Yeesu. ⁹ De anan a gebi de iran, de sagin jày rabin gi pî da nit ây tèe daw Yeesu ra sàm kpolo, ni nit ây kana ɗa. ¹⁰ A nikin ây sake yèk yey da nit ây tèe daw Yeesu gi, aw Mariya sàni-Magdala, ni Yowanna, ni Mariya nuu wàa di Yakuba, ni nikin ây kana tâanjin ni aw gi ɗi. ¹¹ A nit ây rake yèk yey gi, de tâa daw kà yèk ɓa hû go, aw goosi ba.( ¹² Amma Piyèr de ane e ’nòo a gebi, de ûu e gop a gebi nà. De rabe tifokrunum wurra gbè. Ye koye, de tâaw ’nang a jàk ây rabe gi.) ¹³ Unji maan a nit ây cuk aw dikɗe a riiy kana înuwan Emmawus, kpâanji ni Yerusalem kilomèeta ra sàm kpolo. ¹⁴ Aw yèenjirre a jàk ây mbirge nà gi. ¹⁵ A ye yèenjin gi aw gunjirre a tîim waw, Yeesu ni hak wàa de hèera e diknji ni aw. ¹⁶ Amma jày kupti daw nisi, aw cèngsu ba. ¹⁷ Yeesu de gun daw: Yèk ji yèenjunu a tîim wun a orri ya? De gòyin ni ngòlnji. ¹⁸ Nit kana nîir wàa Kileyopa de goosi de gàaw: Muy tâage kpolo a Yerusalem, mu cèngni jày mbirge a riiy yey a unji ây gi ba yi? ¹⁹ Yeesu de gun daw: Ji mbirge ya? De gàawan: Jày mbirge a hak Yeesu ni-Nasaret gi, nit yey nit lònum yèk Fay ɗi, dii ni mbinum a tèem ni yèerra yèy a ɗàm kpees Fay, ni nit ây pî. ²⁰ A nit ɓèl ta waw da nit daprum ây, ni toonji ta worro aw hîigu ngam hiitum, aw hiitu kiita wurra. De gbaluwan a minjum kpiiri. ²¹ Orro ot dànde nà, nge ey tâage Nitsaanum ni-Israyel ây. A jàk ây gi pî, unji taanti niyey diga ye mbire jàk maan gi. ²² A nikin ây kana ɗa a gin worro aw kpulsina jungci isi. Ye digin a geb wàa ni ndamji birit, ²³ aw kpàaw is wàa ba, aw koyra aw gàana, a malayka ây aw lòtɗa dawge, aw gàa daw ey dii beengiya. ²⁴ A nit ây kana tâanje ni orro aw dige a gebi, de kpàan kà yey gàan nikin ây nà, amma dey aw rabu ba. ²⁵ Yeesu de gàa daw: Un cèngnum jày kpâanuge, tinîir wun ndège goosum a jàk ây pî yèen nà nit lònum ây gi! ²⁶ Ti gesi Kristu e rii ’màar yey, ha e lek a ’mita wàa ba yi? ²⁷ De kàl daw yèk yey tâage kètiya a hak wàa, diga yèk Muusa ni yèk nit lònum ây ha yèk defterre Fay pî. ²⁸ Ye hèeran a riiy yey digin gi, de mbire mu gàa ɗàm kpeesi gàa e digi. ²⁹ A nit ây nà cuk gi de waawan de gàan: Tâanji ni orro, ngam mbona ciiye, tuma gàarre e lugi. Yeesu de goose, de tâanji ni aw. ³⁰ Ye tâan aw rii tiriici, Yeesu de arre tàarri, de gàa mbew di Fay, de mîinje de hîi daw. ³¹ Kòsòng nis waw da nit ây cuk nà de kuple, de cèngsuwan. De sèerre a nis waw. ³² De gàan: Tinîir worro ti mâana ye yèenji ni orro a orri, ye lònina ɗa yèk defterre Fay gi ba yi? ³³ De anin yaale aw koyra a Yerusalem. De kpàan lor ta Yeesu ra sàm kpolo aw kimjige ni nit ây tâanjin ni aw. ³⁴ A nit ây tâage a farra de gàan: Takundi, Nitcoorra gûysige, lòrrurra di Simon. ³⁵ A nit ây nà cuk gi de sagin daw jày mbirge a orri, kày cèngsuwan ɗa di Yeesu a mîinjum tàarri. ³⁶ A ye yèen yèk yey gi, Yeesu ni hak wàa gòyrre a tîim waw. ³⁷ De malin de tolin, ngam aw dàne aw rabe jungci ni-gebi. ³⁸ Yeesu de gàa daw: Ngam jâ tâanu ’nang, hàanjunu a tinîir wun ya? ³⁹ Gobuwan kàn mum, ni nak mum, miy ɗi! Mâamin, raptimin, ngam jungci ni-gebi cen ni jooci, ni kòpti kà yey rapnu gi ba.( ⁴⁰ Ye gàa kà yey, de kàlni daw kàn ta wàa ni nak ta wàa.) ⁴¹ Amma ye tâa a lor ta wàa ɗà aw goosi ba, ngam kâwrra tinîiri, tâa dawrre ɗa ’nang, de gàa daw: Tiriici diinu ay gi yi? ⁴² De hîiwan ngirra cîici jumdiya. ⁴³ De arre de rii a nis waw. ⁴⁴ De gàa daw: Gesi yèk yey yèenim dun nà ye tâanjim ni un e gbèe, yey yèe a hak mum a defterre Muusa, ni nit ây lòni nà yek Fay, ni defterre Ndûu. ⁴⁵ De faari daw dànda waw, ha aw cèngni yèk defterre ây. ⁴⁶ De gàa daw: Kà yey gàa a defterre Fay: Sey Kristu e rii ’màari, e gûysi a wurra unji taanti, ⁴⁷ sey aw sak yèk inum tinîiri, ni yaafum jàk maarra, aw ɗaa sakta ni nîir wàa a Yerusalem, ha a gin yòot ni-riiy ây kana pî. ⁴⁸ Un un nit seedum ây ɗi a jàk ây gi. ⁴⁹ Tèe gim tèera dun jàk yey mòonjini Too mum kàn ni un. Amma tâan ay a Yerusalem, ha un kpàa mbinum yey ge ana a faktiturum. ⁵⁰ Yeesu de ’maa daw da lor ta wàa a Betaniya. De parre kàn wàa, de mbârsi daw. ⁵¹ Ye mbârsi daw gi, de ɗòlnje ni aw, de naase a faktiturum. ⁵² De coowan, de iran a Yerusalem ni tinîir kâwrriya dèy. ⁵³ Unji pî aw tâarre a àay Fay, aw ’misirre nîir Fay.