Yakuba

Yakuba

¹ Miy mi Yakuba, mi sàay Fay ni Yeesu Kristu Nitcoorra, mi kèpfa dunde dun yòot ni-Yude ây ra sàm cuk pî, yeske a deesi lang gi. ² Un kor ta mum, kâwsin tinîir wun dèy, to ’màar ây ’nang ’nang kpètnu go gi! ³ Un cèngni, gòyrra a màari ni goosum wun ’maara dunde èfta tinîiri. ⁴ Amma ndika èfta tinîir wun e lòt mbâra, ngam ha un gbèesi tâarra getiya, un èe koo jâ ba. ⁵ To nirri a tîim wun èe go còycum, sey e waa Fay, hîi ge hîiwa. Ngam ey hîirre jày pî dànjum cen, lèta cen. ⁶ Amma nit maan sey e waa ni goosum, ta e hàanji a tinîir wàa ba. Ngam nit yey hàanje gi, rèenji ni kèlmum sòo yey yûusu hiski. ⁷ Ngam ta nit maan e dàni, ge kpàa jày a gin Nitcoorra. ⁸ Ey dii ni tinîiri cuk, ti gòy mbâra a tèem wàa pî ba. ⁹ Kor yey tâage nit ɓa hû go a tîim nit ây, sey e râani ngam ey kpàa aanjum. ¹⁰ Amma sey nit bèebi e râani ngam hak wàa ûuye, hò ge hòm kà bista bàsi. ¹¹ To unji lòrra go ni mâarra wàa, kò ge kòysu di bàsi. Bista wàa yaa ge yaari, della bista wàa ge gbee. Hû go ɗa nit bèebi yû ge yûksi a tâam wàa. ¹² Kâwum diiw di nit yey èfke tinîiri a ’màari gi, ngam gòy go a ’màar maan, kpàa ge kpàa jàk koyrra, gûyrra yey gàa Fay ge hîi da nit ây yiɗu gi. ¹³ To nirri lek go a jàk rûfta, ta e gàa «Fay rûfkim gi» ba. Ngam jàk maarra ge kpàaw rûfta di Fay ba. Ey ɗa ge rûf koo di wuna ba. ¹⁴ Amma koo wun leke a jàk rûfta, gayam wàa nàtkuwa, de tâaw kà tidokri. ¹⁵ A dat maan gayam fûr go, kpàa ge kpàa jàk maarra. Jàk maarra ɗa gbèe go ’mita, kpàa ge kpàa wurra. ¹⁶ Un kor ta mum yiɗim dun gi, ta un rûf hak wun ba. ¹⁷ Jàk hîirra mbâra ni hîir delliya lang ana a faktiturum, a gin Fak timbangsum jàk kayang ây. Ey ti bunjirre ba, ti itɗe unji ni kuski ba. ¹⁸ Hîinage gûyrra a yèk takundi kà yey yiɗe gi, ngam ha ot tâa tiɗàm kpees ây a tîim nit ây mbangse gi. ¹⁹ Cèngnin, un kor ta mum yiɗim dun gi: Sey koo wuna e kîr rakta, e èf tinîir wàa a yèerra, e èf tinîiri a ngòlòm ɗa. ²⁰ To nirri dii go ni ngòlòm, ti tèerre jàk mbâra a ɗàm kpees Fay ba. ²¹ Woofan dànda tinîir yiriya, ni tèem makta ɗa pî! Ngorin ni fetkum tinîiri yèk yey còge Fay a tinîir wun, ha e saanunu jungci wun. ²² Amma tâan nit tèerra jày gàa yèk maan, naa nit rakta ây gbè! Ngam un tâa go nit rakta ây ni tuy gbè, un rûfɗe hak wun. ²³ To nirri tâa go nit rakta yèy ni tuy gbè, tâa go nit tèerra ni yèk maan ba, rèenji ni nit yey rapti nis wàa a darrugal gi. ²⁴ Ngam ye rapti hak wàa, a dat maan dige, hènti yaale kày rèe nà gi. ²⁵ Amma nit yey rapti a yèk mgbèngda delliya yey hîigina tâam tiròom, to fut go gi, ey ti tâa nit rakta yèy e hènti ba, amma tâa nit tèerra ni yèk maan. Fay mbâ ge mbârsu dey a tèem wàa. ²⁶ To nirri ii go hak wàa kà nirri futke yèk Fay, amma ti mòosirre rèeng wàa ba, ey rûfɗe hak wàa, coor wàa ɓa hû go ɗi. ²⁷ Coor mbâri yey delge a ɗàm kpees Fay Tooy Ɓèl gi, e tâage mgbaanjum hàm tiɗir ây ni kin wurra ây a ’màar waw, tâage ɗa faasum hay a jàk maarra kparri pî.

¹ Un kor ta mum, ye tâa un futɗe yèk goosum Yeesu Kristu Nitcoorra worro a ’mita wàa, ta un rapti nis nit ây ’nang ’nang ba. ² Ngam to nirri lek go a àay kimjum wun, ni tikòr kangeerri a kàn, ni lurra delliya, nit kana ɗa dàara go, lekfa ni lurra ngatiya, ³ un ii go nis wun a gin nit yey mgbapke lurra delliya, un gàaw «tâa a gin tâam mbâra gi», un gàaw di nit èca ngaa «gòy muy ay go, koo tâa ay a gin nafta nak mum gi», ⁴ kà yey un ɗòlnjirre ni hak wun, un ire nit hiitum ây ni dànda maktiya. ⁵ Raksin, un kor ta mum yiɗim dun gi! Fay catke nit èca ây a kparri gi, ha aw tâa nit bèeb ây a goosum, aw lek a wûun wàa, yey gàa ge hîi da nit ây yiɗu gi. ⁶ Amma un un coo daw da nit èca ây ba. Ti tâa nit bèeb ây ndakrunu jày ni ndakcu, nàtkunu aw ’maanu a kiita ba yi? ⁷ Ti tâa aw aw maasi della nîir yey hîinu Fay gi ba yi? ⁸ Un mbitɗe mbâra, to un futɗe go yèk wûun Fay, kà yey gàa nà a defterre wàa: Yiɗi nit tâanjum wey kà yey yiɗum hak wey. ⁹ Amma to un raptirre go nis nit ây ’nang ’nang, un tèerre jàk maarra, yèk mgbèngda hii ge hiitunu kà nit hàanjum ây. ¹⁰ Ngam koo wun futke yèk mgbèngda pî amma mgbòl go a yèk kpolo, mbire jàk maarra a woy ngasta ɗa. ¹¹ Fay gàa «ta mu ii njeenu ba», gàa ɗa «ta mu ɓàr nirri ba». To mu ii go njeenu ba, amma mu ɓàr nirri, mu dii nit yewrra a yèk mgbèngda. ¹² Yèen, mbirin ɗa kà nit ây ge hiiti daw yèk mgbèngda hîigina tâam tiròom gi! ¹³ Kiita ge iiw ’maton di nit yey èege ’maton gi ba. Amma nit yey tâage ni ’maton gi, kpàa ge kpàa ’maton a kiita Fay. ¹⁴ Un kor ta mum, to nirri gàa go dii ni goosum a tinîiri, amma ti lònirre tèem ba, goosum maan ji ge mbira ya? Malla goosum maan saa ge saanuwa yi? ¹⁵ To kor wey nihun koo nikin èe go lurra ni tiriici, ¹⁶ amma nirri kpolo a tîim wun gàa daw go «tayin mbâra, awin ebi, riin un oli», ti hîi daw jày a gayam waw ba, ji ge mbira daw ya? ¹⁷ Hû go ɗa ni goosum, to ti lòni go tèem ba, goosum maan wurre. ¹⁸ Nit kana gàa ge gàa: Muy mu dii ni goosum, miy ngaa mi dii ni tèem. Kàlnim goosum wey cen tèem, miy ɗa kà gim kàlnum tèem mum a goosum. ¹⁹ Muy mu goosirre, nge Fay dii kpolo. Mu mbire mbâra. A tindòom ây ɗa aw goosirre hû go, aw malle tolnji. ²⁰ Muy mu ray ɗi! Mi yiɗi mi kàlum, goosum cen tèem gi goosum maan ɓa hû go ɗi: ²¹ Wosom worro Abraham gòye ɗèm a ɗàm kpees Fay ni tèem, ye ’maa hàm wàa Isak a gin gurfum gi. ²² Mu kpàawe kày ’mèmsi goosum ni tèem wàa. Tèerra tèem tâage jàk tigbèesunum a goosum wàa. ²³ Hû go gbèe yèk defterre Fay, gàa: Abraham goosuge di Fay, Fay de sagu nit gòyrra ɗèm, de ’naasu soob wàa. ²⁴ Kà yey un kpàa, nirri gòye ɗèm a ɗàm kpees Fay ni tèem, naa ni goosum gbè. ²⁵ Hû go ɗa Rahab kin tikàm toonji, ni tèem gòye ɗèm a ɗàm kpees Fay, ye ngore mbâra da ni-Israyel ây tèeran daw gi, yuuni daw a ot kana gi. ²⁶ Kà yey tâa isi jungci cen gi wutiya ɗi, hû go ɗa goosum tâa ti lòni tèem ba, wutiya ɗi.

¹ Un kor ta mum, ta a nit ây dèy a tîim wun aw kàm tâarra nit kàlnjum jày ba! Cèngnin, ot nit kàlnjum ây kpàa got kpàa kiita woy hòmge àyrra. ² Ngam orro pî ot mgbòlle a jàk ây dèy. Nit yey tâa ti mgbòl a yèerra yèy ba, nit getiya ɗi, ey mbi ge mbin mòosum is wàa pî. ³ To ot iirre go titefki a mgbelyèk kpis ây ha aw rakna tuy, ot ûuni dawrre ni is waw lang. ⁴ E rri yey ɗa a koombowal ây ’mitiya, hiski ɓèl tus dawrre, amma a nit kuta ây aw ini dawrre ni tikuni luusiya a gin yiɗin gi lang. ⁵ Hû go ɗa rèeng jàk kaaya ɗi a is nirri, amma mbitɗe jàk ɓèlya. Gop ebi càa aksi lungji ɓèl gi! ⁶ Rèeng ɗa dii kà ebi, dii kà kparri maktiya. Rèeng yey tâage a is worro, ’miskininarre isi lang, mòonarre a jungci worro pî. Mbinum wàa ngaa ana a eb ɓèl. ⁷ Nirri ûunirre joot nûr ây pî, ni jooy ây, ni jòoy ây, ni jàk ây tâage a sòo pî, aw dii ûunumya diga mgban ɗa. ⁸ Amma koo wuna ge kpàaw ûunum rèeng wàa ba, jàk maktiya ɗi, ti tâarre baak baak ba, mûu ni larri tiwurra. ⁹ Ni rèeng ’misinina nîir Fay Tooy Ɓèl, ni erra ɗa maasinina da nit ây mbangsi daw Fay, rèenji ni ey gi. ¹⁰ A mgbelyèk kpolo yuura ’misum ni maasum. Un kor ta mum, ta jày e tâa kà yey ba! ¹¹ Sòo ɗuurre mbâriya ni ɗalliya a nis sòo kpolo yi? ¹² Un kor ta mum, jâaci ge kpàa repta korrom yi? Koo timgbokcum ge kpàa repta jâaci yi? Hû go ɗa nis sòo ngangjiya ge ɗuura sòo mbâriya ba. ¹³ Wun tâage ni còycum, ni dànda mbâra a tîim wun ya? Ndika e kàlni dànda wàa ni tèem a dikri mbâra, ni fetkum tinîiri a còycum. ¹⁴ Amma to ngèeri ngaktiya ni tihàanjum dii go a tinîir wun, ta un ’misi hak wun ba, ta un rèeng rèeng a yèk takundi ɗa ba. ¹⁵ Còycum kà yey ti ana a faktiturum ba, amma a kparri ana, a dànda nirri, a gin Seyɗan. ¹⁶ Ngam a gin tâa ngèeri ni tilètnjum, a farra tâa ɗa anda yèy, ni tèem maarra pî. ¹⁷ Amma còycum yey anga a faktiturum gi, màrra lòni ɓet ɓet, a dat maan raknjum, ni mgbergum yèy, ni rakta tuy, ni ’maton ni tèem mbâri dèy. Còycum maan e tâa cen ɗòlnjum da nit ây, cen tibiw ɗa. ¹⁸ A nit ây kàmgi mbâri gi, aw yòorre a mbâri yòot yey ge rep gòyrra ɗèm a ɗàm kpees Fay.

¹ U hâ ana bàpri ni haarra gbàaci a tîim wun ya? Ti tâa ngam gayam wun haage gbàaci a tinîir wun ba yi? ² Jày gayrunu gi, un kpàarre ba. Ngam un ɓàtɗe nirri, un ngètɗe ngèeri, amma un haa kpàarra ba. Kà yey un haarirre gbàaci un tapnjirre bàpri. Un kpàa jày yiɗunu gi ba, ngam un waaw di Fay ba. ³ Ye waanu Fay, un kpàa jàk maan ba, ngam un waarre ni dànda maktiya, un yiɗi un gbeesi jày waanu gi a gayam wun. ⁴ Un un woofa yèk Fay! Un cèngni, mòonjum sooba ni kparri tâage yiiri a gin Fay gi ba yi? Nit yey yiɗi mòonjum sooba ni kparri, ire nit yiir Fay. ⁵ Koo un dànde, defterre Fay yèe ɓa hû go yi, ye gàa: Jungci yey hîina Fay, iirre ngèeri a gin worro gi yi? ⁶ Amma mbâr yey hîi Fay gi hòme ’mita. Hû go defterre gàa: Fay njanggi dawrre da nit ây ’misi hay. Amma hîi dawrre mbâr wàa da nit ây ûuni hay. ⁷ Hû go raguwan di Fay, hàwin yèk Seyɗan, ha e ’nòonu! ⁸ Hèeran a gin Fay, ey ngaa hèe ge hèera a gin wun. Kòlin kàn wun, un nit ây mbirge jàk maarra! Ɓetkinin tinîir wun, un nit dànda cuk cuk ây! ⁹ Tâan ni ngòlnji a ’màar wun, tâan ni àyrra tinîiri, umin! Wâasum wun e ir àyrra tinîiri, kâwum wun ngaa e ir ngòlnji! ¹⁰ Uunin hak wun a ɗàm kpees Nitcoorra, ey ngaa aa ge aanjunu. ¹¹ Un kor ta mum, ta un njeenji yèk makta a tîim wun ba! Nit yey njeege yèy di kor wàa koo hiiti kor wàa gi, ey maase yèk mgbèngda, hiiti yèk mgbèngda ɗa. To mu hiiti go yèk mgbèngda, mu tâa nit tèerra tèem yèk mgbèngda ba, amma mu nit hiitum yèk mgbèngda ɗi. ¹² Fay kpolo ey iige yèk mgbèngda, ey ge hiiti ɗa. Ey dii ni mbinum e saani koo e gbeesi. Muy mu wun ɗi ya, ha mu hiiti nit tâanjum wey ya? ¹³ Raksin, un nit ây gàage: Unji yey koo ni ndamji di got dik a riiy kana, ot ɓel a farra yeri kpolo, ot sàa jày ot sàansi, ha ot kpàa bèebi. ¹⁴ Un ɗa un cèngni jày ge mbir ni ndamji ba. Gûyrra wun kà tâa ya? Dii kà tufki, e lòt càa e yeski. ¹⁵ Ndika un gàa: To Tooy Ɓèl yiɗi go gi, orro ɗa ot gûyrre go, mbi got mbir hûy ni hûy. ¹⁶ Amma kòsòng un ’misirre hak wun, un ɗèpsirre. Tiɗèpsum kà yey maaye. ¹⁷ Hû go nit yey cèngni tèerra jàk mbâri, amma ti tèe ba, iirre jàk maarra a hak wàa.

¹ Raksin, un nit bèeb ây, umin taasin, ngam ’màari dàararre a gin wun! ² Bèeb wun raaye, lurra ta wun jâam riiye. ³ Kangeerri wun ni sarrdi wun bukrige. Bukrum maan tâa ge tâa seedamku a hak wun, a ge aksi is wun kà ebi. Koo a mgbàr gbèerra un kimjirre bèebi bak. ⁴ Un jing bèeb tèem waw da nit ây ripke hèmna ta wun ba, ha aw bimde. Taasum nit tèem hèmna ây gi lege a tuk Tooy Ɓèl, tâagi ni mbinum dèy gi. ⁵ Un gûyi nà a tiɗèpsum a deesi gi, un tèe jày gayrunu gi ha e getnu. Un mgbòksirre is wun koo a unji gûurra jàk gûurra. ⁶ Un iiwe kiita di nit yey gòyge ɗèm, un ɓàruge. Ey ngaa ti gàanu jày ba. ⁷ Hû go un kor ta mum, èfin tinîiri ha mgbàr dàarra Nitcoorra, kà nit hèmna waage nîirra jàk mbâra a deesi, èfɗe tinîir wàa ha e kpàa buun màrra ni buun gbèeni. ⁸ Un ɗa èfin tinîir wun, tâan kpèw, ngam dàarra Nitcoorra hèerage. ⁹ Un kor ta mum, ta nirri e bagu di nit kana ba, ngam ta un kpàa kiita ba. E rri yey Tooy hiitum gòyrre a nin. ¹⁰ Un kor ta mum, ɓaysin yèk nit lònum ây yèege ni nîir Tooy Ɓèl, ye tâan ni èfta tinîiri a riirra ’màari gi. ¹¹ E rri yey ot ’naasi dawrre nit kâwum da nit ây mòoge nà mbâra ha gbèeni. Un rage yèk èfta tinîir Ayuba, un rabe kày tèewrra Tooy Ɓèl a gbèeni wàa. Ngam Tooy Ɓèl dii ni ’maton dèy, ni mbâri ɗa. ¹² Un kor ta mum, màrra a jày pî, ta un hàa tihàani koo ni faktiturum koo ni deesi, koo ni tihàani kana ba. Sey eeye wun e tâa eeye, oow wun e tâa oow, ngam ta un yaa a kiita ba. ¹³ To nirri dii go a tîim wun riirre ’màari, sey e waa Fay. To nit kana dii go ni kâwum tinîiri, sey e kâa ndûu e ’misini nîir Fay. ¹⁴ To nit kana a tîim wun kûurre go àyci, sey e ’naasi da toonji nit kimjum ây, aw waawrra Fay, aw iiwrra num ni nîir Nitcoorra. ¹⁵ Waarra Fay a goosum ndòo ge ndòosu di nit àyci. Nitcoorra aa ge aanjuwa. To mbir go nà jàk maarra, yaa ge yaafuwa. ¹⁶ Lòninjin jàk maarra a tîim wun! Waanjirin Fay a tîim wun ha un kpàa ndòosum! Nit yey gòyge ɗèm a ɗàm kpees Fay, waar wàa kpèw dii ni mbinum dèy. ¹⁷ Eliya nirri ɗi ɗa kà orro, rîi nà kpèw a waarra Fay, ta buun e yaa ba. Yeri taan ni corri yira buun ti yaa a deesi ba. ¹⁸ Ye waasi Fay, buun de ɗaasa yaarra, deesi de ɓukse jày. ¹⁹ Un kor ta mum, to nirri a tîim wun gbee go ot takundi, nit kana inuwa go, ²⁰ cèngnin, nge nit yey inuwa di nit mbita jàk maarra a gbeerra ot wàa gi, saanige jungci kpolo a wurra, burre ɗa jàk maarra dèy.