Ni-Galatiya ây

Ni-Galatiya ây

¹ Miy mi Pawlu mi nit tèerriya, tèem mum ti ana a gin nit ây koo a raknjum ni nirri ba, amma a mbinum Yeesu Kristu, ni Fay Tooy Ɓèl gûysu di Yeesu a wurra gi. ² Miy ni kor goosum ây pî tâanji ni miy, ot kèpfa dunde dun nit kimjum ây a dees Galatiya. ³ Nge Fay Too worro ni Yeesu Kristu Nitcoorra, aw hîinu mbâr waw ni tâam mbâri! ⁴ Kristu ey hîige hak wàa wutke ngam jàk maarra worro, ha e saanina a tâam makta a kparri yey gi, kà yey yiɗi Fay Too worro. ⁵ ’Mita e tâaw di Fay tâam timgbàri ha tâam timgbàri! Amen. ⁶ Tâamde ’nang ye hèesunu kènu, un woowfa di Tooy Ɓèl ’naasunu ni mbâr Kristu gi, itnu a Yèk Kâwrra kana. ⁷ Takundi, Yèk Kâwrra kana cen. Amma mi yèenurre kà yey, ngam a nit ây kana aw yûusunurre, aw yiɗi aw ini Yèk Kâwrra Kristu. ⁸ To nirri, koo orro koo malayka anga a faktiturum, to saknu go Yèk Kâwrra tâage ’nang ni Yèk Kâwrra yey sakna ot dun gi, e tâa lètiya! ⁹ Kà yey gàana orro mgban gi, hû go gàami ɗa: To nirri saknu go Yèk Kâwrra tâage ’nang ni Yèk Kâwrra yey ngotnu gi, e tâa lètiya! ¹⁰ Hû go mi yèerre ngam ha mi kpàa ɓòlmum a gin nirri yi, koo a gin Fay yi? Malla mi kàmde kâwsum da nit ây yi? To tâa go ngin mi kàmde bak kâwsum da nit ây, gim tâa ngin sàay Kristu ba. ¹¹ Un kor ta mum, mi kàlnurre: Yèk Kâwrra yey saknim dun gi, ti ana a gin nirri ba. ¹² Ngam mi ngor yèk maan a gin nirri ba, nirri ɗa ti kàlnjim ba, amma Yeesu Kristu ey lònimda yèk maan. ¹³ Un rage yèk dikri mum kày tâa nà mgban a ot ni-Yude ây, mi ɗàa dawrre nà ɗàar ɓèl da nit ta Fay kimje gi, mi haawe nà ha mi gbeesi daw. ¹⁴ Mi hòm daw da boro ta mum a futa a ot ni-Yude ây, mi hòm daw nà dèy a tèerra yèk hàar wosom ta mum. ¹⁵ Amma Fay catkim diga himni nuu mum, de ’naasim a mbâr wàa. ¹⁶ Ye delu e lòni Hàm wàa a gin mum, ha mi sak Yèk Kâwrra a tîim nit ây èege yèk wàa gi, mi yèenji ni nirri ba. ¹⁷ Mi dik ɗa a Yerusalem a gin nit tèerra ây ɗàagim gi ba, amma mi taye yaale a dees ni-Arab ây, a dat maan de irma a Damasku. ¹⁸ A dat yeri taan de koyma a Yerusalem, ngam mi rabu di Piyèr ha mi cèngnu, de tâanjim ni ey unji ra sàm kèrèw. ¹⁹ Amma da nit ây kana tèe daw Yeesu gi mi rap daw ba, sey Yakuba kaa wàa di Nitcoorra. ²⁰ Jày kèrmifa dun gi takundi ɗi; mi gàarre a ɗàm kpees Fay, mi rèengde ba. ²¹ A dat maan de dikmi a dees Siriya ni Kilikiya. ²² Mgbàr maan a nit ta Kristu kimje a dees Yude, aw cèngnim ba. ²³ Aw rage gbè a gin nit ây kana aw gàarre: Nit yey ɗàagina mgban ɗàari gi, sakɗe yèk goosum yey haaw nà e gbeesifa gi. ²⁴ De ’misin nîir Fay ngam mum.

¹ A dat yeri ra sàm naan de diksim a Yerusalem ni Barnaba, ni Titus ɗa. ² Mi dige ngam Fay lònim kà yey. Mi cèngnini daw da kor ây a farra Yèk Kâwrra yey saknim a tîim nit ây èege yèk Fay. Mi cèngnini daw hû go ɗa da nit tiɗàm kpees ây ye kimjina orro kpolo worro ni aw, ngam mi yiɗi ha tèem mum mgban koo kòsòng e tâa ɓa hû go ba. ³ Koo di Titus ni-Girèk gi tâanje ni miy, aw ndagu ha e rrèpni ba. ⁴ Amma a kor rèeng ây leke ni fûucu dàaga ni gâra, ha aw faana ray a tâam tiròom yey tâagina a gin Yeesu Kristu gi, aw yiɗi aw inina sàay yèk mgbèngda. ⁵ Orro ot rak daw tuy koo càa ba, ngam ha takundi Yèk Kâwrra e gòynjisi bak ni un. ⁶ A ’mita waw da nit ây gàan daw nit tiɗàm kpees ây, koo kà ’mirrin ya, jày ti tâamde a ’mita maan ba, ngam Fay ti raptirre nis nit ây ’nang ’nang ba. A nit tiɗàm kpees ây gi ɗa aw iisimda koo yèk kana ba. ⁷ Amma aw rabe, Fay hîimi mi sak Yèk Kàwrra da ni-riiy ây kana tâa aw rrèpni ba, kà yey hîiw Piyèr e sak Yèk Kâwrra da ni-Yude ây rrèpni gi. ⁸ Ngam Tooy yey tèenji ni Piyèr a tèem wàa a tîim nit ây tâage rrèpnumya gi, ey tèenji ni miy ɗa a tèem mum a tîim nit ây èege yèk wàa. ⁹ Yakuba, ni Piyèr, ni Yuhanna gàan daw nit gòynum ây gi, ye cèngnin mbâr yey hîim Fay, de mòonjin kàn raknjum ni miy ni Barnaba, ha orro ot dik ot tèe a tîim nit ây èege yèk Fay, aw ngaa aw tèe a tîim ni-Yude ây tâage rrèpnumya gi. ¹⁰ Sey yèk kana kàlin dot gbè, ot ɓaysi daw da nit èca ây a tîim nit kimjum ta waw. Mi hâri a tèerra tèem maan. ¹¹ Amma Piyèr ye dàara a Antakiya, de gòymi a ɗàm kpees wàa mi anurra yèy, ngam ey gerre ha mi yèewrra. ¹² Ngam ɗoko a nit ây kana anga a gin Yakuba aw dàara gi, ey riinji ni kor ây tâage nà mgban nit ây èege yèk Fay. Amma ye dàaran gi, de woofariinjum ni kor ây nà, de ɗòlnje ni aw ngam tole da ni-Yude ây tâage rrèpnumya gi. ¹³ A ni-Yude ây kana ɗa aw ’mèmsi a iirra tibiw ni ey, ha de jòlnuwan di Barnaba a tibiw waw. ¹⁴ Ye rapmi aw dik a ot ɗèm a takundi Yèk Kâwrra ba, de gàami di Piyèr a ɗàm kpees waw pî: Muy mu ni-Yude, ye tâa mu mbire kà nit ây èege nà yèk Fay gi, naa kà ni-Yude ây, ngam jâ ndakmu daw da nit ây èege nà yèk Fay aw fut ot ni-Yude ây gi ya? ¹⁵ Dorro aw kpàana ni-Yude ây, aw kpàana kà nit ây èege yèk Fay ba, tâage ni jàk maarra gi. ¹⁶ Amma ot cèngni, nirri ge kpàa gòyrra ɗèm ni tèem yèk mgbèngda ba, sey ni goosum di Yeesu Kristu. Orro ot goosuge di Yeesu Kristu, ha ot kpàa gòyrra ɗèm naa ni tèem yèk mgbèngda, amma ni goosum di Kristu. Ngam cen nirri ge kpàa gòyrra ɗèm ni tèem yèk mgbèngda ba. ¹⁷ Amma to aw kpàana go orro ot nit mbita jàk maarra ɗi gi, ye tâa ot kàmde goosum a ’mèmsum ni Kristu, mba Kristu nit mgbaanjum tèem jàk maarra ɗi ya? Ge tâa hû go ba sam! ¹⁸ To mi jâasi go kan jày yaanimfa gi, mi iiwe di hak mum mi nit yewrra yèk mgbèngda ɗi. ¹⁹ Ngam a futa yèk mgbèngda mi wurre a yèk maan, ha mi gûy ngam Fay. Mi wutnji ni Kristu a minjum kpiiri, koo ye tâa mi dii beengiya gi. ²⁰ Ti tâa miy gûyge ba, amma Kristu gûyge a tinîir mum. Jungci yey gûymi ni is mum gi, mi gûyrre a goosum di Hàm Fay. Ey yiɗimge, hîiye hak wàa ngam mum. ²¹ Miy gim hàanji mbâr Fay ba. Ngam to gòyrra ɗèm tâa go ngin ni yèk mgbèngda, ɗo Kristu wurre ɓa hû go.

¹ Kay, un ni-Galatiya ây, cèngnum jày kpâanuge, wun mboysunu hakkilo, dun nit ây lònirran dun a nis wun Yeesu Kristu wutke a minjum kpiiri gi ya? ² Jày kpolo gbè yiɗim cèngnum a gin wun: Un kpàaye Jungci Delliya a tèem yèk mgbèngda yi, koo a goosum di Kristu yi? ³ Kà kà kpâanu cèngnum jày ya? Un yiɗi gbèesum ni kpèw kpèw isi jày ɗaanu ni Jungci Delliya gi yi? ⁴ Jày kpètkunu pî tâanurre kà jàk ɓa hû go yi? Ge tâanu jàk ɓa hû go gbè ba. ⁵ Fay hîigunu Jungci Delliya, tèege jàk kayeefi ây a tîim wun, ey mbitɗe kà yey ngam un tèerre tèem yèk mgbèngda yi, koo ngam un goosu di Kristu yi? ⁶ Dii kètiya a defterre Fay, gàa a hak Abraham: Ey goosu di Fay, Fay de sagu nit gòyrra ɗèm. ⁷ Hû go cèngnin, a nit ây goosu di Fay aw tâage a hàm ta Abraham. ⁸ Defterre Fay gàa nà mgban, Fay gò ge gòyni daw ɗèm da nit ây èege yèk wàa, to aw goosu go, ye gàaw nà màrra yèk kâwrra di Abraham gi: Ni muy a nit dees ây pî gaw kpàa mbâri. ⁹ Kà yey a nit ây goosu di Fay aw dii mbârsumya ’mèmsa ni Abraham nit yey goose gi. ¹⁰ Amma a nit ây pî tèege tèem yèk mgbèngda gi, aw dii lètiya. Ngam gàa a defterre Fay: Koo wun tâa ti mòo jày pî tâage kètiya a defterre yèk mgbèngda, ha e tèe gi ba, tâa ge tâa lètiya. ¹¹ Ngam lòtiya ɗi, cen nirri ge kpàa gòyrra ɗèm a ɗàm kpees Fay ni tèerra tèem yèk mgbèngda ba. Gàa nà a defterre Fay: Nit yey gòyge ɗèm ni goosum gi, gû ge gûyi. ¹² Amma yèk mgbèngda ti gòy a goosum ba, kà yey gàa a defterre Fay: Nirri tèege jày gàa yèk mgbèngda gi, gû ge gûy ni erra. ¹³ Kristu sàasina a tâam lètiya a yèk mgbèngda, ye ire ey nit lètiya ngam worro gi. Gàa kà yey a defterre Fay: Koo wun tâage ɓitiya a kpiiri gi, dii lètiya. ¹⁴ Mbire hû go ngam ha mbâr yey kpàa Abraham, e dàara daw ni Yeesu Kristu da nit ây èege yèk Fay, ha orro ɗa ot ngor Jungci Delliya tâagina a mòonjum kàn ni Fay gi ni goosum. ¹⁵ Un kor ta mum, e rri yey mi yèenurre kày tâa a tîim nit ây. To nirri was go yèk wasta takundi, koo wuna ge kpàaw hàanjum yèk maan ba, koo e iisirra yèk kana ba. ¹⁶ Fay yèege yèk mòonjum kàn gi a hak Abraham ni yòot wàa. Ti yèe a «yòot ây», kà gàarra aw mûuye ba, amma yèe «a yòot wey» kà gàarra nirri kpolo, tâage Kristu. ¹⁷ Kà yey mi gàanurre, yèk wasta yey wase Fay takundi diga màrra gi, ge kpàaw mboyrra ni yèk mgbèngda, dàaga a dat yeri temèrre naan ni ra taan gi ba. Hû go yèk mgbèngda ɗa ge kpàaw inum yèk mòonjum kàn gi e tâa jàk ɓa hû go ba. ¹⁸ Ngam to jàk koyrra yey hîi Fay gi ana go ngin a yèk mgbèngda, ge tâa ngin a yèk mòonjum kàn ba. Amma Fay hîiwe mbâr wàa di Abraham ni mòonjum kàn. ¹⁹ Ɗo ngam jâ hîi Fay yèk mgbèngda gi ya? Ey iisirrage ngam jàk maarra nit ây, ha mgbàr yey ge dàara nit yey tâage yòot Abraham, yèe Fay a hak wàa ni yèk mòonjum kàn gi. A malayka ây aw hîige yèk mgbèngda nà a kàn nit raknjunum. ²⁰ Amma gayam nit raknjunum cen ngam nirri kpolo ba. Fay ey ɗi kpolo. ²¹ Kà yey yèk mgbèngda jàk yiirra ɗi a yèk mòonjum kàn yi? Ge tâa hû go ba sam! To Fay hîi go ngin yèk mgbèngda kana ge kpàaw gûynum di nirri, takundi nirri ge gòy ngin ɗèm ni yèk mgbèngda. ²² Amma yèk defterre Fay mòo daw da nit ây pî a mbinum jàk maarra, ngam ha a nit ây goosu gi, aw kpàa hîir yey hîi daw Fay ni mòonjum kàn a goosum di Yeesu Kristu. ²³ Ɗoko ye dàara jàk goosum gi, ot dii fantumya a kultuma yèk mgbèngda, ot waarre mgbàr yey ge lòrra jàk goosum. ²⁴ Hû go yèk mgbèngda ey tâage nà jàk nàta worro, yiɗi e ’maana a gin Kristu a dàarra wàa, ngam ha ot tâa nit gòyrra ây ɗèm ni goosum. ²⁵ Amma ye tâa jàk goosum gi dàarage, ot censirra bak a kàn jàk nàta gi ba. ²⁶ Un pî un hàm ta Fay ɗi, ngam un goosu di Yeesu Kristu. ²⁷ Ngam koo wuna a tîim wun kpàage baptisma, ’mèmse ni Kristu gi, ey mgbabe Kristu. ²⁸ Hû go censirra ’nang a tîim ni-Yude ni ni-riiy kana ba, a tîim sàay ni tiròom ba, a tîim nihun ni nikin ba. Un pî un ’mèmsi kpolo a gin Yeesu Kristu. ²⁹ To un tâa go nit ta Kristu, un dii ɗa yòot ta Abraham, kpàa gun kpàa jàk koyrra yey hîi Fay ni mòonjum kàn gi.

¹ De gàam kan, nit koyrra a jàk too wàa ye tâa hàm ɗi gi, ti hòmu di sàay ba, koo ye tâa jàk ây pî jàk ta wàa ɗi. ² Ngam dii tâarre a kàn nit tiɗàm kpees ây ni nit faarra jàk ây, ha unji yey gàa too wàa gi. ³ Kà yey orro ɗa ye tâana nà kà hàm ây, ot dii nà sàay a jàk mbinum ây a kparri. ⁴ Amma ye kpèrra mgbàr yey carre Fay gi, de tèera Hàm wàa kpàage a gin nikin, tâage ûunumya a yèk mgbèngda gi, ⁵ ngam e sàasi da nit ây tâage ûurriya a yèk mgbèngda, ha ot kpàa tâarra hàm ta Fay. ⁶ Ye tâa orro ot hàm ta Fay ɗi gi, de tèera Jungci Hàm wàa a tinîir worro, yey bimge e gàa «Abba» kà gàarra «Too mum». ⁷ Kà yey mu tâasirra sàay ba, amma mu hàm àay ɗi. To mu hàm àay ɗi go, hû go kpàa gum kpàa ɗa jàk koyrra a gin Fay. ⁸ Mgbàr maan ye tâa nà un cèngnu di Fay ba, un tèerre nà tèem sàay da fak ây tâa a fak takundi ây ɗi ba. ⁹ Amma kòsòng ye tâa un cèngnu di Fay gi, ndika mi gàa un dii cèngnumya a gin wàa, kà gun isi a jàk mbinum ây a kparri tâage dàngdiya yotiya, kà yiɗunu un ɗaasi tâam sàay a gin waw gi ya? ¹⁰ Ngam un iirre hakkilo wun ɗa a unji ây, ni wuta corri, ni mgbàr daprum, ni yeri! ¹¹ Mi tolle yèk wun. Hâta tèem mum a tîim wun jàk ɓa hû go ɗi yi? ¹² Un kor ta mum, mi waanurre, irin kà mum, ngam miy ɗa mi ire kà yey tâanu nà un mgban gi. ¹³ Un ɓaysi, mi saknu nà màrra Yèk Kâwrra, ngam àyci njanggim dikta a gin kana, de tâam a gin wun. ¹⁴ Ayci is mum tâagunu nà mu gàa jàk ndèkta gi. Koo hû go un raptim kà nit ɓa ba, un hàwim ba, amma un ngorim mbâra kà malayka Fay, koo kà Yeesu Kristu. ¹⁵ U hâ tâa kâwum wun kan kòsòng ya? Ngam mi gàanurre, mgbàr maan nà to un kpàaw go ngin, gun hòl ngin nis wun un hîimi. ¹⁶ Koo mi ire nit yiir wun kòsòng yi, ngam mi kàlnurre yèk takundi gi yi? ¹⁷ A nit ây kana aw hât dunde kàmda, naa ngam yèk mbâri, amma aw yiɗi aw ɗòlnjunu ni miy, ngam ha un ɗa un hât daw kàmda. ¹⁸ Takundi, dele to nirri hâtɗe go kàmda jàk mbâri, to hâtɗe go kàmda koo ningàa, naa ye tâanjim ni un gbè. ¹⁹ Un hàm ta mum, mi riirre ’màari ngam wun ha mi kpàasunu, kà nikin riige ’màari a kpàarra hàm, ha Kristu e ’mit a tinîir wun. ²⁰ Mi yiɗi ngin mi tâa a tîim wun kòsòng, mi yèenu ni mîrngi ’nangga. Ngam tinîiri taamde yèk wun. ²¹ Un nit ây tâage ûurriya a yèk mgbèngda gi, un rakɗe yèk mgbèngda ba yi? ²² Ngam dii kètiya a defterre Fay, gàa Abraham dii nà ni hàm nihun ây cuk, kpolo hàm wàa di kin tâage a tâam sàay, kpolo ngaa hàm wàa di kin tâage a tâam tiròom. ²³ Hàm wàa di kin yey tâage a tâam sàay gi, aw kpàawe ni gayam isi. Amma hàm wàa di kin yey tâage a tâam tiròom gi, dey aw kpàawe a mòonjum kàn ni Fay. ²⁴ Tisaga yey tâa kà jàk rèenjunum yèy. A nikin ây gi cuk gi aw rèenji ni jàk wasta ây cuk. Jàk wasta kpolo ana a gopri Sina, rèenji ni Agar kpàa a hàm ây a tâam sàay. ²⁵ Agar tâage gopri Sina ni yèk Arab. Getnji ni Yerusalem tâarra yey gi, ngam dii bak a tâam sàay ’mèmsa ni nit ta wàa. ²⁶ Amma Yerusalem faktiturum tiròom ɗi, ey tâage nuu worro. ²⁷ Ngam dii kètiya a defterre Fay, gàa: Mu kin duri tâa mu haa kpàarra hàm ba, kâwsi tinîir wey! Muy ye tâa mu haa rakta loca ròorra ba, ii yerem! Ngam a hàm ta wàa di kin yey woowfan gi, aw hòme daw mûurra da hàm ta kin yey tâage ni maa gi. ²⁸ Un kor ta mum, un hàm ây ɗi a yèk mòonjum kàn ni Fay kà Isak. ²⁹ Kà hàm yey kpàawan ni gayam isi ɗàaw nà ɗàari di hàm yey kpàawan ni Jungci gi, hû go tâa ɗa kòsòng. ³⁰ Amma ji gàa a defterre Fay ya? Gàa: Mànfa kin yey tâage sàay gi, ni hàm wàa, ngam ta hàm sàay e koyrra jàk koyrra ni hàm wàa di kin yey tâage a tâam tiròom gi ba. ³¹ Hû go un kor ta mum, ot tâa hàm ta wàa di kin yey tâage a tâam sàay gi ba, amma ot hàm ta wàa di kin yey tâage a tâam tiròom ɗi.

¹ Kristu inina a tâam tiròom, ngam ha ot tâa nit tiròom ây takundi. Hû go gòyin kpèw a tâam maan, ta aw insunu a tâam sàay gi ba! ² Miy mi Pawlu mi gàanurre, raksin: To un rrèpni go gi, Kristu ge mgbaanjunu koo jâ ba. ³ Mi gàanurre bak, koo wun rrèpni gi, ey ii hak wàa ha e tèe jày gàa yèk mgbèngda pî. ⁴ Un nit ây kàmge gòyrra ɗèm ni yèk mgbèngda gi, un ɗòlnji ni Kristu, un wòo mbâr Fay. ⁵ Orro ot nit ây kpàage Jungci Delliya, ot waatirre jàk dànda a gòyrra ɗèm ni goosum. ⁶ Ngam a ’mèmsum ni Yeesu Kristu, rrèpnum koo cen rrèpnum ge tèe koo jâ ba, sey goosum yey lòtke ni yiide. ⁷ Un dikɗe nà mbâra. Wun njanggunu futa yèk takundi gi ya? ⁸ Jày rûfin dun ti ana a gin Tooy ’naasunu gi ba. ⁹ Un cèngni, njàngna càa fâasi mûta jày pî. ¹⁰ Nitcoorra hîimi cèngnum a hak wun, gun dàn ’nang ni miy ba. Amma nit yey mboysunu hakkilo gi, koo wun ɗi ya, kpàa ge kpàa kiita. ¹¹ Amma miy, kor ta mum, to mi sakɗe go bak yèk rrèpnum gi, ngam jâ ɗàamin ɗàari ya? To tâa go ngin kà yey, gim hèenifa ngin jàk timgbòlnji a yèk wurra Kristu a minjum kpiiri. ¹² Ndika a nit ây mboysunu hakkilo gi, aw iisirra dikta ɗàm kpeesi ni tèem waw, aw cup jàk ta waw ɗa ni cupcu. ¹³ Un kor ta mum, Fay ’naasunu a tâam tiròom. Amma ta tâam maan e tâanu jàk mgbaanjum a gayam isi ba. Sey un tèe tèem yiide a tîim wun. ¹⁴ Ngam yèk mgbèngda pî gòye a yèk yey kpolo: Yiɗi nit tâanjum wey kà yey yiɗum hak wey. ¹⁵ Amma to un numjirre go, un riinjirre go isi, iin hakkilo, ta un mitnji ba! ¹⁶ Mi gàanurre, woon Jungci Delliya e nàtnu a dikri wun! Hû go gun goosi a gayam isi ba. ¹⁷ Ngam gayam isi yiiwrre di Jungci Delliya, Jungci Delliya ngaa yiiwrre di gayam isi. A jàk ây gi cuk aw haknjirre a tîim waw, ha gun kpàaw tèerra jày yiɗunu gi ba. ¹⁸ Amma to Jungci Delliya nàtnurre go, un censirra ûurriya a yèk mgbèngda ba. ¹⁹ Tèem gayam isi gi lòtiya ɗi. E tâage njeenu, ni tèem ’miskum, ni haanum tuy, ²⁰ ni coorra mâri, ni yèk dîw, ni yiiri, ni tilètnjum, ni ngèeri, ni ngòlnji, ni anda yèy, ni ɗòlnjum, ni futa ot ây ’nang ’nang, ²¹ ni gbokri, ni râmrum mbàl, ni mòorgum oca, ni jàk ây kana kà yey gi. Mi ɗàanurre kàlla kà yey gàanim dun nà diga mgban, a nit ây mbirge jàk ây gi gaw kpàa lekta a wûun Fay ba. ²² Amma jàk repta Jungci Delliya tâage yiide, ni kâwum tinîiri, ni tâam mbâri, ni èfta tinîiri, ni mgbergum yèy, ni mbita jàk mbâri, ni mòorra mbâra a tèem, ²³ ni fetkum tinîiri, ni mòosum hay. A jàk ây gi pî yèk mgbèngda kana cen. ²⁴ A nit ây ’mèmse ni Kristu gi aw gbale is waw ni jàk yiɗum waw, ni gayam waw ɗa pî a minjum kpiir wàa. ²⁵ To tâa go ot gûyrre ni Jungci Delliya gi, sey ot woow ɗa e nàtna a dikri worro. ²⁶ Ta ot ’misi hay a jàk ɓa hû go ba, ta ot anji tilètnjum ba, ta ot iinji ngèeri ba.

¹ Un kor ta mum, un nit ây tâage ni Jungci Delliya, to un kpàaw go di nirri mbitɗe go koo jàk maarra hâ, insuwan a ot mbâri ni fetkum tinîiri. Faasin hak wun, ta e rûfnu ɗa ba. ² Paanjinjin jàk titokri ta wun! Hû go gun tèeni ni yèk mgbèngda Kristu gi. ³ To nirri dànde go ni hak wàa ey gerre, amma takundi ti get koo jâ ba, rûfsirre hak wàa. ⁴ Amma sey koo wuna e gerru di hak wàa. Hû go kpàa ge kpàa ’mita ngam hak wàa gbè, ge tâa ngam nit kana ba. ⁵ Ngam koo wuna pî futɗe titokri tèem wàa. ⁶ Nit yey èngni a yèk Fay gi, sey e mîinji jàk ta wàa ni nit kàlnjum wàa. ⁷ Ta un rûfsi hak wun ba! Fay Fak tiwâskum ɗi ba. Jày còge nirri gi, jàk maan ge ribi. ⁸ To nirri còk go jày ge delu di is wàa gi, ri ge rip jàk raarriya a is wàa. To còk go jày ge delu di Jungci Delliya gi, ri ge rip gûyrra tâam timgbàri a Jungci Delliya. ⁹ Ta ot loo a tèerra jàk mbâri ba. Ngam to ot loo go ba, ri got rip a mgbàr yey carre Fay gi kpèrra go. ¹⁰ Hû go ye tâa ot kpàa orri gi, dàan ot tèe jàk mbâri da nit ây pî, sakkoma da kor ta worro a goosum. ¹¹ Raptin kukta jàk kèta yey kèrmifa dun ni kàn mum gi! ¹² A nit ây pî kàmge aw ndaknu un rrèpni gi, aw mbitɗe gbè kà yey ngam ha aw del a ɗàm kpees nit ây, ngam ta aw kpàa ɗàari a yèk minjum kpiir Kristu ba. ¹³ Koo ye tâa aw a nit rrèpnum ây ɗi gi, aw ni hak waw aw mòorre yèk mgbèngda ba, amma aw yiɗi un rrèpni ngam ha aw ’misini hak waw yèk is wun. ¹⁴ Miy ta e tâam kà yey ba, ngam ta ’misum mum e tâam a jàk kana ba, sey a minjum kpiir Yeesu Kristu Nitcoorra worro. Ye tâa ey wurre a minjum kpiiri gi, kparri tâamde wutiya, miy ɗa mi dii wutiya ngam kparri. ¹⁵ Ngam rrèpnum koo cen rrèpnum ge sak koo jâ ba, sey ita nit fûuya, yey inu Kristu e tâa nit fûuya gi. ¹⁶ Tâam mbâri ni ’maton Fay e tâa daw da nit ây pî futke ot yey gi. E tâa daw ɗa hû go da ni-Israyel ây takundi, tâage nit ta Fay. ¹⁷ Kòsòng ta nirri e loosisimda bak ba, ngam ticèngsunum ’màar Yeesu dii a is mum. ¹⁸ Un kor ta mum, mbâr Yeesu Kristu Nitcoorra worro e tâanji ni un pî a tinîir wun! Amen.