Ni-Hebra ây

Ni-Hebra ây

¹ Fay yèera daw nà mgban da wosom ta worro ni mgbelyèk nit lònum ây nak mûsi jày, ni orri ’nang ’nang. ² Kòsòng a mgbàr gbèeni gi yèera dot ni Hàm wàa. Ni ey mbangsini kparri ni jàk ây pî, iiwe e tâa nit koyrra a jày pî. ³ Ey finde ni kayang ’mita Fay, rèenji ni Fay, mòorre jàk ây pî ni mbinum yèk wàa. A dat yey ɓetkini daw da nit ây a jàk maarra waw, de tâa a faktiturum a riina Fay tâage ni mbinum hòmge ’mita gi. ⁴ Hû go Hàm gi hòm daw ’mita da malayka ây ni nîir yey hîiw Fay, hòmgi daw da nîir ta waw gi. ⁵ Ngam Fay ti haa gàarra di malayka kpolo a tîim waw «muy mu Hàm mum ɗi gi, mi kpàame unji yey» ba. Ti haa ɗa gàarra «miy tâa gim tâa Too wàa, ey ngaa tâa ge tâa Hàm mum» ba. ⁶ Amma ye ge tèera Hàm màrra wàa a kparri gi, yèk yey gàa mgban ge gbèe: A malayka ta Fay pî sey aw coowa. ⁷ A hak malayka ta wàa gàarre: Fay ini dawrre da malayka ta wàa aw tâa hiski ây, da nit tèem ta wàa aw tâa rèeng eb ây. ⁸ Amma di Hàm gi Fay gàawe: Mu Fay gi, gbaat wûun wey tâa ge tâa tâam timgbàri ha tâam timgbàri. Gàawe ɗa: Suu wûun wey suu ɗèm ɗi, ⁹ mu yiɗi tâam ɗèm, mu yiirre jàk makta èege yèk mgbèngda gi. Ngam maan miy mi Fay Fak wey gi, mi carrumge mi fòogumda num kâwum, ha mu hòm daw da nit tâanjum ta wey. ¹⁰ Gàawe ɓak: Mu Nitcoorra, muy mbangse deesi a mgbàr ɗaarra jày pî. Faktiturum gi tèem kàn wey ɗi. ¹¹ Aw gi gbee gaw gbee, amma muy tâa gum tâa koo ningàa. Aw gi pî mgba gaw mgbanti kà lurra. ¹² Ka gum karri daw kà jàk joorra, bu gaw bunji kà lurra ây. Amma muy mu gòyrre, gum wàrfi ba, yer wey ge gbèe ba. ¹³ Amma di malayka hâ haarra gàarra «tâa a riina mum, ha mi ii nit yiir ta wey gin nafta nak wey.» ya? ¹⁴ Naa aw pî a jungci daprum ây ɗi di Fay, tèe daw tèerra tèem mgbaanjum da nit ây gaw kpàa saarra gi naa?

¹ Ngam maan gesi ot faasi hak worro dèy a yèk yey rakna gi, ngam ta ot gbee ot saarra ba. ² Ngam yèk yey yèen a malayka ây gi gòyrriya ɗi. Koo wun yewge nà yèk maan ni koo wun hàwge nà rakta tuy, kpàa bèeb tèem makta wàa kày gesu gi. ³ Sakko kày got ’nòo kiita to ot ndòorirre go yèk saarra ɓèl kà yey ya? Nitcoorra ni hak wàa sage nà màrra yèk yey, a nit ây rake gi aw gòynina yèk maan. ⁴ Fay gòyni ɗa tèem waw ni jàk lònum ây, ni kayeefi ây, ni tèem mbinum ây ’nang ’nang dèy, ni hîir ây hîi Jungci Delliya gi, mîinji daw da nit ây kày yiɗe gi. ⁵ Fay ti ûuni a gin malayka ây kparri yey ge dàara gi, yèena gi ba. ⁶ Amma nirri kpolo yèe a gin kana a defterre Fay, gàa: Nirri wun ɗi, ha mu ɓaysu gi ya? Hàm nirri wun ɗi, ha mu gobu gi ya? ⁷ Unji càa mu luusu a gin malayka ây, amma a dat maan mu hîiwe wûun ni ’mita, ni tâam ɓèl, ⁸ mu ûuni jày pî a gin wàa. Ngam ye tâa jày pî dii ûunumya a gin wàa, cen jày tâa ti ûunurra ba. Kòsòng orro ot ɗà ot rap nge jày pî ûunurrage ba. ⁹ Amma ot rapɗe di Yeesu tâage luusumya unji càa a gin malayka ây gi, kpàaye wûun ni ’mita, ni tâam ɓèl yèk ’màar wurra wàa. Ngam kà yey yiɗi Fay a mbâr wàa, ha e wut ngam nit ây pî. ¹⁰ Gesu di Fay Tooy yey tâage jày pî ngam wàa, gòyge jày pî ni ey gi, ’maaga hàm ây dèy a ’mita wàa, ha e inu nit getiya di Yeesu nit ɗàarra saanum waw ni riirra ’màari. ¹¹ Yeesu nit yey ɓetkini daw da nit ây a jàk maarra waw gi, ni nit ɓetum ây pî aw ana a gin Tooy kpolo. Ngam maan Yeesu ii lawsam ha e ’naasi daw kor ây ba, ¹² gàa nà: Fay, cè gim cèngnini daw nîir wey da kor ta mum, kâa gim kâa ndûu ’misunum nîir wey a tîim nit kimjum ây. ¹³ Gàa ɗa: Ii gim ii dànda tinîir mum a gin Fay. Gàa bak: E rri yey miy ni hàm ây hîim Fay gi. ¹⁴ Ye tâa a hàm ây gi aw dii ni isi ni njîim, Yeesu ɗa ire kà aw, ngam ha ni wurra wàa e mboysu di Seyɗan tâage nà ni mbinum wurra gi. ¹⁵ Hû go saani dawge da nit ây tâage a tâam sàay yer waw lang yèk tolnji wurra gi. ¹⁶ Ngam takundi, mgbaanji daw da malayka ây ba, amma mgbaanji dawrre da nit ây tâage yòot ta Abraham, kà yey gàa a defterre Fay. ¹⁷ Ngam maan gesuge di Yeesu, e rèenjini hak wàa ni kor ây a jày pî, ha e tâa nit ɓèl daprum mbâra ni ’maton a ɗàm kpees Fay, e hûrfa jàk maarra nit ây. ¹⁸ Ye tâa riiye ’màari, kpàaye jàk rûfta ɗa, mbi ge mbin e mgbaanji daw da nit ây kpàage jàk rûfta gi.

¹ Ngam maan un kor ta mum tâage nit della ta wàa di Fay, ’naasunu un ’mèmsi a tâam faktiturum gi, raptuwan di Yeesu tèewra Fay, tâage nit ɓèl daprum, sakna nîir wàa gi! ² Ey mòoye mbâra a tèem yey hîiw Fay gi, kà yey mòo Muusa tèem wàa mbâra a àay Fay pî. ³ Amma Yeesu hòmu ’mita di Muusa, kà nit jâarra àay hòmgu ’mita di àay gi. ⁴ Koo àay hâ jâarriya ɗi ni kàn nirri. Amma Tooy yey jâage jày pî, Fay ɗi. ⁵ Muusa nit mòorra mbâra ɗi a tèem a àay Fay lang, ey nit tèerra tèem seedamku ɗi, ha e lòni da nit ây jày gàaw Fay. ⁶ Amma Yeesu Kristu mòo mbâra a tèem, ngam ey Hàm ɗi gi, Fay iiwe e tâa hay a àay wàa. Orro tâage àay maan, to ot gòyrre go kpèw, ot mòorre go tinîir wot a kâwum jàk dànda yey ’misina hak worro ngam maan gi. ⁷ Ngam maan Fay gàa ni Jungci Delliya: Unji yey to un rak go gûn mum, ⁸ ta un ndèksi tinîir wun ba, kà yey mbirin nà a wosom ta wun a unji yey anin yèy a gin mum, haawimin a tîim nûri gi, ⁹ ha sokrimin, gopnimin, koo ye tâa aw rapɗe tèem mum yeri ra naan gi. ¹⁰ De anim ni ngòlnji a gin yòot nit ây mgbàr maan, de gàami: Dànda tinîir waw gbeerriya ɗi, aw aw cèngni ot mum ba. ¹¹ De hàami ni ngòlnji mum de gàami: Gaw lek a gin tiwuysum mum ba. ¹² Un kor ta mum, faasin hak wun, ta nirri kpolo a tîim wun e tâa ni tinîir maktiya a èca goosum, ha e woofa Fak beengiya ba. ¹³ Amma kpèwsinjin a tîim wun unji pî a mgbàr yey gàa «unji yey» gi, ngam ta nirri kpolo a tîim wun e ndèksi tinîir wàa ni rûfrum jàk maarra ba. ¹⁴ Ngam orro ot nit ây ’mèmse ni Kristu ɗi, to ot gòyrre go kpèw ha gbèeni a dànda tinîir worro iina a gin wàa a ɗaarra goosum worro gi. ¹⁵ Amma Fay gàa nà: Unji yey to un rak go gûn mum, ta un ndèksi tinîir wun ba, kà yey mbirin nà a wosom ta wun ye anin ni yèy a gin mum gi. ¹⁶ A wun tâage nit ây rake yèk Fay, ange ni yèy a gin wàa gi ya? Ti tâa a nit ây pî yuuni daw Muusa a dees Ejip gi ba yi? ¹⁷ Da wun anda Fay ni ngòlnji yeri ra naan gi ya? Ti tâa da nit ây mbirge nà jàk maarra, wutke a nûri woogifa is waw a farra gi ba yi? ¹⁸ Da wun hàa Fay, gàa gaw lek a gin tiwuysum wàa ba ya? Ti tâa da nit ây hàwge rakta tuy gi ba yi? ¹⁹ Hû go ot rage, aw aw kpàa lekta a gin tiwuysum maan ba, ngam aw goosi ba.

¹ Ye tâa yèk mòonjum kàn ni Fay, yèk lekta a gin tiwuysum wàa ngasɗa dotke gi, faasin hak wun ta nirri kpolo a tîim wun e tâa ge kpèt ba ba. ² Ngam orro ot rage Yèk Kâwrra ɗa kà aw tâage nà a tîim nûri gi. Amma rakta yèk maan ti mgbaanji daw koo jâ ba, ngam koo ye ragin gi, aw goosi ba. ³ Orro ot nit ây goose gi le got lek a gin tiwuysum maan, a gin gàa daw nà Fay da nit ây kana: Mi hàaye ni ngòlnji mum, mi gàaye: Gaw lek a gin tiwuysum mum ba. Gàa kà yey, koo ye tâa tèem wàa gbèeye diga ɗaarra mbangsum kparri gi. ⁴ Ngam gàa a gin kana a defterre Fay yèk unji jòsti: Fay wuysi a unji jòsti a tèem wàa pî. ⁵ A yèk maan gàa ɗa: Gaw lek a gin tiwuysum mum ba. ⁶ Hû go yèk lekta a gin tiwuysum maan ngasɗa dawrre da nit ây kana, ye tâa a nit ây rake màrra Yèk Kâwrra gi aw lek ba, ngam aw ragu tuy di Fay ba. ⁷ Ngam maan Fay gòynisi bak unji kana ’naasu «unji yey» gi, ye gàa ni mgbelyèk Dawda a dat yeri mûsi jày, kà yey ɗàana ɗa gàarra gi: Unji yey to un rak go gûn mum, ta un ndèksi tinîir wun ba. ⁸ Ngam to Yosuwa wuysini daw go ngin da nit ây, Fay ge yèesirra ngin yèk unji kana a dat maan ba. ⁹ Ɗo wuysum yey rèenji ni wuysum Fay a unji jòsti gi, ngasɗa dawrre da nit ta Fay. ¹⁰ Ngam nit yey leke a gin tiwuysum maan a gin Fay gi, wu ge wuysi a tèem wàa ɗa kà yey wuysi Fay a tèem wàa. ¹¹ Hû go dàan ot hâri, ha ot lek a gin tiwuysum maan, ngam ta nirri kpolo e yaa e gbee, e ir jàk kàlnum a èca rakta tuy kà nit ây a tîim nûri nà ba. ¹² Ngam yèk Fay dii beengiya ni mbinum tèerra jày, hòme gûurra di ɓet ɓèl riige cewci cuk, baarre ha e mîinji jungci isi ni dànda nirri, ni tulnji ây, ni tifîkfîk, hiitirre jày yiɗi nirri, ni jàk dànda tinîir wàa ɗa. ¹³ Cen jày mbangse Fay gi fûugu a ɗàm kpees wàa ba, amma jày pî dii kpong, faarumya a nis wàa, a gin wàa got goosi yèk hak worro gi. ¹⁴ Ye tâa orro ot dii ni nit ɓèl daprum ’mitiya kpètke ha a tâam Fay, Yeesu Hàm wàa ɗi, sey ot mòo kpèw a yèk goosum yey seedina gi. ¹⁵ Ngam ot dii ni nit ɓèl daprum yey ge kpàana gopta ’maton a èca kpèw kpèw worro, kpàage jàk rûfrum ây pî kà orro, amma ey ti mbir jàk maarra ba. ¹⁶ Hû go dàan ot hèerra cen tolnji a gbaat wûun Fay a gin tâam mbâr wàa, ngam ha ot kpàa ’maton, ot kpàa mbâr mgbaanjum a unji yey gâygina gi.

¹ Koo nit ɓèl daprum hâ aw carru a tîim nit ây, aw gòynu ngam waw ha e dapru di Fay, e hîi hîir ây ni jàk gûurra ây ngam jàk maarra waw. ² E kpàa gopta ’maton da nit ây tâa aw cèngni jày ba, ni nit ây gbeege gi, ngam ey ɗa mgbapɗe èca kpèw kpèw a is wàa. ³ Yèk èca kpèw kpèw wàa gi, ti gesi e hîi jàk gurfum ngam jàk maarra nit ây gbè ba, amma sey e hîi jàk gurfum ngam jàk maarra hak wàa ɗa. ⁴ Cen nirri ge at tèem nit ɓèl daprum ni ’mita maan ni hak wàa ba, sey to Fay ’naasu go kà Arong gi. ⁵ Kà yey Kristu ɗa ti ’misi hak wàa e tâa nit ɓèl daprum ba, amma Fay gàagu nà: Muy mu Hàm mum ɗi gi, mi kpàame unji yey. ⁶ Gàa ɗa a gin kana a defterre wàa: Muy tâage nit daprum a funji Melkisadak ha tâam timgbàri. ⁷ Yeesu a tâam wàa tâa nà a deesi gi waarre waar ây ni jàk gunda ây a gin Tooy yey tâage ni mbinum e saanu a wurra, waare ni tibimni ɓèl ni umda rîsim. Tooy Ɓèl gi ngore waar wàa, ye tâa tolurre gi. ⁸ Koo ye tâa ey Hàm Fay ɗi gi, èngni rakta tuy a riirra ’màar wàa. ⁹ A dat ye gbèese tèem wàa, ire nit getiya, de tâa Nitsaanum ha e saani tâam timgbàri da nit ây raku tuy gi. ¹⁰ Fay gòynu e tâa nit ɓèl daprum a funji Melkisadak. ¹¹ A yèk yey jàk ây dèy ngasɗa dotke, amma àye ha ot saknu, ngam un ire nit ây kpâa dun rakta jày. ¹² Unji ây hòme dèy, ha un tâa ngin nit kàlnjum ây, amma un dii bak ni gayam ha nit kana e kàlnjunu jàk màrra ây a yèk Fay. Tirrit wun mboom ɗi gbè, ti tâa nàam ba. ¹³ Koo wun âwge nâwri, ey hàm ɗi, nit èca cèngnum jày ɗi a yèk gòyrra ɗèm. ¹⁴ Amma da nit ây tâage getiya gi, tiriit waw nàam ɗi, ngam dànda waw dii rûunumya ha aw hiiti jàk mbâra ni jàk makta.

¹ Hû go dàan ot dik ɗàm kpeesi a tâarra tâam getiya, ot woofa jàk màrra ây a yèk Kristu. Ta ot ɗaasi bak gòynum jày a yèerra yèk inum tinîiri a tèem wutiya, koo a yèk goosum di Fay ba, ² koo a yèk baptisma, koo a yèk iirra kàn ngam mbârsum da nit ây, koo a yèk gûysum a wurra, koo a yèk kiita tâam timgbàri ba. ³ Sey ot dik ɗàm kpeesi, ot tèe jàk yey, to Fay ge hîi go orri. ⁴ Ngam a nit ây kpàage kayang Fay nak kpolo, haagi daw da jàk hîir ây diga faktiturum, ’mèmse ni Jungci Delliya gi, ⁵ haagu di yèk Fay mbâriya ɗi gi, cèngni kpèw kpèw mgbàr yey ge dàara gi, ⁶ to aw gbee go orri, gaw kpàasi inum tinîir waw ba, ngam aw ni hak waw aw gbale Hàm Fay nak cukti a minjum kpiiri, ha aw inu jàk wâskum. ⁷ To deesi ngotɗe go sòo buun yaaga nak mûsi jày gi, ɓuksirre go jàk ɓukta ây mbâra ngam nit ây còke gi, Fay mbâ ge mbârsu. ⁸ Amma to ɓuksirre go cikci ni tinjòkri, ey dii ɓa hû go, dii gaarra a tilèni Fay, gbèeni maan sey aksum ɗi ni ebi. ⁹ Un kor ây yiɗina ot gi, koo ye tâa ot yèerre kà yey, ot gòyni dànda worro kpèw yèk wun a jàk yey hòmge ’mita, tâagunu a saarra gi. ¹⁰ Ngam Fay ti èe tèerra tèem ɗèm ba, ha e hènti tèem wun, ni yiide yey lònunu ngam nîir wàa a tèem mgbaanjum tèenu a gin nit della ta wàa ha kòsòng gi. ¹¹ Amma ot yiɗi dèy ha koo wuna a tîim wun e tâa ni hâta kà yey ha gbèeni, ngam a gin iirra jàk dànda wàa gi e mûu. ¹² Ta un tâa nit taski ây ba, amma furrin da nit ây goose, èfke tinîiri gi, kpàage jày gàa Fay ni yèk mòonjum kàn gi. ¹³ Fay a ye hîiw yèk mòonjum kàn di Abraham, de hàa ni hak wàa, ngam cen nirri hòmgu ’mita ha e hàani ni ey ba, ¹⁴ gàa: Takundi, mbâ gim mbârsum ni mbâri, mûu gim mûusi yòot wey dèy. ¹⁵ Ye tâa Abraham èfe tinîir wàa, de kpàa jày gàa Fay ni yèk mòonjum kàn gi. ¹⁶ To a nit ây aw hàarre go tihàani, hû waan aw hàani ni nîir nit yey hòmgi daw ’mita, ha aw gòyni jày gàan gi ni tihàani maan, ngam ta tilètnjum e tâa a tîim waw ba. ¹⁷ Fay ɗa hàa ni tihàani a yèk yey yèe nà ni mòonjum kàn, ha e kpèwsi yèk maan, ngam e kàlni daw mbâra da nit ây gaw kpàa jày gàa a yèk mòonjum kàn gi, nge jày yiɗi gi ge ir ba sam. ¹⁸ Yèk mòonjum kàn ni tihàani gi ɗa cuk gaw kpàa ita ba, Fay ɗa ge kpàaw rèengda rèeng a yèk maan ba. Hû go ot nit ây ’nòoga a gin wàa gi, ot dii ni suunji tinîiri dèy, ha ot mòo a jàk dànda yey tâagina mbangsumya gi. ¹⁹ Jàk dànda yey tâagina kà tigòyni jungci is worro, dii mbâriya kpèw kpèw, lekɗe ha a gin tâam delliya tâage a ɗàm kpees jimda jàk joorra woy minjum a àay Fay gi. ²⁰ A gin yey Yeesu ɗàana lekta ngam worro, ire nit ɓèl daprum a funji Melkisadak ha tâam timgbàri.

¹ Melkisadak tâage wûun Salem, nit ɓèl daprum di Fak ’mita, ey kpàanjige ni Abraham ye ira a sunda bàpri da wûun ây, de mbârsuwa. ² Abraham hîiwe jày kpolo a jày kpètke ra a jàk ây pî koyna a bàpri gi. Nîir Melkisadak yiɗi gàarra «wûun gòynum ɗèm». Ye tâa ey wûun Salem ɗi gi, e tâage kà gàarra «wûun tâam mbâri». ³ Dey tooy cenu ba, nuu cenu ba, wosom cenu ba, ɗaarra yer wàa cenu ba, gbèeni gûyrra wàa ɗa cenu ba, amma rèenji ni Hàm Fay, tâarre nit ɓèl daprum koo ningàa. ⁴ Raptuwan kày ’mirre gi! Ngam Abraham tooy wosom ây hîiwe jày kpolo a jày kpètke ra a jàk ây koyna a bàpri gi. ⁵ A hàm ta Lewi ngorge tèem nit ɓèl daprum aw dii nà ni yèk mgbèngda, ha aw at jày kpolo a jày kpètke ra a gin ni-Israyel ây tâage kor ta waw, anga ɗa a yòot Abraham gi. ⁶ Amma Melkisadak nit yey tâa ti ana a yòot waw ba, ngore jày kpolo a jày kpètke ra a gin Abraham, mbârsu di nit yey kpàage nà yèk mòonjum kàn gi. ⁷ Ɗo nit yey mbârsu gi hòmu ’mita di nit yey kpàage mbâri gi. Cen nirri ge kpàaw hàanjum yèk maan ba. ⁸ A hàm ta Lewi atke jày kpolo a jày kpètke ra, aw a nit ây gaw wutki ɗi. Amma a hak Melkisadak ngorge jàk maan ɗa, defterre Fay seedi ey nit beengiya ɗi, nit wuta ɗi ba. ⁹ Gàa got gàa, koo Lewi nit ata jày kpolo a jày kpètke ra, ’mèmsi ɗa ni Abraham ye hîi jày kpolo a jày kpètke ra gi. ¹⁰ Ngam dii nà a is wosom wàa Abraham, ye kpàanjin ni Melkisadak. ¹¹ Tâam nit ɓèl daprum waw da hàm ta Lewi gòye a yèk mgbèngda kpàan nà ni-Israyel ây. To tâam nit ɓèl daprum maan tâa go ngin getiya gi, ji tâage gayam nit daprum kana a funji Melkisadak tâa ti tâa a funji Araong ba ya? ¹² Ngam ye tâa tâam nit ɓèl daprum bunjige, sey yèk mgbèngda ɗa e bunji. ¹³ Nitcoorra worro, a gin nit yey yèe yèk ây gi, ana a yòot kana yey tâa nirri ti haarra tèerra tèem gûurra jàk gurfum ba. ¹⁴ Cèngnumya ɗi ey ana a yòot Yuda. Amma Muusa ti gàa jày a yòot maan ba, ye yèe yèk nit daprum ây gi. ¹⁵ Yèk maan hòme lòta ye tâa nit daprum kana dàara, rèenji ni Melkisadak. ¹⁶ Nit yey ti tâa nit daprum ni yèk mgbèngda nirri ba, amma ni mbinum gûyrra yey tâa ge lòo ba gi. ¹⁷ Ngam defterre Fay gàa a hak wàa: Muy tâage nit daprum a funji Melkisadak ha tâam timgbàri. ¹⁸ Hû go yèk mgbèngda mgban mboye, ngam èe kpèw kpèw, mgbaanji koo jâ ba. ¹⁹ Yèk mgbèngda Muusa pî ti ’maa daw da nit ây a tâam getiya ba. Amma jàk dànda kana hòmge gi lege, yey got hèewrra di Fay ni erra gi. ²⁰ Jàk maan ’mèmsi ɗa ni tihàani Fay. Ngam a nit ây kana irge nà nit daprum ây, ti tâa ni tihàani ba. ²¹ Amma Yeesu tâa nit daprum ni tihàani, ye gàaw Fay: Mi hàa ni tihàani, gim hàlsi ba: Muy gum tâa nit daprum ha tâam timgbàri. ²² Hû go Yeesu tâagina nit gòynum jàk wasta yey hòmge della gi. ²³ A nit daprum ây kana aw mûu dèy, ngam aw wutɗe gi, aw kpàa tâarra koo ningàa a tèem maan ba. ²⁴ Amma Yeesu tâarre tâam timgbàri, tèem daprum wàa ge hòm a gin nit kana ba. ²⁵ Ngam maan, takundi ge kpàa daw saanum da nit ây hèegurra di Fay ni ey gi, gûyrre koo ningàa, ha e waa Fay ngam waw. ²⁶ Gesinage, ye tâa ot dii ni nit ɓèl daprum kà yey. Ngam Yeesu dii delliya a ɗàm kpees Fay, mamji cenu ba, jàk ’miskum cenu ba, kpâanjige ni nit ây mbirge jàk maarra, naasi a gin yey hòmge ’mita a faktiturum. ²⁷ Ey gayam cenu, ha e gurfi jàk gurfum unji pî kà nit ɓèl daprum ây kana, hîige màrra jàk gurfum ngam jàk maarra hak waw, a dat maan ngam jàk maarra nit ây gi ba. Ey gurfi jàk gurfum nak kpolo, gerre ngam koo ningàa, ye hîi hak wàa ngam jàk gurfum gi. ²⁸ Ngam yèk mgbèngda Muusa gòynirre nit ɓèl daprum ây da nit ây tâage dàngdiya gi. Amma yèk hàar Fay tâage a dat yèk mgbèngda gi, gòynu di Hàm wàa getke ha tâam timgbàri, e tâa nit ɓèl daprum.

¹ E rri yey jày hòmge ’mita a yèk yey yèena gi pî: Orro ot dii ni nit ɓèl daprum tâage a gbaat wûun Fay hòmge ’mita a faktiturum gi. ² Ey tèerre tèem daprum a gin tâam delliya, a tâam takundi, yey mbangse Tooy Ɓèl, ti tâa mbangsumya ni kàn nirri ba. ³ Da nit ɓèl daprum ây pî aw gòyni dawrre ha aw hîi hîir ây ni jàk gurfum ây. Hû go ɗa gesu di Yeesu nit ɓèl daprum worro, e tâa ni jày ge hîi gi. ⁴ To ey tâa go ngin a deesi gi, ge tâa ngin nit daprum ba, ngam a nit daprum ây aw dii mgban a deesi, aw hîirre hîir ây kà yey gàa yèk mgbèngda gi. ⁵ Tèem daprum waw tèen gi jàk kàlnum ɗi ni bingi gbè a jày tâage a faktiturum, getnji ni yèk mgbèngda yey rage Muusa gi. Ngam ye dàne mbangsum gin titâam ngam Fay, Fay gàawe: Ii hakkilo, ha mu mbangsi jày pî kà yey lònumda dum nà ni jàk kàlnum a gopri gi. ⁶ Amma kòsòng Yeesu ngore tèem daprum hòmge ’mita dèy, ye tâa ey nit raknjunum ɗi a jàk wasta woy hòmge della, gòyge a yèk mòonjum kàn ây hòmge della gi. ⁷ Ngam to jàk wasta màrra tâa go ngin getiya, gaw kànsirra ngin woy cukti ba. ⁸ Amma Fay yèe dawrre da nit ây, gàa: Miy mi Tooy Ɓèl mi gàarre: E rri yey unji dàararre, ha mi gbèesi jàk wasta fûuya ni ni-Israyel ây, ni yòot Yuda ɗa. ⁹ Ge tâa kà jàk wasta yey mbirim ni wosom ta waw ba, a unji yey mòomi daw kàn waw, yuunim daw a dees Ejip gi. Ngam aw aw gòy a jàk wasta mum ba, miy ɗa mi ndòori dawge. Hû go gàa Tooy Ɓèl gi. ¹⁰ Gàa ɗa: E rri yey jàk wasta yey gim gbèesi ni ni-Israyel ây, a dat unji ây gi. Ii gim ii yèk mgbèngda mum a dànda waw, kè gim kèr ɗa a tinîir waw. Miy tâa gim tâa Fak waw, aw ngaa tâa gaw tâa nit ta mum. ¹¹ A dat maan cen nirri ge haasirra kàlnjum di nit tâanjum wàa, koo gàara di kor wàa «cèngnu di Tooy Ɓèl» ba. Ngam a nit ây pî cè gaw cèngnim, diga hàm ây ni nit ɓèl ây pî. ¹² Go gim gop daw ni ’maton a tèem makta waw, gim ɓaysisirra jàk maarra waw ba. ¹³ Fay ye yèe yèk jàk wasta fûuya gi, mgbantinifa woy màrra. Jàk yey mgbante wàrfe gi, kèle gbeecu.

¹ Jàk wasta màrra dii nà ni hàar ây ngam daprunum di Fay, ni gin tâam delliya mbangsin a nit ây a deesi gi. ² Aw mbangsi nà gin titâam Fay ni minjum ’nang ’nang cuk. Gin minjum màrra aw înu «gin delliya», yey iirran timòoni eb ây, ni taabul ni tàat ây a farra gi. ³ Gin minjum cukti dii a ɗàm kpees jimda jàk joorra, aw înu «gin delliya hòmge della». ⁴ A farra tâan nà gin gûurra jàk gurfum mbangsumya ni kangeerri, ni akota jàk wasta butiya lang ni kangeerri. A tîim akota gi, taang dii mbangsumya ni kangeerri mûunumya ni tàat mannu, ni suu Arong gotke waasi gi, ni gòok tikpàaga ây cuk kètiya ni yèk jàk wasta ây. ⁵ A fak akota gi dii nà tirèenjunum malayka ây ’mitiya, butke a gin mèsta njîim ngam yaafum jàk maarra. Amma got kpàaw yèerra yèk ây gi pî ay gi ba. ⁶ A jàk ây gi pî aw dii nà mbangsumya kà yey. A nit daprum ây aw lekɗe unji pî a gin minjum màrra a gin tâam maan, ha aw tèe tèem daprum. ⁷ Amma a gin minjum cukti, sey nit ɓèl daprum lekɗe nak kpolo a yeri lang. Lekɗe hû go ba, sey ni njîim ngam hak wàa ni ngam nit ây mbirge jàk maarra cen cèngnum gi. ⁸ Kà yey Jungci Delliya lònirre, orri a gin tâam delliya ɗà faari ba, ye tâa gin minjum màrra tâarre bak gi. ⁹ Gin minjum maan dii jàk rèenjunum a tâarra yey, ngam aw hîirre nà hîir ây ni jàk gurfum ây tâa gaw kpàaw inum dànjum tinîir nit yey dapri gi e tâa getiya ba. ¹⁰ Tèem daprum maan ’mèmsi ni ɓaysum yèk tiriit ây, ni njoor ây, ni kòlla jàk ây ’nang ’nang. Jàk hàar ây ɗi a tèem isi gbè, ha mgbàr yey ge gòyni Fay hàar takundi gi. ¹¹ Amma ye dàara Kristu gi, ha e tâa nit ɓèl daprum ni jàk mbâr ây ’maara gi, de lege a gin tâam yey hòmge ’mita, hòmge geta gi, tâa ti tâa mbangsumya ni kàn nirri ba, kà gàarra ti tâa kà jàk mbangsum ây a kparri gi ba. ¹² Ey lege a gin tâam delliya nak kpolo gerre ngam koo ningàa. Ti hîi njîim tikpool koo njîim hàm naay ba, amma ni njîim hak wàa kpàa sàasum ngam worro tâam timgbàri. ¹³ Ngam koo njîim tikpool, koo njîim gusi, koo sama aksum hàm naay yey mèsɗan daw da nit ây tâage ’miskumya gi, delsi dawrre ye ɓetkini daw is waw gi. ¹⁴ Sakko njîim Kristu nit yey hîige hak wàa ɓet ɓet a gin Fay, mûuge ni Jungci tâam timgbàri gi, ɓetkininarre dànjum tinîiri a tèem wutiya, ngam ha ot kpàaw daprum di Fak beengiya. ¹⁵ Kà yey Kristu ire nit raknjunum a jàk wasta fûuya, ngam ha a nit ây ’naasi daw Fay aw kpàa jàk koyrra tâam timgbàri, yey yèe daw nà ni mòonjum kàn gi. Ey wurre ngam e sàasi daw da nit ây a jàk maarra waw mbirin a tâam waw tâan nà a jàk wasta màrra gi. ¹⁶ A gin yey tâa jàk wasta, gesi nit yey yèege yèk maan e wut ɗà. ¹⁷ Ngam jàk wasta ge gòy ba, ge mbir koo jâ ba, sonaa nit yey yèege yèk maan wut go gi. ¹⁸ Hû go sey ni tuusum njîim ɗaa gòyrra jàk wasta màrra. ¹⁹ Muusa ye sak daw da mûsa nit ây yèk mgbèngda gi pî, de arre njîim hàm naay ni njîim tikpool, ’mèmsa ni sòo, ni gimsi wongjiya, ni waas Isop, de mèsɗa a defterre yèk mgbèngda ni gin nit ây pî, ²⁰ de gàa: E rri yey njîim jàk wasta yey saknu Fay ngam ha un mòo gi. ²¹ Kà yey mèsɗa ɗa a gin titâam Fay, ni jàk titèeni ây a tèem daprunum gi. ²² Mûsa jàk ây pî aw kpàa ɓetkunum ni njîim kà yey gàa yèk mgbèngda. To njîim tuu go ba, yaafum jàk maarra ɗa cen. ²³ A jàk tirèenjunum jàk ây a faktiturum gi gesi aw kpàa ɓetkunum kà yey. Amma a jàk ây a faktiturum aw dii ni gayam jàk gurfum ây woy hòmge della di yey. ²⁴ Ngam Kristu ti lek a gin tâam delliya yey mbangsin ni kàn nirri, rèenjinin gbè ni takundi gi ba, amma lege a faktiturum, ha e lòt kòsòng a ɗàm kpees Fay ngam worro. ²⁵ Ey ti lek e hîi hak wàa ngam gurfum nak mûsi jày ba, kà yey lege nà nit ɓèl daprum waw da ni-Yude ây ni njîim jàk kana yeri pî a gin tâam delliya gi ba. ²⁶ To tâa go ngin kà yey, gesi ngin Kristu e rii ’màari nak mûsi jày diga ɗaarra mbangsum kparri. Amma lòrre kòsòng nak kpolo a gbèeni mgbàr ây, ngam e atfa jàk maarra ni daprunum hak wàa. ²⁷ Gesi koo wuna e wut nak kpolo, a dat maan e kpàa kiita Fay. ²⁸ Hû go ɗa Kristu, ye tâa daprini hak wàa nak kpolo ngam e atfa jàk maarra nit ây dèy gi, lò ge lòrra nak cukti naa ngam ata jàk maarra, amma ngam e saani daw da nit ây waagu gi.

¹ Yèk mgbèngda tâage tirèenjunum a jàk ây gi gbè, bingi ɗi a jàk mbâr ây gaw dàara gi, ti kpàa daw inum getiya da nit ây gûuge jàk gurfum ây a yeri pî gi ba sam. ² To a nit ây tèege nà tèem daprum aw kpàa go ngin ɓetkum nak kpolo a jàk maarra waw ni ata jàk dànjum àyrriya a tinîir waw gi, gaw woofa ngin gûurra jàk gurfum. ³ Amma takundi, gûurra jàk gurfum ây gi ɓaysini dawrre da nit ây jàk maarra waw yeri lang. ⁴ Ngam njîim gus ây ni njîim tikpool ây gaw kpàa ata jàk maarra ba. ⁵ Ngam maan Kristu ye dàara a kparri gi, de gàaw di Fay: Jàk gûurra koo jàk hîir ây mu yiɗi ba, amma mu mbangsim isi. ⁶ Jàk gurfum, koo jàk gûurra ngam ata jàk maarra gi aw delum ba. ⁷ Ɗo de gàam: E rri yey mi dàarage, ha mi tèe jày yiɗum gi, Fay, kà yey tâa kètiya yèk hak mum a defterre wey gi. ⁸ Màrra gàaye: Jàk gûurra koo jàk hîir ây, koo jàk gurfum, koo jàk gûurra ngam ata jàk maarra aw delum ba, koo ye tâa aw hîirre jàk ây gi kà yey gàa yèk mgbèngda. ⁹ A dat maan de gàaye: E rri yey mi dàarage, ha mi tèe jày yiɗum gi. Kà yey Kristu hèenifa jàk gurfum ây woy mgban, ha e kànsirra jàk gurfum fûuya tâage hak wàa. ¹⁰ Ye tâa ey tèe jày yiɗi Fay gi, de kpàana ɓetkum a jàk maarra worro ni hîirra is wàa nak kpolo, gerre ngam koo ningàa. ¹¹ Koo nit daprum hâ tèerre tèem daprum unji pî, hîirre nak mûsi jày jàk gurfum ây, tâa ge kpàa ata jàk maarra da nit ây ba sam. ¹² Amma Kristu ye hîi jàk gurfum kpolo gbè ngam jàk maarra nit ây, de tâa a riina Fay ha tâam timgbàri. ¹³ Waatirre a farra, ha Fay e ii daw da nit yiir ta wàa gin nafta nak wàa. ¹⁴ Hû go ni hîirra jàk gurfum kpolo ini dawge getiya koo ningàa da nit ây ɓetini daw a jàk maarra waw gi. ¹⁵ Jungci Delliya seedininarro yèk yey ɗa, ngam gàa màrra: ¹⁶ Tooy Ɓèl gàa: E rri yey jàk wasta yey gim was ni aw a dat unji ây gi. Ii gim ii yèk mgbèngda mum a tinîir waw, kè gim kèr ɗa a dànda waw. ¹⁷ De iisirra gàarra: Gim ɓaysisirra jàk maarra waw ni tèem makta waw ba. ¹⁸ To jàk yaafum tâa go, gayam censirra hîirra jàk gûurra yèk jàk maarra ba. ¹⁹ Un kor ta mum, ot dii ni ot lekta cen tolnji a gin tâam delliya hòmge della gi ni njîim Yeesu. ²⁰ Ey mgbatna ot fûuya ot gûynum, ye hòme a jimda jàk joorra woy minjum tâage is wàa gi. ²¹ Orro ot dii ni nit ɓèl daprum tâage tiɗàm kpeesi a àay Fay. ²² Hû go dàan ot hèewrra di Fay ni tinîir takundi, ni goosum kpèw, ye tâa tinîir worro diina ɓetkumya a dànjum maktiya, is worro ngaa diina kòlliya ni sòo ɓet ɓet. ²³ Dàan ot mòo kpèw a jàk dànda yey seedina gi cen yûurra, ngam Tooy hîigina yèk mòonjum kàn, mòorre yèk wàa mbâra. ²⁴ Dàan ot gopnji a tîim worro, ngam ot mûyi a yiɗum ni yiide, ni tèerra tèem mbâri. ²⁵ Ta ot woofa dàarra a kimjum worro kà yey rûun a nit ây kana ba, amma dàan ot kpèwsinji a tîim worro, sakko ye tâa un rapɗe unji Nitcoorra hèerarre gi. ²⁶ Ngam to ot mbir go jàk maarra, a dat ye kpàana cèngnum yèk takundi, ot censirra ni ot gûurra jàk gurfum ngam jàk maarra worro ba, ²⁷ sey waarra tolnji kiita ni kpânda eb yey ge gbeesi daw da nit yiir ta Fay gi. ²⁸ To nirri yew go yèk mgbèngda Muusa, a nit ây cuk koo taan aw seedu go, kpàa ge kpàa wurra cen ’maton. ²⁹ Sakko kà ge tâa kiita nit yey hàanju di Hàm Fay, raptu kà jàk ɓa hû go di njîim jàk wasta, kpàani nà mgban ɓetkunum ni erra, luusu di Jungci mbâri gi! Ji dànnu, kày ge tâa kiita wàa ya? ³⁰ Ngam ot cèngnu di Tooy gàage: Kànsum jàk makta a gin mum tâaye, miy gim hîisu kiita di nirri. Gàaye ɗa: Tooy Ɓèl hii ge hiiti daw da nit ta wàa. ³¹ Lekta a kiita Fak beengiya jàk tolnji ɗi. ³² Ɓaysin kà yey tâanu nà mgban a unji màrra ây, ye kpàanu kayngum Fay, èfnu ɗa tinîir wun a riirra ’màar ây àyge dèy gi. ³³ Mgbàr kana un dii jàk tiraptunum, ye jàmrin dun riisin dun ’màari a nis nit ây, mgbàr kana un mgbaanji daw da tiriit ’màar ây kà yey. ³⁴ Un gop daw ni ’maton da nit ây leknin daw a kultuma gi. Ye arrin jàk ta wun, un woo daw ni tinîir kâwrra aw mbitnu kà yey, ngam un cèngni, jàk yey hòmgu di yey ge tâanu tâam timgbàri gi waanurre. ³⁵ Ngam maan ta un ’màktifa jàk goosum yey diigunu ni jàk kpàarra dèy gi ba! ³⁶ Un dii ni gayam èfta tinîiri, ha un tèe jày yiɗi Fay, un kpàa jày ii ni yèk mòonjum kàn gi. ³⁷ Ngam gàa a defterre Fay: Ngasɗa sey unji càa, ha nit yey gesi e dàara gi dàararre, ge tòora ba. ³⁸ Nit mum nit gòyrra ɗèm gi gû ge gûy ni goosum. Amma to ir go u daarri, ge kâwsim tinîiri ba. ³⁹ Orro ot tâa kà aw irge u daarri, dike a gin gbeerra gi ba, amma ot dii nit ây goose, tâage a ot saarra gi.

¹ Ngam goosum tâage iirra tinîiri kpèw a jàk dànda, ni cèngnum mbâra a jày tâa nirri ti rap ba. ² Ni goosum kà yey a wosom ây kpàan nà ɓòlmum Fay. ³ Ni goosum cèngnina, kparri ni jàk ây pî mbangsi ni yèk Fay, ha jày tâa nirri ti rap ba ire jàk rapta gi. ⁴ Ni goosum Abel hîi nà jàk gurfum di Fay hòmgu della di Kaynu. Ngam goosum wàa Fay de gàaw nit ɗèm ɗi, ye ngore hîir wàa. Koo ye tâa wurre gi, goosum wàa yèerre bak ha kòsòng. ⁵ Ni goosum Enoki de tâa ti wut ba, Fay de asu beengiya a faktiturum. Aw kpàasu a deesi ba, ngam Fay asu gi. Defterre de gàa a hak wàa, ɗoko asum wàa ey delu mgban di Fay. ⁶ Nirri ge delu di Fay ba, sey ni goosum. Ngam gesu di nit yey hèegurra di Fay e goosi, nge Fay dii tâarre, hîirre bèeb tèem waw da nit ây kàmgu gi. ⁷ Ni goosum Nuhu rage jàk kàlla Fay a jày tâa ɗà ti rap ba gi, de tole a yèk maan de mbangse koombowal, a gin yey ge saanini nit àay rra wàa. Ni goosum wàa yaanu di kparri a kiita, kpàa ɗa gòyrra ɗèm. ⁸ Ni goosum Abraham rage tuy a ye ’naasu Fay gi, de ane e dik a gin ge tâaw jàk koyrra, a gin tâa ti cèngni ba gi. ⁹ Ni goosum tâa kà ni-wooy a dees yey gàaw Fay ni yèk mòonjum kàn gi, tâarre a ndûkci ây, kà yey gaw tâa ɗa Isak ni Yakob ’mèmse ni ey a yèk mòonjum kàn gi. ¹⁰ Ngam waarre riiy ɓèl ge tâa tatiya, gòyrriya, yey ge kèr Fay ge jâa gi. ¹¹ Ni goosum Sara ɗa kpàa mbinum kpàarra hàm, koo ye tâa wàrfige, ngam raptu di Tooy hîige yèk mòonjum kàn gi gòyrre a yèk wàa. ¹² Hû go maa wàa Abraham nit wàrfiya kpolo, kpàa hàm ây mûsi jày kà tibiskum ây a faktiturum, kà kaksoori a sîirra ɓèl tâa gaw kpàaw sakta ba gi. ¹³ Aw pî a goosum waw wurrin, cen kpàarra jàk ây gàa Fay ge hîi daw ni yèk mòonjum kàn gi, sey diga kpâarriya raptifan daw kèpfan daw. Aw lòni yèk hak waw, aw a nit cita ây ɗi, kà ni-wooy ây a kparri. ¹⁴ A nit ây gàage kà yey, aw lònirre nge aw aw kàmde gin titâam waw takundi. ¹⁵ To aw ɓaysi go ngin a dees yey yuuran gi, gaw kpàa ngin ot isum a farra. ¹⁶ Amma aw kàmde gin tâam yey hòmge della gi, kà gàarra faktiturum. Ngam maan Fay ti ii lawsam, ha aw ’naasu Fak waw ba, ngam mbangsi daw riiy ɓèl e tâa daw gin titâam waw. ¹⁷ Ni goosum Abraham gàa nà e hîi hàm wàa Isak kà jàk gurfum a ye gerru Fay, gàa nà e hîi hàm wàa kpolo, yey kpàa a yèk mòonjum kàn gi, ¹⁸ gàaw nà Fay: Ni Isak yòot ta wey gaw cègi. ¹⁹ Abraham dàne, Fay ge kpàaw gûysum di hàm wàa a wurra. Ngam maan de kpàasu mu gàa gûyse a wurra. ²⁰ Ni goosum, Isak mbârsi daw di Yakob ni Esuwa, ni yèerra yèk jàk ây ge dàara gi. ²¹ Ni goosum Yakob ye gàa e wut gi, mbârsi daw da hàm ta Yosef cuk gi, ûu ditiktik a pètki suu wàa e coo Fay. ²² Ni goosum Yosef ye gàa e wut gi, yèe yèk yuurra ni-Israyel ây a dees Ejip, kàl daw ɗa kày gaw mbir ni wurra wàa. ²³ Ni goosum too wàa ni nuu wàa di Muusa fûunuwan corri taan a dat kpàarra wàa, ye tâa aw rabe hàm dele, aw tol jày gàa wûun gi ba. ²⁴ Ni goosum Muusa ye ’mirre gi, de hàwe ta aw ’naasu hàm wàa di sapri Farong ba. ²⁵ Ey hòme yiɗum e riinji ’màari ni nit ta Fay, ni rakta kâwum a jàk maarra unji càa gi. ²⁶ Ey rapti riirra ’màari a jàk wâskunum Kristu gi bèebi ɗi, hòm daw ’mita da bèeb ây a dees Ejip, ngam iirre nis wàa a jàk yey ge kpàa gi. ²⁷ Ni goosum yuu e woofa dees Ejip, ti tol ngòlnji wûun ba, ngam gòyrre kpèw mu gàa rapɗe di Tooy yey tâa nirri ti haa rapta ba. ²⁸ Ni goosum ii Paska, gûu mgbâay ây lòre njîim a nin ây, ngam ta malayka gbeesum hàm màrra ây e ɓàt daw da hàm ni-Israyel ây ba. ²⁹ Ni goosum a ni-Israyel ây yewin a sòo ɓèl înuwan Sòo Caliya, kà a dees kòyrriya, a gin yey gbeen ni-Ejip ây ye haawan yewrra kà aw gi. ³⁰ Ni goosum waw yaan a jâarra bàan ây a Yeriko, a dat ye gîrin kpumdin nak jòròs gi. ³¹ Ni goosum Rahab kin tikàm toonji ti gbeenji ni nit ây hàwgu rakta tuy di Fay gi ba, ngam ngore mbâra da nit ây dikifa sipta sipri. ³² Ji gim gàa bak ya? Orri cenim ha mi yèe yèk Gedeyon, ni Barak, ni Samson, ni Yefta, ni Dawda, ni Samuyel, ni nit ây lòni nà yèk Fay gi ba. ³³ Ni goosum a nit ây gi sunin daw da wûun ây, tèen tèem ɗèm, kpàan jày gàa Fay ni yèk mòonjum kàn gi, fantin mgbelyèk tidîisi, ³⁴ kûysin ngongji ebi, saan a pètki ɓet ɓèl, kpàasin kpèw kpèw a dàngda isi, irin nit sunda ây a bàpri, mànin daw da nit bàpri ây kana gi. ³⁵ A kin kana aw kpàasi hàm ta waw gûyse a wurra. Da nit ây kana aw riisi daw ’màari ha aw wurri, aw ngor aw woo daw ba, ngam ha aw kpàa gûysum a jungci yey hòmge della gi. ³⁶ A nit ây kana aw kpàa tinjàmni ni tilèfni, ni ti’mèmni, ni lekta a kultuma. ³⁷ Da nit ây kana aw aari daw ni gòok ây, da nit ây kana ngaa aw aksi daw ni ebi, da nit ây kana aw gûunji daw is waw cuk, da nit ây kana ngaa aw ɓàri daw ni ɓet ɓèl. A nit ây kana aw gîtnjirre aw mgbapɗe kûuk mgbâay, koo kûuk bii, aw riirre fòon, aw ɗàa dawrre ɗàari, aw riisi dawrre ’màari. ³⁸ A nit kparri ây aw get ha nit ây gi aw tâanji ni aw ba. Aw gi aw gîtnjirre a tîim nûri, ni fak gopri ây, ni gook ây, ni kpàtki ây. ³⁹ A nit ây gi pî aw kpàa ɓòlmum Fay ni goosum, koo ye tâa aw kpàa jày gàa Fay ni yèk mòonjum kàn gi ba. ⁴⁰ Dorro Fay ɗàana mbangsum jày hòmge della, ngam ta a nit ây gi aw tâa getiya sonaa ni orro ba.

¹ Ye tâa orro ot dii mgbaarriya ni mûsa nit seedum ây goose gi, hû go dàan ot woofa titokri pî bûrgina gi, ni jàk maarra ɗa tâagina gaarra, ot ’nòo ni èfta tinîiri a ’nòor yey tâage a ɗàm kpees worro gi. ² Dàan ot ii nis worro ot raptu di Yeesu, tâage nit ɗaarra ni nit gbèesum a goosum worro! Ey èfe tinîir wàa ye ɓàruwan a minjum kpiiri, raptu di ’màar maan kà jàk ɓa hû go, ngam kâwum yey waagu nà a ɗàm kpees wàa gi, de tâa a riina gbaat wûun Fay. ³ Ɓaysin kày èfe tinîir wàa, a ye hàanjuwan a nit ây mbirge jàk maarra gi! Kà yey ta un loo ba, ta jungci is wun e dàngnu ba. ⁴ A haarra gbàat wun ni jàk maarra, un ɗà un haa ha a wurra ba. ⁵ Un hènti yèk kpèwsum yey yèenu nà Fay kà hàm ta wàa gi yi? Ngam gàa: Hàm mum, ta mu raptu kà jàk luurriya ba, to Tooy Ɓèl nàrrumde go gi. Ta kpèw kpèw e atnjum ba, to yèemde go a jàk maarra. ⁶ Ngam Tooy Ɓèl nàtɗe di nit yey yiɗu gi, lèfɗe koo di hàm hâ ngoru kà hàm wàa gi. ⁷ Efin tinîir wun a nàta wàa! Ngam Fay mòonurre kà hàm ta wàa. Hàm hâ tâa too wàa ti nàrru ba ya? ⁸ To un kpàa go ngin nàta wàa kà yey kpàan a nit ’mèmsum ây ni un gi ba, gun tâa ngin hàm takundi ây ba. ⁹ A too rra worro tâagina tooy isi a kparri gi ye nàrrin dotki, ot tol dawrre. Sakko ge gesina ha ot ûuni hak worro a gin Tooy faktiturum, ngam ot gûyi ba yi? ¹⁰ Ngam a too rra worro a kparri aw nàtnarre unji càa kà yey dànin gi. Amma Tooy Ɓèl nàtnarre ngam mbâr worro, ha ot ’mèmsi a della wàa. ¹¹ Jàk nàta pî a ye nàtna gi, tâana kâwum ba, sey jàk àyrra tinîiri. Amma a dat maan re ge rep daw tâam mbâri ni gòyrra ɗèm da nit ây rûuge a jàk nàta maan gi. ¹² Ngam maan aanjin kàn ta wun loorriya, kpèwsin gbeski ta wun dàngdiya gi, ¹³ nafin un dik a ot gòyrriya, ngam ta nit èskum e jòlni nak wàa ba amma e kpàa ndòosum. ¹⁴ Kàmin tâam mbâri ni nit ây pî! Kàmin ɓetkunum hak wun! Cen nirri ge rap Nitcoorra ba, to èe go jàk yey gi. ¹⁵ Faasin hak wun ta nirri kpolo e èe mbâr Fay ba, ngam ta e tâa kà jàk ɓukta ɗalliya ’mitke gi, e ir jàk mboysum da nit ây dèy ba. ¹⁶ Ta nirri kpolo e tâa nit haanum tuy koo nit woorra jày kà Esuwa, sàanifa tâam ɓèl wàa ni tiriici gi ba. ¹⁷ Un cèngni, a dat maan ye yiɗi kpàarra mbâr jàk koyrra, de tâaw njangdiya, ti kpàa orri ha e ini tinîir wàa ba, koo ye tâa kàmde kà yey ni ti umni gi. ¹⁸ Ngam un un hèerra a jàk bangda ba, koo a eb yeerriya, koo a titurum yiriya, koo a kulpi, koo a hiski titèkruma, ¹⁹ koo a dûurra ti uta, koo a gûn nirri kà yey mbit daw da ni-Israyel ây gi ba. Ye ragin gûn maan, aw waarre ta e iisirra daw yèerra ba. ²⁰ Aw aw kpàaw tokta yèk mgbèngda yey gàage «koo jàk tinak hâ mâatirra a gopri gi, sey aw aaru ni gòok ây e wutki» ba. ²¹ Jàk lònum Fay gi jàk tolla ɗi, ha Muusa gàa: Mi tolle ni timalni. ²² Amma un hèerra a gopri Siyona, a riiy Fak beengiya tâage Yerusalem woy faktiturum, ni mûsa malayka ây hòmge ujinè ra gi, ²³ a gin kimjum kâwrra waw da nit màrra ta Fay tâage nîir waw kètiya a faktiturum gi, un hèerra a gin Fay Tooy hiitum nit ây pî, ni gin jungci waw da nit ɗèm ây tâage getiya gi. ²⁴ Un hèerra a gin Yeesu nit raknjunum a jàk wasta fûuya, ni gin mèsta njîim wàa yèege jày hòmge di njîim Abel. ²⁵ Faasin hak wun, ta un hàwu rakta di nit yey yèegunu gi ba. Ngam a nit ây hàwge nà rakta di nit yey yèegirra daw yèk Fay a deesi gi, aw saa kiita ba. Sakko orro kà got saa, to ot ir go ot woowfa di Tooy yey yèega dot diga faktiturum gi ya? ²⁶ Ey yûuse nà deesi ni gûn wàa gi, gàa kòsòng ni yèk mòonjum kàn: Yûu gim yûusi bak naa deesi gbè, amma faktiturum ɗa. ²⁷ Ye gàa «gim yûusirra bak», lònirre nge jàk ây pî tâage mbangsumya gi ye gaw yeski a yûurra maan, ngam ha jày tâa ge yûu ba e ngasi. ²⁸ Ye tâa orro ngo got ngor wûun yey tâa ge yûu ba gi, dàan ot gàa mbew di Fay, ha ot dapru daprum yey ge delu gi, ni coorra ni tolnji. ²⁹ Ngam Fak worro tâage kà eb aksum.

¹ Ta un woofa yiɗum kor ây ba! ² Ta un woo ngota ni-wooy ây ba! Ngam kà yey a nit ây kana ngorin nà malayka ây, aw cèngni nge aw a malayka ây ɗi ba. ³ Ɓaysin daw da nit ây tâage a kultuma, mu gàa un ɗa un dii ’mèmdiya ni aw a kultuma gi. Ɓaysin da tiriit ’màar ây, ye tâa un cèngni un ɗa un dii ni is dàngdiya, gun rii ’màari kà aw. ⁴ Un pî coonjin a atnjum nihun ni nikin, ta tâanjum wun e mboy ba, ngam Fay hii ge hiiti daw da nit tigîtnjurum ây ni nit ây iirge njeenu gi. ⁵ Ta dànda tinîir wun e fut yiɗum seede ba. Kâwsin tinîir wun a jày tâagunu gi! Ngam Fay gàaye: Miy gim woomfa ba, gim ’màktumfa ba sam. ⁶ Hû go gàa got gàa ni suurra tinîiri: Tooy Ɓèl tâage nit mgbaanjum mum, gim tol koo jâ ba. Ji ge mbirim nirri ya? ⁷ Ɓaysin da nit tiɗàm kpees wun yèegunu nà yèk Fay gi, raptin dikri waw ni yèk wurra waw, furrin goosum waw! ⁸ Yeesu Kristu ey gòyge kpolo ninjaay, niyey ha tâam timgbàri, ge bunji ba sam. ⁹ Ta jàk kàlnjum ây kana ’nang ’nang aw nàtnu aw jòlnunu ba. Ngam dele to tinîir nirri kpèwsi go ni mbâr Fay, naa ni yèk tiriici tâa ge mgbaanji daw koo jâ da nit ây futke ot maan gi ba. ¹⁰ Orro ot dii ni gin gûurra jàk gurfum, yey tâa a nit ây tèege tèem daprum a gin tâam delliya aw cen ni orri ha aw rii jày hîin a farra gi ba. ¹¹ Nit ɓèl daprum hû waa nà e lekni njîim jàk tinay a gin tâam delliya hòmge della gi, e dapri ngam jàk maarra nit ây, amma is jàk maan hû waan nà aw aksifa a dat àay ây. ¹² Ngam maan Yeesu ɗa wurre a dat riiy Yerusalem, ha e ɓetkini daw da nit ây ni njîim hak wàa. ¹³ Hû go sey ot yuufa a gin wàa a gbaa, ot tok jàk wâskum wàa. ¹⁴ Ngam ay gi ot cen ni riiy tâarra koo ningàa ba, amma ot kàmde riiy yey ge tâa gi. ¹⁵ Dàan ot hîiw jàk gurfum ây di Fay koo ningàa ni Yeesu, e tâage hîir ’misunum nîir wàa ni mgbelyèk worro. ¹⁶ Ta un hènti tèerra jàk mbâri, ni mgbaanjurum a tîim wun ba. Ngam hîir ây kà yey ge delu di Fay. ¹⁷ Ragin daw tuy da nit tiɗàm kpees wun, goosin yèk waw! Ngam aw aw faanurre gi, goo gaw goosi yèk hak wun a ɗàm kpees Fay. To un rak dawrre go tuy, kpàa gaw kpàa mbita kà yey ni kâwum tinîiri. Tonaa hû go ba, mbi gaw mbir ni àyrra tinîiri, yey tâa ge mgbaanja dun koo jâ ba. ¹⁸ Waan Fay ngam worro! Ngam ot cèngni mbâra nge dànjum tinîir worro dii burriya, ye tâa ot kàmde dikta dikri mbâra a jày pî. ¹⁹ Mi iisirra dunde gàarra un waa Fay, ngam e insimfa kènu a gin wun. ²⁰ Fay gûysu di Yeesu Nitcoorra worro, irge hàm faat ɓèl da mgbâay ây yèk wurra wàa, ni njîim wàa gòyni jàk wasta tâam timgbàri gi. ²¹ Fay Fak tâam mbâri e kpèwsunu a jàk mbâri pî ha un tèe jày yiɗi gi, e tèe a gin wun jày delgu gi ni Yeesu Kristu! ’Mita e tâaw di Yeesu tâam timgbàri ha tâam timgbàri! Amen. ²² Mi waanurre un kor ta mum, ngorin yèk yey yèenim dun ha mi kpèwsunu gi. Ngam yèk yey kèrmifa dun gi, luuye. ²³ Cèngnin, di kor worro Timote aw woowe. To dàara go kènu, di gim diknjifa ni ey a gin wun ha mi rapnu. ²⁴ Kèbin daw da nit tiɗàm kpees wun, ni nit ây pî tâage nit della ta wàa di Fay gi! A ni-Italiya ây aw kèpfa dunde. ²⁵ Mbâr Fay e tâanji ni un pî!